Tessalonika 1
SXINGR PAUL SIAW HRO TESSALONIKALANGG EE TAUU JIT DNIUX PUEX
1 Paul qapp Silvanus, ixqip Timoti, siaw puex qiar hro Tessalonikalangg ee qauwhue, dyrr si diamr dirr Ve Siongrder qapp Jruw Jesus Krist :ee: Guan linw did diyc undenw ving'anx.
2 Guanw uirdiyhh linw jiongww langg siongsiongg qamxsia Siongrder, dirr qidyw ee diongqanx siauwliam linw;
3 Dirr Siongrder, lanw ee Ve ee binrjingg, dngdngg siauwliam linw uirr sinr ee qniajuer, uirr zin'air laii diyhbuaa, uirr ngwbang lanw ee Jruw Jesus Krist laii tunlunw.
4 Siongrder soxx tniar ee hniadi ar, guanw jaix linw si siurr qingxsuanw :ee.
5 In'ui guanw ee hok'imx qaur dirr linw, m si jairdirr qongxue nardnia, si jairdirr quanlingg, Singwsinn, qapp qenqor ee sinr; cincniu linw jaix guanw dirr linw diongqanx, uirdiyhh linw laii jniajuer simxmih dringw hy ee langg.
6 Qycc linw ixqing’ dirr jerje koxlan ing Singwsinn soxx sniuxsur ee hnuahiw, laii singsiu dyrliw, jex dyrr u yc guanw, iarr u yc Jruw,
7 Drir qaur linw juer Macedonia qapp Aqaia longxjongw sinr ee langg ee bo'ngiu.
8 In'ui Jruw ee dyrliw dui' linw tuann .cud, m na dirr Macedonia qapp Aqaia nardnia, linw ngr Siongrder ee sinr ixqing’ dagg soxjai vywiongg, drir qaur guanw mrbenw qongw simxmih.
9 In'ui inx qaqi vywbingg qongxx guanw qaur linw diongqanx si simxmih kuanw, qycc linw jnaixngiu u lirkuix gnoxsiong, qruix dirr Siongrder, laii hogsai uac qycc jinx ee Siongrder;
10 Tingwhau Ix ee Qniaw, dyrr si Ix dui' sixlangg diongx hro Ix qycc uac :ee hitt xee jinxqiur lanw cud jionglaii ee siurkir ee Jesus, dui' tnix lyc .laii.
2 Hniadi, linw jaix guanw jingg:a qaur linw diongqanx m si kangx kangx;
2 Jingg:a guanw dirr Filippi siurkow duw diyc lingziok, jex si linw soxx jaix :ee; guanw dirr jerje jingjenr ee diongqanx, uaxkyr lanw ee Siongrder, did diyc hyxdnaw laii duiww linw qongw Siongrder ee hok'imx.
3 In'ui guanw ee kuanwbenw m si cud dirr cabiu, m si cud dirr byy cingkir, iarr m si ing qanjar,
4 Guanw si hro Siongrder giam .quer, jiacc ing hok'imx tokdiong guanw, guanw dyrr jiauww anxnix laii qongw, m si cincniu beh hro langg hnuahiw :ee, si hro giam guanw ee simx ee Siongrder hnuahiw.
5 In'ui guanw longxx m bad ing tiamxmi ee ue, jiauww linw soxx jaix :ee, iarr byy ing jngtna laii ziakamr tamsimx, Siongrder juer qanjingr.
6 Guanw juer Krist ee suwdoo, suizenn tangx qiyr langg qingwdiong guanw, kiokk m bad duiww langg qriuu ingqngx; byy duiww linw, iarr byy duiww vadd langg.
7 Guanw unziuu dirr linw diongqanx, cincniu linbuw decc riyx qaqi ee qniaxzii.
8 Cincniu anxnxi, guanw in'ui luanbo linw, dyrr m na Siongrder ee hok'imx, lenrr qaqi ee sniwmia iarr hnuahiw hro linw; in'ui linw si guanw soxx tniawtangr :ee.
9 Hniadi ar, linw qir did guanw ee diyhbuaa qapp qankow, mizit juer qangx, laii tuann Siongrder ee hok'imx hro linw, rair benw did tualui linw jit langg.
10 Linw juer qanjingr, Siongrder iarr juer qanjingr, guanw duiww linw sinr ee langg, juewlangg si jnaixngiu singwqed, qonggi, byy tangx hiamm;
11 Linw jaix guanw jnaixngiu kuanxtai linw dagg langg, u kuanwbenw linw, an'uir linw, iarr u qanjingr linw, cincniu laurve kuanxtai qaqi ee qniaxzii;
12 Jex si beh hro linw qniaa dairjir hap dirr Siongrder, dyrr si driaur linw zip Ix ee qog qapp ingqngx :ee.
13 Soxiw guanw iarr qamxsia Siongrder byy suah, in'ui linw dui' guanw tniax .diyc Siongrder ee dyrliw ee sii, dyrr qra jiaplap, byy qra liac juer si langg ee dyrliw, si liac juer Siongrder ee dyrliw. Jex sidjai jinjniar si, iarr u cud lat qniaa dirr linw sinr ee langg ee diongqanx.
14 Hniadi ar, linw u yc Judea diongx diamr dirr Krist Jesus :ee jiaxee Siongrder ee qauwhue, in'ui linw sriu diyc linw qangg jok ee hamrhai, cincniu inx sriu diyc Judealangg hamrhai jidngiu.
15 Judealangg hai siw Jruw Jesus qapp jiaxee sendix, iarr qikdiok guanw. Inx byy hro Siongrder hnuahiw, qycc qapp jiongww langg juer duiwdik;
16 Guanw qawsi guarvanglangg, beh hro inx did diyc qiur, inx joxdongr guanw, drir qaur inx ee juerog sisii decc quanwmuaw; siurkir qaur dirr inx ixqing’ qigtauu.
17 Hniadi ar, guanw jiamrsii qapp linw lirvet, sinkux lirvet, simx byy lirvet; guanw unkunn naxx ced, jin' air qnir diyc linw ee bin.
18 Guanw air jiurqin linw, guaw Paul jit vaiw qycc jit vaiw air kir, danrsi Satan joxdongr guanw.
19 Guanw ee ngwbang qapp hnuahiw, ixqip soxx kuakauw ee benxliuu si simxmih? Qamxx m si linw dng' lanw ee Jruw Jesus qycc laii ee sii, dirr Ix ee binrjingg mah?
20 In'ui linw si guanw ee ingqngx qapp hnuahiw.
3 Guanw ixqing’ lunw be diauu, dyrr dniardiyc beh dnuasinx druar dirr Athens,
2 Crex guanw ee hniadi Timoti, dirr Krist ee hok'imx juer Siongrder ee ce'ing :ee, laii qenqor linw, qycc uirdiyhh linw ee sinr laii an'uir linw,
3 Benw did u langg hro hiaxee huanrlan soxx iydang; in'ui linw qaqi jaix lanw duw diyc jex si vunw dyrr dniardiyc :ee.
4 In'ui guanw qapp linw dilehh ee sii bad dairsingx qra linw qongw, lanw e duw diyc huanrlan, au .laii qyxzenn anxnix, jex si linw soxx jaix :ee.
5 Soxiw guaw qiwzenn be qycc lunw .did, dyrr crex langg rair jaix linw ee sinr jnaixngiu, qniax hitt xee cir :ee u soxx cir linw, dyrr guanw ee diyhbuaa qruix dirr kangx kangx.
6 Danrsi dnaxx Timoti dui' linw hiax laii qaur guanw jiax, jiong' linw ee sinr qapp tniar ee hyw siausid vyr guanw jaix, qycc qongw kiw linw siongsiongg siauwliam guanw, himbo beh qnir diyc guanw, cincniu guanw air qnir diyc linw jidngiu.
7 Soxiw, hniadi ar, guanw dirr itcer kunxvig hunarlan ee diongqanx, dui' linw ee sinr, uirdiyhh linw siurr an'uir.
8 In'ui linw narr kia jai dirr Jruw, guanw dyrr uac.
9 Guanw dirr lanw ee Siongrder ee binrjingg uirdiyhh linw jin' hnuahiw, guanw uirdiyhh jitt xee itcer ee hnuahiw, e ing simxmih ee qamxsia uirdiyhh linw vywdab Siongrder ar?
10 Guanw mizit cetced qidyw, rair qnir diyc linw ee bin, laii voxmuaw linw ee sinr soxx byy qraur.
11 Guan lanw ee Ve Siongrder, qapp lanw ee Jruw Jesus inxcua guanw vnitnaw ee lo jiurqin linw.
12 Iarr guan Jruw hro linw sna' tniar, suar tniar jiongww langg ithuad ciongmuaw, cincniu guanw tniar linw jidngiu,
13 Drir qaur qenqor linw ee simx jniaa sxingr byy tangx hiamm, dirr lanw ee Ve Siongrder ee binrjingg, dirr lanw ee Jruw Jesus qapp Ix longxjongw ee singwdoo qycc laii ee sii.
4 Hniadi ar, qetbuew laii qongw, guanw dirr Jruw Jesus qriuu linw, krngr linw, jiauww linw jingg soxx bad dui' guanw sriu, diyhh jnaixngiu qniaa laii hro Siongrder hnuahiw :ee, linw ixqing’ decc qniaa, dnaxx diyhh qyckacc cud lat qniaa.
2 Linw jaix guanw dui' Jruw Jesus u simxmih bingrling hro linw.
3 Siongrder ee jixir, dyrr si linw ee jniaa sxingr, si rair linw lirkuix imluan,
4 Rair linw dagg langg e hiauxdid ing singwqed qapp junquir siuw qaqi ee sinkux,
5 Byy ing su'iok ee jxingg, cincniu m bad Siongrder ee guarvanglangg;
6 Dirr jitt jann su iarr byy qewqair, cimhuan ix ee hniadi; in'ui qniwnarr jitt hy su, Jruw si e sin'uanx :ee, cincniu guanw bad qra linw qongw, qycc laii qanjingr :ee.
7 In'ui Siongrder driaur lanw, m si drir qaur uwuer, si drir qaur jniaa sxingr.
8 Soxiw qirjuat :ee m si qirjuat langg, si qirjuat ing Ix ee Singwsinn hro linw ee Siongrder.
9 Lun tniar hniadi, jex mrbenw siaw puex hro linw, in'ui linw qaqi u sriu diyc Siongrder ee qawsi, hro linw dairqex sna' tniar.
10 Linw qyxzenn u duiww tong' Macedonia ee jiongww hniadi anxnix qniaa, jongwsirr, hniadi ar, guanw krngr linw diyhh ithuad anxnix;
11 Iarr diyhh duiwdiong tiamjing, laii juer qaqi ee su, cincniu ing ciuw juer qangx, jiauww guanw soxx bad huanhur linw :ee,
12 Hro linw ngr guarbinrlangg duanjniar laii qniaa, qaqi iarr byy soxx kiamwkueh.
13 Hniadia ar, lun qaur decc kunr ee langg, guanw m air linw m jaix, benw did linw iubun cincniu hiaxee byy ngwbang ee langg jidngiu.
14 In'ui lanw narr sinr Jesus siw u qycc uac, dyrr sriok Jesus laii kunr ee langg, Siongrder iarr beh anxnix cua inx qapp Jesus snaqab laii.
15 In'ui guanw hrong Jruw ee bingrling, ing jitt xee qra linw qongw, dyrr si Jruw qycc laii ee sii, lanw jiaxee iauxx uac lehh ee langg, be e dairsingx hiaxee decc kunr ee langg.
16 In'ui Jruw beh vunxsinx dui' tnix lyc .laii, u dua auqiyr, u jiww dua tnisair ee sniax, iarr u Siongrder ee sauwqag, dyrr hiaxee sriok Krist ixqing’ siw ee langg beh dairsingx kiw .laii.
17 Au .laii lanw iauxx uac lehh ee langg beh qapp inx sriu jiaplap dirr hunn-lai, zip kongdiongx gniajih Jruw; anxnix lanw dyrr ingxuanw qapp Jruw snaqab dilehh.
18 Soxiw diyhh ing hiaxee ue sna' an'uir.
5 Hniadi ar, lun qaur siqii, jex mrbenw siaw puex hro linw.
2 In'ui linw qaqi siongser jaix, Jruw ee zit qaur, dyrr cincniu cat tauwmii laii.
3 Langg dngdecc qongw ving'anx unxdangr ee sii, jaiec hutzenqanx qaur dirr inx, cincniu snix qniaw ee qankow qaur dirr u sin'in ee hurzinlangg jidngiu, inx hiaxee langg be e jauw li.
4 Danrsi hniadi ar, linw m si dirr amr ee diongqanx, drir qaur hitt zit cincniu cat laii zib diyc linw.
5 In'ui linw longxx si qngbingg ee langg, zit .sii ee langg. Lanw m si sriok dirr mii .sii .ee, iarr m si sriok dirr oamr :ee.
6 Soxiw lanw m tangx cincniu qi'uu ee langg decc kunr, diyhh qingxsingw jetjer.
7 In'ui kunr ee langg si mii .sii kunr; jiuxjuir ee langg si mii .sii juir.
8 Danrsi lanw sriok zit .sii .ee diyhh jetjer, cing sinr qapp zin'air juer horsimqniar, ing did qiur ee ngwbang juer taukuex.
9 In'ui Siongrder dniardiyc lanw m si beh hro lanw laii duw diyc siurkir, si beh hro lanw dui' lanw ee Jruw Jesus Krist laii did diyc qiur.
10 Ix ter lanw siw, hro lanw bylun cnew iacc kunr, longxx qapp Ix dangjee uac.
11 Soxiw diyhh sna' an'uir, dairqex sna' qenwlip dikhing, jiauww linw soxx decc juer :ee.
12 Hniadi ar, guanw qriuu linw, huanrnarr dirr linw diongqanx diyhbuaa, diamr dirr Jruw dirliw linw, qingxqair linw :ee, linw diyhh bad ix,
13 Uirdiyhh inx soxx juer ee qangx, linw diyhh dirr zin'air dua dua junqingr inx. Linw dairqex diyhh hybok.
14 Hniadi ar, guanw krngr linw diyhh qingxqair hiaxee byy siuw quiqiw :ee, an'uir hiaxee luexjir :ee, hucii hiaxee luanxziok :ee, ing kuan'iongg kuanxtai jiongww langg.
15 Diyhh qinxsin, byc did ing pnaiw vyr pnaiw; dairqex sna' kuanxtai, iacc si kuanxtai jiongww langg, longxx diyhh siongsiongg duizib hitt xee hyw.
16 Diyhh siongsiongg hnuahiw;
17 Diyhh qidyw byy suah;
18 Huanrsu qamxsia, in'ui jitt xee si Siongrder diamr dirr Krist Jesus ngr linw ee jixir.
19 M tangx pachuax Singwsinn;
20 M tangx knuawkinx sendix ee ue,
21 Huanrsu diyhh catgiam; hyw :ee diyhh jipsiuw;
22 Diyhh lirkuix dagg ngiu ee pnaiw.
23 Guan ving'anx ee Siongrder Qaqi hro linw itjin jniaa sxingr; qycc guan linw ee sinn qapp hxunn ixqip sinkux dirr lanw ee Jruw Jesus Krist qycc laii ee sii, longxx did diyc vyxjuann, byy tangx hiamm.
24 Driaur linw :ee si sinwsit, Ix iarr dikkag beh jniaa jitt xee su.
25 Hniadi ar, diyhh ter guanw qidyw.
26 Diyhh ing sxingr ee sna' jimx laii cingxanx longxjongw ee hniadi.
27 Guaw qiw Jruw laii huanhur linw, ing jitt dniux puex tak hro jiongww hniadi tniax.
28 Guan lanw ee Jruw Jesus Krist ee undenw qapp linw dilehh.