Hitt sii Quansewimx Posad an' jyrui vreh kiw, hiongr Vuddyy ee kax qnialew, suar qra Vuddyy qongw, "Sewjunx, sniu kiw quewkir bubanrsor naxx Ganges Hyy ee suax sowliong hiacc je ee qiab, dirr hitt sii u miaa qiyr juer Quansewimx ee vut dirr sewqanx cuthen. Guaw hiongr hitt xee vut huad potesimx. Hitt xee vut qar guaw an' tniax suniuu siulen laii zip samadhi. Cocox dirr tniabunn lairdew, zip juixlauu, be qir soxx laii ee soxjai. Zip .laii ee soxjai qaxx jigbet, drang qapp jing jitt nng xee siongwtew liauxqed be qycc snix. Cincniu jitt kuanw jiamrjiam jingqax, tniax qapp tniax ee soxjai longxx qaur qik. Tniax qaur qigdiamw, byy soxx cisiuw. Qakdix qapp qakdix ee qinkir kangx ar. Qakdix kangx ar, qaur qik uanbuanw. Kangx qapp kangx ee mic longxx bet. Snix-bet qaxx bet, jigbet henxhen dirr gan-jingg. Jit sijun ciauuat cutser zibser, sibhongx uanbuanw tongdat, did diyc nng jiongw digsuu busiong qingwqair. Id jiarr, hiongr quann qapp sibhongx juui vut vunxguann bibiau u qakdix ee simx habhyy, qapp Vut Zulaii vnivnii u juvix ee ligliong. Zi jiarr, hiongr xe qapp sibhongx loigdy jiongwsingx habhyy, duiww soxu jiongwsingx vnivnii linbinw."
"Sewjunx, in'ui guaw qiongqib Quanimx Zulaii, singsiu Zulaii tuann hro guaw naxx huanwqingw ee sniaimx, vuengiuw snia'imx siulen Qimqongx Vajra Samadhi, qapp Vut Zulaii vnivnii u jusen ligliong, suxx guaw singjiu snax-jap-zi huanxsingr ee sinhun laii jinwzip soxu qoktow. Sewjunx, narr juui posad zip samadhi, jinr jit vo siulen byy lrau diwhui, cutdiyh ee qenwqaiw denxhen cud uanbuanw qingwqair, guaw e henxhen vutsinx uirr inx qangxsuad jingwhuad, hro inx qaixtuad. Narr juui u siurqar :ee jigjing bibiau bingqngx, cutdiyh bibiau, henxhen cud uanbuanw qingwqair, guaw e dirr inx binrjingg henxhen dog'id qakdix ee sinhun, uirr inx qangxsuad jingwhuad, hro inx qaixtuad. Narr juui u siurqar :ee cetdng jap-zi inenn, cetdng inenn, vunxsingr drat qaur jiww quann, cutdiyh bibiau, henxhen cud uanbuanw qingwqair, guaw e dirr inx binrjingg henxhen inenn qakdix ee sinhun, uirr inx qangxsuad jingwhuad, hro inx qaixtuad. Narr juui u siurqar :ee u singjiu diyc sir xee singwder ee kongsingr, siulen dyrhing zibbet, vunxsingr cutdiyh henxhen uanbuanw ee qingwqair, guaw e dirr inx bijrjingg henxhen sniaxbunn ee sinhun, uirr inx qangxsuad jingwhuad, hro inx qaixtuad. Narr juui jiongwsingx beh simx bingvik liauxgno, byy huan diyc iogbong ee din'aix, beh sinhun cingjing, guaw e dirr inx binrjingg henxhen Brahma Ongg ee sinhun, uirr inx qangxsuad jingwhuad, hro inx qaixtuad. Narr juui jiongwsingx beh jyr tnijuw tangx tongxdi lingxdy soxu tnisinn, guaw e dirr inx binrjingg henxhen Shakra ee sinhun, uirr inx qangxsuad jingwhuad, hro inx u singjiu. Narr juui jiongwsingx beh qriuu sintew jurjai tagnx dirr sibhongx iulik, guaw dirr inx binrjingg henxhen jurjai tnix ee sinhun, uirr inx qangxsuad jingwhuad, hro inx u singjiu. Narr juui jiongwsingx beh qriuu sinhun jurjai tangx dirr hukongx vuex, guaw e dirr inx binrjingg henxhen dua jurjai tnix ee sinhun, uirr inx qangxsuad jingwhuad, hro inx u singjiu. Narr juui jiongwsingx air tongxhad quixsinn, qiuwjo vyxho qoktow, guaw e dirr inx binrjingg henxhen tnix dua jiongxqunx ee sinhun, uirr inx qangxsuad jingwhuad, hro inx u singjiu. Narr juui jiongwsingx air tongxhad sewqair, vyxho jiongwsingx, guaw e dirr inx binrjingg henxhen sir tni'ongg ee sinhun, uirr inx qangxsuad jingwhuad, hro inx u singjiu. Narr juui jiongwsingx air uac dirr tnidingw soxjai, kudiok saixpair quixsinn, guaw e dirr inx binrjingg henxhen sir tniqog taiwjuw ee sinhun, uirr inx qangxsuad jingwhuad, hro inx u singjiu. Narr juui jiongwsingx air dirr zinqangx jyr ongg, guaw e dirr inx binrjingg henxhen zinqanx ongg ee sinhun, uirr inx qangxsuad jingwhuad, hro inx u singjiu. Narr juui jiongwsingx air jyr jongjok ee tauu, air sewqanlangg qra jongvair junqingr, guaw e dirr inx binrjingg henxhen diongxjiaw ee sinhun, uirr inx qangxsuad jingwhuad, hro inx u singjiu. Narr juui jiongwsingx air damlun cutmiaa ee quwdau, air cingjing qaqi druar, guaw e dirr inx binrjingg henxhen qusu ee sinhun, uirr inx qangxsuad jingwhuad, hro inx u singjiu. Narr juui jiongwsingx air dirliw qoktow, air huntiah caiduanr qog-lai ee surbu, guaw e dirr inx binrjingg henxhen jaixsiongr ee sinhun, uirr inx qangxsuad jingwhuad, hro inx u singjiu. Narr juui jiongwsingx hnor qokk jiongw qewsngr, qisut, hnor siuxho jurue, guaw e dirr inx binrjingg henxhen brahman ee sinhun, uirr inx qangxsuad jingwhuad, hro inx u singjiu. Narr u javolangg air beh cutqex, u cisiuw soxu qaiwlut, guaw e dirr inx binrjingg henxhen bikiu ee sinhun, uirr inx qangxsuad jingwhuad, hro inx u singjiu. Narr u jaboxlangg air beh cutqex, u cijiuw soxu qimwqair, guaw e dirr inx binrjingg henxhen biksuni ee sinhun, uirr inx qangxsuad jingwhuad, hro inx u singjiu. Narr u javoalngg hnuahiw cisiuw go xee qaiwlut, guaw dirr inx binrjingg henxhen upasaka ee sinhun, uirr inx qangxsuad jingwhuad, hro inx u singjiu. Narr u jaboxlangg qaqi cisiuw go xee qaiwlut, guaw e dirr inx binrjingg henxhen upasika ee sinhun, uirr inx qangxsuad jingwhuad, hro inx u singjiu. Narr u jaboxlangg air beh huadlyc qalairsu, hro qadingg qokqax u anding, guaw e dirr inx binrjingg henxhen luxjuxlangg ee sinhun, qokhuzinn, quiwhuzinn, iacc jabow sensnix, uirr inx qangxsuad jingwhuad, hro inx u singjiu. Narr u jiongwsingx beh siuw dongsinx, guaw e dirr inx binrjingg henxhen dongsinx ee sinhun, uirr inx qangxsuad jingwhuad, hro inx u singjiu. Narr u jairsikluw hnuahiw beh siuw dongsinx, byy beh sriu cimhuan qiongvy, guaw e dirr inx binrjingg henxhen jairsikluw ee sinhun, uirr inx qangxsuad jingwhuad, hro inx u singjiu. Narr u jiongww tnisinn hnuahiw qra tenlunn vangr li, guaw e henxhen tnix ee sinhun uirr ix qangxsuad jingwhuad, hro inx u singjiu. Narr junw u lringg hnuahiw tiaur cud lringg ee lunliw, guaw e henxhen lringg ee srinx uirr inx qangxsuad jingwhuad, hro inx u singjiu. Narr yaksha hnuahiw ciautuad vunxsingr ee lunsiongg, guaw e dirr inx binrjingg henxhen yaksha ee sinhun, uirr inx qangxsuad jingwhuad, hro inx u singjiu. Narr gandharva hnuahiw tuatli lunsiongg, guaw e dirr inx binrjingg henxhen gandharva ee sinhun, uirr inx qangxsuad jingwhuad, hro inx u singjiu. Narr asura hnuahiw beh tuatli lunsiongg, guaw e dirr inx binrjingg henxhen asura ee sinhun, uirr inx qangxsuad jingwhuad, hro inx u singjiu. Narr kimnara hnuahiw tuatli lunsiongg, guaw dirr inx binrjingg henxhen kimnara ee sinhun, uirr inx qangxsuad jingwhuad, hro inx u singjiu. Narr mahoraga hnuahiw tuatli lunsiongg, guaw dirr inx binrjingg henxhen mahoraga ee sinhun, uirr inx qangxsuad jingwhuad, hro inx u singjiu.Narr juui jiongwsingx hnuahiw juer langg laii siuhing, guaw e henxhen langg ee sinhun uirr inx qangxsuad jingwhuad, hro inx u singjiu. Narr hiaxee m si langg, u hxingg iacc byy hxingg :ee, e sniu iacc be sniu :ee, inx hnuahiw ciautuad inx ee lunsiongg, guaw e dirr inx binrjingg henxhen inx qokved sinhun uirr inx qangxsuad jingwhuad, hro inx u singjiu. Jex miaa qiyr juer bibiau cingjing snax-jap-zi huanxsingr tangx zip soxu qoktow, longxx ixx samadhi tniabunn siulen, byy jok'ui bibiau ee lat tagnx jurjai laii singjiu."
"Sewjunx, guaw qycc ixx jitt jiongw tniabunn siulenn, ixx Qimqongx Vajra Samadhi byy jok'uii bibiau ee lat, qapp sibhongx snax sxer liogdy ee itcer jiongwsingx u qangrkuanw ee visimx qapp giongxbong, hro juui jiongwsingx an' guaw ee srinx qapp simx did diyc jap-sir jiongw byy qnia'uir ee qongdig. Derr id jiongw, guaw byy quancad snia'imx, suacc quancad decc knuar :ee, hro hiaxee sibhongx koxnauw jiongwsingx tangx kuancad imsniax dyrr did diyc qaixtuad. Derr zi jiongw, qakdix qapp qenwsig tangx sec dywdngw, hro juui jiongwsingx setsuw ham zip dua huew, huew iarr siyx be diyc inx. Derr snax jiongw, quancad qapp tniax tangx sec dywdngw, hro juui jiongwsingx narr hro duarjuiw lrauu .kir, inx iarr be rimx .siw. Derr sir jiongw, bongrsiongw bedjuat, simx byy sniu sathai, hro juui jiongwsingx junw narr zip quixaxqog, qxuiw iarr be tangx laii siy' hai. Derr go jiongw, siulen tniabunn jniaa sniax, lak qinkir siuabet huedngw, qapp tniax .diyc ee sniax siysiang. Erdangr hro jiongwsingx beh virr hai ee limdongsii, dyx dng juer jit quec jit quec; hro vingkir naxx decc quah juiw; iarr naxx decc cuex qngsnuar, vunxsingr byy iydang. Derr lak jiongw, siulen tniabunn, jing'ingx bingqngx, huatqair venww de u qongbingg, diwsuw soxu vunxsingr oamr :ee berdangr junjai. Tangx hro jiongwsingx dirr yaksha, rakshasa, kumbhanda, pishacha, qapp putana uaw qin inx ee sii marr be hro inx knuar .diyc. Derr cid jiongw, imx ee singr juann siaubet, dngw laii quancad qapp tniax, qapp soxu ee din'aix bongrsiongw li hng hng, tangx hro jiongwsingx benw sriu diyc kaqee iacc syxlen laii sokvak. Derr veh jiongw, imx bet, tniabunn uanbuanw, siwqer snix cud juvix ee lat, tangx hro jiongwsingx qingquer hiamxlo ee sii iarr be sriu cadhuiw cniuxqiab. Derr qauw jiongw, siulen tniabunn laii qapp din'aix li hng hng, sikdinn be laii cniuxqiab, tangx hro je jiongw iogbong ee jiongwsingx qapp tam'iog li hng hng. Derr jap jiongw, sunzenn ee imx byy din'aix, qinkir ee qingwqair uanbuanw tongdat, byy sniaxmih soxx duiwingr :ee, tangx hro itcer hunwno, siuhun ee jiongwsingx qapp uanwhun li hng hng. Derr jap-id jiongw, din'aix siaubet huedngw bingqngx, huatqair ee srinx qapp simx bersux liulii, tetdew qongbingg byy jiongwgai, tangx hro itcer vunxsingr hunrdun u jiongwgai ee atyantika ingxuanw lirkuix cigaii qapp guduu. Derr jap-zi jiongw, siau'ngiuu ee hingtew qycc dngw laii tniabunn, byy dinxdang ee dyrdniuu jinwzip sewqanx, byy huixhuai ee sewqair erdangr dirr sibhongx venww muaw, qiongqib naxx biser din'aix hiacc je ee juui Vut Zulaii, dirr muixx jit xee Vut vnix:a jyr dharma ee ongjuw, tangx hro huatqair byy qniaxzii ee jiongwsingx beh qriuu javongix :ee snix cud u hog u dig, u diwhui ee lamjuw. Derr jap-snax jiongw, lak qinkir uanbuanw tongdat, qongbingg jiywqngx byy derr zi xee, vauhamm sibhongqair. Qenwlip dua ngii qniar ee kangx Zulaii Jongr, singjiab sunrsiu naxx sibhongx biser din'aix hiacc je ee Zulaii ee viwbit huatmngg, niaxsiu byy sitkiog, tangx hro huatqair byy qniaxzii ee jiongwsingx beh qriuu jaboxngix :ee snix cud duanjniar u hog u dig, qycc unziuu sunrjiongg, jiongwlangg tniawtangr qingwair ee luxjuw. Derr jap-sir jiongw, jitt xee snax-cingx daircenx sewqair u vah-ig xee zit qapp guec, henrjai druar dirr sewqanx soxu dharma ongjuw ee sowliong u cincniu lak-jap-zi diauu Ganges Hyy lairdew ee suax hiacc je. Siulen jingwhuad jyr denxhuan. Qauwhuar jiongwsingx. Hongven diwhui, duer qokvet jiongwsingx laii suxiong, muixx jit xee longxx byy qang. An' guaw soxx did .diyc ee uanbuanw tongdat guanvunw ee qinkir, huathen bibiau hni-mngg. Zen'au bibiau ee srinx qapp simx vauhamm lehh, huatqair jit siwqer longxx u. Tangx hro cisiuw guaw miahy ee jiongwsingx qapp hiaxee cisiuw lak-jap-zi diauu Ganges Hyy lairdew ee suax ee sowliong hiacc je ee dharma ongjuw, inx jitt nng xee ee hokdig qangrkuanw, longxx byy jingcax. Sewjunx, guaw jitt xee miahy qapp hiaxee jerje miahy vingrr byy jingcax. An' guaw siulen did diyc jinsit uanbuanw tongdat, miaa qiyr juer jap-sir jiongw byy qnia'uir ee lat, hokkir jiujir tangx sisiar hro jiongwsingx."
"Sewjunx, guaw qycc u did diyc uanbuanw tongdat. Siulen busiong dyrhing u did diyc jingwbingg ee enqor, qycc tangx jiaujngg did diyc sir xee vutkyw sugi byy jok'uii ee bibiau qongdig. Derr id jiongw, guaw cocox did diyc bibiau ee tniax-simx, simx jingbiau qra tniax vangr li. Qenwbunn qakdix berdangr hunquah, jniaa jyr jit xee uanbuanw tangx ionglap cingjing ee vyxquir qakdix. Jex diwsuw guaw tangx henxhen jerje jiongw qibiau ee iongmau; erdangr qongw viwbit ee sinbiau jiuwgiw byy dixjiw. Qidiongx ursii henxhen jit xee tauu, snax xee tauu, go xee tauu, cid xee tauu, qauw xee tauu, iacc jap-id xee tauu. Jiauww jitt kuanw simrjiww qaur jit-vah kxongr veh xee tauu, cingx xee tauu, bxan xee tauu, iacc veh-bxan sir-cingx vajra ee tauu. Ursii u nng qix ciuw, sir qix ciuw, lak qix ciuw, veh qix ciuw, jap qix ciuw, jap-zi qix ciuw, jap-sir, jap-lak, jap-veh, zi-jap jiww zi-sir. Jiauww jitt kuanw simrjiww qaur jit-vah kxongr veh qix ciuw, cingx qix ciuw, bxan qix ciuw, iacc veh-bxan sir-cingx qix mudra ee ciuw. Ursii u nng luiw bagjiux, snax luiw bagjiux, sir luiw bagjiux. Jiauww jitt kuanw simrjiww qaur jit-vah kxongr veh luiw bagjiux, cingx luiw bagjiux, bxan luiw bagjiux, iacc veh-bxan sir-cingx cingjing vyxquir ee bagjiux. Uree juvix, uree uigiamm. Ursii dniardiyc, ursii u diwhui. Qiuwjo qapp vyxho jiongwsingx hro inx did diyc dua jurjai. Derr zi jiongw, guaw an' tniax qapp sniu laii tuatli liogdinn. Naxx snia'imx quer cniuviah qangrkuanw, berdangr qra joxgai. Soxiw guaw ee bibiau tangx henr cud jiongxjiongw ee siongwtew, tangx liam jiongxjiongw jiuwgiw. Jiaxee siongwtew qapp jiuwgiw e ixx byy qnia'uir laii sisiar hro juui jiongwsingx. Jex diwsuw sibhongx naxx bibiau din'aix hiacc je ee qoktow longxx qra guaw qiyr juer sisiar byy qnia'uir :ee. Derr snax jiongw, in'ui guaw u siulen qapp hagsip guanvunw bibiau uanbuanw tongdat cingjing ee vunxqinx, soxx iulik .quer ee sewqair, longxx hro hiaxee jiongwsingx qamguan qra sinkux qapp dinquir vyxvuer vangr li laii qiucuw guaw ee linbinw. Derr sir jiongw, guaw did diyc Vudsimx, liauxted qiuwqingr jingwhuad u did diyc jingwsit, erdangr ixx jiongxjiongw dinquir vyxvuer qiongqib sibhongx Zulaii ixqip huatqair liogdy ee jiongwsingx. Inx qiucuw bow dyrr tangx did diyc bow; qiucuw qniaw dyrr tangx did diyc qniaw; qriuu samadhi dyrr tangx did diyc samadhi; qriuu dngg huewsiu dyrr tangx did diyc dngg huewsiu. Jiauww jitt kuanw simrjiww qaur qiucuw dua liappuann Nirvana, iarr tangx did diyc dua liappuann Nirvana. Vuddyy mng quanhe uanbuanw tongdat. Guaw an' hni-mngg did diyc uanbuanw huatqngx ee samadhi, simx juriuu jurjai. Duiwingr lrauu .zip ee siongwtew did diyc samadhi. Singjiu potee, jitt hxang vaii derr id."
"Sewjunx, Vut Zulaii janwtanr guaw u jiaujngg did diyc uanbuanw tongdat ee huatmngg, dirr dairhue lairdew qra guaw juer qiwzin, hro guaw Quansewimx ee miahy. In'ui guaw quancad qapp tniax diyc sibhongx uanbuanw bingqngx, soxiw Quanimx ee miaa dirr sibhongqir venwvenr."
Hitt sii Sewjunx dirr sraix-aw jyrui, an' gnoxtew qang sijun hongwsia cud vyxqngx, hng hng quanr dirr sibhongx naxx din'aix hiacc je ee Zulaii qapp dharma ongjuw ixqip juui posad ee taukag. Hiaxee juui Zulaii iarr an' gnoxtew qang sijun hongwsia cud vyxqngx, an' naxx biser din'aix hiacc je ee soxjai laii quanr dirr Vut ee taukag, iarr quanr huathue lairdew juui dua posad qapp arhat. Navoo, ciurbok, juixdii, qapp unwde longxx enxjaur cud huat'imx. Qngsnuar qaucex bersux dinquir sxix jyr ee bxang-aw. Jitt jiongw qinglik, jingwlangg m bad jingrr u, itcer dairjiongr poxpenr did diyc Qimqongx Vajra Samadhi. Hitt sii tnix lyhho. Vacvyw lenhuex, cnix :ee, ngg :ee, angg ;ee, qapp vec :ee qnaiwcah jabcyr. Sibhongx hukongx venwsingg cid jiongw vyquir ee sikcaiw. Jitt xee Saha Sewqair ee dairde qapp sanhyy jidsii longxx byy .kir ar. Qnadna' knuar diyc sibhongx naxx biser din'aix hiacc je ee qoktow ionghap venwsingg jit xee sewqair. Sunbiw janwtanr ee imquax jurzendig enxjaur.
Jurr anne Zulaii qra Manjushr Dharma Ongwjuiw qongw, "Liw dnaxx quancad jitt zi-jap-go xui (benw qycc yc) dua posat qapp arhat. Inx qokk langg decc qongw cocox singjiu dyrhing ee hongven hxuad, longxx qongw inx ee siulen si jinsit uanbuanw tongdat. Inx hiaxee siuhing, sidjai byy hyw-baiw qapp ingg-au ee jingcax. Guaw jitmaw beh hro Ananda kaigno. Jex zi-jap-go siuhing huatmngg, dycc jit xee juer qinvunw? Qycjaiww jit hxang, danw guaw zibbet liauxau, jitt xee sewqair ee jiongwsingx beh zip posad dy, beh qriuu busiong jingwdy, dycc jit xee hongven huatmngg kacc kuair did diyc singjiu?"