Bang Jap Xia

(夢十夜)

derr cid xia

(第七夜)

Lu Juxbingg huan'ik

Zuarr nirr raw dua jiah ee junn, guaw jre dirr lairdew. Jitt jiah junn dagg qangx dagg amr longxx byy jit sxx aw tingkunr, itdit tror cud ox enx, ced quer haixingw, hiongr taujingg qniaa .kir, qycc huad cud jiokk dua ee sniaimx. Mrqycc byy langg jaix ix beh qniaa anww dyhh .kir.

Qandna’ knuar diyc zidtauu cniu vuu angg ee huexdi ui’ haixingw erdew vreh .kiw .laii, qniaa qaur masto jniar dingxquann tingg diauu lehh. Qycc m jaix dirsii dyrr criaux quer dua junn, jauw qaxx jiokk hng ee soxjai .kir. Qycc laii, cniu siyx angg huexdi ee zidtauu qangrkuanw dimm duiww haixingw erdew .kir. Hitt sii, an’ singkux vnix cnex sig haixingw hiongr diyc hng hng soxjai knuar .kir, dyrr knuar diyc jit pnir dua angg sig qunxqaw ee pylong, ban ban aw venr byy .kir. Iaxx lanw jitt jiah dua sniax hauw ee junn dirr aurviah pemia duix, sen’ duix marr duix be diyc.

U jit qanx, guaw qra qang junn ee jit xee javolangg lrak lehh, mng ix qongxx, “Jitt jiah junn qamxx si hiongr diyc saivingg qniaa?”

Javolangg henr cud giaugii ee binrcniux qra guaw grinn u .jit .kunr .ar, jiacc rinr qongxx, “Sniaxmic? ”

Guaw qongw, “Si in’ui junn jongxx si hiongr zidtauu dimm lyc hitt vingg itdit duix .kir .lar!” Javolangg suacc hahax dua ciyr, uat tauu jauw jyww ix lirkuix.

Jitt sii u tniax diyc habjee cniur quax ee sniax.

“Hiongr saix qniaa ee zidtauu, dangx vingg qamxx si liw ee bogpiaux? Jex si jingwqingx :ee. An’ dangx vingg cud .laii ee zidtauu, saix vingg qamxx si liw ee qowhiongx? Jex si jingwqingx :ee. Singkux qiar dirr pylong dingw, iong junvuex jyr jimxtauu. Lrauu laii jiax, lrauu kir hiax.”

Guaw qniaa qaur junn-tauu, knuar diyc qui’ dua din juixhux qab jywhuew decc giuw pangvor ee syh-aw, syh-aw-srinx jiokk cox :ee.

Jitt sijun ee guaw, simqnuatauu jiokk huanlyw :ee, junn dirsii e kyr hnua m jaix, junn beh qniaa anww dyhh kir m jaix, u dniardiyc :ee qandna’ si junn itdit tror ox enx, itdit qniaa, ced kuix haixingw itdit hiongr jingg qniaa.

Hex haixingw jit ingw qycc jit ingw, knuar qaur jiokk hng .kir, marr byy jit xee jinrvong. Jriw knuar diyc byy-ven.-byy-qair ee jit dua pxenr cnex sig, u sii aw qycc e huanw jyr jxiw sig. Junn jit qniaa dinxdang, siwkouii-aw longxx bunr cud vec sig ee juixpyx, puar .kir qycc bunr cud, puar .kir qycc bunr cud.

Guaw suacc viw guankixtauu qycc kacc huanlyw, sniu qongxx itdit qux diamr jitt jiah junn-dingw kacc sux quikir tiaur lyc haixdew siw siw kacc benw cauhuann.

Jre junn ee langkeh jin’ je, dua vorhun si guarqoklangg, jriw si sui’ langg u sui’ langg ee binrcniux.

U jit qangx, tnidingw dar diyc ox hunn, junn iyy dinxdang iyy qaxx jiokk dua lat :ee. Jit xee jaboxlangg uaw dirr lanqanx vnix, jujux decc kaur, knuar .kiw .laii jin’ siongsimx ee kuanw. Ix iong vec sig ee ciuxqinx crid bagjiux. Mrqycc ix singkux cing :ee si naxx cincniu inwhuevor ee ngiujongx. Knuar diyc jitt xee jabow ee sii, guaw jiacc diwqag diyc simqnuatauu visiongx :ee m si qandna’ guaw nia.

Qycc u jit amr, guaw qaqi jit langg laii qaur deki dingw, knuar tnicnix. Jit xee guarqoklangg laii qra guaw mng qongxx qamxx bad tenbunhak. Guaw dy’ byy ir aw byy ir, qacc si sniu beh siw ar, naxx qycc u suiaur kir bad siaxmih tenbunhak. Guaw diam diam byy qra rinr sniax. Jitt xee guarqoklangg qewsiok qongw hex Qimguqiongx ee sir liap cnxex longxx si siongrder congwjy :ee, anxjnuaw anxjnuaw, lorbuew ix qycc mng guaw u sinr siongrder bor. Guaw jriw si diam diam knuar tnidingw, byy cud sniax.

Qycc u jit qangx, guaw qniaa zip kir salong, jit xee snxax cing qaxx jiokk iamrle qyquir, kajiacpniax hiongr mngkauw ee qoniuu-aw dirr hiax dnuaa qngwkimm, vnix:a jit xee javolangg dua sniax decc cniur quax. Ix ee cuir jiokk dua :ee. Inx nng langg duiww diyc vnix:a ee dairjir longxx byy decc diwir, marr qanxnaxx m jaix inx si qapp jingwlangg qangrkuanw, si jre dirr jitt jiah m jaix beh qniaa duiww dyhh kir ee junn dingxquann.

Guaw qamxqag soxu itcer longxx qik qaiww byy bi, quatsimx beh laii siw. Mow jit amr, guaw tranr sir vingg vnix:a longxx byy langg, simqnuax liac tanxhnuaii, langg hiongr diyc haixbin tiaur .lyc .kir.

Dyrr dirr guaw kax duxx lirkuix deki, an’ junn ee singkux vnix kaisiw beh lag duiww erdew hitt sii, guaw suacc hionghiongg sniu qongxx snewmia iauxx si vyxquir :ee, m tangx laii siw, qinw dongwdiam dirr vnuawkongdiongx, mair qycc lag .lyc .kir, mrqycc longxx sniu’ ban ar. Dyrr sngr qaqi anxjnuaw m kingw, anxjnuaw qunxliongr, sniu beh byy air lag lyc kir haixdew marr byy kyxlingg. Qandna’ knuar diyc junn-srinx zuxx laii zuxx quann, guaw ee singkux li junn-dingw u jit dua quec, mrqycc kax iauxx byy hiacc qinw dyrr bag diyc juiw. Hiauhing :ee si guaw ciuw longxx byy mihqnia sax, dyrr sngr qongxx guaw qra kax qiuxuanx lehh, marr si zuxx laii zuxx uaw diyc juiw, juiw ee sikdir si ox :ee.

Sudongsii junn iuguann jiauwsiongg tror cud ox enx, itdit qniaa uiww taujingg kir. Guaw jitt jun jiacc jaingiaw, dyrr sngr liw m jaix junn beh qniaa uiww dyhh kir, liw iauxx si quaix quaix aw jre dirr junn-dingw kacc hyw.

Mrqycc liauxqaiw jitt diamw marr byy sniaw loring, py diyc buhan ee hiyrhuew qapp buhan ee kiongxvor, jing jing dimm lyc kir ox sig ee haixingw lairdew.

guanjokjiaw: Natsume Soseki 夏目漱石