Bang Jap Xia

(夢十夜)

derr zi xia

(第二夜)

Lu Juxbingg huan'ik

Lirkuix jurcii huesniu ee senvangg, en’ diyc hangrlo dngw laii qaur qaqi ee vangqingx. Vangqingx lai, dinglangw ee huexqngx venr qaxx amwlyy amwlyy.

Guaw dyrr jit kax qui dirr potuann dingw, jit kax vnuar uanx tner kiw sinkux, qra dingsimx vuew hro dit, hitt xee cniu ser luiw huex ee dinghiongx huexsimx buew “pok” jit sniax, lag dirr ju’angg ee dingsimdaii dingw, jiksii qui’ xee vangqingx dua dua qng’iam .kiw .laii.

Vangqingx ee juaxqecmngg dingxquann si Busong rue ee doo. Ox sig liuxciu sikdir u qau u vyc, rue qaxx hng qin jiokk hunbingg, qycc hex liac hii .ee qaxnaxx jin’ qnuaa ee kuanw, lxec-aw dir kix kix, dirr kevychnua dingw ban ban aw qniaa. Jitt vxag “hihux lim’uxhingg” si tong’ langg jaix ee doo.

Vangqingx viacqag dyc qaxx cunx jit sud aw ee snuawhniux iauxx dirr hiax siwsnuar ix ee pangbi. Sirngi kuah-bongxbongw, diwsuw siwqer diam-jiucjiuh, tniax byy vnuar diamw aw sniasueh.

Tenjniw dingw puu cud dinglangw ngii ngii ee ox ngiaw, dnax tauu knuar .kir, hex dingx-ngiaw iyy laii iyy kir, naxx cniu siaxmic uac tiaur tiaur ee iaxsiur.

Juser byy venr, jit kax qui, jit kax uanx, dyr ciuw qra potuann qngw .kiw .laii, jniar ciuw crunx zip kir bongx knuar bai, qajair, iauxx dirr guanvunw ee soxjai. Qacc si dilehh, simx dyrr anx ar.

Qra potuann congr huedngw guanlaii ee hxingg, langg ansimx aw jre .lyc .laii.

“Liw si jit xee buxsu. Qacc si buxsu, byy kaigno si vut’ingqaix,” huesniu anxnex qongw. “Dy’ jiokk quw ar, liw iauxx si byy kaigno. Guaw knuar liw m si buxsu, si jit xee huiwzinn. Hachah, sniurkir ar.” Huesniu naxx qongw naxx qra guaw tixciyr, “Narr qamxqag uixkud, cniaw tec cud liw kaigno ee jingwqir laii!” Qongw uann, uat tauu dyrr jauw. Jinjin huanx-qihqa!

Guaw itding beh dirr qecviah dua tnxiax ee viackamx lai hitt jiah sijingx xe huee qycc dann ee sii, kaigno hro linw knuar! Kaigno liauxau, ing’amr dyrr qycc zip kir huesniu ee senvangg, qra ix ee taukag quah .lyc .laii, qaungua guaw ee kaigno!

Narr byy kaigno, dyrr berdangr cruw huesniu ee snewmia, huanxdyxdngw si guaw rair siw. Anwjnuaw qongw? Byy kaingo si be ing .did? In’ui guaw si buxsu. Jit miaa buxsu, byy kaigno, sriu diyc buxziok, si byy lixiuu qycc uac .lyc .kir, diyh’air jursad, rair siw qaxx jin’ suixkuir, jin’ qongcaiw!

Dng’ guaw taukag lai anxnex decc sniu ee sii, ciuw qaxnaxx dirr byy diwqag diongx crunx zip kir potuann erbin, dirr hiax qra hitt qix dew dyx, lenrr ix guarbin ee angg sig dysiur qui’ xee tec .cud .laii, ciuxjiangw qra dyvner dne ann, hiongg hiongg dua cud lat, dew dyx vuec .cud .laii, dyvner danr duiww vnix:a kir.

Vinglingw dimwdauw ee dyx-srinx dirr amr-binbongx ee vangqingx lai, ciy cud jit sog qngngiaw, uanxzenn kutqiongg ee snewmia an’ guaw ee ciuw-diongx jauw .cud .kir! Qycc suar .lyc, juanvo jurjip dirr dyx-buew ee satkir kox uaw jyr jit diamw.

Guaw itsimx qra hex lrai-qiamwqiamr ee dyx-srinx knuar jyr cniu jiamtauu hiacc ser ee jit diamw. Dng’ guaw bagjiux giyw diyc jit qix qauw cunr go hunx dngg ee dew dyx ee siamxqngx, guaw hiongg hiongg sniu beh qra ix dua cud lat duc .cud .kir, luan huix, luan pud.

Jitt sii, juann sinkux ee hueh longxx hiongr diyc jniar ciuw ee ciuxuanw lrauu .laii. Ciuxjiangw dne ann ann ee dyvner ixqingx damm qaxx liamm-titix, guaw ee cuiwdunn marr decc kurku-junx. Qunxqaw ee simjingg quer u jit kunr ar jiacc dimm .lyc .laii.

Guaw qra dew dyx siux zip kir dysiur lairdew, giap dirr jniar ciuw vingg queclangkax, qycc suar .lyc, kaisiw dnaxjy camsenn.

Diyrjiux qongw “buu”, buu si siaxmic? Caur huesniu, cuir-lai kinx kinx aw ma jit sniax.

Camsenn byy zuarr quw, jingwtauu laii ar, guaw cuiwkiw aurjanx qa ann, pnirkangx cuanxkuir mew qycc siyx, taiwionghed diucdiuh-tniar, bagjiux tiw kuix u vingsiongg sii nng vue dua!

Knuar e diyc diauwdoo, knuar e diyc dinglangw, knuar e diyc tatami, marr knuar e diyc huesniu ee dua qngtauu, qycc kacc hiauhing :ee si tniax e diyc ix koghii dua ee cuir lic-saisaix, dirr hiax qra guaw tixciyr ee sniax. Huanx-qihqa! Huesniu sidjai si huanx-qihqa. Guaw byy qra ix ee taukag juii .lyc .laii si be ing .did.

Guaw beh kaigno, guaw beh kaigno, buu, buu, cuir-lai itdit huah buu, mrqycc snuawhniux ee pangbi iuguann ho’ngg pnri .diyc, jiauww qongw, sig-singx-hiongx-bi-ciog-huad ingwqaix longxx byy jiacc si buu, bogjenn anxnex dyrr m driyc.

Guaw hiongg hiongg quntaubuw dne ann, jringx duiww qaqi ee taukag, dyrr anxnex aurjanx cuiwkiw qa zuxx ann, nng vingg queclangkax ee qnua marr itdit lrauu byy tingg. Kajiacpniax venr qaxx cniu cakox hiacc dingrjnix, katauux limsii marr tniar .kiw .laii, sniu qongxx kaqud si m si dng .kir .ar?

Jongw .si, tniar iarr hyw, qankow iarr hyw, kaigno ee hitt hy qingxqair buu iuguann m laii. U sii sniu qongxx buu ixqingx cuthen ar, qycc suar .lyc suacc qui’ sinkux tniar qaxx m jaix langg.

Guaw jiokk sniurkir, jiokk auxnauw, jiokk m guan :ee, bagsaiw dua liap dua liap an’ bagqnii dinx .lyc .laii, sniu qongxx quikir langg longr duiww jiyhviah .kir, longr hro qui’ sinkux ee quttauu qapp bah longxx venr qaxx cruir-qoqoo. Sniu bongxx sniu, guaw iauxx si jre dirr potuann dingw, cai tringg tringg naxx jiyhdunx. Qra hex qiongbeh dongr be diauu ee qankow tangwtniar longxx lunw .lyc .laii.

Acc hex qankow tangwtniar dunw dirr hingkamw qapp vxag-lai qokk soxjai, itdit jngr kangx cue pang, beh an’ mngqngxkangx cringr .cud .laii, bygigo soxu ee mngqngxkangx longxx trad diauu lehh, cue byy cutkauw, sidjai si jiokk liongvue, jiokk cnicamw :ee.

Dyrr dirr jitt sii, taukag lai kiw jit jun ee venwhuar, hiaxee dinglangw, Busong ee rue, tatami, sinkamx jiongw jiongw knuar kiw laii naxx u qycc naxx byy, naxx byy qycc naxx u, acc mrqycc, buu ee qinxqair iuguann byy henxsi dirr binrjingg, guaw si qycc jaiww jit crur vec jyr qangx, bongxx jre bongxx camx, qeqiamw dirr hiax cai vnuar vox nia.

Hionghiongg jitt sii, qecviah qingx sijingx “dangxxx” dann jit sniax, guaw suacc gang .jit .dah .quw .ar, suar .lyc, jniar ciuw qra dew dyx sax lehh, qecviah sijingx iurqycc dann jit sniax.

guanjokjiaw: Natsume Soseki 夏目漱石