DERR 25 JNIUX
CUD HUIH
Cud huih (出血, haemorrhage) u snax kuanw: dui’ dongrmec cud huih, qiyr juer dongrmec cud huih; dui’ jingrmec cud huih, qiyr juer jingrmec cud huih; dui’ mngsewhuicqngw cud huih, qiyr juer mngsewhuicqngw cud huih.
Dongrmec cud huih ee kuanxsid si simx pog ee sii, huih jiurr cringr .cud .laii. Ix ee sig cing’angg.
Jingrmec cud huih ee kuanxsid jiurr si dui’ siursiongx ee soxjai, huih diddit lrauu .cud .laii (byy cringr .cud .laii). Ix ee sig kacc ox.
Mngsewhuicqngw cud huih, sidi si ciac’angg, iarr hitt xee huih m si decc lrauu, si dui’ siongcuir, dagg xui ee soxjai decc siab .cud .laii.
Jingwjong tangx hunx nng kuanw:
1. Hutzenqanx cud jin’ je huih. Puehux qapp liammoc e dngw vec. Singkux e lrauu cinr qnua, iarr e lingw. Hokib kacc qinw, iarr cuanw duarkuir. Mehpog si kacc qinw kacc ser, kacc byy lat. Knuar be bingg, bagjiux cud huexqimqox. Hnirkangx kongrkong hauw. Air tror, iarr m jaix langg. Langg be anjing, air luan luan dinxdang. Singkux ee texunx lyhqe, iarr vutjiw cuiwdax.
2. Huih cud byy diddit lrauu, ursii jriw, ursii lrauu, jitt hy cud huih qingquer kacc quw, jingwjong si: Ganxqiamw qapp kaciuw juixjingw. Langg kacc kuair hrun .kir. Mehpog kacc qinw, iarr kacc byy lat. Taukag hinn. Huih naxx cud, jingwjong naxx siongdiong. Narr dirr be knuar qnir ee soxjai decc cud huih, qycc jit~nng zit e kiw zet 101-102 dxo F. (38.3∘-- 38.9∘C.).
U jit hxang jueww iauwqinw ee su, jiurr si u langg narr cud huih, hitt xee huicqngw qaqi e sok’uaw laii jriw, in’ui huicqngw guanvunw u cunqiux ee singr. Narr quah dng ix, hitt xee dng ee soxjai, siangvingg longxx lirkuix .kir, jongw .si huicqngw ee guarjann-lai, hitt xee kangcuir jiurr qiux ser .kir. Iarr huicqngw-diongx ee huih, qapp huicqngw guarbin ee huih vniwjniaa qui’ der; dui’ anxnix huih jiurr e qaqi jriw. Langg narr hun .kir, ix ee simx ee mehpog kacc ban, iarr kacc byy lat, soxiw huih e kacc be lrauu. Jongw .si kanwho tak dingw jam ee su, m tangx pacsngr huih dniardiyc qaqi e jriw, iauwqinw diyhh isingx ing guarkyx ee hxuad qra ix jriw.
Dirliauu: Vnirlangg diyhh dyw lehh, iarr longxx m tangx dinxdang. In’ui langg narr dyw lehh, ix ee simx decc tiaur, decc dinxdang, jiurr kacc ban, huih decc lrauu, jurzenn iarr kacc ban. Ix ee taukag diyhh viw kax kacc qe. Diyhh ing siyx nitanw, qapp siyjuixquanr, hro ix kacc siyx. Iarr kanwho cenban m tangx hro jiac qiongsimjex, acc si jiuw ee lxui. Langg cud huih hrun .kir, narr liamvnix ing jiuw hro ix, qniax liauw ix jiac qiongsimjex liauxau, simx tiaur kacc qinw, jiong’ ixqingx sxingg ee huicder, suar sag .cud .laii. Qniahniaa ee su, iarr e hro simx tiaur sniu’ qinw, soxiw diyhh krngr vnirlangg m tangx qniax. Narr si diyhh ing qiongsimjex diyhh jiauww isingx ee bingrling jiacc tangx. Hro ix anjing ee huatdo, jiurr si ing apenr hro jiac, acc si juwsia. Narr cud huih jin’ je, ursii isingx beh ing iamjuiw juwsia dirr jingrmec-lai, acc si dirr puee-xe ee qetdewjid (derr 30 jniux).
Narr vnirlangg hutzenn lrauu huih, kanwho diyhh jaix jriw huih ee hxuad, narr beh qanda’ tingwhau isingx laii jiacc qra ix jriw, jiurr dikkag e gorsu, soxiw kanwho diyhh u hagbun qenwsig, e ing jriw huih ee hxuad. Nar vnirlangg singkux guarbin jit soxjai lrauu huih, kanwho ingqaix diyhh jaix hitt xee huicqngw dirr simxmic soxjai jiksii qra liap lehh, acc si ing lat qra cic lehh, laii jriw hitt xee huih, tingwhau isingx laiijiacc idi; soxiw jitt kuanw ee hagbun jueww iauwqinw, jitt hyw jriw huih ee huatdo bad qiur langg m si jiyw.
Narr si kax acc si ciuw lrauu huih, diyhh hro hitt qix decc lrauu :ee qiac qnuaii, iarr jiong’ simxmic mic; cincniu snxax, acc si mipue, acc si jiyhtauu he erdew laii tuh .kiw .laii.
Siursiongx ee huicqngw narr cue e diyc, si kacc hyw. Diyhh ing deh ee lat, acc si cic hitt xee cud huih ee soxjai, acc si cic hitt xee huicqngw soxx qingquer ee lo. Narr byy misex, ing cingkir ee vehvor laii trad hitt xee siongcuir.
Narr si dua ee dongrmehqngw siursiongx, diyhh ing dua lat cic hitt xee siursiongx ee soxjai, hitt dingxbin ee dongrmec, jiurr si kacc uaw dirr simx ee dongrmec. Setsuw jitt xee dongrmec si dirr u qud ee soxjai, ing jngxtau’aw qra ix cic, si vutjiw u qonghau. Jit langg jixu e cic quiw hunjingx quw nardnia, kacc quw jiurr iawsen.
Jixhuickir (止血器, Tourniquet): Tec jit diauu ciuxqinx, lairbin qngw jit xee qanaxtad, acc si ing vadd kuanw gni ee mic juer driam; kuar dirr dongrmec ee dingxbin, jiong’ ciuxqinx vak hitt kax, acc si ciuw nirr (derr 192-193 doo). Ing jit qix ser qiw ee qunxaw cngx hitt xee ciuxqinx, qapp suwjix ee diongqanx, jiacc qra ix qaw uaw .laii; jongw .si m tangx sniu’ ann, vutqyr hitt xee lat e hro huih jriw jiurr hyw. Diyhh siyxsimx knuar hitt xee driam u dui’ dongrmhqngw acc byy (derr 193 doo). Narr u ciurlingx jixhuickir iarr kacc hyw. Jitt xee jiurr si qanda’ jiamrsii ee hxuad nardnia, narr kacc quw hitt qix kax jiurr e siw. Ing jitt hy jixhuickir m tangx quer nng diamxjingx quw. Iarr qanda’ tangx ing jriw suwjix ee dongrmec cud huih. Narr jingrmec cud huih jiurr m tangz ing jitt hy huatdo.
Jixhuickir u quixnarr kuanw. Derr 194-195 doo jitt kuanw u qauwgiac bingg. Dairsingx jiong’ binrqinx vaux dirr beh vak jixhuickir ee soxjai. Tec hitt liap caa deh dirr dongrmec ee dingxbin, jiacc jiong’ hitt diauu ciurlingqngw dnii nng linr. Diyhh dnii duxhyw ann tangx hro dongrmec ee huih tingjiw.
Narr si jingrmec cud huih diyhh jiauww qir dirr erdew ee hxuad. Hro vnirlangg dyw vnii vnii, hitt qix cud huih ee ciuw acc si kax diyhh qiac qnuaii. Narr u vak ann ee duar diyhh vangwsangx. Diyhh jiong’ quixnarr der quer siaudok ee misex qapp mihuex he dirr siongcuir ee dingxbin. Dairsingx beh kamr ee mihuex diyhh viw siongcuir kacc dua damrvyc, aurlaii dingxbin unn jiamrjiam kacc dua, jiacc jiong’ pingduar vak. Dui’ kajngxtauaw, acc si ciuxjngxtau’aw, ing pingduar jiamrjiam vak qaur siongcuir. Iugaunn diyhh qiac qnuaii.
Dirr erbin beh qanxsingw qongw narr dongrmec cud huih soxx diyhh cic ee uirdir (derr 199 doo).
Siongrjix: Narr cud huih dirr siongrpokqud, acc si jingrpokqud, diyhh cic dirr siongrpog dongrmec (brachial artery), nngrtaupokqinx (biceps) ee lairbin vingg. Cic ee lat diyhh ngr uaw guarbin qapp aurbin vingg. Narr anxnix e cic uaw dirr siongrpokqud (derr 196 doo).
Narr qyc’erkangx cud huih, diyhh cic dirr syxqud-xe dongrmec. Cic ee soxjai si syxqud ee dingxbin, hitt xee sewbin diyhh ngr aurbin qapp damrvyc erbin, uaw tauu jit qix hiabqud (derr 197 doo). Kacc hyw diyhh ing jit qix catuii, jiong’ vor vaux bat tuii ee buexliux, jiacc jiauww dingxbin ee huatdo cic ann (derr 198 doo).
Narr ciuxjniuw cud huih, jiong’ cingkir ee ciuxqinx acc si vor vaux jit liap ngii ngii ee jiyc-aw, he dirr ciuxjniuxsimx (derr 200 doo). Ciuw jngxtau’aw diyhh lrak uaw, ing ing pingduar vak, huih jiurr jriw (derr 201-202 doo). Jiacc jiong’ diauwduar diauwpuu dirr hxingx-jingg (derr 203 doo).
Harjix narr cud huih diyhh cic dirr qoxdongrmec decc qer(?) qutvnuaa ee soxjai. Cic ee uirdir diyhh dirr jingsiongrqig qapp tixqud-nngxqud-jiaphap (恥骨軟骨接合, symphysis pubis) jitt nng diamw ee diong’ngx. Cic ee sewbin, diyhh aurbin qapp damrvyc dirr lairbin (derr 204 doo).
Narr kabuew cud huih, diyhh jiauww derr 205 doo, jiong' kax qiux uaw. Jiong' jit liap jiyc, acc si vor juer :ee, juer driam, he dirr cikquanjad aurbin ee uanx; jiacc ing pingduar vak ann. Anxnix e cic ann cikqog dongrmec (popliteal artery). Jitt xee huatdo si qankow; diyhh jimjiog vnirlangg amwjni qaqi taux tauw kuix. Ing jitt xee huatdo, cic siongrpog dongrmec iarr hyw (derr 206 doo).
Narr taukag acc si amrqunw cud huih diyhh cic jongxqing dongrmec (common carotid artery). Cic ee soxjai si hingqud qapp syxqud siy’ jriab ee quanjad ee dingxbin cunr vnuar qnuaii. Cic ee sewbin si ngr aurbin qapp lairbin (derr 207 doo).
Ganbin dongrmec (Facial artery). Cic jitt diauu dongrmec ee soxjai si dirr hargogguu ee jingbin jit cunr. Diyhh cic uaw dirr hargogqud (derr 208 doo).
2. Ing dongrmehknii jiong’ huicqngw gnec hro ann, juan lehh, acc si ing snuar qra ix vak lehh.
3. Siyjiokhuad (燒灼法, Cautery): Jitt xee huatdo jiurr si jiong’ jit qix jiamx, acc s ticqunxaw, ing huew, acc si den, hro siyx, qaur vnir angg ee sii, jiacc ing jit qix siyjiokpinwih, tangx qra ur hitt xee decc lrauu huih ee soxjai (knuar derr 226 bin).
4. Vingx: He vingx dirr hitt xee decc lrauu ee soxjai, iarr huicqngw e qiux .kiw .laii. Narr pnirkangx cud huih, tangx ing vingjuiw, acc si jit der vingx he pnirkangx-lai. Narr cuir-lai cud huih, iarr tangx jiong’ vingx qamm hro qui’ cuir. Narr ui nirr cud huih, ursii isingx bad qah langg ing vinglongg, he dirr vnirlangg vakdow-dingw; acc si narr hir cud huih, he vinglongg dirr hxingx-jingg. Iauxquxx, decc ing ee sii diyhh jaix, derr id iauwqinw diyhh hro vnirlangg singkux e duxhyw siyx.
5. Ing siyx juiw ee zeddo 120∘-- 140 dxo F. (49∘-- 60∘C.) Diyhh ing mihuex jimr dirr siyx juiw nirr, jiacc he decc cud huih ee xui. Acc si ing hitt xee siyx juiw sew cud huih ee soxjai, cincniu juxqiongx-lai; narr anxnix diyhh 120 dxo F. (49∘C.).
6. Jriw huih ee iyc: Soxx ing ee iyc jiurr si liquor ferri perchloridi, acidum tannicum qapp hazeline. Jitt xee hxuad byy simxmic tywdongr.
Ursii ing suprarenal extract ee iyc laii juwsia, in’ui beh jriw huih ee enqor. Iarr ing ergot ee iyc laii juwsia, acc si jiac, e jriw juxqiongx cud huih.
Ursii banw cuiwkiw laiuxau, cuiwkixhnua, huih lrauu be jriw. Narr ing jriw huih ee iyc, cuir nirr u pnaiw ee bi, kiwhnua iarr e nua .kir. Derr id hyw ee hxuad, si ing jit der ser der ee misex, he dirr cuiwkixkangx-lai. Dairsingx jiong’ huicder sew hro cud .laii, jiacc ing jit xee ser der ee qanaxtad, hitt xee duarsiyw diyhh qapp cuiwkixhnua ee kangx vnivnii, viw cuiwkiw kacc qnuaii damrvyc. Ing pingduar dui’ taukag-dingw, vak duiww hargogqud lyc .laii, hro hitt xee kixhnua be dinxdang, anxnix deh hro ann, iarr e jriw huih.
Pnirkangx cud huih ee dirliauu hxuah: Qah vnirlangg dyw lehh, narr iuguann be jriw, diyhh knuar huih dui’ dyxlyc jit vingg ee pnirkangx lrauu .cud .laii, jiacc ing misex qra ix trad hro ann. Ursii ing vingx he pnirkangx-lai, acc si pnirniuu-dingw, acc si amrqunw aurvingg, iarr e jriw huih. Ursii narr ing misex trad pnirkangx, huih e dui’ cuir nirr cud .laii; hitt sii, isingx soxx decc ing ee huatdo, si dirr cuir-lai ee arubin laii trad aurpnirkauw. Jitt xee huatdo si si huiwkir, kanwho jiurr mrbenw ing, diyhh isingx juer jiacc e ing .did.
Narr si pruir huih ee langg, hitt xee huih qoo dirr naauu, diyhh jiong’ huicder tec .cud .laii, jiong’ vnirlangg ee jimxtauu suaw he vnix:a, jiong’ bincngg kuar kax ee soxjai driam hro qnuaii (jit ciyh jiurr hyw), diyhh hro taukag viw kax kacc qe.
Tror huih qapp kak huih (sraur laii pruir huih) si byy sna’ drangg; sraur ee huih si dui’ hiwjong sraur .cud .laii; tor huih si dui’ ui nirr tror .cud .laii .ee; kanwho diyhh jaix jitt nng kuanw ee hunved, vailet dirr erdew:
Tror huih (haematemesis): Dui’ ui nirr tror .cud .laii ee huih.
1. Sikdi kacc ox.
2. Cam’ ui nirr soxx jiac ee mic, snaqab cud .laii.
3. Kacc siongg tror huih jit vaiw narnia.
4. Dairven u osig ee huih.
5. Ui ee jingwjong.
6. Kacc siongg jingwtauu si kacc kinx.
Kak huih (Kaemoplysis): Dui’ hir kak huih sraur .cud .laii ee huih.
1. Sikdi kak angg.
2. Cam’ hir-lai ee kongkir sraur .cud .laii .ee, si puec puec, vucpa vucpa, in’ui u kongkir dirr lairbin.
3. Qeh quixnarr zit au, tamm u qnaa huicsix, huicdiamw.
4. Dairven byy huih.
5. Hiwjong ee jingwjong, sraur, zet.
6. Jingwtauu kacc siongdiong.
Narr ix ee cuir byy qycc pruir cud hiwjong ee huih liauxau, jiurr qah diam diam diam kunr, m tangx dinxdang, iarr byc did hro ix qongxue. Cuir nirr hro qamm vingx. Isingx kah duarbin beh congr morphia 0.016 grm. qra ix juwsia. Tror huih ee vnirlangg iarr byc did hro ix dinxdang, qongxue, acc si jiac mic; qycc diyhh e qir did bylun tror huih, acc si kak huih, iauwqinw m tangx hro ix limx jiuw. Narr si vnirlangg huih dui’ qongbunn lrauu .cud .laii, diyhh hro ix diam diam dyw lehh, byc did dinxdang. Narr si dui’ imdy lrauu .cud .laii, diyhh jiong’ bincngg kuar kax ee soxjai, driam hro viw taukag qex u jit ciyh qnuaii. Ursii jiauww isingx ee bingrling, ing 115 dxo F. (46∘C.) ee siyx juiw qra ix juer imdyx quanwkaiwhuad (derr 237 bin); narr e kamx did kacc siyx, jiurr ing 120 dxo F. (49∘C.) ee siyx. Narr ing siyx juiw ee huatdo, be did tangx jriw(?juw?), diyhh jiong’ jit diauu jit diauu quer sac ee juixnivor (lint) dui’ imdy trad hro ann. Narr huih lrauu sniu’ je, diyhh jiong’ kaqud ing mihuex qapp pingduar vak hro ann, hro hitt xee huih dairsingx qruix dirr simx qapp hir ee diongqanx, laii voxho ix ee sniwmia; jitt xee huatdo, ursii jin’ u qonghau. Vnirlangg lrauu huih ee sii, byc did hro ix jiac siyx ee mic. Narr isingx byy qongw beh ing qiongsimjex, kanwho jiurr m tangx hro ix.
Jongw .si jueww iauwqinw diyhh liamvnix cniaw isingx laii idi. Isingx beh lairjinw hitt xee huih, dui’ simxmic enqor jiacc lrauu. Narr anxnix jaix cud huih ee guaninx, isingx beh ing huatdo qra ix jriw.
U go hxang, isingx iauxx bue laii ee dairsingx, kanwho tangx qaqi juer:
1. Hro vnirlangg diam diam dyw lehh.
2. Hro ix ee kax kacc qnuaii.
3. Jiong’ kax ing mihuex qapp oingduar vak.
4. Qah vnirlangg hro ix siyx.
5. Virvan ven isingx qiamxcaiw air beh ing ee mic, cincniu:
Kiw huexloo hro ven.
Qunxjuiw.
Lingw qunxjuiw.
Iamjuiw.
Siaudog’iyhjuiw.
Jixhuic’iyc.
Siaudok vausiongliau, mihuex, misex, pingduar.
Qesix, vingsiongg decc ing :ee.
Juwsiarkir.
Morphia, beh juwsia ee loring.