derr jap-cid jniux
DERR 17 JNIUX
UWLINGW, UWSIYX EE HXUAD
Uwlingw e hro langg hun .kir, mrquxx, langg narr hun .kir, ing lingw juiw qra ix ciwqig e hro ix cniw, iarr e ing laii ur lairjong lrauu huih ee vni; iarr e juer jixtniar ee loring.
Ing lingw ee huatdo ur vnirlangg huat’im ee soxjai, e hro hitt xui ee huicqngw sokser. Dui’ anxnix ursii e tewiam, iacc si hro hitt xee iamrjingr huar byy .kir.
1. Ing jit diauu binrqinx, iacc si jit der juixnivor, jimr dirr lingw juiw nirr, jun hro da,x jiacc cux dirr iamrjingr ee soxjai. Diyhh ing jit xee lirpuerqer, hro bincngg ee tanxaw, be deh diyc damm vor. M tangx ing pingduar qra ix vak.
2. Narr air kacc lingw, tangx jiong’ vingx he juiw nirr.
3. Ing jinghuatjex (蒸發劑, evaporationg lotion, dirr jitt hy iyc-lai u huexjiuw, iacc si ether hitt hy lxui), e hro iamjingr ee soxjai kacc liangg iarr e hro hitt xuiee huih kacc jiyw, kacc byy siyx, iarr e in’ui anxnix tewiam. Diyhh ing juixnivor jimr iyhjuiw nirr, jiacc he huat’iam ee soxjai. Narr dax, diyhh qycc congr hro ix damm.
Ing vinglongg ursii si u nauxiam ee vni, iacc si hiwiam ee vni, iarr bad ing laii ur lairjong lrauu huih ee vni; cincniu hiwjong lrauu huih, diyhh qra ur hxingx-jingg. Qycc vinglongg iarr e u hingmoh’iam ee tniar, qapp u taukag tniar. Lrongg-lai ee vingx m tangx drew sniu’ muaw, narr drew sniu’ muaw, jit hxang si sniu’ dang, jit hxang kacc pnaiw he.
Ing jngxaw, laii cak vingx, viw ing tictuii qongw, si kacc hyw, in’ui ing jngxaw laii cak e cutjai langg ee iwsur, hro hitt xee ving dua iacc ser, iarr qycc kacc kuair, mrbenw pacsngw qangx. Langg ee singkux, druu kir taukag, he vinglongg ixgua, vadd soxjai diyhh ing vor laii vaux, Qycc narr he vingx dirr langg ee singkux, m tangx qui’ xee qra deh lehh, in’ui vinglongg sniu’ dang, kanwho diyhh sethuad jiong’ vinglongg qra ix diaur lehh, iacc si log dirr vnirlangg ss sinvnix, hro ix uaw ix ee sintew. Suizenn byy ur diyc langg ee singkux, jongw .si hah hitt xee lianglingw ee krir iarr hyw. Tnikir kacc liangg ee sii, muiw nng diamxjingx tnrix vingx jit vaiw; tnikir narr kacc zuac, diyhh siongsiongg tnrix vingx. Vingx narr rngiuu .kir, hitt xee juiw diyhh vniar .cud .laii. Kanwho diyhh jaix jitt xee huatdo si beh hro vingx ciangjai be rngiuu .kir, vnirlangg e siongsiongg did diyc liangg ee krir. Setsuw jitt sii ing vingx, quer jit diamxjingx ing siyx juiw, anxnix hutzenn lingw, hutzenn siyx, dikkag byy qonghau. Vinglongg iauxx byy juan bat ee dairsingx, diyhh cic hro kongkir jiauu cud (derr 146 doo).
Juer vingvavor (Ice poultice): Jitt xee hxuad soxx ing ee mic, jiurr si erdew jiaxee: Digvet ee iujuaw, iamm, vingx, xmii.
1. Ing iujuaw nng dniux, jiuuii diyhh viw deaw kacc dua jit cunr. Ing jit dniux iujuaw cux he erdew.
2. Juaw ee dingxbin jiacc cux xmii.
3. Xmii ee dingxbin jiacc pox dog cruir ee vingx.
4. Vingx ee dingxbin jiacc ia jit dingg iamm.
1. Jiong’ xmii qycc kamr he dingxbin ia kamr hitt dingg iujuaw. Kamr hyw, jiurr dui’ siwvnix aur zip kir jih lehh.
6. Dairsingx ing jit der cingkir ee vor, cux hex vnirlangg ee singkux, hitt xui u vni ee soxjai; zen’au jiacc jiong’ lingw ee deaw kuar he dingxbin.
Qycc jit xee uwlingw ee huatdo, si ing Leiter sri ee enqngw, iacc si ciurlingqngw. Si dingxbin ling juiw e dui’ qngw lrauu lyc erbin. Knuar derr 147, 148 doo jiurr jaix.
Uwsiyx ee hxuad: Uwsiyx e hro hitt xui ee huicqngw kokdua. Narr singkux-lai u soxjai haut’iam, suisii qra ix uwsiyx, ursii hitt xee hxuad cud ee huicjniux, e qycc kipsiux zip singkux-lai; anxnix jiurr tewiam, be hunr lxangg. Jitt xee si in’ui huicqngw kokdua ee sii, kacc je cingkir ee huih e dui’ hiax qingquer, e vangjan hitt xee kipsiux ee jok’iong. Narr hitt xee huat’iam kacc quw, jiong’ uwsiyx ee hxuad, e hro huicjniux qapp vehhuicqiuu naxx je, tangx hro lang’iongg-lai ee lxangg kacc kuair uaw puehux.
Uwsiyx ee hxuad u nng kuanw, dax qapp damm :ee. Damm :ee tangx hunx juer sipvor (濕布, fomentation) qapp vavii (琶布, poultice).
Uwsix dax ee hxuad: Drew siyx juiw ee kiwqu, si jiauwqor vnirlangg jueww iauwqinw ee mic; u ciurlingx :ee, u jur :ee, iarr u huii :ee. Jur :ee kacc kuair snix sxenx, jiurr kacc kuair lau ciurlingx :ee juer habsig, in’ui cinwcaiw e he dirr vnirlangg ee dagg soxjai; jongw .si hitt xee siyx byy tangx cincniu huii :ee hiacnirr quw; qewjnii iarr kacc quir.
Zip dirr quanr-lai ee siyx juiw, m tangx dua siyx, qniax liauw quanr puar tngr diyc vnirlangg. Narr si ciurlingx :ee, diyhh dyw juiw jidvnuar dni; iarr deaw-lai ee kongkir, diyhh cic hro cud .laii, zen’au siyx juiw deaw-cuir, diyhh juan hro ann.
Beh ing diyhh sewzi, bylun ing simxmic kuanw ee siyxjuixquanr, guarenn longxx diyhh tyr jit xee nii(?) ee deaw; narr byy jitt hy deaw, m tangx hro vnirlangg ing. Narr si vnirlangg kipzip bajuiwiyc liauw, iacc si vnirjingr dang, qaur vutsingxzinsu ee sii, kanwho m tangx tec siyjuixquanr, kir he sinvnix, diyhh ing nitanw laii qeh lehh. Iarr kanwho m tangx lirkuix ix ee sinvnix; diyhh siyxsimx knuar vnirlangg ee huansinx dinxdang, in’ui m jaix langg ee sii, qaiww kair hro tngr .diyc.
Narr byy siyjuixquanr, tangx ing hangx siyx ee jiyh, acc si ganrjiw, ing nitanw laii vaux. Acc si ing vingsiongg vylequanr drew siyx juiw, ing nitanw vaux laii ur, iarr si hyw ing.
Juer siyx nitanw qapp qah ee huatdo: Hangx tanxaw, m tangx qngw lehh, diyhh tiw hro kuix. Dairsingx dui’ tanxaw-vnix hangx kiw, sui’ siyx sui’ qngw .kiw .laii; diyhh qngw tanxhuaii, qaur qui’ niaw tanxaw longxjongw siyx. Qngw .kiw .laii liauxau, jiurr diyhh ing ciuw lamw hro ann; qycc qiyr jit xee langg draur vangjan, knuax knuax aw si jiong’ vnirlangg dingw quar soxx qah ee pue unn unn aw henx .kiw .laii; diyhh e qir .did, m tangx dua lat jit xe jiurr henx kuix. Ing ciuw jiong’ qngw ee tanxaw he .lyc .kir, unn unn aw tiw qah qaur kax-buew. Jex siyx tanxaw si diyhh qah qin vnirlangg ee singkux, qiuu soxx qah ee mic longxx diyhh tec .lyc .laii. Anxnix vnirlangg ee singkux jiacc e did diyc siyx ee krir; zen’au qycc jiong’ kax vaux hro hyw.
Uwsiyx dax ee hxuad tangx jiong’ juixnivor, iacc si qu ee tanxaw ee jit der, iacc si mihuex, hangx hro ix siyx, jiacc ur dirr vnirlangg u vni ee soxjai. Kacc hyw ee huatdo diyhh ing ciurlinglongg, drew siyx juiw laii hib, kacc be hiacc kuair lingw.
Uwsiyx damm ee hxuad: Sipvor u unsipvor, acidum boricum ee unsipvor, apenwunsipvor, oleum terebinthinae (turpentine) ee unsipvor, acidum carbolicum, hydrarg. perchlor. ee unsipvor.
Unsipvor: Diyhh urvi binrtangw, qunxjuiw, juixnivor, jit dniux viw juixnivor kacc dua ee iujuaw, jit der viw juixnivor kacc dua ee mihuex, pingduar, vinxjiamx, jun ee vor. Jun ee vor diyhh dua qycc qau, iarr diyhh e tiapsit. Iarr diyhh u nng qix ee catuii ciyh veh dngg, jit ciyh qau, cngx zip dirr junrvor ee siangx tauu buew ee vangjua jiacc laii juan; ciuw kacc be siyx; knuar derr 149 doo.
1. Jiong’ juixnivor jih, iarr hitt vingg vnivnii diyhh jih dirr guarbin, hitt vingg u mii :ee jih dirr guarbin, hitt vingg u xmii :ee jih dirr lairbin. Narr byy juixnivor, ing vingsiongg vor jiurr hy.
2. Jiong’ juixnivor he dirr jun vor ee lairbin, suar he dirr binrtangw nirr. Vniar qunxjuiw dirr dingxbin, jimr hro jiauu damm.
3. Jun hro dax.
4. Jiong’ juixnivor tec .cud .laii, vnua jit xe qniax liauw tngr diyc vnirlangg. Unn unn aw he dirr vnirlangg u vni ee soxjai.
5. Ing iujuaw laii kamr, jiacc ing mihuex he hitt dingxbin.
6. Ing pingduar vaux hro hyw, iarr ing vinxjiamx qed(qid?) hro ann.
Acidum Boricum unsipvor: 1. Jiong’ acidum boricum 4.0 grms. He vnuaa-lai.
2. Jiauww dingxbin ee huatdo, he juixnivor dirr siaudok binrqinx-lai.
3. Ing qunxjuiw tinn dirr dingxbin, jiacc jiauww dingxbin ee huatdo, jiong’ juixnivor, tec kiw laii; diyhh ing quer sac ee gnec’aw. Jiauww isingx ee bingrling, nng~snax diamw diyhh ngua jit vaiw (derr 150-151 doo).
Oleum Terebinthinae unsipvor: Ing 1.5 c.c. oleum terebinthinae (turpentine) dih he juixnivor ee lairbin jiacc vniar qunxjuiw dirr dingxbin, jimr hro jiauu damm. Qycc jit xee huatdo, si ing qunxjuiw 600.0 c.c., hitt lairbin vniar oleum terebinthinae 10.0 c.c., lai hro jiauu. Decc la ee sii, ing juixnivor jimr hro jiauu damm, jiacc tec .kiw .laii, jun hro dax, he dirr u vni ee soxjai. Jitt hy iuu, diyhh duarlangg jiacc tangx ing, ginxaw m tangx ing.
Apenwunsipvor: Hitt xee juixnivor jimr dirr qunxjuiw nirr, jun liauxau, diyhh ing 1.0 c.c. tinctura opii dih juixnivor-lai. Jitt hy kindang ee hunsniax diyhh sewzi; isingx bingrling diyhh ing zuarr je, diyhh tranr, m tangx ing sniu’ je.
Narr ing lotio hydrarg. perchlor. juer unsipvor, diyhh 1~5,000. Narr acidum carbolicum diyhh 1~100. Narr ing acidum carbolicum iacc si hydrarg. perchlor., diyhh siyxsimx knuar vnirlangg ee jinghingg, in’ui jiaxee iyc kuair kuair kipsiux dirr singkux-lai diongwdok.
Vavor (琶布, Poultice): Jitt xee huatdo si ing iyc, ver(?) iacc si vaux dirr vor ee lairbin, jiacc he vni ee soxjai. Ursii byy longxx vaux, qanda’ qoo jit vingg, iarr he u vni ee soxjai.
Vavor ee loring, si hro u vni ee soxjai, kacc siyx iarr kacc siplun. Dui’ anxnix e: (1) jixtniar; (2) hro huicqngw kokdiong drir qaur tewiam, iacc si vangjan lang’iongg-lai ee lxangg uaw puehux, kacc kuair cud .laii.
Cokngx vavor: Jiong’ jit der muavor juer deaw, ix ee daurser si jiauww beh ur ee soxjai. Ing cokngx jit qxinx, iacc si vnuar qxinx, jiauww beh ing ee liongrsor, he dirr vnuaa-lai, hangx hro siyx. Muavor deaw iarr diyhh hangx hro siyx. Ing damrvyc quixjuiw, vniar dirr cokngx nirr (m tangx sniu’ je, hro ix damm damm jiurr hyw), ing tngsii, iacc si iyhdyx, la hro jiauww. Qnuaxqinw vniar dirr deaw-lai, deaw-cuir vak congr hro vnii, he u vni ee soxjai, jiacc ing binrqinx kamr, pingduar vak hro hyxser. Narr lingw, tangx qycc congr hro siy, qycc ing; jongw .si si kacc hyw diyhh ing sinx ee congkngx. Quanjad narr tniar, iacc si kax, ciuw, hingkamw u tniar, uwsiyr cokngx e jixtniar. Jitt xee deaw tec .kiw .laii ee sii, diyhh ing siyx ee mihuex, vaux u vni ee soxjai, dihongg qamw .diyc, iacc si ing siyx oleum olivae qra ix truix, jiacc jiong’ hangx siyx ee nivor qra ix kamr lehh, pingduar vak hro hyw.
Muajixvavor (Linseed poultice): Diyhh urvi jiaxee mic: Jit xee juixquanr drew qunxjuiw, juiw-lai he jit qix dunx ee dyx (iyhdyx); hangx siyx ee vnuaa; muavor; oleum olivae; jit der vangx; muajixbuac (linseed meal).
1. Jiong’ muavor ee hnuaidit, suar cux hro vnii dirr langg ee dingxbin. Jitt der muavor sir vnix diyhh kacc dua damrvyc, cavutdyx liong nng cunr tangx auw .zip .laii.
2. Jiong’ soxx beh ing ee muajixbuac he dirr hangx siyx vnuaa-lai, jiacc ing qunxjuiw unn unn aw tinn .lyc .kir; tinn ee sii diyhh ing siyx ee iyhdyx lai hro jiauu, m tangx qed qui’ liap (derr 152 doo). Narr cincniu mirqoo ee kuanxsid jiurr hyw.
3. Jiong’ muajixqoo, vniar dirr muavor ee dingxbin, pix hro ix vnii; diyhh qnuaxqinw jiong’ iyhdyx unr qunxjuiw tnuakuix hro vnii vnii. Soxx ing :ee, diyhh buah snax hunx ee qau. Decc pix ee sii m tangx jiauu pix liauw, sir vingvnix-aw diyhh lauu jit cunr. Ursii diyhh ing damrvyc oleum olivae buah dirr dingxbin (derr 153 doo).
4. Muavor ee sir vingvnix, diyhh ud nng auw zip .laii, hro muajiw be jauw cud guarbin.
5. Decc ur vnirlangg ee sijun, diyhh unn unn aw he .lyc .kir, qniax liauw e sniu’ siyx, laii qra tngr .diyc.
6. Ing mihuex laii kamr, zen’au ing pingduar vak hro ix hyxser.
Dirr vnirlangg ee hxingx-jingg, iacc si vakdow-dingw, beh ing jitt xee iyc laii qoo, si m tangx sniu’ qau; in’ui vnirlangg hiwjongx hokib ee lat kacc lamw, narr qycc ing kacc dang ee iyc, e gairdiyc ix ee hokib.
Air jaix kanwho soxx juer jitt kuanw ee iyc, hyw iacc m hyw, narr knuar soxx ngua .kiw .laii ee iyc, be liamm vnirlangg ee puehux, iarr soxx juer ee iyhpnir byy snruar, jiurr jaix si hyw.
Jiauww isingx soxx huanhur :ee laii ngua. Narr ixqingx lingw, diyhh tec .kiw .laii. Narr m qycc ing iyc hib, jiurr diyhh jiong’ siyx xmii kamr lehh; ing pingduar vak hyxser.
Qaiwluac vavor: Juer jitt xee hxuad, si qapp dingxbin :ee siysiang. Qaiwluac vavor, si ing muajixbuac, camx qaiwluac, juer jit xe la hro jiauu. Ursii ing qaiwluac kacc je, ursii kacc jiyw; narr si beh jixtniar ee loring, beh qra duarlangg qoo, diyhh ing 1 hxun ee qaiwluac, 1 hxun ee muajixbuac; diyhh qoo 15 hunjingx quw, jiacc tec .kiw .laii. Narr si beh qoo hxingx-jingg, duarlangg diyhh 1 hxun ee qaiwluac, 7 hxun ee muajixbuac. Qaiwluac diyhh ing lalunn siyx juiw la hro jiauu, jiacc jiauww dingxbin soxx qongw ee huatdo, praur muajixbuac, jiong’ nng hxang la hro jiauu. Jiacc jiauww dingxbin ee huatdo, laii qra vnirlangg qoo, jongw .si dairsingx diyhh ing vyc vyc ee vor, hro jitt xee qaiwluac be bag diyc vnirlangg ee puehux, qniax liauw e pongwpa. Iauwqinw narr knuar ix puebah vnir angg jiurr hyw, m tangx sniu’ qeuwtauu, in’ui narr qoo sniu’ quw, puee e pongwpa.
Jitt xee qaiwluac qoo liauw tec .kiw .laii ee sijun, diyhh ing xmii jeh hiax ee damx hro ix dax, m tangx cud lat crid, iarr diyhh qycc srunn, knuar iauxx u qaiwluac liamm lehh iacc byy; narr u, diyhh tec .kiw .laii. Aurlaii jiacc ing zinci oxidum hunw samw, iacc si ing unguentum zinci oxidi (iuu) laii qoo. Jiacc ing vor qapp xmii amx lehh; ing pingduar qra vak hro be ling .kir.