uanjuann dyrdig
Bunchhai huan'ik
DAHUERTAUU
HUWCUD QUANHUAII QINXSIN DUIWTAI
Jitt venw ceh vutjiw u uihiabsingr. Guaw beh siaw, si sniu qongxx u langg su'iaur, siongsinr erdangr drat qaur juanbin ee dirliauu ingwhau.
Mrqycc, marr py diyc cneqniax/ qinxsin ee simjniaa. Jitt vunw ceh kyxlingg jyrsingg sionghai --- hro mow quaw togjiaw hamrzip tongwkow nirr. Kyxlingg qyckacc camw --- u quaw langg kyxlingg lamriong ceh nirr ee lueriongg, sionghai vadd langg.
Guaw singx mng quer pnuawduanrlat/ causiuw be baiw ee togjiaw "liw zinruii jitt vunw ceh soxx tamwtyw zinsingr ee og, qamxx sngr byy dyrdig?" inx qongw byy anne sniu, u langg voxciongx qongw "gunw qauwhue u langg qongw, lenrr MARIA marr e hro langg sanxsingx singr huanwsiongw neh!"
Inx qongw qaxx jiacc didjiab, qanxdanx u lat ee huanxingr vutjiw huhap sidjer, mrqycc guaw iauxx si byy qaiww hongwsimx. Narr qongw jitt vunw ceh jyrsingg zimrhyy sionghai, duiww guaw ee togjiaw/ siarhue dairjiongr, singx qra linw hue sitlew. Dongsii, kunxcniaw qokk xui sewzi ingwhur/ qinxsin duiwtai.
Zuqyw jit vunw ceh henkuix liw luersimx ee siongtniar, cniaw itding rair kuan'iongg jurqiw/ air qaqi. Zuqyw u jit zit liw huatqag cuwvnix simhuaii-vutsen, marr cniaw liw huaipy unluanw / aiwsimx duiwtai inx. Itding diyhh dingxjinx ingwhur --- juansimx-juan'ir ee quanhuaii!
Siaog ee langg iong'i hin, cniaw e qir .did, SAINT AUGUSTINE qingxqyr lanw "hin juerog, air u jue ee langg", itdanr jinjniar knuar cingcyw siaog, "siongrder ee undenw dyrr e qangwlimm".
Qra mow quaw langg dah siaog ciamhy sii, guaw si iong qik giamqeh ee qewdat viaujunw, guaw soxx sinwkyr ee jruw qongw, "m tangx pepingg vadd langg, linw jiacc be sriu pepingg; " guaw ciangjai inxiong jitt dnxua ue, mrqycc jruw Iasox m si rair lanw ingxuanw bersaih vinglun langg'. Ix qewsiok qongw, "guirsenrjiaw ar! Liw diyhh dairsingx jiong' liw bagjiux lai ee dua qix samx-aw-kox tec cud laii, zenau liw jiacc erdangr knuar qaxx bingg ~ ~, tangx tec liw hniadi bagjiux lai ee cauxsab-aw cud laii."(Maxtair hokimx derr cid jniux derr id~ go jed). Iasox si rair lanw huisiongg sewzi, ixx uixdai ee aiwsimx, laii vinglun langg'. Soxui sewzi/ aiwsimx, longxx si singx ui' jurqiw vinglun kiw.
Narr berdangr singx binrduir zinsingr ee og, dyrr byy huatdo jiamduir zinsingr ee og duiwjingr lyc iyc! Be jiyw langg zinruii guaw ee jingg jit vunw ceh --- "simlingg derdoo (THE ROAD LESS TRAVELED)", si jit vunw hyw ceh. Qamxx si hyw ceh? Hex si tamwtyw zinsingr ee oamwbin neh! dairvorhun siaw iuxquanx zinlui siarhue siongrr baiw ee hunrjuw --- qongw sit :ee, hex si siaog moquiw ee hitt qrunn. U vit'iar duiww jiaxee langg lyc pnuawduan. Jitt pnix juxiaur si beh suecbingg : jiaxee digsuu ee duiwsiong qapp itvnuax zinsingr ee og, diyhh ixx kyhak ee honghuad genxqiur, berdangr qandna' tiusiong detliw tyxlun, ingwqaix qangxqiur kyhak. Uirr sidjer hingdong, lanw itding guanrir jyr pinglun. Tec cud puepnuar kyxlingg huawsingg guihiamw, derr cid jnxiux u siongser tyxlun. Dairsingx guaw beh qokk xui e qir .did : duhuix lanw singx jurgnow puepnuar/ jurgnow dirliauu, narr byy, dyrr byy hxuad banrid-busid lunrdng langg'. Huawqaiw zinsingr og ee jenwjingx, ongxongw si ui' qadingg jyr kiw. Jingrhuar jurqiw ee simlingg, itdit si zinlui iongxiuw siongrr qiongg/ u lat ee buxkir.
Jitt vunw qylando ee ceh, guan'inx jerje, siongrr juxiaur :ee si, jingxqyy quewdingg sriok henrjai jinwhingg, guaw iauxx decc yc knuar tauw zinsingr ee og ; sursit, si kiw vo narnia. Derr zi jniux "siaog simlixhak ee copuex", si iauxx bue u jiokgiac ee juliau quilap cud siaog sinlixhak qurtew kyhak diwsig. Iong'unw guaw tecniw qokk xui : jin sinr ceh vutzuu byy ceh. Sursit, vunxceh ee jongjiw, si beh inxhuad dag'ee jiamduir hen qaidnua, duiww jitt vunw ceh soxx qongw :ee juxdee zinrdix vutjiog/ byy qraur cingcyw :ee, viauxsi vutbuanw.
Jaxjingg, bad qongw .quer, Iasox qidog si guaw ee qiuwjuw, je nii au, ui' guduu jniajyr vudqauwdoo/ vixjiab hueqaur ee sinvir qauwgi au, dirr 1980/03/09, sir-jap-snax huer sii, jiapsui byy hunx qauwpair ee sexlew, quatjir jniajyr qidokdoo. Hitt sii, jitt vunw ceh ixqingx kaisiw siaw liauw jit dnxua siqanx ar, siaxjog ee quewdingg nirr, siongrder bad hro guaw jniajyr "qidokdoo ee penqenr", laii dyrkiamx/ venrqaiw. Dnaxx guaw byy qycc sixjner, byy hro jurqiw ham zip iapqag nirr. Marr byy sniu beh amkamr qidokdoo sinhun. Sursit marr jyr be qaur. Jniajyr qidokdoo si guaw itsingx siongrr diongriaur ee dua su. Hibang hro jitt vunw ceh u kacc qiongg ee suechoglik, qyckacc uanjingw.
Narr qongw qidokdoo hingsiong sniu' binghenw, e hro mow quaw togjiaw sanxsingx byy vit'iaur ee penqenr. Cniaw qokk xui kacc sewzi .jit .xe. Ui' quiw sewqiw jingg qaur dnaxx, dua okmoo jongxsi kangx u qidokdoo ee sinhun, qew qidog ee miaa qniaa. Suibongw qidokqaur u siuxho ee jok'iong, berdangr byy tihh, baiw :ee henxzenn marr jerje. Guaw qaix uirr henrser qidog qauwhue, ixqibb qywzinn ee jue, dyrkiamx.
Singwjenr/ ngirduanx dinwab ham' qidog byy kanlenn; jenwjingx/ koxtniar/ vikhai ham' qidog byy kangai' ; gnorban/ hogsiuu marr ham' qidog byy kancew. Dirr singwqingx nirr, Iasox derr id vaiw qawsi qunjiongr, soxx qongw ee derr id qxur ue "singsimx ee langg u hog ar!" u hog ee langg juadduir be qikkuir. Iasox dicbecc siw ee sii, iauxx iauqiuu siawbenw bohai ix ee langg.
SAINT THERESA siuluw dirr hro ix ee jixmue ee puex siaw "liw narr guanrir vingjing zimxsiu tongwkow cirtih, anne liw dyrr si hro jruw Iasox qidog u songxkuair hixlok soxjai ee langg." qaiwding "jinjniar qidokdoo" si guihiamw ee dairjir, zuqyw guaw qiogvutqiok lyc dingrgi, "jinjniar ee qidokdoo" si "hro jruw Iasox u zukuair iwair soxjai ee langg." Iokk u sxor bxan ixsiong ee langg dagg lexvaiwzit kir qauwhue jyr lexvair, kiokk jit diamw aw dyrr byy guanrir dirr tongwkow nirr, simvingg kiwhyy binrduir jurqiw, inx vingrr m si hro jruw Iasox qidog u jit xui hnuahiw ee soxjai. Sionghuanw :ee, u jnriu vah-bxan xee Inwdorqauwdoo/ Vudqauwdoo/ Hueqauwdoo/ Iutaiwqauwdoo/ businlunrjiaw/ agnostik :ee(AGNOSTICISM), guanrir sriu diyc jinglen. Jitt vunw ceh juadduir byy sniu beh cionghuan ee iwsur, kiokk u be jiyw soxjai kyxlingg huan .diyc.
Guaw qamxqag u vit'iaur viauxdat "huidyrkiamx ee sniabingg (NONAPOLOGY)". Jerje togjiaw kyxlingg vutjiw quanced guaw ixx lamsingr cinghox siongrder. Duiw inx ee quanced, guaw erdangr liauxqaiw, marr jin' qamxsia. Jex si qingquer cimsniu kyxlu .quer ee quatding. Guaw itdit si hurluw unrdong qionglik jicijiaw, marr dua lat juxdniux ixx lixsingr kongwjingx quanhe qisi luxsingr zirganw ee bunzi uahdang. Siongrder m si diongsingr. siongrder vutduan kokciongx tamwsyh sniwmia/ air (simrjiww singwair). Guaw u kyxlu qra siongrder let jyr "lamluw qangrtew", u luxsingr unsunn nngxser/ ziusun jusen/ quanair iongxho/ ciongbuanw buxsingr. Suibongw anne, kyxlingg si bunhuar-siong ee dingrui, guaw juxquanx qamxsiu, ixx lamsingr viauxsi kacc je. Siongrder quanair jiauwqor sewzinn ixgua, marr sniu beh cimzip zinsimx, dongrcad zinlui. Siongrder ciongbuanw jingsinn duiziog zinlui, lanw be viwsur uiwlangg, biccih jauxkuix siongrder ee duarair, duardysor hro langg sanxsingx siongrder qaix si lamsingr ee lensiongw. C.S.LEWIS soxx qongw ee, dirr siongrder binrjingg, juann zinlui longxx si luxsingr. Bylun lanw si kia dyhh jit pair ee singwvet sinhaglun (GENDER THEOLOGY)/ iwsig sinhaglun (CONSCIOUS THEOLOGY), siongrder ee duarair, iwdoo hro Iasox qidog dirr liw/ guaw/ tnaxzinn ee luersimx laii cutsir --- cniurr singwbuw MARIA snex lyc Iasox qidog, si sewzinn ee girbu/ jikzim.
Satan neh? Guaw kiokk beh ham' tuantongw dywvingg, ixx diongsingr jyr dairviauw. suibongw guaw bingvik satan hiongg qaiwqair, suisii sniu beh siamwtaur zinlui luersimx, kiokk jit sud aw marr byy texhue diyc jex si singwvet-siong/ congwjyrlat ee duiqiuu --- jixu hin/ pywhairlat. lunrdng juaa ee singwvet si kunwlann :ee.
Jitt vunw ceh muixx jit xee qywanr ee sewjad, longxx qingquer guaw jerje vaiw siuqaiw .quer. Singsinr byy penwlangg/ jingbit junxkag si jingsinn dirliauu/ kyhak ee qicow, iuguann quriuw uanjingw ee qewdat; diwdang qywzinn su'iuw ee vyxho kuanli ngiaa quer tanxvec cutpuar byy siongquanx ee sewjad. Sunzenn juxgirjiaw (PURIST) kyxlingg byy sinwzim guaw ee "juliau". Lingrgua jit bin, narr u togjiaw zinruii bad ceh nirr ee mow xui huanrjiaw, anne liw kyxlingg hud m driyc ar! Qokk xui itding zin diyc be jiyw langg ee qywsingr digdingx, ham' ceh nirr soxx biyue ee vnerhuan siy' qang. Jex si qingquer guaw ee pnuawduan au, soxu siujingr ee qywanr sewjad byy giamdiong niuxkiog zinsingr dongrlighak (HUMAN DYNAMICS) ee sidhongw. Zinsingr dongrlighak ee qiongrtongsingr, lanw u vit'iaur qaqiongg zinsingr dongrlighak qinxsin huntiah bingven ee linglik, si guaw siaw jitt vunw ceh ee guan'inx.
DERR ID JNXIUX HAM' SATAN DRING IOG EE LANGG
Jap-guec-cex mow jit zit ervox jingg, GEORGE jongw sniu qongxx jurqiw sing'uac byy iux byy ciuu. Ix u snax jiongw sinhun: giabbu zinguann/ angsair/ vaxvah, jin' cingkiwsniur, iauqiuu dua ser hxang dairjir, diyhh jyr qaxx suwsi, diauu diauu iuxliw. Qau cauhuann, cur laurjuiw/ viah cad lag jit sud aw/ cauw kacc dngg quaw, longxx e ingxhiongw diyc simjniaa, hex si simqnuax qed qui' qad! byy qac'ir honghunx ee sikig, qamxsiongx/ qniahniaa, bogbingqibiau dor qaxx qui' sinkux. siongrr hyw si kangkuer byingg qaxx be qir did zidtauu lyc snuax/ tnix beh amr!
GEORGE si cutsir laii jyr tuisiauguann ee --- endauu/ e uersenx/ qniavangr piauped/ gauu qongw qxow. Jin' dew ee siqanx lai, qinxsog langw diyc Bixqog danglamvo qingsiaukux. Tuisiaux ee sanxpinw luirsu quanr jrngx qavix ee sokqax quar, cirdniuu qingrjingx, juann qog u go qingx qangdniuu singsanw jitt lui ee sanxpinw. Nng nii lai, ix ui' jit xui giabjig vutjiw hyw ee giabburguann jiapquanw qongsix cikue juxquanw. Diwdang sunrsi/ siuw quilut ee digjid, hro inggiap giahdo ciongx quann snax vxue. Snax-jap-sir huer hitt nii, nisinx qax iongrqimx, siuzip drat qaur lak-bxan kox, surgiap iuxsingg!
PUU CUD SIXBONGG
Bunrdee ee jingdiau dirr MONTREAL, qongsix pair GEORGE kir camqax sokqax jewpinw siong'nihue. Huergi dirr ciutnix qixhingg, ix ham' kanciuw GLORY longxx m bad knuar quer vakhongx ciuqingw, dyrr quatding jywhuew kir. GLORY simjingg jin' hyw, MONTREAL ee qingxdir suiw qaxx u miaa, cantniax janw! Inx sngw qaxx jin' songw! Kuihue ixgua ee siqanx, lingrgua anvaii jetbok. Hingdingg juewau jit zit ee ervox, dauwdin camquanx dua qauwdngg, inx m si qauwdoo --- GLORY m si kensingg ee sinx qauwdoo, GEORGE itdit zimxsiu maxmah zedqongg ee jongqaur sinwgiongw, duiww qauwdngg byy hyxqamw. Hex si quanqongx soxjia ji' id ziiw. GEORGE qamxqag qauwdngg lai dar diyc imdimm ee kiwhunx, jin' byy cuwbi, danw qaur GLORY sec jit linr cud laii, simjingg kacc kuix .quaw! Nng langg qniaa cud qauwdngg, zidtauu qngx ciy quer laii, GEORGE ngiaw diyc duarmngg vnix u jit xee ser ser hongrhenwsniux , damrvyc dniuduu tingg lyc laii. Ix jit diamw aw dyrr byy sniu beh kngr jnii lyc kir, zimrhyy jit qingx dyrr byy air. Lingrgua jit bin, qongw be cud ee qniax rig kiw laii, ix qniax narr byy qruanx e hai diyc jitmaw anunw ee sing'uac. Ix si lixsingr :ee, sui' sniu diyc he jit diamw aw, si driyc :ee, naxx cniu jinwcud pokbudquanw/ cittyy hngkux ee mngpiyr huiwiong qangrkuanw habliw. Lakde-aw byy qaiww je lansanx, qui' xee zimm cud laii, iokk go-jap-go sxenw, he zip kir sniux-aw drew.
Dyrr dirr jitt sii, jit xee liamrtauu derr id vaiw qongqig ix ee simx , cniurr luii qongr hiacc jinsit, jit jun gongrsinn! Oor! Jex m si qandna' iwliam ziiw! zri kig dirr simtauu " liw uac qaur go-jap-go huer dyrr e siw !"
Crunx ciuw cue puede-aw. Luxhingg ciuxhingg ixgua, u jit dniux go kox/ nng dniux jit kox ! Tiux cud laii jnrix zip kir hongrhenwsniux. Kanx ann GLORY ee ciuw, qniaa hiongr mng ciongx cud kir. GLORY mng "u sniaw m driyc?" rinr qongxx " sinxtew u damrvyc byy songxkuair, sniu beh dngw kir vngrdiamr hiyckunr". Simrjiww anxjnuaw ui' qauwdngg ee gamw-aw lyc laii, qra qewdingciax et ciuw, longxx be qir .did! Itdit qaur luxquanw, dyw dirr bincngg-dingw, jiacc ban ban huesinn!
Derr zi zit jre huiqix dngw kir NORTH CAROLINA, jit lo simjingg vingsun, ciongbuanw jursinr, jahngx ee iwgua, naxx uanjuann danr driau ar!
Nng lexvair au, GEORGE sraiw ciax kir KENTUCKY qongw singliw, enlo knuar diyc " jingg u uanx lo" " 45 ingliw/diamxjingx hanrjer"... qingxqyr viauhy. Sraiw quer lorviaux au, u jit jiongw sniurhuad sanxsingx! Inr dirr taukag lai ee si "liw 45 huer e siw .kir!" zri dua/ sig iamrle.
Jriab lyc laii qui' zit, GEORGE qamxqag vut'anx. Jitt vaiw ix iong kacc logquanx ee qakdo knuar. Jingau nng vaiw ee liamrtauu ham' sowzi iuxquanx, sowzi dyrr si sowzi, tiusiong/ byy iwgi! Narr qongw kaksit u iwsur, jnuaxngiu sowzi byy qang?! Dairsingx si 55, jitt vaiw 45. sowzi narr qang, kyxlingg e hro ix kacc quawir, jex byy sniaw iauwqinw! Qeh dngw zit, laursinn jai jai.
Jit lexvair au, GEORGE sraiw ciax kir qaugua, jinwzip WINSTON, NORTH CAROLINA, lorhy jit cuthen, derr snax xee sniurhuad puu cud laii, "jit xee miaa qiyr WINSTON ee langg beh laii taii liw!" ix jinjniar damsimx! Nng zit au, qingquer jit xee hnghuir ticdy, qycc u liamrtauu vuex quer "jixiaur liw qniaa zip kir hitt dongr duarlauu, cuwdingw dyrr e kab lyc laii, qra liw deh siw!"
Cuxau, GEORGE cavutdyx dagg zit hro siw liamrtauu dnii diauu lehh, sraiw ciax/ qangjog vutquanw sii, vutduan cuthen. Narr duw diyc beh cutdniux ee jaixkiw, dyrr kaisiw vut'anx, cuah lehh danw! Siongrvanx sinn byy jai qingx/ ciywkuesingr byy .kir ar/ jiac, m jaix jubi/ amwmee sitbinn. Qingquer ROANOKE hyy ee hitt zit jaiw, iauxx erdangr zimxsiu, jit quer hyy, simsux qycc hro dnii kir "jitt vaiw si liw juewau jit huee qniaa quer jitt diauu hyy or!"
GEORGE sniu beh qra "taukag lai ee xmoo" qra GLORY qongw. "qamxx e sniu qongxx guaw si sinqingvne?" ix m jaix beh anxjnuaw qongw. Binrduir amwmee dyw dirr ix sinvnix, kunr qaxx hiacc hyxser ee langg, nacc jaix jurqiw ham zip jinwter liongxlann/ qongw be cud ee kunwqingw, suacc jitdor simjniaa hiacc vingjing ee GLORY. ROANOKE hyy hitt jxy qiyy si GEORGE siongrr jiap qniaa ee lo; narr m qingquer jitt diauu qiyy, dagg qywguec diyhh qex sec quixarr vah ingliw ee hngrlo, narr byy, dyrr e sitkir quixarr xee kecho. "liw qra guaw siamw, jex taiww liqingx ar, gauw be hro jitt jiongw sniurhuad/ jit pnir jit der hihuanr ee ngiaxziah qanziauw guaw ee sing'uac, quwjai lnx hilang" simlai jin' siurkir, qycc byy der jingwbingg, sax byy jangw! Lingrgua jit bin, nacc e jaix jex be venwjyr jinx :ee neh? Guaw erdangr jingwbingg jex m si jinx ee --- jaiww jit crur kir hitt xee qiyy, qra qniaa quer kir, narr hyw hyw byy siw, dyrr ersaih tihh ar! Zuqyw narr jniasit huatsingx, hex ...
Vnuawmee jit diamw, GEORGE quatding beh tec mia vruac .jit .xe, hyxsiw ngiaa quer auwmia jerje! Kiw cngg cing snxax, amwbinrbongx m qnaw kuix denrhuew, taux taux suanx cud laii. Cur li hitt jxy qiyy iokk cid-jap-snax ingliw. Jit lo simx qniax, jing be lyc laii, itdit qaur knuar diyc amwqngx ee qiyy-srinx, qinxdniux qaxx be cuanxkuir, hingkamw vnex ann, hionghiongg qra ciax sraiw quer nng lxiw lo, tingg lyc laii, ciatauu sehdngw laii, quer qiyy duiww cur ee honghiongr sraiw kir. Quer quanx ar! Ixqingx jingwbingg qydnii ee liamrtauu --- si gong/ hyxciyr ee sniurhuad. Simjniaa kinsangx qaxx e krox si'aw. Tnix decbecc qngx jiacc qaur cur, tiongr qaxx liac be diauu, jitt nng qywguec laii, derr id vaiw jiacc susongw, jingsinn vah vxue hyw! Simqnuadew hitt liap jiyhtauu byy .kir ar!
Sniu be qaur, derr snax zit amr qycc u venwhuar. Hitt zit ervox GEORGE cutdniux vran uann qongsu, jiapqin FAYETTEVILLE, ARKANSAS sii, qingquer jit xui cimknex. "cimknex tun dni jingg, ciax e itdit sraiw zip kir knex drew, liw dyrr e siw dirr hia." duxx kaisiw, GEORGE duiww jitt xee sinx snix cud ee iwliam, qamxqag hyxciyr. Jixvutqyr si jit jiongw sniurhuad ziiw! Qamxx m si jingwsit quer ar! Hyvid quawir? Mrqycc hitt mee, ix kunr be kir! Jingwbingg ROANOKE qiyy ee dairjir, byy viauxsi sinx vuh cud laii "camxsiw dirr cimknex" be huatsingx; byy itding jitt vaiw si jinx ee! ROANOKE ee dairjir byy huatsingx, qamxx si anjuann ee qexsiong? Qamxx qongxx viauxbin hro guaw ansimx, mia-diongx kiokk juwdnia draii siw dirr cimknex? Zuxx sniu zuxx qniax, uanjuann kunr be kir!
Kyxlingg rair hro dua qiyy ee dairjir qycc enw jit vaiw, jaiww dngw kir cimknex henrdniuu, byy itding simjingg e kacc hyw .quaw? Tanxvec qongw, jex byy sniaw dyrliw. Dyrr si jinjniar ui' cimknex ving'anx dngw laii, sniu e qaur :ee, au huee neh? Iauxx e si jiacc hamwqow ee liamrtauu, qycc kir henrdniuu jingwbingg? iusimx qiauxluan soxu ee kavo, dngw kir henrdniuu kyxlingg si daddid cir :ee? GEORGE qycc jit vaiw dnaxvan hyxser, amwbongx cud mngg, qamxqag qaqi cniurr hauwdaix :ee. Sraiw qaur FAYETTEVILLE, qaur cimknex kauw tingg lyc laii, qycc dngw laii cur nirr, kaksit hro ix qex jin' hongwsimx, jitt jiongw simjingg marr hro ix qaqi diyhqniax ! --- jit liap simx jinjniar kinsangx jerje! Jursinwsimx cue dngw laii ar! Qycc jit vaiw siongsinr, jurqiw si miarun ee juxlangg. Kunr qaxx jin' ansimx/ hyxser. Jitt quiw diamxjingx lai, itcer longxx byy dairjir.
GEORGE ee vnerjingr, dauc duac henxcud qowding ee mosid ; vnerjingr zuxx laii zuxx giamdiong. jit~nng zit dyrr puu cud sinx sixhuad, jiausimx vutanx, enxvenr qaur be kamx did zimxsiu ee dervo. GEORGE itdit dngw kir hro ix oluan sniu ee henrdniuu, vingjing dngw .laii, qecdngxzit qycc vuh cud sinx ee, anne itjair l.-laihuee-h., be suah.
Lak lexvair quer kir, muixx qeh jit zit amwmee, GEORGE dyrr e sraiw ciax kir NORTH CAROLINA ee qaugua sec jit lenr, kunwbinn zuxx laii zuxx jiyw, texdang qiamw liauw jap-go vong ; jin' qniax kir qangjog ee soxjai, giabjig naxx decc cux liulongg lehh ; kecho kaisiw sehsec liam, diuiww ginxaw ee taiwdo jongxsi vah bin byy nairsimx. Zi-guec ee jit amr, langg vxangx ar! Hauw qaxx jin' cicamw, itdit qra GLORY qongw ix ee kow. Ving'iuw siaurqair laii guaw jiax. Derr zi zit ee ervox, gunw derr id vaiw qniwbin.
QIONGVIG BONGRSIONGW
Gauw qra GEORGE qongw, ix si denxhingg ee "qiongvig bongrsiongw hxingg jingsinn quanlingg jxingr(OBSESSIVE-COMPULSIVE NEUROSIS)". Kunwziauw ix ee "sniurhuad" dyrr si jingsinkyx isux soxui ee "bongrsiongw (OBSESSION)". Diyh'air dngw kir henrdniuu ee "gongrvar", si jit jiongw "qiongvig hinguii (COMPULSION)". "liw qongw qaxx jin' driyc, guaw kaksit virr vig :ee, qinvunw dyrr byy sniu beh kir hitt xee hro guaw simsu luan jaux jaux ee soxjai, jaix anne jyr jin' kyxciyr, qandna' sniu beh vangr be qir .did, hyw hyw kunr .jit .xe, m jaix zuarr hyw lehh! Dyrr si jyr be qaur. Naxjunxx u jit qrow lat vig guaw ovec sniu, vig guaw vnuawmee kixcngg kir qaur henrdniuu. Guaw byy hxuad kongwjer jurqiw! Guaw ee srinx m si guaw ee, virr vig :ee, liw qamxx jaix? Camw dyrr camw dirr jiax. Narr qongxx qandna' sniu .jit .xe, kyxlingg iauxx erdangr zimxsiu, qiongvig guaw itding rair dngw kir qiujingr, hex jinjniar si tyw guaw ee mia. Amwsii berdangr kunr, quixarr diamxjingx luersimx qaujenr, itdit mng jurqiw, 'rair dngw kir? Qamxx driyc?' sidjai si liahqongg , kixsiauw ar! Jitt jiongw 'qiongvig' hinguii ee vnerjingr, viw liw soxx qongw hitt xee sniaw? --- 'bongrsiongw' iauxx kacc giamdiong. Guaw dyrr si hro jiaxee qxuiw bruw qaxx qiongrbecc kixsiauw ar! " qongw qaur jiax, GEORGE tingg .jit .xe, diyhqib knuar guaw, mng " liw sniu guaw si m si siauw :ee?"
"M si, liw m si." guaw hueingr. "guaw duiww liw itbuu-soxdix, ui' viauxbin soxx knuar diyc ee, guaw knuar be cud liw u damrvyc jingsinn cywluan ee vnerjingr, zircniaw jinghongw marr byy viw giamdiong ee jingsinn quanlingjingr huanrjiaw kacc baiw."
GEORGE danw be hur mng "liw ee iwsur si qongw, marr u langg cniurr guaw huan diyc "qiongvig bongrsiongw" ee vne? Qamxx qongw jiaxee langg byy sngr siauw :ee?"
"Byy m driyc!" guaw rinr, "inx kyxlingg m si hro sixbongg liamrtauu dnii; viauxhen cud laii ee sriu vig hinguii kyxlingg byy qang. Mrqycc vuh cud byy vit'iaur ee okliam/ jyr byy sniu beh jyr ee hinguii mosid, itmoo-itngiu." guaw qewsiok duiww GEORGE qongw quiw xee kacc iong'i qnir diyc ee bongrsiongw anwle. U langg huaigii jurqiw si m si duarmngg byy sryw? Vutditvud dngw kir qiamxjax, jitt jiongw langg cutgua dorqar si kunwlann :ee. "guaw dyrr si anne ar!" GEORGE dua sniax huah. "guaw simrjiww rair qiamxjax snax~sir vxenr, loo ee huew u qnuaix? Liw qongw, guaw ham' vadd langg qangrkuanw?"
"GEORGE, guaw m si jitt xee iwsur. Liw ham' inx byy qang." guaw qongw. "suibongw jerje langg --- tongsiongg kacc u miaa ee langg --- ciangjai anjuanqamw e qamxqag byy qaiww qraur/ dne qniax siw, vangr qniax vuex, vutqyr byy giamdiong qaur qui' mee virr moliam buxlang. Liw ee jingsinn ixqingx sueziok qaxx byy lat sing'uac. Suibongw u iyc qiur, ui' simliw hunsig ee jingsinn liauhuad laii lun, byy jin' hyw rix, kyxlingg su'iaur jin' dngg ee jit dnxua siqanx. Liw iauxx byy jingsinn cywluan, guaw sniu liw ee jingwtauu byy kinx. Narr qongw byy juanbin dirliauu, byy lat qamw e qewsiok be trer."
snax zit au GEORGE derr zi vaiw laii jinxsow sii, cniurr venr jit xee langg. Guanw derr id crur huejinw sii, ix si t.-tikaur.-k qongw ix ee koxcow, aiqiuu ix simanx ee qiawbang. Jitmaw ix jursinr buanw buanw, laursinn jai jai ee hxingg. Sursit, ix jit diamw aw dyrr byy quawir ee taiwdo, naxx "endauu-aw sangr" ee hingsiong. Guaw sniu jinrliong liauxqaiw ix ee sing'uac jongrhongw, mrqycc did diyc :ee byy je.
"PECK isux, duliauw bongrsiongw/ qiongvig hinguii ee siyw movne ixgua, guaw jinjniar byy qitnax cauhuann ee dairjir. Jingg vaiw laii quer liw jiax au, guaw hyw li ar! Or! Guaw singzin duiww mow quaw dairjir sniu' jairir, jex ham' iusimx vut'anx byy qang. Guaw ee iwsur si, quansimx qinnii zuac .langg si m si cur lai ee viah rair cad? Iauxx si danw qaur menii jiacc laii jyr? Jixsi decc quansimx/ juwir jitt hxang su ziiw, vingrr byy iusimx vut'anx. Gunw dirr ginghangg ee liabjig be jiyw, quawsimx ginxaw dirr haghau ee viauxhen. dua hanr jaboxqniaw DEBBY qinnii jap-snax huer, kyxlingg diyhh diaux cuiwkiw ar, derr zi :ee GEORGE --- jap-id huer --- singjig poxtongx, IQ byy bunrdee, nauw ee huatiok jingwsiongg, duiww texiok kacc cuwbi. Lak huer ee CHRIS duxx beh kir tagceh; ix siongrr cingsunn, liw narr qongw ix si guaw ee "simqnuax vyxvuer" marr byy quewhun. Guaw diyhh singzin, dirr guaw simlai duiww ix ee tniawair --- kaksit u qex quer lingrgua nng xee qniaw, mrqycc jinrliong byy viauxhen cud laii, guaw sniu amkamr liauw be baiw --- vingrr byy inxkiw bunrdee. Gunw ee qadingg sing'uac anding/ hun'inx hingrhog. Or! Driyc lar! GLORY gauu saih singwde, u sii, guaw simrjiww zinruii ix jin' ciah. soxu ee luxsingr qamxx m si anne? Liw jaix! Si guehsu ji' lui ee simjniaa jiuqii."
"Gunw angbow ee singr sing'uac? Iauxx ersaih tihh, byy sniaw bunrdee. GLORY narr mair cniurr okvyy luan huad pikir, hro gunw nng xee simjniaa baiw qaxx byy sniu beh air --- jex sngr jingwsiongg huanxingr hno!"
"Guaw sewhanr sii? Or! M si itdit jin' kuaiwlok, qauw huer sii, vaxvah jingsinn vxangx .kir, rair druar jiulip vnerngi. Inx qongw si "jingsinn hunlec (SCHIZOPHRENIA)". Guaw sniu, jex si uirsniaxmic dingw vaiw guaw qniax liw qongw guaw kixsiauw ee guan'inx. Qongw sit :ee, liw jid'err qongw guaw byy siauw, simtauu ee dang dnar sui' kinsangx kiw laii. Liw qamxx jaix? Gunw vaxvah ee vne m bad hyw li quer, quixarr vaiw vnerngi qiamxjax au, hro ix dngw laii cur nirr hiu'iongw, mrqycc m bad dngrqinx .quer. Guaw sniu, ix samvutgorsii itding siauw qaxx jin' tiamw, jixvutqyr siauw qaur sniaw tingdo, guaw inwsiong byy cimx. Qandna' e qir .did, diyh'air kir vnerngi knuar ix, guaw huisiongg tyxiar, hiax jin' caur! Vnerngi jitt xee soxjai hro langg kiw qebuxpuee. Qyzi ixau dyrr byy sniu beh kir knuar vaxvah ar, dairhak sii quewsinx. Byy m driyc, vaxvah siw ee sii byy je huer, duiww gunw si hog m si xeh."
Guaw byy zinruii jiaxee dairjir jinjniar qanziauw guaw. Mexmeh qiamw guaw nng huer, gunw jiapsiu qangrkuanw ee jiauwqor! Maxmah itdit dirr sinvnix ; ix si hyw maxmah, quewdo kensingg ee qauwdoo; byair ix jongw beh giuw gunw kir qauwhue. Guaw qandna' jitt hxang su duiww ix u iwqenr. Tak dairhak au, luirsu ee jinghingg dyrr byy qycc huatsingx ar! Gunw byy jin' u jnii, sing'uac sngr e quer tihh. Guarqongx/ guarmaw ham' gunw jin' cinx, vitjiw u jnii, itdit hro gunw jin' dua ee vangjan, u jit vaiw vaxvah zip ngi, gunw kir druar inx daux, digvet air guarmaw. A'qongx/ a'maw dyrr itbuu-soxdix."
"Or! guaw sniu kiw laii ar! Dingw huee lanw qniwbin au, qiywcniw guaw jit quaw qiwig. Qongw diyc qiongvig hinguii, hro guaw huesiongw kiw, jap-snax huer jyxiu bad diyc quer jitt jiongw vne. Byy jin' cingcyw huad vne ee guan'inx, jixsi qamxqag zuqyw dagg zit byy kir bongx quaw jiyhtauu, guarmaw dyrr e siw. Qisit marr m si zuarr vutdikliauw ee jiyhtauu; si ui' haghau dngw laii ee lorvnix, diyh'air e qir did kir bongx dyrr hyw! Vingsii siongrkyr-zit byy sniaw gai .diyc, vaiwlak/ lexvair kacc u bunrdee. Dagg zit itding diyhh e qir did ciauu siqanx cud laii. Qingquer jit nii, dyrr byy anne jyr ar. M jaix si jnuaxngiu byy qycc qewsiok jyr, sunrqii jurzenn ? Cincniu jit xee quewdo qrii!"
"Qycc hro guaw lensiongw .diyc, guaw marr decc tuatli juewqin jiaxee moliam/ qiongvig hinguii. Guaw qra liw qongw, dingw vaiw ham' liw siy' qnir liauxau, guaw jit viaw dyrr byy huatjog. Iycsniu guaw kyxlingg hyw li ar! Gauw qandna' sniu beh cniurr jingg quiw zit ham' liw qongw .jit .xe. Zuqyw erdangr anne, guaw jin' qamxsia! Liw byy huatdo liauxqaiw dng' guaw jaix qaqi byy kixsiauw, qycc u langg cniurr guaw qangrkuanw, e sanxsingx hiacc kyxciyr ee iwliam sii, si zuarr hongwsimx! Kyxlingg simjniaa kinsangx, vne dyrr hyw ar. Guaw sniu guaw su'iaur :ee --- linw soxui ee sniaw ? --- simliw hunsig. Guaw dong'ir, qaur dnaxx iauxx byy hxuad lyc dingrlun, zuqyw jitt xee okbang kyr guaw qaqi ee lat vakli, duiww guaw laii qongw, longrhuir hiacc je siqanx, dairqer sidjai taiww dua. Guaw qamguan byy air singx iog xe huee ee siqanx, diam diam knuar venwhuar. Zuqyw guaw jitt xee qiongvig bongrsiongw jxingr qycc giaa kiw laii, jiacc qewsiok dirliauu, jitt sii jitt kig, dyrr jiamrsii --- bongxx quer knuar mai lehh!"
Guaw jinrliong hyw hyw krngr GEORGE, dirr guaw knuar .laii, ix ee qaixvenr byy dua, qycc huaigii dexqii lai, ix ee jingwtauu e qycc giaa kiw laii. Erdangr texhue ix pacsngr naxx knuar mai lehh; dongsii marr huangingg ix suisii laii cue guaw. GEORGE ixqingx quatding, henxzenn jixiaur ix qamxqag kinsangx jurjai, dyrr be qewsiok jiapsiu dirliauu. Gunw byy vit'iaur qycc vren. Danw, si guaw ui'id qaix caixiong ee honghuad.
Guaw byy su'iaur danw quw.
QUEWKIR :EE
Nng zit au, GEORGE kar denrue laii, qigdong ee kauxkir "liw qongw :ee driyc! PECK sensnix. Hitt xee okliam qycc laii ar! Jahngx camqax bexbe huergi au, sraiw ciax dngw laii, dirr jit lenr dngw uat au ee quiw ingliw, hionghiongg dyc kiw laii : dngxuad ee sii liw qra kia dirr lorvnix danw ciax ee langg longr siw ar. Jaix si guaw siauxqongg iwliam qidiongx ji' id! Narr qongxx guaw jinjniar qra langg longr dyw kir(.kir), itding u siy' longr ee qamxqag/ tniax diyc jit dua sniax. Mrqycc dyrr si byy hxuad qra anne ee liamrtauu liamr danwsag, jongw e puu cud dyw dirr lorvnix juixqaux ee sitew/ jongw sniu hitt xee langg kyxlingg iauxx bue siw, su'iaur langg' qiur/ iusimx u langg e kongwqyr guaw, longr siw langg dyy jauw. Dngw qaur cur guaw zimxsiu be diauu ar! Huandngxtauu dit sraiw go-jap ingliw, qaur hitt xui dngwuad ee soxjai. Benw qongw hiax byy sixlangg, byy ciaeh ee hingziah, cauxvox marr knuar be diyc huecziah, damrvyc kacc hyxser .quaw. Mrqycc berdangr hro jitt jiongw jinghingg qewsiok huatdenw lyc kir. Guaw sniu liw qongw ee driyc, kaksit su'iaur jiapsiu simliw hunsig."
GEORGE bongrsiongw qiongvig jxingr suar lecc laii, huehok jinxliauu. Qycc laii ee snax qywguec, jit lexvair laii nng huee. Simdiongx ee liamrtauu vutduan, viw ixjingg kacc je, dysor si ix vunxlangg siw .kir, u quaw si vadd langg ee siw kantuax diyc ix huanrjue. Muixx jit vaiw u dngg/ u dew ee moliam/ qiongvig hinguii dnii srinx, siongrbuew jongxsi zin sux, jaiww crur dngw kir vuh cud liamrtauu ee henrdniuu, hro simjingg did diyc huawqaiw; ix ee kow m bad hiyh .quer.
Jinxliauu quewdingg ee jingg snax qywguec, guaw jiamrr jaix, ix ee vne viw henxcud :ee giamdiong jerje. Qongw ix ee singr sing'uac hingrhog, sursit si luanrcid-vatjaux/ ovec bruw/ luan caucaux/ lamrsamw laii/ ovec laii ! GLORY ham' ix lak lexvair qniavangg jit vaiw, cniurr jiuxjuir au jinwhingg/ dongrjog colow/ ciongbuanw dongrbudsingr/ cinwcaiw qetsog. GLORY "naxx siauxvyy ee singwde" jit huatjog, lensuar quixarr lexvair. Ham' GLORY qniwbin, huathen ix ee siaudimm jin' giamdiong, hin GEORGE qau ~ ~. qongw si "nngxziog/ sehsec liam ee colangg". GEORGE marr kaisiw ban ban viauxlo duiww GLORY jit dua dxuix ee uanwhin/ jurgnow diongsimx/ uanjuann m kingw jo langg'/ jit diam aw dyrr byy aiwsimx ee luxsingr. GEORGE ham' duarhanr ee/ derr zi ee qniaw uanjuann souanw/ zinruii si GLORY diauqangx jewjy :ee. Derr snax CHRIS si ui'id ham' ix kacc hyw :ee/ marr singzin byy air hro "GLORY kongwjer", jiamrr qra sing pnaiw ar!
Jit kaisiw GEORGE singzin, ix sewhanr byy hiacc hyxser. Guaw vig ix huesiongw sii, jiacc liauxqaiw donglenn qniahniaa ee sionghai, ciauquer ix guanrir siongsinr ee dervo. Iauxx e qir .did veh huer snizit. Hitt zit, ix iauxx bue jiac jaixkiw, jre dirr bincngg ovec sniu, sniu qongxx kyxlingg e siux diyc lexmic; jitt sii, mexmeh cri ee niaumix jauw zip laii GEORGE ee vangqingx, bruw qaxx luan caucaux, vaxvah ciuw tec sauwciuw duer lecc zip laii, GEORGE qiux jyr jit uann, dua sniax huachiux "mair qycc pah ar!" vaxvah iauxx si m tingg ciuw, qra niaumix uac uac pah siw. Jitt hxang su huatsingx dirr vaxvah zip kir jiulip vnerngi ee jingg jit nii.
Maxmah huatqongg ee tingdo byy sux vaxvah. Jap-id huer ee jit xee amwmee, maxmah m hro ix kunr, qiongvig GEORGE qui lehh qidyw, uirr dair diyc simjongrvne ee qadingg bogsux, qriuu siongrder hro uac lyc kir. GEORGE jin' hin hitt xui bogsux/ maxmah, dagg lexvaiwsnax/ vaiwgo amwsii, lexvair qui' zit, cua ix kir qidog qauwhue,qui' dxangx byy hiyh. E qir .did jyr lexvair sii, maxmah itdit liam byy tingg, naxx huah "oor! Jruw Iasox qidog!", singkux naxx iyy, uanjuann be qir jurqiw ee junjai,hro ix qenwsiaur qaxx byy der bih. Ham' guarqongx dauwdin ee zidjiw, jin' byy kinsangx, qandna' sniu beh vangr be qir .did. Qajair guarmaw unluanw cinced, vyxcii be baiw ee maxsunx quanhe, kiokk ciangjai hro ix qamxqag m jaix dangsii e byy .kir. Ham' guarqongx/ guarmaw druar nng dxangx ---si vaxvah druar ngi au --- guarqongx dagg lexvair longxx e pah guarmaw. GEORGE jin' huanlyy guarmaw e hro pah siw .kir. Ix m qnaw likuix cur. Jaix langg dirr cur nirr, marr byy loriong kiokk qongw be cud uirsniaxmic, qamxqag siuw dirr cur lai, kyxlingg erdangr hongjiw guarmaw virr pah siw.
Guaw diyhh je hongbin duiww GEORGE ciwtamr, jiacc erdangr liogsiok did diyc jit quaw cuiwpnir. Ix vutduan bai'uanr, byy liauxqaiw uirhyy sniu :ee, longxx si duiww bogjingg sing'uac byy qraiw ee bunrdee/ quewkir tongwkow ee qiwig. "guaw qandna' sniu beh vuew driau jiaxee qyqyx dnii ee bongrsiongw/ qiongvig hinguii. Guaw be liauxqaiw, kacc qongw dyrr si quewkir hiaxee byy songxkuair :ee, zuhyy jo guaw kiwduu jiaxee vnerjingr?" GEORGE qnauhqnauc liam be suar, qongw :ee cavutdyx si hro ix kunwziauw ee gongrvar/ qiongvig vnerjingr. Dagg vaiw dramm diyc jit xee "sinx liamrtauu", GEORGE jongxsi biyue qaxx digvet siongser, jit sud aw dyrr be lauwqaux, naxjunxx sniu jaiww hogsip si m si beh kuthok dirr "qiongvig bongrsiongw", dywdngw kir henrdniuu ee tongwkow jubi. Sursit, GEORGE jixsi liriong jiaxee, dypiah henrsit sing'uac. Guaw qaixsueh "jiaxee vnerjingr cniurr jit dingg jit renn ee bagjad'enx, hro liw be dinxdang ee guan'inx ji' id. Liw sniu' byingg sukyw/ damlun qaudnii liw ee iwliam/ qiongvig hinguii, byy siqanx setsiongw jiaxee vnerjingr guantauu ee qinvunw bunrdee. Duhuix liw guanrir tingjiw liriong jiaxee ojiab, kacc cimzip tamwsyh jurqiw vuthing ee hun'inx/ camxdam ee donglenn, narr byy, liw jiong' qewsiok sriu jiaxee vnerjingr ee lingdi."
Jin' binghenw, GEORGE marr qirjuat binrduir sixbongg ee bunrdee. "guaw jaix landyy sixbongg, mrqycc hyvid sniu siw ee bunrdee? "siw" jin' qnialangg, lanw qycc byy hxuad ix. Sukyw "sixbongg", marr berdangr qaixvenr sniaw!" guaw iwdoo duiww GEORGE viauxbingg : ix simtair ee kyxciyr. Haurqyw byy hyw. "sursit, liw itdit sniu sixbongg, zuqyw m si sniu diyc siw jitt hxang su, anne liw zinruii qaudnii liw ee soxu qiongvig iwliam, longxx ham' sniaw u quanhe? Zidtauu amr lyc laii hro liw jiaujyx vut'anx, si jnuaxngiu? Qamxx qongw jit zit beh quewkir, liw si byy huatdo dongr :ee, tecniw liw sixbongg byy langg siamw e quer, jex iauxx byy qraur binghenw? Qisit liw jin' qniax siw! Jex byy iauwqinw, guaw marr qniax siw, mrqycc liw byy guanrir binrduir sixbongg, jip'id siauwsniu dypiah sixbongg ee qniasimx. Liw ee bunrdee m si sukyw sixbongg jitt hxang su, si liw sukyw sixbongg ee hongsid. Liw erdangr m qniax sixbongg, laii sukyw sixbongg, narr byy, dyrr qewsiok dirr huijuriuu iwjir ha uirr qiongviksid ee gongrduc sokvak, kacc sniu dyrr si siw." m quanw guaw anxjnuaw suecbingg, GEORGE naxjunxx jit diamw aw byy qib beh qaixquad.
Ix qib :ee si beh vaiduu soxx huan ee vnerjingr. GEORGE kacc hnuahiw damlun ix ee vnerjingr, viw qongw diyc kanciuw/ qniaxzii ji' qranx ee souanw cuwbi jerje. Berdangr hiyxzin , ix "qiongvig jxingr" jin' giamdiong! Dauc dauc ix e dirr huatjog sii/ dirr lo nirr kar denrue hro guaw. "PECK isux, guaw jitmaw dirr LOWRY, quiw diamxjingx jingg guaw qycc snix jit xee sinx liamrtauu! Ixqingx dap'ingr GLORY dngw kir jiac vng, zuqyw guaw qycc dngw kir guanlaii ee derdiamw, dyrr be hur dngw kir cur! M jaix beh anxjnua kacc hyw. PECK isux, vaiwtog .jit .xe, guaw qaix anxjnuaw jyr. Qiyr guaw mair huetauu, qra guaw qongw guaw vutqaix kuthok qiongvig hinguii."
Muixx jit vaiw guaw jin' nairsingr qra GEORGE viauxbingg "be qiyr liw ongw dangx hiongr saix/ byy kxuann anne jyr, liw jurqiw jiacc u kuanli jyr quatding. Air guaw ter liw jyr quatding, si byy qenrkongx ee simtair." ix zinruii guaw ee huanxingr byy dyrliw. Dagg vaiw huerjinw sii, GEORGE dy' muaxvag aicanx tecud kongwgi, "PECK isux, guaw jin' cingcyw, zuqyw liw qra guaw qongw guaw berdangr jaiww huetauu, guaw e jiauww jyr ; simjingg marr e kacc hyw! Byy liauxqaiw uirsniaxmic liw m kingw, jongxsi vutduan qiongdiau, qra guaw qongw qaix anxjnuaw jyr, ham' liw byy quanhe, guaw dyrr si uirr jitt ee guan'inx jiacc laii knuar vne --- diyc jo guaw ar! --- liw kiokk m kingw. Guaw byy bingvik, uirsniaxmic liw jiacc janzimw, crunx ciuw giuw .jit .xe dy' m kingw, qycc itdit beh guaw jurqiw jyr quatding. Qamxx qongw liw knuar be cud, guaw dyrr si jyr be qaur ar! Qamxx qongw liw m jaix, guaw ham zip koxcow ee cimjnew lai, vuec be dinxdang, jinghongw si jiacc camw, liw iauxx byy air jo guaw?"
Jit lexvair jit lexvair quer .kir, vnerjingg guanjai. GEORGE dimlunn lenhuee, ziamw diyc lirjingr, tror qycc laur, sanw qaxx naxx dikqyx/ jingsinn qodaa/ air hauw/ auxud, si m si diyhh kir cue vadd xee simliw isux? Lenrr guaw marr kaisiw huaigii si m si cuxliw jitt xee anr ee hongsid m driyc? Knuar kiw laii, GEORGE naxjunxx u vit'iaur sui' druar ngi.
Zenau, jinghingg dua juanxuad, GEORGE jiapsiu jinxliauu ee derr sir qywguec, jit jaixkiw, ix krox si'aw zip laii ; jingsinn qngngia. Jit knuar dyrr jaix iuxsow qaixvenr. GEORGE viauxsi dong'ir, "byy m driyc, guaw qin'axzit hyw je ar! M jaix uirsniaxmic, lensuar sir zit quaiwqii ee iwliam byy jauw laii, simrjiww byy qamxqag diyhh huedngw kir henrdniuu. Kyxlingg qniaa quer laii ar, guaw kaisiw sinx uahlat ar!" vnerjingr byy huatjog, mrqycc duiww qaixquad henrsit sing'uac/ qadingg jinghongw/ donglenn ee tniar, byy cuwbi binrduir, huehok jaxjingg sniaxmic longxx byy iauwqinw/ piauped lamjuxhanr ee guarviauw. Guaw dybin qoxbuw, jiacc jin' byy qamxjingg qongw kiw henrsit ee jit bin. Jitt vaiw huerjinw qetsog jingg, hionghiongg vuh jit qxur ue "PECK isux, liw qamxx siongsinr sewqanx jinjniar u moquiw?"
"Jex si qiquair qycc hogjap ee bunrdee. Uirsniaxmic mng?"
"Oor! Byy lar! Byy sniaw digvet guan'inx, hnowhenn ziiw!"
"Liw decc siamxpiah bunrdee, itding u guan'inx" guaw liac ix jinn .jit .xe qongw.
"Jixvutqyr liw tak liauw jerje jongvair satan ji' lui quaiwqii qauwpair ee ceh. Liw jaix, dyrr cnirr SAN FRANCISCO hiaxee lirqingx huanxvenr tuantew, jitt dnxua siqanx, vywjuaw jabjir jerje jitt lui ee vywdy."
"Liw qongw :ee byy m driyc, mrqycc jitt xee bunrdee jnuaxngiu e zip kir liw ee taukag? Uirsniaxmic liw hionghiongg dirr jitt sii jitt kig sniu diyc neh?" guaw viauxsi dong'ir.
GEORGE damrvyc byy hnuahiw qongw " guaw nacc e jaix? Dyrr si jurzenn siamw zip laii, liw m si rair guaw qra simlai su siongser qra liw qongw, qamxx m si? Guaw jiauww liw qongw :ee jyr ar! Guaw jyr guaw rair jyr :ee, qra simsu qongw hro liw tniax, uirsniaw e dirr taukag lai, guaw dyrr m jaix!"
Knuar laii byy vanrhuad qewsiok mng, siqanx marr cavutdyx ar, uerdee jiamrsii dirr jiax tingg lyc laii. Xe huee GEORGE laii ee sii, simjingg iuguann be baiw. Texdang u qex quiw vong, kacc byy hiacc dasanw. "nng zit jingg qycc u hitt jiongw quair liamrtauu. Hex ixqingx be qanziauw gauw ar. Guaw qra qaqi qongw, be qycc uirr jiaxee gugong liamrtauu huanlyw. Jiaxee iwliam henxzenn byy zimrhyy iwgi. Dyrr sngr jitt quiw zit guaw jinjniar beh siw --- qycc e anxjnuaw? Guaw simrjiww byy sniu beh dngw kir henrdniuu --- jex cavutdyx byy qycc puu cud laii. Guaw uirsniaw diyhh uirr jiacc gong ee sniurhuad cajingr? Guaw pah vai jitt xee vne ar!"
Ix ee vnerjingr byy qycc dnii ix, guaw iwdoo jaiww crur jo ix cimzip tamwtyw hun'inx bunrdee. Ix ee vunxsingr guaw sax byy, huanxingr jongxsi hamr hamr/ viauxbinrhuar. Guaw qamxqag vut'anx. GEORGE kaksit jiamrr hyw kiw laii. Jiauww lriw qongw, guaw qaix hnuahiw jiacc driyc, mrqycc duiww ix jnuaxngiu juanxvenr, uanjuann m jaix. GEORGE ee sing'uac/ binrduir sing'uac ee taiwdo, itdit byy venr, uirhyy vne e kacc hyw? Jiamrsii qra guaw ee vut'anx cangr dirr simlai.
HAM' MOQUIW CIAMX IOG EE LANGG
Xe huee ee huerjinw, dirr honghunx sii, GEORGE bagsinn cingcaiw qniaa zip laii, viw jaxjingg qyckacc qig guarkuir. Cniurr vingsii anne, guaw danw ix singx qongxue. diamrjing .jit .xe, unn unn aw qongw, "guaw sniu beh jurgnow viauxvec."
"Oor!"
"Liw jaix, juewqin guaw qamxqag hyw je ar, vingrr byy qra liw qongw uirsniaxmic!"
"Oor!"
"Liw qamxx e qir did guaw mng quer liw qamxx siongsinr moquiw ? Liw sniu beh jaix uirsniaxmic guaw e sniu diyc jitt xee bunrdee? Hitt sii guaw byy qongw lauxsidue, qamxqag qra jinsiongr qongw cud laii, taiww byy kiauw!"
"Cniaw qewsiok"
"Jitmaw beh qongw, iuguann qamxqag jurqiw damrvyc gong. Liw byy beh ter guaw jyr quatding, byy guanrir sethuad dongr guaw dngw kir sanxsingx liamrtauu ee henrdniuu. Guaw diyhh jurqiur, sniu vanrhuad byy kuthok qiongvig hinguii. Anne, guaw jixhyw jurqiw sniu vanrhuad lor!"
"Liw jyr liauw sniaw?" guaw mng.
"Ham' moquiw dring iog. Guaw ee iwsur si, jinjniar byy siongsinr sewqanx u moquiw, gauw vitsu'iaur iuxsow hingdong, qamxx m si? Guaw dring liauw jit hxun iog, lueriongg si : zuqyw guaw kuthok dirr qiongvig hing'uii ha, dngw kir sanxsingx iwliam ee henrdniuu, anne moquiw diyh'air hro okliam jniajyr jinsit ee. Liw qamxx liauxqaiw guaw ee iwsur?"
"Byy jin' liauxqaiw." guaw rinr.
"Kyxviw qongxx, quiw zit jingg dirr C snuax hurqin, guaw u anne ee liamrtauu 'xe huee liw qycc sraiw ciax quer jitt diauu lo, ciax qingquer hnua-vnix, liw e siw dirr jiax.' ixjaw, itding e hro guaw simx naxx dyc huew sxor diamxjingx, siongrbuew iauxx si rair dngw kir hnua-vnix, qandna' beh jingwbingg jitt xee sniurhuad byy sidjai, driyc hno! Dring iog au, liw knuar! Guaw si berdangr dngw kir cajingr ee. Hab'iog quiding, zuqyw guaw dngw kir, moquiw itding hro guaw sraiw quer hnua-vnix siw dirr hiax. Jaix jurqiw itding e siw, dyrr byy lixiuu dngw kir. Sursit, byy dngw kir henrdniuu si lingrgua jit jiongw simqix. Jitmaw liw u liauxqaiw?"
"Guaw jaix qidiongx ee guanliw." guaw byy viauxsi iwqenr.
GEORGE hnuahiw viauxsi "knuar .laii jin' u hau. Guaw sanxsingx quer nng xee liamrtauu, jit vaiw dyrr byy dngw .kir, guaw rair singzin, ham' moquiw dring iog, hro guaw qamxqag damrvyc juerog."
"Juerog?"
"Liw jaix dyrr si jitt jiongw juerokqamw, guaw ee iwsur si, langg vutqaix ham' moquiw dring iog, driyc hno? Druu jex ixgua, guaw simrjiww byy siongsinr sewqair jinjniar u moquiw. Mrqycc, jitt jiaux jin' u loriong, sinr/ byy sinr qamxx u sniaw cavet !?"
Guaw diam diam byy qongxue, m jaix qaix duiww GEORGE qongw sniaw? Jitt xee qywanr hnuaii-dit qaujid, hogjap banrcenx, hro guaw gang gang, marr duiww jurqiw ee qamxsiu, qamxqag gignaiw. Gunw nng xee jre dirr anjing/ vutjiw u anjuanqamw ee vanrqongsig lai, dyh-aw qeckuix gunw, guaw bagjiux tingg dirr dyh-dingw ziunngw qngsnuar, taukag lai dngxsec ee ngiaxsiong, jit pnir jit der vutduan rig cud laii, busor hunluan lanqaiw ee simsu, rimx qaxx hro guaw be cuanxkuir. Guanvunw si beh qnuaw jauw hikangx bongx byy ee gongliam/ qiongvig hing'uii, nacc e suacc kir ham' qinvunw byy junjai ee okmoo ciamding hab'iog? Guaw pu'dimm dirr bongbu-diongx, diamrjing qaxx cunx sijingx didah sniax, jujux siongr dycbin ee qngx.
"Liw u sniaw huanxingr?" GEORGE kuix cuir mng.
"Guaw m jaix, GEORGE, guaw m jaix jurqiw si sniaw huanxingr. Dihy'air u kacc je siqanx hro guaw sniu. Iauxx m jaix beh ham' liw qongw sniaw."
Guaw qycc jit vaiw juwsinn dirr qngsnuar nirr, sijingx jiauww qniaa vutgno. Go hunjingx quer, GEORGE naxjunxx duiww jiuuii sixjing, m jaix beh anxjnuaw kacc hyw. Juewau pacpuar diamrjing, "guaw sniu guaw iauxx muakamr jit quaw siyw su. Guaw iyh si hro guaw damrvyc juerog ee lingrgua lixiuu. Liw qamxx jaix? Ham' okmoo dring iog iauxx u jit dnxua qowsu neh! Guaw byy siongsinr jinjniar u xmoo, vingrr byy jabhunx kaksinr zuqyw guaw dngw kir henrdniuu, okmoo e hro guaw siw dirr hiax. Uirr beh siux diyc sidhau, diyhh sniu jit quaw jin' hongwsimx ee vanrhuad, hongjiw jurqiw dngw kir guande. Guaw mng qaqi, erdangr u sniaw hxuad? Zenau, guaw sniu diyc CHRIS si guaw ee jiwair. Guaw liriong jitt diamw jyr hiabding ee jit vorhun : zuqyw guaw jinjniar hro qiongvig hing'uii pah vai dngw kir henrdniuu, anne xmoo e hro CHRIS jaw siw. Qauwsii guaw e siw, CHRIS marr jauw be quer. Jitmaw liw jaix guaw uirsniaxmic bersaih uad dngw kir hnor! Dyrr si sewqanx byy xmoo, guaw iuguann byy guanrir jitt hxang su, drow CHRIS ee sniwmia --- guaw ee jinair! "
"Liw marr qra CHRIS ee mia dongwjyr qaungua ee viziw?" guaw naxx qihaii dionghok ix ee ue.
"Si lar! --- byy qaiww tyxdongr hno! Si jitt xee lixiuu, hro guaw u juerokqamw."
Guaw qycc qongw be cud ue, jiamrr u quaw liauxqaiw. Jitt sii huerjinw ee siqanx cavutdyx ar, GEORGE jre be diauu, sniu beh likuix. Guaw qamm diyc bingrling ee kauxkir qongw "GEORGE, danw .jit .xe, liw si qin'axzit siongrbuew jit xee huerjinw ee langg, guaw sniu jiamduir liw ee jinghongw, cue cud ingwvenr ee honghuad, guaw qamxqag jin' qinw dyrr e u lingqamw ! Duhuix liw qib beh likuix, narr byy, hibang liw lauu lyc laii, danw guaw erdangr jiong' jit quaw sniurhuad viauxdat cud laii liw jiacc jauw."
GEORGE damrvyc vut'anx jre lyc laii danw. Guaw vingrr byy sniu beh hro ix jre qaxx naxx jiamx decc cak hiacc vut'anx. Jyr jit xee jingsinkyx isux, ixqingx sriu quer hunwlen --- qycc u jurgnow hunwlen --- mair lyc pnuawduan, jixu dirr vnerlangg qamxsiu diyc isux ee jiaplap, jinxliauu jiacc e siux diyc ingwhau. Qandna' dirr virr jiaplap ee kiwhunx ha, jiacc qitai vnerlangg qongw cud simlai su, hro qewdadquanx jinjniar henr cud laii. Qingquer jerje qinggiam au, jiacc texhue .diyc, jingsinn dirliauu isux ongxongw u vit'iaur dirr huerjinw qiqanx, jiurr mow digding quandiamw ham' vnerlangg libdniuu dendyr, hro ix jit jiamx qnir hueh ee jinxduan. Guaw marr jin' cingcyw, qaix dirr huerjinw jinwhingg jit dnxua siqanx, dng' vnerlangg / isux ji' qranx ee quanhe unxding lyc laii au, jiacc lyc vingduan kacc lixsiongw. GEORGE laii guaw jiax jiacc sir qywguec, quanhe iauxx cenw. Guaw byy guan morhiamw, sniu' qinw jyr vingduan. Mrqycc lyc/ m lyc pnuawduan, longxx si guihiamw :ee.
GEORGE byy hxuad anjing danw ar, dirr guaw iauxx kow byy vanrhuad sii, ix kuix cuir qongw "hex! liw decc sniu sniaw?"
Guaw siongr ix, qongw " GEORGE, guaw decc sniu, jin' hnuahiw liw sanxsingx liw soxx qongw ee juerokqamw."
"Jitt qxur ue si sniaw iwsur?"
Guaw si qongw liw qaix qamxqag juerog. Liw kaksit jyr liauw u jue ee dairjir. Zuqyw liw duiww vunxsinx ee jywuii, jit diamw aw dyrr byy juerokqamw, guaw e huisiongg siongsimx!"
GEORGE sui' u qingxqag. "guaw zinruii, simliw dirliauu vunxlaii dyrr si beh qiamxduu guaw ee juerokqamw."
"Hex si jriw vutdongr ee juerokqamw." guaw dab. "duiww senrsu u juerog, m na byy vit'iaur, qycc u vne. Mrqycc duiww pnaixsu byy juerog, marr si byy jingwsiongg."
"Liw zinruii guaw jin' baiw?"
"Guaw sniu, ham' moquiw dring iog, liw ixqingx jyr pnaiw dairjir --- jit quaw siaog ee su."
"Mrqycc guaw vingrr byy jinjniar jyr liauw sniaw ar!" GEORGE quann sniax huah "liw qamxx byy bingvik? Jiaxee dairjir longxx kngr dirr guaw ee simlai. Liw m si qra guaw qongw qinvunw byy soxui ee okliam/ pnaiw guanrbong/ byy hyw ee qamxqag ? Liw qongw quer "jixu jinjniar caixcuw hingdong, jiacc qowsingg og." jex si liw soxui ee "simlixhak derr id dingrlut." liw knuar! Guaw sniaw su dyrr byy jyr, simrjiww byy drang jit qix jngxtau'aw kir pah langg!"
"Mrqycc GEORGE liw kakding jyr jit quaw su!" guaw huedab.
"Sniaw su?"
"Liw ham' moquiw dring iog!"
"Mrqycc sniaw su dyrr byy huatsingx ar!"
"M dryic!"
"Jiacc m si neh! Qamxx byy liauxqaiw? Jiaxee juann jrngx dirr guaw ee taukag drew, longxx si kangx sniu :ee. Guaw simrjiww byy siongsinr moquiw ee junjai. Lenrr siongrder/ jongqaur jitt jiongw su guaw longxx byy sinr, qycc beh anxjuanw siongsinr moquiw? Zuqyw guaw ham' uac lingwlingr ee langg dring jit hxun jinjniar ee kuewiog, hex dyrr lingrgua jit huesu ar, guaw byy anne jyr ar! Xmoo sriok hikangx ee ar. Soxiw kuewiog iuqycc anxjnuaw e si jinjnair neh! Liw jnuaxngiu e ham' qinvunw byy junjai :ee ciamding, knuawjyr jinjniar ee habiog neh! Jex byy sngr jinjniar ee hingdong ar!"
"Liw si qongw liw m bad ham' moquiw dring iog lor!"
Tnix ar! Guaw u ar! Guaw qra liw qongw, guaw ham' xmoo dring iog ar! Hex m si "jinjniar ee kuewiog, liw si decc sngw zri, vingw laii vingw kir, nxng nirr qingw qud!"
"M si, GEORGE. Liw jurqiw jiacc sniu beh sngw! Guaw ham' liw duiww xmoo itbuu-soxdix. Qinvunw m jaix moquiw si javox? jabow? Iauxx si diongsiongr? Guaw m jaix okmoo si m si bongx e diyc/ u hingtew? Si jit qrow lat? Iaxx si qandna' jit jiongw qaiwliam? Moquiw dauwdew si sniaxmic, qisit byy diongriaur, sursit si liw ciamding liauw iog."
GEORGE tniax liauw, beh qra guaw vingw dyh ee hxingg, "dyrr si guaw jinjniar ham' qxuiw ciamx iog, marr si jit hxun byy hau ee habiog. Dagg xui ludsux longxx jaix, virr vig ha soxx ciamx ee iog, byy huatlut haurlik. Cingr rah lehh soxx ciamx ee habiog si byy sngr siaur ee, siongrder jaix guaw si virr vig ee, liw marr qimx qimx knuar guaw decc sriu kow. Quixarr qywguec laii, guaw jongxsi kunxqiuu liw ee hiabjo, liw jit diamw aw dy' byy beh giuw guaw .jit .xe, naxjunxx duiww guaw ee cuxqingw jin' cuwbi, qycc qongw byy sxingg lixiuu ee guan'inx, m guanrir dudiau guaw ee tongwkow. Quewkir quiw qywguec laii, guaw jniawqangw sriu jin tuabuaa. Narr qongw jex m si sriu vig, guaw m jaix qaix qongw si sniaw?"
Guaw dui' iw-aw dingw kia kiw laii, qniaa uaw txangx-vnix, knuar duiww txangx gua hng hng hitt vingg itbong-bujer ee oamr. Si sihau ar, guaw dngw srinx binrduir GEORGE qongw " hyw ar! GEORGE, guaw u quaw ue beh duiww liw qongw, hibang liw siongser tniax, in'ui dagg qxur ue longxx jin' diongriaur."
Guaw juwsinn knuar ix, qniaa dngw laii jre iw-aw, "GEORGE, liw zinqeh u jit xee kangkiah, hex si liw siongrr qinvunw ee ziogdiamw, si lanw soxx dramm .quer juanvo kunwqingw ee qinguann, si liw vuthing hun'inx ee juxinx, si liw ee vnerjingr/ bongrsiongw gongliam/ qiongvig hing'uii ee sing'inx. Qin'axzit jniawjyr liw ham' moquiw ciamx iog ee kixinx. Simrjiww si liw iwdoo ter hitt hxun hab'iog venrqaiw ee lixiuu."
"GEORGE, qivunw-siong, liw si jit xee lramw kasiaur. Jixiaur jinghongw u quaw kehciuw, liw dyrr sui' siamw. Binrduir henrsit, jaix liw qaqi quiw zit au e siw, liw dyrr dypiah, m guan sniu .jit .xe. sniu kacc cimx .quaw, e hro liw pipii cuah. Binrduir byy hyxser ee hun'inx, liw tiaur kuix, m na byy air vingw cud bunrdee/ byy caixcuw hingdong/ simrjiww lenrr sniu dyrr byy. Jiaxee dyy be quer ee dairjir, dyrr iong vne/ bongrsiongw/ qiongvid hing'uii ee hingsid ham' liw qaudnii, jex kyxlingg si liw ee qiuwsiok, liw ersaih qongw, dair jiaxee vne, viauxsi guaw huanrsuah ar! Siongrr hyw guaw kiuw cud jiaxee xmoo, saur cud texgua. Liw narr anne jyr, viauxsi liw binrduir jinjniar ee tongwkow. Mrqycc liw kiokk m si anne, liw jyr :ee si, qycc sniu lingrgua jit xee vanrhuad dypiah jiaxee vnerjingr, byy air tamwsyh soxx duar ee iwgi, dendyww iwdoo vaituad, itdanr liw huatqag m si hiacc qanxdanx :ee, liw qycc sec zip kir lingrgua jit jiongw hongsid, erdangr did diyc anuir/ qaixduu ee honghuad --- byy lun iongrir zuarr vutliongg! Siaog duar diyc huixbet ee singhun."
"Liw venrqaiw, ham' xmoo ciamx iog si virr vig , byy sngr siaur. Hab'iog dongzenn si virr vig :ee, liw uirsniaxmic e ham' xmoo dring iog? Kiokk m hnair driau qax dirr liw sinkux ee koxcow? Zuqyw xmoo amwhok dirr srinx-vnix, cue cud ee vanrhuad si cutbe jurqiw ee linghunn, guaw qnaw qruar vyxjingr, liw itding si cue viw liw kacc ziokser ee langg harciuw. Bunrdee m si liw sriu vig, si zuhyy cuxliw sriu vig ee jonghongw. U langg kia kiw laii hueqig/ ciauuat kikhok/ jit dua tiuar/ ciongx cud kir, qingquer jinglen/ zinqeh singhuaa. U langg virr pah vai/ huanxvue dauhangg. Guaw rair qongw, liw dyrr si hitt xee dauhangjiaw, liw iong ee honghuad sidjai sniu' kinsangx ar!
"kinx kinx vuew kuix, ingg sensenx siongrr erdangr hing'iongg liw. Liw qac'ir qra qaqi dingrui jyr cing'ingg jurjai ee piauped langg. Mrqycc guaw m jaix, qamxx u ngiaw liw jinjniar cing'ingg e kiw laii? GOERGE, liw jongxsi decc cue kinsangx, benw cud lat ee lo ; itdanr binrlimm 'jingwkag' 'kinsangx' nng xee suanw jit xee sii, liw jongxsi qingw kinsangx :ee --- byy-tniar-byy-gai hitt jiongw. Sursit, liw si sniu jin vanrhuad cue cud kinsangx ee vaiqaiw hongsid, dyrr si cutbe linghunn/ hisingx jurqiw ee qniaw, liw marr byy quanhe."
"Jaxjingg qongw .quer, hnuahiw liw u juerokqamw. Zuqyw liw duiww jurqiw iong jin qokk jiongw kinsangx ee honghuad kiwduu bunrdee, byy qamxqag vipiw, hex si guaw byy hxuad jo liw :ee. Liw ixqingx jaix simliw dirliauu berdangr cinwcaiw quewquanx. Si jniawbin knuawtai bunrdee, tniar qaxx be kamx .did/ vah hxang bu'nai, marr diyhh cuiwkixqinx qa hro ann, iongxqamw qniaa, si jit diauu jin' byy hyw qniaa/ jingwkag ee lo! M si iong dypiah :ee. Liw narr guanrir jniawbin duiwtai henrsit sing'uac ee koxcow, kyxviw qongxx, qniahniaa ee donglenn/ camxdam ee hun'inx/ sixbongg ee bunrdee/ jurgnow ee zuanxziok, anne guaw iauxx u huatdo qra liw draur janr lat, u vaxag lanw itding e singqongx. Zuqyw liw qingw siongrr qanxdanx ee hongsid huawqaiw, guaw e qra liw rue jyr ham' xmoo qang jit qog. Guaw byy zinruii simliw dirliauu duiww liw u loriong."