Daigiw Siuiongw Qongxue

(Cid-jap-lak) Jit nguaw dnirmuaw, jit jangg ciu decbeh dng diyhh anwjnuaw

Buanxjiog ee derui, diyrr si did diyc jabhunx huwquir ee derui, naxx cincniu juiw drew dirr nguaw nirr, drew qaur dnirmuaw-m. decbeh rig .cud .laii. Hitt sii narr qycc tnrix jit dih aw juiw lyc .kir, hitt xee nguaw drew be diauu, diyrr suisii rig .cud .laii. Soxiw langg dirr hitt xee jabhunx ciongciog ee derui, cenban m tangx ngwbang beh qycc did diyc dua derui dua huwquir. Iaxx arr lanw langg decc guiqib ee sijun, cincniu jit jangg ciu hro hongx pah dyw, decbeh dng .kir .ee siangg kuanw, ciuw narr siyxkuaw kir kap .diyc diyrr dng .kir. Langg decc guihiamw ee sii, iarr diyhh jabhunx diwir, m tangx q.-qniahniaa-h., diyhh d.-diamrjing-j. zimxnai jiacc hyw. Narr zuxx qib diyrr zuxx hai.

(Cid-jap-cid) Dro quer siarhue diyhh siamxvi jiacc hyw

Beh dro quer siarhue, vingsii rair juwir ee dairjir, iong pixlunrue qongw hro linw tniax. Juer hongtaix ee sii, lyc dua ho, kiw dua hongx, kavo diyhh cud kuiwlat, kia ix jai jiacc ersaiw .did. Narr byy, suisii e hro hongx pah dyw .kir. Iaxx arr dirr angg huex lriuw lxik jin’ suiw ee soxjai, lanw ee bagjiux diyhh knuar duiww kacc quann jit jann ee soxjai, dikkag m tangx itbi knuar hitt xee suiw. Narr si qanda’ knuar hitt xee suiw :ee, lanw ee simqnuax e hro ix luan .kir. Iaxx arr lanw qniaa snualo, qniaa qaxx jin’ guihiamw ee soxjai, diyhh qnuaxqinw uat dywdngw .laii jiacc hyw. Narr byy, qniax qnir e gu diyc how lxongg, beh jauw suar e vuac lyc kamr-kax kir siw. Jex dy’ si qar langg diyhh siamxvi guihiamw ee iwsur.

(Cid-jap-veh) Beh ing langg ee viwquad

Juer langg’ ee tauqex, juer langg’ ee siardniuw, ixqip qnuatniax ee jniursix, inx hitt xee langg beh suxiong sinlyy siaruann jit’uann ee viwquad, jingg ixqingx qongw liauw lah. Qycc dingg .jit .xe beh qra linw qongw, diyrr si beh qiyr ix ceing, qar ix vanrsu, dikkag m tangx sniu’ kokhingg. Narr si sniu’ kokhingg, vingsor jin’ kinn, itbi sniu beh siux qonghau ee langg, iarr suar e jiamrjiam lirkuix, byy beh druar. Iaxx arr qapp ving’iuw qauvuee, dikkag diyhh qingw hyw :ee jiacc tangx qapp ix laiongw. Setsuw byy qingw hyw-pnaiw, lamrsamw qauvuee, gauu vaqed, gauu tiamxmi, hitt kuanw pnaiw langg e jin’ je uaw .laii, suar e hro ix hai .diyc. Soxiw diyh’air jabhunx jimjiog jiacc hyw.

(Cid-jap-qauw) Hamiongw zin’air ee simqnuax si derr id iauwqinw

U zin’air ee langg, ix ee simde kacc dua, zicniaw vutjiw tiongwkuair. Ix soxx air ee hingrhog, iarr dua qycc je qycc quxdngg. Ix soxx juer ee dairjir iarr u jit jiongw vutjiw tiongwkuair ee kiwsiong, hro langg’ knuar liauw e hnuahiw. Iaxx byy zin’air ee langg, ix ee simde ehdec, dniardiyc kacc akjag. Ix ee hokkir kacc vyc, ix soxx diwimr ee qniaxsunx, iarr byy tangx quxdngg hiongxhog. Uirr anxnix, vingsii ix soxx juer ee dairjir, iarr jurzenn u akjag ee kuanxsid, hro langg’ knuar diyc e iar e creh e krir .siw. Soxiw guaw krngr linw dairqex, diyhh vingsiongsii hamiongw zin’air ee simqnuax si derr id iauwqinw.

(Veh-jap) Diyhh uiwqingr dairzinn iarr diyhh texsud siauxbinn

Qoxjaxlangg u qongw, diyhh uiwqingr dairzinn. Jitt xee dairzinn diyrr si u dikbong ee langg. Lanw narr erhiauw did tangx junqingr u dikbong ee langg, lanw ee hongwsur ee simqnuax jurzenn e byy .kir, diyrr si m qnaw lamrsamw sniu, iarr m qnaw lamrsmaw juer. Qoxjaxlangg iarr u qongw, diyhh textiab siauxbinn. Siauxbinn diyrr si lydong ee langg. Narr erhiauw tangx texsud lydong ee langg, ix jit diamw qiaugno hingvy ee simqnuax jurzenn e siaubet, zii tniawtangr jitt xee lydongrjiaw. Cincniu jitt kuanw, s.-siongrha-h., langg langg hyhyw, vutvingg vutbuanw ee sniax, juadduir e byy .kir.

(Vec-jap-id) M tangx sniu’ quer diongho iarr m tangx sniu’ quer lingxdam

Lanw langg ee simqnuax, narr sniu’ quer diongho, soxx juer ee dairjir iarr sniu’ quer qanghux, diyrr bylun cing, jiac, kia ixqip zidsiongg itcer ee dairjir, vutdan qaqi juer liauw sniu’ qanghux, ham’ vadd langg ee dairjir dniardiyc ter ix xmii xmii sniu, xmii xmii congr, tniar langg cincniu tniar qaqi. Ing jitt kuanw ee simqnuax jicjiab vadd langg, uanjo vadd langg, vadd langg itding e hnuahiw. Mrquxx ursii aw lanw qaqi dirr hitt jingsinn-siong budjid-siong, vehvec liauw, byy diongg. Iaxx narr si simqnuax sniu’ lingxdam, sniu kacc cinwcaiw, diyrr duiww lanw qaqi ee dairjir iarr byy diwir, vangr ix byy-iauw.-byy-qinw, duiww vadd langg iarr byy zedsimx, l.-lyxcyw-c., cinwcaiw qra langg’ vran. Jitt nng kuanw iarr longxx kacc penx dirr jit vnix, kacc byy tywdongr. Soxiw juer qunjuw ee langg, iarr m tangx sniu’ quer diongho, iarr m tangx sniu’ quer lingxdam. Narr quer diongho diyrr ursii e jiac langg’ ee songg. Narr quer lingxdam, ursii e hro langg’ hiamm.

(Veh-jap-zi) Diyhh ing unhyy cam’ qiamsunr voxqiur jiacc hyw

Dairkair u jetgi ee langg, ix ee singwde kacc qiglet, ingwqaix qaqi qakgo, ing unhyy ee taiwdo laii voxqiur jitt xee kuatdiamw jiacc hyw. Narr e anxnix, kyw benw qapp langg’ sna’ jnex, jurzenn an’unw. Iaxx arr u did diyc qonglyy qapp bing’u ee langg, ingxx e hro vadd langg uanwhun. Soxiw ingwqaix diyhh kiamvix sunwsun laii dihongg jiacc e anjuann. U jetgi ee langg narr kiamr unhyy, u qongbingg ee langg narr kiamr kiamsunr, diyrr qniax liauw jaxmngw e vairham.

(Veh-jap-snax) Sewqanx bxan su cincniu lxee-aw-kuanw dngw laii dngw kir

Sewqanx bxan su cincniu lxee-aw-kuanw, vutsii dngw laii dngw kir byy dniardnia kuar diauu lehh. Pixlunrue laii qongw. Lanw langg soxx sniu soxx juer ee dairjir, longxx berdid tangx jiauww lanw ee iwguan, quer .laii iarr sitvai, quer .kir iarr dingdnaa. Iarr kyxiw mrbenw huanlyw, narr unn unn aw danxhau siqix, diyrr dniardiyc e singqongx. Iaxx arr dagg hxang dairjir longxx erdid tangx jiauww lanw ee simguan, soxx juer ee daijir qaxnaxx sun hongx sraiw junn tiongr qaxx be qongw .did, iarr m tangx hnuahiw. Narr berhiauw tangx qingxqair laii hongwsur, diyrr vadd zit aw dniardiyc e sitvai,duirlyc sit’ir ee qingxgu iarr byy dikkag. Iaxx arr quw byy dairjir, iarr m tangx kyr ving’anx. Byy dniardiyc liamvnix e venwdong. Iaxx beh juer dairjir, dirr kixtauu iarr m tangx sniu qongxx jitt diauu dairjir jin’ kunwlann, juer byy hxuad, suacc m qnaw kixciuw. Narr si erdangr pacpuar hitt xee lanquanx, ixau diyrr jin’ iongngi.

(Veh-jap-sir) Siu’iongw simsinn ee qanghux

Lanw langg beh siu’iongw simsinn, cincniu pah qngwtih dyqiamr siangg kuanw, zuxx pah zuxx len zuxx buaa, dyqiamr jiacc e lrai. Narr si pah byy qanghux, buaa byy dingxjinx, dyqiamr diyrr m jniaa mic, dniardiyc si dun dun be lrai. Lanw langg ee siu’iongw iarr si anxnix, qingquer jin’ je nii, zuxx tuanwlen zuxx siu’iongw, simsinn jiacc e qensit. Iaxx beh congr dairjir, jongw diyhh jabhunx juwir, vniawmia lyc kir juer jiacc ersaiw .did. Diyrr si siyxkuaw dairjir iarr m tangx knuawkinx, dua jann dairjir iarr m tangx qniahniaa. Iauxx bue kixciuw dairsingx jimjiog liauw jimjiog, sniu qaur jabhunx tywdongr jiacc tangx kir congr. Narr jit xe congr .lyc .kir, diyrr beh hro ix tetdew singqongx jiacc ersaiw .did.

(Veh-jap-go) Vaqed langg’ viw qongw langg’ pnaiw ue iaxx kacc lirhai

Cincniu hitt xee og langg, dirr kacngx-au qongw lanw ee pnaiw ue, iarr byy-ngiaw-byy jiah ee dairjir, duiww langg’ qongw qaxx snix kax snix ciuw, hro ix sinr sinr, hitt kuanw iarr jin’ byy huatdo. Jongw si hex cincniu jit diamw aw hunn kir ziax diyc zit siangg kuanw, byy zuarr quw jurzenn e bingvik. Mrquxx iaxx u jit kuanw og langg, dng’ bin laii vaqed .lanw, povaii .lanw, hitt kuanw cincniu jurr tang’axmngg ee kangpang siap .zip .laii ee hongx, zuxx quw zuxx je, suar hro vangqingx qui’ee lingw .kir siangg kuanw. Ix narr si gauu vaqed .lanw, lanw suizenn vaxag simsinn, m iauxx vutdix-vutqag ee diongqanx, laii joxgai lanw ee siu’iongw, laii pywhuai lanw ee diksingr. Soxiw derr id lirhai diyrr si jitt xee vaqed.

(Veh-jap-lak) M tangx hro siauxzinn hnuahiw, iurr m tangx hro qunjuw liongrjingg

Duiww hitt xee siauxzinn diyh’air qingxqair ixqingx qongw liauw. Lanw langg urdangsii aw hro siauxzinn hiamm, hro ix qongw pnaiw ue, iarr si byy sniaw iauwqinw. Cenban m tangx hro siauxzinn hnuahiw, iarr m tangx hro ix povaii. In’ui lanw narr hro ix povaii, diyrr vitding e snix cud kangpang tangx hro ix cngx .laii, diyrr dua dua m hyw. Iaxx arr hro qunjuw ee langg jikvi, kiokzenn si byy iauwqinw. Jongw si m tangx hro qunjuw ee langg dnir byy knuar qnir, iurr m tangx hro ix liongrjingg .lanw. In’ui ix beh jikvi .lanw diyrr si beh tniawtangr .lanw. Ix beh liongrjingg .lanw, diyrr si knuar lanw vutdiongwiong, sniu qongxx bycaiw qauwhunr .lanw jiacc anxnix.

(Veh-jap-cid) Henxzenn ee hairdok qapp runw .did ee hairdok

Cincniu zet hongrhong tamjaii hnowli ee siauxzinn, ix jurr kixtauu diyrr ciaucud dyrdig jingwgi ee huanruii-gua, qongzenn juer vutjingr vutgi ee dairjir. Soxiw ix soxx tuanvor ee hairdok si jin’ henxzenn, m iauxx kacc cenxvyc. Cincniu hyw bing’u ee qew qunjuw, ix jurr kixtauu diyrr bih druar dirr dyrdig jingwgi ee lairbin, amwdiongx juer vutjingr vutgi ee dairjir. Soxiw ix soxx liutuann ee hairdok si runw druar dirr hitt lairdew, jiacc jin’ cimx jin’ dua. Surgiabqax ee langg inx ee bogdig si beh did diyc lirig, mrquxx qidiongx u jingwgi ee langg dendyww kacc je. Jongqauwqax cuir decc qongw jongqaur, qauwiogqaux cuir decc qongw qauwiok, mrquxx hitt kuanw ee langg dyjiaw si cuir qapp simqnuax byy siysiangg, qidiongx qankiauw tamiok ee langg vutjiw je. Jex si sewqanx ee henrsiong.

(Veh-jap-veh) U xunx diyhh vyr, u siuu mair vyr

Sriu langg’ ee unhui suisi kacc dua, iarr byy sniu beh vywdab. Kiyh langg’ ee uanwhun suisi siyxkuaw, iarr sniu dikkag beh vyr. Tniax qnir vadd langg ee pnaiw dairjir, suizenn byy sniaw bingvik, iarr jit xe diyrr sinr qongxx si sidjai. Narr si tniax diyc hyw dairjir, suisi jin’ bingvik, iarr byy air sinr. Jex si poxtongx langg ee simliw, cincniu jitt kuanw jinjniar bersaiw .did. Narr si erhiauw sniu ee langg, sriu langg’ ee siyxkuaw unjingg, iarr dy’ sniu beh vywdab. Duiww langg’ u dua uansiuu, iarr byy air sniu beh vyr. Pnaiw dairjir byc did juxser tniax, dnir juer byy iauwqinw. Hyw dairjir diyhh jimjiog tniax, tangx kiyh kiw laii yc jiacc hyw.

(Veh-jap-qauw) Tagjux cam’ knuar mic ee simhuad

Lanw langg beh tagceh, bagjiux knuar zri gong gong tak si byy loring. Gauu tagceh ee langg, tak qaur zibsinn .kir, urdangsii aw hnuahiw qaur vreh kiw laii tiaur. Cincniu jitt kuanw, simqnuax u liauxgo jiacc anixnxi. Cniurr jitt kuanw ee langg, ix byy krux hitt xee zirqur, juann cruw hitt xee jingsinn, soxiw tak liauw u qamxdong. Hitt xee jingsinn qapp qoxjaxlangg ee jingsinn sna’ jriab. Iaxx arr gauu knuar mic ee langg, cincniu knuar tnide ee dua, sansuiw ee cringx, huejiauw ee suiw knuar qaur sinn .kir, hitt sii jabliam juann byy .kir. Ix ee simqnuax qapp ix ee jingsinn e ionghyy, jurzenn qapp hitt xee mic hap juer jidhuew. Narr e anxnix, si soxx qongw hy juer jingsinn ee tongxid, vutjai hingtew.

(Qauw-jap) Siu’iongw ee jit hxuad

Lanw ee simqnuax suisi dua hnuahiw ee sii, iarr m tangx suacc berhiauw did tangx sniu hitt xee dairjir ee uilann iacc si iongngi, jit xe diyrr qra langg’ inxsiu. Iaxx lanw jiac jiuw ee sii, sringg hitt xee jiuxjuir, siurkir vadd langg si bersaiw .did. Iaxx arr lanw jin’ tiongwlok ee sii, juer dairjir iarr m tangx sniu’ quewtauu. Narr sniu’ quer lryy, langg suisii e sen, suisi jit hxang dairjir iarr be singqongx. Iaxx arr langg suisi jin’ sen, dairjir congr iaxx be cingcyw, dikkag m tangx vangwsuah. Jitt quiw hxang sngr si siu’iongw ee jit hxuad.