SXINGR PAUL SIAW HRO KOLINTOLANGG EE DERR ZI DNIUX PUEX
1 Dui' Siongrder ee jixir juer Krist Jesus ee suwdoo Paul, qapp hniadi Timoti, puex qiar hro Siongrder ee qauwhue dirr Kolinto :ee, ixqip venww Aqaia longxjongw ee singwdoo:
2 Guan linw dui' lanw ee Ve Siongrder qapp Jruw Jesus Krist did diyc undenw ving'anx.
3 Guan lanw ee Jruw Jesus Krist ee Siongrder, iarr si Ix ee Ve, dyrr si linbinw ee Ve, sniuxsur dagg ngiu an'uir ee Siongrder, did diyc ylyw.
4 Guanw dirr dagg ngiu huanrlan diongx, Ix an'uir guanw, beh hro guanw dui' Siongrder soxx an'uir guanw ee an'uir, laii an'uir dagg ngiu huanrlan diongx ee langg.
5 In'ui cincniu Krist ee qankow muaw .cud .laii qaur dirr guanw, guanw ee an'uir iarr dui' Krist muaw muaw.
6 Guanw siurr huanrlan, si beh juer linw siurr an'uir qapp did qiur ee loring; siurr an'uir, si beh juer linw siurr an'uir ee loring; jitt xee an'uir hro linw e tunlunw qankow, jiauww guanw soxx duw .diyc ee jidngiu.
7 Qycc guanw soxx ter linw ngwbang :ee si qenqor, in'ui jaix linw qiwzenn u hxun dirr jiaxee qankow, iarr anxnix u hxun dirr an'uir.
8 Hniadi ar, lun qaur guanw dirr Asia soxx duw .diyc ee huanrlan, guanw m rair linw m jaix, dyrr si guaw siurr decdang jin' tiamw qaur drngx be kiw, lenrr uac iarr byy ngwbang;
9 Guanw qaqi simlai iarr anwsngr e siw, beh hro guanw byy uaxkyr qaqi, dogdok uaxkyr hro sixlangg qycc uac ee Siongrder.
10 Ix ixqing’ qiur guanw tuatli hiacc dua ee sixbyy, qycc beh qiur guanw; guanw iarr ngwbang Ix iauxx beh qiur guanw.
11 Linw iarr ing qidyw laii vangjan guanw, beh hro jerje langg in'ui guanw laii qamxsia, dyrr si uirdiyhh guanw dui' jerje langg qidyw soxx did .diyc ee xunx.
12 In'ui guanw soxx kuakauw :ee, guanw ee liongsimx iarr juer guanw ee qanjingr, dyrr si guanw jiauww Siongrder ee singwqed qapp singsit, m si ing ziogtew ee diwhui, si ing Siongrder ee xunx ongxlaii dirr sewqanx; duiww linw qyckacc si anxnix.
13 In'ui guanw soxx siaw hro linw :ee byy vadd hxang, dogdok dyrr si linw soxx tak, soxx jaix :ee, guaw iarr ngwbang linw qaur buew beh e jaix;
14 Cincniu linw diongqanx u langg jaix guanw, dirr lanw ee Jruw Jesus ee zit, liac guanw juer linw ee kuakauw, cincniu guanw iarr liac linw juer guanw ee kuakauw.
15 Guaw in'ui sinr anxnix, vunw gixdnia beh dairsingx jiurqin linw, hro linw dingjaiww did diyc lirig;
16 Iarr rair dui' linw hiax qingquer kir Macedonia, qycc dui' Macedonia kir linw hiax, hro linw sangr guaw kir Judea.
17 Guaw ixqing’ gixdnia anxnix, qamxx u ing pupiyr mah? Iacc si guaw soxx gixdnia :ee si jiauww ziogtew laii gixdnia, drir qaur guaw u hitt xee Si, dyrr Si, iarr u hitt xee M si, dyrr M si mah?
18 Siongrder si sinwsit, anxnix guaw soxx duiww linw qongw ee ue iarr byy u Si qapp M si.
19 In'ui dui' guanw jiaxee, dyrr si dui' guaw, Silvanus, qapp Timoti, dirr linw diongqanx soxx tuann Siongrder ee Qniaw Jesus Krist, byy u Si qapp M si, jairdirr Ix jixu Si nardnia.
20 In'ui Siongrder soxx ingwunw :ee, bylun zuarr je, jairdirr Ix longxx u Si; soxiw Amen iarr si dui' Ix, hro Siongrder dui' lanw did diyc ingqngx.
21 Dnaxx qenqor guanw qapp linw dirr Krist, qycc ing iuu buah lanw :ee, si Siongrder;
22 Ix iarr qra lanw kamr inr, qycc sniuxsur Sinn dirr lanw ee simx juer dnia.
23 Guaw qiw guaw ee uahmia qriuu Siongrder juer qanjingr, guaw byy qycc qaur Kolinto si in'ui kuan'iongg linw.
24 Guanw m si decc quanxhad linw ee sinr, si vangjan linw hnuahiw; in'ui linw dui' sinr laii kia jai.
2 Guaw bad qaqi quatduan byy qycc ing iubun jiurqin linw.
2 In'ui guaw narr hro linw iubun, dyrr guaw soxx hro ix iubun :ee ixgua, jirjui hro guaw hnuahiw ar?
3 Jingg guaw siaw hitt xee hro linw, benw did guaw laii ee sii, soxx ingqaix hro guaw hnuahiw :ee huanxdngw hro guaw iubun; in'ui guaw cimx sinr linw jiongww langg longxx liac guaw ee hnuahiw juer linw jiongww langg ee.
4 Jingg guaw simlai koxtangr vikced, lrauu jerje bagsaiw siaw puex hro linw, m si beh hro linw iubun, si beh hro linw jaix guaw ee tniar linw si jin' dua.
5 Narr u hro langg inbun :ee, ix m si hro guaw iubun nardnia, iarr dairliok si hro linw jiongww langg iubun, benw did guaw jikvi sniu' dang.
6 Cincniu jitt hy langg dui' hiacc je langg soxx sriu ee jikhuat ixqing’ qauwgiac.
7 Soxiw huanxdngw diyhh siawbenw ix, an'uir ix kacc ngiaa; qniax hitt hy langg iubun quewtauu drir qaur juadbang.
8 Soxiw guaw krngr linw, ing sidsit ee vinqir duiww ix henxbingg linw ee zin'air.
9 In'ui anxnix, guaw iarr bad siaw puex laii ciwgiam linw, knuar linw huanrsu u sunrtanr iacc byy.
10 Linw siawbenw simxmih langg, guaw iarr siawbenw ix. Guaw narr u siawbenw simxmih, si uirdiyhh linw dirr Krist ee binrjingg laii siawbenw :ee,
11 Benw did lanw hro Satan kacc pnitauu .kir; in'ui lanw m si m jaix ix ee qewboo.
12 Jingg guaw uirdiyhh Krist ee hok'imx qaur Tloas, Jruw iarr qra guaw kuix mngg.
13 Danrsi byy duw diyc guaw ee hniadi Titus, soxiw guaw ee simsinn byy ving'anx, dyrr lirvet inx kir Macedonia.
14 Dnaxx qamxsia Siongrder, siongsiongg dirr Krist diksingr, laii juer tauu cua guanw, iarr ing guanw dirr dagg soxjai henxbingg hitt xee dui' bad Krist jiacc u ee kiwbi.
15 In'ui duiww dirr Siongrder, guanw dirr did qiur ee langg ee diongqanx ixqip dimlunn ee langg ee diongqanx, juer Krist ee pangbi.
16 Dui' jiaxee langg, si juer dui' siw drir qaur siw ee bi; dui' hiaxee si juer uac drir qaur uac ee bi. Jiaxee su jirjui e kamx did drngx?
17 In'ui guanw byy cincniu jerje langg hunrjap Siongrder ee dyrliw, si ing singsit duiww Siongrder, dirr Siongrder ee binrjingg diamr dirr Krist laii qongw.
3 Guanw qamxx si jitt diap jiacqycc qaqi quxjenr mah? Iacc si cincniu vadd langg kiamwing langg' ee tuijenwpuex hro linw, iacc si kiamwing linw ee tuijenwpuex hro vadd langg ar?
2 Linw dyrr si guanw ee puex, siaw dirr guanw ee simx, hro jiongww langg soxx jaix, soxx tak :ee.
3 Linw si Krist ee puex, dui' guanw ee qangx laii jniaa :ee, m si ing bxak siaw :ee, si ing jin'uac Siongrder ee Sinn; m si siaw dirr jiyhvix, si siaw dirr ziogtew ee simvix.
4 Guanw uaxkyr Krist ngr Siongrder u jitt hy ee sinr.
5 M si qongxx guanw qaqi e kamx did qaqi laii sniu cud simxmih, guanw soxiw e kamx .did si dui' Siongrder;
6 Ix iarr hro guanw e kamx did damdngx sinx iog ee ce'ing, m si bunzi :ee, si sinlingg :ee; in'ui bunzi drir qaur siw, sinlingg drir qaur uac.
7 Moses ee bin ee ingqngx si jiamrjiam sueter :ee, Islaellangg iauxx si be e juwbak knuar ix ee bin; dnaxx drir qaur siw ee jithun, hitt hy ing zri kig dirr jiyc nirr :ee siongrcniaw u ingqngx,
8 Hyhongw sinlingg ee jithun qamxx byy qyckacc u ingqngx mah?
9 In'ui dring jue ee jithun qiwzenn ingqngx, dyrr drir qaur gi ee jithun, ix ee ingqngx qyckacc ciongmuaw.
10 Jingg soxx sriu ingqngx :ee, in'ui jitt xee kacc dua ee ingqngx, dyrr byy ingqngx.
11 In'ui sueter :ee narr u ingqngx, dyrr hitt xee quxdngg dilehh :ee qyckacc u ingqngx.
12 Guanw qiwzenn u jitt hy ee ngwbang, soxiw jin' hyxdnaw laii qongw,
13 Byy cincniu Moses ing puer dar ix ee bin, hro Islaellangg berdid tangx juwbak knuar qaur hitt xee decc sueter :ee ee qetqiok.
14 Danrsi inx ee simx vnir juer gni, qaur dirr qinaxzit, inx tak Qu Iog ee sii, hitt xee puer iuguann dilehh, byy henx .kuix; jitt xee puer dui' Krist dyrr hruer .kir.
15 Danrsi qaur qinaxzit, vutlun simxmih sii inx tak Moses ee ceh, puer iauxquxx dirr inx ee simx.
16 Dogdok vutlun simxmih sii inx qui'ngr Jruw, puer dyrr druu .kir.
17 Dnaxx Jruw dyrr si hitt xee Sinn; Jruw ee Sinn dirr hitt xui, hitt xui dyrr juriuu.
18 Lanw jiongww langg ee bin byy dar puer, cincniu qniar dyr jiyr Jruw ee ingqngx, longxx venwhuar juer Ix ee sxiong, dui' ingqngx qaur ingqngx, cincniu dui' Jruw, dyrr si Sinn, anxnix.
4 Soxiw guanw qiwzenn u jitt xee jithun, jiauww soxx did .diyc ee linbinw, dyrr byy luexjir.
2 Kiwsag qenwsiaur ee amwsu, byy qniaa dirr kuixked, byy hunrjap Siongrder ee dyrliw, dyrr si henxbingg jinliw, dirr Siongrder ee binrjingg, jiong' qaqi jingwbingg dirr dagg langg ee liongsimx.
3 Narr guanw ee hok'imx u soxx ziakamr, dyrr si ziakamr dirr dimlunn ee langg.
4 Dirr inx diongqanx, jitt sewqair ee siongrder hro m sinr ee langg ee simx cnimii, benw did Krist inghenw ee hok'imx ee qngx jiyr inx; Krist dyrr si Siongrder ee sxiong.
5 Guanw byy tuann qaqi, si tuann Krist Jesus juer Jruw, qycc vunxsinx uirdiyhh Jesus juer linw ee lovok.
6 Siongrder bad qongw, qngx diyhh dui' amr nirr cud .laii, Ix iarr u jiyr dirr guanw ee simx, hro guanw dui' bad Siongrder ee inghenw :ee, laii did diyc qngx.
7 Guanw u jitt hy vyxvuer kngr dirr too juer :ee ee kiwqu, si beh hro qik dua ee quanlingg juer Siongrder ee, m si cud dirr guanw.
8 Guanw huanrsu siurr huanrlan, danrsi byy kunwvig; uilann, iarr byy sitbang;
9 Duw diyc kunxdiok, iarr byy siurr vangwsag; siurr pah dyw, iarr byy sixbyy;
10 Sinkux siongsiongg duar Jesus ee siw, hro Jesus ee uac iarr e henxbingg dirr guanw ee sinkux.
11 In'ui guanw jiaxee uac :ee dniardnia uirdiyhh Jesus laii qauhur dirr siw, hro Jesus ee uac iarr e henxbingg dirr guanw e siw ee ziogtew.
12 Anxnix dyrr siw ee lat qniaa dirr guanw, uac ee lat qniaa dirr linw.
13 Jongwsirr guanw ixqing’ u jitt xee sinr ee sinn, duxduxx jiauww soxx qiwjair qongxx, "Guaw u sinr, soxiw u qongw." Guanw iarr sinr, soxiw iarr qongw.
14 Qaqi jaix hro Jruw Jesus qycc uac :ee iarr beh hro guanw qapp Jesus qycc uac, qycc beh inxjinr guanw qapp linw snaqab kia dirr Ix ee binrjingg.
15 In'ui banrhang su longxx si uirdiyhh linw; beh hro undenw dui' langg naxx je laii naxx qetnix, dyrr hro qamxsia ithuad ciongmuaw, drir qaur Siongrder did diyc ingqngx.
16 Soxiw guanw byy luexjir; guanw ee guartew suizenn vairhuai, danrsi guanw ee lairsimx zidzit nguarsinx.
17 Guanw bak nih quw kinx kinx ee qankow si qra guanw jniaa siongrr dingxsiong ingxuanw ee dua ingqngx.
18 Guanw m si knuar dirr soxx e knuar .qnir .ee, si knuar dirr soxx be knuar .qnir .ee; in'ui soxx e knuar .qnir .ee si jiamrsii, soxx be knuar .qnir .ee si ingxuanw.
5 In'ui guanw jaix guanw dirr de nirr ee vowvnii ee cur narr huixhuai, dyrr e did .diyc dui' Siongrder soxx kixjy ee cur, m si langg ee ciuw soxx jy :ee, si ingxuanw dirr tnix nirr ee cur.
2 In'ui guanw diamr dirr jitt xee vowvnii decc trow kuir, vutjiw himbo guanw dui' tnix nirr ee cur, cincniu snxax tac .lyc .kir.
3 Narr did diyc cing, dyrr benw tngwvakteh.
4 In'ui guanw diamr dirr jitt xee vowvnii :ee decc tuabuaa trow kuir, m si rair trngr .kiw .laii, si rair tac .lyc .kir, drir qaur hitt xee e siw :ee hro uac tunx .lyc .kir.
5 Dnaxx virvan guanw did diyc jitt xee :ee dyrr si Siongrder. Ix iarr ing Ix ee Sinn juer dnia hro lanw.
6 Soxiw guanw siongsiongg hyxdnaw, jaix guanw diamr dirr sinkux dyrr si qapp Jruw sna' li.
7 In'ui guanw decc qniaa, si dui' sinr, m si dui' soxx knuar.
8 Anxnix guanw hyxdnaw, iarr qyckacc hnuahiw lirkuix sinkux, qapp Jruw snaqab diamr.
9 Soxiw, bylun diamr dirr sinkux iacc si lirkuix sinkux, guanw soxx diwir :ee, si hro Ix hnuahiw.
10 In'ui lanw jiongww langg dikkag diyhh henxbingg dirr Krist ee qongjy jingg, hro dagg langg jiauww ix dui' sinkux soxx qniaa ee dairjir, hyw :ee iacc pnaiw :ee, laii siurr vywingr.
11 Soxiw guanw qiwzenn jaix Jruw si tangx qnia'uir :ee, dyrr koxkngr langg. Danrsi guanw ixqing’ henxbingg dirr Siongrder, guaw iarr ngwbang u henxbingg dirr linw ee liongsimx.
12 Guanw m si qycc qaqi duiww linw jingwbingg, si hro linw uirdiyhh guanw u tangx kuakauw ee soxjai, tangx rinr hiaxee jiauww guarmau byy jiauww lairsimx kuakauw ee langg.
13 In'ui guanw narr qongg, si uirdiyhh Siongrder; narr jurjai, si uirdiyhh linw.
14 Krist ee tniawtangr cuivig guanw, in'ui guanw jaix jit langg ter jiongww langg siw, dyrr jiongww langg longxx siw;
15 Qycc Ix ter jiongww langg siw, si beh hro jiaxee uac ee langg ixau byy uirdiyhh qaqi laii uac, si uirdiyhh ter inx siw laii qycc uac :ee.
16 Soxiw guanw dui' dnaxx ixau byy jiauww ziogtew bad langg; suizenn bad jiauww ziogtew bad Krist, dnaxx ixau byy qycc anxnix bad Ix.
17 Soxiw langg narr diamrr dirr Krist, dyrr si juer sinx congwjy :ee, qu ee dairjir ixqing’ quer .kir, dnaxx longxx vnir jniaa sinx :ee.
18 Qycc banrhang su longxx si cud dirr Siongrder, Ix dui' Krist hro lanw qapp Ix qycc hxyy, iarr jiong' jitt xee krngr langg qapp Siongrder qycc hxyy ee jithun hro guanw;
19 Dyrr si Siongrder diamr dirr Krist hro sewqanx qapp Ix qycc hxyy, byy jiong' inx ee juerquar qruix dirr inx, iarr jiong' qycc hxyy ee dyrliw qautog guanw.
20 Anxnix guanw uirdiyhh Krist juer kimcex, cincniu Siongrder ing guanw krngr linw; guanw uirdiyhh Krist qriuu linw qapp Siongrder qycc hxyy.
21 Siongrder hro hitt xee byy jue :ee ter lanw jniaa juer jue, si beh hro lanw diamr dirr Ix laii jniaa juer Siongrder ee gi.
6 Guanw qapp Jruw dangjee diyhbuaa :ee iarr krngr linw m tangx kangx kangx siurr Siongrder ee xunx;
2 In'ui Ix qongw, "Dirr did diyc jiaplap ee sii, Guaw u tniax liw; dirr jinxqiur ee zit, Guaw u vangjan liw." Knuar ar, jitt diap si siurr jiaplap ee sii; knuar ar, jitt diap si jinxqiur ee zit.
3 Guanw itkair byy tatgai langg, benw did jitt xee jithun huanrhiamm;
4 Huanrsu jingwbingg vunxsinx hap dirr jerje tunlunw, huanrlan, kiamwkueh, kunwvig,
5 Siurr pah, qnuaiqnax, ziauxluan, diyhbuaa, byy kunr, byy jiac,
6 Liamqed, diwsig, kuan'iongg, zinjuu, Singwsinn ee qamxhuar, byy qew ee tniar,
7 Jinliw ee dy, Siongrder ee quanlingg, ing gi ee jenwkir dirr jyxiu,
8 Bylun ingqngx, lingziok, pnaiw miasniax, hyw miasniax; cincniu pnaiw langg :ee, qisit si singsit :ee;
9 Qaxnaxx langg m jaix, qisit jerje langg jaix; qaxnaxx beh siw, qisit si uac; qaxnaxx siurr jikhuat, qisit byy drir qaur siw;
10 Qaxnaxx huanlyw, qisit siongsiongg kuaiwlok; qaxnaxx songwhiongx, qisit hro jerje langg vur; qaxnaxx byy u, qisit si byy byy u.
11 Kolintolangg ar, guanw ngr linw cuir kuix kuix, simx kuah kuah.
12 M si dui' guanw hro linw ehdec, si dirr linw ee simx qaqi ehdec.
13 Dnaxx linw diyhh yc jitt xee kuanw, qaqi kuikuah laii vywdab guanw; guaw qongw anxnix, si cincniu duiww qaqi ee sewqniaw laii qongw.
14 Byc did qapp m sinr ee langg juer pnua, in'ui gi qapp vutgi u simxmih siongtongx? Qngx qapp amr u simxmih qauvuee?
15 Krist qapp Belial u simxmih hyhap? Sinr qapp m sinr u simxmih qansiap?
16 Siongrder ee dxen qapp gnoxsiong u simxmih snadangg? In'ui lanw si jin'uac Siongrder ee dxen; cincniu Siongrder u qongw, "Guaw beh kiarkiw dirr inx diongqanx, qnia'iuu dirr inx diongqanx; Guaw beh juer inx ee Siongrder, inx iarr beh juer Guaw ee vecsnir."
17 Soxiw jiauww Jruw soxx qongw :ee, "Linw diyhh dui' inx diongqanx cud .laii, qaqi hunvet, byc did bongx byy cingkir ee mic, Guaw dyrr jiaplap linw.
18 Guaw beh juer linw ee Ve, linw beh juer Guaw ee qniaw, jaboxqniaw." Jex si juanlingg ee Jruw qongw :ee.
7 Soxx tniar ee hniadi ar, qiwzenn u jiaxee ingwunw, lanw diyhh cingkir vunxsinx, druu kir itcer ziogtew qapp sinn ee lasamm, qnia'uir Siongrder, laii uanjuann jniaa sxingr.
2 Diyhh kuikuah linw ee simx, laii jiaplap guanw. Guanw m bad kikkuix langg, m bad sunxhuai langg, m bad pnix langg.
3 Guaw qongw anxnix m si beh jikjue linw, in'ui guaw ixqing’ u qongw, linw dirr guaw ee simtauu, dangjee siw dangjee uac.
4 Guaw ngr dirr linw dua hyxdnaw, guaw uirdiyhh linw dua kuakauw. Guaw muaxsimx did diyc an'uir; dirr guanw itcer huanrlan diongx, guaw u qikgua ee hnuahiw.
5 In'ui guanw laii qaur Macedonia ee sii, guanw ee ziogtew longxx byy ving'anx, huanrsu duw diyc huanrlan, guarbin u sna' jnex, lairbin u qniax.
6 Jongwsirr hex an'uir vibii ee langg :ee, dyrr si Siongrder, ing Titus ee qauwui laii an'uir guanw.
7 M na ing ix qauwui, qycc ing ix dui' linw soxx sriu ee an'uir laii an'uir guanw, in'ui ix jiong' linw ee luanbo, linw ee aisiongx, linw ngr dirr guaw ee zedsimx, qra guanw qongw, drir qaur guaw ithuad hnuahiw.
8 Guaw bad ing puex hro linw huanlyw, jingg suizenn u m quewsimx, dnaxx dyrr byy lar; in'ui guaw knuar hitt dniux puex hro linw huanlyw :ee, vutqyr si jiamrsii.
9 Dnaxx guaw hnuahiw, m si in'ui linw huanlyw, si in'ui linw u dui' huanlyw drir qaur huanxhuew. In'ui linw huanlyw si sun Siongrder, hro linw byy jit hxang dui' guanw siurr kikkuix.
10 In'ui sun Siongrder ee huanlyw snix cud huanxhuew, drir qaur did diyc qiur, byy u au .laii ee tewhuew; sewqanx ee huanlyw si drir qaur siw.
11 Linw knuar, linw sun Siongrder laii huanlyw, dirr linw u snix cud zuarr dua ee unkunn, jnaixngiu ee qaqi hunsor, jnaixngiu ee uanwcueh, jnaixngiu ee qniahniaa, jnaixngiu ee luanbo, jnaixngiu ee zedsimx, jnaixngiu ee jikhuat. Linw dirr jitt jann su ixqing’ dagg hxang viauxbingg qaqi si cingkir.
12 Guaw jingg suibongw siaw puex hro linw, m si uirdiyhh hitt xee kikkuix langg :ee, iarr m si uirdiyhh hitt xee siurr kikkuix :ee, si beh hro linw uirdiyhh guanw ee unkunn, dirr Siongrder ee binrjingg, duiww linw henxbingg.
13 Soxiw guanw ixqing’ siurr an'uir; qycc dirr an'uir diongx, Titus ee simx hnuahiw, in'ui ix dui' linw jiongww langg laii did diyc anhiyh, guanw ee hnuahiw dyrr ithuad ciongmuaw.
14 Guaw narr bad duiww ix kuakauw linw simxmih dairjir, iarr dyrr byy qenwsiaur. In'ui guanw duiww Titus soxx kuakauw linw ee ue si jinsit, cincniu guanw duiww linw soxx qongw ee ue iarr longxx si jinsit.
15 Qycc ix suliam linw ee sunrhok, ing qniahniaa gniauhgniauc cuah jiaplap ix, ix ee simx dyrr ithuad ngr dirr linw.
16 Dnaxx guaw hnuahiw, in'ui lun qaur linw, guaw huanrsu e vangwsimx .did.
8 Hniadi ar, guanw jiong' Siongrder soxx sniuxsur dirr Macedonia jiaxee qauwhue ee xunx vyr linw jaix,
2 Dyrr si dirr huanrlan diongx siurr dua ciwlen ee sii, inx ee dua hnuahiw, qapp inx ee qik songwhiongx, u qikgua jniaa inx dua dua ee hyw simx.
3 In'ui guaw qanjingr inx qaqi qamguan jiauww inx ee ligliong, qycc quewtauu dirr inx ee ligliong,
4 Kunxced qriuu guanw hro inx did diyc jitt xee xunx, laii snaqab u hxun dirr hogsai singwdoo.
5 Qycc m na jiauww guanw soxx ngwbang, dyrr si dairsingx jiong' vunxsinx henr hro Jruw, iarr dui' Siongrder ee jixir henr hro guanw.
6 Soxiw guanw krngr Titus, ix qiwzenn u teciongr jitt xee unhui dirr linw diongqanx, dyrr diyhh jiauww anxnix hro ix jniaa.
7 Dnaxx linw dirr huanrsu, cincniu sinwsimx, kauxjaii, diwsig, longxjongw ee zedsimx, ixqip linw ee tniar guanw, jiaxee su qiwzenn ciongmuaw, dyrr dirr jitt xee unhui iarr diyhh ciongmuaw.
8 Guaw qongw anxnix, m si bingrling linw, si dui' vadd langg ee unkunn laii ciwgiam linw zin'air ee sidjai.
9 In'ui linw jaix lanw ee Jruw Jesus Krist ee xunx; Ix vunw hyxgiac, uirdiyhh linw jniaa juer songwhiongx, beh hro linw dui' Ix ee songwhiongx laii jniaa juer hyxgiac.
10 Guaw dirr jitt jann su jiong' guaw ee iwqenr hro linw jaix; in'ui jex u lirig linw; linw dui' qurnii ixqing’ teciongr jitt xee su, m na juer jingg qniaa, iarr juer jingg qamguan.
11 Dnaxx diyhh juewjniaa jitt xee su, drir qaur linw qiwzenn u zedsimx ee qamguan, iarr diyhh jiauww soxx u :ee laii jniaa ix.
12 In'ui ixqing’ u jitt hy zedsimx, dyrr did diyc jiaplap, si jiauww langg soxx u :ee, m si jiauww langg soxx byy :ee.
13 Kiokk m si rair vadd langg liaurling, hro linw haddat,
14 Si rair did vnivnii; henrsii jiong' linw u cunx :ee vow inx ee byy qraur, tangx jiong' inx u cunx :ee vow linw ee byy qraur, anxnix jiacc e vnii;
15 Jiauww soxx qiwjair qongxx, "Kiyh je :ee byy cunx, kiyh jiyw :ee byy kiamr."
16 Qamxsia Siongrder hro Titus ee simx vnivnii uirdiyhh linw unkunn.
17 Ix u siurr guanw ee koxkngr, danrsi ix vunxzenn dyrr jin' unkunn, qaqi qamguan kir cue linw.
18 Guaw iarr crex jit xee hniadi qapp ix kir, dyrr si dirr hok'imx u hro jiongww qauwhue ylyw :ee;
19 M na anxnix, iarr si jiaxee qauwhue soxx qingxsuanw qapp guanw cud mngg draur liaurliw guanw soxx decc vran ee unhui, laii viauxbingg Jruw ee ingqngx qapp guanw ee qamguan.
20 Jex si dihongg langg uirdiyhh guanw soxx liaurliw ee jerje ginn laii hiamm guanw;
21 In'ui guanw doboo hyw su, m na dirr Jruw ee binrjingg, iarr si dirr langg ee binrjingg.
22 Qycc crex guanw ee hniadi ee jit langg qapp inx kir, guanw dirr jerje su bad jerje vaiw ciwgiam ix, jaix ix ee unkunn, dnaxx in'ui cimx sinr linw, dyrr qyckacc unkunn.
23 Lun qaur Titus, ix si guaw ee dangpnua, uirdiyhh linw laii snaqab diyhbuaa :ee. Lun qaur guanw jiaxee hniadi, inx si jiaxee qauwhue ee suwjiaw, iarr si Krist ee ingqngx.
24 Soxiw dirr jiaxee qauwhue ee binrjingg, linw diyhh duiww inx henxbingg linw ee ju'air ee vinqir, iarr henxbingg guanw uirdiyhh linw soxx kuakauw :ee si sidjai.
9 Lun qaur hogsai singwdoo ee su, guaw siaw puex hro linw sngr si qex qangx.
2 In'ui guaw jaix linw ee zedsimx, jiacc jiong' jitt xee, duiww Macedonialangg kuakauw, qongw Aqaia dui' qurnii ixqing’ ven; qycc linw ee zedsimx u qamxdong jerje langg.
3 Jongwsirr guaw crex jiaxee hniadi, hro linw singx virvan, jiauww guaw soxx qongw, benw did guanw dirr jitt xee su soxx uirdiyhh linw kuakauw :ee qruix dirr kangx kangx;
4 Qniax u Macedonialangg qapp guaw laii, knuar qnir linw bue u ven, guanw dyrr uirdiyhh cimx sinr linw drir qaur qenwsiaur; linw ee qenwsiaur, guaw qyckacc benw qongw.
5 Soxiw guaw sniu dikkag diyhh krngr jiaxee hniadi liongrjaw kir linw hiax, laii dairsingx kingg linw jingg soxx rinw ee unhui, tangx henxbingg linw ee virvan si dui' unhui, m si dui' benxqiongw.
6 Danrsi guaw qongw, "Jiyw jingr :ee, jiyw siux; je jingr :ee, je siux."
7 Dagg langg jiauww ix simlai soxx u dniardiyc :ee, byc did huanlyw, byc did benxqiongw; in'ui hnuahiw tec .cud .ee, Siongrder tniar ix.
8 Qycc Siongrder e hro dagg hxang ee undenw ciongmuaw qaur dirr linw, hro linw huanrsu siongsiongg ciongjiog, tangx qniaa dagg hxang ee hyw su u qaur muaw muaw;
9 Jiauww soxx qiwjair qongxx, "Ix u dua siaxsir, Ix u jinxjer songwhionglangg, Ix ee gi ingxingw dilehh."
10 Qycc sniuxsur jingxjiw hro ia :ee, iarr sniuxsur bixniuu hro langg jiac :ee ee Siongrder, Ix beh sniuxsur linw tangx ia ee jingxjiw jerje, iarr beh qetnix linw qniaa gi ee quexjiw,
11 Hro linw huanrsu ciongjiog, qaur u dagg ngiu ee hyw simx, jitt xee hyxsimx dyrr si tokdiong guanw laii, drir qaur langg qamxsia Siongrder :ee.
12 In'ui jitt xee hogsai ee qangx m si voxjiog singwdoo ee kiamwkueh nardnia, qycc suar e hro jerje langg qamxsia Siongrder.
13 Inx dui' jitt xee qangx ee qinggiam laii qruix ingqngx Siongrder, si in'ui linw singzin Krist ee hok'imx laii sunrhok, qycc in'ui linw hyxsimx kuanxtai inx qapp jiongww langg;
14 Qycc inx uirdiyhh Siongrder soxx sniuxsur linw qik dua ee xunx, ter linw qidyw, laii luanbo linw.
15 Qamxsia Siongrder, uirdiyhh Ix qongw be jin ee unsur.
10 Guaw Paul, sna' qniwbin ee sii dyrr dirr linw diongqanx juer vibii, sna' lirkuix ee sii dyrr ngr linw juer hyxdnaw :ee, dnaxx ing Krist ee unziuu, sunliongg, qaqi krngr linw.
2 U langg pacsngr guanw si jiauww ziogtew laii qniaa, guaw pacsngr quat'ir diyhh ing hyxdnaw laii vran inx; qriuu linw byc did hro guaw dirr sna' duiwbin ee sii u jitt hy quat'ir ee hyxdnaw.
3 In'ui guanw suizenn dirr ziogtew laii qniaa, m si jiauww ziogtew laii qaujenr.
4 In'ui guanw qaujenr ee kiwqu m si sriok dirr ziogtew, si dirr Siongrder ee binrjingg u kuiwlat qauwgiac tangx laii qongr puar jiaxee qenqor ee ngiaje,
5 Huanrnarr jiaxee qewboo, ixqip longxjongw quann quann ee mic, soxx quw kiw laii joxdongr langg bad Siongrder :ee, guanw longxx huixhuai ix, jiong' longxjongw ee liamrtauu liac laii hro ix sunrhok Krist,
6 Qycc ixqing’ virvan ven, tingwhau linw uanjuann sunrhok, jiacc laii jikhuat longxjongw ee byy sunrhok :ee.
7 Linw knuar ganxjenn ar. Narr u langg kyr qaqi si sriok Krist :ee, ix diyhh qycc qaqi sniu, knuar ix jnaixngiu sriok Krist, guanw iarr si anxnix.
8 Jruw soxx sniuxsur guanw ee qxuann si beh qenwlip linw, m si beh vairhuai linw; guanw dyrr narr uirdiyhh jitt xee qxuann liyc aw quewtauu kuakauw, iarr vutdir qenwsiaur;
9 Guaw qongw anxnix, benw did linw liac juer guaw ing puex qra linw qniax.
10 In'ui u langg qongw, "Ix ee puex dingrdiong, qycc u lat; narr si sna' duiwbin ee sii, sinkux nngxjniaw, qongxue siyc siyc."
11 Hitt hy langg diyhh sniu, guanw sna' lirkuix ee sii, puex nirr qongxue si simxmih kuanw, sna' duiwbin ee sii, juer su iarr si anxnix.
12 U langg qaqi ylyw, guanw m qnaw qapp inx liac vnii, qapp inx vixping; danrsi inx ing qaqi puepingg qaqi, si byy diwsig.
13 Guanw byy beh kuakauw quewhun ee su, si jiauww Siongrder soxx pair hro guanw hanrdnia ee hunrgiac; jitt xee hunrgiac linw iarr jairlai.
14 Guanw m si vnuaa quer hxun, naxx cincniu byy ingqaix qaur dirr linw :ee; si in'ui guanw tuann Krist ee hok'imx jaw dyrr bad qaur dirr linw.
15 Guanw m si quewhun laii kuakauw vadd langg ee diyhbuaa, si ngwbang linw sinr naxx cimx, dyrr guanw dirr linw diongqanx jiauww guanw ee hunrgiac e kuikuah qaur muaw .cud .kir,
16 Laii tuann hok'imx qaur dirr linw qaiwgua ee de; byy ing vadd langg hunrlai ixqing’ juer ven ee su laii kuakauw.
17 Kuakauw ee langg diyhh ing Jruw laii kuakauw.
18 In'ui m si qaqi ylyw ee langg jniurcuw, si Jruw soxx ylyw :ee jniurcuw.
11 Guan linw iong'unw guaw siyxkuaw ee gong; qisit linw be m iong'unw guaw.
2 Siongrder ee zedsimx, guaw uirdiyhh linw iarr laii zedsimx; in'ui guaw bad pingwdnia linw hro jit xee diongrhux, beh jiong' linw juer jingjed ee jairsikluw, henr hro Krist.
3 Danrsi guaw qniax linw ee simsux vairhuai, byy sunjuann cingqed laii ngr Krist, cincniu juaa ing ix ee kuixked inxiuw Eva jidngiu.
4 Narr u langg laii tuann vadd xee Jesus, guanw soxx m bad tuann :ee, iacc si linw sriu diyc qyc'ngiu ee sinn, jingg soxx m bad sriu .diyc .ee, iacc si qyc'ngiu ee hok'imx, jingg soxx m bad singsiu :ee, linw iong'unw ix.
5 In'ui guaw pacsngr guaw longxx byy kacc sux dirr hiaxee siongrdingw ee suwdoo.
6 Guaw qongxue suizenn siyc siyc, danrsi diwsig m si anxnix; in'ui guanw huanrsu u duiww linw henxbingg dirr jiongww langg diongx.
7 Iacc si guaw qaqi kutqe, hro linw singquann, byy tec soxhuir, vehvec tuann Siongrder ee hok'imx hro linw, jex qamxx si huanrjue mah?
8 Guaw cniuw vadd xee qauwhue, tec inx ee soksiux, laii hogsai linw.
9 Guaw qapp linw dilehh ee sii ing byy qraur, m bad lenlui diyc linw jit langg; in'ui dui' Macedonia laii ee hniadi voxjiog guaw ee kiamwkueh. Guaw huanrsu qaqi e siuw, byy tuatui linw; au .laii iarr beh qaqi siuw.
10 Krist ee jinsit qiwzenn dirr guaw, dirr Aqaia jiaxee derhngx dyrr byy langg e joxjiw guaw jitt hy ee kuakauw.
11 Si simxmih enqor? Si guaw byy tniar linw mah? Siongrder jaix lar.
12 Guaw soxx qniaa :ee iuguann beh qniaa ix, beh juaddng hiaxee cue qihue ee langg ee qihue, hro inx dirr inx soxx kuakauw :ee, qiuwqingr qapp guanw byy qyc'ngiu.
13 In'ui hitt hy langg si qew suwdoo, qniaa dairjir qanjar, qaqi jrngx juer Krist ee suwdoo.
14 Jex iarr byy qiquair. In'ui Satan iarr qaqi jrngx juer qngbingg ee tnisair.
15 Soxiw ix ee ce'ing qaqi jrngx juer cincniu gi ee ce'ing, jex iarr m si dua su. Inx ee qetqiok beh jiauww inx ee soxx qniaa.
16 Guaw qycc qongw, langg m tangx knuar guaw juer gong; narr jinjniar anxnix, marr diyhh iuguann jiaplap guaw cincniu gong, hro guaw iarr tangx liyc liyc aw kuakauw.
17 Guaw dnaxx soxx qongw :ee m si jiauww Jruw laii qongw, si cincniu gong :ee, duardnaw laii kuakauw.
18 Qiwzenn u jerje langg jiauww ziogtew laii kuakauw, dyrr guaw iarr beh kuakauw.
19 Linw qiwzenn si diwsig ee langg, dyrr e hnuahiw iong'unw gong ee langg.
20 Setsuw u langg kuanxtai linw juer lovok, tunqa linw, liac linw, jurqyx, senr linw ee bin, linw dyrr iong'unw inx.
21 Guaw qongw anxnix si byy texben, naxx cincniu guanw jingg si nngxjniaw. Danrsi langg dirr simxmih dairjir hyxdnaw (guaw qongw jitt qxur si gong ue), guaw iarr hyxdnaw.
22 Inx si Heblalangg mah? Guaw iarr si. Inx si Islaellangg mah? Guaw iarr si. Inx si Ablaham ee horer mah? Guaw iarr si.
23 Inx si Krist ee ce'ing mah? Guaw qyckacc si. (Guaw qongw anxnix si qongg ue). Guaw diyhbuaa iauxx kacc je, siurr pah qaur be sngr .did, jerje vaiw hiamw hiamw siw.
24 Guaw hro Judealangg pah go vaiw, muiw vaiw sir-jap qiamw jit xe.
25 Snax vaiw siurr qnuaiw-aw pah, jit vaiw siurr jiyhtauu dimr, snax vaiw duw diyc junn puar, jit zit jit mii dirr cimx haiw;
26 Siongsiongg liglo, duw diyc qanghyy ee guihiamw, cadbuew ee guihiamw, vunxjok ee guihiamw, guarvangx ee guihiamw, sniaa-lai ee guihiamw, kongwiaw ee guihiamw, haixbin ee guihiamw;
27 Siurr lylok qapp qankow dniardnia byy kunr, iaux quaww cuiwdax, dniardnia byy jiac, qnuaa quaww tngwvakteh.
28 Druu kir jiaxee guarsu, iauxx u jit hxang dagg zit deh guaw, dyrr si ter jiongww qauwhue kuawlu.
29 Jirjui luanxziok, guaw iarr byy suar luanxziok ar? Jirjui diyhdag, guaw ee simx iarr byy cincniu huew dyc ar?
30 Guaw narr vutdikvud diyhh kuakauw, dyrr beh kuakauw quanhe guaw luanxziok ee su.
31 Jruw Jesus ee Siongrder, iarr si Ix ee Ve, ingxuanw tangx ylyw :ee, jaix guaw byy vehcat.
32 Dirr Damaskus Aletas Ongg soxx sed ee derhngqnuax, vexsiuw Damaskuslangg ee sniaa :ee beh liac guaw;
33 Guaw dui' txangx-aw, ing kingx dui' sniacniuu hro langg lrui .lyc .kir, tuatli ix ee ciuw.
12 Suizenn byy lirig, guaw vutdikvud diyhh kuakauw. Guaw beh qongw kiw Jruw ee ngirsiong qapp kexsi.
2 Guaw bad jit xee langg, ix si diamr dirr Krist :ee, jap-sir nii jingg siurr duar qaur derr snax jann tnix. (Higjiaxsi diamr dirr sinkux, guaw m jaix; higjiaxsi byy diamr dirr sinkux, guaw iarr m jaix; qandna' Siongrder jaix.)
3 Guaw bad jit xee cincniu jitt hy ee langg, (higjiaxsi diamr dirr sinkux, higjiaxsi byy dirr sinkux, guaw m jaix, qandna' Siongrder jaix.)
4 Ix siurr duar qaur Loghngg, tniax qnir berdid tangx qongw ee ue, dyrr si langg soxx m tangx qongw :ee.
5 Guaw beh uirdiyhh jitt hy langg kuakauw; narr si uirdiyhh qaqi, druu guaw ee luanxziok ixgua, guaw byy beh kuakauw.
6 Guaw narr rair beh kuakauw, iarr m si qongg, in'ui guaw beh qongw jinsit; jixsirr guaw qaqi ioksog, qniax langg pinglun guaw kacc quewtauu dirr ix soxx knuar qnir guaw, iacc si ix dui' guaw soxx tniax .qnir .ee.
7 Qycc in'ui jiaxee kexsi ee qik dua, benw did guaw quewtauu jurqyx, soxiw hro guaw ziogtew lai u cxir, dyrr si Satan ee suwjiaw laii pah guaw, benw did guaw quewtauu jurqyx.
8 Uirdiyhh anxnix, guaw snax vaiw qriuu Jruw, hro hitt xee lirkuix guaw.
9 Ix qra guaw qongw, "U Guaw ee xunx, liw dyrr qauwgiac; in'ui Guaw ee kuiwlat si dirr langg ee luanxziok laii jniaa." Soxiw guaw jin' hnuahiw, kacc air kuakauw guaw jiaxee luanxziok, hro Krist ee kuiwlat druar dirr guaw.
10 Soxiw guaw uirdiyhh Krist liac jiaxee luanxziok, kiamwkueh, kunxdiok, kunwvig juer hnuahiw; in'ui guaw luanxziok ee sii, huanxdngw u kuiwlat.
11 Guaw jniaa juer gong, si linw vig diyc guaw; in'ui guaw habqaix diyhh hro linw ylyw. Guaw suizenn byy simxmih, sidjai byy kacc sux hiaxee siongrdingw ee suwdoo.
12 Suwdoo ee jingwqir, dyrr si jiaxee diaurtauu, sinziah, quanlingg, guaw ing vacvnuax ee tunlunw laii qniaa dirr linw diongqanx.
13 Druu kir guaw byy lenlui linw jitt hxang, ixgua, linw iauxx u simxmih su kaxx sux qi'uu ee qauwhue? Jitt xee byy qongdy ee soxjai, cniaw linw kuansur guaw.
14 Dnaxx jex si guaw derr snax vaiw virvan beh kir linw hiax, iarr byy beh lenlui linw. Guaw soxx rid .diyc .ee dyrr si linw, m si linw ee mic; in'ui qniaxzii byy ingqaix qra verbuw liabjig, si verbuw qra qniaxzii liabjig.
15 Guaw jin' hnuahiw uirdiyhh linw ee linghunn laii kaihuir, iarr huir jin qaqi ee sniwmia; jongw byy guaw zuxx tniar linw, suacc zuxx jiyw did diyc linw ee tniar mah?
16 U langg qongw guaw byy tuatui linw, si guaw qikiauw, ing kuixked ee vorsor laii tec linw.
17 Guaw soxx crex kir linw hiax ee langg, qidiongx guaw u bad ing simxmih langg lud linw mah?
18 Guaw krngr Titus, iarr crex jit xee hniadi qapp ix kir. Titus bad lud linw mah? Guanw soxx qniaa qamxx m si qangg jit xee sinn, qangg jit xee ngiu ee kavo mah?
19 Linw qaur dnaxx liac juer guanw duiww linw decc hunsor. Guanw diamr dirr Krist qongxue dirr Siongrder ee binrjingg. Soxx tniar ee hniadi ar, itcer ee su longxx si uirdiyhh qenwlip linw.
20 In'ui guaw decc qniax, qniax qongxx guaw laii ee sii qiamxcaiw duw diyc linw byy jiauww guaw soxx air, qycc linw duw diyc guaw jiauww linw soxx m air; qniax u sna' jnex, uanwdor, siurkir, qetdongw, huixvongr, qongw kajiac'aurue, pinxpongw, hunluan, jiaxee su;
21 Iarr qniax qongxx guaw qycc laii ee sii, guaw ee Siongrder hro guaw dirr linw ee binrjingg vibii, guaw iarr uirdiyhh jerje jiongjenn huanrjue, iarr byy huanxhuew inx soxx qniaa ee uwuer, qan'imm, hongwdong ee langg laii inbun.
13 Jex si derr snax vaiw guaw beh qaur linw hiax. "Ing nng~snax xee qanjingr ee langg ee cuir, dagg qxur longxx u vinjunw."
2 Guaw bad dairsingx qongw :ee, dnaxx beh qycc dairsingx qongw ix, cincniu derr zi vaiw snaqab dilehh ee sii, henrjai sna' lirkuix, qra jiaxee jiongjenn huanrjue :ee, ixqip qi'uu ee jiongww langg qongw, guaw narr qycc laii, byy beh kuansur;
3 In'ui linw rair did diyc Krist diamr dirr guaw laii qongxue ee vinqir. Ix ngr linw m si luanxziok, si u quanlingg dirr linw diongqanx.
4 Ix dui' luanxziok laii siurr dingr sibzirqer, danrsi dui' Siongrder ee quanlingg laii uac. Cincniu anxnix, guanw diamr dirr Ix iarr luanxziok, danrsi dui' Siongrder ngr linw soxx henxbingg ee quanlingg beh qapp Ix snaqab uac.
5 Linw diyhh cir knuar vunxsinx u diamr dirr sinr iacc byy; diyhh qaqi giam knuar. Iacc si m jaix qongxx linw narr m si tangx kiwsag :ee, dyrr u Jesus Krist diamr dirr linw?
6 Guanw iarr ngwbang linw e jaix guanw m si tangx kiwsag :ee.
7 Dnaxx guanw qriuu Siongrder hro linw soxx qniaa byy jit hxang pnaiw, m si beh henxbingg guanw juer tangx jiaplap :ee, si beh hro linw ee qniajuer longxx hyw, suizenn guanw juer cincniu tangx kiwsag :ee iarr tangx.
8 In'ui guanw be e juer simxmih laii qec jinliw.
9 Guanw luanxziok, linw iongxjongr, guanw dyrr hnuahiw; guanw soxx qiqiuu :ee dyrr si hro linw e uanjuann.
10 In'ui anxnix, guaw sna' lirkuix ee sii siaw jiaxee hro linw, tangx dirr sna' qniwbin ee sii, benw jiauww Jruw soxx hro guaw ee qxuann, laii ing giamm hxuad; jitt xee qxuann si beh kixjy, m si beh ciax dyw.
11 Hniadi ar, qetbuew laii qongw, diyhh hnuahiw. Diyhh uanjuann, diyhh siurr an'uir, diyhh dangsimx, diyhh hybok; anxnix dyrr sniuxsur zin'air qapp ving'anx ee Siongrder beh qapp linw dilehh.
12 Diyhh ing sxingr ee sna' jimx laii cingxanx.
13 Jiaxee singwdoo longxx cingxanx linw.
14 Guan Jruw Jesus Krist ee undenw, Siongrder ee tniawtangr, Singwsinn ee siongtongx, qapp linw jiongww langg dilehh.