1. Lamjuw kacc quiwkir iacc si Luxjuw?

Jin' qiquair! Langg jnaixngiu e u davox qycc u jabow? Jex si jin' qiquair, iurqycc si jin' cuwbi.

Dirr Lamm Taiwvingg Xngiuu u jit xee dyxsu qiyr jyr Tahiti. Dirr hiax ee iaxbanlangg u liutuann qongxx, kixcox jyrhuar ee Sinn tec angtoo jyr jit jit xee davolangg. Qaur jit zit jiong' hitt xee langg qra ix bee hro ix kunr .kir, jiacc duiww hitt xee langg ee singkux tec jit der quttauu kiw laii jyr jit xee jaboxlangg.

Iutaiwlangg soxx sinwgiongw ee qxaur si dua dua e tangx hro Sewqair jyr bohuan. Inx ee qingdenw ee lairbin iarr u qir bingg cincniu jitt kuanw ee ue. Inx qongw Siongrder congwjy tnide bxan mic ixau, jiauww Ix ee hingsiong ee kuanw iong too congwjy jit senx ang'aw. Ix dyrr jiong' Ix ee kuir vunn zip kir hitt senx ang'aw ee pnirkangx, hitt senx ang'aw dyrr uac .kiw .laii, qiyr jyr Adongx, si davolangg. Siongrder dyrr jiong' Adongx congr hro ix kunr .kir, jiong' ix ee hiabqud tec jit qix kiw laii jyr jit xee hurzinlangg, qiyr jyr Haruax. Jex iarr si jit jxingw ee liutuann. Jongw .si narr jiauww jitt kuanw ee qongxhuad, qiamxx m si bingbingg viauxsi lamjuw si jruw, luxjuw si jiongg. Lamjuw kacc quiwkir, luxjuw kacc harjen mah? In'ui qongw davolangg si dairsingx u, jaboxlangg si tec davolangg singkux ee jit vorhun aw laii jywjniaa :ee.

Cincniu jitt kuanw ee qongxhuad qiamxcaiw u langg beh venrvog qongxx, qoxjaw ee dairjir dairqex dy' longxx byy kacc sit e jai'ngiaw. Jiauww lanw soxx jaix :ee laii qongw, davolangg qiamxx m si longxx dui' jaboxlangg ee vakdow nngr .cud .laii mah? Soxiw ix beh qongw luxjuw si kacc quiwkir, jex kiokk iarr m si juanzenn byy jingliw.

Lanw qycc tniax Lamngiuu Hyjiux (Australia) ee osiklangg qongw, jyrhuar ee Jruw qiyr jyr Panxzi, giac ix ee dyx-aw vrag snax dniux ee ciurpuee cux diamr tokax, tec jit uann ee liamtoo kuawhe hitt dingxbin, jyr nng senx ang'aw. Ix jyr liauw jin' dik'ir, vreh kiw laii tiauwbuw sec hitt nng senx ang'aw quixnarr linr. Ix dyrr qycc vrag jit kuanw ee ciurpuee, tiusix liamm diamr ang'aw ee taukag, jyr ang'aw ee taumngg. Ix knuar liauw dyrr jin' dua dik'ir. Qycc diamr ang'aw ee jiuuii tiauwbuw quixnarr linr, jiong' ix ee kuir vunn duiww ang'aw ee pnirkangx, vunn jit dua xe lyc .kir, acc dyrr qycc tiaur qycc sec. Lorbuew jiong' nng senx ang'aw enw kiw laii kia, ang'aw dyrr suar ciyr hihix, jywhuew qongxue jin' cinbit!

Dairqex soxx jaix, lanw jitt vingg qongw langg si Vyjiaxbyw ciok too jywjniaa :ee, jongw .si davox jabow si anwjnuaw hunved jyr, kiokk si byy qongw bingg si siang sii jyr :ee, m si dui' davolangg ee singkux laii jyr cud jaboxlangg; jitt diamw si bingvik.

Jiauww dingxbin jitt nng kuanw ee liutuann knuar, davox jabow si siang sii jniaa :ee, kiokk m si qongw dycc jit vingg kacc dairsingx. Dui' anxnix naxx cincniu eriongrdid qongw m si davox kacc quiwkir, iarr m si jabow kacc harjen, si vingdingw byy jingcax.

2. Jionglaii Luxjuw si hro langg' knuar jin' kinx?

Dingxbin soxx qongw si quiw jam ee ciywkueue nardnia, si be junxvinn .did. Mrquxx narr jiauww ligsuw siongrr sidjai ee surjig laii lun, qaur qinaxzit hurzinlangg sriu langg knuawkinx si jin' je lar. M si qongxx qanda' dycc jit dah si anxnix, juann sewqair dy' longxx si jit ngiu.

Henrsii jaix Sengiuu duiww luxjuw, ping lanw jitt vingg si qex jin' jundiong. Jongw .si jex si qinrlaii ee dairjir. Kacc jaw si qapp lanw byy jingcax. Luxjuw ee derui ping lamjuw ee si kacc qe, si cax jin' je. Lamjuw si jruw, luxjuw si cincniu qinsuii ee langg. Kacc qigduanx ee sidai, iarr bad knuar luxjuw jyr jit jxingw ee jaisanw, eriongrdid jiauww lamjuw ee iwsur qra ix cesaiw bexbe, cincniu bre dix bre ngiuu ee kuanxsid. Iarr qycjaiww knuar luxjuw jyr qoxguanw ang'aw ee kuanw, tangx hro lamjuw tittyy knuawhongw. Qycjaiww itvnuax si liac hurzinlangg knuar jyr jin' uwuer, knuar jyr cincniu iaujnix e hamrhai langg huanrjue.

Jairr Sewqair ee diongqanx, Qidokqaur sngr si derr id jundiong langg ee zinqeh. Iasox vunxsinx m na m bad qongw hitt hy knuawkinx hurzinlangg ee ue, Ix duiww hurzinlangg ee taiwdo sidjai si jin' qongvnee. Suizenn si anxnix, au-laii Ix ee hagsingx ee lairdew, u jit langg qiyr jyr Vyxlyy; ix si jin' zedsimx jin' gauu cenxbingg Qidog ee qaiwsi ee dua suwdoo. Jongw .si ix bad qongw, "Hurzinlangg diyh'air diam diam hagsip dyrliw, diyhh itbi sunrjiongg. Guaw m jrunw hurzinlangg qongw dyrliw, iarr m jrunw ix quanxhad davolangg. Ix diyhh qanda' diam diam jiacc hyw, in'ui Adongx si singx cutsir, Haruax virr bee ham lyc jue." Narr qanda' jiauww jitt qxur ue knuar, jex bingbingg si knuar hurzinlangg kacc kinx ee jingwqur.

Sinr Vudqaur ee langg knuar hurzinlangg si iauxquxx qyckacc m kiw. M na vair vut ee langg si anxnix, Vudjow vunxsinx iarr si knuar hurzinlangg m kiw. Ix knuar hurzinlangg qapp davolangg diongx ee pnaiw langg drangg jit dringw; qongw inx beriongrid qapp poxtongx ee davolangg drangg jitt kuanw ee qawsi; soxiw digvet sed jit jxingw ee hardingw ee qawsi, qiyr jyr "Harsing ee Vudqaur," juanjuanx decc qawsi inx jiaxee hardingw ee davolangg qapp itcer ee jaboxlangg; iarr ix decc qar poxtongx ee davolangg dyrr longxx iong kacc siongrdingw ee dyrliw, qiyr jyr "Siongrsing ee Vudqaur." Vudjow vunxsinx duiww hurzinlangg si ixqingx dua dua u byy qongvnee, soxiw au-laii hrong ix ee qawsi ee langg si iauxx qyckacc quewtauu. Inx qongw hurzinlangg si uwuer, diwqaur huesniu byy cuarbow; acc qimr hurzinlangg beriongrdid zip Vudsi vair vut. Dirr Zuqaur vair Kongxjuxqongx ee langg iarr si u jitt kuanw ee qenwqaiw, qongw hurzinlangg beriongrdid zip Singwbiy jewsingr.

U guaw ee ving'iuw, ix beh jiyh diamr Kongxjuw Biy-lai ee Binglundongg, qruar Kongwjuw ee singwsiong habhunx. Jin' je qu pair ee langg duiww jitt jann huisiongg huanxduir. Inx qongw cua hurzinlangg zip Singwbiy si uwuer diyc Singwzinn. Sinx pair ee langg tniax liauw jin' siurkir; hiamw hiamw long cud sinx-qu nng pair ee dua ciongdut. Dyrr si Kongxjuw vunxsinx iarr u anxnix qongw, "Ii luxjuw uw siauxzinn ruii lan'iongw" (Dogdok jaboxlangg qapp byy dikhing ee langg jueww derr id yh kansingg). Jitt kuanw qiamxx m si dui' qindew laii knuawkinx luxjuw ee qongxhuad mah?

Ixjingg ee dairjir cniaw byy qongw, jiauww henrsii dirr lanw ee siarhue, knuawdang davox, knuawkinx jabow ee hongkir, iauxquxx si jin' sing. Langg narr snex davoqniaw qadi iarr jin' dik'ir, cinjniaa ving'iuw qywqyr muaw cuir qra ix qongw, "Qionghiw!" Acc narr snex jaboxqniaw, dyrr liac u junw jyr byy ee kuanw. Cinjniaa ving'iuw narr u mng, rinr liauw dyrr kacc byy lat, byy sniabuew; mng ee langg iarr m qnaw qycc derr zi qxur, liogliok qongw jit qxur, "iarr hyw!" dyrr junw suah. Kacc qigduanx ee langg narr snex diyc jaboxqniaw, tuax lehh, dyrr hro :langg, naxx cincniu danr jit der haurpniapuer hetqak ee kuanxsid.

Jionglaii ee langg, jyr hurzinlangg diyhh u samjiongg-suwdig jiacc eriongrdid cxingx jyr hyw. Simxmic qiyr jyr "Samjiongg" neh? Dyrr si qongw, luxjuw jit siwlangg ee diongqanx, diyh'air u snax kuanw ee jiongsun. Derr id: iauxx bue cutqer ee sii diyhh sunrjiongg laurve. Derr zi: qer liauw dyrr diyhh sunrjiongg diongrhux. Derr snax: diongrhux siw liauw dyrr diyhh sunrjiongg ix ee qniaxzii. Jitt snax jxingw sunrjiongg ee iwsur, pacsngr qnaxx si juanx jriw qongxx, hurzinlangg itsingx diyhh qapp jitt snax kuanw langg jywhuew quewzit sing'uac, m ingqaix qadi kia diamr byy bingvik ee soxjai. Jongw .si poxtongx ee qaixsuad si qongxx jyr hurzinlangg huanrsu m ingqaix qadi pacsngr, qadi m tangx jib iwqenr, diyhh jyr byy iwqenr ee langg, zimrvinn laurve, diongrhux, qniaxzii ee iwsur, tuax .diyc m tangx dunwdnex. Soxiw siogguw u qongw, "Luxjuw byy jxaii venrr si dxig," -- qongw hurzinlangg narr byy jaijingg byy juxir dyrr si eriongrdid cxingx jyr u hyw dikhing.

Jitt kuanw ee simsux qiamxx m si knuar jaboxlangg jyr sixmic, jyr qikir decc kuanxtai mah? Muaw tnikae ee jixmue m jaix kingw zin anxnix jyr ingqax .byy? Narr beh si m kingw, jnaixngiu quixnarr cingx nii ixlaii, jiauww sursit knuar, jixmue tacc longxx hro langg knuar jin' kinx, diddit suar qaur qinaxzit neh? Jitt diongqanx ee uixkiok guaw hibong jingww jixmue diyhh cimx cimx qadi huanxsingw knuar.

3. Luxjuw jnaixngiu hro langg' knuawkinx neh?

Jiauww guaw knuar luxjuw virr lamjuw knuawkinx ee lixiuu u snax hxang:

Derr id: In'ui langg ee dyrdiksimx byy huatdat, qor qadi byy qor vadd langg, diong suiok byy diong qongliw; sniu tec zip, sniu vawjiamr, byy sniu tec cud qapp langg vunx. Duiww anxnix knuar langg' ee snewmia cincniu jiauxmngg hiacc kinx, knuar qadi ee snewmia cincniu Taiwsanx hiacc dang, longxx berhiauw siy' textiab; qiongg jiac ziok; u lat :ee kiartauu denxuix; luanxziok :ee dyrr diyhh tunlunw hogjiongg, sriu langg' hohad. Luxjuw guanlaii ee snejyr qapp lamjuw dua dua byy siysiang. Ix ee sincaii kacc siyxser, acc jit guehzit rair jit vaiw ee byy juriuu; ix ee quxjiw kacc iuwsiur, qinqud kacc byy lat. Soxiw dirr hitt hy byy dyrdig, prinw kuiwlat prinw iongw ee sidai, luxjuw diyhh niu lamjuw snax vo, diyhh sriu hohad, jex si knuair sniu ee dairjir.

Derr zi ee liuxiuu si in'ui ginxaw dy' longxx si dui' hurzinlangg ee vakdow nngr .cud .laii; qycjaiww ginxaw diyhh jiac ix ee lingx jiacc e uac, vutsii dy' beriongrdid lirkuix ix. Duiww anxnix byxqniaw ee aiwjingg si viw verqniaw kacc cimx. Hurzinlangg suisi sriu lamjuw ee knuawkinx pnaiw kuanxtai, uirdiyhh tniar qniaw ee enqor, bxan su longxx tunlunw. Davolangg jaingiaw hurzinlangg u sriu aiwjingg sokvak, duiww anxnix dyrr suar zuxx kywsiok zuxx hongwsur.

Derr snax ee lixiuu si dirr hurzinlangg viw davolangg kacc byy qauwiongw, kacc byy jaijingg, jitt diamw si hurzinlangg sriu davolangg kingsi jueww dua ee guaninx. Luxjuw ping lamwjuw, u tangx sriu qauwiongw ee qihue si qex jin' jiyw. Jiauww dingxbin soxx qongw, luxjuw ee sintew siongsiongg e m duxhyw, qycjaiww ix diyhh ngiuxci qniaxzii, jerje be tangx jiauww iwsur. M na anxnix, lamjuw uirdiyhh air hongwhur quanxhad hurzinlangg, ix byy air hurzinlangg qapp ix vnevnee gauu; soxiw m na byy jiongxle luxjuw tagceh sriu qauwiongw, huanxdngw joxdongr hurzinlangg air hagbun ee simx si kacc je.

U sed dyrdig hro luxjuw siuw, qiyr ix diyhh u samjiongg-suwdig jiacc hyw; bxan su diyhh sunrjiongg davolangg, m tangx sukiax u juxir; soxiw mrbenw bad simxmih hagbun, qanda' gauu kuanxtai davolangg dyrr hyw. Diwqaur hurzinlangg qadi iarr suar sib'iw-uisiongg, byy sniu beh jinwvo, beh qapp davolangg siangrkuanw, jinjniar suar sinr qongxx, "Luxjuw byy jxaii venrr si dxig;" sinr jitt qxur si jinliw, itcer ee hagbun longxx vangr hro lamjuw kir yc, bxan hxang ee qangge iarr itjin zimrvinn davolangg kir did.

Qaur buew hurzinlangg suar vniwjyr jit jiongw byy jiwkir ee mic, qanda' erhiauw jrngx suiw, ngwbang did diyc davolangg ee linbinw; sidjai taukaknguaw-lai kangx lysyx, m bad hnuaidit; druu kir juxjiac, voxtni, sexsaur ixgua, dy' byy u kacc qenwdiongg ee soxjai. Duiww anxnix knuar, luxjuw qadi be tangx jyr simxmic; narr m si uaxkyr davolangg ee diwimr, qadi be tangx uac. Be tangx doglip sing'uac ee langg mrbenw qongw si luxjuw, dyrr si lamjuw iarr si dikkag hro langg' knuawkinx lar!

Luxjuw sriu lamjuw knuawkinx ee lixiuu ixgua kiokk si iauxx u, jongw .si dingxbin soxx qongw jitt snax diamw si jueww juxiaur. Siser ixqingx venwngua liauw, qokk hxang dairjir dy' longxx qapp jingg dua dua u jingcax, dyrr si hunrzinlangg ee derui iarr ixqingx quann jin' je. Dirr Sengiuu luxjuw qapp lamjuw ee derui si cavutdyx qaur beh vnevnee. Dendyww u soxjai luxjuw ee derui kacc quann :ee iarr si u. Acc e diwqaur anxnix ee guaninx, byy vadd hxang, dyrr in'ui siser ee jinwvo; langg ee dyrdiksimx u kacc quann, erhiauw jundiong langg ee zinqeh, diwqaur m qnaw uirdiyhh luxjuw luanxziok dyrr knuawkinx ix. Jongw .si jueww dua ee guaninx, jueww didjiab ee lixiuu, si in'ui hurzinlangg qadi u jurqag, m guan vutsii kia langg' ee buexau, qenwsiaur vutsii sriu lamjuw ee diwimr, qadi sniu jinwvo hunwhuad benxqiongw; vutlun tagceh, higsi jywqangx, longxx byy beh sux davolangg. Jitt diamw jueww u quanhe, jueww iauwqinw.

Dingw vrangx Aujiux dua siy' taii ee sii, lamjuw longxx jyr vxingx kir cutdin, diwqaur qog-lai bxan hxang ee dairjir longxx byy langg tangx vran. Hitt diap dirr Ingqog, iacc si Huatqog, Dikqog ee hurzinlangg dyrr longxx iongxiok jinwjingg damzim bxan hxang ee surbu. Uree sraiw huexciax jair langkeh, uree jyr qingxcad vyxho derhngx ee ving'anx, uree tec iuven, uree inr sinbunn hro jingwlangg e tangx tongx siaudid. M na anxnix, iarr u zip qangdniuu jewjy huexiyc qapp duarcingr, zip haghau qar hagsingx, zip gemngg jywqnuax vran qongsu marr si u; vutlun cox-iur quann-qe, jitt vxangx hurzinlangg dy' longxx u vran .diyc. Acc vran liauw dy' byy kacc sux davolangg, dendyww uree vran liauw iauxx kacc hyw. Duiww jitt vrangx ee dairjir, dirr Sengiuu ee hurzinlangg henxbingg inx ee jaijingg jin' je, jerje si lamjuw vutjiw diyhh dua qniax, m qnaw qycc knuar hurzinlangg kinx, iong vingdingw ee tairgu kuanxtai inx. Sengiuu ee hurzinlangg dirr qinaxzit ixqingx jinr qaur qapp davolangg byy u dua hunved, jyr dua qnruax iarr u, jyr giruann venrhorsu iarr u; jyr haghau ee sensnex, iacc si kuix dxiamr jyr singliw, ixqip saixciax jyr codang ee qangx, cincniu jre huilingqix cutdin qapp duiwdik siy' taii ee dairjir inx dy' qnaw jyr. Huanrnarr lamjuw jyr e qaur ee dairjir, henrsii Sengiuu ee luxjuw dy' longxx m zinrsux, dy' longxx u sniu beh kir jyr. Sengiuu ee luxjuw dnaxx longxx si uanjuann ee langg lar; m na byy sriu lamjuw ee diwimr, qadi e tangx uac, dendyww iauxquxx si sniu beh diwimr langg'.

Guaw soxx qingwair drangg jok ee jixmue, linw qinaxzit soxx kia ee derui si zuarr quann? Linw henrsii ee kuiwlat u zuarr dua? Cimx guan jixmue dairqex jabhunx huanxsingw knuar. Linw narr byy liac lamjuw jyr qnuaiw-aw, qadi kia kiw e jai iacc si be, cniaw siangx ciuw vangr kuix cir knuar bai.

4. Luxjuw ee Tenjid

Luxjuw m si lamjuw ee qinsuii. Lamjuw narr hiacc quann, luxjuw iarr si hiacc quann; lamjuw narr hiacc dua, luxjuw iarr si hiacc dua lar! Luxjuw byy lamjuw kiokk be iong .did, jongw .si lamjuw byy luxjuw iarr si vnevnee jidvnuangiu. Suizenn si anxnix qongw, luxjuw qapp lamjuw snex jyr byy siysiang, soxx qenwdiongg ee hongbin iarr si u qyc'ngiu, soxiw luxjuw jit siwlangg ingqaix cud lat kir jyr ee giabbu, dyrr si lamjuw soxx jyr be qaur :ee, guaw sniu m na jit~nng hxang. Cir jiong' guaw soxx sniu e qaur :ee vailet dirr jingww jixmue-hniadi ee binrjingg.

Tauu jit jann. Hurzinlangg diyhh iongxiok qniaxzii. Davolangg kacc je si dirr guarbin vran giabbu. Iongxiok qniaxzii ee dairjir dy' rair hurzinlangg juanjuw kir jyr, guaw sniu jitt hxang ingxuanw si sriok luxjuw ee tenjid. Sing'iok ginxaw m si hiacc kinkuair ee dairjir. Sidjai snex qniaw si jin' yh, jongw .si cri qniaw si qingwqax qyckacc yh.

Kixcox ginxaw dirr laurbyw ee vakdow-lai ee sii, sidjai hitt sii si nng langg siyqab jit diauu snewmia. Tangx qongw laurbyw ee simx dyrr si qniaw ee simx, laurbyw ee bah dyrr si qniaw ee bah. Soxiw hitt xee sijun jyr laurbyw ee langg diyhh jnaixngiu, jixmue dairqex m jaix u bingvik .byy? Ginxaw cutsir liauw jueww u quanhe :ee si laurbyw ee lingx. Linw diyhh jnaixngiu qor hro lingx hyw, acc jit zit diyhh hro ix jiac quiw vaiw, jixmue m jaix u genxqiur acc byy?

Jiauww guaw soxx knuar henrsii ee jixmue kacc je qanda' erhiauw snex, berhiauw cri. Ginxaw ee simliw, kueckiamr, ginxaw u iaux, u qnuaa acc byy, be hiauxdid .ee si kacc duarvorhun. Lanw ee ginxaw in'ui ngiuxci ee langg be hiauxdid, diwqaur laii sixsid :ee si jin' je. Dirr lanw Daiuann Vunxdyxlangg jiauww Diarjingg jap-id nii ee diaujax, jit nii siw cavutdyx u 9,500 langg. Jiongdiongx jit huer qaur go huer ee ginxaw jiamr beh qaur duiwvnuar, si jiongqin 4,400 langg. Jitt 4,400 ee siw ginxaw ee lairdew, qaur jit huer decc jiac nix :ee, jiamr cavutdyx 2,700 langg. Liw sniu, qiamxx m si jin' tangx air diyhqniax? Jex longxx si in'ui ngiuxci m duxhyw soxx dair .laii ee cicamw lar.

Luxjuw m na diyhh jyr ginxaw ee laurbyw, iauxquxx diyhh jyr ginxaw ee sensnex. Ginxaw iauxx bue zip haghau ee diongqanx, bxan hxang dy' si vair laurbyw jyr sensnex, dui' laubyw yc. M na si dui' laurbyw yc qongxue, jit siwlangg ee singwjingg sriu laurbyw ee qamxhuar si huisiongg dua. Zidvunw luerde u jit qxur siogguw qongw, "Snax huer ginxaw ee jingsinn suar qaur jit-vah huer." Sengiuu iarr u siogguw qongw, "iyy iynaa ee ciuw e tangx iydang tnikae." Jitt kuanw ue longxx si cingjanr luxjuw ee dua kuiwlat, jixbingg laurbyw duiww ginxaw ee qamxhuar si cimx qycc dua. Lanw narr knuar ligsuw soxx qiwjair ee inghiongg, dua gauu langg soxx jyr ee dairjir, qycjaiww kekyw hiaxee langg ee laurbyw ee jaijingg dikhing qapp duiww ix ee qniaw ee iongrsimx, lanw dyrr jiokgiac e tangx bingvik laurbyw duiww ginxaw ee qamxhuar u zuarr dua, jyr laurbyw ee jiksingg si zuarr dang neh? Soxiw guaw qongw e snex qniaw be e qar qniaw, si byy qyc'ngiu erhiauw jxaix huex berhiauw ag juiw; erhiauw vror diu berhiauw banw cauw. Jitt jxingw hurzinlangg be kamx did jyr ginxaw ee laurbyw, jixhyw jyr qeaxqniaw ee qebyw. Snex qniaw si jin' yh, ngiuxqniaw qyckacc yh, jongw .si qar qniaw si iauxquxx qyckacc yh!

Hurzinlangg beh jin ngiuxci qniaxzii ee vunxhun, ix diyhh qycc juwir jit hxang. Jitt hxang si lanw jiyw jiyw sniu u qaur ee dairjir. Lanw ee langg m na duiww huewsiu jnijaii u tamsimx, duiww qniaxzii iarr si dydyx iksen, longxx byy hiamm. Lun snex qniaw ee su kiokk si jywlangg ee dua vunxhun, langlangg dy' diyhh u.

Jongw .si diyhh sniu jinx. Snex qniaw qapp liap toang'aw si byy siang. Toang'aw liap qyckacc je senx, qra ix vaii qui' let, ix dyrr diam diam diamr hiax cai, mrbenw jiac iarr be puawvne, qycjaiww be uanqex jyr pnaiw su. Ginxaw quw m si anxnix lehh; byy u hiacc suiven. Ginxaw snex zuxx je, byxsinx dikkag si zuxx lramw. Byxsinx lramw, narr si ginxaw e tangx iongw, qiamxcaiw iauxquxx e iong .did. Lramw laurbyw e tangx cri iongw qniaw, dairqex m jaix knuar qnir u zuarr je? Qycjaiww ginxaw qanda' cri iongw qiamxx dyrr e liauxqiok. Bing Hujuw qongw, "Langg byy sriu qauwiok, li jingsnex byy hng." U jaidiau tangx snex qniaw, byy jaidiau tangx hro qnaiw sriu qauwiok jniaa jyr jit xee poxtongx ee langkuanw, tangx qongw si dua dua byy jiksingg.

Liw knuar, dirr lanw diongqanx jitt kuanw byy jiksingg ee laurve laurbyw qiamxx jiyw jiyw mah? Dairqex diyh'air jaix, qex snex jit xee byy qawsi ee ginxaw, si qex vangr jit dnar dang dnar hro jingwlangg dnax, qiamxcaiw si qex vangr jit jiah how qa langg! Soxiw snex qniaw si hyw, si jin' tangx qionghiw; jongw .si iarr diyhh junxjad, erhiauw liong kuiwlat, e snex qniaw iarr diyhh e kansingg qniaw jiacc hyw. Narr byy liong kuiwlat, luan luan snex, qaur buew diyhh vangr decc quwjai ix, jex m na si hai qniaxzii, hai siarhue si jin' je!

Luxjuw derr zi ee tenjid si liaurliw qasu. Lamjuw narr vixping jyr jiongwqunx, luxjuw dyrr si siongwiaa. Jiongwqunx si juanjuw qor guarbin, siongwiaa si juanjuw lriw lairbin. Qycjaiww duiww liaurliw qasu jitt diamw qongw, luxjuw si qadingg-lai ee ongg, in'ui qadingg lairbin ee dairjir ingqaix longxjongw diyh'air ix jiangxquanw.

Dingw jam u qongw Sengiuu luxjuw ee derui vutjiw quann, vutviw lanw jitt vingg, inx jin' sriu lamjuw ee junqingr. Jex si u jiongxjiongw ee guaninx. Sengiuu ee hurzinlangg duiww liaurliw qasu jitt jann sidjai jin' giamxgne; inx longxx guanjuann mrbenw davolangg capcuir, vanrliw jabhunx jiujir qauwqag. Sengiuu ee luxjuw sidjai uanjuann si qadingg ee luxongg, juanvo ee qasu longxx si inx juxjiangw. Davolangg dui' guarbin dngw .laii, giamxzenn cincniu jyr langkeh, si qanda' sriu an'uir hiongxhog nardnia. Dirr guarbin sriu hongsongx, dngw laii qaur cuwmngkauw, dyrr u lingxli ciyr hihix ee hurzinlangg dirr hiax danxhau ix; ix qanda' jiong' ix dirr guarbin pacvniar soxx did :ee tec qaur hurzinlangg, ixgua ix dirr cur-lai qanda' tiw kuix cuir jiahvng dyrr hyw, mrbenw huanlyw bixqer quann iacc si qe. Acc ix qanda' decc jre, hax siyx dee, tauu kix kix knuar cinghiux u jingxdunr ee cur lairbin; py ix ee uahdang qik kiauxkir u quiqiw ee haursnex jaboxqniaw; tniax inx liam "Guec qongqongx, siuwjailongg, kiaa vec bew, quer lamdongg..." hitt kuanw ee ginxaxquax, higsi tniax ix ee hurzinlangg vywqyr cincig ongxlaii ee siausid, ving'iuw ee puesinr. Acc si ix dirr guawrbin soxx jyr be diaudit ee dairjir, dyrr qongw laii qapp ix ee hurzinlangg camsiongg, tniax hurzinlangg kinx sniax ser sueh ee kuanxkngr, sew kir ix simlai ee utjud.

Urdangsii hongcingx-zidluanw ee sii angbow siy' kanx iacc si cua qniaw kir qonghngg qniasuaw, higsi kir iaxgua knuar qingxdir. Urdangsii guec qngx, cnex bingg ee sijun, angx dyrr dnuaa, bow dyrr cniur, qniaxzii dyrr tiauwbuw, siyqab cingjanr zinsingx ee hylok, qamxsia qadingg ee hokkir. Davolangg soxx sriu ee hongdinn, tangx qongw jit vaiw dngw laii qaur cur-lai, in'ui hurzinlangg ee iongrsimx longxjongw sew cingkir. M na anxnix, iauxquxx si qex did vah vxue ee iongxkir tangx cud kir siarhue dua dinxdang. Ar! Sengiulangg e u qinaxzit, qiamxx longxx si davolangg gauu :ee mah?

Jingww jixmue-hniadi, Sengiulangg knuar ix ee qadingg cincniu Tendongg, cincniu Setenx qiglok ee soxjai. Acc henrsii lanw ee qadingg kacc je si cincniu simxmih kuanw? Qiamxx m si cincniu qnagak iacc si dergik :ee si kacc duarvorhun? Dui' bagjiux soxx knuar .qnir .ee qongw, dirr lanw ee qadingg davolangg kacc je si cincniu ong'iaqongx, hurzinlangg si cincniu jaboxqanw. Tangx qongw lanw ee qadingg si lamjuw juanjer ee qokdo. Led'ui, lanw ee siarhue si jin' byy cincniu langg, jongw .si lanw diyhh jaix, lanw ee qadingg si iauxkacc mrjniamic. Lanw ee siarhue sueter ee guaninx jerje si dui' lanw ee qadingg huxvai soxx drir .laii .ee lar! Hniadi jitt diamw linw u dong'ir .byy? Jixmue linw u singzin .byy?

Guaw cimx cimx ngwbang dairqex jidhuanx dua qakgno, qinw qinw sidhingg dua qaixqig. Acc jingww jixmue diyhh digvet dua hunwhuad dua benxqiongw, jiwjiyw linw diyhh jyr qaur hro qadingg vniwjniaa linw ee ongqog jiacc e iong .did.

Luxjuw derr snax ee tenjid si vryw zinluiw ee vinghyy, siarhue ee bixquanx, hro tong' tnikae u sikcaiw u qngtangx, u siykir. Guanlaii luxjuw ee singwjid qapp lamjuw vutjiw u jingcax. Hurzinlangg ee qamxjingg si kacc binw, kacc nngxsimx kacc unhyy, kacc gauu textiab langg. Qycjaiww ix ee taiwdo si jin' iuwsiur unziuu nngxlun, e tangx sauwduu itcer ee coiaw. Henrqimx luxjuw ee kuiwlat duarvorhun si jyr dirr qadingg-lai, didjiab jyr dirr siarhue iauxquxx si siyxkuaw. Qim'au siarhue iauqiuu hurzinlangg didjiab jinrlat ee soxjai si jin' je.

Qiw jit jann qongw. Ingqog u cud jit xee hurzinlangg qiyr jyr Naitingge (Florence Nightingale). Duw diyc Ingqog vangjan Toxnixqii qapp Gylysux siy' taii. Hitt sii m na diyhsiongx ee vxingx byy langg qiur, u huad unik diyhvne ee vxingx iarr si jinjniar je. Naitingge tniax qnir jitt kuanw su, jabhunx siurr ciwqig, quatsimx vangwsag qadi, qaur jenwdniuu vangjo diyhsiongx qapp puawvne ee vingsu, byy hunved vunxqog ee vxingx qapp duiwdik. Jiyjip siydangg jiwkir ee hurzinlangg, vnuaa snuax quer haiw qaur jenwdin ee soxjai, sriu liauw jin' je ee guihiamw, qiuwjo jerje snewmia. Au-laii qapp ix siysiang jiwkir ee langg jiamrjiam qex, inx kia jit qix angsig sibzi ee qii jyr qiwhy. Qaur henrqimx tong' sewqair banrqog longxx u singzin jitt hxang surgiap jin' iauwqinw, soxiw banrqog ee qnuahuw jywhuew lib'iog congwsed "Banrqog Ciacsibzirsia." Qniwnarr u kia jit qix Ciacsibzi qii ee soxjai beriongrdid pah duarcingr. Jurr Naitingge setlip Ciacsibzirsia ixlaii, langg m jaix qex uac u zuarr je, qycjaiww langlangg zinjuu ee simqnuax m jaix qetnix u zuarr je? Sewqair uirdiyhh anxnix sidjai qetnix jin' je ee qongcaiw!

5. Qethunx ee dairjir

Langg narr si u digvet ee jiwkir, uirdiyhh beh jyr ix ee surgiap, tangx qongwhenr siarhue, hro jingwlangg e tangx did diyc hyw, uirdiyhh anxnix jit siwlangg m qethunx, qamguan dnuasinx jit langg, jex kiokk si dua dua tangx vyxsiyh ee hyw su. Jongw .si druu kir anxnix ixgua, jywlangg dniardiyc si rair qethunx.

Jionglaii u qongw, "Qapvangg jyr duarlangg." Sidjai lamluw narr byy habhunx beriongrdid sngr jyr si guanjuann ee langg, in'ui inx be tangx jiaujngg jyr lanw langg soxx air jyr ee vunxhun. Soxiw tangx jaix qethunx si jin' sinsingr ee su.

Mrquxx lanw iurr u jit qxur ue qongw, "Byy-uan.-byy-qex, be jniaa hucex." Qongw angbow jingg siwlangg si uansiuu, jit siwlangg jyr angbow si beh vywsiuu sna' huanjer. Narr jiauww jitt kuanw ee knuawhuad, qethunx qiamxx m si cincniu zip qnalyy giaa qee jidngiu, si jin' tangx iamwkir ee dairjir. Qaijair duanwduanr m si anxnix; jex si knuawpenx jit vingg ee qongxhuad.

Iarr u qongw, "Cuarbow si siyw dingkyx;" dyrr si qongw cuarbow naxx cincniu diongr jiongrguann hiacc dua tangx hnuahiw. Jiauww guaw knuar, jex iarr si qongw liauw u kacc penx. Qethunx ee dairjir kiokk m si duiwtauu uanqex siy' huanjer, iarr m si jiongrguann jamhuex decc iuqex, vutqyr si langg jit siwlangg diyhh jyr jit vaiw ee vunxhun. Qinrqin duiww qethunx qongw, hitt lairbin byy qankow iarr si byy kuaiwlok, si lanw langg ingqaix diyhh qniaa jit diauu ee duarlo, qankow iacc si knuawuac dyrr diyhh kuix vo qniaa kir jywknuar jiacc e jaix.

Jiauww lanw jionglaii ee qinggiam sidjai laii qongw, langg qethunx liauw qankow si kacc je, kuaiwlok si kacc jiyw. Jex indnuax si lanw duiww qethunx ee huatdo, dua dua u m driyc, acc hitt xee m driyc decc hro lanw qankow nardnia. Guanlaii angx si bow ee angx, bow si angx ee bow, qethunx si angbow nng langg ee dairjir, vingrr m si vadd langg ee. Mrquxx lanw dui' jaw ixlaii ee qethunx, m si angx crua bow, bow decc qer angx, si cinqex duiww cinqex ee qethunx, cnemw duiww cnemw ee qewcua nardnia. Anxnex qiamxcaiw qongw liauw u kacc quewtauu, jongw .si sidjingg si jitt kuanw, si dairqex soxx jaix ee sursit. Liw knuar, mrbenw qongw jaboxginxaw, dyrr si davox :ee narr dirr langg' ee binrjingg qongw diyc cinjniaa ee dairjir, qiamxx m si bin dyrr air angg .kiw .laii, naxx cincniu jin' qenwsiaur; narr si jaboginxaw bin dyrr giac berdangr tangx kir cangr.

Jex si jnaixngiu neh? Dyrr si quxnii ee diongqanx cinjniaa ee dairjir, longxx si sirduarlangg decc juxir: haursnex jaboxqniaw longxx beriongrdid cud cuir, dyrr si laurve laurbyw quewtauu juxdniux jyr sirduarlangg ee quanli, qaur buew suar vniwjniaa quanwsir, siauwlenlangg suar liahjyr m si inx soxx ingqaix cab ee su. Dui' anxnix dyrr snex kiw huisiongg ee vewhai. Sinniuu ee hyw-baiw si jiauww sirduarlangg ee bagjiux decc knuar, qniaxsair ee hyw-baiw iarr si cutjai verbyw decc qamwding. Jingrr qaur dnaxx, qniaxsair qapp sinniuu qaur qapvangg hitt amr jiacc sna' bad ee langg m jaix u zuarr je?

Tangx qongw jionglaii ee qethunx, naxx cincniu cnemee decc liamx kaux-aw, juanzenn si drow zirun ee jywhuad. Qiamxcaiw e tangx qongw si cincniu vruac dauqauw ee kuanw; lak bin jiacc u jit bin tangx ngwbang, go bin si sux, qanda' jit bin u tangx ngiaa, sidjai si jinjniar byy tywdongr. In'ui jitt kuanw ee angbow si dui' verbyw ee bingrling, m si dui' nng langg ee aiwjingg laii qetjniaa :ee, soxiw singwjingg be hap si kacc je.

Qycjaiww jaboxlangg byy tagceh byy siu'iongw :ee si kacc duarvorhun, simqnuax byy sniu u qngtangx, byy venwkiaur, kacc byy tongdat jingliw, berhiauw u cuwbi; jit jong cincniu jit uann ee auwhongx qiamm ciurjiw. Jit vingg davolangg ee liongsimx iurr byy jinwvo, qongvnee ee simx byy huatdat, jiauww dingxbin soxx lun ee kuanw, knuar hurzinlangg kinx; qanda' erhiauw iauqiuu hurzinlangg ee jingjed, jongw .si qadi ee jingjed longxx berhiauw siuw. Bow hyw, siongrcniaw diamr cur-lai be diauu, hyhongr hurzinlangg singwjid byy congbingg, byy lingxli, byy venwkiaur, byy cuwbi diwqaur qikjniaa davolangg ee pnaiw pinxhing. Qaur buew suar inw qxuiw zip txec, sewii jit xee crua quer jit xee; qaur jiax angbow suar vniwjniaa uanqex. Jitt kuanw ee cuarbow qisit si giaa qee, jitt kuanw ee qewangx si kacc camw lyc snex dergik! Qiongjer qethunx ee hairdok snex qaur jitt kuanw jiacc lirhai.

Soxiw guaw qongw, m si guaw qongw, si jinliw decc iauqiuu. Qethunx si angx qapp bow ee dairjir, ingqaix diyhh zimrvinn beh jyr angbow ee langg kir juxir; vnix:a ee langg vutlun si laurve laurbyw longxx beriongrdid ter inx quatding, iacc si qiongjer inx kir jyr. Jex si jinliw; narr byy tranr jitt diauu jinliw angbow qaur buew diyhh jniaa jyr uanqex. Jongw .si m tangx u gorqaiw. Guaw qongw vongvnix ee langg beriongrdid ter inx quatding, qiongjer inx kir jyr; jex m si qongw vongvnix ee langg longxx beriongrdid capcuir; camsiongg, draur pacsngr. Narr si siauwlenlangg quewtauu juxdniux inx ee quanli, liac jiuuii ee langg junwjyr longxx si byy quanhe ee kuanxtai, jex si siauwlenlangg ee m driyc, dikkag siongsiongg e sitvai.

Jongw qongw jit qxur, davoginxaw qapp jaboxginxaw dairqex u sna' tniawtangr iacc si byy, nng langg beh qethunx iacc si m, jitt hxang juewau ee juxir, dikkag rair vangr hro inx nng langg, acc jiuuii ee sirduarlangg vutqyr si jyr inx ee qowbun, jyr inx ee qunsux, qapp inx draur pacsngr, qongw iwqenr hibong koxkngr hro inx jyr camkyw. Jitt kuanw ee qethunx dyrr si juriuu luan'air ee qethunx.

Qethunx narr e tangx iong jinx ee juriuu luan'air laii jniaa, nng langg ee singwjingg e kacc sna' qin, angx knuar bow dang, bow niu angx qxuann, nng langg sidsimx sna' qingr sna' tniar; ix uirr ix siawsinx, ix uirr ix vniawmia, sna' vangjan sna' textiab, drangg dnix drangg kow, qaur vacnii-au snaqab anjongr jyr jit kud, nng diauu ee linghunn cincniu Niuu Sanvig qapp Jiog Ingdaii ee kuanw, vniwjniaa nng jiah vehhyc ledvaiw vuex jnriu tnix, ingxuanw be sna' li. Narr si anxnix qethunx ee hnuahiw, qiamxx jiacc qanda' si cincniu "Siyw dingkyx?"

E tangx qongw, qethunx si nng xee qywsingr iong aiwjingg qetlenn jyr jidtew ee viauxhen. Soxiw byy aiwjingg qethunx si be jniaa, acc narr qiongqiongg hro ix jniaa si juerog. Jongw .si aiwjingg m si qadi snex .cud .laii, dyrr diyhh nng langg dairsingx jai'ngiaw qokk langg ee singwjingg. Qycjaiww nng langg ee singwjingg diyhh e hap, jiacc e snex cud aiwjingg laii, narr be hap dyrr si byy su'ngiaa.

Dui' anxnix tangx jaix u jit hxang beriongrdid byy ee dairjir. Dyrr si dui' vingsowsii diyhh sed tywdongr ee qihue, hro davoginxaw qapp jaboxginxaw e tangx sna' qauvuee, sna' jai'ngiaw. Jitt hxang si jueww iauwqinw, iurqycc si jueww qanqer jyr. Jitt hxang dyrr diyhh jyr sirdua ee langg vingsor jabhunx ter sirser iongrsimx genxqiur sethuad. Davox jabow liongw vingg kixtauu ee qauvuee diyh'air byy iwsur, jiacc hyw. Kixtauu si hro inx jyr ving'iuw qauvuee, sirduarlangg diyhh gauu junxjad, m tangx hro inx snex cud u quewsid, iarr m tangx qamdog sniu' giamdiong, diwqaur hro inx byy juriuu byy jurzenn.

Dui' anxnix iurqycc tangx jaix jit hxang. Lanw jiongjingg u qongw, "Lamluw cid huer dyrr m tangx jywhuew jiac;" acc si qongw, "Lamluw siursiu vutcinx,"-- davox jaow dairqex diyhh m tangx sna' duxtauu sna' jiycmng. Jex si huisiongg dua cywgo ee pacsngr.

Vnevenn si soxx snex ee qniaxzii, davoqniaw jaboxqniaw si u simxmic qyc'ngiu neh? Davox :ee narr diyhh u qauwiok, jabow :ee iarr si diyhh qapp ix siangrkuanw. Davox jabow vnevnee si u dikhing, vnevnee u qenwsig. narr si anxnix, davox dyrr dikkag be knuawkinx jabow, jabow iarr dyrr be byy juxir, jit xe dyrr hro davox sut .kir. Narr si jiauww henrsii, qauwiok byy simxmih hingx, dyrdig, diwsig, byy simxmih jinwvo ee sidai, jyr jit kunr dyrr vangr hro davox jabow juriuu lam jywhuew: guaw suisi kacc hyxdnaw, jex kiokk iarr si m qnaw juxdniux.

Guaw qanda' air cud lat juxdniux jit hxang, dyrr si davox jabow ee hagsingx jurr sewhanr, dyrr hro inx lam jywhuew tagceh. Hro inx dirr byy-iw.-byy-sur ee diongqanx sna' bad, jyr dongcongx ee ving'iuw. Jitt hxang narr be tangx kuair kuair sidhingg, guaw dyrr air hibong jyr verbyw sirdua ee langg, kacc byy iong sokvak jaboxginxaw, qiyr ix vutsii diamr lairdew; diyhh siongsiongg hro ix qapp inx jywhuew cutgua, jex si huisiongg ee iauwqinw. Acc dirr cur u langkeh cutzip ee sii, hro jaboxginxaw cud laii ingwjiab, iarr si vutjiw simsig u lirig ee huatdo.

Quanhe davox jabow qaujer qapp qethunx ee dairjir, guaw soxx air qongw ee ue kiokk si iauxx jin' je, danxhau au vaiw u hyw qihue jiacc lingrgua qycc qongw kacc siongser, guaw jiax si qanda' qongw quiw qxur air dairqex duiww jitt diamw cimx cimx laii genxqiur, qinw qinw juwir siyxsimx kir sidhingg.

huedngw tauu iac