Congwser Qir

1 Guankixtauu Siongrder congwjy tnix qapp de.

2 De si kangx kangx hunrdun; cim'enx ee binrjniu oamr; Siongrder ee Sinn unrdong dirr juiw-bin.

3 Siongrder qongw, "Diyhh u qngx"; dyrr u qngx.

4 Siongrder knuar qngx si hyw. Siongrder jiong' qngx qapp amr vunkuix.

5 Siongrder qiyr hitt xee qngx juer Zit, qiyr amr juer Mii. U ehngx u jaxkiw, si tauu jit zit.

6 Siongrder qongw, "Jiaxee juiw ee diongqanx diyhh u qiongcongx, jiong' juiw qapp juiw vunkuix."

7 Siongrder dyrr jy qiongcongx, laii hunx kuix qiongcongx xe ee juiw qapp qiongcongx dingw ee juiw; dyrr u anxnix.

8 Siongrder qiyr qiongcongx juer Tnix. U ehngx u jaxkiw, si derr zi zit.

9 Siongrder qongw, "Tnie jiaxee juiw diyhh jurjip qaur jit soxjai, dax de diyhh cuthen"; dyrr u anxnix.

10 Siongrder qiyr dax de juer De, qiyr jurjip ee juiw juer Haiw; Siongrder knuar anxnix si hyw.

11 Siongrder qongw, "De diyhh huad cauw, qycc diyhh u e qed jiw ee caiwsex, ixqip jiauww lui snix quexjiw ee ciu, hitt lairbin u ix ee jiw"; dyrr u anxnix.

12 De dyrr huad cauw, qapp jiauww lui qed jiw ee caiwsex, qapp jiauww lui snix quexjiw ee ciu, hitt lairbin u ix ee jiw; Siongrder knuar anxnix si hyw.

13 U ehngx u jaxkiw, si derr snax zit.

14 Siongrder qongw, "Tnix nirr ee qiongcongx diyhh u e huad qngx ee tew, laii hunvet zit qapp mii, iarr tangx juer diaurtauu, uerhunx suwquir, zit, nii;

15 Qycc hro inx juer qngtew dirr tnix ee qiongcongx laii jiyr qngx dirr derjniu"; dyrr u anxnix.

16 Siongrder dyrr jy dua ee qngtew nng xee, kacc dua :ee quanw zit .sii, kacc ser :ee quanw mii .sii; iarr u jy cnisinn.

17 Siongrder he inx dirr tnix nirr ee qiongcongx, hro inx jiyr qngx dirr de nirr,

18 Tangx quanw zit, mii, qycc hunvet qngx, amr. Siongrder knuar anxnix si hyw.

19 U ehngx u jaxkiw, si derr sir zit.

20 Siongrder qongw, "Juiw diyhh snitnuar jerje u uahmia ee dongrbut; jiauw vuex dirr de ee dingxbin qapp tnix nirr ee qiongcongx."

21 Siongrder dyrr congwjy haiw nirr ee dua hii, ixqip juiw soxx snix jerje u uahmia ee dongrbut, qokk jiauww ix ee lui; qycc congwjy dagg ngiu ee vuejiauw, jiauww ix ee lui;

22 Siongrder knuar anxnix si hyw. Siongrder suwhog inx, qongw, "Diyhh snitnuar qetnix jin' je ciongmuaw dirr haiw nirr ee juiw, iarr hro jiauxjiah snitnuar jerje dirr de nirr."

23 U ehngx u jaxkiw, si derr go zit.

24 Siongrder qongw, "De diyhh snix u uahmia ee dongrbut: jingsnix, tangtua, derjniu ee jauxsiur, longxx jiauww inx ee lui"; dyrr u anxnix.

25 Siongrder dyrr jy derjniu ee jauxsiur, jiauww ix ee lui, jingsnix jiauww ix ee lui, derjniu itcer ee tangtua jiauww ix ee lui;

26 Siongrder knuar anxnix si hyw. Siongrder qongw, "Lanw diyhh jy langg cincniu lanw ee siongr, jiauww lanw ee kuanw, hro inx quanxliw haiw nirr ee hii, tnix nirr ee jiauw, qapp jingsnix, qapp juann de, ixqip derjniu decc syy ee tangtua."

27 Siongrder dyrr congwjy langg cincniu Ix qaqi ee siongr, congwjy inx lxamm :ee luw :ee.

28 Siongrder suwhog inx. Siongrder qycc duiww inx qongw, "Diyhh snitnuar jin' je, ciongmuaw dirr derjniu, laii kacc ngiaa ix; iarr diyhh dirliw haiw nirr ee hii, tnix nirr ee jiauw, qapp derjniu itcer soxx dinxdang ee uahmic."

29 Siongrder qongw, "Guaw u hro linw venww derjniu itcer qed jiw ee caiwsex, qycc itcer ee ciu, qidiongx u e qed jiw ee ciu ee quexjiw, longxx hro linw juer jiahmic.

30 Lun qaur derjniu itcer ee jauxsiur, tnidiongx itcer ee jiauw, qapp derjniu itcer e dinxdang u uahmia ee mic, Guaw jiong' itcer cnicauw hro inx juer jiahmic"; dyrr u anxnix.

31 Siongrder knuar Ix itcer soxx jy :ee si jin' hyw. U ehngx u jaxkiw, si derr lak zit.

2 Tnide qapp ix itcer soxu :ee ixqing’ juer uann.

2 Dirr derr cid zit, Siongrder uann Ix soxx jy ee qangx, dyrr dirr derr cid zit hiyh Ix itcer soxx jy ee qangx.

3 Siongrder suwhog dirr derr cid zit, dring juer singwzit; in'ui dirr jitt zit, Siongrder tingg Ix itcer congwjy ee qangx dyrr anhiyh.

4 Tnide congwjy ee lailik, dirr Jehovah Siongrder jy de qapp tnix ee zit, cincniu erdew.

5 Snua'iaw itcer ee cauxbok iauxx bue u, itcer ee caiwsex iauxx byy huad, in'ui Jehovah Siongrder byy lyc ho dirr de nirr, iarr byy langg tangx jingwjyh hitt xee toxde.

6 Danrsi u bu dui' de cud, laii zunrdik venww derbin.

7 Jehovah Siongrder ing derjniu ee tohunw ciaux juer langg, vunn uac ee krir zip ix ee pnirkangx, langg dyrr jniaa juer uac ee linghunn.

8 Jehovah Siongrder dirr danghngx ee Eden jingr jit xee hngg, jiong' soxx jy ee langg he dirr hiax.

9 Jehovah Siongrder hro dagg ngiu ee ciu dui' de nirr huad .kiw .laii, hyw knuar iarr hyw jiac; dirr hngg ee diongqanx qycc u uahmia ee ciu, qapp hunvet hyw qapp pnaiw ee ciu.

10 Eden u hyy lrauu .cud .laii decc quanwag hitt xee hngg; dui' hiax hunx kuix juer sir diauu.

11 Tauu jit diauu miaa qiyr Pison, dyrr si sehlauu dirr Havilah juann de :ee;

12 Dirr hiax u cud qimx, qycc hitt xui ee qimx si jin' hyw; iarr u cud jinjux, pikgik.

13 Derr zi diauu miaa qiyr Gihon, dyrr si sehlauu dirr Kus juann de :ee.

14 Derr snax diauu miaa qiyr Tiglis, dyrr si lrauu quer Assylia ee dangsir :ee. Derr sir diauu dyrr si Viklat.

15 Jehovah Siongrder jiong' hitt xee langg he dirr Eden Hngg, laii jingwjyh qowsiuw.

16 Jehovah Siongrder huanhur hitt xee langg qongxx, "Hngg-lai dagg hy ciu ee quexjiw, liw tangx suisii banw laii jiac.

17 Danrsi hunvet hyxpnaiw ee ciu, ix ee quexjiw m tangx jiac; liw narr jiac, dikkag e siw."

18 Jehovah Siongrder qongw, "Langg dnuasinx qaqi druar m hyw. Guaw beh qra ix jy jit xee vangjan :ee laii pitpuer ix."

19 Jehovah Siongrder ing too juer snua'iaw dagg ngiu ee jauxsiur, ixqip kongdiongx dagg ngiu ee vuejiauw, qra inx cua qaur hitt langg ee binrjingg, knuar ix beh cxingx inx simxmih miaa; qniwnarr ix soxx cxingx dagg ngiu uahmic :ee, dyrr juer hitt xee mic ee miaa.

20 Hitt xee langg dyrr qra itcer ee jingsnix, qapp kongdiongx ee vuejiauw, qapp snua'iaw itcer ee jauxsiur longxx hy miaa, danrsi cue byy jit xee tangx juer hitt langg ee vangjan laii pitpuer ix.

21 Jehovah Siongrder hro hitt xee langg kunr dangrbinn, dyrr tec ix ee hiabqud jit qix, qycc ing bah qra vaux bat .kiw .laii.

22 Jehovah Siongrder dyrr jiong' dui' hitt langg soxx tec cud ee hiabqud jyrjniaa jit xee jaboxlangg, qra cua laii jiurqin hitt langg.

23 Hitt langg qongw, "Dnaxx jitt xee si guaw qud-lai ee qud, bah-lai ee bah, beh cxingx juer jaboxlangg; in'ui ix si dui' davolangg tec .cud .ee."

24 Soxiw langg beh lirkuix ix ee verbuw, qetlenn ix ee bow, inx dyrr jniaa juer jidtew.

25 Angbow nng langg vnivnii tngwvakteh, iarr byy qenwsiaur.

3 Jehovah Siongrder soxx jy snua'iaw itcer ee uahmic, juaa si viw inx kacc qauxked :ee. Juaa duiww hurzinlangg qongw, "Siongrder qamxx urngiaw qongw hngg-lai itcer ee ciu, linw longxx m tangx jiac mah?"

2 Hurzinlangg duiww juaa qongw, "Hngg-lai ciu-dingw ee quexjiw guanw tangx jiac;

3 Jixu hngg diong'ngx hitt jangg ciu ee quexjiw, Siongrder bad qongw, 'Linw m tangx jiac ix, iarr m tangx kir bongx; qniax linw jiac liauw e siw.'"

4 Juaa duiww hurzinlangg qongw, "Linw byy dikkag e siw.

5 In'ui Siongrder jaix linw jiac ee zit, linw ee bagjiux dyrr e kuix, linw beh cincniu Siongrder, e hunvet hyw qapp pnaiw."

6 Hurzinlangg knuar hitt jangg ciu hyw jiac iarr qacbak, qycc hitt jangg ciu si tangx himbo, hro langg u diwhui, dyrr banw ix ee quexjiw laii jiac, suar hro ix ee diongrhux; ix iarr jiac ix.

7 Inx nng langg ee bagjiux dyrr kuix, jiacc jaix inx si tngwvakteh, dyrr vinw buhuaqyxhiyc uirr qaqi juer qunn.

8 Zit lianglingw ee sii, Jehovah Siongrder qnia'iuu dirr hngg-lai. Inx tniax qnir Ix ee sniax, hitt langg qapp ix ee hurzinlangg dyrr bih dirr hngg-lai ee ciu-diongx, laii siamxvi Jehovah Siongrder ee bin.

9 Jehovah Siongrder qiyr hitt langg, duiww ix qongw, "Liw dirr daclyc?"

10 Ix dyrr qongw, "Guaw dirr hngg-lai tniax qnir Liw ee sniax, dyrr qniax, in'ui guaw tngwvakteh, dyrr qaqi bih .kiw .laii."

11 Jehovah qongw, "Jirjui qra liw qongw, liw tngwvakteh? Guaw huanhur liw m tangx jiac hitt jangg ciu, liw kir jiac mah?"

12 Hitt langg qongw, "Liw soxx hro guaw juer pnua ee hurzinlangg, ix ing hitt jangg ciu ee quexjiw hro guaw, guaw dyrr qra jiac."

13 Jehovah Siongrder duiww hurzinlangg qongw, "Liw soxx juer si simxmih su?" Hurzinlangg qongw, "Juaa inxiuw guaw, guaw dyrr jiac."

14 Jehovah Siongrder duiww juaa qongw, "Liw ixqing’ juer jitt xee su, dirr itcer ee jingsnix qapp snua'iaw itcer ee jauxsiur, qandna' liw siurr jiuwjow. Liw beh ing vakdow qniaa, itsingx jiac tohunw.

15 Guaw beh hro liw qapp hurzinlangg qed uansiuu, liw ee horer qapp ix ee horer iarr qed uansiuu. Ix beh siongx liw ee taukag, liw beh siongx ix ee ka'aurdnix."

16 Qycc duiww hurzinlangg qongw, "Guaw dikkag dua dua qetnix liw huaiin ee qankow; liw beh qankow snix qniaw. Liw beh luanbo liw ee diongrhux, ix beh quanxhad liw."

17 Iarr duiww Adam qongw, "Liw ixqing’ tniatanr liw ee hurzinlangg ee ue, laii jiac Guaw soxx huanhur liw qongxx, 'Liw m tangx jiac ix :ee'; soxiw toxde in'ui liw ee enqor siurr jiuwjow; liw jit siwlangg lykow, jiacc e did diyc jiac.

18 Toxde beh in'ui liw huad ciwper qapp jiglee; liw iarr beh jiac hngg nirr ee caiwsex.

19 Liw beh qnua lrauu muaw bin jiacc tangx did diyc jiac, qaur liw qruix tow; in'ui liw si dui' too tec .cud .laii. Liw vunw si tohunw, iarr beh qruix dirr tohunw."

20 Hitt langg qra ix ee bow hy miaa, qiyr Eva; in'ui ix juer jingwlangg ee laurbuw.

21 Jehovah Siongrder uirdiyhh hitt langg qapp ix ee bow, ing puee juer ihok hro inx cing.

22 Jehovah Siongrder qongw, "Knuar ar, jitt langg ixqing’ qapp lanw sna' cincniu, e hunvet hyxpnaiw, dnaxx qniax ix e crunx ciuw qycc dui' uahmiarciu banw laii jiac, dyrr uac qaur ingxuanw."

23 Soxiw Jehovah Siongrder qra ix qnuaw cud Eden Hngg, laii jingwjyh hitt ee too, dyrr si ix soxx dui' hex cud :ee.

24 Qra hitt xee langg qnuaw .cud .kir liauxau, iarr dirr Eden Hngg ee dangsir andir Qilorvingx qapp siwbin dngxsec huad huexiam ee qiamr, laii hongsiuw uahmiarciu ee lo.

4 Hitt langg qapp ix ee bow Eva dangvangg. Eva dyrr huaiin snix Kain, qongw, "Guaw dui' Jehovah ee viwiu did diyc qniaw."

2 Qycc snix ix ee siyxdi Abel. Abel si qor ngiuu :ee, Kain si jyccann :ee.

3 Zidjiw kacc quer, Kain jiong' toxsanw juer lexmic henr hro Jehovah.

4 Abel iarr jiong' ngiuu-qrunn diongx taujniu snix :ee, siongrr hyw ee ngiuu tec laii henr. Jehovah quanwqor Abel qapp ix ee lexmic,

5 Danrsi byy quanwqor Kain qapp ix ee lexmic. Kain dyrr dua siurkir, vniwbin.

6 Jehovah duiww Kain qongw, "Liw sniaw su siurkir? Liw sniaw su vniwbin?

7 Liw narr qniaa hyw, qamxx byy did diyc qamwlap? Narr byy qniaa hyw, juerget baihok dirr mngkauw; ix beh luanbo liw, liw beh quanxhad ix."

8 Kain qra ix ee siyxdi qongw. Ixau inx dirr snuax nirr ee sii, Kain qongqig ix ee siyxdi Abel, qra ix taii .siw.

9 Jehovah duiww Kain qongw, "Liw ee siyxdi Abel dirr daclyc?" Ix qongw, "M jaix. Guaw qamxx si qowsiuw guaw ee siyxdi :ee mah?"

10 Ix qongw, "Liw u juer simxmih? Linw siyxdi ee huih ee sniax dui' de nirr auqiyr Guaw.

11 De u kuix cuir dui' liw ee ciuw laii jiapsiu linw siyxdi ee huih. Dnaxx liw dui' jitt xee de siurr jiuwjow.

12 Liw jingwjyh, de byy beh cud toxsanw hro liw; liw beh siwqer jauw, piauliuu derjniu."

13 Kain duiww Jehovah qongw, "Guaw ee hinghuat taiww dang, quewtauu dirr guaw soxx e drngx :ee.

14 Liw qinaxzit qnuaw guaw lirkuix jitt xee derbin, byy tangx druar dirr Liw ee binrjingg. Guaw siwqer jauw, piauliuu derjniu; qniwnarr duw diyc guaw :ee beh taii siw guaw."

15 Jehovah duiww ix qongw, "In'ui anxnix, qniwnarr taii siw Kain :ee, beh siurr cid vxue ee vywingr." Jehovah dyrr qra Kain lip jit xee qiwhy, benw did duw diyc ix :ee taii siw ix.

16 Kain dyrr lirkuix Jehovah ee binrjingg kir dirr Eden ee dangxsir, Liulong ee de, kiarkiw.

17 Kain qapp ix ee bow dangvangg. ix ee bow huaiin snix Enoc. Kain kiw sniaa, dyrr jiauww ix ee qniaw ee miaa cxingx hitt xee sniaa ee miaa juer Enoc.

18 Enoc snix Ilad; Ilad snix Mehujael; Mehujael snix Metusael; Metusael snix Lamec.

19 Lamec crua nng xee bow; jit xee miaa Adah, jit xee miaa Zillah.

20 Adah snix Jabal; ix juer kiarkiw dirr vowvnii cri jingsnix ee langg ee jow.

21 Ix ee siyxdi miaa Jubal; ix si juer itcer dnuaa kimm vunn siaux :ee ee jow.

22 Zillah iarr snix Tubal Kain; ix dyrr si jewjy dagg ngiu dangg, tih, lairkir :ee; Tubal Kain ee jixbe dyrr si Naamah.

23 Lamec duiww ix nng xee bow qongw: Adah qapp Zillah ar, diyhh tniax guaw ee sniax, Lamec ee bow ar, diyhh diwir tniax guaw ee ue; langg siongx guaw, guaw taii ix, siauwlenlangg hai guaw, guaw taii ix,

24 Kain ee sin'uanx narr si cid vxue, Lamec ee sin'uanx dyrr dikkag cid-jap-cid vxue.

25 Adam qycc qapp ix ee bow dangvangg, ix ee bow snix qniaw, viauxmiaa qiyr Set; ix qongw, "Siongrder qycc qra guaw setlip jit xee qniaw lair ter Abel, in'ui Kain qra ix taii .siw."

26 Set iarr snix qniaw, viauxmiaa Enos. Hitt sii, langg jiacc kixtauu qiuqiyr Jehovah ee miaa.

5 Adam ee sewhe qir dir erdew. Dng' Siongrder congwjy langg ee zit, si jiauww Siongrder ee kuanxsid laii jy :ee,

2 Congwjy inx davox qapp jabow; dirr inx siurr congwjy ee zit, sur inx hokkir, cxingx inx ee miaa qiyr Langg.

3 Adam jit-vah snax-jap huer snix qniaw jiauww ix ee kuanw, cincniu ix ee siongr, viauxmiaa qiyr Set.

4 Adam snix Set liauxau ligquer veh-vah nii; qidiongx iauxx u snix qniaw jaboxqniaw.

5 Adam qewqiong hiongxsiu qauw-vah snax-jap huer jiacc siw.

6 Set jit-vah lenn go huer snix Enos.

7 Set snix Enos liauxau iauxx uac veh-vah lenn cid nii; qidiongx u qycc snix qniaw jaboxqniaw.

8 Set qewqiong hiongxsiu qauw-vah id-jap-zi huer jiacc siw.

9 Enos qauw-jap huer snix Kenan.

10 Enos snix Kenan liauxau iauxx uac veh-vah id-jap-go nii; qidiongx u qycc snix qniaw jaboxqniaw.

11 Enos qewqiong hiongxsiu qauw-vah lenn go huer jiacc siw.

12 Kenan cid-jap huer snix Mahalalel.

13 Kenan snix Mahalalel liauxau iauxx uac veh-vah sir-jap nii; qidiongx u qycc snix qniaw jaboxqniaw.

14 Kenan qewqiong hiongxsiu qauw-vah id-jap huer jiacc siw.

15 Mahalalel lak-jap-go huer snix Jaled.

16 Mahalalel snix Jaled liauxau iauxx uac veh-vah snax-jap nii; qidiongx u qycc snix qniaw jaboxqniaw.

17 Mahalalel qewqiong hiongxsiu veh-vah qauw-jap-go huer jiacc siw.

18 Jaled jit-vah lak-jap-zi huer snix Enoc.

19 Jaled snix Enoc liauxau iauxx uac veh-vah nii; qidiongx u qycc snix qniaw jaboxqniaw.

20 Jaled qewqiong hiongxsiu qauw-vah lak-jap-zi huer jiacc siw.

21 Enoc lak-jap-go huer snix Matuselah.

22 Enoc snix Matuselah liauxau, qapp Siongrder snaxqab qniaa snax-vah nii; qidiongx u qycc snix qniaw jaboxqniaw.

23 Enoc qewqiong hiongxsiu snax-vah lak-jap-go huer.

24 Enoc qapp Siongrder snaxqab qniaa. Siongrder jriab ix kir; ix dyrr byy .kir .ar.

25 Matuselah jit-vah veh-jap-cid huer snix Lamec.

26 Matuselah snix Lamec liauxau iauxx uac cid-vah veh-jap-zi nii; qidiongx u qycc snix qniaw jaboxqniaw.

27 Matuselah qewqiong hiongxsiu qauw-vah lak-jap-qauw huer jiacc siw.

28 Lamec jit-vah veh-jap-zi huer snix jit xee qniaw,

29 Viauxmiaa qiyr Noah, qongw, "Jehovah bad jiuwjow de, hro lanw juer qangx lykow; dnaxx jitt xee qniaw beh an'uir lanw."

30 Lamec snix Noah liauxau iauxx uac go-vah qauw-jap-go nii; qidiongx u qycc snix qniaw jaboxqniaw.

31 Lamec qewqiong hiongxsiu cid-vah cid-jap-cid huer jiacc siw.

32 Noah go-vah huer snix Sem, Ham, qapp Jafet.

6 Langg dirr derjniu naxx kacc je, iarr snix jaboxqniaw ee sii,

2 Siongrder ee qniaw knuar qnir langg ee jaboxqniaw suiw, dyrr jiauww inx soxx air, crua inx juer bow.

3 Jehovah qongw, "Langg qiwzenn sriok dirr ziogtew, Guaw ee sinn byy beh ingxuanw diamr dirr inx; inx ee zidjiw be ciauquer jit-vah zi-jap nii."

4 Dirr hitt sii, u duarhanwlangg dirr derbinrjniu. Au .laii Siongrder ee qniaw qapp langg ee jaboxqniaw dangvangg, dyrr snix qniaw; jiaxee dyrr si qoxjaw inghiongg u miasniax ee langg.

5 Jehovah knuar qnir langg dirr derjniu juerog jin' dua; inx simlai soxx sniu ee liamrtauu dagg zit longxx si pnaiw.

6 Jehovah tewhuew Ix dirr sewqanx jy langg, simlai iubun.

7 Jehovah qongw, "Guaw beh dui' derjniu jaubet Guaw soxx congwjy ee langg, jiong' langg qapp jauxsiur, tangtua, qapp vuejiauw longxx jaubet; in'ui Guaw jy inx liauw u tewhuew."

8 Jixu Noah did diyc undenw dirr Jehovah ee binrjingg.

9 Noah ee sewhe qir dirr erdew. Noah si girlangg, dirr hitt sewdai ee diongqanx si uanjuann ee langg. Noah qapp Siongrder snaqab qniaa.

10 Noah snix snax xee qniaw, dyrr si Sem, Ham, Jafet.

11 Sewqair vairhuai dirr Siongrder ee binrjingg. Sewqair ciongmuaw qiongvo.

12 Siongrder knuar sewqair longxx vairhuai; in'ui qniww u ziogtew :ee, inx dirr sewqair ee qniajuer longxx si vairhuai.

13 Siongrder duiww Noah qongw, "Qniww u ziogtew :ee Guaw knuar inx ee buadqii ixqing’ qaur, in'ui inx ee qiongvo ciongmuaw dirr sewqair. Liw knuar, Guaw beh jiong' inx qapp de juer jit xe huixbet.

14 Liw diyhh ing cingveccaa juer dua junn, junn-lai diyhh qeh vangqingx, lairgua ing ligcniiuu qoo ix.

15 Dua junn ee jyrhuad si anxnix: dngg snax-jap dxng, kuah go-jap dxng, quann snax-jap dxng.

16 Junn diyhh juer txangx-aw, quann jit dxng; mngg diyhh he dirr junn-vnix; junn diyhh juer snax janr, hunx siong, diongx, ha.

17 Liw knuar. Guaw, Guaw beh hro duarjuiw huanwlam dirr derjniu, laii huixbet tnie qniwnarr u uahkir ee ziogtew; qniwnarr dirr derjniu :ee longxx e siw.

18 Danrsi Guaw beh qapp liw lip Guaw ee iog. Liw qapp liw ee qniaw, liw ee bow, liw ee simvu, longxx diyhh zip dua junn.

19 Qniwnarr u uahkir ee ziogtew, dagg ngiu jit duir, jit jiah qangx :ee, jit jiah buw :ee. Liw diyhh duar inx zip dua junn, qapp liw snaqab vyxjuann uahmia.

20 Vuejiauw qokk jiauww ix ee lui, jingsnix qokk jiauww ix ee lui, derjniu ee tangtua qokk jiauww ix ee lui, dagg ngiu jit duir beh qaur liw hiax laii vyxjuann inx ee uahmia.

21 Liw diyhh tec dagg ngiu ee jiahmic jikju lehh, tangx juer liw qapp inx ee jiahmic."

22 Noah dyrr anxnix qniaa, jiauww Siongrder longxjongw soxx bingrling :ee kir qniaa.

7 Jehovah duiww Noah qongw, "Liw qapp liw juann qrex longxx diyhh zip dua junn; in'ui dirr jitt sewdai ee diongqanx Guaw knuar qnir liw dirr Guaw ee binrjingg si girlangg.

2 Qniwnarr cingkir ee jingsnix liw diyhh duar cid jiah qangx :ee, cid jiah buw :ee; byy cingkir ee jingsnix, liw diyhh duar jit jiah qangx :ee, jit jiah buw :ee.

3 Tnix nirr ee jiauw iarr diyhh duar, cid jiah qangx :ee, cid jiah buw :ee, tangx lauu inx ee jxingw uac dirr juann de.

4 In'ui qycc quer cid zit, Guaw beh lyc ho dirr derjniu, sir-jap zit sir-jap mii; jiong' Guaw soxx jy dagg hy ee uahmic longxx dui' derjniu jaubet."

5 Noah dyrr jiauww Jehovah soxx bingrling ix :ee itjin kir qniaa.

6 Dng' duarjuiw huanwlam dirr derjniu ee sii, Noah lak-vah huer.

7 Noah dyrr qapp ix ee qniaw, ix ee bow, ix ee simvu, longxx zip dua junn, siamxvi duarjuiw.

8 Cingkir ee jingsnix, qapp byy cingkir ee cingsnix, vuejiauw qapp derjniu itcer ee tangtua,

9 Longxx jit duir jit duir, u qangx :ee, u buw :ee, qaur Noah hiax, jinr zip dua junn, jiauww Siongrder bingrling Noah :ee.

10 Quer hitt cid zit, dua juiw huanwlam dirr derjniu.

11 Dng' Noah lak-vah huer, Zi-guec jap-cid, hitt zit cim'enx ee juixguann longxx lic kuix, tnix iarr puawkiah.

12 Sir-jap zit sir-jap mii lyc ho dirr derbinrjniu.

13 Duxduxx hit zitt Noah qapp ix ee qniaw, Sem, Ham, Jafet, qapp Noah ee bow, qapp ix snax ee simvu, longxx zip dua junn;

14 Inx qapp vacsiur qokk jiauww ix ee lui, itcer ee jingsnix qokk jiauww ix ee lui, itcer syy dirr derjniu ee tangtua qokk jiauww ix ee lui, itcer u sxit :ee qokk jiauww ix ee lui, itcer ee vuejiauw qokk jiauww ix ee lui, longxjongw jinr zip dua junn.

15 Qniwnarr ziogtew lairbin u uahkir :ee, longxx jit duir jit duir, qaur Noah hiax, zip dua junn.

16 Qniwnarr zip dua junn :ee, si u qangx :ee u buw :ee, jiauww Siongrder soxx bingrling ix :ee; Jehovah dyrr ter Noah qra mngg qnuaix lehh.

17 Juiw huanwlam dirr derjniu sir-jap zit; juiw diongr naxx quann, hro duarjunn cringr puu, junn dyrr li de.

18 Juixser jin' dua, dirr derjniu diddit diongr .kiw .laii; junn piauliuu dirr juixbin.

19 Juixser dirr derjniu qigqii dua; tnie ee quann snuax longxx hro ix imbat.

20 Juixser viw snuax qex qnuann jap-go dxng; snuax longxx hro ix imbat.

21 Qniwnarr dirr derjniu u ziogtew ee dongrbut, dyrr si vuejiauw, jingsnix, jauxsiur, qapp itcer syy dirr derjniu ee tangtua, ixqip soxu ee jingwlangg longxx siw.

22 Qniwnarr dirr dax de, u pnirkangx cuanxkuir ee singlingg longxx siw.

23 Qniwnarr derjniu itcer ee uahmic longxx jaubet; langg qapp jingsnix, tangtua, ixqip tnidiongx ee vuejiauw, inx longxx dui' derjniu siurr jaubet; jixu Noah cam' hiaxee qapp ix dirr junn nirr :ee lauu lehh.

24 Juixser jin' dua dirr derjniu, ligquer jit-vah go-jap zit.

8 Siongrder qir did Noah, qapp itcer ee uahmic, ixqip qapp ix dirr dua junn itcer ee jingsnix. Siongrder hro hongx cuex de, juiw dyrr jiamrjiam siausic.

2 Cim'enx ee juixguann qapp tnix ee kangkiah longxx qnuaibat; tnix nirr ee ho iarr suah.

3 Juiw dui' derjniu diddit trer. Jit-vah go-jap zit au, juiw dyrr jiamrjiam sriaux.

4 Cid-guec jap-cid, junn kuar dirr Alalat ee snuax.

5 Juiw qycc jiamrjiam sriaux, itdit qaur Jap-guec ceid, snuatauu jiacc cuthen.

6 Quer sir-jap zit, Noah kuix ix soxx juer dua junn ee txangx-aw, vangr jit jiah oax cud .kir.

7 Oax vuex laii vuex kir, itdit qaur derjniu ee juiw dax longxx byy qycc dyr .laii.

8 Ix qycc vangr jit jiah jnixaw cud .kir beh knuar juiw dui' derjniu trer iauxx bue.

9 In'ui venww derbin iauxx u juiw, jnixaw cue byy hiyckax ee soxjai, dyrr dywdngw laii dua junn Noah hiax. Noah crunx ciuw jrih ix, qra liac zip dua junn.

10 Ix qycc tingwhau cid zit, qycc vangr jnixaw cud dua junn.

11 Qaur ehngx jnixaw dyr laii ix hiax, cuir qa jit hiyc sinx ee qnanaxhiyc; Noah jiacc jaix juiw dui' derjniu trer lar.

12 Ix qycc tingwhau cid zit, vangr jnixaw cud .kir; jnixaw longxx byy qycc dyr .laii.

13 Qaur Noah lak-vah lenn jit huer, Jniax-guec ceid, derjniu ee juiw longxx dax. Noah dyrr henx kuix dua junn ee quar cud laii knuar, dyrr knuar qnir derbin ixqing’ dax.

14 Zi-guec zi-cid, tode longxx dax.

15 Siongrder duiww Noah qongw,

16 "Liw qapp liw ee bow, liw ee qniaw, liw ee simvu, longxx diyhh cud dua junn.

17 Dirr liw hiax qniww u ziogtew ee uahmic, dyrr si vuejiauw, jingsnix, qapp itcer syy dirr derjniu ee tangtua, longxx diyhh duar inx cud .kir, hro inx hing'ong dirr de nirr, snitnuar jin' je."

18 Dui' hitt diap, Noah qapp ix ee qniaw, ix ee bow, ix ee simvu, longxx cud .laii.

19 Itcer ee jauxsiur, itcer ee tangtua, itcer ee vuejiauw, qniwnarr derjniu soxx u ee dongrbut, qokk jiauww ix ee joglui, longxx cud dua junn.

20 Noah uirdiyhh Jehovah kiw jit jxy dnxuaa; dui' dagg ngiu cingkir ee jingsnix, dagg ngiu cingkir ee vuejiauw, cruw laii henr dirr dnxuaa-dingw juer siyjer.

21 Jehovah pni hex pangbi, simlai dyrr qongw, "Guaw byy qycc in'ui langg ee enqor jiuwjow de. Langg dui' sewhanr ee sii, simx soxx sniu dyrr pnaiw; Guaw byy beh jiauww Guaw soxx bad qniaa :ee, qycc bet qokk jxingw ee uahmic.

22 De iauxx dilehh ee sii, jaijingr qapp siusingg, qnuaa qapp zuac, dangtnix qapp hertnix, zit qapp mii, longxx byy hiyh.

9 Siongrder suwhok Noah qapp ix ee qniaw, iarr duiww inx qongw, "Linw diyhh snitnuar jerje, ciongmuaw derjniu.

2 Qniwnarr derjniu ee jauxsiur, qapp tnix nirr ee jiauw, longxx beh qniax linw uir linw; lenrr derjniu itcer ee tangtua, qapp haiw nirr itcer ee hii, longxx qauhur dirr linw ee ciuw.

3 Qniwnarr uac ee dongrbut longxx juer linw ee jiahmic; jiaxee itcer Guaw longxx hro linw, cincniu hro linw caiwsex jidngiu.

4 Dogdok u uahmia ee bah, dyrr si u qnaa huih :ee, linw m tangx jiac. In'ui uahmia dirr huih lairdew.

5 Hro linw lrauu huih :ee, dyrr si lrauu hro linw uahmia ee huih ee jue, Guaw beh qra tyw. Guaw beh duiww qokk ngiu jauxsiur tyw, iarr beh duiww langg ee ciuw, ixqip dagg langg hniadi ee ciuw, laii tyw langg ee uahmia.

6 Qniwnarr hro langg' lrauu huih :ee, langg' iarr beh hro ix lrauu huih; in'ui Siongrder jy langg, si cincniu Ix qaqi ee siongr.

7 Linw diyhh snitnuar jerje, dirr derbinrjniu diyhh hing'ong, qetnix jin' je."

8 Siongrder qra Noah qapp ix ee qniaw qongw,

9 "Guaw qapp linw ixqip linw ee horer lip Guaw ee iog;

10 Iarr qapp hiaxee qapp linw dilehh itcer ee uahmic, dyrr si hiaxee qapp linw dilehh ee vuejiauw, jingsnix, itcer jauxsiur, qniwnarr dui' dua junn cud laii derjniu itcer ee jauxsiur lip iog.

11 Guaw qapp linw lip Guaw ee iog; qniww u ziogtew :ee, byy qycc hro duarjuiw bedbyy, iarr byy qycc hro duarjuiw huixhuai toxde."

12 Siongrder qongw, "Guaw qapp linw, iarr qapp hiaxee qapp linw dilehh dagg ngiu ee uahmic soxx lip ingxsewdai ee iog si u qiwhy.

13 Guaw jiong' Guaw ee king he dirr hunn nirr, tangx juer Guaw qapp de lip iog ee qiwhy.

14 Ixau Guaw hro hunn kiw, ziax de ee sii, beh u king cuthen dirr hunn nirr.

15 Guaw dyrr qiwliam Guaw qapp linw ixqip dagg ngiu u ziogtew ee uahmic soxx lip ee iog, juiw byy qycc huanwlam sunxhuai itcer u ziogtew ee mic.

16 King beh cuthen dirr hunn nirr; Guaw knuar .diyc, e hro Guaw qiwliam Siongrder qapp derjniu dagg ngiu u ziogtew ee uahmic soxx lip ingxuanw ee iog."

17 Siongrder duiww Noah qongw, "Jex dyrr si Guaw qapp derjniu itcer u ziogtew ee mic soxx lip ee iog ee qiwhy."

18 Noah ee qniaw, cud dua junn :ee, dyrr si Sem, Ham, Jafet. (Ham si Kanaan ee laurve.)

19 Jitt snax xee si Noah ee qniaw; dui' inx laii venwmauw juann de.

20 Noah kixciuw juer longhux, jaijingr pudyhngg, limx hitt xee jiuw suacc laii juir,

21 Dirr vowvnii lai trngr teh teh.

22 Kanaan ee laurve, Ham, knuar inx laurve tngwteh, dyrr kir guarbin qra ix nng xee hniadi qongw.

23 Sem qapp Jafet tec jit niaw snxax kuar dirr inx ee qingtauu; dywter qniaa laii ziax laurve ee tngwteh, inx ee bin ngr cud, byy knuar qnir laurve ee tngwteh.

24 Noah jiuxjuir cnew, jiacc jaix derr zi qniaw ee soxx juer.

25 Dyrr qongw, "Kanaan diyhh siurr jiuwjow; ix beh juer ix ee hniadi ee lovok."

26 Qycc qongw, "Diyhh ylyw Jehovah, Sem ee Siongrder! Kanaan juer Sem ee lovok.

27 Guan Siongrder hro Jafet huatdenw; hro ix druar dirr Sem ee vowvnii; Kanaan iarr juer ix ee lovok."

28 Duarjuiw liauxau, Noah iauxx uac snax-vah go-jap nii.

29 Noah qewqiong hiongsiu qauw-vah go-jap huer jiacc siw.

10 Noah ee qniaw Sem, Ham, qapp Jafet ee sewhe qir dirr erdew. Duarjuiw ixau, inx u snix qniaw.

2 Jafet ee qniaw: Gomer, Magog, Madah, Javan, Tubal, Mesec, qapp Tilas.

3 Gomer ee qniaw: Askenaz, Rlifat, qapp Togarmah.

4 Javan ee qniaw: Elisah, Tarsis, Qitim, qapp Rlodaimlangg.

5 Jiaxee langg ee horer, jiong' dagg qog ee dertow, haixsu, vunx kuix kiarkiw, qokk jiauww inx ee kniukauw, jiauww inx ee jongjok, jiauww inx ee vangqog.

6 Ham ee qniaw: Kus, Egipt, Libia, qapp Kanaan.

7 Kus ee qniaw: Seba, Havilah, Sabtah, Rlaamah, qapp Sabteka. Rlaamah ee qniaw: Seba, Dedan.

8 Kus iarr snix Nimlod; ix juer sewjniu inghiongg ee kixtauu.

9 Ix dirr Jehovah ee binrjingg si jit xee ing'iongw paclac :ee; soxiw langg qongw, "Guan liw dirr Jehovah ee binrjingg cincniu Nimlod si jit xee ing'iongw paclac :ee."

10 Ix ee qog ee kixtauu, dyrr si Babylon, Elec, Ackad, qapp Kalah, si dirr Sinar ee de.

11 Ix dui' hiax cud .laii, kir Assylia, kiwjy Nineveh, Rlehobot Ir, Kalah,

12 Ixqip Nineveh qapp hitt xee dua sniaa Kalah diongqanx ee Rlesen.

13 Mezlaimlangg snix Lydialangg, Anamlangg, Lehablangg, Naftuhlangg,

14 Patluslangg, Kasluhlangg, qapp Kaftolangg (dui' inx cud Filistlangg).

15 Kanaan snix dua-qniaw Sidon qapp Het;

16 Ixqip Jebuslangg, Amolilangg, Girgaslangg,

17 Hivilangg, Arkilangg, Sinilangg,

18 Arvadilangg, Zemalilangg, qapp Hamatlangg. Au .laii Kanaan jiaxee jok hunsnuar.

19 Kanaan ee qingxqair si dui' Sidon ngr Galar ee lo, qaur Gaza; qycc ngr Sodom, Gomollah, Admah, qapp Seboiim ee lo, qaur Lasa.

20 Jex dyrr si Ham ee horer, qokk jiauww inx ee jongjok, inx ee kniukauw, dirr inx ee dertow, inx ee vangqog.

21 Jafet ee hniax Sem, juer Hebla juann jok ee jow, iarr snix qniaw.

22 Sem ee qniaw: Elam, Assur, Arfasad, Lud, qapp Alam.

23 Alam ee qniaw: Uz, Hul, Gether, qapp Mesek.

24 Arfacsad snix Selah; Selah snix Eber.

25 Eber snix nng xee qniaw; jit xee miaa qiyr Peleg, in'ui dirr ix hitt sii de dyrr u hunqair; Peleg ee siyxdi miaa qiyr Joktan.

26 Joktan snix Almodad, Selef, Hazarmavet, Jelah,

27 Hadolam, Uzal, Diklah,

28 Obal, Abimael, Seba,

29 Ofir, Havilah, qapp Jobab; jiaxee longxx si Joktan ee qniaw.

30 Inx soxx kiarkiw ee derhngx si dui' Mesa qaur Sefar dangsir ee snuax.

31 Jex dyrr si Sem ee qniaxsunx, qokk jiauww inx ee jongjok, inx ee kniukauw, dirr inx ee toxde, jiauww inx ee vangqog.

32 Jiaxee longxx si Noah ee qniaw ee jongjok, qokk jiauww inx ee sewhe, inx ee vangjok; duarjuiw ixau, inx dirr derjniu vunx juer vangqog.

11 Hitt sii tnie ee kauximx, gengiw, longxx jidngiu.

2 Inx suaw kir dangsir ee sijun, dirr Sinar-de duw diyc jit pxenr ee vni'ngiuu, dyrr druar dirr hiax.

3 Inx dairqex camsiongg qongxx, "Laii ar, lanw diyhh juer jxngx, qra siyx hro ix sik."

4 Inx u jxngx tangx juer jiyc, qycc u jiyh'iuu tangx ter hetoo."

5 Qycc qongw, "Laii ar, lanw diyhh kiw sniaa qapp tah, tah-dingw duw tnix, uirr lanw lip jit xee miaa, benw did lanw siwsnuar dirr juann de."

6 Jehovah qangwlimm, beh knuar sewqanlangg soxx kiw ee sniaa qapp tah. Jehovah qongw, "Knuar ar, jiaxee vecsnir longxx hab'id, gengiw iarr jidngiu; henrjai ixqing’ kixciuw juer jitt xee su, ixau inx soxx beh juer :ee, byy jit hxang e qimwjiw.

7 Laii ar, lanw lyc .laii .kir, dirr hiax pah luan inx ee kauximx, hro inx ee gengiw dairqex be siongtongx."

8 Dui' anxnix, Jehovah hro inx dui' hiax siwsnuar dirr juann de; inx dyrr tingg qangx, byy kiw hitt xee sniaa.

9 Soxiw hitt xee sniaa miaa qiyr Babylon, in'ui Jehovah dirr hiax pah luan tnie ee gengiw; Jehovah hro langg dui' hiax siwsnuar dirr juann derjniu.

10 Sem ee sewhe qir dirr erdew. Sem jit-vah huer, duarjuiw ixau nng nii snix Afacsad.

11 Sem snix Afacsad liauxau, iauxx uac go-vah nii, qycc u snix qniaw jaboxqniaw.

12 Afacsad snax-jap-go huer snix Selah.

13 Afacsad snix Selah liauxau, iauxx uac sir-vah lenn snax nii, qycc u snix qniaw jaboxqniaw.

14 Selah snax-jap huer snix Eber.

15 Selah snix Eber liauxau, iauxx uac sir-vah lenn snax nii, qycc u snix qniaw jaboxqniaw.

16 Eber snax-jap-sir huer snix Peleg.

17 Eber snix Peleg liauxau, iauxx uac sir-vah snax-jap nii, qycc u snix qniaw jaboxqniaw.

18 Peleg snax-jap huer snix Rleu.

19 Peleg snix Rleu liauxau, iauxx uac nng-vah lenn qauw nii, qycc u snix qniaw jaboxqniaw.

20 Rleu snax-jap-zi huer snix Selug.

21 Rleu snix Selug liauxau, iauxx uac nng-vah lenn cid nii, qycc u snix qniaw jaboxqniaw.

22 Selug snax-jap huer snix Nahor.

23 Selug snix Nahor liauxau, iauxx uac nng-vah nii, qycc u snix qniaw jaboxqniaw.

24 Nahor zi-jap-qaur huer snix Telah.

25 Nahor snix Telah liauxau, iauxx uac jit-vah jap-qauw nii, qycc u snix qniaw jaboxqniaw.

26 Telah cid-jap huer snix Ablam, Nahor, qapp Halan.

27 Telah ee sewhe qir dirr erdew. Telah snix Ablam, Nahor, qapp Halan. Halan snix Lot.

28 Halan siw dirr ix ee laurve Telah ee binrjingg, dirr ix ee vunxde Qaldea ee Ur Sniaa.

29 Ablam qapp Nahor qokk u cuarbow. Ablam ee bow, miaa qiyr Salai; Nahor ee bow miaa qiyr Milkah, si Halan ee jaboxqniaw; Halan si Milkah ee laurve, iarr si Iskah ee laurve.

30 Salai byy huaiin, byy qniaw.

31 Telah cua ix ee qniaw Ablam, qapp ix ee sunx Lot, dyrr si Halan ee qniaw, ixqip ix ee simvu Salai, dyrr si ix ee qniaw Ablam ee bow, inx snaqab cud Qaldea ee Ur Sniaa, beh kir Kanaan-de. Inx qaur Halan dyrr druar dirr hiax.

32 Telah hiongxsiu nng-vah lenn go huer; Telah siw dirr Halan.

12 Jehovah duiww Ablam qongw, "Liw diyhh lirkuix vunxde, vunxjok, laurve ee qrex, kir Guaw soxx beh jixsi liw ee de.

2 Guaw beh hro liw jniaa juer dua qog, Guaw beh suwhog liw, hro liw ee miaa juer dua, liw iarr beh hro langg did diyc hokkir.

3 Jiokhog liw :ee, Guaw beh suwhog hro inx; jiuwjow liw :ee, Guaw beh jikhuat inx. Derjniu banrjok beh in'ui liw did diyc hokkir."

4 Ablam jiauww Jehovah huanhur ee ue, dyrr kir; Lot iarr qapp ix kir. Ablam cud Halan ee sii cid-jap-go huer.

5 Ablam duar ix ee bow Salai, qapp ix ee did'aw Lot, ixqip inx dirr Halan soxx jikju ee jaibut qapp soxx did diyc ee langgiac. Inx dyrr cud .kir, beh kir Kanaan-de. Inx dyrr qaur Kanaan-de.

6 Ablam qingquer hitt ee de, qaur dirr Seqem ee soxjai, qaur Moleh ee siongrciu. (Hitt sii Kanaan-jok iauxx druar dirr hiax.)

7 Jehovah duiww Ablam cuthen, qongw, "Guaw beh jiong' jitt xee derhngx sniuxsur liw ee horer"; ix dyrr dirr hiax uirdiyhh duiww ix cuthen ee Jehovah kiw jit jxy dnxuaa.

8 Dui' hiax, ix suaw qaur Betel dangsir ee snuax, dah vowvnii; saisir si Betel, dangsir si Ai; dirr hiax uirdiyhh Jehovah kiw jit jxyy dnxuaa, qiuqiyr Jehovah ee miaa.

9 Ablam jiamrjiam suaw kir lamsir ee de.

10 Hitt xee de duw diyc qihngx, Ablam lyc kir Egipt, beh dirr hiax jiamrsii kiarkiw; in'ui hitt xee de qihngx jin' dua.

11 Jiongqin beh zip Egipt, dyrr duiww ix ee bow Salai qongw, "Liw si binrmau hyw knuar ee hurzinlangg;

12 Egiptlangg knuar qnir liw ee sii beh qongw liw si guaw ee bow, inx beh taii siw guaw, laii lauu liw uac lehh.

13 Qriuu liw diyhh qongw, liw si guaw ee siyxbe, hro guaw in'ui liw did diyc ving'anx; guaw ee sniwmia iarr dui' liw laii did diyc uac."

14 Ablam qaur Egipt ee sii, Egiptlangg knuar qnir hitt xee hurzinlangg qigqii suiw.

15 Falaoh ee zinsinn knuar qnir ix, dyrr duiww Falaoh ylyw ix; hitt xee hurzinlangg dyrr hro langg duar zip Falaoh ee ongqiongx.

16 Falaoh in'ui jitt xee hurzinlangg dyrr hyw kuanxtai Ablam; Ablam dyrr did diyc ngiuu, guu, qangx ee luu, lovok, luxvi, buw ee luu, ixqip logdyy.

17 Jehovah in'ui Ablam ee bow Salai ee enqor, qangr dua jaieh dirr Falaoh qapp ix juann qrex.

18 Falaoh dyrr qiyr Ablam laii, qongw, "Liw duiww guaw soxx juer :ee si simxmih su? Sniaw su byy qra guaw qongw ix si liw ee bow?

19 Sniaw su cxingx ix juer siyxbe, drir qaur guaw jiong' ix crua laii juer guaw ee bow. Dnaxx liw ee bow dirr jiax, tangx qra cua .kir, jueww liw kir."

20 Dui' hitt diap Falaoh uirdiyhh ix laii huanhur langg, jiong' ix qapp ix ee bow qapp ix soxu :ee longxx sangr ix kir.

13 Ablam dui' Egipt jnriu .kir, ix qapp ix ee bow qapp ix soxu :ee, lenrr Lot, longxx kir lamvo.

2 Ablam ee guu, ginn, qimx jin' je.

3 Ix dui' lamvo jiamrjiam kir Betel, qaur Betel qapp Ai ee diongqanx, dyrr si jaxjingg dah vowvnii, kixtauu kiw dnxuaa ee soxjai;

4 Ablam dirr hiax qiuqiyr Jehovah ee miaa.

5 Qapp Ablam drangg qniaa ee Lot iarr u ngiuu-qrunn, guu-qrunn, qapp vowvnii.

6 Hitt xee de dyrr be iong'unw did inx snaqab kia; in'ui inx ee jaibut je, jiacc be e snaqab kia.

7 Ablam ee bogjiaw qapp Lot ee bogjiaw sna' jnex. (Dngsii Kanaanlangg qapp Pelizlangg dirr hitt xee de kiarkiw.)

8 Ablam qra Lot qongw, "Liw qapp guaw m tangx uanqex, liw ee bogjiaw qapp guaw ee bogjiaw iarr m tangx uanqex; in'ui lanw si qutziok ee cinx.

9 Juann de qamxx byy dirr liw ee bagjiux jingg mah? Cniaw liw lirkuix guaw; liw dyr vingg, guaw dyrr jniar vingg; liw jniar vingg, guaw dyrr dyr vingg."

10 Lot giahbak knuar Jordan Hyy itpenr ee vni'ngiuu, itdit qaur Zoar ee lo longxx jin' zunrdik. Hitt xee de dirr Jehovah bue bet Sodom qapp Gomollah ixjingg, si cincniu Jehovah ee hngg, iarr cincniu Egipt ee de.

11 Dui' anxnix, Lot qingw Jordan Hyy itpenr ee vni'ngiuu, censuaw kir dangsir. Inx dyrr dairqex vunx kuix.

12 Ablam kiarkiw dirr Kanaan-de. Lot kiarkiw dirr vni'ngiuu jiaxee sniaa, qra ix ee vowvnii suaw qaur Sodom.

13 Sodomlangg qik pnaiw, dua dua dikjue Jehovah.

14 Lot lirvet liauxau, Jehovah duiww Ablam qongw, "Liw giahbak, dui' liw soxx diamw ee soxjai ngr dangx, saix, lamm, vag laii knuar.

15 Liw soxx knuar .qnir itcer ee de, Guaw longxx beh hro liw, qapp liw ee horer, didqaur ingxuanw.

16 Guaw iarr beh hro liw ee horer cincniu derjniu ee tosuax, langg narr e sngr derjniu ee tosuax, jiacc e sngr liw ee horer.

17 Liw kiw laii venww qniaa jitt xee de ee hnuaidit, in'ui Guaw beh jiong' jitt xee de hro liw."

18 Ablam dyrr vnuasuaw vowvnii qaur Heblon, uaw Mamle hiax ee siongrciu kiarkiw; dirr hiax uirr Jehovah kiw jit jxy dnxuaa.

14 Dng' Amlafel juer Sinar ee ongg, Alioc juer Ellasar ee ongg, Qedorlaomer juer Elam ee ongg, Tidal juer Goiim ee ongg ee sii,

2 Inx laii qongqig Sodom ee ongg Bera, Gomollah ee ongg Birsa, Admah ee ongg Sinab, Zeboiim ee ongg Semeber, ixqip Bela ee ongg (Bela dyrr si Zoar).

3 Inx longxx jurhue dirr Siddim ee snuaqog; Siddim snuaqog dyrr si Iamm Haiw.

4 Inx hogsai Qedorlaomer jap-zi nii quw, qaur jap-snax nii vuervuan.

5 Jap-sir nii, Qedorlaomer qapp drangg huerbingg jiaxee ongg longxx laii, dirr Astelot Karnaim taii ngiaa Rlefaimlangg, dirr Ham taii ngiaa Zuzimlangg, dirr Save Kiliataim ee Emimlangg,

6 Dirr Hollangg ee Seir Snuax taii ngiaa Hollangg, qaur qin kongwiaw ee Elpalan.

7 Inx dywdngw qaur Enmisvat, dyrr si Kades, qongqig Amaleklangg ee juann de, qapp kiarkiw dirr Hazazon Tamar ee Amolilangg.

8 Dui' hitt diap, Sodom ee ongg, Gomollah ee ongg, Admah ee ongg, Zeboiim ee ongg, qapp Bela ee ongg (Bela dyrr si Zoar), longxx cud laii dirr Siddim ee snuaqog vaidin, qapp inx qaujenr;

9 Dyrr si qapp Elam ee ongg Qedolaomer, Goiim ee ongg Tidal, Sinar ee ongg Amlafel, qapp Elasar ee ongg Alioc qaujenr; sir xee ongg duiwdik go xee ongg.

10 Siddim Snuaqog longxx si jiyh'iuknix. Sodom qapp Gomollah jiaxee ongg dyjauw ee sii vuac dirr hiax; qi'uu :ee jauw jnriu snuax.

11 Inx dyrr jiong' Sodom qapp Gomollah ee jaibut, ixqip inx ee qanniuu longxx cniuw .kir, jueww inx kir.

12 Qycc jiong' Ablam ee did'aw, Lot, ee jaibut cniuw .kir; hitt sii Lot druar dirr Sodom.

13 U jit xee dyjauw ee langg laii qra Heblalangg Ablam qongw. Hitt sii Ablam kiarkiw dirr Amolilangg Mamle ee siongrcniu hitt soxjai. Mamle ham' Eskol qapp Aner longxx si hniadi, u qapp Ablam lenbingg.

14 Ablam tniax qnir ix ee did'aw hro langg liac .kir, dyrr cua sing'iongw dirr ix ee qrex nirr jinglen ee jongwdingx snax-vah jap-veh langg, duizip qaur Dan.

15 Ix qapp ix ee lovok tauwmii vunx dui qongqig inx, duix qaur Damaskus dyr vingg ee Hobah.

16 Inx jiong' itcer ee jaibut cniuw dywdngw, lenrr ix ee did'aw, Lot, ee jaibut, ixqip hurluw, vecsnir, iarr longxx cniuw dywdngw.

17 Ablam taii ngiaa Qedorlaomer, ixqip qapp ix juewdin jiaxee ongg dyr .laii ee sii, Sodom ee ongg cud .laii, qaur Saveh ee snuaqog gniajih ix; Saveh ee snuaqog dyrr si Ongg ee snuaqog.

18 Iarr u Salem ee ongg Melqizedek (ix si Jiww Quann Siongrder ee jewsix) duar vniaw qapp jiuw cud .laii, jiokhog ix qongxx,

19 "Guan tnide ee Jruw, Jiww Quann ee Siongrder, suwhog Ablam.

20 Jiww Quann ee Siongrder jiong' duiwdik qaux dirr liw ee ciuw, ingqaix ylyw Ix." Ablam jiong' longxjongw soxx did .diyc .ee, jap hxun tec jit hxun hro ix.

21 Sodom ee ongg qra Ablam qongw, "Jiong' langg qruix guaw; mic longxx hro liw."

22 Ablam qra Sodoma ee ongg qongw, "Guaw u qiw tnixde ee Jruw, Jiww Quann ee Siongrder Jehovah laii jiuwjua,

23 Huanrnarr liw ee mic, dyrr si jit diauu snuar, jit diauu eduar, guaw longxx m tec, benw did liw qongw, 'Guaw hro Ablam hyxgiac';

24 Jixu siauwlenlangg soxx jiac :ee, ixqip qapp guaw drangg qniaa ee langg Aner, Eskol, qapp Mamle, inx soxx ingr did ee hunrgiac, tangx cutjai inx tec."

15 Jiaxee dairjir liauxau, Jehovah ee ue dirr ngirsiong diongx limqaur Ablam, qongw,

2 "Ablam ar, liw mrbenw qniax, Guaw si liw ee dinvaii, si liw qik dua ee vywsniuw." Ablam qongw, "Jruw Jehovah ar, Liw beh hro guaw simxmih, guaw byy qniaw; singjiab guaw ee qegiap :ee, dyrr si Damaskuslangg Eliezer."

3 Ablam qycc qongw, "Liw byy hro guaw u horer; hitt ee snix dirr guaw ee qrex-lai :ee si guaw ee horsuu."

4 Jehovah qycc limqaur, qra ix qongw, "Jitt langg m si beh juer liw ee horsuu; dui' liw vunxsinx cud :ee, jiacc si juer liw ee horsuu."

5 Dyrr cua ix cud kir guarbin, qongw, "Liw knuar, liw ee horer iarr beh cincniu anxnix."

6 Ablam sinr Jehovah; Ix dyrr qra ix sngr juer gi.

7 Qycc duiww ix qongw, "Guaw si Jehovah, bad cua liw cud Qaldea ee Ur Sniaa, uirdiyhh beh jiong' jitt xee de hro liw juer giap."

8 Ablam qongw, "Jruw Jehovah ar, guaw jnaixngiu e jaix beh did diyc jitt xee de juer giap ar?"

9 Ix qra ix qongw, "Liw qra Guaw cruw jit jiah snax nii dua, buw ee guu, jit jiah snax nii dua, buw ee snua'ngiuu, jit jiah snax nii dua, qangx ee mi'ngiuu, jit jiah qajuix, qapp jit jiah jnixaw."

10 Ix dyrr cruw jiaxee mic laii, dagg ngiu duiwdiongx puar kuix juer nng vingg, jitt vingg qapp hitt vingg vaii snax duir; jixu jiauw byy puar kuix.

11 U ingjiauw lyc laii dirr siw ee jingsnix ee dingxbin; Ablam dyrr qra qnuaw .kir.

12 Zit beh lyc ee sii, Ablam kunr dangrbinn; hutzenn u jin' oamr ee dua qniahniaa qaur dirr ix.

13 Jehovah duiww Ablam qongw, "Liw dikkag diyhh jaix, liw ee horer beh cutgua dirr vadd langg ee de, qycc hogsai hitt xui ee langg; hitt xui ee langg beh koxcow inx sir-vah nii.

14 Inx soxx beh hogsai ee qog, Guaw beh vran inx; au .laii inx beh duar jerje jaibut dui' hiax cud .laii.

15 Liw beh anzenn dywjow, jiac dngg huewsiu, hro langg baijongr.

16 Qaur derr sir dai, inx beh dyr laii jiax; in'ui Amoli-jok ee jue iauxx bue quanwbuanw."

17 Zit lyc tnix amr, u cud enx ee loo qapp decc dyc ee huexvew, dui' hiaxee puawvingg ee bah qingquer.

18 Dng' hitt zit, Jehovah qapp Ablam lip iog, qongw, "Guaw u jiong' jitt xee de, dui' Egipt ee hyy qaur hitt xee dua hyy, Viklat Hyy, hro liw ee horer;

19 Dyrr si Kenlangg, Kenizlangg, Kadmonlangg,

20 Hitlangg, Pelizlangg, Rlefaimlangg,

21 Amolilangg, Kanaanlangg, Girgaslangg, qapp Jebuslangg jiaxee jok ee de."

16 Ablam ee bow Salai byy qra ix snix qniaw; ix u jit xee luxvi miaa Hagar, si Egiptlangg.

2 Salai qra Ablam qongw, "Jehovah qimr guaw snix qniaw. Cniaw liw qapp guaw ee luxvi dangvangg. Qiamxcaiw guaw tangx dui' ix did diyc ginxaw." Ablam tniatanr Salai ee ue.

3 Dui' hitt diap Ablam ee bow Salai jiong' ix ee luxvi Egiptlangg Hagar hro ix ee diongrhux Ablam juer bow; hitt sii Ablam ixqing’ druar Kanaan jap nii.

4 Ix qapp Hagar dangvangg, Hagar dyrr huaiin. Hagar jaix qaqi u srinx, dyrr knuawkinx juxbuw.

5 Salai qra Ablam qongw, "Guaw ee uan'ongw qruix dirr liw; guaw jiong' guaw ee luxvi he dirr liw ee simhuaii diongx. Ix knuar qaqi u srinx, dyrr knuawkinx guaw. Guan Jehovah dirr liw guaw ee diongqanx pnuawduanr."

6 Ablam duiww Salai qongw, "Liw ee luxvi dirr liw ee ciuw, liw tangx suiir kuantai ix." Salai koxcow ix, ix dyrr dui' Salai ee binrjingg dyjauw.

7 Jehovah ee suwjiaw dirr kongwiaw ee juixjnuaa vnix duw diyc ix; hitt xee juixjnuaa dirr Sur ee lorjniu.

8 Suwjiaw duiww ix qongw, "Salai ee luxvi Hagar, liw dui' daclyc laii? Beh duiww daclyc kir?" Ix qongw, "Guaw dui' guaw ee juxbuw Salai ee binrjingg jauw .cud .laii."

9 Jehovah ee suwjiaw duiww ix qongw, "Liw dyr kir liw ee juxbuw hiax, hanghok dirr ix ee ciuw-xe."

10 Jehovah ee suwjiauw qycc duiww ix qongw, "Guaw beh hro liw ee horer qikqii je, simrjiww be sngr .did."

11 Jehovah ee suwjiaw qycc duiww ix qongw, "Liw dnaxx huaiin, beh snix jit xee qniaw, diyhh qra ix hy miaa Ismael, in'ui Jehovah tniax qnir liw ee koxjingg.

12 Ix juewlangg beh cincniu iaw luu, ix ee ciuw beh qongqig jingwlangg. Jingwlangg ee ciuw beh qongqig ix; ix beh kiarkiw dirr jiongww hniadi ee taujingg."

13 Hagar dyrr cxingx hitt xee duiww ix qongxue ee Jehovah ee miaa qongw, "Liw si e knuar qnir dagg hxang ee Siongrder"; in'ui ix qongw, "Guaw knuar qnir hitt xee knuar qnir guaw :ee, qycc guaw iauxx dilehh mah?"

14 Soxiw jitt xee jnew miaa qiyr "Knuar diyc guaw, qycc iauxx uac lehh", dyrr si dirr Kades qapp Beled ee diongqanx.

15 Au .laii Hagar qra Ablam snix jit xee qniaw; Ablam qra ix ee qniaw hy miaa qiyr Ismael.

16 Hagar qra Ablam snix Ismael ee sii, Ablam veh-jap-lak huer.

17 Ablam qauw-jap-qauw huer ee sii, Jehovah duiww Ablam henxhen, qra ix qongw, "Guaw si juanlingg ee Siongrder, liw dirr Guaw ee binrjingg qniajuer diyhh uanjuann.

2 Guaw beh qapp liw lip Guaw ee iog, hro liw ee horer qigqii je."

3 Ablam dyrr pag lyc dirr de nirr. Siongrder qycc qapp ix qongxue, qongw,

4 "Guaw qapp liw lip Guaw ee iog, liw beh juer jerje qog ee ve.

5 Dui' dnaxx ixau, liw ee miaa byy qycc qiyr juer Ablam, si beh qiyr juer Ablaham, in'ui Guaw ixqing’ lip liw juer jerje qog ee ve.

6 Guaw beh hro liw ee horer qigqii je, qokdo dui' liw laii lip, qun'ongg dui' liw laii cud.

7 Guaw beh qapp liw, ixqip liw ligdai ee horer, setlip Guaw ee iog juer ingxuanw ee iog, si beh juer liw qapp liw ee horer ee Siongrder.

8 Guaw beh jiong' liw henrjai cutgua ee de, dyrr si Kanaan juann de, sniuxsur liw qapp liw ee horer, juer ingxuanw ee giap; Guaw iarr beh juer inx ee Siongrder."

9 Siongrder qycc duiww Ablaham qongw, "Liw qapp liw ee horer diyhh ligdai junsiuw Guaw ee iog.

10 Linw diongqanx soxu ee davox :ee, longxx diyhh sriu qatlew, jex dyrr si Guaw qapp liw ixqip liw ee horer soxx lip ee iog, si linw soxx diyhh junsiuw :ee.

11 Linw diyhh quah linw iongbut ee puee; jex si beh juer Guaw qapp linw soxx lip ee iog ee qiwhy.

12 Linw ligdai ee davox :ee, bylun qrex-lai snix :ee, iacc si liw ee horer ixgua ing ginn dui' guarbinrlangg brew :ee, ixqing’ cutsir veh zit, longxx diyhh sriu qatlew.

13 Liw qrex-lai snix :ee, qapp liw ing ginn brew :ee, longxx dikkag diyhh sriu qatlew; anxnix Guaw ee iog beh he dirr linw ee sinjniu, juer ingxuanw ee iog.

14 Byy sriu qatlew ee davox :ee, ix sinkux qiwzenn byy sriu qatlew, si vue Guaw ee iog, dikkag dui' vecsnir ee diongqanx druu .kir."

15 Siongrder qycc duiww Ablaham qongw, "Liw ee bow Salai, m tangx qycc qiyr ix ee miaa Salai; ix ee miaa beh qiyr juer Salah.

16 Guaw beh suwhog ix, Guaw iarr beh hro liw dui' ix did diyc jit xee qniaw. Guaw beh suwhog ix, ix iarr beh juer ledqog ee laurbuw; beh u vangqog ee ongg dui' ix cud."

17 Ablaham dyrr pag lecc ciyr, simlai qongw, "Jit-vah huer ee langg iauxx e snix qniaw mah? Salah ixqing’ qauw-jap huer, iauxx e sing'iongw mah?"

18 Ablaham duiww Siongrder qongw, "Danrguan Ismael uac dirr Liw ee binrjingg."

19 Siongrder qongw, "M si lar, liw ee bow Salah beh qra liw snix jit xee qniaw, liw beh qra ix hy miaa qiyr Isaac; Guaw beh qapp ix setlip Guaw ee iog.

20 Lun qaur Ismael, Guaw iarr u tniax liw qriuu. Liw knuar, Guaw ixqing’ suwhog ix, beh hro ix hing'ong, qetnix qigqii je. Ix beh snix jap-zi xee jogdniuw, Guaw iarr beh hro ix jniaa juer dua qog.

21 Qaur menii jitt sii, Salah beh qra liw snix Isaac; Guaw beh qapp ix setlip Guaw ee iog."

22 Siongrder qapp Ablaham qongw suah, dyrr lirkuix ix jnriu .kir.

23 Duxduxx hitt zit, Ablaham jiauww Siongrder soxx qra ix qongw :ee, qra ix ee qniaw Ismael, qapp Ablaham qrex-lai itcer ee davolangg, bylun dirr qrex nirr snix :ee, iacc si ing ginn brew :ee, longxx qniaa qatlew.

24 Ablaham sriu qatlew ee sii qauw-jap-qauw huer;

25 Ix ee qniaw Ismael sriu qatlew ee sii jap-snax huer.

26 Duxduxx hitt zit Ablaham qapp ix ee qniaw Ismael drangg sriu qatlew.

27 Qrex-lai soxu ee langg, bylun dirr qrex nirr snix :ee, iacc si ing ginn dui' guarbinrlangg brew :ee, longxx qapp ix drangg sriu qatlew.

18 Jehovah dirr Mamle ee siongrciu hiax, duiww Ablaham cuthen. Hitt sii zit dng' zuac. Ablaham jre dirr vowvnii mngkauw,

2 Giahbak kiw laii knuar, knuar qnir snax langg dirr duiwbin decc kia. Ix jid'err knuar .qnir, dyrr dui' vowvnii mngkauw, jauw kir gniajih inx, pag dirr de nirr, qongw,

3 "Guaw ee jruw, guaw narr dirr liw ee binrjingg did diyc undenw, qriuu liw m tangx lirkuix lovok jueww linw kir.

4 Iong'unw guaw tec damrvyc juiw hro linw sew kax, cniaw dirr ciurkax hiyckunr.

5 Guaw qycc tec damrvyc vniaw, hro linw juer diamxsimx, zen'au jiacqycc jinwjingg kir; in'ui linw si uirdiyhh anxnix, jiacc qaur linw ee lovok jiax." Inx qongw, "Tangx jiauww liw ee ue kir qniaa."

6 Ablaham qnuaxqinw zip vowvnii, qra Salah qongw, "Liw qinw qinw ing snax seah ee mirhunw nuaw juer vniaw."

7 Ablaham qycc jauw qaur guu-qrunn ee soxjai, kanx jit jiah jniw qycc hyw ee guu-aw laii, qra qaux hro lovok, ix dyrr qnuaxqinw kir virvan.

8 Ablaham qycc tec lin'iuu qapp linx, qapp soxx virvan ee guu-aw laii dirr ciurkax qra vaii dirr inx ee binrjingg.

9 Inx qra ix qongw, "Liw ee bow Salah dirr daclyc?" Ix qongw, "Dirr vowvnii lai."

10 Inx diongqanx u jit xee qongw, "Qauwqii guaw dikkag beh qycc laii liw jiax. Liw ee bow Salah beh snix jit xee qniaw." Salah dirr aurbin, dirr vowvnii mngkauw, decc tniax.

11 Ablaham qapp Salah nihuer ixqing’ lau; Salah ee guehqingx ixqing’ juat.

12 Salah simlai ciyr qongxx, "Guaw ixqing’ suelamw, guaw ee jruw iarr lau lar; qamxx iauxx u jitt hy ee hnuahiw?"

13 Jehovah duiww Ablaham qongw, "Salah uirr sniaw su ciyr qongxx, 'Guaw ixqing’ lau, qyxjinx e snix qniaw mah?'

14 Qamxx Jehovah u juer be laii ee su mah? Qauwqii, menii jitt sii, Guaw beh qycc laii liw jiax, Salah beh snix jit xee qniaw."

15 Salah qniax, m zin, qongw, "Guaw byy ciyr." Hitt langg qongw, "By'ngiaw. Liw sidjai u ciyr."

16 Hiaxee langg dyrr dui' hiax kiw .laii, ngr Sodom kir. Ablaham iarr qapp inx snaqab qniaa, beh sangr inx jit jam.

17 Jehovah qongw, "Guaw soxx beh juer ee su, qamxx tangx duiww Ablaham unxkngr mah?

18 In'ui Ablaham dikkag beh jniaa juer qiongdua ee qog, derjniu banrqog beh in'ui ix laii did diyc hokkir.

19 Guaw qingw ix, si beh hro ix bingrling ix ee qniaw qapp ix ee qequanr, hro inx dngdngg siuw Jehovah ee dyrliw, vingxqongx qniagi; drir qaur Jehovah qiw Ablaham soxx qongw ee ue, longxx qruix hro ix."

20 Jehovah qongw, "Sodom, Gomollah huachiamr ee sniax jin' dua, inx ee juerog sidjai dang.

21 Guaw dnaxx beh lyc .kir, knuar inx soxx qniaa :ee, qyxzenn itjin jiauww Guaw soxx tniax ee sniax iacc byy; narr byy anxnix, Guaw iarr e jaix."

22 Hiaxee langg dui' hiax uat dngw srinx ngr Sodom kir; Ablaham iauxx kia dirr Jehovah ee binrjingg.

23 Ablaham qinrjingg laii qongw, "Hyw langg qapp pnaiw langg, Liw longxx beh jaubet mah?

24 Setsuw sniaa-lai u go-jap xee hyw langg, Liw iuguann beh jaubet hitt soxjai mah? Byy beh uirdiyhh sniaa-lai jitt go-jap xee hyw langg, laii siawbenw inx mah?

25 Guan Liw quatduanr byy anxnix qniaa, jiong' hyw langg qapp pnaiw langg juer jit xe hai siw, drir qaur hyw langg qapp pnaiw langg snadangg; guan Liw quatduanr byy anxnix qniaa. Simxpnuar juann de ee Jruw qamxx byy qniaa qonggi mah?"

26 Jehovah qongw, "Guaw narr dirr Sodom sniaa-lai duw diyc u go-jap xee hyw langg, Guaw dyrr uirdiyhh inx ee enqor kuan'iongg hitt soxjai."

27 Ablaham rinr qongxx, "Guaw suizenn si huexhux tohunw, iauxquxx qnaw duiww Jruw qongxue;

28 Setsuw jiaxee go-jap xee hyw langg kiamr go xee, Liw dyrr in'ui kiamr go xee, jaubet juann sniaa mah?" Ix qongw, "Guaw dirr hiax narr duw diyc u sir-jap-go xee, iarr byy beh jaubet."

29 Ablaham qycc duiww Ix qongw, "Setsuw dirr hiax duw diyc sir-jap xee ne?" Ix qongw, "Uirdiyhh jiaxee sir-jap xee ee enqor, Guaw iarr byy beh juer jitt xee su."

30 Ix qycc qongw, "Qriuu Jruw byc did siurkir, guaw beh qycc qongw; setsuw dirr hiax narr duw diyc snax-jap xee ne?"

31 Ix qongw, "Guaw dirr hiax narr duw diyc u snax-jap xee, Guaw iarr byy beh juer jitt xee su." Ix qongw, "Guaw iauxquxx qnaw duiww Jruw qongw; setsuw dirr hiax duw diyc u zi-jap xee ne?"

32 Ix qongw, "Uirdiyhh jiaxee zi-jap xee ee enqor, Guaw iarr byy beh jaubet." Ix qongw, "Qriuu Jruw byc did siurkir, guaw qycc qongw jitt jit vaiw; setsuw dirr hiax duw diyc u jap xee ne?" Ix qongw, "Uirdiyhh jiaxee jap xee ee enqor, Guaw iarr byy beh jaubet."

33 Jehovah qapp Ablaham qongw bingvik, dyrr jnriu .kir. Ablaham iarr dyr kir ix ee soxjai.

19 Zit amr, hitt nng xee suwjiaw qaur Sodom; Lot jre dirr Sodom sniamngg nirr. Lot knuar qnir inx, dyrr kiw laii gniajih inx, qiokqiongx, bin ngr de, qongw,

2 "Guaw ee jruw ar, cniaw uat laii lovok ee cur hiycmii, sew kax; binaxjaxkiw kiw .laii, jiacqycc qniaa linw ee lo." Inx qongw, "Mrbenw. Guanw beh dirr duarquebin quer mii."

3 Lot cetced cniaw inx; inx jiacc uat dngw kax, uat zip ix ee cur. Lot uirr inx virvan ensiac, vig byy-qnar-vniaw; inx dyrr jiac.

4 Inx iauxx bue kir kunr, sniaa-lai ee langg, dyrr si Sodomlangg, dui' siauwlenn qaur lau, siwbin laii uii ix ee cur,

5 Qiyr Lot qongxx, "Ing'amr qaur liw jiax ee langg dirr daclyc? Hro inx cud .laii, jiauww guanw soxx air :ee kir juer."

6 Lot cud kir qaur mngg-gua jingwlangg hiax, dyrr jiong' mngg qnuaix lehh, qongw,

7 "Hniadi ar, cniaw linw byc did juer jitt hy pnaiw.

8 Linw knuar, guaw u nng xee jaboxqniaw, iauxx si jairsikluw. Iong'unw guaw cua inx cud .laii, cutjai linw soxx air laii qniaa; dogdok jitt nng langg ixqing’ qaur guaw ee cur, m tangx duiww inx juer simxmih."

9 Jingwlangg qongw, "Liw trer .kir." Qycc qongw, "Liw qiawqux dirr jiax, suar beh quanxhad guanw mah? Dnaxx guanw beh hai liw viw hai inx kacc siongdiong." Inx dyrr ekeh Lot, jinwjingg beh qongr puar ix ee mngg.

10 Hitt nng langg crunx ciuw, kanx Lot zip cur, jiong' mngg qnuaix .kiw laii;

11 Qycc hro mngg-gua ee langg, dui' ser qaur dua, bagjiux en'ng, longxx be knuar .qnir. Inx cue qaur sen iarr cue byy mngg.

12 Hitt nng langg duiww Lot qongw, "Liw dirr jiax iauxx u simxmih langg? Higsi qniaxsair, higsi qniaw, higsi jaboxqniaw, ixqip sniaa-lai itcer sriok liw ee langg, liw diyhh hro inx longxx lirkuix jitt xee soxjai.

13 In'ui guanw beh jaubet jitt xee soxjai, si uirdiyhh inx huachiamr ee sniax dirr Jehovah ee binrjingg jin' dua. Jehovah crex guanw laii beh jaubet Sodom."

14 Lot cud .kir, duiww crua ix ee jaboxqniaw ee qniaxsair qongw, "Linw kiw .laii, lirkuix jiax; in'ui Jehovah beh bedbyy jitt xee sniaa." Ix ee qniaxsair liac juer ix si qongxciyr.

15 Tnix qngx, suwjiaw cuivig Lot qongxx, "Kiw .laii, cua liw ee bow, ixqip liw dirr jiax nng xee jaboxqniaw kir; benw did qapp jitt xee sniaa ee juerog snaqab siurr bedbyy."

16 Lot encenn. In'ui Jehovah linbinw Lot, hitt nng langg dyrr kanx ix ee ciuw, qapp ix ee bow ee ciuw, jiong' ix cua cud, andir dirr sniaa-gua.

17 Cua inx cud kir liauw, qongw, "Liw diyhh dymia, m tangx uat tauu knuar, iarr m tangx duar dirr vni'ngiuu; diyhh jauw kir snuax nirr, benw did siurr bedbyy."

18 Lot duiww inx qongw, "Guaw ee jruw ar, m tangx anxnix.

19 Liw knuar, liw ee lovok ixqing’ did diyc undenw dirr liw ee binrjingg, liw iarr duiww guaw henxcud qik dua ee zinjuu, qiur guaw ee sniwmia. Guaw qniax guaw be e jauw qaur snuax nirr jinwjingg, jitt xee jaieh ixqing’ qaur dirr guaw, anxnix guaw dyrr siw.

20 Liw knuar, jitt xee sniaa qin qin, ser ser, tangx dyjauw kir hiax. Cniaw iong'unw guaw kir hiax dysiamw, laii vyxjuann guaw ee uahmia. Jitt xee sniaa qamxx m si ser ser mah?"

21 Ix duiww ix qongw, "Jitt xee dairjir, guaw iarr unxjunw liw. Liw soxx qongw ee sniaa, guaw byy beh ciax dyw.

22 Liw diyhh qinw qinw jauw kir hiax; in'ui liw iauxx bue qaur hiax, guaw be e juer simxmih." In'ui anxnix, hitt xee sniaa miaa qiyr Zoar.

23 Lot qaur Zoar, zit ixqing’ cud.

24 Hitt sii Jehovah jiong' ziu'ngg qapp huew, dui' tnidingw, dui' Jehovah hiax qangr lyc dirr Sodom qapp Gomollah.

25 Jiong' hiaxee sniaa, ixqip juann vni'ngiuu, qapp sniaa-lai soxu ee vecsnir, lenrr derbinrjniu singdiongw :ee, longxx huixhuai.

26 Lot ee bow dirr aurbin, jid'err uat tauu knuar, dyrr vnir juer jit qix iamtiau.

27 Ablaham tauwjaw kiw .laii, qaur ix jingg zit kia dirr Jehovah binrjingg hitt xui,

28 Ngr Sodom, Gomollah, qapp vni'ngiuu ee juann de laii knuar, knuar qnir hitt soxjai huexenx cringr quann, cincniu huexloo ee enx.

29 Dng' Siongrder jaubet vni'ngiuu jiaxee sniaa ee sii, Siongrder siauwliam Ablaham, duxduxx beh ciax dyw Lot soxx kiarkiw ee sniaa ee sii, dyrr jrunw Lot dui' hitt diongqanx jauw .cud .kir.

30 Lot diamr dirr Zoar jin' qniahniaa, dyrr qapp ix nng xee jaboxqniaw dui' Zoar cud kir diamr dirr snuax nirr; ix qapp nng xee jaboxqniaw diamr dirr jit xee dong-lai.

31 Dua jaboxqniaw duiww ser jaboxqniaw qongw, "Lanw ee laurve lau lar, derjniu qycc byy langg qapp lanw juer pitpuer laii jiauww zindy.

32 Laii lar, lanw laii hro laurve limx jiuw, tangx qapp ix snaqab kunr; anxnix lanw iarr tangx dui' ix liujunn horer."

33 Hitt mii inx hro laurve limx jiuw; dua jaboxqniaw dyrr zip kir qapp laurve snaqab kunr. Ix simxmih sii kir kunr, simxmih sii kiw .laii, laurve longxx m jaix.

34 Quer zit, dua jaboxqniaw qra ser jaboxqniaw qongw, "Guaw jamii qapp laurve snaqab kunr. Ing'amr lanw qycc hro ix limx jiuw, liw tangx zip kir qapp ix snaqab kunr. Anxnix, lanw hyw tangx dui' laurve liujunn horer."

35 Hitt mii inx qycc hro laurve limx jiuw, ser jaboxqniaw kiw laii kir qapp ix kunr. Ix simxmih sii kir kunr, simxmih sii kiw .laii, laurve iarr longxx m jaix.

36 Anxnix Lot nng xee jabovqniaw longxx dui' inx laurve laii huaiin.

37 Dua :ee snix qniaw, qiyr ix ee miaa Moab, dyrr si henrjai Moablangg ee jow.

38 Ser :ee iarr snix qniaw, qiyr ix ee miaa Benammi, dyrr si henrjai Ammonlangg ee jow.

20 Ablaham dui' hiax jiamrjiam ngr lamhngx suaw .kir, druar dirr Kades qapp Sur ee diongqanx, qiawqux dirr Gelar.

2 Ablaham qongw qaur ix ee bow Salah, dyrr qongw, "Si guaw ee siyxbe." Gelar ee ongg Abimelec crex langg jiong' Salah cua .kir.

3 Mii .sii, dirr binbang diongx, Siongrder laii qra Abimelec qongw, "Liw si qaix siw ee langg, in'ui liw soxx crua hitt xee hurzinlangg si langg' ee bow."

4 Abimelec iauxx bue cinqin ix, dyrr qongw, "Jruw ar, qniagi ee vecsnir, Liw iarr beh bet ix mah?

5 Hitt langg qamxx m si vunxsinx duiww guaw qongw, 'Ix si guaw ee siyxbe' mah? Hurzinlangg vunxsinx iarr qongw, 'Ix si guaw ee hniax'; guaw juer jitt xee su, si simx duanjingr, ciuw cingkir."

6 Siongrder dirr bang-diongx duiww ix qongw, "Guaw vunw jaix liw juer jitt xee su, si simdiongx duanjingr, Guaw jiacc joxdongr liw, benw did liw dikjue Guaw. Soxiw Guaw byy iong'unw liw bongx diyc ix.

7 Dnaxx liw diyhh jiong' jitt langg ee bow hingg ix, in'ui ix si sendix; ix beh ter liw qidyw, liw jiacc e uac. Liw narr m hingg ix, liw diyhh jaix, liw qapp liw soxu ee langg longxx decbeh siw."

8 Abimelec tauwjaw kiw .laii, qiyr jiongww lovok laii, jiong' jiaxee dairjir longxx qongw hro inx tniax; hiaxee langg longxx jin' qniax.

9 Abimelec qiyr Ablaham laii, duiww ix qongw, "Liw duiww guanw soxx qniaa :ee si simxmih su? Guaw u simxmih dikjue liw, liw qingxzenn hro guaw qapp guaw qok-lai ee langg ham lyc dang jue? Liw duiww guaw qniaa m ingqaix qniaa ee su."

10 Abimelec qycc duiww Ablaham qongw, "Liw knuar qnir simxmih, jiacc juer jitt xee su?"

11 Ablaham qongw, "Guaw pacsngr jitt soxjai ee langg longxx byy qniax Siongrder; inx beh uirdiyhh guaw ee bow ee enqor taii siw guaw.

12 Qycc ix iarr sidjai si guaw ee siyxbe, siangg ve qycc buw, au .laii juer guaw ee bow.

13 Dng' Siongrder qiyr guaw lirkuix laurve ee qrex kir siwqer qniaa ee sii, guaw dyrr qra ix qongw, 'Jionglaii lanw soxx qaur ee soxjai, cniaw liw cxingx guaw qongxx 'ix si guaw ee hniax'; jex dyrr si liw kuanxtai guaw ee xunx."

14 Abimelec jiong' ngiuu, guu, lovok, qapp luxvi hro Ablaham, qycc jiong' ix ee bow Salah hingg ix.

15 Abimelec qycc qongw, "Liw knuar, guaw ee de longxx dirr liw ee binrjingg, liw tangx sui'ir kiarkiw."

16 Qycc qra Salah qongw, "Guaw hro liw ee hniax jit-cingx ginn, qra liw duiww juann qrex juer ziax bagjiux :ee; dnaxx liw dirr itcer longxx byy vutsi."

17 Ablaham qidyw Siongrder; Siongrder dyrr rix hyw Abimelec qapp ix ee bow qapp luxvi, inx dyrr e snix qniaw.

18 In'ui Jehovah uirdiyhh Ablaham ee bow Salah ee enqor, bad hro Abimelec qrex-lai ee hurzinlangg be e snix qniaw.

21 Jehovah jiauww Ix jingg ee ue quanwqor Salah. Dui' anxnix, Jehovah jiauww Ix soxx qongw :ee qra Salah juewjniaa.

2 Ablaham nilau ee sii, Salah huaiin; qaur Siongrder duiww ix qongw ee zidqii, dyrr qra ix snix jit xee qniaw.

3 Ablaham qra Salah soxx snix ee qniaw hy miaa qiyr Isaac.

4 Isaac cutsir veh zit, Ablaham jiauww Siongrder soxx huanhur :ee, qra ix ee qniaw qniaa qatlew.

5 Ix ee qniaw Isaac cutsir ee sii, Ablaham jit-vah huer.

6 Salah qongw, "Siongrder hro guaw hnuahiw ciyr; qniwnarr tniax .qnir .ee, beh qapp guaw dangjee hnuahiw ciyr."

7 Qycc qongw, "Jirjui e dairsingx qra Ablaham qongw, 'Salah beh hro ngex-aw suh lingx'? In'ui dirr ix nilau ee sii, guaw qra ix snix jit xee qniaw."

8 Ginxaw jiamrjiamr dua, dyrr dngrlingx. Isaac dngrlingx ee zit, Ablaham vaised dua ensiac.

9 Dngsii Egiptlangg Hagar qra Ablaham soxx snix ee qniaw decc lingxciyr, hro Salah knuar .qnir.

10 Salah dyrr duiww Ablaham qongw, "Diyhh qra jitt xee luxvi qapp ix ee qniaw qnuaw .cud .kir; in'ui luxvi ee qniaw berdangr qapp guaw ee qniaw Isaac drangg juer horsuu."

11 Ablaham in'ui ix ee qniaw ee enqor vutjiw inbun.

12 Siongrder qra Ablaham qongw, "Liw m tangx uirdiyhh jitt xee ginxaw ixqip liw ee luxvi iubun; qniwnarr Salah duiww liw qongw :ee, liw longxx diyhh tniax; in'ui dui' Isaac snix :ee, jiacc beh cxingx juer liw ee horer.

13 Lun qaur luxvi ee qniaw, Guaw iarr beh hro ix jniaa juer jit qog, in'ui ix iarr si liw snix :ee."

14 Ablaham jaw jaw kiw .laii, tec vniaw qapp jit puede ee juiw hro Hagar; he dirr ix ee qingtauu dingw; lenrr ginxaw suar qapp ix kir. Ix dyrr kir, qaur Beerseba ee kongwiaw dyrr qniaa byy lo.

15 Puede lai ee juiw ing liauw, Hagar dyrr jiong' ginxaw vangr dirr ser jangg ciu-kax,

16 Vunxsinx qniaa kuix iokliok jyc jit qix jnxir ee hng, sna' duiwbin decc jre, qongw, "Guaw vutzimw knuar ginxaw siw"; dyrr jre dirr hiax, cud sniax dua tikaur.

17 Siongrder tniax qnir ginxaw ee sniax; Siongrder ee suwjiaw dui' tnix nirr qiyr Hagar, qongw, "Hagar, liw u simxmih dairjir? Mrbenw qniax. Siongrder ixqing’ tniax qnir ginxaw dirr hiax ee sniax.

18 Kiw .laii, iarr hro ginxaw kiw .laii, kanx dirr liw ee ciuw; Guaw beh hro ix jniaa juer dua qog."

19 Siongrder kuix ix ee bogjiux; ix dyrr knuar qnir juixjnew. Ix dyrr jiong' puede kir zip juiw qaur muaw muaw, suar hro ginxaw limx.

20 Siongrder qapp ginxaw dilehh, ix dyrr jiamrjiam dua, diamr dirr kongwiaw, jniaa juer sria jnxir ee langg.

21 Ix kiarkiw dirr Palan ee kongwiaw. Ix ee laurbuw dui' Egipt-de qra ix crua jit xee bow.

22 Dng' hitt sii, Abimelec qapp ix ee qundniuw Fikol duiww Ablaham qongw, "Qniwnarr liw soxx qniaa ee su, Siongrder qapp liw dilehh.

23 Dnaxx liw dirr jiax diyhh qiw Siongrder qapp guaw jiuwjua, m tangx kihu guaw, qapap guaw ee qniaw, ixqip guaw ee sunx. Guaw anxjnaixngiu hyw kuanxtai liw, liw iarr diyhh jiauww anxnix kuanxtai guaw, ixqip liw soxx qiawqux ee derhngx."

24 Ablaham qongw, "Guaw beh jiuwjua."

25 Jingg Abimelec ee lovok vawjiamr jit kauw juixjnew, Ablaham uirr jitt xee su hiamm Abimelec.

26 Abimelec qongw, "Jirjui juer jitt xee dairjir, guaw m jaix; liw iarr byy qra guaw qongw, qaur qinaxzit guaw jiacc tniax .qnir."

27 Ablaham jiong' ngiuu qapp guu hro Abimelec; nng langg dyrr snaqab lip iog.

28 Ablaham jiong' cid jiah buw ee ngiuqyx lingrgua vangr dirr jit soxjai.

29 Abimelec mng Ablaham qongxx, "Liw jiong' cid jiah buw ee ngiuqyx lingrgua vangr dirr jit soxjai, si simxmih iwsur?"

30 Rinr qongxx, "Liw diyhh dui' guaw ee ciuw siux jitt cid jiah ngiuqyx, juer guaw kuix jitt kauw jnew ee jingwqir."

31 Soxiw dyrr miaa hitt soxjai qiyr Beerseba, in'ui inx nng langg dirr hiax u jiuwjua.

32 Inx dirr Beerseba lip iog. Abimelec dyrr qapp ix ee qundniuw Fikol kixsinx dyr kir Filist.

33 Ablaham dirr Beerseba jraix jit jangg suisiliuxciu; qycc dirr hiax qiuqiyr Jehovah, ingxingw dilehh :ee ee Siongrder ee miaa.

34 Ablaham dirr Filistlangg ee de qiawqux jerje zit.

22 Jiaxee dairjir ixau, Siongrder cir Ablaham, qiyr ix qongxx, "Ablaham"; ix rinr qongxx, "Guaw dirr jiax."

2 Siongrder qongw, "Liw duar liw ee qniaw, dyrr si liw dogsnix ee qniaw, liw soxx tniar ee Isaac, kir Moliah ee de, Guaw soxx beh jixsi liw ee snuax; dirr hiax jiong' ix henr juer siyjer."

3 Ablaham tauwjaw kiw .laii, virvan luu, duar ix ee nng xee siauwlenlangg, qapp ix ee qniaw Isaac; iarr puar siyjer ee caa; dyrr kixsinx kir Siongrder soxx jixsi ix ee de.

4 Qaur derr snax zit, Ablaham giahbak hng hng knuar hitt xee soxjai.

5 Ablaham duiww ix ee siauwlenlangg qongw, "Linw qapp luu diamr jiax tingwhau, guaw qapp ginxaw kir hiax qingwvair, dyrr dyr laii linw jiax."

6 Ablaham jiong' siyjer ee caa he dirr ix ee qniaw Isaac ee sinjniu, qaqi ee ciuw giac huew qapp dyx; dui' hitt diap nng langg snaqab qniaa.

7 Isaac qra ix ee laurve Ablaham qongw, "Ve ar"; ix qongw, "Guaw ee qniaw, guaw dirr jiax." Ix qongw, "Liw knuar, huew qapp caa longxx u; danrsi siyjer ee ngiuu-aw dirr daclyc?"

8 Ablaham qongw, "Guaw ee qniaw, Siongrder beh qaqi virvan siyjer ee ngiuu-aw"; dui' hitt diap nng langg snaqab qniaa.

9 Inx qaur Siongrder jixsi ix ee soxjai; Ablaham dirr hiax kiw dnxuaa, jiong' caa vaii hyw, qra ix ee qniaw Isaac vak lehh he dirr dnxuaa nirr ee caa-dingw.

10 Ablaham dyrr crunx ciuw giac dyx, beh taii ix ee qniaw.

11 Jehovah ee suwjiaw dui' tnix qiyr ix qongxx, "Ablaham, Ablaham"; ix rinr qongxx, "Guaw dirr jiax."

12 Suwjiaw qongw, "Liw m tangx dirr jitt xee ginxaw ee sinjniu herciuw, iarr m tangx duiww ix jnaixngiu juer; in'ui guaw dnaxx jaix liw si qingwuir Siongrder, iarr byy jiong' liw ee qniaw, dyrr si liw dogsinx :ee, lauu lecc m hro guaw."

13 Ablaham giahbak knuar, knuar qnir aurbin u jit jiah ngiuqangw, qag dnii dirr qui' py ee ciu-aw. Ablaham dyrr kir liac hitt jiah ngiuqangw laii, henr juer siyjer, laii ter ix ee qniaw.

14 Ablaham miaa hitt xee soxjai qiyr *Iahyhua'ixlik; qaur qinaxzit langg iauxx decc qongw, "Dirr Jehovah ee snuax beh virvan."

15 Jehovah ee suwjiaw derr zi vaiw dui' tnix qiyr Ablaham qongxx,

16 "Jehovah qongw, 'Liw ixqing’ qniaa jitt ee su, byy lauu liw ee qniaw, dyrr si liw dogsnix ee qniaw, Guaw dyrr qiw qaqi jiuwjua qongxx,

17 Guaw beh suwhog liw, beh qetnix liw ee horer, cincniu tnidingw ee cnxix, haixvnix ee suax; liw ee horer beh did diyc jiaxee duiwdik ee quan'air.

18 Qycc derjniu banrvangx beh in'ui liw ee horer did diyc hokkir; in'ui liw tniatanr Guaw ee ue.'"

19 Dui' hitt diap Ablaham dyr laii ix hiaxee siauwlenlangg hiax; inx dyrr snaqab kixsinx kir Beerseba. Ablaham dyrr diamr dirr Beerseba.

20 Jiaxee dairjir liauxau, u langg qra qongw, "Milkah qra liw ee siyxdi Nahor snix qniaw;

21 Dua :ee Uz, siyxdi Buz, qapp Alam ee lauve, Kemuel;

22 Qycc u Qesed, Hazo, Pildas, Jidlaf, Betuel (Betuel snix Rlebekka)."

23 Jitt veh langg longxx si Milkah qra Ablaham ee siyxdi Nahor snix :ee.

24 Nahor ee sewii, miaa Rleumah, snix Tebah, Gaham, Tahas, qapp Maakah.

23 Salah hiongxsiu jit-vah zi-jap-cid huer; jex si Salah itsingx ee nihuer.

2 Salah siw dirr Kanaan-de ee Qiliat-arba, dyrr si Heblon. Ablaham laii decc uirdiyhh Salah aisiongx tikaur.

3 Au .laii Ablaham dui' sixlangg ee binrjingg kiw .laii, qra Hitlangg qongw,

4 "Guaw dirr linw diongqanx si qiawqux ee cutguarlangg, qriuu linw dirr jiax hro guaw jit xee soxjai juer tiongxde, tangx baijongr guaw ee sixlangg, hro guaw byy qycc knuar qnir ix."

5 Hitlangg rinr Ablaham, qra ix qongw,

6 "Guaw ee jruw, cniaw tniax. Liw dirr guanw diongqanx juer Siongrder ee bogvig. Cutjai liw dirr guanw ee tiongxde lai qingw derr id hyw :ee laii baijongr liw ee sixlangg. Guanw byy jit langg m iong'unw liw dirr ix ee tiongxde baijongr liw ee sixlangg."

7 Ablaham kiw .laii, duiww hitt soxjai ee langg, dyrr si Hit-jok, ngar iyx,

8 Duiww inx qongw, "Linw narr u iwsur beh hro guaw baijongr guaw ee sixlangg, hro guaw byy qycc knuar qnir ix, dyrr cniaw tniax guaw ter guaw qriuu Zohar ee qniaw Eflon,

9 Jiong' ix ee cantauu Macpelah ee het hro guaw; ix tangx jiauww jiokgiac ee qewsor bre hro guaw, hro guaw dirr linw diongqanx u giap tangx juer bongrde."

10 Dngsii Eflon jre dirr Hitlangg ee diongqanx. Dui' hitt diap Hitlangg Eflon dirr soxu zip ix ee sniamngg ee Hitlangg ee binrjingg, rinr Ablaham, qongw,

11 "Mrbenw, guaw ee jruw, cniaw tniax guaw. Guaw beh sangr liw hitt kux cann, lenrr hitt lairbin ee het iarr hro liw, dirr guaw qangg jok ee langg ee bingrjingg, guaw hro liw, tangx baijongr liw ee sixlangg."

12 Ablaham dyrr dirr hitt soxjai ee vecsnir ee binrjingg ngar iyx,

13 Dirr hitt soxjai vecsnir ee binrjingg, duiww Eflon qongw, "Liw narr kingw, cniaw tniax guaw. Guaw beh jiong' cann ee qewjnii hro liw, liw diyhh siux, hro guaw tangx dirr hiax baijongr guaw ee sixlangg."

14 Eflon rinr Ablaham qongxx,

15 "Guaw ee jruw, cniaw tniax guaw. Cann dat did ginn sir-vah, dirr liw qapp guaw ee diongqanx, beh sngr simxmih? Jueww liw baijongr liw ee sixlangg."

16 Ablaham tniax Eflon ee ue, jiauww ix dirr Hitlangg ee binrjingg soxx qongw :ee, jiong' bexbe tong'ing ee ginn, cinr sir-vah hro Eflon.

17 Dui' hitt diap, Eflon ee cann, dirr Macpelah, Mamle ee taujingg, hitt kux cann qapp hitt lairbin ee het, qapp cann-lai ixqip siwuii itcer ee ciurbak,

18 Dirr Hit-jok ee langg qapp soxu zip ix ee sniamngg ee langg ee binrjingg, longxx dniardiyc qruix hro Ablaham juer giap.

19 Au .laii Ablaham jiong' ix ee bow Salah baijongr dirr Kanaan-de Mamle taujingg ee Macpelah cann nirr ee het; Mamle dyrr si Heblon.

20 Dui' anxnix, hitt kux cann qapp cann nirr ee het, dui' Hitlangg dniardiyc qruix hro Ablaham juer giap, laii juer bongrde.

24 Ablaham huewsiu dngg, ixqing’ nilau. Jehovah dirr itcer ee su longxx suwhog hro Ablaham.

2 Ablaham duiww ix ee qrex-lai quanxliw juann giap ee lau lovok qongw, "Cniaw jiong' liw ee ciuw he dirr guaw ee duartuiw xe,

3 Guaw beh qiyr liw qiw Jehovah, dyrr si tnix ee Siongrder, de ee Siongrder, laii jiuwjua. Guaw kiarkiw Kanaanlangg ee diongqanx, liw m tangx qra guaw ee qniaw crua inx ee jaboxqniaw juer bow.

4 Liw diyhh kir guaw ee vunxde vunxjok, qra guaw ee qniaw Isaac crua jit xee bow."

5 Lovok rinr ix qongxx, "Setsuw jaboxginxaw m kingw duer guaw laii jitt soxjai, guaw dyrr diyhh jiong' liw ee qniaw duar dyr kir liw soxx dui' hiax cud .laii ee de mah?"

6 Ablaham qra ix qongw, "Liw diyhh qinxsin, m tangx cua guaw ee qniaw dyr kir hiax.

7 Tnix ee Siongrder, Jehovah, bad cua guaw lirkuix laurve ee qrex, qapp vunxjok ee de, duiww guaw qongxue, iarr duiw guaw jiuwjua qongxx, 'Guaw beh jiong' jitt xee de sniuxsur liw ee horer.' Ix beh crex Ix ee suwjiaw dirr liw ee binrjingg; liw dyrr tangx dui' hiax qra guaw ee qniaw crua jit xee bow.

8 Setsuw jaboxginxaw m kingw duer liw laii, guaw qiyr liw jxiur ee jxua dyrr qapp liw byy qansiap; dogdok m tangx duar guaw ee qniaw dyr kir hiax."

9 Lovok dyrr jiong' ix ee ciuw he dirr juxlangg Ablaham ee duartuiw xe, uirdiyhh jitt xee su duiww ix jiuwjua.

10 Hitt xee lovok dui' ix juxlangg ee logdyy diongx, cruw jap jiah logdyy, suar duar ix juxlangg dagg ngiu ee jaivyw, kixsinx kir Padan-alam, qaur Nahor ee sniaa.

11 Zit beh amr, jiongww jaboxginxaw cud laii cnriu juiw. Ix dyrr hro logdyy qui dirr sniaa-gua ee jnew-vnix.

12 Ix qongw, "Guaw ee juxlangg Ablaham ee Siongrder Jehovah ar, qriuu Liw six xunx hro guaw ee juxlangg Ablaham, hro guaw qinaxzit u hyw jyrgu.

13 Guaw dnaxx kia dirr jnew-vnix, snialairlangg ee jaboxginxaw decc cud laii cnriu juiw.

14 Guaw beh duiww jit xee jaboxginxaw qongw, 'Cniaw vangr lyc liw ee juixvann, hro guaw limx juiw.' Ix narr qongw, 'Cniaw limx, guaw iarr beh hro liw ee logdyy limx', guan hitt xee jaboxginxaw si Liw soxx dniardiyc hro Liw ee lovok Isaac juer bow. Anxnix, guaw dyrr jaix Liw six xunx hro guaw ee juxlangg."

15 Ue qongw iauxx bue suah, Rlebekka qingtauu pnai juixvann cud .laii, ix si Betuel snix :ee; Betuel si Ablaham ee siyxdi Nahor ee bow Milkah ee qniaw.

16 Hitt xee jaboxginxaw binrmau qigqii suiw, iauxx si jairsikluw, iauxx m bad u langg cinqin ix. Ix lyc kir jnew-vnix, cnriu muaw ix ee vann dyrr kiw .laii.

17 Lovok jauw jinwjingg gniajih ix, qongw, "Qriuu liw jiong' vann-lai ee juiw damrvyc aw guaw limx."

18 Jaboxginxaw qongw, "Guaw ee jruw, cniaw limx"; dyrr qnuaxqinw vangr juixvann lyc .laii, kuar dirr ciuw nirr hro ix limx.

19 Hro ix limx bingvik, qycc qongw, "Guaw iarr beh qra liw ee logdyy cnriu juiw, hro inx limx qraur gxiac."

20 Ix dyrr qnuaxqinw jiong' vann-lai ee juiw vniar dirr jxyy nirr; qycc jauw qaur jnew nirr cnriu juiw, ter ix soxu ee logdyy cnriu.

21 Hitt xee langg juwbak knuar ix, diam diam byy qongxue, rair jaix Jehovah sniuxsur ix sunrsu ee lo iacc byy.

22 Logdyy limx bingvik, hitt langg dyrr tec jit xee qimkuann, dang vnuar sekel, nng xee qimx ciuxkuann, dang jap sekel hro hitt xee jaboxginxaw, qongw,

23 "Liw si jirjui ee jaboxqniaw? Cniaw qra guaw qongw. Linw laurve ee qrex, u soxjai tangx hro guanw hiyh iacc byy?"

24 Ix dyrr qra ix qongw, "Guaw si Milkah dui' Nahor soxx snix ee qniaw, Betuel ee jaboxqniaw."

25 Ix qycc duiww ix qongw, "Guanw u cauxliau bixniuu ciongjiog; iarr u soxjai tangx hiyh."

26 Hitt langg dyrr ngar tauu qingwvair Jehovah, qongw,

27 "Diyhh ylyw guaw ee jruw Ablaham ee Siongrder Jehovah; Ix ing ju'air singsit kuanxtai guaw ee juxalngg, longxx byy tingjiw. Lun qaur guaw, Jehovah dirr lorjniu inxcua guaw qaur guaw ee juxlangg ee hniadi ee qrex."

28 Jaboxginxaw jauw .dyr .kir, jiauww jiaxee ue qra inx laurbuw tong' qrex ee langg qongw.

29 Rlebekka u jit xee hniax, miaa qiyr Laban, ix cud kir jnew-vnix jiurqin hitt langg.

30 Ix knuar qnir hitt xee kuann, qycc knuar qnir ciuxkuann dirr inx siyxbe ee ciuw, iarr tniax qnir inx siyxbe Rlebekka ee ue, qongw, "Hitt langg duiww guaw qongw anxnix, anxnix'; ix dyrr kir hitt langg hiax, knuar qnir hitt langg iauxx kia dirr logdyy vnix, uaw qin juixjnew.

31 Laban dyrr qra ix qongw, "Liw jitt xee did diyc Jehovah suwhog :ee, cniaw zip .laii, sniaw su kia dirr guarbin? Guaw ixqing’ virvan cur, qapp logdyy ee soxjai."

32 Hitt langg dyrr zip ix ee cur. Laban dyrr tauw logdyy soxx jair :ee, qycc ing cauxliau bixniuu cri logdyy; pangg juiw hro hitt langg ixqip qinduer ee langg sew kax,

33 Jiong' jiahmic vaii dirr ix ee binrjingg, hro ix jiac. Danrsi ix qongw, "Guaw byy beh jiac, tingwhau guaw qongw bingg guaw ee suwbing." Laban qongw, "Cniaw liw qongw."

34 Ix dyrr qongw, "Guaw si Ablaham ee lovok.

35 Jehovah dua dua suwhog dirr guaw ee juxlangg, hro ix hing'ong, qycc hro ix ngiuu, guu, qimx, lovok, luxvi, logdyy qapp luu.

36 Guaw ee juxlangg ee bow Salah nilau ee sii, qra guaw ee juxlangg snix jit xee qniaw; guaw ee juxlangg iarr jiong' itcer soxu :ee hro jitt xee qniaw.

37 Guaw ee juxlangg qiyr guaw jiuwjua qongxx, 'Guaw kiarkiw Kanaanlangg ee de. Liw m tangx qra guaw ee qniaw crua inx ee jaboxqniaw juer bow.

38 Liw diyhh kir guaw ee laurve ee qrex, guaw vunxjok hiax, qra guaw ee qniaw crua jit xee bow.'

39 Guaw duiww guaw ee juxlangg qongxx, 'Kiongxqniax jaboxginxaw m kingw duer guaw laii.'

40 Ix dyrr qra guaw qongw, 'Guaw soxx hogsai ee Jehovah beh crex Ix ee suwjiaw qapp liw snaqab kir, hro liw sunrsu ee lo, liw dyrr tangx dui' guaw ee jongjok, guaw ee ve ee qrex, qra guaw ee qniaw crua jit xee bow.

41 Dogdok rair liw qaur guaw vunxjok hiax. Inx narr m hro liw, guaw qiyr liw jxiur ee jxua, iarr qapp liw byy qansiap.'

42 Qinaxzit guaw qaur jnew-vnix, qongw, 'Guaw ee juxlangg Ablaham ee Siongrder Jehovah ar, Liw narr hro guaw soxx qniaa ee lo sunrsu;

43 Guaw dnaxx kia dirr juixjnew vnix, duiww jit xee cud laii cnriu juiw ee jaboxginxaw qongw: Cniaw liw jiong' liw vann nirr ee juiw damrvyc hro guaw limx;

44 Ix narr qong: Jueww liw limx, guaw iarr beh qra liw ee logdyy cnriu juw; guan hitt xee jaboxginxaw juer Jehovah soxx dniardiyc hro guaw ee juxlangg ee qniaw juer bow.'

45 Guaw simlai ee ue qongw iauxx bue liauw, Rlebekka dyrr cud .laii, qingtauu dingw pnai juixvann, lyc kir jnew-vnix cnriu juiw. Guaw dyrr qra ix qongw, 'Cniaw liw hro guaw limx.'

46 Ix dyrr qnuaxqinw dui' qingtauu dingw vangr lyc juixvann, qongw, 'Cniaw limx. Guaw iarr beh hro liw ee logdyy limx'; guaw dyrr limx, ix iarr hro guaw ee logdyy limx.

47 Guaw qycc mng ix qongxx, 'Liw si jirjui ee jaboxqniaw?' Ix rinr qongxx, 'Guaw si Milkah dui' Nahor soxx snix ee qniaw, Betuel, ee jaboxqniaw.' Guaw dyrr jiong' kuann qruar dirr ix ee pni, ciuxkuann qruar dirr ix ee ciuw.

48 Guaw dyrr ngar tauu vair Jehovah, ylyw guaw ee jruw Ablaham ee Siongrder Jehovah; in'ui Ix cua guaw qniaa duxhyw ee lo, hro guaw did diyc guaw ee jruw ee siyxdi ee jaboxsunx laii hro ix ee qniaw.

49 Dnaxx linw narr beh ing ju'air singsit kuanxtai guaw ee juxlangg, dyrr qra guaw qongw; narr m, iarr qra guaw qongw; hro guaw hyw tangx ngr jyw iacc si ngr iu."

50 Laban qapp Betuel rinr qongxx, "Dairjir cud dirr Jehovah, guanw be e duiww liw qongw hyw iacc pnaiw.

51 Liw knuar, Rlebekka dirr liw ee binrjingg, tangx jiong' ix cua .kir, hro liw ee juxlangg ee qniaw juer bow, jiauww Jehovah soxx qongw."

52 Ablaham ee lovok tniax qnir inx jiaxee ue, dyrr ngr Jehovah pag dirr de nirr.

53 Hitt diap lovok tec cud ginkir, qimkir qapp ihok sangr Rlebekka; qycc jiong' vyxmic sangr ix ee hniax qapp ix ee laurbuw.

54 Lovok qapp duer ix ee langg limjiac hiycmii; tauwjaw kiw .laii, dyrr qongw, "Cniaw crex guaw dyr kir guaw ee juxlangg hiax."

55 Rlebekka ee hniax qapp ix ee laurbuw qongw, "Iong'unw jaboxginxaw qapp guanw diamr quiw zit, siangrjiyw jap zit, zen'au ix tangx kir."

56 Ix duiww inx qongw, "M tangx joxdongr guaw, Jehovah ixqing’ hro guaw sunrsu ee lo; cniaw crex guaw kir, hro guaw dyr kir guaw ee juxlangg hiax."

57 Inx qongw, "Guanw qiyr jaboxginxaw laii, tamr ix ee uerir."

58 Dyrr qiyr Rlebekka laii, mng ix qongxx, "Liw beh qapp jitt langg kir mah?" Ix qongw, "Guaw beh kir."

59 Inx dyrr crex siyxbe Rlebekka, qapp ix ee lingbuw, qapp Ablaham ee lovok, ixqip duer ix ee langg kir.

60 Inx dyrr qra Rlebekka jiokhog, duiww ix qongw, "Siyxbe ar, guan liw juer cingban langg ee laurbuw, guan liw ee horer did diyc duiwdik ee quan'air."

61 Rlebekka qapp ix ee luxvi kiw laii kiaa logdyy, duer hitt xee langg. Lovok dyrr cua Rlebekka kir.

62 Isaac kiarkiw dirr lamhngx ee de, hitt sii dui' Beer Lahai Rloi ee lo laii.

63 Zit beh amr, Isaac cud laii dirr cann nirr, jing jing decc sniu; giahbak jid'err knuar, knuar qnir logdyy laii.

64 Rlebekka knuar qnir Isaac, dyrr dui' logdyy lyc .laii,

65 Mng hitt xee lovok qongxx, "Dirr cann nirr qniaa laii gniajih lanw :ee si jirjui?" Lovok qongw, "Si guaw ee juxlangg." Rlebekka dyrr tec puer qaqi dar.

66 Lovok jiong' soxx juer itcer ee su qra Isaac qongw.

67 Isaac dyrr kanx Rlebekka zip ix ee laurbuw Salah ee vowvnii, crua ix juer bow, qycc jin' tniar ix. Isaac dui' laurbuw siw au, qaur jitt diap jiacc did diyc an'uir.

25 Ablaham qycc crua jit xee bow, miaa qiyr Ketulah.

2 Ketulah qra ix snix Zimlan, Joksan, Medan, Midian, Isbak, qapp Su'ah.

3 Joksan snix Seba qapp Dedan. Dedan ee qniaxsunx si Asul-jok, Letuslangg qapp Leumlangg.

4 Midian ee qniaw si Efah, Efer, Hanoc, Abida, qapp Eldaah; jiaxee longxx si Ketulah ee qniaw.

5 Ablaham jiong' itcer soxu :ee hro Isaac.

6 Ablaham jiong' jaibut vunx hro ix jiaxee sewii ee qniaw, tanr ix vunxsinx iauxx uac lehh ee sii, crex inx lirkuix ix ee qniaw Isaac kir dangsir, qaur dangvingg ee de.

7 Ablaham itsingx nizit si jit-vah cid-jap-go huer.

8 Ablaham jiac dngg huewsiu, jniaa juer laurlangg, nihuer muaxjiog, dngrkuir siw, dywjow.

9 Ix ee qniaw, Isaac qapp Ismael, jiong' ix baijongr dirr Macpelah ee het. Jitt xee het dirr Mamle ee taujingg, Hitlangg Zohar ee qniaw Eflon ee cann-diongx,

10 Dyrr si Ablaham dui' Hitlangg soxx brew hitt kux cann. Ablaham qapp ix ee bow Salah longxx baijongr dirr hiax.

11 Ablaham siw liauxau, Siongrder suwhog hro ix ee qniaw Isaac; Isaac uaw qin Beer Lahai Rloi kiarkiw.

12 Ablaham ee qniaw Ismael ee sewhe, qir dirr erdew. Ismael dyrr si Salah ee luxvi Egiptlangg Hagar dui' Ablaham soxx snix :ee.

13 Ismael jiaxee qniaw ee miaa, jiauww ix ee miazi sewhe, cincniu erdew: Ismael ee dua-qniaw Nebaiot; qycc u Kedar, Adbeel, Mibsam,

14 Misma, Dumah, Massa,

15 Hadad, Tema, Jetur, Nafis, qapp Kedemah;

16 Jiaxee dyrr si Ismael ee qniaw ee miaa, jiauww inx ee hniujngx, ngiaje juer jap-zi jok ee jogdniuw.

17 Ismael itsingx ee huewsiu, jit-vah snax-jap-cid; kuir dng siw dyrr dywjow.

18 Ix ee qniaxsunx druar dirr Havilah qaur Egipt taujingg ee Sur, beh kir Assylia ee lo; kiarkiw dirr ix jiongww hniadi ee taujingg.

19 Ablaham ee qniaw Isaac ee sewhe qir dirr erdew: Ablaham snix Isaac;

20 Isaac crua Rlebekka juer bow ee sii, duxaxx sir-jap huer. Ix si Padan-alam ee Alamlangg Betuel ee jaboxqniaw, Alamlangg Laban ee siyxbe.

21 Isaac in'ui ix ee bow byy snix qniaw, ter ix qiqiuu Jehovah. Jehovah unxjunw ix soxx qriuu; ix ee bow Rlebekka dyrr huaiin.

22 Ginxaw dirr ix ee vaklai sna' keh. Ix dyrr qongw, "Narr si jitt kuanw, guaw micsaiw anxnix?" Ix dyrr kir mng Jehovah.

23 Jehovah qra ix qongw, "Nng qog dirr liw vaklai, nng jok beh dui' liw ee sinkux cud; jitt jok beh kacc qiongg hitt jok; sirdua :ee beh hogsai sirser :ee."

24 Singsanw ee zidqii qaur, qyxzenn vaklai si siangsnix :ee.

25 Tauu jit xee cud .laii .ee, sintew angg angg, tong' sinkux cincniu pue'axsnax; dyrr qra ix hy miaa juer Esau.

26 Duewau, siyxdi qycc cud .laii, ix ee ciuw knii Esau ee ka'aurdnix; dyrr qra ix hy miaa qiyr Jakob. Nng xee qniaw cutsir ee sii, Isaac duxaxx lak-jap huer.

27 Nng xee ginxaw jiamrjiam dua. Esau gauu paclac, siongsiongg dirr snua'ngiaa; Jakob juewlangg tiamjing, sionsiongg druar vowvnii lai.

28 Isaac tniar Esau, in'ui siongsiongg jiac ix ee iaxbi. Rlebekka tniar Jakob.

29 U jit zit Jakob juw tngx, Esau dui' snua'iaw dyr .laii, iawsen qaur qik.

30 Esau duiww Jakob qongw, "Guaw jin' iawsen. Qriuu liw ing jitt xee angg ee tngx hro guaw jiac"; in'ui anxnix, Esau ee miaa iarr qiyr Edom.

31 Jakob qongw, "Liw qinaxzit ing dua-qniaw ee binghun bre hro guaw."

32 Esau qongw, "Guaw dy' beh siw lar; jitt xee dua-qniaw ee binghun, duiwdirr guaw u sniaw lirig?"

33 Jakob qongw, "Qinaxzit liw diyhh duiww guaw jiuwjua." Ix dyrr duiww ix jiuwjua, jiong' dua-qniaw ee binghun bre hro Jakob.

34 Jakob dyrr jiong' vniaw qapp angdaurtngx hro Esau; ix dyrr limjiac, kiw laii jueww ix kir. Jex dyrr si Esau knuawkinx dua-qniaw ee binghun.

26 Ablaham ee sii, tauu jit vaiw qihngx ixau, hitt soxjai qycc u qihngx. Isaac dyrr kir Gelar, qaur Filist ee ongg Abimelec hiax.

2 Jehovah duiww ix cuthen, qongw, "Liw m tangx lyc kir Egipt, diyhh druar dirr Guaw soxx jixsi liw ee de.

3 Liw qiawqux dirr jitt xee de, Guaw beh qapp liw dilehh, suwhog liw; in'ui Guaw beh jiong' jiaxee de longxx hro liw, qapp liw ee horer. Guaw beh qenqor Guaw dui' liw ee ve Ablaham soxx jxiur ee jxua.

4 Guaw beh qetnix liw ee horer, cincniu tnix nirr ee cnxix hiacc je; qycc beh jiong' jiaxee de longxx hro liw ee horer; qycc derjniu banrqog beh in'ui liw ee horer did diyc hokkir.

5 Si in'ui Ablaham tniax Guaw ee ue, siuw Guaw ee huanhur, Guaw ee bingrling, Guaw ee ludle, Guaw ee huatdo." Isaac kiarkiw dirr Gelar.

6,7 Hitt soxjai ee langg mng qaur ix ee bow; ix dyrr qongw, "Ix si guaw ee siyxbe." Ix m qnaw qongw, "Si guaw ee bow"; simlai decc sniu, "Qniax hitt soxjai ee langg uirdiyhh Rlebekka ee enqor taii guaw"; in'ui ix binrmau jin' suiw.

8 Ix dirr hiax ixqing’ quw, Filist ee ongg, Abimelec, dui' txangx-aw knuar, knuar qnir Isaac qapp ix ee bow Rlebekka decc sionghyw.

9 Abimelec qiyr Isaac laii, qra ix qongw, "Ix sidjai si liw ee bow. Liw sniaw su qongw, 'Ix si guaw ee siyxbe'?" Isaac qongw, "Guaw simlai sniu qongxx, kiongxqniax guaw e uirdiyhh ix laii siw."

10 Abimelec qongw, "Liw duiww guanw soxx juer :ee si simxmih su? Vecsnir ee diongqanx, hiamxhiamw u langg qapp liw ee bow snaqab kunr; liw dyrr hro guanw ham lyc jue."

11 Dui' hitt diap Abimelec dyrr huanhur jiongww vecsnir qongxx, "Huanrnarr kap diyc jitt langg qapp ix ee bow :ee, dniardiyc beh hro ix siw."

12 Isaac dirr hitt soxjai jingwjyh, hitt nii did diyc vah vxue; in'ui Jehovah sur ix hokkir.

13 Ix dyrr jniaa juer dua, naxx quw, naxx dua, qaur jniaa juer dua huwho.

14 Ix u ngiuu-qrunn guu-qrunn, iarr u jerje lovok. Filistlangg dyrr uanwdor ix.

15 Dng' ix ee laurve Ablaham dilehh ee zit, ix ee laurve ee lovok soxx kuix ee jnew, Filistlangg longxx qra ix trad .kiw .laii, ing too tun muaw.

16 Abimelec qra Isaac qongw, "Liw diyhh lirkuix guaw kir, in'ui liw viw guanw jamxzenn kacc qiongsing."

17 Isaac dyrr lirkuix hiax, dirr Gelar ee snuaqog dah vowvnii, diamr hiax kiarkiw.

18 Dng' ix ee laurve Ablaham dilehh ee zit, soxx kuix hiaxee juixjnew, qaur Ablaham siw au, hro Filistlangg tun .kir. Isaac dingjaiww qra ix kuix, iuguann jiauww laurve soxx hy ee miaa laii miaa hiaxee jnew.

19 Isaac ee lovok dirr snuaqog decc qrut, duw diyc jit xee uahjuiw ee jnew.

20 Gelar ee bogjiaw qapp Isaac ee bogjiaw sna' jnex, qongw, "Jitt xee juiw si guanw :ee." Isaac dyrr hy hitt xee jnew ee miaa qiyr Esek; in'ui inx qapp ix sna' jnex.

21 Inx qycc kuix jit xee jnew, uirr jitt xee jnew qycc sna' jnex; dyrr qiyr ix ee miaa Sitnah.

22 Lirkuix hiax qycc kuix jit xee jnew; inx byy uirr jitt xee jnew qycc sna' jnex; dyrr qra ix hy miaa Rlehobot; si qongxx, "Jehovah dnaxx hro guanw kuikuah ee de; guanw beh dirr jitt xee de hing'ong."

23 Isaac dui' hiax jnriu kir Beerseba.

24 Hitt mii Jehovah duiww ix cuthen, qongw, "Guaw si liw ee laurve Ablaham ee Siongrder. Mrbenw qniax, in'ui Guaw qapp liw dilehh, beh suwhog liw, hro liw ee horer hing'ong, longxx si uirdiyhh Guaw ee lovok Ablaham ee enqor."

25 Ix dyrr dirr hiax kiw jit jxy dnxuaa, qiuqiyr Jehovah ee miaa, dirr hiax dah ix ee vowvnii. Isaac ee lovok dyrr dirr hiax kuix jit xee jnew.

26 Abimelec qapp ix ee ving'iuw Ahuzat ixqip ix ee qundniuw Fikol, dui' Gear laii qnir ix.

27 Isaac duiww inx qongw, "Linw qiwzenn uanwhun guaw, qiyr guaw lirkuix linw. Dnaxx sniaw su laii guaw jiax?"

28 Inx qongw, "Guanw bingg bingg knuar qnir Jehovah qapp liw dilehh. Lanw diongqanx liw guanw jiuwjua, hro guanw qapp liw lip iog.

29 Liw byy hai guanw, cincniu guanw m bad kap diyc liw, dogdok hyw kuanxtai liw, sangr liw anzenn dyr .kir. Dnaxx liw si Jehovah suwhog :ee."

30 Isaac dyrr uirr inx sed ensiac; inx dyrr jiac dyrr limx.

31 Tauwjaw kiw .laii, dairqex jiuwjua. Isaac sangr inx kixsinx; inx dyrr anzenn lirkuix ix kir.

32 Siangg hitt zit, Isaac ee lovok laii, jiong' inx kuix jnew ee su tongdix ix, qongw, "Guanw did diyc juiw lar."

33 Ix dyrr qiyr hitt xee jnew ee miaa qiyr Sibah; soxiw qaur qinaxzit hitt xee sniaa ee miaa qiyr juer Beerseba.

34 Esau sir-jap huer ee sii, crua Hitlangg Beeli ee jaboxqniaw Judit, qapp Hitlangg Elon ee jaboxqniaw Basemat juer bow.

35 Jitt nng xee hurzinlangg siongsiongg hro Isaac qapp Rlebekka simlai dua inbun.

27 Isaac nilau, bagjiux huex, byy knuar .qnir, dyrr qiyr ix ee dua-qniaw Esau laii, qra ix qongw, "Guaw ee qniaw ar." Ix rinr qongxx, "Guaw dirr jiax."

2 Isaac qongw, "Guaw dnaxx lau lar, m jaix daclyc jit zit beh siw.

3 Dnaxx giac liw ee qesix, dyrr si jniwde qapp qringx, kir snuax nirr, qra guaw paclac,

4 Jiauww guaw soxx qac'ir :ee juw hro ix hyw jubi, pangg laii hro guaw, guaw tangx jiac, hro guaw dirr bue siw ee dairsingx qra liw jiokhog."

5 Isaac qra ix ee qniaw Esau qongw ee sii, Rlebekka tniax .qnir. Esau kir snuax nirr beh paclac, tangx duar dyr .laii.

6 Rlebekka dyrr duiww ix ee qniaw Jakob qongw, "Liw knuar, guaw tniax qnir linw laurve qra liw ee hniax Esau qongw,

7 'Liw jiong' iaxsiur qra guaw duar .laii, qra guaw juw hro ix hyw jubi, hro guaw jiac; guaw beh dirr bue siw ee dairsingx, dirr Jehovah ee binrjingg qra liw jiokhog.'

8 Dnaxx guaw ee qniaw, liw diyhh tniax guaw ee ue, jiauww guaw soxx huanhur liw :ee.

9 Liw kir ngiuu-qrunn hiax, qra guaw liac nng jiac vuii ee snua'ngiuu-aw laii. Guaw beh qra liw ee laurve juw hyw ee birsor, jiauww ix soxx qac'ir :ee.

10 Liw pangg kir linw laurve hiax, hro ix jiac; hro ix dirr bue siw ee dairsingx qra liw jiokhog."

11 Jakob duiww ix ee laubuw Rlebekka qongw, "Mrquxx guaw ee hniax Esau sinkux u xmngg, guaw si qngqut.

12 Setsuw guaw ee laurve bongx diyc guaw, beh knuar guaw juer kipenr langg :ee; guaw dyrr jiyx jiuwjow, be did diyc jiokhog."

13 Ix ee laurbuw qongw, "Guaw ee qniaw ar, liw jiyx ee jiuwjow qruix dirr guaw. Jueww liw tniax guaw ee ue, kir liac laii hro guaw."

14 Ix dyrr kir liac laii hro ix ee laurbuw; laurbuw dyrr juw hyw ee jubi, jiauww laurve soxx qac'ir :ee.

15 Rlebekka qycc hniah dua-qniaw Esau siux dirr ix qrex-lai ee suiw snxax, qra ix ee sewqniaw Jakob cing.

16 Qycc ing snua'ngiu'axpuee vaux Jakob ee ciuw, qapp ix amrqunw qngqut ee xui.

17 Ix dyrr jiong' soxx juw ee hyw jubi qapp vniaw, he dirr ix ee qniaw Jakob ee ciuw.

18 Jakob qaur inx laurve hiax, qongw, "Guaw ee ve ar." Ix qongw, "Guaw dirr jiax. Guaw ee qniaw, liw si jirjui?"

19 Jakob duiww ix ee laurve qongw, "Guaw si liw ee dua-qniaw Esau; guaw ixqing’ jiauww liw soxx huanhur guaw :ee kir qniaa. Cniaw liw kiw laii jre, jiac guaw soxx pah .diyc .ee, hyw tangx qra guaw jiokhog."

20 Isaac duiww ix ee qniaw qongw, "Guaw ee qniaw, liw jnaixngiu jiacc kuair did .diyc?" Ix qongw, "In'ui liw ee Siongrder Jehovah hro guaw hyw jyrgu laii did .diyc."

21 Isaac qra Jakob qongw, "Guaw ee qniaw ar, liw qinruaw .laii, guaw beh bongx liw, knuar liw jinjniar si guaw ee qniaw Esau iacc m si."

22 Jakob dyrr uaw qin ix ee laurve Isaac. Ix dyrr bongx ix, qongw, "Sniax, si Jakob ee sniax; ciuw, si Esau ee ciuw."

23 Isaac hunvet be bingg, in'ui ix ee ciuw u xmngg, cincniu ix ee hniax Esau ee ciuw. Isaac dyrr qra ix jiokhog.

24 Qycc qongw, "Liw jinjniar si guaw ee qniaw Esau mah?"

25 Ix qongw, "Guaw si." Isaac qongw, "Pangg laii hro guaw. Guaw beh jiac guaw ee qniaw soxx did diyc ee iaxbi, hyw tangx qra liw jiokhog." Jakob dyrr pangg jiuw hro ix; ix dyrr limx.

26 Ix ee laurve Isaac duiww ix qongw, "Guaw ee qniaw, jinwjingg laii jimx guaw."

27 Ix dyrr jinwjingg, jimx ix ee laurve; ix ee laurve pnix diyc ix ee snxax ee pangbi, dyrr qra ix jiokhog, qongw, "Guaw ee qniaw ee pangbi, cincniu Jehovah suwhog ee cann ee pangbi.

28 Guan Siongrder sniuxsur liw tnidingw ee qamlo, sewjniu ee vuide, gnoxqog qapp sinx ee jiuw jin' je.

29 Jiongww vecsnir hogsai liw, ledqog quirvair liw. Liw juer liw hniadi ee jruw, liw ee laurve ee qniaw quirvair liw. Jiuwjow liw :ee siurr jiuwjow, jiokhog liw :ee did diyc hokkir."

30 Isaac qra Jakob jiokhog bingvik, Jakob duxduxx dui' ix ee laurve Isaac hiax cud .laii, ix ee hniax Esau paclac dyr .laii.

31 Ix iarr juw hyw ee birsor, pangg laii hro ix ee laurve, qongw, "Guaw ee ve ar, cniaw kiw laii jiac qniaw soxx pah .diyc .ee, hyw tangx qra guaw jiokhog."

32 Ix ee laurve Isaac qra ix qongw, "Liw si jirjui?" Ix qongw, "Guaw si liw ee qniaw, dyrr si liw ee dua-qniaw, Esau."

33 Isaac dua qniax, gniauhgniauc cuah, qongw, "Hex si jirjui? Liw bue laii ee dairsingx, pangg ix soxx pah .diyc .ee laii hro guaw. Guaw u jiac, iarr u qra ix jiokhog. Ix dikkag beh did diyc hokkir."

34 Esau tniax qnir laurve ee ue, kuix sniax qiyr kow dua kaur, duiww ix ee laurve qongw, "Guaw ee ve ar, liw iarr diyhh qra guaw jiokhog."

35 Isaac qongw, "Liw ee siyxdi ing kuixqer laii cniuw liw ee hokhun."

36 Esau qongw, "Ix miaa juer Jakob, qamxx byy jin' hap mah? Ix kipenr guaw nng vaiw. Jingg cniuw guaw dua-qniaw ee binghun. Liw knuar, dnaxx ix qycc cniuw guaw ee hokhun." Qycc qongw, "Qamxx byy lauu jit xee tangx qra guaw jiokhog :ee mah?"

37 Isaac rinr Esau qongxx, "Guaw ixqing’ lip ix juer liw ee jruw, iarr jiong' ix ee jiongww hniadi hro ix juer lovok; qycc ing gnoxqog sinx jiuw ngiuxci ix. Guaw ee qniaw ar, dnaxx guaw iauxx e qra liw juer simxmih?"

38 Esau qra ix ee laurve qongw, "Ve ar, liw ee jiokhog qamxx jixu jit vaiw mah? Guaw ee ve ar, guaw, liw iarr diyhh qra guaw jiokhog." Esau kuix sniax tikaur.

39 Ix ee laurve Isaac rinr ix qongxx, "Liw soxx kiarkiw :ee, be u sewjniu ee vuii de, iarr be u tnidingw ee qamlo.

40 Liw beh uaxkyr dyqiamr doruac, qycc beh hogsai liw ee siyxdi. Qaur liw hunwhingx ee sii, beh dui' liw ee amrqunw qunwkuix ix ee gudnax."

41 Esau in'ui ix ee laurve qra Jakob jiokhog, dyrr uanwhun Jakob; simlai qongw, "Uirr laurve ding'iux ee sii qin lar. Qaur hitt sii, guaw beh taii siw guaw ee siyxdi Jakob."

42 U langg jiong' Esau ee ue qra Rlebekka qongw; ix dyrr crex langg kir qiyr ix ee sewqniaw Jakob laii, qra ix qongw, "Liw ee hniax Esau beh taii liw, laii sriaux ix ee hunrkir.

43 Dnaxx guaw ee qniaw, liw diyhh tniax guaw ee ue, kiw .laii, jauw kir Halan, guaw ee hniax Laban hiax,

44 Qapp ix diamr quiw zit, tingwhau liw ee hniax siurkir sriaux.

45 Qaur liw ee hniax siurkir suah, be qir did liw duiww ix soxx juer ee su, hitt si guaw dyrr crex langg cua liw dui' hiax dyr .laii. Guaw sniaw su jit zit sitlyc linw nng langg?"

46 Rlebekka qra Isaac qongw, "Guaw in'ui jiaxee Hitlangg ee jaboxqniaw, lenrr sniwmia dy' m air. Setsuw Jakob iarr crua jitt soxjai ee jaboxqniaw juer bow, cincniu Hitlangg ee jaboxqniaw hitt kuanw, guaw uac lehh u sniaw loring?"

28 Isaac qiyr Jakob laii, qra ix jiokhog, iarr huanhur ix qongxx, "Liw m tangx crua Kanaan ee jaboxginxaw juer bow.

2 Liw kiw .laii, kir Padan-alam, qaur liw ee guarqongx Betuel ee qrex; dirr liw ee buxqu Laban jaboxqniaw ee diongqanx, crua jit xee juer bow.

3 Guan juanlingg ee Siongrder suwhog liw, hro liw snitnuar jin' je, jniaa juer jerje jok.

4 Qycc jiong' soxx ingwunw Ablaham ee hokkir hro liw, qapp liw ee horer, hro liw singjiab liw soxx qiawqux ee de, dyrr si Siongrder soxx hro Ablaham :ee."

5 Isaac crex Jakob kir. Ix dyrr kir Padan-alam, qaur Alamlangg Betuel ee qniaw Laban hiax; ix si Jakob Esau ee buxqu.

6 Esau knuar qnir Isaac qra Jakob jiokhog, qycc crex ix kir Padan-alam, beh dui' hiax cuarbow; iarr knuar qnir jiokhog ix ee sii, huanhur ix qongxx, "M tangx crua Kanaan ee jaboxginxaw juerbow";

7 Qycc knuar qnir Jakob tniax verbuw ee ue, kir Padan-alam.

8 Esau dyrr jaix Kanaan ee jaboxginxaw, ix ee laurve Isaac m dingwir.

9 Esau dyrr kir Ismael hiax, dirr ix hiaxee bow ixgua, qycc crua Mahalat juer bow; ix si Ablaham ee qniaw, Ismael, ee jaboxqniaw, Nebaiot, ee siyxbe.

10 Jakob lirkuix Beerseba, ngr Halan kir.

11 Qaur jit soxjai, in'ui zit lyc, dyrr dirr hiax hiycmii. Dui' hiaxee jiyhtauu ee diongqanx, ix tec jit der juer jimxtauu, dirr hiax kunr.

12 Ix bang qnir u tuix kia dirr de nirr, tuix-dingw duw tnix; u Siongrder ee suwjiaw dirr tuix nirr decc jniurlyc.

13 Jehovah kia dirr tuix-dingw, qongw, "Guaw si Jehovah, liw ee jow Ablaham ee Siongrder. Guaw beh jiong' liw henrjai soxx kunr ee de sniuxsur liw, qapp liw ee horer.

14 Liw ee horer beh cincniu derjniu ee tosuax. Liw beh duiww dangx, saix, lamm, vag laii huatdenw. Derjniu banrjok beh in'ui liw qapp liw ee horer did diyc hokkir.

15 Guaw iarr qapp liw dilehh, liw bylun kir daclyc, Guaw beh vyxho liw; iarr beh cua liw dyr laii jitt soxjai, longxx byy vangwsag liw, qaur Guaw jniaa duiww liw soxx qongw :ee."

16 Jakob kunr cnew, qongw, "Jehovah jinjniar dirr jiax, guaw qingxzenn m jaix."

17 Ix dyrr qniax, qongw, "Jitt soxjai jiacc tangx qniax! Jiax m si vadd hxang, si Siongrder ee cur; jex si tnix ee mngg."

18 Jakob jaw jaw kiw .laii, jiong' ix juer jimxtauu ee jiyc kia juer tiau, dryr iuu dirr dingxbin,

19 Dyrr miaa hitt soxjai qiyr Betel; jitt xee sniaa vunxmiaa Luz.

20 Jakob he guan, qongw, "Siongrder narr qapp guaw dilehh, dirr guaw soxx qniaa ee lo vyxho guaw, qycc hro guaw u mic tangx jiac, u snxax tangx cing,

21 Hro guaw anzenn dyr laii guaw ee ve ee cur, dyrr Jehovah dikkag juer guaw ee Siongrder.

22 Guaw soxx kia juer tiau ee jiyc beh juer Siongrder ee cur; qniwnarr Liw soxx sniuxsur guaw :ee, guaw beh jiong' jap hxun ee jit hxun henr hro Liw."

29 Jakob kixsinx, qaur danghngx ee langg ee de, knuar qnir cann nirr u jit kauw jnew, u snax din ngiuu dyw dirr jnew-vnix.

2 Langg hro ngiuu-qrunn limx, longxx si ing hitt xee jnew ee juiw; jnexjuiw ing dua jiyc kamr.

3 Vingsii ngiuu-qrunn jurjip dirr hiax, langg dyrr jiong' jiyhtauu suaw li jnew-cuir, hro ngiuu limx juiw, jiacqycc jiong' jiyhtauu suaw qaur guan'ui.

4 Jakob duiww inx qongw, "Hniadi ar, dui' daclyc laii?" Inx qongw, "Guanw dui' Halan laii."

5 Mng inx qongw, "Nahor ee sunx Laban, linw bad ix mah?" Qongw, "Bad ix."

6 Qycc duiww inx qongw, "Ix ving'anx mah?" Qongw, "Ving'anx. Liw knuar, ix ee jaboxqniaw Rlaqel cua ix ee ngiuu-qrunn decc laii."

7 Qongw, "Zit iauxx quann, jingsnix jurjip ee sii bue qaur, m dyrr hro ngiuu limx juiw, qycc qra cri."

8 Inx qongw, "Guanw be anxnix. Diyhh tingwhau jerje din longxx jurjip, langg qra jiyc suaw lirkuix jnew-cuir, jiacc tangx hro ngiuu limx."

9 Jakob decc qapp inx qongxue ee sii, Rlaqel cua inx laurve ee ngiuu laii; in'ui si ix decc qor.

10 Jakob knuar qnir buxqu Laban ee jaboxqniaw Rlaqel, qapp buxqu Laban ee ngiuu-qrunn, dyrr jinwjingg jiong' jiyc suaw li jnew-cuir, hro inx buxqu Laban ee ngiuu-qrunn limx.

11 Jakob qra Rlaqel jimx, kuix sniax kaur.

12 Jakob qycc qra Rlaqel qongw ix si inx laurve ee guersingx, si Rlebekka ee qniaw. Rlaqel dyrr jauw kir qra inx laurve qongw.

13 Laban tniax qnir guersingx Jakob ee siausid, dyrr jauw kir gniajih ix, py ix, qapp ix jimx, cua ix qaur inx daux. Jakob jiong' itcer ee surjingg qra Laban qongw.

14 Laban qra Jakob qongw, "Liw sidjai si guaw ee qutziok." Ix dyrr qapp ix druar jit guehzit.

15 Laban qra Jakob qongw, "Liw suizenn si guaw ee cincig, qamxx tangx vehvec juer guaw ee qangx. Cniaw qra guaw qongw, liw beh simxmih qangjnii."

16 Laban u nng xee jaboxqniaw, dua :ee miaa qiyr Leah, ser :ee miaa qiyr Rlaqel.

17 Leah bagjiux suiw, danrsi Rlaqel snix juer qyckacc hyw knuar.

18 Jakob tniar Rlaqel, dyrr qongw, "Guaw guan uirdiyhh liw ser jaboxqniaw Rlaqel qra liw juer qangx cid nii."

19 Laban qongw, "Jiong' ix qer hro liw, kacc hyw hro vadd langg. Liw qapp guaw druar."

20 Jakob dyrr uirdiyhh Rlaqel qra ix juer qangx cid nii; in'ui cimx tniar ix, knuar juer quixnarr zit nia.

21 Jakob duiww Laban qongw, "Zidqii ixqing’ muaw. Qriuu liw jiong' guaw ee bow hro guaw, guaw tangx qapp ix dangvangg."

22 Laban jurjip hitt soxjai ee jingwlangg, vran ensiac cniaw inx.

23 Qaur zit amr, Laban jiong' ix ee jaboxqniaw Leah sangr laii hro ix; Jakob dyrr qapp ix dangvangg.

24 Laban jiong' ix ee luxvi Zilpah hro ix ee jaboxqniaw Leah juer luxvi.

25 Qaur tnix qngx, Jakob jid'err knuar qnir si Leah, dyrr duiww Laban qongw, "Liw qra guaw juer :ee si simxmih? Guaw qra liw juer qangx, qamxx m si uirdiyhh Rlaqel mah? Liw sniaw su penr guaw?"

26 Laban qongw, "Bue qer dua :ee, dairsingx qer ser :ee, dirr guanw jiax byy langg anxnix juer.

27 Liw qapp jitt xee diyhh muaw cid zit, guanw dyrr jiong' hitt xee iarr qer hro liw. Liw uirdiyhh ix qycc qra guaw juer qangx cid nii."

28 Jakob dyrr jiauww anxnix qniaa. Jid'err muaw cid zit, Laban dyrr jiong' ix ee jaboxqniaw, Rlaqel, hro ix juer bow.

29 Laban jiong' ix ee luxvi Bilhah, hro ix ee jaboxqniaw, Rlaqel, juer luxvi.

30 Jakob iarr qapp Rlaqel dangvangg, qycc tniar Rlaqel ngiaa quer Leah, dyrr qycc qra Laban juer qangx cid nii.

31 Jehovah knuar Leah byy diktiongw, dyrr hro ix huaiin; dogdok Rlaqel byy.

32 Leah huaiin snix qniaw, dyrr qra ix hy miaa Rleuben; in'ui qongw, "Jehovah knuar qnir guaw ee koxjingg. Dnaxx guaw ee diongrhux beh tniar guaw."

33 Ix qycc huaiin snix qniaw, qongw, "Jehovah tniax qnir guaw byy diktiongw, soxiw qycc hro guaw jit xee qniaw"; dyrr qra ix hy miaa Simeon.

34 Qycc huaiin snix qniaw, qongw, "Guaw qra diongrhux snix snax xee qniaw, ix beh qapp guaw qetlenn; miaa qiyr Levi."

35 Qycc huiain snix qniaw, qongw, "Jitt xee guaw beh ylyw Jehovah; soxiw qiyr ix ee miaa Judah." Qaur jiax dyrr tingg, byy qycc snix.

30 Rlaqel knuar vunxsinx byy qra Jakob snix qniaw, dyrr uanwdor ix ee duarjiw. Ix duiww Jakob qongw, "Liw diyhh qniaw hro guaw; narr byy, guaw beh siw."

2 Jakob siurkir Rlaqel, qongw, "Hro liw byy snix :ee, si Siongrder; guaw qamxx erdid ter Ix mah?"

3 Rlaqel qongw, "Liw knuar, guaw ee luxvi Bilhah dirr jiax. Liw kir qapp ix dangvangg, hro ix snix qniaw py dirr guaw ee katauux; guaw iarr dyrr tangx dui' ix did diyc qniaw."

4 Rlaqel dyrr jiong' ix ee luxvi Bilhah hro ix juer bow; Jakob dyrr qapp ix dangvangg.

5 Bilhah huaiin, qra Jakob snix jit xee qniaw.

6 Rlaqel qongw, "Siongrder u qra guaw pnuawduanr, iarr u tniax guaw ee sniax, hro guaw u qniaw; soxiw beh qiyr ix ee miaa juer Dan."

7 Rlaqel ee luxvi Bilhah qycc huaiin, qra Jakob snix derr zi xee qniaw.

8 Rlaqel qongw, "Guaw qapp guaw ee duarjiw jnex qaxx jin' lirhai, iarr u did diyc kacc ngiaa"; dyrr qiyr ix ee miaa juer Naftali.

9 Leah knuar vunxsinx tinghiyh byy snix, dyrr jiong' ix ee luxvi, Zilpah, hro Jakob juer bow.

10 Leah ee luxvi Zilpah qra Jakob snix qniaw.

11 Leah qongw, "Qaijair!" Dyrr qiyr ix ee miaa juer Gad.

12 Leah ee luxvi, Zilpah, qycc qra Jakob snix derr zi xee qniaw.

13 Leah qongw, "Guaw u hokkir! Jiaxee jaboxginxaw longxx beh cxingx guaw u hokkir"; dyrr qiyr ix ee miaa juer Aser.

14 Quah bec ee sii, Rleuben kir cann nirr, did diyc hongqax, tec laii hro ix ee laurbuw Leah. Rlaqel duiww Leah qongw, "Cniaw jiong' liw ee qniaw ee hongqax hro guaw."

15 Leah duiww ix qongw, "Liw cniuxduat guaw ee diongrhux, qamxx si siyxkuaw su; liw qycc cniuxduat guaw ee qniaw ee hongqax mah?" Rlaqel qongw, "Uirdiyhh liw ee qniaw ee hongqax, qinmii liw tangx qapp ix snaqab kunr."

16 Qaur amr, Jakob dui' cann nirr dyr .laii. Leah cud kir gniajih ix, qongw, "Liw diyhh qapp guaw snaqab kunr; in'ui guaw sidjai ing guaw ee qniaw ee hongqax laii ngua diyc liw." Hitt mii ix dyrr qapp ix snaqab kunr.

17 Siongrder unxjunw Leah, ix dyrr huaiin, qra Jakob snix derr go xee qniaw.

18 Leah qongw, "Siongrder hro guaw qangjnii, in'ui guaw jiong' luxvi hro guaw ee diongrhux"; dui' anxnix, qra ix hy miaa Issaqar.

19 Leah qycc huaiin, qra Jakob snix derr lak xee qniaw.

20 Leah qongw, "Siongrder sniuxsur guaw hyw ee sniuxsur; guaw ee diongrhux beh qapp guaw druar, in'ui guaw qra ix snix lak xee qniaw"; dui' anxnix, qra ix hy miaa qiyr Zebulun.

21 Au .laii qycc snix jit xee jaboxqniaw, qra ix hy miaa qiyr Dinah.

22 Siongrder siauwliam Rlaqel, Siongrder unxjunw ix, hro ix e snix qniaw.

23 Ix dyrr huaiin snix qniaw, qongw, "Siongrder druu kir guaw ee qenwsiaur";

24 Dyrr qra ix hy miaa Josef, qongw, "Guan Jehovah qycc qetnix guaw jit xee qniaw."

25 Rlaqel snix Josef liauxau, Jakob duiww Laban qongw, "Cniaw crex guaw kir, hro guaw dyr kir guaw ee vunxsoxjai, vunxde.

26 Cniaw liw jiong' guaw hogsai liw soxx did .diyc ee boxqniaw hro guaw, iong'unw guaw kir. Guaw jnaixngiu hogsai liw, liw longxx jaix."

27 Laban qra ix qongw, "Guaw narr dirr liw ee binrjingg did diyc undenw, cniaw liw qapp guaw druar; in'ui guaw cimx jaix Jehovah sur guaw hokkir, si uirdiyhh liw ee enqor."

28 Qycc qra ix qongw, "Cniaw liw dniardiyc liw ee qangjnii, guaw dyrr hro liw."

29 Jakob qra ix qongw, "Guaw hogsai liw jnaixngiu, liw ee jingsnix dirr guaw ee ciuxtauu jnaixngiu, si liw soxx jaix.

30 Guaw bue laii ee dairsingx, liw soxx u :ee jin' jiyw, dnaxx u dua huatdat. Jehovah ing hokkir duer guaw ee kax laii hro liw. Dnaxx guaw beh simxmih sii uirr guaw ee qrex qenwdir sanxgiap?"

31 Laban qongw, "Guaw diyhh hro liw simxmih?" Jakob qongw, "Liw iarr mrbenw hro guaw simxmih. U jit hxang su, liw narr ingwsingg, dyrr guaw iuguann cri liw ee ngiuu-qrunn laii qowsiu.

32 Qinaxzit guaw beh venww srunn liw ee ngiuu-qrunn, jiong' mi'ngiuu diongx qniww u vandiamw :ee, qapp ox sig :ee, ixqip snua'ngiuu diongx qniww u vandiamw :ee, longxx vuah cud. Jionglaii jitt kuanw :ee juer guaw ee qangjnii.

33 Ixau liw laii knuar guaw ee qangjnii, hitt diongqanx narr snua'ngiuu byy diamw byy vanx :ee, mi'ngiuu byy ox sig :ee, dyrr sngr si guaw taux :ee; ing anxnix laii jingwbingg guaw ee qongdy."

34 Laban qongw, "Hyw, guaw guan jiauww liw ee ue qniaa."

35 Dng' hitt zit, dyrr jiong' u srunn, u vxanx ee snua'ngiuqangw, u diamw u vxanx, qnair vec ee snua'ngiubuw, ixqip ox sig ee mi'ngiuu, longxx vuah cud laii qaux hro ix hiaxee qniaw.

36 Ix hro qaqi qapp Jakob sna' li u snax zit ee lorjam. Jakob dyrr qor Laban qi'uu ee ngiuu.

37 Jakob tec cnix ee iongciu, hingrciu, vngciu, nngw ee qix, jiong' puee vrag jniaa vec srunn, hro qix-lai vec :ee lorcud.

38 Jiong' vrag puee ee qix, cah dirr ngiuu limx juiw ee juixqaux qapp juixjyy, hro ix qapp ngiuu snaduir. Ngiuu laii limx ee sii, qangx :ee qapp buw qauhap.

39 Ngiuu dirr qix ee duiwbin qauhap, dyrr snix u srunn :ee, u diamw :ee, u vxanx :ee.

40 Jakob jiong' ngiuu-aw vuah cud, hro Laban ee ngiuu qapp jiaxee u srunn qapp ox sig ee ngiuu snaduir; jiong' qaqi ee ngiuu lingrgua vangr dirr jit soxjai, byy hro ix qapp Laban ee ngiuu camcap.

41 Duw diyc ngiuu-qrunn diongx iongxjongr :ee qauhap ee sii, Jakob dyrr ing ciurqix cah dirr juixqaux lai, hro ngiuu dirr ciurqix ee duiwbin qauhap.

42 Duw diyc ngiuu-qrunn diongx sanw :ee, dyrr byy cah ciurqix. Dui' anxnix sanw :ee qruix Laban, iongxjongr :ee qruix Jakob.

43 Dui' anxnix ix dua huatdat, did diyc jerje ngiuu-qrunn, luxvi, lovok, logdyy, qapp luu.

31 Jakob tniax qnir Laban jiongww qniaw u ue qongw, "Lanw laurve soxx u :ee, Jakob longxx ciuw .kir, qycc dui' lanw ee laurve did diyc ingqngx."

2 Jakob knuar qnir Laban qnir diyc ix, byy cincniu jiongjingg ee binrsig.

3 Jehovah duiww Jakob qongw, "Liw diyhh dyr kir liw ee verqongx ee de, qaur liw ee cinjok hiax; Guaw beh qapp liw dilehh."

4 Jakob crex langg qiyr Rlaqel qapp Leah qaur snua'ngiaw, qaur ngiuu-qrunn hiax, duiww inx qongw,

5 "Guaw knuar qnir linw laurve qnir diyc guaw, byy cincniu jiongjingg ee binrsig; danrsi guaw ee ve ee Siongrder sisiongg qapp guaw dilehh.

6 Linw iarr jaix guaw jin guaw ee lat juer linw laurve ee qangx.

7 Linw laurve penr guaw, jap vaiw qexngua guaw ee qangjnii; danrsi Siongrder byy iong'unw ix hai guaw.

8 Ix narr qongw, 'U diamw :ee qruix liw juer qangjnii', dyrr ngiuu-qrunn soxx snix :ee longxx u diamw; ix narr qongw, 'U srunn :ee qruix liw juer qangjnii'; dyrr ngiuu-qrunn soxx snix :ee longxx u srunn.

9 Anxnix Siongrder jiong' linw laurve ee jingsnix cniuw laii hro guaw.

10 Ngiuu qauhap ee sii, guaw bang-diongx giahbak jid'err knuar, knuar qnir pah ngiubuw ee ngiuqangw, longxx si u srunn :ee, u diamw :ee, u huevanx :ee.

11 Siongrder ee suwjiaw dirr hitt bang-diongx qiyr guaw qongxx, 'Jakob'; guaw qongw, 'Guaw dirr jiax'.

12 Ix qongw, 'Liw giahbak knuar, pah ngiubuw ee ngiuqangw longxx si u srunn :ee, u diamw :ee, u huevanx :ee; huanrnarr Laban duiww liw soxx juer :ee, Guaw longxx knuar .qnir.

13 Guaw si Betel ee Siongrder, liw dirr hiax bad ing iuu buah tiau, duiww Guaw he guan. Dnaxx liw diyhh kiw .laii, lirkuix jitt soxjai, dyr kir vunxde.'"

14 Rlaqel qapp Leah rinr ix qongxx, "Dirr guanw laurve ee qrex, qamxx iauxx u guanw tangx did ee qehuew qapp sanxgiap mah?

15 Guanw qamxx m si hro ix knuar juer guarlangg mah? In'ui ix bre guanw, tunjiac guanw ee qewjnii.

16 Siongrder dui' guanw laurve cniuw cud itcer ee jaibut, hiaxee dyrr si guanw qapp guanw qniaw ee. Dnaxx qniwnarr Siongrder soxx duiww liw qongw :ee, jueww liw kir qniaa."

17 Jakob dyrr kiw .laii, hro ix ee qniaw qapp bow longxx kiaa logdyy.

18 Qycc duar itcer ee jingsnix, qapp soxx jikju ee jaibut, (soxx did .diyc ee jingsnix, si dirr Padan-alam soxx did .diyc .ee) beh kir Kanaan-de, kir ix ee laurve Isaac hiax.

19 Hitt sii Laban kir jenw ngiumngg; Rlaqel tautec inx laurve qrex-lai ee gnoxsiong.

20 Jakob rmuaa Laban, taujauw .kir, byy qra ix qongw,

21 Dyrr duar itcer soxx u :ee dyjauw. Ix kixsinx quer Viklat Hyy, ngr Gilead Snuax kir.

22 Qaur derr snax zit, u langg qra Laban qongw, "Jakob jauw .kir lar."

23 Ix dyrr cua ix ee hniadi snaqab kir duizip; ligquer cid zit ee lorjam, qaur Gilead Snuax jiacc zib .diyc.

24 Mii .sii binbang diongx, Siongrder qaur Alanlangg Laban hiax, qra ix qongw, "Liw diyhh siyxsimx, m tangx qapp Jakob qongw hyw qongw pnaiw."

25 Laban duix diyc Jakob. Jakob dirr hitt xee snuax ixqing’ dah vowvnii; Laban qapp ix ee jiongww hniadi, iarr dirr Gilead Snuax dah vowvnii.

26 Laban qra Jakob qongw, "Liw soxx juer si simxmih su, liw sniaw su vue guaw, jiong' guaw jiaxee jaboxqniaw cua .kir, cincniu ing dyqiamr cniuxliac jidngiu?

27 Liw sniaw su amwjni taujauw, iarr byy qra guaw qongw, hro guaw tangx ing hnuahiw, cniuwquax, pah qow, dnuaa kimm, sangr liw dyr .kir?

28 Qycc byy iong'unw guaw qapp guersunx, jaboxqniaw jimcuir? Liw dnaxx soxx qniaa si jin' gong.

29 Guaw ee ciuw vunw u lat tangx hai linw; dogdok linw laurve ee Siongrder jamii qra guaw qongw, 'Liw diyhh siyxsimx, m tangx qapp Jakob qongw hyw qongw pnaiw.'

30 Dnaxx liw suizenn luanbo liw ee laurve ee qrex, vutdikvud diyhh kir, sniaw su tautec guaw ee sinbingg?"

31 Jakob rinr Laban qongxx, "In'ui guaw qniax, simlai sniu qongxx, qniax liw jiong' liw ee jaboxqniaw dui' guaw cniuw .kir.

32 Lun qaur liw ee sinbingg, liw dui' simxmih langg ciaux .diyc, ix dyrr diyhh siw. Dng' lanw jiongww hniadi ee binrjingg, liw zin knuar, dirr guaw jiax u simxmih mic si liw ee, tangx tec .kir." In'ui Jakob m jaix Rlaqel u tautec sinbingg.

33 Laban dyrr zip Jakob ee vowvnii, Leah ee vowvnii, qapp nng xee luxvi ee vowvnii, longxx ciaux byy, dyrr dui' Leah ee vowvnii cud .laii, zip Rlaqel ee vorvnii.

34 Rlaqel ixqing’ jiong' gnoxsiong kngr dirr logdyy ee nguax-xe, laii jre dirr hitt dingxbin. Laban dirr ix ee vowvnii lai siwqer bongx, longxx ciaux byy.

35 Rlaqel duiww ix ee laurve qongw, "Qingqii duxaxx qaur, be e dirr liw ee binrjingg kia .kiw .laii; qriuu guaw ee jruw byc did siukir." Laban siwqer cue gnoxsiong, ciaux longxx byy.

36 Jakob dyrr siurkir, qapp Laban qewqaur, duiww Laban qongw, "Guaw u huan diyc simxmih quewsid, u simxmih juerog, liw qingwzenn zib guaw jiacc qib?

37 Liw venww bongx guaw itcer ee qesix, u ciaux diyc linw daux simxmih qesix cud .laii? Tangx he dirr liw guaw ee hniadi ee binrjingg, hro inx dirr lanw nng langg ee diongqanx pnuawduanr.

38 Guaw qapp liw druar jitt zi-jap nii, liw ee mi'ngiubuw, snua'ngiubuw, m bad u lauwtex; liw ngiuu-qrunn diongx ee ngiuqangw, guaw m bad qra jiac.

39 Hro iaxsiur sionghai :ee, guaw byy duar laii hro liw; guaw vunxsinx jergiac. Bylun zit .sii siurr taux, mii .sii siurr taux, liw longxx duiww guaw tyxvuee.

40 Guaw zit .sii hro zit pak, mii .sii hro sxngx dangr, longxx be qor did kunr, guaw siongsiongg si anxnix.

41 Guaw jitt zi-jap nii dirr liw ee qrex, uirdiyhh liw nng xee jaboxqniaw, qra liw juer qangx jap-sir nii; uirdiyhh liw ee ngiuu-qrunn lak nii. Liw jap vaiw qexngua guaw ee qangjnii.

42 Narr m si u guaw ee ve ee Siongrder, dyrr si Ablaham ee Siongrder, qycc si Isaac soxx qnia'uir :ee, qapp guaw dilehh, liw dnaxx unxdangr hro guaw kangx ciuw kir. Siongrder knuar qnir guaw ee koxjingg, qapp guaw ee lylok, jiacc dirr jamii jikvi liw."

43 Laban rinr Jakob qongxx, "Jiaxee jaboxqniaw si guaw ee jaboxqniaw, jiaxee ginxaw si guaw ee ginxaw, jiaxee ngiuu-qrunn iarr si guaw ee ngiuu-qrunn, huanrnarr liw soxx knuar .qnir .ee, longxx si guaw ee. Guaw ee jaboxqniaw, qapp inx soxx snix ee ginxaw, qinaxzit guaw e qra inx juer simxmih?

44 Dnaxx liw laii, lanw nng langg tangx laii lip iog, dirr liw guaw ee diongqanx juer jingwqir."

45 Jakob cruw jiyc kia juer tiau.

46 Jakob duiww jiaxee hniadi qongw, "Linw diyhh kiyh jiyhtauu." Inx dyrr jiong' jiyhtauu kiyh laii tiap qui' dxuix. Dairqex dyrr dirr hitt dxuix ee vnix:a jiac.

47 Laban miaa ix qiyr Jegar Sahaduta; Jakob miaa ix qiyr Galeed.

48 Laban qongw, "Qinaxzit jitt xee jiyhduix juer liw guaw diongqanx ee jingwqir." In'ui anxnix, miaa ix qiyr Galeed;

49 Iarr qiyr juer Mizpah, dyrr si qongxx, "Lanw dairqex lirvet ixau, guan Jehovah dirr liw guaw ee diongqanx qamwcad.

50 Liw narr koxcow guaw ee jaboxqniaw, qycc dirr guaw ee jaboxqniaw ixgua lingrgua cuarbow, suizenn byy langg qapp lanw dilehh, u Siongrder dirr liw guaw ee diongqanx juer qanjingr."

51 Laban qycc duiww Jakob qongw, "Liw knuar jitt dxuix jiyc, liw knuar jitt qix tiau, dyrr si guaw soxx he dirr liw guaw ee diongqanx :ee.

52 Jitt dxuix jiyc juer qanjingr, jitt qix tiau juer qanjingr, guaw byy beh quer jitt dxuix jiyc kir hai liw, liw iarr m tangx quer jitt dxuix jiyc qapp tiau, laii hai guaw.

53 Guan liw ee senjow Ablaham ee Siongrder, qapp guaw ee senjow Nahor ee Siongrder, dirr liw guaw ee diongqanx pnuawduanr." Jakob dyrr qiw inx laurve Isaac soxx qnia'uir ee Siongrder laii jiuwjua.

54 Jakob dirr snuax nirr henwjer, cniaw ix hiaxee hniadi laii jiac; inx jiac liauw, dyrr dirr snuax nirr hiycmii. Laban tauwjaw kiw .laii, qapp ix ee guarsunx qapp ix ee jaboxqniaw jimcuir, qra inx jiokhog, dyrr kixsinx dyr kir qaqi ee soxjai.

32 Jakob qycc qniaa ix ee lo. Siongrder ee suwjiaw duw diyc ix.

2 Jakob knuar qnir inx, dyrr qongw, "Jex si Siongrder ee qundui"; soxiw miaa hitt soxjai qiyr Mahanaim.

3 Jakob crex langg dairsingx kir Seir ee de, Edom ee cann, qnir ix ee Hniax Esau.

4 Ix huanhur inx qongxx, "Linw qra guaw ee jruw Esau qongw, 'Liw ee lovok Jakob anxnix qongw: Guaw dirr Laban hiax qiawqux, druar qaur qinaxzit.

5 Guaw u guu, luu, ngiuu-qrunn, lovok, luxvi. Dnax crex langg laii vyr guaw ee jruw, rair dirr liw ee binrjingg did diyc undenw.'"

6 Soxx crex ee langg dyr laii Jakob hiax qongw, "Guanw qaur liw ee hniax Esau hiax, ix duxduxx decc laii beh gniajih liw; qycc u sir-vah langg qapp ix laii."

7 Jakob dua qniax qycc vecvag; jiong' hiaxee qapp ix snaqab dilehh ee langg, qapp ngiuu-qrunn, guu-qrunn, logdyy, vunx juer nng dui, qongw,

8 "Esau narr laii qongqig jitt dui, cunx :ee hitt dui iauxx tangx dyjauw."

9 Jakob qycc qongw, "Guaw ee jow, Ablaham ee Siongrder, guaw ee ve Isaac ee Siongrder, Jehovah ar, liw bad duiww guaw qongw, 'Dyr kir liw ee vunxde vunxjok, Guaw beh hyw kuanxtai liw.'

10 Liw duiww liw ee lovok soxx six itcer ee ju'air qapp itcer ee singsit, dyrr jiww biser :ee, guaw iarr be kamx did did .diyc. Guaw jingg giac guaw ee qnuaiw-aw quer jitt xee Jordan Hyy, dnaxx guaw ixqing’ jniaa juer nng dui.

11 Qriuu Liw qiur guaw tuatli guaw ee hniax Esau ee ciuw; in'ui guaw qniax ix, qniax ix laii taii siw guaw qapp inx buxqniaw.

12 Liw iarr bad qongw, 'Guaw dikkag beh hyw kuanxtai liw, hro liw ee horer cincniu haixvnix ee suax, je qaur be sngr .did.'"

13 Hitt mii Jakob hiyh dirr hiax, dyrr dirr ix soxu ee mic ee lairbin, qingw cud lexmic, beh sangr ix ee hniax Esau.

14 Snua'ngiubuw nng-vah jiah, snua'ngiuqangx zi-jap jiah, mi'ngiubuw nng-vah jiah, mi'ngiuqangx zi-jap jiah;

15 Logdybuw qapp jiac nix ee qniaw snax-jap jiah, gubuw sir-jap jiah, guqangw jap jiah, lubuw zi-jap jiah, luqniaw jap jiah.

16 Qokk ngiu jit qrunn, qaudair lovok, qra lovok qongw, "Linw dairsingx guaw kir, hro dagg qrunn u sna' li."

17 Qycc huanhur juer tauu :ee, qongw, "Guaw ee hniax Esau duw diyc liw ee sii, narr mng liw qongxx, 'Liw si simxmih langg ee? Beh kir daclyc? Liw taujingg hiaxee si jirjui ee?'

18 Liw diyhh qongw, 'Si liw ee lovok Jakob ee; si beh sangr guaw ee jruw Esau ee lexmic. Henrjai ix vunxsinx iarr dirr guanw ee aurbin.'"

19 Qycc huanhur derr zi derr snax, qapp itcer qnuaw qui' qrunn jingsnix ee langg, qongw, "Linw duw diyc Esau ee sii, iarr diyhh jiauww anxnix qra ix qongw.

20 Qycc linw iarr diyhh qongw, 'Liw ee lovok Jakob dirr guanw ee aurbin.'" In'ui Jakob qaqi pacsngr qongxx, "Guaw ing dirr guaw taujingg kir ee lexmic laii sriaux ix ee hun; zen'au guaw qnir diyc ix ee bin, qiamxcaiw ix e jiaplap guaw."

21 Dui' anxnix, lexmic singx qniaa. Hitt mii Jakob hiyh dirr dui-diongx.

22 Ix mii .sii kiw .laii, cua ix nng xee bow, nng xee luxvi, qapp jap-id xee qniaw, longxx quer Jabbok ee dortauu.

23 Dairsingx hro inx quer kex, huanrr soxu :ee iarr hro inx quer,

24 Jixu cunx Jakob qaqi dilehh. U jit langg laii qapp ix sna' enw, qaur dirr tnix puxqngx.

25 Hitt langg knuar be ngiaa ix; dyrr senr Jakob ee duartuixku. Sna' enw ee sii, Jakob ee duartuixku cuah .diyc.

26 Hitt langg qongw, "Tnix beh qngx lar, diyhh vangr guaw kir." Jakob qongw, "Liw narr byy qra guaw jiokhog, m vangr liw kir."

27 Hitt langg qongw, "Liw miaa juer simxmih?" Ix qongw, "Guaw miaa juer Jakob."

28 Hitt langg qongw, "Liw ee miaa byy beh qycc qiyr Jakob, beh qiyr juer Islael, in'ui liw qapp Siongrder, qapp langg dauwsu'ngiaa, longxx did diyc kacc ngiaa."

29 Jakob mng ix qongxx, "Cniaw jiong' liw ee miaa qra guaw qongw." Hitt langg rinr qongxx, "Micsaiw mng guaw ee miaa?" Ix dyrr dirr hiax qra ix jiokhog.

30 Jakob miaa hitt soxjai qiyr Peniel, in'ui qongxx, "Guaw dngtauu duiwbin qnir diyc Siongrder, guaw ee sniwmia iauxx did diyc vyxjuann."

31 Zit duxaxx cud, Jakob qingquer Peniel; ix ee duartuiw ixqing’ vaiw.

32 Soxiw jiaxee Islaellangg byy jiac duartuixtauu ee qinx, qaur dirr qinaxzit; in'ui hitt langg senr Jakob tuixku ee duarqinx.

33 Jakob giahbak knuar, knuar qnir Esau laii; qycc u sir-vah langg qapp ix laii. Ix dyrr jiong' hiaxee ginxaw vunx .kuix, qaux hro Leah, qaux hro Rlaqel, qaux hro nng xee luxvi.

2 Jiong' luxvi qapp inx ee qniaw vaii dirr taujingg, Leah qapp ix ee qniaw vaii dirr aurbin, Rlaqel qapp Josef vaii dirr lorbuew.

3 Ix vunxsinx dirr inx ee taujingg quer .kir, lenlenn cid vaiw pag dirr de nirr, jiacc uaw qin ix ee hniax.

4 Esau jauw laii gniajih ix, jiong' ix py lehh, qycc lamw ix ee amrqunw, jimx ix; nng langg dyrr tikaur.

5 Esau giahbak knuar qnir hurzinlangg qapp ginxaw, dyrr qongw, "Jiaxx qapp liw drangg qniaa :ee si jirjui?" Jakob qongw, "Jiaxee ginxaw si Siongrder six xunx hro liw ee lovok :ee."

6 Dui' hitt diap nng xee luxvi, qapp inx ee ginxaw, jinwjingg laii vair.

7 Leah qapp ix ee ginxaw iarr jinwjingg laii vair. Lorbuew Josef qapp Rlaqel iarr jinwjingg laii vair.

8 Esau qongw, "Guaw soxx duw diyc qui' qrunn ee jingsnix, liw si simxmih iwsur?" Jakob qongw, "Si beh dirr guaw ee jruw ee binrjingg did diyc undenw."

9 Esau qongw, "Siyxdi ar, guaw ixqing’ qauwgiac, liw ee iuguann qruix liw."

10 Jakob qongw, "Byc anxnix, guaw narr dirr liw ee binrjingg did diyc undenw, qriuu liw dui' guaw ee ciuw siux guaw ee lexmic; in'ui guaw qnir diyc liw ee bin, cincniu qnir diyc Siongrder ee bin, liw iarr jiaplap guaw.

11 Qriuu liw siux guaw duar laii hro liw ee lexmic; in'ui Siongrder undenw guaw, hro guaw ciongjiog." Jakob vig ix, zen'au ix dyrr siux.

12 Esau qongw, "Lanw kixsinx laii kir, guaw juer tauu qniaa."

13 Jakob duiww ix qongw, "Guaw ee jruw jaix jiaxee ginxaw nngxjniaw, guu, ngiuu iarr duxaxx snix. Narr juer jit zit qnuaw, qui' qrunn longxx beh siw.

14 Qriuu guaw ee jruw dirr lovok ee taujingg qniaa, guaw beh jiauww dirr guaw binrjingg jiaxee qui' qrunn jingsnix ee ligliong, iarr jiauww ginxaw ee ligliong, ban ban jinwjingg, qniaa qaur Seir, qaur guaw ee jruw hiax."

15 Esau qongw, "Iong'unw guaw jiong' duer guaw ee langg lauu quiw xee qapp liw juewdin." Jakob qongw, "Micsaiw anxnix? Dirr guaw ee jruw ee binrjingg did diyc undenw dyrr hyw."

16 Hitt zit Esau kixsinx, jiauww guanlo dyr kir Seir.

17 Jakob qniaa qaur Sukkot, dirr hiax uirr vunxsinx kiw cur, uirr jingsnix dah cauxliauu; soxiw miaa hitt soxjai juer Sukkot.

18 Jakob dui' Padan-alam dyr .laii ee sii, ving'anx qaur Kanaan-de ee Seqem Sniaa, dirr sniaa ee binrjingg dah vowvnii.

19 Ing jit-vah der ginn, dui' Seqem ee laurve Hamor ee qniaxsunx, brew ix dah vowvnii hitt der de;

20 Dirr hiax kiw jit jxy dnxuaa, qra ix hy miaa qiyr El-Elohe-Islael.

34 Leah qra Jakob soxx snix ee jaboxqniaw, Dinah, cud kir beh qnir hitt soxjai ee jaboxginxaw.

2 Hitt soxjai ee bogvig Hivitlangg Hamor ee qniaw Seqem knuar qnir ix, dyrr kiuw ix, qapp ix snaqab kunr, lingziok ix.

3 Ix ee simx luanbo Jakob ee jaboxqniaw Dinah, tniar jitt xee jaboxqniaw, ing hyw ue an'uir ix.

4 Seqem qra ix ee laurve, Hamor, qongw, "Qriuu liw qra guaw pingr jitt xee jaboxginxaw juer bow."

5 Jakob tniax qnir ix paclasamm ix ee jaboxqniaw Dinah. Hitt sii ix hiaxee qniaw qapp ix ee jingsnix dirr snuax nirr. Jakob jing jing byy juer sniax, tingwhau inx dyr .laii.

6 Seqem ee laurve, Hamor, cud laii qnir Jakob, beh qapp ix qongxue.

7 Jakob hiaxee qniaw tniax qnir jitt xee dairjir, dyrr dui' snuax nirr dyr .laii, dag'ee m qamguan, jabhunx siurkir; in'ui Seqem dirr Islael juer cud qenwsiaur ee dairjir, qapp Jakob ee jaboxqniaw snaqab kunr; jex vunw si m ingqaix juer ee su.

8 Hamor qapp inx camsiongg qongxx, "Guaw ee qniaw Seqem ee simx himbo linw ee jaboxginxaw. Qriuu linw jiong' ix hro guaw ee qniaw juer bow.

9 Linw qapp guanw dairqex qetcinx; linw tangx jiong' linw ee jaboxqniaw hro guanw, linw iarr tangx crua guanw ee jaboxqniaw.

10 Linw qapp guanw snaqab kiarkiw, de dirr linw ee binrjingg. Linw druar jiax kia, juer singliw, qenwdir sanxgiap."

11 Seqem duiww jaboxginxaw ee laurve qapp ix ee hniadi qongw, "Guan dirr linw ee binrjingg did diyc undenw. Linw soxx duiww guaw qongw :ee, guaw beh hro linw.

12 Cutjai linw beh duiww guaw tyw zuarr je pingwqimx, qapp lexmic, guaw dikkag jiauww linw soxx qongw :ee hro linw; jixu rair linw ing jaboxginxaw hro guaw juer bow."

13 Jakob hiaxee qniaw, in'ui Seqem paclasamm inx ee siyxbe Dinah, dyrr ing qanjar ee ue laii rinr Seqem, qapp ix ee laurve Hamor, duiww inx qongw,

14 "Jiong' guanw ee siyxbe hro byy sriu qatlew ee langg juer bow, jitt xee dairjir guanw be juer .did; in'ui hex si guanw ee qenwsiaur.

15 Linw soxu ee davolangg, narr longxx sriu qatlew cincniu guanw jidngiu, u jitt jit hxang jiacc tangx ingwunw linw;

16 Guanw dyrr jiong' guanw ee jaboxqniaw hro linw, guanw iarr crua linw ee jaboxqniaw; guanw dyrr qapp linw snaqab druar, jniaa juer jit xee vecsnir.

17 Setsuw linw m tniax guanw ee ue laii sriu qatlew, guanw dyrr duar guanw ee siyxbe laii kir."

18 Hamor, qapp ix ee qniaw Seqem, hnuahiw inx ee ue.

19 Hitt xee siauwlenlangg juer jitt xee dairjir, longxx byy encenn; in'ui ix tniar Jakob ee jaboxqniaw; qycc ix dirr inx laurve ee qrex derr id junquir.

20 Hamor, qapp ix ee qniaw Seqem, laii qaur vunxsniaa ee mngkauw, qra vunxsniaa ee langg qongw,

21 "Jiaxee langg qapp lanw hyhyw. Lanw tangx jrunw inx dirr jitt xee de kiarkiw, juer singliw; qycc jitt xee de iarr kuikuah, e iong'unw did inx. Lanw tangx crua inx ee jaboxqniaw juer bow, iarr tangx jiong' lanw ee jaboxqniaw qer hro inw.

22 Dogdok diyhh u jit hxang, inx hiaxee jiacc beh rinw lanw, qapp lanw kiarkiw, jniaa juer jit xee vecsnir. Dyrr si lanw diongqanx soxu ee davolangg longxx diyhh sriu qatlew, cincniu inx sriu qatlew jidngiu.

23 Ix ee guu, ngiuu, jaisanw, qapp itcer ee jingsnix, qamxx byy longxx qruix dirr lanw mah? Jixu diyhh rinw inx, inr dyrr beh qapp lanw druar."

24 Qniwnarr dui' sniamngg cud .laii ee langg longxx tniatanr Hamor qapp ix ee qniaw Seqem ee ue; dui' anxnix qniwnarr dui' sniamngg cud .laii ee davolangg longxx sriu qatlew.

25 Qaur derr snax zit, jingwlangg dngdecc tangwtniar ee sii, Jakob nng xee qniaw, dyrr si Dinah ee hniax Simeon qapp Levi, longxx giac dyx, tanr langg byy dniudii, laii qaur sniaa-lai, taii siw longxjongw ee davolangg.

26 Iarr ing dyx taii siw Hamor qapp ix ee qniaw Seqem; cua Dinah dui' Seqem ee cur cud .laii, dyrr kir.

27 Jakob hiaxee qniaw, uirdiyhh inx siyxbe siurr paclasamm, dyrr laii qaur siurr taii ee langg hiax, cniuxqiab inx ee sniaa.

28 Cniuw inx ee ngiuu-qrunn, guu-qrunn, qapp luu; ixqip sniaa-lai qapp cann nirr soxu :ee.

29 Qycc jiong' inx itcer ee huewmic jnijaii, itcer ee ginxaw qapp hurzinlangg, ixqip dagg der cur soxu :ee, longxx cniuw, liac, dyrr kir.

30 Jakob qra Simeon qapp Levi qongw, "Linw lenlui guaw, hro guaw dirr jitt soxjai kiarkiw ee vecsnir ee diongqanx, dyrr si dirr Kanaanlangg qapp Pelizlangg ee diongqanx u caur miaa. Qycc guaw ee langgiac jiyw. Inx dikkag jurjip laii qongqig guaw, pah guaw. Guaw qapp juann qrex ee langg longxx e bedbyy."

31 Inx qongw, "Ix qamxx tangx kuanxtai guanw siyxbe cincniu ciongqix mah?"

35 Siongrder qra Jakob qongw, "Kir ar, jnriu kir Betel, druar dirr hiax. Qycc diyhh dirr hiax qra Siongrder kiw jit jxy dnxuaa, dyrr si liw siamxvi liw ee hniax Esau ee bin ee sii, duiww liw cuthen :ee hitt xee."

2 Jakob dyrr qra juann qrex ixqip itcer qapp ix dilehh ee langg qongw, "Linw diyhh druu kir linw diongqanx guarvangx ee siongrder; iarr diyhh qaqi cingkir, ngua linw ee ijniuu.

3 Lanw diyhh kiw .laii, jnriu kir Betel. Dirr hiax guaw beh qra Siongrder kiw jit jxy dnxuaa, dyrr si dirr guaw duw diyc huanrlan ee zit, unxjunw guaw ee qidyw, dirr guaw soxx qniaa ee lo qapp guaw dilehh hitt xee."

4 Inx dyrr jiong' inx ciuw-lai soxu ngirvangx ee sinbingg, qapp inx ee hnirqaux, longxx hro Jakob. Jakob jiong' hiaxee draii dirr Seqem hitt xui ee siongrciurkax.

5 Inx dyrr kixsinx. Siongrder hro siwjiuuii ee sniaa ee langg longxx jin' qniax; inx dyrr byy duizib Jakob ee jiongww qniaw.

6 Jakob, ixqip itcer qapp ix juewdin ee langg, qaur Kanaan-de ee Luz, dyrr si Betel.

7 Ix dirr hiax kiw jit jxy dnxuaa, dyrr qra hitt soxjai hy miaa, qiyr El-Betel; in'ui ix siamxvi ix ee hniax ee sii, Siongrder dirr hiax duiww ix cuthen.

8 Rlebekka ee nibuw Debolah siw, dyrr qra baijongr dirr Betel ee erbin ee siongrciu kax; soxiw qiyr ix ee miaa Allon Bakut.

9 Jakob dui' Padan-alam dyr .laii, Siongrder qycc duiww ix cuthen, suwhog hro ix.

10 Siongrder qycc qra ix qongw, "Liw miaa si Jakob. Dnaxx ixau liw ee miaa byy qycc qiyr Jakob, beh qiyr juer Islael." Dyrr qiyr ix ee miaa Islael.

11 Siongrder qycc qra ix qongw, "Guaw si juanlingg ee Siongrder. Liw diyhh snitnuar jerje; jionglaii u jit qog, qycc u jerje qog dui' liw laii snix, qycc u qun'ongg dui' liw snix cud.

12 Guaw soxx hro Ablaham qapp Isaac ee de, Guaw beh hro liw, iarr beh jiong' jitt xee de hro liw ee horer."

13 Siongrder dyrr dui' qapp ix qongxue ee soxjai jnriu .kir.

14 Jakob dyrr dirr Siongrder qapp ix qongxue ee soxjai kia jit qix tiau, dyrr si jiyhtiau; dirr hitt dingxbin quanwden dryr iuu.

15 Jakob dyrr cxingx Siongrder qapp ix qongxue ee soxjai, miaa juer Betel.

16 Inx dui' Betel kixsinx; lirkuix Eflat iauxx u jit jam ee lo. Rlaqel decbeh snix, limsanw qanlann.

17 Dng' ix qankow snix ee sii, kiycjiaw duiww ix qongw, "Mrbenw qniax, liw dnaxx beh qycc did diyc jit xee qniaw."

18 Ix kuir beh dng, limjiongx ee sii, dyrr qiyr ix ee qniaw ee miaa Benoni; ix ee laurve qra ix hy miaa Benjamin.

19 Rlaqel siw, baijongr dirr kir Eflat ee lo; Eflat dyrr si Betlehem.

20 Jakob kia tiau dirr ix ee bong-dingw, jitt xee tiau dyrr si Rlaqel ee bongrvaii, qaur qinaxzit iauxx dilehh.

21 Islael qycc kixsinx kir, dirr Eder dah vowvnii.

22 Islael druar dirr hitt soxjai ee sii, Rleuben kir qapp ix ee laurve ee sewii, Bilhah, snaqab kunr; Islael iarr jaix.

23 Jakob qiong u jap-zi xee qniaw. Leah ee qniaw, dyrr si Jakob ee dua-qniaw Rleuben, ixqip Simeon, Levi, Judah, Issaqar, Zebulun;

24 Rlaqel ee qniaw, dyrr si Josef, Benjamin;

25 Rlaqel ee luxvi Bilhah soxx snix ee qniaw, dyrr si Dan qapp Naftali;

26 Leah ee luxvi Zilpah soxx snix ee qniaw Gad, Aser; jex si Jakob dirr Padan-alam soxx snix ee qniaw.

27 Jakob laii qnir ix ee laurve Isaac dirr Mamle, qaur Arba, dyrr si Heblon, Ablaham qapp Isaac bad qiawqux ee soxjai.

28 Isaac hiongxsiu jit-vah veh-jap huer.

29 Isaac nihuer lau, zidjiw muaxjiog, kuir dng laii siw, dyr kir ix ee ledjow hiax. Ix nng xee qniaw Esau, Jakob, qra ix baijongr.

36 Esau dyrr si Edom, ix ee sewhe qir dirr erdew.

2 Esau cua Kanaan-de ee jaboxginxaw juer bow; dyrr si Hitlangg Elon ee jaboxqniaw Adah, qapp Hivilangg Zibeon ee jaboxsunx, Anah ee jaboxqniaw, Oholibamah.

3 Qycc cua Ismael ee jaboxqniaw, Nebaiot ee jixbe, Basemat.

4 Adah qra Esau snix Elifaz; Basemat snix Rleuel;

5 Oholibamah snix Jeus, Jalam, qapp Kolah; jex longxx si Esau ee qniaw, dirr Kanaan-de snix :ee.

6 Esau duar ix ee bow, qniaw, jaboxqniaw, qapp qrex-lai longxjongw ee langg, ixqip guu, ngiuu, qapp itcer ee jingsnix, itcer ee jaibut, dyrr si ix dirr Kanaan-de soxx did .diyc .ee, kir vadd soxjai, lirkuix ix ee siyxdi Jakob.

7 In'ui nng langg soxx u :ee jin' je, be tangx snaqab kia; qycc in'ui inx ee guu ngiuu je, soxx qiawkax ee soxjai be iong'unw .did.

8 Dui' anxnix Esau druar dirr Seir Snuax. Esau dyrr si Edom.

9 Esau ee sewhe qirr dirr erdew: Esau dyrr si Seir Snuax Edomlangg ee jow.

10 Esau jiaxee qniaw ee miaa qirr dirr erdew, Esau ee bow Adah ee qniaw Elifaz, Esau ee bow Basemat ee qniaw Rleuel.

11 Elifaz ee qniaw: Teman, Omar, Zepo, Gatam, Kenaz;

12 Timna si Esau ee qniaw Elifaz ee sewii, ix qra Elifaz snix Amalek; jex si Esau ee bow Adah ee qniaxsunx.

13 Rleuel ee qniaw si Nahat, Zelah, Sammah, qapp Mizah; jiaxee si Esau ee bow Basemat ee qniaxsunx.

14 Esau ee bow Oholibamah si Zibeon ee jaboxsunx, Anah ee jaboxqniaw; ix qra Esau snix Jeus, Jalam, qapp Kolah.

15 Esau ee qniaw soxx snix juer jogdniuw :ee, qir dirr erdew: Esau ee dua-qniaw Elifaz ee qniaw, u Teman Jogdniuw, Omar Jogdniuw, Zepo Jogdniuw, Kenaz Jogdniuw,

16 Kolah Jogdniuw, Gatam Jogdniuw, qapp Amalek Jogdniuw; jiaxee si dirr Edom-de, Elifaz soxx snix ee jogdniuw, si Adah ee qniaxsunx.

17 Esau ee qniaxsunx Rleuel ee qniaw, u Nahat Jogdniuw, Zelah Jogdniuw, Sammah Jogdniuw, qapp Miah Jogdniuw; jiaxee si dirr Edom-de, dui' Rleuel soxx cud ee jogdniuw, longxx si Esau ee bow Basemat ee qniaxsunx.

18 Esau ee bow Oholibamah ee qniaw, u Jeus Jogdniuw, Jalam Jogdniuw, qapp Kolah Jogdniuw; jiaxee si dui' Esau ee bow, Anah ee joboxqniaw Oholibamah, soxx cud ee jogdniuw.

19 Jiaxee si Esau ee qniaxsunx, qycc jiaxee si inx ee jogdniuw; Esau dyrr si Edom.

20 Hitt soxjai e vunxderlangg, dyrr si Holilangg Seir ee qniaxsunx, qir dirr erdew: dyrr si Lotan, Sobal, Zibeon, Anah, Dison, Ezer, qapp Disan;

21 Jiaxee si dui' Edom-de ee Holilangg, Seir qniaxsunx diongx soxx cud ee jogdniuw.

22 Lotan ee qniaw si Holi, Heman; Lotan ee jixbe si Timna.

23 Sobal ee qniaw si Alvan, Manahat, Ebal, Sepo, qapp Onam.

24 Zibeon ee qniaw, Aiah qapp Anah; dngsii decc cri inx laurve Zibeon ee luu, dirr kongwiaw cue diyc unjnuaa :ee, dyrr si jitt xee Anah.

25 Anah ee qniaw si Dison; Anah ee jaboxqniaw si Oholibamah.

26 Dison ee qniaw si Hemdan, Esban, Itlan, qapp Qelan.

27 Ezer ee qniaw si Bilhan, Zaavan, qapp Akan.

28 Disan ee qniaw si Uz qapp Alan.

29 Dui' Holilangg soxx cud ee jogdniuw, qir dirr erdew: dyrr si Lotan Jogdniuw, Sobal Jogdniuw, Zibeon Jogdniuw, Anah Jogdniuw,

30 Dison Jogdniuw, Ezer Jogdniuw, Disan Jogdniuw. Jiaxee si dui' Holilangg soxx cud ee jogdniuw, longxx dirr Edom-de juer jogdniuw.

31 Dng' Islaellangg bue u qun'ongg dirliw ee dairsingx, dirr Edom-de juer ongg laii dirliw :ee qir dirr erdew.

32 Beor ee qniaw, Bela, dirr Edom juer ongg; ix ee qniasniaa miaa qiyr Dinhabah.

33 Bela siw liauw, Bozlahlangg Zelah ee qniaw, Jobab, suawjiab ix juer ongg.

34 Jobab siw, Teman-de ee langg Husam suawjiab ix juer ongg.

35 Husam siw, Bedad ee qniaw, Hadad, suawjiab ix juer ongg; ix dyrr dirr Moab-de taii ngiaa Midianlangg :ee. Ix ee qniasniaa miaa qiyr Avit.

36 Hadad siw, Maslekahlangg Samlah suawjiab ix juer ongg.

37 Samlah siw liauw, Hyy-vnix ee Rlehobotlangg Saul suawjiab ix juer ongg.

38 Saul siw, Acbor ee qniaw, Baal Hanan, suawjiab ix juer ongg.

39 Acbor ee qniaw Baal Hanan siw, Hadad suawjiab ix juer ongg; ix ee qniasniaa miaa qiyr Pau; ix ee bow miaa qiyr Mehetabel, si Mezahab ee jaboxsunx, Matled ee jaboxqniaw.

40 Dui' Esau soxx cud ee jogdniuw, jiauww inx ee jongjok, soxjai, miazi, qir dirr erdew: dyrr si Timna Jogdniuw, Alvah Jogdniuw, Jetet Jogdniuw,

41 Oholibamah Jogdniuw, Elah Jogdniuw, Pinon Jogdniuw,

42 Kenaz Jogdniuw, Teman Jogdniuw, Mibzar jogdniuw,

43 Magdiel Jogdniuw, qapp Ilan Jogdniuw; jiaxee si Edom ee jogdniuw, jiauww inx kiarkiw ee soxjai, dirr soxx did diyc juer giap ee de. Jitt xee si Edomlangg ee jow, dyrr si Esau.

37 Jakob kiarkiw dirr Kanaan-de, dyrr si ix ee laurve qiawkax ee soxjai.

2 Jakob ee sewhe qir dirr erdew. Josef jap-cid huer qapp ix hiaxee hniax snaqab qor ngiuu. Ix iauxx si jit xee ginxaw ee sii, qapp ix ee laurve ee sewii Bilhah qapp Zilpah ee qniaw, siongsiongg juewdin. Josef jiong' ix hiaxee hniax ee pnaiw pinxhing qra inx laurve qongw.

3 Dnaxx Islael tniar Josef kacc ngiaa quer dirr tniar ix ee jiongww qniaw, in'ui Josef si ix nilau snix :ee. Ix qra Josef juer jit niaw caixsig ee snxax.

4 Josef hiaxee hniax knuar qnir laurve tniar Josef, quewtauu dirr tniar inx, dyrr uanwhun Josef, be e qapp ix qongw hybok ee ue.

5 Josef bang qnir jit xee bang, qra ix hiaxee hniax qongw; inx dyrr qyckacc uanwhun ix.

6 Josef duiww inx qongw, "Cniaw linw tniax guaw soxx bang .qnir ee bang.

7 Lanw dirr hngg nirr haa gnoxqog; guaw soxx haa :ee kia .kiw .laii, linw soxx haa :ee uiluii laii vair guaw soxx haa :ee."

8 Ix ee hniax rinr qongxx, "Jongw byy liw jinjniar beh juer guanw ee ongg mah?" Inx dyrr uirdiyhh ix ee bang, qapp ix ee ue, qyckacc uanwhun ix.

9 Au .laii ix qycc bang qnir jit xee bang, iarr qra ix ee hniax qongw, "Guaw iuqycc bang qnir jit xee bang; u zit, u guec, qapp jap-id liap cnxix decc vair guaw."

10 Josef qra ix ee laurve qapp ix ee hniax qongw; inx laurve dyrr jikvi ix, qongw, "Liw soxx bang qnir jitt xee bang si jnaixngiu? Jongw byy guaw qapp linw laurbuw, linw hniadi, longxx beh pag lecc vair liw mah?"

11 Ix ee hniax longxx uanwdor ix; ix ee laurve u qra jiaxee ue qir dirr simlai.

12 Josef ee hniax kir Seqem cri laurve ee ngiuu.

13 Islael duiww Josef qongw, "Linw hniax qamxx m si dirr Seqem cri ngiuu mah? Liw laii, guaw beh crex liw kir inx hiax."

14 Ix rinr qongxx, "Guaw dirr jiax." Ix qra ix qongw, "Liw kir knuar linw hniax u ving'anx iacc byy, ngiuu-qrunn u ving'anx iacc byy; dyr .laii qra guaw qongw." Dyrr crex ix cud Heblon ee snuaqog; ix dyrr kir qaur Seqem.

15 U langg drng diyc ix dirr snuax nirr belo, dyrr mng ix qongxx, "Liw decc cue simxmih?"

16 Ix qongw, "Guaw decc cue guaw ee hniax. Cniaw qra guaw qongw, inx dirr daclyc decc cri ngiuu."

17 Hitt langg qongw, "Inx ixqing’ lirkuix jiax. In'ui guaw u tniax qnir inx decc qongw, 'Lanw laii kir Dotan.'" Josef dyrr kir zib ix ee hniax, duw diyc inx dirr Dotan.

18 Inx hng hng knuar qnir ix. Ix iauxx bue qniaa qaur inx hiax, inx dyrr snaqab qewboo beh hai siw ix.

19 Dairqex snaqab qongw, "Liw knuar, juer bang :ee laii lar.

20 Laii, dnaxx lanw qra ix taii .siw, qra hed dirr jit xee dax jnew, jiacc laii qongw u iaxsiur jiac ix. Lanw jiacc knuar ix ee bang jionglaii jnaixngiu."

21 Rleuben tniax .qnir, dyrr beh qiur ix tuatli inx ee ciuw, qongw, "Lanw m tangx hai ix ee sniwmia."

22 Rleuben qycc duiww inx qongw, "M tangx hro ix lrauu huih; tangx qra ix hed dirr jitt xee kongwiaw ee dax jnew, m tangx herciuw hai ix"; iwsur si beh qiur ix tuatli inx ee ciuw, hro ix dyr kir ix ee laurve hiax.

23 Josef qaur ix ee hniax hiax. Hitt diap inx dyrr trngr Josef ee guarsnax, dyrr si ix sinkux hitt niaw caixsig ee snxax.

24 Inx dyrr liac ix, qra hed lyc jnew. Hitt xee jnew si dax :ee, lairbin byy juiw.

25 Inx jre decc jiac vniaw, giahbak knuar, knuar qnir jit din Ismaellangg dui' Gileadlangg laii. Inx ing logdyy vue hniuliau, zuxhniux, bud'iyc, beh duar lyc kir Egipt.

26 Judah duiww jiaxee hniadi qongw, "Lanw taii siw lanw ee siyxdi, kngwbat ix ee huih, u simxmih lirig?

27 Lanw laii qra ix bre hro Ismaellangg, m tangx herciuw hai ix; in'ui ix si lanw ee siyxdi, lanw ee qutziok." Hniadi tniax ix.

28 U hiaxee Midian ee singlixlangg dui' hiax quer, ix ee hniax dyrr qra Josef dui' jnew-lai giuw .kiw .laii, jiong' ix bre hro Ismaellangg, did diyc zi-jap ee ginn. Hiaxee langg dyrr duar Josef kir Egipt.

29 Rleuben dywdngw laii jnew-vnix, knuar qnir Josef byy dirr jnew-lai, dyrr tiah lic qaqi ee snxax.

30 Ix dyr kir siyxdi hiax, qongw, "Ginxaw byy .kir lar. Acc guaw lehh, guaw beh daclyc kir?"

31 Inx dyrr taii jit jiah snua'ngiuqangw, jiong' Josef hitt niaw snxax unr huih,

32 Dyrr crex langg tec hitt niaw caixsig ee snxax kir inx laurve hiax, qongw, "Guanw cue diyc jitt niaw, cniaw liw zin knuar si liw ee qniaw ee guarsnax iacc m si."

33 Ix zin .did, dyrr qongw, "Jex si guaw ee qniaw ee guarsnax, u iaxsiur qra jiac .kir. Josef dikkag hro ix tiaccuir."

34 Jakob dyrr tiah lic snxax, iyx haa muavor, uirr ix ee qniaw aisiongx jerje zit.

35 Ix ee qniaw qapp ix ee jaboxqniaw longxx kiw laii an'uir ix. Ix m kingw siurr an'uir, qongw, "Guaw dikkag aisiongx lyc imhuw, qaur guaw ee qniaw hiax." Ix uirdiyhh ix ee qniaw Josef tikaur.

36 Midianlangg duar Josef qaur Egipt, jiong' ix bre hro Falaoh ee zinsinn, siruerdniuw Potifar.

38 Hitt sii Judah lirkuix ix ee hniadi, lyc kir qaur jit xee Adullamlangg, miaa juer Hilah ee qrex.

2 Judah dirr hiax knuar qnir jit xee Kanaanlangg, miaa qiyr Sua ee jaboxqniaw; dyrr crua ix, qapp ix dangvangg.

3 Ix dyrr huaiin snix qniaw. Judah dyrr qra ix hy miaa juer Er.

4 Ix qycc huaiin snix qniaw, qra ix hy miaa Onan.

5 Ix iuqycc snix qniaw, qra ix hy miaa Selah. Ix snix Selah ee sii, Judah duxaxx dirr Aczib.

6 Judah qra ix ee dua-qniaw Er cuarbow, miaa qiyr Tamar.

7 Judah ee dua-qniaw qniaa pnaiw dirr Jehovah ee binrjingg. Jehovah dyrr hro ix siw.

8 Judah qra Onan qongw, "Liw diyhh qapp liw ee hniasyw dangvangg, duiww ix laii jin liw juer siyxdi ee vunxhun, qra liw ee hniax lip horsuu."

9 Onan jaix soxx snix ee qniaw byy qruix dirr ix qaqi, soxiw dangvangg ee sii, uised dirr de nirr, benw did hro ix ee hniax u horsuu.

10 Ix ee soxx juer, Jehovah knuar juer pnaiw, hro ix iarr siw.

11 Judah simlai qongw, "Qniax Selah iarr siw, cincniu ix nng xee hniax jidngiu"; dyrr duiww ix ee simvu qongw, "Liw kir druar linw laurve ee qrex jiuxqnuaw, tingwhau guaw ee qniaw Selah diongxsingg." Tamar dyrr dyr .kir, druar dirr inx laurve ee qrex.

12 Quer quw quw, Judah ee bow Sua ee jaboxqniaw siw. Judah siurr an'uir; dyrr qapp ix ee ving'iuw Adullamlangg Hilah jnriu kir Timnah, qaur ix jenw ngiumngg ee langg hiax.

13 U langg qra Tamar qongw, "Linw daqnuax jnriu kir Timnah, jenw ix ee ngiuu ee xmngg."

14 Tamar knuar qnir Selah ixqing’ diongxsingg, iauxx byy crua ix juer bow, dyrr trngr ix jiuxqnuaw ee snxax, ing puer dar bin, qycc muax sintew, jre dirr Timnah ee lo, Enaim mngkauw.

15 Judah knuar qnir ix, liac juer si ciongqix, in'ui ix u dar bin.

16 Ix dyrr uat kir lo-vnix jiurqin ix, qongw, "Laii, hro guaw qapp liw snaqab kunr." Ix m jaix si ix ee simvu. Ix rinr qongxx, "Liw beh qapp guaw kunr, beh ing simxmih hro guaw?"

17 Judah qongw, "Guaw dui' ngiuu-qrunn lai liac jit jiah snua'ngiuu-aw, qiar laii hro liw." Qongw, "Liw beh ing simxmih mic juer junxdngr, tangx hro guaw tingwhau liw qiar laii?"

18 Judah qongw, "Guaw diyhh simxmih hro liw juer junxdngr?" Ix dyrr qongw, "Liw ee inr, liw ee duar, qapp liw ciuw nirr ee qnuaiw-aw." Ix dyrr hro ix, qapp ix kunr; ix dyrr dui' Judah huaiin.

19 Tamar kiw laii kir, trngr ix ee puer, iuguann cing ix jiuxqnuaw ee snxax.

20 Judah tog ix ee ving'iuw Adullamlangg sangr jit jiah snua'ngiuu-aw beh dui' hitt xee hurzinlangg ee ciuw tec junxdngr.

21 Cue ix be diyc, dyrr mng hitt soxjai ee langg qongxx, "Enaim lo-vnix ee ciongqix dirr daclyc?" Inx qongw, "Jitt xui byy ciongqix."

22 Ix dyr kir qnir Judah qongw, "Guaw cue ix byy. Hitt xui ee langg iarr qongw, 'Jitt xui byy ciongqix.'"

23 Judah qongw, "Quwjair ix tec .kir, benw did lanw qenwsiaur. Liw knuar, guaw ixqing’ jiong' jitt jiac snua'ngiuu-aw sangr ix, liw qingwzenn cue ix byy."

24 Iokliok quer snax guehzit, u langg qra Judah qongw, "Liw ee simvu Tamar juer ciongqix; qycc in'ui qnia'imm, suar u sinin." Judah qongw, "Qra ix tuax cud laii siyx."

25 Tamar hro langg tuax .cud .laii ee sii, dyrr crex langg kir qnir ix ee daqnuax, qongw, "Jiaxee mic si jirjui :ee, guaw dyrr si dui' ix laii huaiin."

26 Qycc qongw, "Cniaw liw zin, knuar jitt xee inr qapp duar qapp qnuaiw-aw si jirjui :ee." Judah zin .did, dyrr qongw, "Guaw viw ix kacc byy gi; in'ui guaw byy jiong' ix qer hro guaw ee qniaw Selah." Dui' hitt diap, Judah byy qycc cinqin ix.

27 Tamar decbeh snix ee sii, jaix ix vakdow lai si siangx xee.

28 Decc snix ee sii, jit xee ginxaw crunx jit qix ciuw .cud .laii; kiycjiaw tec angg snuar vak dirr ix ee ciuw, qongw, "Jitt xee si dairsingx cud :ee."

29 Au .laii ix ee ciuw qiux .zip .kir. Derr zi xee cutsir; kiycjiaw qongw, "Liw sniaw su jongg .cud .laii? Jitt xee viakpuar si uirdiyhh liw"; soxiw qra ix hy miaa juer Pelez.

30 Au .laii hitt xee, ciuw vak angg snuar :ee, iarr snix .cud .laii, dyrr hy ix ee miaa juer Zelah.

39 Josef hro langg duar lyc kir Egipt. U jit xee Egiptlangg, si Falaoh ee zinsinn siruerdniuw Potifar, dui' hiaxee duar ix laii ee Ismaellangg ee ciuw qra brew .kir.

2 Jehovah qapp ix snaqab dilehh, hro ix dagg hxang hingtongx, hro ix druar dirr ix ee juxlangg Egiptlangg ee qrex.

3 Ix ee juxlangg knuar qnir Jehovah hro ix ee ciuw soxx juer :ee longxx hingtongx.

4 Josef dyrr dirr juxlangg ee binrjingg did diyc undenw, laii hogsai ix. Juxlangg setlip ix quanxliw ix ee qrex, jiong' itcer soxx u :ee qaux dirr ix ee ciuw.

5 Dui' juxlangg setlip ix quanxliw qesu, qapp ix itcer soxx u :ee, Jehovah uirdiyhh Josef ee enqor, suwhog dirr hitt xee Egiptlangg ee qrex; qniwnarr qrex-lai qapp cann nirr itcer soxx u :ee, longxx did diyc Jehovah suwhog.

6 Ix jiong' itcer soxx u :ee, longxx qaux dirr Josef ee ciuw; druu kir ix soxx jiac ee mic ixgua, vadd hxang soxx u :ee, longxx m jaix. Josef suiw qycc hyw snijuer.

7 Jiaxee dairjir ixau, Josef ee juxbuw juwsinn knuar ix, qongw, "Laii qapp guaw kunr."

8 Josef m tranr, duiww ix ee juxbuw qongw, "Liw knuar, qrex-lai u simxmih dirr guaw ee ciuw, guaw ee juxlangg longxx m jaix. Ix ixqing’ jiong' soxu :ee qaux dirr guaw ee ciuw; dirr jitt qrex-lai byy jit xee viw guaw kacc dua.

9 Liw ixgua; ix byy jit hxang byy qaux hro guaw. Liw si ix ee bow; guaw jnaixngiu tangx qniaa jitt xee dua pnaiw, laii dikjue Siongrder?"

10 Au .laii, ix dagg zit qapp Josef qongxue. Josef byy tniax ix ee ue, byy qapp ix kunr, iarr byy qapp ix juewduix.

11 U jit zit, Josef zip cur vran ix ee dairjir. Qrex-lai ee langg byy jit xee dirr cur-lai.

12 Hurzinlangg dyrr kiuw ix ee snxax qongw, "Liw laii qapp guaw kunr." Josef jiong' snxax vangr dirr ix ee ciuw, jauw cud kir guarbin.

13 Hurzinlangg knuar qnir Josef jiong' snxax vangr dirr ix ciuw nirr, qycc jauw cud guarbin,

14 Dyrr qiyr qrex-lai ee langg laii, duiww inx qongw, "Linw knuar lehh, ix duar jit xee Heblalangg zip laii lanw ee qrex beh hiwlang lanw. Ix laii guaw jiax, beh qapp guaw kunr. Guaw dyrr dua sniax huah.

15 Ix tniax qnir guaw cud sniax huah, dyrr jiong' ix ee snxax vangr dirr guaw jiax, jauw cud kir guarbin."

16 Hurzinlangg jiong' Josef ee snxax siux dirr ix hiax, tingwhau ix ee juxlangg dyr .laii,

17 Dyrr duiww ix qongw kiw jiaxee su, qongw, "Liw soxx duar laii lanw jiax hitt xee Hebla ee lovok, ix qaur guaw jiax, beh hiwlang guaw.

18 Guaw cud sniax huah. Ix jiong' ix ee snxax vangr dirr guaw jiax, jauw cud kir guarbin."

19 Juxlangg tniax qnir ix ee bow duiww ix soxx qongw ee ue, qongw, "Liw ee lovok cincniu anxnix kuanxtai guaw", ix dyrr siurkir.

20 Josef ee juxlangg jiong' ix qnuaix lyc qnax, dyrr si ongg ee juerhuan siurr qnuaix ee soxjai. Dui' anxnix Josef dirr hitt xee qnax-lai.

21 Jongwsirr Jehovah qapp Josef dilehh, six xunx hro ix, hro ix dirr quanxqnax ee langg ee binrjingg did diyc undenw.

22 Quanxqnax :ee dyrr jiong' qnax-lai soxu ee huanrlangg longxx qaux dirr Josef ee ciuw. Inx dirr hiax soxx juer ee dairjir, longxx si ix decc juer.

23 Qniwnarr Josef ciuw-xe ee dairjir, quanxqnax :ee itkair byy cab; in'ui Jehovah qapp Josef dilehh, qycc ix soxx juer :ee, Jehovah longxx hro ix hingtongx.

40 Jiaxee dairjir ixau, Egipt Ongg ee jiuxjingr qapp duvangg dikjue inx ee jruw Egipt Ongg.

2 Falaoh siurkir ix nng xee zinsinn, dyrr si jiuxjingwdniuw qapp duvangdniuw,

3 Jiong' inx qnuaix dirr siruerdniuw huw-lai ee qnax, dyrr si Josef siurr qnuaix ee soxjai.

4 Siruerdniuw jiong' inx qaudair Josef, ix dyrr suhau inx; inx dyrr dirr qnax-lai u hiacc quw.

5 Siurr qnuaix dirr qnax :ee, Egipt Ongg ee jiuxjingr qapp duvangg, nng langg qangg jit mii qokk bang qnir jit xee bang, longxx jiauww dagg xee bang ee iwgi laii bang.

6 Qaur tnix qnx, Josef zip kir inx hiax, knuar qnir inx u iubun ee kuanxsid.

7 Ix dyrr mng Falaoh nng xee zinsinn, dyrr si qapp ix vnivnii qnuaix dirr juxlangg huw-lai :ee, qongw, "Qinaxzit linw sniaw su bin dair iu'iongg?"

8 Inx qra ix qongw, "Guanw dagg langg bang qnir jit xee bang, byy langg tangx uann." Josef qra inx qongw, "Uann bang qamxx m si jairdirr Siongrder mah? Cniaw linw qra guaw qongw."

9 Jiuxjingr dyrr duiww Josef vailet ix ee bang, qongw, "Guaw bang-diongx knuar qnir u jit jangg pudyciu dirr guaw ee binrjingg.

10 Ciu-dingw u snax qix, cincniu u huad gee kuix huex. Ix ee pax qetjniaa sik ee pudyy.

11 Falaoh ee vxuex dirr guaw ee ciuw-lai, guaw dyrr tec pudyy qra nic dirr Falaoh ee vxuex-lai, jiong' vxuex pangg qaux Falaoh ee ciuw."

12 Josef qra ix qongw, "Liw ee bang si anxnix uann. Snax qix dyrr si snax zit.

13 Qycc snax zit, Falaoh beh quxkiw liw ee tauu, hogdyr liw ee qnuajid. Falaoh ee jiuxvuex beh iuguann he dirr liw ee ciuw, cincniu jingg juer ix ee jiuxjingr jidngiu.

14 Liw narr dikjir ee sii, diyhh qiwliam guaw, six xunx hro guaw, dirr Falaoh ee binrjingg ter guaw qongw jit sniax, qiur guaw cud jitt xee qnax.

15 Guaw sidjai si dui' Heblalangg ee de siurr bre .laii .ee. Guaw dirr jiax iarr byy juer cud simxmih, tangx hro inx qra guaw qnuaix lyc qnax."

16 Duvangg knuar qnir bang uann liauw hyw, dyrr qra Josef qongw, "Guaw iarr dirr guaw ee bang-diongx knuar qnir dirr guaw ee taukag dingw u snax kingx vig ee vniaw.

17 Dingxbin hitt kingx u drew Falaoh soxx jiac dagg hy vig ee mic; u jiauw laii decc jiac guaw taukag dingw kingx-lai ee mic."

18 Josef rinr ix qongxx, "Liw ee bang si anxnix uann. Snax xee kingx si snax zit.

19 Qycc snax zit, Falaoh beh quxkiw liw ee taukag lirkuix liw, qra liw diaur dirr caa nirr. Beh u vuejiauw laii decc jiac liw sinkux ee bah."

20 Qaur derr snax zit, si Falaoh ee snizit, ix uirr jiongww sinzinn vaised ensiac. Dirr jiaxee zinsinn ee diongqanx, taiquw jiuxjingr qapp duvangg.

21 Ix hro jiuxjingwdniuw hogdyr qnuajid, hro ix iuguann pangg vxuex dirr Falaoh ee ciuw;

22 Jiong' duvangg tauu diaur .kiw .laii, duxduxx jiauww Josef soxx qra inx uann :ee.

23 Danrsi jiuxjingwdniuw byy liam diyc Josef, qingwzenn be qir did ix.

41 Quer nng nii qanngg, Falaoh binbang, bang qnir ix kia dirr hyy-vnix,

2 Knuar qnir cid jiah gubuw hyy nirr kiw .laii, suiw qycc vuii, dirr lodig-aw lai decc jiac.

3 Duewau qycc u cid jiah gubuu dui' hyy nirr kiw .laii, kiapsir qycc sanw, qapp jingg hiaxee guu drangg kia dirr hyy-vnix.

4 Jiaxee kiapsir qycc sanw ee gubuw itjin jiac hitt cid jiah suiw qycc vuii ee guu.

5 Falaoh dyrr cnew. Ix qycc kunr, derr zi vaiw binbang, bang qnir jit jangg bec cud cid sui, pauh qycc hyw.

6 Au .laii knuar qnir qycc cud cid sui, pnar pnar, qycc hro danghongx saur pnaiw .kir.

7 Jiaxee pnar ee sui tunx hitt cid xee sui, pauh, qycc vaxmuaw :ee. Falaoh cnew, jiacc jaix si bang.

8 Qaur tnix qngx, Falaoh simx byy ving'anx, dyrr crex langg driaur Egipt soxu ee sudsu, poksu laii. Falaoh dyrr jiong' ix soxx bang .qnir .ee qra inx qongw. Inx byy langg e qra Falaoh uann.

9 Hitt sii jiuxjingwdniuw qra Falaoh qongw, "Guaw qinaxzit qir did guaw ee jue.

10 Jingg Falaoh siurkir zinsinn, jiong' guaw qapp duvangtauu qnuaix dirr siruerdniuw huw-lai ee qnax.

11 Guaw qapp ix, nng langg siangg hitt mii u bang .qnir, qokk jiauww bang ee iwgi laii bang.

12 Dirr hiax, qapp guanw dilehh, u jit xee Hebla ee siauwlenlangg, si siruerdniuw ee lovok, guanw qra ix qongw, ix dyrr qra guanw uann guanw ee bang; si jiauww guanw dagg langg ee bang laii uann.

13 Au .laii duxduxx jiauww ix soxx qra guanw uann :ee laii jniaa. Ix hro guaw hogjid, hitt langg siurr diaur laii siw."

14 Falaoh dyrr crex langg kir driaur Josef. Inx dyrr qinw qinw cua ix cud qnax. Ix dyrr jenw taumngg, ngua ix ee snxax, laii qnir Falaoh.

15 Falaoh qra Josef qongw, "Guaw bang qnir jit xee bang, byy langg e uann. Guaw tniax qnir langg qongw qaur liw tniax qnir bang dyrr e uann."

16 Josef rinr Falaoh qongxx, "Jex m si jairdirr guaw. Siongrder beh jiong' ving'anx jixsi Falaoh."

17 Falaoh qra Josef qongw, "Guaw bang qnir guaw kia dirr hyy-vnix,

18 U cid jiah gubuw dui' hyy nirr kiw .laii, vuii qycc suiw, dirr lodig-aw lai decc jiac.

19 Duewau qycc u cid jiah gubuu kiw .laii, nngxjniaw, jin' kiapsir, qycc jin' sanw; venww Egipt-de, guaw m bad knuar qnir qaur jiacc pnaiw.

20 Jiaxee snaw qycc kiapsir ee gubuw itjin jiac dairsingx hitt cid jiah vuii ee gubuu tunx lyc vxag.

21 In'ui hitt xee kiapsir ee kuanw iuguann qapp dairsingx byy qyc'ngiu, iauxx bue knuar cud inx qamxx u tunx .lyc .kir, guaw dyrr cnew.

22 Guaw dirr bang-diongx qycc knuar qnir jit jangg bec, cud cid sui, vaxmuaw qycc hyw.

23 Au .laii qycc cud cid sui, qodaa, pnar pnar, qycc hro danghongx saur pnaiw .kir.

24 Jiaxee pnar pnar ee sui tunx hitt cid sui hyw :ee. Guaw qongw hro sudsu tniax, iarr byy langg e qra guaw quexbingg."

25 Josef qra Falaoh qongw, "Falaoh ee bang dyrr si anxnix. Siongrder soxx beh qniaa ee su, u jixsi Falaoh.

26 Cid jiah hyw ee gubuw si cid nii, cid sui hyw :ee iarr si cid nii; jex si jit xee bang.

27 Hiaxee duewau kiw .laii ee cid jiah sanw qycc kiapsir ee gubuw, si cid nii; hiaxx cid sui kangpnar, qycc hro danghongx saur pnaiw :ee, iarr si cid nii; beh juer cid nii ee qihngx.

28 Siongrder soxx beh juer ee su, u henxbingg dirr Falaoh. Jex si guaw duiww Falaoh soxx qongw :ee.

29 Liw knuar, Egipt venww de beh duw diyc dua hyw nidangx cid nii.

30 Duewau, qycc beh duw diyc qihngx cid nii, simrjiww dirr Egipt-de longxx be qir did ixjingg ee hyw siux. Juann de beh hro qihngx soxx bet,

31 In'ui ixau ee qihngx taiww siongdiong, dyrr m jaix ixjingx derhngx ee hyw siux.

32 Lun qaur Falaoh nng vaiw ee binbang, si in'ui Siongrder juwdnia jitt xee dairjir, qycc Siongrder beh qinw qinw jniaa ix.

33 Soxiw Falaoh diyhh qingw jit xee u cangmiaa, u diwhui ee langg, pair ix dirliw Egipt-de.

34 Falaoh diyhh anxnix qniaa, qycc lip qnua'uann quanxliw jitt xee de. Dng' cid nii hyw nidangx ee sii, Egipt-de soxx siux :ee, go hxun tiux jit hxun,

35 Hro inx dirr jionglaii ee hyw nidangx, jikju itcer ee bixniuu, jurjip gnoxqog, dirr dagg xee sniaa siukngr jiauwqor, tangx juer jiahmic qruix dirr Falaoh ee ciuxtauu.

36 Soxx jikju ee bixniuu, tangx juer Egipt-de jionglaii cid nii qihngx ee loring, benw did jitt xee de hro qihngx soxx bet."

37 Falaoh qapp ix itcer ee zinsinn longxx liac jitt xee dairjir juer hyw.

38 Falaoh duiww ix ee zinsinn qongw, "Lanw qamxx e cue diyc jit xee cincniu ix jitt xee langg, u Siongrder ee sinn dirr ix ee lairbin :ee mah?"

39 Falaoh duiww Josef qongw, "Siongrder ixqing’ jiong' jitt xee dairjir longxx jixsi liw, kyxqenr byy langg cincniu liw u jitt hy ee cangmiaa diwhui.

40 Liw tangx quanxliw guaw ee qrex. Guaw ee vecsnir longxx diyhh tniax liw ee ue, hro liw quanxliw; dogdok dirr vyxjy, guaw viw liw kacc dua."

41 Falaoh qra Josef qongw, "Guaw quxkiw liw quanxhad Egipt juann de."

42 Falaoh dyrr vrag ciuw nirr juer inr ee ciuxjiw, qruar dirr Josef ee jngxtauu-aw, qra ix cing iuwduersnax, jiong' qimlen qruar dirr ix ee amrqunw.

43 Qycc hro Josef jre ix ee derr zi vanx ciax. Kuidy :ee qiyr qongxx, "Qui." Anxnix Falaoh setlip ix dirliw Egipt juann de.

44 Falaoh duiww Josef qongw, "Guaw si Falaoh. Liw narr byy huacsniax, dirr Egipt juann de, m jrunw langg drang kaciuw."

45 Falaoh kimsur Josef ee miaa qiyr Zafenat Paneah, qycc jiong' On Sniaa ee jewsix Potifela ee jaboxqniaw Asenat hro ix juer bow. Josef dyrr cutsunn Egipt-de.

46 Josef qnir Egipt Ongg Falaoh ee sii, hitt nii snax-jap huer. Josef dui' Falaoh ee binrjingg cud .kir, venww qniaa Egipt juann de.

47 Cid xee hyw nidangx ee lairbin, de ee cutsanw qigqii hongsing.

48 Josef jurjip Egipt-de cid xee hyw nidangx itcer ee bixniuu, jiong' bixniuu jikju dirr dagg xee sniaa; jiuuii cande ee bixniuu, longxx jikju dirr vunxsniaa.

49 Josef jikju gnoxqog qik je, cincniu haiw-vnix ee suax, qaur ix tingjiw byy qycc sngr; in'ui sngr be liauw.

50 Qihngx bue qaur ixjingg, On Sniaa ee jewsix Potifela ee jaboxqniaw Asenat qra Josef snix nng xee qniaw.

51 Josef qra dua-qniaw hy miaa qiyr Manasseh; in'ui ix qongw, "Siongrder hro guaw be qir did guaw itcer ee kunwkow, qapp guaw ee laurve ee juann qrex."

52 Ix qra derr zi qniaw hy miaa Eflaim; in'ui ix qongw, "Siongrder hro guaw dirr guaw siurkow ee derhngx hing'ong."

53 Egipt-de cid nii hyw nidangx ixqing’ uann,

54 Cid nii qihngx dyrr laii, duxduxx jiauww Josef soxx qongw :ee. Dagg qog longxx u qihngx, dogdok Egipt juann de u bixniuu.

55 Qaur Egipt juann de u qihngx, jiongww vecsnir duiww Falaoh aiqiuu bixniuu. Falaoh duiww Egipt ee jingwlangg qongw, "Linw kir cue Josef, huanrnarr ix soxx qongw :ee, linw longxx diyhh juer."

56 Dngsii qihngx venwmuaw tnie. Josef kuix dagg soxjai ee cikcngx, tiyr bixniuu hro Egiptlangg. Dirr Egipt-de qihngx jin' siongdiong.

57 Dagg qog ee langg longxx kir Egipt, qaur Josef hiax diac bixniuu; in'ui tnie qihngx jin' siongdiong.

42 Jakob knuar qnir Egipt u gnoxqog, dyrr qra ix hiaxee qniaw qongw, "Linw sniaw su decc sna' knuar."

2 Qycc qongw, "Guaw tniax qnir Egipt u gnoxqog, linw tangx lyc kir hiax, uirr lanw diac damrvyc, hro lanw tangx doruac, benw siw."

3 Dui' anxnix Josef jap xee hniax longxx lyc Egipt, kir diac bixniuu.

4 Danrsi Josef ee siyxdi Benjamin, Jakob byy crex ix qapp inx hniax snaqab kir; in'ui ix qongw, "Qniax ix duw diyc hai."

5 Laii diac bixniuu ee langg ee diongqanx, Islael hiaxee qniaw iarr u laii, in'ui Kanaan-de iarr u qihngx.

6 Dngsii dirliw Egipt-de :ee si Josef; tiyr bixniuu hro hitt soxjai ee jiongww vecsnir :ee, iarr si ix. Josef hiaxee hniax laii, pag lyc de vair ix.

7 Josef knuar qnir ix hiaxee hniax, e zin .did, qew juer snihunrlangg, duiww inx qongw kacc giamm ee ue, mng inx qongxx, "Linw dui' daclyc laii?" Inx qongw, "Dui' Kanaan-de laii diac bixniuu."

8 Josef e zin did inx, inx be zin did ix.

9 Josef qir did jingg soxx bang lun qaur inx :ee hiaxee bang, dyrr duiww inx qongw, "Linw si jingtamr, laii tamwtniax jitt soxjai ee husit."

10 Inx duiww ix qongw, "Guanw ee jruw ar, m si, liw ee lovok laii beh diac bixniuu.

11 Guanw longxx si jit langg ee qniaw, guanw si lauxsidlangg, liw ee lovok m si jingtamr."

12 Josef qra inx qongw, "M si anxnix, linw laii si beh tamwtniax jitt soxjai ee husit."

13 Inx qongw, "Liw ee lovok jap-zi xee hniadi, si Kanaan-de jit xee langg ee qniaw; siongrr ser :ee, henrjai dirr guanw laurve hiax; u jit xee byy .kir lar."

14 Josef qra inx qongw, "Guaw duxaw qongw linw si jingtamr, jitt xee ue sidjai byy cyr.

15 Guaw qiw Falaoh ee sniwmia laii jiuwjua, narr linw suacbuew ee siyxdi byy qaur jiax, linw berdid tangx cud jitt soxjia; ing anxnix laii ciwgiam linw ee husit.

16 Diyhh crex linw diongqanx jit langg kir cua linw ee siyxdi laii, linw jiaxee longxx diyhh qnuaix dirr jiax, jingwbingg linw ee ue, jaix linw singsit iacc byy; narr byy, guaw qiw Falaoh ee sniwmia laii jiuwjua, linw itding si jingtamr."

17 Dui' anxnix Josef jiong' inx longxx qnuaix dirr qnax nirr snax zit.

18 Qaur derr snax zit, Josef duiww inx qongw, "Guaw qingwuir Siongrder. Linw jiauww guaw ee ue qniaa, dyrr e uac.

19 Linw narr qyxzenn si lauxsidlangg, linw hniadi diongx tangx lauu jit xee vak dirr linw hitt xee qnax-lai. Linw tangx duar bixniuu dyr .kir, qiur linw qrex-lai ee qihngx,

20 Jiong' linw suacbuew siyxdi cua laii guaw jiax. Anxnix linw ee ue dyrr u vinqir, linw iarr mrbenw siw." Inx dyrr jiauww anxnix qniaa.

21 Inx snaqab qongw, "Lanw duiwdirr lanw ee siyxdi sidjai u jue, ix aiqiuu lanw ee sii, lanw knuar qnir ix simlai ee qankow, iarr m kingw tniax ix; soxiw jitt dniuu ee koxlan qaur dirr lanw."

22 Rleuben rinr inx qongxx, "Guaw qamxx m si duiww linw qongw, m tangx hai hitt xee ginxaw laii cruw jue, dogdok linw m tniax? Soxiw lrauu ix ee huih ee jue, duiww lanw jiaxee tyw."

23 Inx m jaix Josef tniax e hiauxdid; in'ui dirr inx diongqanx u ing huan'igqnuax.

24 Josef uat dngw srinx lrauu bagsaiw, qycc uat laii qapp inx qongxue, dyrr dirr inx diongqanx cruw Simeon cud .laii, dirr inx ee binrjingg qra ix vak lehh.

25 Josef huanhur langg jiong' gnoxqog zip dirr inx ee kiwqu qaur muaw muaw, iarr jiong' inx dagg langg ee ginn he dirr inx ee vowde lai laii hingg inx, qycc qra inx cuann lo nirr ee jiahmic; langg dyrr jiauww anxnix laii qra inx juer.

26 Inx dyrr jiong' gnoxqog hro inx ee luu jair, dyrr lirkuix hiax kir.

27 Qaur hiycmii ee soxjai, inx diongqanx u jit langg tauw kuix ix ee vowde, beh tec hro luu jiac, jiacc knuar qnir ix ee ginn iuguann dilehh, he dirr vowderkauw.

28 Ix dyrr qra ix ee hniadi qongw, "Inx qra guaw ee ginn hingg dywdngw, liw knuar, iuguann dirr guaw ee vowde lai." Inx dyrr qniax qaur byy simqnuax, gniauhgniauc cuah, snaqab qongw, "Siongrder anxnix kuanxtai lanw si simxmih?"

29 Inx qaur Kanaan-de, qaur inx laurve Jakob hiax, jiong' soxx duw .diyc ee su longxx qra ix qongw, qongw,

30 "Hitt langg dyrr si hitt soxjai ee jruw, duiww guanw qongw jin' giamm ee ue, liac guanw juer hitt soxjai ee jingtamr.

31 Guanw qra ix qongw, guanw si lauxsidlangg, guanw m si jingtamr,

32 Guanw si jap-zi xee hniadi, si guanw laurve ee qniaw; u jit xee byy .kir, siongrr ser :ee henrjai qapp guanw laurve dirr Kanaan-de.

33 Hitt langg, dyrr si hitt soxjai ee jruw, qra guanw qongw, 'Narr rair hro guaw jaix linw si lauxsidlangg, linw hniadi diongx tangx lauu jit xee dirr guaw jiax, linw jiaxee tangx duar gnoxqog dyr .kir, qiur linw qrex-lai ee qihngx;

34 Cua linw suacbuew ee siyxdi laii guaw jiax, guaw dyrr jaix linw m si jingtamr, si lauxsidlangg. Anxnix guaw dyrr jiong' linw ee hniadi qaux hro linw; linw iarr tangx dirr jitt soxjai bexbe.'"

35 Au .laii inx vniar inx ee vowde, byy pacsngr, inx dagg langg ee ginvaux longxx dirr inx ee vowde lai. Inx qapp inx laurve knuar qnir ginvaux dyrr longxx qniahniaa.

36 Inx ee laurve Jakob qra inx qongw, "Linw hro guaw sitlyc guaw ee qniaw. Josef byy .kir, Simeon iarr byy .kir, linw qycc beh cua Benjamin kir. Jiaxee dairjir longxx si hai diyhh guaw."

37 Rleuben qra ix ee laurve qongw, "Guaw narr byy cua ix dyr laii qaux liw, liw tangx taii guaw nng xee qniaw. Jueww liw tangx jiong' ix qaudair guaw. Guaw dikkag cua ix dyr laii qaux liw."

38 Jakob qongw, "Guaw ee qniaw guaw byy beh hro ix qapp linw kir. Ix ee hniax ixqing’ siw, jixu cunx ix. Ix narr dirr linw soxx qniaa ee lo duw diyc hamrhai, linw dyrr hro guaw vec taumngg, cnicamw lyc imhuw."

43 Hitt soxjai qihngx jin' dua. Inx dui' Egipt duar laii ee gnoxqog ixqing’ jiac liauw.

2 Inx laurve qra inx qongw, "Linw qycc kir qra lanw diac damrvyc bixniuu laii."

3 Judah rinr ix qongxx, "Hitt langg cetced huanhur guanw qongxx, 'Linw siyxdi narr byy qapp linw snaqab laii, linw dyrr be did diyc qnir guaw ee bin.'

4 Linw narr crex guanw siyxdi qapp guanw snaqab kir, guanw dyrr lyc .kir, qra liw diac bixniuu.

5 Liw narr byy crex ix kir, guanw dyrr m lyc .kir; in'ui hitt langg qra guanw qongw, 'Linw siyxdi narr byy qapp linw snaqab laii, linw dyrr be did diyc qnir guaw ee bin.'"

6 Islael qongw, "Linw sniaw su anxnix hai guaw, qra hitt langg qongw linw iauxx u siyxdi ar?"

7 Inx rinr qongxx, "Hitt langg diwir mng guanw qapp guanw cinjok ee dairjir, qongw, 'Linw laurve iauxx dilehh bor? Linw iauxx u hniadi .byy?' Guanw jiauww ix soxx mng :ee qra ix qongw. Guanw taixtyw e jaix ix beh qongw, 'Diyhh duar linw siyxdi lyc .laii'?"

8 Judah qycc qra ix ee laurve Islael qongw, "Liw crex ginxaw qapp guaw kir, guanw dyrr kixsinx kir, tangx hro guanw qapp liw, ixqip guanw ee ginxaw, did diyc uac, benw siw.

9 Guaw qra ix vyw, liw tangx duiww guaw tyw; guaw narr byy cua ix dyr laii kia dirr liw ee binrjingg, guaw guan itsingx damdngx jue.

10 Lanw narr m si u encenn, ixqing’ derr zi vaiw dyr .laii lar."

11 Inx laurve Islael duiww inx qongw, "Narr si anxnix, linw dyrr diyhh anxnix juer. Tangx cruw jitt soxjai derr id hyw ee toxsanw, zuxhniux damrvyc, pangbit damrvyc, ixqip hniuliau, bud'iyc, huixjiw, hingrzinn, longxx siux dirr kiwqu lai, duar kir sangr hitt langg.

12 Qycc diyhh duar ginn dingvue, iarr diyhh jiong' linw vowderkauw, ix hingg linw ee ginn, duar dyr kir hro ix. Hitt xee qiamxcaiw si sitcyr;

13 Iarr cua linw siyxdi kixsinx, qycc kir qnir hitt langg.

14 Dogdok guan juanlingg ee Siongrder hro linw dirr hitt langg ee binrjingg did diyc linbinw, jiong' linw hitt xee hniadi qapp Benjamin qaux linw. Guaw narr sitlyc guaw ee qniaw, iarr diyhh hro ix sitlyc dyrr si."

15 Dui' hitt diap, inx duar hiaxee lexmic, iarr duar ginn dingvue, qycc cua Benjamin, kixsinx lyc kir Egipt kia dirr Josef ee binrjingg.

16 Josef knuar qnir Benjamin qapp inx snaqab laii, dyrr duiww quanxqex :ee qongw, "Cua jiaxee langg kir cur-lai, taii jingsnix, virvan ensiac. Zit daur :ar, jiaxee langg beh qapp guaw snaqab jiac."

17 Hitt langg dyrr jiauww Josef ee ue kir qniaa, cua inx hiaxee langg zip Josef ee cur.

18 Hiaxee lnagg hro ix cua qaur Josef ee cur, dyrr qniahniaa, qongw, "Cua lanw qaur jiax, dikkag si in'ui tauu jit vaiw dirr vowde lai hingg lanw ee ginn, beh cue lanw ee kangpang, herciuw hai lanw, qiongqiongg liac lanw lovok, cniuw lanw ee luu."

19 Inx dyrr uaw qin Josef ee quanxqex :ee, dirr cuwmngkauw qapp ix qongxue, qongw,

20 "Guaw ee jruw ar, guanw tauu vaiw lyc .laii, sidjai si beh diac bixniuu.

21 Au .laii guanw qaur hiycmii ee soxjai, kuix guanw ee vowde, byy pacsngr, guanw dagg langg ee ginn jioksor iuguann dirr dagg langg ee vowderkauw. Dnaxx guanw u qycc duar .laii. Guanw lingrgua u qycc duar ginn beh laii diac bixniuu.

22 Guanw m jaix jirjui jiong' guanw ee ginn he dirr guanw ee vowde lai."

23 Quanxqex :ee qongw, "Jueww linw ansimx, benw qniax; si linw ee Siongrder, qapp linw laurve ee Siongrder, sniuxsur linw jaivyw dirr linw ee vowde lai. Linw ee ginn guaw ixqing’ siux liauw." Dyrr cua Simeon cud laii hro inx.

24 Hitt langg dyrr cua hiaxee langg zip Josef ee cur, pangg juiw hro inx sew kax; qycc tec cauxliau cri inx ee luu.

25 Inx dyrr virvan hiaxee lexmic, tingwhau Josef zit daur dyr .laii; in'ui inx tniax qnir beh dirr hiax jiac.

26 Josef dyr laii qaur cur, inx dyrr jiong' soxx duar .laii ee lexmic tec zip cur sangr ix, qycc pag dirr de nirr vair ix.

27 Josef mng inx ving'anx, qycc qongw, "Linw ee laurve, dyrr si linw soxx qongw hitt xee laurlangg, ving'anx mah? Ix iauxx dilehh mah?"

28 Inx rinr qongxx, "Liw ee lovok, guanw ee laurve, ving'anx, ix iauxx dielhh." Inx dyrr ngar tauu vair ix.

29 Josef giahbak knuar qnir ix qangg buw ee siyxdi, Benjamin, dyrr qongw, "Linw soxx qra guaw qongw suacbuew siyxdi, si jitt xee mah?" Qycc qongw, "Sewqniaw, guan Siongrder six xunx hro liw."

30 Josef tniar siyxdi ee jxingg dua siurr qikdong, dyrr qnuaxqinw cue jit xui tangx tikaur. Ix dyrr zip ix ee vangqingx tikaur.

31 Au .laii sew bin cud .laii, benxqiongw lunw lehh, huanhur kuix dyh.

32 Inx dyrr uirr Josef lingrgua vaii jit der dyh, uirr hiaxee langg qycc vaii jit der, iarr uirr qapp Josef snaqab jiac ee Egiptlangg lingrgua vaii jit der; in'ui Egiptlangg be tangx qapp Heblalangg snaqab jiac, jex si Egiptlangg soxx iamwgnor.

33 Hiaxee langg jre dirr ix ee binrjingg, duarser jiauww inx ee nihuer ee cuwsu; hiaxee langg dairqex gong'gniac.

34 Josef jiong' ix bingrjingg ee jiahmic vunx hro inx; dogdok Benjamin soxx did .diyc .ee, viw vadd langg qex go vxue je. Inx dyrr limx jiuw, qapp Josef snaqab enwlok.

44 Josef huanhur quanxqex :ee qongxx, "Jiong' bixniuu zip muaw jiaxee langg ee vowde, jin inx soxx e duar :ee; qycc jiong' dagg langg ee ginn log dirr ix ee vowderkauw.

2 Iarr jiong' guaw ee vxuex, dyrr si hitt der ginvuex, he dirr siauwlenn :ee ee vowderkauw; ix diac gnoxqog ee ginn iarr suar he lehh." Quanxqex :ee dyrr jiauww Josef soxx qongw ee ue kir qniaa.

3 Tnix jid'err qngx, dyrr crex hiaxee langg qapp inx ee luu kir.

4 Inx cud sniaa qniaa byy zuarr hng, Josef qra quanxqex :ee qongw, "Kiw .laii, kir duizib hiaxee langg. Duix .diyc, dyrr qra inx qongw, 'Linw sniaw su ing pnaiw vyr hyw ar?

5 Jex qamxx m si guaw ee juxlangg limx jiuw ee vxuex mah? Qamxx m si ix jiamvog decc ing :ee mah? Linw anxnix juer si pnaiw.'"

6 Quanxqex :ee duix diyc inx, jiong' jiaxee ue qra inx qongw.

7 Inx rinr qongxx, "Guaw ee jruw sniaw su qongw jitt hy ue? Liw ee lovok duanwduanr byy juer jitt hy su.

8 Liw knuar, guanw jingg dirr vowderkauw soxx knuar .qnir ee ginn, siongrcniaw dui' Kanaan-de duar laii hingg liw, taixtyw e dui' liw juxlangg ee qrex tautec qimginn ar?

9 Liw ee lovok ee diongqanx, bylun dirr simxmih langg hiax ciaux .diyc, dyrr hro ix siw, guanw iarr beh juer guaw ee juxlangg ee lovok."

10 Quanxqex :ee qongw, "Dnaxx dyrr jiauww linw ee ue qniaa. Dirr simxmih langg hiax ciaux .diyc, hitt langg dyrr juer guaw ee lovok; qi'uu :ee longxx byy jue."

11 Dui' hitt diap, inx dagg langg qnuaxqinw jiong' vowde siar dirr tokax, dagg langg tauw kuix inx ee vowde.

12 Quanxqex :ee dyrr ciaux, dui' dua :ee kiw, qaur ser :ee jriw; hitt xee vxuex qingwzenn dirr Benjamin ee vowde lai ciaux .diyc.

13 Inx dyrr tiah lic inx ee snxax, dagg langg jiong' inx ee mic hro luu jair, dyr kir sniaa-lai.

14 Judah qapp ix ee hniadi qaur Josef ee cur. Josef iauxx dirr hiax. Inx dyrr dirr ix ee binrjingg pag lyc de.

15 Josef qra inx qongw, "Linw soxx juer :ee si simxmih su? Linw qamxx m jaix, cincniu guaw jitt hy ee langg e jiamvog mah?"

16 Judah qongw, "Guanw duiww guaw ee jruw beh qongw simxmih? Iauxx u sniaw e tangx qongw? Guaw tacc e qaqi sowbingg ar? Siongrder ixqing’ jax cud liw ee lovok ee juerquar. Guanw qapp hitt xee dirr ix ee ciuw ciaux diyc vxuex :ee, longxx si guaw ee jruw ee lovok."

17Josef qongw, "Guaw duanwduanr byy beh anxnix juer. Dirr simxmih langg ee ciuw ciaux diyc vxuex, hitt langg dyrr diyhh juer guaw ee lovok. Linw jiaxee tangx ving'anx jnriu kir linw laurve hiax."

18 Judah uaw qin ix qongw, "Guaw ee jruw ar, qriuu liw iong'unw liw ee lovok qongw jit qxur ue hro guaw ee jruw tniax, byc did siurkir liw ee lovok; in'ui liw qapp Falaoh jidngiu.

19 Guaw ee jruw bad mng liw jiaxee lovok qongxx, 'Linw u laurve, u hniadi .byy?'

20 Guanw qra guaw ee jruw qongw, 'Guanw u laurve, ixqing’ nilau; iauxx u ix nilau soxx snix jit xee suacbuew qniaw; ix ee hniax ixqing’ siw, ix ee laurbuw qandna' vangr ix jit xee, qycc ix ee laurve jin' tniar ix.'

21 Liw qra liw ee lovok qongw, 'Cua ix lyc laii guaw jiax, hro guaw cinbak knuar qnir ix.'

22 Guanw qra guaw ee jruw qongw, 'Ginxaw be e lirkuix ix ee laurve; narr lirkuix ix ee laurve, laurve dikkag siw.'

23 Liw qra liw ee lovok qongw, 'Linw ee suacbuew siyxdi narr byy qapp linw snaqab lyc .laii, linw dyrr berdid qycc qnir guaw ee bin.'

24 Guanw jnriu qaur liw ee lovok, guanw laurve hiax, dyrr jiong' guanw ee jruw ee ue qra ix qongw.

25 Guanw ee laurve qongw, 'Linw qycc kir qra lanw diac damrvyc bixniuu laii.'

26 Guanw dyrr qongw, 'Guanw be e lyc kir; guanw ee suacbuew siyxdi narr qapp guaw snaqab kir, guanw dyrr beh lyc .kir; in'ui suacbuw siyxdi narr byy qapp guanw snaqab kir, guanw dikkag berdid qnir hitt langg ee bin.'

27 Liw ee lovok, guaw ee laurve, qra guanw qongw, 'Linw jaix guaw ee bow qra guaw snix nng xee qniaw,

28 Jit xee lirkuix guaw cud .kir, guaw qongw ix dikkag si hro iaxsiur tiaccuir; qaur dnaxx guaw iauxx m bad knuar qnir.

29 Dnaxx linw qycc jiong' jitt xee cua .kir, lirkuix guaw. Narr ix duw diyc hamrhai, dyrr si linw hro guaw vec taumngg, cnicamw lyc imhuw.'

30 Guanw laurve ee sniwmia qapp jitt xee ginxaw ee sniwmia snix sna' lenn. Dnaxx guaw dyr kir liw ee lovok, guaw ee laurve hiax. Narr ginxaw byy qapp guanw snaqab dilehh, guanw ee laurve knuar byy ginxaw, ix dyrr dikkag siw.

31 Jex e hro liw ee lovok, guanw ee laurve, vec taumngg, cnicamw lyc imhuw.

32 In'ui liw ee lovok bad duiww guaw ee laurve vyw jitt xee ginxaw, qongw, 'Guaw narr byy cua ix dyr laii qaux liw, guaw guan dirr laurve ee binrjingg itsingx damdngx jue.'

33 Dnaxx qriuu liw iong'unw liw ee lovok diamr lehh, ter jitt xee ginxaw juer guaw ee jruw ee lovok; hro ginxaw qapp ix hiaxee hniax snaqab jnriu .kir.

34 Narr ginxaw byy qapp guaw snaqab kir, guaw taixtyw e jnriu kir qnir guaw ee laurve ar? Guaw qniax kir knuar qnir guanw laurve soxx duw diyc ee jaieh."

45 Josef dirr hiaxee kia ix sinvnix ee langg ee binrjingg lunw be diauu, dyrr huah qongxx, "Jingwlangg diyhh lirkuix guaw cud .kir." Josef jiong' ix vunxsinx hro hniadi zin .did ee sii, byy jit langg kia dirr ix ee binrjingg.

2 Ix dyrr cud sniax dua kaur. Egiptlangg tniax .qnir, Falaoh ee qrex iarr tniax .qnir.

3 Josef qra ix ee hniadi qongw, "Guaw si Josef, guaw ee laurve iauxx dilehh mah?" Ix ee hniadi be e rinr, in'ui dirr ix ee binrjingg longxx qniahniaa.

4 Josef qycc qra ix ee hniadi qongw, "Cniaw qniaa uaw .laii." Inx dyrr uaw .laii. Ix qongw, "Guaw si linw ee siyxdi Josef, dyrr si linw soxx bre qaur Egipt :ee.

5 Dnaxx mrbenw in'ui bre guaw qaur jiax laii iubun, laii qaqi uanwhun; jex si Siongrder crex guaw dairsingx linw laii, in'ui beh vyxjuann sniwmia.

6 Dnaxx dirr jitt soxjai ee qihngx ixqing’ nng nii, iauxx u go nii, byy tangx jingwjyh, byy tangx siusingg.

7 Siongrder crex guaw dairsingx linw laii, uirdiyhh beh qra linw lauu cunx ee jingxjok dirr sewjniu, qycc beh qniaa Ix dua ee jinxqiur, vyxjuann linw ee uahmia.

8 Anxnix knuar .kiw .laii, crex guaw qaur jiax :ee, m si linw, si Siongrder. Ix qycc hro guaw cincniu Falaoh ee ve, hro guaw juer ix juann qrex ee jruw, qapp quanxliw Egipt juann de.

9 Linw diyhh qnuaxqinw jnriu kir guaw ee laurve hiax, qra ix qongw, 'Liw ee qniaw Josef anxnix qongw: Siongrder hro guaw juer juann Egipt ee jruw, cniaw lyc laii guaw hiax, m tangx encenn.'

10 Liw qapp liw ee qniaw, liw ee sunx, qapp guu-qrunn, ngiuu-qrunn, ixqip itcer soxu :ee, longxx tangx laii diamr dirr Gosen ee de, qapp guaw sna' qin.

11 Guaw beh dirr hiax hongrsingg liw. In'ui iauxx u go nii ee qihngx, benw did liw, qapp liw ee qequanr, qapp itcer soxu :ee lyhvyc.

12 Hyhongr linw ee bagjiux qapp guaw ee siyxdi Benjamin ee bagjiux longxx knuar qnir guaw qapp linw cincuir duiww linw qongxue.

13 Linw iarr diyhh jiong' guaw dirr Egipt itcer ee ingqngx qapp linw soxx knuar .qnir ee su, longxx qra guaw ee laurve qongw. Qycc diyhh qnuaxqinw jiong' guaw ee laurve vnuax laii guaw jiax."

14 Dui' anxnix Josef pag dirr ix ee siyxdi Benjamin ee amrqunw tikaur; Benjamin iarr dirr ix ee amrqunw tikaur.

15 Ix qycc qapp jiongww hniadi jimcuir, py inx ee tikaur. Au .laii ix ee hniadi dyrr qapp ix qongxue.

16 Jitt xee hongsniax tuann qaur Falaoh ee qiongx-lai, qongw, "Josef ee hniadi laii lar." Falaoh qapp ix ee zinsinn longxx hnuahiw.

17 Falaoh qra Josef qongw, "Liw diyhh qra liw ee hniadi qongw, 'Linw diyhh anxnix qniaa. Jiong' mic hro jingsnix jair, kixsinx kir Kanaan-de,

18 Jiong' linw ee laurve, qapp linw ee qequanr, longxx vnuax laii guaw jiax. Guaw beh jiong' Egipt-de ee hyw mic hro linw; linw iarr tangx jiac jitt soxjai ee sandinx haixbi.

19 Dnaxx guaw bingrling liw, linw diyhh anxnix juer. Dui' Egipt-de duar ciax kir, jiong' linw ee ginxaw, qapp bow, qapp linw ee laurve, longxx vnuax .laii.

20 M tangx knuawdang linw qrex-lai ee mic, in'ui Egipt juann de ee hyw mic, longxx si linw ee."

21 Islael ee jiongww qniaw dyrr anxnix qniaa. Josef jiauww Falaoh ee bingrling hro inx ciax, qapp lo-diongx diyhh ing ee jiahmic;

22 Qycc hro inx jit langg jit tyr ihok, dogdok hro Benjamin ginn snax-vah, ihok go tyr.

23 Sangr inx laurve ee mic, qir dirr erdew: luqangw jap jiah, jair Egipt ee hyw mic; lubuw jap jiah, jair gnoxqog qapp vniaw qapp cair, hro inx laurve lo nirr tangx jiac tangx ing.

24 Josef dyrr crex ix ee hniadi dyr .kir; inx dyrr kixsinx. Josef qycc qra inx qongw, "Linw m tangx dirr lo nirr uanqex."

25 Inx dui' Egipt jnriu .kir, laii qaur Kanaan-de, inx laurve Jakob hiax, qra ix qongw,

26 "Josef iauxx dilehh, qycc quanxliw Egipt juann de." Jakob simx hrun .kir, in'ui m sinr inx ee ue.

27 Inx dyrr jiong' Josef duiww inx soxx qongw ee ue, longxx qra ix qongw. Knuar qnir Josef soxx crex .laii beh jair ix ee ciax, inx laurve Jakob ee simx uac .kiw .laii.

28 Islael qongw, "Hyw lar. Guaw ee qniaw Josef iauxx dilehh. Tanr guaw iauxx bue siw, guaw beh kir knuar ix."

46 Islael duar itcer soxu :ee, kixsinx laii qaur Beerseba; dyrr henwjer hro ix ee laurve Isaac ee Siongrder.

2 Mii .sii Siongrder dirr ngirsiong ee diongqanx qra Islael qongw, "Jakob ar, Jakob ar."

3 Ix qongw, "Guaw dirr jiax." Siongrder qongw, "Guaw si Siongrder, dyrr si liw ee laurve ee Siongrder. Liw lyc kir Egipt mrsaiw qniax. In'ui Guaw beh hro liw dirr hiax jniaa juer dua qog.

4 Guaw beh qapp liw snaqab lyc kir Egipt, guaw iarr dikkag cua liw kiw .laii. Josef beh ciuw hnua liw ee bagjiux, hro liw kreh."

5 Jakob dyrr duiww Beerseba kixsinx. Islael hiaxee qniaw, hro inx ee laurve Jakob, qapp inx ee qniaxzii, inx ee bow, longxx jre dirr Falaoh soxx crex .laii beh jair ix ee ciax.

6 Jakob qapp ix itcer ee qniaxsunx, duar inx ee jingsnix, ixqip dirr Kanaan-de soxx did .diyc ee huewjaii, longxx qaur Egipt.

7 Jakob duar ix ee qniaw, sunx, jaboxqniaw, jaboxsunx, qapp ix itcer ee horer longxx qaur Egipt.

8 Islaellangg qaur Egipt :ee, Jakob qapp ix ee qniaw, inx ee miaa qir dirr erdew. Jakob ee dua-qniaw Rleuben.

9 Rleuben ee qniaw si Hanoc, Pallu, Hezlon, qapp Karmi.

10 Simeon ee qniaw si Jemuel, Jamin, Ohad, Jaqin, qapp Zohar; iauxx u Kanaan-de ee hurzinlangg ee qniaw, Saul.

11 Levi ee qniaw si Gerson, Kohat, qapp Melali.

12 Judah ee qniaw si Er, Onan, Selah, Pelez, qapp Zelah; dogdok Er qapp Onan siw dirr Kanaan-de. Pelez ee qniaw si Hezlon qapp Hamul.

13 Issaqar ee qniaw si Tola, Puah, Jasub, qapp Simlon.

14 Zebulun ee qniaw si Seled, Elon, qapp Jahleel.

15 Jiaxee si Leah dirr Padan-alam qra Jakob soxx snix ee qniaw; qycc u ix ee jaboxqniaw Dinah. Qniaxsunx lamluw qiong snax-jap-snax langg.

16 Gad ee qniaw si Zefon, Haggi, Suni, Ezbon, Eli, Alod, qapp Qleli.

17 Aser ee qniaw si Imnah, Isvah, qapp Beliah; qycc inx ee siyxbe Selah. Beliah ee qniaw si Heber qapp Malqiel.

18 Jex si Laban hro ix ee jaboxqniaw Leah, ee luxvi Zilpah soxx snix ee qniaxsunx, dyrr si ix qra Jakob snix :ee; qiong jap-lak langg.

19 Jakob ee bow Rlaqel ee qniaw si Josef qapp Benjamin.

20 Josef dirr Egipt-de snix Manasseh qapp Eflaim, dyrr si On Sniaa ee jewsix, Potifela ee jaboxqniaw, Asenat, qra Josef snix :ee.

21 Benjamin ee qniaw si Bela, Beqer, Asbel, Gela, Naaman, Ehi, Rlos, Muppim, Huppim, qapp Ard.

22 Jiaxee si Rlaqel qra Jakob soxx snix ee qniaxsunx, qiong jap-sir langg.

23 Dan ee qniaw, Husim.

24 Naftali ee qniaw si Jahzeel, Guni, Jezer, qapp Sillem.

25 Jiaxee si Laban hro ix ee jaboxqniaw Rlaqel ee luxvi Bilhah soxx snix ee qniaxsunx, dyrr si ix qra Jakob soxx snix :ee, qiong cid langg.

26 Hiaxee qapp Jakob snaqab qaur Egipt :ee, druu ix ee simvu ixgua, qniwnarr dui' ix sinkux soxx cud :ee, qiong lak-jap-lak langg.

27 Qycc u Josef dirr Egipt soxx snix ee qniaw, nng xee; Jakob ee qrex laii qaur Egipt :ee qiong cid-jap langg.

28 Jakob crex Judah juewtauu kir qnir Josef, tangx cua inx kir Gosen. Inx dyrr qaur Gosen ee de.

29 Josef virvan ix ee ciax kir Gosen, gniajih ix ee laurve Islael. Qaur qnir diyc bin, dyrr pag dirr laurve ee amrqunw, dirr amrqunw nirr kaur quw quw.

30 Islael qra Josef qongw, "Guaw qnir diyc liw ee bin, jaix liw iauxx uac lehh, guaw dnaxx siw iarr qamsimx."

31 Josef qra ix ee hniadi qapp laurve ee qrex qongw, "Guaw beh jnriu kir tongdix Falaoh, qra ix qongw, 'Guaw ee hniadi qapp guaw ee laurve ee qrex, jingg dirr Kanaan-de :ee, dnaxx longxx laii qaur jiax.

32 Inx si bogjiaw, in'ui inx si cri jingsnix ee langg; inx jiong' ngiuu-qrunn, guu-qrunn, qapp itcer soxu :ee longxx duar .lai.'

33 Falaoh driaur linw ee sii, narr mng linw qongxx,

34 'Linw juer simxmih taulo?' Linw diyhh qongw, 'Liw ee lovok, dui' siauwlenn qaur dnaxx, guanw lenn guanw ee joxqongx longxx si decc cri jingsnix.' Anxnix linw tangx laii kia dirr Gosen ee de, in'ui qniwnarr cri jingsnix :ee, longxx si Egiptlangg soxx iamwjen :ee."

47 Josef zip kir qra Falaoh qongw, "Guaw ee laurve qapp guaw ee hniadi duar inx ee ngiuu-qrunn, guu-qrunn, qapp itcer soxu :ee, dui' Kanaan-de laii; dnaxx dirr Gosen ee de."

2 Josef dui' ix ee hniadi ee diongqanx qingw go langg, cua inx kir qnir Falaoh.

3 Falaoh mng Josef ee hniadi qongxx, "Linw juer simxmih taulo?"

4 Inx qra Falaoh qongw, "Liw ee lovok vunxsinx, qapp guanw ee joxqongx, longxx si qor ngiuu ee langg." Inx qycc qra Falaoh qongw, "Kanaan-de qihngx jin' siongdiong, lovok ee ngiuu-qrunn byy cauw tangx jiac; soxiw guanw laii, si beh qiawkax dirr jiax. Dnaxx qriuu liw iong'unw liw ee lovok diamr dirr Gosen-de."

5 Falaoh qra Josef qongw, "Liw ee laurve qapp liw ee hniadi laii qaur liw jiax.

6 Egipt-de longxx dirr liw ee binrjingg, hro liw ee laurve qapp liw ee hniadi druar dirr qog-lai derr id hyw ee de. Inx tangx druar dirr Gosen ee de. Liw narr jaix inx diongqanx kacc u vunxsu ee langg, dyrr pair inx quanwqor guaw ee jingsnix."

7 Josef cua ix ee laurve Jakob zip kir kia dirr Falaoh ee binrjingg. Jakob dyrr qra Falaoh jiokhog.

8 Falaoh mng Jakob qongxx, "Liw itsingx ee nizit si zuarr je ar?"

9 Jakob qra Falaoh qongw, "Guaw qiawkax dirr sewqanx ee nizit si jit-vah snax-jap huer. Guaw itsingx ee nizit iarr jiyw, iarr qankow, m dat diyc guaw ee ledjow qiawkax dirr sewqanx ee nizit."

10 Jakob qycc qra Falaoh jiokhog, dyrr dui' Falaoh ee binrjingg cud .kir.

11 Josef jiauww Falaoh ee bingrling, jiong' Egipt derr id hyw ee de, dyrr si Rlameses ee de, hro ix ee laurve qapp ix hniadi kiarkiw, juer sanxgiap.

12 Josef ing bixniuu hongrsingg ix ee laurve juann qrex, longxx jiauww inx ee langgiac laii qiongqib inx.

13 Qihngx jin' siongdiong, juann de longxx byy bixniuu. Egipt-de qapp Kanaan-de ee langg, in'ui qihngx ee enqor, simrjiww gy qaur hrun .kir.

14 Josef jurjip Egipt-de qapp Kanaan-de soxu ee ginn, dyrr si inx diac bixniuu ee ginn. Josef dyrr jiong' hiaxee ginn duar qaur Falaoh ee qiongx.

15 Egipt-de qapp Kanaan-de ee ginn longxx ing liauw. Egipt jingwlangg longxx laii qnir Josef qongw, "Guanw ee ginn longxx ing liauw lar, qriuu liw hro guanw bixniuu; guanw sniaw su diyhh siw dirr liw ee binrjingg?"

16 Josef qongw, "Narr si ginn ing liauw, linw ee jingsnix tangx kanx .laii. Guaw uirdiyhh linw ee jingsnix beh hro linw bixniuu."

17 Inx dyrr jiong' jingsnix qnuaw qaur Josef hiax. Josef dyrr ing bixniuu ngua inx ee bew, ngiuu-qrunn, guu-qrunn, qapp luu. Hitt nii uirdiyhh ngua inx itcer ee jingsnix, dyrr ing bixniuu ngiuxci inx.

18 Hitt nii ixqing’ quer; derr zi nii, inx qycc laii qnir Josef, qra ix qongw, "Guanw be xmuaa did guaw ee jruw, guanw ee ginn longxx ing liauw, jingsnix iarr longxx qruix dirr guaw ee jruw. Guanw dirr guaw ee jruw ee binrjingg, druu guanw ee sintew qapp guanw ee cande ixgua, byy cunx jit hxang.

19 Guanw sniaw su langg siw, de pahngx, dirr liw ee bagjiux jingg ar? Qriuu liw ing bixniuu brew guanw qapp guanw ee de, guanw qapp guanw ee de juer Falaoh ee loring; qycc ing jingxjiw hro guanw, hro guanw did diyc uac, benw siw, toxde iarr benw pahngx."

20 Dui' anxnix, Josef uirr Falaoh brew Egipt soxu ee de. Egiptlangg in'ui hro qihngx soxx vig, dagg langg longxx bre ix ee cande; hiaxee de dyrr longxx qruix dirr Falaoh.

21 Josef jiauww jiaxee snia'ib censuaw Egipt ee vecsnir dui' Egipt jitt vingg qaur dirr hitt vingg.

22 Dogdok jewsix ee de Falaoh byy brew ix; in'ui jewsix u dui' Falaoh did diyc dniardiyc ee nriuu. Inx jiac Falaoh soxx hro inx ee nriuu; soxiw inx byy bre inx ee de.

23 Josef qra vecsnir qongw, "Guaw qinaxzit uirr Falaoh brew linw qapp linw ee de. Knuar ar, dirr jiax u jingxjiw hro linw, linw tangx kir jyccann.

24 Qaur siusingg ee sii, linw diyhh jiong' go hxun jit lap hro Falaoh; sir hxun qruix linw, juer cann nirr ee jingxjiw, iarr juer linw qapp linw qelairlangg ee jiahmic."

25 Inx qongw, "Liw u qiur guanw ee sniwmia. Guan guanw dirr guaw ee jruw ee binrjingg did diyc undenw, guanw beh juer Falaoh ee lovok."

26 Anxnix Josef uirr Egipt ee de, setlip dniardiyc ee le, qaur dirr qinaxzit. Falaoh did diyc go hxun ee jit hxun; dogdok jewsix ee de byy qruix Falaoh.

27 Islaellangg kiarkiw dirr Egipt, Gosen ee de, inx dirr hiax qenwdir sanxgiap, qycc snitnuar qigqii je.

28 Jakob diamr dirr Egipt-de jap-cid nii. Jakob itsingx ee nizit si jit-vah sir-jap-cid huer.

29 Islael siw ee zit qin lar. Ix dyrr qiyr ix ee qniaw Josef laii, qra ix qongw, "Guaw narr dirr liw ee binrjingg did diyc undenw, cniaw liw he ciuw dirr guaw ee duartuiw xe, ing ju'air qapp singsit kuanxtai guaw; m tangx baijongr guaw dirr Egipt.

30 Guaw qapp guaw ee verqongx drangg kunr ee sii, liw diyhh jiong' guaw duar cud Egipt, baijongr dirr inx baijongr ee de." Josef qongw, "Guaw beh jiauww liw ee ue laii qniaa."

31 Jakob qongw, "Liw diyhh duiww guaw jiuwjua." Ix dyrr duiww ix jiuwjua. Dui' anxnix Islael uaw cngg-tauu qingwvair Siongrder.

48 Jiaxee dairjir liauxau, u langg qra Josef qongw, "Linw laurve puawvni lar." Ix dyrr cua ix nng xee qniaw Manasseh, Eflaim, snaqab kir.

2 U langg tongdix Jakob qongxx, "Liw knuar, liw ee qniaw Jakob laii beh cue liw." Islael dyrr benxqiongw kiw .laii, jre dirr bincngg.

3 Jakob qra Josef qongw, "Juanlingg ee Siongrder bad dirr Kanaan-de ee Luz duiww guaw cuthen, suwhog guaw, qra guaw qongw,

4 'Guaw beh hro liw snitnuar jerje, jniaa juer jerje vecsnir; iarr beh jiong' jitt xee de sniuxsur liw ee horer, juer ingxuanw ee giap.'

5 Guaw bue qaur Egipt liw jiax ee dairsingx, liw dirr Egipt-de soxx snix nng xee qniaw, Eflaim Manasseh, si guaw ee, cincniu Rleuben Simeon si guaw ee jidngiu.

6 Dirr inx ixau, liw soxx snix ee qniaw, dyrr si liw ee; inx tangx qruix dirr inx nng xee hniax ee miae, did diyc giap.

7 Lun qaur guaw, guaw dui' Padan-alam laii ee sii, Rlaqel siw dirr guaw ee bagjiux jingg, dirr Kanaan-de, dirr lo nirr ee diongqanx, lirkuix Eflat iauxx u jit jam. Guaw dyrr qra ix baijongr dirr Eflat ee lo." (Eflat dyrr si Betlehem)

8 Islael knuar qnir Josef nng xee qniaw, dyrr qongw, "Jex si jirjui?"

9 Josef qra inx laurve qongw, "Jex si guaw ee qniaw, Siongrder dirr jiax sniuxsur guaw :ee." Qongw, "Cniaw liw cua inx uaw qin guaw. Guaw beh qra inx jiokhog."

10 Islael nilau, bagjiux huex be knuar .qnir; Josef cua inx qinruaw ix ee binrjingg, ix dyrr qra inx jimcuir, py inx.

11 Islael qra Josef qongw, "Guaw byy pacsngr e qnir diyc liw ee bin. Dnaxx Siongrder qycc hro guaw knuar diyc liw ee qniaw."

12 Josef jiong' nng xee qniaw dui' ix nng xee katauux diongx cua .cud .laii, vunxsinx dyrr pag lyc de vair.

13 Au .laii Josef qycc kanx inx nng xee, jniar ciuw kanx Eflaim, ngr Islael ee dyr ciuw, dyr ciuw kanx Manasseh ngr Islael ee jniar ciuw, cua inx qinruaw ix.

14 Islael crunx jniar ciuw hnua Eflaim ee taukag, ix si derr zi :ee, qycc paccex ing dyr ciuw hnua Manasseh ee taukag, Manasseh vunw si dua-qniaw.

15 Ix dyrr qra Josef jiokhog qongxx, "Guan guaw ee jow Ablaham, qapp guaw ee ve Isaac qniaa dirr Ix ee binrjingg :ee, dyrr si itsingx vyxngiuw guaw qaur dirr qinaxzit ee Siongrder,

16 Qiuwsiok guaw tuatli itcer ee huanrlan, hitt xee Suwjiaw, suwhog hro jitt nng xee ginxaw. Guan inx qruix dirr guaw ee miae, qapp guaw jow Ablaham, guaw ee ve Isaac ee miae; qycc guan inx dirr sewqair diongx snitnuar jin' je."

17 Josef knuar ix ee laurve ing jniar ciuw hnua dirr Eflaim ee taukag, byy hnuahiw, dyrr tnaw ix ee laurve ee ciuw, beh dui' Eflaim ee taukag suaw qaur Manasseh ee taukag.

18 Josef qra ix ee laurve qongw, "Guaw ee ve ar, m si anxnix. Jitt xee si dua-qniaw, qriuu liw ing jniar ciuw hnua ix ee taukag."

19 Ix ee laurve m tranr, qongw, "Guaw jaix, guaw ee qniaw, guaw jaix. Ix iarr beh jniaa juer jit jok, iarr beh kuacdua. Danrsi ix ee siyxdi jionglaii viw ix kacc dua, ix ee siyxdi ee horer beh jniaa juer jerje jok."

20 Dng' hitt zit qra inx jiokhog qongxx, "Islaellangg beh qiw liw laii jiokhog langg qongxx, 'Guan Siongrder hro liw cincniu Eflaim, cincniu Manasseh jidngiu.'" Dui' anxnix lip Eflaim dirr Manasseh ee dairsingx.

21 Islael qycc qra Josef qongw, "Guaw beh siw lar, danrsi Siongrder beh qapp liw dilehh, beh cua linw dyr kir linw ledjow ee de.

22 Guaw jingg ing guaw ee qringx, guaw ee dyx, dui' Amolilangg ee ciuw cniuw .laii hitt der de, guaw dnaxx hro liw, viw liw ee hniadi did diyc kacc je."

49 Jakob qiyr ix hiaxee qniaw laii, qongw, "Linw longxx jurjip, guaw beh jiong' linw zid'au soxx e duw .diyc ee su qra linw qongw:

2 Jakob jiaxee qniaw, linw diyhh jurjip laii tniax, diyhh tniax linw laurve ee ue.

3 Rleuben ar, liw si guaw ee dua-qniaw, guaw ee quanser, guaw ee kuiwlat ee kixtauu, uigiamm ee digsig :ee, quanlingg ee digsig :ee.

4 Danrsi liw cincniu juiw decc qunw, dikkag be did diyc kia tauu xui; in'ui liw vreh jnriu linw laurve ee bincngg. Hitt sii liw pah lasamm ix, liw vreh jnriu guaw ee pox.

5 Simeon qapp Levi si hniadi. Inx ee dyqiamr si hiong'og ee kiwqu.

6 Guaw ee simsinn ar, liw m tangx qapp inx drangg qewboo; guaw ee sinhunn ar, liw m tangx qapp inx ee huerjiongr lenlok. In'ui inx tingwkiw siurkir, taii siw langg. Inx cutjai iwsur quah dng gutuiw ee duarqinx.

7 Inx ee siurkir sywvy, tangx jiuwjow. Inx ee hunrkir janzimw, iarr si tangx jiuwjow. Guaw beh vunkuix inx dirr Jakob ee qrex, siwsnuar inx dirr Islael-jok.

8 Judah ar, liw ee hniadi beh ylyw liw. Liw ee ciuw beh cic duiwdik ee amrqunw. Liw ee laurve ee qniaw beh pakvair dirr liw ee binrjingg.

9 Judah si ser jiah sraix. Guaw ee qniaw ar, liw duiww soxx ziaur .diyc ee mic, dyrr jnriu .kir. Ix kud lyc, ix tner kax, cincniu sraix; iarr cincniu buw ee sraix, jirjui qnaw ziaw ix?

10 Quanvingr byy lirkuix Judah, dirliw :ee byy lirkuix ix nng qix kax ee diongqanx, qaur Siloh laii; ledvangx longxx beh qruix ix.

11 Vak ix ee luu-aw dirr pudyciu, vak ix ee lu'axqniaw dirr hyw ee pudyciu; ing pudyciu sew ix ee ihok, ing pudyjiab sew ix ee ijniuu.

12 Ix ee bagjiux in'ui jiuw laii angg, ix ee cuiwkiw in'ui lingx laii vec.

13 Zebulun beh kiarkiw dirr haixkauw, beh juer prax junn ee haixkauw; ix ee qaiwsnuar beh qaur Sidon.

14 Issaqar si iongw ee luu, dyw dirr ngiuu-diauu ee diongqanx.

15 Ix knuar anjing juer hyw, knuar toxde juer suiw; ngar qingtauu dnax lehh, jniaa juer lykow ee lovok.

16 Dan beh pnuawduanr ix ee vecsnir, cincniu Islael jipair ee jit xee.

17 Dan beh juer lo nirr ee juaa, lo-diongx ee dogjuaa; qarsiongx bexdee, kiaa ee langg hniar duiww aurbin lyc .kir.

18 Jehovah ar, guaw u tingwhau Liw ee jinxqiur.

19 Gad beh hro qundui duivig, jongwsirr ix beh duivig inx ee ka'aurdnix.

20 Aser beh cud hyw ee bixniuu, qycc cud ongg soxx jiac ee hyw mic.

21 Naftali si tauxvangr ee logbuw, cud hyw tniax ee ue.

22 Josef si gauu qed quexjiw ee ciurqix; ix ee ciurqix crunx cud cniuu-gua.

23 Sria jnxir ee langg dua sionghai ix, ing jnxir sria ix, kunxvig ix;

24 Danrsi ix ee qringx iuguann ann, ix ee ciuw iarr did diyc u lat; jex si dui' Jakob ee Juanlingg :ee ee ciuw, (Dui' jex dyrr u cud bogjiaw, Islael ee jiyhvnuaa.)

25 Iarr dui' liw ee ve ee Siongrder, Ix beh vangjan liw; qycc dui' hitt xee Juanlingg :ee, Ix beh suwhog liw; beh ing tnidingw qangr lyc ee hokkir, cim'enx soxx kngr ee hokkir, ixqip jiac lingx singsanw ee hokkir, longxx beh hro liw.

26 Liw ee laurve soxx jriog ee hokkir, ngiaa quer guaw ee verqongx soxx jriog ee hokkir, didqaur ingxsewdai ee snuaniaw qigtauu ee vniqair. Jiaxee hokkir beh qangr lyc dirr Josef ee taukag, limqaur hitt xee qapp hniadi digvet :ee ee taukag-dingw.

27 Benjamin si gauu vectiac ee cailongg; jaxkiw-sii jiac ix soxx ziaur .diyc .ee, ehngx-sii vunx ix soxx cniuw .diyc .ee.

28 Jex itcer si Islael ee jap-zi jipair. Jex iarr si inx ee laurve duiww inx soxx qongw ee ue, qra inx soxx jiokhog :ee, longxx si jiauww dagg langg ee hokhun, qra inx jiokhog.

29 Ix qycc huanhur inx qongxx, "Guaw beh dyr kir guaw ee ledjow hiax, linw diyhh jiong' guaw baijongr dirr Hitlangg Eflon cann nirr ee het, qapp guaw ee verqongx siangg soxjai;

30 Dyrr si dirr Kanaan-de Mamle ee binrjingg, Macpela cann nirr ee het. Hitt xee het qapp cann si Ablaham dui' Hitlangg Eflon brew juer giap, laii juer bongrde :ee.

31 Dirr hiax baijongr Ablaham qapp ix ee bow Salah; qycc dirr hiax baijongr Isaac qapp ix ee bow Rlebekka; guaw iarr dirr hiax baijongr Leah.

32 Hitt kux cann qapp hitt lairbin ee het, si dui' Hitlangg brew :ee."

33 Jakob huanhur ix hiaxee qniaw bingvik, kax qiux jnriu cngg, dyrr kuir dng, dyr kir ix ee ledjow hiax.

50 Josef pag dirr ix ee laurve ee bin, tikaur, jimx ix.

2 Josef huanhur suhau ix ee isingx, ing hniuliau quanr ix ee laurve. Isingx dyrr ing hniuliau quanr Islael.

3 Quanr sinsix dniardiyc ee le diyhh sir-jap zit. Hitt xee sir-jap zit muaw, qycc Egiptlangg uirr ix tikaur cid-jap zit.

4 Uirdiyhh ix tikaur ee zit ixqing’ quer, Josef duiww Falaoh qrex-lai ee langg qongw,

5 "Guaw narr dirr linw ee binrjingg did diyc undenw, cniaw linw tongdix Falaoh, qra ix qongw, guaw ee laurve qiyr guaw jiuwjua qongxx, 'Guaw beh siw lar, liw diyhh jiong' guaw baijongr dirr Kanaan-de, dirr guaw uirr vunxsinx soxx qrut ee bong.' Dnaxx qriuu liw jrunw guaw jnriu kir baijongr guaw ee laurve, zen'au guaw beh dywdngw .laii."

6 Falaoh qongw, "Liw tangx jnriu kir baijongr liw ee laurve, jiauww ix soxx qiyr liw jxiur ee jxua."

7 Dui' anxnix Josef jnriu kir baijongr ix ee laurve. Qapp ix snaqab jnriu .kir .ee, u Falaoh qrex-lai ee diongxlyw, qapp Egipt jiongww diongxlyw.

8 Qycc u Josef juann qrex, qapp ix hiaxee hniadi, ixqip ix ee laurve ee qequanr; jixu inx ee ginxaw, qapp ngiuu-qrunn, guu-qrunn, longxx lauu dirr Gosen-de.

9 Qycc u ciax qapp kiaa bew :ee, hitt din ee langg vutjiw je.

10 Inx qaur Jordan Hyy-gua, Atad ee gorqakdniuu, dyrr dirr hiax dua tikaur, dua aisiongx. Josef uirdiyhh laurve vi'aix cid zit.

11 Kanaan-de kiarkiw ee vecsnir knuar qnir Atad gorqakdniuu ee tikaur, dyrr qongw, "Jex si Egiptlangg jit dniuu ee dua tikaur." In'ui anxnix, hitt xee de miaa qiyr Abel Mizlaim, si dirr Jordan Hyy-gua.

12 Jakob hiaxee qniaw dyrr jiauww laurve soxx huanhur :ee qra ix juer.

13 Hiaxee qniaw jiong' ix un qaur Kanaan-de, baijongr dirr Mamle ee taujingg, Macpelah cann nirr ee het, hitt xee het qapp cann si Ablaham dui' Hitlangg Eflon brew juer giap, laii juer bongrde :ee.

14 Josef baijongr inx laurve ixau, dyrr qapp jiongww hniadi, ixqip itcer qapp ix jnriu kir baijongr inx laurve ee langg, longxx dywdngw Egipt.

15 Josef hiaxee hniax knuar inx laurve ixqing’ siw, dyrr qongw, "Qiamxcaiw Josef beh uanwhun lanw, jiauww lanw jingg kuanxtai ix longxjongw ee pnaiw, itjin vywingr lanw."

16 Inx dyrr tog langg kir qnir Josef qongw, "Liw ee laurve bue siw ee dairsingx, huanhur qongxx,

17 'Linw diyhh duiww Josef anxnix qongw: Jingg liw jiaxee hniax pnaiw kuanxtai liw, qriuu liw siawbenw inx ee quewsid qapp juerog.' Dnaxx qriuu liw siawbenw liw ee laurve ee Siongrder ee lovok ee quewsid." Inx duiww Josef qongw jiaxee ue, Josef dyrr tikaur.

18 Ix jiaxee hniax qycc laii pag dirr ix binrjingg, qongw, "Guanw si liw ee lovok."

19 Josef qra inx qongw, "Mrbenw qniax. Guaw qamxx e ter Siongrder mah?

20 Jingg linw ee iwsur si pnaiw, jongwsirr Siongrder ee iwsur si hyw. Ix beh vyxjuann jerje langg ee sniwmia, cincniu qinaxzit.

21 Dnaxx linw mrbenw qniax. Guaw beh ngiuxci linw, qapp linw ee qniaxzii." Dui' anxnix Josef ing cin'air ee ue an'uir inx.

22 Josef qapp inx laurve ee qequanr longxx diamr Egipt. Josef jiacc vah-id huer.

23 Josef did diyc knuar qnir Eflaim derr snax dai ee sunx; Josef iarr py inx dirr katau'ux.

24 Josef duiww ix ee hniadi qongw, "Guaw beh siw lar. Danrsi Siongrder dikkag knuawqor linw, cua linw dui' jitt soxjai jnriu .kir, qaur Ix jiuwjua ingwunw hro Ablaham, Isaac, qapp Jakob ee de."

25 Josef qiyr Islael ee qniaxsunx jiuwjua qongxx, "Siongrder dikkag jiauwqor linw. Linw diyhh jiong' guaw ee quttauu un jnriu .kir." Josef siw, duxaxx vah-id huer. Langg ing hniuliau qra ix quanr, jiong' ix siux lyc qnuacaa, tingg dirr Egipt.

huedngw tauu iac