Timoti 1
SXINGR PAUL SIAW HRO TIMOTI EE TAUU JIT DNIUX PUEX
1 Paul juer Krist Jesus ee suwdoo, jiauww qiur lanw ee Siongrder qapp hro lanw u ngwbang ee Krist Jesus soxx bingrling :ee,
2 Siaw puex qiar hro Timoti, dyrr si dirr sinr juer guaw jinsit ee qniaw :ee: Guan liw dui' Ve Siongrder qapp lanw ee Jruw Krist Jesus did diyc undenw, linbinw, ving'anx.
3 Guaw kir Macedonia ee sii bad krngr liw iuguann druar Efesus, hro liw tangx huanhur quixnarr langg byc did tuann vadd hy ee qxaur,
4 Iarr byc did rair tniax byngiaxjiah ee ue, qapp buqiongjin ee jogpow, huanrnarr jitt hy si snix cud venrlun, m si hro Siongrder dirr sinr soxx anvaii :ee did diyc jniaa.
5 Qaiwbing ee jongjiw si zin'air, jitt xee zin'air si dui' cingkir ee simx, qapp byy tangx jikvi ee liongsimx, qapp byy qew ee sinr snix .cud.
6 U langg sitlyc jiaxee, huanxdngw ngr pupiyr ee damlun;
7 Inx rair juer qauwhuatsux, kiokk be hiauxdid qaqi soxx qongw :ee, ixqip soxx jib ee genlun si uirdiyhh simxmih.
8 Lanw jaix ludhuad si hyw, dogdok langg diyhh habhuad laii ing,
9 Iarr diyhh jaix ludhuad ee setlip m si uirdiyhh gi ee langg, si uirdiyhh vuthuad qapp byy sunrhok :ee, byy qingwkenn qapp huanrjue :ee, byy singwqed qapp cosiok :ee, pah siw ve pah siw buw :ee, taii siw langg :ee,
10 Qnia'imm :ee, hnor lamsig :ee, juer huanwsaux :ee, qongw vehcat :ee, lamrsamw jiuwjua :ee, iacc si u simxmih vadd hxang gik jingwqaur ee su,
11 Jex si jiauww dua hokkir ee Siongrder qautog guaw ingqngx ee hok'imx soxx qongw :ee.
12 Guaw qamxsia hro guaw u kuiwlat :ee, dyrr si lanw ee Jruw Krist Jesus, in'ui Ix liac guaw juer jinrdiongx, setlip guaw juer ce'ing.
13 Guaw jingg si vongwdok :ee, kunxdiok :ee, buxban :ee, danrsi guaw jitt hy soxx juer si cud dirr m jaix m sinr, jiacc did diyc linbinw.
14 Qycc lanw ee Jruw ee undenw si qik dua hongsing, hro guaw dirr Krist Jesus u sinr, u tniar ee simx.
15 U jit qxur ue tangx sinr, tangx jiaujngg jiaplap :ee, dyrr si Krist Jesus limqaur sewqanx, beh qiur u jue ee langg; qidiongx guaw si derr id pnaiw.
16 Danrsi guaw did diyc linbinw, si in'ui Jesus Krist beh dirr guaw, derr id pnaiw ee langg, henxbingg Ix itcer ee tunlunw, laii juer au .laii sinwkyr Ix did diyc ingxuac ee langg ee bongiu.
17 Guan junquir ingqngx qruix dirr be huixhuai, knuar be diyc, banrsewdai ee Ongg, dog'id ee Siongrder, qaur dairdai byy jin. Amen.
18 Guaw ee qniaw Timoti ar, guaw jiauww jingg soxx lun qaur liw ee camwgiw, jiong' jitt xee qaiwbing qautog liw, hro liw ing jiaxee camwgiw laii jingjenr hitt xee hyw ee jingjenr;
19 Diyhh jrunn sinr qapp byy tangx jikvi ee liongsimx, u langg vangwsag jitt xee, lun qaur sinr, inx sitlyc ix, cincniu qongr puar junn jidngiu.
20 Qidiongx u Hymenaeus qapp Alesander, guaw ixqing’ jiong' inx qaux hro Satan, hro inx siurr qingxqair m tangx huixvongr.
2 Soxiw guaw soxx kuanwbenw :ee, derr id dyrr si ter jiongww langg kunxqiuu, qidyw, qiu'unx, jioksia;
2 Ter jiaxee ongg qapp longxjongw ee qnuahuw qriuu, hro lanw huanrsu qingwkenn duanjongx, tangx anzenn tiamjing laii quer zit.
3 Jex si hyw, qycc did diyc jiaplap dirr qiur lanw ee Siongrder ee binrjingg.
4 Ix air jiongww langg did diyc qiur qycc cimx jaix jinliw.
5 In'ui Siongrder si jit xee, Siongrder qapp langg ee diongqanx ee Diongvyw iarr si jit xee, dyrr si juer langg ee Krist Jesus.
6 Ix uirdiyhh jiongww langg henr vunxsinx, juer tewsiok ee qewjnii, sii qaur, beh jingwbingg .cud .laii.
7 In'ui anxnix guaw siurr setlip juer suantuann :ee, juer suwdoo, ing sinr ing jinsit juer guarvangx ee qauwsux; guaw soxx qongw si jinsit byy vehcat.
8 Soxiw guaw hibang davolangg giac kiw sxingr ee ciuw, byy siurkir byy giaugii, dagg soxjai qidyw;
9 Iarr hibang hurzinlangg dnaxvan sor sor, ing liamtiw, siuxqiw jngtna qaqi, m si ing vnrix taumng, qapp qimkir, iacc si jinjux, iacc si dadjnii ee ijniuu; si ing hyw ee soxx qniaa juer jngtna,
10 Jex si zin qaqi juer qingr Siongrder ee hurzinlangg soxx habgii :ee.
11 Hurzinlangg diyhh tiamjing, itbi hanghok laii hagsip.
12 Guaw m jrunw hurzinlnagg tuanqaur, iacc si quanxhad davolangg, dogdok diyhh tiamjing.
13 In'ui Adam dairsingx siurr jy, zen'au jiacc Eva.
14 Qycc Adam byy siurr kipenr, dogdok hurzinlangg siurr kipenr laii ham lyc jue.
15 Jongwsirr inx narr diamr dirr sinr, zin'air, qapp jniaa sxingr qiamx jetjer, ix dyrr beh dui' snix qniaw laii did qiur.
3 "Langg narr himbo qamdog ee jithun, ix si rid diyc hyw ee qangx." Jitt qxur ue si jinsit.
2 Soxiw juer qamdog :ee ingqaix diyhh byy tangx hiamm, juer jit xee hurzinlangg ee diongrhux, m tangx hnor jiuw, diyhh siuxqiw, duanjingr, hyw kuanxtai cutguarlangg, gauu qawsi;
3 Byy in'ui jiuw kiw su, byy pah langg, diyhh unziuu, byy sna' jnex, byy tamjaii;
4 Gauu jingxjee qaqi ee qrex, ing duanjongx hro qniaxzii sunrhok.
5 In'ui langg narr be hiauxdid jingxjee qaqi ee qrex, beh jnaixngiu jiauwqor Siongrder ee qauwhue ar?
6 Duxaxx zip qxaur :ee, m tangx hro ix juer qamdog, qniax ix e qaqi pinxpongw, laii ham lyc dirr moquiw soxx sriu ee simxpnuar.
7 Qycc dirr qauwhue gua diyhh u hyw miasniax, qniax e duw diyc langg ee luexme, ham lyc moquiw ee uahdauh.
8 Anxnix juer jipsu :ee iarr diyhh duanjongx, byy nng ngiu ue, byy air limx jerje jiuw, byy tamx vutgi ee jnii,
9 Diyhh jrunn cingkir ee liongsimx, qowsiuw sinwdy ee ywbiau.
10 Cincniu jitt hy langg diyhh dairsingx ciwgiam ix; narr byy tangx hiamm, jiacc tangx hro inx juer jipsu.
11 Anxnix hurzinlangg iarr diyhh duanjongx, byy huixvongr, byy hnor jiuw, huanrsu diongsinr.
12 Jipsu diyhh juer jit xee hurzinlangg ee diongrhux, gauu jingxjee inx ee qniaxzii qapp qaqi ee qrex.
13 In'ui gauu juer jipsu :ee, qaqi did diyc hyw ee derui, qycc dirr Krist Jesus ee dyrliw u dua dua hyxdnaw.
14 Guaw siaw jiaxee hro liw, si ngwbang vunxsinx qinw qinw qaur liw hiax;
15 Setsuw narr encenn, iarr hro liw tangx jaix ingqaix diyhh jnaixngiu dirr Siongrder ee cur qniaa, dyrr si jin'uac Siongrder ee qauwhue, jinliw ee tiaurjiyc qapp derqix.
16 Dua ar, qingwkenn ee ywbiau, byy langg byy liac juer driyc; dyrr si Ix henxhen dirr ziogtew, dirr sinn cxingx juer gi, cuthen dirr tnisair jingg, dirr guarvangx virr suantuann, dirr sewqanx hro langg sinr, virr jiaplap dirr ingqngx.
4 Singwsinn bingg qongw, dirr au .laii ee siqii, beh u langg vuerbiu sinr, iwhiongr hiaxee behik langg ee sinn, qapp qxuiw ee qawsi,
2 Dui' vehcadlangg ee qew hyw, inx ee liongsimx cincniu hro zet ee tih qur .diyc,
3 Qimwjiw qewcua, qimwqair jiahmic, dyrr si Siongrder soxx congwjy, hro sinr laii bingvik jinliw ee langg ing jioksia laii hiongxsiu :ee.
4 In'ui Siongrder soxx congwjy ee mic longxx si hyw, narr jioksia laii niaxsiu ix, dyrr byy jit hxang tangx kiwsag.
5 In'ui dui' Siongrder ee ue, qapp langg ee qidyw, dyrr longxx jniaa sxingr.
6 Narr jiong' jiaxee su diamw cnew hniadi, dyrr liw beh juer Krist Jesus hyw ee ce'ing, ing sinwdoo ee ue qapp liw soxx sunrtanr hyw ee qawsi ee ue laii did diyc vue'ngiuw.
7 Diyhh kiwsag cosiok ee ue qapp lau hurzinlangg ee pnawqow, qycc diyhh qaqi lenrsip qaur dirr qingwkenn.
8 In'ui lenrsip sinkux, hitt xee lirig si siyxkuaw; narr si qingwkenn dyrr huanrsu u lirig; in'ui u henrsii qapp jionglaii uahmia ee ingwunw.
9 Jitt qxur ue si tangx sinr, tangx jiaujngg jiaplap :ee.
10 Lanw diyhbuaa cud lat si uirdiyhh jitt xee, in'ui lanw ee ngwbang jairdirr jin'uac ee Siongrder, Ix si jiongww langg ee Qiuwjuw, duiww jiaxee sinr ee langg qyckacc si.
11 Jiaxee su liw diyhh bingrling, qycc laii qawsi.
12 Byc did in'ui liw ee siauwlenn hro langg knuawkinx; diyhh dirr qongxue, dirr qniajuer, dirr zin'air, dirr sinr, dirr cingkir, juer sinr ee langg ee bongiu.
13 Diyhh diwir tagceh, kuanwbenw qawsi, itdit qaur guaw laii.
14 Liw simlai ee unsur, dui' sendix ee ue qapp jiongww dniuxlyw hnua ciuw laii hro liw :ee, liw m tangx hutliok.
15 Liw diyhh diwir juansimx dirr jiaxee su, hro liw ee jinwvo henxbingg dirr jiongww langg.
16 Diyhh qinxsin liw vunxsinx ixqip liw ee qawsi, siongsiongg quansimx dirr jiaxee su; in'ui anxnxi qniaa, dyrr beh qiur liw vunxsinx qapp tniax liw ee langg.
5 Byc did jikvi laurlangg, diyhh krngr ix cincniu laurve; krngr siauwlenlangg cincniu hniadi;
2 Krngr lau hurzinlangg cincniu laurbuw; krngr siauwlenn hurzinlangg cincniu jixbe, diyhh juanbu cingkir.
3 Jinjniar jiuxqnuaw ee qnuaxhu diyhh junqingr ix.
4 Narr jiuxqnuaw ee hurzinlangg ee qniaw iacc si sunx, inx diyhh dairsingx yc iuxhaur dirr ix qaqi ee qrex, laii vywdab inx ee sirduarlangg, in'ui jex si e did diyc jiaplap dirr Siongrder ee bingrjingg.
5 Jinjniar juer qnuaxhu byy i'uaw :ee, ix ngwbang Siongrder, mizit siongsiongg decc qiuqiyr qidyw.
6 Narr ciaciw :ee, ix suizenn uac, qisit ixqing’ siw.
7 Jiaxee su diyhh huanhur inx, hro inx byy mauving.
8 Langg narr byy qor cinlangg, simrjiww byy qor qaqi ee qrex, jex dyrr si vuerbiu dyrliw, viw m sinr ee langg qyckacc pnaiw.
9 Qnuaxhu dikkag diyhh jnriu lak-jap huer jiacc qir dirr ceh nirr, qandna' bad juer quer jit xee diongrhux ee hurzinlangg,
10 Qycc u qniaa hyw ee jingwqir, bad ngiuxci qniaxzii, jiaptai langkeh, sew singwdoo ee kax, jinxjer siurr huanrlan ee langg, tranr itcer ee hyw laii qniaa.
11 Narr siauwlenn ee qnuaxhu diyhh qra srii; in'ui inx qaur jing'iok huatdong laii gik Krist ee sii, dyrr sniu beh qer;
12 Inx vangwsag kixtauu ee sinr, dyrr siurr gixduan.
13 Qycc yc vinrdnua, quer cur quer qrex; m na vinrdnua, iarr qau ue, air cab su, qongw soxx m ingqaix qongw :ee.
14 Soxiw guaw rair siauwlenn ee qnuaxhu qycc qer, snix qniaw, liaurliw qrex, byy hro duiwdik u qihue tangx qongw pnaiw ue.
15 In'ui ixqing’ u langg uat dngw kir duer Satan.
16 Narr sinr Jruw ee hurzinlangg, ix ee qaicinx u qnuaxhu, dyrr diyhh vangjan ix, benw drir lenlui qauwhue, hro qauwhue tangx vangjan hiaxee jinjniar juer qnuaxhu :ee.
17 Gauu dirliw qauwhue ee dniuxlyw diyhh qavue junqingr ix; hiaxee diyhbuaa dirr qrangw dyrliw qapp qawsi :ee, liw qyckacc diyhh anxnix.
18 In'ui Singwqingx qongw, "Bry gnoxqog ee guu, byc did langw ix ee cuir." Qycc, "Juer qangx :ee kamx did siurr ix ee qangjnii."
19 U qryr dniuxlyw :ee, narr m si u nng~snax xee juer qanjingr, dyrr byc did jiaplap.
20 Huanrjuer :ee diyhh dng' jiongww langg ee binrjingg jikvi inx, hro qi'uu :ee iarr tangx qniahniaa.
21 Guaw dirr Siongrder qapp Krist Jesus ixqip siurr qingw ee tnisair ee binrjingg bingrling liw, diyhh siuw jiaxee su, byc did qowjib soxx cunn ee iwqenr, qniaa dairjir byc did pensux.
22 Byc did qnuaxqinw qra langg hnua ciuw, iarr byc did u hxun dirr vadd langg ee jue; qaqi diyhh qor cingkir.
23 In'ui liw ee vi'ui, qapp liw ee qau puawvni ee enqor, byc did qycc qandna' limx juiw, diyhh ing damrvyc jiuw.
24 U langg inx ee jue lorhen, juer taujingg siurr simxpnuar; uree inx ee jue si duer dirr aurbin :ee.
25 Cincniu anxnix, hyw ee soxx qniaa iarr u henxbingg :ee; hiaxee byy henxbingg :ee iarr kamr be bat.
6 Qniwnarr dirr langg ee hat'e juer lovok :ee, diyhh knuar qaqi ee juxlangg kamx did siurr jiaujngg ee junqingr, benw did Siongrder ee miaa qapp dyrliw duw diyc huixvongr.
2 Setsuw ix ee juxlangg si sinr dyrliw :ee, dyrr m tangx in'ui ix si hniadi laii knuawkinx ix; huanxdngw qyckacc diyhh hogsai ix, in'ui siurr lirig :ee dyrr si sinr qapp did diyc tniar :ee. Liw diyhh ing jiaxee qawsi laii koxkngr inx.
3 Narr u langg tuann vadd ngiu ee qxaur, byy sunrhok lanw Jruw Jesus Krist duanjingr ee ue, qapp jiauww qingwkenn ee qauwhunr :ee,
4 Ix si qaqi pongwhongx, m jaix vnuar hxang, u hnor venrlun qapp snajni'ue ee verving; dui' anxnix dyrr snix kiw uanwdor, sna' jnex, huixvongr, pnaiw liamrtauu,
5 Ixqip simjir vairhuai songwsid jinliw ee langg ee uanqex; inx liac qingwkenn juer lirlo.
6 Narr qingwkenn qiamx dijiog dyrr si dua lirlo.
7 In'ui lanw cutsir byy duar simxmih laii, quewsir iarr be e duar simxmih kir.
8 Narr si u tangx jiahcing, lanw dyrr beh dijiog.
9 Dogdok hiaxee sniu beh huatjaii :ee, dyrr ham lyc behik qapp lybang, ixqip jerje gong gong u sunxhai ee su'iok, dyrr si hro langg dimm lyc dirr vairhuai qapp bedbyy :ee.
10 In'ui tamjaii si banrog ee qinguann; u langg luanbo ix, dyrr siurr behik laii lirkuix dyrliw, ing jerje qankow qaqi ciwcak.
11 Dogdok liw, sriok Siongrder ee langg ar, diyhh siamxvi jiaxee, laii duizib gi, qingwkenn, sinr, zin'air, tunlunw, qapp unziuu.
12 Diyhh uirr sinr ee hyw laii jingjenr, jiong' ingxuac knii diauu diauu, liw ee siurr driaur dyrr si uirdiyhh jitt xee; qycc iarr bad singzin hyw ee jiwguan dirr jerje qanjingr ee langg ee binrjingg.
13 Guaw dirr sniuxsur uahmia hro bangrhangru ee Siongrder ee binrjingg, ixqip duiww Pontius Pilate juer hyw ee qanjingr ee Krist Jesus ee binrjingg huanhur liw,
14 Diyhh siuw jitt xee bingrling, byy hacuu, byy tangx hiamm, qaur lanw ee Jruw Jesus Krist ee henxhen.
15 Qaur qrii, dua hokkir, dog'id u quanlingg, banrongg ee Ongg, banrjuw ee Jruw,
16 Dyrr si dog'id be siw, diamr dirr be tangx qinruaw ee qngx, langg soxx m bad knuar .qnir, iarr be e knuar .qnir .ee, beh qra Ix henxbingg .cud .laii; guan junquir qapp ingxuanw ee quanser qruix dirr Ix. Amen.
17 Qimser hyxgiac ee langg, liw diyhh huanhur inx, simjir byc did jurqyx, byc did he inx ee ngwbang dirr byy dniardiyc ee jnijaii, diyhh he dirr jiong' banrmic muaw muaw hro lanw hiongxsiu ee Siongrder;
18 Qycc huanhur inx qniaa hyw su, dirr soxx qniaa ee hyw hyxgiac, hnuahiw jinxjer, qamguan vunx hro langg,
19 Uirdiyhh qaqi jikju hyw ee derqix, virvan au .laii ee su, hro inx knii diauu jinx ee uahmia.
20 Timoti ar, soxx qautog liw :ee, liw diyhh vyxsiuw ix, lirkuix u miaa byy sit ee diwhui jiaxee cosiok ee husuu, qapp sna' vixqaur ee venrlun.
21 U langg jurcingx u jitt hy diwhui, dyrr ixqing’ cabiu dyrliw ar. Guan undenw qapp liw dilehh.