SXINGR PAUL SIAW HRO FILIPPILANGG EE PUEX
1 Krist Jesus ee lovok Paul qapp Timoti, siaw puex qiar hro diamr dirr Krist Jesus, kiarkiw dirr Filippi longxjongw ee singwdoo, qapp jiaxee qamdog ixqip jipsu:
2 Guan linw dui' lanw ee Ve Siongrder qapp Jruw Jesus Krist did diyc undenw ving'anx.
3 Guaw qniww u siauwliam linw, dyrr qamxsia guaw ee Siongrder,
4 Dagg vaiw uirdiyhh linw jiongww langg qidyw ee sii, siongsiongg hnuahiw laii qidyw.
5 In'ui linw dui' tauu jit zit qaur dnaxx, snaqab u hxun dirr hingx kiw hok'imx;
6 Guaw iarr cimx sinr kixtauu dirr linw simlai juer hyw ee qangx :ee, beh jniaa jitt xee qangx itdit qaur dirr Jesus Krist ee zit.
7 Qycc guaw uirdiyhh linw jiongww langg u jitt hy simjir, jex si habgii, in'ui linw siongsiongg dirr guaw ee simlai, bylun guaw dirr ticlen diongx, ixqip venrbingg laii qenqor hok'imx ee sii, linw jiongww langg qapp guaw u hxun dirr undenw.
8 In'ui Siongrder qra guaw juer qanjingr, guaw texhue Krist Jesus ee simx, u jnaixngiu luanbo linw jiongww langg.
9 Qycc guaw soxx qriuu :ee dyrr si hro linw ee zin'air, dirr diwhui ixqip dagg ngiu ee hiauxgno, ciongmuaw iuqycc ciongmuaw,
10 Drir qaur linw e giam cud hiaxee kacc hyw ee su, hro linw sunjuann byy tatgai, qaur dirr Krist ee zit;
11 Qycc ing gi ee quexjiw muaw muaw, dyrr si dui' Jesus Krist u :ee, beh hro Siongrder did diyc ingqngx ylyw.
12 Hniadi ar, guaw rair linw jaix guaw soxx duw .diyc ee dairjir duxduxx si hro hok'imx kacc jinwvo;
13 Drir qaur dirr juann ngiaa qapp qi'uu ee jiongww langg laii henxbingg guaw dirr Krist siurr qruar ticlen;
14 Qycc drir qaur diamr dirr Jruw ee hniadi duarvnuar dui' guaw ee siurr qruar laii cimx sinr, ithuad hyxdnaw byy qniax, laii qongw Siongrder ee dyrliw.
15 Dnaxx langg decc tuann Krist, uree si cud dirr uanwdor uanqex, uree si cud dirr hyw iwsur.
16 Jiaxee cud dirr zin'air, si jaix guaw si uirdiyhh venrbingg hok'imx laii setlip :ee.
17 Hiaxee decc vywiongg Krist cud dirr qetdongw :ee, m si sidsimx; inx ee iwsur si rair hro guaw dirr ticlen diongx lingrgua qetnix qankow.
18 Anxnix qycc jnaixngiu? Qew iacc si jinx, bylun jnaixngiu, qinduw si tuann Krist; guaw in'ui anxnix dyrr hnuahiw, ixau iarr beh qycc hnuahiw.
19 In'ui guaw jaix jitt xee su, dui' linw ee qidyw, ixqip Jesus Krist ee Sinn ee sniuxsur, beh drir qaur guaw did diyc qiur,
20 Jiauww guaw soxx cetced himbo qapp ngwbang :ee, dyrr si guaw byy jit hxang su qenwsiaur, huanrsu hyxdnaw, henrjai iarr jiauww vingsiongg anxnix, bylun siw iacc uac, Krist beh dirr guaw ee sinkux did diyc ingqngx.
21 In'ui lun qaur guaw, uac, si uirdiyhh Krist, siw, iarr u lirig.
22 Setsuw dirr ziogtew uac lehh, si juer guaw ee qangx ee quexjiw, guaw iarr m jaix beh jnaixngiu qingw.
23 Guaw dirr liongxlann ee diongqanx, qamguan dyr kir qapp Krist snaqab dilehh, jex si kacc hyw buviw.
24 Jongwsirr guaw iuguann dirr ziogtew uac lehh, uirdiyhh linw ee enqor, si qyckacc iauwqinw.
25 Guaw ixqing’ cimx sinr jitt xee, dyrr jaix guaw beh iuguann dilehh, iarr qapp linw jiongww langg snaqab dilehh, drir qaur linw ee sinr did diyc jinwvo qycc hnuahiw,
26 Hro linw dirr Krist Jesus ee kuakauw, dirr guaw qapp linw qycc dilehh ee sii, uirdiyhh guaw e naxx ciongmuaw.
27 Dogdok linw qniaa dairjir diyhh hap dirr Krist ee hok'imx, hro guaw qiamxcaiw laii qnir linw, iacc si lirkuix linw, e tniax qnir linw ee dairjir, dyrr si linw dirr jit xee sinn u kia jai, ing jidsimx uirdiyhh hok'imx ee sinr snaqab cud lat;
28 Huanrr dairjir byy hro duiwdik pacqniax; jex si juer inx bedbyy ee vinqir, iarr si juer linw did qiur ee vinqir; qycc jex longxx si dui' Siongrder.
29 In'ui ixqing’ sniuxsur linw dirr Krist, m na sinwkyr Ix, qycc diyhh uirdiyhh Ix siurkow;
30 Linw cud lat qaujenr, qapp jingg linw dui' guaw soxx knuar .qnir .ee, henrjai dui' guaw soxx tniax .qnir .ee snadangg.
2 Soxiw narr dirr Krist u simxmih kuanwbenw, iacc si simxmih zin'air ee an'uir, iacc si u Singwsinn ee simxmih qautongx, iacc si u simxmih juvix linbinw,
2 Linw diyhh hro guaw ee hnuahiw ciongmuaw, dyrr si qangg simjir, qangg zin'air, simsinn hyhap, simjir juan'id;
3 Huanrsu byc did uirdiyhh qetdongw, iacc si uirdiyhh kangx kangx ee ingqngx laii juer; dogdok dairqex ing kiamsunr ee simx knuar vadd langg kacc ngiaa dirr vunxsinx.
4 Linw dagg langg byc did qandna' qor qaqi ee su, iarr diyhh qor vadd langg ee su.
5 Linw diyhh ixx Krist Jesus ee simx juer simx;
6 Ix vunw u Siongrder ee hingjong, byy liac qaqi qapp Siongrder vnidingw juer soxx diyhh jipsiuw :ee,
7 Huanxdngw vniar kangx qaqi, cruw lovok ee hingjong, jniaa juer langg ee ngiursniur;
8 Ixqing’ u cincniu langg ee kuanxsid, dyrr kud qaqi, sunrhok qaur dirr siw, simrjiww siw dirr sibzirqer.
9 Soxiw Siongrder qysingx Ix qik quann, sniuxsur Ix hitt xee vnuaa quer dirr banrmiaa ee dingxbin ee miaa,
10 Hro qniwnarr dirr tnix, dirr de, qapp dirr dere :ee, dirr Jesus ee miaa, byy jit xee katauux m quirvair,
11 Byy jit xee cuir m cinghox Jesus Krist juer Jruw, laii qruix ingqngx Ve Siongrder.
12 Soxiw, guaw soxx tniar ee hniadi ar, linw bad siongsiongg sunrtanr, m na dirr guaw qapp linw dilehh ee sii, dyrr henrjai guaw byy qapp linw dilehh, linw ithuad diyhh ing qniahniaa gniauhgniauc cuah, laii juewjniaa linw qaqi ee did qiur;
13 In'ui linw u hitt xee iwguan, u hitt xee soxx qniaa, longxx si dui' Siongrder uirdiyhh Ix ee hyw ir laii qniaa dirr linw simlai.
14 Linw huanrsu byc did gnauhgnauc liam, byc did jingven,
15 Jiacc hro linw byy tangx hiamm, jinsit byy qew, dirr siapiah hinggik ee sewqair juer Siongrder byy hacuu ee qniaxzii. Linw dirr inx diongqanx cuthen, cincniu jiyr qngx dirr sewqanx :ee,
16 Henxbingg uahmia ee dyrliw, hro guaw qaur dirr Krist ee zit u tangx kuakauw, in'ui guaw m si kangx kangx pauxjauw, iarr m si kangx kangx diyhbuaa.
17 Dyrr narr ing linw ee sinr juer jewmic laii hogsai, guaw juer quanwden dirr hitt dingxbin, guaw si hnuahiw, qycc iarr qapp linw jiongww langg snaqab hnuahiw;
18 Linw iarr diyhh anxnix hnuahiw, suar qapp guaw snaqab hnuahiw.
19 Guaw diamr dirr Jruw Jesus ngwbang qinw qinw crex Timoti kir jiurqin linw, hro guaw jaix linw ee su, laii anx guaw ee simx.
20 In'ui guaw byy vadd xee dangsimx ee langg, jinjniar kuawlu linw ee dairjir :ee.
21 In'ui jiongww langg longxx si doboo qaqi ee su, m si doboo Jesus Krist ee su.
22 Danrsi Timoti ee qinggiam linw jaix, dyrr si qapp guaw snaqab diyhbuaa laii hingx kiw hok'imx, cinciu qniaw duiww laurve anxnix.
23 Soxiw guaw jid'err knuar cud guaw ee dairjir jnaixngiu, dyrr ngwbang liamvnix crex ix kir.
24 Danrsi guaw diamr dirr Jruw cimx sinr vunxsinx iarr beh qinw qinw qaur.
25 Mrquxx, guaw sniu iauwqinw diyhh crex Epafloditus jiurqin linw. Ix dyrr si gauw ee hniadi, dangjee juer qangx :ee, dangjee drngx vxingx :ee, iarr si linw ee suwjiaw, qiongqib guaw soxx kiamwing :ee;
26 In'ui ix luanbo linw jiongww langg, qycc ix u decc camxceh, in'ui linw u tniax qnir ix puawvni.
27 Ix qyxzenn u puawvni qaur hiamw hiamw siw; danrsi Siongrder linbinw ix, m na linbinw ix, iarr linbinw guaw, benw did guaw dirr iubun diongx qetnix iubun.
28 Soxiw guaw qyckacc diwir crex ix, hro linw qycc knuar qnir ix laii hnuahiw, guaw dyrr kacc byy iubun.
29 Soxiw linw diamr dirr Jruw diyhh h.-hnuahiw-h. jiaplap ix, iarr diyhh jundiong cincniu jitt hy ee langg.
30 In'ui ix uirdiyhh juer Krist ee qangx hiamw hiamw siw, qaqi vniawmia, beh vow linw hogsai guaw soxx byy qraur :ee.
3 Guaw ee hniadi ar, qetbuew laii qongw, linw diyhh diamr dirr Jruw hnuahiw. Guaw qycc siaw jiaxee ue hro linw, jairr guaw be huiwkir, jairr linw si tywdongr.
2 Diyhh dihongg jiaxee pnaiw qxauw, dihongg jiaxee juer pnaiw :ee, dihongg jiaxee siurr siongquah :ee.
3 In'ui lanw ing Siongrder ee Sinn laii hogsai, diamr dirr Krist Jesus laii kuakauw, byy uaxkyr ziogtew :ee, jiacc si siurr qatlew :ee.
4 Suisi anxnix, guaw iarr u tangx uaxkyr ziogtew; narr vadd langg liac juer u tangx uaxkyr ziogtew, guaw dyrr qyckacc u.
5 Guaw derr veh zit siurr qatlew, si Islael-jok ee langg, Benjamin ee jipair, si Heblalangg soxx snix ee Heblalangg; jiauww ludhuad dyrr si Faliselangg;
6 Jiauww zedsimx dyrr si kunxdiok qauwhue :ee; jiauww dirr ludhuad ee gi, si byy pang tangx hiamm.
7 Danrsi vingsor juer guaw ee lirig :ee, guaw uirdiyhh Krist ixqing’ knuar ix juer sunxhai.
8 M na anxnix, guaw jinjniar knuar banrsu juer sunxhai, in'ui guaw liac bad guaw ee Jruw Krist Jesus juer derr id hyw; guaw uirdiyhh Ix bad sunxsid itcer, qra itcer knuar juer vunwsyr, si rair did diyc Krist,
9 Laii dngdngg diamr dirr Ix, m si u qaqi dui' ludhuad ee gi, si u dui' sinr Krist ee gi, Siongrder uirdiyhh sinr soxx sniuxsur :ee;
10 Hro guaw bad Ix, qapp Ix qycc uac ee quanlingg, ixqip u hxun dirr Ix ee siurkow, laii yc Ix ee siw,
11 Knuar erdid tangx qaur dirr hitt xee dui' sixlangg diongx ee qycc uac.
12 M si qongxx guaw ixqing’ did .diyc, iacc si ixqing’ uanjuann; dogdok jauw jinwjingg, knuar e tangx did diyc Krist Jesus ee, soxiw did diyc guaw ee.
13 Hniadi ar, guaw byy liac qaqi juer ixqing’ did .diyc; dogdok juanbu jit hxang, dyrr si be qir did aurbin ee su, diwir taujingg ee su,
14 Ngr soxx cah ee viyx laii jauw, qaur did diyc Siongrder dirr Krist Jesus, dui' dingxbin driaur lanw ee sniuw.
15 Soxiw lanw qniwnarr juer uanjuann :ee, diyhh jrunn jitt xee simjir; narr dirr simxmih su linw jrunn vadd ngiu ee simjir, Siongrder iarr beh ing jitt xee jixsi linw.
16 Narr si lanw soxx ixqing’ qaur :ee, diyhh jiauww jitt xee laii qniaa.
17 Hniadi ar, linw diyhh snaqab yc guaw; linw u guanw juer bongiu, dyrr diyhh diwir knuar hiaxee jiauww anxnix qniaa :ee.
18 In'ui u jerje langg qniaa dairjir si Krist sibzirqer ee duiwdik; jex gauw bad dniardnia qra linw qongw :ee, danxx beh qycc lrauu bagsaiw qra linw qongw:
19 Inx ee qetqiok si dimlunn, inx ee siongrder si inx ee vakdow, inx ee ingqngx si dirr inx ee qenwsiaur, inx soxx diwir :ee si derjniu ee su.
20 In'ui lanw si tnidingw ee qokbinn, iarr ngwbang Jinxqiur :ee dui' hiax laii, dyrr si Jruw Jesus Krist;
21 Ix qiwzenn u quanlingg e hro banrmic hanghok dirr Ix vunxsinx, dyrr beh ing hitt xee quanlingg laii venwngua lanw vijen ee sinkux, laii qapp Ix ingqngx ee sinkux qangrkuanw.
4 Soxiw guaw soxx tniar soxx himbo ee hniadi, juer guaw ee hnuahiw, juer guaw ee benxliuu :ee, soxx tniar :ee ar, diyhh anxnix kia jai dirr Jruw.
2 Guaw krngr Euodia qapp Sintyqe, diyhh dangsimx dirr Jruw.
3 Qycc jinx ee dangpnua ar, guaw iarr qriuu liw vangjan jitt nng xee hurzinlangg, in'ui inx bad qapp guaw dangjee cud lat dirr hok'imx, iarr qapp Klement, ixqip qi'uu qapp guaw danggjee diyhbuaa :ee, inx ee miaa qir dirr uahmia ee ceh.
4 Diyhh siongsiongg diamr dirr Jruw laii hnuahiw; guaw beh qycc qongw jit vaiw, linw diyhh hnuahiw.
5 Linw ee sunliongg diyhh duiww jiongww langg henxbingg.
6 Jruw qin lar. Itkair byc did kuawlu, dogdok banrsu diyhh ing qidyw, kunxqiuu qapp qamxsia, jiong' linw soxx qriuu :ee vailet hro Siongrder jaix;
7 Dyrr Siongrder ee ving'anx, vnuaa quer itcer langg soxx sniu e qaur :ee, beh dirr Krist Jesus vyxsiuw linw ee simx, linw ee liamrtauu.
8 Dnaxx hniadi ar, qetbuew laii qongw, qniwnarr jinsit :ee, qniwnarr kyxqingr :ee, qniwnarr qonggi :ee, qniwnarr cingqed :ee, qniwnarr tangx tniar :ee, qniwnarr hyw miasniax :ee, narr u simxmih dikhing, simxmih tangx ylyw, jiaxee linw diyhh siauwliam.
9 Linw dui' guaw soxx hagsip, soxx niaxsiu, soxx tniax .qnir, soxx knuar .qnir .ee, longxx diyhh qniaa, anxnix, sniuxsur ving'anx ee Siongrder dyrr beh qapp linw dilehh.
10 Guaw diamr dirr Jruw dua dua hnuahiw, in'ui linw siauwliam guaw ee simjir dnaxx u qycc vuh ngiw; linw vingsor u jitt hy siauwliam, vutqyr si byy qihue nardnia.
11 Guaw qongw anxnix, m si uirdiyhh byy qraur ee enqor; guaw ixqing’ hagsip, vutlun simxmih qingwgu, byy byy dijiog.
12 Guaw jai'ngiaw diamr dirr vijen, iarr jai'ngiaw diamr dirr huwjiog; bylun vaw iacc iaux, huwjiog iacc kueckiamr, huanrsu guaw longxx lauxlen.
13 Diamr dirr sniuxsur guaw kuiwlat :ee, guaw sursu longxx e.
14 Suisi anxnix, linw textiab guaw ee huanrlan, jex si jin' hyw.
15 Filippilangg ar, linw iarr jaix dirr tuann hok'imx ee kixtauu, guaw lirkuix Macedonia ee sii, qapp guaw jiapciuw :ee jixu linw, vadd xee qauwhue byy.
16 Lenrr guaw dirr Tessalonika ee sii, linw iarr jit vaiw qycc jit vaiw crex langg qiongqib guaw soxx kiamwing.
17 M si guaw decc qriuu langg sangr mic, dogdok si qriuu quexjiw naxx je, laii qir lyc linw ee siaur.
18 Guaw u jiaxee mic, qauwgiac qycc u cunx; guaw ixqing’ ciongjiog, si bad dui' Epafloditus sriu diyc linw qiar .laii ee mic, dyrr si pangx pangx ee bi, juer tangx jiaplap ee jewmic, si Siongrder soxx hnuahiw :ee.
19 Qycc guaw ee Siongrder beh jiauww Ix ingqngx diongx ee vuwu, dirr Krist Jesus, voxjiog linw itcer ee kiamwkueh.
20 Guan ingqngx qruix dirr lanw ee Siongrder, lanw ee Ve, qaur dairdai byy suah. Amen.
21 Cingxanx diamr dirr Krist Jesus dagg xee singwdoo, jiaxee qapp guaw dilehh ee hniadi cingxanx linw.
22 Jiaxee singwdoo longxx cingxanx linw; sriok dirr Kaesar ee qrex :ee, qyckacc diwir cingxanx linw.
23 Guan Jruw Jesus Krist ee undenw qapp linw ee sinn snaqab dilehh.