Samuel I

1 Eflaim ee snuade ee Rlamah, u jit xee Eflaimlangg, miaa qiyr Elkanah, si Zuf ee guansunx, Tohu ee jingsunx, Elihu ee sunx, Jeloham ee qniaw.

2 Ix u nng xee bow, jit xee miaa Hannah, jit xee miaa Peninnah; Peninnah u qniaxzii, Hannah byy qniaxzii.

3 Jitt langg dagg nii dui' ix ee vunxsniaa jnriu kir qaur Siloh beh qingwvair, iarr beh jewsu banrqunx ee Jehovah. Eli nng xee qniaw Hofni qapp Finehas dirr hiax juer Jehovah ee jewsix.

4 Elkanah henwjer ee zit, vunx jewbah hro ix ee bow Peninnah, qapp ix ee qniaw jaboxqniaw;

5 Vunx hro Hannah :ee si siangx hxun, in'ui ix tniar Hannah; danrsi Jehovah qnuaibat ix ee txex.

6 Qapp ix juer duiwtauu ee Peninnah dua dua qig ix, beh hro ix iubun; in'ui Jehovah qnuaibat ix ee txex.

7 Inx ninii jnriu qaur Jehovah ee cur ee sii, Peninnah iuguann qig ix; ix dyrr tikaur, suar m jiac.

8 Ix ee diongrhux Elkanah qra ix qongw, "Hannah ar, liw sniaw su tikaur? Sniaw su m jiac? Sniaw su simx iubun ar? Guaw duiwdirr liw qamxx byy viw jap xee qniaw kacc hyw mah?"

9 Inx dirr Siloh limjiac liauxau, Hannah dyrr kiw .laii. Jewsix Eli dirr Jehovah ee dxen ee mngkia vnix jre dirr ix ee xui.

10 Hannah ee simlai iukow, qidyw Jehovah, dua tikaur, he guan qongxx,

11 "Banrqunx ee Jehovah ar, Liw narr qyxzenn knuawqor Liw ee luxvi ee qanlann, qycc siauwliam guaw, byy be qir did Liw ee luxvi, cniaw sniuxsur Liw ee luxvi snix davoqniaw. Guaw beh hro ix qruix dirr Jehovah qaur jit siwlangg, tiwtaudyx byy qaur ix ee taukag."

12 Hannah dirr Jehovah ee binrjingg diddit qidyw ee sii, Eli juwbak knuar ix ee cuir.

13 Dnaxx Hannah simlai jing jing qriuu, jixu cuiwdunn dinxdang, byy tniax qnir sniax, soxiw Eli liac juer ix si jiuxjuir.

14 Eli qra ix qongw, "Liw beh juir qaur dirsii ar? Liw m tangx qycc limx jiuw."

15 Hannah rinr qongxx, "Guaw ee jruw ar, m si anxnix. Guaw si simlai iukow ee hurzinlangg, vyc jiuw qau jiuw guaw longxx byy limx; dogdok dirr Jehovah ee binrjingg tror cud simjingg.

16 Byc did liac liw ee luxvi juer pnaiw dikhing ee hurluw, in'ui guaw qaur dnaxx duiww guaw ee dua iubun siurr qikkir laii qongw."

17 Eli rinr ix qongxx, "Liw tangx ving'anx dyr .kir; guan Islael ee Siongrder unjunw liw soxx duiww Ix qriuu :ee."

18 Hannah qongw, "Guan liw ee luxvi did diyc xunx dirr liw ee binrjingg." Hurzinlangg dyrr dyr .kir, laii limjiac, dyrr byy qycjaiww dair iusiongx.

19 Qeh zit inx jaw jaw kiw .laii, dirr Jehovah ee binrjingg qingwvair, dyrr dyr kir Rlamah, qaur ix ee qrex. Elkanah qapp bow Hannah dangvangg; Jehovah siauwliam Hannah.

20 Hannah dyrr huai'in; qaur sii dyrr snix jit xee qniaw, qra ix hy miaa qiyr Samuel, qongw, "Jex si guaw duiww Jehovah qriuu :ee."

21 Elkanah qapp ix ee tongqex longxx jnriu kir Siloh, beh ing dagg nii ee jewsu qapp ix soxx he ee guan henr hro Jehovah.

22 Danrsi Hannah byy jnriu .kir. Ix qra ix ee diongrhux qongw, "Tingwhau ginxaw dng linx, guaw dyrr duar ix jnriu .kir, hro ix diauqnir Jehovah, ingxuanw diamr dirr hiax."

23 Ix ee diongrhux Elkanah qra ix qongw, "Jiauww liw soxx knuar juer hyw :ee laii qniaa, tangx tingwhau ginxaw dng linx; danrsi guan Jehovah ingwgiam Ix ee ue." Dui' anxnix hurzinlangg dirr qrex-lai riyx qniaw, qaur dng linx.

24 Ixqing’ qra ix dng linx, dyrr cua ix snaqab jnriu Siloh, qaur Jehovah ee cur; qycc duar snax jiah guqangw, jit efah iur ee mirhunw, jit puede jiuw. Hitt sii ginxaw iauxx ser hanr.

25 Inx taii jit jiah guqangw, dyrr cua ginxaw qaur Eli ee binrjingg.

26 Hurzinlangg qongw, "Guaw ee jruw ar, guaw qiw liw ee uahmia laii jiuwjua, guaw ee jruw ar, jingg kia dirr liw jiax, qiqiuu Jehovah :ee, hitt xee hurzinlangg dyrr si guaw.

27 Guaw qriuu beh did diyc jitt xee ginxaw, Jehovah ixqing’ sniuxsur guaw soxx duiww Ix qriuu :ee,

28 Soxiw guaw ing jitt xee ginxaw hingg Jehovah, ix jit siwlangg hingg Jehovah." Dyrr dirr hiax qingwvair Jehovah.

2 Hannah qidyw qongw:

Guaw ee simx in'ui Jehovah laii kuaiwlok,

Guaw ee qag in'ui Jehovah laii giac quann;

Guaw ngr duiwdik qnaw qongw duarue,

In'ui guaw uirdiyhh Liw ee jinxqiur laii hnuahiw.

2 Byy u sxingr :ee cincniu Jehovah;

Liw ixgua byy vadd xee;

Iarr byy jiyhvnuaa cincniu lanw ee Siongrder.

3 Linw m tangx jurkuax qongw qiaugno ee ue;

Iarr m tangx hro lamrsamw ee ue cud liw ee cuir;

In'ui Jehovah si diwsig ee Siongrder,

Langg ee qniajuer hro Ix puepingg.

4 Iongxsu ee qringx ixqing’ atjic;

Diyhdag ee langg ing kuiwlat haa iyx.

5 Vaxjiog :ee, hro langg cniar laii tanwjiac;

Iaux :ee, byy qycc iaux;

Be sing'iok :ee, snix cid xee qniaw,

U jerje qniaw :ee, huanxdngw sueziok.

6 Jehovah hro langg siw, iarr hro langg uac;

Hro langg lyc imqanx, iarr hro langg kiw .laii.

7 Jehovah hro langg songwhiongx, iarr hro langg hyxgiac;

Hro langg qangwqe, iarr hro langg singquann.

8 Ix dui' din'aix singquann songwhionglangg,

Dui' vunwsywduix qysingx kiamwkueh ee langg,

Hro inx qapp siuxlingw snaqab jre,

Suawjiab ingqngx ee jyrui;

In'ui de ee tiau sriok dirr Jehovah,

Ix jiong' sewqair andir dirr hitt dingxbin.

9 Ix beh vyxsiuw Ix sxingr :ee ee kax,

Hro pnaiw langg dirr oamr diongx jing cauccauh;

In'ui langg uaxkyr kuiwlat be e kacc ngiaa.

10 Qapp Jehovah sna' jnex :ee beh siurr paccuir;

Ix beh dui' tnix ing luii pah ix;

Jehovah beh simxpnuar de ee qigtauu;

Sniuxsur kuiwlat hro Ix ee ongg,

Quxkiw Ix siurr buah iuu :ee ee qag.

11 Elkanah dyr kir Rlamah qaur ix ee qrex. Hitt xee ginxaw dirr jewsix Eli ee binrjingg hogsai Jehovah.

12 Eli hiaxee qniaw si huixlui, m bad Jehovah.

13 Jewsix dirr vecsnir ee le, dyrr si qniwnarr langg henwjer decc juw bah ee sii, jewsix ee lovok dyrr laii, ciuw giac snax ziauw ee cxex,

14 Ing cxex cah zip vxuah, iacc si dniaw, iacc si ticdiy, iacc si uex, qniwnarr soxx cxex .cud .laii ee bah, jewsix longxx tec juer qaqi ee. Inx dirr Siloh cinnciu anxnix kuanxtai qniwnarr laii hiax ee Islaellangg.

15 Qycc dirr bue siyx iulaa ee dairsingx, jewsix ee lovok dyrr laii, qra henwjer ee langg qongw, "Liw diyhh ing bah hro jewsix tangx vig, in'ui ix m rair liw quer juw ee bah, si rair cnrex :ee."

16 Hitt langg narr duiww ix qongw, "Beh dairsingx siyx iuu, zen'au tangx jiauww liw ee simx soxx rair tec .kir.' Ix dyrr qongw, "M ar, jitt diap diyhh hro guaw; narr m, guaw beh qiongg tec .kir."

17 Anxnix hiaxee siauwlenlangg ee jue dirr Jehovah ee binrjingg jin' dang; in'ui inx iamwngor Jehovah ee jewsu.

18 Hitt sii Samuel iauxx sewhanr, cing iuwduervor ee efod, dirr Jehovah ee binrjingg hogsai.

19 Qycc ix ee laurbuw dagg nii qra ix juer jit niaw ser niaw ee dngg snxax, qapp ix ee diongrhux jnriu laii henr nijer ee sii, duar laii hro ix.

20 Eli qra Elkanah qapp ix ee bow jiokhog, qongw, "Guan Jehovah duiww jitt xee hurzinlangg qycc sniuxsur liw horer, laii ter soxx hingg hro Jehovah :ee." Inx dyrr dyr kir vunxsoxjai.

21 Jehovah knuawqor Hannah; ix dyrr huai'in snix snax xee qniaw; nng xee jaboxqniaw. Ginxaw Samuel iarr dirr Jehovah ee binrjingg jiamrjiam duarhanr.

22 Eli jin' lau, tniax qnir ix ee qniaw duiww Islael jingwlangg soxx qniaa itcer ee su, qycc tniax qnir inx qapp huerbo mngg-jingg juewqangx ee hurzinlangg sutongx.

23 Ix dyrr qra inx qongw, "Linw sniaw su qniaa jiaxee su ar? Guaw dui' jiaxee jiongww vecsnir tniax qnir linw soxx qniaa ee pnaiw.

24 Guaw ee qniaw ar, m tangx anxnix. Guaw soxx tniax .qnir ee hongsniax si m hyw. Linw hro Jehovah ee vecsnir huanrjue.

25 Langg narr dikjue langg, Siongrder simxpnuar ix; langg narr dikjue Jehovah, jirjui ter ix qidyw?" Danrsi inx m tniax laurve ee ue; in'ui Jehovah jun'ir beh taii inx.

26 Ginxaw Samuel jiamrjiam duarhanr, did diyc Jehovah qapp langg naxx tniar ix.

27 U Siongrder ee lovok laii qnir Eli, duiww ix qongw, "Jehovah anxnix qongw, 'Liw ee joxqongx ee qrex, jingg dirr Egipt Falaoh ee qrex juer lovok ee sii, Guaw qamxx byy duiww ix cuthen mah?

28 Guaw qamxx byy duiww Islael jiongww jipair, qingw ix juer Guaw ee jewsix, dirr Guaw ee dnxuaa-dingw henwjer, siyx hniux, cing efod dirr Guaw ee binrjingg; Ixlael-jok soxx henr ee huexjer, Guaw qamxx byy longxx hro ix ee joxqongx ee qrex mah?

29 Guaw soxx bingrling ee jewsu lexmic, dirr Guaw kiarkiw ee soxjai :ee, linw sniaw su tunxdac ix, jundiong liw ee qniaw kacc quewtauu jundiong Guaw, ing Guaw ee vecsnir Islael soxx henr siongrr hyw ee lexmic, laii qaqi vuii ar?'

30 Soxiw Jehovah, Islael ee Siongrder qongw, 'Guaw sidjai bad qongw, liw ee qrex, liw ee laurve ee qrex beh ingxuanw qniaa dirr Guaw ee binrjingg.' Danrsi dnaxx Jehovah qongw, 'Guaw quatduanr m anxnix; in'ui jundiong Guaw :ee, Guaw beh jundiong ix; biauxsi Guaw :ee, ix beh siurr knuawkinx.

31 Knuar ar, zidjiw beh qaur, Guaw beh jam dng liw ee ciuxqud, hro liw ee qrex-diongx byy jit xee laurlangg.

32 Dirr Siongrder hro Islaellangg hiongxhog ee sii, liw beh knuar qnir liw ee cur ee suevai; dirr liw ee qrex-diongx beh ingxuanw byy jit xee laurlangg;

33 Sriok dirr liw ee langg, Guaw byy dui' Guaw ee dnxuaa jaubet :ee, beh pah pnaiw liw e bagjiux, iusiongx liw ee simx; liw qrex-diongx soxx qycc snix ee langg, longxx beh dionglenn dyrr siw;

34 Liw nng xee qniaw Hofni qapp Finehas soxx duw .diyc .ee, beh juer liw ee diaurtauu; inx nng langg beh qangg jit zit siw.

35 Guaw beh uirr qaqi lip jit xee jinrdiongx ee jewsix, ix beh jiauww Guaw ee simx, Guaw ee ir laii qniaa; Guaw beh uirr ix qenwlip qenqor ee qrex; ix beh ingxuanw qniaa dirr Guaw soxx buah iuu :ee ee binrjingg.

36 Liw ee qrex soxx cunx ee langg longxx beh laii quirvair ix, qriuu jit xee ginn, jit xee vniaw, qongw: Qriuu liw hro guaw drng jewsijid ee jit xee, hro guaw tangx did diyc damrvyc vniaw laii jiac.'"

3 Ginxaw Samuel dirr Eli ee binrjingg hogsai Jehovah. Dirr hitt sijun, Jehovah ee ue jin' hihanw, byy siongsiongg u kexsi.

2 Jit zit Eli dirr qaqi ee soxjai kunr, ix ee bagjiux ixqing’ bu, knuar be bingg.

3 Siongrder ee dingx iauxx bue huax, Samuel ixqing’ dirr Jehovah ee dxen, dirr Siongrder ee iokqui hiax decc kunr.

4 Jehovah qiyr Samuel; ix rinr qongxx, "Guaw dirr jiax."

5 Dyrr jauw qaur Eli hiax, qongw, "Guaw dirr jiax, in'ui liw qiyr guaw." Ix rinr qongxx, "Guu byy qiyr liw, liw dyr kir kunr." Ix dyrr kir kunr.

6 Jehovah qyrr qiyr Samuel; Samuel kiw .laii, kir Eli hiax, qongw, "Guaw dirr jiax. In'ui liw qiyr guaw." Ix rinr qongxx, "Guaw ee qniaw ar, guaw byy qiyr liw, tangx qycc kir kunr."

7 Hitt sii Samuel iauxx bue bad Jehovah, Jehovah ee ue bue u kexsi ix.

8 Jehovah derr snax vaiw qiyr Samuel. Samuel kiw .laii, kir Eli hiax, qongw, "Guaw dirr jiax, in'ui liw qiyr guaw." Eli jiacc jaix si Jehovah qiyr ginxaw.

9 Dui' anxnix, Eli qra Samuel qongw, "Liw qycc kir kunr. Ix narr qycc qiyr liw, liw dyrr qongw, 'Jehovah ar, cniaw Liw qongw, Liw ee lovok decc tniax.'" Samuel dyrr kir ix ee soxjai kunr.

10 Jehovah qycc laii kia lehh, cincniu jingg quixnarr vaiw qiyr, "Samuel ar, Samuel ar." Samuel rinr qongxx, "Cniaw qongw, Liw ee lovok decc tniax."

11 Jehovah qra Samuel qongw, "Knuar ar, Guaw dirr Islael diongx beh qniaa jit hxang su, hro tniax .qnir ee langg, nng xee hnirkangx beh diy .kiw .laii.

12 Guaw lun Eli ee qrex soxx qongw :ee, qaur hitt zit tauu qaur buew Guaw beh ingwgiam dirr ix.

13 Guaw bad qra ix qongw, Guaw beh uirdiyhh ix soxx jaix ee jue, ingxuanw simxpnuar ix ee qrex; in'ui ix ee qniaw qaqi jiyx jiuwjow, ix iarr byy qimwjiw inx.

14 Soxiw Guaw u duiww Eli ee qrex jiuwjua qongxx, 'Eli ee qrex ee juerquar, suizenn jewsu lexmic, ingxuanw be e sioghuee.'"

15 Samuel kunr qaur tnix qngx, dyrr kuix Jehovah ee denrmngg. Samuel m qnaw jiong' ngirsiong qra Eli qongw.

16 Eli qiyr Samuel, qongw, "Guaw ee qniaw Samuel ar."

17 Ix rinr qongxx, "Guaw dirr jiax." Eli qongw, "Jehovah duiww liw qongw simxmih? Qriuu liw m tangx unxmuaa guaw; narr jiong' Ix soxx qra liw qongw :ee duiww guaw unxbat jit qxur, guan Siongrder qavue jikhuat liw."

18 Samuel dyrr jiong' hiaxee ue longxx qra ix qongw, iarr byy duiww ix unxmuaa. Eli qongw, "Si Jehovah, guan Ix jiauww Ix soxx knuar juer hyw :ee laii qniaa."

19 Samuel jiamrjiam duarhanr. Jehovah qapp ix dilehh, hro ix soxx qongw :ee, byy jit qxur byy ingwgiam.

20 Dui' Dan qaur Beerseba, soxu ee Islaellangg longxx jaix Samuel siurr setlip juer Jehovah ee sendix.

21 Jehovah qycc dirr Siloh henxhen, in'ui Jehovah ing Jehovah ee ue dirr Siloh henxbingg dirr Samuel.

4 Samuel ee ue venww tuann dirr Islael jingwlangg.

Islaellangg cud kir beh qapp Filistlangg qaujenr, jrad ngiaa qin dirr Ebenezer; Filistlangg jrad ngiaa dirr Afek.

2 Filistlangg vaidin qongqig Islaellangg; qaujenr ee sii, Islaellangg taii sux dirr Filistlangg ee binrjingg. Filistlangg dirr vningiuu taii siw inx ee qunvingx, iokliok sir-cingx langg.

3 Vecsnir dyr laii qaur ngiaa-lai, Islael ee diongxlyw qongw, "Jehovah qinaxzit sniaw su hro lanw taii sux dirr Filistlangg ee binrjingg ar? Lanw diyhh qrngx Jehovah ee iokqui dui' Siloh laii lanw jiax, hro ix dirr lanw diongqanx, tangx qiur lanw tuatli lanw ee duiwdik ee ciuw."

4 Vecsnir dyrr crex langg qaur Siloh, dui' hiax qrngx jre dirr qilorvingx ee diongqanx, banrqunx ee Jehovah ee iokqui laii. Eli nng xee qniaw Hofni, Finehas qapp Siongrder ee iokqui dirr hiax.

5 Jehovah ee iokqui qaur ngiaa-diongx, Islael jingwlangg dyrr dua sniax huah, de suar e inwsniax.

6 Filistlangg tniax qnir dua sniax decc huah ee snia'imx, dyrr qongw, "Dirr Hebla ee ngiaa anxnix dua sniax huah, si simxmih enqor?" Au .laii inx dyrr jaix Jehovah ee iokqui qaur ngiaa-diongx.

7 Filistlangg dyrr qniahniaa, qongw, "U Siongrder qaur inx ee ngiaa-diongx"; qycc qongw, "Lanw u jaieh lar, vingsor m bad u jitt xee su.

8 Lanw u jaieh lar, jirjui e qiur lanw tuatli jiaxee dua quanlingg ee siongrder ee ciuw ar? Jingg dirr kongwiaw ing dagg ngiu ee jaieh pah Egiptlangg :ee, dyrr si jiaxee siongrder.

9 Filistlangg ar, linw diyhh iongxqamw, diyhh juer dairdiongrhux, benw did linw hogsai Heblalangg, cincniu inx hogsai linw jidngiu; linw diyhh juer dairdiongrhux qapp inx qaujenr."

10 Filistlangg dyrr qaujenr. Islaellangg taii sux; dagg xee jauw dyr kir inx ee vowvnii; taii siw jin' je. Islael ee vorvingx siw snax-bxan langg.

11 Siongrder ee iokqui hro inx cniuw .kir; Eli nng xee qniaw Hofni qapp Finehas iarr siw.

12 U jit xee Benjaminlangg dui' jenwdin jauw .laii, snxax tiah lic, taukag samw tohunw, siangg hitt zit qaur Siloh.

13 Ix qaur ee sii, duxdng Eli dirr lo-vnix jre dirr ix ee xui decc liaubang, in'ui ix ee simx uirdiyhh Siongrder ee iokqui laii kuawlu. Hitt langg zip sniaa vyr siausid, tong' sniaa ee langg dyrr longxx auqiyr.

14 Eli tniax qnir auqiyr ee sniax, dyrr mng qongxx, "Jitt xee huarhua hauw ee sniax si simxmih enqor ar?" Hitt langg qnuaxqinw laii vyr Eli.

15 Hitt sii Eli qauw-jap-veh huer, bagjiux caa caa, be e knuar .qnir.

16 Hitt langg qra Eli qongw, "Guaw si dui' jenwdin laii :ee, qinaxzit guaw dui' jenwdin jauw .laii." Eli qongw, "Guaw ee qniaw ar, dairjir jnaixngiu?"

17 Vyr siausid :ee rinr qongxx, "Islaellangg dirr Filistlangg ee binrjingg dyjauw, vecsnir diongx siurr taii :ee vutjiw je, liw nng xee qniaw, Hofni qapp Finehas, iarr siw. Siongrder ee iokqui suar hro inx cniuw .kir."

18 Ix jid'err qongw kiw Siongrder ee qxui, Eli dyrr dui' ix ee jyrwui hniar duiww aurbin, vuahdyw dirr mngg-vnix, amrqunw jric, dyrr siw; in'ui ix nilau, sintew dang. Eli juer Islael ee sursux sir-jap nii.

19 Eli ee simvu, Finehas ee bow, huai'in beh qaur qrii. Ix tniax qnir Siongrder ee qxui hro langg cniuw .kir, daqnuax qapp diongrhux longxx siw ee siausid, dyrr kiauqux laii snix qniaw, in'ui dua tangwtniar hutzenn qaur.

20 Decbeh siw ee sii, vnitauu decc kia hiaxee hurzinlangg qra ix qongw, "Mrbenw qniax, liw snix davoginxaw lar." Ix byy rinr, iarr byy quansimx.

21 Ix qra ginxaw hy miaa Iqabod, qongw, "Ingqngx lirkuix Islael." Jex si in'ui Siongrder ee qxui hro langg cniuw .kir, qycc in'ui daqnuax qapp diongrhux iarr siw.

22 Ix qycc qongw, "Ingqngx lirkuix Islael, in'ui Siongrder ee qxui siurr cniuw."

5 Filistlangg duar Siongrder ee iokqui, dui' Ebenezer qrngx qaur Asdod.

2 Filistlangg jiong' Siongrder ee qxui qrngx zip Dagon ee biy, he dirr Dagon ee sinvnix.

3 Qeh jaxkiw Asdod ee langg kiw .laii, knuar qnir Dagon vuahdyw dirr Jehovah ee qxui-jingg, bin pag dirr de nirr; dyrr jiong' Dagon qycc cai dirr ix ee guan'ui.

4 Qycc qeh zit tauwjaw kiw .laii, knuar qnir Dagon vuac dyw dirr Jehovah ee qxui-jingg, bin pag dirr de nirr; qycc Dagon ee tauu qapp nng qix ciuxjniuw longxx jric dirr hording dingw; jixu cunx Dagon kut kut ee sinkux.

5 Uirdiyhh anxnix, Dagon ee jewsix, qapp itcer zip Asdod Dagon ee biy ee langg, longxx byy dac Dagon ee hording, didqaur qinaxzit

6 Jehovah ee ciuw dang dang pah Asdodlangg, vairhuai inx, hro inx huad liab'axjingr; Asdod qapp ix ee qingxlai longxx si anxnix.

7 Asdodlangg knuar qnir anxnix, dyrr qongw, "Islael Siongrder ee qxui m tangx diamr dirr lanw diongqanx, in'ui Ix ee ciuw dang dang pah lanw, qapp lanw ee siongrder Dagon."

8 Dyrr crex langg cniaw Filist hiaxee siuxlingw laii jurjip dirr inx hiax, qongw, "Islael ee Siongrder ee qxui lanw diyhh jnaixngiu sethuad ar?" Inx rinr qongxx, "Tangx jiong' Islael ee Siongrder ee qxui un kir Gat." Dyrr jiong' Islael Siongrder ee qxui un qaur hiax.

9 Un qaur liauxau, Jehovah ee ciuw qongqig hitt xee sniaa, hro hitt xee sniaa ee langg jin' dua luan; qycc pah sniaa-lai ee langg, bylun dua, ser, inx longxx huad liab'axjingr.

10 Inx dyrr jiong' Siongrder ee qxui sangr qaur Eklon. Siongrder ee qxui qaur Eklon, Eklon ee langg dyrr huah qongxx, "Inx jiong' Islael ee Siongrder ee qxui un qaur lanw jiax, beh hai siw lanw qapp lanw ee vecsnir."

11 Dyrr crex langg jurjip Filist longxjongw ee siuxlingw, qongw, "Islael Siongrder ee iokqui diyhh sangr dyr kir ix ee vunxsoxjai, benw did ix hai siw lanw qapp lanw ee vecsnir." Hitt sii tong' sniaa u drir qaur siw ee ziauxluan; in'ui Siongrder ee ciuw dirr hiax pah inx jin' dang.

12 Byy siw ee langg longxx duw diyc liab'axjingr, sniaa-diongx tikaur ee sniax taur qaur tnix nirr.

6 Jehovah ee iokqui druar dirr Filistlangg ee de cid guehzit quw.

2 Filistlangg qiyr hiaxee jewsix qapp sudsu, qongw, "Jehovah ee iokqui lanw diyhh jnaixngiu sethuad? Cniaw jixsi guanw diyhh jnaixngiu sangr ix dyr kir vunxsoxjai."

3 Inx qongw, "Linw narr sangr Islael ee Siongrder ee iokqui kir, m tangx hro ix kangx kangx kir, dikkag diyhh ing vow quewsid ee jrer hingg ix, linw jiacc e did diyc hyw, iarr e jaix Ix ee ciuw sniaw su byy lirkuix linw."

4 Inx qongw, "Guanw diyhh ing simxmih juer vow quewsid ee jrer laii hingg Ix ar?" Rinr qongxx, "Diyhh ing qimx ee liab'aw go xee, qimx ee niauxcuw go jiah, jiauww Filist siuxlingw ee siauwgiac; in'ui linw qapp linw ee siuxlingw soxx duw .diyc ee jaieh jidngiu.

5 Soxiw linw diyhh juer linw ee liab'aw ee sxiong, qapp huixsiongx linw ee de ee niauxcuw ee sxiong; qycc diyhh qruix ingqngx hro Islael ee Siongrder; qiamxcaiw Ix duiwdirr linw, qapp linw ee siongrder, qapp linw ee de, e vangwkinx Ix ee ciuw.

6 Linw sniaw su gni linw ee simx, cincniu Egiptlangg qapp Falaoh gni inx ee simx ar? Siongrder dirr inx diongqanx qniaa sinziah, inx qamxx byy vangr vecsnir kir, vecsnir dyrr kir mah?

7 Dnaxx linw diyhh virvan jit dniux sinx ee ciax, qapp nng jiah u linx ee gubuw, m bad qruar dnax :ee, jiong' jiaxee guu vak dirr ciax nirr, iarr hro gu'axqniaw lirkuix ix, dyr kir inx cur.

8 Qra Jehovah ee iokqui he dirr ciax nirr, iarr ing liw soxx hingg qimx ee vyxmic juer vow quewsid ee jrer :ee, log dirr sniux-lai, he dirr qxui-vnix, sangr ix kir.

9 Linw diyhh knuar, ix narr dui' ix qauqair ee lo jnriu qaur Bet Semes, dyrr qangr jitt xee dua jaieh hro lanw :ee sidjai si Ix; narr byy, dyrr tangx jaix pah lanw :ee m si Ix ee ciuw, si lanw gnoxzenn duw .diyc .ee."

10 Hiaxee langg dyrr anxnix qniaa, jiong' nng jiah u linx ee gubuw vak dirr ciax nirr, qycc qnuaix gu'axqniaw dirr cur-lai.

11 Qycc ing Jehovah ee iokqui, ixqip kngr qimx ee niauxcuw qapp liab'aw ee sxiong ee sniux, longxx he dirr ciax nirr;

12 Gubuw diddit ngr Bet Semes ee lo kir, dui' dua lo qniaa, naxx qniaa naxx hauw, byy penx jyxiu. Filist hiaxee siuxlingw duer aurbin kir, qaur Bet Semes ee qingxqair.

13 Duxduxx Bet Semeslangg dirr snuaqog quah bec, giahbak knuar qnir iokqui, knuar .qnir dyrr hnuahiw.

14 Ciax qaur Bet Semeslangg Josua ee hngg, dyrr tingg lehh. Dirr hiax u jit der dua der jiyvnuaa. Inx puar ciax ee caa henr nng jiah gubuw juer siyjer hro Jehovah.

15 Levilangg jiong' Jehovah ee iokqui, qapp ix vnix:a drew qimx ee vyxmic ee sniux tec .lyc .laii, he dirr hitt der dua jiyhvnuaa ee dingxbin. Bet Semeslangg dirr hitt zit henr siyjer qapp jewsu hro Jehovah.

16 Filistlangg go xee siuxlingw knuar .qnir, siangg hitt zit dyrr dyr kir Eklon.

17 Filistlangg hingg hro Jehovah juer vow quewsid ee jrer ee qimx ee liab'aw, dyrr si jiaxee; jit liap uirdiyhh Asdod, jit liap uirdiyhh Gaza, jit liap uirdiyhh Askelon, jit liap uirdiyhh Gat, jit liap uirdiyhh Eklon;

18 Qimx ee niauxcuw ee siauwgiac, si jiauww Filist ee siuxlingw soxx quanw ee sniaa, dyrr si qenqor ee sniaa qapp hniusia; iarr suar qaur dua der jiyhvnuaa, dyrr si he Jehovah ee iokqui :ee; jitt der jiyhvnuaa qaur qinaxzit iauxx dirr Bet Semeslangg Josua ee hngg.

19 Jehovah pah siw Bet Semeslangg, in'ui inx u knuar Ix ee iokqui lai, dyrr pah siw inx cid-jap langg, go-bxan langg vecsnir aikaur, in'ui Jehovah dua dua pah siw vecsnir.

20 Bet Semeslangg qongw, "Jirjui e kia dirr Jehovah, jitt xee sxingr ee Siongrder ee binrjingg ar? Ix beh jnriu kir simxmih langg hiax, laii lirkuix lanw ar?"

21 Dui' anxnix crex langg kir qnir dirr Kiliat Jealim kiarkiw ee vecsnir, qongw, "Filistlangg jiong' Jehovah ee iokqui sangr .dyr .laii; linw lyc .laii, qrngx jnriu kir linw hiax."

7 Kiliat Jealimlangg laii, duar Jehovah ee iokqui jnriu .kir, qaur dirr snuax-dingw Abinadab ee cur, hunvet ix ee qniaw Eleazar qowsiuw Jehovah ee iokqui.

2 Iokqui dirr Kiliat Jealim zidjiw quw quw, ligquer zi-jap nii; Islael juann qrex duiliam Jehovah.

3 Samuel qra Islael juann qrex qongw, "Linw narr jidsimx quisun Jehovah, dyrr diyhh dui' linw diongqanx druu kir guarvangx ee siongrder qapp Astarte, qensimx qui'ngr Jehovah, dnuadnuax hogsai Ix, Ix beh qiur linw tuatli Filistlangg ee ciuw."

4 Islaellangg dyrr druu kir jiaxee Baal qapp Astarte, dnuadnuax hogsai Jehovah.

5 Samuel qongw, "Diyhh jurjip Islael jingwlangg dirr Mizpah, guaw beh ter linw qidyw Jehovah."

6 Inx dyrr jurjip dirr Mizpah, cnriu juiw vniar dirr Jehovah ee binrjingg, dirr hitt zit qimwjiac, dirr hiax qongw, "Guanw u dikjue Jehovah." Samuel dyrr dirr Mizpah pnuawduanr Islaellangg.

7 Filistlangg tniax qnir Islaellangg jurjip dirr Mizpah, Filist ee siuxlingw dyrr jnriu laii beh qongqig Islaellangg. Islaellangg tniax qnir dyrr qniax Filistlangg.

8 Islaellangg qra Samuel qongw, "Guan liw ter guanw qiuqiyr Jehovah, lanw ee Siongrder, byy suah, hro Ix qiur lanw tuatli Filistlangg ee ciuw."

9 Samuel dyrr ing jit jiah jiac linx ee ngiuu-aw, qui' jiah siyx laii henr hro Jehovah juer siyjer. Samuel ter Islaellangg qiuqiyr Jehovah; Jehovah rinr ix.

10 Samuel decc henr siyjer ee sii, Filistlangg jinwjingg laii, beh qapp Islaellangg qaujenr. Dirr hitt zit Jehovah kiw dua sniax ee luii qogqig Filistlangg, pacluan inx; inx dyrr taii sux dirr Islaellangg ee binrjingg.

11 Islaellangg dui' Mizpah cud .laii, duiqnuaw Filistlangg, pah inx didqaur Betkar ee erbin.

12 Samuel ing jit der jiyc kia dirr Mizpah qapp Sen ee diongqanx, qiyr ix ee miaa Eben Ezer, qongw, "Qaur jitt diap Jehovah vangjan lanw."

13 Dui' hitt diap Filistlangg dyrr kuthok, m qnaw qycc zip Islaellangg ee qingxlai. Samuel itsingx ee zit, Jehovah ee ciuw qongqig Filistlangg.

14 Filistlangg soxu cruw Islaellangg ee sniaa, dui' Eklon qaur Gat, longxx hingg Islaellangg. Inx hiaxee qingxqair, Islaellangg iarr dui' Filistlangg ee ciuw siux dywdngw; hitt sii Islaellangg qapp Amolilangg hyhyw.

15 Samuel itsingx juer Islael ee sursux.

16 Ix dagg nii sunsi Betel, Gilgal, Mizpah jiaxee soxjai, pnuawduanr Islaellangg,

17 Dyrr dywdngw .kir, qaur Rlamah, in'ui ix ee qrex dirr hiax; iarr dirr hiax pnuawduanr Islaellangg; iarr dirr hiax qra Jehovah kiw jit jxy dnxuaa.

8 Samuel ixqing’ lau, dyrr setlip ix ee qniaw juer Islael ee sursux.

2 Ix ee dua-qniaw miaa qiyr Joel, derr zi qniaw miaa qiyr Abijah; inx dirr Beerseba juer sursux.

3 Danrsi ix ee qniaw byy qniaa ix ee lo, pensux tamjaii, siurr vowlo, byy jiauww dit pnuawduanr.

4 Islael ee dniuxlyw longxx jurjip, qaur Rlamah qnir Samuel, qra ix qongw,

5 "Knuar ar, liw ixqing’ lau, liw ee qniaw byy qniaa liw ee lo. Dnaxx qriuu liw qra guanw setlip jit xee ongg pnuawduanr guanw, cincniu ledqog jidngiu."

6 Jitt ee su, Samuel byy hnuahiw. Samuel dyrr qidyw Jehovah.

7 Jehovah duiww Samuel qongw, "Vecsnir duiww liw soxx qongw itcer ee ue, liw diyhh tranr; in'ui inx m si kiwsag liw, si kiwsag Guaw, byy hro Guaw juer inx ee ongg.

8 Dui' Guaw cua inx cud Egipt qaur qinaxzit, inx itcer soxx qniaa lirkuix Guaw, kir hogsai vadd xee siongrder, dnaxx iarr jiauww anxnix kuanxtai liw.

9 Soxiw liw diyhh tranr inx ee ue; danrsi diyhh giamgiamm qingxqair inx, hro inx jaix jionglaii quanxliw inx ee ongg ee jewdo si jnaixngiu."

10 Samuel ing Jehovah ee ue longxx qra vecsnir qongw, dyrr si hiaxee duiww ix tyw jit xee ongg :ee, qongw,

11 "Jionglaii quanxliw linw ee ongg ee jewdo dyrr si anxnix. Ix beh cruw linw ee qniaw laii qra ix quanw ciax, qycc ing inx juer ix ee bexvingx, jauw dirr ciax ee taujingg;

12 Qycc beh uirr qaqi setlip inx juer cenjongw, gnoxsibhudiongw; iarr beh setlip langg qra ix jyh hngg, siux gnoxqog, jewjy qunkir, qapp ciax nirr ee kiwqu;

13 Beh cruw linw ee jaboxqniaw qra ix jewjy pangx iuu, juer juxjiac :ee, juer vig vniaw :ee;

14 Linw ee canghngg, pudyhngg, qnanaxhngg, hitt xee siongrr hyw :ee, ix beh cruw ix laii hro ix ee lovok;

15 Linw soxx jingwjyh :ee, qapp linw ee pudyhngg, ix beh cruw jap hxun jit, hro ix ee taiwqamr qapp lovok.

16 Qycc beh cruw linw ee lovok, luxvi, iongxqnia ee siauwlenlangg, qapp linw ee luu, laii juer ix ee ce'ing;

17 Linw ee ngiuu-qrunn, ix beh cruw jap hxun ee jit hxun; linw iarr beh juer ix ee lovok.

18 Hitt sii linw beh in'ui soxx qingw ee ongg laii auqiyr, danrsi Jehovah dirr hitt sii m tniax linw."

19 Danrsi vecsnir m kingw tniax Samuel ee ue, qongw, "M ar, guanw dikkag beh jit xee ongg dirliw guanw,

20 Hro guanw cincniu ledqog jidngiu, guanw ee ongg pnuawduanr guanw, juer tauu cua guanw, ter guanw qaujenr."

21 Samuel ixqing’ tniax qnir vecsnir longxjongw ee ue, dyrr qra hiaxee ue qongw hro Jehovah tniax.

22 Jehovah duiww Samuel qongw, "Liw diyhh tniax inx ee ue, qra inx setlip jit xee ongg." Samuel qra Islaellangg qongw, "Linw dagg xee dyr kir qaqi ee sniaa."

9 U jit xee Benjaminlangg, miaa qiyr Kis, si Benjaminlangg Afiah ee guansunx, Bekolat ee jingsunx, Zelor ee sunx, Abiel ee qniaw, si jit xee dua kuiwlat ee iongxsu.

2 Ix u jit xee qniaw, miaa qiyr Saul, iongxjongr qycc hyw snijuer, dirr Islael diongx byy jit langg e viw did ix ee hyw snijuer; sintew viw jingwlangg kacc quann jit xee taukag.

3 Saul ee laurve Kis pacmrqnir quixnarr jiah lubuw. Kis qra ix ee qniaw Saul qongw, "Liw cua jit xee lovok kixsinx kir cue lubuw."

4 Ix dyrr qingquer Eflaim ee snuade, qapp Salisah ee de, longxx cue byy; qycc qingquer Saalim ee de, iarr byy dirr hiax; qycc qingquer Benjamin ee de, iarr cue byy.

5 Qaur Zuf ee de, Saul qra qinduer ix ee lovok qongw, "Laii ar, lanw dyr .laii .kir, qniax guaw ee laurve byy kuawlu luu, dendyww laii huanlyw lanw."

6 Lovok qongw, "Knuar ar, jitt xee sniaa nirr u jit xee Siongrder ee lovok, si langg soxx jundiong :ee, qniww ix soxx qongw :ee longxx dikkag ingwgiam. Lanw kir ix hiax, qiamxcaiw ix e jixsi lanw soxx qniaa ee lo."

7 Saul qra Lovok qongw, "Lanw narr kir, u simxmih tangx sangr hro langg ar? In'ui lanw deaw lai ee jiahmic longxx liauw lar, iarr byy lexmic tangx sangr hitt xee Siongrder ee lovok; lanw sinvnix iauxx u simxmih mic bor?"

8 Lovok qycc rinr Saul qongxx, "Guaw ciuw nirr u ginn jit sekel ee sir hxun jit; guaw jiong' jitt xee laii sangr hitt xee Siongrder ee lovok, cniaw ix jixsi lanw soxx qniaa ee lo."

9 (Jingg Islael diongx, narr u langg kir mng Siongrder, dyrr qongw, "Lanw laii kir qnir senqenr"; in'ui henrjai cxingx sendix, jingg cxingx senqenr.)

10 Saul qra lovok qongw, "Liw soxx qongw ee ue hyw. Laii ar, lanw laii .kir." Inx dyrr kir Siongrder ee langg soxx diamr ee sniaa.

11 Inx jnriu snuapniaa beh zip sniaa, dyrr duw diyc quixnarr xee siauwlenn ee jaboxginxaw cud laii cnriu juiw, dyrr mng inx qongxx, "Senqenr dirr jiax bor?"

12 Jaboxginxaw rinr qongxx, "Si lar, dirr jiax. Knuar ar, ix dirr liw ee taujingg. Qnuaxqinw kir, ix qinaxzit duxaxx qaur sniaa; in'ui qinaxzit vecsnir dirr snuataudnuaa henwjer.

13 Dirr ix iauxx bue jnriu kir snuataudnuaa beh jiahdyh ee dairsingx, linw jid'err zip sniaa dyrr e duw diyc ix; in'ui ix iauxx bue qaur, vecsnir byy dairsingx jiac, dikkag tingwhau ix dairsingx jiokhog jewmic, zen'au soxx cniaw ee langkeh jiacc jiac. Dnaxx linw jnriu .kir, jitt sii e duw diyc ix."

14 Nng langg dyrr jnriu sniaa; ixqing’ zip sniaa, Samuel cud .laii, beh jnriu quann ee soxjai, dyrr duw diyc inx.

15 Saul bue qaur ee jingg jit zit, Jehovah ixqing’ kexsi Samuel qongxx,

16 "Binaxjair jitt sii, Guaw beh crex jit langg dui' Benjamin-de qaur liw jiax. Liw diyhh qra ix buah iuu juer Guaw ee vecsnir Islael ee tauu; ix beh qiur Guaw ee vecsnir tuatli Filistlangg ee ciuw; in'ui Guaw ee vecsnir aiqiuu ee sniax taur qaur Guaw, Guaw knuawqor inx."

17 Samuel knuar qnir Saul ee sii, Jehovah qra ix qongw, "Knuar ar, jitt langg dyrr si Guaw soxx qra liw qongw :ee, ix beh quanxliw Guaw ee vecsnir."

18 Saul dirr sniamngg nirr uaw qin Samuel, qongw, "Cniaw qra guaw qongw, senqenr ee cur dirr dyclyc?"

19 Samuel rinr Saul qongxx, "Guaw dyrr si senqenr. Liw dirr guaw ee taujingg jnriu kir quann ee soxjai, in'ui linw qinaxzit beh qapp guaw jiac. Binaxjaxkiw guaw beh hro liw kir; liw simlai ee su longxx beh qra liw qongw.

20 Liw snax zit jingg pacmrqnir hiaxee lubuw, liw mrbenw kuawir, ixqing’ cue .diyc lar. Islael jingwlangg soxx himbo :ee qruix jirjui ar? Qamxx m si qruix liw, qapp liw ee laurve ee qrex mah?"

21 Saul rinr qongxx, "Guaw si Benjamin jipair jiaxee qrex ee diongqanx ee jit xee; guaw ee qrex qamxx m si qik biser mah? Liw sniaw su duiww guaw qongw jitt hy ue?"

22 Samuel cua Saul qapp qinduer ix ee langg zip kectniax, hro inx dirr soxx cniaw ee langg ee diongqanx jre duarui; soxx cniaw :ee iokliok u snax-jap langg.

23 Samuel qra duvangg qongw, "Guaw soxx qaudair liw, qiyr liw diyhh siux hitt hxun, dnaxx tangx pangg .laii."

24 Duvangg dyrr pangg tuiw he sirr Saul ee binrjingg. Samuel qongw, "Liw knuar, jitt xee soxx lauu :ee, liw diyhh tec kir laii jiac; in'ui guaw cniaw vecsnir ee sii, diauqowir qra liw lauu lehh qaur dniardiyc ee zit." Hitt zit Saul dyrr qapp Samuel snaqab jiac.

25 Inx dui' quann ee soxjai lyc .laii, zip sniaa, Samuel qapp Saul dirr cur-dingw qongxue.

26 Inx jaw jaw kiw .laii, pacpuxqngx ee sii, Samuel dirr cur-dingw qiyr Saul qongxx, "Kiw .laii ar, guaw beh sangr liw dyr .kir." Saul dyrr kiw .laii; ix qapp Samuel nng langg cud kir guarbin.

27 Inx lyc kir qaur sniaa ee qaktauu, Samuel qra Saul qongw, "Diyhh huanhur lovok dairsingx lanw kir"; lovok dyrr kir; qycc qongw, "Liw cniaw kia lehh, guaw beh hro liw tniax Siongrder ee ue."

10 Samuel tec jit vann iuu, dryr dirr Saul ee taukag, qra ix jimx, qongw, "Jex qamxx m si Jehovah buah liw juer Ix ee giap ee taulangg mah?

2 Qinaxzit liw lirkuix guaw liauxau, dirr Benjamin qauqair ee Zelzah, qin Rlaqel ee bong, beh duw diyc nng langg; inx beh qra liw qongw, 'Liw kir cue hiaxee lubuw, ixqing’ cue .diyc; dnaxx liw ee laurve byy decc kuawlu luu, si decc huanlyw liw, qongw: Guaw uirdiyhh guaw ee qniaw beh jnaixngiu ar?'

3 Liw beh dui' hiax kir, qaur Tabor ee siongrciu hiax, beh u snax langg duw diyc liw, inx si beh kir Betel qaur Siongrder hiax, jit xee duar snax jiah snua'ngiuu-aw, jit xee duar snax ee vniaw, jit xee duar jit puede ee jiuw;

4 Inx beh mng liw ving'anx, ing nng xee vniaw hro liw; liw dyrr dui' inx ee ciuw jrih .laii.

5 Jitt diap liauxau, liw beh qaur Siongrder ee snuax, dirr hiax u Filistlangg hongsiuw ee vxingx. Liw qaur sniaa ee sii, beh duw diyc jit din sendix dui' quann ee soxjai lyc .laii; dirr inx ee taujingg u qimsig, u linlongqow, u dad'aw, u kimm; inx longxx qongw sendi'ue.

6 Jehovah ee Sinn beh dua dua limqaur liw, liw iarr beh qapp inx qongw sendi'ue, liw beh venr juer sinx ee langg.

7 Jiaxee diaurtauu limqaur liw, liw diyhh tanr qihue laii juer, in'ui Siongrder qapp liw dilehh.

8 Liw diyhh dairsingx guaw lyc kir Gilgal, guaw iarr beh lyc .kir liw hiax, henr siyjer qapp siarunjer. Liw diyhh tingwhau cid zit, tingwhau guaw qaur liw hiax, jixsi liw diyhh qniaa ee su."

9 Ix uat dngw srinx beh lirkuix Samuel, Siongrder nguarsinx ix ee simx; dng' hitt zit jiaxee diaurtauu longxx ingwgiam.

10 Inx ixqing’ qaur hitt xee snuax, u jit din sendilangg duw diyc ix. Siongrder ee Sinn dua dua limqaur Saul, ix dyrr dirr inx diongqanx qongw sendi'ue.

11 Vingsor bad ix ee langg, knuar ix dirr sendix diongx decc qongw sendi'ue, dyrr snaqab qongw, "Kis ee qniaw duw diyc anxnix si jnaixngiu? Saul iarr let dirr sendix diongx mah?"

12 Hitt soxjai u jit langg rinr qongxx, "Hiaxee langg ee laurve si jirjui ar?" Dui' anxnix u jit qxur sioggiw qongxx, "Saul iarr let dirr sendix diongx mah?"

13 Saul qongw sendi'ue bingvik, dyrr jnriu kir quann ee soxjai.

14 Saul ee jig mng Saul qapp ix ee lovok qongxx, "Linw kir dyclyc?" Rinr qongxx, "Kir cue lubuw; cue ix byy, dyrr kir Samuel hiax."

15 Saul ee jig qongw, "Cniaw liw qra guaw qongw, Samuel qra linw qongw simxmih."

16 Saul qra ix ee jig qongw, "Ix qra guanw qongw lubuw ixqing’ cue .diyc lar." Lun qaur Samuel soxx qongw qog ee su, ix byy qra ix qongw.

17 Samuel jiyjip vecsnir qaur Mizpah, Jehovah hiax, qra Islaellangg qongw,

18 "Jehovah, Islael ee Siongrder anxnix qongw, 'Guaw cua Islael cud Egipt, qiur linw tuatli longxjongw hiaxee jewab linw qog ee ciuw.'

19 Danrsi linw qinaxzit u kiwsag linw ee Siongrder, dyrr si vunxsinx qiur linw tuatli itcer huanrlan qankow :ee; linw iarr duiww Ix qongw, 'Diyhh setlip ongg quanxliw guanw.' Dnaxx linw diyhh jiauww linw ee jiapir, linw ee jongjok, laii kia dirr Jehovah ee binrjingg."

20 Dui' anxnix Samuel hro Islael jiongww jipair qinrjingg laii, dyrr cruw diyc Benjamin ee jipair;

21 Qycc hro Benjamin ee jipair jiauww inx ee jongjok qinrjingg laii, dyrr cruw diyc Marli-jok; dui' hitt diongqanx qycc cruw diyc Kis ee qniaw Saul; langg cue ix, iarr cue be diyc.

22 Soxiw dyrr qycc mng Jehovah qongxx, "Hitt langg u laii jiax iacc byy?" Jehovah qongw, "Ix bih dirr jabmic ee diongqanx."

23 Inx dyrr jauw .kir, dui' hiax cua ix cud .laii. Ix kia dirr vecsnir ee diongqanx, viw jiongww vecsnir kacc quann jit xee taukag.

24 Samuel qra jiongww vecsnir qongw, "Jehovah soxx qingw ee langg, dirr vecsnir diongx byy jit xee e viw did ix, linw knuar qnir mah?" Jiongww vecsnir dyrr dua sniax qiyr qongxx, "Guan ongg banrsuer."

25 Samuel jiong' qokhuad duiww vecsnir qongw bingg, qycc qir dirr ceh nirr, he dirr Jehovah ee binrjingg; zen'au Samuel siwsnuar jingwlangg, dagg xee dyr kir inx ee qrex.

26 Saul iarr dyr kir Gibeah, qaur ix ee qrex. U jit din langg, hro Siongrder qamxdong ix ee simx :ee, duer ix kir.

27 Hiaxee huixlui qongw, "Jitt langg tacc e qiur lanw ar?" Dyrr biauxsi Saul, byy sangr ix lexmic, danrsi Saul jing jing.

11 Ammonlangg Nahas jnriu qaur Gilead ee Jabes, jrad ngiaa beh qongqig ix. Jabes ee jingwlangg qra Nahas qongw, "Liw qapp guanw lip iog, guanw dyrr beh hogsai liw."

2 Ammonlangg Nahas rinr qongxx, "Guaw qapp linw lip iog, diyhh anxnix, dyrr si iah linw jingwlangg ee jniar bak, guaw tangx ing jitt xee laii lingziok Islaellangg."

3 Jabes ee dniuxlyw qra ix qongw, "Qriuu liw kuan'iongg guanw cid zit, hro guanw crex langg kir Islael ee juanqingw; narr byy langg qiur guanw, guanw dyrr cud laii jiu liw."

4 Soxx crex ee langg qaur Saul ee Gibeah, jiong' jiaxee ue qongw hro vecsnir tniax; vecsnir dyrr longxx kuix sniax hauw.

5 Saul duxdng dui' cann nirr qnuaw guu dyr .laii; Saul qongw, "Vecsnir uirr sniaw su tikaur?" Inx dyrr jiong' Jabeslangg ee ue qra ix qongw.

6 Saul tniax qnir jiaxee ue, Siongrder ee Sinn dua dua qamxdong ix; ix dua siurkir.

7 Ix dyrr jiong' jit duir guu ced jit der jit der, qaudair suwjiaw sangr qaur Islael ee juanqingw, qongw, "Qniwnarr byy cud laii qinduer Saul qapp Samuel :ee, iarr beh anxnix kuanxtai ix ee guu." Jehovah hro vecsnir qniax, inx dyrr longxx cud .laii, cincniu jit langg.

8 Dirr Bezek diamxsngr hiaxee langg; Islaellangg u snax-jap-bxan, Judahlangg u snax-bxan.

9 Inx qra soxx crex ee langg qongw, "Linw diyhh anxnix huehog Gilead ee Jabeslangg, qongw, binaxzit jiongqin diongdaur ee sii, linw beh did diyc jinxqiur." Soxx crex ee langg dyr kir qra Jabeslangg qongw; inx dyrr hnuahiw.

10 Jabeslangg dyrr qra Nahas qongw, "Binaxzit guanw beh cud laii jiu linw, linw tangx cutjai iwsur kuanxtai guanw."

11 Qeh zit Saul vunx vecsnir juer snax dui, dirr gorqnijaw ee sii zip Ammonlangg ee qunngiaa, pah siw inx qaur zit beh daur; soxx cunx ee langg longxx jauw siwsnuar.

12 Vecsnir qra Samuel qongw, "Hitt xee qongw, 'Saul qamxx e quanxhad lanw :ee' si jirjui ar? Diyhh liac hiaxee langg cud .laii, guanw beh taii siw ix."

13 Saul qongw, "Qinaxzit jit langg iarr m tangx taii siw; in'ui qinaxzit Jehovah jinxqiur Islael."

14 Samuel qra vecsnir qongw, "Laii ar, lanw laii kir Gilgal, dirr hiax dingjair qenwlip qog"

15 Jiongww vecsnir dyrr kir Gilgal; dirr Gilgal dng' Jehovah ee binrjingg setlip Saul juer ongg; inx dirr hiax henr siarunjer dirr Jehovah ee binrjingg. Saul qapp Islael jingwlangg dua dua hnuahiw.

12 Samuel qra Islael jingwlangg qongw, "Qniwnarr linw duiww guaw soxx qongw ee ue, dyrr si setlip jit xee ongg quanw linw, guaw longxx u tniax .qnir.

2. Knuar ar, dnaxx u jit xee ongg qniaa dirr linw ee binrjingg. Guaw ixqing’ lau, tau'mngg vec; guaw ee qniaw longxx dirr linw jiax. Guaw dui' siauwlenn qaur dnaxx, longxx qniaa dirr linw ee binrjingg.

3 Guaw dirr jiax, linw diyhh dirr Jehovah ee binrjingg, qapp Ix soxx buah iuu :ee ee binrjingg, qra guaw juer qanjingr. Guaw u kanx jirjui ee guu? Kanx jirjui ee luu? Kihu jirjui? Apjer jirjui? Dui' jirjui ee ciuw siurr vowlo, drir qaur ziax guaw ee bagjiux? Narr u, guaw beh hingg linw."

4 Inx qongw, "Liw m bad kihu guanw, m bad apjer guanw, iarr m bad dui' langg ee ciuw tec simxmih mic."

5 Ix qra inx qongw, "Linw dirr guaw ee ciuw byy cue diyc simxmih mic, qinaxzit Jehovah duiww linw juer qanjingr, Ix soxx buah iuu :ee, iarr juer qanjingr." Inx qongw, "Ix juer qanjingr."

6 Samuel qra vecsnir qongw, "Jingg setlip Moses qapp Aalon :ee, cua linw ee ledjow cud Egipt :ee, si Jehovah.

7 Dnaxx linw diyhh kia lehh, guaw beh dirr Jehovah ee binrjingg qapp linw venrlun Jehovah duiww linw qapp linw ee ledjow soxx qniaa itcer qonggi ee su.

8 Jingg Jakob qaur Egipt, linw ee ledjow iarr qiuqiyr Jehovah, hitt sii Jehovah dyrr crex Moses qapp Aalon cua linw ee ledjow cud Egipt, hro inx kiarkiw dirr jitt xee soxjai.

9 Danrsi inx be qir did Jehovah, inx ee Siongrder; Ix dyrr bre inx dirr Hazor ee qundniuw, Sisela ee ciuw, qapp Filistlangg ee ciuw, qapp Moab ee ongg ee ciuw, drir qaur hiaxee langg laii qongqig inx.

10 Inx qiuqiyr Jehovah qongxx, 'Guanw u jue lar, in'ui guanw u lirkuix Jehovah, kir hogsai Baal, qapp Astarte. Dnaxx qriuu Liw qiur guanw tautli guanw ee duiwdik ee ciuw, guanw beh hogsai Liw.'

11 Jehovah dyrr crex Gideon, Balak, Jeftah qapp Samuel, qiur linw tuatli siwuii ee duiwdik ee ciuw, linw jiacc ving'anx kiarkiw.

12 Linw knuar qnir Ammonlangg ee ongg Nahas laii qongqig linw, dyrr duiww guaw qongw, 'M ar, guanw dniardiyc beh u jit xee ongg quanxliw guanw.' Qisit Jehovah, linw ee Siongrder si linw ee Ongg.

13 Dnaxx knuar linw soxx qingw soxx qriuu ee ongg dirr jiax; knuar ar, Jehovah ixqing’ setlip ongg quanw linw.

14 Linw narr qingwuir Jehovah, hogsai Ix, tniax Ix ee ue, byy uivue Jehovah ee bingrling, linw qapp quanxhad linw ee ongg iarr sunrtanr Jehovah, linw ee Siongrder dyrr hyw.

15 Setsuw linw m tniatanr Jehovah ee ue, uivue Jehovah ee bingrling, Jehovah ee ciuw beh qongqig linw, cincniu jingg qongqig linw ee joxqongx jidngiu.

16 Dnaxx linw diyhh kia lehh, laii knuar Jehovah dirr linw ee bagjiux jingg soxx beh qniaa ee dua su.

17 Qinaxzit qamxx m si quah siyxbec ee sii mah? Guaw qriuu Jehovah, Ix beh kiw luii lyc ho, hro linw iarr jaix iarr knuar cud, linw uirr qaqi qriuu setlip ongg ee su, dirr Jehovah ee binrjingg soxx huan ee jue si jin' dua."

18 Dui' anxnix, Samuel qiuqiyr Jehovah; Jehovah dyrr dirr jitt zit kiw luii lyc ho; jiongww vecsnir dyrr jin' qniax Jehovah qapp Samuel.

19 Jiongww vecsnir qra Samuel qongw, "Qriuu liw ter liw jiaxee lovok qriuu Jehovah, liw ee Siongrder, benw did guanw sixbyy; in'ui guanw uirr qaqi qriuu jit xee ongg, jinjniar si qetnix jue dirr jue ee dingxbin."

20 Samuel qra vecsnir qongw, "Byc did qniax, linw suizenn qniaa jitt xee pnaiw, danrsi m tangx penli byy duer Jehovah;

21 Dogdok diyhh jinrsimx hogsai Jehovah, m tangx penli, in'ui penli dyrr si tranr huqew ee mic, byy lirig, iarr byy jinxqiur :ee, in'ui inx si huqew.

22 Jehovah uirdiyhh qaqi ee duarmiaa dikkag byy kiwsag Ix ee vecsnir; in'ui Jehovah hnuahiw ing linw juer Ix ee vecsnir.

23 Lun qaur guaw ter linw qidyw, quatduanr byy tingsuah, drir qaur dikjue Jehovah. Guaw beh ing hyw qycc jingwdit ee lo jixsi linw.

24 Dogdok linw diyhh qingwuir Jehovah, singsimx sid'ir hogsai Ix. Linw diyhh siauwliam Ix uirr linw soxx qniaa ee su jnaixngiu ee dua.

25 Linw narr iuguann juer pnaiw, linw qapp linw ee ongg beh juer jit xe bedbyy."

13 Saul duxaxx jerui, juer Islael ee ongg derr zi nii.

2 Saul dyrr uirr qaqi dui' Islael diongx qingw snax-cingx langg; nng-cingx qinduer Saul dirr Micmas qapp Betel ee snuax, jit-cingx qinduer Jonatan dirr Benjamin ee Gibeah; qi'uu ee langg, ix crex inx dyr kir dagg langg ee vowvnii.

3 Jonatan dirr Geba pah Filistlangg ee qunngiaa, Filistlangg tniax .qnir. Saul dyrr vunn sauwqag dirr juann de, qongw, "Heblalangg diyhh tniax ar."

4 Islael jingwlangg tniax qnir Saul pah Filistlangg ee qunngiaa, qycc tniax qnir Islaellangg hro Filistlangg iamwngor, vecsnir dyrr qinduer Saul, jurjip dirr Gilgal.

5 Filistlangg jurjip beh qapp Islaellangg qaujenr; u ciax snax-bxan dniux, bexvingx lak-cingx, vorvingx cincniu haiw-vnix ee suax hiacc je; dyrr jnriu .laii, dirr Bethaven dangsir ee Micmas jrad ngiaa.

6 Islaellangg knuar qnir qaqi guiqib, in'ui vecsnir kunxvig, dyrr qaqi bih dirr snuadong, ciurnaa, qapp cimknix.

7 Iarr u Heblalangg quer Jordan qaur Gad qapp Gilead-de. Saul iauxquxx dirr Gilgal; vecsnir longxx gniauhgniauc cuah laii qinduer ix.

8 Saul jiauww Samuel soxx dniardiyc ee zidqii, tingwhau cid zit. Samuel iauxx bue laii Gilgal, vecsnir lirkuix ix siwsnuar kir.

9 Saul qongw, "Jiong' siyjer qapp siarunjer duar laii guaw jiax"; ix dyrr henr siyjer.

10 Ix henr siyjer duxaxx bingvik, Samuel qaur lar. Saul cud kir gniajih ix, beh qra ix cingxanx.

11 Samuel qongw, "Liw juer simxmih dai ar?" Saul qongw, "In'ui guaw knuar qnir vecsnir siwsnuar lirkuix guaw, liw iarr byy jiauww soxx dniardiyc ee zidqii qaur, qycc Filistlangg ixqing’ jurjip dirr Micmas;

12 Soxiw guaw sniu qongxx, Filistlangg beh qaur Gilgal qongqig guaw, qycc guaw iauxx bue qriuu Jehovah six xunx, guaw dyrr benxqiongw henr siyjer."

13 Samuel duiww Saul qongw, "Liw juer gong su lar, in'ui liw byy junsiuw Jehovah, liw ee Siongrder soxx bingrling liw ee qaiwbing; beh narr u siuw, Jehovah dyrr qenqor liw ee ong'ui dirr Islael diongx qaur ingxuanw.

14 Dnaxx liw ee ong'ui byy quxdngg; Jehovah ixqing’ cue diyc hap Ix ee sim'ir ee jit langg; qycc Jehovah iarr dniardiyc ix juer Ix ee vecsnir ee tauu, in'ui liw byy junsiuw Jehovah soxx bingrling liw :ee."

15 Samuel dyrr kiw .laii, dui' Gilgal jnriu kir Benjamin ee Gibeah. Saul diamxsngr duer ix ee langg, iokliok u lak-vah langg.

16 Saul qapp ix ee qniaw Jonatan, qapp duer inx ee langg, longxx diamr dirr Benjamin ee Geba. Danrsi Filistlangg jrad ngiaa dirr Micmas.

17 U cniuxqiab :ee dui' Filist ee qunngiaa diongx cud .laii, vunx juer snax dui; jit dui uad duiww Oflah ee lo, qaur Sual ee de kir;

18 Qycc jit dui uad duiww Bet Holon ee lo kir; qycc jit dui uad duiww Zeboim ee snuaqog duiwbin derqair ee lo, ngr kongwiaw kir.

19 Hitt sii Islael juann de byy jit xee pactih saihu, in'ui Filistlangg qongw, qniax Heblalangg jewjy qiamr qapp cniux.

20 Islaellangg beh buaa lrai ix ee lee, ditauu, voxtauu, liam'aw, dagg langg diyhh lyc kir Filistlangg hiax;

21 Narr beh ler ditauu, lee, snax qiw ee cxex, voxtauu, qapp qnuaw guu ee ticcir, diyhh jit pim ee qangjnii;

22 Soxiw qaur qaujenr ee zit, duer Saul qapp Jonatan ee langg, byy jit xee ciuw nirr u qiamr u cniux :ee; dogdok Saul qapp ix ee qniaw Jonatan u.

23 Filist hongsiuw ee vxingx cud kir qaur Micmas ee aiwkauw.

14 U jit zit Saul ee qniaw Jonatan qra giac ix ee qunkir ee siauwlenlangg qongw, "Laii, lanw laii kir hitt vingg, qaur Filistlangg qunngiaa hiax"; danrsi ix byy qra inx laurve qongw.

2 Saul dirr Gibeah ee qigtauu, jre dirr Miglon ee siahliuciu kax. Duer ix :ee iokliok u lak-vah langg;

3 Qycc u Ahitub ee qniaw Ahijah, duar efod, si Iqabod ee hniax, Finehas ee qniaw, Eli ee sunx, dyrr si dirr Siloh juer Jehovah ee jewsix :ee. Vecsnir m jaix Jonatan kir.

4 Jonatan beh kir Filist ee qunngiaa, soxx beh quer hiaxee aiwkauw ee diongqanx, jitt vingg u jiyc ee snuajiamx, hitt vingg iarr u jiyc ee snuajiamx, jit xee miaa Bozez, jit xee miaa Seneh;

5 Jit xee jiyc ee snuajiamx dirr vakvingg, qapp Micmas snaduir, jit xee jiyc ee snuajiamx dirr lamm vingg, qapp Geba sna' duir.

6 Jonatan qra giac ix ee qunkir ee siauwlenlangg qongw, "Laii, lanw laii kir byy sriu qatlew ee langg ee qunngiaa hiax, qiamxcaiw Jehovah beh ter lanw juer dairjir; in'ui Jehovah qiur langg, byy hanrdnia langg ee jerjiyw."

7 Giac ix ee qunkir :ee qra ix qongw, "Jiauww liw ee simx soxx air :ee longxx qniaa ix, tangx jinwjingg kir; guaw qapp liw dangsimx, beh duer liw kir."

8 Jonatan qongw, "Lanw beh qingquer qaur hiaxee langg hiax, hro inx knuar qnir lanw;

9 Inx narr anxnix qra lanw qongw, 'Linw kia lehh, tingwhau guanw qaur linw hiax', lanw dyrr dnia dnia kia lehh, byy jnriu kir inx hiax.

10 Inx narr qongw, 'Linw jnriu laii guanw jiax', lanw dyrr jnriu .kir; in'ui Jehovah jiong' inx qaux dirr lanw ee ciuw, jitt xee e tangx juer lanw ee jingwqir."

11 Nng langg dyrr hro Filist hongsiuw ee vxingx knuar .qnir. Filistlangg qongw, "Heblalangg dui' soxx bih ee dong cud .laii."

12 Hongsiuw ee vxingx qra Jonatan qapp giac ix ee qunkir ee langg qongw, "Linw jnriu laii guanw jiax, guanw u jit hxang dairjir beh vyr linw." Jonatan dyrr qra giac ix ee qesix :ee qongw, "Liw duer guaw jnriu .kir, in'ui Jehovah jiong' inx qaux dirr Islaellangg ee ciuw."

13 Jonatan dyrr ing ciuw knii, ing kax lingr .jnriu .kir, giac ix ee qunkir ee langg duer ix. Filistlangg dyw dirr Jonatan ee binrjingg, giac ix ee qunkir ee langg iarr duer ix ee aurbin laii taii inx.

14 Jonatan qapp giac ix ee qunkir ee langg kixtauu soxx taii :ee, iokliok zi-jap langg, longxx si dirr vnuar brow hngg ee leqaux.

15 Dui' anxnix dirr ngiavnuaa, dirr can'iaw, dirr jiongww vecsnir ee diongqanx, longxx gniauhgniuac cuah; hongsiuw ee vxingx qapp cniuxqiab ee vxingx iarr longxx gniauhgniauc cuah; de iarr dinxdang, drir qaur gniauhgniauc cuah qaur qik.

16 Dirr Benjamin ee Gibeah, Saul siuxbang ee vxingx beh knuar, knuar qnir Filist ee jiongww qunvingx siwsnuar, siwqer luan luan jauw.

17 Saul dyrr qra duer ix ee vecsnir qongw, "Linw diamxsngr, knuar jirjui dui' lanw jiax cud .kir." Inx diamxsngr liauw, dyrr jaix Jonatan qapp giac ix qunkir ee langg byy dilehh.

18 Saul qra Ahijah qongw, "Liw diyhh duar Siongrder ee iokqui laii"; in'ui hitt sii Siongrder ee iokqui dirr Islaellangg ee soxjai.

19 Saul qapp jewsix qongxue ee sii, Filist ngiaa-diongx hanxhua ee sniax naxx quw naxx dua. Saul dyrr qra jewsix qongw, "Benw drang liw ee ciuw."

20 Saul qapp duer ix ee vecsnir longxx jurjip, laii qaur jenwdniuu; knuar qnir Filistlangg dagg xee ing dyx sna' jrann, jin' dua luan.

21 Ixjingg uaw Filistlangg ee Heblalangg, dui' siwhngx duer qaur ix ee ngiaa :ee, dnaxx iarr huanxdngw laii vangjan duer Saul qapp Jonatan ee Islaellangg.

22 Hiaxee bih dirr Eflaim ee snuade ee Islaellangg, tniax qnir Filistlangg dyjauw, inx dyrr cud laii zib uaw dirr inx ee aurbin, laii qaujenr.

23 Hitt zit Jehovah jinxqiur Islael; diddit jenr qaur Bethaven.

24 Hitt zit Islaellangg jin' kunwkow, in'ui Saul ngr vecsnir jiuwjua qongxx, "Byy danw qaur zit amr, tingwhau guaw vyr guaw ee duiwdik ee uansiuu ee dairsingx, jiac mic ee langg diyhh siurr jiuwjow"; soxiw vecsnir byy jiac simxmih.

25 Jiongww vecsnir zip ciurnaa, knuar qnir u bit dir derjniu.

26 Vecsnir zip ciurnaa, knuar qnir u bit decc dih; danrsi byy langg qnaw ing ciuw tec zip cuir, in'ui vecsnir qniax hiaxee jiuwjua ee ue.

27 Jonatan byy tniax qnir inx laurve ngr vecsnir jiuwjua, soxiw crunx ix ciuw nirr ee qnuaiw-aw-buew duh dirr bidvyy; ix ee ciuw uad qaur cuir nirr; bagjiux dyrr qimx.

28 Vecsnir diongx u jit langg qra ix qongw, "Liw ee laurve ngr vecsnir giamgiamm jiuwjua, qongw, 'Qinaxzit u jiac simxmih :ee, diyhh siurr jiuwjow.'" Vecsnir dyrr jin' iawsen.

29 Jonatan qongw, "Guaw ee ve hai diyc jitt xee derhngx. Linw knuar, guaw cir jitt jit diamw aw bit, bagjiux dyrr qimx.

30 Hyhongr vecsnir qinaxzit narr cutjai iwsur jiac inx soxx cniuw duiwdik ee mic, pah siw Filistlangg qamxx byy qyckacc je mah?"

31 Hitt zit inx pah Filistlangg, dui' Micmas qaur Aijalon; vecsnir jin' iawsen.

32 Vecsnir dyrr qnuaxqinw jauw kir tec soxx cniuw ee ngiuu, guu, gu'axqniaw, dirr de nirr taii ; bah iauxx u huih, dyrr jiac ix.

33 U langg qra Saul qongw, "Vecsnir dikjue Jehovah lar, in'ui inx jiac iauxx u huih ee bah." Ix qongw, "Linw cabiu lar; dnaxx diyhh qy dua der jiyc laii guaw jiax."

34 Saul qycc qongw, "Linw diyhh siwqer qniaa dirr vecsnir ee diongqanx, qra inx qongw dagg langg kanx inx ee guu, dagg langg kanx inx ee ngiuu laii guaw jiax; dirr jiax taii laii jiac; m tangx jiac iauxx u huih ee bah, laii dikjue Jehovah." Hitt mii vecsnir dagg langg kanx inx ee guu kir hiax taii.

35 Saul qra Jehovah kiw jit jxy dnxuaa; jex si ix tauu jit vaiw qra Jehovah kiw ee dnxuaa.

36 Saul qongw, "Lanw dnaxx diyhh tauwmii lyc kir zib Filistlangg, cniuw inx, qaur tnix qngx, byy lauu inx jit langg." Vecsnir qongw, "Liw soxx knuar juer hyw :ee, dyrr qniaa ix." Jewsix qongw, "Lanw diyhh laii jiax, cinqin Siongrder."

37 Saul mng Siongrder qongxx, "Guaw diyhh lyc kir zib Filistlangg iacc mrbenw? Liw beh jiong' inx qaux hro Islael ee ciuw mah?" Hitt zit Siongrder byy rinr ix.

38 Saul qongw, "Linw vecsnir diongx ee sirdua longxx diyhh jnriu laii jiax, jabingg qinaxzit jitt xee jue si jairdirr simxmih?

39 Guaw qiw qiur Islael ingxuac ee Jehovah laii qongw, suizenn guaw ee qniaw Jonatan, ix iarr diyhh siw." Danrsi vecsnir diongx byy jit langg rinr ix.

40 Ix dyrr qra Islael ee jingwlangg qongw, "Linw kia jitt vingg, guaw qapp guaw ee qniaw Jonatan kia hitt vingg." Vecsnir duiww Saul qongw, "Liw knuar juer hyw :ee dyrr qniaa ix."

41 Saul qra Jehovah, Islael ee Siongrder qongw, "Qriuu Liw jixsi sidjingg"; dui' anxnix liamx diyc Jonatan qapp Saul, vecsnir longxx byy dairjir.

42 Saul qongw, "Diyhh dirr guaw qapp guaw ee qniaw Jonatan ee diongqanx laii liamx kaux"; dyrr liam diyc Jonatan.

43 Saul qra Jonatan qongw, "Liw qra guaw qongw liw juer simxmih su." Jonatan qongw, "Guaw sidjai ing ciuw nirr ee qnuaiw-aw-buew unr jit diamw aw bit laii cir bai lehh. Anxnix, guaw diyhh siw."

44 Saul qongw, "Jonatan ar, liw dikkag diyhh siw. Guan Siongrder anxnix qniaa; narr byy, dyrr e viw anxnix iauxkacc dang."

45 Vecsnir qra Saul qongw, "Jonatan ixqing’ qniaa jitt xee dua ee jinxqiur dirr Islael :ee, ix diyhh siw mah? Quatduanr m tangx. Guanw qiw ingxuac ee Jehovah laii qongw, ix jit qix taumngg iarr dikkag byy qalauc dirr de nirr, in'ui ix qinaxzit qapp Siongrder snaqab juer dairjir." Dui' anxnix vecsnir qiur Jonatan benw siw.

46 Saul dyrr jnriu .kir, byy duizib Filistlangg. Filistlangg iarr kir ix vunxsoxjai.

47 Saul jiangw qog ee quanvingr, dirliw Islael, kir qapp siwuii longxjongw ee duiwdik qaujenr, dyrr si qongqig Moablangg, Ammonlangg, Edom, qapp Zobah jiaxee ongg, qapp Filistlangg; ix bylun soxx kir, longxx kacc ngiaa.

48 Saul hunwiongw qongqig Amaleklangg, qiur Islael tuatli cniuw inx ee langg ee ciuw.

49 Saul ee qniaw si Jonatan, Isvi qapp Malqisua; ix nng xee jaboxqniaw ee miaa, dua :ee miaa qiyr Melab, ser :ee miaa qiyr Miqal.

50 Saul ee bow, miaa qiyr Ahinoam, si Ahimaaz ee jaboxqniaw; ix ee qundniuw, miaa qiyr Abner, si Ner ee qniaw, Ner si Saul ee jig.

51 Saul ee laurve Kis; Abner ee laurve Ner, dyrr si Abiel ee qniaw.

52 Saul itsingx siongsiongg qapp Filistlangg dua qaujenr; Saul qniwnarr knuar qnir u linglik ee langg, iacc si iongxsu, dyrr jiyjip laii uaw ix.

15 Samuel qra Saul qongw, "Jehovah crex guaw ing iuu buah liw, setlip liw juer ongg, dirliw Ix ee vecsnir Islael, soxiw liw diyhh tniax Jehovah soxx qongw ee ue.

2 Banrqunx ee Jehovah anxnix qongw, 'Islaellangg cud Egipt ee sii, Amaleklangg jnaixngiu kuanxtai inx, jnaixngiu ced inx ee lo, Guaw longxx qir .did.

3 Dnaxx liw diyhh kir pah Amalek, itjin bedbyy inx soxu :ee, byc did vyxsiyh inx; jiong' lxamm, luw, ginxaw, jiac linx :ee, qapp guu, ngiuu, logdyy, qapp luu, itjin taii siw.'"

4 Saul dyrr jiyjip vecsnir dirr Telem diamxsngr inx, qiong vorvingx zi-jap-bxan, Judahlangg jit-bxan.

5 Saul qaur Amalek ee sniaa, baihok dirr snuaqog diongx.

6 Saul qra Kenlangg qongw, "Linw lyc kir lirkuix Amaleklangg, benw did guaw jiong' linw qapp inx juer jit xe jaubet; in'ui Islaellangg cud Egipt ee sii, linw bad hyw kuanxtai inx." Dui' anxnix Kenlangg lirkuix Amaleklangg kir.

7 Saul pah Amaleklangg, dui' Havilah qaur Egipt taujingg ee Sur.

8 Ix uac uac liac Amalek ee ongg Agag, ing dyx itjin taii siw ix ee jiongww vecsnir.

9 Danrsi Saul qapp vecsnir vyxsiyh Agag, iarr vyxsiyh siongrr hyw ee ngiuu, guu, guu-aw, ngiuu-aw, qapp itcer hyw ee mic, m kingw jaubet ix; qniwnarr harjen m jniaa mic :ee, longxx itjin taii siw.

10 Hitt sii Jehovah ee ue limqaur Samuel, Ix qongw,

11 "Guaw uirdiyhh setlip Saul juer ongg laii tewhuew, in'ui ix uat dngw kir byy duer Guaw, byy junsiuw Guaw ee bingrling." Samuel jin' cecsimx, tong' mii qriuu Jehovah.

12 Samuel qeh jaxkiw, tauwjaw beh kir gniajih Saul; u langg qra Samuel qongw, Saul qaur Karmel, dirr hiax uirr qaqi kia jiyhvix, qycc uat dngw .quer .kir, lyc qaur Gilgal.

13 Samuel qaur Saul hiax, Saul qra ix qongw, "Guan Jehovah suwhog liw, guaw ixqing’ junsiuw Jehovah ee bingrling lar."

14 Samuel qongw, "Narr anxnix, jitt xee ngiuu mehmec hauw zip guaw ee hnirkangx, qapp guaw soxx tniax diyc guu decc ma, si simxmih indnuax?"

15 Saul qongw, "Inx si dui' Amaleklangg hiax duar .laii .ee; in'ui vecsnir vyxsiyh siongrr hyw ee ngiuu, guu, beh henr hro Jehovah, liw ee Siongrder; qi'uu :ee guanw longxx jaubet."

16 Samuel qra Saul qongw, "Liw diam diam, guaw beh jiong' Jehovah jarmii soxx qra guaw qongw :ee qra liw qongw." Ix qra ix qongw, "Cniaw qongw."

17 Samuel qongw, "Jaw liw suizenn qaqi knuar juer biser, qamxx m si siurr setlip juer Islael ee jipair ee tauu mah? Jehovah ing iuu buah liw juer ongg, laii dirliw Islael;

18 Qycc Jehovah crex liw kixsinx kir, huanhur liw qongxx, 'Amaleklangg si u jue ee langg, liw kir itjin jaubet ix, qycc qapp inx qaujenr, qaur inx longxx bet';

19 Liw sniaw su byy tranr Jehovah ee ue, qnuaxqinw kir cniuw mic, qniaa Jehovah soxx knuar juer pnaiw ee su ar?"

20 Saul qra Samuel qongw, "Guaw sidjai u tniatanr Jehovah ee bingrling, qniaa Jehovah soxx crex guaw qniaa ee lo, liac Amalek ee ongg Agag laii, itjin bet Amaleklangg;

21 Dogdok vecsnir dui' soxx cniuw ee mic ee diongqanx, cruw ngiuu, guu, ingqaix henr ee mic ee siongrr hyw :ee, beh dirr Gilgal jewhenr Jehovah, liw ee Siongrder."

22 Samuel qongw, "Jehovah hnuahiw siyjer jewsu, qamxx cincniu hnuahiw langg juntanr Jehovah ee ue mah? Knuar ar, juntanr ngiaa quer henwjer, tniatanr si ngiaa quer ngiuqangw ee iuu.

23 In'ui vuervuan si cincniu qniaa siasut ee jue, gnirsimx si cincniu hogsai huqew, cincniu vair gnoxsiong; uirdiyhh liw kiwsag Jehovah ee ue, Ix iarr kiwsag liw, byy hro liw juer ongg."

24 Saul duiww Samuel qongw, "Guaw u jue, guaw u huan diyc Jehovah ee bingrling qapp liw ee ue, in'ui guaw tniax vecsnir, tniax inx ee ue.

25 Dnaxx qriuu liw siawbenw guaw ee jue, qapp guaw dyr .kir, hro guaw tangx qingwvair Jehovah."

26 Samuel qra Saul qongw, "Guaw m qapp liw dyr .kir; in'ui liw kiwsag Jehovah ee bingrling, Jehovah iarr kiwsag liw, byy hro liw juer Islael ee ongg."

27 Samuel uat dngw srinx beh kir, Saul dyrr kiuw ix ee sna'axqix, snxax dyrr tiah dng.

28 Samuel qra ix qongw, "Qniaxzit Jehovah hro Islael-qog qapp liw juaddng, iarr si anxnix, jiong' qog sniuxsur hro liw ee cuwvnix ee jit xee, viw liw kacc hyw :ee.

29 Islael ee dua henxhig :ee, byy vehcat, iarr byy tewhuew."

30 Saul qongw, "Guaw u jue; suizenn anxnix, qriuu liw jundiong guaw dirr guaw ee vecsnir ee diongxlyw qapp Islaellangg ee binrjingg, qapp guaw dyr .kir, hro guaw qingwvair Jehovah, liw ee Siongrder."

31 Samuel dyrr uat dngw srinx duer Saul kir; Saul dyrr qingwvair Jehovah.

32 Samuel qongw, "Linw diyhh duar Amalek ee ongg Agag laii guaw jiax." Agag dyrr ansimx laii qaur ix ee binrjingg; Agag qongw, "Sixbyy ee qankow dikkag quer .kir lar."

33 Samuel qongw, "Liw ee dyx bad hro hurzinlangg byy qniaw, anxnix liw ee laurbuw dirr hurzinlangg diongx iarr beh byy qniaw"; dui' anxnix Samuel dirr Gilgal, dirr Jehovah ee binrjingg, jiong' Agag puar qui' der.

34 Samuel kir Rlamah; Saul jnriu kir ix ee cur qaur Gibeah.

35 Samuel qaur ix siw ee zit, byy qycc laii qnir Saul; in'ui Samuel uirdiyhh Saul iubun. Jehovah in'ui setlip Saul juer Islael ee ongg iarr tewhuew.

16 Jehovah qra Samuel qongw, "Guaw ixqing’ kiwsag Saul, byy hro ix juer Islael ee ongg, liw uirdiyhh ix iubun beh qaur zuarr quw ar? Liw diyhh ing qag drew iuu muaw muaw. Kir ar, Guaw beh crex liw kir Betlehemlangg Jesse hiax; in'ui Guaw dirr ix ee qniaw ee diongqanx virvan jit xee ongg."

2 Samuel qongw, "Guaw jnaixngiu tangx kir? Saul narr tniax .qnir, ix beh taii guaw." Jehovah qongw, "Liw tangx duar jit jiah guu-aw qapp liw kir, dyrr qongw, 'Guaw kir si beh jewhenr Jehovah.'

3 Liw diyhh cniaw Jesse laii hur jitt xee jewsu; Guaw beh jixsi liw soxx ingqaix qniaa ee su. Guaw soxx jixsi liw ee langg, liw diyhh ter Guaw qra ix buah iuu."

4 Samuel dyrr jiauww Jehovah ee ue kir qniaa, qaur Betlehem. Sniaa nirr hiaxee dniuxlyw longxx gniauhgniauc cuah, cud laii gniajih ix, qongw, "Liw laii si uirdiyhh ving'anx mah?"

5 Ix qongw, "Uirdiyhh ving'anx. Guaw si beh jewhenr Jehovah. Linw diyhh cingkir qaqi, laii qapp guaw hur jewsu." Samuel dyrr hro Jesse qapp ix hiaxee qniaw cingkir, qiyr inx laii hur jewsu.

6 Inx ixqing’ laii, Samuel knuar qnir Eliab, sniu qongxx, Jehovah soxx beh buah iuu :ee, qyxzenn dirr Ix ee binrjingg.

7 Danrsi Jehovah qra Samuel qongw, "Byc did knuar ix ee iongmau, qapp ix sinkux ee dua hanr. Jitt langg si Guaw soxx qirjuat, in'ui Jehovah decc knuar byy cincniu langg decc knuar. Langg knuar guarmau, Jehovah si knuar simlai."

8 Jesse qiyr Abinadab, hro ix dui' Samuel ee binrjingg qingquer; Samuel qongw, "Jehovah iarr byy qingw jitt langg."

9 Jesse qycc qiyr Sammah qingquer; ix qongw, "Jehovah iarr byy qingw jitt xee."

10 Jesse hro ix hiaxee qniaw cid xee, longxx dui' Samuel ee binrjingg qingquer.

11 Samuel qra Jesse qongw, "Liw ee qniaw longxx dirr jiax mah?" Ix rinr qongxx, "Iauxx u jit xee suacbuew :ee, dnaxx decc cri ngiuu." Samuel qra Jesse qongw, "Liw crex langg cua ix laii, in'ui ix iauxx bue laii, lanw byy beh jerdyh."

12 Dyrr crex langg cua ix zip .laii; ix ciacsig, bagjiux cingsiur, snix juer hyw knuar. Jehovah qongw, "Jitt langg dyrr si, liw kiw laii qra ix buah iuu."

13 Samuel dyrr ing qag-lai ee iuu, dirr ix hiaxee hniax ee diongqanx buah ix. Dui' hitt zit kiw, Jehovah ee Sinn dua dua limqaur David. Samuel kixsinx dyr kir Rlamah.

14 Jehovah ee Sinn lirkuix Saul, u pnaiw sinn dui' Jehovah hiax laii decc qiauxziauw ix.

15 Saul ee zinsinn duiww ix qongw, "Knuar ar, dnaxx u jit xee pnaiw sinn dui' Siongrder hiax laii qiauxziauw liw.

16 Guanw ee jruw diyhh bingrling qinsuii liw ee zinsinn cue jit xee gauu dnuaa kimm :ee laii. Dui' Siongrder hiax laii ee pnaiw sinn limqaur liw ee sii, hro ix ing ciuw dnuaa kimm, liw dyrr hyw."

17 Saul qra ix ee zinsinn qongw, "Linw qra guaw cue jit xee gauu dnuaa kimm :ee, cua laii guaw jiax."

18 Siauwlenlangg diongx u jit xee qongw, "Guaw bad knuar qnir Betlehemlangg Jesse jit xee qniaw gauu dnuaa kimm, si dua iongxsu, qycc si jenwsu, qongxue u diwhui, binrmau hyw knuar, Jehovah iarr qapp ix dilehh."

19 Saul crex suwjiaw kir qnir Jesse, qongw, "Crex liw ee qniaw David, dyrr si hitt xee cri ngiuu :ee, laii guaw jiax."

20 Jesse dyrr ing luu jair vniaw, qapp jit puede ee jiuw, qapp jit jiah snua'ngiuu-aw, qaux hro ix ee qniaw David, sangr hro Saul.

21 David qaur Saul hiax, qinsuii dirr ix ee binrjingg. Saul jin' tniar ix. David dyrr juer Saul giac qunkir ee langg.

22 Saul crex langg kir qnir Jesse, qongw, "Qriuu liw iong'unw David qinsuii dirr guaw ee binrjingg, in'ui ix did diyc undenw dirr guaw ee bagjiux jingg."

23 Dui' Siongrder hiax laii ee pnaiw sinn limqaur Saul ee sii, David dyrr tec kimm ing ciuw laii dnuaa. Saul dyrr kuansimx, did diyc hyw, pnaiw sinn lirkuix ix.

17 Filistlangg jurjip inx ee qunvingx beh qaujenr, jurjip dirr sriok Judad ee Sokoh, jrad ngiaa dirr Efes Dammim, dirr Sokoh qapp Azekah ee diongqanx.

2 Saul qapp Islaellangg jurjip, jrad ngiaa dirr Elah ee snuaqog, vaii duirgnow dixdik Filistlangg.

3 Filistlangg kia dirr jitt vingg ee snuax, Islaellangg kia dirr hitt vingg ee snuax, diongqanx u snuaqog.

4 Dui' Filist ee ngiaa-diongx u jit xee jenwjiongr cud .laii, miaa qiyr Goliat, si Gatlangg, sinkux quann lak dxng qycc jit liac;

5 Tauu dir dangkuex, srinx cing u lrann ee jenwqah, ix ee jenwqah ee dangg, u go-cingx sekel ee dang;

6 Duartuiw cing dangqunn, qingtauu diongx vue dangg ee qig;

7 Cniuvnir dua cincniu vowquix ee digsimx; cniux-buew ee tih u lak-vah sekel ee dang; u jit xee qnrua dinvaii :ee qniaa dirr ix ee taujingg.

8 Ix kia lehh duiww Islael ee qundui huah, qra inx qongw, "Linw cud laii vaii duirgnow beh sniaw su ar? Guaw qamxx m si Filistlangg, linw qamxx m si Saul ee lovok mah? Linw diongqanx qingw jit langg hro ix lyc laii guaw jiax.

9 Ix narr qapp guaw sna' taii e taii siw guaw, guanw dyrr beh juer linw ee lojaii; guaw narr kacc ngiaa ix, taii siw ix, linw dyrr beh juer guanw ee lojaii, hogsai guanw."

10 Hitt xee Filistlangg qycc qongw, "Guaw qinaxzit biauxsi Islael jiaxee qundui; linw qiyr jit langg cud .laii, qapp guaw sna' taii."

11 Saul qapp Islael jingwlangg tniax qnir Filistlangg jiaxee ue, dyrr jin' lunw, jin' qniax.

12 David si Judah Betlehem ee Eflatlangg Jesse ee qniaw. Jesse u veh xee qniaw. Dng' Saul ee sii, Jesse nihuer je, dirr langg ee diongqanx sngr si laurlangg.

13 Jesse hiaxee qniaw, snax xee kacc dua :ee duer Saul kir cutjingx; kir cutjingx hitt snax xee qniaw, dua :ee miaa Eliab, derr zi Abinadab, derr snax :ee Sammah.

14 David si derr id ser :ee; hitt snax xee kacc dua :ee qinduer Saul.

15 David ongxlaii dirr Saul ee soxjai, dirr Betlehem cri ix ee laurve ee ngiuu.

16 Hitt xee Filistlangg jaxamr cud laii kia lecc denw, ligquer sir-jap zit.

17 Jesse qra ix ee qniaw David qongw, "Liw diyhh qra liw hiaxee hniax duar hangx ee gnoxqog jit efah, qapp jitt jap xee vniaw, qinw qinw kir qunngiaa, hro liw hiaxee hniax;

18 Qycc duar jitt jap xee gulinvniaw, sangr hro inx ee cenjongw, qycc mng liw ee hniax ving'anx bor, duar ix ee jingwqir laii."

19 Saul qapp David ee snax xee hniax, qapp Islael jingwlangg, dirr Elah ee snuaqog, qapp Filistlangg qaujenr.

20 David tauwjaw kiw .laii, qra ngiuu-qrunn vangr qaux hro jit xee qowsiuw ee langg, jiauww Jesse soxx bingrling ix :ee, duar jiahmih kir qaur vailet ciax ee soxjai. Qunvingx duxaxx cud kir qaur jenwdniuu, huah beh qaujenr.

21 Islaellangg qapp Filistlangg longxx vailet duirgnow, liongxvingg ee qundui sna' duir.

22 David qra mihqnia qaudair dirr qor mihqnia ee langg ee ciuw, jauw qaur jenwdniuu, cingxanx ix ee hniax.

23 Qapp inx qongxue ee sii, knuar ar, hitt xee jenwjiongr, dyrr si Gat ee Filistlangg, miaa Goliat, dui' Filist ee duirgnow cud .laii, jiauww jingg soxx qongw :ee laii qongw. David u tniax .qnir.

24 Islael jingwlangg knuar qnir hitt langg, dyrr jauw siamw ix, jinrjai qniax.

25 Islaellangg qongw, "Jitt xee jnriu .laii ee langg, liw u knuar qnir mah? Ix jnriu .laii, si beh biauxsi Islael. Narr u langg e taii siw ix, ongg beh hro ix dua hyxgiac, jiong' ix ee jaboxqniaw qer ix, qycc hro ix ee laurve jit qrex dirr Islael diongx benw lap suer dngcex."

26 David mng kia dirr ix sinvnix hiaxee langg, "U langg taii siw jitt xee Filistlangg, sexduu Islael ee qenwsiaur, beh jnaixngiu kuanxtai ar? Jitt xee byy sriu qatlew ee Filistlangg si jirjui, qnaw biauxsi ingxuac Siongrder ee qundui mah?"

27 Vecsnir jiauww jingg ee ue rinr ix, qongw, narr u langg e taii siw jitt langg, beh anxnix kuanxtai ix.

28 David ee dua-hniax Eliab tniax qnir ix qapp langg decc qongxue, Eliab siurkir David, qongw, "Liw sniaw su lyc laii jiax? Hitt quiw jiah ngiuu dirr kongwiaw nirr, liw vangr qaux jirjui ar? Guaw jaix liw qiaugno; liw lyc laii vutqyr si beh knuar qaujenr."

29 David qongw, "Guaw u simxmih jue? Qamxx si byy indnuax mah?"

30 David dyrr lirkuix ix, kir ngr vadd langg, jiauww jingg ee ue decc mng; vecsnir jiauww jingg ee ue laii rinr ix.

31 David soxx qongw ee ue ixqing’ hro langg tniax .qnir, inx dyrr qongw hro Saul jaix; Saul dyrr crex langg qiyr ix laii.

32 David qra Saul qongw, "Langg mrbenw uirdiyhh hitt langg laii sitdnaw, liw ee lovok beh kir qapp hitt xee Filistlangg qaujenr."

33 Saul duiww David qongw, "Liw be e kir dixdik jitt xee Filistlangg qapp ix qaujenr; in'ui liw ee nihuer iauxquxx jiyw, ix dui' siauwlenn dyrr hagsip jenwsu."

34 David qra Saul qongw, "Liw ee lovok qra laurve qor ngiuu ee sii, u sraix iacc si himm laii, dui' ngiuu-qrunn diongx qa ngiuu-aw kir.

35 Guaw dyrr zib ix, pah ix, qiur ngiuu-aw cud ix ee cuir. Ix kiw laii beh qrang guaw, guaw dyrr kiuw ix ee cuiwerdauw, pah siw ix.

36 Liw ee lovok bad pah siw sraix qapp himm. Jitt xee byy sriu qatlew ee Filistlangg, iarr beh cincniu inx ee jit jiah anxnix; in'ui ix biauxsi ingxuac Siongrder ee qundui."

37 David qycc qongw, "Jehovah qiur guaw tuatli sraix ee ziauw qapp himm ee ziauw, Ix iarr beh qiur guaw tuatli jitt xee Filistlangg ee ciuw." Saul qra David qongw, "Liw kir ar, Jehovah beh qapp liw dilehh."

38 Saul dyrr ing ix ee qunhok hro David cing, ing dangg ee taukuex hro ix dir, qycc hro ix cing jenwqah.

39 David ing dyx haa dirr qunhok, cir qniaa knuar; in'ui m bad cing .quer. David qra Saul qongw, "Cing jiaxee guaw qniaa be kir, in'ui m bad cing .quer."

40 David dyrr trngr .kiw .laii; ix ciuw giac qnuaiw-aw, qycc dirr snuaknix-aw, qingw go der qngqut ee jiyhnng, he dirr deaw, dyrr si qor ngiuu ee langg soxx duar ee lrongg; ciuw tec hnir jiyc ee syh-aw, dyrr qniaa uaw hitt xee Filistlangg.

41 Hitt xee Filistlangg iarr naxx qniaa uaw David, qnrua vaii :ee qniaa dirr ix ee taujingg.

42 Hitt xee Filistlangg giac kiw laii knuar, knuar qnir David, dyrr knuawkinx ix; in'ui ix jiyw huer, sikdi ciah, binrmau hyw knuar.

43 Hitt xee Filistlangg qra David qongw, "Guaw qamxx si qxauw mah, liw jiacc giac qnuaiw-aw laii guaw jiax?" Filistlangg dyrr qiw qaqi ee siongrder, jiuwjow David.

44 Hitt xee Filistlangg qycc qra David qongw, "Liw laii guaw jiax, guaw beh ing liw ee bah hro kongdiongx ee vuejiauw qapp can'iaw ee iaxsiur."

45 David duiww hitt xee Filistlangg qongw, "Liw laii uaw qin guaw, si ing dyx, ing cniux, ing qig; guaw laii uaw qin liw, si ing banrqunx Jehovah ee miaa, Islael qundui ee Siongrder, dyrr si liw soxx biausi :ee.

46 Qinaxzit Jehovah beh jiong' liw qaux dirr guaw ee ciuw, guaw beh pah siw liw, taii liw ee taukag. Qinaxzit guaw beh jiong' Filist qunvingx ee sinsix, hro kongdiongx ee vuejiauw, derjniu ee iaxsiur, tangx hro poxtnie ee langg longxx jaix Islael u Siongrder;

47 Qycc hro jiaxee qui' qrunn ee langg jaix Jehovah qiur langg, m si ing dyx, iarr m si ing cniux, in'ui qaujenr ee su jairdirr Jehovah, Ix beh jiong' linw qaux dirr guanw ee ciuw."

48 Hitt xee Filistlangg kiw .laii, jinwjingg qinruaw beh jrih David. David iarr qnuaxqinw jauw .kir, ngr qundui beh jrih Filistlangg.

49 David crunx ciuw zip deaw lai, tec jit der jiyc-aw cud .laii, ing syh hnir .kir, sria diyc Filistlangg ee tauhiac, jiyc-aw dimm zip tauhiac; ix dyrr dyw .lyc .kir, bin pag dirr de nirr.

50 Anxnix David ing hnir syh qapp jiyc-aw kacc ngiaa Filistlangg, pah siw ix; danrsi David ee ciuw byy dyx.

51 David qinw qinw jauw .kir, kia dirr hitt xee Filistlangg ee dingxbin, jiong' ix ee dyx vuic cud sxiur; ing hitt qix taii siw ix, jamw ix ee taukag. Filist jingwlangg knuar qnir inx ee iongxsu ixqing’ siw, dyrr jauw.

52 Islaellangg qapp Judahlangg dyrr kiw .laii, huachiamr, duizib Filistlangg, qaur Gat qapp Eklon ee sniamngg. Diyhsiongx ee Filistlangg dyw dirr Saalaim ee lo, didqaur Gat, qapp Eklon.

53 Islaellangg duizib Filistlangg dywdngw .laii, dyrr cniuw inx ee ngiavnuaa.

54 David jiong' hitt xee Filistlangg ee taukag duar qaur Jelusalem; qycc ing ix ee qunkir he dirr qaqi ee vowvnii.

55 Saul knuar qnir David kir pah Filistlangg ee sii, dyrr mng qundniuw Abner qongxx, "Abner ar, hitt xee siauwlenlangg si jirjui ee qniaw?" Abner qongw, "Guaw qiw ongg ee uahmia laii jiuwjua, guaw m jaix."

56 Ongg qongw, "Liw kir mng knuar hitt xee ginxaw si jirjui ee qniaw."

57 David pah siw Filistlangg dyr .laii, Abner cua ix laii Saul ee binrjingg, ix ee ciuw nirr u Filistlangg ee taukag.

58 Saul mng ix qongxx, "Siauwlenlangg ar, liw si simxmih langg ee qniaw?" David qongw, "Guaw si liw ee lovok Betlehemlangg Jesse ee qniaw."

18 David qapp Saul qongw bingvik, Jonatan ee sniwmia qapp David ee sniwmia snix sna' lenn; Jonatan tniar ix cincniu qaqi ee sniwmia.

2 Hitt zit Saul lauu ix, byy hro ix dyr kir laurve ee qrex.

3 Jonatan qapp David nng langg qet'iog; in'ui ix tniar ix cincniu qaqi ee sniwmia.

4 Jonatan trngr ix sinkux ee guarsnax hro David; qycc jiong' ix ee qunhok, lenrr ix ee dyx, ix ee qringx, ix ee iyduar, iarr longxx hro ix.

5 Qniwnarr Saul crex ix kir dyclyc, David soxx kir byy m jingtongx. Saul dyrr setlip ix juer jenwsu ee taulangg. Jiongww vecsnir qapp Saul ee zinsinn longxx knuar juer hyw.

6 David pah siw hitt xee Filistlangg dywdngw, inx dyr .laii ee sii, hiaxee hurluw dui' Islael dagg xee sniaa cud .laii, cniuwquax, tiauwbuw, ing linlongqow, ing hnuahiw, ing jokgak ee kiwqu, laii gniajih Saul Ongg.

7 Hiaxee hurluw tiauwbuw, uree cniur, uree qongw:

Saul taii siw inx cingx cingx,

David taii siw inx bxan bxan.

8 Saul vutjiw siurkir, byy hnuahiw jitt xee ue, dyrr qongw, "Jiong' bxan bxan hro David, cingx cingx hro guaw, jixu cunx qok'ui byy hro ix nardnia."

9 Dui' hitt zit kiw, Saul knuar qnir David dyrr qra grinn.

10 Qeh zit, dui' Siongrder hiax laii ee pnaiw sinn dua dua limqaur Saul, ix dyrr dirr cur-lai qongw sendi'ue. David jiauwsiongg ing ciuw dnuaa kimm, Saul ciuw nirr u cniux.

11 Saul ing cniux qra sria, in'ui qongw, "Guaw beh cxir David, qra ix dingr dirr viah nirr." David dirr ix ee binrjingg siamxvi nng vaiw.

12 Saul qniax David, in'ui Jehovah qapp ix dilehh, lirkuix Saul.

14 Saul hro David lirkuix ix, setlip ix juer cenjongw; ix dirr vecsnir ee binrjingg cutzip. David qniww soxx juer ee dairjir byy m jingtongx, Jehovah qapp ix dilehh.

15 Saul knuar qnir David soxx juer ee dairjir jin' jingtongx, vutjiw qniax ix.

16 Dogdok Islael qapp Judah ee jingwlangg longxx tniar David, in'ui ix dirr inx ee binrjingg cutzip.

17 Saul qra David qongw, "Knuar ar, guaw beh ing dua jaboxqniaw Melab hro liw juer bow, dogdok rair liw juer guaw ee iongxsu, ter Jehovah qaujenr." Saul simlai qongw, "Guaw m tangx cinciuw hai ix, diyhh jiyh Filistlangg ee ciuw hai ix."

18 David qra Saul qongw, "Guaw si jirjui, guaw u simxmih sinhun, guaw ee laurve ee qrex dirr Islael diongx si simxmih hy ee qrex, guaw tangx juer ongg ee qniaxsair mah?"

19 Saul ee jaboxqniaw Melab dniardiyc hro David ee qrii qaur lar, qingxzenn hro Meholahlangg Adliel juer bow.

20 Saul ee jaboxqniaw Miqal tniar David, u langg qra Saul qongw; Saul hnuahiw jitt xee su.

21 Saul simlai qongw, "Guaw jiong' jitt xee jaboxqniaw hro David juer lybang laii brang ix, tangx jiyh Filistlangg ee ciuw hai ix." Saul dyrr qra David qongw, "Dnaxx jitt xee derr zi vaiw liw tangx juer guaw ee qniaxsair."

22 Saul huanhur zinsinn qongxx, "Ongg hnuahiw liw, zinsinn iarr tniar liw; soxiw liw tangx juer ongg ee qniaxsair."

23 Saul ee zinsinn dyrr jiong' jiaxee ue qongw hro David tniax. David qongw, "Linw pacsngr juer ongg ee qniaxsair si siyxkuaw su mah? Guaw si songwhiongx vibii ee langg."

24 Saul ee zinsinn huehog qongxx, David soxx qongw :ee anxnix, anxnix.

25 Saul qongw, "Linw diyhh duiww David qongw, ongg m air simxmih pingwlew, jixu beh jit-vah xee Filistlangg iongbut ee puee, tangx vywsiuu dirr ongg ee duiwdik." Saul ee iwsur beh hro David siw dirr Filistlangg ee ciuw.

26 Ix ee zinsinn jiong' jiaxee ue qra David qongw; David hnuahiw beh juer ongg ee qniaxsair.

27 Zidqii iauxx bue qaur, David kiw laii qapp duer ix ee langg kixsinx kir, taii siw nng-vah xee Filistlangg. David duar hiaxee iongbut ee puee, inx dyrr jiauww siauwgiac itjin henr hro ongg, hro ix tangx juer ongg ee qniaxsair. Dui' anxnix Saul jiong' jaboxqniaw Miqal hro ix juer bow.

28 Saul knuar .qnir, qycc jaix Jehovah qapp David dilehh; qycc Saul ee jaboxqniaw Miqal iarr tniar ix.

29 Saul ithuad qniax David; Saul siongsiongg juer David ee duiwdik.

30 Filist hiaxee siuxlingw cud laii qaujenr; inx dagg vaiw cud .laii, David soxx qniaa viw Saul hiaxee zinsinn kacc jingtongx; dui' anxnix ix ee miaa hro langg qyckacc jundiong.

19 Saul duiww ix ee qniaw Jonatan qapp jiongww zinsinn qongw, "Diyhh taii siw David"; danrsi Saul ee qniaw Jonatan vutjiw hnuahiw David.

2 Jonatan qra David qongw, "Guaw ee laurve Saul sniu beh taii liw; soxiw binaxjaxkiw liw diyhh siyxsimx, qaur jit xee penpiah ee soxjai, qaqi bih.

3 Guaw beh kir liw soxx bih ee cann, kia dirr guaw ee laurve ee sinvnix; guaw qapp guaw ee laurve girlun liw ee su. Guaw soxx knuar .qnir .ee, guaw beh qra liw qongw."

4 Jonatan duiww ix ee laurve Saul lun David, ter ix qongw hyw ue, qongw, "Ongg m tangx dikjue liw ee lovok David, in'ui ix m bad dikjue liw; ix duiww liw soxx qniaa :ee, longxx si hyw;

5 In'ui ix bad vniawmia taii siw hitt xee Filistlangg, Jehovah uirr Islael jingwlangg dua qniaa jinxqiur. Hitt sii liw knuar .qnir, vutjiw hnuahiw. Dnaxx sniaw su byy enqor beh taii siw David, lrauu byy jue ee langg ee huih, laii huanrjue ar?"

6 Saul tniax Jonatan ee ue; Saul qiw Jehovah ee uac laii jiuwjua qongxx, "Guaw byy beh hro ix siw."

7 Jonatan qiyr David laii; Jonatan jiong' jex itcer ee ue qra ix qongw. Jonatan cua David kir qnir Saul, ix iuguann kia dirr Saul ee binrjingg.

8 Ixau qycc u qaujenr. David cud kir qapp Filistlangg qaujenr, dua dua taii siw inx; inx dyrr dirr ix ee binrjingg dyjauw.

9 Saul jre dirr cur-lai, ciuw giac cniux; hitt sii dui' Jehovah hiaxee laii ee pnaiw sinn qycc limqaur ix. David ing ciuw dnuaa kimm.

10 Saul beh ing cniux cxir David, dingr ix dirr viah nirr; ix dyrr dui' Saul ee binrjingg siamw kuix; hitt qix cniux cak zip viah. Hitt mii David dyrr jauw, tangx laii siamxvi ix.

11 Saul crex langg qaur David ee cur siuw ix, tingwhau tnix qngx beh taii ix. David ee bow Miqal duiww ix qongw, "Liw qimmii narr byy dymia, binaxzit liw beh siurr taii."

12 Miqal dyrr dui' txangx-aw dui David lyc .kir; ix dyrr jauw .kir, laii siamxvi.

13 Miqal ing qrex-lai ee gnoxsiong he dirr bincngg, taukag kruar dirr snua'ngiu'mngg ee jimxtauu, ing pue kamr ix.

14 Saul crex langg kir liac David; Miqal qongw, "Ix puawvni."

15 Saul qycc crex langg kir knuar David, qongw, "Lenrr bincngg qrngx laii guaw jiax, guaw tangx taii siw ix."

16 Suwjiaw zip .kir, knuar qnir cngg nirr u gnoxsiong, taukag kruar dirr snua'ngiu'mngg ee jimxtauu.

17 Saul duiww Miqal qongw, "Liw sniaw su anxnix penr guaw, vangr guaw ee duiwdik dyjauw ar?" Miqal rinr qongxx, "Ix qra guaw qongw, 'Liw vangr guaw kir; byy, guaw qamxx diyhh taii siw liw mah?'"

18 David jauw .kir, dysiamw qaur Rlamah, qnir Samuel, jiong' Saul duiww ix soxx qniaa ee su, longxjongw qra ix qongw. Ix qapp Samuel dyrr kir Naiot kiarkiw.

19 U langg qra Saul qongw, "Knuar ar, David dirr Rlamah ee Naiot."

20 Saul crex suwjiaw kir liac David; inx knuar qnir jit din sendix decc qongw sendi'ue, qycc Samuel kia dirr inx diongqanx qamdog inx, Siongrder ee Sinn limqaur Saul ee suwjiaw, inx iarr qongw sendi'ue.

21 U langg jiong' jitt xee su qra Saul qongw; ix dyrr crex vadd xee suwjiaw kir; inx iarr qongw sendi'ue. Saul derr snax vaiw crex suwjiaw kir, inx iarr qongw sendi'ue.

22 Au .laii ix vunxsinx iarr kir Rlamah; qaur Seku ee dua jnew hiax, mng langg qongxx, "Samuel qapp David dirr dyclyc?" U langg qra ix qongw, "Knuar ar, dirr Rlamah ee Naiot."

23 Siongrder ee Sinn iarr limqaur ix; ix naxx qniaa naxx qongw sendi'ue, didqaur Rlamah ee Naiot.

24 Ix dyrr trngr snxax, dirr Samuel ee binrjingg qongw sendi'ue; tong' zit tong' mii tngwteh dyw lehh. Dui' anxnix, langg decc qongw, "Saul iarr let dirr sendix diongx mah?"

20 David dui' Rlamah ee Naiot dyjauw, qaur Jonatan ee binrjingg, qongw, "Guaw juer simxmih? Guaw u simxmih pnaiw? Dirr liw ee laurve ee binrjingg u simxmih jue, ix qingxzenn decc siauwsniu guaw ee sniwmia mah?"

2 Jonatan qra ix qongw, "Quatduanr m si, liw be qaur siw. Guaw ee laurve juer dairjir, bylun dua, ser, byy jit hxang byy hro guaw jaix. Guaw ee laurve qamxx qandna' unxmuaa guaw jitt hxang su mah? Quatduanr byy anxnix."

3 David qycc jiuwjua qongxx, "Liw ee laurve junw junw jaix guaw dirr liw ee binrjingg did diyc undenw; ix ee simx qongw, 'M tangx hro Jonatan jaix, qniax ix e iubun.' Guaw qiw Jehovah ee ingxuac qapp liw ee uahmia laii jiuwjua, guaw lirkuix siw jixu jit vo nardnia."

4 Jonatan qra David qongw, "Liw ee simx soxx air, guaw beh qra liw juer."

5 David qra Jonatan qongw, "Binaxzit si ceid, guaw ingqaix diyhh qapp ongg jerdyh. Qriuu liw iong'unw guaw kir bih dirr cann nirr, qaur derr snax zit ehngx.

6 Liw ee laurve narr knuar guaw byy dilehh, liw dyrr qongw, 'David cetced qriuu guaw jrunw ix dyr kir vunxsniaa Betlehem, in'ui ix tong' qrex dirr hiax henr nijer.'

7 Ix narr qongw, 'Hyw lar', dyrr liw ee lovok u ving'anx; ix narr huad siurkir, dyrr jaix ix quat'ir beh hai guaw.

8 Dnaxx liw diyhh six xunx hro liw ee lovok; in'ui liw jingg u hro liw ee lovok qapp liw qiw Jehovah laii qet'iog. Guaw narr u jue, cniaw liw vunxsinx taii guaw; sniaw su duar guaw qaur liw ee laurve hiax?"

9 Jonatan qongw, "Quatduanr byy duiww liw anxnix qniaa; in'ui guaw narr jinx jaix guaw ee laurve quat'ir beh hai liw, guaw qamxx byy qra liw qongw mah?"

10 David qra Jonatan qongw, "Liw ee laurve narr ing pnaiw sniasaur rinr liw, jirjui beh laii qra guaw qongw ar?"

11 Jonatan qra David qongw, "Laii lar, lanw cud laii kir cann nirr"; nng langg dyrr cud kir cann nirr.

12 Jonatan qra David qongw, "Guan Jehovah, Islael ee Siongrder juer qanjingr, binaxzit jitt sii, iacc si derr snax zit, guaw tamwknuar guaw ee laurve, narr u hyw iwsur ngr David, guaw qamxx byy crex langg qra liw qongw mah?

13 Guaw ee laurve narr u iwsur hai liw, guaw beh qra liw qongw, hro liw ving'anx kir; narr byy, guan Jehovah qavue jikhuat Jonatan. Guan Jehovah qapp liw dilehh, cincniu Ix bad qapp guaw ee laurve dilehh jidngiu.

14 M na guaw uac lehh ee sii, liw diyhh duiww guaw henxbingg Jehovah ee ju'air, benw did guaw sixbyy;

15 Dyrr Jehovah dui' derjniu itjin jenxduu David ee duiwdik ee sii, liw ingxuanw m tangx duiww guaw ee qrex juaddng liw ee unhui."

16 Jonatan dyrr qapp David ee qrex qet'iog, qongw, "Guan Jehovah dui' David jiaxee duiwdik ee ciuw laii tyw ix."

17 Jonatan in'ui tniar David, dyrr qiyr ix qycc jiuwjua; in'ui ix tniar ix cincniu tniar qaqi ee sniwmia.

18 Jonatan qra ix qongw, "Binaxzit si guec ee ceid, liw ee xui vangr kangx, beh qongw liw byy dilehh.

19 Danw qaur snax zit, liw diyhh qinw qinw lyc kir qaur liw jingg duw diyc dairjir soxx bih ee soxjai, dirr Ezel ee jiyhvnuaa hiax tingwhau.

20 Guaw beh sria snax qix jnxir dirr jiyhvnuaa vnix, naxx cincniu kyxvew jidngiu.

21 Guaw beh crex jit xee ginxaw, qongw, 'Liw kir cue hiaxee jnxir.' Guaw narr qra ginxaw qongw, 'Knuar ar, jnxir dirr liw jitt vingg, diyhh kiyh ix'; liw dyrr tangx dyr .laii; guaw qiw uac ee Jehovah laii jiuwjua, liw u ving'anx byy hai.

22 Guaw narr qra ginxaw qongw, 'Knuar ar, jnxir dirr liw hitt vingg, liw dyrr diyhh kir'; in'ui si Jehovah crex liw kir.

23 Lun qaur liw guaw qinaxzit soxx qongw :ee, u Jehovah dirr liw guaw ee diongqanx, didqaur ingxuanw."

24 David dyrr kir bih dirr cann nirr; qaur ceid, ongg jerdyh decbeh jiac.

25 Ongg jiauwsiongg jre ix ee xui, dyrr si uaw dirr viah nirr ee xui. Jonatan decc kia. Abner jre dirr Saul ee sinvnix. David ee xui vangr kangx.

26 Danrsi jitt zit Saul byy qongw simxmih; ix pacsngr David duw diyc dairjir, byy cingkir, ix dikkag si byy cingkir.

27 Qeh zit, dyrr si hitt guec ee cezi, David ee xui iuguann vangr kangx. Saul mng ix ee qniaw Jonatan qongxx, "Jesse ee qniaw jnaixngiu jazit qinaxzit longxx byy laii jiac?"

28 Jonatan rinr Saul qongxx, "David cetced qriuu guaw jrunw ix kir Betlehem.

29 Ix qongw, 'Qriuu liw jrunw guaw kir, in'ui guanw daux dirr sniaa-lai u jewsu, guaw ee hniax huanhur guaw kir. Dnaxx guaw narr dirr liw ee bagjiux jingg did diyc undenw, qriuu liw jrunw guaw kir qnir guaw hiaxee hniax.' Soxiw ix byy laii qapp ongg jerdyh."

30 Saul duiww Jonatan huad siurkir, qra ix qongw, "Liw jitt ee gnirsimx vuergik :ee, guaw qamxx m jaix liw qingw Jesse ee qniaw, qaqi cruw lingziok, drir qaur liw ee laurbuw duw diyc tngwteh ee lingziok mah?"

31 In'ui Jesse ee qniaw uac dirr derjniu ee sii, liw qapp liw ee qog dikkag be qenqor. Dnaxx diyhh crex langg kir liac ix qaur guaw jiax, ix dikkag diyhh siw."

32 Jonatan rinr ix ee laurve Saul, duiww ix qongw, "Ix sniaw su diyhh siw ar? Ix u juer simxmih ar?"

33 Saul jyc hitt qix cniux, beh cak Jonatan. Jonatan dyrr jaix ix ee laurve quat'ir beh taii David.

34 Dui' anxnix, Jonatan jin' siurkir, dyrr dui' dyh nirr kiw .laii, dirr jitt xee ceid byy jiac simxmih. Ix uirr David huanlyw, in'ui ix ee laurve lingziok ix.

35 Qeh jaxkiw, Jonatan jiauww ix qapp David soxx iog ee sii, cud kir qaur cann nirr; u jit xee ginxaw qapp ix kir.

36 Ix qra ginxaw qongw, "Liw jauw kir cue guaw soxx sria ee jnxir." Ginxaw jauw .kir. Ix dyrr sria jit qix jnxir dirr ix ee taujingg.

37 Ginxaw qaur Jonatan jnxir sria qaur ee soxjai, Jonatan dirr ginxaw ee aurbin qiyr qongxx, "Jnxir qamxx m si dirr liw ee taujingg mah?"

38 Jonatan qycc qiyr ginxaw, qongw, "Qnuaxqinw or, qinw qinw kir, m tangx encenn." Jonatan ee ginxaw dyrr kiyh hiaxee jnxir, dywdngw laii ix ee juxlangg hiax.

39 Danrsi ginxaw m jaix jex si simxmih iwsur, jixu Jonatan qapp David jaix jitt xee dairjir.

40 Jonatan jiong' kiwhaii qaudair ginxaw, huanhur qongxx, "Liw tec dyr kir sniaa-lai."

41 Ginxaw kir liauxau, David dyrr dui' lamsir jitt soxjai cud .laii, pag dirr de nirr, vair snax vair, nng langg sna' jimx, snaqab tikaur, David qyckacc qaur qik.

42 Jonatan qra David qongw, "Liw dnaxx ving'anx kir. Lanw nng langg ixqing’ qiw Jehovah ee miaa jiuwjua qongxx, guan Jehovah dirr liw guaw ee diongqanx, qycc dirr liw ee horer qapp guaw ee horer ee diongqanx, didqaur ingxuanw." Ix dyrr kiw laii kir; Jonatan iarr dyr kir sniaa-lai.

21 David qaur Nob, qaur jewsix Ahimelec hiax. Ahimelec qniahniaa laii jrih David, duiww ix qongw, "Liw sniaw su qaqi laii, byy langg qapp liw laii ar?"

2 David rinr jewsix Ahimelec qongxx, "Ongg bingrling guaw jit qnia su, qycc qra guaw qongw, 'Guaw soxx crex liw ee su, qapp guaw soxx bingrling liw :ee, longxx m tangx hro langg jaix.' Guaw ixqing’ pair siauwlenlangg dirr bxow soxjai tingwhau guaw.

3 Dnaxx liw ee ciuw u simxmih mic, cniaw liw ing go xee vniaw hro guaw, iacc si vadd hxang."

4 Jewsix duiww David qongw, "Guaw ee ciuw nirr byy vingsiongg ee vniaw, jixu sxingr ee vniaw. Narr siauwlenlangg byy cinqin hurzinlangg, jiacc tangx."

5 David rinr jewsix, qra ix qongw, "Qaur dnaxx iokliok u snax zit, m bad cinqun hurzinlangg. Guaw cutmngg ee sii, suizenn si vingsiongg ee dairjir, siauwlenlangg ee kiwqu si cingkir; hyhongr qinaxzit inx ee kiwqu qamxx byy sxingr mah?"

6 Jewsix dyrr tec sxingr ee vniaw hro ix, in'ui dirr hiax byy vadd mic ee vniaw, jixu vailet ee vniaw, dui' Jehovah ee binrjingg tec .kiw .laii .ee, tec .kiw .laii hitt zit, si beh he siyx ee vniaw laii vaii ix.

7 Dng' hitt zit dirr hiax, u Saul ee lovok lauu dirr Jehovah ee binrjingg, miaa qiyr Doeg, si Edomlangg, juer Saul qor jingsnix :ee ee taulangg.

8 David mng Ahimelec qongxx, "Liw ciuw-xe u cniux iacc si dyx iacc byy? In'ui ongg ee dairjir jin' qinxqib, guaw longxx byy duar dyx qapp kiwhaii."

9 Jewsix qongw, "U Filistlangg Goliat ee dyx, dyrr si liw jingg dirr Elah ee snuaqog soxx taii .siw .ee, dirr jiax, vaux dirr vor nirr, dirr efod ee aurbin. Liw narr beh ing, dyrr giac .kir, in'ui hitt qix ixgua byy vadd hxang." David qongw, "Jitt qix dyx byy jit qix e viw did ix, cniaw liw hro guaw."

10 Hitt zit David kixsinx, siamxvi Saul, jauw qaur Gat ee ongg Aqis hiax.

11 Aqis hiaxee zinsinn qra ix qongw, "David mah? Inx dirr tiauwbuw diongx cniuwhy qongxx, ' Saul taii siw :ee cingx cingx, David taii siw :ee bxan bxan', qamxx m si qiw jitt langg mah?"

12 David jiong' jiaxee ue jrunn dirr simlai, jin' qniax Gat ongg Aqis;

13 Dyrr dirr jingwlangg ee binrjingg, qexngua quxdong. Ix dirr inx ee ciuw-xe qew denqongg, dirr sniamngg ee mngsnir luan siaw luan uec, hro nxua lrauu dirr cuiwciux nirr.

14 Aqis qra ix ee zinsinn qongw, "Linw knuar, jitt xee langg si denqongg, sniaw su duar ix laii guaw jiax ar?

15 Guaw qamxx u kiamwing denqongg :ee, linw jiacc cua jitt langg laii dirr guaw ee binrjingg denqongg ar? Jitt langg qamxx tangx zip guaw ee cur mah?"

22 David dyrr lirkuix hiax, jauw qaur Adullam ee dong; ix ee hniadi qapp ix ee laurve juann qrex tniax .qnir, dyrr longxx lyc kir qaur ix hiax.

2 Qniwnarr kunxvig :ee, kiamwjer :ee, simlai utjud :ee, longxx jurjip qaur ix hiax. David dyrr juer inx ee tauu; uaw ix :ee iokliok u sir-vah langg.

3 David dui' hiaxe kir Moab ee Mizpah, qra Moab Ongg qongw, "Qriuu liw iong'unw guaw ee laurve laurbuw cud .laii, diamr linw jiax kia, tingwhau guaw jaix Siongrder beh qra guaw jnaixngiu qniaa."

4 Ix cua inx qaur Moab ee ongg ee binrjingg. David diamr dirr snuaje ee sijun, ix ee verbuw iarr diamr dirr Moab Ongg hiax.

5 Sendix Gad qra David qongw, "Liw m tangx diamr dirr jiax, diyhh kir Judah-de." David dyrr lirkuix hiax, kir qaur Helet ee ciurnaa.

6 Saul dirr Gibeah, jre dirr suisiliuw ee ciurkax, ciuw nirr giac cniux, jiongww zinsinn uiluii dirr ix ee jyriu. Saul tniax qnir qongxx, David qapp duer ee langg hro langg duw .diyc.

7 Saul dyrr qra uii ix ee zinsinn qongw, "Benjaminlangg ar, linw diyhh tniax. Jesse ee qniaw e ing cann qapp pudyhngg hro linw dagg langg mah? E setlip linw juer cenjongw, vecjongw mah?

8 Linw qingxzenn snaqab qewboo qongqig guaw. Guaw ee qniaw bad qapp Jesse ee qniaw qet'iog, byy langg vyr guaw jaix. Linw diongqanx byy jit langg kyxlinn guaw. Guaw ee qniaw qiausyx guaw ee zinsinn qongqig guaw, dngdanw guaw, cincniu qinaxzit ee kuanw, linw longxx byy vyr guaw jaix."

9 Hitt sii Edomlangg Doeg kia dirr Saul zinsinn ee diongqanx, qra ix qongw, "Guaw bad knuar qnir Jesse ee qniaw qaur Nob, qaur Ahitub ee qniaw Ahimelec hiax.

10 Ahimelec ter ix mng Jehovah, qycc hro ix jiahmic, iarr ing Filistlangg Goliat ee dyx hro ix."

11 Ongg dyrr crex langg driaur Ahitub ee qniaw, jewsix Ahimelec, qapp ix laurve juann qrex, dyrr si diamrr dirr Nob hiaxee jewsix; inx dyrr longxx laii ongg hiax.

12 Saul qongw, "Ahitub ee qniaw ar, diyhh tniax." Ix rinr qongxx, "Guaw ee jruw ar, guaw dirr jiax."

13 Saul qra ix qongw, "Linw sniaw su qapp Jesse ee qniaw qewboo qongqig guaw. Liw qingxzenn ing vniaw qapp dyx hro ix, qycc ter ix mng Siongrder, hro ix kiw laii qongqig guaw, dngdanw guaw, cincniu qinaxzit ee kuanw?"

14 Ahimelec rinr ongg qongxx, "Liw ee zinsinn diongx, jirjui e viw did David ee jinrdiongx ar? Ix si ongg ee qniaxsair, qycc juer liw ee camboo, iarr dirr liw ee qrex-diongx si junquir :ee.

15 Guaw qamxx si dui' qinaxzit jiacc ter ix mng Siongrder mah? Guaw quatduanr byy hitt hy iwsur. Ongg byc did ing simxmih qruix dirr lovok qapp guaw ee laurve juann qrex; in'ui jiaxee itcer ee su, bylun dua, ser, liw ee lovok longxx m jaix."

16 Ongg qongw, "Ahimelec ar, liw qapp liw ee laurve juann qrex longg dikag diyhh siw."

17 Ongg bingrling jyxiu ee sirue qongxx, "Linw uat dngw kir taii Jehovah ee jewsix; in'ui inx iarr vangjan David, qycc in'ui inx jaix David dyjauw, qingxzenn byy vyr guaw jaix." Danrsi ongg ee zinsinn m kingw crunx ciuw pah siw Jehovah ee jewsix.

18 Ongg qra Doeg qongw, "Liw uat dngw kir pah hiaxee jewsix." Edomlangg Doeg dyrr uat dngw kir pah jewsix; hitt zit taii siw cing iuwduervor ee efod veh-jap-go langg.

19 Qycc ing dyx pah jewsix ee sniaa Nob, qidiongx ee lamluw, ginxaw, jiac linx ee ngex-aw, qapp guu, luu, ngiuu, longxx ing dyx taii siw.

20 Ahitub ee qniaw, Ahimelc u jit xee qniaw, miaa qiyr Abiatar, tuatli, jauw kir duer David.

21 Abiatar qra David qongw Saul u taii siw Jehovah ee jewsix.

22 David qra Abiatar qongw, "Hitt zit Edomlangg Doeg dirr hiax, guaw jaix ix dikkag e qra Saul qongw. Liw ee laurve juann qrex sitlyc sniwmia, longxx si in'ui guaw ee enqor.

23 Liw diyhh qapp guaw druar, mrbenw qniax; in'ui siauwsniu guaw ee sniwmia :ee dyrr si siauwsniu liw ee sniwmia. Liw qapp guaw druar, e did diyc vyxjuann."

23 U langg vyr David qongxx, "Knuar ar, Filistlangg pah Keilah, cniuw gorqakdniuu."

2 David dyrr mng Jehovah qongxx, "Guaw tangx kir pah hiaxee Filistlangg iacc m tangx?" Jehovah qra David qongw, "Liw tangx kir pah Filistlangg, qiur Keilah."

3 Duer David ee langg qra ix qongw, "Lanw dirr Judah-de jiax siongrcniaw qniahniaa, hyhongr kir Keilah pah Filistlangg ee qundui ar?"

4 David qycc mng Jehovah. Jehovah rinr qongxx, "Liw kiw .laii, lyc kir Keilah, in'ui Guaw beh ing Filistlangg qaux dirr liw ee ciuw."

5 David qapp duer ix ee langg kir Keilah, qapp Filistlangg qaujenr; cniuw inx ee jingsnix, taii siw inx jerje langg; anxnix David qiur dirr Keilah kiarkiw ee vecsnir.

6 Ahimelec ee qniaw Abiatar jauw kir qaur Keilah qnir David ee sii, ciuw nirr duar efod lyc .kir.

7 U langg qra Saul qongw, "David qaur Keilah." Saul qongw, "Siongrder jiong' ix qaux dirr guaw ee ciuw, in'ui ix zip u mngg u cnuar ee sniaa, qnuaix diauu dirr hitt lairbin."

8 Saul dyrr jiyjip jiongww vecsnir, beh kir qaujenr, lyc kir Keilah, uikunr David qapp duer ix ee langg.

9 David jaix Saul sed qewboo beh hai ix, dyrr qra Abiatar qongw, "Liw duar efod laii."

10 David qongw, "Jehovah, Islael ee Siongrder ar, Liw ee lovok kaksit tniax qnir Saul rair beh laii Keilah, beh uirdiyhh guaw ee enqor bet jitt xee sniaa.

11 Keilahlangg beh jiong' guaw qaux dirr ix ee ciuw iacc byy? Saul beh jiauww Liw ee lovok soxx tniax .qnir .ee lyc .laii iacc byy? Jehovah, Islael ee Siongrder ar, qriuu Liw jixsi Liw ee lovok." Jehovah qongw, "Saul beh lyc .laii."

12 David qycc qongw, "Keilahlangg beh jiong' guaw qapp duer guaw ee langg qaux dirr Saul ee ciuw mah?" Jehovah qongw, "Inx beh jiong' liw qaux hro ix."

13 David qapp duer ix ee langg, iokliok lak-vah, dyrr kixsinx cud Keilah, kir inx soxx kir ee soxjai. U langg qra Saul qongw, "David ixqing’ dui' Keilah dyjauw." Saul dyrr byy cud .kir.

14 David diamr dirr kongwiaw ee soxjai, siongsiongg dirr Zif ee kongwiaw ee snuade. Saul dagg zit cue ix; danrsi Siongrder byy jiong' David qaux dirr ix ee ciuw.

15 David jaix Saul ixqing’ cud laii decc siauwsniu ix ee sniwmia. Hitt sii David dirr Zif ee kongwiaw, diamr dirr ciurnaa lai.

16 Saul ee qniaw Jonatan kixsinx, kir hitt xee ciurnaa lai qnir David, hro ix kyr Siongrder laii qenqor.

17 Dyrr qra ix qongw, "Mrbenw qniax, guaw ee ve Saul ee ciuw cue liw be diyc. Liw beh juer Islael ee ongg, guaw beh juer liw ee derr zi; jitt xee su guaw ee ve Saul ixqing’ jaix."

18 Dui' anxnix nng langg dirr Jehovah ee binrjingg qet'iog. David diamr ciurnaa, Jonatan dyr kir ix ee cur.

19 Ziflangg jnriu kir Gibeah qnir Saul, qongw, "David qamxx m si diamr dirr guanw hiax, bih dirr ciurnaa lai ee uersow, dirr Judeah lamvingg ee Haqilah Snuax mah?

20 Ongg ar, cniaw liw jiauww liw ee simx soxx rair lyc .kir .ee lyc .kir; jiong' ix qaux dirr ongg ee ciuw si guanw ee dai."

21 Saul qongw, "Guan Jehovah suwhog linw, in'ui linw kyxlinn guaw.

22 Cniaw linw dyr .kir, qycc dairsingx virvan, siongser jaix, tamwknuar ix qniadac ee soxjai, simxmih langg knuar qnir ix dirr hiax; in'ui u langg qra guaw qongw, ix jin' qauxquair.

23 Soxiw linw diyhh caknuar, jaix ix itcer qaqi bicbat ee soxjai, dywdngw laii ing sidjingg qra guaw qongw; guaw dyrr beh qapp linw kir. Ix narr dirr jitt xee qingxlai, guaw beh dirr Judah ee jiongww hniusia qra ix ciaux .cud .laii."

24 Inx dyrr kixsinx, dairsingx Saul kir Zif. David qapp duer ix ee langg diamr dirr Maon ee kongwiaw, dirr Judah lamsir ee soxjai.

25 Saul qapp duer ix ee langg kir cue ix. U langg qra David qongw; ix dyrr lyc kir qaur jiyhvnuaa, diamr dirr Maon ee kongwiaw. Saul tniax .qnir, dyrr dirr Maon ee kongwiaw duizib David.

26 Saul qniaa dirr snuax ee jitt vingg, David qapp duer ix ee langg qniaa dirr snuax ee hitt vingg. David qinxqib qniaa, siamxvi dirr Saul ee binrjingg; in'ui Saul qapp duer ix ee langg, siwbin uii David qapp duer ix ee langg, beh liac inx.

27 U suwjiaw qaur, laii vyr Saul qongxx, "Liw diyhh qinw qinw dyr .laii, in'ui Filistlangg cimhuan qingxqair."

28 Dui' anxnix Saul byy zib David, dyr kir dixdik Filistlangg; in'ui anxnix, hitt xee soxjai miaa qiyr Qeckuix Snuax.

29 David dui' hiax jnriu .kir, diamr dirr Engedi ee uersow.

24 Saul duizib Filistlangg dyr .laii ee sii, u langg qra ix qongw, "Knuar ar, David diamr dirr Engedi ee kongwiaw."

2 Saul dyrr dui' Islael diongx cua qingxsuanw ee vxingx snax-cingx kir cue David, qapp duer ix ee langg, kir iaw snua'ngiuu ee jiyhvnuaa,

3 Qaur lo-vnix ee ngiuu-diauu, dirr hiax u dong, Saul zip kir beh dairven. David qapp duer ix ee langg bih dirr dong-lai kacc cimx ee soxjai.

4 Qinduer David ee langg qra ix qongw, "Jehovah bad qra liw qongw, 'Guaw beh jiong' liw ee duiwdik qaux dirr liw ee ciuw, jiauww liw soxx knuar juer hyw :ee kuanxtai ix.' Knuar ar, hitt xee zit qaur lar." David dyrr kiw .laii, amwjni quah Saul guarhok ee snaaxqix.

5 Au .laii David simlai qaqi jikvi; in'ui quah Saul ee snaxqix.

6 Ix duiww duer ix ee langg qongw, "Guan Jehovah qimwjiw guaw duiww guaw ee jruw, Jehovah soxx buah iuu :ee, qniaa jitt xee su, dyrr si kixciuw laii qongqig ix; in'ui ix si Jehovah soxx buah iuu :ee."

7 David ing jiaxee ue joxjiw duer ix ee langg, m jrunw inx kiw laii qongqig Saul. Saul kiw .laii, dui' dong-lai cud kir qniaa ix ee lo.

8 Au .laii David iarr kiw .laii, dui' dong-lai cud .kir, dirr Saul ee aurbin qiyr qongxx, "Guaw ee jruw, guaw ee ongg." Saul uat tauu knuar, David dyrr kud srinx pag dirr de nirr vair.

9 David duiww Saul qongw, "Liw sniaw su tniax langg ee ue, qongw, 'David sniu beh hai liw.'

10 Qinaxzit liw cinbak knuar .qnir, qinaxzit liw dirr dong-lai, Jehovah jiong' liw qaux dirr guaw ee ciuw. U langg qiyr guaw taii liw; danrsi guaw tniawsiyh liw. Guaw qongw, 'Guaw byy beh crunx ciuw hai guaw ee jruw; in'ui ix si Jehovah soxx buah iuu :ee.'

11 Guaw ee ve ar, liw knuar jex, knuar liw guarhok ee snaaxqix dirr guaw ee ciuw. Guaw quah liw ee guarhok snaaxqix, byy taii liw; dui' anxnix liw tangx knuar cud, dyrr jaix guaw ee ciuw byy juer simxmih pnaiw, byy vuergik liw; guaw m bad dikjue liw, danrsi liw cincniu paclac :ee siauwsniu guaw ee sniwmia.

12 Guan Jehovah dirr liw guaw ee diongqanx pnuawduanr, Jehovah beh dirr liw ee sinjniu qra guaw sin'uanx; danrsi guaw ee ciuw byy beh hai liw.

13 Cincniu qoxjaxlangg u jit qxur sioggiw qongxx, 'Pnaiw su dui' pnaiw langg cud'; danrsi guaw ee ciuw m qrang liw.

14 Islael Ongg cud laii beh cue jirjui ar? Liw duizib jirjui ar? Vutqyr cue jit jiah siw qxauw, jit liap qajauw.

15 Soxiw guan Jehovah juer simxpnauwsix, pnuawduanr dirr liw guaw ee diongqanx; qycc qamwcad, laii venrho guaw ee anwqnia, qiur guaw cud liw ee ciuw."

16 David duiww Saul qongw jiaxee ue suah, Saul qongw, "Guaw ee qniaw David, jex si liw ee sniax mah?" Saul dyrr cud sniax tikaur.

17 Ix qra David qongw, "Liw viw guaw kacc qonggi, in'ui liw ing hyw vyr guaw, danrsi guaw ing pnaiw vyr liw.

18 Liw qinaxzit si viauxbingg ing hyw kuanxtai guaw, in'ui Jehovah jiong' guaw qaux dirr liw ee ciuw, danrsi liw byy taii siw guaw.

19 Langg narr duw diyc ix ee duiwdik, qamxx u vangr ix ving'anx kir mah? Guan Jehovah in'ui liw qinaxzit duiww guaw soxx qniaa :ee, ing hyw vyr liw.

20 Knuar ar, dnaxx guaw, jaix liw dikkag beh juer ongg, Islael-qog beh qenqor dirr liw ee ciuw.

21 Dnaxx liw diyhh qiw Jehovah duiww guaw jiuwjua, guaw quewsinx liauw, byy jenxduu guaw ee horer, dirr guaw ee horer, dirr guaw ee ve ee qrex byy bedbyy guaw ee miaa."

22 David dyrr ngr Saul jiuwjua. Saul dyrr dyr kir ix ee cur. David qapp duer ix ee langg jnriu kir uersow.

25 Samuel siw, Islael jingwlangg jurjip, uirdiyhh ix tikaur, baijongr ix dirr ix qaqi ee cur, dyrr si dirr Rlamah. David kixsinx lyc kir dirr Palan ee kongwiaw.

2 Dirr Maon u jit langg, ix ee sanxgiap dirr Karmel, si dua hyxgiac, u mi'ngiuu snax-cingx jiah, snua'ngiuu jit-cingx jiah; ix dirr Karmel jenw ngiumngg.

3 Hitt langg si Kaleb-jok ee langg, miaa qiyr Nabal, ix ee bow miaa qiyr Abigail, si cangmiaa qycc suiw ee hurzinlangg, danrsi hitt langg ee qniajuer si gnirsimx qycc hiong'og.

4 David dirr kongwiaw tniax qnir Nabal decc jenw ngiu'mngg,

5 David dyrr crex jap xee siauwlenlangg. David huanhur hiaxee siauwlenlangg qongxx, "Linw diyhh jnriu kir Karmel, qnir Nabal, ing guaw ee miaa qra ix cingxanx.

6 Diyhh qra hitt xee hyxmiarlangg qongw, 'Guan liw ving'anx, guan liw ee qrex ving'anx, guan liw itcer soxu :ee longxx ving'anx.

7 Dnaxx guaw tniax qnir qongxx, u langg dirr liw hiax, qra liw jenw ngiu'mngg. Liw ee bogjiaw bad qapp guanw druar, guanw byy kihu ix; inx dirr Karmel ee sii, longxx m bad sitlyc simxmih.

8 Tangx mng liw ee siauwlenlangg, inx beh qra liw qongw. Soxiw guan guaw ee siauwlenlangg dirr liw ee bagjiux jingg did diyc undenw; in'ui guanw laii si hyw zidjiw, qriuu liw jiauww liw ee ciuw suiven tec damrvyc hro liw ee lovok, qapp liw ee qniaw David.'"

9 David ee siauwlenlangg qaur, dyrr jiong' jiaxee ue ing David ee miaa, longxx qra Nabal qongw, dyrr jing jing tingwhau.

10 Nabal rinr David ee lovok qongxx, "David si jirjui? Jesse ee qniaw si jirjui? Qinrlaii jerje lovok vue ix ee juxlangg.

11 Guaw ee vniaw, guaw ee juiw, qapp uirdiyhh jenw ngiu'mngg ee langg, guaw soxx taii jingsnix ee bah, qamxx tangx hro hiaxee guaw m jaix ix dui' dyclyc laii ee langg mah?"

12 David ee siauwlenlangg dyrr uat dngw srinx, dui' guanlo dyr .kir, jiauww jiaxee ue longxx qra David qongw.

13 David duiww duer ix ee langg qongw, "Linw dagg langg longxx diyhh vue dyx." Inx dyrr longxx vue dyx. David iarr vue dyx; duer David jnriu .kir .ee iokliok u sir-vah langg, lauu nng-vah langg qowsiuw jabmic.

14 Nabal hiaxee siauwlenlangg diongx u jit xee laii qra Nabal ee bow Abigail qongw, "David dui' kongwiaw crex suwjiaw laii cingxanx guanw juxlangg, juxlangg huanxdngw saupii inx.

15 Danrsi hiaxee langg kuanxtai guanw jin' hyw, guanw dirr can'iaw qapp inx ongxlaii ee sii, longxx byy siurr sionghai, iarr byy sitlyc simxmih.

16 Guanw dirr inx hiax cri ngiuu ee sii, inx mizit juer guanw ee cniuuii.

17 Dnaxx liw diyhh jaix, iarr diyhh dnaxsngr, knuar liw beh jnaixngiu qniaa; in'ui u dniardiyc iwsur beh hai guanw ee juxlangg qapp ix ee juann qrex; ix ee singwjingg hiong'og, byy langg qnaw qapp ix qongxue."

18 Abigail dyrr qnuaxqinw jiong' nng-vah xee vniaw, nng puede jiuw, go jiah virvan hyw ee ngiuu, go ser aw hxang ee gnoxqog, jit-vah pax pudyqnuax, nng-vah xee buhuaqyxvniaw, hro quixnarr jiah luu vue,

19 Qra ix hiaxee siauwlenlangg qongw, "Linw juer tauu kir, guaw beh duer linw ee aurbin kir." Danrsi ix byy qra ix ee diongrhux Nabal qongw.

20 Ix dyrr kiaa luu, duxaxx lyc snuax ee uatqag, hutzenn knuar qnir David qapp duer ix ee langg dirr duiwbin lyc .laii; ix dyrr duw diyc inx.

21 David bad qongw, "Jitt langg dirr kongwiaw itcer soxu :ee, guaw qra ix qowsiuw, drir qaur sriok dirr ix :ee byy sitlyc jit hxang, anxnix jyr sidjai si kangx kangx. Ix ing pnaiw vyr guaw ee hyw.

22 Huanrnarr sriok ix :ee, guaw narr lauu ix jit xee davoqniaw qaur binaxjair tnix qngx, guan Siongrder ing kuanxtai David ee duiwdik :ee, viw anxnix iauxx kacc dang kuanxtai guaw."

23 Abigail knuar qnir David, dyrr qnuaxqinw dui' ix ee luu lyc .laii, dirr David ee binrjingg ngar tauu pag dirr de nirr vair ix.

24 Ix pag dirr ix ee kax-xe, qongw, "Guaw ee jruw ar, guan jitt xee jue qruix dirr guaw, qriuu liw jrunw liw ee luxvi qongw hro liw tniax, qycc qriuu liw tniax liw ee luxvi ee ue.

25 Qriuu guaw ee jruw byc did diwir jitt xee byy herlyc ee langg Nabal, in'ui ix ee miaa jnaixngiu, ix ee langkuanw iarr si anxnix. Ix ee miaa qiyr Nabal, juewlangg gugong. Danrsi guaw ee jruw soxx crex .laii ee siauwlenlangg, liw ee luxvi iarr byy knuar .qnir.

26 Guaw ee jruw ar, Jehovah qiwzenn qimwjiw liw huan diyc taii siw langg ee jue, ing liw ee ciuw vyr qaqi ee qiusiuu, soxiw guaw qiw ingxuac ee Jehovah qapp liw ee uahmia laii jiuwjua qongxx, guan liw ee duiwdik, qapp qewboo hai guaw ee jruw :ee, longxx cincniu Nabal.

27 Dnaxx liw ee luxvi soxx duar laii hro guaw ee jruw ee lexmic, tangx hro qinduer guaw ee jruw ee siauwlenlangg.

28 Qriuu liw kuansur liw ee luxvi ee juerquar, in'ui Jehovah dikkag qra guaw ee jruw qenwlip qenqor ee qrex, in'ui guaw ee jruw uirdiyhh Jehovah qaujenr; qycc dirr liw itsingx ee zit byy craa cud liw u simxmih quewsid.

29 Suizenn u langg kiw laii duizib liw, siauwsniu liw ee sniwmia, danrsi guaw ee jruw ee sniwmia beh dirr Jehovah, liw ee Siongrder hiax, vaux dirr uahmia ee vaux-lai; liw ee duiwdik ee sniwmia, Jehovah beh qra ix hnir .cud .laii, cincniu dui' hniwsyh ee diongqanx hnir .cud .kir jidngiu.

30 Qaur au .zit Jehovah jiauww Ix soxx ingwunw guaw ee jruw ee hokkir, laii itjin qniaa dirr liw, setlip liw juer Islael ee tauu.

31 Dng' hitt sii, guaw ee jruw mrbenw uirdiyhh lrauu byy jue ee langg ee huih, qaqi ee sin'uanx, drir qaur u simxmih iubun, iacc si simlai qaqi jikvi. Jehovah suwhog hro guaw ee jruw ee sii, qriuu liw qiwliam liw ee luxvi."

32 David qra Abigail qongw, "Jehovah, Islael ee Siongrder, si ingqaix ylyw :ee; in'ui Ix qinaxzit crex liw laii duw diyc guaw;

33 Liw ee diwhui tangx ylyw, liw vunxsinx iarr tangx ylyw; in'ui liw qinaxzit joxdongr guaw huan diyc taii siw langg ee jue, byy ing qaqi ee ciuw vyr qaqi ee qiusiuu.

34 Qimwjiw guaw sionghai liw ee Jehovah, Islael ee Siongrder, guaw qiw Ix ee ingxuac laii jiuwjua, narr liw byy qinw qinw laii jrih guaw, qaur binaxjaxkiw qniwnarr sriok Nabal :ee, quatduanr byy lauu jit xee davoqniaw."

35 David siux Abigail duar laii hro ix ee mic, dyrr qra ix qongw, "Liw tangx ving'anx dyr kir liw ee qrex. Knuar ar, guaw u tniax liw ee ue."

36 Abigail qaur Nabal hiax, knuar qnir ix dirr qrex-lai vaised ensiac, cincniu ongg ee ensiac. Nabal simx dua hnuahiw, in'ui ix jin' dua juir. Soxiw Abigail dua, ser ee su, longxx byy qra ix qongw; tingwhau qaur qeh jaxkiw.

37 Quar qeh jaxkiw, Nabal jiuw trer; ix ee bow jiong' jiaxee su qra ix qongw. Ix ee simx dirr lairbin cincniu siw, ix venr cincniu jiyhtauu.

38 Iokliok jap zit, Jehovah pah Nabal, ix dyrr siw.

39 David tniax qnir Nabal ixqing’ siw, dyrr qongw, "Ingqaix diyhh ylyw Jehovah, in'ui guaw dui' Nabal ee ciuw soxx sriu ee lingziok, Ix u qra guaw sin'uanx, qycc joxjiw lovok qniaa pnaiw. Jehovah iarr hro Nabal ee pnaiw qruix qaur Nabal ee taukag." Anxnix David dyrr crex langg kir qra Abigail qongw, beh crua ix juer bow.

40 David ee lovok qaur Karmel qnir Abigail, qra ix qongw, "David crex guaw laii qnir liw, sniu beh crua liw juer bow."

41 Abigail dyrr kiw .laii, pag dirr de nirr, qongw, "Liw ee luxvi dirr jiax, guan juer ce'ing, laii sew guaw ee jruw hiaxee lovok ee kax."

42 Abigail qinw qinw kiw .laii, kiaa luu, u ix go xee luxvi snaqab kir; ix dyrr duer David ee suwjiaw kir juer David ee bow.

43 David iarr crua Jezleellangg Ahinoam; inx nng langg longxx juer ix ee bow.

44 Saul ixqing’ jiong' ix ee jaboxqniaw Miqal, dyrr si David ee bow, hro Gallimlangg Lais ee qniaw Palti, juer bow.

26 Ziflangg qaur Gibeah qnir Saul, qongw, "David qamxx m si qaqi bih dirr Judah taujingg ee Haqilah ee snuax mah?"

2 Saul dyrr kiw .laii, cua Islael diongx qingxsuanw ee vxingx snax-cingx, lyc kir qaur Zif ee kongwiaw, beh dirr Zif ee kongwiaw cue David.

3 Saul dirr Judah taujingg ee Haqilah Snuax, jrad ngiaa dirr lo nirr. David diamr dirr kongwiaw, jaix Saul laii kongwiaw beh duizib ix.

4 David dyrr crex quixnarr xee jingtamr, jiacc jaix Saul jinjniar laii.

5 David dyrr kiw .laii, qaur Saul jrad ngiaa ee soxjai. David knuar qnir Saul qapp ix ee qundniuw Ner ee qniaw Abner kunr ee soxjai, Saul kunr dirr vailet ciax ee lairbin, vecsnir jrad ngiaa dirr ix ee siwuii.

6 David duiww Hitlangg Ahimelec, qapp Zeluiah ee qniaw Joab ee hniadi Abisai qongw, "Jirjui beh qapp guaw lyc .kir, qaur ngiavnuaa, qaur Saul hiax?" Abisai qongw, "Guaw qapp liw lyc .kir."

7 David qapp Abisai tauwmii qaur vecsnir hiax, knuar qnir Saul dyw dirr vailet ee ciax ee lairbin decc kunr; ix ee cniux dirr taukag vnix, cah dirr de nirr; Abner qapp vecsnir kunr dirr ix ee siwuii.

8 Abisai qra David qongw, "Siongrder qinaxzit jiong' liw ee duiwdik qaux dirr liw ee ciuw, qriuu liw jrunw guaw ing cniux qra ix cak dirr de nirr, cak jit xee, mrbenw nng xee."

9 David qra Abisai qongw, "M tangx hai siw ix. Jirjui kiw ciuw hai Jehovah soxx buah iuu :ee suacc byy jue ar?"

10 David qycc qongw, "Guaw qiw ingxuanw ee Jehovah laii jiuwjua, Jehovah beh pah ix; qiamxcaiw ix sizit beh qaur, iacc si ix beh lyc jenwdin laii siw.

11 Guaw duiww Jehovah quatduanr m qnaw kiw ciuw pah Jehovah soxx buah iuu :ee. Dnaxx liw tangx cruw ix taukag vnix ee cniux qapp juixvann, lanw tangx tec .laii .kir."

12 David dui' Saul ee taukag vnix cruw ix ee cniux qapp juixvann; nng langg dyrr kir; byy langg knuar .qnir, byy langg jaix, iarr byy langg cnew. Inx longxx decc kunr, in'ui Jehovah hro inx kunr dang binn.

13 David quer kir qaur hitt vingg, hng hng kia dirr snuax-dingw, qapp inx sna' li vutjiw hng.

14 David qiyr vecsnir qapp Ner ee qniaw Abner, qongw, "Abner ar, liw byy rinr mah?" Abner qongw, "Liw si jirjui, decc qiyr ongg ar?"

15 David duiww Abner qongw, "Liw qamxx m si jit xee iongxsu mah? Islael diongx jirjui viw did liw ar? Liw sniaw su byy vyxho liw ee jruw, liw ee ongg ar? In'ui vecsnir diongx u jit langg zip kir beh hai liw ee ongg, liw ee jruw.

16 Liw jitt hy soxx juer si m hyw; guaw qiw ingxuac ee Jehovah jiuwjua, linw longxx si qaisiw :ee, in'ui linw byy vyxho linw ee jruw, dyrr si Jehovah soxx buah iuu :ee. Dnaxx, liw knuar, ongg taukag vnix ee cniux qapp juixvann dirr dyclyc?"

17 Saul zin did si David ee sniax, dyrr qongw, "Guaw ee qniaw David, jex si liw ee sniax mah?" David qongw, "Ongg ar, guaw ee jruw, si guaw ee sniax";

18 Qycc qongw, "Guaw ee jruw sniaw su duizib lovok? Guaw juer simxmih? Guaw ee ciuw u simxmih pnaiw?

19 Ongg ar, guaw ee jruw ar, dnaxx qriuu liw tniax lovok ee ue. Narr si Jehovah qikdong liw qongqig guaw, guan Ix qamwlap jewmic; narr si langg qikdong liw, guan inx dirr Jehovah ee binrjingg siurr jiuwjow, in'ui inx qinaxzit qikdiok guaw, hro guaw byy hxun dirr Jehovah ee giap, qongw, 'Liw kir hogsai vadd xee siongrder.'

20 Dnaxx byc did hro guaw ee huih lrauu dirr lirkuix Jehovah binrjingg ee de; in'ui Islael ee ongg cud .laii, cincniu decc cue jit jiah qajauw, cincniu langg dirr snuax nirr zib jit jiah jiawqox."

21 Saul qongw, "Guaw u jue lar. Guaw ee qniaw David, liw tangx dyr .laii; guaw byy beh qycc hai liw; in'ui liw qinaxzit knuar guaw ee sniwmia juer vyxvuer. Knuar ar, guaw soxx juer si jin' gong, cywgo qaur qik."

22 David rinr qongxx, "Ongg ar, liw ee cniux dirr jiax, liw diyhh qiyr jitt xee siauwlenlangg quer laii giac.

23 Jehovah beh jiauww dagg langg ee qonggi qapp diongsinr laii vyr ix. Qinaxzit Jehovah jiong' liw qaux dirr guaw ee ciuw, danrsi guaw m kingw crunx ciuw hai Jehovah soxx buah iuu :ee.

24 Guaw qinaxzit knuawdang liw ee sniwmia, guan Jehovah iarr anxnix knuawdang guaw ee sniwmia, qycc qiur guaw tuatli longxjongw ee huanrlan."

25 Saul qra David qongw, "Guaw ee qniaw David, guan liw siurr jiokhog. Liw beh qniaa cud dua ee dairjir, iarr unxdangr beh kacc ngiaa." David dyrr jueww ix qniaa. Saul dyr kir ix ee vunxsoxjai.

27 David simlai qongw, "Beh u jit zit guaw siw dirr Saul ee ciuw. M dyrr diyhh jauw kir Filist ee de, Saul duiwdirr guaw dyrr juadbang, byy qycc dirr Islael ee qingxlai cue guaw; anxnix guaw dyrr tangx tuatli ix ee ciuw."

2 David dyrr kiw .laii, qapp duer ix ee lak-vah langg, quer kir qaur Gat Ongg, Maoc ee qniaw Aqis hiax.

3 David qapp ix nng xee bow, dyrr si Jezleellangg, Ahinoam, qapp bad juer Nabal ee bow ee Karmellangg Abigail, qapp duer David ee langg, ixqip dagg langg ee qequanr, longxx diamr dirr Gat Ongg Aqis hiax.

4 U langg qra Saul qongw, "David jauw kir Gat." Saul dyrr byy qycc cue ix.

5 David duiww Aqis qongw, "Guaw narr dirr liw ee binrjingg did diyc undenw, qriuu liw ing snuadniuu jitt xee sniaa hro guaw, guaw dyrr u soxjai tangx kiarkiw; in'ui liw ee lovok sniaw su diyhh qapp liw snaqab kiarkiw dirr qniasniaa ar?"

6 Dng' hitt zit Aqis jiong' Ziklag hro ix; in'ui anxnix, Ziklag sriok Judah ee ongg, didqaur qinaxzit.

7 David diamr dirr Filistlangg ee de, qiong jit nii qycc sir guehzit.

8 David qapp duer ix ee langg jnriu .kir, cimcuw Gesurlangg, Girzilangg, qapp Amaleklangg; in'ui jitt quiw jok vingsor kiarkiw dirr hitt soxjai, dui' Sur kir qaur Egipt.

9 David pah hitt soxjai, bylun lamluw byy jit xee uac; qycc cniuw inx ee ngiuu, guu, luu, logdyy, qapp ihok, dywdngw laii qnir Aqis.

10 Aqis qongw, "Linw qinaxzit kir cimcuw simxmih derhngx ar?" David qongw, "Pah Judah ee lamhngx, Jelahmeellangg ee lamhngx, Kenlangg ee lamhngx."

11 David byy lauu jit xee lamluw uac, duar qaur Gat, si qniax inx jiong' su vyr langg jaix, qongw ix anxnix qniaa; qycc ix diamr dirr Filistlangg ee de ee sii, iarr siongsiongg jiauww jitt kuanw laii qniaa.

12 Aqis sinr David, simlai qongw, "David hro ix vunxjok Islaellangg jin' iamwngor, soxiw ix beh ingxuanw juer guaw ee lovok."

28 Hitt sii Filistlangg jurjip qunvingx cutdin, beh qapp Islaellangg qaujenr. Aqis duiww David qongw, "Liw diyhh kaksit jaix, liw qapp duer liw ee langg longxx diyhh duer guaw cutdin."

2 David duiww Aqis qongw, "Si, lovok soxx e juer ee dairjir, liw dikkag e jaix." Aqis qra David qongw, "Anxnix, guaw setlip liw ingxuanw juer guaw ee siruerdniuw."

3 Hitt sii Samuel ixqing’ siw, Islael jingwlangg uirdiyhh ix aikaur, baijongr ix dirr Rlamah, dyrr si dirr ix ee vunxsniaa. Saul bad qnuaxdiok qxuiw jnriu srinx :ee qapp qniaa siasut :ee lirkuix ix ee qingxlai.

4 Filistlangg jurjip, jrad ngiaa dirr Sunem. Saul jurjip Islael jingwlangg, jrad ngiaa dirr Gilboa.

5 Saul knuar qnir Filist ee qunvingx, dyrr jin' qniax, simx pok pok cingw qaur qik.

6 Saul mng Jehovah; Jehovah longxx byy ing binbang, iacc si Ulim, iacc si sendix, laii rinr ix.

7 Saul huanhur ix ee lovok qongxx, "Liw diyhh qra guaw cue ang'ii, hro guaw tangx kir ix hiax mng ix." Lovok qongw, "Dirr Endor u jit xee ang'ii."

8 Saul dyrr qexngua ix ee hing'iongg, cing vadd hy ee snxax, u nng langg qapp ix kir, mii .sii kir hitt xee hurzinlangg hiax. Saul qongw, "Cniaw liw ing jnriu liw ee srinx ee sinn, qra guaw qniaa huatsut, guaw soxx qra liw qongw ee langg, liw qra guaw kanx ix jnriu .laii."

9 Hurzinlangg duiww ix qongw, "Knuar ar, liw jaix Saul ee soxx juer; ix duiww qingxlai jenxduu jiaxee qxuiw jnriu srinx :ee, qapp qniaa siasut :ee; liw sniaw su setqer beh hai siw guaw ee sniwmia ar?"

10 Saul qiw Jehovah duiww ix jiuwjua, qongw, "Guaw qiw ingxuac ee Jehovah laii jiuwjua, liw byy beh in'ui jitt xee su siurr hinghuat."

11 Hurzinlangg qongw, "Guaw diyhh qra liw kanx simxmih langg jnriu .laii ar?" Ix qongw, "Qra guaw kanx Samuel jnriu .laii."

12 Hurzinlangg knuar qnir Samuel, dyrr dua sniax qiyr; hurzinlangg qra Saul qongw, "Liw sniaw su penr guaw; in'ui liw si Saul."

13 Ongg duiww ix qongw, "Byc did qniax, liw knuar qnir simxmih?" Hurzinlangg qra Saul qongw, "Guaw knuar qnir sinbingg dui' de nirr jnriu .laii."

14 Saul qongw, "Ix ee hingjong jnaixngiu?" Ix qongw, "U jit xee laurlangg jnriu .laii, sinkux muax dngg snxax."

15 Saul jaix si Samuel, dyrr pag dirr de nirr vair ix. Samuel qra Saul qongw, "Liw sniaw su qiauxziauw guaw, kanx guaw jnriu .laii ar?" Saul qongw, "Guaw kunwkow qaur qik; in'ui Filistlangg qapp guaw qaujenr, Siongrder iarr lirkuix guaw, byy qycc ing sendix, iacc si binbang, laii rinr guaw; soxiw guaw cniaw liw laii, tangx jixsi guaw diyhh jnaixngiu qniaa."

16 Samuel qongw, "Jehovah ixqing’ lirkuix liw, suar juer liw ee duiwdik. Liw sniaw su mng guaw ar?

17 Jehovah jiauww Ix tog guaw soxx qongw ee ue qniaa dirr liw. Jehovah ixqing’ dui' liw ee ciuw cniuxduat qok'ui, hro liw ee dangpnua David.

18 In'ui liw byy tranr Jehovah ee ue, qniaa Ix ee dua siurkir dirr Amalek, soxiw Jehovah qniazit anxnix qniaa dirr liw;

19 Qycc Jehovah beh jiong' liw qapp Islael qaux dirr Filistlangg ee ciuw; binaxzit liw qapp liw hiaxee qniaw beh qapp guaw dilehh; Jehovah beh jiong' Islael ee qunvingx qaux dirr Filistlangg ee ciuw."

20 Saul hutzenn sinkux dyw dit dit dirr de nirr, in'ui Samuel ee ue, dyrr jin' qniax; in'ui jit zit jit mii longxx byy jiac simxmih, longxx byy lat.

21 Hurzinlangg uaw qin Saul, knuar qnir ix jin' vecvag, duiww ix qongw, "Liw ee luxvi tniax liw ee ue, byy qor qaqi ee sniwmia, tniax liw soxx qra guaw qongw ee ue.

22 Dnaxx qriuu liw tniax luxvi ee ue, iong'unw guaw dirr liw ee binrjingg vaii damrvyc jiahmic, hro liw jiac, liw qnialo jiacc u kuiwlat."

23 Ix tesii qongxx, "Guaw m jiac." Danrsi ix ee lovok qapp hurzinlangg hyxcuir krngr ix, ix jiacc tniax inx ee cuir dui' de nirr kiw .laii, jre dirr cngg nirr.

24 Hurzinlangg cur-lai u jit jiah vuii ee guu-aw, qnuaxqinw taii ix, qycc tec mirhunw, qra ciaux juer byy-qnar-vniaw laii vig ix, vaii dirr Saul qapp ix ee lovok ee binrjingg.

25 Inx u jiac. Hitt mii inx dyrr kixsinx kir.

29 Filistlangg jurjip inx ee qunvingx qaur Afek. Islaellangg jrad ngiaa dirr Jezleel ee juixjnuaa vnix.

2 Filistlangg hiaxee siuxlingw cua vxingx, uree jit-vah, uree jit-cingx, jinwjingg kir. David qapp duer ix ee langg, qapp Aqis, duer dirr aurbin.

3 Filistlangg ee siuxlingw qongw, "Jiaxee Heblalangg dirr jiax juer simxmih?" Aqis qra Filistlangg ee siuxlingw qongw, "Saul ee zinsinn David mah? Ix qapp guaw druar ixqing’ u jiaxee zit, jiaxee nii; dui' dauhangg guaw qaur qinaxzit, guaw m bad knuar qnir ix u quewsid."

4 Filistlangg ee siuxlingw siurkir ix; Filistlangg ee siuxlingw qra ix qongw, "Diyhh hro jitt langg dyr .kir, dyr kir liw soxx andir ix ee soxjai, m tangx hro ix qapp lanw lyhdin, qniax ix dirr din-lai juer lanw ee duiwdik. Ix beh qapp ix ee juxlangg qycc hxyy, beh ing simxmih ar? Qamxx m si lanw jiaxee langg ee taukag?

5 Jingg inx u langg tiauwbuw cniuwhy qongxx, 'Saul taii siw inx ee cingx cingx, David taii siw inx ee bxan bxan'; soxx qongw :ee, qamxx m si jitt xee David mah?"

6 Aqis qiyr David laii, qra ix qongw, "Guaw qiw ingxuac ee Jehovah laii jiuwjua, liw si jingwdit, liw qapp guaw cutzip dirr qundui diongx, guaw knuar si hyw; in'ui dui' liw laii guaw jiax ee sii, qaur qinaxzit, guaw m bad knuar qnir liw u simxmih quewsid. Dogdok jiaxee siuxlingw knuar liw juer m hyw.

7 Dnaxx liw dyr .kir, anzenn kir, qniax liw soxx juer, Filistlangg ee siuxlingw byy hnuahiw."

8 David qra Aqis qongw, "Guaw bad juer simxmih? Dui' guaw kixtauu laii liw ee binrjingg ee sii qaur qinaxzit, liw dirr liw ee lovok u knuar cud simxmih dairjir, hro guaw byy tangx qapp ongg kir qapp guaw ee jruw ee duiwdik qaujenr ar?"

9 Aqis rinr David qongxx, "Guaw jaix liw dirr guaw ee bagjiux jingg si hyw, cincniu Siongrder ee suwjiaw jidngiu. Danrsi Filistlangg ee siuxlingw qongw, 'Jitt langg m tangx qapp lanw kir qaujenr.'

10 Soxiw liw ixqip liw ee jruw ee lovok, qapp qapp liw laii :ee, diyhh jaw jaw kiw .laii, qaur tnix qngx dyrr diyhh kir."

11 Qeh jaxkiw David qapp duer ix ee langg jaw jaw kiw .laii, kixsinx dyr kir Filist ee de. Filistlangg iarr jnriu kir Jezleel.

30 Derr snax zit David qapp duer ix ee langg qaur Ziklag. Amaleklangg ixqing’ cimhuan lamhngx qapp Ziklag, iarr pah Ziklag, ing huew siyx ix;

2 Liac sniaa-lai ee hurluw, bylun dua, ser, byy taii siw jit xee, qandna' liac ix kir.

3 David qapp duer ix ee langg qaur hitt xee sniaa, knuar qnir sniaa ixqing’ hro huew siyx .kir, inx ee bow, qniaw, jaboxqniaw, longxx hro ix liac .kir.

4 David qapp duer ix ee langg dyrr kuix sniax hauw, hauw qaur byy lat tangx hauw.

5 David nng xee bow, Jezleellangg Ahinoam, qapp bad juer Karmellangg Nabal ee bow Abigail, iarr hro ix liac .kir.

6 David jin' diyhqib. Vecsnir qongw, "Diyhh ing jiyhtauu dimr ix'; si in'ui vecsnir langlangg uirdiyhh inx ee qniaw jaboxqniaw jin' huanlyw; danrsi David uaxkyr Jehovah, ix ee Siongrder, qaqi qenqor.

7 David qra Ahimelec ee qniaw, jewsix Abiatar, qongw, "Cniaw liw qra guaw duar efod laii." Abiatar dyrr duar efod qaur David hiax.

8 David mng Jehovah qongxx, "Guaw zib jitt xee qundui, zib e diyc iacc be?" Jehovah qongw, "Liw diyhh zib ix, unxdangr diyc, iarr unxdangr qiur inx longxx dyr .laii."

9 David dyrr qapp duer ix ee lak-vah langg laii qaur Besor ee kex; lauu lehh ee langg hiyh dirr hiax.

10 Danrsi David qapp sir-vah langg kir duizib; u nng-vah langg iawsen, be e quer Besor ee kex, dyrr lauu dirr hiax.

11 Inx dirr can'iaw duw diyc jit xee Egiptlangg, dyrr duar ix qaur David hiax. Inx ing vniaw hro ix, ix dyrr jiac, ing juiw hro ix limx;

12 Qycc hro ix jit der buhuaqyxvniaw, nng pax pudyqnuax. Ix jiac liauw, jingsinn hogdyr; in'ui ix snax zit snax mii byy jiac vniaw byy limx juiw.

13 David mng ix qongxx, "Liw sriok jirjui? Dui' dyclyc laii?" Ix rinr qongxx, "Guaw si Egipt ee siauwlenlangg, si Amaleklangg ee lovok. In'ui guaw snax zit jingg puawvni, guaw ee juxlangg dyrr vangwsag guaw.

14 Guanw cimhuan Qelet ee lamsir, qapp sriok Judah ee de, qapp Kaleb-de ee lamsir; qycc ing huew siyx Ziklag."

15 David mng ix qongxx, "Liw e cua guaw qaur hitt xee qundui hiax iacc be?" Ix rinr qongxx, "Liw diyhh qra guaw qiw Siongrder laii jiuwjua, byy taii siw guaw, iarr byy jiong' guaw qaux dirr guaw ee juxlangg ee ciuw, guaw dyrr beh cua liw lyc kir qaur hitt xee qundui hiax."

16 Ix cua ix lyc .kir ee sii, knuar qnir inx siwsnuar dirr venww de, limjiac tauwbuw; in'ui dui' Filist-de qapp Judah-de soxx cniuw ee mic jin' je.

17 David pah inx dui' honghun'amr qaur qeh zit ee ehngx; jixu sir-vah xee kiaa logdyy ee siauwlenlangg jauw .kir, ixgua byy jit langg jauw li.

18 Amaleklangg soxx cniuw .kir ee jaibut, David longxx qiur dywdngw, David iarr qiur ix nng xee bow dyr .laii.

19 Qniwnarr Amaleklangg soxx cniuw .kir .ee, bylun dua, ser, qniaw, jaboxqniaw, jaibut, David longxx duar dywdngw, byy sitlyc jit xee.

20 David qycc cniuw soxu ee ngiuu-qrunn, guu-qrunn, inx qnuaw ix dirr jingsnix ee taujingg, qongw, "Jex si David soxx cruw .laii .ee."

21 David qaur hiaxee iawsen, be e qinduer David kir, lauu dirr Besor Kex ee nng-vah langg hiax. Inx cud laii gniajih David qapp duer ix ee vecsnir. David jinwjingg qaur vecsnir hiax, cingxanx inx.

22 Qapp David kir ee langg, qidiongx ee pnaiw langg huixlui qongw, "In'ui inx byy qapp lanw kir, lanw soxx qiur dywdngw ee mic, dikkag m vunx hro inx, qandna' ing inx dagg langg ee bow, qniaxzii, hro inx, hro inx cua .kir."

23 David qongw, "Hniadi ar, m tangx jiong' Jehovah soxx sniuxsur lanw ee mic anxnix juer. In'ui Ix vyxho lanw, jiong' qongqig lanw ee qundui qaux dirr lanw ee ciuw.

24 Jitt xee dairjir jirjui beh tniatanr linw ar? Qowsiuw jabmic ee langg soxx did .dicy ee hunrgiac diyhh cincniu cutdin ee langg ee hunrgiac, dairqex diyhh vnivunx."

25 Dui' hitt zit ixau David setlip jitt xee juer Islael ee ludle huatdo, didqaur qinaxzit.

26 David qaur Ziklag ee sii, dui' soxx cniuw ee mic ee diongqanx tec kiw laii qiar kir sangr ix ee ving'iuw, Judah ee dniuxlyw, qongw, "Knuar ar, jiaxee si dui' Jehovah ee duiwdik cniuw .laii .ee, sangr hro linw juer lexmic."

27 Dyrr si sangr hro diamr dirr Betel :ee, diamr dirr lamhngx ee Rlamah :ee, diamr dirr Jattir :ee;

28 Diamr dirr Aloer :ee, diamr dirr Sifmot :ee, diamr dirr Estemoa :ee,

29 Diamr dirr Rlakal :ee, diamr dirr Jelahmeellangg jiaxee sniaa :ee;

30 Diamr dirr Hormah :ee, diamr dirr Bor Asan :ee, diamr dirr Atac :ee;

31 Diamr dirr Heblon :ee, ixqip David qapp duer ix ee langg vingsor soxx ongxlaii ee soxjai, longxx hro ix.

31 Filistlangg qapp Islaellangg qaujenr, Islaellangg dirr Filistlangg ee binrjingg dyjauw, siursiongx laii siw, dyw dirr Gilboa Snuax.

2 Filistlangg zib uaw Saul qapp ix ee qniaw. Filistlangg dyrr taii siw Saul ee qniaw, Jonatan, Abinadab, qapp Malqisua.

3 Hitt xee qaujenr qongqig Saul jin' siongdiong; sria jnxir ee langg vig ix jin' camw.

4 Saul qra giac ix ee qunkir ee langg qongw, "Vuic liw ee dyx qra guaw cak .quer .kir, qniax jiaxee byy sriu qatlew ee langg laii cak siw guaw, laii lingziok guaw."

5 Giac ix ee qunkir ee langg byy beh, in'ui ix jin' qniax. Saul dyrr giac ix ee dyx, cih dirr hitt dingxbin. Giac ix ee qunkir :ee knuar qnir Saul ixqing’ siw, ix iarr cih dirr dyx nirr, qapp ix snaqab siw.

6 Saul qapp ix snax xee qniaw, qapp giac ix ee qunkir ee langg, ixqip longxjongw duer ix ee langg, qangg jit zit juer jit xe siw.

7 Dui' anxnix dirr snuaqog hitt vingg, qapp dirr Jordan Hyy hitt vingg ee Islaellangg, knuar qnir Islaellangg ixqing' dyjauw, Saul qapp ix hiaxee qniaw iarr longxx siw, dyrr kiwsag hiaxee sniaa dyjauw. Filistlangg suar laii diamr hiax kiarkiw.

8 Qeh zit Filistlangg laii vrag hiaxee siurr taii siw ee langg, cue diyc Saul qapp ix snax xee qniaw, siw dirr Gilboa Snuax.

9 Inx dyrr quah dng ix ee taukag, trngr ix ee jenwqah, crex langg qaur Filist-de ee siwqingw, venww tuann dirr hiaxee gnoxsiong ee biy qapp vecsnir ee diongqanx.

10 Qycc jiong' ix ee jenwqah he dirr Astarte ee biy-lai, jiong' ix ee sinsix dingr dirr Bet San ee sniacniuu dingw.

11 Gilead Jabes kiarkiw ee vecsnir, tniax qnir Filistlangg soxx qniaa dirr Saul ee su,

12 Inx hiaxee iongxsu longxx kiw .laii, tong' mii qniaa, jiong' Saul ee sinsix, qapp ix hiaxee qniaw ee sinsix, dui' Bet San ee sniacniuu cruw .lyc .laii, duar qaur Jabes, dirr hiax siyx ix;

13 Jiong' inx ee qud baijongr dirr Jabes ee suisiliuw ee ciu-kax, qimwjiac cid zit.

huedngw tauu iac