Bang Jap Xia

(夢十夜)

derr jap xia

( 第十夜)

Lu Juxbingg huan'ik

Sotaro hro jabow iuxquaiw .kir, qaur qaxx derr cid qangx amwsii jiacc damwsuee damwsuee dngw .laii. Jit qaur cur dyrr piang dirr bincngg dingw, qui’ singkux siyx tngwtngr. Jex si Ken qongw hro guaw jaix :ee.

Sotaro si lanw jngx nirr jit xee endauu siauwlenqex, langg qaiww qoxir senrliongg, dogdok u jit hxang hingwpiah byy simsig, dyrr si air dirr amwtauaw dir jit dingw Panama laii ee by-aw, jre dirr quexjiw-dnar taujingg, siongr hiac’ee laii laii kir kir ee jabow ginxaw, qycc jiabjiap dirr cuir-lai ser sniax pinxpingg suixbaiw, jitt diamw ji’ gua ix dyrr byy sniaw tangx hyw qongw. Narr byy jabow ginxaw anww hiax qingquer, ix dyrr byy knuar langg, juansimx it’ir knuar hiac’ee quexjiw-aw. Quexjiw-aw u vah vah kuanw, cniurr juixbidtyy, quaqyw, givee, qingjiyx, longxx jrngx qaxx suiw suiw kngr dirr naa-aw lairdew, dirr qexaw dingw vaii qaxx jin’ jingxjee. Narr beh jyr pnuarciuxlew si jin’ qysiongw qycc duarvan.

Sotaro simlai jiokk ylyw hex naa-aw suiw, quexjiw sikjuiw u qraur, jiokk hyw jiac kuanw. Narr beh jyr singliw, ix dogdok beh vaii quexjiw-dnar, jyr quexjiw ee singliw.

Qongw si anxnex qongw, ix iuguann dir diyc hitt dingw Panama by-aw, jit siwqer luarlua syy. Ix marr bad pinxpingg quer hex zuahtnix ee bidqamx, qongw sikdir suiw, juixhun qraur, mrqycc ix tauwdew m bad zimm jnii cud laii brew, donzenn dyrr byy tangx jiac lor. Jongw qongw, ix dy’ si qanda’ knuar, qanda’ genr.

Mow jit xee honghunx ee amwtauu aw, jit xee siyxjiaxlangg-aw byiwdiongx kia dirr dxiamr ee taujingg, hogjongx jin’ gnaxkir, siongdongx u sinhun ee langg. Ix cingrcah ee kuanxsig qapp sikdir jiokk dingr Sotaro ee ir, binrboo-aw ee kingkag qycc suiw. Sotaro simqnuax gniaurgniau qunw, dyrr qra hitt dingw by-aw trngr .lyc .laii, jiyhox langkeh. Siyjiaxlangg-aw ciuw qiw hex siongrr dua ee quexjixnaa-aw qongw, “Jitt xee hyw.”

Sotaro dyrr sui’ qra hitt xee naa-aw tec laii hro langkeh. Langkeh jrih quer ciuw, qongw, “Jiokk dang :ee.”

Sotaro vunxdew dyrr ingg sensenx, langg qycc kongxqaux hysongw, dyrr qongw, “Guaw laii qra hex sangr qaur liw huxsiong.”

Dyrr sngr Sotaro langg zuarr kongxqaux hysongw, mrqycc jit qnia dairjir marr sniu’ hongxhniaw, sniu’ hamwqow, ving’iuw cam’ cinjniaa longxx qongw qaxx cirbuxcircu. Quixlyrr qangx byy knuar diyc Sotaro ee langg. Itdid qaur qaxx derr cid amr, Sotaro jiacc penn .jit .xe penn .jit .xe dngw .laii. Jingwlangg juruaw dirr inx daux, mng qongxx, “Sotaro ar, jitt quiw qangx liw si jauw duiww dyhh .kir?”

Sotaro suacc rinr qongxx, “Guaw jre denrciax kir snuadingw cittyy lar.”

Hex itding si viw Lirsongrqalavax qycc kacc hng ee soxjai. Jiauww Sotaro qongw, denrciax qauwui liauxau, dyrr knuar diyc jit pxenr ee cauxvox vnengiuu, bagjiux knuar .kir, si kuah bongxbongw ee cuiwcnix, itdit renn qaur buhan ee soxjai .kir.

Ix cam’ siyxjiaw suisimx qniaa dirr cauxvox-aw dingw, byy-dniu.-byy-dii suacc qniaa laii qaur jit xee juadgaii vnix. Jitt sii jabow duiww Sotaro qongw, “Liw an’ jiax tiaur lyc kir knekamr drew knuar mai lehh.”

Sotaro sun juadgaii ee viah hiongr erdew itdit knuar .kir, “aixiyiah”, knuar byy drew. Ix qra by-aw trngr .lyc .laii, qnialew qongw ix byy air tiaur. Jabow dyrr qycc qongw, “Liw narr byy beh tiaur, dyrr rair hro dix-aw jng singkux, anxnex hyw bor?”

Sotaro siongrr gairgiyc :ee dyrr si dix-aw qapp Kumoemon, mrqycc sniu .dngw .laii, ix iauxx si qamguan hro dix-aw jng singkux marr m kingw srid kir snewmia, soxiw lehh, ix iauxx si byy tiaur.

Jitt sii m jaix dirr dyhh hionghiongg jongg laii jit jiah gnorgno qiyr ee dix-aw, sui’ dyrr beh longr diyc Sotaro. Ix qovutjiongx tec dirr ciuw nirr hitt qix vinnngg ciuruex jyr :ee ser qix quaiw-aw hiongr hitt jiah dix-aw but .kir, hitt jiah dix-aw “uux” jit sniax dywter jit vo, dyrr lag lyc kir juadgaii kax. Dyrr dirr Sotaro cuanw jit kuir jiacc cuanw hyw nia, iurqycc jit jiah dix-aw dua pnirqongw gia quann quann jongg duiww ix jiax laii. Siaulenqex byy huatdo tingg .lyc .laii, qewsiok iong vinnngg quaiw-aw but .lyc .kir, jitt jiah dix-aw “aiix” jit sniax dyrr lag duiww knekamr kax kir.

Qycc suar .lyc, dix jit jiah jit jiah itdit cuthen, Sotaro jitt sii jiacc juwir diyc cauxvox vnengiuu hng hng hitt vingg u qui’ bxan jiah ee dix-qrunn dngdecc gnorgno qiyr, pemia jongg .quer .laii. Siauwlenqex qniax qaxx kabuew longxx lingw, suacc m jaix beh anxjnuaw jiacc hyw. Venrnarr dix-aw uaw qin singkux, ix dyrr iong quaiw-aw qra hamw pnirqongw. Vutkyxsugi :ee si qenwnarr hamw .diyc, dix-aw dyrr lag lyc kir juadgaii kax. Ix hiongr juadgaii knuar .kir, langg qniax jit diyy, sniu qongxx, “Guaw qingwzenn hamw lyc jiacc je jiah ee dix-aw.” Mrqycc dix-qrunn iuguann itdit bunr .cud .laii, byy tangx hro tingg ciuw, hex dix-aw dyrr naxx cincniu ox hunn snex kax hitt kuanw, vuah kuix cauxjangg, pnirqongw gnorgno qiyr, jiokk qinw jiokk qinw itdit jongg .quer .laii.

Siaulenqex py diyc hur siw ee quatsimx, pemia cud lat iong vinnngg quaiw-aw itdit hamw dix-aw ee pnirqongw. Ix qapp dix-qrunn ee jenwjingx ensiok cid qangx cid mee, lorbuew kuiwlat vangr jin, qui’ singkux nngxqylyriyy. Dix-aw iauxx si jng diyc ix ee singkux, ix langg diam diam dyw dirr juadgaii vnix:a ee cauxvox-aw dingw.

Quanhe Sotaro ee qowsu, Ken dyrr qongw qaur jiax. Ix siubuew qongw, “Soxiw neh, iauxx si m tangx ovec knuar jaboxlangg kacc hyw.”

Guaw marr si qanrkuanw anxnex sniu. Ken qycc qongw ix jin’ qac’ir Sotaro hitt dingw Panama by-aw.

Guaw sniu Sotaro vacbin si byy qiur ar, acc hitt dingw by-aw vanrpuex e hro Ken jrih .kir.

guanjokjiaw: Natsume Soseki 夏目漱石