Bang Jap Xia

(夢十夜)

derr id xia

(第一夜)

Lu Juxbingg huan'ik

Jyr jit xee jitt kuanw ee bang.

Quirje dirr jabow ee jimxtauu vnix:a. Siangx ciuw siy’ tac kngr dirr vakdow jingg. Jabow tauu ngr tnix, cuir nirr ser ser sniax qongw, “Beh siw ar.”

Ix dngg dngg ee taumngg puac dirr jimxtauu dingw. Kingkag snuawdiauu jin’ iugnaw, binrboo-aw snex jyr quex-aw-hxingg, jitt jun, ix langg taukag dyw dirr jimxtauu diongngx. Vec sicsiag ee cuiwpuew u ho’ngg knuar .kiw .laii siyhyx ee huecsig. Cuiwdunn si cringx angg :ee, knuar be cud qongxx e siw. Mrqycc jabow iuguann ser ser sniax jin’ jamrgamm qongw, “Dniardiyc e siw.”

Guaw dyrr tauu lee .lyc .laii, naxx knuar ix naxx mng, “Qamxx jingwqingx e siw?”

Jabow jitt sii qra dua dua luiw, hro bagjiacmngg kox .diyc, juiw uanguangx lrauu ee bagjiux vreh qimx, cuir rinr qongxx, “E siw lar,” ox sig angaxzinn lairdew puu cud jin’ hunbingg ee guaw ee langngiaw.

Guaw itdit jinn ix tauwted qycc cringx nguainguaix ee bagjiux, qycjaiww jit vaiw sniu qongxx ix qamxx e siw. Guaw dyrr uaw laii qaur ix ee jimxtauu vnix, jin’ ken’ir duiww ix qongw, “Liw be siw lar, anx lar.”

Jabow qra air kunr ee bagjiux qycc tenw dua, qangrkuanw ser sniax qongw, “E siw, jex si byy vanrhuad :ee.”

Guaw jin’ auxjib qycc mng :ix, “Anxnex, liw u knuar diyc guaw ee bin bor?”

Ix bibii aw ciyr, qongw, “Mng guaw u knuar diyc bor? Hex qamxx m si dyrr ciy dirr hiax lehh?”

Guaw diam diam dnax tauu suaw lirkuix .ix. Siangx ciuw qycc siy’ tac lehh, naxx sniu, ix nacc itding e siw?

U .jit .dah .quw .aw, jabow qongw, “Guaw narr siw, cniaw qra guaw baijongr. Liw dyrr iong dua hur jinjux leaxkag, ow jit xee bongrkud, qycc laii, iong tnidingw lag .lyc .laii ee tnicnix ee cuiwpnir jyr bongrvaii, suar .lyc, dyrr dirr bong vnix danw, guaw e qycc dywdngw .laii qapp liw sionghongg.”

Guaw dyrr mng ix dirsii qycc dngw .laii?

Ix qongw, “Zidtauu cud .laii, zidtauu dimm .lyc, itdit cud .laii, itdit dimm .lyc, dirr angg angg zidtauu ui’ dangx hiongr saix, qycjaiww ui’ dangx hiongr saix, byy tingg unrjuanw ee zidjiw nirr, cniaw liw dyrr anxnex danxtai, itdit qaur qaxx guaw dngw .laii.”

Guaw diam diam dimr tauu rinw :ix. Jitt sii jabow qra guanvunw qe qe ee sniasaur giaa quann, iong jin’ kniqoo ee kuiwkauw qongw, “Cniaw danw guaw jit-vah nii.”

“Jit-vah nii. Dirr guaw ee bong vnix jre lecc danxtai, guaw dniardiyc e dngw laii qapp liw sna’ qnir.”

Guaw rinr qongxx itding e danw :ix. Jitt sii ix ee ox bagjiuzinn vunxlaii u jin’ cingcyw ee langngiaw, jiksii laii venr siwsnuar .kir, naxx cniu guanlaii vnee vnee ee juixbin, kir hro hongx cuex .diyc, lairdew ee ngiaw longxx luan .kir qangrkuanw. Dyrr dirr hex bagjiuzinn lairdew, guaw ee langngiaw naxx cniu beh lrauu .cud .laii sii, jabow bagjiux ban ban aw kreh .kiw .laii, jului an’ dngg dngg ee bagjiacmngg diongngx dinx lyc cuiwpuew vnix, ix siw ar.

Guaw qniaa laii qaur aurviah hngg-aw, iong jinjux haixleaxkag ow jit xee bongrkud, jinjux leaxkag si jit kuanw dua hxingg qngqut, limxqnii jin’ lrai ee leaxkag. Qenwnarr qra too hor .cud .laii ee sii, liyc aw damsib too ee kiwbi, longxx e siwsnuar dirr kongkir diongx, leaxkag ee qngqut lai renn, qra guehqngx huanxciy qaxx siamw .jit .xee, siamw .jit .xee.

Bongrkud byy zuarr quw dyrr ow hyw ar, guaw qra jabow kngr .zip .kir, qycc kinx kinx aw qra too kamr dirr ix singkux dingw, muixx kamr jit cog too, leaxkag lai renn dyrr huanxciy guehqngx jit vxenr.

Suar .lyc, guaw qra lag dirr tokax ee tnicnix ee cuiwpnir kiyh .kiw .laii, cai dirr bongrqux dingw.

Tnicnix ee cuiwpnir si ngiqyhingg :ee, duiwdit u jnia’ ciyh dngg. Ingwqaix si dirr tnix dingw qniaa quer jit dnxua dngg lyxlyw ee lortingg, jiamx qag longxx buaa qaxx qut liuwsiur .kir.

Guaw qra hex tnicnix ee cruiwpnir moh kiw kir bongrqux dingw sii, ciuw qapp hingkamw u liyc aw siyhyx.

Guaw jre dirr cnetii dingw, siangx ciuw siy’ tac kngr diamr vakdow jingg, bagjiux naxx knuar ngii ngii ee bongrvaii, simlai naxx sniu qongxx jurr jitt jun kiw, beh danw ix jit-vah nii.

Suar .lyc dairjir dyrr naxx jabow qongw :ee, zidtauu an’ dangx vingg cud .laii, dua liap qycc angg pacpah ee zidtauu. Qycc laii qangrkuanw jiauww ix qongw :ee, dimm lyc saix vingg, angg qongwqongr ee huexqiuu, jit bak nih aw dyrr lag .lyc .kir, tauu jit qangx, guaw qra sngr.

Byy zuarr quw, angg qongwqongr ee zidtauu, qycc sun ix dirr tnix dingw quanwsir ui’ dangx ngr saix ee lortingg vreh .kiw .laii, diam diam aw qniaa qaur duiwdit hitt vingg, qycc dimm .lyc .kir, derr zi qangx, guaw qra sngr.

Guaw dyrr jiauww anxnex sngr, jit xee, nng xee, snax xee, m jaix qnir quer angg angg ee zidtauu cud .laii u quixlyrr vaiw. Itdit sngr, itdit sngr, iarr si sngr be cringx zidtauu an’ taukag dingw qingquer u quiw huee. Vutzirqyr, hex jit-vah nii marr si iauxx byy laii. Itcer longxx byy qycngiu, langg decc crinr simx ee sii, knuar diyc bongrvaii kir hro cnetii dar qaxx muaw muaw si. Sniu qongxx si m si kir hro jabow penr .kir ar?

Dyrr dirr jitt sii, ui’ jiyhtauu erkax, jit qix hueqnuaiw ciaa ciaa hiongr guaw crunx .quer .laii, itdit qaur qaxx hingkamw jingg jiacc tingg .lyc .laii. Kinx kinx aw decc iyy ee hueqnuaiw buew, kix kix snex jit luiw huemm, hex huevan iur iur qycc dngg dngg, jin’ u guankir, ban ban aw decc tenw kuix. Si vikhap.

Vec lecseh ee vikhap dirr guaw ee pnirkangx taujingg, bunr cud e cuanr qinx jngr qud ee pangbi. Byy dniudii ji’ diongx, iauuanw ee tnix dingw dih lyc jit dih lorjuiw. Liyc aw jicjair be diauu lorjuiw dang, vikhap hueqix iyy iyy cuah cuah. Guaw qra bin dux uaw .kir, jimx hitt xee kir hro lingw lingw lorjuiw dih .diyc ee vec sig huevan.

Dyrr dirr guaw qra bin beh tiux li vikhap ee sii, byiwdiongx, knuar diyc hng hng ee tnix dingw, u jit liap jaixkiw siamxsih ee tnicnix.

“Ixqingx jit-vah nii or,” jitt sii guaw jiacc diwqag .diyc.

guanjokjiaw: Natsume Soseki 夏目漱石