Hosea
1 Dng' Uziah, Jotam, Ahaz, Hezekiah snasuar juer Judah Ongg, Jehoas ee qniaw Jeloboam juer Islael Ongg ee sii, Jehovah ee ue limqaur Beeli ee qniaw Hosea.
2 Jehovah kixtauu duiww Hosea qongw ee ue si anxnix. Jehovah duiww Hosea qongw, "Liw diyhh kir crua imhu juer bow, iarr did diyc dui' imluan soxx snix ee qniaw; in'ui jitt xee derhngx dua qniaa imluan, lirkuix Jehovah."
3 Dui' anxnix ix dyrr kir crua Diblaim ee jaboxqniaw Gomer; hurzinlangg huai'in, qra ix snix jit xee qniaw.
4 Jehovah duiww ix qongw, "Qra ix miaa qiyr Jezleel; in'ui qycc diap aw quw, Guaw beh vran Jehu ee qrex dirr Jezleel taii langg lrauu huih ee jue, iarr beh hro Islael-qrex ee qog byy .kir.
5 Qaur hitt zit Guaw beh dirr Jezleel vningiuu, ad jric Islael ee qringx."
6 Hurzinlangg qycc huai'in, snix jit xee jaboxqniaw; Jehovah duiww Hosea qongw, "Qra ix hy miaa Loluhama, in'ui Guaw byy beh qycc linbinw Islael-qrex, quatduanr byy siawbenw inx.
7 Jongwsirr Guaw beh linbinw Judah-qrex, ing Jehovah, inx ee Siongrder qiur inx, m si ing qringx ing dyx, ing qaujenr, ing bew, qapp ing bexvingx laii qiur inx."
8 Loluhama dngrlinx liauxau, hurzinlangg qycc haui'in, snix jit xee qniaw.
9 Jehovah qongw, "Diyhh qra ix hy miaa qiyr Loami; in'ui linw m si Guaw ee vecsnir, Guaw iarr m juer linw ee Siongrder."
10 Jongwsirr Islael ee langgiac beh cincniu haixsuax, be nriuu .did, be sngr .did; jingg dirr simxmih soxjai duiww inx qongw, "Linw m si Guaw ee vecsnir", jionglaii dirr hiax beh duiww inx qongw, "Linw si ingxuac Siongrder ee qniaw."
11 Judahlangg qapp Islaellangg beh snaqab jurjip, uirr qaqi setlip jit xee taulangg, dui' jitt xee de jnriu .kir; in'ui Jezleel ee zit beh juer dua ee zit.
2 Diyhh duiww linw ee hniadi qongw, "Ammi", qycc duiww linw ee jixbe qongw, "Rluhamah."
2 Diyhh qapp linw laurbuw venrlun, qycc venrlun; in'ui ix m si Guaw ee bow, Guaw iarr m si ix ee diongrhux; qiyr ix druu kir bin nirr ee imluan, qapp ix hingkamw ee imhing;
3 Benw did Guaw qra ix trngr qngx qngx, hro ix cincniu duxaxx cutsir ee zit, hro ix cincniu kongwiaw, cincniu dasyr ee de, hro ix dui' cuiwdax laii siw.
4 Guaw byy beh linbinw ix ee qniaw, in'ui inx si dui' imluan snix ee qniaw.
5 In'ui inx ee laurbuw qniaa imluan; huai'in :ee juer cud qenwsiauwsu; in'ui ix qongw, "Guaw beh duer guaw soxx luan'air ee langg, guaw ee vniaw, juiw, ngiumngg, muaa, iuu qapp guaw soxx limx :ee, longxx si inx hro guaw."
6 Knuar ar, in'ui anxnix, Guaw beh ing cixaw joxtad ix ee lo, jyh cniuu hro ix cue byy ix ee lo.
7 Ix beh duizib soxx luan'air ee langg, narr si zib be diyc, ix beh cue inx, jongwsirr cue be diyc; dyrr qongw, "Guaw beh dyr kir cue guaw ee vunxhux, in'ui guaw hitt sii ee qingxhongw viw henrjai iauxx kacc hyw."
8 Ix m jaix ix ee gnoxqog, jiuw, iuu, si Guaw hro ix; qetnix ix ee ginn qapp qimx :ee, iarr si Guaw; ix ing jiaxee hogsai Baal.
9 Soxiw qaur siuquah ee zit, Guaw beh jiong' Guaw ee gnoxqog dui' inx tec dywdngw; qycc dirr cud jiuw ee sii, beh jiong' Guaw ee sinx jiuw tec dywdngw, iarr beh jiong' Guaw hro ix tangx ziax ciacteh ee ngiumngg qapp muaa, cniuw dywdngw.
10 Dnaxx Guaw beh dirr ix soxx luan'air ee langg ee bagjiux jingg, lorcud ix ee imhing; dikkag byy langg e qiur ix tuatli Guaw ee ciuw.
11 Guaw beh suah inx hiaxee enwlok, jec'enn, guec ee ceid, Anhiyczit, qapp longxjongw ee jecqii.
12 Guaw iarr beh huixhuai ix ee pudyciu, qapp buhuaqyxciu, dyrr si qongw, "Jex si hiaxee luan'air guaw :ee hro guaw ee lexsor"; Guaw beh hro hiaxee venr juer ciurnaa, hro iaxsiur jiac ix.
13 Ix jingzit siyx hniux hogsai jiaxee Baal, qycc ing hnirqaux qapp vadd hy siuxsig qaqi jngtna, duer ix sna' luan'air ee langg, laii be qir did Guaw; in'ui anxnix Guaw beh vran ix. Jex si Jehovah qongw :ee.
14 Knuar ar, Guaw beh jiyhox ix, cua ix qaur kongwiaw, ing ue an'uir ix.
15 Guaw iarr beh dui' hiax sniuxsur ix pudyhngg, qycc sniuxsur ix Akor ee snuaqog juer ngwbang ee mngg; ix beh dirr hiax rinr sniax, qapp siauwlenn ee zit byy qycngiu, qapp dui' Egipt-de jnriu .laii ee zit snadangg.
16 Jehovah qongw, "Dng' hitt zit liw beh qiyr Guaw qongxx: Guaw ee diongrhux ar. Byy qycc qiyr guaw qongxx: Guaw ee Jruw ar.
17 In'ui Guaw beh dui' inx ee cuir druu kir jiaxee Baal ee miaa, byy qycc ing jitt xee miaa qiwliam ix.
18 Dng' hitt zit Guaw beh uirdiyhh inx, qapp can'iaw ee jauxsiur, qapp kongdiongx ee vuejiaw, ixqip derjniu ee tangtua lip iog; Guaw iarr beh dui' jitt xee derhngx atjiw qringx, dyx, qaujenr, hro inx anzenn dyw lecc kunr.
19 Guaw beh pingwdnia liw ingxuanw qruix dirr Guaw, qycc Guaw beh ing qonggi, qongvingg, ju'air, linbinw, pingwdnia liw qruix Guaw.
20 Guaw iarr beh ing singsit pingwdnia liw qruix Guaw, liw dyrr beh bad Jehovah.
21 Jehovah qongw: Hitt zit Guaw beh inwdab, Guaw beh inwdab tnix, tnix beh inwdab de;
22 De beh inwdab gnoxqog, jiuw, iuu, jiaxee beh inwdab Jezleel.
23 Guaw beh uirr qaqi jaijingr ix dirr jitt xee de; vingsor byy did diyc linbinw :ee, Guaw beh linbinw ix; m si Guaw ee vecsnir :ee, Guaw beh duiww ix qongw: Liw si Guaw ee vecsnir, ix iarr beh qongw: Liw si guaw ee Siongrder."
3 Jehovah duiww guaw qongw, "Liw diyhh qycc kir tniar hurzinlangg, si imhu, iarr si ix sionghyw ee langg soxx tniar :ee, cincniu Jehovah tniar Islaellangg, jongwsirr inx penngr vadd xee siongrder, hnuahiw pudyqnuavniaw."
2 Guaw dyrr ing ginn jap-go sekel, duarbec jit homer, qycc vnuar homer, brew ix qruix guaw.
3 Guaw duiww ix qongw, "Liw diyhh uirr guaw qaqi druar jerje zit; m tangx qniaa imm, iarr m tangx duer vadd langg; guaw duiwdirr liw iarr beh anxnix."
4 In'ui Islael iarr beh qaqi druar jerje zit, byy qun'ongg, byy siuxlingw, byy jewsu, byy diaukig ee tiau, byy efod, byy qrex-lai ee gnoxsiong.
5 Au .laii Islaellangg beh uat dngw laii cue inx ee Siongrder Jehovah, qapp inx ee ongg David; zid'au inx beh ing qnia'uir ngr Jehovah, qapp Ix ee unhui.
4 Islaellangg ar, linw diyhh tniax Jehovah ee ue; in'ui Jehovah qapp jitt soxjai ee langg venrlun; in'ui dirr jitt xee derhngx byy singsit, byy zinjuu, byy langg bad Siongrder.
2 Jixu jiuwjua, vue iog, taii langg, tautec, qan'imm, qiongvy, taii langg byy suah.
3 Soxiw jitt xee derhngx beh vi'aix, qidiongx kiarkiw ee langg, qapp can'iaw ee sriur, kongdiongx ee jiauw, longxx beh suebii; haiw-diongx ee hii iarr beh byy .kir.
4 Jongwsirr langg m tangx venrlun, m tangx sna' jikvi; in'ui liw ee vecsnir cincniu qapp jewsix venrvog :ee jidngiu.
5 Liw beh dirr zit .sii vuahdyw, sendix iarr beh dirr mii .sii qapp liw snaqab vuahdyw, Guaw beh bedbyy liw ee laurbuw.
6 Guaw ee vecsnir in'ui budix laii bedbyy; in'ui liw kiwsag diwsig, Guaw iarr beh kiwsag liw, hro liw byy tangx qycc juer jewsix hogsai Guaw; liw qiwzenn be qir did liw ee Siongrder ee ludhuad, Guaw iarr beh be qir did liw ee qniaxzii.
7 Inx qetnix naxx je, dyrr naxx dikjue Guaw; Guaw beh hro ix ingqngx venr juer lingziok.
8 Inx jiac Guaw ee vecsnir ee siogjuerjer, iwair inx huanrjue.
9 Jionglaii vecsnir jnaixngiu, jewsix iarr beh anxnix; Guaw beh in'ui inx soxx qniaa :ee laii vran inx, jiauww inx soxx qniaa :ee laii vywingr inx.
10 Inx jiac iarr be did diyc vaw, qniaa imm iarr byy qetnix langg; in'ui inx vangwsag Jehovah, m tniatanr Ix.
11 Imhing qapp jiuw qapp sinx jiuw si duat langg ee simx.
12 Guaw ee vecsnir mng inx ee catauu, qycc inx ee qnuaiw-aw jixsi inx; in'ui inx qniaa imm ee simx hro inx sitbee; inx qniaa imm lirkuix inx ee Siongrder ee quanxhad.
13 Inx henwjer dirr snuax-dingw, siyx hniux dirr snuatauu, dirr siongrciu, iongciu, ligciu ee erbin, in'ui inx ee imwngw ee hyw; soxiw linw ee jaboxqniaw imluan, linw ee sinniuu qniaa imm.
14 Linw ee jaboxqniaw imluan, linw ee sinniuu qniaa imm, Guaw byy hinghuat inx; in'ui hiaxee davolangg qapp ciongqix lingrgua druar, qapp biy-lai ee qirluw snaqab henwjer; jitt hy budix ee vecsnir dikkag ciax dyw.
15 Islael ar, liw suizenn qniaa imm, jongwsirr Judah m tangx huanrjue; m tangx kir Gilgal, iarr m tangx jnriu qaur Betaven, iarr m tangx qiw ingxuac ee Jehovah laii jiuwjua.
16 Islael gni pni, cincniu gni pni ee gubuw; dnaxx Jehovah beh cri inx, cincniu cri ngiuu dirr kuikuah ee de.
17 Eflaim qetlenn gnoxsiong, cutjai ix. Inx soxx limx :ee ixqing’ huatsngx, inx siongsiongg qniaa imm, inx ee qnuadniuw jin' hnuahiw qenwsiauwsu. Hongx ing ix ee sxit qngw ix; inx beh uirdiyhh inx ee jewsu, drir qaur qenwsiaur.
5 Jewsix ar, linw diyhh tniax jitt xee; Islael-qrex ar, linw diyhh juwir; ongcinx ar, linw diyhh ngar hnirkangx; in'ui simxpnuar quanhe dirr linw, in'ui linw juer uahdauh dirr Mizpah, juer lybang dniux dirr Tabor.
2 Jiaxee vuergik ee langg dua qniaa taii langg; Guaw beh jikhuat inx.
3 Guaw bad Eflaim, Islael iarr be unxbat dirr Guaw; Eflaim ar, dnaxx liw qniaa imm, Islael bag diyc lasamm.
4 Inx soxx juer :ee joxdongr inx qruix dirr inx ee Siongrder; in'ui imluan ee simx dirr inx lairbin, inx iarr m bad Jehovah.
5 Islael ee qiaugno dngbin qanjingr inx; soxiw Islael qapp Eflaim, beh in'ui inx ee juerquar laii diyhdag; Judah iarr beh qapp inx snaqab diyhdag.
6 Inx beh duar guu-qrunn ngiuu-qrunn kir cue Jehovah, jongwsirr cue be diyc; in'ui Ix ixqing’ lirkuix inx.
7 Inx ngr Jehovah qniaa kuixjar, taux snix qniaw; dnaxx qaur guec ee ceid, inx qapp inx ee sanxgiap beh siurr tunbet.
8 Linw diyhh dirr Gibeah vunn sauwqag, dirr Rlamah vunn hyrtauu; dirr Betaven cud qingxqyr ee sniax, qongw: Benjamin ar, dirr liw ee aurbin.
9 Dirr jikhuat ee zit, Eflaim beh pahngx; Guaw dirr Islael jiaxee jipair diongx, hro inx jaix jionglaii dikkag u ee su.
10 Judah ee siuxlingw cincniu censuaw derqair ee langg; Guaw beh vniar Guaw ee siurkir dirr inx ee sinjniu, cincniu vniar juiw jidngiu.
11 Eflaim siurr vuergiok, siurr simxpnuar apjer; in'ui ix qamsimx tranr bingrling.
12 Soxiw Guaw duiwdirr Eflaim, cincniu jiuwtangg, duiwdirr Judah cincniu hiuxhuai ix :ee.
13 Eflaim knuar qnir qaqi u vni, Judah knuar vunxsinx u siongx; Eflaim dyrr kir Assylia, crex langg kir qnir Uixdai ee Ongg; ix be e rix hyw liw, iarr be e hro liw ee siongx hyw.
14 Guaw duiwdirr Eflaim beh cincniu sraix, duiwdirr Judah-qrex cincniu iongw ee sraix; Guaw beh tiah lic jiacc kir; Guaw beh qa .kir, byy u qiur ix :ee.
15 Dnaxx Guaw beh kir, dyr kir Guaw ee soxjai, qaur inx zin qaqi ee jue, qriuu qnir Guaw ee bin; inx dirr qiplan ee sii, beh cetced cuerqiuu Guaw.
6 Laii ar, lanw diyhh qui'uaw Jehovah; Ix tiah lic lanw, iarr beh rix hyw lanw; Ix pah lanw, iarr beh vaux lanw ee siongx.
2 Quer nng zit Ix beh hro lanw qycc uac; qaur derr snax zit, Ix beh hro lanw kiw .laii, lanw dyrr uac dirr Ix ee binrjingg.
3 Lanw diyhh zinrbad Jehovah, cud lat jinwjingg cincniu tniqngjaw ee qngx, Ix beh limqaur lanw, cincniu ho, iarr cincniu cuntnix ee ho, zunrdik toxde.
4 Eflaim ar, Guaw beh jnaixngiu kuanxtai liw? Judah ar, Guaw beh jnaixngiu kuanxtai liw? In'ui liw ee senrliongg cincniu jaxkiw-sii ee hunbu, qycc cincniu qinw qinw dax ee lorjuiw.
5 In'ui anxnix, Guaw ing sendix taisiah inx; ing Guaw cuir-lai ee ue, taii siw inx. Guaw ee simxpnuar cincniu qngx huad cud.
6 In'ui Guaw air linbinw, m air jewsu, air langg bad Siongrder, ngiaa quer siyjer.
7 Jongwsirr inx vue iog cincniu Edom; dirr hiax ngr Guaw qniaa kuixjar.
8 Gilead dyrr si qniaa pnaiw :ee ee sniaa, bag diyc huicziah.
9 Cincniu qui' din ee cat baihok decc dngx langg, jewsix qed dongw; iarr cincniu anxnix, dirr Seqem ee lo taii langg; qycc sidjai qniaa sia'imm.
10 Dirr Islael-qrex Guaw knuar qnir qik tangx iamwngor ee su; dirr hiax u Eflaim ee imhing, Islael bag diyc lasamm.
11 Judah ar, Guaw hro Guaw siurr liac ee vecsnir dyr .laii ee sii, dyrr beh uirr liw virvan siuquah.
7 Guaw air idi Islael ee sii, Eflaim ee juerquar qapp Samalia ee juerog dyrr lorhen; in'ui inx qniaa dairjir huqew; lairbin u cat zip .laii, guarbin u qui' din ee cniuxqiab.
2 Inx simlai byy sniu qongxx, Guaw qir did inx longxjongw ee pnaiw; dnaxx inx soxx juer :ee uikunr inx; si dirr Guaw ee binrjingg.
3 Inx ing qniaa pnaiw hro qun'ongg hnuahiw, ing vehcat hro siuxlingw kuaiwlok.
4 Inx longxx si qniaa imm :ee; cincniu vig vniaw :ee, kiw zet ee huexloo, ix dui' ciaux mi qaur ix huad qnar e sii, jiacc byy qycc tar huew.
5 Dirr lanw ee ongg enwlok ee zit, jiaxee siuxlingw, in'ui jiuw ee zet, laii puawvni; ix qapp buxban ee langg kanx ciuw.
6 Inx baihok ee sijun, virvan inx ee simx, cincniu huexloo; inx vig vniaw ee langg, tong' mii decc kunr; qaur jaxkiw-sii, ix dyc cincniu huew iam iam.
7 Inx zet cincniu huexloo, tunbet inx ee sursux; inx ee qun'ongg longxx dyw .lyc .kir; inx diongqanx byy langg qiuqiyr Guaw.
8 Eflaim qaqi camcab dirr ledvangx; Eflaim si byy quer vingw ee vniaw.
9 Guarvanglangg ixqing’ tunjiac ix ee linglik, ix iarr m jaix; taumngg ixqing’ camx vec, ix iarr m jaix.
10 Islael ee qiaugno dngbin qanjingr inx; suizenn duw diyc jex itcer, inx iuguann byy qui'ngr Jehovah inx ee Siongrder, iarr byy cuerqiuu Ix.
11 Eflaim cincniu jnixaw gong gong budix; inx qiuqiyr Egipt, kir jiurqin Assylia.
12 Inx kir ee sii, Guaw beh jiong' Guaw ee bxang pax dirr inx ee dingxbin; Guaw beh hro ix duirlyc, cincniu kongdiongx ee jiauw. Guaw beh jiauww inx ee huerjiongr soxx tniax .qnir .ee, kenxjig inx.
13 Inx u jaieh ar, in'ui inx lirkuix Guaw kir; inx beh duw diyc vairhuai, in'ui inx dikjue Guaw. Guaw beh qiuwsiok inx, inx iauxquxx qongw vehcat qongqig Guaw.
14 Inx byy ing simx qriuu Guaw, si dirr bincngg auqiyr; inx uirdiyhh gnoxqog qapp sinx jiuw laii qaqi jurjip; inx longxx vuergik Guaw.
15 Guaw qauwdog inx, hro inx ee ciuxqud u lat; inx iauxquxx doboo pnaiw su laii qongqig Guaw.
16 Inx qui'ngr, jongwsirr m si qui'ngr Jiww quann :ee; inx cincniu vingw linr dngw ee qringx; inx ee siuxlingw in'ui jic ee hongwciongr, beh dyw dirr dyx-xe; jitt xee beh dirr Egipt-de juer ciywvnir.
8 Liw ee cuir diyhh vunn sauwqag; duiwdik cincniu ringx qongqig Jehovah ee cur; in'ui jitt xee vecsnir vue Guaw ee iog, huan diyc Guaw ee ludhuad.
2 Inx beh auqiyr Guaw qongxx: Guanw ee Siongrder ar, guanw Islael bad Liw.
3 Islael vangwsag senrliongg; duiwdik beh duizib ix. Inx setlip qun'ongg, m si dui' Guaw setlip ix;
4 Inx setlip siuxlingw, Guaw iarr m jaix. Inx ing inx ee ginn, inx ee qimx, jy gnoxsiong, drir qaur inx siurr jenxduu.
5 Samalia ar, Ix u vangwsag liw ee guu-aw; Guaw dua siurkir inx; inx qaur dirsii jiacc did diyc byy jue ar?
6 Jitt xee cud dirr Islael; si saihu soxx jy :ee, ix m si Siongrder; Samalia ee guu-aw quatduanr beh duw diyc paccuir.
7 Ix soxx jingr :ee si hongx, soxx siux :ee si qngxlehongx; byy jniaa jangg; soxx huad :ee byy qetsit; dyrr narr qetsit, guarvanglangg iarr beh jiac ix.
8 Islael ixqing’ siurr tunbet; henrjai dirr ledqog diongx cincniu langg byy hnuahiw ee kiwqu.
9 Inx jnriu kir Assylia, cincniu qaqi diamr ee iaw luu; Eflaim brew langg tniar ix.
10 Inx suizenn dirr ledqog diongx brew langg tniar inx, Guaw beh jurjip inx; inx in'ui qun'ongg qapp siuxlingw soxx he ee dang dnar jiamrjiam suebii.
11 Eflaim-qrex kiw jewdnuaa drir qaur huanrjue; in'ui anxnix jewdnuaa hro inx huanrjue.
12 Guaw uirr ix siaw Guaw ee ludhuad jnia' bxan diauu; jongwsirr ix knuar juer qapp ix longxx byy qansiap.
13 Lun qaur henr hro Guaw ee lexmic, inx henr bah qaqi jiac ix; jongwsirr Jehovah byy jiaplap inx; dnaxx beh qir did inx ee juerquar, vran inx ee juerog; ix beh dywdngw kir Egipt.
14 In'ui Islael be qir did congwjy inx ee Jruw, kiw qingbiy; Judah-qrex kiw qenqor ee sniaa; Guaw beh qangr huew dirr ix ee sniaa, siyx inx ee ngiavnuaa.
9 Islael ar, byc did hnuahiw, byc did kuaiwlok cincniu guarvanglangg; in'ui liw qniaa sia'imm lirkuix liw ee Siongrder; dirr dagg xee gorqakdniuu rair langg sangr mic.
2 Gorqakdniuu qapp jiuxkud byy beh ngiuxci inx; ngwbang sinx jiuw iarr kangx kang.
3 Inx byy tangx kiarkiw dirr Jehovah ee de; jongwsirr Eflaim beh dyr kir Egipt, beh dirr Assylia jiac byy cingkir ee jiahmic.
4 Inx byy tangx ngr Jehovah denrjiuw; inx ee jewmic iarr byy did diyc Ix hnuahiw; beh cincniu duw diyc sixsid ee qrex ee jiahmic, qniwnarr jiac :ee dikkag bag diyc lasamm; in'ui inx ee jiahmic tangx juer qaqi ee loring, be tangx zip Jehovah ee dxen.
5 Dirr duarhue ee zit, qapp Jehovah ee jecqii, linw beh jnaixngiu juer ar?
6 Knuar ar, inx siamxvi jaihai kir; Egiptlangg beh jurjip inx, Menfislangg beh baijongr inx; inx ing ginn soxx juer tangx iwair :ee, beh huad jidlee; inx ee dniuwvangg lai, beh huad ciwper.
7 Hinghuat ee zit ixqing’ qaur, vywingr ee zit ixqing’ qaur; Islael beh jaix; sendix gugong, siurr sinn qamxdong :ee denqongg, in'ui liw ee juerquar jin' je, uanwhun iarr jin' dua.
8 Eflaim qapp lanw ee Siongrder juer siuxbang :ee; lun qaur sendix, dirr ix longxjongw ee lo juer liac jiauw ee lybang, dirr ix ee Siongrder ee cur-lai kngr uanwhun.
9 Inx cimx cimx qaqi vairhuai, cincniu dirr Gibeah ee zit; Ix beh qir did inx ee juerquar, vran inx ee juerog.
10 Guaw cue diyc Islael, cincniu pudyy dirr kongwiaw; Guaw knuar qnir linw ee ledjow, cincniu buhuaqyw tauquir kixtauu sik ee quexjiw; jongwsirr inx jiurqin Baal Peor, juansimx qingwvair hitt xee tangx qenwsiaur :ee, dyrr jniaa juer kyxngor :ee, qapp inx soxx luan'air :ee jidngiu.
11 Lun qaur Eflaim, inx ee ingqngx beh cincniu jiauw vuex .kir; beh byy snix qniaw, byy duawsinx, byy huai'in.
12 Dyrr narr cri qniaw qaur duarhanr, Guaw iarr beh hro ix siw qniaw, qaur byy lauu jit xee; Guaw lirkuix inx, inx dyrr u jaieh.
13 Guaw knuar Eflaim cincniu Tyle, jraix dirr vuii ee de; jongwsirr Eflaim beh cua ix ee qniaxzii cud .laii, qaux hro taii siw langg :ee.
14 Jehovah ar, Liw diyhh hro inx; beh hro inx simxmih? Hro inx qalauhsinx ee txex, linx dax .kir.
15 Inx itcer ee pnaiw dai longxx dirr Gilgal, Guaw dirr hiax uanwhun inx; in'ui inx soxx qniaa ee pnaiw, Guaw beh dui' Guaw ee qrex qnuaw inx cud .kir, byy qycc tniawsiyh inx; inx ee siuxlingw longxx si vuergik :ee.
16 Eflaim siurr pah, inx ee qintauu qodaa, be e qed quexjiw; inx dyrr narr snix qniaw, Guaw beh taii siw inx soxx snix soxx tniar :ee.
17 Guaw ee Siongrder dikkag kiwjuat inx, in'ui inx m tniatanr Ix; inx iarr dikkag piauliuu dirr ledqog diongx.
10 Islael si borsing ee pudyciu, ix qed ix ee quexjiw; ix ee quexjiw qed naxx je, dyrr kiw jewdnuaa naxx je; toxde naxx vuii, dyrr jy tiaursiong naxx suiw.
2 Inx jrunn nng ngiu ee simx, dnaxx beh siurr dingrjue; Jehovah beh tiah inx ee jewdnuaa, huiw inx ee tiaursiong.
3 In'ui inx dnaxx beh qongw: Guanw byy ongg, in'ui guanw byy qingwuir Jehovah; ongg, e ter guanw juer simxmih?
4 Inx qongw vehcad'ue, lamrsamw jiuwjua lip iog; soxiw simxpnuar huad kiw, cincniu hngqaux ee indinn.
5 Samalia kiarkiw ee vecsnir beh in'ui Betaven ee guu-aw qniahniaa; in'ui ix hiaxee vecsnir beh uirdiyhh ix ee ingqngx byy .kir, iarr beh gniauhgniauc cuah.
6 Ix beh hro langg duar qaur Assylia, juer lexmic laii sangr hro Uixdai ee Ongg, Eflaim beh siurr lingziok, Islael beh uirdiyhh qaqi ee qewboo laii qenwsiaur.
7 Lun qaur Samalia, ix ee ongg bedbyy, cincniu juixbin ee puec jidngiu.
8 Ammon ee snuatauu, Islael ee jue, beh duw diyc huixbet; ciwper qapp jidlee beh huad dirr inx hiaxee dnxuaa-dingw; inx beh duiww dua snuax qongw: Kamr guanw; duiww siyw snuax qongw: Deh guanw.
9 Islael ar, liw dui' Gibeah ee zit ixlaii, dyrr huanrjue; inx dirr hiax kia; benw did dirr Gibeah qongqig vutgi ee langg ee qaujenr qaur dirr inx.
10 Guaw u juxir ee sii, dyrr beh jikhuat ix; inx hro nng hxang juer vexvak ee sii, ledvangx beh jurjip laii qongqig inx.
11 Eflaim si kuair jniurqar, buw ee guu-aw, rair dac gnoxqog :ee; Guaw ing dnax qruar dirr ix vuisuiw ee amrqunw; Guaw beh hro Eflaim tuax ciax; Judah beh lee cann; Jakob beh vee sangx cantoo.
12 Linw diyhh uirr qaqi ing qonggi ia jxingw, jiauww zinjuu laii siuquah; kaikunw pahngx ee de; in'ui jex si cuerqiuu Jehovah ee sii, tingwhau Ix laii, ing qonggi cincniu ho qangr lyc dirr linw.
13 Linw bad jingwjyh qan'og, siusingg juerquar; jiac vehcat ee quexjiw; in'ui uaxkyr qaqi ee soxx qniaa, iarr uaxkyr liw jerje ee iongxsu.
14 Soxiw dirr liw ee vecsnir diongx beh hingx kiw ziauxluan, liw longxjongw ee uersow beh siurr tiachuiw, si cincniu Salman dirr qaujenr ee zit tiachuiw Betarbel; hitt sii juer laurbuw :ee qapp inx ee qniaw, juer jit xe siurr siag siw.
15 In'ui linw ee dua pnaiw, Betel iarr beh anxnix kuanxtai linw. Qaur tnix qngx, Islael Ongg quatduanr beh bedbyy.
11 Islael juer ginxaw ee sii, Guaw tniar ix; qycc driaur Guaw ee qniaw cud Egipt-de.
2 Naxx qiyr inx, inx naxx jauw kuix, henwjer dirr jiaxee Baal, siyx hniux dirr gnoxsiong.
3 Guaw qar Eflaim yc qniaa, kanx ix ee ciuw; jongwsirr inx m jaix Guaw rix hyw inx.
4 Guaw ing juhui ee syh qapp zin'air ee duar kanx inx; Guaw kuanxtai inx cincniu dui' inx ee amrqunw tauw kuix inx ee dnax :ee, ing niucauw he dirr inx binrjingg.
5 Ix byy qycc dyr kir Egipt-de; Assylia beh juer ix ee ongg, in'ui ix m kingw dywdngw.
6 Dyqiamr beh qaur ix ee sniaa, huixhua inx ee mngqongg; in'ui inx ee qewboo tunbet.
7 Guaw ee vecsnir qaut'ir be vue Guaw; suizenn u langg qiyr inx qui'ngr Jiww quann :ee, jongwsirr byy jit xee jundiong Ix.
8 Eflaim ar, Guaw taixtyw e kiwsag liw? Islael ar, Guaw taixtyw e jiong' liw qaux hro langg? Guaw taixtyw e hro liw cincniu Admah? Taixtyw e kuanxtai liw juer Zeboiim? Guaw huesimx dngxir, Guaw ju'air ee simx jin' zet.
9 Guaw byy beh huad cud Guaw bingxlet ee siurkir; iarr byy qycc huixbet Eflaim; in'ui Guaw si Siongrder, m si sewqanlangg, si dirr linw diongqanx ee Sxingr :ee; Guaw byy beh dirr siurkir diongx limqaur linw.
10 Jehovah beh cincniu sraix decc hauw; inx beh duer Ix laii qniaa; Ix hauw ee sii, hiaxee qniaw dyrr gniauhgniauc cuah, dui' saihngx qnuaxqinw laii.
11 Cincniu cikjiauw-aw, dui' Egipt qinw qinw laii; qycc cincniu jnixaw dui' Assylia-de qaur; Guaw beh hro inx kiarkiw dirr qaqi ee cur; jex si Jehovah qongw :ee.
12 Eflaim ing kipenr uii Guaw, Islael-qrex iarr ing kuixqer uiluii Guaw; Judah kyr Siongrder jiangxquann, ngr Sxingr :ee u jinrdiongx ee simx.
12 Eflaim jiac hongx, qycc duizib danghongx; zidzit qetnix vehcat qapp qiongvy; qapp Assylia lip iog, ing iuu sangr qaur Egipt.
2 Jehovah qapp Judah venrlun, beh jiauww Jakob soxx qniaa :ee jikhuat ix, jiauww ix soxx juer :ee vywingr ix.
3 Ix dirr txex nirr knii diauu ix ee hniax ee kaaurdni; jongwlenn ee sii qapp Siongrder draur lat;
4 Qapp tnisair draur lat, qycc did diyc kacc ngiaa; tikaur kunxqiuu ix; dirr Betel duw diyc Ix, Ix dirr hiax qapp lanw qongxue;
5 Jehovah dyrr si banrqunx ee Siongrder; Jehovah si Ix ee miaa.
6 Soxiw liw diyhh qui'ngr liw ee Siongrder; jipsiuw zin'air qongvingg; siongsiongg tingwhau liw ee Siongrder.
7 Ix si singlixlangg, ciuw giac byy qongdy ee cinr, air ing kipenr.
8 Eflaim qongw: Guaw sidjai hyxgiac, ixqing’ did diyc jaivyw; dirr guaw soxx diyhbuaa did .diyc .ee, byy tangx cue diyc guaw u vutgi, laii sngr juer jue.
9 Dui' liw cud Egipt-de ee sii, Guaw juer liw ee Siongrder Jehovah; Guaw beh hro liw qycc kiarkiw dirr vowvnii, cincniu dirr duarhue ee zit jidngiu.
10 Guaw bad duiww jiaxee sendix qongw, qycc qetnix ngirsiong; Guaw iarr tog sendix sed piwzu.
11 Gilead byy jue mah? Inx juanzenn si huqew :ee; dirr Gilgal henr guu-aw juer jrer; inx ee jewdnuaa cincniu cann nirr lee jua ee jniaa dxuix.
12 Jaxjingg Jakob jauw qaur Alam-de, Islael in'ui bed did diyc bow laii hogsai langg; in'ui beh did diyc bow laii cri ngiuu.
13 Jehovah qycc ing jit xee sendix cua Islael cud Egipt, iarr ing jit xee sendix vyxjuann ix.
14 Eflaim ziaw diyc dua siurkir; soxiw ix hro langg lrauu huih ee jue beh qruix dirr ix; Eflaim soxx qniaa lingziok Jruw ee su, Jruw beh vywingr ix.
13 Jaxjingg Eflaim qongxue, langg longxx gniauhgniauc cuah; ix dirr Islael diongx diamr dirr quann xui; jongwsirr ix dirr Baal ee su huanrjue, dyrr drir qaur siw.
2 Dnaxx inx ee juerquar naxx huan naxx je, ing inx ee ginn uirr qaqi jrngx vut, inx jiauww inx ee qikiauw laii jy gnoxsiong, longxx si saihu soxx juer; inx girlun qongxx: Henwjer ee langg diyhh qapp guu-aw jimx cuir.
3 In'ui anxnix, inx beh cincniu jaxkiw-sii ee hunn, iarr cincniu kuair kuair dax ee lorjuiw, cincniu gorqakdniuu ee pnar cxig hro qongg hongx cuex .kir, qycc cincniu enx dui' txangx-aw cringr .cud .kir.
4 Dui' liw cud Egipt-de ee sii, Guaw juer liw ee Siongrder Jehovah; Guaw ixgua liw m tangx zinrbad vadd xee Siongrder; qycc Guaw ixgua byy u Qiuwjuw.
5 Dirr kongwiaw dasyr ee de, Guaw ixqing’ bad liw.
6 Inx jiauww inx ee bixniuu did diyc jiac vaw; ixqing’ jiac vaw, inx ee simx dyrr jurqyx, dui' anxnix be qir did Guaw.
7 Soxiw Guaw duiwdirr inx cincniu sraix, qycc cincniu var bih dirr lo-vnix.
8 Guaw duw diyc inx cincniu sitlyc qniaw ee himbuw, tiah lic inx ee hinghac; dirr hiax Guaw beh cincniu buw ee sraix tunjiac inx; iaxsiur beh tiah lic inx.
9 Islael ar, liw ee vairbyy dyrr si in'ui huanxduir Guaw, dyrr si huanxduir vangjan liw :ee.
10 Henrjai liw ee ongg dirr dyclyc, hro ix dirr liw jiaxee sniaa jinxqiur liw ar? Liw ee sursux dyrr si liw soxx bad qongw: Qra guanw setlip jit xee ongg qapp siuxlingw :ee. Dnaxx inx dirr dyclyc ar?
11 Guaw dirr siurkir diongx qra liw setlip ongg, iarr dirr Guaw ee dua siurkir hruir ix.
12 Eflaim ee juerquar qir diauu lehh, ix ee juerog siukngr lehh.
13 Hurzinlangg snix qniaw ee tangwtniar beh qaur dirr ix; ix si byy diwhui ee qniaw, in'ui ix ee sii ixqing’ qaur; m ingqaix encenn dirr juxqiongx kauw.
14 Guaw beh sioghuee inx tuatli imhuw ee qxuann; Guaw beh jinxqiur inx tuatli sixbyy; Sixbyy ar, liw ee jaihai dirr dyclyc? Imhuw ar, liw ee huixbet dirr dyclyc? Guaw quatduanr byy tewhuew.
15 Ix dirr hniadi diongx, suizenn qetsit jerje, jongwsirr beh u danghongx cuex .laii, dyrr si Jehovah ee hongx dui' kongwiaw kiw, ix ee juixjnuaa beh dax, ix ee guantauu beh juat, ix beh cniuxtec soxx jikju itcer tangx hnuahiw ee vyxkir.
16 Samalia beh damdngx ix ee jue; in'ui vuergik ix ee Siongrder; ix beh dyw dirr dyx-xe, inx ee ngex-aw beh hro langg siag siw, inx u srinx ee hurzinlangg beh hro langg puawvag.
14 Islael ar, liw diyhh dywdngw laii qruix Jehovah, liw ee Siongrder; in'ui liw dui' liw ee jue laii vuahdyw.
2 Diyhh virvan e dywdngw laii qruix Jehovah, duiww Ix qongw: Qriuu Liw siawbenw longxjongw ee jue, ing undenw jiaplap guanw; guanw dyrr ing cuir ylyw laii ter singlew.
3 Assylia be e qiur guanw; guanw byy qycc kiaa bew, iarr byy qycc duiww guanw ee ciuw soxx jy :ee qongw: Liw si guanw ee siongrder, in'ui byy ve ee qniaw dui' Liw did diyc linbinw.
4 Guaw beh rix hyw ix ee vuervuan, Guaw beh vec vec tniar inx; in'ui Guaw ixqing’ duiww inx suah Guaw ee siurkir.
5 Guaw beh dirr Islael cincniu lorjuiw; ix beh kuix huex cincniu vikhabhuex; ix beh crunx qinx cincniu Lebanon.
6 Ix ee qix beh crunx dngg, ix ee suiw beh cincniu qnanaxciu; ix ee pangx beh cincniu Lebanon.
7 Diamr dirr ix ee imwngw :ee, beh dywdngw .laii; inx beh cincniu gnoxqog qycc huanx cnix, kuix huex cincniu pudyciu; ix ee pangx beh cincniu Lebanon ee jiuw.
8 Eflaim beh qongw: Guaw qapp gnoxsiong iauxx u simxmih qansiap ar? Guaw u rinr ix, qycc knuawqor ix. Guaw cincniu cnicuir ee jingciu, liw ee quexjiw dui' Guaw laii did .diyc.
9 Jirjui si diwhui ee langg, e bingvik jiaxee su? Jirjui si tongdat ee langg, e jaix jiaxee? In'ui Jehovah ee dyrlo si jingwdit, girlangg beh qniaa dirr hitt diongqanx, vuergik ee langg beh vuahdyw dirr hitt dingxbin.