myth_6

THE POWER OF MYTH -6

Bunchhai huan'ik

LUXSINGG EE LEXMIC

Uixdai luxsinn ee sinue, qauwdy soxu ee jiongwsingx juvix;

an' juvix, liw e kaisiw himsiongw dairde vunxsinx ee singwqed,

in'ui dairde si luxsinn vunxsinx.

B: duiww jruw ee qidyw si anne kaisiw :ee “gunw jairr tnix ee ve ...” qamxx u kyxlingg “lanw ee buw ...” kaisiw?

J: jex si siongrdingsingr ee iwsiong. Soxu jongqaur/ sinue iwsiong, si jixzin iwsig ee mow janbin/ zinlui simlingg kyxlingg ee qinggiam lingxhik. Jiaxee iwsiong soxx qikhuad ee qinggiam/ taiwdo, jo lanw sukyw zinlui junjai qinguann ee ywvir.

U quaw jongqaur ixx buxcinx jywuii juxiaur guantauu. Maxmah viw vaxvah kacc jiapqin ginxaw, in'ui ginxaw ui' buxcinx laii cutsir, zimrhyy ingzii derr id qinggiam si maxmah. Guaw ciangjai zinruii sinue si buxsingr iwsiong ee singhuaa/ lanw qongw dairde ji' buw/ EGYPT u soxui tnix-buw NUT luxsinn, dairviauw jingxqyy tendongg ee huanruii.

B: guaw dirr EGYPT jit jxy sinbiy ee tenvongg, derr id vaiw knuar diyc jitt xee NUT sii, cimx ~ siurr qamxdong.

VAXVAH DIRR DYHH ?

J: guaw jaix hitt jxy sinbiy.

B: NUT hro langg sanxsingx qingwuir, belangg ee digjid byy der viw.

J: si ar, luxsinn ee quanliam/ liw an' maxmah hiax laii cutsir/ byy itding jaix vaxvah si'angw/ kyxlingg ixqingx sixbongg ... dringw sursit siongquanx.

Binjok ligsuw dngg six ciangjai u anne ee qowsu : inghiongg cutsir sii, hurcinx ixqingx quewongw/ iacc si dirr qitnax soxjai, zenau, inghiongg kaisiw jauxcue vaxvah.

Iasox dingg cutsir ee qowsu, vaxvah si tnive, jiwjiyw siongrdingx iwgi anne qongw. Iasox qniaa hiongr sibzirqer sii, qniaa hiongr ix ee vaxvah, byy qor maxmah/ sibzirqer siongrdingx dairde, qisit dyrr si siongrdingx maxmah. Dirr sibzirqer-dingw, Iasox qra sinkux lauu hro snebuw, zenau qniaa hiongr hitt xee ciausewsiok ee jiongqik sinvir laiguann, ix ee hurcinx.

B: jitt xee cue ve ee qowsu, dirr ligsuw-siong duiww lanw jyrsingg sniaw ingxhiongw ?

J: jex si sinue diongriaur juxdee. Jerje ham' inghiongg sing'uac iuxquanx ee qowsu, dy' e cuthen liyc aw ham' hurcinx siongquanx ee jingjed. Ginxaw e mng “maxmah, vaxvah dirr dyhh?” “liw ee vaxvah dirr mow soxjai”, zenau, ginxaw kaisiw kir jauxcue.

Dirr <ODYSSEY> , ODYSSEY li qrax camqax TROY jenwjingx, qniaw TELEMACHUS iauxx qycc si ngix-aw, jenwjingx lensuar jap dxangx, dngw laii ee vnuawlo, qycc dirr naxx sinue ee Dedionghaiw sinvir sewqair jap nii. Luxjenwsinn ATHENA laii qaur ixqingx zi-jap huer ee TELEMACHUS binrtaujingg, qongw “kir cue liw ee hurcinx.” m jaix vaxvah dirr dyhh? Kir mng TROY laurjiongr NESTOR “liw sniu, guaw ee vaxvah kyxlingg dirr dyhh?” “kir mng haixsinn PROTEUS.” anne, TELEMACHUS cutmngg cue vaxvah.

B: dirr <STAR WARS>, tnikonglangg LUKE qra dangpnua qongw “jin' hibang jaix guaw ee vaxvah.” jauxcue vaxvah ee iwsiong jin' qamxdang langg, uirsniaw byy suncue maxmah ee iwsiong neh?

LIW EE MIARUN SI LIW EE SINGWQEH

J: buxcinx snex liw/ cri liw/ qar liw, itdit dirr srinx-vnix qaur itding nihuer, diyh'air kir cue liw ee hurcinx.

Huathen hurcinx si cue diyc liw jurqiw ee zinqeh digjid/ miarun. U jit jiongw qongxhuad zinruii, singwqeh uituann laijurr vaxvah, sinkux/ simx laijurr maxmah. Liw m jaix liw ee singwqeh, danrsi liw ee singwqeh dyrr si liw ee miarun. Huathen liw ee miarun, jiacc qra jauxcue laurve jitt xee siongrdingx iwgi viauxsi cud laii.

B: cue diyc liw ee vaxvah, dyrr cue diyc liw jurqiw, qamxx driyc?

J: Ingbunn u jit zri, dirr vaxvah hiax did diyc “voxsiongw (AT-ONE-MENT)”. Liw qamxx e qir did Iasox jap-zi huer sii, dirr JERUSALEM cue byy lo ee qowsu! Ix ee verbuw siwqer jauxcue, juewau huathen ix dirr biy ham' jit qrunn huatlut poksu dam'ue. Verbuw mng “ liw uirhyy vangr gunw byy quanw neh? Uirsniaxmic hro guaw damsimx jiaujyx neh?” “linw qamxx m jaix guaw rair hagsip hurcinx ee surgiap?” hitt sii Iasox jap-zi huer, duxx kaisiw cingcunqii, suncue jurgnow ee lenlingg.

B: danrsi dirr guansiw siarhue, uirhyy e junqingr luxsingr ee sinn/ uixdai ee luxsinn/ dairde ji' buw neh? Jex si jnuaxngiu jit huesu?

J: juxiaur ham' longgiap bunhuar/ siarhue/ toxde iuxquanx. Luxzinn ee sing'iok hyxcincniu dairde ju'iongw sidbut/ cnia'iongw qniaxzii cniurr cauxbak qang/ ham' dairde qangrkuanw sinqii/ inx si siongquanlenn ee. Ju'iongw snewmia hingtew ee lingliong itdanr zinqehuar au, dyrr ixx luxsingr hingsiong cuthen. MESOPOTAMIA vnengiuu/ EGYPT NILE Hyy snaqakjiux/ jaxqii longgiap bunhuar, sinue juxiaur hingsiong dy' si luxsinn.

Lanw ixqingx huathen quixarr vah xee Aujiux Sinjiyhkir Sidai ee luxsinsiong, cavutdyx byy zimrhyy lamsingr ee sinsiong. Guqangw/ ngiuqangw/ qitnax luirsu iaxdix ... dringw dongrbut, u sii e virr iong laii dairviauw lamsingr ee lat, danrsi luxsinn si dongsii ui'id knuar diyc ee sinbingg hingsiong.

Dng' luxsinn jniajyr jyrbudjiaw sii, ix ee sinkux dyrr si uxdiu/ ham' uxdiu qang jit hxang su/ si liw dirr EGYPT sinbiy denrdongg, soxx knuar diyc NUT ee iwgi. NUT si jingxqyy snewmia uxdiu ee juanvo.

B: liw qamxx e qir .did, NUT tunjiac taiwiongg hitt vorhun dosiong?

J: jitt xee dosiong beh viauxdat ee iwliam si, qra sehongx ee taiwiongg tunx lyc kir, zenau sanxsingx danghongx ee taiwiongg, dng' taiwiongg tongx quer ix sinkux sii, si amwsii.

B: duiww sniu beh qaixsueh uxdiu sinqii henrsiong ee langg laii qongw, ixx luxsingr zinbut laii qaixsueh snewmia henrsiong, si jin' jurzenn ee dairjir.

J: m na anne, ixx dethak quandiamw knuar, luxsingr dairviauw huanwsiong, cniurr dirr Inwdorqaur ee jyrbut luxsinn, qaur dnaxx iuguann si juxiaur sinbingg siongrdingx.

KANT dethak ee juaniongrsuu, luxsingr dairviauw soxui “binxqamw ee hingsid”, si si'kongx vunxsinx/ ciauuat ix ee ywvir si ciauuat soxu duiwtai :ee. Jitt xee ywvir m si lamsingr/ m si luxsingr. M si “si”, marr m si “m si”. Itcer dy' dirr luxsingr ji' lai, jiongww sinn si ix ee qniaxzii, liw soxx sniu e diyc :ee/ knuar e diyc :ee muixx jit hxang, dy' si jyrbut luxsinn ee sanxbut.

Guaw bad knuar quer jit vxo iuxquanx guanhingjid ee kyhak denrngiaw, lueriongg huisiongg jingcaiw, duiww guaw si jit xee kexsi. Guanhingjid vutduan liudong, byy jit kig tingg lyc laii. Ursii ixx moxjiongw hongsid lrauu, zenau sokjy mow surbut / u sokjy surbut ee amwlat.

Guaw dirr Vakqajiux knuar quer jitt vxo denrngiaw au, en' haixhnua jit lo sraiw ciax lyc laii, soxx qnir diyc :ee, si gubuw ee guanhingjid tunjiac cauxvox ee guanhingjid; jiauw guanhingjid liac juiw-lai hii ee guanhingjid, ... Naxjunxx knuar diyc jit xee sanxsingx banrsu-banrbut ee byy drew cimknex, danrsi muixx jit xee hingtew dy' u inx jurqiw ee iwjir/ kyxlingsingr, jex marr si sanxsingx iwgi ee soxjai, m si guanhingjid vunxsinx.

B: lanw qycc dngw laii dramm INDIANS, inx siongsinr dairde sangr hro soxu surbut snewmia/ lingliong. Liw bad inxiong UPANISAD jit dnxua ue “liw singjiu liauw amwkongxsig ee jiauw/ marr hro ligsig ingqyx snex cud angg bagjiux; liw duiwtai sicnar cincniurr jurqiw ee qniaxzii/ congwjy liauw suwquir haixhnua. Liw, byy kixtauu/ byy jiongbuew, ham' sinsingr hab'id, banrbut ui' jiax snetnuar.” jex si qongw, lanw ham' dairde si qangrngiu :ee, qamxx si?

Dirr kyhak soxx huathen/ qionglik jingwbingg-ha, qamxx qongw jitt jiongw sniurhuad be siausid? Lanw jitmaw jaix sidbut m si ui' sixlangg sitew huad cud laii :ee, si jiauww inx ee jingxjiw/ toziangw/ zidtauu huatjig singdiongw ee. Qamxx qongw NEWTON m si siaubet sinue?

J: guaw sniu sinue qycc laii ar. Juewqin u jit xee siauwlenn kyhagqax, iong “qi'inx hingtair judniuu” jitt xee bingsuu, suecbingg jitt xee judniuu sanxsingx liauw snewmia hingtew. Hex dyrr si jyrbut luxsinn, sanxsingx hingtew ee judniuu.

B: jex duiww lanw u sniaw iwgi?

J: viauxsi qaix jauxcue snewmia laiguann, dyrr si liw ee sinkux/ sneliw hingtair ham' jitt xee hro jniahingg ee lingliong, u sniaw quanhe? Byy lingliong ee sinkux m si uahlangg, qamxx m si? Dirr snewmia-lai, lanw ersaih kuhunx sinkux ee snewmia/ lingliong/ iwsig ee snewmia.

Dirr Inwdo siongrr poxpenr ee jiongqik siongrdingx, si hurjig snetnuar qniaxsunx, sinn ee LINGAM, cngx zip luxsinn YONI ee dosiong. Dng' liw bingngiu jitt xee siongrdingx sii, si decc bingngiu soxu snewmia kaisiw ee hitt jit kig. Jingxqyy snewmia huatsingx ee ywvir, dirr jitt xee dosiong virr siongrdingsingr viauxdat cud laii. Singr ee ywvir dirr Inwdo/ sewqair dairvorhun derkux, dy' si sinsingr ee ywvir, si snewmia huatsingx ee ywvir. Snex qniaw ee hing'uii si uxdiu ee hing'uii, virr zinruii si sinsingr :ee. Siongrr erdangr dairviauw sinn qra snewmia lingliong juwzip si'kongx ee siongrdingx, si LINGAM/ YONI, si lamsingr/ luxsingr congwjyrlat ee qethap.

QAXSUW LANW QIDYW, GUAW EE BUW...

B: Narr dirr ligsuw mow jit xee si'kig, lanw kaisiw anne qidyw qongw “guaw ee buw”, m si “guaw ee ve”, duiww lanw u sniaw iwig? E duar hro lanw jnuaxngiu ee simliw jongrtair?

J: dongzenn duiww bunhuar singwqeh sanxsingx simliw ingxhiongw. Vixzu, se'ngiuu bunbingg si dirr NILE Hyy/ TIGRIS --- EUPHRATES Hyy/ INDIAN Hyy ixqibb aurlaii ee GANGES Hyy ... dringw lrauu .quer ee kuhik cutsir ee. Jiaxee derkux jongvair luxsinn. GANGES vunxsinx si luxsinn ee miahy.

Zenau guarjok cimhuan/ jitt xee surqnia ui' seguann jingg sir sewqir kaisiw/ zuxx laii zuxx giamdiong. ui' vakhongx/ lamhongx zip laii, jit xia qongjiamr jerje sniaci. Quriog congwsewqiw derr it jniux, JACOB ee jogzinn dirr SHECHEM uaxqaiw sii ee voghingg, jiaxee hionghiongg cuthen ee iubok binjok, jit mee dyrr huixdiau itcer. Zibcimx ee SEMITIE si knuar ngiuu :ee/ INDO-EUROPEAN vorlok si knuar guu :ee, ixjaw longxx si paclac :ee, soxiw qivunw-siong si iaxbann bunhuar. Lacho si satsings :ee, narr si vangwci :ee, marr si satsingx, in'ui vutduan duer juiw/ cauw suaw, ingxuanw ham' qitnax binjok huatsingx ciongdut/ jiamwiuw langg' ee toxde. Jiaxee cimhuan hing'uii cua laii jenwsinn/ luii-sinn, cniurr ZEUS/ Iahyhuaa dyrr si.

B: qamxx si qiamr qapp sixbongg cuxdai liauw lamsingr ham' snetnuar sing'iok?

J: diryc! Virr dongwjyr qangrkuanw :ee.

B: liw bad qongw quer jit xee iuxquanx ciadyw buxsingr luxsinn TIAMAT ee qowsu?

J: guaw sniu, jex erdangr virr knuawjyr quanqenr ee guanhingg surqnia.

B: liw qamxx qongw hex si ligsuw quanqenr si'kig?

J: ai lar! SEMITIE cimliok ixx buxsingr luxsingg sinue hertongw sewqair, lamsingr sinue venwsingg juxliuu, buxsingr luxsinn u damrvyc venwjniaa a'maw qxib ee ligsuw qurjig/ hitt sii duxx si BABYLON sinx sniaci dngdecc kiw laii. Jiaxee jaxqii ee sniaci, u inx jurqiw ee vyxho sinn/ luxsingg.

Dewqokjuxgi kinghiongr ee binjok digsingr si e iwdoo qra inx derhngx jurqiw ee sinn, tuisag hro jniajyr jingxqyy uxdiu ee juxjnaiw, qitnax sinbingg dy' pah cud langw gua. Sidhen jitt xee iwdoo ee hongsid, si siaubet dongde guan'iuw ee sinn/ luxsinn. BABYLON MARDUK sinn jinwjingg dyrr si buxsingr ee sinn.

Jitt xee qowsu si anne qongw ee: u jit dua qrunn lamsinn dirr tnidingw diauwkuix huergi, muixx jit xee lamsinn dyrr si jit liap cnxex, inx tniax qongw uxdiu guantauu buxsingr luxsinn TIAMAT decbecc ixx dua hii/ iacc si dua lringg hingtai cuthen. Dycc jit xee sinn u iongxkir laii hiongr luxsinn tiaujenr? Dongzenn u iongxkir :ee, dyrr e jniajyr hitt sii uixdai sniaci ee sinn, in'ui ix dyrr si iongxjiaw.

Dng' TIAMAT kuix cuir sii, jitt xee BABYLON siauwlenn :ee, siongr pang qra hongx sangr zip ix ee auu/ vakdow, qra siah cruir tiacqaiw, jiong' ix ee sinkux sokjy cud tnide, guancox ee junjai qaixsnuar, sinkux jniajyr uxdiu jitt xee juxdee, ixx jerje hingsid cuthen dirr jerje sinue-diongx. PURUSHA si Inwdo sinbingg, ix ee sinkux dyrr si huanxngiar cud uxdiu ngiaxsiong.

Dirr guan'iuw buxsingr luxsinn sinue-diongx ee buxsingr luxsinn jursinx si uxdiu, soxiw MARDUK uixdai congwjy hing'uii si qex :ee, byy su'iaur qra luxsinn tiah cruir qycc johap congwjy cud uxdiu, ix jaw dyrr si uxdiu ar. Danrsi ixx lamsingr diongsimx ee sinue kaisiw kongwjer itcer, “ix” jin' binghenw venwjniaa jyrbudjiaw.

B: zenau juwsinlik qycc ui' jyrbut luxsinn juanxii qaur inx ee qniaw --- jitt xee siauwlenn/ u jingwdi iaxsimx qycc qiaugno jurhur ee sinn ...

J: jitt xee juwiwlat digvet virr juanxii qaur BABYLON lamsingr jongxdog srinx-siong.

B: soxiw buxsingr siarhue kaisiw niurdo hro jit xee ...

J: or, qiwguann jingg, iokk 1750 nii, buxsingr siarhue dyrr qetsog ar.

B: henrdai u luxsingr qongw, jyrbut luxsinn ee jingsinn ixqingx virr danr driau go-cingx nii ar, ui' ...

J: byy go-cingx nii hiacc quw lar! Ix si qoxdai GREECE siqii Derdionghaiw kuhik jit xui huisiongg u lat ee sinbingg, dirr ROMA Tenjuxqaur tuantongw, jaiwdo ixx singwbuw MARIA ee sinhun cuthen. Liw dirr ligsuw-siong cue be cud ngiaa quer jap-zi ~ jap-snax sewqiw FRANCE Tenjuxqauwdngg, hiacc jongvair luxsinn ee tuantongw, muixx jxy qauwdngg longxx qiyr singwbuxdngg.

B: si ar, danrsi dongsii soxu ee jongqaur girdee jiangxag dirr sinhu/ juxqaur ... lamsingr ciuw-diongx, inx si vaitig luxsingr :ee. Bylun jitt xee luxsinn hingsiong duiww sinwdoo u jnuaxngiu ee iwgi, qaqiongg iwsiong ee bogdig, kiokk si iu' lamsingr juxkongr.

J: liw erdangr qiongdiau jitt diamw, guaw zinruii jitt xee lunrdiau sniu' qiongg, hitt sii marr u uixdai ee luxsingr singwdoo. BINGEN ee HILDEGARDE, si u qraur lat ham' INNOCENT III sna' vixping tihh, qycc u AQUITAINE ee ELEANOR, guaw byy zinruii diongsewqiw u dycc jit xee ee dyrdig, vniar e ngiaa ix. Lanw jitmaw dongzenn erdangr surau Kongxbingg laii sna' jnelun dongsii ee jinghingg, danrsi hitt sii luxsingr ee cuxqingw juadduir m si hiacc camw.

B: jiaxee luxsingwdoo byy jit xee jniajyr qauwjongx.

J: jyr qauwjongx vingrr byy sniaw liauxvutkiw, hex si quanxliw ee jitbu. Byy jit xee qauwjongx kyxiw jniajyr Qidog ee maxmah --- singwbuw. Henrser u jerje qaksig su'iaur vnuaenw, lamsingr ee qangjog si vyxho luxzinn.

B: hex si hurquann quanliam ee kaisiw.

J: luxzinn si siongpinw, sriok jenr ngiaa langg :ee. Duer diyc sniaci ee bedbongg, soxu ee luxzinn dy' e virr jautad.

B: liw dirr ceh dramm diyc anne ee lunliw ciongdut, <Cud Egipt Qir (EXODUS)> anne siaw “ liw vutqaix satsingx, liw vutqaix siauwsniu cur-vnix ee bow, mrqyxx byy qang derkux :ee dyrr byy jitt xee hanrjer, liw rair iong jin itcer taii siw hiaxee javolangg; inx ee hurluw erdangr cniuw laii jyr liw ee loriong.” Quriog Singwqingx anne qongw.

J: hex si <Quriog Sinbing Qir (20:11~14)>. Jiaxee qongxhuad si janvok :ee.

B: liw knuar, inx duiww hurluw qongw liauw sniaw?

J: inx qongw :ee iuxquanx Sinbing Qir ee su ngiaa quer luxzinn jerje. Ham' inx qecviah jogqunn vixqaur, HEBREW juadduir si cojann :ee. Jiaxee bunn ersaih qongw si duardysor siarqunn kinghiongr sinue-diongx, moxjiongw amwcangr sowjid ee qigduanx dairviauw. Ngua jit qxur qongw, air/ juvix jixsirr vyxliuu hro jurqiw ee jogzinn/ qniaxsunx, juvix jixsirr duiww jurqiw tuantew ee singguann; qongqig/ gigtai jiamduir vadd langg, duiwtai guarjok ee hongsid duxx si Sinbing Qir soxx siaw :ee.

Jitmaw sewqair ixqingx byy soxui guarjok junjai ar, dongdai jongqaur ee kywdee, si zuhyy qra juvix inxhiongr juann zinlui. Qongqig hing'uii neh? Jex si dongdai rair binrduir :ee, qongqig hing'uii/ juvix, qangrkuanw si jurzenn ee vunxlingg, qyckacc qivunw :ee, jiaxee jongxsi e huatsingx.

Jex si sneliw ee sursit. Dongzenn, dirr Singwqingx sidai dng' HEBREW qrongx zip laii sii, inx kaksit qra jyrbut luxsinn ee derui uanjuann buacsiaux. Quriog qiwjair CANAANITE luxsinn so iong ee zirhy si “kyxog ee surbut (ABOMINATION)”.

Ixx Led'ongg soxx qiwjair qowsu ee nidai jyr le, jitt nng xee byy qang sinue hertongw ee sewlat si horsiong siaudiongw. Quriog jerje HEBREW qok'ongg jongvair snuax sinn virr kenxjig, jiaxee snuax si luxsinn ee siongrdingx. HEBREW sinue dexjer jyrbut luxsinn ee kinghiongr si jin' qionglet ee, si INDO-EUROPEAN vorlok sinue hertongw cue byy ee, inx ee sinue ZEUS/ jyrbut luxsinn nng langg qethunx, jywhuew limx-jiac tid. Soxiw dirr Singwqingx ee jinghingg si jin' digvet ee le, lanw sehongx e qra luxsingr qangr lyc cuwiaur derui, si jiauww Singwqingx mosid sukyw ee sanxbut.

B: dng' liw qra luxzinn ngua jyr lamsingr au, liw ee simliw jongrtair byy qang lor, bunhuar ee penqenr marr byy gang. Zircniaw si unxjunw kir jyr liw bunhuar-diongx sinn soxx jyr ee dairjir, soxiw liw dyrr ...

QURIOK SIONGRDER CONGWJY BYY LUXSINN EE SEWQAIR

J: kaksit si anne. Guaw duiww sidjer jinghingg ee knuawhuad si anne: dairsingx si jyrbut luxsinn dua qxii giac quann ~, lamsingr sinbingg uanjuann byy diongriaur. Zenau jinghongw huanxdngw laii, lamsinn cuxdai luxsinn derui. Juewau si denxhingg lamsinn/ luxsinn horsiong ingxhiongw qaidnua. Vixzu, Inwdo si anne.

B: jex si ui' dycc laii ee?

J: si ui' INDO-EUROPEAN(Inwaux) binjok ee taiwdo enxvenr laii ee, inx byy uanjuann hiyxding luxsingr guanjig.

B: jairsikluw snex qniaw neh? Tudzenn, jyrbut luxsinn qycc ixx ginxaxdiyh (dongsinx) sunzenn ee hingtew cuthen, virr suanxding kaisiw uirr siongrder hingdong ee sinkux.

J: dirr sehongx jongqaur ee ligsuw, jex si qik cuwbi ee huatdenw. Quriog siongrger congwjy liauw jit xee byy luxsinn ee sewqair, danrsi quiling-diongx diwhui luxsinn SOPHIA cuthen, ix qongw “dng' siongrder congwjy sewqair sii, guaw marr jairr dniuu, guaw si Ix siongrr dua ee hixlok.” HEBREW tongtongw, siongrder qniaw ee qaiwliam si virr vaitig/ uanjuann byy kongqanx. MESSIAH jywuii siongrder qniaxzii, vingrr m si siongrder jinjniar ee qniaw, si iongxiuw siongrder digjid/ jungiamm, daddid virr knuawjyr siongrder qniaw ee langg. Guaw kakding HEBREW tuantongw, byy jairsikluw snex qniaw jitt xee quanliam. Vixzu, liw tak sir hok'imx sii, ui'id cuthen jairsikluw snex qniaw :ee si Luka Hok'imx, Luka si GREEKS.

B: Dirr GREECE tuantongw, qamxx u iuxquanx jairsikluw snex qniaw ee iwsiong/ tuansuad/ sinue neh?

J: or! Si lar! RITA qapp tengyy, imqanx luxongg PERSEPHONE qapp juaa-jingx, ixqibb qitnax jerje lerjingr. Jairsikluw snex qniaw ee qaiwliam, dirr GREECE sinue cinwcaiw cue dyrr u.

JAIRSIKLUW SNEX QNIAW SI SNIAW ?

B: dirr BETHLEHEM vingrr m si sinx quanliam. Mrqyxx jairsikluw snex qniaw si sniaw iwgi?

J: guaw sniu, huedab jitt xee bunrdee siongrr hyw ee hongsid, si dramm .jit .xe, Inwdo hertongw soxui simlingg huatdenw qaidnua. Dirr Inwdo, inx zinruii liongqud si iu' cid xee simliw diongsimdiamw joxhap ee hertongw/ hunvet dairviauw byy qang ee quansimx/ iwsig/ hingdong jancur. Derr id diamw si dirr dua dngtauu, dairviauw ing'iongw, uicii qivunw snewmia ee qonglingg.

Juaa dairviauw sneliw-siong vitzenn aplik ee siongrdingx/ luirsu jit xee ban ~ lunr ee na'auqngw, jixsirr vutduan jiac, jiac, qycc jiac. Qaxsuw lanw byy qewsiok vutduan jiac, byy langg erdangr uac lyc kir. Jex si jiahmic/ limjiac luirsu singwlew ee ywvir/ lanw jre lyc laii beh jiac ee sii, jin' jiyw e kir sniu diyc jitt jann iwgi. Qaxsuw jiac mic jingg qamxsia jruw ee undenw, lanw sidjer si qamxsia Singwqingx uirr lanw duar laii jiahmic jitt xee zinbut. Jaxqii ee sinue, langg jre lyc laii beh jiac, e qamxsia jiwguan hisingx jurqiw, laii beh hro langg jiac ee dongrbut.

UPANISAD u jit xee jin' bixbiau ee qongxhuad “or! Jin' suiw! or! Jin' suiw! Kaksit huisiongg ee suiw! Guaw si jiahmic, guaw si jiahmic, guaw si jiahmic! Guaw beh jiac! Guaw beh jiac! Guaw beh jiac!” lanw jitmaw ixqingx m si anne knuawtai jurqiw ar, qycc jipquad jurgnow m hro jurqiw jniajyr jiahmic, qivunw-siong si hiyxding snewmia hing'uii ee taiwdo, si hro liudong ee snewmia tingg lyc laii. Qra jurqiw niurdo hro snewmia, si qamxsia dongrbut hisingx jurqiw qamguan jyr jiahmic, sanxsingx liauw uixdai sinvir qinggiam, u jit zit, siqanx jiong' e qra liw kamr byy .kir.

B: guaw si jurzenn, jurzenn dyrr si guaw.

J: si ar! Derr zi xee simliw diongsimdiamw si ixx singwkiwquanx jyr siongrdingx, dairviauw snetnuar ee ciongdong. Derr snax si dorjaii, duiqiuu kuanlik/ kongwjer/ singjiu ee iwjir diongsimx, narr jiurr hurbin iwgi qongw, si kir jinghok/ jiangxkongr/ pacvai/ piwsniur/ apjer tnazinn ee diongsimx, qongqig ee qonglingg. Lanw zinrbad liauw Inwdo simliw hertongw ee siongrdingx iwgi au, e jaix derr id jicii snewmia ee qonglingg, si dongrbut vunxlingg; derr zi snetuann qonglingg marr si dongrbut vunxlilngg; derr snax kongwjer/ jinghok ee qonglingg, iaxx si dongrbut vunxlingg. Jitt snax xee diongsimx, siongrdingsingr ee uirdir dirr tuixtauqud/ kacngdauw.

Derr sir diongsimx si simjong, dairviauw packuix juvix. Dirr jit diamw likuix dongrbut hing'uii, jinwzip zinlui/ jingsinn ee lingxhik.

Jitt sir xee diongsimx qokk u jit xee siongrdingx hingtew. Vixzu, dirr dexjann derr id xee siongrdingx hingtew si LINGAM/ YONI, lxamm-luw singwkiwquanx qauhap. Dirr simjong diongsimx, jaiwdo ixx LINGAM/ YONI, danrsi kiokk ixx qimjid dairviauw jairsikluw snex qniaw ee siongrdingx iwgi/ si decc qongw, jingsinsingr ee langg jurr dongrbudsingr ee langg cutsir.

B: dirsii huatsingx...

J: dng' lanw simx ee jancur qakcnew diyc juvix, texzin camxceh/ qiongrdongg hunhiongw koxlan, si ham' tnazinn jywhuew singsiu koxlan ee qinggiam sii, dyrr huatsingx ar, si zinsingr ee kaisiw. Duiww jongqaur ee tamwsyh sukyw, marr si ui' simx ee jancur jitt xee qaidnua kaisiw.

B: liw qongw hex si zinsingr ee kaisiw, danrsi jiaxee qowsu, si sinn cutsir ee sikig. Jairsikluw snex qniaw dairviauw sinn ee cuthen.

J: si'angg si hitt xee sinn? si liw ar! Soxu jiaxee sinue ee siongrdingx jriw :ee si liw. Liw kyxlingg hamrzip sinue-diongx, zinruii hex jixsirr kecquanx ee sinue, liw e zinruii, Iasox ee jingqamw si ix zuhyy siurr kow ee qamxsiu, danrsi hitt xee koxlan qaix dirr liw srinx-siongx qamxsiu jiacc driyc. Liw si m si jingsinn-siong qyc'uac? Liw qamxx ui' dongrbut vunxsingr siw .kir, gniaa hiongr juvix huawsinx ee langg-srinx sinx snewmia?

B: uirsniaxmic ui' jairsikluw laii cutsir? U sniaw iwgi?

J: soxx cutsir :ee, si ui' jingsinn lingsingr laii :ee. Jex si jingsinn snewmia. Jairsikluw si iu' hni liauxqaiw sinn ee ue.

B: sinn ee ue cniurr derr id dy sicnar ...

J: si ar, tniax qongw, Vuddyy si ui' maxmah ee qyc'erlangx simjong bingdiamw laii cutsir ee.

B: simjong bingdiamw si sniaw iwsur?

J: si ham' simx iuxquanx ee jit xee siongrdingsingr dingsimx. Bingdiamw si “ngiko'aw-lai ” “huanrdiuu”.

B: Vuddyy si ui' hiax cutsir?

J: ui' maxmah ee qyc'erlangx cutsir, hex si siongrdingsingr ee cutsir. Vingrr m si jinjniar ui' maxmah qyc'erlangx laii ee, si siongrdingx iwsiong.

B: danrsi Qidog ham' liw/ guaw ee cutsir qangrkuanw.

J: si ar, danrsi Qidog si jairsikluw snex :ee. Qinqir ROMA Tenjuxqaur ee qauwgi, ixx jairsikluw singsanw au qycc huehok ar, ersaih qongw, sneliw-siong byy huatsingx zimrhyy qaixvenr. Siongrdingx iwgi soxx kansiap :ee, vingrr m si Iasox sinkux ee cutsir, si jingsinn-siong ee iwgi. Hex si jairsikluw snex qniaw soxx dairviauw ee iwgi. Inghiongg/ vnuawsinn-langg si juvix laii :ee, m si kuanlik/ singwiog/ uirr uicii singbut snewmia laii ee.

Jex si jaiwsingx ee iwgi, dng' liw kaisiw ui' simx ee jancur laii sing'uac sii, dyrr si jaiwsingx. Kacc qe ee snax xee jancur m si virr hiyxding, si virr ciauuat lor! Uirr simx hogbu!

B: qaxsuw lanw huedngw qaur uanxqow sidai, lanw si m si e huathen diyc qiuwsewjuw maxmah, singwbuw MARIA hingsiong?

J: MARIA ee hingsiong siongrr qoxlyw, sidjer-siong si EGYPT quanw tai'in ee ISIS luxsinn, py ix ee qniaw Taiwiongsinn HORUS.

ISIS LUXSINGG

B: ISIS luxsinn?

J: jex qongw laii uertauu dngg. Sursit-siong, itcer ixqingx venr qaxx jin' hogjap. ISIS ham' inx angx OSIRIS si jyrbudjiaw NUT luxsinn ee siangsnex qniaw. Inx lingrgua nng xee siauwlenn cinjniaa SETH/ NEPHTHYS, marr si NUT ee siangsne'aw.

U jit amr, OSIRIS ham' NEPHTHYS kunr dauwdin, kiokk qra dongwjyr si ISIS, liw erdangr qongw jex si srid qakcad ee qetqyw. Jitt amr au, ANUBIS laii cutsir, si OSIRIS ee duarhanwqniaw/ m si jurqiw ee bow snex :ee. NEPHTHYS ee angx SETH qra jitt hxang su knuar qaxx jin' giamdiong, qewue beh taii driau ix ee a'hniax OSIRIS. SETH amr ~ aw niuu OSIRIS lxan ee cunwciyh, qycc qiyr langg jy jit xee uanjuann sna' hap ee bixle jix.

Zenau, dirr mow jit mee jiongww sinn jurjip ee enwhue, SETH jah hitt xee jix qniaa zip laii, suanvyr zuqyw u zimrhyy langg lxan ee cunwciyh ham' jitt xee jix sna' hap, erdangr siux jyr vruee jongr ee lexmic. Enwhue-diongx muixx jit xee langg dy' cir quer, dongzenn lunn diyc OSIRIS sii, suacc huathen jin' bardah, cid-jap-zi xee sinn sui' ciongx cud laii, habjee qra OSIRIS jnrix zip qnuacaa, quar kamr kiw laii, kunxvak hyxser danr zip NILE Hyy. Jit xee sinn dyrr anne siw .kir .ar. Byy quanw dycc jit xee sidai, zuqyw sinn anne siw .kir, xe jit vo vitzenn si jitt xui sinn qyc'uac kiw laii.

OSIRIS ee sixbongg, dirr siongrdingx iwgi-siong, ham' NILE dagg dxangx dingrqii jyr duarjuiw ju'iongw toxde ee qonglingg iuxquanx, naxjunxx decc qongw, OSIRIS huxvai ee sinkux ju'iongw liauw toxde.

OSIRIS virr dauzip hyy au, en' hyy piaulauu, siongrbuew virr ciongx kiw kir SYRIA qingwlai ee hnua-vnix, snex cud jit jangg pangx qongwqongr ee ciu, qycc qra hitt xee jix vaukamr dirr ciurvag. Dongde ee qok'ongg duxx snex jit xee haursnex, beh kiw jit jxy qiongden, hitt jangg pangx ciu taiww bixbiau lehh, dyrr qra cyr lyc laii, jyr qiongden siongrr juxiaur duartniax ee nxiuu.

Jitt sii, kyxlenn ee ISIS, dng en' NILE hyhnua cue angx ee sinsix. Sinn jauxcue kanciuw jitt lui juxdee, si dongsii sinue qowsu juxiaur lueriongg. Luxsinn cue sitkir ee angsair/ aiwzinn, tauwquer driongx/ sixbongg, juewau jniajyr qiuwsiogjiaw.

ISIS qibsii qnuaw qaur SYRIA hongqiongx, pnri diyc ciongbuanw pangx bi dua dxen ee niutiau/ huaigii jex ham' OSIRIS iuxquanx, dyrr qexjyr qok'ongg ngex-aw ee lingbuw/ iong jingxtau'aw cri ingzii, vitqingr si luxsinn, uixkud zimxziok si u hanrdo ee. Vutqyr, ISIS jin' qac'ir jitt xee ginxaw, quatding beh iong huew siyx driau ix itding rair siw kir ee sinkux, hro ingxsingx. Liw jaix, ixx luxsinn ee lat ersaih hro ginxaw byy hro huew siyx diyc. Dagg amr dng' ginxaw dirr huew-diongx hangx sii, ISIS dyrr huawsinx jyr ngir-aw, dirr inx angx niutiau siwjiuuii vuex, jinjniar aivix.

Jit xia, ginxaw ee maxmah zip laii vangqingx, knuar diyc ix ee qniaw dirr huexloo-dingw, qniax jit diyy dua sniax huachiux, suacc hro jiuwgiw puawqongx, ginxaw rair sui' ui' huew-diongx qiur cud. Jitt sii ngir ixqingx venwhuee duanjongx ee lingbuw/ luxsinn, jiong' dairjir siongser qaixsuad, duiww hongho qongw, “sunsuar qra liw qongw, gunw angx dirr hitt qix tiau-lai,, zuqyw erdangr hro guaw jah dngw kir, guaw e huisiongg qamxqig liw.” qok'ongg tniax diyc jitt xee sinwsid, qinw qnuaw laii, qongw “dongzenn ersaih tihh.” qiyr langg suaxkuix jitt qix niutiau, qaux hro ISIS, vaux dirr OSIRIS-lai ee bixle jix, kngr dirr qok'ongg ee jit jiah junn-dingw.

Dirr dngw kir NILE snaqakjiux ee vnuawlo, ISIS qra qnuacaa quar henkuix, tex dirr angx ee srinx-siong, dyrr huai'in ar. Jex si ixx jerje siongrdingx hingsid, ciangjai cuthen dirr qoxdai sinue ee juxdee --- ui' sixbongg-diongx sanxsingx snewmia. Junn kyr hnua au, ISIS dirr lamwde cauw-vnix snex liauw qniaw HORUS; jitt xee ciuw py qniaw, simx sniu siongrder ee singwbuw qaksig, dyrr jniajyr singwbuw MARIA ee viaujunw mosid.

B: ngir-aw dairviauw hunxjiauw ee singwlingg, qamxx driyc?

VUEX DIRR VNUAWTNIX EE HUNXJIAUW

J: dirr vnuawtnix vuex ee hunxjiauw, poxpenr dairviauw luirsu Qidokqaur ee singwlingg ---

B: qamxx ham' sinsingr buxcinx iuxquanw?

J: qra buxcinx qowsiongw jyr singwlingg, si lar. Danrsi iauxx u jit xee sewjed beh dirr jiax voxciongx. Jitdor ee siyxdi SETH jitt sii vawjiamr OSIRIS ee ong'ui, mrqyxx beh jingwsid cruw diyc ong'ui, rair ham' ISIS qethunx. Dirr EGYPT ee dosiong genxqiur-diongx, ISIS dairviauw :ee dyrr si ong'ui.

Jre dirr ong'ui :ee si PHARAOH ISIS, ixx ginxaw jre dirr maxmah katau'ux ee hingtair cuthen. Liw narr kia dirr CHESTER qauwdngg jingg, saivingg jniawmngg knuar e diyc jit xee MARIA ee hingsiong, ginxaw Iasox jre dirr dingxbin, ixx ongjy hingtair, qunongg limqaur tenha ee vanrser cuthen. Jex dyrr si qoxlyw EGYPT tuann lyc laii hro lanw ee iwsiong, jaxqii sinhu/ gersudqax kik'ir jiapsiux jiaxee iwsiong.

B: Qidokqaur sinjid zinguann caixiong ISIS ee iwsiong?

J: kaksit anne. Inx jurqiw qongw :ee. Mow quaw qingbunn anne siaw “ixongw jixsirr sinue jiaxee hingsid, jitmaw ixqingx jingwsid dirr lanw qiuwsewjuw ee srinx-siong jaiwsingx.” jiax soxx qongw sinue hingsid, jriw :ee si, hiaxee siw qyc'uac ee sinn, cniurr ATTIS/ ADONIS/ GILGAMESH/ OSIRIS ... dringw. Qokk soxjai sinn ee sixbongg/ qyc'uac, dy' ham' guehniuu --- dagg qywguec luirsu sixbongg qyc'uac ee venwhuar iuxquanx. Guehniuu jaiwsingx su'iaur nng amr/ iacc si snax zit ee oamr, Qidog ui' bong qyc'uac marr su'iaur nng amr/ snax zit.

B: jex si sniaw iwgi?

J: dirr lanw sing'uac/ sukyw, u jit jiongw quewkir si sixbongg, birlaii si snewmia ee sniurhuad. Sixbongg jriw :ee si dongrbudsingr siw .kir, snex si jingsinsingr ee cutsir. Jiaxee siongrdingx huhy soxx dairviauw :ee, jongxsi jiaxee iwgi.

B: ISIS ersaih anne qongw “ guaw si banrbut jurzenn ji' buw, soxu jurzenn guansor ee luw-juxjnaiw/ sinlat lingxsiur/ dergak jiongwsingx luxongg/ tendongg jiongxsingx qingwdiong :ee. Soxu jiongww sinn/ luxsinn iu' guaw huawsinx laii cutsir.”

J: hex si jitt xee qowsu aurlaii ee qongxhuad. Laijurr derr zi sewqiw APULEIUS ee <GOLDEN ASS>. Jitt vunw ceh si siongrr jaw ee siyxsuad ji' id, juxqag si inghiongg zinbut, in'ui tamx iok virr venwjyr luu, rair tongx quer tongwkow/ qenwsiaur ee qanlann quewdingg, itdit qaur did diyc luxsinn ISIS qiuwsiok. ISIS tec jit qix muiquir cuthen (si sinn ee air, m si tamiok siongrdingx), luu rair jiac liauw muiquir au, huehok langg-srinx, danrsi jitmaw ixqingx vutjiw si jit xee poxtonglangg ziiw, si jit xee e huat qngx singhuaa ee singwzinn, qingquer derr zi crur jairsikluw snex qniaw ee qinggiam. Soxiw, langg erdangr ui' jixsirr dongrbut ee bacsinx iogbang, tauwquer jingsinn-siong ee sixbongg/ jaiwsingx. Derr zi crur ee cutsir, si huansongw hixlok ee jingsinn snewmia.

Luxsinn hro jex itcer huatsingx. Derr zi vaiw snewmia si jingsinn buxcinx laii :ee. PARIS/ CHESTER ee singwbuxdngg, dy' si lanw buxsingr qauwdngg. Lanw jiyh jinr-cud qauwdngg, dirr jingsinn-siong dingg cutsir.

IASOX IXX LUXSINN LAII QAUR ZINQANX

B: luxsingr u jit jiongw digvet ee lat hnor!

J: dirr jitt xee qowsu si anne, danrsi byy vitzenn jixu luxsingr jiacc u lat, marr ersaih tongquer lamsingr did diyc jaiwsingx. Vutqyr dirr jitt xee huhy hertongw, luxsingr jniajyr jaiww jy uxdiu ee jnuaguann.

B: dirr Iasox siw au sir-vah snax-jap-id nii, dirr EPHESUS diauwkuix huergi sii, suanqyr MARIA si siongrder ji' buw, qamxx si ligsuw derr id crur?

J: m si derr id vaiw. Sursit-siong, jitt jiongw qongxhuad dirr qauwhue ixqingx liutuann je nii ar. Danrsi juewau quatding jitt xee guanjig ee derdiamw EPHESUS, duxhyw si luxsinn ARTEMIS/ iacc si DIANA soxjai, ROMA Dewqog siongrr uixdai ee jongqauwsniaa. Tniax qongw, dirr huergi jinwhingg-diongx, lunrjnex jitt xee guanjig sii, EPHESUS ee jurbinn qunjiongr dua sniax ylyw MARIA “ luxsinn! Luxsinn! Ix dongzenn si luxsinn!”

Tenjuxqaur tuantongw, qra MESSIAH knuawjyr dairviauw qethap sewsiok/ jingsinlat ee HEBREW hurkuann quandiamw, uixdai luxsinn ee qniaw siw qyc'uac, qiuwsewjuw ee HELLENE quandiamw, jiamrr hab'id, bad u jerje anne ee qiuwsewjuw dingsingx quer.

Qinrdangx derkux, huanrnarr qangwlimm qaur sewqanx ee sinbingg, guanvunw dy' si luxsinn. Iasox juvix ixx guanvunw luxsinn qaksig laii qaur zinqanx, dng' ixx sewsiok sinkux siongrder hingboo henxsinx dirr jitt derkux sii, byy langg viauxsi huanxduir, dyrr si qongw ixqingx ingxhiongw liauw qiuwsiok. Singwbuw ee koxlan/ inx qniaw siurr lan, jitt nng jiongw knuawhuad, jiamrr byy hunvet, zuxx laii zuxx poxpenr. Guaw sniu dirr Tenjuxqaur, singwbuw jitmaw virr qongw si “qiongrdongg ee qiuwsewjuw”.

B: jex duiww lxamm luw dingsinx qethap teqiongx liauw jnuaxngiu ee suatbingg? Guansiw siarhue jin' dngg jit dnxua siqanx, luxsingr si juxiaur ee sinue iwsiong. Ham' jex dongsii junjai :ee, si lamsingr/ qongqig/ jenwsinn ee iwsiong, zenau, jin' qinw qycc dngw laii vnuaenw congwjy/ snetnuar qaksig luxsingr srinx-siong. Jex si m si suecbingg liauw lamluw jiqanx horsiong su'iaur duiwhongx ee qivunw iauqiuu?

J: si ar. Danrsi guaw gamguan iong ligsuw ee qaiwliam laii knuawtai. Cuwbi :ee si, jitt xee buxsingr luxsinn duxx si Inwdo hyqok derkux (INDUS VALLEY) ee Inwdo luxongg. Ui' AEGEAN qaur Inwdo Hyy, ix dy' si juxiaur zinbut. Zenau duer diyc INDO-EUROPEAN binjok ui' vag hiongr lamm cimzip qaur PERSIAN/ Inwdo/ GREECE/ ITALY, ixx lamsingr diongsimx ee sinue hertongw marr duer zip laii, qycc itdit ingxhiongw lyc laii. Inwdo si VEDA tuantongw, GREECE si HOMER-sid tuantongw. Iokk go-vah nii au, luxsinn jaiww cuthen. Qiwguann jingg iokk cid sewqiw, Inwdo sanxsingx liauw UPANISAD tuantongw, dngsii duxhyw si luxsinn dingsinx dirr AEGEAN bunhuar cuthen sihau.

Jitt qrunn VEDA sinbingg jurjip ee soxjai, inx knuar diyc jit jiongw quaiwqii venwhingg surbut cuthen, jit jiongw enbu ee mic. Inx mng “hex si sniaw?” byy langg jaix. Derr id ee sinn qenwgi qongw “guaw e cue cud dab laii.” sui' qniaa zip jitt xee enbu-diongx, qongw “guaw si huexsinn AGNI, e qra zimrhyy mic siyx driau, liw si sniaw?” bu-diongx jit qix cauxqyw vuex cud laii, lag dirr tokax, u sniax qongw “knuar liw jnuaxngiu qra siyx driau.”

AGNI huathen jurqiw byy hxuad diamw dyc jit qix cauxqyw, duiww vadd xui sinn qongw “jex jinjniar qiquair!” hongsinn qongw “hro guaw cir knuar mai lehh.” dng' ix qniaa hiongr jingg, qangrkuanw ee mic cuthen. “guaw si hongsinn VAYU, guaw e qra zimrhyy mic cuex jauw.” cauxqyw jaiwcur danr cud laii. “knuar liw anxjnuaw cuex.” hongsinn sitvai lor. Uat dngw kir. Suar lyc laii si VEDA siongrr uixdai ee sinn INDRA qniaa uaw kir. Dng' ix kyr qin sii, hitt xee iulingg huanwsiong siausid, cuthen jit xee sinvir/ bixle ee luxsingr, qra jiongww sinn qongw, “duxjiah henrsiong si gunw junjai qicow ee sirhuan, si soxu junjai ee jiongqik ywvir, jiacc hro linw u sinlat, marr erdangr sui'ir duat jauw linw ee sinlat.” Inwdorlangg hro jitt xee banrbut junjai qicow hyrmiaa BRAHMAN, si diongsingr bingsuu, m si iongsingr/ m si imsingr. Inwdo hro luxsingr ee miazi si MAYA-SHAKTI- DEVI, si “snewmia luxsinn qapp banrbut ji' buw” ee iwsur, dirr UPANISAD, ixx qauwdy VEDA sinbingg ee ju'tair cuthen, qra inx qongw jiongqik ee jinsit, ixqibb inx ee lat/ junjai ee laiguann.

LIW GUAW LONGXX U LAMLUW EE DIGJID

B: jex si luxsingr diwhui.

J: luxsingr hro banrbut snewmia, si snewmia ee laiguann, jaix banrbut laijurr dyhh. Hex si laijurr ciauuat lamsingr/ luxsingr ee sewqair, laijurr ciauuat u-byy ee sewqair, m si “si”, m si “m si”, ciauuat itcer susiongw/ simdir ee bingsiong.

B: Sin'iog u jit dnxua hyw bunzi “ dirr Iasox-diongx, byy lxamm-luw.” jiurr surbut jiongqik ee iwgi laii qongw, si ciauuat lxamm-luw.

J: rair anne, qaxsuw Iasox dairviauw lanw junjai ee laiguann, anne lanw juanvo si ix simdiongx ee liamrtauu ziiw. Iasox singjiu lanw bacsinx.

B: dirr liw/ guaw srinx-siong, dy' u lxamm-luw ee digjid, qamxx driyc?

J: sinkux si anne. Guaw m jaix hingsingg ee kaksit siqanx si dirsii, vutqyr dirr huai'in ee mow xee sikig, jin' binghenw knuar e cud ginxaw jiong' beh jniajyr javox/ iacc si jabow :ee. Guaw bogjingg sintew amwlat si hiongr digding mow xee binrsiongr huatdenw.

B: lanw ee zinsingx, pen'air mow jit xee kinghiongr, suacc apjer lingrgua jit vingg.

J: dirr Diongqog ximx-xiongg doo, hitt jiah osig ee hii, (iacc si jairr liw jnuaxngiu cinghox longxx hyw) lairbin u jit diamw vehsig, vehsig hii u jit diamw osig. Jex si uirhyy inx erdangr tongtaur ee guan'inx. Liw byy kyxlingg ham' liw uanjuann byy quanx ee surbut sna' qethap. Jex si uirsniaxmic qra sinn knuawjyr juadduir :ee, si hro guaw sniu be tongx :ee. “Juadduir” si ham' qitnax surbut jit diamw aw dyrr byy quanhe.

B: liw qongw jitt xee jingsinn juanxhuar/ qaixvenr, si m si qinqir cnia'iongw/ congwjy/ habjog, m si duiwkongr ... dringw luxsingr digjid laii ee? Jex qamxx si lanw tyxlun luxsingr guanjig ee hudsimx?

BUXCINX HRO QNIAW JURZENN SNEWMIA, VAXVAH HRO SIARHUE SINGWQEH

J: buxcinx air soxu ee ginxaw, gong :ee/ kiauw :ee/ jenrtangg :ee/ quaikiauw :ee, longxx qangrkuanw, bylun inx qywvet ee digsingr si sniaw. Jiurr mow hongbin qongw, luxsingr dairviauw duiww qniaxsunx vau'iongg ee air. Hurcinx penhiongr quanxqar qaksig, ham' siarhue detsu/ singwqeh kacc siongquanx ee. Jex sidjer-siong si siarhue vunxsinx unrjog ee hongsid. maxmah hro qniaw jurzenn snewmia, vaxvah hro siarhue singwqeh, dyrr si qongw, hro ginxaw zuhyy huathuix qonglingg. Huehiongr jurzenn vitzenn jaiwdo duar laii buxsingr guanjig. Gauw m jaix zuhyy ham' hursingr guanjig sionglenn, in'ui derqiuu ee qijer qionglet uahdang kiw laii, hex si lamsingr ee qonglingg, byy hxuad ircig jiong' e huatsingx sniaw sinx surbut. Mrqyxx erdangr kakding jurzenn e qycc laii.

B: soxiw dng' lanw qongw “jingxqiur derqiuu”, si decc qongw qiur lanw jurqiw.

J: si ar, soxu hibang siarhue erdangr iuxsow qaixvenr ee sniurhuad, rair danxtai zinlui simliw iuxsow qaixvenr, dyrr si jit jiongw juansinx qinggiam siarhue ee hongsid, jiacc u kyxlingg sidhen. Guaw zinruii jiurr jitt diamw laii qongw, quanqenr ee bunrdee jixsirr, liw qamxx guanrir zinrdongg hitt xee siarhue? hitt xee tuantew? Si zinrdongg jingxqyy derqiuu-siong ee zinlui? Iacc jixsirr jurqiw ee qokqax? Binjok? qivunw-siong, marr si dongnii Bixqog qenwqokjiaw soxx sniu ee bunrdee. Zuhyy qra jap-snax jiux lenhap jniajyr jit xee qokqax? Qycc be cimhuan diyc mow quaw jiux ee digvet lirig? Uirsniaxmic luirsu ee bunrdee berdangr iong laii sukyw jitmaw ee sewqiok?

B: dirr tyxlun jiaxee lamsingr/ luxsingr guanjig, jairsikluw snex qniaw, ixqibb hro zinlui zi-crur snewmia jingsinlat ... dringw quanhuaii sii, u jit xee bunrdee sanxsingx. Muixx jit xee sidai ee diwhuirjiaw dy' qongw, zuqyw lanw erdangr hagsip quer jingsinn sing'uac, lanw dyrr ersaih u sxen ee sing'uac. Huanrnarr langg dyrr si bacsinx, zuhyy quer jingsinn sing'uac? PAUL qongw, “bactew iogbang duiwlip diyc linghunn, linghunn ee iogbang duiwlip diyc bacsinx.” lanw zuhyy hagsip quer jingsinn sing'uac?

J: dirr qoxjaw, hex si laursux ee dairjir, qar lanw quer jingsinn sing'uac ee snuawsyh, hex marr si bogsux/ jongqaur gisid junjai ee lixiuu. Jongqaur gisid ersaih dingrgi jyr sinue ee jewdowhuar. Jiyh cam'uw jongqaur gisid, sidjer texgiam sinue sing'uac, cam'uw-diongx, langg kyxiw hagsip quer jingsinn sing'uac.

B: sinue qowsu sidjer si jixinw jit diauu tongx hiongr jingsinn sing'uac?

J: si ar. Liw rair u snuawsyh jiacc e ing tihh, diyh'air u luirsu derdoo ee mic, jiaxee snuawsyh/ derdoo dirr lanw srinx-vnix, qycc byy uanjuann qang. U quaw qandna' dramm diyc jurqiw tuantew ee lirig/ mow xee vorlok ee sinn, qitnax :ee, digvet si hiaxee ui' uixdai luxsinn/ uxdiu/ zinlui buxcinx soxx kexsi :ee, qauwdy jiongwsingx juvix.

Ui' juvix, liw marr e kaisiw himsiongw dairde vunxsinx ee singwqed/ si luxsinn ee jursinx. Dng' Iahyhuaa congwjy sewqair sii, ix ui' toxde jy cud lamzinn, qra snewmia vunn zip sokjy hyw ee hingtew-diongx. Ix vunxsinx vingrr byy junjai dirr ix sokjy ee hingtew-lai. Danrsi luxsinn dongsii dirr lai/ marr dirr gua. Liw ee sinkux si ui' ix ee sinkux laii :ee. Dirr anne ee sinue, lanw e texzin uxdiu ee zinrdongqamw.

BUHAN DUA, QIGLET VENWDONG EE UXDIU

B: hex si uirsniaxmic guaw byy kakding zinlui ee birlaii/ qiuwsiok, si m si dirr guartaiwkongx ee guan'inx. Guaw sniu, kyxlingg dirr derqiuu-siong, dirr sinkux-lai, dirr lanw junjai ee jnuaguann.

J: kaksit si anne. Dng' liw dirr guartaiwkongx, liw soxx jah :ee iauxx si liw ee sinkux. Zuqyw liw byy juanxhuar jitt sinkux, taiwkongx byy hxuad juanxhuar liw. Mrqyxx bad quaw guartaiwkongx, kyxlingg e jo liw liauxqaiw mow quaw dyrliw. Dirr jit vxag nng iac kuah ee uxdiu derdoo, erdangr knuar diyc lanw ginhyy-hxe dirr jerje ginhyy-hxe jiqanx, taiwiongg-hxe dirr jitt xee ginhyy-hxe. Ui' doo kyxiw liauxqaiw, lanw ixqingx huathen hiacc dua ee uxdiu, jiaxee derdoo qra guaw qongw :ee, si buhan qycc qiglet venwdong ee uxdiu.

Siwqewsnuar cingx-ig qycc cingx-ig suisii e vrong ee zedhut-iongloo, muixx jit xee dyrr si jit liap hingcnex (STAR), taiwiongg si qidiongx ji' id. Inx jerje e qra jurqiw vrong qaxx cruir ~ ~, jiaxee ingiax/ m jaix miaa ee jingkir, duer diyc kongkir koksanr qaur hng liuliux taiwkongx, jitmaw sinsingx ee taiwiongg-hxe, dyrr si iu' jiaxee ingiax ... dringw soxx snex cud laii ee. Ciauuat jiaxee ixgua, qyckacc hng ee jap-snax tnix gua taiwkongx tuann laii uxdiu sniax, jit dun jit jun, si uxdiu huatsingx guancox dua vogjar (THE BIG BANG) soxx sanxsingx hue'imx dexpyx. Mow quaw qewsngr ee qongxhuad, dua vogjar iokk huatsingx dirr jit-vah veh-jap ig nii jingg.

Jex si lanw junjai ee uxdiu, liw narr liauxqaiw jitt diamw, dyrr e bingliauw jurqiw si zuarr diongriaur! Liw jaix --- liw si dirr hiacc iauuanw buhan uxdiu ee jit siyw liap suax, kiokk erdangr qinggiam ham' uxdiu dirr moxjiongw iwgi-siong si ittew ee, jywhuew hiangxsiu soxu jiaxee itcer.

B: hng liuliux ee uxdiu ui' lanw jurqiw jiax sngr kiw.

J: ui' lanw jurqiw jiax kaisiw sngr.

huedngw tauu iac