Efesus ee Puex
SXINGR PAUL SIAW HRO EFESUSLANGG EE PUEX
1 Dui' Siongrder ee jixir juer Krist Jesus ee suwdoo, Paul, puex qiar hro diamr dirr Efesus jiaxee singwdoo, diongsinr dirr Krist Jesus :ee:
2 Guan linw dui' lanw ee Ve Siongrder qapp Jruw Jesus Krist did diyc undenw ving'anx.
3 Guan lanw ee Jruw Jesus Krist ee Siongrder, iarr si Ix ee Ve, did diyc ylyw; Ix dirr Krist bad sniuxsur lanw dirr tnix nirr dagg hxang sriok dirr sinn ee hokkir,
4 Dyrr si jiauww Ix congwjy sewqanx ee dairsingx dirr Krist qingw lanw, hro lanw dirr Ix ee binrjingg jniaa juer sxingr, byy tangx hiamm;
5 Ix jiauww ix ee jixir soxx hnuahiw :ee, ing zin'air, dairsingx dniardiyc lanw dui' Jesus Krist did diyc juer qniaw, laii qruix dirr Ix,
6 Hro Ix undenw ee ingqngx did diyc ylyw. Jitt xee undenw dyrr si Ix dirr soxx tniar ee Qniaw sniuxsur lanw :ee;
7 Lanw dui' Ix ee huih did diyc sioghuee, siawbenw juerquar, jex si jiauww Ix undenw ee vuwu.
8 Ix jiong' jitt xee undenw, ing dagg ngiu ee diwhui qapp qenwsig, sniuxsur lanw qaur muaw muaw; ixqing’ hro lanw jaix Ix ee jixir ee ywbiau,
9 Jiauww Ix ee hyw ir, dyrr si Ix dirr vunxsinx soxx dairsingx dniardiyc :ee,
10 Beh dirr jiaxee zidqii uanmuaw ee sii, sethuad hro banrmic, vutlun dirr tnix nirr :ee, dirr de nirr :ee, longxx dirr Krist laii hab'id.
11 Diamr dirr Ix, lanw iarr jniaa juer qegiap, dyrr si dairsingx siurr dniardiyc :ee, jiauww hitt xee tranr Ix qaqi ee jixir qniaa banrhangru :ee ee iwsur,
12 Beh hro Ix ee ingqngx dui' guanw jitt quaw dairsingx ngwbang dirr Krist ee langg did diyc ylyw.
13 Diamr dirr Ix, linw iarr ixqing’ tniax qnir jinliw ee dy, qapp qiur linw ee hok'imx; qiwzenn sinr dyrr diamr dirr Ix, u sriu soxx ingwunw ee Singwsinn kamr inr,
14 Ix dyrr si juer lanw singjiab giap ee junxdngr, qaur Siongrder soxx did .diyc ee giap sioghuee, hro Ix ee ingqngx did diyc ylyw.
15 In'ui anxnix, guaw qiwzenn tniax qnir linw diongqanx dirr Jruw Jesus ee sinr, qapp henxcud dirr jiongww singwdoo ee zin'air,
16 Dyrr uirdiyhh linw qamxsia byy suah, qidyw ee sii siauwliam linw;
17 Qriuu lanw ee Jruw Jesus Krist ee Siongrder, ingqngx ee Ve, sniuxsur linw diwhui kexsi ee Sinn, laii cimx bad Siongrder;
18 Hro linw ee simbak did diyc qngbingg, hro linw jaix Ix driaur langg u jnaixngiu ee ngwbang, Ix ee giap dirr singwdoo diongx ingqngx ee vuwu qaur jnaixngiu,
19 Qycc jaix Ix ee quanlingg ngr dirr lanw jiaxee sinr ee langg dua qaur jnaixngiu,
20 Jiauww Ix jingg soxx bad qniaa dirr Krist dua quanlingg dua kuiwlat ee qong'iong, hro Ix dui' sixlangg diongx qycc uac, dirr tnix nirr jre Ix ee duarvingg,
21 Vnuaa quer longxjongw vran jingwsu :ee, jiangxquann :ee, u jailingg :ee, dirliw :ee, qapp itcer soxx hy ee miaa, m na dirr qimser, iarr dirr laiser, longxx vnuaa quer hng hng.
22 Qycc hro banrhangru hanghok dirr Ix ee kax-xe, qycc jiong' Ix juer quanw banru ee tauu, laii sniuxsur qauwhue;
23 Qauwhue si Ix ee sinkux, Ix soxx ciongmuaw :ee; Ix iarr si ing banru ciongmuaw banru :ee.
2 Qycc linw vingsor dui' linw ee quewsid, linw ee juerquar laii siw :ee, Ix iarr bad hro linw qycc uac;
2 Linw jingg qniaa dirr hitt diongqanx, tranr jitt sewqanx ee hongsiok, qapp kongdiongx jiangxquann ee qun'ongg, dyrr si henrjai unrhingg dirr vuergik ee langg hitt xee sinn.
3 Guanw jingg iarr longxx dirr guanw ziogtew ee su'iok decc qniajuer, tranr ziogtew qapp simlai ee iwsur, singsingg si juer tangx siurkir :ee, cincniu vadd langg jidngiu.
4 Danrsi Siongrder ee linbinw jin' hongsing, uirdiyhh Ix tniar lanw ee dua zin'air,
5 Dng' lanw dui' quewsid ixqing’ siw ee sii, dyrr hro lanw qapp Krist dangjee uac, (linw dui' undenw did diyc qiur),
6 Iarr hro lanw dirr Krist Jesus qapp Ix dangjee kiw .laii, dangjee jre dirr tnix nirr;
7 Qycc dui' Ix dirr Krist Jesus soxx sniuxsur lanw ee zinjuu, beh dirr au sewdai henxbingg Ix undenw ee qik vuwu.
8 Linw dui' undenw did diyc qiur, si dui' sinr; jex iarr m si cud dirr linw vunxsinx, si Siongrder soxx sniuxsur;
9 M si cud dirr soxx qniaa, benw did langg kuakauw.
10 Lanw si Ix soxx juewjniaa :ee, siurr congwjy dirr Krist Jesus laii qniaa hyw su, dyrr si Siongrder dairsingx virvan :ee, beh hro lanw laii qniaa.
11 Soxiw linw diyhh qir did linw jingg jiauww ziogtew juer guarvanglangg, hro hiaxee cxingx juer qatlew ee langg cxingx linw juer byy siurr qatlew, inx ee qatlew dyrr si dui' langg ee ciuw soxx qniaa dirr ziogtew :ee.
12 Hitt sii linw byy dirr Krist, qycc dirr Islael ee qog byy hxun, dirr jiaxee ingwunw ee iog byy qansiap, byy soxx ngwbang, diamr dirr sewqanx m bad Siongrder.
13 Linw vingsor lirkuix hng hng :ee, dnaxx diamr dirr Krist Jesus, dui' Ix ee huih u did diyc qinruaw.
14 In'ui Ix si juer lanw ee hyvingg, hro nng vingg juer jit xee, tiah kir hitt diongqanx sna' qeh ee cniuu,
15 Qycc dirr Ix ee ziogtew huewbyy qed uansiuu ee indnuax, dyrr si jiaxee qaiwbing ee ludhuad, qiwjair dirr quile :ee; beh dirr Ix vunxsinx, jiong' nng vingg jyrjniaa jit xee sinx ee langg, laii singjiu hyvingg;
16 Qycc ixqing’ dirr sibzirqer druu kir hitt xee uansiuu, beh hro nng vingg venr jidtew, dui' sibzirqer qapp Siongrder hxyy.
17 Qycc laii taunn hyvingg hro linw hng ee langg, iarr tuann hyvingg hro qin :ee.
18 In'ui dui' Ix, lanw nng vingg dirr jit xee Sinn did diyc cinqin Ve.
19 Anxnix linw byy qycc juer guarbinrlangg iacc qiawkax :ee, si qapp jiaxee singwdoo siang qog, juer Siongrder qrex-lai ee langg,
20 Siurr kixjy dirr jiaxee suwdoo qapp sendix ee derqix dingw, Krist Jesus qaqi juer cuwqag iauwqinw ee jiyc;
21 Jairdirr Ix qniwnarr soxx kiw :ee, longxx sna' lenlok, diamr dirr Jruw laii jiamrjiam jniaa juer singwden;
22 Linw iarr diamr dirr Ix snaqab siurr kixjy, jniaa juer Siongrder ing Sinn soxx kiarkiw ee cur.
3 In'ui anxnix, guaw Paul, uirdiyhh linw guarvanglangg juer Krist Jesus ee siuhuan,
2 Huanrser linw bad tniax qnir Siongrder uirdiyhh linw soxx sniuxsur hro guaw :ee ee undenw ee jithun,
3 Dyrr si ing kexsi hro guaw jaix hitt xee ywbiau, dyrr cincniu guaw ixjingg bad dairliok siaw :ee.
4 Linw tak ix, dyrr e hiauxdid guaw jai'ngiaw Krist ee ywbiau,
5 Si jingg dai m bad hro langg jaix :ee, byy cincniu henrjai dirr Singwsinn kexsi Ix jiaxee sxingr ee suwdoo sendix jidngiu,
6 Si guarvanglangg dirr Krist Jesus, dui' hok'imx, dangjee juer horsuu, dangjee juer jit xee sintew, snaqab u hxun dirr soxx ingwunw :ee.
7 Guaw juer jitt xee hok'imx ee ce'ing, jiauww Siongrder undenw ee sniuxsur, dyrr si jiauww Ix ee quanlingg soxx unrhingg laii sniuxsur guaw :ee.
8 Guaw si jiongww singwdoo diongx siongrr derr id ser :ee, did diyc jitt xee undenw sniuxsuw guaw, tangx jiong' Krist be cikdok .did ee vuwu tuann hro guarvangx,
9 Iarr hro jiongww langg longxx bingvik jitt xee ywbiau si jaixngiu anvaii, dyrr si ligdai ixlaii kngr bat dirr jy banrmic ee Siongrder :ee;
10 Dnaxx beh dui' qauwhue hro dirr tnix nirr jiaxee vran jingwsu :ee, u quanlingg :ee jaix Siongrder vacvnuax ee diwhui,
11 Jiauww Ix dirr lanw ee Jruw Krist Jesus soxx dniardiyc banrdai ee jixir;
12 Lanw jiaxee dui' sinr Ix, u hyxdnaw qycc hairjai, laii cinqin Siongrder.
13 Soxiw qriuu linw byc did uirdiyhh guaw ter linw soxx sriu ee huanrlan laii luexjir; jex si linw ee ingqngx.
14 In'ui anxnix, guaw qui lyc dirr Ve ee binrjingg,
15 Dyrr si dirr tnidingw derjniu longxjongw ee qrex dui' Ix laii hy miaa :ee,
16 Qriuu Ix jiauww Ix ingqngx ee vuwu, dui' Ix ee Sinn, ing quanlingg hro linw simlai iongxqnia;
17 Hro Krist dui' linw ee sinr laii kiarkiw dirr linw ee simx, hro linw u dingwqinx he derqix dirr zin'air,
18 Jiacc e qapp longxjongw ee singwdoo hiauxgno hitt ee dngg, kuah, quann, cimx,
19 Iarr jaix Krist ee tniar, dyrr si vnuaa quer dirr langg soxx e jaix ee tniar, hro linw jiauww Siongrder jiauvi ee ciongmuaw laii did diyc ciongmuaw.
20 Siongrder ee qniajuer vnuaa quer dirr lanw itcer soxx qriuu soxx sniu :ee,
21 Dyrr si jiauww Ix soxx unrhingg dirr lanw ee quanlingg, guan dirr qauwhue qapp dirr Krist Jesus ingqngx qruix Ix qaur banrser, dairdai byy suah. Amen.
4 Soxiw guaw diamr dirr Jruw juer siuhuan :ee, krngr linw qniaa dairjir diyhh hap dirr soxx sriu ee driaur,
2 Huanrsu kiamsunr, unziuu, ing tunlunw, dirr zin'air sna' kuan'iongg,
3 Ing hyvingg sna' qetlenn, diwir siuw Singwsinn soxx sniuxsur ee hab'id.
4 In'ui tew jit xee, Sinn jit xee, cincniu linw siurr driaur ee ngwbang iarr si jit xee;
5 Jruw jit xee, sinr jit xee, sexlew jit xee;
6 Siongrder jit xee, juer jiongww langg ee Ve, dirr banru ee dingxbin, quanwcuanr dirr banru, diamr dirr banru :ee.
7 Jongwsirr ing undenw hro lanw dagg langg, si jiauww Krist unsur ee hunrliong.
8 Soxiw u qongw, "Ix singquann ee sii, liac hiaxee siurr liac :ee, iarr jioing' jiaxee unsur vunx hro langg".
9 (Dnaxx qiwzenn qongw Ix singquann, qamxx m si qongxx Ix bad qangr lyc?
10 Hitt xee singquann dirr jiaxee tnix ee dingxbin :ee, beh ciongmuaw banrmic.)
11 Ix soxx sniuxsur :ee, u suwdoo, u sendix, u tuann hok'imx :ee, u bogsux qapp sensnix,
12 Uirdiyhh beh hro singwdoo jiauvi, laii juer ce'ing ee qangx, kixjy Krist ee sintew,
13 Didqaur lanw jiongww langg dirr sinr, ixqip bad Siongrder ee Qniaw, laii hab'id, qaur jniaa jit xee uanjuann ee langg, qaur did diyc Krist ee ciongmuaw laii diongxsingg;
14 Beh hro lanw byy qycc juer ginxaw, hro dagg ngiu qawsi ee hongx iycuah piauliuu, be qycc driongr diyc langg ee kuixqer, drir qaur hro cabiu ee huatsut muapenr;
15 Si diyhh diamr dirr zin'air, qongxue jinsit, hro lanw dirr banrhang jiamrjiam dua, qaur lenjiab dirr hitt xee juer Tauu :ee, dyrr si Krist;
16 Dui' Ix, juann srinx qethap lenlok, dyrr si dui' vacjad ee sna' jiap'ingr, jiauww dagg tew qaizenn ee unrdong, drir qaur sinkux naxx diongxdua, dirr zin'air qaqi kixjy.
17 Soxiw guaw qongw, qycc dirr Jruw laii qra jingwbingg, dyrr si linw ee soxx qniaa m tangx qycc cincniu guarvanglangg ee soxx qniaa, inx ee simjir kangx kangx,
18 Inx ee simsux oamr, qecdng dirr Siongrder ee uahmia, si dui' inx ee m jai'ngiaw, inx ee simx qonggni;
19 Qiwzenn songwsid liongsimx, dyrr hongwciongr qaqi dirr siapiah, dui' tamx laii qniaa dagg ngiu ee uwuer.
20 Narr si linw hagsip Krist dyrr m si anxnix.
21 Linw narr qyxzenn tniax qnir Ix, qycc dirr Ix siurr qawsi, jiauww Jesus soxu ee jinsit,
22 Lun jiongjenn ee qniajuer, linw diyhh trngr kir qu ee langg, dyrr si jiauww inxiuw langg ee su'iok decc vairhuai :ee;
23 Qycc linw simsinn nguarsinx,
24 Cing hitt xee sinx ee langg, dyrr si jiauww Siongrder ing jinliw ee gi qapp sxingr laii congwjy :ee.
25 Soxiw diyhh druu kir vehcat, dagg langg qapp ix ee cuwvnix qongw jinsit, in'ui lanw snaqang juer tew.
26 Linw siurkir, diyhh m tangx huanrjuer; u qig siurkir, m tangx qaur zit lyc,
27 Iarr m tangx hro moquiw u pang tangx zip.
28 Tautec :ee byc did qycc tautec, lingkow diyhbuaa, cinciuw juer hyw ee qangx, jiacc u tangx vunx hro kiamwkueh ee langg.
29 Linw ee cuir longxx m tangx qongw cud lasamm ee ue, dogdok diyhh qongw hyw ue, jiauww qibsii ee kiamwkueh laii jyrjiu ix, hro tniax ee langg did diyc undenw.
30 Iarr byc did hro Siongrder ee Singwsinn iubun, dyrr si soxx bad ing laii kamr inr linw, qaur dirr sioghuee ee zit :ee.
31 Itcer ee koxdok, uanwhun, siurkir, suanziongw, huixvongr, ixqip itcer ee okdok, longxx diyhh dui' linw diongqanx druu .kir.
32 Qycc diyhh ing zinjuu sna' kuanxtai, jrunn linbinw ee simx; dairqex sna' siawbenw, cincniu Siongrder dirr Krist bad siawbenw linw jidngiu.
5 Linw qiwzenn juer Siongrder soxx tniar ee qniaw, diyhh yc Siongrder.
2 Iarr diyhh qniaa dirr zin'air, cincniu Krist bad tniar linw, ter lanw henr qaqi juer lexmic juer jewsu, pangx pangx dirr Siongrder ee binrjingg.
3 Narr si qan'imm qapp itcer ee uwuer, iacc si tamsimx, dirr linw diongqanx lenrr qongw kiw iarr m tangx, jiacc si jiauww singwdoo soxx habgii :ee.
4 Qenwsiauwsu, qapp pupiyr ee ue, iacc si hiwhiauh ee ue, iarr si vutqaix; kacc hyw diyhh qongw qamxsia ee ue.
5 In'ui linw kaksit jaix qniwnarr imluan :ee, iacc si uwuer :ee, iacc si tamsimx, dyrr qapp vair gnoxsiong :ee qangrkuanw, longxx berdid tangx singjiab qegiap dirr Krist qapp Siongrder ee qog.
6 Linw byc did hro langg ing byngiaxue soxx kipenr, in'ui Siongrder ee siurkir uirdiyhh jiaxee su qaur dirr vuergik ee langg.
7 Soxiw linw byc did qapp inx u hxun.
8 In'ui linw jingg si amr, danrsi jitmaw diamr dirr Jruw si qngx, diyhh jiauww qngbingg ee langg laii qniaa,
9 (In'ui qngx ee qetjiw jairdirr itcer ee hyw qapp gi qapp jinx),
10 Giamrbingg simxmih si Jruw soxx hnuahiw :ee.
11 Byc did camcap dirr oamr byy haurqyw ee qniajuer, kacc hyw diyhh jikvi inx;
12 In'ui inx dirr amwjni soxx qniaa :ee, lenrr qongw dy' qenwsiaur.
13 Dogdok huanrsu siurr jikvi :ee dyrr si hro qngx soxx henxbingg; in'ui qniwnarr siurr henxbingg :ee longxx si qngx.
14 Soxiw u qongw, "Kunr ee langg diyhh cnew, dui' sixlangg diongx kiw .laii, dyrr Krist ee qngx beh jiyr liw."
15 Soxiw diyhh jimjiog knuar linw ee soxx qniaa si jnaixngiu, m tangx cincniu byy diwsig :ee, diyhh cincniu u diwsig :ee,
16 Diyhh vyxsiyh qihue, in'ui dongqimx ee siser siaog.
17 Soxiw m tangx gong gong, diyhh bingvik simxmih si Jruw ee jixir.
18 Iarr byc did jiuxjuir, jex e drir qaur hongwsur, si diyhh hro Singwsinn ciongmuaw;
19 Ing six, ing quax, ing sinn ee quax, dairqex sna' inwdab, ing simx gimm six jokgak laii ylyw Jruw;
20 Banrsu siongsiongg dirr lanw ee Jruw Jesus Krist ee miaa laii qamxsia Ve Siongrder;
21 Diyhh qingwuir Krist laii sna' sunrhok.
22 Juer hurzinlangg :ee, diyhh sunrhok qaqi e diongrhux, cincniu sunrhok Jruw jidngiu.
23 In'ui diongrhux juer hurzinlangg ee tauu, cincniu Krist juer qauwhue ee tauu, iarr qaqi juer juantew ee Qiuwjuw.
24 Qauwhue sunrhok Krist, hurzinlangg huanrsu iarr diyhh anxnix sunrhok diongrhux.
25 Juer diongrhux :ee, linw diyhh tniar hurzinlangg, cincniu Krist tniar qauwhue, iarr ter ix henr qaqi,
26 Beh hro ix jniaa sxingr, si ing juiw ee sew qapp dyrliw laii cingkir ix,
27 Beh jiong' ix henr hro qaqi, juer ingqngx ee qauwhue, byy diamw, byy ziauwbin, cincniu jitt kuanw :ee longxx byy, dyrr si sxingr byy hacuu.
28 Anxnix diongrhux diyhh tniar ix ee hurzinlangg cincniu qaqi ee sintew. Tniar qaqi ee hurzinlangg dyrr si tniar qaqi.
29 In'ui m bad u langg uanwhun qaqi ee sinkux; si ngiuxci ix, vyxsiyh ix, cincniu Krist ee kuanxtai qauwhue;
30 In'ui lanw dyrr si Ix sinkux ee vactew. In'ui anxnix, langg beh lirkuix verbuw, qetlenn ix ee bow, inx nng xee beh jniaa juer jidtew.
31 Jitt xee ywbiau dua ar; guaw qongw jex, si qiw Krist qapp qauwhue.
32 Jongwsirr linw langlangg sui' xee diyhh tniar ix ee hurzinlangg cincniu qaqi; hurzinlangg iarr diyhh qingwuir ix ee diongrhux.
6 Juer qniaxzii :ee, linw diamr dirr Jruw diyhh sunrtanr linw ee verbuw, in'ui jex si ingqaix :ee.
2, 3 Diyhh junqingr liw ee verbuw, (jex si tauu jit diauu u qnaa ingwunw ee qaiwbing), beh hro liw hingtongx, dngg huewsiu dirr sewqanx.
4 Juer laurve :ee, linw m tangx qig qniaxzii ee siurkir; dogdok diyhh ing Jruw ee qingwqair qapp qauwhunr laii vue'ngiuw inx.
5 Juer lovok :ee, linw diyhh qniahniaa gniauhgniauc cuah, ing singsidsimx sunrtanr jiauww ziogtew juer linw ee juxlangg :ee, cincniu decc sunrtanr Krist.
6 Byc did qandna' dirr bagjiux jingg unkunn, cincniu cruw hro langg hnuahiw :ee; dyrr diyhh cincniu juer Krist ee lovok, ing sidsimx laii qniaa Siongrder ee jixir;
7 Qamsimx juer qangx, cincniu qra Jruw juer, m si qra langg juer;
8 In'ui jaix bylun juer lovok iacc si juriuu :ee, dagg langg soxx qniaa simxmih hyw, beh dui' Jruw laii sriu dywdngw.
9 Juer juxlangg :ee, linw iarr diyhh anxnix kuanxtai lovok, byc did hangxhuah inx; in'ui jaix inx qapp linw qangg jit xee Jruw dirr tnix nirr, dyrr si byy ing guarmau cruw langg :ee.
10 Qetbuew laii qongw, linw diyhh diamr dirr Jruw qapp Ix u kuiwlat ee quanlingg laii iongxjongr.
11 Diyhh cing Siongrder juanhur ee jenwqah, hro linw e kia jai, laii dixdik moquiw jiaxee kuixqer.
12 In'ui lanw ee qaujenr m si dixdik hetkir :ee, si dixdik jiaxee vran jingwsu :ee, jiaxee jiangxquann :ee, qapp jitt xee amwser sewqanx jiaxee qun'ongg, ixqip tnidiongx pnaiw ee sinlui.
13 Soxiw linw diyhh ing Siongrer juanhur ee jenwqah, hro linw dirr honghiamw ee zit dixdng e diauu, qaur linw ixqing’ juer jniaa longxjongw ee su iarr iuguann kia jai.
14 Soxiw diyhh kia jai, ing jinsit haa iyx, ing gi juer horsimqniar,
15 Ing hyvingg hok'imx ee virvan cing dirr kax nirr;
16 Qycc diyhh giaa sinr ee dinvaii, ing jitt xee jiacc e pacbet itcer pnaiw ee huexjnir.
17 Qycc niaxsiu jinxqiur ee taukuex, ixqip Sinn ee qiamr, dyrr si Siongrder ee ue; ing dagg ngiu ee qidyw qapp kunxqiuu,
18 Sisii dirr Singwsinn laii qidyw, qingxsingw dirr jitt xee, uirdiyhh longxjongw ee singwdoo kunxqiuu byy iawsen;
19 Iarr ter guaw qriuu, hro guaw erdid kuix cuir hyxdnaw laii qongw, hro langg jaix hok'imx ee ywbiau,
20 Uirdiyhh jitt xee, guaw juer qruar ticlen ee kimcex; iarr diyhh qriuu hro guaw dirr jitt xee ywbiau e hyxdnaw, jiauww guaw soxx ingqaix qongw :ee qongw.
21 Dogdok beh hro linw iarr jaix guaw ee surjingg qapp guaw ee qingxhongw jnaixngiu. Soxx tniar ee hniadi Tyqikus, dyrr si diamr dirr Jruw jinrdiongx ee ce'ing, ix beh hro linw jaix longxjongw ee su.
22 Uirdiyhh anxnix, guaw diaudii crex ix kir jiurqin linw, hro linw jaix guanw ee su, qycc an'uir linw ee simx.
23 Guan ving'anx qapp zin'air ham' sinr, dui' Ve Siongrder qapp Jruw Jesus Krist qaur dirr jiongww hniadi.
24 Qycc qniwnarr ing be vairhuai ee tniar laii tniar lanw ee Jruw Jesus Krist :ee, guan undenw qapp inx jiongww langg snaqab dilehh.