1. Sewqanx si jit diauu ee dua kelauu

Vudqaur ee kaiqijow Sikkiax Zulaii u jit qxur ue, qongw, "Juhuad busiongg," dyrr si qongxx itcer bxan hxang longxx si vutsii venwcenx, byy jit sii u dniardiyc. Cniaw knuar, huex pangx u quiw sii, guec ngii u zuarr quw neh? Duxjiacc cud zit, liamvnix dyrr beh lyhho. Suiw suiw ee ginxaxngex, qiamxx m si byy zuarr quw dyrr beh venwjniaa unxqux giac qnuaiw ee laurduarlangg mah?

Cincniu jitt kuanw ee knuawhuad, kiokk si hro langg kacc air viquanx iamwser. Sewqanx bxan hxang sidjai vutsii decc venwcenx, jongw .si byy dikkag longxx si venr pnaiw. Jiauww guaw knuar, suizenn si qyckacc anwjnuaw venr, qaur buew dniardiyc si venr hyw. Narr si qongxx qiuwqingr ee dairjir si bibiauw hro langg yh did duanr; narr si anxnix, guaw iauxx e tangx qongw jit qxur, langg dniardiyc si hibong sewqanx venwjniaa hyw, dikkag si byy simguan hnuahiw sewqanx venwjyr pnaiw. Si, sewqanx vutsii dirdecc venr, jongw .si langg dniardiyc si air sewqanx venr hyw; banrid narr venwjyr pnaiw, jyr langg dikkag qankow, auwnauw, vunn dua kuir.

Sewqanx bxan hxang decc venwngua si cincniu kejuiw dirdecc lrauu. Liw knuar, kejuiw uang'uangx dirdecc lrauu, mezit dy' longxx byy cunwkig ee hiyckunr. Jongw .si m tangx qongw, kejuiw si id kir byy huetauu. Driyc, kejuiw si dui' snuadingw lrauu .lyc .laii, didtaur lrauu duiww haiw nirr kir. Cniaw sniu knuar, kejuiw narr si id kir byy huetauu, snuadingw jnaixngiu u hiacc je ee juiw vutsii dy' lrauu be liauw? Sidjai kejuiw m si id kir byy huetauu; kejuiw lrauu qaur haiw nirr ee diongqanx, diyhh sriu zidtauu pak siyx, dui' anxnix juiw dyrr venwjyr juixenx cringr jnriu tnidingw .kir. Juixenx dirr tnidingw qnir diyc lingw hongx, dyrr qycc venwjniaa juiw qalauc duiww snuadingw derbin laii, jex dyrr si qiyr juer ho. Soxiw tangx jaix, kejuiw si dui' snuadingw lrauu lyc haiw, jongw .si qaur haiw e qycc cringr jnriu snuax, si anxnix sunhuann decc dngw. Sewqanx bxan hxang decc venwngua, knuar jinx dy' jiauww jitt xee kuanw; si u jiauww itding ee lorqingw decc venwcenx, dikkag m si byy dniardiyc luan luan dirdecc qaw. Juiw diyhh qnialauu, diyhh venwngua jiacc be caur, sewqanx bxan hxang iarr si diyh'air qexqu-nguarsinx jiacc e u jinwvo. Juiw suizenn si jin' cringx jin' hyw, mrquxx narr si vutsii jxig dirr jit soxjai, byy zuarr quw dyrr e venr lyy huad caur bi.

Sewqanx suizenn si qyckacc hyw ee dairjir, narr m si e tangx qapp siser vnevnee laii venwngua, byy zuarr quw iarr dikkag diyh'air jniajyr qursniur byy hab'ing ee mic. Sewqanx ee decc venwcenx duxduxx si cincniu kejuiw decc lrauu, mizit dy' longxx byy hiyckunr; juiw zuxx lrauu, si zuxx uac zuxx cingkir, sewqanx siarhue zuxx venr si zuxx sinx zuxx jinwvo. Juiw decc lrauu u jiauww dniardiyc ee huatdo, sewqanx bxan hxang ee venwcenx iarr si itding ee cuwsu, dikkag byy hitt hy acnng qy duiww jiyhtaupang cud .laii ee dairjir.

2. Daiuann u venr iacc si byy?

Jiauww bagjiux soxu knuar .qnir .ee laii qongw, jitt zi-jap gua nii laii, Daiuann si venr jin' je. Kacc jaw langg decc qautongx ongxlaii longxx si ing kax qniaa, urdiok ee langg si jre qiy kiaa bew. Dnaxx qaur dyclyc dy' si u huexciax, jurjuanxciax, jurdongrciax tangx jre. Jaijingg kacc gauu :ee jit zit iarr si be qniaa quer jap por lo, jongw .si henrsii jit zit beh jauw jit-vah gua por si iong'ngi. Jaw ee dyrlo qelo longxx si cincniu qedngg-aw u.-uan'uad-u. jin' ser diauu; henrsii dy' longxx si jin' dit, jin' kuah, jin' dua diauu, jin' vnetnaw. Jingg qelo ee juixqaux kacc byy tongx, soxiw caur juiw jxig qui' kud, drir qaur snex bangw, snex tangg, huad dogkir, hro langg kuair puawvne, henrqimx dairkair qeci longxx u kuix juixqaux, siwqer dy' longxx dasangx. Ingxdangsii longxx si ing cauwiuu decc diamw dingx, m na si byy qraur qngx, sidjai jin' guihiamw, jin' qau oenx; jongw .si jitt diap ixqingx u denrdingx tangx diamw, amwsii e tangx jiyr viw zit .sii qyckacc qngx. Qokk soxjai qeci qex jin' suiw, iarr u qex sed qonghngg tangx tittyy, iarr u jin' je ee dua qingx cur tangx knuar. Jerje soxjai u dua qingx ee jewtngg huersia, qikir ee sniax kinwkongr hauw; jyr singliw ee huatdo iarr longxx qapp jingg u qyc'ngiu; haghau iarr u kacc jingxdunr kacc je qingx; jyr qnruax ee langg iarr si qex kacc je kacc giamm, cuxcat-aw qiamw jin' je, qiongqongwcat e tangx qongw si ixqingx jehjingw liauw.

Tec henrjai ee Daiuann laii vixqaur ingxvaiw, u venwcenx ee soxjai si jin' je. Acc soxu venr liauw :ee si hyw-pnaiw camcix, kiokk m si longxjongw tangx qionghiw. Hyw-pnaiw cniaw bylun, qanda' cniaw sniu knuar jiaxee soxu venwngua ee diamw si dui' anwjnuaw laii? Vutlun hro sniaw langg qongw, pacsngr qnaxx byy langg beh qongw si dui' lanw Vunxdyxlangg ee simlai qig .cud .laii, acc si dui' lanw ee ciuw laii jyrjniaa. Qenwsiaur ar! Lanw m na berhiauw did qadi qig cud jitt hy, lenrr yc langg', duer langg' ee kuanxngiu lanw dy' si be e. Setsuw mair did vadd langg qapp lanw cab, jiong' henrsii dirr lanw Daiuann Dxyw-lai soxu itcer ee sised dagg hxang ee qiquanx vangr hro lanw laii jiangw, lanw byy jaidiau tangx jiangxliw hyxser, jex si knuar hen hen ee su, pacsngr mrbenw zuarr quw e trer qaur qapp id~zi-jap nii jingg siysiang.

M si guaw air buxziok qadi, sidjai si jitt xee kuanw, qadi ylyw dy' iarr si byy loring. Soxiw diyhh bingvik; Daiuann suizenn si u venwcenx, jex si langg' jyr hro lanw :ee, m si cud jurr lanw ee jaidiau. Dui' anxnix diyhh qongw, "Daiuann si byy venr kacc driyc." Sewqanx sisii decc venr, vadd langg kikkig longxx u decc nguarsinx, jongw .si lanw iauxquxx si jiauww zi~snax-jap nii jingg ee taubin. In'ui anxnix dairqex diyhh viw ingxvaiw kacc qankow, kacc byy cuwbi si ingqaix. Aixar! Daiuann u venwsinx, jongw .si dairqex dy' si zuxx qiyr kow! Sinx :ee si m bad, qu :ee iurr si cavutdyx decbeh be qir .did. Bagjiux qimx qimx knuar vadd langg p.-piauped-p. decc uahdang, mrquxx qadi cincniu pnuawvnerlangg, air beh duer langg' diyy kax si kia be jai, beh yc langg viw ciuw iurr giac be kiw; sniu beh tranr langg ee cuiwbuew cniur, mrquxx naauu dax dax, cuiwjic be dinxdang. Hongwqiamx iurqycc siongsiongg duw diyc jokget ee ginxaw, iacc si byy tenliongg ee okhanr beh kihu. Aixar! Dairqex jnaixngiu m diyh'air vunkuir?

3. Qiuwqingr si byy tak byy qar soxx drir :ee

Dairqex henrsii ee jygu, qiuwqingr sniu jinx, si in'ui quxnii qauwhuar byy hingx, srid liauw qawsi soxx drir :ee, hro qauwhuar jiacnirr sueter ee guaninx sngr .laii si jin' je. Huatdo sed liauw m hyw iarr si u, acc u jit vo ee langg air jingwlangg gong, qadi tangx juanquann, iong jiongxjiongw ee ciuxdnua decc joxgai iarr si u. Jongw .si jueww dua ee guaninx si dirr jingwlangg berhiauw qauwiok ee vyxvuer, qanda' uirdiyhh bak-jingg ee jiahvng cud lat, knuar tagceh qangxqiur ee su jyr qex :ee, liahjyr si kangx liauw qangx.

Lanw vunxlaii ee singwjid si kacc diwdiong sidjai, kacc qor bagjiux-jingg; bxan hxang dy' si air jinx duw jinx, sit duw sit, longxx si diong etlik, drow tenun nardnia. Kacc je si sinr, qongw, langg beh jniurquann cutsinx mrbenw dikkag air tagceh; soxiw u jit qxur ue qongw, "Liuu Hang guanlaii vuttogsux," si qongxx, Hanwdiauu ee kaiqijow Lauu Vangx qapp Coxvawongg Hang Uw; jitt vuer ee langg longxx byy tagceh, inx dy' iarr e vreh hiacc quann, jyr hiacc dua ee dairjir. Jex si qoxjaw ee surjig, dirr jingwlangg longxx si gugong m bad simxmic ee sidai, qiamxcaiw e iong .did; dirr qinaxzit banrid narr si iauxquxx u langg anxnix sinr, dyrr si jin' kyxlinn. Sidai ixqingx byy siysiang, henrsii si hagbun ee sidai, qinrqin iong jit langg ee etlik qinggiam si duanwzenn be tangx jyr simxmic, sidjai si yh did kia e jai tangx quewzit.

Kacc jaw si qywzinjuxgi ee sidai, bxan su longxx si duiww qadi jit langg laii pacsngr, longxx si jit langg duiww jit langg ee jywhuad; soxiw kacc je diyhh vin' jurqiw ee kuiwlat, iong qadi ee juxquad juanduanr. Piwlun duiww jyr singliw ee hongbin qongw, kacc jaw longxx si jit langg jit langg qadi jyr, dagg hxang jin' qanxdanx, qokk langg ee kuiwlat dy' si u hanrliong, soxiw jit langg duw jit langg ee su'ngiaa jingcax si byy zuarr je. Henrsii ixqingx m si jitt kuanw ee jywhuad; henrsii si qiongrdongg hiablik ee sidai, soxiw singliw iarr si hap jingwlangg ee kuiwlat decc jyr. Liw knuar, henrsii u qex jin' je kuanw ee sinx qiquanx, u qiyr jyr simxmih huersia, simxmih ginhangg, longxx si iong dusig hap jerje qoxdux decc jyr, vunxjnii si jinjniar dua, singliw si jyr huisiongg kuah, ix ee kuiwlat byy hanrliong. Siogguw qongw, "Siyqab biw, juw u cunx." In'ui vunw dua, siaulo dua, soxiw mihqnia e tangx dingxjinx qycjaiww siok. M na anxnix, iauxquxx e tangx anvaii ix ee dxiamr-lai jin' suiw, e giuw langkeh ee bagjiux, iarr e tangx setvi jerje hxang hro langkeh hnuahiw.

Guaw ee bagjiux soxu cinx knuar qnir siangrr dua kxamw ee bunci singlixdiamr, qanda' hitt qingx dxiamr ee cur, si kiw sir~go-vah-bxan ginn, si lak janr ee ngiulauu, lairbin ee posed uanxzenn cincniu ongqiongx, dxiamr-lai duarsiyw ee huexqir davox jabow jongxqiong cingx gua langg. Lairbin u iw tangx hro langkeh tedyw, iarr jin' je jaboxginxaw decc pangg dee, iarr u huehngg tangx hro langkeh siongxguanw, iarr u langg decc jauwgak jyr hxir hro langkeh tniax knuar. Acc langkeh narr vakdow iaux iarr u tangx hro ix brew jiac, mrbenw qycc jauw kir vadd dah. Narr zuac ee sii u tangx crid bin iarr denrhongx tangx liangg, langkeh ee snxax ingx suax u langg tangx qra ix crid. Langkeh soxx brew ee mic mrbenw qadi tec, narr qra ix qaudair, u jurdongrciax acc si huexciax tangx qra langg jair qaur cur. Narr si kacc hng :ee, suisii e tangx qra lanw qiar iuven unrsangr qaur lanw daux; vutlun liw qauquanx jerjiyw dy' longxx si jitt kuanw ee sna' kuanxtai. Cincniu jitt kuanw ee jywhuad, jit langg ee siyw singliw beh dongr tacc e tangx jai, dniardiyc rair dyxdiamr! Jongw .si jitt hy singliw m si huah jyr dyrr suisii e tangx jyr, diyhh bad jin' je hongbin ee dairjir, diyhh hap jin' je langg ee diwsig, jiacc jyr e tangx laii. Jitt kuanw si jin' je langg siyqab ioksog decc jyr, soxiw dikkag diyhh u jingxjingw ee quiqiw, diyhh bingvik huatlut jiacc jyr e tangx siwjniar.

Iurqycc qauquanx si jin' kuah, hangjingg rair jingtongx, jurzenn puesinr ongxlaii si jin' jiap, soxiw m na qadi ee bunzi diyh'air bad, vadd qog ee ue qapp bunn dy' longxx rair jingtongx. Siauwbak jin' je jin' jrap, diyhh jnaixngiu qir jiacc e bingvik, jniginn diyhh jnaixngiu unrjuanw jiacc e liutongx, dxiamr-lai ee soxhuir diyhh anwjnuaw iong jiacc e jet'iog, jex iarr m si jit langg soxx sniu e qaur. Dui' jitt quiw diamw sniu iarr dyrr tangx jaix, henrjai beh jyr singliw, diyh'air u hagbun diyhh tagceh, diyhh jai'ngiaw jerje gauu langg soxx qinggiam soxx etlik soxx genxqiur ee qetqyw, jiong' hiaxee tec laii jyr camkyw, anxnix henrsii ee singliw jiacc jyr e laii, iarr jiacc e singqongx. Jyr singliw ixgua bylun si jycsid, iacc si jywqangx, dirr henrsii dy' longxx diyhh tagceh, u hagbun, jiacc e tangx qapp langg vnee jerkia.

Lun langg tagceh genxqiur hagbun u nng kuanw ee bogdig. Jit kuanw si beh hro langg ee pinxsingr jiaujngg, qycc jit hxang si beh hro langg did diyc jywqangx vanrsu ee jailingg. Bing Hujuw qongw, "Tagceh byy vadd hxang, qanda' si beh qriuu soxx pah m qnir liauw ee liongsimx dywdngw .laii," dyrr si beh hro langg ee pinxsingr jiaujngg ee iwsur, jex si tagceh derr id ee bogdig. Jongw .si kacc je langg byy sniu qaur jitt diamw, qongw tagceh si beh tanwjnii, jyr qnruax. Tanwjnii, jyr qnruax, jyr dairjir, jex si sriok qisut jailingg ee hongbin, si tagceh qangxqiur hagbun derr zi ee bogdig, kacc jaw si qanda' knuawdang dirr jitt diamw, jex si kacc penx ee knuawhuad. Langg qanda' hro laurbyw snex .cud .laii si byy jiaujngg, si jit xee langg ee copuex nardnia, dikkag diyhh qycc qangxqiur hagbun, jai'ngiaw jin' je gauu langg ee soxx sniu soxx qniaa, tangx hro lanw ee taunauw uahdang simsux bingvik, hro lanw erhiauw jywqangx vanrsu ee huatdo, kixtauu jiacc e sngr did si jiaujngg. Dirr lanw Daiuann jiongjenn qauwiok longxx byy hingx, hagbun longxx sitdui, jex longxx si duiww lanw dairqex qadi qapp lanw ee joxsenx kacc je byy bingvik hagbun ee jinx iwgi, be hiauw did siser ee venwcenx soxx drir :ee.

Led'ui hniadi jixmue, siser ixqingx venwngua liauw. Kacc jaw si jit langg duiww jit langg decc jywsu, si qywzinjuxgi ee sidai, henrqimx si jingwlangg duiww jingwlangg, tuantew duiww tuantew, si hiabdongjuxgi ee sidai. Kacc jaw si jit langg gauu, jingwlangg gong; jit langg diwimr jingwlangg, jit langg hohad jingwlangg; si inghiongjuxgi, si juanjewjuxgi ee sidai; henrqimx si jingwlangg gauu, jingwlangg iongw; qongqex jyr, qongqex siux, iong je langg ee hyw, jewjiw jingwlangg ee pnaiw, si binjiongwjuxgi, binvunxjuxgi ee sidai. Kacc jaw si suiven air, suiven tangx jyr, qokk langg e tangx pah qokk langg ee sngr, si jurzenjuxgi, hongwzimrjuxgi ee sidai; henrqimx si u zinrding jit xee qongqex ee piaujunw, qongqex ee quiqiw, qongqex diyh'air siuw; dyrr si lixsiongxjuxgi, huatdirjuxgi ee sidai. Jongw qongw jit qxur, jaxjingg si jit langg jit langg qadi uac ee jywhuad; henrqimx si venwjniaa jit langg hap jingwlangg, jywhuew uac ee jywhuad. Tangx jaix dirr henrqimx ee siser, jit langg qapp jingwlangg si jin' dua u quanhe, soxiw jit langg be tangx jiauww qadi ee pacsngr, diyhh jai'ngiaw jingwlangg ee dairjir; diyhh bad jin' kuah, soxiw diyhh u hagbun, u diwsig jiacc e ing .did. Dnaxx lanw dairqex jaix, lanw Daiuann ee hurzinlangg qiamxx m si bagjiux longxx m bad "Id .zri" si jit uec mah? Acc davolangg quiw langg u tagceh neh? Aixar! Siser venr liauw liauw! Lanw dairqex iauxquxx si bagjiux oamr :ee kacc je. Anxnix knuar, dairqex jnaixngiu mrbenw qankow e ing .did! Lanw sidjai si srid qawsi, lanw ee taukaknguaw-lai si longxx kangx kangx. Daiuann henrqimx si dirr diwsig qihngx ee sijun lar!

4. Dnaxx diyhh qinw qinw poxqib Lymaxzi!!

Sewqanx kikkig decc nguarsinx, siser ixqingx venwngua liauw, jongw .si lanw Diaunn ee Vunxdyxlangg, hniadi-jixmue, iauxquxx si jiauww qu kuanw, be tangx ingr siser. Jex si in'ui srid qauwiok byy hagbun soxx drir :ee; lanw ixqingx bingvik liauw. Dnaxx lanw diyhh qnuaxqinw laii jinwhingx lanw ee qauwiok. Lun jitt hxang qauwiok ee dairjir, m si jit sii jit kig soxx jyr e tangx laii, diyh'air jin' quw ee koxsimx, jiacc jit sud aw e did qenr qonghau. Zidvunw Dewqog lingw Daii ixjingg, sriu juvangg qursig ee qauwiok bad Hanwbunn Hanwhak ee langg si byy zuarr je. Henrqimx m jaix iauxx srin u jap-bxan langg iacc byy? Guaw decc giaugii. Jurr lingw Daii ixau, Jongxdokhuw u sinx sed jingxjingw ee haghau; qaur dnaxx sriu jitt kuanw qauwiok, yc sinx hagbun ee langg, cimcenw bylun itcer sngr jairlai, iarr qnaxx byy tangx jnriu jap-bxan, jex si guaw ee cuisiongw pacsngr qnaxx byy sniu' dua jingcax. Vunxdyxlangg longxqiong u snax-vah-lak-jap-bxan langg, qinrqin jiacc cavutdyx zi-jap-bxan langg u hagbun, qiamxx m si jin' jiyw mah? Jex si simxmih guaninx neh? Jit hxang, si lanw qadi berhiauw knuar hagbun dang; jit hxang, si sethuad ee langg byy u jabhunx ee singsimx. Iauxqycc jit hxang, dyrr si beh yc hagbun ee bunzi genguw qanqer huisiongg yh did yc.

Duw diyc henrsii ee qingxhongw, cuxkir dairqex dikkag duiww qauwiok e jin' zedsimx jiacc driyc. Danrsi jit hxang bunzi qapp genguw diyhh qycc jit huanx ee dua cimsniu dua genxqiur. Daiuann qapp Diongqog ee ongxlaii dikkag beringrdid qecdng .kir, soxiw Hanwbunn si duanwduanr beringrdid vangwsag. Daiuanlangg iurr si Zidvunw ee vecsner, soxiw Zidvunw ee Qokguw iarr si dikkag diyh'air yc. Mrquxx Hanwbunn si jin' yh, Qokguw iarr si jin' lann, qycjaiww jitt nng langg qapp Daiuanue longxx si byy quanhe. Jit xee langg beh siyxkuaw jingtongx jitt nng kuanw genguw bunzi, jiwjiyw diyh'air jap nii ee qanghux; tangx qongw si jin' dang ee dnawtauu. Siauwlenn ginxaw jurr sewhanr yc kiw, dyrr u ngwbang e singqongx; henrsii m bad zri ee duarlangg beh laii yc, pacsngr yc qaur siw iarr qnaxx si be jniaa.

Henrqimx dirr lanw Daiuann ingqaix kir haghau tagceh ee siauwlenn ginxaw, vingqinx jit-vah langg diongx jiacc snax-jap-snax langg kir tagceh; aurciuw lak-jap-cid langg si diyhh jyr byy hagbun ee kasiaur. Tangx jaix, henrqimx dirr Daiuann ee ginxaw snax hxun nng si iauxx byy haghau tangx tagceh, qiamxx m si jin' kyxlinn mah? Narr qongxx qaur zi-jap huer, snax-jap huer, ixsiong ee davox jabow, byy qihue tangx jiapqin haghau :ee si muaw siwqer. Jiaxee zi~snax-jap huer ixsiong ee langg, jniawjniar si decc qing'ingg henrqimx ee Daiuann. Jiaxee m bad hagbun m bad dairjir, Daiuann beh tacc e nguarsinx jinwvo? Acc jitt jun ee siauwlenn ginxaw si au dai beh qing'ingg Daiuann ee zinjaii, jiaxee jitt jun byy haghau tangx tagceh, aurlaii beh tacc u loring? Anxnix Daiuann beh tacc u hiongwsiong ee zit, lanw beh tacc u cuttautnix ee sii? Qaur jiax sngr si juiw qik qaur pnirkangx-kauw, lanw byy zinrjinx laii sethuad jnaixngiu e ing .did?

Jitt xee bunrdee guaw jurr jap gua nii jingg dyrr u sewser sniu quer liauw. Jiauww guaw ee soxx sniu, guaw sinr qongxx, narr m si qinw qinw poxqip Lymaxzi si byy venr. Dairjingr snax nii ee nii-buew, Vanxhuann Vikjiog dui' Dangqniax laii lanw Daiuann, qapp Limm Henwdongg Sensnex ixgua jin' je langg, hiablik beh congwsed Donghuawhue ee sii, guaw dirr hitt sii dyrr u duiww inx qenwgi diyhh caixiong Lymaxzi. Hitt sii inx duiww guaw qongw, "Jongxdokhuw qapp jin' je Luerderlangg duiww jitt xee hue vutjiw dua huanxduir; jimxmaw narr qongw beh poxqip Lymaxzi, tangx ciokjinr Daiuann ee qauwiok, qniax liauw e qyckacc huanxduir." Jiauww inx dairqex hitt sii ee iwsur, si qongxx sed Donghuawhue si beh hro Vunxdyxlangg donghuar qapp Luerderlangg siangrkuanw, soxiw dairqex diyhh zedsimx yc Qokguw jiacc hyw: jimxmaw narr si laii qar Lymaxzi, beh ing Daiuanue laii qar Vunxdyxlangg ee hagbun, Jongxdokhuw dikkag e qongw, jex si beh qiyr Vunxdyxlangg duiww Qokguw naxx byy zedsimx, naxx qapp Luerderlangg lirkuix, soxiw Jongxdokhuw dikkag e qyckacc huanxduir.

Hitt sii guaw u siongser venrbingg hro inx tniax, jongw .si dy' bycaiw qangx. Jiauww guaw hitt sii soxx sniu, Vunxdyxlangg qapp Luerderlangg huawjyr siysiangrkuanw si hyw, jongw .si byy dikkag Vunxdyxlangg longxx diyhh huar jiurqin Luerderlangg. Vunxdyxlangg u pnaiw :ee huar jiurqin Luerderlangg ee hyw, jex si e ing .did; mrquxx Vunxdyxlangg u hyw :ee iarr diyhh huar kir jiurqin Luerderlangg ee pnaiw :ee, jex si duanwduanr be ing .did. Vutqyr u hyw snaqab yc, u pnaiw snaqab druu; dairqex longxx laii snaqab vniwjyr hyw, jex jiacc si jinjniar ee donghuar. Soxiw dairqex diyh'air dairsingx erhiauw hyw-pnaiw si simxmic, dairsingx u siangrkuanw ee diwsig si iauwqinw. Dairqex zedsimx yc Qokguw iarr si hyw, mrquxx qiyr henrsii zi~snax-jap huer ixsiong ee langg diyhh singx yc Qokguw, zen'au dui' Qokguw jiacc laii yc diwsig, anxnix si byy ngwbang ee dairjir. Hiaxee langg qaur sii pacsngr Qokguw iarr si yc be jniaa. Soxiw dikkag diyhh qinw qinw singx qar Lymaxzi jiacc driyc. Jex si guaw hitt sii ee iwqenr. Hitt sii Donghuawhue ee Qanwvo Limm Henwdongg Sensnix inx hiaxee juxnauw ee langg laii Dailamm, Dailamm Ci ee langg dirr sinx kiw ee dairbuxdaii qra inx kuix Huanginghue, guaw hitt sii iarr u dirr hiax qongw jitt kuanw iwbi ee ue. Debak guaw iauxx e qir .did, si "Donghuar ee jinx iwgi qapp lanw ee junxvi." Dyrr si henrsii guaw iarr si jitt kuanw ee iwqenr. Quanhe jitt jann Lymaxzi ee bunrdee, jitt jap gua nii laii vutsii dy' diauu dirr guaw ee simlai, duiww jitt jann guaw iarr qongw jin' je ue liauw. Jongw .si gorqaiw guaw ee jinx ir, qapp u jit vorhun m air Vunxdyxlangg gauu ee langg, vutjiw dua dua ciangr huanxduir, qongw pnaiw ue. Suizenn si anxnix, jinx qimx si duanwzenn m qniax huew, jinliw si hro langg be bet .did. Qinrlaii qnuabinn ee diongqanx, duiww jitt jann diyhh iauwqinw poxqip Lymaxzi ee dairjir jiamrjiam u decc knuawdang. Tniax qnir qongxx Qingxcatqnuax ee Lenrsibsow ixqingx u caixiong Lymaxzi decc yc Daiuanue. Acc Siyxhaghau iarr ixqingx u decc qar Daiuanue, iarr si jiamrjiam e caixiong Lymaxzi. Jex si jin' tangx hnuahiw ee kinghiongr.

Dairqex diyhh qnuaxqinw laii yc Lymaxzi. Lanw narr longxx bad Lymaxzi lanw e tangx did diyc jerje ee venrgii, vutlun Luerderlangg iacc si Vunxdyxlangg, bylun davox jabow, duarlangg iacc si ginxaw, u hagbun iacc si byy :ee. Guanlaii genguw bunzi si diwsig ee cngkor, acc si langg ee simqnuax beh sna' qauvuee ee mnglo. Mrquxx genguw si ing snia'imx viauxhen; snia'imx si hiangw byy zuarr hng, qycjaiww jit vaiw dyrr siaubyy .kir, soxiw langg qongw ee ue be tangx hro jin' je langg jyr jit vaiw tniax, iarr be tangx jiong' soxx qongw ee ue lauu lehh hro au-laii ee langg jai'ngiaw. In'ui rair vow jitt kuanw ee kuatham, soxiw jiacc u jewding bunzi, jiong' langg soxx beh qongw ee genguw ing bunzi viauxhen, siaw diamr juaw ee binrdingw, jiauww hitt dniux juaxbin soxx siaw ee kuanw causiaw, iacc si iong qikir inr, dyrr e tangx did c.-cingban-b. dniux siangrkuanw ee bunzi, jiong' hiaxee qiar hro langg, suisi qyckacc je qyckacc hng ee langg, dy' e tangx jiong' lanw soxx air qongw ee simsux tuann hro inx jaix. M na anxnix, soxx inr hiaxee juaw qra ix qab qui' vunw(dyrr si ceh), siux hyw kiw laii kngr, suisi kacc quw ee aursewdairlangg, iarr si e tangx hro inx jaix lanw ee soxx sniu.

Tangx jaix u genguw iarr diyhh u bunzi, jiacc e did jiong' langg ee simsux tuanvor qaur dirr kuah kuah ee soxjai, quw quw ee diongqanx. Acc langg qapp langg ee qauvuee, jiacc e tangx zuxx cinbit zuxx kuikuah. Sewqair-diongx bunbingg ee langg, u genguw dikkag iarr u bunzi. Iaxbanlangg qanda' u genguw byy bunzi, soxiw inx be tangx jiong' qadi ee simsux tuann hro au-laii ee langg jaix, acc qadi iarr be tangx jai'ngiaw ixjingg ee langg ee iwqenr. Jongw qongw inx si byy hagbun, vutsii qadi sniu qadi bad nardnia, be tangx bad kacc je, vutsii be jinwvo, vutsii dy' iaxbann. Lanw ee Daiuanue vunxlaii si qapp Diongqok'ue siangrkuanw, vnevnee si iong Hanwzi, in'ui lanw quxnii vangwsag hagbun, lanw ee ue suar qapp Hanwzi sna' lirkuix, Daiuanue suar decbeh vniwjniaa jit jxingw byy bunzi ee genguw. Jex si jin' tangx qamxtanr qenwsiaur ee dairjir, drir qaur jionglaii Luerderlangg beh yc Daiuanue diyhh qanda' iong cuir vnuaa, Vuxndyxlangg beh yc Qokguw acc si Hanwbunn, iarr diyhh vutsii qin sensnex, be tangx dui' ceh laii qadi yc, si jin' dua huiwkir. Hyw qaijair! U jit jxingw Lymaxzi tangx vangjan lanw. Lanw narr jiong' jiaxee Lymaxzi yc liauw longxx erhiauw iong ee sii, beh yc Qokguw, Hanwbunn ee langg mrbenw sensnex, qanda' knuar ceh dyrr e tangx qadi yc. Qex jin' singw vunw qycc singw qangx. Qycc jit hxang jueww hyw :ee, dyrr si iauxx m bad Qokguw iacc si Hanwbunn ee langg, e tangx dui' Lymaxzi laii bad jin' je ee diwsig, jin' kuah ee hagbun. Acc duiww vadd jxingw ee bunzi ixqingx u did diyc siongdongx ee hagbun ee langg, iarr e tangx ing jitt hxang Lymaxzi huatviauw ix ee genxqiur hro longxjongw ee hniadi-jixmue jaix; id .laii e tangx lirig dairqex; zi .laii, ix qadi ee taunauw iarr e kacc uahdang. Dui' anxnix, lanw Daiuann ee qauwhuar dikkag e dua jinwhingx, jingwlangg ee jingsinn dikkag e kacc jiog, kacc hiongwsiong. Daiuann dui' anxnix, dikkag e qetnix dua dua ee jinwvo.

Dairqex ixqingx bad Lymaxzi ee led'ui, guaw sinr led'ui iarr si sisii decc kuawsimx Daiuann ee jinwvo, soxiw cimx cimx qiguan qapp dairqex hap kuiwlat, mizit zinrjinx poxqip Lymaxzi. Lanw dairqex narr m si qinw qinw singx laii bad jitt zi-jap-sir zri ee Lymaxzi, Daiuann si dikkag jinjniar yh did qiur. Daiuann henrqimx si dirr diwsig dua qihngx ee sidai, dairqex ee taukaknguaw ixqingx kangx kangx, gy qaur beh dyw .lyc .kir, lanw dnaxx diyhh qinw qinw dairsingx laii kuix jitt xee Lymaxzi ee cngkowmngg, jitt qingx kacc hyw kuix. Lanw iaugy liauw byy lat, vadd qingx cngkowmngg si kuix be laii, diyhh duiww jitt qingx singx kuix, lanw e taunauw jiacc e did diyc damrvyc vaxdni. Dui' anxnix, lanw dyrr e tangx jiktiog siasiauw ee kuiwlat, tangx qycc laii kuix Qokguw ee cngkor, Hanwbunn ee cngkor, acc si Ingguw, ixqip qitnax jiongxjiongw guarqok'ue ee cngkowmngg. Led'ui dongvaux! Lanw diyhh qinw qinw laii yc Lymaxzi, acc lanw jerje langg diyhh iong Lymaxzi laii siaw jerje ee hyw ceh, hro lanw jerje ee hniadi-jixmue tak; hro inx tangx rix hyw inx ee jingsinn ee iaugy. Narr si anxnix, Daiuann dyrr e hiongwsiong, Daiuann dyrr e nguarsinx, Daiuann dyrr e uac .kiw .laii!!

huedngw tauu iac