Bang Jap Xia
(夢十夜)
derr sir xia
(第四夜)
Lu Juxbingg huan'ik
Longwkongr dua ee cur-lai, sowde tokax jniar diongngx dinr jit jiah liang’iw-hxingg ee dngg liauu iw. Vnix:a vaii quiw jiah ser jiah qajenxiw.
Dngg liauu iw si oqimx qaxx e huanxciy qngsnuar. Viacqag jit jiah siwqag-hxingg ee jiahvngrdyh-aw. Lau a’qongx qo’ jit langg jre dirr hiax limx jiuw damrsamw, jiuxpuer si jin’ pangx ee kuanw.
Lau a’qongx jiuw limx u .jit .quaw, bin siyxkuaw decc angg ar. Ix bindexpuee jin’ qngqut, knuar byy jit sxix aw ziauhunn, qanda’ erdangr anww ix gunvec sig ee cuiwciux laii jaix si u huer ar. Guaw iauxx si jit xee ginxaxtyy, jin’ hnowhenn lau a’qongx u quiw huer.
Duxhyw jitt sii, jaboxqnuax tauqeniuu an’ lairdew qnrua jit xee ui’ juixqingw srinn dni ee juixtangw .cud .laii, ix dirr uisuqunn dingxbin qra ciuw crid dax naxx mng qongxx,
“Lau a’qongx quiw huer ar?”
Lau a’qongx qra jiuxpuer dua cuir tunx .lyc .kir, qexsenx qexquiw qongw, “Quiw huer guaw marr be qir .did ar.”
Tauqeniuu qra crid dax ee ciuw cah diamr ser ser diauu ee kowduar diongngx, kia dirr lau a’qongx vnix:a liac ix ee bin qimqimx siongr. Lau a’qongx qra jit xee cniu de’nguaw hiacc dua ee nguaxqongx pangg quann, dua cuir quut jit sniax qra jiuw limx .lyc .kir, suar .lyc, tniax ix huuw ee jit sniax, an’ vec sig cuiwciux diongngx vunn jit cuir dngg dngg ee hongx, jitt sii tauqeniuu qycc mng,
“ Lau a’qongx cur diamr dyhh?”
Lau a’qongx qra ix dng’ decc vunn dngg dngg ee hongx dongwdiam, rinr qongxx, “Diamr dirr dorjaii cimx cimx ee soxjai.”
Tauqeniuu ciuw iuguann cah dirr kowduar lairdew, qycc mng, “Acc liw beh duiww dyhh kir?”
Lau a’qongx qangrkuanw iong hex de’nguaw dua ee nguaxqongx qra siyjiuw quut jit sniax limx .lyc .kir, hiongr taujingg huxhut vunn jit kuir, qongw, “Duiww hiax kir.”
Jaboxqnuax qycc mng kiw, “Itdit kir or?”
Jitt sii, Lau a’qongx ee hitt kauw kuir taur quer juaxtangx hiongr cur-gua itdit kir, cngx quer liuxciu-kax, qaur qaxx kevox laii.
Lau a’qongx qniaa cud mngkauw, guaw qinw duer dirr ix aurviah. Ix iyvo qad jit xee holoo, qingqactauu diaur jit kax siwqag-hxingg ee sniux-aw dinx dir queclangkax, cing :ee si cenxngg sig ee kowjat’aw, cam’ cenxngg sig byy ciuxngw ee qac’aw, kax cing cauxee, buec-aw marr sii ngg sig :ee, m jaix sniaxmih puee jyr .ee.
Lau a’qongx qniaa qaur liuxciu-kax. Hiax u snax~sir xee ginxaw decc sngw. Lau a’qongx an’ iyx nirr tec jit diauu cenxngg sig ee ciuxqinx-aw .cud .laii, qycc laii qra hex qngw jyr jit diauu iue iur dngg dngg ee syh-aw, kngr diamr tokadaux, dirr siwkouii-aw rue jit xee ngikoaw. Siongrr buew dirr qingqactauu hitt kax sniux-aw tec jit qix dangg jyr ee prinw-aw .cud .laii, cniu bre qamaxtngg ee langg decc vunn hitt kuanw.
“Jitt jun hitt diauu ciuxqinx-aw e venr jyr juaa, knuar jimjiog oox, knuar jimjiog.” Lau a’qongx qangrkuanw ee ue itdit qongw, quiw xee ginxaw tiw dua bagjiux diwsimx knuar, guaw marr si.
“Knuar or knuar, u venr bor?”
Lau a’qongx naxx qongw naxx vunn prinw-aw, qycc dirr ix rue ee ngikoaw linlongx sec byy tingg.
Guaw qanda’ itdit knuar hitt diauu ciuxqinx-aw, suibongxx hex itdit longxx byy dinxdang.
Lau a’qongx viix viix itdit vunn prinw-aw, kax cing cauxee, kabuew nir quann, jin’ sewzi, jin’ siyxsimx, sec ix rue ee hitt xee ngikoaw. Knuar .kiw .laii hro langg liyc aw simx qniax, marr liyc aw kuehaii qapp qokvih.
Byy zuarr quw, lau s’qong kavo hionghiongg tingg .lyc .laii, prinw-aw byy vunn, qra hitt kax dindongx hnair ee sniux-aw pah kuix jit kangx, qycc qra tokax hitt diauu ciuxqinx-aw an’ jit tauu nrix .kiw .laii, jnrix zip kir sniux-aw lairdew.
“Anxnex dirr sniux-aw-lai dyrr e venr jyr juaa lar, sui’ beh hro liw knuar, sui’ beh hro liw knuar, m tangx dngxlunn.”
Lau a’qongx naxx qongw naxx qniaa, itdit en’ liuxciu-kax ee jit diauu ser diauu lo-aw qniaa, guaw marr duer dirr ix aurviah, jiokk sniu beh knuar ix venr ee juaa, vnuar qniaa vnuar ziog.
Lau a’qongx qongw, “Jitt jun dyrr beh venr”, “venr jyr juaa .cud .laii” lorbuew quikir iong cniur .ee,
“Jitt jun beh venr ar, juaa beh venr .cud .laii ar,
dniardiyc e venr ar, prinw-aw vunn .kiw .laii ar”
Ix naxx cniur naxx qniaa, ixqingx qniaa laii qaur kevox ee jinrvong, hiax byy qiyy, marr byy junn, guaw sniu ix itding beh tingg .lyc .laii, hro gunw knuar sniux-aw lairdew ee juaa, nacc jaix ix qewsiok qniaa, qniaa zip kir quut quut qiyr ee kejuiw lairdiongx.
Duxx kixtauu juiw cimx si qaur katauux nia, ban ban aw qaur iyvo, qycc laii hingkamw, amrqunw, langg jitt sii qiongrr beh knuar be diyc.
Suibongxx anxnex, lau a’qongx marr si naxx cniur,
“Juiw venr kacc cimx lor, iarmii venr kacc amr lor,
lo venr dit longxlongw lor.”
Ix langg hiongr taujingg itdit kir, byy zuarr quw, ix cuiwciux, binrboo, taukag, tauqinx jit xee jit xee longxx knuar be diyc ar.
Guaw sniu lau a’qongx e dirr kex hitt vingg vreh jnriu hnua, hitt sii e knuar diyc ix soxx venr ee juaa, dyrr qodnuax jit langg kia dirr hiax gong gong aw danw, hnirkangx-vnix si hongx cuex juixlodig suaax suaax hauw ee sniax.
Jiongqibuew, lau a’qongx iaxx si byy vreh jnriu hnua.
guanjokjiaw: Natsume Soseki 夏目漱石