Daigiw Siuiongw Qongxue

(Qauw-jap-id) Uanwhun ee simqnuax diyhh jnuaxngiu jiacc e byy .kir

Vutlun simxmic, lanw soxx congr ee dairjir, berdid tangx jiauww lanw ee iwguan. Jinjniar qankow ee sii, diyhh sniu dirr jitt sewqanx iarr u viw lanw qyckacc qankow ee langg. Narr erhiauw tangx sniu jitt kuanw, hitt xee uanr tnix uanr de ee simqnuax, jurzenn e siaubyy .kir. Iaxx arr lanw ee simqnuax jin’ sen jin’ iar, byy air ingrqongx ee sii, iarr diyh’air sniu dirr jitt xewqanx, jaijingg hagbun viw lanw qyckacc hyw ee langg iarr vutjiw je. Narr erhiauw did sniu jitt kuanw, lanw ee jingsinn diyrr jurzenn e hunwhuad, sniu zinrjinx ingrqongx, m qnaw vindnua.

(Qauw-jap-zi) Diong guerquanx vutqib diong lueriongg

Tyhuex lixhuew, suiw kiokk si jin’ suiw, mrquxx byy quxdngg, liamvnix e sia .kir. Cingvec suisi byy kuix huex, jid’err knuar dy’ byy suiw, mrquxx ciurhiyc qui’ nii cnix cnix, ciurqix ee kuanxsid lingrgua u jit jxingw ee cuwbi, jin’ qensit, qycc u quiwkir. Qetqiok, tyliw guerquanx suizenn si suiw, m dat diyc cingvec lueriongg ee qensit. Iaxx arr juixlaii angki, jiac liauw dy’ arr hyw jiac, mrquxx kacc m dat diyc qamx-aw bundanr u jit jxingw ee hongbi. Hra sidjai diong guerquanx vutqip diong lueriongg, air jaxsiur vutzuu air buanxsingg.

(Qauw-jap-snax) Druar oamr diongx jiacc jaix qongbingg ee jinx qrer

Vingsor druar dirr Zidvunw qog-lai, diyrr m jai’ngiaw lanw qog ee hyw .cxur. Narr jid’err cud kir haixgua, knuar vadd qog ee sidjingg, diyrr jaix lanw qokbinn-jingsinn ee hongbin kacc ngiaa guarqog ee soxjai. Iaxx arr vingsii lanw langg narr jiamr did kacc quann ee derui, iarr m jai’ngiaw hitt xee derui ee guihiamw. Narr jid’err kir jiac kacc vijen ee taulo, diyrr e jaix hitt xee dua derui ee guihiamw. Qapp jex siangg lixkir, diyrr si dirr hitt kacc amr ee soxjai, jiacc e jaix kacc qngx ee soxjai, qng qaxx sniaw kuanw. Iurr cincniu lanw langg kir unxqux kia druar hitt snuanaa-lai, jiacc tangx jaix sewqanx ee langg dagg xee zet putpud decc uahdang, kir congr dairjir sniu’ quer lysimx. Iurr qig diam diam, jiacc jaix qau ue ee langg qanda’ e caxla byy loring. Cincniu jitt kuanw, qongw derui ee quanqe, soxjai ee qng’amr, hingdong ee jingrdong, genguw ee jerjiyw, vixqaur laii knuar, diyrr hro langg u tangx hiauxgo ee soxjai.

(Qauw-jap-sir) Qnuaqaiwlangg cam’ binqanlangg ee taiwdo

Juer qnruax ee langg m na qongw vran qongbu diyh’air jabhunx ee jimjiog, suisi qanda’ siaw jit dniux puex beh hro .langg, iarr jongw diyh’air u huncunr, jit xee tingdo jiacc ersaiw .did. Si in’ui qniax liauw hitt xee siauxzinvuer, knuar hitt dniux puex ee quwdau, gorqaiw lanw ee simsu, suacc beh laii iauwqiuu dairjir, knuar u tangx hiauhing did diyc simxmih lirig, soxiw diyh’air jimjiog jiacc hyw. Iaxx arr byy druar qnuaqair ee langg, m tangx sniu’ quer jurqyx. Narr si sniu’ quer jurqyx, vadd langg diyrr suar m qnaw cinqun .lanw. Jongw diyhh ing unhyy ee taiwdo, h.-hnuahiw-h., snaqab qongxue, jiong’ iuxgidig qapp ix cinbit jiacc hyw.

(Qauw-jap-go) Diyhh andnia qaqi ee simqnuax

Niguec vunxdew si quxdngg :ee. Mrquxx langg narr sniu’ byy ingg, iarr si decc akjag, diyrr sniu qongxx nii guec zit jin’ dew, jin’ kuair quer. Tnide guanlaii jin’ kuah jin’ dua, byy jit hxang mic byy hro ix vau’iongg .did. Mrquxx narr simde ehdew ee langg, ix diyrr sniu qongxx tnide jin’ ser. Iurr cincniu cuntnix ee huex, hartnix ee hongx, ciutnix ee guec, dangtnix ee seh, qongqingw vunxjniaa si jin’ cing’iux, hro langg knuar diyc jin’ cingsongw. Mrquxx simqnuax decc huanlyw ee langg, ix knuar liauw m na longxx byy songxkuair, dendyww qongxx ziaw kiw huanlyw. Soxiw lanw langg derr id iauwqinw dy’ si andnia qaqi ee simqnuax.

(Qauw-jap-lak) Lanw langg diyhh qriuu ingxuanw jinx ee kuaiwlok

Guaw knuar sewqanx ee langg, poxtongx soxjai hnuahiw tiongwlok si simxmic? Erdid tangx jiauww lanw simqnuax soxx air diyrr si hnuahiw, jiong’ lanw ee jing’iok erdid tangx hro ix buanxjiog diyrr si tiongwlok. Simqnuax sniu beh hro ix buanxjiog, uirr anixnix, dendyww ix ee sinkux ham lyc qankow ee qingxgu. Narr si bad dyrliw ee langg, ix jiong’ berdid tangx hro ix buanxjiog qaqi ee jing’iok laii decc tiongwlok. Uirr anxnix, ix vutsii qamguan decc qankow. U jitt kuanw ee simqnuax jiacc huanxdngw u tangx did diyc jinx ee kuaiwlok. Jitt xee jinx ee kuaiwlok si ingxuanw :ee, jitt xee jurr jing’iok laii ee tiongwlok si jidsii :ee. Sewqanlangg nacc m vangwsag jidsii ee tiongwlok, kir qriuu ingxuanw jinx ee kuaiwlok?

(Qauw-jap-cid) M tangx cab siauxzinn iurr m tangx vaqed qunjuw

Cincniu hitt kuanw siauxzinn, lanw longxx vutdid cab .ix. Lanw narr cab .ix, qapp ix duiwciuw, ix diyrr e kiyc’uanr, jin’ m dat. Siauxzinn ee langg jin’ qauxquair. Lanw narr tin .ix diyrr zuxx hyw kuanw, beh tiaulann .lanw, beh kiaukow .lanw. Iarquxqnaw vutzuu lanw m tangx qapp ix jiapqun, hro ix byy kangpang tangx cngx .zip .laii derr id an’unw. Siauxzinn duiww siauxzinnn, ix dniardiyc u siang lui ee langg tangx cam’ ix duiwdik. Iaxx arr lanw duiww qunjuw ee langg, dikkag m tangx kir vaqed .ix, povaii .ix. Hitt xee qunjuw ee simqnuax jin’ qongvnii, jin’ damrvok, longxx byy jit diamw aw supenx. Soxiw lanw qyckacc gauu vaqed, ix dniardiyc byy beh digvet kuanxtai .lanw, byy digvet unhui beh hro .lanw. Lanw ingwqaix diyhh jiauww jingwgi ee simqnuax qapp ix jicjiab jiacc hyw.

(Qauw-jap-veh) Cruw diong’iongg ee dy laii qniaa derr id hyw

Lanw langg druar dirr sewqanx, cam’ siarhue ee langg qiongrdongg sing’uac, juanzenn tranr sewsiok qapp ix siangg kuanw iarr m tangx, iacc juanzenn qapp inx duiwhuanw iarr m tangx, diyhh cruw hitt xee diong’iongg laii qniaa jiacc ersaiw .did. Cincniu siujuiw, u jit xee tingdo, m tangx sniu’ puu, iarr m tangx sniu’ dimm. Iaxx arr beh juer dairjir ee sii, m tangx hro langg’ iar, iarr m tangx hro langg’ hnuahiw. Jex si anwjnuaw? Beh congr dairjir, bylun simxmih surgiap, qanda’ ing lanw qaqi jit xee langg ee kuiwlat juer be qaur, jongw diyh’air kyr jin’ je langg ee kuiwlat. Narr si beh ing je langg diyrr m tangx hro ix iar. Mrquxx beh hro juanvo ee langg hnuahiw, hex iarr si byy ngwbang, qanda’ huir liauw qaqi ee jingsinn, lryy zii buqongx. Soxiw lanw dikkag diyhh dikdiongx laii qniaa jiacc erdid tangx singqongx.

(Qauw-jap-qauw) Sniu’ jetkiam iarr m hyw, sniu’ kiamsunr iarr m hyw

Jetkiam suisi hyw, narr si quer tingdo diyrr suar vnir juer qenlin, vnir juer siauxpixlenw, huanxdngw e pywhuai jingwdy. Qongw kiamsunr iarr si hyw. Jongw si narr sniu quewtauu diyrr suar vnir juer duwqiongx, vnir juer kiauqinw, dyww m hyw. Jitt xee juwqiongx cam’ kiauqinw nng qxur ue, si Kongxhujuw qongw ee qiongqingr cam’ qinxsin, longxx sniu’ quer tingdo .kir. Cincniu qoxjaw Loxqog ee dairhux, Quiwsunx, Sioksunx, Bingrsunx, inx hiaxee langg hitt kuanw ee taiwdo, hitt kuanw ee hing’uii iarr ersaiw did qongw juwqiongx kiauqinw. Dairkair jurr imboo ee iaxsimx cud .laii qyckacc m hyw.

(Jit-vah) Jikvi vadd langg cam’ jikvi qaqi ee huatdo

Vadd langg u juer m driyc, lanw air beh qra ix jikvi ee sii, iarr m tangx itbi qongw ix ee quewsid, jikvi sniu’ tiamw. Jongw diyhh unn unn aw krngr .ix, qar ix honghuad, qiyr ix anwjnuaw juer, au vaiw jiacc be qycc m driyc. Narr anxnix, hitt xee langg iarr dniardiyc be uanwhun, dendyww e qamxsia lanw ee hyw ir. Iaxx arr beh jikvi lanw qaqi, diyhh tranr iauxx bue u quewsid ee sii, jaiwsnax huanxsingw, sniu knuar qqai dyc’ui aw u quewsid iacc byy. Narr erdangr cincniu jitt kuanw, benw qniax lanw qaqi u juer m driyc. Lanw ee dikhing, zuxx siulen zuxx hiongwsiong. Jex diryr si beh jikvi vadd langg qapp jikvi qaqi ee huatdo.

(Jit-vah-kxongr-id) Cuir si simqnuax ee mngg, ir si simqnuax ee kavo

Lanw simqnualai soxx sniu ee dairjir, air beh huativuaw, longxx si kyr jitt xee cuir. Soxiw cuir hy juer simqnuax ee mngg. Jitt xee simqnuax ee mngg, vutsii diyhh qor jin’ giamm jiacc hyw. Narr byy, simqnualai u jit xee jin’ ywbiau, jin’ qibit ee jok’iong, suacc e lrau .cud .laii. Hro langg’ jai’ngiaw, hex diyrr e gro su. Iaxx arr jitt xee iwsig, diyrr si simqnuax ee kavo. Vutsii diyhh jabhunx dniudii, s.-siongser-s. qra ix sniu. Narr byy, qniax qnir qniaa duiww vnix:a ee siyw lo kir diyrr jin’ hai lar. Jongw qongw diyrr si qongxue diyhh qinxsin, iwsig diyhh juxser.

(Jit-vah-kxongr-zi) Diyhh jiauww tnide ee iwsur jiacc hyw

Tnix ee iwsur, si dui’ jingwlangg ee lairdew qingw quiw xee aw hro ix jin’ congbingg, beh qiyr ix kir jixdy jingwlangg, qauwhuew jingwlangg. Mrquxx ix longxx m jaix qamxsia tnide ee iwsur, ix qai ee jikzim vangr hro byy iauwqinw, huanxdngw kyr ix ee jaijingg, ma langg’ byy jaidiau, vutdiongwiong. Iaxx arr tnix ee iwsur, si dui’ jingwlangg ee lairbin, qingw quiw xee aw hro ix jin’ hyxgiac, beh qiyr ix kir qiuwjer jingwlangg. Jongw si ix longxx m jaix textiab tnide ee iwsur, dendyww kyr ix qaqi ee huwlik, laii beh jautad sanwhionglangg. Cincniu inx byy jiauww tniir, qaur buew tniqongx diyrr dniardiyc beh jikvi .ix.

(Jit-vah-kxongr-snax) Sniu’ qysiong iarr m hyw, sniu’ qipqig iarr m hyw

Pixlun snuax kacc quann qycc sniu’ qia ee soxjai, ciurbak diyrr kacc be huat’iok. Siwuii kniqaux kacc qe ee soxjai, cauw-aw ciurbok jin’ je jin’ am. Iurr cincniu keluar hionglauu ee soxjai, hii-aw kacc jiyw. Cincniu lxua-buew ee txamm-aw juiw cimx ee soxjai, dua buew hii dua jiah vih jin’ je longxx si druar dirr hiax. Jiauww anxnix laii knuar, lanw langg ee hing’uii, narr sniu’ qysiong iarr m hyw, lanw langg ee simqnuax, sniu’ qipqig iarr m hyw. Juer qunjuw ee langg, diyhh bad jitt diauu jingliw, dua dua qingxqair jiacc ersaiw .did

(Jit-vah-kxongr-sir) Diyhh knuar taur hitt xee lueriongg

Lanw langg knuar mic diyhh erhiauw knuar cud hex si jinx :ee iacc si qew :ee jiacc hyw. Cincniu cuntnix qaur, vah huex kuix liauw jin’ suiw, jiauw-aw tii, hitt xee snia’imx jin’ hyw tniax, muaw snuax muaw iaw, cuntnix ee qongqingw huisiongg suiw. Jongw si hitt xee suiw si jngsig :ee, si qaxjongx :ee, diyrr si jidsidig ee huanwqingw, m si tenzenn ingxqiuw :ee. Narr si qaur cxiux cimx ee sii, cauw-aw ngg, ciurhiyc dax, juixser lyc, jiyhsnuax hen, jniawsi hen cud tnide ee sidjai qongqingw. Lanw langg m tangx qanda’ diong guarquanx, rair knuar taur hitt xee lueriongg. Lanw langg diyhh jaix tangx diwdiong ingxqiuxdig, m tangx diwdiong jidsidig, jiacc erdid jaix ingxqiuxdig qapp jidsidig ee hunved.

(Jit-vah-kxongr-go) Qniaqii birbenw u siongduat ee simx

Kir diyr hii ee langg, jid’err knuar ix longxx byy sniu diyc sewqanx ee bingli, simqnuax jin’ cing’ingg ee kuanw, jongw si iauxx birbenw did u quaw satsingx ee krir dilehh. Iaxx arr hitt xee qniaqii, iuhir ee diongqanx ersaiw did qongw vutjiw cing’ingg ee kuanw, mrquxx iauxquxx u quaw jingduat ee simqnuax dilehh. Lanw beh congr dairjir iarr si cincniu jitt kuanw. Beh congr, suizenn aurlaii u dua hibang dilehh, mrquxx kixtauu decc congr, iarr birbenw diyhh huir simx. Huanxx si byc did juer kacc benw huanlyw. Iaxx suizenn si viw vadd langg kacc u jailingg, mrquxx langg qongw gauu :ee sriu jin’ je ee giaa. Iaxx arr qongw iongzinn dyx horhog, u jaijingg :ee viw byy jaijingg :ee dendyww kacc qankow.