Siauwliam Singwdoo

(Qyx Qimsingx siaw)

1. Qyx Diongw Vxeh

Qyx Diongw Vxeh si Hokqenr Singw, Juanjiux Huw, Jinwqangx Quan, Ingxlingg Sniaa ee langg. Zxic-veh huer laii Daiuann cue dua-jiw, tyw taulo (inx dua-jiw kuix dre-aw hangg, dirr Dailamm Guarsinx Qrex). Kixtauu, ix laii qra siongdiamr juxjiac, zen'au qadi jyr surgiap; longxx sihvunw, dyrr sniu beh kir he ong'iaa. Virvan lexmic, beh kir biy nirr siyx qimx; qaur lo-diongx knuar langg uii qui' din, dyrr mng qongxx, "Simxmih dairjir?" Langg' qra qongw, "Decc qongw huanaxqaur." Simxmic si huanaxqaur? Ix dyrr uaw kir tniax. Hitt langg decc qongw, Siongrder si jinx, langg diyhh vair Ix; vut si by'ngiaw, vair ix si m driyc. Jitt sii, ix simqnuax juanxhiongr, biy nirr siyx qimx suacc suah .kir.

Hitt diap Maw Isingx suer jit kxamw dxiamr dirr Knuawsaix Qrex hing'ix tuanqaur. Guarsinx Qrex qapp Knuawsaix Qrex si siy' jiapqin. Diongw Vxeh druar dirr dua-jiw ee cur, siongsiongg laii Knauwsaix Qrex tniax dyrliw; qapp Bunsuiw Vxeh siongsik, dyrr quxjenr ix qapp Maw Isingx druar, vniawsaur lairbin qiamx juxjiac. Dirr 1865 nii Cid-guec ceqauw, jerje langg laii qongqig hitt qingx suatqaur sow, sewbin jin' guihiamw. Goo Bunsuiw Sensenx zip sniaa henwvinw, Daiuann Quan vunxsinx laii huah suah, iarr krngr inx diyhh siamw kir Qi'au. Maw Isingx inx suaw kir Qi'au. Diongw Vxeh iarr qapp inx kir. Qaur menii Veh-guec jap-zi, Ermngg Suanx Bogsux (Rev. W. Swanson) laii Qi'au quxhingg buanxcanx, sir langg zibqaur, Diongw Vxeh u jairlai.

Niaw sexlew liauw, dyrr jyr tuandy. Soxx hagsip :ee, si quiw siuw six, quiw jniux Singwqingx, jongw .si ixau u jinwvo. Hanwbunn ee bunliw Singwqingx, Sinx log Juansux longxx erhiauw tak, erhiauw qexsueh veh'ue. Suatqaur zedced, uerqur cenxvec, srunn hueriuw qutlat kax, jiyhox langg u cinced.

Ix inxcua Qyx lau Vxeh laii qruix Iasox. Hitt langg jiac apenr snax-jap nii, tniax hok'imx, jit mee huesimx, qra jin' dadjnii ee apenr huncuex, qapp qi'uu ee kiwqu, longxx huixhuai hetqak, apenr jyr jit xe duanrjuat. Au .laii Iau Vxeh jyr Dailamm Qauwhue ee dniuxlyw, u brew toxde dirr Dailamm ee Vakmngg gua, henr jyr qauwhue ee qongtiongw. Qycc u jit langg Liw Huix Hniax, dirr Bagsax ee Qiauxliau'aw jyr singliw; uirdiyhh toxhuiw ee ziauxluan, inx ee iuwliabmic ee sniux, tangw, longxx vnuax laii kngr Bagsax lexvaiwdngg qiar Diongw Vxeh. Derhngx vnidnia ee sii, Huix Hniax ee mic longxx dilehh, dui' anxnix ix qapp juanqex laii sinr lasox. Henrsii Hongrsnuax Liw Bunjenn, Liw Bunho Sensnix dringw, si Huix Hniax ee horer. Iauxx u vadd langg si ix inxcua :ee.

Diongw Vxeh vunxsinx duiwdiong iuxhaur, jyr qauwhue ee qangx, taucuir lak xee, guehhong go kox. Muixx guec kiam nng kox qiar hro laurbuw. Dniardnia liam Timoti Jensux 5:8 qongxx, "Langg narr byy qor cinlangg, simrjiww byy qor qaqi ee qrex, jex dyrr si vuerbiu dyrliw, viw m sinr ee langg qyckacc pnaiw." Ixgua vutlun si se'ngiuu iacc si dang'ngiulangg narr qaur ix daux, ix longxx qingwdiong, hyw kuanxtai inx. Ix byy jaisanw, u hniadirair.

Ix kixcox tuann hok'imx, dyrr duw diyc qankow. Dngsii ee vecsner uanwhin Tenjuxqaur, huixvongr inx ow bagjiux, puar simqnuax, taii siw langg, dywtauu diaur, dih langjiab juw apenr. Vitauu (henrsii ee Hongrsnuax) ee vecsner gorzin Quijingwqaur si Tenjuxqaur, siurkir, dyrr tiah lanw ee lexvaiwdngg. Dirr Vitauu ee Vakmngg gua, Diongw Vxeh hro langg' hiamw hiamw pah siw. Qajair ix jauw zip Vitauu ee gemngg lai, quanrjuw cutsik, vecsner qryr ix si Tenjuxqaur ee pnaiw langg. Quanrjuw congr sibzirqer, bingrling Diongw Vxeh diyhh huac sibzirqer, ix dyrr huac. Dui' anxnxi quanrjuw jaix ix m si sriok Tenjuxqaur, dyrr qra ix qnuaix lyc hoxtauqnax, vecsner tniax diyc anxnix dyrr trer .kir, sniu qongxx qnuatniax si qra ix dring sixhingg.

Quer quixnarr zit, langg qrngx vut jongg zip gemngg lai, quanrjuw diamw hniux qingr vut; vudqiy uad cud gemngg, qaur Maw Isingx kunwvangg ee xui, dirr hiax sec ar sec. Langg huah qongxx, "Qrut knuar lehh!" Jid'err qrut, juann juann si quttauu. Quanrjuw duer kir knuar .diyc, dyrr sinr huanaxqaur urngiaw hai langg. Qniabunn hro Ingqog lingxsu, qongw kiw Maw Isingx ee okhingg. Lingxsu qapp qnuatniax iog zit hro Maw Isingx hunsor. Hitt zit qnuatniax vaii cniudyhang, Maw Isingx zip kir giam qud, jingwbingg jiaxee qud, uree si diqud, qauxqud, uree kiokk si langqud; byy u sinx qud, qabuu guanw hai siw langg, si lamrsamw. Vitauu Quan sitvai, Maw Isingx singwli, su u diongrdai. Hokjiux jongxdog pair langg laii qapp lingxsu jiaphiap vanrliw. Lexvaiwdngg kiw vuee, Diongw Vxeh tauxvangr, Vitauu Quan lutjid, suah su.

Ixau, Diongw Vxeh laii Qadangaw Qauwhue, au .laii kir Ogulann; druar hiax uaw jap nii, dyrr juanxkinn Dailamm. Henrjai tuanqauwqax ngua xui, suizenn u hingliw qapp ginxaw ee tuatui, mrquxx qautongx lirven, u ciax tangx jre, anzenn qaur bogdikde. Dui' Ogulann kixsinx, lordiongx qniax cnehuanx, hniadi giac cingr songwhingg, hingliw diyhh langg' dnax, sensnix diyhh vorqniaa, cing cauxee, pnai bangrde, giac horsnuar, ginxaw ing naa dnax, hurzinlangg narr be qniaa, jiacc u jre qiy, lenlenn qniaa cid zit, jiacc qaur Dailamm.

Ix druar jiax lak nii juanxkinn Bagsax. Diamr Bagsax uaw lak nii, siurr Qauwsurhue paiwkenw, diyhh kir au Daiuann nng nii quw. Lordoo kikux, tiauwuanw qycc guihiamw; ginxaw je, qycc sewhanr, qovutjiongx qeau diyhh vangwhe Bagsax. Ix dnuasinx kixsinx, lo nirr diyhh tongquer Dik'axkax ee Vunwqioo, Jimwjuixngiaa (hiax u vxingx qor lo, joxdongr cnehuanx taii langg). Qadi duar jiahniuu, pnai uaw jit dauw biw, vreh jnriu Dairbuw Snuax qapp langg' jywdin diamr snuax qeh mee. Lyc snuax, jnriu vag qaur Jiyhhorsnuar Qauwhue, jininiar si lykow! Zim muaw, laii druar Qongaxnaa qapp Banrdanx, snax-jap nii quw jyr qauwhue ee qongqangx. Dirr 1912 nii Qauw-guec cejap, ix dyrr anzenn kir qnir Tnive, hiongxsiu cid-jap-zi huer.

2. Jux Qoniuu qapp Bunn Qoniuu

Dnaxx qycc laii qongw kiw luxqair nng xui luxdiongrhux, dyrr si Jux Iok'anx qapp Bunn Anx. Inx dirr 1885 nii laii Daiuann, druar dirr Sinlauu, si juanbu dirr luxqair ee qangjog; viauxbin-siong si qar haghau, qisit inx ee qangx si snax kuanw.

(1) Qar Luxyc

Dirr 1887 nii, kaised Luxyc dirr Sinlauu, jiyx luxjuw laii tak; kixcox hagsingx si jap gua xee, soxx qar ee hagkyr: suanwsut, derliw, ciacsiur, uersingx, Hanwbunn, Singwqingx (jitt kxyr jyr diongsimx). Siongsiongg cniaw zedsimx ee bogsux kir haghau hunwhingx, haurhongx dui' anxnix venr jin' hyw. Inx byy tuann se'ngiuu ee hongsiok hro luxjuw, qar inx diyhh giamsiuw vunxdyw ee hongsiok; inx ee simx soxx cet'ir, qywqyr diyhh sinr Jruw Iasox. Dui' jiax cud .kir ee hagsingx, siwsnuar dirr siarhue, duardysor u tuann Siongrder hok'imx ee jingsinn.

(2) Srunn qauwhue

Nng xui qoniuu lunliuu qar hagsingx, iarr lunliuu srunn qauwhue. Diamr cauxde u quiw zit, cniaw ginxaw laii yc Veh'uerzi, tak Singwqingx, qar inx bad dyrliw; kir dagg kauw jaur tamr jixmue laii an'uir, qawsi, benxle inx. Qycc jiyhox inx jurjip laii kuix qidyxhue. Inx narr druar Dailamm, ervox dagg lexvair ee vaiwzi u hurzinn qidyxhue, si dui' inx sed kiw.

(3) Duiww gua vowdy

Inx m air jixu druar Sinlauu, air jiauww se'ngiuu ee sne'uac, kir suer cur dirr guarbin, hro langg' kuair cinqin, tangx qapp langg' qauvuee laii tuann hok'imx. Ursii cua hagsingx kir sewsiogqex tamr vnerlangg; simrjiww duw diyc venwsui ee hurzinlangg be kiw cngg, inx qapp hagsingx dyrr kir qra inx sew sinkux, hro inx knuawuac, brang hok'imx ee qngx e tangx jiyr zip. Dagg nii qurlik ee sinjniax, inx dyrr virvan devniaw cniaw guarbin ee hurluw laii inx daux tittyy, sun qihue vowdy. Dailamm Ci ee hurzinlangg e.-ekeh-k., laurzet ciccih, jit din laii cue qoniuu.

Jux Qoniuu, Bunn Qoniuu qycc sniu cud digvet ee honghuad. Inx kir cingin Qyhiongg Muii Isingx hagsip jorsanw, hnuahiw liauw iyc, liauw qangx, byy siux senselew qra langg kiyh ginxaw. Dui' anxnix tangx zip langg' ee qadingg, badvangg laii qanjingr Iasox si Qiuwjuw , decc sniu langg ee linghunn si vyxvuer. Lanw ee qauwhue dirr Daiuann m jaix zuarr je langg u anxnix?

3. Lok-aw Hniax

Dirr A.D. 1881 nii, Dauxlak u jit xee singwdoo sner Goo, miaa Lok-aw Hniax; hitt jun zi-jap-veh huer did diyc dyrliw. Cinglenlangg dair jingwtauu, qoxdiongr --- vakdow qaiww dua. Qnialo ee sii, jit ciuw langw kor, huu vakdow; jit ciuw giac qnuaiw-aw, dagg xee Anhiyczit diyhh cincniu anxnix qniaa por zi lo qaur Qadang'aw lexvair.

Lok-aw Hniax jiong' hok'imx tuann hro qrex-lai ee langg tniax, Lok Syw dua huanxduir, kunxdiok ix, ix iuguann qniaa vair Siongrder ee lo. Duxgu jit vaiw Gorzidjeh, Lok Syw vran cnecaux haur sinbingg, dyrr benxqiongw ix giac hniux vair sinn. Lok-aw Hniax qaur jiax simx dua qankow, sinkux suizenn rair tranr, simlai diddit qriuu Siongrder siawjue. Vair bingvik, Lok Syw qiyr ix jiac haur qxuiw ee mic, ix dyrr jiac. Hitt mii diyc lauwtowjingr, jin' siongdiong, u huatzet, qadi jiac jit sud aw qinaxhunw. Tnix qngx kuu dirr lo-vnix, ving'iuw knuar .qnir, dyrr qongw, "Lok-aw, liw ee vakdow duiww dyc'ui kir?" Vakdow siauliaux .kir, inx hurzinlangg dua qiquair, dui' anxnix dyrr sinr Qiuwjuw Iasox, angbow dangsimx vair jinx Sinn, henr inx ee cur jyr lexvaiwdngg. Lok-aw Hniax ee vne uanjuann hyw.

Henrsii Sailee ee lexvaiwangg, jingg si dirr Qadang'aw, dngsii Jiongx Bunjinw Sensnix dirr hiax juer tuandy.

Lok Hniax guanvunw ee jitgiap si decc hnua vowderhir ee aurvnee, vunn qoxcuex, ex henn-aw. In'ui kir lexvair suacc byy taulo. Byy jnii, beh qra qauwhue ee langg jiyh, langg' m qnaw jiyh ix. Beh jyr hxir, langg' m cniar. Qycc hitt sii u jit xee dngsnuakeh diamr dirr inx daux jiac. Lok-aw Hniax byy jnii, lenrr jit kauw dangdniaw-aw iarr tec kir bre snax-vah gua jnii. Dngsnuakeh qar ix jyr qiamsngdnix ee huatdo; au .laii dui' hiax kiw qrex. Bylun sniaw langg qaur inx daux, ix dyrr qongw, "Hniadi ar! Diyhh sinr, iarr diyhh qniaa. Guaw jit kauw dangdniaw-aw jiac qaur qinaxzit." Dnaxx qaiw dxoo jewjy qiamsngdnix, u cutmiaa. Lexvaiwzit juadduir byy bre qiamsngdnix. Ving'iuw suizenn dui' hng lo laii, rair beh brew, iarr m bre ix, jiauww soxx e :ee tec sangr :inx. Iurqycc vaiwlak soxx bre ee jnii longxx henr hro qauwhue. Veh'uerzi ee Singwqingx, Sinx, Qu Iog ix tak jin' sik. Kacc je huer ee sii, siwqer kir tuann hok'imx, cuir vunn vi'aw, ciuw ex henn-aw, kax pah pig, jiyx langg tniax hok'imx, liac anxnix juer kuaiwlok.

U jit zit, Goo Tensur Bogsux dui' Daidiongx laii vaiwtamr a'qongx, laurlangg hitt diap sinkux byy knuawuac, air qapp sunx-aw kir Daidiongx. Ix qongw, "Liw narr kacc hyw, guaw jiacc laii cua liw." Lok Hniax au .laii u kir Daidionox dagg zit qapp qanaxsunx kir qonghnge tittyy, juewau snax zit quw longxx gimm "Tendongg longxx byy koxlan" hitt siuw six, h.- hnuahiw-h. Zit amr kir kunr, tnix qngx iauxx bue kiw .laii. Siwdairsunx laii qongw, a'jow iauxx decc kunr. Tensur qongw, "M tangx paccnew." Siyxtingg ginxaw laii vyr qongxx a'jow diam diam. Ginxaw ee laurve kir knuar, qongw, "A'qongx anzenn quitenx." Isingx jinxduanr simjong byy lat, hiongxsiu cid-jap-veh huer.

4. Ingw Jimw

Gann Ingw Jimw (Angg sri Senhyy) Cingqog sidai, diamr Senrhuar (Uanliw Qrex) kiarkiw. Dui' Huex Mw tniax hok'imx laii sinr Jruw, sir-jap huer dui' Qamx Uilimm Bogsux niaw sexlew, hiongxsiu cid-jap-qauw huer lirkuix sewqanx.

Ingw Jimw dui' sinr Jruw ixau, ix ee soxx juer cincniu uahciu diddit duarjangg, kuix huex qed hyw quexjiw.

(1) Kaised jibhuersow

Vunxsinx jiyhox jixmue jap gua langg, dagg xee Anhiyczit jurjip dirr inx daux lexvair. Qaur Zidvunw quanw Daiuann ee sii, jiacc lingrgua cak jit qingx dikcur, jre did snax-jap gua langg. Muixx lexvair Duaryc (Sinhag'ngi) pair snax xee hagsingx kir hiax jyr juxliw, au .laii langgiac jiamrjiam qetnix, soxjai sniu' ec, vaiwdngg dyrr censuaw kir Dangmngg tauu.

(2) Doboo inxcua qniaxsunx qruix Jruw

Hitt diap Dailamm Sinlauu u kuix Luxyc (Diongxingg Luxjuw Diongyc). Duxgu hitt jun bre jinjujiamx ee Quer Mw (jitt xee jixmue siwqer jyr singliw, suar qongw dyrliw hro langg' tniax), ix ee jaboxqniaw jywlangg dniardiyc, uanhunx ee zit qin, diyhh virvan qewjngx. Ingw Jimw bingrling ix ee jaboxqniaw a'Hyw kir qra ix draur jyr sinniumic, Ingw Jimw cniar qiy qrngx a'Hyw laii druar Sinlauu ee Luxyc, kiokk u hro ix draur jyr sinniuu ee ijniuu. Bogdig m si rair ix anxnix, si rair ix zip Luxyc, did diyc dyrliw. A'Hyw iauxx bue sinr Jruw, qycc vak kax, vak kax byy tangx zib'yc. Ingw Jimw u dairsingx qapp sensnix qongw hyxser, qongw beh anxnix. anxnix......

Qoniuu kixtauu u bingrling a'Hyw qapp jiongww hagsingx siongrkyr, au .lai vangwkuanx hro ix juriuu. Ix narr air tak dyrr tak, m air tak dyrr kir laudingw kunr. Quer jerje zit, ix qadi air qapp jiongww dairqex vnivnii zib'yc. Knuar diyc vadd xee ving'iuw longxx byy vak kax, jixu ix, quair quair, qaur buew tauw kax qapp langg' siysiang, dui' hitt diap jinwzip sinwgiongw, niaw sexlew, qruix Jruw Iasox. Ingw Jimw iauxx u vadd xee jaboxqniaw iuguann sangr ix zib'yc, hro ix tniax hok'imx, sinr Jruw.

Gann Jinxsingx si ix ee haursnex, sewhanr ee sii qra ix qiar dirr Qyx Diongw Vxeh ee qadingg; dirr hiax yc Veh'uerzi, vair Siongrder, tangx qapp vair Siongrder ee ginxaw siang qrunn. Qycc hro ix zip Sinlauu Cecvangg yc inr ceh, iarr kir Duaryc tagceh, jiacc kir Jionghuar, dui' Lann Isingx hagsip isut; jniaa jyr singsit ee Qidokdoo. Kaigiap dirr Dailamm, jyr Taiwvingqingw Qauwhue ee dniuxlyw, jinrdiongx hogsai Siongrder.

Ixau qrex-lai lamluw sunx-aw cuthen, Jinxsingx ee laurbyw, dyrr dokjig inx yc Veh'uerzi tak Singwqingx, hur Juxzid'yc, dagg ehngx cua jiaxee sunzii qadingg lexvair, ix anxnix jinrlat, bogquair ix ee uijok longxx qruix Qidog. Siauwliam qowhiongx ee jxingg cimx, tniax diyc henrsii Senrhuar ee lexvaiwdngg kiw hyw, dyrr virvan iw jap-go liauu sangr kir Senrhuar vaiwdngg hongrhenr. Qycc quer jit lexvair, Ingw Jimw dyr kir ix ee Ve ee qog.

5. Ciacbew Hniax

Suwdoo Paul qongw, lanw diyhh qingquer jerje qankow laii zip Siongrder ee qog (Hingrduan 14:22). Daiuann iarr u langg bad qniaa jitt diauu lo, jiongdiongx jit langg, dyrr si Limm Ciacbew Hniax. Ix diamr Binhiongg Jngx (Dnaxniaux) kiarkiw (inx hniax si siuwjaii), nii zi-jap-go huer, vangjan hniax qawyc. Jitt sii dyrr qauvuee pnaiw ving'iuw, genxqiur vuahqiauw; narr ngiaa qxiauw, dyrr limx jiuw, huah qxunn. Ix m bad kir hualiuxqingx, danrsi m jaix vuahqiauw si juerog.

Ix zi-jap-lak huer (1883 nii) ee sii, Snax-guec diongsunn, kir cue qangg jngx ee ving'iuw Queh Singw, knuar diyc dirr dyh-dingw u jit vunw longxsimx Sinx Six, tec kir dyrr tak.

"Siongrder congwjy tnix qapp de,

Snix jniaa banrmic dagg hxang e," qycc

Siongrder ee xinx qongw be jin,

Cekenw Iasox qiur banbinn.

Tak liauw, hap ceh, diam diam sniu qongxx, "Guaw tak jiacc je ceh, m bad tak diyc jex. Tnix, de, sniaw langg congwjy :ee. Jitt vunw ceh soxx qir, qongxx si Siongrder congwjy :ee." Ix mng qongxx, "Singw Hniax, jitt vunw ceh dui' dyc'ui laii?" Rinr qongxx, "Dui' Qagi vaiwdngg laii." "Hew! Liw jnaixngiu zip huanaxqaur, jitt xee qxaur duanrduan m tangx zip. In'ui jitt hy qxaur si qar langg byy hogsai sinvut, byy qingr joxsenx, si ngirduanx ee qxaur. Simx narr hyw, dyrr qauwgiac, hyvid diyhh zip qxaur? Liw m tangx zip jitt kuanw bet jok, bet jongx ee qxaur."

"Ciacbew Hniax! Liw jaix guaw si byy hagbun ee langg, qycc tniax dyrliw byy zuarr quw, be tangx qongw hro liw tniax qaur buanxjiog. Qycc nng zit si lexvaiwzit, cniaw liw laii Qagi vaiwdngg, hiax u sensnix tangx siongser qongw hro liw tniax, sii qaur liw dyrr e bingvik."

Lexvaiwzit qaur, Ciacbew Hniax simx jin' qankow, qir did Queh Singw ee ue, qniaa veh Ixiw lo, laii qaur Qagi, decc sniu qongxx, narr u dyrliw, dikkag diyhh sinr: narr by dyrliw, dyrr m tangx jinwhingg. Ix siongser mng lo, laii qaur vaiwdngg.

Hitt sii duxdng decc lexvair, tuandyrsux Goo Ir, tak Congwser Qir jap-qauw jniux, ing Siongrder bet Sodom jyr debak. Ix knuar langg' kreh bak decc qidyw, giaugii decc liam jiuwgiw; qycc siongser knuar vaiwdngg-lai byy Siongrder ee sxiong, iarr byy siyx hniux. Hngr! Jinjniar si ngirduanx ee qxaur. Mngqngw diddit crangr, simqnuax pok pok cingw, ix m qnaw zip .kir, qandna' kia dirr guarbin decc quancad itcer.

Lexvair suah, Goo Sensnix knuar diyc guarbin u snehunrlangg decc tniax, dyrr cinced cniaw ix zip .laii, krngr ix diyhh huanxhuew sinr Siongrder, qycc jixbingg qingsux qiwjair Siongrder ee su, sinwkyr Iasox e did diyc qiur; uaxkyr Ix siogjue ee qonglyy, dyrr tangx cinqin Siongrder, vangwsag jitt xee, ixgua byy lo.

Ciacbew Hniax simx dua qamxdong, rinr qongxx, "Sidjai si anxnix, danrsi qahingx m jrunw." Goo Tuandy qongw, "Linghunn diyhh vyxdiong, cetced m tangx qniax langg, drir qaur linghunn be did qiur"; dyrr sangr ix quixnarr vunw ee dyrlixceh.

Jitt amr, Ciacbew Hniax kir hiyh dirr cincig ee qrex, qui' mee tak hiaxee ceh, simx dua hnuahiw, did diyc dingtausnex, guan jyr Iasox ee hagsingx. Dngw kir inx daux, dyrr ing voxtauu huixhuai vuahqiauw ee kiwqu, hed lyc venrsow laii juaddng juerqinx.

Tnilo huac zip, kunxdiok huatsnix.

Derr id jam:

U jit zit, laurve bingrling ix vair vut, ix m. Laurbyw qiquair qongxx, "Liw dui' sewhanr dyrr hogsai vut, dnaxx jnaixngiu m?" Ciacbew Hniaw qongw, "Guaw ixqingx sinr Iasox, cimx jaix gnoxsiong si byngiaw; narr vair, si gik Siongrder, jue si jin' dang." Laurbyw jin' siurkir, dua sniax hauw, ing qnuaiw-aw qra qongr, pah.

Derr zi jam:

Quixnarr guehzit quw, laurbyw ursii dirr qnxex cimx xia jing hitt diap, laii jre dirr cngg-jingg dua sniax tikaur, krngr ix diyhh vrue qxaur. Ursii pah, ursii me, iarr bad ing jursad laii hnaw ix, krngr ix m tangx kir lexvair. Ciacbew Hniax vikced qidyw qongxx, "Jruw ar! Liw diyhh qiur guaw."

Derr snax jam:

Inx hniax Limm Luxlunn (Hagdunx) qongw, "Liw m tangx zip huanaxqaur, laii sitlyc lanw ee texben, in'ui lanw si bongrjok, quixnarr jap dai u cutsu. Liw narr m tniax, guaw beh ing quan'uix hro liw siw." Ciacbew Hniaw venrbingg jitt xee dyrliw si jinx ee bylun sniaw langg diyhh hogsai jyrbut ee Juxjnaiw. Luxlunn siurkir, dui' jiax kiw, vutsii pah, me, tad, qniwbin ursii ing qunw dee qra ix puah, ursii ing deaux qra ix dimr, hro ix muaw bin Irauu hueh.

Derr sir jam:

Bxow zit cniaw quixnarr xee cincig laii inx daux, dyrr tuax Ciacbew Hniax qaur dirr vut qapp bogjuw ee taujingg, bingrling ix diyhh quiwvair. Ciacbew Hniax qongw, "Qaur siw guaw dy' m tranr." Hniax huad dua siurkir, hinghuat ix hro cincik, vut, bogjuw knuar. Ciacbew Hniax diddit qriuu Jruw sniuxsur linglik, hro ix tangx zimxsiu camxkow, qycc liam quixnarr siuw longxsimx Sinx Six, laii jan kuiwlat. Ix ee hniax ing ciuw senr, kax tad, qunr qongr, qaur buew ving'iuw ter ix qiujingg, dyrr jiamrsii vangr ix.

Derr go jam:

Siuwjaii Luxlunn qongw, "Siyxdi liw narr m tniax hniax ee ue, itbi jipbee, guaw guan ing siw qiyr liw cnew." Dyrr ing syh-aw vak qadi ee amrqunw, qadi cuix, kuir decbeh dng. Qajair u langg qra ix tauw, jiacc byy sunxsid snewmia.

Derr lak jam:

U jit zit, inx tuax Ciacbew Hniax qaur tniamngg gua, hiongr bogjuw ee binrjingg, syh-aw vak dirr ciuruex, tec hniux qiyr ix diyhh vair. Ix m tranr, dyrr qra ix diaur dirr ciu-dingw hnair laii hnair kir. Ving'iuw qiujingg, jiacc qra ix vangr.

Derr cid jam:

Qycc jit zit, Ciacbew Hniax duxdecc qidyw, inx hniax qiyr langg' ing ticlen qra ix vak dirr dyckax. Go zit quw m hro ix jiac, cuir dax auu kuah, pruir cuiwnua qed qui' der. Qajair Qiuwjuw qapp ix dilehh. Ix suizenn duw diyc hiacc dua qankow, jongw .si simx ving'anx; qaur buew u qra ix tauxvangr.

Derr veh jam:

lurqycc jit zit, jiahvng ee sii, Ciacbew Hniax decc qamxsia Jruw. Inx zi-syw knuar .diyc, dua sniax jiuwme, saixlang diongrhux qycc qra kunxdiok. Laurbyw qapp hniax henr cud okbin qongw, "Liw qyxzenn m kingw vrue qxaur, dikkag diyhh qnuaw cud, benw bag lasamm qadingg." Ciacbew Hniax qongw, "Guaw qiwzenn zimrsig Iasox si Qiuwjuw, vangwsag jitt xee, byy vadd xee, Jruw e qiur langg, guaw zimrsig jitt diauu lo si tenlo; vangwsag jitt diauu, byy vadd diauu hro langg e did diyc uac. Guaw iarr cimx sinr Qidokqaur soxx qongw ee Sinn si congwjy uxdiu ee jinx Sinn Tnive Siongrder. E hai siw sinkux, be hai siw linghunn :ee mrbenw qniax. Dnaxx guaw qaur siw quatduanr m vangwsag lasox, quatduanr m vrue qxaur."

Hniax qapp laurbyw tniax qaur anxnix, buhuad-kyxsix. Inx kir camsiongg, qetqiok qnuaw cud, duarmngg dyrr qnuaix.

U lo byy cur, sinwdoo jiauhux.

Hitt diap, ix byy duar ijniuu, iarr byy duar lorhuir. Tnix si qnuaa, snxax qycc vyc, vakdow iaux, vikced qidyw qriuu Jruw kuix qngbingg ee lo. Ix dyrr kir hiyh dirr Queh Singw ee qrex quixnarr zit quw, camsiongg cue taulo ee su. Singw Hniax qongw, "Diyhh kir Qagi vaiwtog tuandyrsux."

Ciacbew Hniax vunxsinx qongw, "Guaw kir Qagi, tuandyrsux jabhunx dongjingg, ter guaw siaw puex kir Dailamm mng taulo; hitt ehngx qidyxhue, dairqex vikced ter guaw qidyw, qriuu Siongrder kuix lo."

Tnix qngx, Goo Sensnix qongw, "Dnaxx Dailamm mrbenw kir, Siongrder u kuix lo, Giamjingg Siyxyc kiamr jit miaa sensnix, liw tangx kir hiax jyr qawyc ee qangx, qaiww u qihue tangx hogsai Siongrder." Ciacbew Hniax tniax jit xe hnuahiw qaur qik, qamxsia Siongrder.

Goo Sensnix dyrr tog Ngg Seqingx (Ngg Sinwqii ee laurve) cuarlo kir Giamjingg, iarr tog diamr dirr Giamjingg ee tuandy Jiux Vorhaa borjip hagsingx, qriuu Jruw hro inx nng langg ving'anx qauwui.

Nng langg duxjiacc cud Qagi ee Saimngg gua, duw diyc Ongg Kimm Hniax, mng qongxx, "Linw beh kir dyc'ui?" Seqingx rinr qongxx, "Cua jitt xee hniadi beh kir Giamjingg qar qauwhue ee siyxyc. Ix uirdiyhh sinr Jruw, hro laurbyw qapp hniax dua kunxdiok, suacc qra ix qnuaw .cud .laii." Ongg Kimm tniax liauw simx snex kyxlinn, qongw, "Tngwciackax qawyc jin' vutgnaw", dyrr trngr qadi soxx cing ee ox vowee sangr ix, qycc tec sir-vah jnii hro ix jyr lorhuir.

Inx dirr hiax borjip hagsingx jap-cid miaa, muixx nii sokqimx jap-cid kox. Ciacbew Hniax nng kox hro laurbyw, ing snax kox jyr ihok, brew ree, buec, by, iauxx jap-zi kox jyr jit nii ee huexsit qapp jabhuir. (Dng' hitt sidai, muixx langg muixx guec juewjiyw diyhh kox vnuar ginn jiacc e doruac.)

Anhiyczit hueriuw laii lexvair. Inx puer cunx ee cair, caiwvow, imwsni, qiamm quex-aw. Ciacbew Hniax saur saur jyr dxuix laii dorqiamm, qycc qadi sew snxax, juw vng.

Suizenn jin' kikkow, mrquxx ix simbak ngr Jruw dirr sibzirqer ee qankow laii did diyc an'uir. Dui' anxnix, ix qamxqag viw bue sinr Jruw ee sii ee hiongxhog simx kacc ving'anx.

Henr srinx hro Jruw, juanbu singwqangx.

Ciacbew Hniax zedsimx hogsai Jruw, Goo Bunvinx Sinsnex (Qebuw Jig) cuijenr ix zip Sinhag'ngi tagceh. Ix dirr 1892 nii cutgiap, siurr pair druar Giamjingg, au .lai juanxkinn kir Maxqingx. Dui' Maxqingx ngua laii Jionghuar, dirr hiax sir nii jyr tuandy, jap-lak nii jyr bogsux. Ixau Qauwsurhue pingwcniaw ix jyr sunhuee ee qangx jap nii quw, jyr qauwhue ee qangx sir-jap gua nii; cid-jap huer siter, laii kiarkiw dirr Dauxlak jyr juriuu tuandy, byy sniu vadd mic surgiap.

Ix u snax xee jaboxqniaw, u qniaxsair, u sunx-aw, longxx si kyxcuw ee langg. Ix itsingx vowdy, druar qauwhue, srunn hueriuw lylok punpyx, uirr Jruw siurr kow. Dngsii Zidvunw dnaxx jiacc jiamr Pneoo, Zidvunxqnuax bingrling ix qapp inx laii Daiuann; m, bering .did. Quer laii Daiuann ixau, qunqnuax knuar ix diongsit, dyrr duiww ix qongw, "Liw benw qycc kir Pneoo tuandy, liw druar qundui, jionglaii unxdangr e dua huwquir." Ciacbew Hniax qongw. "Guaw ixqingx henr srinx hro Iasox, m qnaw vrue Iasox ee xinx, guaw quatduanr m qnaw uiqec Siongrder ee bingrling, huwquir m si guaw soxx air." Zidvunxqnuax m qnaw lauu ix, sniuw ix ginn jit hrongx. Limm Sensnix jiauwqu kir Pneoo jyr qangx.

Hniadi ar! Lanw u quiw xee langg cincniu ix anxnix juansimx dirr Tenqog?

1939 nii Jabzi-guec, bogsuniuu kir jaboxqniaw ee cur decc cri qxex simsig, nauxvinhed dyrr anxnix kir joxqex. Dirr 1943 nii, u jit zit, Limm Bogsux dirr hitt jaxkiw vakdow tniar, qaur ehngx dyrr qapp sewqanx suah, hiongxsiu veh-jap-lak huer. Inx nng xui qaiww cincniu Elijah jre qngxlehongx jnriu tnix, liamvnix qaur hitt xee sinx sinx ee sewqair, banrsiu buqiongx.