cionghunx huathuix ee amwiwsig -10
Jung (Bunchhai huan'ik)
DERR JAP JNIUX HUANWSIONG
zuqyw beh quer jurqiw ee sing'uac,
diyh'air singdamx cywgo;
cywgo,
hro sing'uac jniajyr uanjingw.
1944 nicex, guaw vuahdyw siag dng kaqud, suar laii simjongrvne qycc huatjyh. Dirr amwiwsig jongrtair-diongx, guaw qinglik liauw jiamrsii ee jingsinn cywluan (Delirium) qapp huanwsiong, iycsniu guaw jiapsiu sangwsor ham' juwsia jniulyxiuu sii, si dac dirr sixbongg snuar-dingw. Jerje hingsiong criaux duarhingg, duanrding jurqiw qiongbecc sixbongg. Aurlaii horsu qra guaw qongw “ liw naxjunxx qingquer huanxcnix” ix voxciongx qongw, dirr decbecc siw ee langg, e qnir diyc jitt jiongw henrsiong. Guaw ixqingx qniaa qaur jiongdiamxjam ee vnix :a ar, m jaix guaw si dirr bang-diongx, iacc si hionghiw jongrtair. Bylun zuhyy, guaw srinx-siong huatsingx liauw jin' qiquair ee dairjir.
Guaw naxjunxx dirr quann ~ ee kongdiongx/ dirr hng ~ ee erbin, knuar diyc derqiuu jimr dirr canwlan nasig qonghuix-diongx; cimnaa ee haixjuiw/ jit der jit der ee liogde, kax erbin hng ~ ee soxjai si SriLanka, qycc quer si Inwdo dairliok. Guaw ee siriaw berdangr knuar diyc derqiuu-siong soxu :ee, mrqycc guarhingg cingcyw knuar .diyc, cngtangr naqngx guaruii ginqngx siamxsih/ derqiuu jerje soxjai si caixsig :ee, iacc si duar diyc cimligsig, cniurr ginkir kngr dirr kongkir-diongx sniu' quw venwsig hitt jiongw sikjuiw. Dywciuxvingg hng ~ soxjai u jit dua pxenr hngvox, si ngg duar angg ee Arabia suaboo, ginsid toxde naxjunxx dar diyc angqimx/ qycc laii si anghaiw, aurbin siongrr hng ee xui --- derdoo dywvingg dingxbinrqag,knuar diyc Derdionghaiw ee jit qag, guaw siongr hitt vingg quw ~, qitnax ee itcer longxx byy cingcyw/ marr u knuar diyc dar qaxx qui' xee duarseh ee The Himalayas, mrqycc hitt xee honghiongr hunbu qau ~/ byy ngr jniawvingg knuar, qandna' jaix jurqiw dng' decc vueli derqiuu.
Aurlaii guaw huathen beh knuar qaxx jiacc kongwkuah, iokk jit-cingx ingliw ee quando! Dirr jiax guaw knuar .quer derqiuu siongrr uixdai bixle ee qingxsiong.
Quancad damrvyc quw au, guaw juanw quer srinx laii, huathen jurqiw guanlaii si binrduir vakvingg, kajiacau si Inwdo Xngiuu. Aurlaii guaw naxjunxx dngxsinx hiongr lamm/ knuar diyc sinx ee qingxsig; byy qaiww hng ee kongdiongx knuar diyc jit der dua ojiyc, cniurr cnijiyc, u guaw ee cur hiacc dua, simrjiww qyckacc dua, dirr kongdiongx piaupuu, guaw marr decc piaux.
Bad dirr Bangladesh haixhnua qnir .quer luirsu ee dua jiyc --- laurdesig hueqongjiyc, u virr cak kangx jyr jit jxy biy. Guaw ee jiyhtauu dyrr si anne jit der osig dua jiyc/ u jit xee zibkauw tonghiongr jit qingx siyw jingtniax/ zibkauw jniawbin, jit xee bacsig oqngx ee Inwdo qauwdoo tiabkuann jre dirr jiyc-iw, cing jit niaw vec dngsnax, guaw jaix ix decc danw guaw/ guaw qniaa jnriu nng qxaix tonghiongr jingtniax/ dywvingg u lo tonghiongr sirbiy ee mngg/ busor ee siyw sinkamx, muixx jit xee longxx u dic-aw hxingg ee lapkut'aw, dni ~ ee iajixiuu, dionghngx u jit xee siyw iusimx/ iudingx qngkuann uiseh jitt snir mngg. Guaw dirr SriLanka camquanx Vudkixsi sii, kaksit qnir .quer jitt xee qxingw; duarmngg siwjiux vaii quiw let qangrkuanw ee iudingx.
Dirr guaw jiapqin tonghiongr dua jiyc zibkauw ee gamxaw sii, cuthen qiquair henrsiong: qamxqag itcer decc siausid; guaw soxx juwbak :ee/ qiqiuu :ee/ liaursiongw ee itcer, ixqibb derqiuu junjai ee huanxngiaw juanvo siaubyy, iacc si likuix guaw, jex si qik tongwkow ee quewdingg. Mrqyxx u quaw vyxliuu .lyc .laii, guaw naxjunxx iauxx vyxjunn qinglik .quer/ jyr .quer ee itcer, ersaih qongw, jex itcer ham' guaw dongjai, guaw si jex itcer, guaw ui' jex itcer josingg, guaw jurqiw ee ligsuw qowsingg, guaw k.-kaksit-s. qamxqag diyc: dyrr si guaw, “guaw si soxu junjai .quer qapp ixqingx uansingg ee surbut ee jongxhap.”
Jitt xee qinglik hro guaw qamxqag u qraur sanxciah/ kiokk qycc jabhun ciongsit. Guaw itbuu soxqiuu, junjai dirr kecquanx ee hingsid-diongx, guaw si quewkir qasiong qinglik .quer :ee. Dairsingx, huixbedqamw virr duat, iacc si cniuxqiab jiamr juxdyw derui; mrqyxx tudzenn jiqanx, qamxqag huar byy .kir. Itcer naxjunxx jniajyr quewkir, junjai :ee si qiwsingg ee sursit/ ham' ixongw byy quanhe. Songwsid/ virr tec jauw ee mic byy qycc kyxsiyh; sianghuanw, guaw u quewkir soxx qamxsiu .quer ee itcer, jex dyrr si itcer.
Qycc lingrgua jit hxang su, inxkiw guaw juwir: jiapqin biyrsi sii, guaw kaksinr jurqiw beh jinwzip jit qingx qongbingg duartniax, guaw e dirr hiax duw diyc henrsit-diongx qangrvuer :ee. Benw huaigii, guaw jiongbuew lixqaiw, guaw/ iacc si guaw ee snewmia sikhap let zip dycc jit dnxua ligsuw/ jiong' e jaix, dirr guaw jingg junjai quer sniaw/ guaw uirsniaw junjai/ guaw ee snewmia lrauu hiongr dyhh kir. Guaw soxx qinglik ee sing'uac duiww guaw laii qongw, cniurr jit xee byy kaisiw/ byy jiongdiamw ee qowsu. Qamxqag guaw si ligsuw ee jit jad, dingxe bunn longxx ixqingx kangbyy ar. Guaw ee sing'uac naxjunxx ui' jit dngg qnrua surqnia-diongx jriab .kiw .laii, jerje bunrdee iuguann byy did diyc huedab. Ix uirsniaw beh suanw jitt dnxua quewdingg neh? Guaw uirsniaxmic e duar laii jiaxee digvet ee singlok neh? Ixau qycc e anxjunaw? Guaw qamxqag jit jinwzip jitt jxy jiyhbiy, guaw dyrr e did diyc soxu ee dab, liauxqaiw dairjir uirhyy anne; guaw e duw .diyc, jaix ixjingg zuhyy, ixau zuhyy ee langg.
HINGRHOG HUANWSIONG
Dirr guaw sukyw jiaxee bunrdee sii, u jit hxang inxkiw guaw juwsinn: ui' Aujiux hitt vingg puu .kiw .laii jit xee hingsiong --- guaw ee isux, H poksu (iacc si ix ee ngiaxsiong)/ tauu-dingw dnii diyc qimlen, iacc si qimsig guehquir huekuann. Guaw sui' zinrcud “guaw ee isux, itdit si ix qra guaw knuar vne/ mrqyxx jitmaw ixx ix ee guancox hingsiong, cniurr Kos qok'ongg. Dirr sing'uac-diongx ix si jit xee qok'ongg, dyrr si guancox hingsiong jiamrsii texhen ee lovok, guancox hingsiong ui' jit kaisiw dyrr junjai, henrjai ix duxx ixx jitt jiongw hingsiong cuthen.”
qangrkuanw, guaw marr si guancox hingsiong, suibongw guaw byy quancad diyc jitt diamw, kiokk knuawjyr lixsow-dongzenn. Ix cuthen sii, gunw diam ~ horsiong qauliuu susiongw. H poksu virr derqiuu pair laii tuandat huanxduir guaw likuix ee siausid, qongw guaw byy kuanli likuix derqiuu, diyh'air dngw .kir. Tniax diyc jitt xee siausid guaw jingsinn ar.
Guaw qamxqag sitbang, in'ui jex itcer byy iwgi. Jitt jiongw tuatli ee tongwkow quewdingg dingxii vec jycqangx, guaw byy did diyc jinwzip biyrsi, qnir ixjingg qangrvuer ee hixkyw.
Sidjer-siong, guaw qingquer jiog ~ snax lexvair, guaw jiacc quatding uac .lyc .kir/ berdangr jiac mic, soxu ee sidbut longxx hro guaw huanxvag. Vnervangg gua ee sniaci/ snualingg, naxjunxx si jit vxag u okangx ee caixsig vownii-aw/ iacc si jit dxuix inr qaxx muaw ~ byy iwgi siongwpnir ee cruir vywjuaw. Sitbang ee sii, sniu diyc : jitmaw guaw qycc rair dngw kir “sniux-aw hertongw (Box System)” ar. In'ui dirr uxdiu tenjewsnuar jigua, ixqingx kiauwbiau kixjy cud jit xee snax-cuwguann sewqair, muixx jit xee langg qaqi jre dirr jit xee sniux-aw lai. Jitmaw guaw diyh'air jaiww crur suechok jurqiw: dngw .kir jin' diongriaur! Sing'uac ham' jingxqyy sewqair dirr guaw knuar laii, cniurr jit jxy qnagak, sniu diyc guaw rair zinruii jex itcer habjingg-habliw, sjidjai buhan huanlyw. Guaw bad hnuahiw qajair ixqingx vaixtuad jex itcer, jitmaw ee jinghongw si guaw ham' qitnax :ee qang, qycc virr jit diauu snuar diaur dirr sniux-lai. Dirr taiwkongx piaupuu sii, guaw byy dangrliong, marr byy zimrhyy mic kiuw .guaw. Jitmaw, itcer longxx byy caixqangx!
Guaw duiww jitt xui isux u qionglet huanxkongr, ix bingrling guaw qycc uac .dngw .laii; dongsii qycc uirr ix jin' iusimx : ix u snewmia huihiamw! Ix si ixx guancox hingsiong cuthen dirr guaw binrjingg ee! Si'angw narr si did diyc jitt xee guarhingg, dyrr viauxsi ix beh siw .ar, ix ixqingx sriok “kacc dua ee kuntew”! Qniahniaa diongx, tudzenn sniu .diyc, H poksu rair ter guaw siw. Guaw vniawmia hro ix liauxqaiw, mrqycc ix m bad/ aurlaii guaw siurkir “uirsniaxmic ix jongxsi qew m jaix, ix si Kos qok'ongg ee lovok neh? Zircniaw ix ixqingx kurvi ix guancox hingsiong? Ix qingwzenn beh guaw siongsinr ix m jaix!” guaw jin' hunwno. Kanciuw jikvi guaw duiww ix byy qraur iuxsen/ ix si driyc ee; mrqyxx guaw sidjai jin' siurkir, ix jiacc jip'id, qirjuat m tec huanwsiong-diongx guaw ham' ix jiqanx huatsingx ee itcer. “ jin' kyxog, ix diyhh kacc sewzi .jit .xe, ix byy kuanli jiacc colow! Guaw beh qingxqyr ix, qiyr ix kacc siyxsimx .quaw.” guaw siongsinr ix ee snewmia suisii u huihiamw.
Sursit-siong, guaw si ix juewau jit xee vnerlangg. 1944 nii sir-guec cesir, ui' guaw puawvne ixlaii, derr id vaiw did diyc unxjunw, ersaih jre .kiw .laii, jre dirr bincngg-dingw, dyrr jitt zit, H poksu vnerdyw .kir, jaiww byy kiw laii ar. Guaw tniax qongw ix huan diyc hiycjunrzet, byy zuarr quw vairhuecjingr quewsinx. Ix si jit xui hyw isux, u quiw hunx tenjaii, narr m si, ix beh ixx Kos qok'ongg sinhun cuthen dirr guaw binrjingg.
Hitt jun, guaw sing'uac dirr jit jiongw kaxquair ee jetjaur-diongx/ zidsii, qamxqag simbun/ hiziok/ camxceh, cavutdyx m qnaw dinxdang/ oamr-diongx, guaw sniu “jitmaw guaw virr vig dngw laii jitt xee vehjniaw bybi ee sewqair.”/ honghunx sii, guaw e kunr, itdit qaur vnuawmee jingsinn/ dyw jit diamxjingx, jit jiongw uanjuann qyc'ngiu jongrtair-diongx, naxjunxx dirr jit jiongw hixqongg-diongx, qamxqag jurqiw cniurr dirr kongdiongx piauliuu, dirr uxdiu-diongx --- jit jiongw ciaudua ee kangbyy-lai --- guaw anzenn byy vnertniar, simdiongx ciongbuanw hingrhog. “jex si ingxuanw ee hokjiw.” guaw sniu, “byy ue qongw e cringx, taiww qibiau lehh!”
Guaw jiuuii ee itcer suxx langg simsinn kinx qaxx vuex .kiw .laii, horsu sangr laii siyly ee jiahmic, jixu jitt sii guaw jiacc sniaxmic longxx jiac, kuivii lirkauw. U jit dnxua siqanx, guaw qamxqag horsu si jit xee Iutaiw lau hurluw, viw sidjer lenlingg dua jerje, ix duxx decc uirr guaw junxvi cingkir ee jewpinw/ guaw knuar ix ee sii, ix tauu jiuuii naxjunxx u nasig qngkuann/ guaw jurqiw naxx dirr Pomegranates ee huehngg-lai/ Malchuth ham' Tifereth ee hunlew dngdecc jinwhingg/ guaw si Iutaiw huathak juanqax Simon Ben Jochai, jit xee duxx qixhingg jurqiw imqanx hunlew ee langg/ si cuthen dirr bidqaur tuantongw ee sinvir hunlew. Guaw byy hxuad qra linw qongw, hex si zuarr qibiau, jixsi vutduan dirr cuir-lai liam “jiax dyrr si Pomegranates huehngg! Jiax dyrr si Malchuth, Tifereth ee hunlew!” guaw m jaix guaw si vnuaenw sniaw qaksig. Lunrjinx, hex dyrr si guaw jurqiw, guaw dyrr si hunlew. Guaw ee jiwhog si huanlok ee hunlew.
Jiamrr ~, Pomegranates huehngg siausid/ venwhuar, qycc laii si Iasox Qidog ee hunlew (Marriage of The Lamb) dirr Jerusalem/ quawdingx qatcaiw laurzet qunw ~, guaw qongw be cud sewjed, si ingxuanw lanbongg ee huanhiw/ tensair limqaur, itpenr qongbingg. Guaw jurqiw dyrr si “Iasox Qidog ee hunlew”.
Zenau, hunlew siausid, suar lyc laii si jit jiongw sinx hingsiong --- juewau ee huanwsiong. Guaw dirr qongxkuah ee snuaqog qniaa qaur jinrbuew, jingg si kixlyc ee siyw snualunn/ snuaqog jinrvong si jit xee qoxdenw ee vnuawngii qiogdniuu, siwjiuuii si cnecuir ee qingxdir/ jitt xee qiogdniuu dngdecc kingwjiog sinsingr ee len'inx/ lamluw vreh kiw kir buxdaii-dingw tiauwbuw, dngg iw ia buanw ~ ee cnehuex, jiongww sinn ji' ve Zeus ham' Hera uansingg liauw sinvir hunlew, qapp “Iliad” soxx biyue :ee qangrkuanw.
Jiaxee texgiam longxx jin' qongcanr bingqngx. Dagg mee, guaw dirr siongrr sunjing ee jiwhog-diongx piau'iuu, “ jiuuii uaxqin laii :ee, si itcer congwjy ee hingsiong.” (“Fraust” derr zi vxo), qokk jiongw juxdee jiamrr ionghap, sitkir sikcaiw, huanwsiong iokk qewsiok jit diamxjingx, guaw kunr .kir. Jaxkiw laii sii, guaw qamxqag : huexhusig qycc laii .ar, huexhusig ee sewqair qapp sniux-aw qycc laii .ar! Jiacc guduu/ colow qycc honghamr! Hiaxee luerjai ee qingxqair jiacc hihanw/ bixle, nng xee siy' vixqaur, henrser si jiacc kyxciyr! Duer diyc guaw sintew jiamrr huehok, jiaxee qingxqair zuxx laii zuxx huebu .kir, derr id vaiw huanwsiong au byy snax lexvair siauter qaxx byngiaw byziah .ar.
Hiaxee huanwsiong ee suiw/ qionglet ee qamxjingg, si byy hxuad qongw cringx :ee, si guaw qinglik .quer siongrr hongdai jongwquanx ee dniubin. Zit sii, guaw sriu jetbuaa, jiaujy vut'anx; s.-surhang-h. ziaw guaw cauhuann, itcer longxx sniu' cosiok/ okjid/ vunrciax, kongqanx/ jingsinn longxx sriu hanrjer, itcer longxx si qamwqimr, jex itcer qycc si sniaw guan'inx neh? M jaix!! narr jit jiongw cuibinn/ suechoglik, naxjunxx hex dyrr si henrsit vunxsinx; m quanw zuhyy, guaw iuguann knuar diyc ix ee kanghix, suibongw guaw ixqingx huehok duiww sewqair ee sinwsimx, mrqyxx jurr hitt sii kiw, guaw itdit byy vaixtuad jitt xee inwsiong: sing'uac si penwduan ee junjai, virr lap zip juanbunn setqer ee snax-cuwguann sniux-aw hxingg uxdiu-diongx.
QUEWKIR/ HENRJAI/ BIRLAII RNGIUU JYWHUEW
Iauxx u jit hxang dairjir guaw qir qaxx jin' cingcyw: jit kaisiw, guaw qinglik Pomegranates huehngg ee huanwsiong, zuqyw horsu sriu diyc kunwziauw, cniaw ix guanliong guaw/ sxig-lai ee singwqed kyxlingg duiww ix byy hyw. Ix dongzenn m jaix guaw ee iwsur. Duiww guaw laii qongw, dng' singwqed laii ee sii, e u jit jiongw qiquair ee kiwhunx, guaw damsimx langg' byy hxuad zimxsiu. Guaw bingvik uirsniaw u langg qongw diyc singwqed ee kiwbi/ singwlingg ee “pangx”/ dyrr si jitt jiongw bi. Jitt xee vangqingx-lai u byy hxuad viauxdat singwqed ee kiwhunx/ viauxsiong si qokk jiongw sinvir habtew.
Jurlaii byy sniu .diyc, e u jitt ngiu qinglik. Jex m si siongxsiong ee sanxbut, huanwsiong/ texgiam longxx si sursit, byy juxquanx iyccig, simrjiww kuriuw juadduir kecquanx pinxjid.
Lanw piacbenw iong “ingxuanw” jitt xee suu, mrqyxx guaw erdangr qra jitt xee qinggiam biysut jyr jit jiongw huisiqanx jongrtair ee hixqongg, in'ui henrjai/ quewkir/ birlaii longxx hab'id. Venrnarr dongsii cuthen ee surbut longxx virr kngr zip kurtew ee jingxtew-lai, byy virr koksnuar cud siqanx qua, berdangr iong siqanx qaiwliam laii nriuu/ jitt jiongw qinggiam qigqex qandna' iong qamxqag laii hing'iongg/ berdangr hro siongxsiong jaiww cuthen. Guaw jnuaxngiu siongxsiong cniurr jahngx/ qin'axzit/ bin'axjair dongsii junjai ee jongrtair neh? U iauxx bue kaisiw :ee/ henrjunn :ee/ marr u ixqingx uansingg :ee, jex itcer longxx rngiuu jyr ittew. Qamxqag erdangr jiangxag ui'id surbut si jit xee jingxtew/ jit xee qimqut ee jingxtew, vauhamm duiww moxjiongw kixtauu ee qitai/ dngdecc huatsingx ee qniaqii/ qetqyw ee buanxjiog iacc sitbang. Langg virr qngw zip jit jiongw berdangr hing'iongg ee jingxtew-diongx, qycc ixx uanjingw ee kecquanx taiwdo quancad ix.
Aurlaii, guaw jaiww crur quancad diyc jitt jiongw kecquanx/ si kanciuw quewsinx au, guaw dirr naxx huanwsiong bang-diongx knuar diyc kanciuw.
Ix kia dirr jit dnxua qirli gua, itdit siongr guaw knuar/ hitt sii ix iokk snax-jap huer, snewmia dng' bixhyw sii, cing je nii jingg guaw viauxjew (hitt xui e qangr sinn :ee) uirr ix jyr ee jit niaw snxax, kyxlingg si ix cing .quer siongrr suiw ee snxax. Ix byy hnuahiw/ byy viaix, si kiauw qycc jin' textiab langg'/ jit diamw aw dy' byy qikdong ee viauxjingg, naxjunxx ixqingx ciautuad jingqamw ee bongrjong. Guaw jaix hex m si ix, si ix uirr guaw jewjyr/ iacc si sangr guaw ee jit vxag ix ee hingdoo/ lairdew u gunw ee cosiydng, qethunx au go-jap-zi dxangx jiongxjiongw qinglik qapp ix snewmia ee jiongqed. Binrduir jitt jiongw uanjingw ee hingsiong, gunw byy ue qongw, in'ui gunw cavutdyx byy hxuad lixqaiw.
Jitt xee bang ham' qitnax huanwsiong, guaw soxx qamxsiu diyc kecquanx junjai si ixqingx uansingg qywtexhuar ee jit vorhun, jex iwbi diyc tuatli qokk jiongw pingqer/ likuix soxui qamxjingg sokvak. Itvnuax laii qongw, qamxjingg sokvak duiww zinlui si diongriaur :ee; mrqyxx jitt jiongw sokvak vauhamm mow quaw dausia, diongriaur :ee si tiux cud jiaxee dausia, drat qaur jurqiw/ vyxiuw kecquanx. Jingqamw quanhe si iogbang, ziamxdor diyc qiongvig/ ioksog, si duiww lingrgua jit xee langg ee moxjiongw qitai, hro langg' byy juriuu. Kecquanx zinrbad cangwbih dirr jingqamw quanhe ee kip'inw, naxjunxx si jiongbuew ee viwbit, jixu tauwquer kecquanx ee zinrbad jiacc erdangr drat qaur kyxlingg jinjniar habtew.
Jitt vaiw puawvne au, guaw kaisiw qniaa hiongr hongsiux siqii, jerje juxiaur jokpinw si dirr jitt qiqanx uansingg :ee. Guaw soxx did diyc e hiauxgo, iacc si banrbut quisiok ee huanwsiong, hro guaw u iongxkir dingsinx siaxjog. Guaw byy qycc rair langg' jiapsiu guaw ee qenwqaiw, si junsunn guaw jurqiw susiongw uahdang, hro bunrdee jit hxang jit hxang denxhen, hingsingg copuex.
Qycc duar laii lingrgua jit jiongw venwhuar, guaw erdangr jiong' qaixsueh jyr, duiww henrjunn surbut ee kingxding/ byy diauqnia singzin itcer junjai ee surbut/ juadduir byy juxquanx ee qencii/ jiapsiu guaw soxx qnir diyc :ee/ soxx lixqaiw junjai ee kuanqingw/ jiapsiu guaw jurqiw ee tensingr. Pnuawvne coqii, qamxqag jurqiw taiwdo u quaw jauxjingx/ guaw diyh'air hu kiw moxjiongw jikzim. Mrqyxx, naxx junsunn qywtexhuar ee lo, zuqyw beh quer jurqiw ee sing'uac, diyh'air singdamx cywgo; cywgo hro sing'uac uanjingw, byy vyxjingr lanw be huan cyr/ suisii e lag zip diwmia ee huihiamw-diongx. Lanw kyxiw siongxsiong didtongx ee lo, mrqyxx hex kyxlingg qniaa hiongr sixbongg. Siw au, sniaw su marr be huatsingx, jiwjiyw jingwkag ee dairjir byy qycc huatsingx. Zimrhyy sniu beh liac dit lo qniaa :ee, ham' sixlangg qang.
Jitt crur puawvne au, bingvik singzin jurqiw miarun si zuarr diongriaur. Anne jiacc erdangr cirtih cud jit xee byy hxuad lixqaiw dairjir huatsingx sii, marr byy virr pacvai ee jurgnow; jitt xee jurgnow nairmia, singdamx sursit, marr u linglik duiwhur sewqair/ miarun, incuw qinglik sitvai dingxii qinglik singwli. Byy zimrhyy su e sriu qiauxcaw/ bylun luerjai, guarjai/ jit xee langg ee jurgnow ensiogsingr dongr e diauu snewmia ham' siqanx ee diauliuu. Jit xee langg jixu byy cab miarun anvaii sii jiacc erdangr anne.
Guaw qycc zinrbad .diyc, langg rair jiapsiu jurqiw henrsit vorhun/ qaqi hingsingg luerjai susiongw. Jinx/ qew ee luirvet dongzenn junjai, mrqyxx byy ioksoklik, si jiamr derr zi xui. Susiongw ee junjai viw lanw duiww susiongw ee pnuawduan kacc diongriaur; mrqyxx jiaxee pnuawduan berdangr virr apjer, in'ui marr si henrjunn ee susiongw, si lanw uanjingw ee jit vorhun.