inghionglo_4

inghiongg lo -4

Bunchhai huan'ik

HAM' LUXSINN SIONGHUE

The Meeting with the Goddess

sinue dosiong gixgenn-diongx, luxzinn dairviauw e virr zinrbad ee juantew.

Inghiongg si laii qriuu beh jaibad (jaidai) ee langg, duer diyc zinsingx ban ~ kexbongg ee quewdingg jiamrr jinwdenw, luxsinn hingsiong marr uirr inghiongg qinglik sna' lensuar ee venwhingg:

luxsinn juadduir be venr qaxx viw inghiongg kacc uixdai, danrsi luxsinn soxx singlok :ee, jongxsi e ciauuat inghiongg soxx lixqaiw ee huanruii.

---------J. Campbell <Cingbin Inghiongg>

CAMPBELL jaxqii hagsingx JEAN ERDMAN, marr si M.GRAHAM buxtuann ee singguann, liriong camqax S.LAWRENCE Hagngi ee gersut taudin huxdy kywdingg sii, laii siong liauw CAMPBELL bixhak ee kxyr. CAMPBELL zid'au huesiongw qongw, “byy zuarr quw, dyrr huathen hro ix kib .kir .ar!”

Jaix JEAN beh ham' cur-lai ee langg kuan'iuu sewqair luxhingg jit dxangx sii, CAMPBELL qra SPENGLER siaw ee <THE DECLINE OF THE WEST> hro JEAN, beh jiyh jitt vunw ceh kakvyw dngw laii au e laii sna' cue, simjiww qandna' laii mng jitt vunw ceh lueriongg soxx amwsi ee iwgi marr hyw. Jitt jiaux u hau! 1938 nii JEAN ui' qokgua dngw laii byy zuarr quw, inx nng langg qethunx ar. Suar lyc laii go-jap dxangx, angbow dirr qokk langg byy qang lingxhik kiokk horsiong u qauknaa ee surgiap dauwdin pacvniar : dagg zit honghunx amr sii, CAMPBELL dy' e liam hitt zit siaw ee mic hro JEAN tniax, JEAN marr e iauqiuu sinx congwjy ee henrdairbuw teqiongx iwqenr. Angbow sna' habjog, 1972 nii dirr NEW YORK singlip THE OPEN EYE Qiogdniuu, si inx siongrr dua ee singjiu.

1941 nii, CAMPBELL tauwquer luxhagsingx SUE DAVIDSON LOWE ee siaurqair, sigsai SWAMI NIKHILANANDA, si NEW YORK RAMAKRISHNA VIVEKANANDA diongsimx ee hnuartauu. Suar laii ee quixarr nii, CAMPBELL dy' jinrlik ham' NIKHILANANDA habjog, qra <UPANISHADS> <THE GOSPEL OF SRI RAMAKRISHNA> huansiaw jyr Ingbunn. 1954 nii, uansingg liauw H.ZIMMER snax vunw iuxquanx Inwdo gersut/ dethak qangxenw qiwlok ee venjip cutvanw qangjog au, CAMPBELL kir Inwdo luxiuu lak qywguec, NIKHILANANDA qapp Inwdo hagjiaw ALFRED SALMONY jyr dyriuu, camquanx Inwdo ee singwde. Jitt xee qiqanx, JEAN dirr Inwdo qixhingg qywzinn tiauwbuw viauxenw.

Brown : JEAN, cniaw liw dramm .jit .xe, liw ee gersudquanx/ buxdy si jnuaxngiu qethap jywhuew? Digvet si HAWAII duiww liw u sniaw ingxhiongw?

Jean : gunw u snax dai druar dirr HAWAII ar, guaw dirr jiax cutsir/ duarhanr, si HAWAII ee qniaxzii, erdangr lau qycc dngw laii druar jiax, sidjai taiww hinghok lor! Soxu sewhanr ee hue'ig, cniurr duarjuiw ciongx .quer .laii. Jurlaii m qnaw siauwsniu gunw e vnuax dngw laii jiax/ byy irliau JOE e sniu beh druar jiax. Jongxsi gunw vnuax dngw laii ar. JOE ciangjai qunxsngxciyr qongw guaw ee linghunn druar dirr MOKULEIA, guaw sniu jex si sursit.

Jurr sewhanr qaur duarlangg, ham' soxu HAWAII langg qang: tiauwbuw, gunw dagg xee longxx tiaur HULA, tagceh sii, marr tiaur I. DUNCAN ee hongqeh. Linw jaix, ix ee buw si hongw qoxdai GREEK, dyrr si ixx jurzenn qitew unrdong.

Jitt nng jiongw bruw dy' si trngr ciackax tiaur. Kir qaur NEW YORK, huathen henrdai buxdy M.GRAHAM, marr si ciackax tiaur, soxiw guaw itdit si trngr ciackax tiauwbuw. GRAMHAM ee buxdy sewqair, ham' guaw laijurr :ee snaqab. Dongzenn lun hongqeh, ham' guaw guanlaii :ee cax qik dua, vutqyr, jitt jiongw cavet dendyww hro guaw cue cud jurqiw ee digsig.

---------------------

tiauwbuw duiww JEAN, naxcniurr VIVALDA duiww imgak.

------------ Alan Watt <MY OWN WAY>

Guaw ithiongr duiww zimrhyy bruw dy' jin' cuwbi, genxqiur quer byy qang hongqeh :ee --- ballet / SPANISH / qokk jiongw tuantongw bruw, Zi-crur Dairjenr dicbecc qetsog sii, ham' CAMPBELL dirr NANTUCKET hitt nii jingxqyy zuac .langg longxx decc jyr jitt xee qangjog. Dongsii dag'ee dy' m qnaw jre junn kir NANTUCKET, qniax siurr Dikqog cngwjuixtingw qongqig. Gunw byy quanw hiacc je, druar dirr jit qingx suandinn muiquir ee suiw cur. JOE dngdecc siaw <Cingbin Inghiongg> derr go vanw ciuxqyw, guaw liriong jitt dnxua siqanx tamwcue buxdy gersut ee vunxjid bunrdee, vixqaur qokk jiongw tuantongw buxdy, huntiah SPANISH DANCING si vin' dycc quaw guansor, hro viauxdat cud bunhuar digsig/ qamxjingg, ballet ... dringw marr jyr liauw luirsu kaipuar, hro guaw bingvik .diyc, tiauwbuw :ee/ buxdy gersut viauxhenrlik ee quanqenr, si buxdy guansor ee cuxsiaw.

Dng' guaw kaisiw venx bruw sii, dyrr si jiauww guaw ee hongjiamx, vyxcii juadduir ee diamrjing/ qandna' anne jiacc erdangr jimjiog tniax qitew ee cuanxkuir/ simlai sniu ee pueboo iwsiong, zenau ban ~ qra soxx amwqamm :ee huatdenw .cud .laii. Guaw jitmaw iauxx e iong jitt jiongw honghuad, zircniaw qar langg suxiong jitt jiongw vanrhuad. Guaw venx ee derr id der bruw, iong ee iwsiong si qxow GREEK sinue zinbut MEDUSA.

JOE qra guaw qongw, MEDUSA kixsingx si sinbiy jit xee kyxair ee ang'ii, in'ui taiww juwsinn suacc qandna' erdangr knuar diyc jit xee honghiongr, incuw dng' ix suaw dinxdang sii, qandna' e ui' jitt vingg suaw qaur lingrgua hit vingg, ngua jit qxur qongw, ix berhiauw jyr ngihingg dinxdang. “knuar” jitt xee quanliam, cimx ~ kip'inw guaw, zenau qycc siongxsiong ix jiywqniar ee jingqingw, qingquer je vaiw suaxui, guaw ui' qidiongx qaixhongr cud laii. Dirr liw erdangr cue diyc jit xee diongsimdiamw jinwjingg, jongxsi dirr duiwlip ee nng qigtauu, itdanr jinwzip diongsimx au, dyrr erdangr jairr simx soxx sniu jurjai idong.

JIT DER BRUW CONGWJYR UXDIU JIT VAIW

Brown : JOE duiww liw congwjy ingxhiongwxlat u zuarr je?

Jean : guaw qamxqag venx bruw si jit jiongw jingcaiw byy de viw ee qingqiam, qinglik simjingg huatdenw/ sna' lensuar snewmia juanxhuar, venx quer ee muixx jit der bruw si guaw ee jit xee “vangqingx”, dy' si guaw siujongg ee jit xee jun'iuw jongrtair, muixx jit xee congwjy, JOE e qra hyrmiaa. “MEDUSA” si guaw ui' iuxqix snewmia quandiamw congwjy cud :ee. Venx bruw jit dua tiaujenr, si cue cud hiaxee henxsi byy qang jun'iuw jongrtair ee qitew dongrjog/ muixx jit der bruw dy' qaix u jurqiw ee gixgenn/ si qra uxdiu dingsinx congwjyr jit vaiw --- si siqanx/ kongqanx/ dongrlik/ liudong/ kongwjer ee qinggiam. Venx bruw jinjniar hro guaw quer liauw huisiongg digvet ee zinsingx qinggiam.

Brown : Liw likuix M. GRAHAM buxtuann au, si jnuaxngiu congwqenr jurqiw buxdy surgiap?

Jean : u jit dnxua siqanx, uirr buxtuann/ marr uirr jurqiw enxcud venx bruw. Sursit-siong, hitt dnxua siqanx, guaw bad ixx qywzinn sinhun, dirr sewqair qokk de sunhuee viauxenw. Itdit qaur <FINNEGANS WAKE> ee luxjuxqag ANNA LIVIA PLURABELLA qighuad guaw ixx ix jyr juxdee ee hiwqiok congwjy, jiacc qetsog ham' M. GRAHAM buxtuann ee habjog quanhe.

Qongw diyc <FINNEGANS WAKE> , linw qamxx jaix, guaw bad jin' jiuwcamr jitt vunw ceh, qongw ingxuanw byy air knuar ix! cimxx qethunx sii, gunw angx dngdecc jyr genxqiur, jit ciuw kanx guaw, jit ciuw tec jitt vunw ceh tak, jiamr liauw gunw sinhunx qiqanx jidvnuar siqanx, qingquer quixarr nii au, guaw jiacc byy qycc jiahcor! Siqanx erdangr buah siaux itcer, qamxx m si neh!

M quanw jnuaxngiu, guaw iauxx si ui' hiax did diyc lingqamw, zuqyw sniu beh dirr hiwqiok-diongx jiauwqor diyc PLURABELLA qokk hongbin, diy'air iong JOYCE ee gixgenn. Hex viauxsi guaw soxx caixiong ee enxguann, siongrjiyw rair u sraiw e dinxdang SHAKESPEARE linglik ee juixjunw. JOE laii guaw ee qangjoksig tak nng vaiw <FINNEGANS WAKE> , gunw qra soxu tuijenr laii ee buxjiaw iaucniaw laii tniax, knuar inx si m si guanrir cam'uw enxcud.

Hex si 1961 nii ee dairjir ar. Dongsii, iauxx byy langg cir qra qowsursingr huatdenw kngr zip buxdy viauxenw-lai. M jaix jurqiw si m si decc jyr jit hxang jin' vutvinghuann ee su. Vutqyr hyxzirun si gunw cue diyc jit qingx OFF-BROADWAY ee hiwhngg guanrir hro gunw viauxenw, 1962 nii derr id vaiw enxcud, qewsiok jit quiwjed, did diyc nng ~ snax xee jxiongw au, qycc sriu iaucniaw qaur SPOLETO (dirr ITALY)/ IRELAND/ Zidvunw, qapp Bixqog jerje soxjai/ CANADA jyr viauxenw.

Gunw encud ee buxdy si u qiogjingg, soxiw dirr ITALY/ Huatqog/ Zidvunw enxcud sii, dy' inxkiw dongderlangg lensiongw diyc inx jurqiw ee hiwqiok/ jongxtew hewqiok : Zidvunw ee KABUKI/ ITALY ee COMMEDIA/ Huatqog ee MIME. Qycc si ixx <FINNEGANS WAKE> jyr qiycvunw, ix ee gixgenn dirr muixx soxjai dy' did diyc qangrkuanw ee lixqaiw. Jitt cud hxir qra guaw cua .zip .kir jongxtew hiwqiok lingxhik, tecnew guaw jit xee cavutdyx ixqingx virr guaw be qir .kir ee lixliam : jinjniar ee hiwqiok si erdangr qethap soxu viauxenw gersut.

Brown : Linw jnuaxngiu e u congwlip “THE OPEN EYE” qiogdniuu ee qowsiongw?

Jean : Si JOE je nii laii qangxjy genxtyw ham' guaw jongsu jongxtew hiwqiok congwjy ee jonghap qetjnix, singlip qaur dnaxx ixqingx jap-sir ~ go dxangx. Gunw qong'enw .quer ee hiwqiok-diongx, u jit cud si ixx PAUL GAUGUIN dirr TAHIT sing'uac jyr juxdee, e duiww jitt xee dejaii cuwbi, ham' guaw si POLYNESIAN huec'enn iuxquanx. Lingrgua jit cud si ixx HAWAII sinue --- huexsnuax luxsinn PELE tuansuad --- jyr juxdee hyrjyr THE SHINING HOUSE. Bogjingg decc diuvi ixx GREEK sinue jyr qiycvunw ee hiwqiok, byy itding e dirr GREEK qong'enw --- ARTHENS hiwqiogjed enxcud.

HUN'INX EE IWGI DYRR SI HAP ZI JYR ID

Robert Cockrell : JOE, dramm liw duiww hun'inx ee knuawhaud, qamxx hyw? Jiurr guaw soxx jaix, liw qra knuawjyr kuriuw sinue iwgi ee surhang.

Campbell : zuqyw liw byy zinrding hun'inx si zinsingx derr id iauwbu, dyrr vutqaix qethunx, hex si jit xee diongrdua quatdik, iauqiuu liw rair uanjuann sunrhok dirr nng langg soxx qowsingg ee quanhe-diongx, qycc ixx jitt jiongw quanhe jyr liw itcer hingdong ee guandiamw. Guaw ciangjai qra hiaxee qniax hun'inx girbu ee langg, inx uirr dauwdin :ee soxx jyr ee hisingx, si uirr sianghongx ee quanhe hisingx, vingrr m si uirr duiwhongx ziiw. Angbow quanhe si su'iaur jywcud hisingx ee quanhe, zuqyw hucex sianghongx dy' erdangr quanlenn dirr jitt jiongw quanhe-ha, hex dyrr e hap zi jyr id, uanjuann cniurr “im'iongg” (zuqyw liw qandna' sniu jyr “xiongg” iacc si jixu beh jyr “ximx”, cenban m hyw qethunx). Ui' liw qethunx hitt sii kiw, liw zinsingx ee itcer, dy' ham' jitt xee quanhe u quanlenn. Zuqyw liw erdangr dirr jyr zimrhyy quantding sii, dy' e qra jitt xee quanhe kngr .zip .kir, jiacc sngr liw si u qethunx.

Hun'inx u nng qaidnua. Derr id dnxua si singbudsingr hun'inx, duar cud laii juxluw. Suar laii :ee, si guaw hyrjyr sinuersingr hun'inx/ iacc si lenrqimsut hun'inx qaidnua. Jerje langg dyrr si byy jinwzip jitt qaidnua. Tniax ving'iuw qongw mow mic langg inx lienn, guaw dy' jin' diyhqniax. Ongxongw, inx vutjiwsirr ixqingx u qniaxzii, zircniaw guarlangg knuar .laii, vutjiw uanmuaw (uanbuanw), kiokk byy zuarr quw au, tniax inx qongw, “gunw hunx ar!”

zuqyw angbow jinjniar hiabdiau itdir, inx ee ittexqamw e ban ~ singsik. Guaw qamxqag jin' hyxciyr :ee si, jitmaw ciangjai tniax langg qongw, hun'inx jinjniar iwgi si jitt xee/ hitt xee. Guaw zinruii hun'inx jinjniar iwgi dyrr si hun'inx, viauxsi qed jyr ittew.

QRA QIGJINGG HUAWJYR TNIAWTANGR QAPP DINSIYH

Arrien : qamxx u jit jiongw aiwjingg vingrr m si dausia .cud :ee? Iacc si qongw soxu aiwjingg dy' jixsirr jurqiw luersimx lixsiongw hingsiong ee dausia, sniu beh jiyh dausia cud ee duiwsiong laii ham' jitt xee lixsiongw hingsiong lenqed jywhuew?

Campbell : guaw ui' longrbanrsid aiwjingg cue .diyc :ee, jixu jitt xee lixsiongw hingsiong, soxui ANIMA/ si liw jah dirr luersimx ee lixsiongw hingsiong/ liw e qra dausia dirr byy qang langg ee srinx-siong/ ixx simlai doo tauwquer ham' duiwhongx qethap laii lenqed. Vutqyr benw zuarr quw, dyrr e huathen hex jixvutqyr dausia ziiw, suar lyc laii e huatsingx sniaw dai, dag'ee dy' jin' cingcyw lor.

Andresen : qamxx u ingxuanw uixdai ee aiwjingg?

Lawrence Favrot : jex si hyw bunrdee, liw narr tak quer JUNG ee ceh, e qamxqag ix ee lixlun qinvunw byy jinjniar aiwjingg ee kongqanx, itcer aiwjingg jixsirr ANIMA iacc si ANIMUS ee dausia. Guaw huaigii...

Campbell : hun'inx ee buatuax kyxiw hro jitt jiongw dausia uaxqaiw au, laii jiapsiu snewmia ee jinsit. Zuqyw jyr qraur jitt diamw, dyrr erdangr ham' jywduix :ee qenwlip huisiongg honghur air ee quanhe, zircniaw erdangr itdit enxsiok .lyc .kir.

Arrien : jex qapp liw ee “s.-siamxsih-s.(TWINKLE-TWINKLE)” guanliw si itdir ee, qamxx si?

Campbell : [ciyr] guaw si sniu beh tauwquer dairjir tauu-buew sunrsi laii ...

Itvnuax qongw, muixx jit xee langg dy' si sing'uac dirr mow jit xee siarhue quntew-diongx, narr byy viauxsi iwqenr jiapsiu jitt xee quntew ee qewdat viaujunw/ lixliam, dyrr e quer qaxx vutjiw jurjai. Mrqyxx, itdanr qamxqag m driyc ngiu, liw ee quanliam/ lixliam e kaisiw huatsingx juanxvenr, zenau, simlingg e u juanzenn juanxhuar, liw ee jurgnow (EGO) qapp jurgnow ee bogdiksingr horsiong venr kacc lringx .kir, jitt sii amwiwsig ee lixsiongw e vuh .cud .laii.

Jex u nng jiongw kyxlingg ee honghiongr. Jit xee si kacc uihiap :ee, JUNG hyrjyr “imngiaw (SHADOW)”, guaw qra qongw si “sna' ciongx (KNOCK-KNOCK)”guanliw, si qniahniaa ix jurqiw SELF. E qir did jit xee siauwlenn sinsu qra guaw qongw “zuqyw guaw m si hyw ee qidokdoo, dyrr e si jit xee jin' kyxpnar ee langg.” jex dyrr si “sna' ciongx”. Hro jitt jiongw iwgi ee amwiwsig puu .cud .laii si guihiamw :ee. Lingrgua jit xee honghiongr viw derr id jiongw cuwbi jerje. Hex si guarlaii ee inxiur, guaw qongw si ”s.-siamxsih-s.” guanliw.

Dng' liw kaisiw duiww liw ee dyrdig libdniuu sitkir sinwsimx sii, dyrr e ongw jitt nng honghiongr ji' id idong. Dirr itqenr-jiongjingg ee dniuhap, e duiww mow jit xee langg tudzenn cuthen dirr liw binrjingg, hro liw ee simx dua dinxdang, liw e sniu, dyrr si ix, ix si guaw ee snewmia. Jex huatsingx dirr jerje longrban aiwjingg qowsu, vutjixsirr Aujiulangg, Ajiulangg marr e. gauw jurqiw marr u quer anne ee qinggiam.

Dauwdew liw si air diyc si'angg? Liw vingrr m jaix liw air ee jitt xee ix si si'angg? Liw air ee hitt xee qycc si si'angg? Jongxqongw jit qxur, liw duiww liw soxx air :ee qinvunw uanjuann byy zinrbad. Zuqyw liw air :ee, jixsirr jit xee liw dausia ee huanwsiong, jinsiongr jaw-ban e duiww liw henxhen, qaur sii, liw beh jnuaxngiu vran? Dongzenn, liw erdangr duiww jurqiw qongw, ”mr, guaw beh qra air siux dngw laii, lingrgua qycjaiww cue jin'air.”

Danrsi, liw qycc u lingrgua jit jiongw suanxdik, duiww jurqiw qongw, “guaw jiapsiu jitt xee sursit”. Anne ee ue, liw ee taiwdo e jiamrr qaixvenr, liw ee dausia e siausid/ kyxlingg siuhuee; vutrqyr laii qaur snax-jap-go huer iacc si sir-jap huer (gunw maxmah air qongxx si “guihiamw ee sir-jap huer”), e qycc dingsinx vuh .cud .laii, jitt sii, liw rair jaiww jit crur cuxliw jitt xee bunrdee, soxuir TRISTAN qapp ISEULT bunrdee.

Arrien : liw qamxx byy zinruii, su'iaur air je quer sunzenn uirr air laii air? Zuqyw liw ee air jixsirr dausia quanhe, liw dyrr jin' pnaiw qongw si jinjnair ee air.

Campbell : jex si guaw duxjiacc qongw .quer, marr si uirsniaxmic zinruii hun'inx si jit jiongw tongwkow ee jetbuaa.

Arrien : jex qamxx si liw qongw :ee, qigjingg zid'au venwsingg unair ee guan'inx?

Campbell : driyc! Jex si hun'inx ui'id cutlo. Qigjingg e hro langg beh qewsiok jiamwiuw/ jipuer, si m si erdangr ui' qigjingg juanxhuar dinsiyh/ sna' tniawtangr, si hun'inx siongrr dua kywdee.

Arrien : dirr air ee janbin, liw jnuaxngiu dingrgi dyrdig?

Campbell : duer siarhue qongw :ee kir jyr, hyrjyr dyrdig, muixx jit xee siarhue dyrdig byy qang.

Arrien : dyrdig qamxx qaix si air ee jit vorhun?

Campbell : qamxx ingwqaix? Zuqyw liw zinruii ingwqaix, dyrr si ingwqaix. Dyrdig “si” air ee jit vorhun? Guaw e qongw “m si”. Soxu ham' air/ jenwjingx iuxquanx ee dairjir, dy' byy dirr dyrdig ee kingkag-lai. Angbow siongrr dua kywdee si jnuaxngiu dauwdin qycc byy sanxsingx siy' longr/ ciongtut. Qiujinx qongw, lanw dy' jixsirr vnuar xee langg, m.-mijnix-j. jauxcue lingrgua jidvnuar, hro jurqiw huehok uanjingw. Zuqyw liw u qraur bingdir, dyrr cue e diyc jingwkag ee hitt jidvnuar; liw ee bogviaux narr jingwkaksingr u qraur, jurzenn cue diyc :ee, si driyc ee jidvnuar.

Zuqyw duiww singr-quanhe u jingwkag liauxqaiw, dyrr e jaix, hex si ixx bunhuar jyr qicow, vingrr m si ixx singbudsingr. Mrqyxx bunhuar si e venr ee, m si qowding be venr, qinglik sna' lensuar juanxhingg, incuw lanw qinvunw byy lixiuu zinruii jurqiw qaix jiauww mow jit xee dyrdig hertongw. Guaw zinruii huisiongg diongriaur :ee, si lanw byy vit'iaur danxtai siarhue qakcnew. Jit xee langg qaix jurqiw cue cud ix ee lo.

Siarhue u kyxlingg lensuar quixarr sewqiw dy' dirr cywgo ee dyrlo-siong dngxsec, qywzinn kiokk kyxiw dirr jurqiw simlai cue diyc Tniqongveh venpair ix ee digjid, jex si byy diauqnia :ee, lanw erdangr ui' lanw ee luerjai cue diyc anne ee mic.

JONGQYX? SUIW?

Cockrell : guaw tak liauw KANT ee jit pnix bunn <THE BEAUTIFUL AND THE SUBLIME>. Qidiongx jit xee lunrdiamw si, luxsingr si suiw :ee, lamsingr si qysiongw uixdai :ee, qycc qongw, lamsingr u jit xee qonglingg, si qra jongqyx jingr zip luxsingr, hro dirr inx srinx-siong huatdenw cud laii, dng' inx ee suiw jiamrr tewsig au, luxsingr marr jniajyr qysiongw.

Guaw ee qamxqag viw KANT jauw qyckacc hng. Zuqyw lanw qra lamsingr/ taiwiongg sna' lenn; luxsingr lenjiab dairde, lamluw jiqanx dongrlik hongsid, lamsingr vutjiw si dirr luxsingr juxqiongx hervuii, marr lyc dirr inx ee simlingg, qiywcnew inx luerjai ee jongqyx.

Campbell : guaw beh qongw ee derr id diamw si, KANT jitt sxer byy qethunx! Rair jiax, “qethunx ee dethagqax” si jit xee horsiong maudunw ee qongxhuad. Guaw iauxx e qir .did liw qongw .diyc jitt pnix bunn ee jit qxur, digvet henx kuix guaw ee inwsiong, ham' DANTE duiww suiw/ jongqyx knuawhuad iuxquanx, jitt qxur ue hro guaw qamxqag KANT si jit xee u aurdunr ee sizinn.

Ix qongw, nasig bagjiux si suiw ee, osig :ee si jongqyx ee. Jex diamxcud bunrdee ee soxjai, suiw e ho'ngg sanxsingx qamxjingg/ siongxsiong, jongqyx si e hro langg ee qamxjingg/ sinwliam siurr qniahniaa/ simrjiww dnaxqig. Jongqyx ee qinggiam ciangjai sanxsingx dirr jit xee qik dua ee kongqanx/ iacc si jit xee viauxhen cud huisiongg dua ligliong ee kuanqingw, qongw jit xee le, zuqyw liw srinx dirr jit xee sriu qiglet kongsip ee sniaci, byy itding dyrr texgiam diyc jongqyx. Guaw si qongw jinx :ee! Liw srinx jairr qidiongx zuarr quw, dyrr e qamxsiu diyc jongqyx zuarr quw, liw qamxqag qniahniaa, hiongdua ee lat qra liw liac diauu lehh.

Srinx jairr jurqiw byy huatdo kongwjer ee ligliong-diongx, kiokk qaxjongx u lat kongwjer, jex si jongqyx simjniaa ee guan'iuu. Guaw marr e iong jitt jiaux, dagg vaiw qex limx quaw jiuw, bingjaix jurqiw dongr be diauu, qniaa be cud duarmngg --- jex dyrr si snewmia [ciyr]. Linw qamxx jaix, WHISKEY IRISH ee zir si USQUEBAUGH, huansiaw jyr Ingbunn dyrr si “snewmiarjuiw”. NIETZSCHE qra DIONYSIAN ham' jiuxjuir sna' kanlenn, zinruii DIONYSIAN soxx dairviauw :ee, si pacpuar guanjig, APOLLON dairviauw hingsid ee vyxliuu.

Jongqyx si jit jiongw kiongxvor ee sinvir, suiw si belangg ee sinvir, jex si inx cavet soxjai. Luxsingr ee vunxjid si belangg :ee, KANT e qra “suiw” hunpuer hro luxzinn, lamzinn si huixbedjiaw/ satciuw, inx ee hing'uii jixhiongr sionghai/ qongqig, KANT jiacc qra “jongqyx” quisiok hro lamsingr.

Luxzinn jongxsi qongw, gunw jit diamw aw dyrr byy sinvir. Sursit m si anne.

Favrot : suiw/ jongqyx ee hunvet, qamxx ersaih iong NARCISSUS beluann jurqiw ee juiw-diongx ngiaw suacc rimx .siw/ JOB binrduir siongrder ee kyxgiam au, qamxqag diyc “kiongxvor ee ywvir”

Campbell : driyc! Inx si anne.

Favrot : liw qinggiam diyc jongqyx, m si liw iongxiuw ciauuat sxen-og linglik, jixsirr liw soxx binrduir :ee, si ciaucud zinlui erdangr lixqaiw ee lat.

Campbell : byy cyr!

Kennard : lanw tniax .diyc ee aiwjingg qowsu ciangjai dy' u jit xee bosid: javoginxaw air diyc jaboxginxaw/ mow xee lixiuu suacc sitkir/ qycc dingsinx did .diyc. Jex qamxx jixsirr sehonglangg ee jiaujyx? Iacc si qongw liw sitkir mow mic au, jaiww jywcud dua loxlik qra jingcuw dngw laii, si jit jiongw huisiongg inghiongg hing'uii?

Campbell : m si, hex jixsirr qowsu ee quewdingg ziiw. [ciyr] zimrhyy genxqiur qowsu congwjy ee langg dy' jaix, qowsu beh kip'inw langg, dyrr rair u jit xee kunwqingw qaidnua, juxqag qniaa hiongr koxlan/ jaieh, zenau mow quaw amwqamm dirr derr id / derr zi dnxua ee snuawsyh jongw e puu cud, qra juxqag ui' guilan-diongx qaixqiur ...

Kennard : anne ee vaiviw erdangr duiziog qaur zuarr jaw ixjingg? INDIAN aiwjingg qowsu qamxx anne?

Campbell : m si, jixu jiyw vorhun jiacc anne. Guaw sinu, jitt lui bosid ee qowsu erdangr ziog qaur <Vaiwlak Amwvyr (SATURDAY EVENING POST)>. [ciyr]

JIAPLAP SNEWMIA EE SIDSIONGR

Joan Halifax : JOE, guaw ham' liw jywhuew qangjog ixqingx quixarr nii ar, jin' sniu beh jaix, luxsingr duiww liw ee snewmia u sniaw ingxhiongw? liw ham' qitnax luxsingr --- sunzenn ee ANIMA (lamsingr simdiongx ee luxsingr guanhingg iwsiong) --- jywhuew sii, did diyc sniaw qinggiam.

Campbell : ANIMA jurlaii dyrr byy sunn :ee. [ciyr]

Tarnas : jit qxur dyrr qongw diyc diongrdiamw.

Halifax : jnuaxngiu qongw neh?

Campbell : ersaih qongw, hex si snewmia virr uziamw, jit xee jauxcuac ee le.

Halifax : vixzu sniaw neh?

Campbell : ANIMA ee hingsiong si itdit decc venwdong ee. Dirr liw cue diyc jit xee duiwsiong erdangr qiawtog liw ee ANIMA jinwjingg, liw m jaix ANIMA si snex jyr sniaw ngiu. Zuqyw liw vixqaur liw dausia .quer ANIMA ee duiwsiong, e huathen inx horsiong ee cavet jin' dua.

Anne, sniaw qycc si sunn ee ANIMA? Jongxsi kansiap diyc jit xee ligsuw qapp simliw qin'guann. Snewmia jinjniar bunrdee ham' jitt nng hongxbin dy' u quanlenn. Liw kuriuw simlixhak-siong ee quewkir, qycc srinx jairr ligsuw jingqingw-diongx --- jex si liw tuad be kuix ee, ANIMA e ham' liw soxx qitai ee, ixx jin' byy qang ee hongsid laii cuthen, jex si hun'inx ee landee. Liw ham' jit xee liw dausia ANIMA ee duiwsiong qethunx, danrsi sursit-siong, ix kiokk si jit xee ix jurqiw. Jitt jiongw siongxsiong qapp sidjer snali, jiongbuew e hro liw ee dausia qaixtew. Dyrr si qongw, liw rair qra dausia .cud .kir ee ANIMA siux .dyw .laii. Liw dongzenn ersaih qra siux dngw laii ee ANIMA qycjaiww cue lingrgua jit xee langg dausia cud kir, anne jyr, jixsirr hro bunrdee itjair ding'enw!

Jitmaw qokk jiongw juliau laiguann dy' qra lanw qongw, hun'inx si aiwjingg ee endngg, erdangr ui' cundngg-diongx did diyc jerje cuwbi. Sursit-siong, qethunx soxx duar laii ee cuwbi be ciauquer jap hunjingx. Liw rair binrduir jitt xee sursit, jiapsiu tuabuaa.

Sunn ANIMA si liw rair dudiau, hro siausid ee mic. Liw soxx qethunx :ee jixsirr ANIMA ee qew ngiaw, vingrr m si liw zinruii liw e did .diyc ee hitt xee. Soxui ee singsik si bysniax-bysueh jiapsiu snewmia hiongr liw henxsi ee sidsiongr.

SINUE SI SING'UAC

Halifax : liw jaix, dirr guaw ee sewqair, guaw e qongw hiaxee berdangr jiaplap jurqiw ANIMA vunxsingr ee lamsingr si u vne :ee.

Campbell : m driyc! M si anne. Liw rair qra ANIMA danwdiau, diyh'air rngiuu zip liw lairbin, e dirr liw qethunx iokk go dxangx au jaiwdo cuthen, hitt sii liw rair cuxliw.

Halifax : jiurr guaw soxx jaix, liw ee zinsingx/ huatdenw-diongx, ANIMA vnuaenw qik diongriaur qaksig.

Campbell : guaw qar luxhagsingx snax-jap-veh dxangx! Siwqer dy' duw e diyc!

Halifax : dirr sinue-diongx, ANIMA u jerje byy qang ee ligsuw miazi, ix si jit xee qaksig/ jit jiongw henxhen/ si liw diwlingg snewmia soxx uaxkyr dongrlik ee hingsid.

Campbell : ix ee miaa hyrjyr JEAN, JOAN, qapp JANE.

Halifax : Liw ee ANIMA duiww liw ee ingxhiongxlat si sniaw? Hro liw sniaxmic?

Campbell : Jex si duanrqir ee dairjir, guaw qywzinn ithiongr byy qac'ir duanrqir.

Halifax : Jex byy sngr si duanrqir!

Campbell : Guaw ee vunxgiap si vixqauwsinuerhak.

Halifax : JOSEPH, qin'axzit jiacc tniax liw qongw, dirr SARAH LAWRENCE qar luxhagsingx, hro liw zinrbad .diyc, vutjixsirr iong vixqauwsinuerhak quandiamw liauxqaiw sinue, qycc rair iong ham' snewmia quanhe ee quandiamw jyr liauxqaiw.

Campbell : dysia liw hro guaw singw driau qycc qongw jit vaiw. Jex duxx si guaw junxvi beh qongw :ee. Sinue si huisiongg dua ee hagsut lingxhik, busor ee sursit su'iaur kir siujip/ kyxjingr/ genxqiur. Liw kyxiw iong sunn hagsut hongsid genxqiur, qra siaw jyr bunjiux, kranx dirr byy qang ee qikanx. Danrsi qar luxhagsingx sii, guaw kiokk huathen, inx jongxsi mng guaw sinue jailiau ham' inx sing'uac jiqanx, u sniaw quanhe. Jitt jiongw duiww snewmia vunxsinx ee cuwbi, si viw javox hagsingx duiww juwqaiw ee cuwbi qyckacc daddid qiongdiau. Lamsingr duiww hiaxee qihaisingr sewjed, sniu' iwsinn lor. Guaw itdit erdangr vyxcii dirr jingwkag ee quixdy-siong, si luxhagsingx sur hro guaw ee, inx qar guaw zinrbad sinue hingsid ee snewmia qewdat.

GERSUT M SI JNEVNIAR LINGXHIK, SI UANSINGG JURGNOW

Rozanne Zucchet : Liw qamxx si zinruii, henrdai luxsingr qaix kacc diwdang jurqiw, iacc si qongw siarhue ingwqaix qaixvenr/ dingsinx vingqow mow quaw qewdadquanx?

Campbell : m si. Guaw zinruii luxsingr ui'id rair jyr :ee, si mair itsimx qandna' sniu beh ham' javox siyqang/ qapp javox vniar sux-ngiaa. Inx jixiaur jaix jurqiw erdangr duiww javox huathuix zuarr dua ingxhiongxlat dyrr u qraur ar. Dirr guaw qar ceh juewau jit dxangx, u jit xui hagsingx laii vanrqongsig cue guaw, jre lyc laii au qongw “CAMPBELL sensnix, liw itdit dramm :ee dy' si inghiongg, mrqyxx luxsingr qycc si jnuaxngiu neh?” guaw qar :ee si vixqaur sinue.

”luxsingr si inghiongg ee buxcinx/ vyxhorjiaw. Linw iauxx qycc sniu beh jaix sniaw?”

”guaw sniu beh jniajyr inghiongg.” luxhagsingx anne rinr.

Qajair hitt nii guaw dyrr tewhiux, benw qycc qar kacc je luxhagsingx. [ciyr]

Audience Question : liw duiww hiaxee uirr air laii suanxdik inx surgiap ee luxsingr u sniaw knuawhuad?

Campbell : Dirr lanw bunhuar, luxsingr anne jyr ixqingx jin' dngg jit dnxua siqanx ar, inx duiww snewmia ee binxqamxdo qik bingw, jaix jurqiw dirr dycc jit xee lingxhik siongrr erdangr huathuix, jex qamxx si liw beh mng :ee?

Audience Question : m si, guaw si jriw hiaxee in'ui duiww mow qnia qangjog ee hixair jiacc jongsu hitt hxang qangjog ee luxsingr, vixzu, jit xee air ginxaw ee luxsingr e kir jyr laursux ji' lui :ee.

Campbell : guaw zinruii zimrhylangg air ixgua ee zimrhyy lixiuu jyr suanxdik, dy' si gongrgenwtauu. Suanw qangjog dingxiw decc suanxdik liw ee zinsingx. Zuqyw byy air liw dngdecc jyr ee qangjog, si byy kyxlingg e dauzip ee.

Audience Question : qiwzenn anne qongw, zuqyw jit xee luxsingr duiww singjiu ee duiqiuu marr si in'ui air, hex dyrr byy sniaw m hyw lor?

Campbell : guaw m si huanxduir luxsingr duiqiuu singjiu. Luxkuann unrdong jit kaisiw soxx duiziog ee bogviaux, qangjog/ sinsuiw rair vin' linglik quann-qe, vutqaix ixx lamluw singwvet hunx. Jex si habjingg-habliw ee iauqiuu. Bunrdee si, luxsingr aurlaii suacc venr qaxx uanjuann byy duiwdiong qadingg sing'uac/ sngxdng inx duiww qadingg surbut ee tenhun/ qauwiongw qniaxzii ee jikzim uanjuann sag hro Jiux-jingwhuw qapp haghau.

Zucchet : Duiww gersut lingxhik qangjog ee luxsingr, liw u sniaw quanqamw?

Campbell : gunw bow si tiauwbuw :ee, jongsu buxdy gersut ee luxsingr dy' byy jitt hongbin ee bunrdee. Guaw sigsai jerje gersut qangjog luxsingr. Gersut vingrr m si beh liw qapp langg' sna' qingrjingx, hex si hro liw huatdenw jurgnow, huatdenw ham' jurqiw quanhe ee lingxhik.

Arrien : guaw sniu jitt diamw qangrkuanw sik'iong dirr lamsingr.

Tarnas : liw qamxx si zinruii, luxsingr qaix air gersut, m si air singjiu?

Campbell : gersudqax beh jyr ee dairjir m si beh did diy singjiu/ viauxhen jurqiw, si beh uansingg jurgnow. Duiww qersut ee duiqiuu/ jauxcue singjiu si uanjuann byy qang ee nng huesu.

Arrien : rair suisii vyxcii ham' jurqiw didqag snalenn?

Campbell : si anne. Dirr qongjiongr ganxqongx, derr id/ derr zi, simrjiw derr snax miaa, si byy qangai (dirdai) ee. Jiurr guaw soxx jaix, muixx jit xee gersudqax dy' iong jurqiw ee hongsid uansingg jurgnow. Gersut m si sna' dauwngiaa ee lingxhik.

Arrien : narr anne, liw ee gersut dyrr si liw ee zinsingx lor!

Campbell : driyc! Danrsi sionggiap getsut si lingrgua jit huesu. Guaw itdit dramm :ee dy' si didjiab ee/ congwjyrsingr ee gersut.

Brown : qamxx u kyxlingg, jit xee byy zinruii jurqiw si gertsudqax ee poxtonglangg, sursit si gersudqax?

------------------------------------------

luxsinn siongrdingx jurzenn, lamsinn siongrdingx siarhue. Zuqyw sinue qiongdiau lamsinn je quer luxsinn, hex liw e jaix, inx vuerau ee jongqaur, si qiongdiau siarhue ngiaa quer jurzenn :ee. Zuqyw sinue jaiww qazip huanrjue duirlyc jitt xee juxdee, jurzenn dyrr jysiu jiuwlew.

------------ Campbell -----------

Campbell : bunrdee si jyr gersudqax ee jit xee vit'iaur diauqnia si jiangxag qikiauw, jex si su'iaur duanwlen jiacc did e diyc ee. Kanciuw JEAN si jitgiap buxdyrqax, marr qar langg tiauwbuw. Liw sniu beh jniajyr buxjiaw, singx rair jyr jerje l.-luixcuir-c. ee qitew dongrjog hunwlen, cniurr kax giac quann/ hnua qnuaix jyr dongrjog jilui.

U jit nii, JEAN ham' guaw jywhuew kir ESALEN genxqiuwsow qar kxyr. Guaw hurjig sinue kywdingg, ix rair qar langg tiauwbuw. Derr id zit honghunx, ix dngw laii ee sii, qui' bin viauxjingg jin' samwdam. Guaw mng “Or! JEAN, sniaw dairjir neh?”

”inx jixsirr sniu beh laii did diyc 'ESALEN' texgiam ziiw!” JEAN anne rinr.

Derr zi zit, kyxlingg derr snax zit, dng' guaw sag kuix tangx-aw, knuar diyc JEAN ham' hagsingx dirr hng ~ soxjai, ix iauqiuu hagsingx cunkuix siangciuw/ bin hiongr zidtauu, ui' snuapyx lenr .lyc .laii, qycc tiaur .kiw .kir.

Jitt hxang su, jixbingg iuxquanx gersut jin' diongriaur ee jit diamw. Hro JEAN qiksimx :ee, si ix ee hagsingx qra s.-suiven-v. ee qitew dongrjog knuawjyr jinjniar ee buxdy, qongxx si congwjyrsingr gersut. Hex qinvunw m si/ jixsirr dirliausingr :ee. Jiaxee si tuatli quixdy, hibang jiyh gersut dingsinx dngw kir quixdy-siong ee langg. Danrsi gersudqax kiokk si vunxlaii dyrr dirr quixdy-siong. Hex si uanjuann byy qang ee nng huesu. Liw qac'ir qra gersut dongwjyr dirliausingr qangqu, jex vunxsinx byy sniaw byy tyxdongr, mrqycc liw bersaih m jaix qidiongx ee cavet.

Iauqiuu jit xee juangiap buxdyrqax qar e jit quaw byy guanrir duanwlen qikiauw ee langg tiauwbuw, qinvunw si taiww benxqiongw langg lor! Buxdy si siongrr liauxvutkiw ee gersut. Jairr guaw knuawhuad, buxdy/ cniur quax dy' si siongrr kunwlann ee gersut, in'ui viauxhen qangqu si jurqiw sinkux, dingxii qongw, inx busii-bukig rair hro jurqiw sinkux vyxcii siongrr hyw jongrtair, suisii diyh'air lenrsip.

Tniajiongr mng : guaw qywzinn ciangjai e qra inghiongg/ gersudqax kngr dirr qang jit xee uirdir, qamxqag inx qangrkuanw si dirr qang jit diauu qongcaiw dyrlo-siong byy diuduu iongxqamw hiongr jingg qniaa ee langg, bogviaux longxx si huathen jurgnow. Incuw jit xee langg si m si gersudqax, naxjunxx duliauw jiangxag qikiauw ixgua, jauxcue luerjai jingsinn, marr huisiongg diongriaur.

Campbell : liw naxx decc jewjy liqingx-vuerdy neh! [ciyr] guaw qamxqag liw qongw liauw sniu' hamwkuah.

Kennard : knuar kiw laii, quewkir jerje siarhue, luxsingr byy qihue jniajyr gersudqax, marr byy jiangxag siarhuer kuanli.

Campbell : sursit-siong, jerje gersut lingxhik itdit ui' luxsingr jiangxkongr, lanw byy caqag .diyc, jixsirr lanw liahjyr hiaxee lingxhik qandan' si qangge/ m si gersut. Cniurr venjid/ venx naa-aw/ jyr huii-aw/ ciacsiur dy' sriok jitt lui.

Kennard : Liw qamxx byy ziuruii, javox kacc air hiaxee byy jyr sniaw ee luxsingr?

Campbell : or! Hex jixsirr tingto-siong ee bunrdee. Tuantongw siarhue, u snax jiongw lixsiongw ee luxsingr denxhingg: id si hencex-liongbuw/ zi si qyqib qaujewhuex/ snax si luxjenwsu.

Arrien : ARTEMIS (GREEK sinue-diongx quanw iaxsingx dongrbut/ paclac/ cauxbok/ jingcyr/ snex qniaw ee luxsinn) sriok dycc jit jiongw?

Campbell : Sinue ee luxsinn hunx nng dua luirhingg. Jit jiongw siongrdingx uxdiu/ tende, inx si juantew/ juantexhingg ee sinbingg (TOTAL GOD).

Lingrgua jit hxingg si lamsinn ee kanciuw. Dirr luxsinn jauxhiongr ee sinue, lamsinn si luxsinn ee kanciuw, dirr lamsinn jiamrr quann ee sinue, luxsinn jixsirr cuwiaur derui.

Liw duxx qongw .diyc ee ARTEMIS, si Cnedangg Sidai ee sinbingg, jiauww qoxdenw jongqaur sinuerhak ee kuan'uix MARTIN NILSSON pnuawduan, sriok juantexhingg luxsinn.

Vutqyr, dng' quixarr xee juantexhingg luxsinn draur jywhuew sii --- jitt jiongw dairjir suwsiongg huatsingx dirr bunhuar ham' bunhaur huatsingx qauliuu ee sii --- inx ee qonglingg dyrr e virr kuvet cud laii.

Dyrr si qongw, juantexhingg luxsinn soxx iongxiuw ee qokk jiongw qonglingg, e virr tiackuix, quisiok qaur qitnax luxsinn srinx-siong. Ixx ARTEMIS jyr le, dirr qongguann go sewqiw sii, ui' guanlaii ee juantexhingg, sokqiamw jyr paclac luxsinn.

Dirr jin' jaxqii sii, luxsinn qapp inx soxx dairviauw ee dongrbut si byy hunvet :ee, ARTEMIS dairviauw lok, ix si lok, lok dyrr si ix. Aurlaii, duer diyc ARTEMIS srinx-siong zinlui ee singhun zuxx laii zuxx siurr qiongdiau, lok venwsingg jixsirr ix ee dangpnua.

PERSEPHONE/ DEMETER dairviauw dix ee luxsinn. Dirr Cnedangg Sidai, dix si huisiongg diongriaur ee dongrbut. CIRCE dyrr si qidiongx jit xee virr venwhingg jyr dix ee luxsinn, marr si jit xee inxcuarjiaw. ODYSSEUS dirr ix ee kuipuar-ha, did diyc imqanx qapp qngx lingxhik (jriw taiwiongg, si CIRCE ee vaxvah) ee diwhui.

Narr juantexhingg luxsinn virr kuhunx au, inx ee lat dyrr qiamw ziok ar.

Highwater : SOCRATES iacc si PLATO qongw .quer, u nng jiongw uanjuann byy qang ee sukyw hongsid, EROS qapp LOGOS. Ingxquw byy venr :ee, si u logic / xiongg-singr hysen :ee, jex si LOGOS. EROS neh? Si didquanx/ venwdong/ ximx-singr :ee, zircniaw m si qaiww hyw ee. Guaw sniu lanw sehonglangg itdit kud dirr jitt jiongw zi-guanlun ee kingkag-lai.

Arrien : Lanw jinjniar si kutdiauu dirr jitt xee zi-guanlun --- logic/ didquansingr sukyw --- ee kingx-lai, jiauww guaw knuar, lanw siongrr su'iaur ee, si dirr jitt nng jiongw jiqanx kuer jit jy qiyniuu, dyrr si packuix jit jiognw juansinx ee sukyw hongsid.

Robert Bly : Anne lanw beh anxjnuaw laii knuawtai JOSEPH soxx zinruii, snewmia ee lingliong laijurr nng qigtauu?

Highwater : Liw qongw diyc diongrdiamw, lanw ciangjai dy' qongw qaix jinrlik qra simlingg dingsinx lenqed kiw laii, qycc qongw, zi-guanlun si jit jiongw tuisaklat, erdangr qra lanw tesingx qaur jit xee kacc quann ee qingxqair.

Halifax : jixiaur zi-guanlun ee zi-guann m si duiwlip :ee, dyrr u kyxlingg.

Highwater : driyc!

Arrien : Guaw sniu, jitt xee tesingx erdangr jiyh jit xee bixle ee sinue laii tiacbingg. Jitt xee sinue anne qongw, u jit xee jin juanlik huathen jurqiw si si'angg ee langg, ix ee taumox si osig, srinx-vnix duer jit jiah var.

Dng' ix kaisiw huathen jurqiw si si'angg ee sii, taumox ui' ox juanxjyr de'sig, hitt jiah var marr venwsingg jit jiah Bixjiux-how, qaur ix uanjuann huathen jurqiw si si'angg, taumox venwjyr cagbak ee angsig, Bixjiux-how venwsingg jit jiah jin' suiw ee sraix. Ix suisii dne diauu sraix ee singdiongxqir(GROWTH MARKS), ix byy sniu beh be qir kir ix soxx laijurr oamr soxjai ee qiwig.

Guaw sniu, jex si jit xee lanw sniu beh duiqiuu ee quewdingg. Lanw longxx qamxsiu diyc jit jiongw tuisaklat, sniu beh ciauuat/ dne ann zi-guansingr/ iacc si nng qigtauu, jinwzip kacc quann ee qingxqair.

Campbell : guaw rair singzin, digvet qac'ir zirguansingr. [ciyr] Zirguann qisut m si bunrdee, si liw jnuaxngiu qaixsueh. Dirr cnedongg qoxsewqair sidai ee uixdai sinue, u nng qigtauu hertongw, Aujiux/ Diongqog/ Zidvunw jiaxee derkux, “xiongg” ham' qangx :ee dy' virr knuawjyr tenx/ taiwiongg/ unluanw/ hingdong sna' lenn, zinruii “ximx” ham' oamr/ damsib/ juiw quanlenn. Jit xee si dax/ lingrgua jit xee si damm.

Jiurr itvnuax lun, lamsingr si juxdongrjiaw, luxsingr virr knuar jyr virdongrjiaw. Guaw zinruii, jitt jiongw ee suuii, dirr Aujiux/ Diongqog dy' si kuriuw juxdyrsingr.

Guaw quancad cud, singdiongw dirr nasig gu'axkor cuthen ixjingg :ee, simliw byy siurr jewiog, lamsingr si qad osig nekudaiw, dairviauw unxsingr/ kacc viwsur; siongduir luxsingr si uah'ingw/ jngtna qaxx naxx iah'aw, huisiongg hniaxtauu, jex si sehongx bunhuar itdit qaur juewqin jiacc cuthen ee digdingx. Mrqyxx danghongx/ guansiw siarhue, luxsingr cingrcah siongdongx vyxsiuw, lamsingr si jin' ngiaxbak, jinghingg luirsu jiauw-aw. Dirr lanw ee siarhue, ui'id e cing qaxx jin' cnexbak ee lamsingr jixu qunzinn, luxsingr dy' e cah jiauxmngg, bogdig si inw langg' juwir.

Guaw jin' u cuwbi jitt diamw. Jiauw ee sewqair/ tuantongw siarhue, lamsingr dy' si goxhuex-jabsig, luxsingr vutjiw aw sunrjiongg/ ziuu, kiokk ixx jicii/ qoxlerjiaw ee qaksig junjai. Inwdorlangg qra qow hunx nng lui, sniax cimdimm/ qe :ee sriok buxsingr, qnghiangw/ quann :ee sriok qangx :ee.

Vutqyr, henrdai sehongx siarhue duxhyw dywhuanw: luxsingr si he dirr taujingg ee. Vixzu, dirr denrtuix-lai duw diyc luxsingr, rair qra by trngr kiw laii, viauxsi diwir (jiwjiyw ixjingg si anne). Narr jit xui luxsingr qniaa .zip .laii, javox e kia .kiw .laii niu jre. Juewqin luxsingr kaisiw cing javosnax, javox ee hogjongx kiokk byy qaixvenr. Lxamm-luw cavet suacc kacc huex .kir. Simrjiww u lamluw qiongriong ee taumodiamr, jex si jin' kyxciyr :ee, snewmia ee lingguann si kyr nng qighuar icii, zuqyw hongwkir, qandna' crunx pyx ziiw. [ciyr]

Liw narr kir quer Inwdo luxhingg, itding e qniax jit diyy, dairviauw juxdong guanjig/ SHAKTI quanliam si luxsingr, lamsingr si virdong :ee.

Knuar diyc jitt xee henrsiong sii, simlai sniu: jitt xee hertongw si ui' dycc laii :ee? Uirjnuaxngiu ham' lanw :ee uanjuann sionghuanw? Jitt nng xee uanjuann erdangr singlip ee, jit xee huanxngiar lxamm-luw simliw ee hunvet, jit xee si sneliw :ee. Jiurr lamsingr simliw-siong qongw, dy' si hibang jurqiw jit langg ! Guaw u quancad, jitt diamw si huisiongg ~ qiongg ee kinghiongr.

Mrqyxx, duer diyc “s.-siamxsih-s.”soxx cua cud ee hue'ingr suacc naxx kelauu tingg be lyc laii, cniurr JOYCE siaw FINNEGANS WAKE ee PLURABELLE soxx qongw “lanw qra jitt xee sewqair dingsinx qycjaiww congwjyr jit vxenr, hex itding jin' simsig.”

Jitt sii javox e sniu, or! Tniqongveh :a jinjniar jin' cuwbi! Lamsingr dyrr si kyr jitt jiongw tuisaklat uahtiaur .kiw .laii, luxsingr si hingdong guanjig, jex linw longxx jaix :ee. [ciyr]

Highwater : Liw si m si zinruii, luxsingr ingxuanw be venr kacc cimhuanrsingr?

Campbell : m si, luxsingr si jin' jikqik :ee, vutqyr inx m si cniurr lamsingrr hitt jiongw, si u xmoo lat/ simliw-siong ee cimhuan. Dng' inx cing lauwhingx dngg lexhok cuthen, suacc hro liw simtauu liac be dnia sii, inx e qongw, ah! Jex ham' guaw buquanx, guaw jixsirr qniaa quer ziiw.

Tniajiongr mng : JOSEPH, liw bad qongw .quer, henrdai lamsingr tingg dirr donglenqii cenn sniu' quw kir ar! Hiyrqyw ji' id si snax-jap-gua huer ee luxsingr muaw siwqer, cue byy sikhap ee duiwsiong, ham' inx nihuer siongdongx ee lamsingr dy' byy duarhanr. Guaw sniu dnaxx jex si lanw bunbingg ee guiqix ji' id.

Campbell : dng' liw ui' jit xee bunhuar jinwzip lingrgua jit xee bunhuar sii, qidiongx ji' id e hro liw dua dinxdang ee hangbok si lamluw quanhe (CULTURE SHOCK). Guaw kir Inwdo ORISSA hongxmng sii, dyrr u jitt jiongw qinggiam. Hitt sii genxqiur Inwdo dethak ixqingx jerje nii lor, danrsi duiww inx lamluw quanhe kiokk m jaix. Qniaa dirr qelo sii, qamxqag jin' qrii? Jex jingqingw guaw qaxnaxx dirr dyhh duw .quer? Soxx knuar diyc :ee, duliauw bre caiwsex ee dnar-aw si luxsingr ixgua, byy jit xee jabow, kyxlingg e knuar diyc nng xee qingxcad ciuw kanx ciuw qniaa, juadduir knuar byy jit lxamm jit luw kanx ciuw.

Kaisiw sniu .kiw .laii, guaw bad dirr jit xee sunn lamsingr ee kuanqingw, si irvikyx tagceh sii, hex si jit qingx javox haghau, byy jit xee jabow. Hex ham' lanw quanwsir ee sewqair uanjuann byy qang :ee. Dirr ORISSA sii, guaw dua ~ qniax jit diyy.

Inwdo cniurr jit qingx javox haghau, knuar byy luxsingr. Dirr ORISSA sii, guaw druar dirr vngrdiamr, u quiw xee siauwlenn sinsu jin' zedsingg jiapdai. U jit zit ervox, qidiongx jit xee cua guaw kir haixsuavox, gunw qniaa lehh qniaa lehh, huathen jurqiw ee ciuw m jaix dirsii ixqingx hro kanx lehh ar. Narr si hro JEAN knuar .diyc, m jaix e u sniaw qamxsiongw! Guaw anne sniu.

Guaw duiww ix qongw, “jin' qamxsia liw ee jiaudai.”

”m si, si guaw ee inghing, zircniaw qin'axzit si guaw ee qawzit ”

”Liw ee hiyckunwzit? Jnuaxngiu vruee guaw laii jiax? Liw qamxx byy sniu beh cua linw bow/ qniaw cud kir dycc sngw neh? ” guaw rinr.

“Or! Byy lor! Gunw byy jyr anne ee dairjir, cua bow/ qniaw cud mngg si jin' mahuann/ huiwkir :ee.”

anne, guaw jiacc jaix, dirr Inwdo, lamsingr ham' cur-lai langg ee sing'uac uanjuann tuatjed. Jex si hro guaw dua qingdang ee qinggiam.

Bly : JOSEPH, guaw qamxx ersaih mng liw jit xee bunrdee? Liw qongw, S. LAWRENCE ee luxhagsingx qra liw siong liauw jin' diongriaur ee jit kxyr, hro liw zinrbad, qaix danwsag liw vunxlaii sunn lamsingr ee juwiwlik, juanxhiongr quanwjur dirr snewmia vunxsinx. Zuqyw jitmaw beh duiww jit quaw Bixqog javox ginxaw qongxue, hro inx jit quaw iwqenr, liw e qenwgi inx jinrlik huatdenw inx srinx-siong lamsingr jitt bin? Iacc si luxsingr hitt bin?

Campbell : guaw e qra inx qongw, vniawmia cue cud linw snewmia ee jiwgiap, qycc hagsip jnuaxngiu jyr hyw, m quanw javox iacc si jabow longxx qang. Guaw duiww qauwiok ee tairdo dyrr si : yc hyw jitt jiongw qilingg, hex m si jit lexvair dyrr yc e hyw :ee, rair dauzip juanvo simhet, liw cud zuarr je lat, e quatding liw zinsingx pinxjid ee quann-qe.

Bly： liw si qniaa hiongr YEATS soxx qongw ee “qigjingg”. Liw ee cuwbi si cue cud jit xee langg ee qigjingg soxjai, qoxle inx zedsingg duer lecc jauxjongg?

Campbell : driyc! qoxbuw inx iongqamw hiongr jingg qniaa .kir.

Tarnas : Dirr liw qongw diyc sinue liongxsingr qaksig hunvet sii, guaw sniu diyc EROS/ PSYCHE inx jnuaxngiu sna' duw, marr sniu diyc GREEK sinue hiacc je lamsingr inghiongg, luxsingr inghiongg kiokk zuarr jiyw neh! Cniurr PSYCHE anne ee luxsingr inghiongg si jin' digvet ee le. Liw qamxx ersaih qongw jitt xee hunvet?

Campbell：sinue jongxsi li be kuix inx ee siarhue kuanqingw. Lanw ee siarhue jauxhiongr, ham' ixjaw uanjuann byy qang qaidnua ar. Jitmaw ee luxsingr ixqingx ui' qokk jiongw qabu qaixhongr .cud .laii, quewkir jiaxee qasu e kib inx juanvo ee siqanx/ jingsinn. Dnaxx luxsingr ixqingx u qihue huatdenw inx jurqiw ee surgiap lor. Jurr jaw ixlaii, sehongx bunhuar jixu lamsingr u kuanli qongw guaw sniu beh jyr jex jyr hex, jitmaw luxsingr marr u anne ee kuanli, vutqyr, sanxsingx liauw jit quaw landee. Qidiongx ji' id si luxsingr soxx suanw ee surgiap, si ixx lamsingr mosid, jerje luxsingr incuw songwsid luxsingr iwsig, inx dy' qra zinsingx qewdat he dirr duiqiuu viauxhen/ singjiu-siong, diwsuw huisiongg giamdiong ee bunrdee.

Tarnas : liw zinruii duiziog singjiu si kacc jauxhiongr lamsingr qewdat ...

Campbell : juadduir si. Jurr kaisiw dyrr si anne. Jitt diamw jixiaur knuar siongrr jaxqii gersut --- Qurjiyhkir Sidai ee gersut, simlai dyrr iuxsor lor. Luxsingr langsiong itlut si kia lehh ee lortexsiong, inx ee lat dirr inx ee sinkux/ junjai/ henxhen vunxsinx. Jerje tuantongw siarhue dy' zinruii, xmoo lat kixsingx qandna' sriok luxsingr soxiuw, aurlaii lamsingr iongxiuw jitt jiongw lat, si ui' luxsingr hiax taux .laii :ee.

Qycc laii knuar lamsingr ee langsiong, inx jongxsi decc jyr sniaxmic/ dairviauw sniaw, ngua jit qxur, lamsingr zinsiong dy' si dongrtair :ee. Itvnuax qongw, guansiw bunhuar luxsingr virr knuawjyr budjingw/ jurzenn ee snetnuawjiaw, lamsingr si uirr siarhue laii snewtnuar. Jex si zinlui siongrr juxiaur ee zirguanlun, ui' goxjaw ~ itdit tuann lyc laii qaur dnaxx.

HUN'INX/ AIWJINGG NNG HUESU

Favrot : Anne qongw .laii, dnaxx siarhue binrduir ee bunrdee, si jit quaw luxsingr duiqiuu singjiu ee simliw sniu' qiongg, suacc ham' kuriuw qangrkuanw simliw ee angsair hingsingg qingrjingx quanhe. Jex qamxx si henrdai hucex jiqanx ciangjai icii byy qaiww dngquw ee guan'inx?

Campbell : guaw byy zinruii bunrdee cud dirr angbow surgiap singjiu ee dauwngiaa, si angx :ee m jaix iong sniaw hongsid duiwtai ix hitt xee --- kyxlingg ersaih anne qongw --- kia dirr bangrqiudniuu duiwbin ee bow. ui' hagsingx hiax hro guaw u jitt jiongw texhue, qauwhak-diongx, vutsii dy' e knuar diyc jit quaw hagsingx dirr hagsip-diongx qaixvenr, venr qaxx huaipy muaxvag lixsiongw. Jiaxee dy' si guaw sing'uac-diongx siongrr suiw ee sikig, hro guaw knuar diyc snewmia jiamrr sringx quann dirr kongdiongx rue cud bixle ee guehbaii snuar.

Suibongw u quaw langg e dirr cutgiap au qewsiok jipid lixsiongw, marr u langg vnuawlo hongwkir. Quer liauw go dxangx, jap dxangx, zi-jap/ snax-jap dxangx au, dirr ciuquir hauriuw jurhue duw .diyc sii, jit bak dyrr knuar cud, dycc quaw langg ee angsair unxjunw inx ee bow huatdenw hro jniajyr jit xee uanjingw ee langg.

Hucex m si bersaih huatdenw qokk langg surgiap, danrsi qaix ixx angx :ee surgiap jyr juxiaur, bow vutqaix sohud duiww ginxaw ee jiauwqor. Zuqyw qang dirr jit qingx cur u nng hxun surgiap dongsii huatdenw, qycc horsiong byy qaujip huanruii, beh qra hun'inx quanhe icii diauu, rair siongdongx ciongjog ee air. Guaw ee iwsur si, angx rair u hro bow huatdenw jniajyr uanjingw ee iwguan, qycc u iwjir qewsiok hun'inx quanhe. Dirr jitt jiongw jinghongw-ha, hun'inx si m si e icii lyc .kir, diyh'air knuar si m si u qra jitt jiongw quanhe he dirr siongrr taujingg, qra hun'inx dongwjyr horsiong huatdenw jurgnow ee vuii. Rair jaix, dng' liw jywcud hisingx sii, vingrr m si uirr duiwhongx hisingx, si uirr linw ee quanhe laii hisingx. Jitt xee quanhe, si liw zinsingx did diyc singdiongw hiongr jingg huatdenw ee quanqenr.

Huanrnarr qra hun'inx knuawjyr aiwjingg buhan endngg ee langg, juewau jiong' e hamrzip mahuann. Hun'inx qinvunw m si aiwjingg ee buhan qewsiok, qyckacc junxkag qongw, hun'inx si jin' gryy langg ee jetbuaa, [ciyr] e duar hro langg singdiongw ee hunwlen. Zuqyw hun'inx be hro langg singdiongw, anne qethunx jit diamw aw dyrr byy hyxcur.

Qaxsuw jit xui luxsingr zinrdongg “ANIMUS”, e si jin' janw ee qingliw zinjaii. Vutqyr, dirr ix zinrdongg jurqiw snewmia lamsingr binrsiongr ee dongsii, kiokk e sitkir luxsingr jitt bin, venr qaxx qandna' duiqiuu singjiu. Vuthing :ee si ix vingrr byy iwsig .diyc, jitt jiongw pencax jiong' e duiww ix ee cuxqingw duar laii hurbin ingxhiongw: ix ee hun'inx jiong' e lyc qia.

Kennard : air qamxx si jap-zi sewqiw jiacc u :ee?

Campbell : hiaxee ylyw aiwjingg/ zinrding aiwjingg viw hun'inx kacc quann jit qib ee tuantongw gimcniur sizinn, huatsingx dirr Huatqog lamvo, PROVENCAL ee siquax, hro ham' aiwjingg iuxquanx ee landee, derr id vaiw puu jnriu daii-bin. Lanw tuantongw simlixhak e u hingwtauu huntiah aiwjingg guansor, marr si laijurr jiax.

Iokk jap-zi sewqiw vnuawdiongqii, cuthen jit xui uixdai sizinn GUIRAUT DE BOMEILH. Dirr ix jinwjingg, jerje langg duiww aiwjingg si sniaw ee bunrdee, ixqingx u jin' je tyxlun, danrsi BOMEILH si derr id xee qra soxu langg ee qongxhuad kurtew qycc uanbiw viauxdat “bagjiux si simx ee quancatjiaw, siwqer jauxcue iwsiong siaurqair hro simx.” Zuqyw bagjiux cue .diyc ee iwsiong, qycc u jit liap unziuu simx, aiwjingg dyrr e laii cutsir. Jitt liap unziuu ee simx, soxx iongxiuw :ee, si air ee linglik, m na qandna' iogbang, iogliam/ aiwjingg si uanjuann byy qang ee nng huesu, iok jixsirr xe vnuawsinx ee zedqongg ziiw.

“TRISTAN qapp ISEULT” ee qowsu, si lexjanr jitt jiongw aiwjingg ywvir siongrr liauxvutkiw ee jokpinw. MARK ongg/ ISEULT inx horsiong m bad snaqnir .quer, hro MARK jaix u ISEULT jitt xee bixluw si TRISTAN. Ue qongw dngw laii, dirr jit vaiw jenwjingx-diongx, TRISTAN driongr diyc dok jnxir, jauw kir cue hitt xee jer dok ee langg, qycc did diyc dirliauu, duiwhongx si ISEULT ee maxmah (marr si hyrjyr ISEULT). Liausiongx qiqanx, suacc air diyc ISEULT, mrqyxx TRISTAN jurqiw m jaix --- jinjniar si gong duardaix, jitt jiongw air hro langg vutdix-vutqag. Dngw laii au, qra a'jig MARK qongw, dirr DUBLIN duw diyc jit xee suiw qaxx byy langg viw e quer ee qoniuu.

MARK tniax liauw, simx dua dinxdang, qongw “jit xee qokongg dyrr si qaix crua jiacc suiw ee luxjuw jyr bow.” pair TRISTAN kir qra pnuarcua dngw laii. jit kir, duw diyc sna' lensuar sniu be qaur ee langrhiamw.

ISEULT maxmah uirr beh hro ISEULT/ MARK nng langg sna' iwair, qab liauw digjer hngtauu soxui airjingg iyhjuiw. Dirr dngw .kir ee lo-siong, TRISTAN/ ISEULT nng langg qra dongwjyr itvnuax ee juiw limx .lyc, sui' duirzip aiwjinghyy, hex si nng langg jiqanx ee sujingg, m si siarhue qamxjingg. Jex si jitt xee qowsu soxx beh tudhenw ee juxdee : henr cud aiwjingg/ hun'inx ee qinxdniux qapp duiwlip.

Dongzenn, jex qidiongx qycc kansiap diyc jit quaw qitnax ee bunrdee. Vixzu, inx qamxx sngr huanrjue? Zuqyw si, inx huan :ee, si m si berdangr kuanliong ee duarjue? Qiwzenn inx siongair si vutdix-vutqag, m si inx ee juriuu iwjir, si gorlimx aiwjingg iyhjuiw ee qetqyw, hex henxzenn berdangr sngr si huanrjue.

Aurlaii quixarr xee sizinn bad qaixsiaw jitt xee qowsu, qra aiwjingg iyhjuiw ee haurlik qongxjyr qandna' icii nng ~ snax dxangx. Dirr iyhlat bue srid jingg, inx huan :ee jixsiirr poxtongx jue, danrsi ixau neh? Inx huan :ee si berdagnr kuansia ee duarjue! Vutqyr jex si lingrgua jit xee uerdee.

Dyrr anne, aiwjingg/ hun'inx ee qinxdniux quanhe jniajyr jit xee danxtai qaixquad ee bunrdee. Dirr PROVENCAL ee gixgenn, air jitt xee zri si AMOR, dendyr siaw si ROMA dyrr si hun'inx. Ui' lingrgua jit bin huanxngiar cud, dongsii ee langg zinruii aiwjingg/ hun'inx si sionghuanw :ee.

Dirr ELEANOR of AQUITAINE/ MARY de CHAMPAGNE/ BLANCHE de CASTILE qapp inx qniaxzii ee hitt xee nidai, luxsingr muixx jit dxangx dy' u byy qang aiwjingg surqnia huatsingx, vingrr byy sngr sniaw sinbunn lor! Jitt lui ee dairjir, jerjiyw siaw dirr gimcniur sizinn ee siquax-diongx, qidiongx jit quaw, hro lanw cingcyw knuar .diyc, dongsii ee langg jinjniar zinrding aiwjingg/ hun'inx si nng huesu. Vixzu, jit xui luxsingr angx siw au, aiwzinn jauw laii qongw “qer hro guaw lar!”

“M si, m si, guaw air :ee si gunw angx.”

“Hex si byy kyxlingg :ee, liw qongw :ee qinvunw horsiong maudunw.” hitt xee aiwzinn jin' siurkir rinr. Qryr kir qaur huatdingg, huatngi qingwzenn pnuawquad jitt xui luxsingr rair qer hro aiwzinn! Gimcniur sizinn ee jokpinw u jerje jitt lui vutkyxsugi ee qowsu.

LIW TNIAR EE SOXJAI, U LIW EE SNEWMIA

Brown : Liw si qongw dongsii dairvorhun langg dy' u luirsu ee aiwjingg qinggiam?

Campbell : Guaw byy anwsngr qongw muixx jit xee langg dy' si anne, danrsi u anne qinggiam ee langg si jin' je. TRISTAN/ ISEULT ee qowsu e hro hiacc je langg u cuwbi, guan'inx dirr jiax. Diongsewqiw uirr aiwjingg/ hun'inx ee qinxdniux quanhe cue cutlo si WOLFRAM von ESCHENBACH siaw ee PARZIVAL, si derr id pnix bunn qra aiwjingg/ hun'inx lenn jywhuew laii dramm. Si guaw siongrr qac'ir ee qowsu ji' id.

Kennard : Qamxx ersaih qongw hro gunw tniax?

Campbell : Hex si jit xee vutjiw dngg ee qowsu ...

WOLFRAM von ESCHENBACH (iokk 1215 nii sii ) siaw ee <Singwvuex Tuanqii>, ersaih qongw si uirr “TRISTAN qapp ISEULT” jitt xee uixdai tuanqii ee uanqetpnix, soxx beh qaixquad ee landee, si Diongsewqiw hitt sii poxpenr quandiamw: aiwjingg/ hun'inx ee liongxlann. Inx zinruii, aiwjingg e uirr snewmia duar laii dua jaieh, in'ui duiww aiwjingg cuxhuat dyrr si siw.

Jitt diamw jin' kurtew viauxhen dirr GOTTFRIED von STRASSBURG siaw ee <TRISTAN> qidiongx jit bo. Suxiongrlangg BRANGIEN si ISEULT maxmah pair laii qor aiwjingg iyhjuiw :ee, dng' BRANGIEN huathen iyhjuiw virr TRISTAN/ ISEULT limx driau au, jin' diyhqniax duiww TRISTAN qongw “liw ixqingx limx lyc liw ee sixbongg.”

”Guaw m jaix liw decc qongw snaiw.” TRISTAN tniax liauw anne qongw.

Jitt jiongw qik koxtangr --- aiwjingg ee kow, snewmia ee tangwtniar --- si Diongsewqiw langg qik cuwbi ee juxdee. Liw erdangr qongw, liw ee snewmia duxx si liw tniar ee soxjai; snewmia ee vunxjid si kyr tniar ee qinggiam icii ee.

Suar laii, TRISTAN qycc qongw, “zuqyw liw soxx qongw ee siw si jriw gunw ee sujingg virr huathen au, e binrlimm ee cuxhuat, guaw jiapsiu. Narr si rair lyc derqak ingxuanw ee sixbongg, guaw marr jiapsiu.”

jex si jit qxur jai dnaw byy qniahniaa ee ue. Dirr hitt xee nidai, jinjniar siongsinr derqak ee junjai.

Jiurr guaw soxx sniu .diyc :ee, duiww suxiongrlangg ee ue siongrr hyw ee dab, si MEISTER ECKHARDT ee ue “air m jaix tongwkow si sniaw.” dyrr si lyc derqak, jixiaur u soxx air ee langg sna' pnua, byy snaiw tangx qniax :ee. Jex dyrr si WOLFRAM ee <PARZIVAL> soxx binrduir ee tairdo. Sursit-siong, Diongsewqiw erdangr kikhok “TRISTAN qapp ISEULT” qowsu henx cud aiwjingg/ hun'inx nng qigtauu bunrdee, kyr :ee dyrr si <PARZIVAL>

----------------------------------

Singwvuex qowsu beh qongw :ee, si siongrder dyrr dirr liw simdiongx. Qidog qamm diyc amwsi, jniajyr jicjair lanw jurgnow snewmia ciauuat lat ee siongrdingx.

--------------- J. Campbell

Campbell : Singwvuex tuansuad soxx beh cuxliw :ee si hnghuiwvox ee bunrdee. Hnghuiwvox si sniaw? Erdangr ui' T.S. ELIOT ee six “Hngde (The Waste Land)” [1922] cue diyc snuawsyh. Jitt pnix soxx tecud ee bunrdee si, beh jnuaxngiu jiacc erdangr qra hngde juanxvenr, jniajyr vah huex dua kuix ee vuii toxde? Hngde jriw jit xee langg quer ee zidjiw, m si ix jurgnow jinsit sing'uac ee soxjai, si u-tew-byy-hxunn ee soxjai. “snewmia rair jnuaxngiu jiacc erdangr ui' jitt xee vunwsywduix qniaa cud laii?” T.S. ELIOT dirr lingrgau jit xee six anne mng.

Diongsewqiw soxx binrduir ee cuxqingw si, virr iauqiuu siongsinr inx byy siongsinr ee sinwgiongw/ ham' jurqiw byy air ee langg qethunx. Inx ee derui si qewsingg laii :ee, m si kyr jurqiw siangciuw jnevniar laii :ee. Liw ersaih qongw inx quer :ee si byy diongho singsit ee sing'uac. WOLFRAM knuar cud qidiongx itpenr hnghuir.

Mrqyxx rair jnuaxngiu jiacc e hro hngde jniajyr vuii too neh? WOLFRAM zinruii, qenwlip jit xee hyw bongiu/ jit xee jinsit ee jurgnow.

<PARZIVAL> ee qowsu, ui' ix ee vaxah GAHMURET, jit xee kiaa bew ee kisu, marr si morhiamxqax kaisiw, dairsingx haurlyy dirr BAGHDAD ee CALIPH. WOLFRAM e qra GAHMURET siaxjyr uirr MUSLIM qunongg jinrlik ee Qidokqaur kisu jitt diamw, dyrr kyxiw huanxngiar cud, ix sukyw ee sewbin si tiaur cud Qidokqaur tuantongw ee koko'aw, qycc zinrbad diyc, ISLAM/ Qidokqaur qisit si jixmuai jongqaur. GAHMURET jyr CALIPH vorha qiqanx, bad kir quer ZAZAMANC, si jit xee olangg qongjuw BELKARNE tongxdi ee soxjai, GAHMURET dirr jiax camqax jit crur buxge vixsair did diyc quanqunx, qycc pah trer laii cimhuan ee duiwdik, jniajyr BELKARNE ee angsair, hro BELKARNE huaiun, mrqyxx ginxaw iauxx bue cutsir, GAHMURET suacc diam ~ likuix.

Dngw laii WALES. Dongsii ee luxongg si HERZELOYDE. GAMURET qycc dirr jit vaiw vixbuw-diongx did diyc singwli, jniajyr HERZELOYDE ee angx. Ngua jit qxur qongw, jitmaw GAMURET si nng xee luxongg ee angx. Vutqyr, HERZELOYDE ursinx au, GAMURET qycc jauw dngw kir BAGADAD haurdiongx CALIPH, aurlaii, siw dirr jenwdniuu.

Ix hitt xee cutsir dirr Qinrdangx :ee qniaw si ox-vec vnuawhongx'aw, hyr jyr FEIREFIZ, dirr WALES cutsir hitt xee dyrr si PARZIVAL. Ngua jit qxur qongw, PARZIVAL jitt xui Qidokqaur kisu, susit-siong qycc u jit xee MUSIM ee hniadi, jixsirr ix m jaix ziiw.

PARZIVAL ee maxmah, byair qniaw cniurr vaxvah hitt hxingg, quatding byy be hro qniaw jaix zimrhyy iuxquanx kisu ee dairjir, dyrr vnuax kir luirsu CONNECTICUT ee soxjai, ngx-miaa-iab-sner, kyr jingwjyh cri qniaw duarhanr. PARZIVAL jurr tauu dyrr m jaix u kisu jitt huesu, mrqyxx ix sinkux lrauu ee si kisu ee hueh, si cutsir beh laii jyr kisu ee, cniurr inx vaxvah qyquir ee simlingg, suibongw ix jurqiw m jaix!

Iokk jap-go ~jap-lak huer sii, u jit zit, dirr cann nirr knuar diyc snax xee kisu kiaa bew qingquer, zinruii inx si tensair (maxmah anne qra qar :ee), sui' qui .lyc .laii. Snax xee kisu duiww ix qongw, “kiw laii, liw benw quirvair gunw, gunw si kisu, laijurr ARTHUR ee hongqiongx.”

“kisu si sniaw? Rair jnuaxngiu jiacc e jniajyr kisu, qycc erdangr jinwzip ARTHUR hongqiongx? ” PARZIVAL mng.

Duiwhongx qra kisu ee dairjir qongw hro ix tniax.

PARZIVAL qinw jauw dngw kir, qra maxmah qongw “guaw beh jyr kisu.” maxmah jit tniax krir qaxx hrun .kir, cnew kiw laii au, quatding beh hro PARZIVAL did diyc qauwhunr. Jyr jit tyr siauxtiux'aw snxax, qycc hro ix jit niaw lairbin ixqingx snex sxenx ee ticqah, cing lehh dyrr jauw .cud .kir. Maxmah duer dirr aurbin, byy sniu .diyc, dirr jit xee uanlo dngxqag soxjai, maxmah suacc ui' bew-dingw siag lyc laii/ siw .kir. Jex si PARZIVAL kisu sing'uac ee kixtauu --- sad siw jurqiw ee maxmah. Sidjai si byy hyw ee kaisiw.

PARZIVAL kiaa bew jit zit, amwsii kir jit jxy hiongcuanx ee siyw sniavyw, juxlangg GURNEMANZ kisu, vunxlaii u jit xee qniaw, dirr buxsut vixsair sii quewsinx .kir, jitmaw qandna' cunx jaboxqinaw vuepnua dirr srinx-vnix.

Dng' PARZIVAL cuthen sii, sniavyw ee langg liahjyr si duarmiaa tangr vnuawtnix ee angg kisu, zedlet huangingg. Vutqyr, PARZIVAL jit trngr driau jenwqah, junxvi sew sinkux sii, sinhun dyrr cingcyw lor! Ix qui' sinkux longxx si ticsenx, sniavyw ee langg draur snaqang qra ticsenx crid driau au, qingwzenn henr cud :ee si siauxtiux'aw snxax.

Mrqyxx GURNEMANZ kiokk knuar cud PARZIVAL m si poxtonglangg, qewsiok jiaudai ix, qycc qar ix kiaa bew ee qisut/ kisu jenwdaur ee qikiauw qapp quijig..., Qidiongx jit diauu si : byy mng byy vit'iaur ee bunrdee. Aurlaii jingwbingg jitt diauu quijig duiww PARZIVAL m si hyw dai.

GURNEMANZ qiwzenn hiacc himsiongw PARZIVAL, jurzenn e sniu beh qra jaboxqniaw qer hro ix. Anne jyr u nng xee hyxcur, hro jurqiw qex jit xee qniaw/ jaboxqniaw u angsair.

PARZIVAL tniax liauw kiokk sniu, guaw byair langg hro guaw bow, guaw beh qaqi kir ngiaa diyc jit xee bow. Jex si jit jiongw sinx dethak ee kaisiw. Linw qamxx u bingvik? Ix sniu beh vaixtuad siarhue qax hro ix ee mic. Incuw, ix likuix sniavyw, jitt sii ix ixqingx jin' bibiau kiw venwhuar, jniajyr jniawqangw ee kisu. Byy hro bew qarqniux, jairr bew suiir qniaa, jitt xee iwsiong si Diongsewqiw sinue/ qitnax jerje sinue jin' diongriaur ee iwsiong. Bew siongrdingx jurzenlat, kiaa bew :ee siongrdingx simlingg kongwjewjiaw. PARZIVAL quwjai bew suiir qniaa, viauxsi ix ixqingx uanjuann kongwjer jurzenn --- ix jurqiw simdiongx jurzenn ee vunxsingr. Hex si jit jiah qyquir ee bew, iongxiuw jit liap ham' PARZIVAL qangrkuanw qysiongw ee simx.

Bew jair PARZIVAL qniaa liauw jit zit, dirr honghunx sii qra cua qaur lingrgua jit jxy sniavyw, luxongg si jit xee nihuer ham' PARZIVAL vnee je ee jaboxginxaw hyrjyr CONDWIRAMURS (amwsi: air ee inxcua). PARZIVAL lixsow-dongzenn trngr driau jenwqah, jiapsiu sew sinkux ee kuanxdai. Sinkux sew cingkir ngua jit sux kinsangx ziu'nngw ee dngsnax, qaix hiyckunr sii, qra cua kir jit dniux bincngg-vnix.

Kunr qaur vnuawmii, mr! u dairjir huatsingx ar. h.-huepuw-p.-diongx PARZIVAL qamxqag knuar diyc CONDWIRAMURS qui dirr ix ee cngg-vnix decc kaur. “liw rair qui :ee si siongrder, m si guaw, zuqyw liw sniu beh jit dniux bincngg, guaw sui' niu liw.””liw narr dap'ingr be cimhuan guaw, guaw guanrir kir liw ee cngg-dingw qra guaw ee qowsu qongw hro liw tniax”, CONDWIRAMURS anne rinr.

Hitt si CONDWIRAMURS ee cingrcah, WOLFRAM anne siaw “ix cing :ee si siyjenr ee hogjongx : jit niaw vnuawtauwbingg ee kunwsnax.”

CONDWIRAMURS dyw dirr bincngg-dingw, naxx hauw naxx qongw “ guaw ee sniavyw duxx virr vauuii, jitt xee sewqair siongrr qiongg ee kisu CLAMIDE, sniu beh jiamwiuw jitt jxy sniaxvyw, qycc qiongg beh cua guaw jyr bow.” knuar .diyc .byy? Qang jit xee juxdee jaiww crur cuthen! CONDWIRAMURS cniurr PARZIVAL qangrkaunw, sniu beh huanxkongr miarun ee anvaii.

“Mrqyxx liw knuar,” ix qewsiok qongw “guaw ee sniavyw u jit jxy jin' quann ee tah, guaw qamguan ui' tah dingw tiaur lyc laii, marr m guan qer hro hitt xee langg.” hitt xee kisu pair cud jit dxuix qundui laii vig guaw qer, niaxdui si ix ee duarjiongqunx.

PARZIVAL qongw “benw huanlyw, bin'axjaiw guaw e kir qra taii siw.”

”Taiww hyw lor!”

Derr zi zit tauwjaw, sniavyw ee diauwqiyy virr vangr .lyc .laii, duer diyc jit jun hyrdangg sniax, knuar diyc jit xui angg kisu kiaa bew, ui' sniavyw-lai ciongx cud laii, itdit hiongr jingg ciongx, ciongx zip digqunx-diongx, ciongx qaur hitt xui duarjiongqunx ee binrtaujingg, nng xee ciuw, dyrr qra duiwhongx pacdyw dirr tokax, jit xee katau'ux sui' deh dirr duiwhongx hingkamw-dingw, jit ciuw qra taukuex henx .kiw .laii, cud ciuw beh qra tauu jamw lyc laii sii, duiwdik qongw “guaw dauhangg!”

PARZIVAL qongw “hyw! Anne liw kir ARTHUR hiax, qongw liw si guaw ee langg, si guaw pair liw kir ee.”

Qangrkuanw ee dairjir huatsingx quixarr vaiw au, ARTHUR kaisiw sniu, mr! Jitt hy zinbut, lanw vutqaix cywsid qihue! Pair langg kir cue PARZIVAL, sniu beh qra cue laii jyr vorha.

PARZIVAL pacvai duiwciuw dngw laii qaur sniavyw sii, knuar diyc CONDWIRAMURS ixqingx qra taumox srex jyr hurzinlangg ee mongiu. Ngua jit qxur qongw, ix ixqingx zinrding jurqiw si PARZIVAL ee kanciuw ar. Inx dy' si jurguan suanw liauw duiwhongx, hitt mee, inx kunr jywhuew.

Vutqyr, WOLFRAM anne siaw hitt amr ee jinghingg, “ dnaxx kiongxqniax byy u quiw xee luxsingr hnuahiw hitt ngiu quer jit amr.” guanlaii, PARZIVAL lenrr bongx dyrr byy bongx CONDWIRAMURS .jit .xe, ix qinvunw m jaix lamluw jiqanx ee dairjir. Lensuar nng amr, inx kunr qang jit dingw bincngg, kiokk sniaw dyrr byy huatsingx. Qaur liauw derr snax amr, PARZIVAL sniu kiw maxmah bad qongw quer siylamw ee jitt huesu, CONDWIRAMURS marr hiongr ix qaixsueh hucex si ittew :ee.

Suar lyc laii, WOLFRAM anne qongw “cniaw qokk xui liongjingg guaw didjiab qongw cud hitt amr ee jinghingg, inx ee ciuw/ kax dnii qaxx ann ~ ~, naxjunxx inx jitt sxer beh anne dnii jywhuew lehh.”

Jitt xee qowsu beh tuandat ee quanliam si : bactew ee qethap si air siongrr quann ee denxhen, did diyc singwqethuar :ee si air, qidiongx byy su'iaur sinhu qaiwzip. Dirr jitt xee qowsu, air si dirr hun'inx-lai virr uansingg, hun'inx dirr air ee snuabuexliux. Dyrr anne, WOLFRAM qra aiwjingg/ hun'inx quanhe cua qaur jit xee juansinx ee quandiamw. Diongsewqiw ee kisu virr zinruii qaix u go jiongw bixdig : jetjer/ iongxkir/ diongsingg/ kiamhix iuxlew/ air. PARZIVAL kuriuw jitt go jiongw bixdig.

Favrot : jitt xee qowsu duiww dongsii ee Aujiux duar laii sniaw ingxhiongw? Zuarr je langg tak .quer? Iacc si qongw jixsirr liw jyr genxqiur sii soxx lyc ee pnuawduanr?

Campbell : qaixsiaw ARTHUR tuanqii cniurr haixpylong jit ingw rig quer jit ingw. Dairsingx cuthen :ee si dirr NONMOUTH ee GEOFFREY, iong LATIN siaw ee <HISTORY OF THE KINGS OF BRITIAN>. Qongw ANGLO-SAXONS iauxx bue laii jinwjingg ee BRITIAN jerje qokongg tuanqii, siongrr jaw jit xee qokongg ee miaa hyrjyr BRUT, BRITIAN si ui' BRUT laii ee. ARTHUR virr biyue jyr dexkongr ANGLO-SAXONS cimliok ee iongxqamw qokongg.

Jitt vunw ceh, inxkiw jit pyx qycc jit pyx siaw CELTIC inghiongg/ dejaii ee liuhingg. Jitmaw, diongriaur :ee, vingrr m si jitt xee tuanqii si m si ingxhiongw dongsii jerje langg, si henr cud hitt sii jingxqyy sukyw jauxhiongr. Jiaxee ixx AUTHUR jyr dejaii ee jokpinw, dy' si hro dongsii ee Aujiux erdangr zinrdongg Qidokqaur --- hex si laijurr sewqair lingrgua jit tauu ee Qinrdangx, si guarlaii ee jongaur, ui' jap-id/ jap-zi/ jap-snax sewqiw coqii jiacc kaisiw ham' Aujiulangg sna' ngaqab. Jap-snax sewqiw sii, dirr FLORENCE ee jit xui JOACHIM (kyxlingg si juxqaur/ iacc si siudyrngi ee ngirdniuw), siaw liauw <Jingsinn ee Snax Xee Sidai> ee suangenn.

Lairbunn jriw cud:

Jingsinn ee derr id sidai si JUDAISM qapp singwve sidai, zimrbu si uirr Qidokqaur ee cuthen/ siongrder huawsinx Iasox jyr junxvi.

Derr zi si singwqniaw/ qauwhue ee sidai, zimrbu si beh uirr sewqanlangg duar laii tnidingw ee sinwsid.

Derr snax si singwlingg sidai, e dirr jap-go sewqiw denxkuix, qaur sii, singwlingg jiong' e didjiab duiww vecsner qongxue/ qauwdy inx, qauwhue ee jewdo jiong' cuhiongr ziok .kir.

Anne ee lixlun virr huanxvog jyr vuervuan jniawdy, sriu diyc kenxjig si jin' jurzenn :ee, mrqyxx iuguann inxkiw siongdongx dua ee juwbak. Singwvuex qoxvyw duxx si kir cam'uw jitt jiongw sinx qinggiam ee qoxvyw. Singwvuex kisu --- m quanw si PARZIVAL iacc si GALAHAD --- dy' virr biyue jyr cing jit sux naxx huew hiacc iam ee angsig jenwqah, dirr singwlingg qangwlimjed (PENTECOST) hitt zit laii qaur ARTHUR sniavyw. Soxiw qongw, singwvuex kisu ee iwgi naxx Qidog, marr si qongw, inx longxx si singwlingg ee qangku.

Jitt jiongw qongxhuad si jitt vunw ceh siongrr dua ee digsig, si vuerli jniawtongw Qidokqaur mosid.

Campbell : “TRISTAN qapp ISEULT” ee qowsu iokk cuthen dirr 1160 ~1170 nidai, jap-zi sewqiw au vnuar qrii, cuwbi :ee si, Inwdo ee KRISHNA CULT marr dirr qang siqii cuthen. Jiurr sinue tuansuad, tensinn KRISHNA zedluann jit xee u angx ee luxsingr RADHA.

Inx jitt nng xee aiwjingg qxow, longxx si pacpuar lexgii/ ludhuad ee qimwki, dairviauw tiaur cud lixsingr qaiwhan, jinwzip huilixsingr lingxhik. “KRISHNA qapp RADHA” qowsu ee digvet soxjai, si jitt vaiw soxx kansiap ee luanjingg, simrjiww si jit xee tensinn.

Ylyw jitt dnxua longrbanrsuw siongrr u miaa ee jokpinw si < Knuar Guu Ginxaw Quax (GITA KOVINDA)>, jokjiaw si jit xee siauwlenn ee BRAHMIN, jygu ham' KRISHNA luirsu, ix ham' jurqiw GULU ee jaboxqniaw zedluann, jiyh KRISHNA/ Radha ee qaksig uirr jurqiw/ aiwzinn laii huatsniax. Jitt vxo duwjog ham' “TRISTAN qapp ISEULT” uanjuann qang siqii ee sanxbut.

Lingrgua, zuqyw lanw qra siqanx hiongr jingg sag jit sewqiw, kyxlingg si vnuar sewqiw jingg, Zidvunw luxsingr MURASAKI siaw ee <THE TALE OF GENJI>, suibongw si aiwjingg qxow, marr si jokjiaw duiww “surbut ee qiwhy”, duiwingr liauw Vuddyy “zinsingr jongxsi koxtangr” ee qawsi. Dirr cavutdyx qang jit siqii, ui' Aujiux laii quar Diongqog Haiw jitt pxenr derkux, lanw erdangr knuar diyc jit jiongw qra aiwjingg tesingx qaur lingsingr qingxqair ee quiwjogsid aiwjingg.

Dirr ISLAM sewqair, aiwjingquanx si duer SUFIS jywhuew cuthen. < Jit Cingx Kxongr Jit Xia (THE ARABIAN NIGHTS)> erdangr knuar diyc berjiyw ham' juadduir aiwjingg iuxquanx ee qowsu, qidiongx hro langg liahqongg ee luxjuxqag, dy' si jit quaw sinqer vutvinghuann ee luxsingr.

Dongsii, juann sewqair dy' si jitt lui ee mic.

Jitmaw ee SUFIS qauwdoo e qra lanw qongw, jitt jiongw quanliam si Aujiulangg caux inx :ee, qycc caux qaxx m driyc .kir. Jex byy uanjuann si sursit. Qaxsuw jitt xee quanliam jinjniar si Aujiulangg caux SUFIS, mrqyxx byy caux m driyc .kir, jixsirr dingsinx qaixsueh ziiw! Dirr danghongx, qowsu ee luxjuxqag dy' si luxsingr digjid ee siongrdingx, tongsiongg siarhue derui viw lamjuxqag qe jit gamw. Danrsi sehongx qowsu luxjuxqag ee siarhue derui kiokk si vnee jre kia ee, zircniaw dairviauw :ee si mow jit xee qywzinn, m si mow xee luxsinn.

Suibongw si qang jit xee quanliam, dirr danghongx/ Aujiux ee viauxhen, kiokk u jin' diongriaur ee cavet. Mrqyxx jiurr Aujiux laii qongw, PROVENCAL ee qimcniuwsizinn (TROUBADOUR) qapp GERMAN ee sijingsizinn (MINNESINGER) jiqanx, marr u jingcax --- m quanw nng xee guan'ir dy' si “cniur aiwjingg quax”. Dirr FRANCE, virr liuluann ee duiwsiong, ciangjai si siongrliuu siarhue ee quiwhuzinn, dirr GERMAN, jinghingg m si anne lor! Sijingsizinn ee tairdo, erdangr ui' uixdai sijingsizinn WALTER von der VOGELWAIDER ee ue huanxngiar cud, “WOMAN' si viw “LADY” kacc qyquir ee zirganw. Hro ix ylyw :ee, si hiaxee vinghuann/ kyxair ee suiw jaboxginxaw.

Diongsewqiw ee aiwjingquanx hiongr byy qang honghiongr itdit endngg quewkir. Mrqyxx dongsii, ui' sewqair jit tauu qaur lingrgua hitt vingg, kongkir-diongx ciongbuanw singwair sinviwjuxgi (EROTIC MYSTICISM).

huedngw tauu iac