Sursux Qir

1 Josua siw liauxau, Islaellangg mng Jehovah qongxx, "Jirjui diyhh juewtauu jnriu kir qra guanw qongqig Kanaanlangg, qapp inx qaujenr?"

2 Jehovah qongw, "Judah diyhh jnriu .kir. Knuar ar, Guaw ixqing’ jiong' hitt xee de qaux dirr ix ee ciuw."

3 Judah duiww ix ee hniax Simeon qongw, "Cniaw liw qapp guaw jnriu kir qaur guaw soxx liamx .diyc ee de, qapp Kanaanlangg qaujenr. Guaw iarr beh qapp liw kir, qaur liw soxx liamx .diyc ee de." Simeon dyrr qapp ix kir. Judah dyrr jnriu .kir.

4 Jehovah jiong' Kanaanlangg qapp Pelizlangg qaux dirr inx ee ciuw;

5 Inx dirr Bezek pah siw inx jit-bxan langg; qycc dirr Bezek duw diyc Adonibezek, qapp ix qaujenr; taii ngiaa Kanaanlangg qapp Bezeklangg.

6 Adonibezek dyjauw, inx duizib ix, liac diyc ix, cyr dng ix ee ciuw qapp ix ee kax ee duarvorbuw.

7 Adonibezek qongw, "Jingg u cid-jap xee ongg, ciuw qapp kax ee duarvorbuw longxx cyr .kiw .laii, dirr guaw ee dyh-kax kiyh jiahmic; dnaxx Siongrder jiauww guaw soxx qniaa :ee vywingr guaw." Inx duar ix qaur Jelusalem; ix dyrr siw dirr hiax.

8 Judahlangg qongqig Jelusalem, cruw ix, ing dyx taii siw inx, qycc vangr huew siyx sniaa.

9 Au .laii Judahlangg lyc .kir, qapp diamr dirr snuade, lamsir ee de, vni'ngiuu ee de ee Kanaanlangg qaujenr.

10 Judah qycc kir, pah hiaxee kiarkiw dirr Heblon ee Kanaanlangg; taii siw Sesai, Ahiman, Talmai; Heblon jingg miaa qiyr Kiliat Arba.

11 Ix dui' hiax kir pah dirrDebir kiarkiw ee vecsnir.

12 Debir jingg miaa qiyr Kiliat Sefer. Kaleb qongw, "Narr u langg pah Kiliat Sefer laii cruw ix, guaw beh jiong' guaw ee jaboxqniaw Acsah hro ix juer bow."

13 Kaleb ee siyxdi Kenaz ee qniaw Otniel cruw ix; ix dyrr jiong' ix ee jaboxqniaw Acsah hro ix juer bow.

14 Acsah quewmngg ee sii krngr diongrhux duiww inx laurve tyw jit kux cann. Acsah dui' luu lyc .laii. Kaleb mng ix qongxx, "Liw beh simxmih ar?"

15 Ix duiww ix qongw, "Qriuu liw suwhog guaw. Liw ixqing’ andir guaw dirr lamhngx ee de, qriuu liw hro guaw juixjnuaa." Kaleb dyrr qra dingw ee juixjnuaa qapp xe ee juixjnuaa hro ix.

16 Moses ee guarcig si Kenlangg, ix ee qniaxsunx qapp Judah ee qniaxsunx dui' Jyxciu Sniaa snaqab jnriu .kir, qaur Alad lamsir, Judah ee kongwiaw, qapp vecsnir snaqab kiarkiw.

17 Judah qapp ix ee hniax Simeon snaqab kir, pah siw kiarkiw dirr Zefat ee Kanaanlangg, itjin huixbet ix; hitt xee sniaa dyrr miaa qiyr Hormah.

18 Judah qycc cruw Gaza qapp ix ee qingxqair, Askelon qapp ix ee qingxqair, Eklon qapp ix ee qingxqair.

19 Jehovah qapp Judah snaqab dilehh. Ix dyrr qnuaw cud snuade kiarkiw ee vecsnir, danrsi be e qnuaw cud vni'ngiuu kiarkiw ee vecsnir, in'ui inx u ticciax.

20 Inx jiauww Moses soxx qongw :ee, ing Heblon hro Kaleb, ix dyrr dui' hiax qnuaw cud Anak snax xee qniaw.

21 Benjaminlangg byy qnuaw cud kiarkiw dirr Jelusalem ee Jebuslangg; Jebuslangg iuguann dirr Jelusalem qapp Benjaminlangg snaqab kiarkiw, qaur qinaxzit.

22 Josef-qrex iarr jnriu kir qongqig Betel; Jehovah qapp inx snaqab dilehh.

23 Josef-qrex crex langg kir taux knuar Betel; hitt xee sniaa tausingx miaa qiyr Luz.

24 Juer jingtamr :ee knuar qnir jit langg dui' sniaa-lai cud .laii, dyrr duiww ix qongw, "Qriuu liw qra zip sniaa ee lo vyr guanw jaix, guanw beh hyw kuanxtai liw."

25 Hitt langg dyrr vyr inx zip sniaa ee lo, inx dyrr ing dyx pah siw sniaa-lai ee vecsnir; dogdok vangr hitt langg qapp ix juann qrex kir.

26 Hitt langg kir Hitlangg ee de, kiw jit jxy sniaa, hy miaa qiyr Luz; qaur qinaxzit iauxx qiyr jitt xee miaa.

27 Manasseh iarr byy qnuaw cud Bet San qapp ix ee hniusia ee vecsnir, Taanac qapp ix ee hniusia ee vecsnir, Dor qapp ix ee hniusia ee vecsnir, Ibleam qapp ix ee hniusia ee vecsnir, Megiddo qapp ix ee hniusia ee vecsnir; Kanaanlangg quat'ir kiarkiw dirr hiaxee derhngx.

28 Qaur Islael qiongsing, dyrr hro Kanaanlangg juer koxqangx, byy itjin qnuaw inx cud.

29 Eflaim iarr byy qnuaw cud kiarkiw dirr Gezer ee Kanaanlangg; Kanaanlangg dyrr dirr inx diongqanx iuguann kiarkiw dirr Gezer.

30 Zebulun iarr byy qnuaw cud Kitlon ee vecsnir, qapp Nahalal ee vecsnir. Kanaanlangg dyrr iuguann kiarkiw dirr inx diongqanx, laii juer koxqangx.

31 Aser iarr byy qnuaw cud dirr Acko kiarkiw ee vecsnir, qapp Sidon, Ahlab, Aczib, Helbah, Afek, qapp Rlehob kiarkiw ee vecsnir.

32 Aserlangg duar dirr kiarkiw hitt soxjai Kanaanlangg ee diongqanx, in'ui byy qnuaw inx cud .kir.

33 Naftali byy qnuaw cud Bet Semes kiarkiw ee vecsnir, qapp Betanat kiarkiw ee vecsnir. Naftali dyrr druar dirr kiarkiw hitt soxjai Kanaanlangg ee diongqanx. Danrsi Bet Semes qapp Betanat kiarkiw ee vecsnir longxx juer koxqangx.

34 Amolilangg qiongvig Dan ee langg, hro inx kiarkiw dirr snuade, byy iong'unw inx lyc kir vni'ngiuu.

35 Amolilangg dyrr quat'ir kiarkiw dirr Heles Snuax, dirr Aijalon, dirr Saalbim. Au .laii Josef-qrex qiongsing, hro inx juer koxqangx.

36 Amolilangg ee derqair, si dui' Aklabbim Snuapniaa, dui' Sela jnriu .kir.

2 Jehovah ee suwjiaw dui' Gilgal jnriu qaur Boqim, qongw, "Guaw hro linw dui' Egipt jnriu .laii, cua linw qaur Guaw duiww linw ledjow jiuwjua ee de. Guaw iarr bad qongw, soxx qapp linw lip ee iog, Guaw ingxuanw byy uivue.

2 Linw iarr m tangx qapp jitt soxjai kiarkiw ee vecsnir lip iog, diyhh tiachuiw inx ee dnxuaa. Linw qingxzenn m tniax Guaw ee ue, si jnaixngiu anxnix qniaa ar?

3 In'ui anxnix Guaw qycc qongw, Guaw byy beh dui' linw ee binrjingg qnuaw cud inx, inx beh juer linw hiap-xe ee cxir, inx ee siongrder beh juer hai linw ee lybang."

4 Jehovah ee suwjiaw duiww Islael jingwlangg qongw jiaxee ue ee sii, vecsnir dyrr kuix sniax tikaur;

5 Dyrr hy hitt soxjai ee miaa qiyr Boqim; inx dirr hiax henwjer hro Jehovah.

6 Josua crex Islaellangg kir ee sii, inx dagg langg qruix inx ee giap, laii did diyc inx ee de.

7 Josua dilehh ee zit, qapp Josua siw liauxau hiaxee knuar qnir Jehovah uirr Islaellangg soxx qniaa dua su ee dniuxlyw iauxx dilehh ee sii, vecsnir hogsai Jehovah.

8 Jehovah ee lovok, Nun ee qniaw Josua, jit-vah id-jap huer siw.

9 Inx dyrr baijongr ix dirr ix ee giap ee qaiwlai, dyrr si dirr Eflaim snuade ee Timnat Selah, dirr Gaas Snuax ee vaksir.

10 Hitt dai ee langg longxx dywjow; ixau qycc jit dai ee langg hingx kiw, m jaix Jehovah, iarr m jaix Ix uirr Islaellangg soxx qniaa ee su.

11 Islaellangg qniaa Jehovah knuar juer pnaiw ee su, kir hogsai Baal;

12 Kiwsag inx ledjow ee Siongrder Jehovah, dyrr si cua inx cud Egipt-de :ee, kir duer vadd xee siongrder, dyrr si siwuii hiaxee vecsnir ee siongrder, quirvair inx, laii ziaw Jehovah ee dua siurkir.

13 Inx iarr kiwsag Jehovah, kir hogsai Baal qapp Astate.

14 Jehovah siurkir Islael ee langg, jiong' inx qaux dirr cniuxliac inx ee langg ee ciuw, inx dyrr cniuw inx. Ix qycc bre inx hro siwuii duiwdik ee ciuw; drir qaur inx dirr inx ee duiwdik ee taujingg byy qycc kia e diauu.

15 Inx bylun kir dyclyc, Jehovah crunx ciuw qangr jaieh hro inx, jiauww Jehovah soxx qongw ee ue, qycc jiauww Jehovah duiww inx soxx jiuwjua :ee; inx dyrr qik kunwkow.

16 Jehovah dyrr hingx kiw sursux; inx dyrr qiur vecsnir tuatli cniuxliac inx ee langg ee ciuw.

17 Danrsi inx byy tniatanr inx ee sursux, qingxzenn qniaa sia'imm, duer vadd xee siongrder laii quirvair inx. Inx ee ledjow tranr Jehovah ee bingrling soxx qniaa ee lo, inx qinw qinw uaicuac ix, byy jiauww anxnix qniaa.

18 Jehovah qra inx hingx kiw sursux ee sii, Jehovah dyrr qapp sursux dilehh; iarr dirr sursux uac dilehh itcer ee zit, qiur inx tuatli duiwdik ee ciuw. Inx in'ui siurr apjer koxcow, dyrr tror kuir, soxiw Jehovah dyrr tewhuew.

19 Qaur sursux siw liauw, inx dyrr uat dngw kir qniaa, viw inx ee verqongx qyckacc pnaiw, duer vadd xee siongrder laii hogsai inx, quirvair inx, longxx byy qaiw inx ee soxx qniaa qapp inx qowjib ee lo.

20 Jehovah dyrr siurkir Islaellangg, qongw, "In'ui jitt xee vecsnir uivue Guaw ee iog, dyrr si Guaw soxx bingrling inx ee ledjow :ee, iarr byy tniatanr Guaw ee ue,

21 Soxiw Josua siw ee sii soxx cunx ee dagg jok, ixau Guaw byy beh qycc dirr inx ee binrjingg qnuaw cud jit jok;

22 Tangx ing jiaxee laii ciwgiam Islaellangg, knuar inx kingw jipsiuw Jehovah ee dyrlo laii qniaa ix, cincniu inx ee ledjow bad siuw ix, iacc byy."

23 Soxiw Jehovah lauu jiaxee jok, byy qinw qinw qnuaw inx cud, iarr byy jiong' inx qaux dirr Josua ee ciuw.

3 Jehovah soxx lauu jiaxee jok, si beh ing laii ciwgiam Islaellangg, dyrr si hiaxee m bad qnir quer Kanaan qaujenr ee su :ee,

2 Diaudii beh hro Islael au dai ee langg jaix, laii qawsi inx qaujenr, dyrr si hiaxee jingg soxx m bad qingquer ee langg.

3 Soxx lauu lehh hiaxee jok dyrr si Filis go xee siuxlingw, qapp itcer ee Kanaanlangg Sidonlangg, qapp kiarkiw Lebanon Snuax ee Hivilangg, dui' Baal Hermon Snuax, qaur Hamat kauw;

4 Jex dyrr si beh ing inx laii ciwgiam Islaellangg, knuar inx kingw tniatanr Jehovah tog Moses soxx bingrling inx ledjow ee qaiwbing iacc byy.

5 Dui' anxnix Islaellangg kiarkiw dirr Kanaanlangg, Hitlangg, Amolilangg, Pelizlangg, Hitlangg, Jebuslangg ee diongqanx; cua inx ee jaboxqniaw juer bow,

6 Iarr ing jaboxqniaw qer inx ee qniaw, suar hogsai inx hiaxee siongrder.

7 Islaellangg qniaa Jehovah soxx knuar juer pnaiw ee su, be qir did Jehovah, inx ee Siongrder, kir hogsai jiaxee Baal qapp Aselah.

8 Soxiw Jehovah siurkir Islaellangg, qra inx bre hro Mesopotamia ee ongg Kusan Rlisataim;

9 Islaellangg hogsai Kusan Rlisataim veh nii. Islaellangg qiuqiyr Jehovah ee sii, Jehovah dyrr qra Islaellangg hingx kiw jit xee jinxqiur :ee qiur inx; dyrr si Kaleb ee siyxdi Kenaz ee qniaw Otniel.

10 Jehovah ee Sinn limqaur ix, ix dyrr juer Islael ee sursux, cud kir qaujenr. Jehovah jiong' Mesopotamia ee ongg Kusan Rlistaim, qaux dirr ix ee ciuw, ix dyrr kacc ngiaa Kusan Rlisataim.

11 Dui' anxnix hitt xee derhngx taiwvingg sir-jap nii. Kaleb ee qniaw Otniel siw.

12 Islaellangg qycc qniaa Jehovah soxx knuar juer pnaiw ee su. Jehovah dyrr hro Moab Ongg Eglon qiongsing qongqig Islaellangg; in'ui inx qniaa Jehovah soxx knuar juer pnaiw :ee.

13 Eglon jurjip Ammonlangg qapp Amaleklangg uaw ix, kir pah Islaellangg, jiamr jyxciu ee sniaa.

14 Dui' anxnix Islaellangg hogsai Moab Ongg Eglon jap-veh nii.

15 Islaellangg qiuqiyr Jehovah ee sii, Jehovah dyrr qra inx hingx kiw jit xee jinxqiur :ee, dyrr si Benjaminlangg Gela ee qniaw Ehud; ix si quanwlen ing dyr ciuw :ee. Islaellangg tokdiong ix sangr lexmic hro Moab Ongg Eglon.

16 Ehud uirr qaqi pah jit qix siangbin lrai ee qiamr, dngg jit dxng, vak dirr jniar tuiw ihok ee lairbin.

17 Ix ing lexmic henr hro Moab Ongg Eglon; Eglon si jin' vuii ee langg.

18 Henr lexmic ixqing’ bingvik, dyrr crex duar lexmic ee langg longxx kir.

19 Ix vunxsinx dui' Gilgal pah jiyhsiong ee soxjai uat dywdngw .laii, qongw, "Ongg ar, guaw u viwbit ee su beh qra liw qongw." Ongg qongw, "Sokjing." Kia dirr ix sinvnix ee langg dyrr longxx ter cud.

20 Ehud jiurqin ix, ongg qaqi jit xee jre dirr lianglingw ee laudingw. Ehud qongw, "Guaw hrong Siongrder ee bingrling u dairjir laii vyr liw." Ongg dyrr dui' jyrui kia .kiw .laii.

21 Ehud dyrr crunx dyr ciuw, dui' jniar tuiw vuic cud qiamr, cxir zip ongg ee vakdow,

22 Qiamr ee vner iarr suar zip .kir, qiamr hro iuu qa diauu lehh, in'ui ix byy dui' ix ee vakdow vuic qiamr cud .laii; dyrr tangr quer qajiah cud .laii.

23 Ehud dyrr cud kir qaur lingxlongg, jiong' hiaxee laumngg qnuaisyw.

24 Ix cud kir liauw, ongg ee lovok qaur, knuar qnir laumngg qnuaisyw, dyrr qongw, "Ix dikkag si dirr laudingw decc dairven."

25 Inx tingwhau qaur gonggniac, knuar qnir ix byy kuix laudingw ee mngg, dyrr giac syxsii laii kuix. Knuar ar, inx ee juxlangg ixqing’ siw, dyw dirr de nirr.

26 Inx encenn ee sii, Ehud dyrr dyjauw, ixqing’ quer pah jiyhsiong ee de, siamxjauw qaur Seilah.

27 Ixqing’ qaur, dyrr dirr Eflaim ee snuade vunn sauwqag. Islaellangg dyrr duer ix dui' snuade lyc .kir.

28 Ix qniaa dirr taujingg, duiww inx qongw, "Linw duer guaw laii, in'ui Jehovah ixqing’ jiong' linw ee duiwdik Moablangg qaux dirr linw ee ciuw." Inx dyrr duer ix lyc .kir, vexsiuw Moab ee duiwbin, Jordan Hyy ee dortauu, byy iong'unw jit langg quer .kir.

29 Hitt sii taii siw Moablangg iokliok jit-bxan, longxx si dua hanr ee iongxsu, byy jit xee jauw li.

30 Dui' anxnix Moab dyrr kuthok dirr Islaellangg; derhngx taiwvingg veh-jap nii.

31 Ehud liauxau, u Anat ee qniaw Samgar, ix ing qnuaw guu ee ticcir pah siw lak-vah ee Filislangg. Ix iarr qiur Islaellangg.

4 Ehud siw liauw, Islaellangg qycc qniaa Jehovah soxx knuar juer pnaiw ee su.

2 Jehovah bre inx dirr Kanaan Ongg Jabin ee ciuw, dyrr si dirr Hazor juer ongg :ee. Ix ee qundniuw si Sisela, ix kiarkiw dirr guarvanglangg ee Haloset.

3 Jabin Ongg u ticciax qauw-vah dniux; ix dua dua ki'ab Islaellangg zi-jap nii; Islaellangg dyrr qiuqiyr Jehovah.

4 Hitt sii u jit xee luxsenxdix miaa qiyr Debolah, si Lappidot ee bow, ix juer Islael ee sursux.

5 Ix kiarkiw dirr Eflaim ee snuade, Rlamah qapp Betel ee diongqanx, dirr Debolah ee jyxciu kax. Islaellangg longxx jnriu kir ix hiax, siurr ix pnuawduanr.

6 Ix crex langg qiyr Abinoam ee qniaw Balak dui' Naftali ee Kedes laii, duiww ix qongw, "Jehovah, Islael ee Siongrder qamxx m si bingrling qongxx, 'Liw diyhh kir Tabor Snuax, cua Naftali app Zebulunlangg jit-bxan qapp liw kir?

7 Guaw beh hro Jabin ee qundniuw Sisela qapp ix ee ciax, ix ee juann qunx, qaur Kison Hyy liw hiax; Guaw beh jiong' ix qaux dirr liw ee ciuw.'"

8 Balak qra ix qongw, "Liw narr qapp guaw kir, guaw dyrr beh kir; liw narr m qapp guaw kir, guaw dyrr m kir."

9 Ix qongw, "Guaw dikkag beh qapp liw kir; danrsi liw dirr soxx qniaa ee lo, be did diyc inghenw, in'ui Jehovah beh bre Sisela dirr hurzinlangg ee ciuw." Debolah dyrr kiw .laii, qapp Balak snaqab kir Kedes.

10 Balak dyrr jiyjip Zebulunlangg qapp Naftalilangg qaur Kedes; duer ix jnriu .kir .ee u jit-bxan langg. Debolah iarr qapp ix jnriu .kir.

11 Kenlangg Heber bad lirkuix Kenlangg, dyrr si Moses ee guarcig, Hobab ee horer; dyrr dah vowvnii dirr Zanannim ee siongrciu vnix, dyrr si uaw qin Kedes :ee.

12 U langg qra Sisela qongw, Abinoam ee qniaw Balak ixqing’ jnriu kir Tabor Snuax.

13 Sisela dyrr jurjip ix longxjongw ee ciax, dyrr si ticciax qauw-vah dniux, qapp duer ix ee juann qunx, dui' guarvangx ee Haloset, qaur Kison Hyy.

14 Debolah duiww Balak qongw, "Kiw .laii, qinaxzit dyrr si Jehovah jiong' Sisela qaux dirr liw ee ciuw ee zit. Jehovah qamxx byy dirr liw ee taujingg qniaa mah?" Dui' anxnix, Balak dui' Tabor Snuax lyc .laii; duer ix :ee u jit-bxan langg.

15 Jehovah ing dyx pah luan Sisela qapp ix soxu ee ciax, ix ee juann qunx, dirr Balak ee binrjingg; Sisela lyc ciax vorqniaa dyjauw.

16 Danrsi Balak duizib hiaxee ciax qapp qundui, qaur guarvangx ee Haloset. Sisela ee juann qunx longxx dyw dirr dyx-xe, byy lauu jit xee langg.

17 Jixu Sisela vorqniaa dyjauw, qaur Kenlangg Heber ee bow Jael ee vowvnii; in'ui Hazor Ongg Jabin qapp Kenlangg Heber ee qrex hyhyw.

18 Jael cud laii gniajih Sisela, qra ix qongw, "Guaw ee jruw ar, uat .zip .laii, cniaw liw uat zip guaw jiax, mrbenw qniax."

19 Sisela dyrr uat zip ix ee vowvnii. Jael dyrr ing tanxaw qra ix qah lehh. Sisela qra ix qongw, "Guaw cuiwdax, cniaw liw ing damrvyc juiw hro guaw limx." Ix dyrr kuix drew linx ee puede hro ix limx, iuguann qra ix qah lehh.

20 Sisela qycc qra ix qongw, "Liw kia dirr vowvnimngg, narr u langg laii mng liw qongxx, 'U langg dirr liw jiax byy?' Liw dyrr qra ix qongw, 'Byy.'"

21 Sisela sen, kunr lyc binn. Heber ee bow Jael tec vowvnii ee dxingx, ciuw giac tuii-aw, liamx liamx aw qniaa qaur ix hiax, ing dxingx dui' ix ee vinwvnix dingr zip taur quer tokax; ix dyrr siw.

22 Hitt sii Balak duizib Sisela, Jael cud laii gniajih ix, qra ix qongw, "Laii ar, guaw ing liw soxx cue ee langg hro liw knuar." Ix dyrr zip .kir. Knuar ar, Sisela ixqing’ siw, dyw lehh, dxingx iauxquxx dirr ix ee vinwvnix.

23 Anxnix hitt jit zit, Siongrder hro Kanaan Ongg Jabin kuthok dirr Islaellangg ee binrjingg.

24 Dui' anxnix Islaellangg ithuad u sewlik, kacc ngiaa Kanaan Ongg Jabin, qaur itjin bet Kanaan Ongg Jabin.

5 Hitt zit Debolah qapp Abinoam ee qniaw Balak cniuwquax, qongw:

2 In'ui Islael diongx juewtauu :ee, juewtauu cua inx,

In'ui vecsnir qamguan hisingx,

Linw diyhh ylyw Jehovah.

3 Led'ongg ar, diyhh tniax, jiaxee siuxlingw diyhh ngar hnirkangx;

Guaw ngr Jehovah, guaw beh gimm six;

Guaw beh cniuwquax ylyw Jehovah, Islael ee Siongrder.

4 Jehovah ar, Liw dui' Seir cud,

Dui' Edom qniaa .laii;

Hitt sii de dinxdang, tnix decc dih;

Hunn iarr dih juiw.

5 Jiaxee snuax dirr Jehovah ee binrjingg iycuah,

Dyrr si jitt xee Seir Snuax dirr Jehovah, Islael ee Siongrder ee binrjingg iycuah.

6 Dirr Anat ee qniaw Samagar ee sii,

Qycc dirr Jael ee zit, dua lo byy langg qniaa;

Qnialo ee langg longxx si uanx siyw lo.

7 Islael diongx byy taulangg, longxjongw byy,

Qaur guaw Debolah kiw .laii,

Qaur guaw kiw laii dirr Islael diongx juer laurbuw.

8 Inx qingw sinx ee siongrder,

Qaujenr dyrr qaur inx ee sniamngg.

Hitt sii Islael sir-bxan langg ee diongqanx,

Qamxx e knuar qnir dinvaii qapp cniux mah?

9 Guaw ee simx iwhiongr Islael hiaxee setlip ludhuad :ee,

Vecsnir diongx qamguan hisingx :ee;

Linw diyhh ylyw Jehovah.

10 Kiaa vec luu :ee,

Jre siuwhuex ee tanxaw :ee,

Qnialo :ee, linw longxx diyhh vywiongg.

11 Dirr cnriu juiw ee soxjai, lirkuix sria jnxir ee langg ee sniax hng hng,

Dirr hiax langg beh qongw kiw Jehovah qonggi ee soxx qniaa,

Dyrr si Ix dirliw Islael qonggi ee soxx qniaa.

Hitt sii Jehovah ee vecsnir lyc kir qaur sniamngg.

12 Debolah ar, cnew ar, cnew ar,

Liw diyhh cnew, diyhh cnew, laii cniuwquax.

Balak ar, liw diyhh kiw .laii, Abinoam ee qniaw, diyhh liac liw soxx liac :ee kir.

13 Hitt sii soxx cunx ee quiwjok, qapp vecsnir snaqab lyc .laii,

Jehovah uirr guaw limqaur, qongqig iongxsu.

14 U dui' Eflaim laii :ee, ix ee qinvunw dirr snuaqog;

Benjamin camx dirr liw ee vecsnir diongx qinduer liw,

U sed ludhuad :ee, dui' Maqir lyc .laii;

U giac qnuaiw diamxsngr vecsnir ee siauwgiac :ee, dui' Zebulun lyc .laii;

15 Issaqar ee siuxlingw, qapp Debolah snaqab laii,

Issaqar qapp Balak jidngiu;

Inx duer ix jauw lyc vni'ngiuu;

Dirr Rleuben ee kex-vnix,

Simx u dua dua jimjiog girlun.

16 Liw sniaw su jre dirr ngiuu-diauu ee diong'ngx,

Tniax qiyr ngiuu-qrunn ee sniax ar?

17 Gad kiarkiw dirr Jordan hitt vingg;

Dan sniaw su tingg dirr junn nirr?

Aser jing jing jre dirr haiw-vnix,

Diamr dirr qangw-lai.

18 Zebulun si vniawmia pesiw ee vecsnir;

Qapp Naftali dirr can'iaw quann ee soxjai, iarr si anxnix.

19 Led'ongg laii qaujenr;

Hitt sii Kanaan led'ongg dirr Megiddo juiw-vnix ee Taanac qaujenr,

Danrsi byy cniuw diyc ginn.

20 U an' tnix laii decc qaujenr :ee,

Cnisinn dui' inx ee kuixdy laii qapp Sisela qaujenr.

21 Kison Hyy dyrr si qoxjaw ee hyy.

Guaw ee sinn ar, liw hunwiongw jinwjingg kir.

22 Bexdee kogkok hauw, si in'ui qinw qinw jauw.

Dyrr si u lat :ee u qinw qinw jauw.

23 Jehovah ee suwjiaw qongw: Diyhh jiuwjow Meloz,

Dua dua jiuwjow qidiongx kiarkiw ee vecsnir,

In'ui inx byy laii vangjan Jehovah,

Byy laii vangjan Jehovah dixdik iongxsu.

24 Kenlangg Heber ee bow Jael,

Viw hiaxee hurzinlangg kacc u hokkir,

Viw kiarkiw vowvnii lai ee hurzinlangg kacc u hokkir,

25 Sisela tyw juiw, ix dyrr ing linx hro ix,

Ing vyxvuer ee vnuaa pangg gulin'iuu hro ix.

26 Jael crunx ciuw giac dxingx,

Jniar ciuw giac juewqanglangg ee tuii-aw,

Ing tuii qongr Sisela, dingr quer ix ee taukag,

Qra cak taur quer ix ee vinwvnix.

27 Dirr ix ee kax ee diongqanx, Sisela pag .lyc .kir,

Cih .lyc .kir, dyw lehh,

Dirr ix ee kax ee diongqanx pah .lyc, cih .lyc .kir;

Dirr soxx pah lyc ee soxjai, cih lyc kir laii siw.

28 Sisela ee laurbuw dui' dangsir knuar .cud .kir,

Dui' tang'axjiw nirr qiyr qongxx:

Jnaixngiu ix ee cia ban ban laii?

Jnaixngiu ix ee cialunn hiacc encenn ar?

29 Qinsuii ix cangmiaa junquir ee hurluw rinr ix,

Ix iarr qaqi rinr qongxx:

30 Qamxx byy soxx did .diyc mah? Qamxx byy vunx soxx cniuw ee mic mah?

Dagg langg vunx jit~nng xee jaboxginxaw;

Sisela dyrr vunx soxx cniuw caixsig ee snxax,

Soxx cniuw siuwhuex caixsig ee snxax,

Nng bin longxx si caixsig siuwhuex :ee, tangx qruar dirr amrqunw, juer soxx cniuw ee mic.

31 Jehovah ar, guan Liw ee duiwdik longxx cincniu anxnix bedbyy;

Guan tniar Ix ee langg cincniu zit cud, qngx nawnar.

Ixau derhngx taiwvingg sir-jap nii.

6 Islaellangg qycc qniaa Jehovah soxx knuar juer pnaiw ee su, Jehovah dyrr qaux inx dirr Midian ee ciuw, ligquer cid nii.

2 Midian ee ciuw apjer Islaellangg; Islaellangg uirdiyhh Midianlangg ee enqor, dyrr uirr qaqi dirr snuax nirr kuix hetdong, qapp hiamxiaur ee soxjai.

3 Islaellangg ia jxingw liauxau, Midianlangg, Amaleklangg, qapp danghngx ee langg, longxx jnriu laii qongqig inx;

4 Jrad ngiaa dirr inx ee duiwbin, pah pnaiw hitt soxjai ee toxsanw, qaur Gaza, byy lauu jiahmic hro Islaellangg, ngiuu, guu, qapp luu iarr byy.

5 In'ui inx duar jingsnix qapp vowvnii jnriu .laii, cincniu cauxmeh hiacc je, langg qapp logdyy sngr be liauw; inx zip jitt xee derhngx beh pah pnaiw ix.

6 Islaellangg in'ui Midianlangg ee enqor kunwkow qaur qik; Islaellangg dyrr qiuqiyr Jehovah.

7 Islaellangg in'ui Midianlangg ee enqor qiuqiyr Jehovah ee sii,

8 Jehovah dyrr crex sendix qaur Islaellangg hiax, duiww inx qongw, "Jehovah, Islael ee Siongrder anxnix qongw, 'Guaw bad cua linw dui' Egipt jnriu .laii;

9 Guaw iarr qiur linw tuatli Egiptlangg ee ciuw, iarr tuatli itcer apjer linw ee langg ee ciuw, dui' linw ee binrjingg qnuaw inx cud, ing inx ee de hro linw.

10 Guaw iarr duiww linw qongw, Guaw si Jehovah, linw ee Siongrder, linw kiarkiw Amolilangg ee de, m tangx qniax inx ee siongrder; danrsi linw m tniax Guaw ee ue.'"

11 Jehovah ee suwjiaw qaur Oflah, jre dirr Abiezer-jok ee langg Joas ee siongrciu kax. Joas ee qniaw Gideon dirr jiuxkud hiax decc pah bec, m rair hro Midianlangg knuar .qnir.

12 Jehovah ee suwjiaw duiww Gideon henxhen, duiww ix qongw, "U kuiwlat ee iongxsu ar, Jehovah qapp liw dilehh."

13 Gideon duiww ix qongw, "Guaw ee jruw ar, narr Jehovah qapp guanw dilehh, guanw jnaixngiu duw diyc jex itcer ee su ar? Guanw ee ledjow soxx qra guanw qongw Jehovah hiaxee qrii su dirr daclyc ar? Inx qongw, 'Ix qamxx byy cua guanw dui' Egipt jnriu .laii' mah?' Dnaxx Jehovah vangwsag guanw, jiong' guanw qaux dirr Midianlangg ee ciuw."

14 Jehovah knuar Gideon, dyrr qra ix qongw, "Diyhh ing liw jitt xee lat, laii qiur Islael cud Midianlangg ee ciuw; Guaw qamxx byy crex liw mah?"

15 Gideon qra Ix qongw, "Jruw ar, guaw beh ing simxmih qiur Islael? Knuar ar, guaw ee qrex si Manasseh diongx derr id songwhiongx :ee, dirr guaw laurve ee qrex guaw si derr id ser :ee."

16 Jehovah duiww ix qongw, "Guaw beh qapp liw dilehh, liw beh pah Midianlangg, cincniu pah jit langg jidngiu."

17 Ix qra Ix qongw, "Guaw narr dirr Liw ee binrjingg, did diyc undenw, qriuu Liw hro guaw jit xee diaurtauu tangx jaix qapp guaw qongw :ee dyrr si Liw.

18 Cniaw Liw m tangx lirkuix jiax, tingwhau guaw qycc laii liw jiax, duar guaw ee lexmic he dirr Liw ee binrjingg." Ix qongw, "Guaw beh tingwhau liw qycc laii."

19 Gideon kir virvan jit jiah snua'ngiuu-aw, ing jit efah ee mirhunw juer byy-qnar-vniaw; bah he dirr kingx nirr, tngx drew dirr xoo nirr, duar qaur siongrciu kax, henr hro Ix.

20 Siongrder ee suwjiaw huanhur ix qongxx, "Bah qapp byy-qnar-vniaw he dirr jitt xee jiyhvnuaa dingw, tngx dyr cud .laii." Ix jiauww anxnix qniaa.

21 Jehovah ee suwjiaw crunx cud ciuw nirr soxx giac ee qnuaiw-aw-buew, laii duh bah qapp byy-qnar-vniaw; dyrr u huew dui' jiyhvnuaa cud .laii, itjin siyx bah qapp byy-qnar-vniaw. Jehovah ee suwjiaw dyrr kir, byy qycc knuar .qnir.

22 Gideon knuar cud Ix si Jehovah ee suwjiaw, dyrr qongw, "Hnairar! Jruw Jehovah ar, guaw dngbin knuar qnir Jehovah ee suwjiaw."

23 Jehovah duiww ix qongw, "Anx liw ee simx, mrbenw qniax, liw be drir qaur siw."

24 Gideon dyrr dirr hiax qra Jehovah kiw jit jxy dnxuaa, hy miaa qiyr "Siongrder suwhog ving'anx"; jitt xee dnxuaa dirr Abiezer ee Oflah, qaur qinaxzit iauxx dilehh.

25 Hitt mii Jehovah huanhur Gideon qongxx, "Liw kanx liw laurve ee guu-aw laii, dyrr si hitt jiah cid nii :ee, iarr diyhh tiachuiw liw laurve soxu Baal ee dnxuaa, cyr dnxuaa-vnix ee Aselah;

26 Dirr jitt xee snuaje, jiauww habgii ee hxuad, uirr Jehovah, liw ee Siongrder kiw jit jxy dnxuaa, ing hitt jiah guu-aw henr juer siyjer, ing liw soxx beh cyr ee Aselah juer caa."

27 Gideon dyrr duiww ix ee lovok diongx cua jap langg, jiauww Jehovah huanhur ix :ee kir qniaa; ix in'ui qniax laurve ee qrex, qapp sniaa-lai ee langg, zit .sii m qnaw juer jitt xee su, dyrr dirr mii .sii juer ix.

28 Sniaa-lai ee langg cingjaw kiw .laii, knuar qnir Baal ee dnxuaa tiachuiw, dnxuaa-vnix ee Aselah cyr .lyc, hitt jiah guu-aw henr dirr soxx kiw ee dnxuaa.

29 Inx snaqab qongw, "Simxmih langg juer jitt xee su ar?" Inx craa .cud .laii liauxau, dyrr qongw, "Jex si Joas ee qniaw Gideon juer :ee."

30 Sniaa-lai ee langg duiww Joas qongw, "Liac liw ee qniaw cud .laii, tangx hro ix siw; in'ui ix tiachuiw Baal ee dnxuaa, cyr dnxuaa-vnix ee Aselah."

31 Joas qra itcer kia decc qongqig ix ee langg qongw, "Linw beh uirr Baal jingven mah? Linw beh qriuu ix mah? Narr u langg uirr ix jingven, tanr jaxkiw diyhh hro ix siw. Baal narr si siongrder, jiacc hro ix uirr qaqi jingven, in'ui langg tiachuiw ix ee dnxuaa."

32 Dui' hitt zit qiyr ix ee miaa Jelubbaal, si qongxx, "Baal diyhh qapp ix jingven, in'ui ix huixhuai ix ee dnxuaa."

33 Hitt sii Midianlangg, Amaleklangg, qapp danghngx ee vecsnir, longxx jurjip quer hyy, dirr Jezleel ee snuaqog jrad ngiaa.

34 Jehovah ee Sinn limqaur Gideon; ix dyrr vunn sauwqag. Abiezer-jok longxx jurjip qinduer ix.

35 Ix crex langg venww qniaa Manasseh; Manassehlangg iarr jurjip laii duer ix, qycc crex langg kir qnir Aserlangg, Zebulunlangg, Naftalilangg; inx iarr longxx jnriu laii qapp inx lenhap.

36 Gideon duiww Siongrder qongw, "Liw narr jiauww Liw soxx qongw :ee, beh ing guaw ee ciuw laii qiur Islael,

37 Guaw dyrr ing qui' niaw ee ngiumngg he dirr gorqakdniuu; narr qandna' ngiumngg u lorjuiw, tokax longxx dax dax, guaw dyrr jaix Liw beh jiauww Liw soxx qongw :ee, ing guaw ee ciuw qiur Islael."

38 Dyrr qyxzenn anxnix. Qeh zit Gideon jaw jaw kiw .laii, jun ngiumngg, dui' ngiumngg qaw cud lorjuiw jit nguaw muaw muaw.

39 Gideon qycc duiww Siongrder qongw, "Qriuu Liw m tangx siurkir guaw, guaw qycc qongw jit vaiw nardnia. Qriuu Liw jrunw guaw qycc jit vaiw ing ngiumngg cir knuar, dnaxx dogdok hro ngiumngg dax dax, tokax longxx u lorjuiw."

40 Jitt mii Siongrder iarr anxnix qniaa, dogdok ngiumngg dax dax, tokax longxx u lorjuiw.

7 Jelubbaal, dyrr si Gideon, ix qapp itcer duer ix ee langg, jaw jaw kiw .laii, dirr Halod juixjnuaa vnix jrad ngiaa. Midian ee ngiaa dirr inx vaksir ee snuaqog, uaw qin Moleh Snuax.

2 Jehovah duiww Gideon qongw, "Guaw ing Midian qaux dirr vecsnir ee ciuw, mrquxx duer liw ee langg sniu' je, qniax Islaellangg duiwdirr Guaw laii qaqi kuakauw, qongw, 'Si guaw qaqi ee ciuw qiur guaw.'

3 Dnaxx liw diyhh suanvor hro vecsnir tniax, qniwnarr qniahniaa lunxneh ee langg, tangx lirkuix Gilead Snuax dyr .kir." Dui' anxnix vecsnir diongx u nng-bxan nng-cingx langg dyr .kir; iauxx u cunx jit-bxan.

4 Jehovah duiww Gideon qongw, "Langg iauxquxx sniu' je. Liw diyhh cua inx lyc kir qaur juiw-vnix. Guaw beh dirr hiax qra liw cir inx. Qniwnarr Guaw qiw simxmih langg duiww liw qongw, 'Jitt langg tangx qapp liw kir', hitt langg dyrr tangx qapp liw kir; Guaw qiw simxmih langg qra liw qongw, 'Jitt langg m tangx qapp liw kir', hitt langg dyrr m tangx kir."

5 Gideon dyrr cua vecsnir lyc kir qaur juiw-vnix. Jehovah duiww Gideon qongw, "Qniwnarr ing jic nar juiw, cincniu qxauw decc nar, hitt langg diyhh hro ix lingrgua kia lehh, qniwnarr qui lyc kir limx juiw :ee, iarr diyhh hro ix lingrgua kia lehh."

6 Ing ciuw uaw cuir laii nar juiw :ee, u snax-vah langg; qi'uu hiaxee vecsnir longxx qui lyc kir limx juiw.

7 Jehovah qra Gideon qongw, "Guaw beh ing jiaxee nar juiw ee snax-vah langg qiur linw, jiong' Midianlangg qaux dirr liw ee ciuw; jiongww vecsnir longxx tangx dyr kir ix ee soxjai."

8 Vecsnir ciuw nirr dyrr duar qanniuu qapp inx ee sauwqag. Gideon crex Islael jingwlangg dagg langg dyr kir inx ee vowvnii, jixu lauu jitt snax-vah langg. Midian ee ngiaa jrad dirr ix erbin ee snuaqog.

9 Siangg hitt mii Jehovah qra Gideon qongw, "Kiw .laii, lyc kir qaur hitt xee ngiavnuaa, in'ui Guaw ixqing’ jiong' ix qaux dirr liw ee ciuw.

10 Liw narr m qnaw lyc .kir, liw qapp liw ee lovok Pulah diyhh lyc kir hitt xee ngiavnuaa.

11 Liw beh tniax qnir inx soxx qongw :ee, zen'au liw dyrr u damxlik lyc kir qaur ngiavnuaa." Ix dyrr qapp ix ee lovok Pulah lyc kir qaur ngiavnuaa, duar qunkir :ee ee vnix:a.

12 Midianlangg, Amaleklangg, qapp danghngx ee jingwlangg, longxx dyw dirr snuaqog, cincniu cauxmeh hiacc je. Inx ee logdyy be sngr .did, je qaxx cincniu haiw-qnii ee suax.

13 Gideon ixqing’ qaur, u langg ing bang qra ix ee dangpnua qongw, "Guaw bang qnir jit xee bang. Knuar ar, u jit xee duarbehvniaw qy zip Midian ee ngiaa, qaur jit xee vowvnii, ciongx hro ix dyw, hro vowvnii vingw linwdngw, dyw qaur vnide."

14 Ix ee dangpnua rinr qongxx, "Jex m si vadd hxang, si Islaellang, Joas ee qniaw Gideon ee dyx. Siongrder ixqing’ jiong' Midian qapp ix ee juann qunx qaux dirr ix ee ciuw."

15 Gideon tniax qnir jitt xee bang ee ue, qapp ix ee quexseh, dyrr qingwvair Siongrder; dyr laii qaur Islael ee ngiaa-diongx, qongw, "Kiw .laii ar, in'ui Jehovah ixqing’ jiong' Midian ee qundui qaux dirr linw ee ciuw lar."

16 Ix dyrr vunx snax-vah langg juer snax dui, ing sauwqag qapp kangx angr qaux dirr dagg langg ee ciuw, angr-lai longxx kngr huexvew, qra inx qongw,

17 "Linw diyhh knuar guaw ee ngiu laii juer. Guaw qaur hitt xee ngiavnuaa vnix, guaw soxx juer :ee, linw iarr diyhh anxnix juer.

18 Guaw qapp hiaxee qapp guaw dilehh ee langg vunn sauwqag ee sii, linw iarr diyhh dirr ngiaa ee siwuii vunn sauwqag, qongw, 'Uirdiyhh Jehovah iarr uirdiyhh Gideon.'"

19 Gideon qapp duer ix ee jit-vah langg, dirr snax qnxex-tauu, laii qaur ngiaa-vnix; hitt sii jiuxqnex :ee duxaxx ngua vanx; inx dyrr vunn sauwqag, qongr puar ciuw nirr ee angr;

20 Snax dui ee langg dyrr longxx vunn sauwqag, qongr puar angr, dyr ciuw giac huexvew, jniar ciuw giac sauwqag, laii vunn, huah qongxx, "Jehovah qapp Gideon ee dyx."

21 Inx dirr ngiaa ee siwuii, dagg xee kia qaqi ee xui; juann ngiaa ee langg longxx jauw; huachiamr hro inx dyjauw.

22 Vunn snax-vah qix sauwqag ee sii, Jehovah hro juann ngiaa ee langg dagg xee ing dyx sna' taii; qundui jauw qaur Zaletan ee Bet Sittah, qycc qaur Abel Meholah ee qaiwsnuar, qin Tabbat.

23 Islaellangg dyrr dui' Naftali, Aser, qapp Manasseh jurjip, laii duiqnuaw Midian.

24 Gideon crex langg venww qniaa Eflaim ee snuade, qongw, "Linw lyc laii qongqig Midian. Tanr inx bue qaur, vexsiuw hiaxee dortauu, didqaur Betbalah, dyrr si Jordan."

25 Dui' anxnix Eflaim ee jingwlangg jurjip, vexsiuw hiaxee dortauu, didqaur Betbalah, dyrr si Jordan; iarr liac diyc Midian nng xee siuxlingw, Oleb qapp Zeeb; taii siw Oleb dirr Oleb jiyhvnuaa, taii siw Zeeb dirr Zeeb ee jiuxkud hiax. Qycc duiqnuaw Midianlangg, duar Oleb qapp Zeeb ee taukag qaur Jordan hitt vingg, Gideon hiax.

8 Eflaimlangg duiww Gideon qongw, "Liw kir qapp Midianlangg qaujenr, byy qiyr guanw qapp liw kir, sniaw su anxnix kuanxtai guanw ar?" Inx dyrr qapp ix dua dua qewqaur.

2 Gideon duiww inx qongw, "Guaw soxx qniaa :ee qamxx e viw did linw mah? Eflaim kiyh pudyseh, qamxx byy kacc ngiaa Abiezer banw pudyy mah?

3 Siongrder ixqing’ jiong' Midian ee siuxlingw Oleb qapp Zeeb qaux dirr linw ee ciuw, guaw soxx qniaa :ee qamxx e viw did linw mah?" Ix qongw jiaxee ue, inx ee siurkir dyrr sriaux.

4 Gideon qapp duer ix ee snax-vah langg qaur Jordan quewdo, suizenn sen, iauxquxx decc duizib.

5 Gideon duiww Sukkotlangg qongw, "Cniaw liw jiong' vniaw qiongqib qinduer guaw ee vecsnir; in'ui inx sen; guaw iarr decc zib Midian nng xee ongg, Zebah qapp Zalmunna."

6 Sukkot hiaxee siuxlingw rinr qongxx, "Zebah qapp Zalmunna ee ciuw ixqing’ dirr liw ee ciuw, guanw jiacc diyhh ing vniaw hro liw ee qundui."

7 Gideon qongw, "Jehovah jiong' Zebah qapp Zalmunna qaux dirr guaw ee ciuw liauxau, guaw dyrr beh ing kongwiaw ee cxir qapp cixaw pacsiongx linw ee bah."

8 Ix dui' hiax jnriu kir Penuel, iarr duiww inx anxnix qongw. Penuellangg rinr ix, iarr qapp Sukkotlangg soxx rinr :ee snadangg.

9 Ix duiww Penuel ee langg qongw, "Guaw ving'anx dyr .laii ee sii, guaw beh tiah jitt xee daii."

10 Hitt sii Zebah qapp Zalmunna, ixqip qinduer ix ee qundui, longxx dirr Karkor, iokliok u jit-bxan go-cingx langg, dyrr si danghngx juann qunx soxx cud :ee; in'ui ixqing’ siw jap-zi-bxan langg, longxx si giac dyx :ee.

11 Gideon dyrr dui' Nobah qapp Jogbehah dangvingg, dui' kiarkiw vowvnii :ee ee lo jnriu .kir, pah ngiaa inx ee qundui.

12 Zebah qapp Zalmunna dyjauw, Gideon duizib inx, liac diyc Midian nng xee ongg, Zebah qapp Zalmunna, hro inx juann qunx qniajauw.

13 Joas ee qniaw Gideon dui' Heles ee snuapniaa, dui' jenwdin dyr .laii.

14 Liac Sukkot jit xee siauwlenlangg, mng ix; ix dyrr siaw Sukkot hiaxee siuxlingw qapp dniuxlyw, qiong cid-jap-cid langg, hro ix.

15 Gideon qaur Sukkot, duiww hiax ee langg qongw, "Linw jingg uirdiyhh Zebah qapp Zalmunna qra guaw qongw, 'Zebah qapp Zalmunna ee ciuw ixqing’ dirr liw ee ciuw, guanw jiacc diyhh ing vniaw hro liw iawsen ee langg.' Dnaxx linw laii knuar."

16 Dyrr liac sniaa-lai ee dniuxlyw, ing kongwiaw ee cxir qapp cixaw laii qautog Sukkotlangg;

17 Qycc tiah Penuel ee daii, taii siw hitt xee sniaa-lai ee langg.

18 Dyrr mng Zebah qapp Zalmunna qongxx, "Linw dirr Taor Snuax soxx taii ee langg simxmih kuanw?" Rinr qongxx, "Inx cincniu liw, dagg langg longxx u ongg ee qniaw ee iongmau."

19 Ix qongw, "Inx si guaw siangg buw ee hniadi. Guaw qiw Jehovah ee ingxuac laii qongw, linw jingg narr lauu inx ee sniwmia, guaw dnaxx dyrr byy taii linw."

20 Dyrr duiww ix ee dua-qniaw Jeter qongw, "Kiw laii taii inx." Danrsi siauwlenlangg byy vuic dyx, in'ui ix iauxx siauwlenn, e qniax.

21 Zebah qapp Zalmunna qongw, "Liw qaqi kiw laii taii guanw; in'ui langg jnaixngiu, kuiwlat iarr si anxnix." Gideon dyrr kiw laii taii siw Zebah qapp Zalmunna, cruw inx logdyy ee amrqunw ee jngtna, kuanxsid cincniu guehbaii.

22 Islaellangg duiww Gideon qongw, "Liw ixqing’ qiur guanw tuali Midianlangg ee ciuw, guan liw qapp liw ee qniaw, liw ee sunx, quanxliw guanw."

23 Gideon qongw, "Guaw byy beh quanxliw linw, guaw ee qniaw iarr byy beh quanxliw linw; dogdok Jehovah beh juer linw ee ongg."

24 Gideon qycc duiww inx qongw, "Guaw u jit hxang qriuu linw. Cniaw linw dagg langg jiong' soxx cniuw ee hnirkuann hro guaw." (In'ui duiwdik si Ismael ee langg, jiacc u jitt hy qimx ee hnirkuann.)

25 Inx qongw, "Guanw qamguan hro liw." Dyrr cux jit niaw guarsnax, dagg langg jiong' soxx cniuw ee hnirkuann hed dirr hitt dingxbin.

26 Gideon soxx tyw ee qimhnirkuann, dang jit-cingx cid-vah sekel ee qimx-aw; jitt xee ixgua qycc u guehbaii ee jngtna, hnirdui, qapp jxiw sig ee ihok, Midian Ongg soxu :ee, qapp logdyy ee amrqunw ee len'aw.

27 Gideon ing jitt xee jewjy jit xee gnoxsiong, he dirr ix ee vunxsniaa Oflah; au .laii Islaellangg longxx kir hiax qniaa sia'imm vair ix; jex si juer hai Gideon qapp ix juann qrex ee lybang.

28 Anxnix Midian kuthok dirr Islaellangg, be e qycc giac kiw taukag. Gideon ee zit, hitt xee derhngx taiwvingg sir-jap nii.

29 Joas ee qniaw Abimelac dyr kir qaqi ee cur kiarkiw.

30 Gideon u cid-jap xee cinsniqniaw; in'ui ix u crua jerje bow.

31 Dirr Seqem, ix ee sewii iarr qra ix snix jit xee qniaw; ix dyrr qra ix hy miaa qiyr Abimelac.

32 Joas ee qniaw Gideon nilau huer je, dyrr siw, baijongr dirr Abiezer Oflah, dirr ix ee laurve Joas ee bong.

33 Gideon siw liauxau, Islaellangg uat dngw kir qnia'imm, duer jiaxee Baal, ing Baal Belit juer inx ee siongrder.

34 Islaellangg byy qiwliam Jehovah, inx ee Siongrder, dyrr si qiur inx tuatli siwuii ee duiwdik ee ciuw :ee;

35 Iarr byy hyw kuanxtai Jelobaal, dyrr si Gideon ee qrex, jiauww ix soxx qniaa dirr Islael ee unhui.

9 Jelubbaal ee qniaw Abimelec qaur Seqem, qnir ix ee jiongww buxqu, duiww inx qapp ix guarqongx juann qrex ee langg qongw,

2 "Cniaw linw qongw hro Seqem ee jingwlangg tniax, knuar si Jelubbaal ee jiongww qniaw cid-jap langg quanw linw, iacc si jit langg quanw linw, daclyc jit hxang kacc hyw? Linw iarr diyhh siauwliam guaw si linw ee qutziok."

3 Ix hiaxee buxqu dyrr jiong' jitt xee itcer ee ue ter ix qongw hro Seqem ee langg tniax; inx ee simx dyrr qui'ngr Abimelec. Inx qongw, "Ix si lanw ee hniadi."

4 Dyrr dui' Baal Belit ee cur tec cid-jap xee ginn-aw hro Abimelec. Ix dyrr ing ix laii qor jiaxee byy herlyc ee huixlui; hiaxee langg dyrr laii duer ix.

5 Ix kir Oflah, qaur ix ee laurve ee qrex, jiong' Jelubbaal ee qniaw, dyrr si ix ee hniadi cid-jap langg, longxx taii siw dirr jit der jiyhvnuaa dingw; jixu Jelubbaal ee suacbuew ee qniaw Jotam lauu lehh; in'ui ix u jauw kir bih.

6 Seqemlangg qapp Betmillo ee qrex, longxx jurjip, dirr Seqem cai tiau ee siongrciu kax, kir setlip Abimelec juer ongg.

7 U langg qra Jotam qongw jitt xee su, ix dyrr kir kia dirr Gelizim Snuax-dingw, dua sniax huah, qra inx qongw, "Seqemlangg ar, linw diyhh tniax guaw ee ue, hro Siongrder iarr tniax linw.

8 Bad u jit vaiw, jiaxee ciu beh setlip jit jangg ciu juer inx ee ongg, dyrr kir duiww qnanaxciu qongw, 'Cniaw liw juer guanw ee ongg.'

9 Qnanaxciu rinr qongxx, 'Guaw qamxx tangx vangwsag guaw ee iuu, dyrr si langg soxx ing laii jundiong Siongrder qapp langg :ee, kir iyy dirr jiongww ciu ee dingxbin mah?'

10 Jiaxee ciu duiww buhuaqyxciu qongw, 'Liw laii, laii juer guanw ee ongg.'

11 Buhuaqyxciu rinr qongxx, 'Guaw qamxx tangx vangwsag guaw ee dnix qycc hyw ee quexjiw, kir iyy dirr jiongww ciu ee dingxbin mah?'

12 Jiaxee ciu duiww pudyciu qongw, 'Liw laii, laii juer guanw ee ongg.'

13 Pudyciu rinr qongxx, 'Guaw qamxx tangx vangwsag guaw ee sinjiuw, dyrr si hro Siongrder qapp langg hnuahiw :ee, kir iyy dirr jiongww ciu ee dingxbin mah?'

14 Jiaxee ciu duiww cixaw qongw, 'Liw laii, laii juer guanw ee ongg.'

15 Cixaw rinr hiaxee ciu qongxx, 'Linw narr sidjai setlip guaw juer linw ee ongg, dyrr diyhh siamxbih dirr guaw ee imwngw xe; narr m, guan huew dui' cixaw cud, siybet Lebanon ee vikhniuciu.'

16 Dnaxx linw setlip Abimelec juer ongg, diyhh jiauww singsit qonggi laii qniaa, qycc hyw kuanxtai Jelubbaal qapp ix ee qrex, jiauww ix ee ciuw soxx diyhbuaa :ee vywdab ix;

17 In'ui guaw ee laurve bad pesiw, uirr linw qaujenr, qiur linw tuatli Midianlangg ee ciuw;

18 Linw qinaxzit kiw laii qongqig guaw laurve ee qrex, taii siw ix ee qniaw cid-jap langg dirr jit der jiyhvnuaa dingw; qycc setlip ix ee luxvi ee qniaw Abimelec juer Seqemlangg ee ongg, in'ui ix si linw ee hniadi.

19 Linw qinaxzit narr jiauww singsit qonggi kuanxtai Jelubbaal qapp ix ee qrex, dyrr linw tangx dui' Abimelec laii hnuahiw, ix iarr tangx dui' linw laii hnuahiw;

20 Narr byy, guan huew dui' Abimelec cud, siyx Seqemlangg qapp Betmillo ee qrex; qycc guan huew dui' Seqemlangg qapp Betmillo ee qrex cud, siyx Abimelec."

21 Jotam, in'ui qniax ix ee hniadi, dyrr dyjauw; jauw kir bih dirr Beer, diamr dirr hiax.

22 Abimelec quanw Islael snax nii.

23 Siongrder crex pnaiw sinn dirr Abimelec qapp Seqemlangg ee diongqanx. Seqemlangg dyrr ing kuixjar kuanxtai Abimelec,

24 Laii vywingr Jelubbaal cid-jap xee qniaw soxx sriu ee janhai; iarr hro inx ee huih qruix dirr taii siw inx :ee, dyrr si inx ee hniadi Abimelec, iarr qruix dirr Seqemlangg, dyrr si jan ix ee ciuw taii siw ix ee hniadi :ee.

25 Seqemlangg dirr snuax-dingw sed baihok, laii dngdanw ix; qniwnarr dui' hitt diauu lo quer ee langg, inx dyrr cniuw ix; u langg dyrr jiong' jex su kir vyr Abimelec.

26 Ebed ee qniaw Gaal, qapp ix ee hniadi, laii qaur Seqem; Seqemlangg longxx sinwkyr ix.

27 Inx cud kir hngg nirr, siux pudyhngg, laii dac jiuw, sed ensiac, zip inx ee siongrder ee biy limjiac, jiuwjow Abimelec.

28 Ebed ee qniaw Gaal qongw, "Abimelec si jirjui, Seqem si jirjui, hro lanw hogsai ix ar? Ix qamxx m si Jelubbaal ee qniaw mah? Ix ee qundniuw qamxx m si Zebul mah? Linw diyhh hogsai Seqem ee laurve Hamor; lanw sniaw su hogsai ix ar?

29 Guan jiaxee vecsnir qruix guaw ee ciuw-xe, guaw dyrr druu Abimelec." Ix dyrr qra Abimelec qongw, "Qetnix liw ee qunvingx cud .laii."

30 Sniasiuw Zebul tniax qnir Ebed ee qniaw Gaal ee ue, dyrr siurkir;

31 Amwjni crex langg kir qnir Abimelec, qongw, "Ebed ee qniaw Gaal qapp ix ee hniadi qaur Seqem, iuxhik sniaa-lai ee vecsnir qongqig liw;

32 Soxiw liw qapp duer liw ee langg, diyhh tauwmii kiw .laii, baihok dirr cann nirr.

33 Jaxkiw-sii, zit duxaxx cud, liw diyhh jaw jaw kiw .laii, ciongx uaw kir qrongx sniaa. Gaal qapp duer ix ee langg cud laii qongqig liw ee sii, liw dyrr tangx siongr qihue laii kuanxtai inx."

34 Abimelec qapp duer ix ee jingwlangg tauwmii kiw .laii, vunx juer sir dui, ngr Seqem baihok.

35 Ebed ee qniaw Gaal cud .kir, kia dirr sniamngg kauw; Abimelec qapp duer ee langg dui' baihok ee soxjai kiw .laii.

36 Gaal knuar qnir hiaxee langg, dyrr duiww Zebul qongw, "Knuar ar, u langg dui' snuax-dingw lyc .laii." Zebul qongw, "Liw knuar qnir snuax ee ngiaw, liac juer si langg."

37 Gaal qycc qongw, "Knuar ar, u langg dui' quann de lyc .laii, qycc u jit dui dui' Ombligo siongrciu ee lo jnriu .laii."

38 Zebul duiww ix qongw, "Liw bad qongw, Abimelec si jirjui, hro lanw hogsai ix. Liw qongw jiaxee ue ee cuir dirr daclyc? Jex qamxx m si liw soxx biauxsi ee vecsnir mah? Liw dnaxx diyhh cud .kir, qapp inx qaujenr."

39 Gaal dyrr dui' Seqemlangg ee taujingg cud .kir, qapp Abimelec qaujenr.

40 Abimelec duiqnuaw ix; ix dirr ix ee binrjingg dyjauw, u jerje langg diyhsiongx dyw lehh, didqaur sniamngg kauw.

41 Abimelec diamr dirr Alumah; Zebul qnuaw Gaal qapp ix ee hniadi, m jrunw ix diamr dirr Seqem.

42 Qeh zit vecsnir cud kir qaur cann nirr; u langg qra Abimelec qongw.

43 Ix dyrr jiong' ix ee langg vunx juer snax dui, baihok dirr cann nirr; knuar qnir Seqemlangg dui' sniaa nirr cud .laii, dyrr kiw laii qongqig inx, taii inx.

44 Abimelec qapp duer ix hitt jit dui ciongx jinwjingg, kia dirr sniamngg kauw; hitt nng dui diddit ciongx qaur cann nirr hiaxee langg, laii taii inx.

45 Abimelec tong' zit qongqig sniaa; cruw hitt xee sniaa, taii siw hitt lairbin ee vecsnir; tiachuiw hitt xee sniaa, ing iamm ia ix.

46 Diamr dirr Seqem Daii ee langg tniax .qnir, dyrr siamw zip Baal Belit ee cur ee uersow.

47 U langg qra Abimelec qongw, "Seqem Daii ee langg longxx jurjip dirr jitt soxjai." Abimelec qapp duer ix ee langg dyrr longxx jnriu Zalmon Snuax.

48 Abimelec ciuw tec voxtauu, cyr jit jangg ciurqix, giaa dirr qingtauu dingw, duiww duer ix ee langg qongw, "Linw knuar guaw soxx qniaa :ee, iarr diyhh qinw qinw yc guaw laii qniaa."

49 Jingwlangg dyrr dag'ee cyr jit qix, laii duer Abimelec, jiong' ciurqix tiap dirr uesow, vangr huew siyx uersow dirr hiaxee langg ee dingxbin, drir qaur Seqem Daii ee langg longxx siw; lamluw iokliok jit-cingx langg.

50 Abimelec kir qaur Tebez, jrad ngiaa dirr Tebez, laii cruw ix. Sniaa-lai u qenqor ee daii;

51 Sniaa-lai ee jingwlangg, bylun lamluw, longxx jauw kir hiax, qnuaix mngg, jnriu daii-dingw.

52 Abimelec qaur hitt xee daii qongqig ix, uaw qin daimngg, beh ing huew qra siyx.

53 U jit xee hurzinlangg jiong' jit der dingxdunw ee byrjiyc, dimr diyc Abimelec ee taukag, pah puar ix ee taukaknguaw;

54 Ix dyrr qinw qinw qiyr giac ix ee qunkir ee siauwlenlangg, qra ix qongw, "Vuic liw ee dyx taii guaw, benw did langg qongw guaw si hurzinlangg soxx taii :ee." Siauwlenlangg dyrr qra ix cak taur, ix dyrr siw.

55 Islaellangg knuar qnir Abimelec ixqing’ siw, dag'ee dyrr dyr kir ix ee soxjai.

56 Anxnix, Siongrder vywingr Abimelec ngr ix ee laurve soxx qniaa ee pnaiw, dyrr si taii siw ix ee hniadi cid-jap langg.

57 Seqemlangg itcer ee pnaiw, Siongrder iarr longxx vywingr dirr inx ee taukag dingw; Jelubbaal ee qniaw Jotam ee jiuwjow qruix dirr inx ee dingxbin.

10 Abimelec liauxau, u Issaqarlangg, Dodo ee sunx, Puah ee qniaw, Tola kiw .laii, jinxqiur Islaellangg. Ix diamr dirr Eflaim ee snuade ee Samir.

2 Ix juer Islael ee sursux zi-jap-snax nii, dyrr siw, baijongr dirr Samir.

3 Ix liauxau u Gileadlangg Jair kiw .laii, juer Islael ee sursux zi-jap-zi nii.

4 Ix u snax-jap xee qniaw, kiaa snax-jap jiah ee luu-aw, inx u snax-jap jxy sniaa, miaa qiyr Jair, itdit qaur qinaxzit; longxx si dirr Gilead-de.

5 Jair siw, dyrr baijongr dirr Kamon.

6 Islaellangg qycc qniaa Jehovah soxx knuar juer pnaiw ee su, kir hogsai jiaxee Baal, qapp Astarte, ixqip Silia ee siongrder, Sidon hiaxee siongrder, Moab ee siongrder, Ammonlangg ee siongrder, Filistlangg ee siongrder; kiwsag Jehovah, byy hogsai Ix.

7 Jehovah siurkir Islaellangg, bre inx dirr Filistlangg ee ciuw, qapp Ammonlangg ee ciuw.

8 Inx dui' hitt nii ziauxluan apjer Islaellangg jap-veh nii, dyrr si dirr Jordan hitt vingg, jiongww Islaellangg kiarkiw dirr Amolilangg ee de, dyrr si dirr Gilead :ee.

9 Ammonlangg qycc quer Jordan Hyy, kir qongqig Judah, Benjamin, Eflaim-jok; Islaellangg dyrr jinrjai kunxvig.

10 Islaellangg aiqiuu Jehovah, qongw, "Guanw dikjue Liw, in'ui u kiwsag guanw ee Siongrder, kir hogsai jiaxee Baal."

11 Jehovah duiww Islaellangg qongw, "Guaw qamxx byy qiur linw tuatli Egiptlangg, Amolilangg, Ammonlangg, qapp Filistlangg mah?

12 Sidonlangg, Amaleklangg, Maonlangg, iarr longxx apjer linw; linw aiqiuu Guaw, Guaw iarr jinxqiur linw tuatli inx ee ciuw.

13 Linw qingxzenn vangwsag Guaw, hogsai vadd xee siongrder;

14 Soxiw Guaw byy qycc qiur linw. Linw kir aiqiuu linw soxx qingw ee siongrder. Linw duw diyc hunarlan ee sii, tangx hro inx qiur linw."

15 Islaellangg duiww Jehovah qongw, "Guanw huanrjue lar, cutjai Liw ee iwsur kuanxtai guanw; dogdok qriuu Liw qinaxzit qiur guanw."

16 Inx dyrr dui' inx diongqanx druu kir guarvangx ee siongrder, hogsai Jehovah; Jehovah ee simx in'ui Islaellangg ee qankow dyrr iubun.

17 Dng' hitt sii Ammonlangg jurjip, jrad ngiaa dirr Gilead; Islaellangg iarr jurjip, jrad ngiaa dirr Mizpah.

18 Gilead ee vecsnir qapp jiongww siuxlingw, dairqex snaqab girlun qongxx, "Jirjui e dairsingx kir qongqig Ammonlangg? Hitt langg beh juer Gilead jiongww vecsnir ee taulangg."

11 Gileadlangg Jeftah si jit xee dua quanlingg ee iongxsu, si qirluw ee qniaw. Jeftah si Gilead soxx snix :ee.

2 Gilead ee bow iarr qra ix snix quixnarr xee qniaw; ix ee bow soxx snix ee qniaw ixqing’ duarhanr, dyrr qikdiok Jeftah, qra ix qongw, "Liw m tangx dirr guanw laurve ee qrex singjiab giap, in'ui liw si vadd xee hurzinlangg ee qniaw."

3 Jeftah dyrr jauw, siamxvi ix ee hniadi, kir diamr dirr Tob ee de; u huixlui jurjip dirr Jeftah hiax, duer ix cutzip.

4 Quer u hiacc quw, Ammonlangg qapp Islael qaujenr.

5 Ammonlangg qapp Islael qaujenr ee sii, Gilead ee dniuxlyw kir beh jiyx Jeftah dui' Tob ee de laii,

6 Duiww Jeftah qongw, "Cniaw liw laii juer guanw ee guansuer, guanw dyrr tangx qapp Ammonlangg qaujenr."

7 Jeftah rinr Gilead ee dniuxlyw qongxx, "Jingg linw qamxx m si uanwhun guaw, qnuaw guaw cud laurve ee qrex mah? Dnaxx linw duw diyc huanrlan, sniaw su laii guaw jiax ar?"

8 Gilead ee dniuxlyw rinr Jeftah qongxx, "Guanw dnaxx soxiw qui'ngr liw, si rair liw qapp guanw kir, qapp Ammonlangg qaujenr; liw tangx juer guanw ee tauu, laii quanxhad Gilead itcer kiarkiw ee vecsnir."

9 Jeftah duiww Gilead ee dniuxlyw qongw, "Linw cua guaw dyr .kir, qapp Ammonlangg qaujenr, Jehovah jiong' inx qaux dirr guaw ee binrjingg, guaw jinjniar beh juer linw ee tauu mah?"

10 Gilead ee dniuxlyw rinr Jeftah qongxx, "Jehovah dirr lanw diongqanx juer qanjingr, guanw dikkag jiauww liw ee ue qniaa."

11 Jeftah dyrr qapp Gilead ee dniuxlyw dyr .kir; vecsnir dyrr lip ix juer tauu, juer guansuer. Jeftah dirr Mizpah jiong' qaqi itcer ee ue vailet dirr Jehovah ee binrjingg.

12 Jeftah crex hiaxee suwjiaw kir qnir Ammonlangg ee ongg, qongw, "Liw qapp guaw simxmih qansiap, qingxzenn laii guaw jiax qongqig guaw ee de ar?"

13 Ammonlangg ee ongg rinr Jeftah ee suwjiaw qongxx, "In'ui Islaellangg dui' Egipt jnriu .laii ee sii, jiamr guaw ee de, dui' Arnon qaur Jabbok, didqaur Jordan. Dnaxx linw diyhh guanrguan jiong' jiaxee de hingg guaw."

14 Jeftah qycc crex suwjiaw kir qnir Ammonlangg ee ongg, qra ix qongw,

15 "Jeftah anxnix qongw, Islaellangg vingrr byy jiamrr Moab-de, qapp Ammonlangg ee de.

16 Islaellangg dui' Egipt jnriu .laii, qingquer kongwiaw qaur Angg Haiw, laii qaur Kades;

17 Hitt sii Islael dyrr crex suwjiaw kir qnir Edom Ongg, qongw, 'Qriuu liw jrunw guanw qingquer liw ee de'; danrsi Edom Ongg m tniax ix. Qycc crex suwjiaw kir qnir Moab Ongg, ix iarr m jrunw; Islaellangg dyrr diamr dirr Kades.

18 Inx qycc qingquer kongwiaw, sec Edom-de qapp Moab-de; dui' Moab-de ee dangsir quer .laii, dirr Arnon hitt vingg jrad ngiaa; iarr byy zip Moab ee qingxlai, in'ui Arnon Hyy si Moab ee qauqair.

19 Islael crex langg kir qnir Amoli Ongg Sihon, dyrr si Hesbon ee ongg. Islael duiww ix qongw, 'Qriuu liw jrunw guanw quer liw ee de, kir guanw qaqi ee soxjai.'

20 Danrsi Sihon m sinr Islael, m hro inx qingquer ix ee qingxqair; Sihon dyrr jurjip ix ee jiongww vecsnir, dirr Jahaz jrad ngiaa, qapp Islaellangg qaujenr.

21 Jehovah, Islael ee Siongrder, ing Sihon qapp ix ee jiongww vecsnir qaux dirr Islaellangg ee ciuw, inx dyrr pah ix; dui' anxnix Islael dyrr did diyc dirr hitt soxjai kiarkiw ee Amolilangg juann de.

22 Inx did diyc Amolilangg ee juann qingxqair, dui' Arnon qaur Jabbok, dui' kongwiaw qaur Jordan.

23 Jehovah, Islael ee Siongrder dirr Ix ee vecsnir Islael ee binrjingg, qnuaw cud Amolilangg; liw iarr beh did diyc inx ee de mah?

24 Liw ee siongrder Qemos soxx sniuxsur liw did .diyc .ee, liw byy did diyc ix laii juer giap mah? Jehovah, guanw ee Siongrder qniwnarr dui' guanw ee binrjingg soxx qnuaw .cud .ee, guaw beh did diyc ix.

25 Liw qamxx ngiaa quer Moab Ongg Zippor ee qniaw Balak mah? Ix qamxx bad qapp Islaellangg qewqaur mah? Qamxx bad qapp inx qaujenr mah?

26 Islaellangg diamr dirr Hesbon qapp ix ee hniusia, Aloer qapp ix ee hniusia, qapp Arnon Hyy-vnix hiaxee sniaa, ixqing’ u snax-vah nii, linw dirr hitt sii sniaw su byy cruw inx dywdngw ar?

27 Guaw byy dikjue liw, liw huanxdngw qapp guaw qaujenr, sidjai buliw. Guan simxpnuar ee Jehovah qinaxzit dirr Islael qapp Ammon ee diongqanx laii pnuawduanr."

28 Danrsi Ammonlangg ee ongg m kingw tniax Jeftah crex langg duiww ix qongw ee ue.

29 Jehovah ee Sinn limqaur Jeftah. Ix dyrr qingquer Gilead qapp Manasseh, qycc qingquer qaur Gilead ee Mizpah, qycc dui' Gilead ee Mizpah qingquer qaur Ammonlangg hiax.

30 Jeftah dyrr duiww Jehovah he guan, qongw, "Liw narr jiong' Ammonlangg qaux dirr guaw ee ciuw,

31 Guaw dui' Ammonlangg hiax ving'anx dyr .laii ee sii, qniwnarr dui' guaw ee cur ee mngg cud laii gniajih guaw :ee, beh qruix dirr Jehovah, guaw beh henr ix juer siyjer."

32 Dui' anxnix Jeftah kir Ammonlangg hiax, qapp inx qaujenr. Jehovah jiong' inx qaux dirr ix ee ciuw;

33 Ix dyrr pah inx, dua dua taii siw inx, dui' Aloer qaur Minnit, didqaur Abel Kelamim, qiong zi-jap xee sniaa. Anxnix Ammonlangg dyrr kuthok dirr Islaellangg.

34 Jeftah dyr laii Mizpah qaur qaqi ee cur, hitt sii ix ee jaboxqniaw giac linlongqow tiawbuw cud laii gniajih ix. Jitt xee si ix dogsnix :ee, ixgua byy qniaw, byy jaboxqniaw.

35 Jeftah knuar qnir ix, dyrr tiah lic snxax qongw, "Aixar, guaw ee jaboxqniaw, liw hro guaw jin' camw; liw iarr si hro guaw jin' dua qanlann; in'ui guaw ixqing’ duiww Jehovah kuix cuir, be e siux dywdngw."

36 Ix rinr qongxx, "Guaw ee ve ar, liw ixqing’ duiww Jehovah kuix cuir, dyrr diyhh jiauww liw ee cuir soxx qongw .cud .ee qniaa dirr guaw; in'ui Jehovah ixqing’ uirdiyhh liw vywsiuu liw ee duiwdik Ammonlangg."

37 Qycc duiww ix ee laurve qongw, "U jit qnia su qriuu liw unxjunw, iong'unw guaw nng guehzit, hro guaw qapp guaw ee dangpnua kir snuax nirr, tangx tikaur guaw juer jairsikluw."

38 Ix qongw, "Liw kir ar." Dyrr crex ix kir nng guehzit; ix qapp dangpnua kir, dirr snuax nirr uirdiyhh ix juer jairsikluw tikaur.

39 Nng guehzit ixqing’ muaw, ix dyr laii qaur laurve hiax, laurve dyrr jiauww ix soxx he ee guan kuanxtai ix; ix longxx byy cinqin davolangg.

40 Au .laii Islael diongx u jitt xee le, dagg nii Islael jiaxee jaboxginxaw kir duidy Gileadlangg Jeftah ee jaboxqniaw, muixx nii sir zit.

12 Eflaimlangg jurjip qaur vakhngx, duiww Jeftah qongw, "Liw quer kir qapp Ammonlangg qaujenr, sniaw su byy qiyr guanw qapp liw kir ar? Guanw beh ing huew siyx liw qapp liw ee cur."

2 Jeftah duiww inx qongw, "Guaw qapp guaw ee vecsnir qapp Ammonlangg dua qewqaur; guaw jiyx linw laii, linw qingxzenn byy qiur guaw tuatli inx ee ciuw.

3 Guaw knuar qnir linw byy laii qiur guaw, guaw dyrr vniawmia jinwjingg kir qongqig Ammonlangg. Jehovah jiong' inx qaux dirr guaw ee ciuw, linw qinaxzit sniaw su laii guaw jiax, beh qapp guaw qaujenr ar?"

4 Jeftah dyrr jurjip Gilead ee jingwlangg, qapp Eflaimlangg qaujenr. Gileadlangg pah siw Eflaimlangg, in'ui inx qongw, "Linw Gileadlangg dirr Eflaim Manasseh ee diongqanx, si Eflaim dyjauw ee langg."

5 Gileadlangg dirr Eflaimlangg ee taujingg vexsiuw Jordan ee dorkauw; Eflaim dyjauw :ee narr qongw, "Cniaw hro guanw quer .kir"; Gileadlangg dyrr mng ix qongxx, "Liw si Eflaimlangg iacc m si?"

6 Ix narr qongw, "M si", dyrr qra ix qongw, "Liw qongw Shibbolet"; ix qongw juer Sibbolet, in'ui inx ee imx qongw be jniar; inx dyrr liac ix, taii dirr Jordan ee dorkauw. Hitt sii Eflaimlangg siurr taii :ee, sir-bxan nng-cingx langg.

7 Jeftah juer Islael ee sursux lak nii. Gileadlangg Jeftah siw, baijongr dirr Gilead ee jit xee sniaa.

8 Jeftah liauxau, u Betlehemlangg Ibzan juer Islael ee sursux.

9 Ix u snax-jap xee qniaw, qycc snax-jap xee jaboxqniaw qer dirr guarkauw; iarr dui' guarkauw qra ix ee qniaw crua snax-jap xee simpu; ix juer Islael ee sursux cid nii.

10 Ibzan siw, baijongr dirr Betlehem.

11 Ix liauxau, u Zebulunlangg Elon juer Islael ee sursux; ix juer Islael ee sursux jap nii.

12 Zebulunlangg Elon siw, baijongr dirr Zebulun-de ee Aijalon.

13 Ix liauxau, u Pilatonlangg, Hillel ee qniaw Abdon, juer Islael ee sursux;

14 Ix u sir-jap xee qniaw, snax-jap xee sunx, kiaa cid-jap jiah luu-aw; ix juer Islael ee sursux veh nii.

15 Pilatonlangg Hillel ee qniaw Abdon siw, baijongr dirr Eflaim-de ee Pilaton, dirr Amaleklangg ee snuade.

13 Islaellangg qycc qniaa Jehovah soxx knuar juer pnaiw ee su; Jehovah jiong' inx quax dirr Filistlangg ee ciuw sir-jap nii.

2 Hitt sii u jit xee Zolahlangg, si Dan ee jok, miaa qiyr Manoah; ix ee bow byy huai'in, byy snix.

3 Jehovah ee suwjiaw duiww hitt xee hurzinlangg henxhen, qra ix qongw, "Liw vingsor byy huai'in byy snix, dnaxx liw beh huai'in snix jit xee qniaw.

4 Soxiw liw diyhh sewzi, vyc jiuw qau jiuw longxx m tangx limx, byy cingkir ee mic iarr longxx m tangx jiac.

5 In'ui liw huai'in beh snix jit xee qniaw; tir taumngg ee dyx m tangx qaur ix ee taukag; in'ui jitt xee ginxaw dui' trex nirr dyrr qruix Siongrder juer Nazarlangg; in'ui ix beh juer qiur Islael ee tauu jit jam, tuatli Filistlangg ee ciuw."

6 Hurzinlangg laii qra ix ee diongrhux qongw, "U jit xee Siongrder ee langg qaur guaw jiax, ix ee iongmau cincniu Siongrder suwjiaw ee iongmau, jin' tangx qniax. Guaw byy mng ix dui' dyclyc laii, ix iarr byy ing ix ee miaa qra guaw qongw; danrsi qra guaw qongw,

7 'Liw huai'in beh snix jit xee qniaw, soxiw vyc jiuw qau jiuw longxx m tangx limx, byy cingkir ee mic iarr longxx m tangx jiac; in'ui jitt xee ginxaw dui' txex nirr qaur ix siw ee zit beh qruix Siongrder juer Nazar ee langg.'"

8 Manoah dyrr qriuu Jehovah qongxx, "Jruw ar, qriuu Liw hro Liw soxx crex ee langg qycc laii guanw jiax, tangx qawsi guanw jnaixngiu kuanxtai jitt xee beh snix ee qniaw."

9 Siongrder tniax Manoah ee ue. Hurzinlangg jre dirr cann nirr ee sii, Siongrder ee suwjiaw qycc qaur ix hiax; danrsi ix ee diongrhux Manoah byy qapp ix dilehh.

10 Hurzinlangg qnuaxqinw jauw .kir, vyr ix ee diongrhux, qra ix qongw, "Hitt zit laii guaw jiax hitt xee langg qycc duiww guaw cuthen."

11 Manoah kiw laii duer ix ee bow qaur hitt langg hiax, qra ix qongw, "Bad qapp jitt xee hurzinlangg qongxue :ee, si liw mah?" Ix qongw, "Si guaw."

12 Manoah qongw, "Guan liw ee ue ingwgiam; jitt xee ginxaw diyhh jiauww simxmih hxuad? Guanw diyhh jnaixngiu qniaa?"

13 Jehovah ee suwjiaw duiww Manoah qongw, "Guaw qra hurzinlangg soxx qongw itcer ee su, ix longxx diyhh jimjiog;

14 Qniwnarr pudyy soxx cud :ee, ix m tangx jiac, vyc jiuw qau jiuw longxx m tangx limx, itcer byy cingkir ee mic iarr m tangx jiac; qniww guaw soxx bingrling :ee, ix longxx diyhh junsiuw."

15 Manoah duiww Jehovah ee suwjiaw qongw, "Cniaw liw hro guaw lauu lehh; guanw tangx qra liw virvan jit jiah snua'ngiuu-aw."

16 Jehovah ee suwjiaw qra Manoah qongw, "Liw suizenn lauu guaw, guaw m jiac liw ee mic; liw narr virvan siyjer, dyrr diyhh henr hro Jehovah." In'ui Manoah m jaix ix si Jehovah ee suwjiaw.

17 Manoah qra Jehovah ee suwjiaw qongw, "Liw miaa qiyr simxmih, qaur liw ee ue ingwgiam ee sii, guanw tangx junqingr liw?"

18 Jehovah ee suwjiaw qra ix qongw, "Liw sniaw su mng guaw ee miaa? Guaw ee miaa si qibiau :ee."

19 Manoah jiong' jit jiah snua'ngiuu-aw qapp sowjer, dirr jiyhvnuaa dingw laii henr hro Jehovah; suwjiaw qniaa qiquair ee su, Manoah qapp ix ee bow knuar .qnir.

20 In'ui huexiam dui' dnxuaa-dingw cringr jnriu tnix ee sii, Jehovah ee suwjiaw dirr dnxuaa-dingw ee huexiam diongx iarr jnriu .kir. Manoah qapp ix ee bow knuar .qnir, dyrr pag dirr de nirr.

21 Jehovah ee suwjiaw byy qycc cuthen hro Manoah qapp ix ee bow knuar .qnir, Manoah jiacc jaix ix si Jehovah ee suwjiaw.

22 Manoah qra ix ee bow qongw, "Lanw dikkag e siw, in'ui lanw u knuar qnir Siongrder."

23 Ix ee bow dyrr qra ix qongw, "Jehovah narr beh hro lanw siw, dikkag byy dui' lanw ee ciuw jiaplap siyjer qapp sowjer, qycc byy jiong' jiaxee itcer ee su jixsi lanw, jitt diap iarr byy jiong' jex su qra lanw qongw."

24 Au .laii hurzinlangg snix jit xee qniaw, qra ix hy miaa qiyr Samson. Ginxaw duarhanr, Jehovah suwhog ix.

25 Dirr Dan Ngiaa, dyrr si Zolah qapp Setaol ee diongqanx, Jehovah ee Sinn kixtauu qamxdong ix.

14 Samson lyc kir Timnah, dirr Timnah knuar qnir jit xee jaboxginxaw, dyrr si Filistlangg ee jaboxqniaw.

2 Samson jnriu kir qra ix ee laurve laurbuw qongw, "Guaw dirr Timnah knuar qnir jit xee jaboxginxaw, si Filistlangg ee jaboxqniaw; guan linw qra guaw crua ix laii juer bow."

3 Ix ee laurve laurbuw qra ix qongw, "Dirr liw hniadi diongx ee jaboxginxaw, iacc si dirr lanw vecsnir diongx, qamxx byy jaboxginxaw, drir qaur liw kir dirr byy sriu qatlew ee Filistlangg diongx cuarbow ar?" Samson qra ix ee laurve qongw, "Guan liw qra guaw crua ix; in'ui ix si guaw qac'ir :ee."

4 Danrsi ix ee laurve laurbuw m jaix jitt xee su si cud dirr Jehovah; in'ui Ix beh cue qihue qongqig Filist. Hitt sii Filistlangg quanxhad Islael.

5 Samson qapp ix ee verbuw lyc kir Timnah, qaur Timnah ee pudyhngg; duxdng u jit jiah sai'axtunn decc hauw laii uaw ix.

6 Jehovah ee Sinn dua dua limqaur Samson, ix ee ciuw byy qesix iarr tiah lic ix, cincniu tiah lic snua'ngiuu-aw jidngiu; ix iarr byy qra ix ee verbuw qongw ix soxx qniaa ee su.

7 Ix lyc kir qapp jaboxginxaw qongxue; ix si Samson soxx qac'ir :ee.

8 Qycc u hiacc quw, dywdngw beh laii crua ix, uad duiww lo-vnix beh knuar siw ee sraix, knuar qnir u jit siu pxangx qapp bit dirr sraix ee sinsix lai.

9 Ix ciuw tec bit qniaa, naxx qniaa naxx jiac. Qaur ix ee verbuw hiax, dyrr hro inx, inx iarr jiac; danrsi byy qra ix qongw jitt xee bit si dui' sraix ee sinsix tec .laii .ee.

10 Ix ee laurve lyc kir qaur jaboxginxaw hiax; Samson dirr hiax sed ensiac; in'ui vingsor siauwlenlangg longxx u jitt hy ee hongsiok.

11 Inx knuar qnir Samson, dyrr cua snax-jap xee pnua laii vruee ix.

12 Samson qra inx qongw, "Guaw dnaxx beh cud jit xee caix hro linw. Linw dirr ensiac ee cid zit lai narr e caix cud iwsur laii qra guaw qongw, guaw dyrr beh hro linw snax-jap niaw ee iuwduersnax, snax-jap tyr ee guarsnax;

13 Linw narr be e qra guaw qongw, linw dyrr diyhh hro guaw snax-jap niaw ee iuwduersnax, snax-jap tyr ee guarsnax." Inx qongw, "Cniaw cud liw ee caix hro guanw tniax."

14 Ix dyrr qra inx qongw: Dui' jiac :ee cud jiahmic; dui' qiongg :ee cud dnix.

Inx snax zit quw caix be cud.

15 Qaur derr cid zit, inx qra Samson ee bow qongw, "Liw diyhh laur liw ee diongrhux, hro ix qra caix ee iwsur qra guanw qongw, benw did guanw ing huew siyx liw qapp liw ee laurve ee cur. Linw cniaw guanw laii, si beh cniuw guanw iacc m si?"

16 Samson ee bow tikaur dirr ix ee binrjingg, qongw, "Liw si uanwhun guaw, m si tniar guaw; in'ui liw cud caix hro guaw vunxqog ee langg, iarr byy qra guaw qongw bingg." Ix rinr ix qongxx, "Lenrr guaw ee laurve laurbuw dy' byy qra ix qongw, qamxx tangx qra liw qongw mah?"

17 Dirr ensiac ee cid zit au, ix tikaur dirr ix ee diongrhux ee binrjingg; qaur derr cid zit dyrr qra ix qongw; in'ui ix vig ix jin' tiamw. Ix ee bow dyrr qra vunxqog ee langg qongw.

18 Qaur derr cid zit, zit iauxx bue lyc ee dairsingx, sniaa-lai ee vecsnir qra Samson qongw, "U simxmih viw bit kacc dnix ar? U simxmih viw sraix kacc qiongg ar?" Samson qra inx qongw:

Linw narr m si ing guaw ee gujingw-aw lee cann,

Guaw ee caix dyrr caix be cud.

19 Jehovah ee Sinn dua dua limqaur Samson, ix dyrr lyc kir qaur Askelon, taii siw inx diongqanx snax-jap langg, cniuw inx, jiong' hiaxee snxax hro caix .diyc ee langg. Samson dua siurkir, dyrr jnriu kir inx laurve ee qrex.

20 Samson ee bow dyrr qer hro ix ee vuepnua, dyrr si juer ix ee ving'iuw :ee.

15 Qycc u hiacc quw, qaur quah bec ee sii, Samson duar jit jiah snua'ngiuu-aw kir cue ix ee bow, qongw, "Guaw beh zip vangg cue guaw ee bow." Ix ee dniurlangg m jrunw ix zip kur.

2 Dniurlangg qongw, "Guaw anwsngr liw sidjai uanwhun ix, in'ui anxnix guaw jiong' ix hro liw ee vuepnua. Ix ee siyxbe qamxx m si viw ix kacc suiw mah? Cniaw liw qra crua laii ter ix."

3 Samson qra inx qongw, "Jitt vaiw guaw sionghai Filistlangg, inx byy tangx jikjue guaw."

4 Samson dyrr kir liac snax-vah jiah holii, qycc duar huexvew, jiong' holii ee buew nng jiah nng jiac vak sna' liamm, jiong' huexvew vak dirr nng qix buew ee diongqanx;

5 Huexvew diamw dyc dyrr vangr holii zip Filistlangg iauxx bue siuquah ee gnoxqog, siyx ix qui' kunw :ee, qapp ix bue quah ee gnoxqog, ixqip qnanaxhngg, longxx qra siyx .kir.

6 Filistlangg qongw, "Jitt xee su jirjui juer :ee ar?" Inx qongw, "Si Timnahlangg ee qniaxsair Samson; ix ee dniurlangg jiong' ix ee bow hro ix ee vuepnua." Filistlangg dyrr jnriu .kir, ing huew siyx hurzinlangg qapp ix ee laurve.

7 Samson duiww Filistlangg qongw, "Linw qiwzenn qniaa anxnix, guaw beh duiww linw vywsiuu, jiacc beh suah."

8 Samson dyrr dua dua pah siw inx, sinsix sna' tac; dyrr lyc kir diamr dirr Etam ee jiyhtaukangx.

9 Filistlangg jnriu kir jrad ngiaa dirr Judah, hunsnuar dirr Lehi.

10 Judahlangg qongw, "Linw sniaw su jnriu laii qongqig guanw ar?" Inx qongw, "Guanw jnriu laii si beh kunxvak Samson; ix kuanxtai guanw jnaixngiu, guanw iarr beh anxnix kuanxtai ix."

11 Dui' anxnix Judah snax-cingx langg qaur Etam ee jiyhtaukangx, duiww Samson qongw, "Filistlangg quanxhad lanw, liw m jaix mah? Liw sniaw su juer jitt xee su hro guanw ar?" Ix rinr qongxx, "Inx jnaixngiu kuanxtai guaw, guaw iarr anxnix kuanxtai inx."

12 Judahlangg qra ix qongw, "Guanw lyc laii si beh kunxvak liw, jiong' liw qaux dirr Filistlangg ee ciuw." Samson qra inx qongw, "Linw diyhh duiww guaw jiuwjua, linw vunxsinx byy beh hai guaw."

13 Inx duiww ix qongw, "Byy. Guanw beh kunxvak liw qaux dirr inx ee ciuw, dikkag byy hai siw liw." Dyrr ing nng diauu sinx ee syh kunxvak ix, dui' jiyhvnuaa duar ix jnriu .kir.

14 Samson qaur Lehi, Filistlangg duw .diyc dyrr huah. Jehovah ee Sinn dua dua limqaur ix, ix ciuw nirr ee syh dyrr cincniu quer huew siyx ee muaa, soxx vak ix ee syh dyrr dui' ix ee ciuw lag .lyc .kir.

15 Ix knuar qnir luu jit qix sinx ee cuiwpexqud, dyrr crunx ciuw kiyh ix, ing laii pah siw jit-cing langg.

16 Samson qongw:

Guaw ing luu ee cuiwpexqud, pah siw langg jit dxuix jit dxuix.

Guaw ing luu ee cuiwpexqud, pah siw jit-cingx langg.

17 Qongw suah, dyrr jiong' ciuw nirr ee cuiwpexqud hetqag; hitt soxjai dyrr qiyr Rlamat Lehi.

18 Samson cuiwdax qaur qik, dyrr qiuqiyr Jehovah qongxx, "Liw qiwzenn ing Liw ee lovok ee ciuw qniaa jiacc dua ee jinxqiur, jongw byy guaw dnaxx diyhh cuiwdax laii siw, ham lyc dirr byy sriu qatlew ee langg ee ciuw mah?"

19 Siongrder dyrr hro Lehi lap'ux ee soxjai lic kuix, u juiw dui' hiax cringr .cud .laii. Samson limx liauw jingsinn hogdyr, qycc uahdang; dui' anxnix hy hitt xee juixjnuaa qiyr Hakkole; hitt xee juixjnuaa qaur qinaxzit iauxx dirr Lehi.

20 Dng' Filistlangg ee sii, Samson juer Islael ee sursux zi-jap nii.

16 Samson qaur Gaza, dirr hiax knuar qnir jit xee qirluw, dyrr cinqin ix.

2 U langg qra Gazalangg qongw, "Samson qaur jiax." Inx dyrr tauwmii uii ix, dirr sniamngg dngdanw ix, tong' mii jing jing, qongw, "Qaur tniqngjaw lanw dyrr tangx taii ix."

3 Samson kunr qaur vnuawmii; dirr vnuawmii kiw .laii, jiong' sniamngg ee mngsnir, qapp nng qix mngkia, qapp mngqongg, longxx tiah .kiw .laii, he dirr qingtauu nirr, giaa qaur Heblon duiwbin ee snuax-dingw.

4 Au .laii Samson dirr Solek Snuaqog air diyc jit xee jaboxlangg miaa qiyr Delilah.

5 Filistlangg hiaxee siuxlingw jnriu kir qnir hitt xee jaboxlangg, duiww ix qongw, "Liw diyhh laur Samson, knuar ix ee dua kuiwlat jairdirr dyclyc, guanw jnaixngiu jiacc e ngiaa ix, tangx qra vak laii kunwkow ix; guanw dyrr dagg langg hro liw jit-cing jit-vah ginn."

6 Delilah qra Samson qongw, "Qriuu liw qra guaw qongw, liw ee dua kuiwlat jairdirr dyclyc, diyhh jnaixngiu jiacc e vak liw, kunwkow liw."

7 Samson rinr qongxx, "Langg narr ing cid diauu iauxx bue dax, cnix ee dinn-aw vak guaw, guaw dyrr luanxziok cincniu vadd langg."

8 Dui' anxnix Filistlangg hiaxee siuxlingw tec cid diauu iauxx bue dax, cnix ee dinn-aw laii, qaux hro hurzinlangg, ix dyrr ing hitt xee laii vak ix.

9 Hurzinlangg ixqing’ u baihok langg dirr ix ee lairvangg; hurzinlangg qongw, "Samson ar, Filistlangg laii beh liac liw." Samson dyrr cuah dng syh, cincniu qingquer huew ee muasix jidngiu; anxnix ix ee dua kuiwlat langg iuguann m jaix.

10 Delilah qra Samson qongw, "Liw penr guaw, duiww guaw qongw vehcat; dnaxx qriuu liw qra guaw qongw diyhh jnaixngiu jiacc e vak liw."

11 Samson rinr qongxx, "Langg narr ing m bad ing ee sinx syh vak guaw, guaw dyrr luanxziok cincniu vadd langg."

12 Delilah dyrr ing sinx syh vak ix, duiww ix qongw, "Samson ar, Filistlangg laii beh liac liw." Hitt sii baihok ee langg bih dirr lairvangg; Samson dyrr cuah dng ix ciuxqud nirr ee syh, cincniu cuah dng jit diauu snuar.

13 Delilah qra Samson qongw, "Liw qaur dnaxx iauxx penr guaw, duiww guaw qongw vehcat; qriuu liw qra guaw qongw, diyhh jnaixngiu jiacc e vak liw." Samson rinr qongxx, "Liw narr qra guaw ee cid qrow ee taumngg qapp huirsnuar snaqab jrid, dyrr e."

14 Hurzinlangg dyrr ing dxingx dingr ix ee taumngg, qra ix qongw, "Samson ar, Filistlangg laii beh liac liw." Samson dyrr cnew, jiong' vowquix ee dxingx qapp huirsnuar, juer jit xe vuic .cud .laii.

15 Delilah qra ix qongw, "Liw ee simx byy lenn dirr guaw; jnaixngiu qongw liw tniar guaw? Liw ixqing’ penr guaw snax vaiw, byy qra guaw qongw liw ee kuiwlat jairdirr dyclyc."

16 Delilah zidzit ing ue cuix ix, vig ix, drir qaur ix ee simx utbun, qaur beh siw;

17 Dyrr jiong' ix ee simdew soxx kngr :ee longxx vyr ix, qra ix qongw, "Ingxx m bad u tiwtaudyx qaur guaw ee taukag; in'ui guaw dui' buxtex dyrr qruix Siongrder juer Nazirlangg; narr qra guaw tir .kiw .laii; guaw ee kuiwlat dyrr lirkuix guaw, guaw dyrr luanxziok cincniu vadd langg."

18 Delilah knuar qnir ix jiong' simdew soxx kngr :ee longxx qra ix qongw, dyrr crex langg qiyr Filistlangg ee siuxlingw, qra inx qongw, "Cniaw linw jitt vaiw qycc jnriu .laii, in'ui ix ixqing’ jiong' simdew soxx kngr :ee longxx qra guaw qongw." Filistlangg ee siuxlingw jnriu kir hurzinlangg hiax, hitt xee ginn duar dirr ciuw nirr.

19 Ix dyrr hro Samson kunr dirr ix ee katau'ux, qiyr jit langg laii tir ix cid qrow ee taumngg; dui' anxnix kunwkow ix, ix ee kuiwlat dyrr lirkuix ix.

20 Ix qongw, "Samson ar, Filistlangg laii beh liac liw." Samson dyrr cnew, simlai qongw, "Guaw beh cincniu jingg quixnarr vaiw qaqi qunr kuix." Ix m jaix Jehovah ixqing’ lirkuix ix.

21 Filistlangg liac ix, iah ix ee bagjiux, duar ix qaur Gaza, ing danglen vak ix; ix dyrr dirr qnax nirr ex bry.

22 Danrsi ix ee taumngg siurr tir liauxau, qycc jiamrjiam dngg .kiw .laii.

23 Filistlangg hiaxee siuxlingw jurjip, beh henr dua jrer hro inx ee siongrder Dagon, iarr beh enwlok, in'ui inx qongw, "Lanw ee siongrder jiong' lanw ee duiwdik Samson qaux dirr lanw ee ciuw lar."

24 Vecsnir knuar qnir Samson, dyrr ylyw inx ee siongrder, qongw, "Lanw ee duiwdik huiw lanw ee de, qycc taii siw lanw jerje langg :ee. Dnaxx lanw ee siongrder ixqing’ jiong' ix qaux dirr lanw ee ciuw."

25 Inx enwlok ee sii, dyrr qongw, "Qiyr Samson laii, hro lanw lang tittyy." Inx dyrr qiyr Samson cud qnax; ix dyrr hro inx lang tittyy. Inx hro ix kia dirr nng qix tiau ee diongqanx.

26 Samson qra kanx ix ee ciuw ee ginxaw qongw, "Cniaw liw hro guaw bongx diyc tuh cur ee tiau, hro guaw uaw inx."

27 Hitt sii cur-lai lamluw muaw muaw; Filistlangg ee jiongww siuxlingw iarr longxx dirr hiax; cur-dingw lamluw iokliok u snax-cingx langg, knuar langg decc lang Samson tittyy.

28 Samson qidyw Jehovah qongxx, "Jruw Jehovah ar, qriuu Liw siauwliam guaw, Siongrder ar, qriuu Liw sur guaw jin jitt vaiw ee kuiwlat, hro guaw uirr guaw nng luiw bagjiux, duiww Filistlangg juer jit xe vywsiuu."

29 Samson dyrr lamw tuh hitt qingx cur ee nng qix diongtiau, laii uaw ix, jniar ciuw lamw jit qix, dyr ciuw lamw jit qix.

30 Samson qongw, "Guan guaw qapp Filistlangg snaqab siw." Dyrr jin lat kutsinx; cur dyrr dyw, laii deh dirr hiaxee siuxlingw, qapp dirr hitt lairbin ee jingwlangg. Anxnix, Samson siw ee sii soxx hai .siw .ee, viw uac ee sii soxx hai .siw .ee qyckacc je.

31 Samson ee hniadi, qapp ix ee laurve juann qrex, longxx lyc laii siusip ix, qrngx jnriu kir baijongr dirr Zolah qapp Estaol ee diongqanx, dirr ix ee laurve Manoah ee bongrde. Samson juer Islael ee sursux zi-jap nii.

17 Eflaim ee snuade u jit xee langg, miaa qiyr Mikah. Ix qra laurbuw qongw,

2 "Liw hitt jit-cingx jit-vah ginn hro langg tec .kir, liw in'ui anxnix jiuwjow, qycc qongw hro guaw tniax. Knuar ar, jitt xee ginn dirr guaw jiax; si guaw tec .kir." Ix ee laurbuw qongw, "Guan Jehovah suwhog guaw ee qniaw."

3 Ix dyrr jiong' cingx id ginn hingg ix ee laurbuw. Ix ee laurbuw qongw, "Guaw ixqing’ dui' guaw ee ciuw ing jitt xee ginn, uirr guaw ee qniaw, henr hro Jehovah, tangx diaukig jit senx sxiong, jur jit senx sxiong; dnaxx guaw iuguann qycc qaux liw."

4 Mikah jiong' ginn hingg ix ee laurbuw. Ix ee laurbuw ing nng-vah ginn hro juwjy ee langg; ix dyrr ing hitt xee juer diaukig ee gnoxsiong, jur ee gnoxsiong, he dirr Mikah ee cur.

5 Jitt xee Mikah u siongrder ee cur, qycc jewjy efod, qapp qrex-lai hiaxee gnoxsiong, qniaa setlip ee lew, hunvet ix jit xee qniaw juer ix ee jewsix.

6 Hitt sii Islael diongx byy ongg; dagg langg jiauww ix soxx knuar juer driyc :ee laii qniaa.

7 Judah Betlehem u jit xee siauwlenlangg, sriok Judah-jok ee Levilangg, ix qiawkax dirr hiax.

8 Jitt langg lirkuix Judah Betlehem Sniaa, beh cue jit xee tangx kiarkiw ee soxjai. Qnialo ee sii, qaur Eflaim ee snuade, Mikah ee cur.

9 Mikah mng ix qongxx, "Liw dui' dyclyc laii?" Ix rinr qongxx, "Guaw si Judah Betlehem ee Levilangg, beh cue jit xee tangx kiarkiw ee soxjai."

10 Mikah qra ix qongw, "Liw laii qapp guaw druar, juer guaw ee ve, juer guaw ee jewsix; guaw dagg nii hro liw jap xee ginn-aw, jit hur ijniuu, qapp liw ee zidsit." Levilangg dyrr zip .kir.

11 Levilangg qamguan qapp hitt langg snaqab druar. Mikah knuar jitt xee siauwlenlangg cincniu qaqi ee qniaw.

12 Mikah qra Levilangg qniaa setlip ee lew; siauwlenlangg dyrr juer ix ee jewsix, laii druar dirr ix ee cur.

13 Mikah qongw, "Dnaxx guaw jaix Jehovah beh hyw kuanxtai guaw, in'ui guaw u jit xee Levilangg juer jewsix."

18 Hitt sii Islael diongx byy ongg. Dan ee langg ee jipair cue de juer giap tangx kiarkiw, in'ui qaur hitt zit, dirr Islael ee jipair diongx, inx iauxx bue did diyc giap.

2 Dan ee langg dui' Zolah qapp Estaol, crex vunxjok jiongww vecsnir diongx go xee iongxsu, kir taux knuar hitt xee de laii cakyw, huanhur inx qongxx, "Linw kir cakyw hitt xee de." Inx laii qaur Eflaim ee snuakux, zip Mikah ee cur, dyrr hiyh dirr hiax.

3 Inx qin Mikah ee cur, zin cud hitt xee siauwlenn Levilangg ee snia'imx, dyrr zip kir mng ix qongxx, "Jirjui cua liw laii jiax? Liw dirr jiax juer simxmih? Liw dirr jiax did diyc simxmih?"

4 Ix qongw, "Mikah kuanxtai guaw anxnix, anxnix; ix u cniar guaw, guaw juer ix ee jewsix."

5 Inx qra ix qongw, "Cniaw liw mng Siongrder hro guanw jaix guanw soxx decc qniaa ee lo, hingtongx iacc byy?"

6 Jewsix qra inx qongw, "Linw tangx ving'anx kir; linw soxx qniaa ee lo si dirr Jehovah ee binrjingg."

7 Go langg dyrr kixsinx, laii qaur Lais, knuar qnir hiax ee vecsnir, anzenn kiarkiw, ving'anx, byy kuawlu, cincniu Sidonlangg jidngiu. Dirr hiax byy u jiangxquann ing simxmih su laii qiauxziauw inx, inx lirkuix Sidonlangg hng hng, byy qapp vadd langg ongxlaii.

8 Go langg dyr laii qaur Zolah qapp Estaol inx hniadi hiax; hniadi mng inx qongxx, "Linw u simxmih ue?"

9 Inx rinr qongxx, "Kiw .laii, lanw jnriu laii kir qongqig inx; in'ui guanw ixqing’ knuar qnir hitt xee de. Knuar ar, hitt xee de jin' hyw; linw sniaw su diam diam? Diyhh laii kir did diyc hitt xee de juer giap, m tangx encenn.

10 Linw qaur hiax, beh knuar anzenn kiarkiw ee vecsnir, soxjai iarr kuikuah. Siongrder ixqing’ jiong' hitt soxjai qaux dirr linw ee ciuw; derjniu soxu ee mic, hitt soxjai byy kiamr jit hxang."

11 Dui' anxnix Dan-jok ee lak-vah langg, dag'ee duar qunkir, dui' Zolah qapp Estaol jinwjingg kir.

12 Inx jnriu kir jrad ngiaa dirr Judah ee Kiliat Jealim; soxiw qiyr jitt soxjai miaa Dan Ngiaa, qaur qinaxzit. Knuar ar, jex si dirr Kiliat Jealim ee aurbin.

13 Inx dui' hiax kir Eflaim ee snuakux, qaur Mikah ee cur.

14 Jiongjingg taux knuar Lais-de ee go langg, qra inx ee hniadi qongw, "Jiaxee cur-lai u efod, qapp qrex-lai gnoxsiong, qapp diaukig ee sxiong, jur ee sxiong, linw jaix mah? Dnaxx linw diyhh sniu, knuar beh jnaixngiu juer."

15 Inx dyrr uad kir hiax, qaur hitt xee siauwlenn ee Levilangg ee cur, dyrr si Mikah ee cur, mng ix ving'anx.

16 Dan-jok hiaxee lak-vah langg duar qundui, longxx kia dirr mngkauw.

17 Taux knuar de ee go lang dyrr zip .kir, jiong' diaukig ee sxiong, efod, qrex-lai ee sxiong, qapp jur ee sxiong longxx tec .kir. Jewsix qapp duar qundui ee lak-vah langg snaqab kia dirr mngkauw.

18 Hitt go langg zip Mikah ee cur, tec diaukig ee gnoxsiong, efod, qrex-lai ee gnoxsiong, qapp jur ee sxiong, jewsix dyrr mng inx qongxx, "Linw juer simxmih ar?"

19 Inx rinr qongxx, "Byc did juer sniax, ing ciuw ngx cuir, duer guanw laii kir, juer guanw ee ve, juer guanw ee jewsix. Liw juer jit langg ee qrex ee jewsix kacc hyw, iacc si juer Islael jit jipair jit jok ee jewsix kacc hyw ar?"

20 Jewsix simx hnuahiw, dyrr tec efod, qapp qrex-lai ee gnoxsiong, qapp diaukig ee sxiong, qniaa dirr vecsnir ee diongqanx.

21 Inx dyrr uat dngw srinx lirkuix hiax, hro ginxaw, jingsnix, huewjaii, juer taujingg.

22 Lirkuix Mikah ee cur jamxzenn hng. Mikah hiaxee cuwvnix longxx jurjip, duiqnuaw Dan ee langg, auqiyr Dan ee langg.

23 Dan ee langg uat tauu knuar, mng Mikah qongxx, "Liw jurjip hiaxee langg laii, si simxmih dairjir ar?"

24 Ix qongw, "Guaw soxx jrngx ee siongrder qapp jewsix, linw longxx duar .kir, guaw iauxx u cunx simxmih? Jnaixngiu iauxx mng guaw qongxx, 'Liw simxmih dairjir ar?'"

25 Dan ee langg qra ix qongw, "Liw m tangx hro guanw tniax qnir liw ee sniax, qniax sywsingr ee langg e laii qrang linw, drir qaur liw qapp juann qrex longxx sitlyc sniwmia."

26 Dan ee langg jueww inx qniaa; Mikah knuar qnir inx viw ix kacc qiongg, dyrr uat dngw srinx dyr kir ix ee cur.

27 Inx duar Mikah soxx juer :ee, qapp ix soxu ee jewsix, qaur Lais, knuar qnir anzenn byy kuawlu ee vecsnir, dyrr ing dyx taii siw inx, qycc vangr huew siyx hitt xee sniaa;

28 Iarr byy langg jinxqiur inx, in'ui lirkuix Sidon jin' hng, inx qycc byy qapp vadd langg ongxlaii. Hitt xee sniaa dirr hitt xee uaw qin Betlehob ee snuaqog.

29 Dan ee langg qycc dirr hiax kiw sniaa laii kiarkiw; jiauww inx joxqongx Islael ee qniaw Dan ee miaa, qiyr hitt xee sniaa miaa Dan. Hitt xee sniaa kixtauu miaa qiyr Lais.

30 Dan ee langg dyrr uirr qaqi cai hitt xee diaukig ee sxiong; Moses ee sunx, Gersom ee qniaw, Jonatan, qapp ix ee qniaxsunx, juer Dan ee jipair ee jewsix, didqaur hitt derhngx ee langg duw diyc liac ee zit.

31 Siongrder ee cur dirr Siloh hiaxee zit, Dan ee langg uirr qaqi cai Mikah soxx juer diaukig ee sxiong.

19 Dng' Islael byy ongg ee sii, u qiawkax dirr Eflaim ee snuade hitt vingg ee jit xee Levilangg, crua jit xee Judah Betlehem ee jaboxginxaw juer sewii.

2 Sewii qnia'imm vue ix ee diongrhux, lirkuix ix dyr kir Judah Betlehem, qaur laurve ee qrex, druar hiax sir guehzit.

3 Ix ee diongrhux kiw .laii, duar jit xee lovok nng jiah luu kir zib ix, beh ing hyw ue an'uir ix, cua ix dyr .laii; ix dyrr cua ix zip laurve ee cur. Hurzinlangg ee laurve knuar .qnir, dyrr huangingg ix.

4 Ix ee dniurlangg, dyrr si jaboxginxaw ee laurve, lauu ix; ix dyrr qapp ix druar snax zit. Inx dyrr snaqab limjiac, diamr dirr hiax.

5 Qaur derr sir zit, inx tauwjaw kiw .laii, ix beh kixsinx kir; jaboxginxaw ee laurve qra qniaxsair qongw, "Cniaw liw jiac damrvyc vniaw juer diamxsimx, liauxau jiacc tangx kixsinx qniaa."

6 Nng langg dyrr jre .lyc .kir, snaqab limjiac. Jaboxginxaw ee laurve duiww hitt langg qongw, "Cniaw liw hnuahiw qycc diamr jit mii, hro liw ee simx kuaiwlok."

7 Hitt langg kiw laii beh kixsinx, ix ee dniurlangg qiongg qiongg lauu ix; ix dyrr qycc hiyh jit mii.

8 Qaur derr go zit, ix tauwjaw kiw laii beh kixsinx; jaboxginxaw ee laurve qra ix qongw, "Cniaw liw qycc jiac diamxsimx, tingwhau qaur zit ciaa saix." Inx nng langg dyrr snaqab jiac.

9 Hitt langg qapp ix ee sewii qapp lovok kiw laii beh kixqniaa; ix ee dniurlangg, dyrr si jaboxginxaw ee laurve, qra ix qongw, "Knuar ar, zit beh amr, cniaw liw qycc hiyh jit mii. Zit beh lyc lar, liw diyhh hiyh jiax, hro liw ee simx kuaiwlok; binaxzit tauwjaw kixsinx dyr kir linw daux."

10 Hitt langg m kingw qycc hiyh jit mii, dyrr kiw laii kixsinx, qaur Jebus ee duiwbin, Jebus dyrr si Jelusalem. Nng jiah qruar nguax ee luu, ixqip ix ee sewii, qapp ix kir.

11 Qniaa qin Jebus ee sii, zit ixqing’ beh lyc. Lovok qra juxlangg qongw, "Laii ar, lanw m dat diyc uat zip Jebuslangg jitt xee sniaa, lanw hiycmii dirr hiax."

12 Juxlangg qongw, "Lanw byy beh uat zip guarvanglangg ee sniaa, dyrr si byy sriok Islaellangg :ee; kacc hyw lanw diyhh quer laii Gibeah."

13 Qycc qra lovok qongw, "Laii, lanw diyhh kir jiaxee soxjai ee jit xee, laii hiyh dirr Gibeah, iacc si Rlamah."

14 Inx dyrr jinwjingg kir. Jiongqin Benjamin ee Gibeah, zit ixqing’ lyc.

15 Inx dyrr uat .zip .kir, beh hiyh dirr Gibeah; dyrr zip kir jre dirr sniaa-lai ee quelo, in'ui byy langg jiaplap inx zip cur hiyhmii.

16 Zit amr, u jit xee laurlangg dui' cann nirr juewqangx dyr .laii. Ix vunw si Eflaim ee snuade ee langg, qiawkax dirr Gibeah; danrsi hitt soxjai ee langg si Benjaminlangg.

17 Laurlangg giahbak knuar qnir langkeh dirr sniaa-lai ee quelo, dyrr mng ix qongxx, "Liw dui' dyclyc laii? Beh kir dyclyc?"

18 Ix rinr qongxx, "Guaw dui' Judah Betlehem laii, beh kir Eflaim ee snuade hitt vingg. Guaw vunw dirr hiax, quer kir Judah Betlehem. Dnaxx guaw kir Jehovah ee cur; dirr jiax byy langg jiaplap guaw zip ix ee cur;

19 Danrsi guaw u cauw u nriuu, tangx hro luu, iarr u vniaw u jiuw tangx hro vunxsinx, qapp liw ee luxvi, qapp duer liw ee lovok ee siauwlenlangg, longxx byy kiamr jit hxang."

20 Laurlangg qongw, "Guan liw ving'anx. Liw soxx kiamwing :ee si guaw dai; dogdok liw m tangx dirr quelo nirr quer mii."

21 Dui' anxnix cua inx qaur ix ee cur, cri ix ee luu; inx dyrr sew kax limjiac.

22 Inx ee simx duxdecc kuaiwlok ee sii, sniaa-lai hiaxee huixlui uiluii ix ee cur, diddit pah mngg, duiww cuwjuw laurlangg qongw, "Liw jiong' hitt xee zip liw ee cur ee langg duar .cud .laii, guanw beh qapp ix qauhap."

23 Hitt xee cuwjuw cud laii inx hiax, qra inx qongw, "Guaw ee hniadi ar, m tangx, byc did juer jitt xee pnaiw, jitt langg qiwzenn zip guaw ee cur, linw dyrr byc did juer jitt xee qenwsiaur ee su.

24 Guaw u jaboxqniaw iauxx si jairsikluw, qycc u ix ee sewii; guaw cua ix cud .laii, linw tangx lingziok ix, cutjai linw ee iwsur kuanxtai inx; dogdok duiww jitt langg, linw m tangx qniaa jitt xee qenwsiauwsu."

25 Danrsi hiaxee langg m tniax ix ee ue; hitt langg dyrr jiong' ix ee sewii kanx cud kir guarbin qaux inx; inx dyrr qapp ix qauhap, tong' mii lingziok ix; qaur jaxkiw tnix beh qngx ee sii, jiacc vangr ix kir.

26 Tnix puxqngx ee sii, hurzinlangg laii qaur ix ee juxlangg soxx hiyh hitt xee cur mngkauw, dyrr dyw dirr hiax, didqaur tnix qngx.

27 Tniqngjaw ix ee juxlangg kiw laii kuix cur ee mngg, cud kir beh kixsinx, knuar qnir hitt xee hurzinlangg, dyrr si ix ee sewii, dyw dirr cur mngkauw, nng qix ciuw kuar dirr hording nirr;

28 Dyrr qra hurzinlangg qongw, "Kiw .laii, lanw beh kixsinx"; danrsi ix byy rinr. Ix dyrr qra ix huu dirr luu ee dingxbin, kixsinx kir ix ee vunxsoxjai.

29 Qaur ix ee cur, dyrr ing dyx jiong' ix ee sewii sinsix qapp qud quah juer jap-zi der, crex langg tec kir tong' Islael ee juanqingw.

30 Qniwnarr knuar .qnir ee langg longxx qongw, "Dui' Islaellangg cud Egipt ee zit, didqaur qinaxzit, m bad anxnix qniaa, iarr byy knuar .qnir. Dnaxx linw diyhh sniu, diyhh camsiongg, zen'au jiacc qongw."

20 Dui' anxnix, Islael jingwlangg dui' Dan qaur Beerseba longxx cud .laii, qapp diamr dirr Gilead ee langg, juann hue jurjip cincniu jit langg, dirr Beerseba, qaur Jehovah ee binrjingg.

2 Vecsnir ee siuxlingw qapp Islael jiongww jipair longxx qaqi laii kia dirr Siongrder ee vecsnir ee hue-diongx, giac dyx ee vorvingx qiong sir-jap-bxan.

3 (Benjaminlangg longxx tniax qnir Islaellangg jnriu qaur Beerseba.) Islaellangg dyrr qongw, "Jitt xee pnaiw dai ee jing'iuu diyhh qra guanw qongw bingg."

4 Hitt xee Levilangg, dyrr si siurr hai siw ee hurzinlangg ee diongrhux, rinr qongxx, "Guaw qapp guaw ee sewii qaur Benjamin ee Gibeah hiycmii.

5 Gibeahlangg kiw laii qongqig guaw, mii .sii vau'uii guaw hiyh ee cur, sniu beh hai siw guaw, qycc qiongqanx guaw ee sewii, drir qaur siw;

6 Guaw dyrr jiong' guaw ee sewii quah qui' der, crex langg tec qaur Islael did diyc juer giap ee juann de; in'ui inx dirr Islael diongx qniaa imluan qapp qenwsiauwsu.

7 Linw longxjongw Islaellangg diyhh dnaxsngr girlun."

8 Jiongww vecsnir longxx kiw laii cincniu jit langg, qongw, "Guanw byy jit langg beh kir ix ee vowvnii, iarr byy jit langg beh dyr kir ix ee cur.

9 Guanw duiww Gibeahlangg beh anxnix qniaa, dyrr si jiauww soxx tiux ee ciamx kir qongqig ix.

10 Guanw beh dirr Islael jiongww jipair diongx, jit-vah langg cruw jap langg, jit-cingx cruw jit-vah, jit-bxan cruw jit-cingx, qra vecsnir un nriuu, hro inx qaur Benjamin ee Gibeah ee sii, tangx jiauww inx dirr Islael diongx soxx qniaa qenwsiaur ee su laii qniaa dirr inx."

11 Dui' anxnix Islael jingwlangg jurjip qongqig hitt xee sniaa, dairqex lenhap cincniu jit langg.

12 Islael jiaxee jipair crex langg venwvenr qra Benjamin ee jipair qongw, "Linw diongqanx soxx qniaa :ee, simxmih pnaiw ar?

13 Dnaxx linw diyhh jiong' jiaxee langg, dyrr si Gibeah ee huixlui, qaux cud, guanw tangx hro inx siw, dui' Islael diongx druu kir hitt xee pnaiw." Danrsi Benjaminlangg m kingw tniax inx hniadi Islaellangg ee ue.

14 Benjaminlangg dui' inx hiaxee sniaa cud .laii, jurjip qaur Gibeah, beh qapp Islaellangg qaujenr.

15 Hitt sii Benjaminlangg, dui' dagg xee sniaa diamw cud giac dyx :ee, qiong nng-bxan lak-cingx, lingrgua iauxx u Gibeahlangg diamw cud cid-vah jinglen ee vxingx.

16 Dirr jiongww vecsnir ee diongqanx u cid-vah jinglen ee vxingx, quanwlen ing dyr ciuw :ee, dag'ee e ing syh hnir jiyc, junw junw hunhyy byy cax.

17 Benjaminlangg ixgua, diamw cud Islaellangg giac dyx :ee, qiong sir-jap-bxan, longxx si jenwsu.

18 Islaellangg dyrr kiw laii qaur Betel, mng Siongrder, qongw, "Guanw diongqanx jirjui diyhh dairsingx jnriu .kir, qapp Benjaminlangg qaujenr ar?" Jehovah qongw, "Judah diyhh dairsingx kir."

19 Islael tauwjaw kiw .laii, jrad ngiaa qongqig Gibeah.

20 Islaellangg dyrr cud .laii, beh qapp Benjaminlangg qaujenr. Islaellangg vaii din dirr Gibeah beh qongqig inx.

21 Benjaminlangg dyrr dui' Gibeah cud .laii, hitt zit taii siw Islaellangg nng-bxan nng-cingx, dyw dirr de nirr.

22 Islaellangg dyrr qaqi hunwiongw, iuguan dirr tauu jit zit vaii din ee soxjai qycc vaii din.

23 (Islaellangg jnriu .kir, dirr Jehovah ee binrjingg tikaur qaur ehngx; mng Jehovah qongxx, "Guanw diyhh qycc jnriu kir qapp guanw ee hniadi Benjaminlangg qaujenr iacc mrbenw?" Jehovah qongw, "Diyhh jnriu kir qongqig ix.)

24 Derr zi zit Islaellangg dyrr jinwjingg kir qongqig Benjaminlangg.

25 Benjaminlangg iarr dirr derr zi zit dui' Gibeah cud .laii, qongqig inx; qycc taii siw Islaellangg jit-bxan veh-cingx langg, dyw dirr de nirr, longxx si giac dyx :ee.

26 Islaellangg qapp jiongww vecsnir longxx jnriu kir qaur Betel, dirr hiax jre dirr Jehovah ee binrjingg henr siyjer qapp ving'anjer.

27 Hitt sii Siongrder ee iokqui dirr hiax. Aalon ee sunx, Eleazar ee qniaw, Finehas hitt sii kia dirr ix ee binrjingg.

28 Islaellangg mng Jehovah qongxx, "Guaw diyhh cud kir qap guaw ee hniadi Benjaminlangg qaujenr mah? Iacc si diyhh suah ar?" Jehovah qongw, "Liw diyhh jnriu .kir, in'ui binaxzit Guaw beh jiong' inx qaux dirr liw ee ciuw."

29 Islaellangg dyrr baihok vxingx, dirr Gibeah ee siwuii.

30 Derr snax zit Islaellangg qycc jnriu kir qongqig Benjaminlangg, vailet duirgnow dirr Gibeah, qapp jingg nng vaiw jidngiu.

31 Benjaminlangg dyrr cud kir dixdik vecsnir, dyrr siurr inxiuw lirkuix sniaa; inx cincniu jingg nng vaiw dirr cann nirr kixciuw taii siw Islaellangg iokliok snax-jap xee, dirr duarlo dingw; hiaxee lo, jit diauu tangr Betel, jit diauu tangr Gibeah.

32 Benjaminlangg qongw, "Inx iuguann taii sux dirr lanw ee binrjingg." Islaellangg qongw, "Lanw diyhh dyjauw, inxiuw inx lirkuix sniaa qaur duarlo."

33 Islael jingwlangg longxx dui' ix ee soxjai kiw .laii, vailet duirgnow dirr Baaltamar; Islael baihok ee vxingx dui' inx ee soxjai, dyrr si Gabaa, ciongx .cud .laii.

34 Tong' Islael u jit-bxan jinglen ee vxingx jinwjingg laii qongqig Gibeah, qaujenr ee sewbin jin' bingxlet; danrsi Benjaminlangg m jaix jaieh qaur lar.

35 Jehovah pah Benjamin dirr Islael ee binrjingg; hitt zit Islaellangg taii siw Benjamin nng-bxan go-cingx jit-vah langg, longxx si giac dyx :ee.

36 Benjaminlangg jiacc jaix inx ee siurr pah, in'ui Islaellangg tewniu Benjaminlangg, si uirdiyhh inx uaxkyr soxx sed dirr Gibeah ee hogvingx.

37 Baihok ee vxingx qinw qinw cuanr zip Gibeah; baihok ee vxingx jinwjingg ing dyx taii siw tong' sniaa ee langg.

38 Islaellangg qapp hogvingx u dairsingx iog jit xee qiwhy, dyrr si hro huexhunx dui' sniaa-lai cringr .kiw .laii.

39 Islaellangg dng' qaujenr ee sii uat dngw srinx; Benjaminlangg kixciuw taii siw Islaellangg, iokliok snax-jap xee, dyrr qongw, "Inx iuguann cincniu jingg vaiw taii sux dirr lanw ee binrjingg."

40 Dng' huexiam cincniu entiau dui' sniaa-diongx cringr .jnriu .kir ee sii, Benjaminlangg uat tauu knuar, knuar qnir tong' sniaa ee huexhunx duw tnix.

41 Islaellangg qycc uat dngw srinx. Benjaminlangg dyrr jin' gonggniac, in'ui knuar qnir jaieh qaur lar.

42 Soxiw inx dirr Islaellangg ee binrjingg uat dngw srinx ngr kongwiaw ee lo dyjauw; danrsi duizib inx jin' uaw, dui' hiaxee sniaa cud .laii .ee, inx longxx taii.

43 Inx uikunr Benjaminlangg, duizib inx, dirr inx hiyckax ee soxjai tunxdac inx, qaur Gibeah ee duiwbin, ngr zit cud ee soxjai.

44 Benjaminlangg siw :ee, u jit-bxan veh-cingx; jiaxee longxx si iongxsu. Qi'uu ee langg uat dngw srinx jauw kir kongwiaw, qaur Rlimmon ee jiyhvnuaa.

45 Islaellangg dirr duarlo nirr siusip inx go-cingx langg, cincniu kiyh behsed jidngiu; qycc duizib inx qaur Gidom, taii siw inx nng-cingx langg.

46 Hitt zit Benjaminlangg siw :ee, qiong nng-bxan go-cingx langg; hiaxee longxx si giac dyx ee iongxsu.

47 Dogdok lak-vah langg uat dngw srinx jauw kir kongwiaw, qaur Rlimmon ee jiyhvnuaa; dyrr diamr dirr Rlimmon ee jiyhvnuaa sir guehzit.

48 Islaellangg qycc uat dngw qongqig Benjaminlangg, ing dyx pah siw jiaxee sniaa-diongx ee langg qapp jingsnix, ixqip itcer soxx duw .diyc .ee; qycc itcer soxx qaur ee sniaa longxx ing huew siyx.

21 Islaellangg dirr Mizpah bad jiuwjua qongxx, "Guanw diongqanx byy jit langg beh qra jaboxqniaw qer hro Benjaminlangg."

2 Vecsnir laii qaur Betel, dirr hiax jre dirr Siongrder ee binrjingg, qaur ehngx, cud sniaa dua tikaur; qongw,

3 "Jehovah, Islael ee Siongrder ar, qinaxzit dirr Islael diongx qiamw jit jipair; Islael diongx sniaw su u jitt xee su ar?"

4 Qeh zit tniqngjaw vecsnir kiw .laii, dirr hiax kiw jit jxy dnxuaa, henr siyjer qapp ving'anjer.

5 Islaellangg qongw, "Dirr Islael jiongww jipair diongx, jirjui byy qapp huerjiongr jnriu kir Jehovah hiax?" In'ui inx dua jiuwjua qongxx, "Qniwnarr byy jnriu Mizpah qaur Jehovah ee binrjingg :ee, diyhh hro ix siw."

6 Islaellangg uirdiyhh inx ee hniadi Benjaminlangg tewhuew, qongw, "Qinaxzit Islael diongx juat jit jipair lar.

7 Lanw ixqing’ qiw Jehovah laii jiuwjua, byy beh ing jaboxqniaw qer inx, dnaxx dyrr inx soxx cunx ee langg, lanw beh dui' dyclyc hro inx u bow ar?"

8 Qycc qongw, "Islael jiaxee jipair diongx, dyclac jit xee byy jnriu Mezpah qaur Jehovah hiax?" Inx dyrr craa cud Gilead ee Jabes byy jit langg qaurr ngiaa-lai huerjiongr hiax.

9 In'ui diamxsngr vecsnir ee sii, hiaxee kiarkiw dirr Gilead ee Jabes ee langg, byy jit xee dirr hiax.

10 Huerjiongr dyrr crex jit-bxan nng-cingx dua lat ee iongxsu, huanhur inx qongxx, "Linw kir ing dyx taii siw kiarkiw dirr Gilead ee Jabes ee langg, ixqip hurzinlangg qapp ginxaw.

11 Linw soxx diyhh qniaa :ee dyrr si anxnix; diyhh jiong' itcer ee davolangg, qapp hiaxee bad qapp davolangg dangvangg ee jaboxlangg itjin taii siw."

12 Inx dirr Gilead ee Jabeslangg ee diongqanx duw diyc sir-vah xee bue qapp davolangg dangvangg ee jairsikluw; dyrr duar qaur Kanaan-de Siloh ee qunngiaa.

13 Juann hue crex langg qra Rlimmon jiyhvnuaa ee Benjaminlangg qongw, ing hyvingg ee ue vyr inx.

14 Hitt sii Benjaminlangg dyr .laii; Islaellangg dyrr jiong' soxx lauu hro ix uac lehh ee Gilead ee Jabes ee jaboxginxaw qer hro inx; iauxquxx byy qraur gxiac.

15 Vecsnir uirdiyhh Benjaminlangg dyrr tewhuew; in'ui Jehovah hro Islael ee jipair kih jit qag.

16 Hue-diongx ee diongxlyw qongw, "Benjamin diongx ee hurluw ixqing’ jaubet; dnaxx dyrr inx soxx cunx ee langg lanw beh dui' dyclyc hro inx u bow ar?"

17 Qycc qongw, "Benjamin dyjauw ee langg, iuguann diyhh u giap hro inx, benw did Islael diongx juat jit jipair.

18 Danrsi lanw be e jiong' qaqi ee jaboxginxaw hro inx juer bow; in'ui Islaellangg bad jiuwjua qongxx, 'Ing jaboxqniaw qer hro Benjaminlangg :ee, diyhh siurr jiuwjow.'"

19 Inx qycc qongw, "Dirr Lebonah ee lamsir, Betel ee vaksir, dyrr si dui' Betel kir Seqem duarlo dangsir ee Siloh, dagg nii u Jehovah ee jecqii."

20 Dyrr huanhur Benjaminlangg qongxx, "Linw diyhh kir, bih dirr pudyhngg diongx;

21 Narr knuar qnir Siloh ee jaboxginxaw cud laii tiauwbuw, linw diyhh dui' pudyhngg cud .laii, dirr Siloh ee luxjuw diongx dagg langg cniuw jit xee juer bow, dyr kir Benjamin-de.

22 Inx ee hurhingx narr laii duiww guanw qywsor, guanw beh duiww inx qongw, 'Cniaw linw duar diyc guanw, laii undenw inx'; in'ui jingg qaujenr ee sii, byy lauu jaboxginxaw hro inx dagg langg juer bow; dnaxx iarr m si linw hro inx; narr si, linw dyrr u jue."

23 Benjaminlangg dyrr jiauww anxnix qniaa, jiauww inx ee langgiac dui' tiauwbuw ee jaboxginxaw diongx soxx liac :ee crua inx juer bow, dyrr dyr kir inx vunxde; qycc kiw sniaa laii kiarkiw dirr hiax.

24 Hitt sii Islaellangg lirkuix hiax, dagg langg dyr kir inx ee jipair, inx ee jongjok; dui' hiax cud .laii .ee, dagg langg dyr kir inx vunxde.

25 Dng' hitt sii Islael diongx byy ongg; dagg langg jiauww ix soxx knuar juer driyc :ee laii qniaa.

huedngw tauu iac