Lu Juxbingg
Veh-guec, hagsingx-ginxaw longxx decc hiyczuac, qang jitt xee sijun, dirr Zidvunw itvnuax siarhue jyr kangkuer :ee cam’ inx ee qajok marr u quixlyhh qangx ee dew qrii hiyckunr. Hex dyrr si dirr Veh-guec diongx ee punn jed. Uirr diyc quer jitt xee jed, jin’ je langg longxx e dngw kir sui’ langg ee qowhiongx.
Punn jed si Ulanpunn Jed qanxdanx ee cinghox, dirr Zidvunw hex si Jnxiax-guec guandanr ji’ gua siongrr dua ee jeczit.
Ix guanvunw si Vudqaur ee jewdenw zit. Ulanpunn si Ullabana ee sniaimx huanik, guanlaii iwsur si dywdiaur ee tongwkow, Vudqauwdoo uirdiyc beh qiur hiaxee sriu jitt kuanw tongwkow ee quixhunn laii vran huathue, tangx hyw qaixqiur inx. Qunqur Ulanpunn Qingx soxx siaw, Boglenn Junjiaw uirdiyc beh qaixqiur duirlyc dirr gyrquiw-dy ee byxcinx ji’ kow, ijiaur vudqaur qauwgi, dirr qurlik Cid-guec jap-go virvan jiongw jiongw jiahmic qionghong jewvair sibhongx qohunn iaxquiw, qiur cud tongwkow ee byxcinx.
Jitt kuanw uahdang qoxjaw si dirr Inwdo qapp Diongqog jyr :ee, Zidvunw cavutdyx si dirr Vudqaur co’ tuann laii ee Huiniauw Sidai (AD 592~710) kaisiw u, liauxau dyrr jiamrjiam dua siqniaa .kiw .laii. Qra sinkamx jngtna hro jin’ jonggiamm, tauu jit qangx qra gniaa hxunn-huew, buew jit qangx sangr hxunn-huew diamw dyc, anxnex jewvair joxsenx si Zidvunxlangg dirr jit nii zuac .langg sijun jin’ digsuu ee uahdang. Jitt xee uahdang qiqanx dua vorhun si dirr Veh-guec jap-snax hitt xee kadaux, iongser qniaxsunx dairsingx qra joxsenx ee linghunn jrih .zip .laii, cam’ qajok dauwdin singuac snax qangx, u snax qangx ee siqanx, qaur qaxx jap-lak hy diamw dyc sangr hxunn-huew jyr gisig qra inx sangr dngw kir inx guanvunw hitt ee sewqair. Qniadox ee Dua Bunzi Siyx hitt kuanw huew siyx si jitt xee uahdang ee jueww qyhongx.
Dirr Zidvunw, lirkuix qowhiongx kir guarkauw pacvniar ee langg jin’ je. Ulanpunn Jed hiyckunr qiqanx, sui’ langg dngw kir sui’ langg ee qowhiongx, qongxx jex si joxsenx cam’ iongser qniaxsunx dauwdin tuanngii ee zidjiw marr byy m driyc.
Cam’ Diongqog ee hongsiok horsiongx duiwjiaur laii knuar, dyrr naxx cniu qra Diongqog ee cingbingg qapp cunjed jywhuew laii quer qangrkuanw.
Qui’ dua din langg dangjee dngw sui’ langg ee qowhiongx hitt kuanw dniubin, qongxx si binjok dua censuaw marr jin’ inwtin. Jitt sii ee dua dohue cniu Dangqniax, Dairvanw, jit sii suacc venr jyr liyc aw lingxcingx hibii .kiw .laii.
Dirr Ulanpunn Jed uahdang gisig lairdew, itding rair qongw diyc Ulanpunn Bruw, Ulanpunn Bruw guanvunw si quewongw bongjiaw quixhunn lirkuix dergak sii, simjingg hnuahiw soxx tiaur ee bruw, qaur jitt jun ixqingx venr jyr qokk de byy qang digsig ee binqanx buxdy.
Zuahtnix amwsii, puewhap diyc dua qow sniax, qui’ jngtauu ee langg uii jit xee dua ngikox-aw, hnuahiw tiaur bruw, hitt kuanw qongqingw, si Ulanpunn Jed sii dirr Zidvunw siwqer longxx knuar e diyc :ee.
Ulanpunn Jed jit quer .kir, jiamrjiam dyrr venr liyc aw lianglingw ee ciutnix ar, marr si hongtaix beh laii cimhuan langg ee quiwjed lar.