myth

THE POWER OF MYTH

Joseph Campbell (Bunchhai huan'ik)

Dongdai Sinuerhak Ddairsux --- Joseph Campbell

qanxqair :

Joseph Campbell, 1904 nii cutsir dirr Bixqog NewYork City, dyjaii dyge/ si hagjiaw/ qauwsiu/ marr si venjip/ jokqax/ simrjiww bad si Jazz gagqax, jin' gauu vunn Saxophone/ Guitar ... dringw gagkir/ qycc bad si cutsig ee unrdong suanxciuw, 1920 nii dirr Colombia dairhak tagceh qiqanx, si snax-vah ingciyh sewqair jauw siongrr qinw ee suanxciuw ji' id. Jinjniar uirr ix kakding ligsuw derui/ uirr zinlui siarhue jywcud qongwhenr :ee, si hongrhenr ix itsingx soxx zed'air ee sinuerhak genxqiur.

Sewhanr sii, ixqingx kaisiw duiww Bixqog Indiana ee tuansuad/ sinue, sanxsingx jin' guann hingwtauu/ qingsiongg liulenn dirr NewYork qokk dua pokbudquanw, didqag zinruii liauxqaiw jiaxee sinue si tonghiongr zinlui simlingg ywvir siongrr didjiab ee dyrlo.

Jinwzip Colombia jingg, kir quer Aujiux. 1927 nii tec diyc vixqaur bunhak siksu au, qycc kir jit vaiw, dirr Paris/ Munich qokk dairhak jyr genxqiur, juanbunn Arthur Sidai ee longrban bunhak, sriu Aujiux dongdai gersut ingxhiongw jin' dua. Jitt xee qiqanx, kaisiw genxqiur Dikqog bunhagqax Thomas-Mann/ simliw dairsu Freud, C.G.Jung ... dringw ee susiongw, jidsiwlangg byy tingg .quer/ jimwbee dirr J.Joyce ee jokpinw, juxiaur guan'inx si Joyce ixx qoxdai sinue juxdee laii viauxhen dongdai iwsiong. Sinhunx qiqanx, Joyce qapp Campbell kanciuw jiamr vnedang hunrliong. Campbell ciangjai jit ciuw kanx bow/ jit ciuw tec ceh <Finnegans Wake, 1939>, ham' langg habsiaw ee <Qaixtiah Finnegans Wake> qyckacc si genxqiur J.Joyce ee diongriaur duwjog, aurlaii Campbell dirr qitnax jokpinw, vutduan inxiong jitt vunw ceh.

1934 nii kaisiw, Campbell druar dirr Woodstock, jinr jit vo genxqiur Jung jibtew amwiwsig ee guanhingg/ bang/ gersut/ vixqaur sinuerhak ... dringw byy qang ee sinue juxdee. Lingrgua jit bin, marr dirr Sarah Lawrence College kaisiw snax-jap-veh nii ee qawceh sing'uac, itdit qaur 1987 nii quewsinx/ marr jniajyr bing'i qauwsiu. Campbell kanciuw Jean Erdman si ix ee hagsingx/ marr si jit xui u miaa ee venbuw :ee/ gersudqax, bad ham' Martha Graham habjog .quer.

Campbell dirr 1942 nii ciamiog beh cud jit vunw “jurhak ciuxceh” uirr cohagjiaw setqer :ee, guansiw dongrqix si beh siaw jit vunw iuxquanx Bulfinch's Mythology ee henrdairvanw. Qetqyw suacc siaw jit vunw dua ceh <Cenbin Inghiongg (The Hero with a Thousand Faces.,1948)>, dring liauw Campbell dirr sinuerhak kuan'uix derui. Jitt vunw ceh si jiamduir qokk jiongw sinue vuerau ee guanhingg jinwhingg genxqiur, ixx byy qang bunhuar qiongriuw ee inghiongg morhiamw qowsu jyr jiaudiamw, suecbingg duliauw viauxbin qodnuax inghiongg zinbut gua, qamm dirr byy qang qowsu vuerau ee qang jit xee hingtair. Ceh nirr singx biysut byy qang ee sinue qowsu, zenau jaiww quiqed qaur qang jit xee guanhingg juxdee. Campbell qongw “juxdee ingxuanw jixu jit xee, lanw soxx huathen ee si jit xee viauxbin vutduan venwhuar kiokk huisiongg itdir ee qowsu. Qidiongx ee sinqii qapp ywvir si lanw ingxuanw texgiam be uann ee.” jitt vunw ceh jit cutvanw, jin' qinw dyrr cua laii jin' dua ee miasniax, qycc jniajyr sinue lingxhik ee qingdenw jokpinw. Campbell ee sniabong/ kuan'uix erdangr qongw si jitt vunw ceh ee qonglyy.

Campbell jokpinw juxdee, ciangjai inxiong Inwdo Veda qingdenw ee jit dnxua ue laii suecbingg “ jinliw jixu jit xee, detzinn iong byy qang ee miahy biyue.” jex marr si uirsniaxmic Campbell dirr ix ee jokpinw-diongx inxsut Jung/ Joyce/ Thomas-Mann ... dringw ee jokpinw. Lingrgua jit xui hagjiaw, Campbell qongw si “guaw suzinn dyrsux”, si uixdai Inwdo hagqax qiamx Sanskrit hagjiaw Henry Zimmer. Mrqyxx siongrr erdangr denxhen cud Campbell “jinliw jixu jit xee” “junsunn luersimx ee hixlok” ... dringw diongsimx susiongw ee, si qongqiong denrsi jetbok, Campbell ham' miasniax tongtauw ee Bill Moyers, jiamduir byy qang sinue/ jongqaur juxdee jinwhingg duiwdamm. Jingxqyy jetbok dirr dyrenw George Lucas (1944-) ee bogdniuu Skywalker sanjongx jinwhingg, jitt xee jetbok duiww Campbell susiongw/ jokpinw ee dairjiongwhuar qongwhenr jin' dua.

Campbell duliauw dirr hagsut/ juangiap duwjog jin' u miaa gua, marr dirr dairjiongr bunhuar/ gulok lingxhik jauxtiaur. Jeorge Lucas ee qingdenw jokpinw <Star Wars Snax Vxo Kxig> , si sriu Campbell sinue qaiwliam “inghiongg morhiamw luxdingg” ingxhiongw :ee. Campbell snewmia juewau jap-zi nii, ix ham' hyw ving'iuw Michael Toms jinwhingg sxor dniuu “jongqaur qinggiam” ee duiwdamm, qidiongx qauw dniuu dirr ix quewsinx au jingxliw jyr ceh cutvanw.

Campbell ee hagbun/ zinluirhak/ kyxqoxhak/ singbudhak/ bunhak/ dethak/ bunhenwhak/ Jung simlixhak/ itvnuax sinue/ vixqaur jongqaur/ gersudsuw/ liuhingg bunhuar ... dringw lingxhik, ionghap jyr ix dog'iuw ee sinue qenwqaiw. Campbell ee congwjyrsingr dirr jiong' zinbunn qewdat/ uxdiursingr ee jingsinn texgiam, quanwjur dongdai kyhak/ gersut ee siongser qaixsueh-diongx, jitt xee sinx dongrqenr m na honghur liauw sinuerhak ee genxqiur lingxhik, qyckacc uirr zinlui birlaii ee sinx sinue kuix cud kuah bongg ~ ee siongxsiong kongqanx. Ix dirr 1987nii jap-guec snax-jap-id quewsinx dirr Hawaii cur-lai.

DAHUERTAUU -- by Bill Moyers

J.Campbell quewsinx au quiw xee lexvair lai, bylun guaw qniaa qaur dyhh dy' e sniu kiw ix.

Ui' Sidai Qongxdniuw denrciajam qniaa .cud .laii, langg keh langg jit jun ho'ngg jatkuir ee aplik rig .quer .laii. Jurqiw dirr simlai ciyr, hutzenn sniu kiw Campbell bad dirr jiax qinggiam diyc jit xee iwsiong: “siongrr sinx lunhuee juanxser ee Oedipus, si gewsiok decc vnuaenw bixluw qapp iaxsiur ee longrban luanair qxow. Ix duxx kia dirr 42 qrex/ derr 5 duardy ee sibzirlorqag, danw cneangdingx venwngua.”

James Joyce (1882-1942) guanjog qaixvenx juewau jit vxo denrngiaw “sixjiaw (The Dead)”, dirr John Huston suantuanhue sii, guaw qycc sniu diyc Campbell/ ix jaxqii jit vxo jokpinw, si liauxqaiw “Finnegans Wake” jitt vunw ceh ee quanqenr/ Joyce zinruii zinlui koxlan soxui ee “siongrr dua/ ingxuanw ee koxlan”, Campbell zinrding si qoxdenw sinuerhak ee qivunw juxdee. Jyrsingg soxu koxlan ee guan'inx, si snewmia vitzenn e sixbongg jitt xee sursit. Narr qongw snewmia virr kingxding, dyrr berdangr hiyxding siw.” Campbell anne qongw.

U jit vaiw, gunw decc tyxlun koxlan jitt xee juxdee, ix jing'au qongw diyc Joyce/ Igjugar-Juk. Si'angw si Igjugar-Juk? Guaw mng, cavutdyx byy hxuad jingwkag huatcud jitt xee langmiaa ee imx. Campbell huee qongw “or! Ix si Canada vakvo Eskimo jit xee vorlok ee dangqix/ bad qra Aujiux laii ee langg qongw “snewmia cutsir dirr uixdai ee diamrjing-diongx, m si langg ee diwlingg crunx e qaur :ee, jixu koxlan jiacc dag e diyc, kiapmia koxlan jiacc erdangr hro simganw packuix, knuar diyc langg' soxx m jaix ee itcer.

“Dongxzenn, Igjugar-Juk” guaw rinr.

Joseph m bad knuar kinx guaw duiww bunhuar ee budix, Ix ee bagjiux hionghingg qngx .kiw .laii, qongw liw qamxx erdangr siongxsiong, jit xee amwmee Joyce cam' Igjugar-Juk jre dirr huexduix vnix, damtnix-suatde qongw be suah? Uaa! Guaw sniu beh jre dirr inx vnix:a jimjiog tniax.”

Campbell duxhyw dirr J.Kennedy virr amwsad zi-jap-sir jiunii qiwliamrzit jingg quewsingx. Ix bad dirr gunw derr id vaiw qniwbin jingg quiw nii, ixx sinue ee qaiwliam tyxlun jitt xee viqiok. Jitmaw jitt xee suxx langg siongsimx ee qiwig, jaiww jit crur laii qaur guaw ganxjingg, jre lyc laii ham' guaw ixqingx singlenn ee qniaw damlun Campbell duiww jitt xee viqiok ee knuawhuad. Ix qra jonggiamm siokjing ee J.Kennedy songlew biyue jyr “duiww jitt xee siarhue jywcud siongrr quann jongqaur gisid ee sirhuan, qikhuad cimdaii dirr zinlui simlingg su'iaur sinue juxdee, gisithuar si jit xee siarhue siongrr vit'air ee jingsinn” Campbell anne siaw. Jongxtongw qongzenn virr amwsad, “ dairviauw lanw jit xee uac lingr lingr ee iuxqix siarhue, dirr jingsinn siongrr ciongvaw sikig, snewmia virr duat/ soxiw su'iaur jit xee voxsiongw ee jongqaur gisid, dingsinx qenwlip tuanqed itdir ee qamxqag. Bixqog si dua qog, dirr lensuar sir zit qokjongr lexgii-diongx, lanw jniajyr jit xee itdir ee siarhue; dag'ee dongsii ixx qangrkuanw ee hongsid, qiongrdongg cam'uw jit xee kuriuw siongrdingx iwgi ee surqnia. “Jex si guaw derr id vaiw marr si ui'id jit vaiw, dirr taiwvingg siqii u jit jiongw uirr jingxqyy qokqax siarhue jit hunjuw ee quisiogqamw. Dag'ee langg laii jiax si uirr camqax jitt hxang u iwgi/ itdiwsingr ee jongqaur gisid.”

E qir .did lingrgua jit hxang su, si gunw jit xui dongsu virr ving'iuw mng diyc iuxquanx gunw ham' Campbell habjog. “uirsniaxmic linw su'iaur sinue?” ix tecud henrdai sigsai lunrdiamw, dyrr si qongw “soxu jiaxee Hellenic ee sinn/ su”, ham' zinlui henrdai cuxqingw longxx byy quanlenn. Ix m jaix, marr si dysowlangg m jaix ee, hiaxee “surbut” ee puar qiqud, cniurr kyxqow henrdniuu ee cohuii cuiwpnir, tnibuanw lanw luerjai sinwgiongw hertongw ee uicniuu. Mrqyxx lanw si iuxqibut, soxiw hiaxee “surbut” dy' ixx lingliong hingsid junjai/ e virr gisid inxcua cud laii. Lanw laii knuar huatqnuax dirr lanw siarhue ee derui, Campbell si iong sinue/ m si siarhuerhak ee qaiwliam laii knuawtai. Narr qongw huatqnuax qandna' si siarhue qaksig, anne cuthen dirr huatdingg, cing huesig sejongx dyrr hyw, m si siongrdingx kuan'uix ee osig dngsnax. In'ui jicjair kuan'uiqamw ee huatlut m na si qiongjer, huatqnuax ee kuanlik rair gisithuar/ sinuerhuar. Campbell qongw “dnaxx sing'uac ee jerje vorhun, ui' jongqaur/ jenwjingx, qaur air/ sixbongg, dy' su'iaur anne.”

Campbell quewsinx au, mow zit tauwjaw siongrvanx vnuawlo, dirr hurqin jit qingx logngiaxduar dxiamr mngkauw tingg lyc laii, knuar qenwvunxduu lai ee denrsi decc vangr George Lucas ee “Star Wars”. Kia dirr hiax hro guaw sniu diyc ham' Campbell dirr California George Lucas ee “Skywalker sanjongx”, jywhuew knuar jitt qix pnir ee jingqingw. Lucas ham' Campbell dirr jitt vxo denrngiaw jewjog au venwsingg hyw ving'iuw, in'ui Lucas jaix jitt pnir sriu Campbell ee ingxhiongw qik cimx, Lucas iaucniaw Campbell quansiongw “Star Wars” ee snax vxo kxig/ jitt vaiw tamwhongw-diongx, Campbell jin' hnuahiw knuar .diyc, duiww qoxdai sinue ee juxdee/ huerir, iong qiongg qycc u lat dongdai iwsiong denxhen dirr henrdai duaringbo/ginbo-siong/ huisiongg iwair juxqag Luke qinglik .quer jerje guilan inghiongg surjig/ qongw diyc Lucas zuhyy “qra siongrr sinx qycc u lat ee venwhuar he zip” qoxdenw qowsu sii, tiongr qaxx qiongbecc diyy .kiw .laii.

”Hex si sniaw venwhuar? ” guaw mng.

“Hex si Goethe dirr Fraust soxx qongw :ee, Lucas ixx henrdai gixgenn viauxhen, dyrr si tuandat liauw kyqix byy hxuad qaixqiur lanw ee sinwsid, lanw ee denrnauw/ qangku/ qikir si byy qraur ee, diyh'air i'uaw lanw ee didqag/ lanw jinsit ee junjai.”

”Jex qamxx m si uihuanw liauw lixsingr? Lanw qamxx m si dihyqib, ixqingx ui' lixsingr tetter?”

“Hex m si inghiongg morhiamw ee diongrdiamw, vingrr byy hiyxding lixsingr, si jiyr ui' kikhok oamr ee qamxjingg, inghiongg siongrdingx liauw lanw duiww luerjai huilixsingr pywhai jok'iong ee kongwjer. ” dirr qitnax dniuhap, Campbell marr viauxsi, viaix lanw berdangr “singzim zinsingr vunxlingg ee jiac qapp singr”. Ix soxx biyue inghiongg morhiamw quewdingg, si jurgnow huathen ee snewmia, m si ingiongw hing'uii. “dng' Luke huathen hingsingg ix binrduir miarun ingxuanw luerjai singwqeh sii, venr qaxx huisingg lixsingr.”

Duiww Campbell laii qongw, inghiongg morhiamw quewdingg ee jiongqed, m si hamwdua inghiongg jitt xee qaksig/ “lanw vutqaix qra jurqiw dingxii soxx qinggiam ee zinbut/ lat.” jin juanlik qaixhongr ee Inwdo Yoga dairsux, qra jurqiw huawjyr qngx, byy qycc dngw laii jitt xee sewqair. Mrqyxx jinjniar sniu beh hogbu tnazinn :ee, si be anne dypiah ee. Jitt xee luxdingg ee jiongqik bogviaux m si qaixhongr/ m si qiglok, si hogbu tnazinn ee diwhui/ lat. “bingzinn ham' inghiongg siongrr dua cavet ji' id, bingzinn uirr jurqiw uac, inghiongg si beh qaixqiur siarhue.” ix anne qongw.

Campbell kingxding zinsingx si jit dniuu morhiamw. Ix dairhak jixdy qauwsiu qra ix hanrjer dirr eh ~ ee hagsut kywdingg-diongx, ix qongw “guaw jiacc byy air cab liw lehh.” dyrr hongwkir tak poksu hag'ui, jurqiw bih dirr cimsnuax tagceh/ itsingx qewsiok vutduan uadlamw iuxquanx sewqair ee ceh, vauquad zinluirhak/ singbudhak/ dethak/ gersut/ ligsuw/ jongqaur, ciangjai tecnew langg', liauxqaiw sewqair jitt diauu kyxkyr ji' lo, si siaw dirr ceh nirr. Dirr ix quewsinx au byy quiw zit, guaw siux diyc jit dniux puex, si ix ee hagsingx/ jit vunw diongriaur jabjir venjib, soxx siaw :ee/ knuar .quer guaw ham' Campbell dirr qongqiong denrsi-dingw jit herlet duiwdamm au, siaw puex hunhiongw Campbell si zuhyy “ixx jit jun qngxle'aw hongx qaw kiw soxu diwsig ee hongsid”, hro Sarah Lawrence College ee hagsingx “dirr siongrkyr sii jit diamw aw dy' m qnaw hiyccuanw tihh/ “suibongw ix ee qangxkyr gunw tniax qaxx dindinx-iuxbi, duiww ix dagg lexvair jixding jokgiap ee hunrliong, dang qaxx hro gunw jin' vutanx, juewau u jit xui dongyc kia kiw laii qongw (jex si Sarah Lawrence College hagsingx ee hongqeh), liw jaix, guaw iauxx u suanw qitnax ee kyr, muixx xee lausux dy' u jixding qongkyr, liw jnuaxngiu qitai guaw dirr jit lexvair lai tak uann soxu ee jokgiap neh?” Campbell ciyr ~ qongw, liw hro guaw qniax jit diyy, sniu beh jit lexvair tak uann, liw u jidsiwlangg ee siqanx tak ar.”

”Guaw iauxx bue tak uann ix hex ingxuanw byy uanqed ee zinsingx qapp diwhui denxhuan.” jitt xui venjid anne siaw.

Lanw erdangr ui' NewYork jurzenn pokbudquanw uirr Campbell qixvan ee qiwliamrhue-siong, knuar cud ix ee ingxhiongxlat. Dng' Ix iauxx qycc si jit xee ginxaw sii, duarlangg cua ix kir pokbudquanw/ hiaxee sinjuxvaii jiyhtiau/ binrdar cimx ~ jinwdong diyc ix/ dauwdew si'angw congwjyr inx? Hex qycc dairviauw sniaw iwgi neh? Ix jin' hnowhenn/ kaisiw jinrlik tak soxu Indiana ee sinue/ tuanqii. Jinwzip jitt xee lingxhik byy ciauquer jap dxangx/ dyrr jniajyr sewqair genxqiur sinue u miaa hagjiaw/ dongsii marr si lanw dongdai siongrr suxx langg himsiongw ee laursux. Tuanqongw, “ix ersaih hro binsioghak/ zinluirhak cniurr jinsit hitt ngiu junjai.” jitmaw dirr cid-jap-go dxangx jingg bad qikhuad ix duiww sinue cuwbi ee pokbudquanw-lai, langg uirr ix qixhingg qiwliam gisid, henwcud siongrr quann ee qingwir. Qidiongx u “huanlok sixjiaw (The Grateful Dead)” dnaxqig gagtuann pacqow ee Mickey Hart enxcud, Campbell bad ham' jitt xee gagtuann jywhuew hunhiangw dnaxqikgak ee bixbiau. Robert Bly dnuajaur Dulcimer/ qycc gimm jit siuw six henr hro Campbell. Tewhiux au ham' kanciuw Jean Erdman vnuax kir Hawaii duar, sinx qaux ee ving'iuw, ixjaw ee hagsingx longxx laii camqax diwsuu. NewYork u miaa ee cutvanw qongsix dairviauw marr u laii camqax. Dongsii vauquad siauwlenn/ jucimx ee jokqax/ hagjiaw, inx dirr Campbell ee ceh-lai cue diyc zinsingx tudpuar ji' lo.

Qycc u sinbunn qiwjiaw, guaw veh dxangx jingg dyrr virr ix kip'inw, jurqiw setqer jewjy laiuw jit herlet jetbok, iwdoo qra lanw sidai ciongbuanw uahlik ee diwhui simlingg cua qaur denrsi-dingw. Gunw dirr jitt xee pokbudquanw logjer liauw nng xee jetbok, tauwquer ix dirr ingbo-siong qiongg qycc u lat cinsinx qongxhuad, jongxqiong jit-bxan sir-cingx miaa quanjiongr laii tyw duiwue kavunw. Hitt sii guaw qycc jiuwjua, qycc beh cue ix jyr jit xee kacc u hertongw/ uanjingw tamwsyh ix susiongw ee jetbok. Ix siaxjog/ juxvenx iokk zi-jap vunw ceh, lanw jiapciog diyc ix jyr jit xui laursux ee hitt bin, ix si duiww sewqair tuansuad/ gixgenn iwsiong u qongxkuah diwsig ee laursux/ hibang langg' erdangr ui' jitt xee qakdo zinrbad ix. Sniu beh ham' dag'ee hunhiongw ix diwhui ee jaivyw, jiacc cioksingg guaw ham' ix qongqiong denrsi duiwdamm jetbok/ jingxliw cud jitt vunw ceh laii cutvanw.

Dag'ee zinruii sinbunn qiwjiaw hiangxiuw vutduan sriu qauwiok ee kuanli, gunw si hyxzirun ee jit qrunn, erdangr qewsiok jiapsiu singlenn kywdingg. Qinrnii laii, Campbell si qar guaw siongrr je :ee, dng' guaw qra qongw, bylun guaw jitt xee hagsingx jionglaii zuhyy venwhuar, ix dy' dnax kiw ingxhiongw guaw ee jikzim. Ix tniax liauw dua sniax ciyr, inxiong jit qxur qxow Roma ganrgiw “ jiangxquanw miarun ee snax xee luxsinn e inxdy iuxjir :ee, duer juiw lauu ee langg, dyrr pni-aw ho'ngg kanx lecc qniaa.”

Cniurr uixdai qauwsux ee qawhuad, ix ixx sidjingr qauwhak. Ix ee taiwdo si byy qac'ir iong gixgenn suechok langg siongsinr mow xee surbut (ui'id ee lergua si hiongr Jean qiuhunx sii). Ix qra guaw qongw, enxqangxjiaw ee cywgo, si iwdoo “jiyr gixgenn hro langg sanxsingx sinwgiongw; inx siongrr hyw erdangr qra jurqiw huathen ee qngngiaw henxlo hro langg jaix.” ix duiww hagsip/ sing'uac ee hixlok, si jiacc uahtiaur denxhen hro lanw! Matthew Arnold zinruii siongrr hyw ee puepingg si “jaix jitt xee sewqair-siong siongrr janw ee surbut, zenau jaiww crur qra jitt xee surbut juanxhuar, congwjy cud jit qrow hac jinliw siongrr sinx susiongw diauliuu.” jex dyrr si Campbell ee qongwhenr. Jixiaur liw tniax ix qongw :ee --- jinjniar zinrjinx tniax, liw itding e huathen, dirr liw jursingr-diongx u jit qrow juann sinx snewmiarlat bunr .cud .laii, ixqibb jurgnow siongxsiongrlat ee tesingx.Ix dong'ir ix genxqiur ee jixdy guanjig, si kir huathen “sewqair sinue juxdee-diongx ee qiongrtongsingr, ixx jixcud zinlui simlingg, u jiong' jurqiw kngr dirr jit xee cimkig iwgi hudsimx ee ingxuanw qiawbang.”

“Liw si qongw jauxcue snewmia ee iwgi?” guaw mng.

“M si, m si, m si,” ix qongw, ”si kir cue hitt jiongw qamxqag jinjniar uac lehh ee qinggiam.”

Guaw bad qongw .quer, sinuerhak si jit dniux luerjai qinggiam ee derdoo, si bad luxliuu .quer ee langg soxx rue :ee. Guaw huaigii ix zinrkyw jitt xee laijurr sinbunn qiwjiaw ee byliauu dingrgi. Duiww ix laii qongw, sinuerhak si “uxdiu ji' quax” si “jurzenn ee imx” --- suibongw lanw m jaix si sniaw kikdiau, iuguann duer diyc jurzen'imx tiauwbuw. “ bylun lanw si ixx jit jiongw qyqyx jairsiong hiwhiauh ee simx, tniax Huijuix Cango dangqix dirr hyy-vnix, duiww kyxciyr gnoxsiong hujiur gimcniur ee sniax, tak Lyxjuw qydo diwhui dyrdikqingx huanikbunn, ban ~ vorjiac cniurr quexjixhut hiacc ding ee Aquinas sinhak gilun, iauxx si tudzenn duiww Eskimo senzinn qowsu ee iwgi iuxsow liauxqaiw.” lanw tniax :ee longxx si jurzenn sniax dinghok jetjaur.

Ix iycsniu, jitt xee ciaudua/ byy hiabdiau ee habcniuwtuann, dairliok si ui' lanw guansiw siarhue joxsenx taii dongrbut jiac sii, quancad diyc dongrbut siw au naxjunxx jinwzip ciaujurzenn sewqair, kaisiw qongw dongrbut qowsu. Ciauuat qnir e diyc ee junjai sewqair, “dirr hiax mow soxjai” u “dongrbut siuxlingw (Animal Master)” junjai/ kongwjer zinlui snesiw ee lat/ narr m qra dongrbut sangr laii hisingx hro zinlui liac, paclac :ee ham' ix ee jogzinn dyrr e iaux. Jaxqii siarhue hagsip liauxqaiw diyc “snewmia ee vunxjid si satsingx/ limx/ jiac, si sinue beh cuxliw diongrdua ywvir.” paclac venwjniaa jit jiongw hisingx ee gisid, juanxdngw laii duiww dongrbut linghunn jywcud voxsiongw dongrjog, hibang erdangr iuxquaiw inx qycc laii hisingx, hro zinlui liac/ jiac. Iaxsiur virr knuawjyr ui' lingrgua jit xee sewqair laii ee qongsair. Campbell iyccig tyxliahlangg qapp lahbut jiqanx jiamrr sanxsingx “jit jiongw sinqii/ bixhyw ee hyhaii”, naxjunxx inx virr sryw dirr jit xee sixbongg/ baijongr/ qycc uac “sinvir ciausiqanx” sunkuann-diongx. Dongrhet viah-dingw ee doo/ kauxtuann bunhak, lanw qongw si jongqaur ciongvong ee viauxhen hingsid.

Dng' jiaxee guansixlangg sing'uac ui' paclac juanxjyr jingwjyh/ juwqaiw snewmia ywvir ee qowsu marr qaixngua ar/ jingxjiw jniajyr sunkuann ee sinqii siongrdingx/ Cauxbok (sidbut) sixbongg, draii lyc too, jiw cud gee/ vuh ngiw qycc uac. Duiww qokk jongqaur dramm diyc ingxuanw jinsit ee henxhen (ui' siw qycc snex, iacc si soxui “ui' hisingx qaur qiglok”) sii, dysor suxiong jitt xee siongrdingx henrsiong, Campbell qamxqag jin' cuwbi.

Ix qongw, “Iasox u ciauuat ganxqongx, dirr quawcair jiw knuar diyc uixdai ee jinsit. Iokhanr Hokimx anne siaw : jinjniar guaw qra liw qongw, jit liap bec-aw jiw lag zip kir too lai/ iuguann si qodnuax ee/ mrqyxx narr siw .kir, dyrr ersaih snex cud jerje bec. Koran anne qongw : liw zinruii liw kyxiw byy qingquer hiaxee, dirr liw jingg sixbongg langg ee ciwlen, qamxx dyrr e hro liw jinwzip tendongg?” Campbell iusec dirr qongxkuah simlingg qingdenw-diongx, simrjiww huanik Sanskrit Inwdorqaur qingdenw, vutduan siujip siongrr sinx ee qowsu, qaqiongg qaixsueh qoxlyw diwhui juliau. Ix digvet qac'ir jit xee u gignaiw ee luxsingr mng Inwdo singwded Ramakrishna (1836-1886) ee qowsu.

Hitt xee luxsingr mng “ar! Dairsux ar! Guaw byy qamxqag guaw air siongrder.”

“Liw si m si byy air zimrhyy surbut?”

“Air guaw ee jaboxsunx ar! ”

“Hex si liw ee air, marr si duiww siongrder ee hogbu, liw air hitt xee ginxaw, marr si decc teqiongx hogbu.”

Campbell qongw “jixiaur linw dirr jitt dangdiongx jiwjiyw uirr jit xee langg jyr dairjir, hiax dyrr si jongqaur ee jongqyx sinwsid ...”

Ix dirr qokk jongqaur sinwgiongw ee bunhenr huathen, zinlui jingsinn jancur ee guanjig huisiongg luirsu, siyxvorhun jiacc byy qang. Lanw diyh'air ui' vorlok iusenx ee quanliam qaixhongr .cud .laii, narr byy, sewqair jongqaur dyrr e tingg dirr cniurr jitmaw ee Diongdangx/ Vag Ireland jongrtair, hex si pixsniur/ cimliok ee laiguann. Ix qongw siongrder ee iwsiong jerje, ersaih qongw si “ingxuanw ee binrdar”, inx dongsii amkamr/ henwcud “qongingg siongrder ee binrmau”. Sniu beh jaix siongrder uirjnuaxngiu dirr byy qang bunhuar, u jiacc je byy qangg miahy, marr sniu beh jaix jiaxee jiacc byy qang ee tuantongw, jerje luirsu ee qowsu zuhyy virr huathen/ vixqaur. Piwzu: congwsewqiw/ jaisikluw snex qniaw/ lunhuee/ sixbongg/ qycc uac/ zirdo qangwlimm (Second Comings)/ juewau simxpnuar ... dringw qowsu. Ix iwsinn Inwdorqaur qingdenw jit xee qenwqaiw “ jinliw jixu jit xee, gauu langg iong jerje byy qang miazi cinghox.” “soxu ee miahy/ iwsiong, duiww siongrder laii qongw, qandna' si kansiap ingxuanw binrdar ziiw. Jiongqik jinsit vunxsinx ee zirgi ixqingx suecbingg ciauuat itcer gixgenn/ gersut, sinue marr si siongrder ee binrdar, viauxsi cangr dirr knuar e diyc sewqair vuerau surbut ee jit xee amwsi. Bylun sinviwjuxgi ee tuantongw zuhyy byy qang, inx dy' decc hohuanr lanw duiww snewmia vunxsinx hingdong cimx jancur ee qakcnew, Campbell anne qongw. Dirr ix ee ceh nirr, berdangr guanliong ee guanjue si dairban sohud/ byy qraur qingxqag/ byy qraur cingcnew.

Guaw jurlaii byy duw quer viw ix qyckacc gauu qongw qowsu :ee. Tniax ix dramm guansiw siarhue, guaw naxx srinx jairr bujer kongdiongx/ qongxdua cauxvox-siong, iacc si dirr itpenr ciurqunn ram ~ ciurnaa lai. Kaisiw liauxqaiw, zuhyy ui' hongluii-diongx tniax diyc sinn ee sniax, ui' snuax-diongx muixx jit diauu kelauu knuar diyc siongrder linghunn ee liudang, ixqibb qra derqiuu knuawjyr si jurr sinue siongxsiong siongrder kuix cud ee hueqyw. Anne guaw sniu beh mng, qiwzenn lanw henrdairlangg ixqingx qra dairjurzenn ee sinvir vrag qaxx qiongbecc byy .kir ar, jiyr iong Saul Bellow (1915-2005) ee ue qongw, ixqingx qra sinwgiongw uanjuann cingsaur cingkir, lanw ee siongxsiongrlik be zuhyy did diyc ju'iongw neh? Qamxx qongw beh kyr Hollywood/ denrsi jewjy ee denrngiaw?

Campbell m si viquanjuxgirjiaw. Ix siongsinr “u jit xee ciauuat huanwsiong ciongtut ee diwhuirdiamw, qapp jit xee e qra snewmia dingsinx kngr huee guan'ui ee jinliw junjai.” beh anxjnuaw cue diyc? “juxiaur si siqanx bunrdee.” dirr zinsingx juewau ee suewguec, ix iwdoo beh cue cud kyhak/ simlingg sinx ee jonghap. Dirr taiwkongzinn jniurliok guehqiuu au, ix anne siaw “ui' derqiuu diongsimx qaur taiwiongg diongsimx jiqanx, sewqair ee qaixvenr naxjunxx qra zinlui ui' diongsimx suaxkuix, diongsimx si jin' diongriaur ee. Ui' jingsinn jancur laii qongw, diongsimx si quancad ee soxjai. Kia dirr qyde knuar diyc tenjewsnuar, kia dirr guehniuu-dingw, knuar diyc jingxqyy derqiuu puu kiw laii, suibongw liw ui' kecquanx ee denrsi knuar .diyc, haurqyw marr qang. Qetqyw kokdua liauw zinliu iuxsuw ixlaii, lanw ee siriaw/ cniurr qoxdai sinue duiww inx hitt xee sidai jywcud ee qongwhenr qangrkuanw, jitt xee sinx uxdiurquanx marr duiww lanw ee sidai huatsingx qangrkuanw ee qonglingg. Qra lanw qamxqag ee mngg cringx cingkir, “gniajih hitt xee bad virr zinruii kyxpnar/ gignaiw ee uxdiu hiqii qingxsiong qapp jurqiw ee ywvir.” ix zinruii vingrr m si kyhak jyrsingg huizinsingwhuar iacc si hro lanw tuatli sinsingr. Sianghuanw, kyhak sinx huathen “hro lanw ham' qoxjaxlangg dingsinx qethap”. In'ui hex hro lanw zinrbad diyc jingxqyy uxdiu vutqyr si “lanw luersimx simlingg cimdew vunxsingr ee hongwdua huanxjiyr ziiw; soxiw lanw kaksit si ix ee hni/ ix ee bagjiux/ ix ee sukyw/ ix ee gixgenn, iacc si ixx sinhak ee gengiw laii qongw, si siongrder ee hni/ bagjiux/ sukyw/ bingrling.” guaw juewau jit crur qnir diyc ix sii, mng ix si m si iuguann siongsinr, bad siaw .quer ee sinwliam “jitt kig lanw dngdecc cam'uw jit vaiw ui' zinlui simlingg duiww guarjai, ixx siongrr dua vo ciongtiaur quer lanw luersimx cimdimm ee ywvir diwsig.”

Ix sniu .jit .xe, huee qongw “jurlaii byy jiacc qensinr .quer.”

Tniax diyc ix quewsinx ee siausid, tec kiw ix sangr guaw ee ceh <The Hero With A Thousand Faces> knuar jit xe quw. Sniu kiw jit vunw ceh derr id vaiw huathen sinue inghiongg sewqair ee jinghongw. Bad ban~ kinx ~ qniaa quer ngiuxci guaw duarhanr ee siyxdinr, jit qingx ser ser dosuquanw-lai, cue cud kexhuad guaw duiww uxdiu zinlui hiqii ee ceh : uirr liauw zinlui, ui' sinn hiax tautec huew ee Prometheus, iongxqamw tiaujenr dua quaiwsiur, cruw diyc qimx ngiumox ee Jason ongjuw; duiqiuu singwvuex ee ngidyh buxsu ... dringw, ceh nirr longxx u. Itdit qaur ham' Campbell siy' bad au, guaw jiacc liauxqaiw, vaiwlak ee hiwqiok soxx knuar .diyc ee sehonglangg, si zuhyy juriuu jiyc'iong jiaxee qoxdai qowsu. Lanw dirr qauwhue juxzidhak yc diyc ee qowsu, ham' qitnax qangrkuanw texzin diyc linghunn jongqyx duiqiuu, ixx ingxuanw snewmia duiqiuu siongrder jinsit ee byy qang bunhuar jiqanx, horsiong duiwjiaur/ vixqaur. Ix hro guaw knuar diyc inx ee quanlenn, zuhyy qra liauxqaiw ee penwduan lenn .kiw .laii, “u uahlat ee dybunhuar birlaii” ix anne qongw, m na byy qycc hiacc qniax, simrjiww hnuahiw ix ee laiqaur.

Dongzenn, ix marr virr puepingg quewdo ixx simlixhak laii suecbingg sinue, ixqibb qra sinue ee dongdai qaksig, sniu' quewhun hanrjer dirr iwsig hingtair qonglingg/ dirliauu ee qonglingg. Guaw byy juqeh lunrduan jiaxee pinglun, iauxx si niu langg' laii duanr. Ix naxjunn jurlaii be uirr jinggi kunwziauw. Jixsirr vutduan qawceh, kexhuad langg ixx sinx ee hongsid knuawtai sewqair.

Vitqingr, si ix hitt jiongw jinsit ee sing'uac kexhuad liauw guaw. Dng' ix qongw sinue si lanw siongrr cimx simlingg amwlat ee snuawsyh, e hro lanw hixlok/ bingqag/ simrjiww hixqongg. Ix qongw qaxx naxx jurqiw bad kir quer hiaxee soxjai, iaucniaw lanw kir vaiwhongw.

Ix si dyhh kip'inw guaw?

Diwhui, si ar, ix huisiongg congbingg.

Bad taur ~. ix kaksit si anne. “duiww hiaxee jiyw langg jaix ee sowjaii, ix kiokk jaix cingban venwhuar/ quewkir ee juanvo bo'ngiu.”

Qycc vutjiw anne.

Qowsu si iong qongw ee. Ix u cingban qowsu ee langg. Ix siongrr qac'ir ee qowsu ji' id : dirr Zidvunw camqax jit hxang jongqaur qokjer huergi sii, Campbell tniax diyc lingrgua jit xui ui' NewYork laii ee Bixqog siarhue dethagqax, duiww jit xui Zidvunw sindyrqaur ee sinjid zinguann qongw “lanw bogjingg uijiw ixqingx camquanx .quer jerje denxlew, marr knuar liauw linw jerje sinbiy. Guaw byy liauxqaiw linw ee iwsig hingtair/ byy liauxqaiw linw ee sinhak.”Zidvunxlangg tingg .jit .xe, naxjunxx decc sniu, zenau, iyy tauu “guaw sniu guanw byy iwsig hingtair.” anne qong “ gunw byy sinhak, gunw tiaubuw.”

Campbell marr si anne, ix tiauwbuw, dirr dairjurzenn pnuarjaur-ha.

Bill Moyers qanxqair:

Denrsi sinbunn qiwjiaw, dirr Colombia qongxvyr denrsirdaii/ qongqiong denrsirdaii ee jokpinw sriu jin' dua huangingg, jundiong. Qongqiong denrsi jetbok ee jewjy quewdingg-diongx, juxiaur jinrlik qra jitt xee sidai, cutsig susiongxqax cua zip denrsi buxdaii.

huedngw tauu iac