Suwdoo Hingduan

1 Teofilus ar, guaw ixqing’ jiong' Jesus dui' kixtauu soxx qniaa, soxx qawsi :ee,

2 Didqaur Ix tokdiong Singwsinn bingrling soxx qingw ee suwdoo liauxau siurr jicjiab jnriu tnix ee zit, dagg hxang qiwjair dirr jingg ee ceh.

3 Ix siurr hai liauxau, bad ing jerje vinqir, dirr sir-jap zit ee diongqanx, cuthen hro suwdoo knuar .qnir, laii henxbingg Ix qaqi si uac, suar qangxlun Siongrdewqog ee su.

4 Ix qapp inx jurjip ee sii, bingrling inx qongxx, "M tangx lirkuix Jelusalem, diyhh tingwhau Ve soxx ingwunw :ee.

5 Johan ing juiw qniaa sexlew; dogdok linw, qycc byy quiw zit, beh dirr Singwsinn siurr sew."

6 Anxnix inx jurjip ee sii, inx mng Ix qongxx, "Jruw ar, Liw dirr jitt sii beh jiong' qog hogdyr hro Islael mah?"

7 Ix dyrr qra inx qongw, "Ve soxx he dirr Ix qaqi qxuann-lai ee sii qapp qrii m si linw soxx tangx jaix :ee.

8 Dogdok Singwsinn limqaur linw ee sii, linw beh did diyc jailingg; qycc dirr Jelusalem, venww Judea qapp Samalia, didqaur derqik, beh juer Guaw ee qanjingr."

9 Jiaxee ue qongw liauw, inx decc knuar ee sii, Jesus siurr quw kiw jnriu tnix, u hunn jicjiab Ix, inx dyrr knuar be qnir.

10 Ix kir ee sii, inx ngr tnix juwbak knuar, hutzenqanx u nng langg cing vec snxax, kia dirr sinvnix, qongw,

11 "Galileelangg ar, sniaw su kia lecc knuar tnix? Jitt xee Jesus lirvet linw siurr jicjiab jnriu tnix, linw knuar Ix anxnix jnriu tnix, Ix iarr beh jiauww anxnix laii."

12 Hitt sii inx dui' hitt xee miaa qiyr Qnanaw ee snuax dyr kir Jelusalem. Jitt xee snuax qin Jelusalem, sna' lirkuix u Anxhiyczit ee lorjam.

13 Inx ixqing’ zip .kir, dyrr jnriu inx soxx druar ee laudingw: u Peter, Johan, James, Andlew; Filip qapp Tomas, Bartolomew qapp Mateo; Alfaeus ee qniaw, James, qapp Zealot ee Simon, qapp James ee qniaw Judas.

14 Jiaxee langg qapp quixnarr xee hurzinlangg, ixqip Jesus ee laurbuw Malia, cam' Ix ee hniadi, longxx dangsimx juanbu qidyw.

15 Dongsii dangjee jurjip ee jiongww langg iokliok jit-vah zi-jap miaa. Peter dirr hniadi diongx kia kiw laii qongw,

16 "Hniadi ar, Singwsinn jiyh David ee cuir soxx camwgiw cua langg liac Jesus ee Judas :ee, jitt xee Singwqingx ee ue ingqaix ingwgiam.

17 In'ui ix bad qapp guanw danglet, qycc dirr jitt xee qangx iarr u hxun.

18 (Dnaxx jitt langg ing ix qniaa vutgi soxx did .diyc ee qangjnii laii brew hngg; sinkux pag .lyc .laii, vakdow viag lic, drngg-aw longxx lrauu .cud.

19 Diamr dirr Jelusalem ee langg longxx jaix, soxiw jiuaww inx ee kniukauw qiyr hitt kux hngg juer Akel Dama, dyrr si Huichngg.)

20 In'ui Sipenx qiwjair qongxx, 'Hro ix ee cur pahngx, byy langg dirr hiax kia'; qycc qongw, 'Ix ee jithun hro vadd langg damdngx.'

21 Soxiw Jruw Jesus dirr lanw diongqanx cutzip ee sii,

22 Dui' Johan qniaa sexlew kiw, qaur Jesus lirvet lanw siurr jicjiab ee zit, soxu siongsiongg qapp guanw juer pnua ee langg, dirr inx diongqanx diyhh u jit xee qapp guanw snaqab juer Ix qycc uac ee qanjingr."

23 Dui' anxnix suanw nng langg, dyrr si Josef, qiyr juer Barsabas, qycc qiyr juer Justus, qycc jit xee si Mattias.

24, 25 Inx dyrr qidyw, qongw, "Jruw ar, Liw si bad jiongww langg ee simx :ee, dirr jitt nng langg diongx jixbingg daxlyc jit langg si Liw soxx qingw :ee, laii u hxun dirr jitt xee qangx, qapp suwdoo ee jithun, dyrr si Judas soxx lirkuix beh kir ix qaqi ee soxjai :ee."

26 Dui' anxnix qra inx liamx kaux; liamx diyc Mattias. Ix dyrr qapp jap-id xee suwdoo danglet.

2 Gorsunjeh ee qrii ixqing’ qaur, inx longxx jurjip dirr jit soxjai.

2 Hutzenqanx dui' tnix u sniax, cincniu dua hongx decc cuex, ciongmuaw qui' qingx inx soxx jre :ee ee cur.

3 U hunkuix ee jic cuthen hro inx knuar .qnir, cincniu huew ee jic, hiyh dirr dagg langg ee dingxbin.

4 Inx longxx siurr Singwsinn ciongmuaw, jiacc kuix cuir qongw vadd ngiu ee kniukauw, si jiauww Singwsinn soxx sniuxsur inx qongw :ee.

5 Hitt sii u kenxsingg ee Judealangg, dui' tnie dagg qog laii :ee, druar dirr Jelusalem.

6 Jitt xee sniax jid'err kiw, jiongww langg jurjip h.-hunluan-l., in'ui dagg langg tniax qnir inx jiauww ix qaqi ee toxkniux laii qongw.

7 Inx dyrr longxx gonggniac qiquair, qongw, "Knuar, jiaxee decc qongw :ee qamxx byy itkair si Galileelangg mah?

8 Jnaixngiu lanw tniax inx qongw jiauww lanw dagg langg soxx cutsir ee toxkniux ar?

9 Lanw jiaxee Partialangg, Medialangg, Elamlangg, qapp diamr dirr Mesopotamia, Judea qapp Kapadocia, Pontus qapp Asia,

10 Flygia qapp Pamfylia, Egipt, qinruaw Kylene ee Libia, jiaxee derhngx ee langg, ixqip dui' Rloma laii :ee ee cutguarlangg, uree si Judealangg, uree si zip Judea Qxaur ee langg,

11 Kletalangg, Alabialangg, longxx tniax inx ing lanw ee kniukauw laii qongw Siongrder ee dua su."

12 Inx dyrr longxx gonggniac diuduu, snaqab qongw, "Jex simxmih iwsur?"

13 Iarr u vadd langg tixciyr inx qongxx, "Inx si limx sinx jiuw decc juir."

14 Peter qapp jap-id xee suwdoo kia lehh, dua sniax qra inx qongw, "Judealangg, qapp longxjongw kiarkiw dirr Jelusalem ee vecsnir ar, linw diyhh jaix jitt xee, iarr diyhh diwir tniax guaw ee ue.

15 Jiaxee langg m si jiuxjuir, cincniu linw soxx pacsngr :ee; in'ui jitt diap duxjiacc dingxvox qauw diamw.

16 Jex dyrr si tog sendix Joel soxx qongw :ee, qongw,

17 'Siongrder qongw: Dirr lorbuew ee sizit, Guaw beh ing Guaw ee sinn qangr lyc dirr huanrr u ziogtew :ee; linw ee haursnix, linw ee jaboxqniaw beh juer sendix qongxue; linw ee siauwlenlangg beh knuar qnir ngirsiong; linw ee laurlangg beh did diyc binbang.

18 Dirr hiaxee zit, Guaw iarr beh ing Guaw ee Sinn lramm dirr Guaw ee lovok, luxvi; inx iarr beh juer sendix laii qongw.

19 Dirr tnix dingxbin, Guaw beh henr cud qrii su; dirr de erbin, Guaw beh henr cud sinziah. U huih, huew, qapp enbu.

20 Dirr Jruw dua qycc inghenw ee zit be qaur ee dairsingx, zit beh vnir juer amr, guec beh vnir juer huih;

21 Qycc huanrnarr qiuqiyr Jruw ee miaa :ee e did diyc qiur.'

22 Islaellangg ar, diyhh tniax jiaxee ue: Nazaletlangg Jesus, Siongrder bad ing Ix dirr linw diongqanx qniaa qycngiu ee quanlingg, qrii su, qapp sinziah, laii duiww linw jingwbingg Ix, jex dyrr si linw soxx jaix :ee;

23 Ix jiauww Siongrder dniardiyc ee jixir qapp senqenr siurr qewsangr; linw jiaxee jiyh vuthuad ee langg ee ciuw qra dingr sibzirqer hai siw Ix.

24 Danrsi Siongrder tauxvangr hiaxee siw ee koxtangr, hro Ix qycc uac; jex si in'ui Ix be e hro siw soxx vexvak.

25 David u qiw Ix qongw, 'Guaw knuar Jruw siongsiongg dirr guaw ee binjingg; Ix diamr dirr guaw ee jniawvingg, hro guaw benw iydang.

26 Soxiw guaw ee simx hnuahiw, guaw ee jic kuaiwlok; qycc guaw ee ziogtew iarr beh diamr dirr ngwbang diongx.

27 In'ui Liw byy beh jiong' guaw ee linghunn vangr dirr imqanx, iarr byy beh hro Liw ee Sxingr :ee duw diyc hiuxnua.

28 Liw bad ing uahmia ee lo jixsi guaw, beh hro guaw dirr Liw ee binrjingg muaxsimx kuaiwlok.'

29 Hniadi ar, senjow David ee su guanw tangx hyxdnaw duiww linw qongw, ix ixqing’ siw qycc iarr baijongr :ar, ix ee bong qaur qinaxzit iauxx dirr lanw diongqanx.

30 Ix qiwzenn si sendix, qycc jaix Siongrder bad qapp ix jiuwjua, beh dirr ix horer diongx setlip jit langg jre ix ee jyrui.

31 Ix dairsingx knuar cud anxnix, dyrr lun Krist ee qycc uac, qongw, 'Ix ee linghunn byy vangr dirr imqanx, Ix ee ziogtew iarr byy duw diyc hiuxnua.'

32 Jitt xee Jesus, Siongrder ixqing’ hro Ix qycc uac, guanw jiaxee longxx juer Ix ee qanjingr.

33 Ix qiwzenn hro Siongrder ee jniawciuw qra Ix giac quann quann, qycc dui' Ve siurr soxx ingwunw ee Singwsinn, dyrr jiong' linw soxx knuar .qnir, soxx tniax .qnir .ee qangr lyc.

34 David m bad jnriu tnix, dogdok ix qaqi qongw, 'Jruw qra guaw qongw ee Jruw qongw: Liw jre dirr Guaw ee duarvingg,

35 Tingwhau Guaw hro Liw ee duiwdik juer liw ee kadah'iw.'

36 Anxnix Islael juann qrex diyhh kaksit jaix, jitt xee Jesus, Siongrder ixqing’ setlip Ix juer Jruw, juer Krist, dyrr si linw soxx dingr dirr sibzirqer :ee."

37 Jiongww langg tniax liauw, simlai ciwcak, duiww Peter qapp qi'uu ee suwdoo qongw, "Hniadi ar, guanw diyhh jnaixngiu juer?"

38 Peter qra inx qongw, "Linw diyhh huanxhuew, dagg langg dirr Jesus Krist ee miaa siurr sexlew, qaur hro linw ee jue siawbenw; qycc linw beh siurr Singwsinn ee sniuxsur.

39 In'ui soxx ingwunw :ee qruix dirr linw, qapp linw ee qniaxsunx, ixqip longxjongw hng hng ee langg, dyrr si qniwnarr Jruw, lanw ee Siongrder, soxx beh driaur :ee."

40 Ix qycc lingrgua ing jerje ue qanjingr, laii koxkngr inx, qongw, "Linw diyhh qiur qaqi tuatli jitt xee siaa ee sewdai."

41 Dui' anxnix jiaplap inx ee ue ee langg longxx siurr sexlew; hitt zit iokliok qetnix snax-cingx langg.

42 Inx siongsiongg juanbu suwdoo ee qawsi, snaqab qauvuee, vreh vniaw, qidyw.

43 Jiongww langg longxx qniahniaa; suwdoo qycc qniaa jerje qrii su, sinziah.

44 Sinr ee langg longxx jurjip dirr jit soxjai, soxu ee mic qongqex ing;

45 Qycc bre budsanw qegiap, jiauww dagg langg soxx kiamwing vunx hro inx. Zidzit dangsimx juanbu dirr dxen-lai, iarr dirr zinqex vreh vniaw, ing hnuahiw singsit ee simx laii jiac;

46 Ylyw Siongrder, iarr did diyc jiongww vecsnir hnuahiw inx. Jruw jiong' did qiur ee langg zidzit qetnix hro inx.

3 Snax diamw qidyw ee sii, Peter qapp Johan jnriu dxen.

2 U jit langg, dui' cutsir dyrr nngw kax, dagg zit hro langg' qrngx laii he dirr dxen ee mngkauw (dyrr si hitt xee qiyr juer Suiw ee mngg), beh qriuu zip dxen ee langg siaxsir.

3 Ix knuar qnir Peter qapp Johan decbeh zip dxen, dyrr qriuu siaxsir.

4 Peter qapp Johan juwbak knuar ix, qongw, "Knuar guanw."

5 Ix dyrr juwsinn knuar inx, ngwbang dui' inx u soxx did .diyc.

6 Danrsi Peter qongw, "Qimx, ginn guaw longxx byy; dogdok guaw soxx u :ee hro liw. Dirr Nazalet Jesus Krist ee miaa, liw kiw laii qniaa."

7 Ix dyrr kanx ix ee jniawciuw, hro ix kiw .laii. Ix ee kax qapp kabak liamvnix iongxqnia,

8 Dyrr tiaur kiw laii kia lehh, qycc qniaa, qapp inx zip dxen, iarr qniaa, iarr tiaur, iarr ylyw Siongrder.

9 Jiongww vecsnir knuar qnir ix decc qniaa, decc ylyw Siongrder,

10 Qycc zin did ix dyrr si vingsor jre dirr dxen ee Suiw Mngg decc qriuu siaxsir :ee, inx dyrr in'ui ix soxx duw .diyc ee su, muaxsimx qiquair, gonggniac.

11 Hitt langg kanx Peter qapp Johan ee sii, jiongww vecsnir dua qiquair, jidjee jauw laii dirr hitt xee miaa qiyr Solomon ee lingxlongg jiurqin inx.

12 Peter knuar .qnir, dyrr duiww vecsnir qongw, "Islaellangg ar, sniaw su liac jitt xee juer qiquair? Sniaw su juwbak knuar guanw, naxx cincniu guanw ing qaqi ee jailingg, iacc si qingwkenn hro ix qniaa?

13 Ablaham, Issac, qapp Jakob ee Siongrder, dyrr si lanw ledjow ee Siongrder, ixqing’ ingqngx Ix ee Lovok Jesus, dyrr si linw jiaxee soxx sangwqaux :ee, qycc dirr Pilate ee binrjingg, dng' ix griw beh vangr Ix ee sii, linw qycc m zin Ix.

14 Anxnix linw m zin hitt xee Sxingr qycc Gi :ee, huanxdngw qriuu ix vangr jit xee hionghuan hro linw.

15 Linw hai siw uahmia ee Zinqunx, dyrr si Siongrder dui' sixlangg diongx hro Ix qycc uac :ee, guanw jiacc e juer Ix ee qanjingr.

16 In'ui sinr Ix ee miaa, Ix ee miaa dyrr hro jitt xee linw soxx knuar, soxx bad ee langg iongxqnia; si hitt xee dui' Ix laii ee sinr hro ix dirr linw jiongww langg ee binrjingg jiaujngg hyw.

17 Hniadi ar, dnaxx guaw jaix linw anxnix qniaa si dui' m jai'ngiaw, linw ee qnuahuw iarr si anxnix.

18 Dogdok Siongrder ing jiongww sendix ee cuir camwgiw Ix ee Krist soxx beh sriu ee hai, Ix u anxnix laii qra ingwgiam.

19 Soxiw linw diyhh huanxhuew, uat dngw tauu, hro linw ee jue erdid catsiaux, hro anlok ee zidqii e dui' Jruw ee binrjingg laii;

20 Qycc Jruw beh uirdiyhh linw crex jaw ixqing’ dniardiyc hyxser ee Krist, dyrr si Jesus.

21 Tnix dikkag diyhh jiaplap Ix, qaur banrmic hogdyr ee sii, dyrr si Siongrder dui' congwser ixlaii ing Ix sxingr-sendix ee cuir soxx qongw :ee.

22 Moses bad qongw, 'Jruw Siongrder beh dirr linw hniadi ee diongqanx qra linw hingx kiw jit xee Sendix, cincniu guaw; huanrnarr Ix soxx qra linw qongw :ee, linw diyhh tniax Ix.

23 Huanrnarr m tniax jitt xee Sendix :ee, beh dui' vecsnir ee diongqanx itjin qra bet .kir.'

24 Qycc jiaxee sendix, dui' Samuel ixlaii, qniww u qongw :ee, longxx si tuanvyr jiaxee zit.

25 Linw si sendix ee qniaxsunx, singjiab Siongrder qapp linw ledjow soxx lip ee iog, dyrr si qra Ablaham qongw, 'Tnie banrjok beh dirr liw ee horer did diyc hokkir.'

26 Siongrder ixqing’ hingx kiw Ix ee Lovok Jesus, crex Ix laii dairsingx suwhog hro linw, dyrr si hro linw dagg langg uat dngw lirkuix linw ee pnaiw."

4 Inx duiww vecsnir qongxue ee sii, jiaxee jewsix qapp denrsix, ixqip Sadducelangg hutzenn qaur;

2 In'ui inx qawsi vecsnir, qycc tee kiw Jesus laii tuann dui' sixlangg diongx qycc uac ee dyrliw, dyrr dua byy hnuahiw.

3 Dui' anxnix, inx herciuw liac inx. In'ui zit amr, dyrr qra inx qnuaix dirr qnax nirr, laii tingwhau qeh zit.

4 Danrsi tniax dyrliw ee langg jerje sinr, langgiac iokliok qaur go-cingx.

5 Qeh zit, inx ee qnuahuw, dniuxlyw, qapp qinghagsu jurjip dirr Jelusalem;

6 Jewsitauu Annas dilehh, qycc u Kaiafas, Johan, qapp Alesander, ixqip huanrnarr sriok jewsitauu ee jongjok iarr dilehh.

7 Inx qiyr inx kia dirr diong'ngx, mng qongxx, "Linw ing simxmih quanlingg, ing simxmih miaa, qniaa jitt xee dairjir ar?"

8 Peter hitt sii hro Singwsinn ciongmuaw, duiww inx qongw,

9 "Vecsnir ee qnuahuw qapp dniuxlyw ar, guanw qinaxzit narr uirdiyhh qniaa dirr luanxziok ee langg ee hyw su, laii siurr simxmng knuar ix anxjnaixngiu did qiur,

10 Linw jiongww langg qapp tong' Islael vecsnir diyhh jaix, jitt langg hyw hyw kia dirr linw ee binrjingg, si in'ui ix u dirr Nazaletlangg Jesus Krist ee miaa, dyrr si linw soxx qra dingr dirr sibzirqer, Siongrder hro Ix dui' sixlangg diongx qycc uac :ee.

11 Ix dyrr si linw saihu soxx m dic ee jiyc, ixqing’ jniaa juer cuwqag ee tauu.

12 Qycc dirr vadd xui byy jinxqiur; in'ui dirr tnie, byy sniuxsur vadd xee miaa dirr langg ee diongqanx, hro lanw diamr dirr ix laii did qiur."

13 Jiongww langg knuar qnir Peter qapp Johan ee hyxdnaw, qycc jaix inx si byy hagbun ee vingsionglangg, dyrr qiquair. Inx iarr zin did inx bad duer Jesus.

14 Inx qycc knuar qnir did diyc hyw ee langg qapp inx snaqab kia lehh, dyrr be e tangx venrvog.

15 Jiacc qiyr inx cud huersow, dyrr snaqab girlun, qongw,

16 "Jiaxee langg beh jnaixngiu vran inx? Inx henxzenn qniaa sinziah, diamr dirr Jelusalem ee langg longxx jaix; lanw jiaxee berdangr qongw byy .did.

17 Uirdiyhh benw did jitt xee su ithuad vywiongg dirr vecsnir ee diongqanx, lanw diyhh hangw inx, duanrduan m tangx qycc jiong' jitt xee miaa duiww langg qongw."

18 Inx dyrr qiyr inx laii, qimwjiw inx qongxx cenban m tangx ing Jesus ee miaa laii qongw kiw, laii qawsi.

19 Danrsi Peter qapp Johan rinr qongxx, "Tniax linw kacc quewtauu tniax Siongrder, dirr Siongrder ee binrjingg habgii iacc byy, linw jiacc gixduan.

20 In'ui guanw soxx bad knuar, bad tniax :ee, berdid byy qongw."

21 Hiaxee langg in'ui vecsnir ee enqor, sniu byy vo tangx hinghuat inx, dyrr qycjaiww hangxhuah, jiacc vangr inx; jex si jiongww langg uirdiyhh inx soxx qniaa :ee, laii qruix ingqngx Siongrder.

22 Dui' sinziah did diyc rix hyw ee langg, ixqing’ sir-jap gua huer.

23 Inx ixqing’ did diyc tauxvangr, dyrr kir cue inx ee ving'iuw, jiong' jiaxee jewsitauu qapp dniuxlyw soxx qongw ee ue duiww inx qongw.

24 Inx tniax .qnir, dyrr dangsimx cud sniax duiww Siongrder qongw, "Juxjnaiw ar, Liw si congwjy tnix, de, haiw, qapp qidiongx banrmic :ee.

25 Liw bad dui' Singwsinn ing Liw ee lovok, guanw ee jow, David ee cuir, laii qongw, 'Ledvangx sniaw su dua siurkir? Qycc jiaxee vecsnir sniaw su qewboo kangx kangx ee dai?

26 Derjniu ee led'ongg jidjee kia lehh, laii duiwdik Jruw, qapp Ix ee Krist.'

27 In'ui Helod cam' Pontius Pilate, qapp guarvanglangg, ixqip Islael jiaxee vecsnir, qyxzenn jurjip dirr jitt xee sniaa, laii qongqig Liw soxx buah iuu sxingr ee Lovok Jesus,

28 Laii qniaa Liw ee ciuw, Liw ee jixsi soxx dairsingx dniardiyc itcer beh jniaa ee su.

29, 30 Dnaxx Jruw ar, diyhh qamxcad hiaxee langg ee hangxhuah, hro Liw jiaxee lovok hyxdnaw qongw Liw ee dyrliw, jiauww sii crunx Liw ee ciuw laii rix vni, hro sinziah qrii su dui' Liw sxingr ee Lovok Jesus ee miaa laii jniaa."

31 Qidyw suah, jurjip ee soxjai dua dinxdang; jiongww langg longxx siurr Singwsinn ciongmuaw, hyxdnaw qongw Siongrder ee dyrliw.

32 Sinr ee langg longxx itsimx itjir, byy langg qongw ix soxx u :ee sriok qaqi, si qongw dagg hxang mic juer qongx :ee.

33 Suwdoo ing dua quanlingg qanjingr Jruw Jesus ee qycc uac; jiongww langg iarr did diyc dua undenw.

34 Qidiongx byy kiamwkueh ee langg, in'ui qniww u canhngg cuwtec :ee, longxx qra bre .kir, duar inx soxx bre ee ginn, he dirr suwdoo ee kax-xe,

35 Jiauww dagg langg soxx kiamwing :ee, vunx hro inx.

36 U Levi-jok ee langg, cutsir dirr Cyplus, miaa Joses, suwdoo qiyr ix juer Barnabas, (huan'ik dyrr si gauu an'ui ee langg).

37 Ix u hngg, dyrr qra bre .kir, jiong' soxx bre ee ginn duar .laii, he dirr suwdoo ee kax-xe.

5 U jit langg miaa Ananias, qapp ix ee bow Sapfila, qra sanxgiap bre .kir.

2 Ix jiong' soxx bre ee ginn amwjni lauu quixnarr hxun, ix ee bow iarr jaix; qi'uu ee duar laii he dirr suwdoo ee kax-xe.

3 Peter qongw, "Ananias, sniaw su Satan ciongmuaw liw ee simx laii penr Singwsinn, jiong' bre hngg ee ginn amwjni lauu quixnarr hxun?

4 Hngg iauxx bue bre, qamxx m si liw ee? Bre liauw, hitt xee ginn qamxx m si liw juxir? Liw simlai sniaw su sniu cud jitt xee dairjir ar? Liw m si penr langg, si penr Siongrder."

5 Ananias tniax qnir jiaxee ue, dyrr lig .lyc .kir, dng kuir; tniax .qnir ee langg longxx dua qniax.

6 Jiaxee siauwlenlangg kiw .laii, siusip ix ee sinsix, qrngx cud kir baijongr.

7 Iokliok quer snax diamxjingx quw, ix ee bow iarr zip .laii, iauxx bue jaix jitt xee su.

8 Peter rinr ix qongxx, "Liw qra guaw qongw, linw bre hngg ee qewjnii si jiacc je mah?" Qongw, "Driyc, si jiacc je."

9 Danrsi Peter duiww ix qongw, "Linw sniaw su dangsimx laii cir Jruw ee Sinn ar? Liw knuar, baijongr liw ee diongrhux :ee, inx ee kax ixqing’ qaur mngkauw, iarr beh qrngx liw cud .kir."

10 Hurzinlangg jiksii lig dirr ix ee kax-xe dng kuir. Hiaxee siauwlenlangg zip .laii, knuar ix ixqing’ siw, dyrr qrngx ix cud .kir, qra baijongr dirr ix diongrhux ee sinvnix.

11 Juann qauwhue, qapp qniwnarr tniax qnir jiaxee dairjir :ee, longxx qniax.

12 Dui' suwdoo ee ciuw u qniaa jerje sinziah qapp qrii su dirr vecsnir ee diongqanx. Jiongww langg longxx dangsimx jurjip dirr Solomon ee lingxlongg.

13 Qi'uu ee langg byy jit xee qnaw qinruaw inx; danrsi vecsnir jundiong inx,

14 Sinr laii qruix Jruw ee langg ithuad qetnix, lamluw longxx jin' je,

15 Simrjiww u qrngx vnirlangg laii qaur quelo, he dirr pox-aw, ngwbang Peter qingquer ee sii, inx uree e hro ix ee ngiaw imr .diyc.

16 Iauxx u jerje langg dui' Jelusalem siwuii ee sniaa laii, cua vnirlangg qapp hro siasinn soxx koxcow :ee, inx longxx did diyc rix hyw.

17 Dogdok jewsitauu, ixqip longxjongw qapp ix qangg ee langg (dyrr si Sadduce Dongw :ee) kia .kiw .laii, muaxsimx uanwdor,

18 Herciuw liac suwdoo, qra inx qnuaix dirr qongx ee qnax.

19 Danrsi Jruw ee tnisair mii .sii kuix qnamngg, cua inx cud .laii, qongw,

20 "Linw diyhh kir kia dirr dxen nirr, ing jitt xee uahmia ee ue longxx duiww vecsnir qongw."

21 Inx tniax qnir jiaxee ue, tnix puxqngx dyrr zip dxen laii qawsi. Jewsitauu qapp qapp ix qangg ee langg qaur, jiyjip qonghue, qapp Islael vecsnir ee laurdua, crex langg kir qnax nirr duar inx laii.

22 Geiac qaur der, knuar inx byy dirr qnax nirr, dyrr dyr laii vyr qongxx,

23 "Guanw knuar qnir qnax qnuaix qaur jin' qenqor, qowsiuw ee langg kia dirr dagg xee mngkauw; danrsi qaur guanw kuix ee sii, cue byy langg dirr lairbin."

24 Denrsix qapp jiaxee jewsitauu tniax qnir jiaxee ue, dyrr uirdiyhh inx dua diuduu, m jaix jitt xee su beh jnaixngiu.

25 U jit langg laii vyr inx qongxx, "Linw soxx qnuaix dirr qnax nirr ee langg henrjai kia dirr dxen nirr qawsi vecsnir."

26 Denrsix qapp geiac dyrr kir cua inx laii, m qnaw ing qiongg, in'ui qniax vecsnir, qniax hro inx ing jiyhtauu dimr.

27 Cua .laii liauw, dyrr hro inx kia dirr qonghue ee binrjingg. Jewsitauu mng inx qongxx,

28 "Guanw bad giamgiamm qimr linw byc did ing jitt xee miaa qawsi langg, linw suacc jiong' linw ee qawsi venww tuann dirr Jelusalem, beh ing jitt langg ee huih qruix dirr guanw."

29 Peter qapp qi'uu ee suwdoo rinr qongxx, "Sunrtanr Siongrder kacc quewtauu dirr sunrtanr langg, si habgii.

30 Linw soxx diaur dirr caa nirr laii qra hai siw ee Jesus, lanw ledjow ee Siongrder ixqing’ hro Ix qycc uac.

31 Jitt xee Jesus, Siongrder ing qaqi ee jniawciuw quw kiw ix juer Zinqunx, juer Qiuwjuw, beh jiong' huanxhuew qapp siar jue sniuxsur Islael vecsnir.

32 Qycc guanw uirdiyhh jiaxee su juer qanjingr; Siongrder soxx sniuxsur hro sunrtanr Ix ee langg ee Singwsinn iarr juer qanjingr."

33 Inx tniax liauw, jinrjai siurkir, rair beh hai siw inx.

34 Dogdok u jit xee Faliselangg, miaa Gamaliel, si jiongww vecsnir soxx qingwdiong ee qauwhuatsux, kiw laii kia dirr qonghue diongx, huanhur hro hiaxee langg jiamrsii cud .kir.

35 Ix dyrr duiww dairqex qongw, "Islaellangg ar, linw diyhh qaqi qinxsin beh jnaixngiu vran jiaxee langg.

36 In'ui jingg u Teudas cuttauu, qaqi kuakauw juer dua; uaw ix ee langg iokliok sir-vah. Ix siurr taii, duer ix ee langg siwsnuar, byy .kir.

37 Jitt langg ixau, jy qeqah ee sii, qycc u Galilee ee Judas cuttauu inxiuw vecsnir tranr ix. Ix iarr bedbyy, duer ix ee langg longxx siwsnuar.

38 Dnaxx guaw qra linw qongw vangr quwjai inx; in'ui jitt xee qewboo, jitt xee soxx juer, narr cud dirr langg, dikkag beh vairhuai;

39 Narr cud dirr Siongrder, linw dyrr be e vairhuai inx, qycc qniax linw iarr si qapp Siongrder decc qaujenr."

40 Inx dyrr tranr ix, driaur suwdoo laii, pah inx, bingrling inx byc did ing Jesus ee miaa laii qongw, dyrr vangr inx.

41 Suwdoo lirkuix qonghue, longxx hnuahiw, si in'ui inx did diyc knuar juer e kamx did uirdiyhh jitt xee Miaa siurr lingziok.

42 Inx dyrr dirr dxen nirr, dirr zinqex qawsi langg, tuann Jesus juer Krist, dagg zit byy suah.

6 Dng' hitt sii, hagsingx qetnix jerje, u qongw Gleek'ue ee Judealangg, duiww Heblalangg cud uanwgenn, in'ui dagg zit ee qiongqib byy qor diyc inx ee qnuaxhu.

2 Jap-zi xee suwdoo qiyr jiongww hagsingx laii, duiww inx qongw, "Guanw jiong' Siongrder ee dyrliw vangwhe lehh, laii vanrliw jiahsit, jex byy habgii.

3 Soxiw hniadi ar, diyhh dui' linw diongqanx qingw u hyw miasniax, siurr Sinn qapp diwhui ciongmuaw :ee cid langg, guanw dyrr setlip inx quanxliw jitt xee su.

4 Guanw beh juanbu qidyw, tuandy."

5 Jiongww langg hnuahiw jitt xee ue; dyrr qingw Stefen, ix si u sinr qapp Singwsinn muaw muaw ee langg; qycc qingw Filip, Ploqolus, Nikanor, Timon, Parmenas, qapp bad zip Judea Qxaur ee Antioclangg Nikolas;

6 Hro inx kia dirr suwdoo ee binrjingg. Inx dyrr qidyw, qra inx hnua ciuw.

7 Siongrder ee dyrliw naxx hing'ong. Dirr Jelusalem hagsingx ee siauwgiac qetnix jin' je, jewsix sunrhok dirr hok'imx :ee iarr jerje.

8 Stefen sriu undenw qapp jailingg muaw muaw, qniaa dua ee qrii su, sinziah dirr vecsnir ee diongqanx.

9 Hitt sii u huerdngg qiyr juer Synagogue Fleedmen :ee, qapp Kylene :ee, Alesander :ee, ixqip dui' Cilicia, Asia laii :ee, quixnarr langg kiw laii qapp Stefen venrlun.

10 Stefen ing diwhui, ing Sinn laii qongw, inx be e dixdngx.

11 Inx dyrr ing langg cud laii qongw, "Guanw bad tniax qnir ix qongw vongwdok Moses qapp Siongrder ee ue."

12 Inx qycc qiausyx vecsnir, qapp dniuxlyw, qapp qinghagsu; inx hutzenqanx qaur, laii liac ix, duar ix qaur qonghue,

13 Qiyr qew qanjingr laii, qongw, "Jitt langg qongxue qongqig jitt xee sxingr ee soxjai qapp ludhuad byy suah;

14 In'ui guanw bad tniax qnir ix qongw jitt xee Nazaletlangg Jesus beh huixhuai jitt xee soxjai, iarr beh quewngua Moses soxx tuann hro lanw ee quile."

15 Hitt diap jre dirr qonghue diongx ee langg, longxx juwbak knuar ix, knuar diyc ix ee bin cincniu tnisair ee bin.

7 Jewsitauu dyrr qongw, "Jiaxee su si anxnix mah?"

2 Stefen qongw, "Led'ui hurhingx, cniaw tniax. Lanw ee jow Ablaham iauxx dirr Mesopotamia, iauxx bue dirr Halan kiarkiw ee sii, ingqngx ee Siongrder duiww ix henxhen,

3 Qra ix qongw, 'Lirkuix liw ee derhngx qapp jongjok, qaur Guaw soxx beh jixsi liw ee derhngx.'

4 Hitt sii ix dyrr cud Qaldealangg ee derhngx, dirr Halan kiarkiw. Ix ee laurve siw liauxau, Siongrder dui' hiax qra ix suaw qaur jitt soxjai, dyrr si linw dnaxx soxx kiarkiw :ee.

5 Dirr jiax, Siongrder vingrr byy sanxgiap hro ix, lenrr kiarkax ee soxjai iarr byy; hitt sii ix iauxx bue u qniaw, Siongrder ingwunw beh ing jitt soxjai hro ix juer giap, suar qycc qaur ix ee horer.

6 Siongrder u anxnix qongw, 'Ix ee horer decbeh cutgua dirr ngirvangx, langg beh qra inx juer lojaii, pnaiw kuanxtai inx sir-vah nii quw.'

7 Siongrder qycc qongw, 'Inx juer lojaii soxx hogsai ee qog, Guaw beh simxpnuar ix. Au .laii inx beh cud .laii, dirr jitt xui hogsai Guaw.'

8 Qycc ing qatlew ee iog hro ix. Dui' anxnix, ix snix Isaac, derr veh zit qra ix qniaa qatlew; Isaac snix Jakob, Jakob snix lanw jap-zi xee jow.

9 Ledjow uanwdor Josef, qra ix bre kir Egipt, danrsi Siongrder qapp ix dilehh,

10 Qiur ix tuatli longxjongw ee koxlan, hro ix dirr Egipt ee ongg, Falaoh ee binrjingg, did diyc undenw qapp diwhui. Falaoh dyrr lip ix jongxliw Egipt, qapp ix ee juann qrex.

11 Au .laii Egipt qapp Kanaan venww de u qihngx, dua qankow. Lanw ee ledjow cue byy bixniuu.

12 Jakob tniax qnir Egipt u gnoxqog, dyrr tauu jit vaiw crex lanw ee ledjow kir.

13 Derr zi vaiw Josef qapp hniadi sna' zin; Josef ee jok suacc hro Falaoh did diyc jaix.

14 Josef dyrr crex langg vnuacniaw laurve Jakob, qapp juann jok cid-jap-go langg laii.

15 Jakob dyrr lyc kir Egipt. Ix qapp lanw ee ledjow siw dirr hiax;

16 Inx qra qnuacaa un qaur Seqem, ho'ngg baijongr dirr Ablaham ing ginn dui' Hamor ee qniaxsunx soxx brew dirr Seqem ee bongrde.

17 Qaur Siongrder duiww Ablaham ing jiuwjua soxx ingxunw :ee, hitt xee qrii ixqing’ qin, vecsnir dyrr snitnuar hing'ong dirr Egipt,

18 Qaur vadd xee ongg m bad Josef :ee kiw laii quanxliw Egipt.

19 Ix bohai lanw ee jok, pnaiw kuanxtai lanw ee jow, bingrling diyhh kiwsag inx ee ngex-aw, hro inx be uac.

20 Hitt sii Moses cutsir, huisiongg ee cingsiur; dirr laurve ee qrex ngiuxci snax guehzit.

21 Ix siurr kiwsag ee sii, hro Falaoh ee jaboxqniaw kiyh .kir, ngiuxci juer qaqi ee qniaw.

22 Moses hagsip Egiptlangg longxjongw ee hagbun; qongxue, qniaa dairjir longxx u jailingg.

23 Jiongqin sir-jap huer, ix sniu beh kir knuar ix ee hniadi, Islael ee qniaxsunx.

24 Ix knuar qnir jit langg siurr uan'ongw, dyrr vyxho ix, ter siurr kud ee langg sin'uanx, pah Egiptlangg.

25 Ix pacsngr hniadi e hiauxgno Siongrder ing ix ee ciuw qiur inx, danrsi inx be hiauxgno.

26 Qeh zit, ix duxdng nng xee decc sna' pah, rair hro inx qycc hyhyw, dyrr qongw, 'Linw si hniadi, sniaw su sna' kihu?'

27 Hitt xee kihu cuwvnix ee langg qirjuat ix, qongw, 'Jirjui setlip liw juer qnuahuw, juer simxpnuawsix, laii dirliw guanw ar?

28 Liw rair beh hai siw guaw, cincniu jazit hai siw hitt xee langg mah?'

29 Moses in'ui jitt qxur ue dyrr jauw, cutgua kir dirr Midian ee derhngx; dirr hiax snix nng xee qniaw.

30 Quer sir-jap nii, dirr Sinai Snuax ee kongwiaw, dirr ciwper huexiam ee diongqanx, u tnisair duiww ix henxhen.

31 Moses knuar .diyc, qiquair soxx knuar .qnir .ee, duxaxx qinruaw beh zinrjinx knuar, dyrr u Jruw ee sniax, qongw,

32 'Guaw dyrr si liw ee ledjow ee Siongrder, dyrr si Ablaham, Isaac, qapp Jakob ee Siongrder.' Moses gniauc gniauc cuah, m qnaw zinrjinx knuar.

33 Jruw qra ix qongw, 'Liw ee ree diyhh trngr .kiw .laii, in'ui liw soxx kia ee xui si singwde.

34 Guaw ee vecsnir dirr Egipt, Guaw sidjai u knuar qnir inx ee kunwkow, iarr tniax qnir inx ee trow kuir, dyrr qangwlimm laii qiur inx. Dnaxx liw laii, Guaw beh crex liw kir Egipt.'

35 Jitt xee Moses dyrr si inx soxx qirjuat :ee, qongw, 'Jirjui setlip liw juer qnuahuw, juer simxpnuawsix ar?' Jitt xee langg dyrr si Siongrder tog ciwper lai duiww ix soxx henxhen ee tnisair, crex ix juer qnuahuw, juer qiuwsiok :ee.

36 Jitt xee langg cua inx cud, qniaa qrii su, sinziah, dirr Egipt, Angg Haiw, qapp kongwiaw sir-jap nii quw.

37 Jitt xee langg dyrr si hitt xee qra Islael qniaxsunx qongw ee Moses, ix qongw, 'Siongrder beh dui' linw hniadi diongqanx uirdiyhh linw hingx kiw jit xee Sendix, cincniu guaw :ee.'

38 Jitt xee langg dyrr si hitt xee dirr kongwiaw nirr ee huerdiongx, qapp dirr Sinai Snuax duiww ix qongxue ee tnixsair, ixqip ledjow, snaqab dilehh :ee; ix iarr did diyc uac ee jiauwbing tuann hro lanw.

39 Lanw ee ledjow m rair sunrtanr ix, huanxdngw qirjuat ix, simx dywdngw dirr Egipt,

40 Qra Aalon qongw, 'Liw diyhh qra guanw jy sinbingg laii juer tauu cua guanw; in'ui jitt xee cua guanw cud Egipt ee Moses, m jaix ix jnaixngiu.'

41 Hitt sii inx dyrr jy guu-aw, qycc henr jrer hro hitt xee sxiong, hnuahiw inx qaqi ee ciuw soxx juer :ee.

42 Siongrder dyrr uat lingr dngw, cutjai inx hogsai tensiong, cincniu sendix ee ceh soxx qiwjair, qongw, 'Islael ee qrex ar, linw dirr kongwiaw ligquer sir-jap nii, qamxx bad ing singlew jewmic henr hro Guaw mah?

43 Linw qrngx Moloc ee vowvnii, qapp Rlemfan Sinn ee cnxix, dyrr si linw soxx jy laii vair ee sxiong; Guaw beh qra linw censuaw kir Babylon gua.'

44 Lanw ledjow dirr kongwiaw u jingwqir ee huerbo, cincniu duiww Moses soxx qongw ee huanhur, diyhh jiauww soxx knuar .qnir ee kuanxsid laii jy ix.

45 Au .laii Siongrder qnuaxdiok guarvanglangg dirr lanw ee jow ee binrjingg, lanw ee jow qapp Joshua qiwzenn singjiab jitt xee huerbo, dyrr qra duar zip kir diamr dirr hitt xee derhngx, didqaur David ee sii;

46 Ix did diyc undenw dirr Siongrder ee binrjingg, rair beh qra Jakob ee Siongrder cue jit xee kiarkiw ee xui.

47 Dogdok Solomon jiacc qra Ix kiw cur.

48 Danrsi Jiww Quann :ee byy diamr dirr langg ee ciuw soxx kiw :ee; cincniu sendix qongw,

49 'Jruw qongw: Tnix si Guaw ee jyrui, de si Guaw ee kadah'iw. Linw beh qra Guaw kiw simxmih hy ee cur? Acc si qongxx Guaw anhiyh ee soxjai dirr daxlyc ar?

50 Jiaxee itcer qamxx m si Guaw ee ciuw soxx congwjy :ee mah?'

51 Linw ee amrqunw gni, simx qapp hni bue siurr qatlew ee langg, siongsiongg vuergik Singwsinn; linw ee jow anxnix, linw iarr anxnix.

52 Sendix diongx daxlyc jit xee byy hro linw ee jow qra kunxdiok ar? Hiaxee camwgiw Gi :ee decbeh qaur ee langg, inx iarr hro inx hai siw. Dnaxx jitt xee Gi :ee linw bad qra sangwqaux laii hai siw Ix;

53 Dui' tnisair laii sed ee ludhuad, linw u sriu .diyc, iarr byy qra siuw."

54 Inx tniax qnir jiaxee ue, simlai jinrjai siurkir, ngr ix qargee cetkiw.

55 Dogdok Stefen hro Singwsinn ciongmuaw, juwbak knuar tnix, knuar qnir Siongrder ee ingqngx, Jesus kia dirr Siongrder ee duarvingg,

56 Dyrr qongw, "Knuar ar! Guaw knuar qnir tnix kuix, Zinjuw kia dirr Siongrder ee duarvingg."

57 Inx dua sniax auqiyr, ngx hnirkangx, dangsimx ekeh ix;

58 Qnuaw ix cud sniaa, ing jiyhtauu dimr ix. Juer qanjingr ee langg jiong' inx ee snxax he dirr siauwlenlangg, miaa qiyr Saul ee kax-jingg.

59 Inx ing jiyhtauu dimr Stefen; Stefen qriuu qongxx, "Jruw Jesus ar, jiaplap guaw ee sinn."

60 Qycc qui .lyc .kir, dua sniax qiyr qongxx, "Jruw ar, byc did ing jitt xee jue qruix dirr inx." Qongw suah dyrr kunr .kir. Saul iarr hnuahiw ix siw.

8 Hitt zit kiw, dirr Jelusalem ee qauwhue duw diyc dua kunxdiok; suwdoo ixgua, longxx siwsnuar dirr Judea, qapp Samalia jiaxee derhngx.

2 U qingwkenn ee langg baijongr Stefen, uirdiyhh ix duii hxingx dua tikaur.

3 Saul dua hamrhai qauwhue, zip dagg langg ee qrex, tuax inx ee lamluw sangwqaux lyc qnax.

4 Dui' anxnix hiaxee siwsnuar ee langg venww qniaa, tuann hok'imx ee dyrliw.

5 Filip lyc kir Samalia ee sniaa, ing Krist tuann hro inx.

6 Jiongww langg tniax .qnir, qycc knuar qnir soxx qniaa ee sinziah, dyrr dangsimx iwhiongr Filip ee ue.

7 In'ui u jerje langg huan diyc siasinn, hiaxee siasinn dua sniax auqiyr, an' inx cud .kir; venwsui :ee, vaixkax :ee, iarr jerje did diyc rix hyw.

8 Hitt xee sniaa-lai dua hnuahiw.

9 U jit langg, miaa qiyr Simon, vingsor dirr sniaa-lai qniaa siasut, jurkuax juer dua, hro Samalia ee vecsnir gonggniac;

10 Dui' ser qaur dua, byy m iwhiongr ix, qongw, "Jitt langg si Siongrder ee quanlingg, dyrr si hitt xee cxingx juer Dua :ee."

11 Inx iwhiongr ix ee enqor, si in'ui ix quw quw ing siasut hro inx gonggniac.

12 Qaur inx sinr Filip soxx tuann ee hok'imx, lun Siongrder ee qog qapp Jesus Krist ee miaa, dyrr u lamluw siurr sexlew.

13 Simon qaqi iarr sinr; ixqing’ siurr sexlew, siongsiongg qinsuii Filip, knuar ix soxx qniaa jiaxee sinziah qapp dua quanlingg, dyrr gonggniac.

14 Dirr Jelusalem ee suwdoo tniax qnir Samalia ixqing’ jiaplap Siongrder ee dyrliw, dyrr crex Peter qapp Johan kir inx hiax.

15 Inx ixqing’ lyc .kir, dyrr ter inx qidyw, hro inx siurr Singwsinn.

16 In'ui Singwsinn iauxx bue limqaur inx qidiongx jit langg, inx jixu siurr sexlew, qruix dirr Jruw Jesus ee miaa nardnia.

17 Dui' anxnix inx qra inx hnua ciuw, inx dyrr siurr Singwsinn.

18 Simon knuar qnir dui' suwdoo ee hnua ciuw dyrr u Singwsinn hro langg, dyrr jiong' jnii henr hro inx, qongw,

19 "Iarr jiong' jitt xee qxuann hro guaw, drir qaur guaw ee ciuw soxx hnua ee langg sriu diyc Singwsinn."

20 Dogdok Peter duiww ix qongw, "Liw ee ginn qapp liw snaqab bedbyy, in'ui liw pacsngr Siongrder ee sniuxsur beh ing jnii laii brew.

21 Liw dirr jitt xee su byy hxun, byy qansiap, in'ui dirr Siongrder ee binrjingg, liw ee simx vutjingr.

22 Soxiw diyhh huanxhuew lirkuix liw jitt xee pnaiw, laii qriuu Jruw, qiamxcaiw liw simlai ee liamrtauu e did diyc siawbenw.

23 In'ui guanw knuar qnir liw zip dirr koxdnaw ee diongqanx, hro vutgi kunxvak."

24 Simon rinr qongxx, "Linw ter guaw qriuu Jruw, hro linw soxx qongw :ee longxx byy qaur dirr guaw."

25 Inx ixqing’ juer qanjingr laii tuann Jruw ee dyrliw, dyrr dyr kir Jelusalem, dirr Samalia jerjer ee hniusia tuann hok'imx.

26 Jruw ee tnisair duiww Filip qongw, "Kiw .laii, duiww lamsir kir, qaur dui' Jelusalem lyc kir Gaza ee lo." Hiax dyrr si kongwiaw.

27 Ix dyrr kiw laii kir hiax. Duxdng u jit xee Etiopialangg, si u qxuann ee taiwqamr, dyrr si uirr Etiopia ee luxongg, Kandace, jongxquanw ginkor. Ix ixqing’ qaur Jelusalem qingwvair,

28 Dywdngw .laii, jre dirr ciax nirr, decc tak sendix Isaiah ee ceh.

29 Singwsinn qra Filip qongw, "Jinwjingg kir qinruaw hitt dniux ciax."

30 Filip jauw kir jiurqin ix, tniax qnir ix decc tak sendix Isaiah ee ceh, dyrr qongw, "Liw soxx tak :ee, liw e bingvik mah?"

31 Ix qongw, "Byy langg jixsi guaw, taixtyw e?" Ix dyrr cniaw Filip jnriu ciax snaqab jre.

32 Ix soxx tak ee Singwqingx dyrr si jitt dnxua, "Ix hro langg kanx, cincniu ngiuu qaur siurr taii ee soxjai. Ix byy kuix cuir, cincniu ngiuu-aw duiww jenw xmngg :ee byy cud sniax.

33 Ix vibii ee sii, siurr byy qonggi ee simxpnuar. Ix ee sewdai jirjui beh tuansut? In'ui Ix ee uahmia dui' derjniu siurr duat .kir."

34 Taiwqamr rinr Filip qongxx, "Cniaw mng, sendix qongw jitt xee ue si qiw simxmih langg ar?"

35 Filip dyrr kuix cuir, dui' jitt xee Singwqingx kiw, ing Jesus tuann hro ix.

36 Qnialo ee sii, qaur u juiw ee xui, taiwqamr qongw, "Liw knuar, jiax u juiw. Guaw siurr sexlew u simxmih joxgai?"

37 Filip qongw, "Liw narr u ing juansimx decc sinr dyrr tangx." Ix rinr qongxx, "Guaw sinr Jesus Krist si Siongrder ee Qniaw."

38 Dyrr huanhur tingg ciax. Filip qapp taiwqamr nng langg lyc juiw, Filip dyrr qra ix qniaa sexlew.

39 Dui' juiw nirr jnriu .laii ee sii, Jruw ee Sinn qra Filip duar .kir; taiwqamr byy qycc knuar qnir ix, dyrr jueww ix jniurlo, iarr jin' hnuahiw.

40 Au .laii Filip dirr Azotus hro langg duw .diyc, ix venww qniaa jiaxee sniaa tuann hok'imx, didqaur Kaesalea.

9 Saul iauxquxx itbi hangxhuah rair taii Jruw ee hagsingx, dyrr kir qnir jewsitauu,

2 Duiww ix qriuu puex hro Damaskus jiaxee huerdngg, narr duw diyc tranr jitt xee lo ee langg, bylun lamluw, jrunw ix tangx vak inx, duar qaur Jelusalem.

3 Qniaa qin Damaskus ee sii, hutzenqanx dui' tnix u qngx uiluii jiyr ix,

4 Ix dyrr vuac dyw dirr de nirr, tniax qnir u sniax qra ix qongw, "Saul, Saul, sniaw su kunxdiok Guaw?"

5 Ix qongw, "Jruw ar, Liw si jirjui?" Qongw, "Guaw dyrr si liw soxx kunxdiok ee Jesus.

6 Liw diyhh kiw laii zip sniaa, liw soxx ingqaix juer :ee beh qra liw qongw."

7 Dangjee qniaa ee langg jing jing kia lehh, tniax qnir sniax, iarr byy knuar qnir langg.

8 Saul dui' de nirr kiw .laii, bagjiux tiw kuix, be knuar qnir simxmih. Langg kanx ix ee ciuw, cua ix zip Damaskus.

9 Ix snax zit be knuar .qnir, byy jiac iarr byy limx.

10 Dirr Damaskus u jit xee hagsingx miaa Ananias. Jruw dirr ngirsiong diongx qra ix qongw, "Ananias ar." Ix qongw, "Jruw ar, guaw dirr jiax."

11 Jruw duiww ix qongw, "Kiw .laii, kir hitt diauu quelo qiyr juer Dit :ee, dirr Judas ee qrex cue Tarsuslangg, miaa Saul, in'ui ix duxduxx decc qidyw;

12 Qycc u knuar qnir jit langg, miaa Ananias :ee zip .laii, qra ix hnua ciuw, hro ix e knuar .qnir."

13 Ananias rinr qongxx, "Jruw ar, guaw tniax qnir jerjer langg qongw, jitt langg dirr Jelusalem bad jnaixngiu dua pnaiw kuanxtai Liw jiaxee singwdoo;

14 Qycc ix dirr jiax u jiaxee jewsitauu ee qxuann, tangx laii vag qniwnarr qiuqiyr Liw ee miaa ee langg."

15 Dogdok Jruw qra ix qongw, "Jueww liw kir. Ix si Guaw qingxsuanw ee kiwqu, beh dirr guarvangx, qok'ongg, ixqip Islael qniaxsunx ee binrjingg vywiongg Guaw ee miaa.

16 Guaw iarr beh hro ix jaix, ix diyhh in'ui Guaw ee miaa siurr zuarr je ee qankow."

17 Ananias dyrr kir, zip ix ee cur, ciuw hnua ix, qongw, "Hniadi Saul, Jruw, dyrr si liw laii ee sii dirr lo-diongx cuthen hro liw knuar ee Jesus, crex guaw laii, hro liw e knuar .qnir, qycc did diyc Singwsinn ciongmuaw."

18 Liamvnix dui' ix ee bagjiux u mic qalauc, cincniu hilann, ix dyrr knuar .qnir, kiw laii siurr sexlew;

19 Jiac .quer liauxau, dyrr iongxqnia. Saul qapp Damaskus ee hagsingx snaqab druar quixnarr zit.

20 Liamvnix dirr jiaxee huerdngg suantuann Jesus, qongxx Ix si Siongrder ee Qniaw.

21 Tniax .qnir ee langg longxx gonggniac, qongw, "Jitt langg qamxx m si hitt xee dirr Jelusalem janhai huanrnarr qiuqiyr jitt xee miaa :ee mah? Qycc laii jiax diaudii beh vak inx, laii tuax inx qaux hro jiaxee jewsitauu."

22 Dogdok Saul ithuad u linglik, vog dyw druar dirr Damaskus ee Judealangg, viauxbingg jitt xee si Krist.

23 Quer jerje zit, Judealangg snaqab qewboo beh taii ix.

24 Danrsi inx ee qewboo Saul jaix. Inx qycc zidmii dirr sniamngg nirr dngdanw beh taii ix.

25 Ix ee hagsingx tauwmii jiong' Saul ing naa dui' sniacniuu qra ix lrui .lyc .kir.

26 Ix ixqing’ qaur Jelusalem, sniu beh qapp hagsingx qauvuee, danrsi inx longxx qniax ix, m sinr ix si hagsingx.

27 Dogdok Barnabas cua ix jurqin suwdoo, jiong' ix dirr lo-diongx jnaixngiu knuar qnir Jruw, Jruw qapp ix qongxue, ixqip ix druar Damaskus jnaixngiu hyxdnaw dirr Jesus ee miaa laii tuann, longxjongw qongw kiw.

28 Ix dyrr dirr Jelusalem qapp inx cutzip,

29 Hyxdnaw dirr Jruw ee miaa laii tuann; iarr qapp qongw Gleek'ue ee Judealangg qongxue venrlun; dogdok hiaxee langg doboo beh taii ix.

30 Hniadi jaix, dyrr sangr ix lyc Kaesalea, hro ix dyr kir Tarsus.

31 Dui' anxnix, venww Judea, Galilee, qapp Samalia ee qauwhue u ving'anx, did diyc qenwlip, qniaa dairjir qingwuir Jruw, iarr siurr Singwsinn ee an'uir, langgiac naxx qetnix.

32 Peter venww qniaa siwhngx ee sii, iarr lyc kir jiurqin diamr dirr Lydda ee singwdoo.

33 Dirr hiax, ix duw diyc jit langg, miaa Aeneas, in'ui huan diyc venwsui, dyw cngg veh nii.

34 Peter qra ix qongw, "Aeneas, Jesus Krist rix hyw liw lar. Kiw .laii, liw ee pox-aw qaqi jingxdunr." Ix liamvnix kiw .laii.

35 Qniwnarr druar dirr Lydda qapp Salon ee langg knuar .qnir, dyrr quihok Jruw.

36 Dirr Joppa u jit xee luxdoo, miaa Tabita (huan'ik dyrr si Dorkas, lingngiuu ee iwsur), qniaa hyw su qapp jinxjer muaw muaw.

37 Ix dongsii puawvni siw; langg sew ix ee sinsix, qra he dirr laudingw.

38 Lydda qin Joppa, hagsingx tniax qnir Peter dirr hiax, dyrr crex nng langg kir cue ix, qriuu qongxx,"Cniaw laii guanw jiax, m tangx encenn."

39 Peter dyrr kixsinx qapp inx kir. Ixqing’ qaur, dyrr u langg cua ix jnriu lxauu; jiongww jiuxqnuaxlangg kia dirr Peter ee sinvnix decc hauw, jiong' Dorkas qapp inx dilehh ee sii soxx juer ee ihok hro ix knuar.

40 Peter dyrr qiyr jiongww langg cud .kir, qui lyc kir qidyw; uat dngw srinx ngr sinsix, qongw, "Tabita, kiw .laii." Ix ee bagjiux tiw kuix, knuar qnir Peter, dyrr kiw laii jre.

41 Peter crunx ciuw huu ix kiw .laii, qiyr jiaxee singwdoo qapp jiuxqnuaxlangg zip .laii, jiong' qycc uac ee Dorkas qaux hro inx.

42 Tong' Joppa longxx jaix, dyrr u jerje langg sinr Jruw.

43 Peter dirr Joppa quw quw, qapp jit xee huanpuee saihu Simon snaqab druar.

10 Dirr Kaesalea u jit langg, miaa Kornelius, juer Itali Ngiaa ee vexjongw,

2 Ix si qingwkenn ee langg, qapp juann qrex qingwuir Siongrder, jinxjer vecsnir jerje, siongsiongg qidyw Siongder.

3 U jit zit, iokliok snax diamw, ix dirr ngirsiong diongx bingg bingg knuar qnir Siongrder ee tnisair zip laii jiurqin ix, duiww ix qongw, "Kornelius".

4 Ix juwbak knuar, jin' qniax, qongw, "Jruw ar, u sniaw su?" Dyrr qra ix qongw, "Liw ee qidyw, liw ee jinxjer ixqing’ jnriu qaur Siongrder ee binrjingg juer qiwliam.

5 Dnaxx liw diyhh crex langg kir Joppa, cniaw hitt xee Simon, cxingx juer Peter :ee laii.

6 Ix hiyh dirr huanpuee saihu Simon daux, ix ee cur dirr haiw-vnix."

7 Qapp ix qongxue ee tnisair ixqing’ trer .kir, Kornelius dyrr qiyr nng xee lovok, qapp jit xee sisiongg qinsuii ix :ee qingwkenn ee vxingx,

8 Jiong' jiaxee dairjir longxx qra inx qongw, dyrr crex inx kir Joppa.

9 Qeh zit, inx ixqing’ qniaa qin sniaa. Iokliok ziddiongdaur, Peter jnriu cur-dingw qidyw.

10 Ix jin' iaux, rair jiac, langg duxduxx decc virvan dxngr, Peter ee sinhunn iuu dirr sxiong-gua,

11 Dyrr knuar qnir tnix kuix, u kiwqu qangr lyc, cincniu dua vxag vor, vak sir xee qaktauu, dui dirr de nirr.

12 Hex lairbin u derjniu dagg ngiu sir kax ee jauxsiur, tangtua, qapp tnidiongx ee vuejiauw.

13 Qycc u sniax duiww ix qongw, "Peter, kiw .laii, qra taii laii jiac."

14 Danrsi Peter qongw, "Jruw ar, duanrduan m tangx. In'ui huanrnarr cosiok ee mic qapp byy cingkir :ee, guaw m bad jiac."

15 Derr zi vaiw u sniax qycc duiww ix qongw, "Siongrder soxx hro ix cingkir :ee, liw byc did liac juer cosiok."

16 Anxnix snax vaiw; hitt xee kiwqu liamvnix siux jnriu tnix.

17 Peter simlai decc diuduu soxx knuar .qnir ee ngirsiong si simxmih iwsur. Duxduxx hitt diap, Kornelius soxx crex .laii ee langg u mng qaur Simon ee cur, kia dirr mngg-gua,

18 Cud sniax decc mng knuar u Simon, cxingx juer Peter :ee, hiyh dirr jiax iacc byy.

19 Peter iauxdecc sniu ngirsiong ee sii, Singwsinn qra ix qongw, "U snax xee langg decc cue liw.

20 Dnaxx diyhh kiw .laii, lyc .kir, qapp inx kir, mrbenw giaugii; in'ui si Guaw crex inx."

21 Peter lyc .kir, qnir hiaxee langg, qongw, "Guaw dyrr si linw soxx cue ee langg. Linw laii si uirdiyhh sniaw su?"

22 Inx dyrr qongw, "Vexjongw Kornelius si gi ee langg, qycc qingwui Siongrder, hro Judea juann qog soxx ylyw, hrong sxingr ee tnisair jixsi ix, diyhh cniaw liw qaur ix ee cur, suar tniax liw ee ue."

23 Peter dyrr cniaw inx zip .laii, lauu inx hiyh lehh. Qeh zit kixsinx qapp inx kir, qycc u Joppa ee hniadi quixnarr langg qapp ix dangjee qniaa.

24 Qycc qeh zit, zip Kaesalea. Kornelius ixqing’ jurjip ix ee cinlangg qapp hyw ving'iuw, decc tingwhau inx.

25 Peter duxaxx zip .kir ee sii, Kornelius gniajih ix, pag dirr ix ee kax-jingg laii vair ix.

26 Peter kanx ix kiw .laii, qongw, "Kiw .laii; guaw qaqi iarr si langg."

27 Peter naxx qapp ix qongxue, naxx zip .kir, knuar qnir jerje langg jurjip,

28 Dyrr duiww inx qongw, "Linw jaix Judealangg qapp vadd jok ee langg cinqin, iacc si lai'ongw, vunw si byy hap le; danrsi Siongrder ixqing’ jixsi guaw, bylun simxmih langg, m tangx qongw ix juer cosiok byy cingkir.

29 Soxiw guaw siurr cniaw, byy tesii, dyrr laii. Dnaxx guaw mng, linw cniaw guaw u simxmih iwsur?"

30 Kornelius qongw, "Sir zit jingg jitt xee sii, ervox snax diamw, guaw dirr cur-lai decc qidyw. Hutzenqanx u jit langg, ijniuu qngx ngiawngiar, kia dirr guaw ee binrjingg, qongw,

31 'Kornelius, dirr Siongrder ee binrjingg, liw ee qidyw ixqing’ tniax .qnir, liw ee jinxjer ixqing’ did diyc qiwliam.

32 Dnaxx diyhh crex langg qaur Joppa, cniaw Simon, cxingx juer Peter :ee laii; ix diamr dirr haiw-vnix, huanpuee saihu Simon ee cur.'

33 Soxiw guaw liamvnix crex langg qaur liw hiax. Liw laii jin' hyw. Dnaxx guanw longxx dirr Siongrder ee binrjingg, rair beh tniax Jruw soxx bingrling liw longxjongw ee ue."

34 Peter kuix cuir, qongw, "Dnaxx guaw jinjniar jaix Siongrder byy ing guarmau cruw langg;

35 Dogdok dirr dagg vangqog qniww u qingwuir Ix laii qniaa gi ee langg, Ix longxx hnuahiw jiaplap.

36 Siongrder soxx qiar hro Islael qniaxsunx ee ue, dui' Jesus Krist laii tuann hyvingg ee hok'imx (Ix si banru ee Jruw).

37 Jitt xee siausid linw jaix si dirr Johan soxx tuann ee sexlew ixau, dui' Galilee kiw qaur venww Judea;

38 Qycc Nazaletlangg Jesus, Siongrder u jnaixngiu ing Singwsinn qapp jailingg buah Ix, Ix dyrr siwquer qniaa, juer hyw su, rix hyw qniwnarr moquiw soxx apjer :ee; in'ui Siongrder qapp Ix dilehh.

39 Qniwnarr Ix dirr Judealangg ee derhngx qapp Jelusalem soxx qniaa :ee, guanw juer qanjingr; langg suacc qra Ix diaur dirr caa nirr laii hai siw Ix.

40 Qaur derr snax zit, Siongrder hro Ix qycc uac, suar cuthen,

41 M si hro jiongww vecsnir knuar, si hro Siongrder dairsingx soxx qingxsuanw uirdiyhh Ix juer qanjingr ee langg knuar, dyrr si guanw jiaxee, dirr Ix dui' sixlangg diongx qycc uac liauxau qapp Ix snaqab limjiac ee langg.

42 Ix qycc bingrling guanw tuann hro vecsnir, qanjingr jitt xee si Siongrder soxx libdnia juer uahlangg qapp sixlangg ee simxpnuawsix.

43 Jiongww sendix iarr uirdiyhh Ix juer qanjingr, dyrr si huanrnarr sinr Ix ee langg, dui' Ix ee miaa did diyc jue siar."

44 Peter iauxquxx decc qongw jiaxee ue ee sii, Singwsinn qangwlimm dirr qniwnarr tniax dyrliw ee langg.

45 Hrong qatlew ee sinwdoo, qapp Peter snaqab laii :ee, in'ui Singwsinn ee sniuxsur iarr qangr lyc dirr guarvanglangg, dyrr longxx qiquair.

46 In'ui tniax qnir inx ing jiaxee kniukauw decc qongw, qycc ylyw Siongrder juer dua.

47 Peter dyrr rinr qongxx, "Jiaxee langg, ixqing’ sriu diyc Singwsinn, cincniu lanw jidngiu, jirjui e qimr did ing juiw qra inx qniaa sexlew ar?"

48 Dyrr bingrling inx dirr Jesus Krist ee miaa siurr sexlew. Dui' anxnix, inx cniaw ix druar quixnarr zit.

11 Suwdoo qapp diamr dirr Judea ee hniadi u tniax qongxx guarvanglangg iarr sriu Siongrder ee dyrliw.

2 Qaur Peter jnriu Jelusalem ee sii, hiaxee hrong qatlew ee langg qapp ix jingven qongxx,

3 "Liw bad zip kir jiurqin byy siurr qatlew ee langg, qapp inx snaqab jiac."

4 Peter jiauww cuwsu duiww inx vailet qongw,

5 "Guaw dirr Joppa Sniaa qidyw, sinhunn iuu dirr sxiong-gua ee sii, knuar qnir ngirsiong, u jit xee kiwqu cincniu dua vxag vor, vak sir xee qaktauu, dui' tnix dui lyc qaur guaw ee binrjingg.

6 Guaw juwbak knuar, siongser qra sniu, knuar qnir u derjniu sir kax ee jingsnix, iaxsiur, tangtua, qapp tnidiongx ee vuejiauw.

7 Qycc tniax qnir u sniax qra guaw qongw, 'Peter, kiw .laii, qra taii laii jiac.'

8 Guaw qongw, 'Jruw ar, duanrduan m tangx, in'ui huanrnarr cosiok ee mic, iacc si byy cingkir :ee, longxx m bad zip guaw ee cuir.'

9 Sniax derr zi vaiw dui' tnix rinr qongxx, 'Siongrder soxx hro ix cingkir :ee, liw byc did liac juer cosiok.'

10 Cincniu anxnix snax vaiw; dagg hxang mic dyrr qycc siux jnriu tnix.

11 Hutzenqanx u snax langg dui' Kaesalea hrong crex laii jiurqin guaw :ee, duxduxx kia dirr guanw soxx diamr ee cur-gua.

12 Singwsinn qra guaw qongw diyhh qapp inx kir, byc did hunvet. Qycc u jitt lak xee hniadi qapp guaw kir, guanw longxx zip hitt langg ee cur.

13 Ix dyrr qra guanw qongw, anxjnaixngiu bad knuar qnir jit xee tnisair kia dirr ix ee cur, duiww ix qongw, 'Diyhh crex langg qaur Joppa, cniaw Simon, cxingx juer Peter :ee, laii,

14 Ix beh ing ue qra liw qongw, liw qapp liw juann qrex dui' jiaxee ue beh did diyc qiur.'

15 Guaw duxduxx decc qongw ee sii, Singwsinn qangwlimm dirr inx, cincniu kixtauu dirr lanw jidngiu.

16 Guaw dyrr qir did Jruw ee ue, qongw, 'Johan si ing juiw qniaa sexlew, dogdok linw beh dirr Singwsinn siurr sew.'

17 Dnaxx Siongrder qiwzenn ing jitt xee unsur hro inx, cincniu dirr lanw sinr Jruw Jesus Krist ee sii soxx hro lanw ee jidngiu. Guaw si jirjui, e joxdongr Siongrder ar?"

18 Hiaxee langg tniax jex ue, dyrr jing jing, iarr qruix ingqngx Siongrder, qongw, "Anxnix, si Siongrder iarr hro guarvanglangg huanxhuew laii did diyc uahmia."

19 Uirdiyhh Stefen ee su soxx snix kiw ee koxlan laii siwsnuar ee langg, venww qniaa qaur Foenicia, Cyplus, Antioc; byy duiww vadd langg qongw dyrliw, jixu duiww Judealangg qongw nardnia.

20 Danrsi qidiongx u Cyplus qapp Kylene quixnarr langg qaur Antioc, iarr duiww Gleeklangg tuann Jruw Jesus ee hok'imx.

21 Jruw ee ciuw qapp inx dilehh, sinr laii qruix dirr Jruw :ee, inx ee siauwgiac vutjiw je.

22 Lun qaur jiaxee langg, u siausid tuann qaur Jelusalem, hro qauwhue tniax .qnir, inx dyrr crex Barnabas kir Antioc.

23 Ixqing’ qaur, ix knuar qnir Siongrder ee xunx, dyrr hnuahiw, koxkngr jiongww langg ing simjir qetlenn dirr Jruw.

24 In'ui ix si hyw langg, u Singwsinn qapp sinr muaw muaw; dui' anxnix qetnix jerje langg qruix dirr Jruw.

25 Ix kir Tarsus cue Saul.

26 Ixqing’ duw .diyc, dyrr cua ix qaur Antioc. Inx dirr qauwhue diongx jurjip jit nii quw, qawsi jerje langg. Hagsingx dyrr si dui' Antioc kiw, ho'ngg cxingx juer Krist ee sinwdoo.

27 Dng' hitt sii u quixnarr xee sendix dui' Jelusalem lyc kir qaur Antioc.

28 Qidiongx jit langg, miaa Agabus kia .kiw .laii, kyr Singwsinn laii jixbingg poxtnie beh dua qihngx. Dng' Klaudius ee niqanx qyxzenn u jitt xee su.

29 Dui' anxnix hagsingx dniardiyc iwsur, dagg langg jiauww ix ee ligliong, qiar kir qiongqib diamr dirr Judea ee hniadi.

30 Inx dyrr jiauww anxnix qniaa, dui' Barnabas qapp Saul qingciuw, qiar qaur hiaxee dniuxlyw.

12 Jiongqin hitt sii, Helod Ongg herciuw hamrhai qauwhue diongx quixnarr langg.

2 Ix ing dyx taii Johan ee hniadi James.

3 Knuar qnir Judealangg hnuahiw, dyrr qycc liac Peter. Hitt sii dyrr si druu qnar ee zit.

4 Ixqing’ liac .diyc, dyrr qra ix qnuaix dirr qnax nirr, qaux hro sir vanx ee vxingx qowsiuw, muixx vanx sir langg, iwsur si beh dirr Vnuaquewjeh au qra duar cud kir vran hro vecsnir knuar.

5 Dui' anxnix, Peter lauu dirr qnax nirr; dogdok qauwhue ter ix cetced qriuu Siongrder.

6 Helod decbeh tee ix cud .laii, hitt mii Peter vak dirr nng diauu ticlen, kunr dirr nng xee vxingx ee diongqanx; qycc qowsiuw ee langg dirr mngg-gua decc qowsiuw.

7 Hutzenqanx u Jruw ee tnisair kia dirr vnitauu, vangg-lai u qngx decc jiyr. Tnisair dah Peter ee hiap-xe, qiyr ix cnew, qongw, "Qinw qinw kiw .laii." Ticlen dyrr dui' ix ee ciuw lag .kir.

8 Tnisair qra ix qongw, "Diyhh haa duar, cing ree." Ix jiauww anxnix qniaa. Qycc qra ix qongw, "Muax liw ee snxax, duer guaw."

9 Ix dyrr cud laii duer ix, m jaix tnisair soxx juer si jinx, liac juer si knuar qnir ngirsiong.

10 Ixqing’ qingquer derr id qapp derr zi qowsiuw ee soxjai, qaur taur sniaa ee ticmngg; hitt xee mngg uirdiyhh inx qaqi kuix .kuix. Inx dyrr cud .kir, qniaa quer jit diauu quex, tnixsair liamvnix lirkuix ix.

11 Peter cnixgo, qongw, "Dnaxx guaw jinjniar jaix Jruw crex Ix ee tnisair qiur guaw tuatli Helod ee ciuw, qapp Judea ee vecsnir itjin soxx ngwbang :ee."

12 Ixqing’ sniu bingg jitt xee su, dyrr qaur Johan ee laurbuw, Malia, ee cur (Johan qycc cxingx juer Marko); dirr hiax u jerje langg jurjip decc qidyw.

13 Ix pah guarmngg ee sii, u jaboxginxaw miaa Rloda :ee cud laii mng.

14 Ix zin did Peter ee sniax, in'ui hnuahiw ee enqor byy kuix mngg, jauw zip kir qra langg qongw, "Peter kia dirr mngg-gua."

15 Danrsi inx duiww ix qongw, "Liw decc qongg lar." Jaboxginxaw cud lat qongw jinjniar si ix. Inx dyrr qongw, "Si ix ee tnisair."

16 Peter qycc pah mngg byy suah; inx kuix mngg knuar qnir ix, jin' gonggniac.

17 Ix iyy ciuw qiyr inx byc juer sniax, dyrr duiww inx qongw kiw Jruw jnaixngiu cua ix cud qnax. Qycc qongw, "Diyhh jiong' jiaxee su qra James qapp hniadi qongw." Ix dyrr cud .kir, kir vadd soxjai.

18 Qaur tnixqngx, vingdingx m jaix Peter daxlyc kir, dyrr dua ziauxdong.

19 Helod cue ix be diyc, dyrr simxmng qowsiuw ee vxingx, bingrling tuax inx kir taii. Ix dyrr lirkuix Judea, lyc kir Kaesalea kiarkiw.

20 Helod vutjiw siurkir Tyle qapp Sidon ee langg. Hiax ee langg vaiwtog qinsuii ongg ee zinsinn Blastus qriuu hxyy, in'ui inx ee derhngx si dui' ongg ee derhngx did diyc bixniuu.

21 Helod dirr soxx dniardiyc ee zidqii cing onghok, jre dirr jyrui, dng' bin duiww inx qongw.

22 Vecsnir qiyr qongxx, "Jex si siongrder ee sniax, m si langg ee sniax."

23 Helod byy qruix ingqngx Siongrder, Jruw ee tnisair suisii pah ix. Ix hro tangg qa, kuir dng.

24 Danrsi Siongrder ee dyrliw naxx kuikuah, hing'ong.

25 Barnabas qapp Saul qra jinxjer langg ee su vran bingvik, dyrr dui' Jelusalem dywdngw, cua Johan, cxingx juer Marko :ee, snaqab kir.

13 Dirr Antioc, dirr qauwhue diongx, u sendix qapp qauwsux quixnarr langg, dyrr si Barnabas, qapp cxingx juer Niger ee Simeon, Kylenelangg Lukius, qapp hunhongx ee zinqunx Helod dangjee vue'ngiuw ee Manaen, ixqip Saul.

2 Inx hogsai Jruw decc qimwjiac ee sii, Singwsinn qongw, "Diyhh qra Guaw hunpair Barnabas qapp Saul laii jniaa Guaw driaur inx kir damdngx ee qangx."

3 Dui' anxnix qimwjiac qidyw, ing ciuw hnua inx, dyrr crex inx kir.

4 Inx ixqing’ hrong Singwsinn soxx crex, lyc kir Seleucia, dui' hiax dah junn kir Cyplus.

5 Qaur Salamis, inx tuann Siongrder ee dyrliw dirr Judealangg jiaxee huerdngg; iarr u Johan juer inx ee vangciuw.

6 Qniaa quer tong' haixsu qaur Pafos, duw diyc jit xee qniaa siasut, juer qew sendix ee Judealangg, miarr Bar-Jesus.

7 Hitt langg siongsiongg qapp jongxdog Sergius Paulus snaqab diamr. Jongxdog si cangmiaa ee langg, ix driaur Barnabas qapp Saul laii, rair tniax Siongrder ee dyrliw.

8 Dogdok hitt xee qniaa siasut ee Elymas (ix ee miaa huan'ik dyrr si qniaa siasut :ee) dixdik inx nng langg, rair beh inxiuw jongxdog, hro ix byy sinr.

9 Danrsi Saul, iarr miaa qiyr Paul, hro Singwsinn ciongmuaw, juwbak knuar ix, qongw,

10 "Hnaiwar! Liw jitt xee ciongmuaw jiongww hxang kuixked qapp qan'og :ee, moquiw ee qniaw, jiongww hxang gi ee duiwdik, liw hunrluan Jruw jiaxee jniar lo, iauxx m suah mah?

11 Dnaxx liw knuar, Jruw ee ciuw dirr liw ee sinjniu, liw beh cnimii, jiamrsii be knuar qnir zit." Ix ee bagjiux liamvnix en'ng oamr; siwquer qriuu langg qra kanx.

12 Jongxdog knuar qnir soxx juer ee su, dyrr sinr, dua qiquair Jruw ee qawsi.

13 Paul qapp dangpnua dui' Pafos kuix junn, qaur Pamfylia ee Perga; Johan lirkuix inx, dyr kir Jelusalem.

14 Inx dyrr dui' Perga qniaa, quer kir qaur Pisidia ee Antioc, dng' Anhiyczit zip huerdngg jre lehh.

15 Ludhuad qapp sendix ee ceh tak bingvik, hiaxee quanw huerdngg :ee crex langg jiurqin inx, qongw, "Hniadi ar, linw narr u koxkngr vecsnir ee ue, cniaw qongw."

16 Paul kia .kiw .laii, iyy ciuw qongw,

17 "Led'ui Islaellangg, qapp qingwuir Siongrder :ee, cniaw tniax. Jitt xee Islael vecsnir ee Siongrder qingw lanw ee ledjow, dng' vecsnir cutgua dirr Egipt ee de ee sii, qra inx sringx quann, giac ciuw cua inx cud hiax.

18 Qycc dirr kongwiaw tunlunw, kuan'iongg inx iokliok sir-jap nii quw.

19 Ixqing’ bet Kanaan cid jok ee langg, dyrr jiong' hitt xee toxde vunx hro inx juer giap, iokliok u sir-vah go-jap nii.

20 Jiaxee dairjir liauxau, ing sursux hro inx, qaur sendix Samuel.

21 Ixau vecsnir qriuu jit xee ongg; Siongrder dyrr jiong' Benjamin jipair ee langg, Kis ee qniaw Saul, hro inx; qingquer sir-jap nii quw.

22 Ixqing’ hruer ix, dyrr suanw David juer inx ee ongg; qanjingr ix, qongw, 'Guaw did diyc Jesse ee qniaw David, ix si hac Guaw ee simx, huanrsu beh juntanr Guaw ee jixir.'

23 Dui' jitt langg ee horer, Siongrder jiauww soxx ingwunw :ee, qra Islaellangg lip jit xee Qiuwjuw, dyrr si Jesus.

24 Dng' Ix bue cuttauu ee si, Johan dairsingx ing huanxhuew ee sexlew suantuann dirr Islael ee jiongww vecsnir.

25 Johan decbeh jin ix ee lorjam ee sii, qongw, 'Linw pacsngr guaw si jirjui? Guaw m si Krist. U lorbuew guaw laii :ee, guaw tauw Ix ee eduar iarr byy qraur qeh.'

26 Hniadi ar, Ablaham ee horer, qapp linw diongqanx qingwuir Siongrder ee langg, jitt xee jinxqiur ee dy ixqing’ tuann qaur dirr lanw lar.

27 In'ui kiarkiw dirr Jelusalem ee langg, qapp inx ee qnuahuw, m bad Ix, iarr m bad dagg xee Anhiyczit soxx tak sendix ee ue, jiacc gixdnia Ix, duxduxx si ingwgiam jiaxee ue.

28 Suizenn craa Ix byy sixjue, iauxquxx qriuu Pilate taii Ix.

29 Huanrnarr soxx qiwjair qiw Ix ee ue ixqing’ ingwgiam, dyrr dui' caa nirr siux Ix lyc .laii, he dirr bong-lai.

30 Dogdok Siongrder hro Ix dui' sixlangg diongx qycc uac.

31 Ix jerje zit hro hiaxee dui' Galilee qapp Ix jnriu Jelusalem ee langg knuar .qnir; dnaxx inx u duiww vecsnir juer Ix ee qanjingr.

32 Qycc guanw vyr linw hyw siausid, dyrr si jaw soxx ingwunw ledjow :ee,

33 Dnaxx Siongrder u qra lanw ee qniaxsunx ingwgiam ix; in'ui Ix u hro Jesus qycc uac. Iarr cincniu Sipenx derr zi pnxix qiwjair, qongw, 'Liw dyrr si Guaw ee Qniaw, Guaw qinaxzit snix Liw.'

34 Lun qaur Ix hro Ix dui' sixlangg diongx qycc uac, byy qycc qruix dirr hiuxnua, u anxnix qongw, 'Guaw beh ing David sxingr qycc sidjai ee unhui hro liw.'

35 Qycc vadd pnxix iarr u qongw, 'Liw byy beh hro Liw ee Sxingr :ee duw diyc hiuxnua.'

36 In'ui David dirr ix ee sewdai juntanr Siongrder ee jixir, dyrr kir kunr, qapp ix ee ledjow snaqab he lehh, laii duw diyc hiuxnua;

37 Dogdok Siongrder soxx hro Ix qycc uac :ee byy duw diyc hiuxnua.

38 Hniadi ar, anxnix linw diyhh jaix, dui' jitt langg jiacc u siar jue ee dyrliw tuann hro linw;

39 Linw kyr Moses ee ludhuad, soxx be did diyc cxingx juer gi ee su, qniwnarr kyr jitt langg, dyrr itcer did diyc cxingx juer gi.

40 Soxiw diyhh qinxsin, qniax sendix ee ue qaur dirr linw.

41 Jruw ee ue qongw, 'Biauxsi ee langg ar, linw diyhh knuar, laii gonggniac, laii bedbyy; in'ui dng' linw ee sizit, Guaw qniaa jit hxang su, dyrr si suizenn u langg qra linw qongw, linw iarr m sinr :ee.'"

42 Inx cud .kir ee sii, u langg qriuu inx dirr au xee Anhiyczit ing jiaxee ue qycc qra inx qongw.

43 Huerjiongr ixqing’ siwsnuar, Judealangg qapp zip inx ee qxaur ee qingwkenn ee langg, jerje duer Paul qapp Barnabas; inx qapp inx qongxue, krngr inx dngdngg diamr dirr Siongrder ee xunx.

44 Au xee Anhiyczit, tong' sniaa ee langg cavutdyx longxx jurjip, laii decc tniax Siongrder ee dyrliw.

45 Danrsi Judealangg knuar qnir langg hiacc je, dyrr muaxsimx uanwdor, venrvog Paul soxx qongw :ee, suar vongwdok inx.

46 Paul qapp Barnabas hyxdnaw qongw, "Siongrder ee dyrliw dairsingx duiww linw qongw, si ingqaix. Danrsi linw ixqing’ kiwsag ix, gixduan qaqi be kamx did sriu ingxuac; dnaxx guanw jiaxee beh juanw ngr guarvanglangg lar.

47 In'ui Jruw bad anxnix bingrling guanw qongxx, 'Guaw ixqing’ setlip liw juer guarvangx ee qngx, hro liw juer jinxqiur :ee qaur dirr derqik.'"

48 Guarvanglangg tniax liauw, dyrr hnuahiw, ylyw Siongrder ee dyrliw; huanrnarr siurr dniardiyc beh did diyc ingxuac ee langg longxx sinr.

49 Dui' anxnix, Jruw ee dyrliw venww tuann dirr hitt xee derhngx.

50 Dogdok Judealangg cuivig qingwkenn junquir ee hurzinlangg, qapp sniaa-lai ee taulangg, snix su kunxvig Paul qapp Barnabas, jiong' inx qnuaw cud qingxgua.

51 Inx duiww jiongww langg vnua kir kax ee tohunw, dyr kir Ikonium.

52 Hagsingx muaxsimx hnuahiw, qycc hro Singwsinn ciongmuaw.

14 Inx dirr Ikonium snaqab zip Judealangg ee huerdngg laii qangxlun, drir qaur Judealangg qapp Gleeklangg jerje laii sinr.

2 Danrsi hiaxee m sunrtanr ee Judealangg iydang guarvanglangg ee simx, hro inx uanwhun jiaxee hniadi.

3 Inx dyrr diamr hiax jerje zit, uaxkyr Jruw hyxdnaw laii qongw. Jruw sniuxsur sinziah, qrii su, dui' inx ee ciuw laii jniaa, qanjingr Ix undenw ee dyrliw.

4 Sniaa-lai ee jiongww langg dyrr hunx vingg, uree duer Judealangg, uree duer suwdoo.

5 Hitt sii guarvanglangg, Judealangg, qapp inx ee sirdua rair beh ekeh, lingziok suwdoo, ing jiyhtauu dimr inx.

6 Inx jaix, dyrr dyjauw kir Lykaonia ee Lystla, Derbe jiaxee sniaa, qapp jiu'uii ee derhngx,

7 Dirr hiax tuann hok'imx.

8 Dirr Lystla u jit langg jre lehh, siangkax byy lat, si dui' cutsir dyrr nngw kax, longxx m bad qniaa.

9 Ix tniax Paul qongw dyrliw. Paul juwbak knuar ix, knuar qnir ix u sinr tangx did diyc hyw,

10 Dyrr dua sniax qongw, "Kiw .laii, siangkax kia jniar, tringg srinx." Hitt langg dyrr tiaur kiw laii qniaa.

11 Jiongww langg knuar qnir Paul soxx juer, dyrr ing Lykaunia ee kniukauw dua sniax qongw, "Jiaxee sinbingg jiyh langg ee hxingg limqaur lanw lar."

12 Dyrr cxingx Barnabas juer Zeus; in'ui Paul cuttauu qongxue, dyrr cxingx ix juer Hermes.

13 Sniaa-gua Zeus ee jewsix kanx guu-aw, tec huekuann, qaur mngg-jingg, beh qapp jiongww langg henr jrer.

14 Danrsi suwdoo Barnabas qapp Paul tniax .qnir, dyrr tiah lic snxax, tiaur cud kir jiongww langg ee diongqanx, qiyr qongxx,

15 "Linw dairqex sniaw su qniaa anxnix? Guanw jiaxee qapp linw qangrkuanw iarr si langg, tuann hok'imx, hro linw lirkuix jiaxee byy ngiaxjiah :ee, laii qruix dirr jin'uac ee Siongrder, dyrr si congwjy tnix, de, haiw, qapp qidiongx banrmic :ee.

16 Ix dirr dairsingx ee sewdai, iong'unw banrvangx qniaa inx ee lo.

17 Danrsi Ix m bad byy uirdiyhh vunxsinx henr cud jingwqir, dyrr si qniaa hyw su, dui' tnix lyc ho, jiauww sii cud quexjiw, ing zidsit qapp hnuahiw ciongmuaw linw ee simx."

18 Inx qongw anixnix, limw limw aw qimwjiw jiongww langg byy henr jrer hro inx nardnia.

19 Danrsi u Judealangg dui' Antioc qapp Ikonium laii; inx qiausyx jiongww langg, dyrr ing jiyhtauu dimr Paul. Inx pacsngr ix ixqing’ siw, dyrr tuax ix cud sniaa-gua.

20 Danrsi hagsingx uii ix, ix dyrr kiw laii zip sniaa; qeh zit qapp Barnabas lirkuix hiax, kir Derbe.

21 Ixqing’ tuann hok'imx dirr hitt xee sniaa, hro jerje langg laii juer hagsingx, dyrr dywdngw kir Lystla, Ikonium, qapp Antioc,

22 Qenqor hagsingx ee simx, krngr inx dngdngg diamr dirr sinr; qycc qongw, "Lanw diyhh dui' jerje qankow laii zip Siongrder ee qog."

23 Inx dirr dagg xee qauwhue qra inx setlip soxx qingw ee dniuxlyw, qimwjiac qidyw, dyrr jiong' inx qautog dirr inx soxx sinr ee Jruw.

24 Inx qingquer Pisidia, qaur Pamfylia.

25 Ixqing’ dirr Perga qongw dyrliw, dyrr lyc kir Attalia.

26 Dui' hiax, inx dah junn qaur Antioc, dyrr si inx bad dirr hiax siurr qautog dirr Siongrder ee undenw, laii qniaa inx soxx uanmuaw ee qangx hiax.

27 Ixqing’ qaur, jurjip qauwhue, qongw kiw Siongrder soxx qapp inx qniaa itcer ee su, iarr qongw Siongrder anxjnaixngiu qra guarvanglangg kuix sinr ee mngg.

28 Inx dyrr qapp hagsingx snaqab druar jamxzenn quw.

15 U quixnarr langg dui' Judea lyc .laii, qawsi hniadi, qongw, "Narr byy juntanr Moses ee ludle siurr qatlew, linw dyrr be did diyc qiur."

2 Paul qapp Barnabas qapp inx dua sna' jnex, venrlun, hniadi dyrr pair Paul, Barnabas qapp inx diongqanx lingrgua quixnarr langg, uirr soxx venrlun ee su jnriu Jelusalem, kir qnir suwdoo qapp dniuxlyw.

3 Dui' anxnix qauwhue sangr inx kixsinx. Inx qingquer Foenicia qapp Samalia, qongw kiw guarvanglangg ee quijingr, hro jiongww hniadi dua hnuahiw.

4 Qaur Jelusalem, hro qauwhue qapp suwdoo dniuxlyw jiaplap; inx dyrr qongw kiw Siongrder soxx qapp inx qniaa itcer ee su.

5 Danrsi u quixnarr xee sinwdoo sriok Falise Dongw :ee kiw laii qongw, "Dikkag diyhh qra inx qniaa qatlew, bingrling inx siuw Moses ee ludhuad."

6 Suwdoo qapp dniuxlyw jurjip camsiongg jitt jad su.

7 Ixqing’ venrlun quw quw, Peter dyrr kiw laii duiww inx qongw, "Led'ui hniadi ar, linw longxx jaix, jaw Siongrder dirr linw diongqanx qingw guaw, hro guarvanglangg dui' guaw ee cuir tniax qnir hok'imx ee dyrliw laii sinr.

8 Qycc, bad langg ee simx ee Siongrder qra inx juer qanjingr, ing Singwsinn sniuxsur inx, cincniu sniuxsur lanw jidngiu,

9 Byy hunvet inx qapp lanw, si ing sinr cingkir inx ee simx.

10 Dnaxx sniaw su cir Siongrder, ing lanw ee jow qapp lanw soxx be vue ee dnax, he dirr hagsingx ee amrqunw ar?

11 Lanw si dui' Jruw Jesus ee xunx did diyc qiur, cincniu inx jidngiu, jex si lanw soxx sinr."

12 Jiongww langg longxx jing jing; tniax Barnabas qapp Paul qongw kiw Siongrder ing inx dirr guarvanglangg ee diongqanx soxx qniaa jiaxee sinziah qrii su.

13 Qongw suah, James dyrr rinr qongxx, "Led'ui hniadi ar, cniaw tniax guaw qongw.

14 Simon ixqing’ qongw kiw Siongrder kixtauu jnaixngiu quanwqor guarvanglangg, dui' inx diongqanx cruw vecsnir laii qruix dirr Ix ee miaa.

15 Jiaxee sendix ee ue, iarr qapp jitt xee su sna' hap;

16 Cincniu soxx qiwjair qongxx, 'Jiaxee dairjir liauxau, Guaw beh dywdngw .laii, qycc kiw David dyw .lyc .kir ee vowvnii; Guaw beh qycc kiw hiaxee puawhuai :ee, laii qenwlip ix;

17 Hro qi'uu ee vensnir, qapp qniwnarr hrong Guaw ee miaa ee guarvanglangg, longxx cue Jruw.'

18 Jiaxee ue si dui' sewqanx ee kixtauu henxbingg jiaxee dairjir ee Jruw soxx qongw :ee.

19 Soxiw guaw pacsngr guarvanglangg qruix Jruw :ee, m tangx qiauxziauw ix;

20 Dogdok siaw puex huanhur inx qimwqair gnoxsiong ee uwuer, qapp imluan, qapp jiac diyc siw ee mic, qapp huih.

21 In'ui dui' jaw ixlaii dirr dagg xee sniaa u tuann Moses ee ceh, dyrr si dagg xee Anhiyczit dirr huerdngg soxx tak :ee."

22 Hitt sii, suwdoo, dniuxlyw qapp tong' qauwhue, quat'ir dui' inx diongqanx qingw langg, dyrr si cxingx juer Barsabas ee Judas qapp Silas, jitt nng langg dyrr si hniadi diongx cutdiyh :ee, crex inx qapp Paul, Barnabas dangjee kir Antioc;

23 Ing puex qaudair inx ee ciuw, qongw, "Suwdoo qapp jiaxee lau hniadi, hiongr diamr dirr Antioc, Sylia, qapp Cilicia guarvangx diongx jiaxee hniadi cingxanx.

24 In'ui guanw tniax qnir quixnarr langg dui' guanw diongqanx cud .kir, ing ue qiauxziauw linw, pacluan linw ee simx; qisit m si guanw soxx bingrling :ee.

25 Guanw ixqing’ dangsimx quat'ir, crex soxx qingw :ee qapp guanw soxx tniar ee Barnabas Saul jiurqin linw.

26 Jitt nng langg si uirdiyhh lanw ee Jruw Jesus Krist ee miaa, byy siyh sniwmia :ee.

27 Soxiw crex Judas qapp Silas, inx iarr beh cincuir qongw kiw jiaxee su.

28 In'ui Singwsinn qapp guanw quat'ir, druu jitt quiw hxang iauwqinw ee su ixgua, byy ing dang dnar he dirr linw ee srinx,

29 Dyrr si qimwqair jrer gnoxsiong ee mic, qapp imluann. Linw narr qimwqair jiaxee dyrr e hingtongx. Guan linw ving'anx."

30 Inx hrong crex, dyrr lyc kir Antioc; ixqing’ jurjip jiongww langg, dyrr jiong' puex qaux inx.

31 Jiongww langg tak liauw, hnuahiw hiaxee an'uir ee ue.

32 Judas qapp Silas vunxsinx iarr si sendix, ing jerje ue an'uir hniadi, laii qenqor inx.

33 Diamr hiax u hiacc quw, hniadi dyrr hro inx ving'anx dyr kir jiurqin crex inx :ee.

34 Danrsi Silas dniardiyc diamr dirr hiax.

35 Paul qapp Barnabas diamr dirr Antioc, qapp jerje vadd langg snaqab qawsi langg, tuann Jruw hok'imx ee dyrliw.

36 Quer quixnarr zit, Paul duiww Barnabas qongw, "Lanw diyhh qycc kir jingg tuann Jruw ee dyrliw ee dagg xee sniaa, knuar hniadi jnaixngiu."

37 Barnabas rair beh duar Johan, miaa Marko :ee, snaqab kir.

38 Dogdok Paul pacsngr duar ix kir si byy hap, in'ui ix dirr Pamfylia bad lirkuix inx, byy qapp inx kir juer qangx.

39 Inx dyrr sna' qig, drir qaur dairqex vunkuix. Barnabas duar Marko dah junn kir Cyplus,

40 Paul qingw Silas snaqab kir; hniadi jiong' ix qautog dirr Jruw ee xunx.

41 Ix venww qniaa Sylia qapp Cilicia, qenqor jiaxee qauwhue.

16 Paul qaur Derbe, qycc qaur Lystla. Duxdng dirr hiax u jit xee hagsingx miaa Timoti, ix ee laurbuw si Judea sinr ee hurzinlangg, ix ee laurve si Gleeklangg.

2 Ix hro Lystla qapp Ikonium jiaxee hniadi soxx ylyw.

3 Paul rair jitt langg qapp ix kir; hiaxee soxjai ee Judealangg longxx jaix ix ee laurve si Gleeklangg, dyrr qra ix qniaa qatlew.

4 Inx qingquer jiaxee sniaa ee sii, jiong' Jelusalem suwdoo qapp dniuxlyw soxx dniardiyc ee bingrling tuann hro inx siuw.

5 Dui' anxnix jiaxee qauwhue sinr naxx qenqor, langgiac zidzit qetnix.

6 Inx qingquer Flygia qapp Galatia ee derhngx, in'ui Singwsinn bad qimr inx tuann dyrliw dirr Asia,

7 Dyrr qniaa qaur Mysia ee venqair, sniu beh kir Bitynia; Jesus ee Sinn m jrunw.

8 Inx dyrr dui' Mysia qingquer, lyc qaur Tloas.

9 Paul mii .sii knuar qnir ngirsiong. U jit xee Macedonialangg kia lecc qriuu ix qongxx, "Cniaw quer laii Macedonia vangjan guanw."

10 Paul ixqing’ knuar qnir ngirsiong, guanw jiaxee liamvnix iwair beh kir Macedonia, liac juer si Siongrder driaur guanw tuann hok'imx hro inx.

11 Soxiw dui' Tloas dah junn, diddit qaur Samotlace, qeh zit quar Neapolis.

12 Dui' hiax qaur Filippi, dyrr si Macedonia hitt der ee tauu jit xee sniaa, iarr si Rlomalangg hunsed ee sniaa. Guanw dirr jitt xee sniaa diamr quixnarr zit.

13 Dirr Anhiyczit cud sniamngg gua qaur hyy-vnix, pacsngr dirr hiax u qidyw ee soxjai; dyrr jre lehh, qapp soxx jurjip ee hurzinlangg damlun.

14 U jit xee bre jxiw sig vor ee hurzinlangg, miaa Lydia laii tniax, ix si Tyatila Sniaa ee langg, vingsor qingwvair Siongrder. Jruw kuix ix ee simx, hro ix juanw ngr Paul soxx qongw ee ue.

15 Ix qapp ix ee qrex ixqing’ siurr sexlew, dyrr qriuu guanw, qongw, "Narr liac guaw juer jinsit sinr Jruw ee langg, cniaw qaur guaw ee qrex druar." Dyrr qiongg lauu guanw.

16 Au .laii guanw kir qidyw ee soxjai, u jit xee luxvi duw diyc guanw, ix hro vokquar ee qxuiw jnriu srinx, vingsor ing vokquar hro hiaxee juxlangg dua tanr jnii.

17 Ix duer Paul qapp guanw, qiyr qongxx, "Jiaxee langg dyrr si Jiww Quann Siongrder ee lovok, ing jinxqiur ee lo tuann hro linw."

18 Ix jerje zit anxnix qniaa. Paul jin' iamwhun, uat dngw srinx qra hitt xee qxuiw qongw, "Guaw tog Jesus Krist ee miaa bingrling liw dui' ix cud .kir." Qxuiw jiksii cud .kir.

19 Ix hiaxee juxlangg knuar qnir tanr jnii ee ngwbang ixqing’ sitlyc, dyrr liac Paul qapp Silas, tuax inx zip queci, kir qnir iuxsiqnuax,

20 Qycc qewsangr qaur jniursiqnuax, qongw, "Jiaxee langg si Judealangg, dua qiauxziauw lanw ee sniaa,

21 Tuann lanw Rlomalangg soxx m ingqaix siuw, m ingqaix qniaa ee quile."

22 Jiongww langg qui' qrunn kiw laii qongqig inx. Jniursiqnuax vrag inx ee snxax, bingrling ing qunr pah inx.

23 Pah jin' je xe, dyrr qnuaix inx lyc qnax, huanhur qor qnax :ee giamqinw qowsiuw;

24 Qor qnax :ee siurr jitt hy bingrling, dyrr qnuaix inx lyc lairdingg qnax, qowding inx ee kax dirr caqongg nirr.

25 Danrsi vnuawmii Paul qapp Silas qidyw gimm six, ylyw Siongrder, qnuaix dirr qnax nirr ee langg iarr juwir decc tniax.

26 Hutzenqanx de dua drang, drir qaur qnax ee derqix longxx iydang; jiaxee mngg iarr liamvnix longxx kuix, jiongww langg ee hingqu itjin lag.

27 Qor qnax ee langg cnew, knuar qnir qnamngg kuix, pacsngr qnasiuu longxx ixqing’ dyjauw, dyrr vuic dyx beh taii qaqi.

28 Danrsi Paul dua sniax qiyr qongxx, "Byc did sionghai qaqi, guanw longxx dirr jiax."

29 Qor qnax ee langg qiyr langg giac huew laii, tiaur .zip .kir, gniahgniac cuah, pag dirr Paul qapp Silas ee binrjingg,

30 Cua inx cud .laii, qongw, "Sensnix ar, guaw diyhh jnaixngiu juer, jiacc e did diyc qiur?"

31 Rinr qongxx, "Diyhh sinr Jruw Jesus, liw qapp liw ee qrex dyrr did diyc qiur."

32 Inx dyrr ing Jruw ee dyrliw qongw hro ix qapp ix qrex-lai longxjongw ee langg tniax.

33 Dirr hitt mii hitt sii, qor qnax ee langg cua inx kir sew inx ee siongx; ix qapp juann qrex ee langg jiksii longxx siurr sexlew.

34 Ix cua inx jnriu ix ee cur, virvan hro inx jiac; ixqing’ sinr Siongrder, dyrr qapp tong' qrex dua hnuahiw.

35 Qaur tnixqngx, jniursiqnuax crex geiac laii, qongw, "Vangr hiaxee langg."

36 Qor qnax :ee jiong' hiaxee ue qra Paul qongw, "Jniursiqnuax crex langg laii beh vangr linw; dnaxx tangx cud .laii, anzenn kir."

37 Danrsi Paul qra hiaxee langg qongw, "Guanw si Rlomalangg, bue simxmng, dyrr qionghingg pah guanw, qycc qnuaix guanw lyc qnax. Dnaxx beh amwjni qnuaw guanw cud mah? Dikkag be juer .did, diyhh inx cinsinx laii cua guanw cud."

38 Geiac jiong' jiaxee ue huehok jniursiqnuax; jniursiqnuax tniax qnir inx si Rlomalangg, dyrr qniax.

39 Dyrr laii koxkngr inx, cua inx cud, cniaw inx lirkuix hitt xee sniaa.

40 Inx cud qnax, zip Lydia ee cur; ixqing’ qnir diyc jiaxee hniadi, dyrr koxkngr inx, jiacc lirkuix hiax.

17 Inx qingquer Amfipolis qapp Apollonia, qaur Tessalonika, dirr hiax u Judealangg ee huerdngg.

2 Paul jiauww vingsiongg ee kuanw zip kir jiurqin inx, dirr snax xee Anhiyczit, inw Singwqingx qapp inx venrlun,

3 Kuitiah jixbingg Krist ingqaix siurr hai, dui' sixlangg diongx qycc uac; qycc qongw, "Guaw soxx duiww linw tuann ee Jesus dyrr si Krist."

4 Inx diongqanx uree siurr koxkngr, dyrr qui'uaw Paul qapp Silas; qycc u qingwkenn ee Gleeklangg vutjiw je, junquir ee hurzinlangg iarr be jiyw.

5 Dogdok Judealangg uanwdor, jiyx queci ee huixlui quixnarr langg, qiausyx vecsnir qui' qrunn jurjip, ziauxdong tong' sniaa, qrongx zip Jason ee cur, rair liac inx cud laii qaux hro vecsnir.

6 Byy duw .diyc, dyrr tuax Jason qapp quixnarr xee hniadi, sangr hro derhngqnuax, qiyr qongxx, "Jiaxee pacluan tnie ee langg iarr qaur jiax.

7 Jason jiaplap inx; jiaxee langg longxx uiqec Kaesar ee bingrling, qongw u vadd xee ongg, Jesus."

8 Jiongww vecsnir qapp derhngqnuax tniax qnir jex, dyrr qniahniaa.

9 Ixqing’ siux Jason qapp qi'uu ee langg ee vyxjng, dyrr vangr inx.

10 Dui' anxnix hniadi suisii crex Paul qapp Silas tauwmii kir Belea. Nng langg ixqing’ qaur der, dyrr zip Judealangg ee huerdngg.

11 Hiaxee langg viw Tessalonikalangg kacc bunbingg, in'ui inx juwir siurr dyrliw, dagg zit cakyw Singwqingx, knuar jiaxee su qyxzenn u anxnix iacc byy.

12 Soxiw qidiongx u jerje langg sinr; qycc u Gleek junquir ee hurzinlangg qapp davolangg be jiyw.

13 Dogdok Tessalonika ee Judealangg jaix Paul dirr Belea tuann Siongrder ee dyrliw, dyrr qaur hiax, iydang qiauxziauw jiongww langg.

14 Hniaxdi liamvnix crex Paul kir qaur haiw-vnix; dogdok Silas qapp Timoti iuguann druar hiax.

15 Sangr Paul ee langg cua ix qaur Atens; siurr bingrling qiyr Silas qapp Timoti qinw qinw laii jiurqin ix, dyrr dyr .kir.

16 Paul dirr Atens tingwhau inx, knuar qnir muaw sniaa longxx si gnoxsiong, dyrr siongsimx diyhqib.

17 Soxiw dirr huerdngg qapp Judealangg ixqip qingwkenn ee langg venrlun, dagg zit dirr queci nirr qapp soxx duw .diyc .ee iarr si anxnix.

18 U Epikulea qapp Stoic nng qauwmngg ee detsu qapp ix venrlun. Uree qongw, "Jitt xee kiyh langg ee uerpyh :ee beh qongw simxmih?" Uree qongw, "Ix si cincniu tuann vadd vangqog ee quixsinn :ee." Jex si in'ui ix tuann Jesus qapp qycc uac ee dyrliw.

19 Inx dyrr cua ix qaur Aleopagus, qongw, "Liw soxx qongw sinx ee qxaur, guanw tangx did diyc jaix mah?

20 In'ui liw ing qiquair ee su tuann zip guanw ee hnirkangx, soxiw guanw rair jaix hiaxee si simxmih iwsur."

21 (Atenslangg qapp diamr hiax ee cutguarlangg be qor did vadd hxang su, dogdok si jiong' sinx ee su laii qongw, laii tniax nardnia.)

22 Paul kia dirr Aleopagus diongx, qongw, "Atenslangg ar, guaw knuar linw huanrsu qingwuir sinbingg, jamxzenn zedsimx.

23 In'ui guaw decc qnia'iuu ee sii knuar qnir linw soxx qingwvair :ee, duw diyc jit jxy dnxuaa, dingxbin siaw qongxx, 'M BAD EE SIONGRDER.' Linw soxx m bad laii qingwvair :ee, guaw ing Ix laii qra linw qongw.

24 Hitt xee congwjy sewqanx qapp qidiongx banrmic ee Siongrder, qiwzenn si tnide ee Jruw, byy kiarkiw dirr ciuw jy ee dxen;

25 Iarr byy hro langg ee ciuw hogsai, naxx cincniu Ix u soxx kiamwkueh; si qaqi ing uahmia, cuanxkuir, qapp banrmic hro jiongww langg.

26 Ix qycc congwjy banrvangx ee langg, dui' jit xee vunxguann, kiarkiw dirr juann derbin, qycc qra inx han dairsingx dniardiyc ee siqii, qapp soxx kiarkiw ee derqair;

27 Si beh hro inx cue Siongrder, qiamxcaiw tangx cuixmoo laii did .diyc, qisit Ix lirkuix lanw dagg langg byy hng.

28 In'ui lanw diamr dirr Ix laii uac, laii dinxdang, laii dilehh; cincniu linw diongqanx juer six ee langg uree u qongw, 'In'ui lanw jiaxee iarr si Ix ee qniaxlui.'

29 Dnaxx qiwzenn si Siongrder ee qniaxlui, dyrr m ingqaix liac juer Siongrder ee vunxjid cincniu qimx, ginn, jiyc, langg ee qanghux, langg ee simsu soxx diaudog :ee.

30 Hiaxee m jai'ngiaw ee sidai, Siongrder byy kingkamr. Dnaxx dyrr bingrling dagg soxjai ee langg longxjongw diyhh huanxhuew,

31 In'ui u dniardiyc jit zit, beh ing Ix soxx setlip ee langg, jiauww qonggi simxpnuar tnie; si dui' sixlangg diongx hro Ix qycc uac, hro jiongww langg u vinqir tangx sinr."

32 Inx tniax qnir sixlangg qycc uac ee ue, uree ciyr ix, uree qongw, "Guanw beh qycc tniax liw qongw jex."

33 Dui' anxnix Paul dui' inx diongqanx cud .kir.

34 Danrsi u quixnarr langg uaw ix laii sinr; diongqanx u Aleopagus ee hueruann Dionysius, qapp jit xee hurzinlangg, miaa qiyr Damalis, qycc iarr u vadd langg.

18 Jitt diap liauxau, Paul lirkuix Atens, qaur Kolinto,

2 Duw diyc jit xee Judealangg, miaa Aquila, cutsir dirr Pontus, qapp ix ee bow Pliskilla, duxaxx dui' Itali laii, in'ui Klaudius bingrling Judealangg longxx lirkuix Rloma.

3 Paul dyrr jiurqin inx, in'ui ix qapp inx juer qangg qangge, dyrr qapp inx snaqab diamr, hap decc juer. Inx ee qangge dyrr si juer vowvnii.

4 Dagg xee Anhiyczit, Paul dirr huerdngg venrlun, koxkngr Judealangg qapp Gleeklangg.

5 Silas qapp Timoti dui' Macedonia lyc .laii ee sii, Paul uirdiyhh dyrliw vutjiw vikced, duiww Judealangg qanjingr Jesus si Krist.

6 Inx duiwdik ix laii vongwdok ee sii, Paul dyrr vnua snxax, duiww inx qongw, "Linw ee huih qruix dirr linw, byy guaw ee quanhe; dnaxx liauxau guaw beh jiurqin guarvanglangg lar."

7 Ix dyrr lirkuix .kir, zip jit langg ee cur, hitt langg miaa Justus, si qingwvair Siongrder ee langg, ix ee cur dirr huerdngg ee qecviah.

8 Quanw huerdngg ee langg, miaa Klispus, qapp juann qrex sinr Jruw. Kolintolangg iarr u jerje tniax .qnir, u sinr laii siurr sexlew.

9 Mii .sii Jruw dirr ngirsiong diongx duiww Paul qongw, "Byc did qniax, diyhh qongw, m tangx jing jing,

10 Guaw qapp liw dilehh; in'ui Guaw u jerje vecsnir dirr jitt xee sniaa."

11 Paul druar hiax jit nii qycc lak guehzit; dirr inx diongqanx jiong' Siongrder ee dyrliw laii qawsi langg.

12 Gallio juer Aqaia jongxdog ee sii, Judealangg dangsimx qongqig Paul, tuax ix qaur qongjy jingg, qongw,

13 "Jitt xee langg krngr langg vair Siongrder byy jiauww ludhuad."

14 Paul duxduxx beh kuix cuir, Gallio qra Judealangg qongw, "Judealangg ar, setsuw si simxmih vutgi qan'og ee su, jiauww lriw guaw diyhh iong'unw linw;

15 Danrsi venrlun gengiw, miazi, qapp linw ee ludhuad, linw kir qaqi liaurliw, guaw m rair simxpnuar jiaxee."

16 Ix dyrr qra inx qnuaw lirkuix qongjy jingg.

17 Jiongww langg liac quanw huerdngg ee Sostenes, dirr qongjy jingg pah ix. Jiaxee dairjir Gallio longxx byy liac juer iauwqinw.

18 Paul iauxx diamr quixnarr zit, dyrr lirvet jiaxee hniadi, dah junn beh kir Sylia, Pliskilla qapp Aquila snaqab kir. In'ui u he guan ee enqor, ix dyrr dirr Cenqlea jenw taumngg.

19 Inx qaur Efesus, Paul dyrr lauu inx druar hiax, qaqai zip huerdngg, qapp Judealangg venrlun.

20 Inx cniaw ix qex druar quiw zit; ix byy rinw,

21 Dyrr lirvet inx, qongw, "Siongrder narr jrunw, guaw beh dywdngw laii jiurqin linw." Dyrr kuix junn lirkuix Efesus.

22 Qaur Kaesalea, dyrr jnriu kir qra qauwhue cingxanx, jiacc lyc kir Antioc.

23 Druar hiax quiw zit, qycc kiw srinx, jiauww cuwsu qingquer Galatia qapp Flegia ee derhngx, qenqor jiongww hagsingx.

24 U jit xee Judealangg, miaa Apollos, qaur Efesus. Ix cutsir dirr Alesandlia, u hagbun, Singwqingx iarr vutjiw e.

25 Ix bad hagsip Jruw ee lo, zedsimx jiong' Jesus ee su siongser qongw laii qawsi langg, danrsi ix jixu jaix Johan ee sexlew nardnia.

26 Ix dirr huerdngg hyxdnaw laii qongw. Aquila qapp Pliskilla tniax .qnir, dyrr cua ix laii, duiww ix vailet Siongrder ee lo kacc siongser.

27 Apollos rair kir Aqaia ee sii, hniadi kuanwbenw ix, qycc qiar puex cniaw hagsingx jiaplap ix. Ix qaur liauxau, vangjan hiax ee sinwdoo;

28 In'ui ix dirr jiongww langg ee binrjingg cud lat vren dyw Judealangg, inw Singwqingx jixbingg Jesus si Krist.

19 Apollos dirr Kolinto ee sii, Paul qingquer dingxsir ee derhngx, qaur Efesus, duw diyc quixnarr xee hagsingx. Ix mng inx qongxx, "Linw sinr ee sii bad sriu diyc Singwsinn .byy?"

2 Rinr qongxx, "Lenrr u Singwsinn ee sniuxsur iacc byy, guanw iarr m bad tniax .qnir."

3 Ix qongw, "Anxnix, linw siurr sexlew laii qruix dirr simxmih ar?" Inx dyrr qongw, "Johan ee sexlew."

4 Paul qongw, "Johan qniaa huanxhuew ee sexlew, qra vecsnir qongw diyhh sinr duewbuew ix laii :ee, dyrr si Jesus."

5 Hiaxee langg tniax .qnir, dyrr siurr sexlew qruix dirr Jruw Jesus ee miaa.

6 Paul qra inx hnua ciuw, Singwsinn dyrr qaur dirr inx; inx suisii qongw jiaxee kniukauw qapp sendix ee ue.

7 Qiong iokliok jap-zi langg.

8 Paul zip huerdngg hyxdnaw laii qongw. Ligquer snax guehzit quw, ing Siongrdewqog ee su laii venrlun koxkngr.

9 U quixnarr langg gnirsimx m sunrtanr, dng' jiongww langg ee binrjingg huixvongr jitt xee Lo. Paul dyrr lirkuix inx, iarr hro hagsingx qapp inx sna' li, dyrr dirr Tylannus ee yhdngg zidzit venrlun.

10 Cincniu anxnix nng nii quw, drir qaur diamr dirr Asia ee langg bylun Judea, Gleek, longxx tniax qnir Jruw ee dyrliw.

11 Siongrder ing Paul ee ciuw qniaa hranw did u ee quanlingg,

12 Simrjiww u langg dui' ix ee sinkux tec ciuxqinx, iacc si uisinqunn he dirr vnirlangg ee sinjniu, inx ee vni dyrr trer .kir, oksinn iarr cud .kir.

13 Danrsi u quixnarr xee siwquer qniaa, liam jxiur qnuaw qxuiw ee Judealangg, duiww hiaxee hro oksinn jnriu srinx ee langg jurjuanx qiyr Jruw Jesus ee miaa, qongw, "Guaw uaxkyr Paul soxx tuann ee Jesus, bingrling linw cud .kir."

14 U Judealangg ee jewsitauu Sceva cid xee qniaw, iarr qniaa jitt xee dairjir.

15 Oksinn rinr qongxx, "Jesus, guaw jaix Ix; Paul guaw iarr bad ix; danrsi linw si jirjui ar?"

16 Hro Oksinn jnriu srinx :ee ee langg dyrr tiaur dirr inx sinjniu, ngiaa inx qidiongx nng langg, apjer inx, drir qaur inx tngwvakteh, siursiongx, jauw cud hitt qingx cur.

17 Dirr Efesus kiarkiw ee Judealangg qapp Gleeklangg longxx jaix, byy byy qniahniaa :ee; Jruw Jesus ee miaa dyrr dua inghenw.

18 Ixqing’ sinr ee langg jerje qaur, bingg bingg zin, qycc qongw kiw inx ee soxx qniaa.

19 Vingsor qniaa huatsut :ee, iarr u jerje langg jiong' inx ee ceh jurjip, he dirr jiongww langg ee binrjingg laii siyx; sngr inx ee qewjnii, dyrr jaix dat ginn go-bxan.

20 Jruw ee dyrliw dua dua hing'ong diksingr, dyrr cincniu anxnix.

21 Jiaxee su ixqing’ bingvik, Paul dniardiyc iwsur, qingquer Macedonia qapp Aqaia, jiacc beh kir Jelusalem, qongw, "Qaur hiax liauxau, guaw iarr diyhh kir knuar Rloma."

22 Dyrr crex qinsuii ix ee jiongdiongx, Timoti qapp Elastus, nng langg kir Macedonia; vunxsinx jiamrsii druar Asia.

23 Dngsii, uirdiyhh Jruw ee Lo, u kiw dua ziauxdong.

24 U jit xee gincniu, miaa Demetlius, vingsor juer Diana ee ginkamx, ix hro juer jitt hy qangx ee langg tanr jnii be jiyw;

25 Ix jurjip inx, ixqip tanr jitt hy jiac ee langg, qongw, "Dairqex, linw jaix lanw uaxkyr jitt xee ciuxge laii tanr jnii.

26 Dnaxx jitt xee Paul m na dirr Efesus, iarr cavutdyx venww Asia, ing ix ee kuanwbenw laii behik jerje langg, qongw, 'Ciuw soxx jrngx :ee m si sinbingg'; jex si linw soxx knuar .qnir, soxx tniax .qnir .ee.

27 Cincniu anxnxi, m na lanw jitt hy qanggiap hro langg knuawkinx, dua luxsinn Diana ee biy iarr beh bagde hro langg knuar byy, qycc venww Asia qapp tnie soxx vair ee Diana beh srid ix ee uihongx."

28 Inx tniax .qnir dyrr dua siurkir, qiyr qongxx, "Dua ar! Efesuslangg ee Diana!"

29 Tong' sniaa ziauxluan. Inx liac qapp Paul dangjee qniaa :ee ee Macedonialangg Gaius qapp Alistarqus, dyrr dangsimx keh zip hiwhngg.

30 Paul simx sniu rair zip kir qnir vecsnir, hagsingx m jrunw.

31 Iauxx u Asia quiw xee taubak, si Paul ee ving'iuw, crex langg krngr ix byc did morhiamw zip hiwhngg.

32 Huerjiongr hunluan, jit langg huah jit kuanw; duarvnuar m jaix si in'ui sniaw su laii jurjip.

33 U langg kanx Alesander cud laii dirr jiongww langg ee diongqanx, Judealangg iarr sag ix jinwjingg. Alesander iyy ciuw, rair duiww vecsnir hunsor.

34 Jiongww langg jaix ix si Judealangg, dyrr qangg sniax qiyr qongxx, "Dua ar! Efesuslangg ee Diana!" Cincniu anxnix, iokliok jit sii quw.

35 Suqiwqnuax ixqing’ hro jiongww langg anjing, dyrr qongw, "Efesuslangg ar, jirjui m jaix Efesuslangg ee sniaa, dyrr si qowsiuw dua Diana ee dxen, qapp dui' Zeus soxx qangr lyc ee sxiong ar?

36 Jiaxee su ixqing’ be venrvog .did, linw jiongww langg diyhh jing jing, m tangx ciongvong.

37 Hyhongw jiaxee langg m si tautec biy-lai ee mic, iarr m si vongwdok lanw ee luxsinn :ee, linw qingwzenn duar inx qaur jiax.

38 Narr Demetlius ixqip hiaxee uaw ix ee saihu qapp langg' u dairjir, dyrr u tnxiax, u sna' qryr ee zidqii, iarr u jongxdog, dairqex tangx duiwsinr.

39 Linw narr mng vadd mic su, tangx dirr hable ee hue laii gixduan.

40 Si in'ui qinaxzit byy enqor ee ziauxluan, qniax lanw be benw did siurr camng; qycc iarr byy e tangx sueh jitt xee jurhue ee in'iuu."

41 Qongw suah, dyrr snuawhue.

20 Hanxhua ixqing’ dnia, Paul qiyr hagsingx laii, krngr inx, dyrr qapp inx lirvet, kixsinx beh kir Macedonia.

2 Ixqing’ qingquer hiaxee derhngx, ing jerje ue koxkngr inx, dyrr qaur Gleek.

3 Diamr hiax snax guehzit, beh dah junn kir Sylia, Judealangg sed qrer beh hai ix, ix dyrr dniardiyc iwsur dui' Macedonia dywdngw.

4 Duer ix kir Asia ee langg, u Belealangg, Pilo ee qniaw Sopater; Tessalonialangg Alistarqus qapp Sekundus; Derbelangg Gaius qapp Timoti; qycc u Asialangg Tyqikus qapp Tlofimus.

5 Jitt quiw langg dairsingx kir, dirr Tloas tingwhau guanw.

6 Duqnawjeh au, guanw dui' Filippi kuix junn, go zit qaur Tloas, qapp inx sionghue; diamr hiax cid zit.

7 Cid zit ee tauu jit zit, guanw jiaxee jurjip beh vreh vniaw, Paul beh dirr qeh zit kixsinx, dyrr qapp inx qangxlun dyrliw, cenn qaur vnuawmii.

8 Guanw soxx jurjip ee lxauu u diamw jerje ee dingx.

9 U jit xee siauwlenlangg, miaa Eutyqus, jre dirr txangx-aw dingw kunr dang binn. Paul qangxlun quw, siauwlenlangg in'ui kunr .kir, dui' snax janr lxauu vuac .lyc .laii. Langg laii huu ix, ix ixqing’ siw lar.

10 Paul lyc kir pag dirr ix ee sinjniu, py ix, qongw, "Linw byc juer sniax; ix ee hxunn iauxx dilehh."

11 Dyrr qycc jnriu kir vreh vniaw laii jiac, snaqab damlun quw quw, qaur tnixqngx dyrr kixsinx.

12 Ginxaw ixqing’ uac, langg cua ix laii, dua siurr an'uir.

13 Guanw dairsingx jnriu junn, kuix junn kir Assos, beh dirr hiax jicjiab Paul; in'ui ix u anxnix huanhur, qaqi beh dui' lo kir.

14 Ix ixqing’ dirr Assos qapp guanw sionghue, guanw dyrr jrih ix jnriu junn, kir Mitylene.

15 Dui' hiax kuix junn derr zi zit qaur Qios ee duiwbin. Qeh zit, junn qruax dirr Samos, qycc jit zit qaur Miletus.

16 In'ui Paul quat'ir dah junn siamw quer Efesus, benw did quw quw diamr dirr Asia, dyrr qnuaxqinw qniaa, knuar e tangx dirr Gorsunjeh qaur Jelusalem.

17 Ix dui' Milerus crex langg qaur Efesus, cniaw qauwhue ee dniuxlyw laii.

18 Inx ixqing’ qaur, ix dyrr duiww inx qongw, "Linw jaix guaw dui' kixtauu dac qaur Asia-de ee zit, tauu qaur buew qapp linw jnaixngiu.

19 Guaw hogsai Jruw, huanrsu kiamsunr, qycc lrauu bagsaiw, qycc dui' Judealangg ee bohai ligquer ciwlen;

20 Huanrr u lirig :ee, guaw m bad qiuquec byy qra linw qongw, laii qawsi linw, bylun dirr jiongww langg ee binrjingg, iacc si dirr jiaxee zinqunx jingg;

21 Duiww Judea qapp Gleeklangg laii jingwbingg, diyhh ngr Siongrder laii huanxhuew, qycc diyhh ngr lanw ee Jruw Jesus Krist laii sinr.

22 Dnaxx guaw ee simsinn siurr vak kir Jelusalem, m jaix dirr hiax beh duw diyc jnaixngiu;

23 Dogdok Singwsinn dirr dagg xee sniaa duiww guaw jingwbingg, qongw u syxlen qapp huanrlan decc tingwhau guaw.

24 Danrsi guaw byy liac sniwmia juer iauwqinw, laii knuar juer vyxvuer, dogdok si beh jin guaw ee lorjam, qapp dui' Jruw Jesus soxx sriu ee jithun, laii jingwbingg Siongrder undenw ee hok'imx.

25 Guaw vingsor siwquer qniaa dirr linw diongqanx tuann Siongrder ee qog, dnaxx guaw jaix linw jiongww langg byy qycc qnir guaw ee bin.

26 Soxiw guaw qinaxzit duiww linw qanjingr, narr u langg dimlunn, guaw byy jiksingg.

27 In'ui guaw m bad qiuquec byy ing Siongrder ee jixir itjin qra linw qongw.

28 Linw diyhh qaqi qinxsin, iarr diyhh uirr juann qrunn qinxsin, Singwsinn dirr inx diongqanx setlip linw juer qamdog, laii jiauwqor Siongrder ee qauwhue, dyrr si Ix ing qaqi ee huih soxx did .diyc .ee.

29 Guaw jaix guaw lirkuix liauxau, beh u hiong'og ee cailongg zip linw diongqanx, byy siyh ngiuu-qrunn;

30 Qycc dui' linw qaqi ee diongqanx, beh u langg kiw laii qongw gigliw ee ue, rair inxiuw hagsingx tranr ix.

31 Soxiw linw diyhh qingxsingw, qiwliam guaw snax nii ee quw, mizit byy suah, lrauu bagsaiw laii qingxqair linw dagg langg.

32 Dnaxx guaw jiong' linw qautog Siongrder, qapp Ix undenw ee dy, jex si e qenwlip linw, hro linw did diyc giap dirr longxjongw jniaa sxingr ee langg ee diongqanx.

33 Guaw m bad tamx langg ee ginn, qimx, ihok.

34 Linw qaqi jaix, jitt nng qix ciuw u qiongqib guaw ee kiamwing, ixqip qapp guaw dilehh ee langg.

35 Guaw huanrsu juer linw ee bo'ngiu, hro linw jaix diyhh anxninx diyhbuaa, laii hucii luanxziok ee langg; qycc diyhh qir did Jruw Jesus vunxsinx ee ue, qongw, 'Hro langg' :ee, viw dui' langg' tec :ee, kacc u hokkir.'"

36 Qongw suah, qui lyc qapp inx jiongww langg qidyw.

37 Jiongww langg dua tikaur, py Paul ee amrqunw, jimx ix;

38 Derr id huanlyw :ee, dyrr si ix soxx qongw ee ue, ixau be qycc qnir diyc ix ee bin. Dyrr sangr ix lyc junn.

21 Guanw ixqing’ lirvet inx kuix junn, itdit qaur Kos, qeh zit qaur Rhodes, dui' hiax qycc qaur Patala;

2 Duw diyc jit jiah junn beh quer kir Foenicia, dyrr dah jitt jiah junn kixsinx.

3 Knuar qnir Cyplus, dui' jniawvingg qniaa .quer, qaur Sylia, dirr Tyle jnriu hnua, in'ui junn dirr hiax siarjair.

4 U cue diyc hagsingx, dyrr qapp inx druar cid zit; inx dui' Sinn qamxdong, qra Paul qongw byc did qniaa qaur Jelusalem.

5 Jiaxee zit ixqing’ muaw, guanw kixsinx qniaa, jiongww langg qapp boxqniaw sangr guanw qaur sniaa-gua, dyrr longxx qui lyc dirr haiw-vnix qidyw, dairqex sna' srii.

6 Guanw jnriu junn, inx dyr kir inx daux.

7 Guanw dui' Tyle juixlo longxx qniaa jin, dyrr qaur Plolemais, qra hniadi cingxanx, qapp inx druar jit zit.

8 Qeh zit kixsinx qaur Kaesalea, zip tuann hok'imx ee langg Filip ee qrex, qapp ix snaqab druar; ix si hitt cid langg diongx ee jit xee.

9 Ix u sir xee jaboxqniaw, longxx si jairsikluw, iarr decc juer sendix.

10 Guanw diamr hiax quixnarr zit, u sendix, miaa Agabus, dui' Judea lyc .laii.

11 Ix jiurqin guanw, tec Paul ee duar, vak dirr qaqi ee kaciuw, qongw, "Singwsinn qongw, 'Judealangg dirr Jelusalem beh anxnix vak jitt diauu duar ee juxlangg, qaux dirr guarvanglangg ee ciuw.'"

12 Guanw tniax qnir jiaxee ue, dyrr qapp hitt soxjai ee langg krngr Paul m tangx jnriu Jelusalem.

13 Paul dyrr rinr qongxx, "Linw sniaw su tikaur, laii jyjag guaw ee simx ar? Guaw uirdiyhh Jruw Jesus ee miaa, m na siurr vak, dyrr siw dirr Jelusalem, iarr guanrir lar."

14 Ix m siurr koxkngr, guanw dyrr suah, qongw, "Jruw ee jixir did diyc jniaa, dyrr si."

15 Jiaxee zit liauxau, guanw siusip hingliw, jnriu Jelusalem.

16 Kaesalea quixnarr xee hagsingx qapp guanw kir, iarr cua jit xee Cypluslangg Mnason, ix si qu ee hagsingx; guanw beh hiyh inx daux.

17 Qaur Jelusalem, hniadi hnuahiw jicjiab guanw.

18 Qeh zit, Paul qapp guanw zip kir qnir James; jiongww dniuxlyw iarr dilehh.

19 Paul ixqing qra inx cingxanx, dyrr jiong' Siongrder ing ix juer qangx, soxx qniaa dirr guarvangx :ee, jit hxang jit hxang qongw bingg.

20 Inx tniax .qnir dyrr qruix ingqngx Siongrder; iarr duiww Paul qongw, "Hniadi ar, liw knuar qnir Judealangg ee diongqanx sinr :ee zuarr je bxan, longxx si uirdiyhh ludhuad decc zedsimx;

21 Inx bad tniax qnir langg qongw, qongxx liw qawsi guarvangx diongx ee Judealangg longxx vue Moses, qongxx byc did qra inx ee qniaw qniaa qatlew, iarr byc did tranr jiaxee quile.

22 Dnaxx beh jnaixngiu? Inx dikkag e tniax qnir liw laii.

23 Soxiw guanw soxx qra liw qongw :ee, liw diyhh qniaa ix. Guanw jiax u sir xee langg he guan;

24 Liw cua jiaxee langg qapp inx jniaa cingkir, cud soxhuir hro inx tir taumngg; anxnix dyrr jiongww langg e jaix soxx tniax qnir qongw kiw liw ee dairjir, si byngiaw; liw vunsinx iarr si siuw ludhuad laii qniaa.

25 Lun qaur sinr Jruw ee guarvanglangg, guanw ixqing’ bad qiar puex, gixdnia diyhh qimxqair jrer gnoxsiong ee mic, qapp huih, qapp nic siw ee mic, qapp imluan."

26 Paul dyrr cua hiaxee langg, derr zi zit qapp inx jniaa cingkir, zip dxen, vyr bingg cingkir ee zidqii muaw lar, tingwhau qra inx dagg langg henr lexmic.

27 Hitt cid zit decbeh muaw, dui' Asia laii ee Judealangg knuar qnir Paul dirr dxen nirr, dyrr qiausyx jiongww vecsnir, herciuw liac ix,

28 Qiyr qongxx, "Islaellangg ar, laii vangjan; jitt langg dyrr si hitt xee dirr dagg soxjai qawsi jiongww langg qongqig lanw ee vecsnir, qapp ludhuad, qapp jitt soxjai :ee; qycc u cua Gleeklangg zip dxen, pah lasamm jitt xee sxingr ee soxjai."

29 In'ui inx bad knuar qnir Efesuslangg Tlofimus qapp ix dirr sniaa-lai, pacsngr Paul u cua ix zip dxen.

30 Dui' anxnix tong' sniaa iycuah, vecsnir longxx jauw .laii, liac Paul, tuax ix cud dxen; jiaxee mngg liamvnix qnuaix.

31 Inx decbeh taii ix, u siausid tuann qaur ngiaa nirr ee cenjongw, qongw tong' Jelusalem hunluan.

32 Ix liamvnix cua vingdingx qapp vexjongw quixnarr xee, jauw lyc kir qaur inx hiax. Inx knuar qnir cenjongw qapp vingdingx, dyrr tingciuw, byy qycc pah Paul.

33 Cenjongw qinrjingg liac Paul, bingrling ing nng diauu lren vak ix; mng ix si jirjui, juer simxmih dairjir.

34 Jiongww langg jit xee huah jit kuanw; in'ui hanxhua, be jaix hitt xee sidjingg, dyrr bingrling duar ix zip ngiavnuaa.

35 Ixqing’ qaur qia-aw, in'ui jiongww langg ekeh jin' hiongg, vingdingx dyrr jiong' Paul cah .jnriu .kir.

36 Jiongww vecsnir duer dirr aurbin, qiyr qongxx, "Qra ix druu .kir."

37 Paul hro inx duar kir beh zip ngiavnuaa ee sii, duiww cenjongw qongw, "Guaw qra liw qongw jit qxur ue, tangx mah?" Ix qongw, "Liw bad Gleek'ue mah?

38 Liw qamxx m si hitt xee Egiptlangg, jingg zit kir ziauxluan, cua sir-cingx xee hiongsiuw cud kir kongwiaw :ee mah?"

39 Paul qongw, "Guaw si Judealangg, cutsir dirr Cilicia ee Tarsus, si cutmiaa ee sniaa ee vecsnir; qriuu liw jrunw guaw duiww vecsnir qongw."

40 Ixqing’ jrunw ix, Paul dyrr kia dirr qia-aw dingw, duiww vecsnir iyy ciuw; jiongww langg jing jing, ix dyrr ing Hebla ee kniukauw duiww inx qongw,

22 "Led'ui hurhingx ar, guaw dnaxx duiww linw hunsor, cniaw linw tniax."

2 Inx tniax ix ing Hebla ee kniukauw duiww inx qongw, dyrr qyckacc anjing.

3 Paul qongw, "Guaw si Judealangg, cutsir dirr Cilicia ee Tarsus, dirr jitt xee sniaa diongxsingg, juer Gamaliel ee hagsingx, jiauww lanw joxjongx ludhuad ee giamqinw laii siurr qawsi, uirdiyhh Siongrder laii zedsimx, cincniu qinaxzit linw jiongww langg jidngiu.

4 Guaw bad kunxdiok tranr jitt xee Lo ee langg, hro ix siw, bylun lamluw longxx vak inx, sangr lyc qnax.

5 Jewsitauu qapp dniuxlyw ee juann hue tangx juer guaw ee qanjingr. Guaw iarr dui' inx did diyc qiar hro hniadi ee puex, kir Damaskus, beh vak diamr dirr hiax ee langg tuax qaur Jelusalem siurr hinghuat.

6 Qniaa qin Damaskus, hitt sii iokliok ziddiongdaur, hutzenqanx dui' tnix u dua qngx uiluii jiyr guaw.

7 Guaw dyrr pag dirr de nirr, tniax qnir u sniax duiww guaw qongw, 'Saul, Saul, sniaw su kunxdiok Guaw?'

8 Guaw rinr qongxx, 'Jruw ar, Liw si jirjui?' Ix rinr guaw qongw, 'Guaw dyrr si Nazalet ee Jesus, liw soxx kunxdiok :ee.'

9 Qapp guaw dilehh ee langg knuar qnir hitt xee qngx, byy tniax qnir qra guaw qongw :ee ee sniax.

10 Guaw qongw, 'Jruw ar, guaw diyhh jnaixngiu juer?' Ix dyrr qra guaw qongw, 'Kiw .laii, zip Damaskus; huanrr soxx dniardiyc liw qniaa :ee, dirr hiax beh qra liw qongw.'

11 Guaw in'ui hitt xee qngx ee canwlan, dyrr be knuar .qnir, hro snaqab dilehh ee langg kanx zip Damaskus.

12 U jit langg, miaa qiyr Ananias, jiauww ludhuad si qingwkenn ee langg, hro diamr dirr hiax ee jiongww Judealangg soxx ylyw.

13 Ix jiurqin guaw laii kia dirr sinvnix, qra guaw qongw, 'Hniadi Saul, liw tangx qycc knuar.' Guaw jiksii giahbak knuar ix.

14 Ix qycc qongw, 'Lanw ledjow ee Siongrder ixqing’ dniardiyc liw laii jaix Ix ee jixir, knuar hitt xee Gi :ee, qycc tniax Ix ee cuir soxx cud ee sniax.

15 In'ui liw beh jiong' soxx knuar .qnir soxx tniax .qnir .ee, uirdiyhh Ix juer qanjingr,

16 Qriuu Ix ee miaa, laii siurr sexlew, sexduu liw ee jue.'

17 Au .laii guaw dywdngw qaur Jelusalem, dirr dxen nirr qidyw ee sii, sinn iuu dirr sxiong-gua,

18 Knuar qnir Ix duiww guaw qongw, 'Liw diyhh qnuaxqinw cud Jelusalem, in'ui liw uirdiyhh Guaw soxx qanjingr :ee, hiaxee langg decbeh m jiaplap.'

19 Guaw qongw, 'Jruw ar, inx longxx jaix guaw vingsor dirr dagg xee huerdngg jiong' sinr Liw ee langg qnuaiqnax qycc pah inx;

20 Qycc juer Liw ee qanjingr ee Stefen lrauu huih ee sii, guaw iarr kia uaw, dangjee hnuahiw, qycc qor hai siw langg :ee ee snxax.'

21 Jruw qra guaw qongw, 'Kir ar; Guaw beh crex liw kir hng hng, jiurqin guarvanglangg.'"

22 Inx tniax qaur jitt qxur ue, dyrr dua sniax qongw, "Jitt hy langg, diyhh dui' de nirr druu .kir, ix m ingqaix uac."

23 Jiongww langg huarhua ziongw, trngr snxax, vnua tohunw dirr kongdiongx.

24 Cenjongw dyrr bingrling duar Paul zip ngiavnuaa, ing vnxix qra pah laii simxmng ix, rair jaix uirdiyhh simxmih enqor jiongww langg anxnix ziongw ix.

25 Duxaxx ing pueduar vak ix, Paul duiww vnix:a decc kia ee vexjongw qongw, "Juer Rlomalangg, bue dring jue, linw pah ix, tangx mah?"

26 Vexjongw tniax .qnir, dyrr kir qra cenjongw qongw, "Liw beh jnaixngiu juer? Jitt xee si Rlomalangg."

27 Cenjongw jiurqin laii duiww ix qongw, "Qra guaw qongw, liw si Rlomalangg iacc m si?" Ix qongw "Si."

28 Cenjongw rinr qongxx, "Guaw ing jerje ginn jiacc brew zip jitt xee jik." Paul qongw, "Guaw cutsir dyrr si."

29 Dui' anixnix beh pacmng ix ee langg dyrr liamvnix lirkuix ix. Cenjongw qiwzenn jaix ix si Rlomalangg, in'ui bad vak ix, iarr jin' qniax.

30 Qeh zit, ix rair jaix Paul hro Judealangg qryr ee sidjingg, dyrr qra ix tauw .kuix, bingrling jiaxee jewsitauu qapp juann qonghue jurjip, dyrr duar Paul lyc .laii, hro ix kia dirr inx ee binrjingg.

23 Paul juwbak knuar qonghue, qongw, "Hniaxdi ar, guaw vingsor juewlangg ngr Siongrder, huanrsu jrunn liongsimx, qaur qinaxzit."

2 Jewsitauu Ananias bingrling sinvnix decc kia ee langg pah ix ee cuir.

3 Paul dyrr duiww ix qongw, "Hunxvec ee cniuu ar, Siongrder beh pah liw; liw jre lehh jiauww ludhuad simxpnuar guaw, qingwzenn uirqec ludhuad bingrling pah guaw mah?"

4 Sinvnix decc kia ee langg qongw, "Siongrder ee jewsitauu, liw me ix mah?"

5 Paul qongw, "Hniadi ar, guaw m bad ix si jewsitauu; in'ui Singwqingx u qir qongxx, 'Byc did me liw ee vecsnir ee sirdua.'"

6 Paul jaix inx jit vingg si Saducelangg, jit vingg si Faliselangg, dyrr dirr qonghue diongx qiyr qongxx, "Hniadi ar, guaw si Faliselangg, iarr is Faliselangg ee qniaw; jitt diap siurr simxpnuar dyrr si in'ui sixlangg qycc uac ee ngwbang."

7 Qongw anxnix, Faliselangg qapp Saducelangg sna' jinglun; jiongww langg dyrr hunx vingg.

8 In'ui Saducelangg qongw byy qycc uac, iarr byy tnisair, iarr byy sinn; danrsi Faliselangg qongw nng hxang longxx u.

9 Dyrr u dua suanziongw; Falise hitt vingg ee qinghagsu quixnarr xee kiw .laii, jingven qongxx, "Guaw knuar jitt langg longxx byy pnaiw; narr jniasit si u sinn, iacc si tnisair qapp ix qongxue lehh?"

10 Hitt sii duxduxx dua sna' jnex; cenjongw qniax Paul hro inx tiah lic, bingrling vingdingx lyc kir dui' inx diongqanx cniuw cud, cua ix zip ngiavnuaa.

11 Hitt mii Jruw kia dirr Paul ee sinvnix, qongw, "Jongr liw ee simx; liw bad dirr Jelusalem uirdiyhh Guaw juer qanjingr, iarr dikkag anxnix juer qangjingr dirr Rloma."

12 Qaur tnixqngx, Judealangg qetdongw jiuwjua, qongw, "Narr byy taii siw Paul, dyrr m limx m jiac."

13 Anxnix dangsimx jiuwjua :ee u sir-jap gua langg.

14 Inx dyrr jiurqin jiaxee jewsitauu qapp dniuxlyw, qongw, "Guanw jiaxee ixqing’ jxiur dang jxua, narr byy qaur taii siw Paul, vnuar hxang mic dy' m jiac.

15 Dnaxx linw qapp qonghue diyhh qra cenjongw qongw, cniaw ix cua Paul qaur linw ee binrjingg, naxx cincniu linw beh qycc siongser camng ix ee anwjingg. Guanw ixqing’ virvan hyw lar, dirr ix bue qinruaw ee sii laii taii ix."

16 Dogdok Paul ee guersingx tniax qnir inx beh baihok, dyrr zip ngiaa qra Paul qongw.

17 Paul qiyr jit xee vexjongw laii, qongw, "Cua jitt xee siauwlenlangg kir qnir cenjongw, in'ui ix u dairjir beh vyr ix jaix."

18 Dyrr kanx ix, cua ix kir qnir cenjongw, qongw, "Hitt xee siurr qnuaix ee Paul qiyr guaw kir, qriuu guaw cua jitt xee siauwlenlangg qnir liw; u dairjir beh qra liw qongw."

19 Cenjongw kanx ix ee ciuw, qaur penpiah ee soxjai, mng qongxx, "Beh vyr guaw jaix simxmih?"

20 Ix qongw, "Judealangg sna' iog, qriuu liw binaxzit cua Paul lyc qonghue, naxx cincniu liw beh siongser camng ix ee anwjingg.

21 Qriuu liw byc did tranr inx, in'ui inx u sir-jap gua langg baihok decc dngdanw ix; inx bad jiuwjua qongxx, 'Narr byy qaur taii siw Paul, m limx m jiac.' Dnaxx inx ixqing’ virvan hyw, decc tingwhau liw unxjunw nardnia."

22 Cenjongw qiyr siauwlenlangg kir, huanhur ix qongxx, "M tangx duiww langg qongw liw u jiong' jiaxee dairjir tongdix guaw."

23 Ix dyrr driaur vexjongw nng langg, qongw, "Virvan vorvingx nng-vah, bexvingx cid-jap, giac cniux :ee nng-vah, qimmii zi qnxix kir Kaesalea;

24 Qycc virvan jingsnix hro Paul kiaa, vyxho ix qaur jongxdog Felix hiax."

25 Ix dyrr siaw bunsux,

26 Dairliok si qongxx: "Klaudius Lysias cingxanx jongxdog Felix Dairzinn.

27 Jitt langg hro Judealangg liac; inx decbeh taii ix, guaw jid'err jaix ix si Rlomalangg, dyrr cua vxingx kir qiur ix.

28 In'ui guaw rair jaix inx qryr ix ee enqor, dyrr sangr ix lyc inx ee qonghue,

29 Craa cud ix siurr qryr, si uirdiyhh inx ludhuad ee venrlun, vingrr byy ingqaix siw, ingqaix vak ee anwjingg.

30 U langg qra guaw qongw, decbeh u qewboo hamrhai jitt langg, guaw jiksii crex ix jiurqin liw, iarr bingrling qryr ix ee langg dirr liw ee bingrjingg qryr ix."

31 Vingdingx hrong bingrling, jiong' Paul tauwmii cua qaur Antipatlis.

32 Qeh zit hro bexvingx qapp ix kir, inx dyrr dyr kir ngiavnuaa.

33 Hiaxee bexvingx zip Kaesalea, jiong' bunsux henr jongxdog, dyrr hro Paul kia dirr ix ee binrjingg.

34 Knuar liauw, mng ix si simxmih singw ee langg; jaix ix sriok Cilicia,

35 Dyrr qongw, "Qryr liw ee langg narr laii, guaw beh siongser tniax liw ee su." Ix dyrr huanhur qra ix qowsiuw dirr Helod ee gemngg.

24 Go zit au, jewsitauu Ananias qapp quixnarr xee dniuxlyw, qapp jitt xee venrhorsu Tertullus lyc .laii, duiww jongxdog qryr Paul.

2 Paul siurr driaur, Tertullus dyrr qryr ix qongxx,

3 "Felix Dairzinn, guanw dui' liw did diyc taiwvingg, qycc dui' liw ee senqenr, jitt qog ee verving did diyc qaixjingr, dagg sii dagg soxjai, guanw singsiu ix, laii qamxsia byy suah.

4 Dnaxx m qnaw cenn liw sniu' quw, qriuu liw kuan'iongg tniax guanw quiw qxur ue.

5 In'ui u craa cud jitt langg cincniu un'ik, dirr tnie snix kiw ziauxluan, juer Nazalet Dongw ee taubak,

6 Lenrr singwden ix iarr beh pah lasamm. Guanw dyrr liac ix;

7 Beh jiauww guanw ee ludhuad simxmng. Danrsi cenjongw Lysias hutzenqanx laii, jinrjai hiongg, dui' guanw ee ciuw-diongx qra ix cniuw .kir

8 Liw qaqi simxmng ix, dyrr guan soxx qyry ix dagg hxang ee indnuax, e kaksit jaix."

9 Judealangg qangg sniax qryr ix qongxx, "Dairjir sidjai si anxnix."

10 Jongxdog dimr tauu, qiyr Paul qongw. Ix dyrr rinr qongxx, "Guaw jaix liw juer jitt vangqog ee simxpnuawsix jerje nii, soxiw hnuahiw hunsor qaqi ee dairjir.

11 Liw e jaix, guaw jnriu Jelusalem qingwvair qaur dnaxx vutqyr jap-zi zit;

12 Inx m bad duw diyc guaw dirr dxen-lai, dirr huerdngg, iacc si dirr sniaa-lai qapp langg venrlun, iacc si ziauxdong jiongww langg,.

13 Qycc henrjai soxx qryr guaw ee su, inx longxx be e duiww liw henr cud jingwqir.

14 Dogdok jit hxang guaw duiww liw zin, dyrr si inx soxx qiyr juer qetdongw ee Lo, guaw jiauww anxnix laii hogsai ledjow ee Siongrder, qycc sinr longxjongw hap dirr ludhuad :ee ixqip qiwjair dirr sendix ee ceh :ee;

15 Qycc duiww Siongrder u ngwbang, dyrr si bylun gi ee langg qapp vutgi ee langg beh longxx qycc uac, jex iarr si inx qaqi soxx decc himbo :ee.

16 Guaw dirr jitt xee qaqi lenrsip, dyrr si duiww Siongrder, duiww langg, siongsiongg jrunn byy kuihu ee liongsimx.

17 Dnaxx quer quixnarr nii, guaw dyr .laii si beh jinxjer vunxqog, qapp henr lexmic.

18 Decc henr ee sii, inx duw diyc guaw dirr dxen nirr ixqing’ cingkir, vingrr byy qed qui' qrunn, iarr byy hanxhua, jixu quiw xee Judealangg dui' Asia laii :ee.

19 Inx narr u tangx jikjue guaw, dyrr ingqaix laii dirr liw ee binrjingg qryr guaw.

20 Iacc si dirr jiax ee langg, narr knuar qnir guaw kia dirr qonghue ee binrjingg, u simxmih vutgi, inx iarr diyhh qaqi qongw;

21 Setsuw u, iarr vutqyr jitt jit qxur nardnia, dyrr si guaw kia dirr inx diongqanx, qiyr qongxx, 'Uirdiyhh sixlangg qycc uac ee su, guaw qinaxzit dirr linw ee binrjingg siurr simxpnuar.'"

22 Felix guandew dyrr siongser jaix quanhe jitt xee Lo ee su, dyrr encenn inx, qongw, "Cenjongw Lysias lyc .laii ee sii, guaw dyrr beh simxduan linw ee dairjir."

23 Dui' anxnix bingrling vexjongw qowsiuw Paul, iarr vangwkuanx ix; ix ee langg narr laii qiongqib ix, longxx byc did joxdongr.

24 Quer quixnarr zit, Felix qapp ix ee bow, Judealangg Dlusilla, snaqab laii, dyrr driaur Paul, rair beh tniax ix lun sinr Krist Jesus ee dyrliw.

25 Paul girlun qonggi, jingjed, qapp jionglaii ee simxpnuar, Felix vutjiw qniax, rinr qongxx, "Dnaxx cniaw trer .kir, u lirven ee sii, jiacc driaur liw."

26 Ix iarr ngwbang Paul beh ginn hro ix, soxiw dniardnia driaur ix laii, qapp ix damlun.

27 Quer nng nii, Porcius Festus jriab Felix ee zim; Felix rair cruw Judealangg hnuahiw, dyrr qra Paul lauu dirr qnax nirr.

25 Festus jniurzim snax zit, dyrr dui' Kaesalea jnriu Jelusalem.

2 Jiaxee jewsitauu qapp Judea ee taulangg, duiww ix qryr Paul;

3 Suar qiujingg beh hai Paul, qriuu ix duar Paul qaur Jelusalem; inx dirr lo nirr beh sed baihok taii ix.

4 Danrsi Festus rinr qongxx, "Paul si ho'ngg qowsiuw dirr Kaesalea, guaw vunxsinx iarr beh qinw qinw dyr kir hiax."

5 Qycc qongw, "Linw diongqanx kacc e ee langg tangx snaqab qapp guaw lyc .kir; hitt langg narr u simxmih vutsi, linw dyrr tangx qryr ix."

6 Festus diamr hiax vutqyr jap zit veh zit, dyrr lyc kir Kaesalea; qeh zit jerdngg, bingrling duar Paul laii.

7 Ixqing’ qaur, dui' Jelusalem lyc laii ee Judealangg uiluii decc kia, ing jerje dang ee anwqnia laii qryr ix; danrsi byy vinqir tangx jingwbingg.

8 Paul hunsor, qongw, "Judealangg ee ludhuad, iacc si denrdngg, iacc si Kaesar, guaw m bad huan .diyc."

9 Festus rair hro Judealangg hnuahiw, rinr Paul qongxx, "Lun jiaxee su, liw qamguan jnriu Jelusalem, dirr hiax dng' guaw ee binrjingg siurr simxpnuar mah?"

10 Paul qongw, "Guaw kia dirr Kaesar ee qongdngg, si guaw ingqaix siurr simxpnuar ee xui; guaw m bad ing vutgi kuanxtai Judealangg, jex iarr si liw soxx bingbingg jaix :ee.

11 Guaw narr u qniaa vutgi, iacc si huan diyc sixjue, dyrr siw iarr byy tesii; danrsi inx soxx qryr guaw :ee byy jit hxang sit, dyrr byy langg tangx sun zinjingg jiong' guaw qaux hro inx. Guaw duiww Kaesar qryr gurjng."

12 Festus qapp girhue snaqab girlun liauw, dyrr rinr qongxx, "Liw ixqing’ duiww Kaesar qryr gurjng, dyrr kir qnir Kaesar."

13 Quer quixnarr zit, Aglippa Ongg qapp Bernice qaur Kaesalea, cingxanx Festus.

14 Diamr hiax jerje zit, Festus jiong' Paul ee su duiww ongg vailet, qongw, "U jit langg, dyrr si Felix soxx lauu dirr qnax nirr :ee.

15 Guaw dirr Jelusalem ee sii, jiaxee jewsitauu qapp Judea ee dniuxlyw qryr ix, qriuu dring ix ee jue.

16 Guaw rinr qongxx, virqyr qapp guanqyr iauxx bue duiwsinr, be did diyc qihue hunsor ix ee anwjingg, dyrr sun zinjingg jiong' ix qaux hro langg, jex m si Rlomalangg ee le.

17 Soxiw inx jurjip dirr jiax, guaw byy encenn, qeh zit jerdngg, bingrling duar hitt langg qaur.

18 Qryr ix ee langg longxx kia lehh; soxx qryr :ee m si guaw soxx dairsingx pacsngr ee pnaiw su,

19 Vutqyr u quiw hxang ee venrlun, dyrr si lun inx qingr sinbingg ee su, qycc lun jit xee Jesus, ixqing’ siw, Paul qongw ix uac, uirdiyhh anxnix laii qryr ix.

20 Jiaxee su diyhh jnaixngiu camng, guaw qiwzenn be bingg, soxiw mng ix qamguan kir Jelusalem, dirr hiax siurr simxmng jiaxee su iacc m.

21 Dogdok Paul ixqing’ qryr gurjng, rair guaw lauu ix qaux hro hongder pnuawduan. Guaw dyrr bingrling lauu ix, tingwhau qewsangr hro Kaesar."

22 Aglippa duiww Festus qongw, "Guaw iarr rair tniax jitt xee langg anxjnuaw qongw." Ix qongw, "Binaxzit tangx tniax ix."

23 Qeh zit Aglippa qapp Bernice dua sed uigii laii, qapp jiaxee cenjongw, ixqip sniaa-lai junquir ee langg, zip qongdngg. Festus cud bingrling, dyrr duar Paul qaur.

24 Festus qongw, "Aglippa Ongg ixqip qapp guanw dilehh ee jiongww langg ar, linw knuar jitt xee langg, dyrr si jiongww Judealangg, dirr Jelusalem qapp dirr jiax, qriuu guaw, qiyr qongxx ix m ingqaix iauxx uac :ee.

25 Danrsi guaw cabingg ix m bad qniaa ingqaix siw ee su; qycc ix ixqing’ qryr gurjng kir hongder hiax, soxiw guaw gixdnia qewsangr ix.

26 Dogdok be did diyc ix ee sidjingg tangx jraur guaw ee jruw. Soxiw duar ix cud laii dirr linw ee binrjingg, qyckacc iauwqinw dirr Aglippa Ongg liw ee binrjingg, jiacc dirr simxmng liauw u soxx tangx jraur.

27 In'ui jiauww guaw pacsngr, qewsangr huanrlangg, narr byy jixbingg qryr ix ee su, si byy habliw."

26 Aglippa duiww Paul qongw, "Jrunw liw qaqi vailet." Paul dyrr giac kiw ciuw hunsor qongxx,

2 "Aglippa Ongg ar, Judealangg soxx qryr :ee, qinaxzit beh longxx hunsor dirr liw ee binrjingg, si jin' qaijair;

3 Qyckacc qaijair :ee, si in'ui Judealangg ee quile qapp inx ee venrlun, liw longxx jaix; soxiw qriuu liw kuan'iongg tniax guaw.

4 Guaw dui' kixtauu dirr guaw ee vecsnir ee diongqanx, qapp dirr Jelusalem, dui' siauwlenn juewlangg jnaixngiu, Judealangg longxx jaix.

5 Inx dui' kixtauu bad guaw, setsuw kingw juer qanjingr, dyrr jaix guaw jiauww lanw qxaur-diongx qik giamm ee pair, juer Faliselangg.

6 Henrjai guaw kia dirr jiax laii siurr simxpnuar, dyrr si in'ui ngwbang Siongrder duiww lanw ee ledjow soxx ingwunw :ee.

7 Lanw jap-zi jipair, zidmii unkunn hogsai, iarr si ngwbang qaur dirr jitt xee. Ongg ar, guaw uirdiyhh jitt xee ngwbang, jiacc hro Judealangg qryr.

8 Siongrder narr hro sixlangg qycc uac, linw jnaixngiu liac juer be sinr .did ar?

9 Jingg guaw qaqi pacsngr diyhh ing jerje hxang laii qongqig Nazalet Jesus ee miaa,

10 dirr Jelusalem qyxzenn bad anxnix qniaa. Guaw sriu diyc jiaxee jewsitauu ee qxuann, jiong' jerje singwdoo qnuaix dirr qnax nirr; inx siurr taii siw, guaw iarr griw u hxun.

11 Qycc dirr dagg xee huerdngg guaw dniardnia hinghuat inx, qiongvig inx qongw vongwdok ee ue; qongqig inx naxx hiongg, kunxdiok inx itdit qaur guaruii ee sniaa.

12 Hitt diap guaw kir Damaskus ee sii, u did diyc jiaxee jewsitauu ee qxuann qapp bingrling.

13 Ongg ar, guaw dirr lorjniu, ziddiongdaur ee sii, knuar qnir dui' tnix u qngx, ngiaa quer zit ee canwlan, uiluii jiyr guaw qapp dangjee qniaa ee langg.

14 Guanw longxx dyw dirr de nirr, guaw tniax qnir u sniax ing Hebla ee kniukauw duiww guaw qongw, 'Saul, Saul, liw sniaw su kunxdiok Guaw? Liw ing kax tad cxir si qankow.'

15 Guaw qongw, 'Jruw ar, Liw si jirjui?' Jruw qongw, 'Guaw dyrr si liw soxx kunxdiok ee Jesus.

16 Liw diyhh kiw laii kia; in'ui Guaw diaudii duiww liw cuthen, beh setlip liw juer ce'ing, juer qanjingr :ee, qanjingr liw soxx knuar qnir Guaw qapp Guaw soxx beh cuthen hro liw knuar ee su.

17 Guaw qycc beh qiur liw cud jitt xee vecsnir qapp guarvanglangg ee ciuw,

18 Dyrr si henrjai Guaw crex liw jiurqin inx :ee, laii kuix inx ee bagjiux, hro inx dui' amr uat dngw qaur dirr qngx; lirkuix Satan ee quanser laii qui'ngr Siongrder, dui' sinr Guaw laii did diyc siar jue, qycc did diyc qigiap dirr jniaa sxingr ee diongqanx.'

19 Aglippa Ongg ar, soxiw guaw byy uiqec dui' tnix soxx henxhen :ee;

20 Dairsingx dirr Damaskus, au .laii dirr Jelusalem, qapp Judea ee juann de, ixqip guarvangx, krngr langg diyhh huanxhuew laii qui'ngr Siongrder, qniaa dairjir qapp huanxhuew sna' hap.

21 In'ui anxnix, Judealangg dirr dxen nirr liac guaw, beh taii guaw.

22 Danrsi guaw did diyc Siongrder ee viwiu, qaur qinaxzit iauxx dilehh, dui' dua qaur ser juer qanjingr; soxx qongw :ee byy m si jiaxee sendix qapp Moses soxx qongw beh qaur ee su;

23 Dyrr si Krist jnaixngiu diyhh siurkow, qycc jnaixngiu juer tauu ing sixlangg qycc uac ee su, laii tuanvyr qngbingg hro jitt xee vecsnir qapp guarvangx."

24 Paul anxnix hunsor, Festus dua sniax qongw, "Paul, liw decc qongg lar; liw ee jerje hagbun hro liw vnir juer qongg."

25 Paul qongw, "Festus Dairzinn, guaw m si qongg; guaw si qongw jinsit duanjniar ee ue.

26 In'ui ongg jaix jiaxee su, guaw iarr hyxdnaw duiww ix qongw; jiaxee su guaw cimx sinr byy jit hxang duiww ongg unxbat, in'ui jex longxx m si qniaa dirr penpiah ee soxjai.

27 Aglippa Ongg ar, liw sinr jiaxee sendix mah? Guaw jaix liw sinr."

28 Aglippa duiww Paul qongw, "Liw sniu ing siyxkuaw koxkngr, beh hro guaw juer Krist ee sinwdoo ar."

29 Paul qongw, "Guaw qriuu Siongrder, bylun ing siyxkuaw iacc si dua, m na hro liw, iarr hro qinaxzit qniwnarr tniax guaw qongw :ee, longxx qapp guaw jidngiu, dogdok byy jiaxee syxlen."

30 Ongg qapp jongxdog qapp Bernice, ixqip dangjee jre ee langg longxx kiw .laii,

31 Trer kir lairbin snaqab damlun qongxx, "Jitt langg soxx juer byy ingqaix siw, ingqaix vak ee su."

32 Aglippa qra Festus qongw, "Jitt langg narr bue u duiww Kaesar qryr gurjng, dyrr tangx vangr ix."

27 Ixqing’ dniardiyc iwsur hro guanw quer haiw kir Itali, dyrr jiong' Paul qapp lingrgua quixnarr xee huanrlangg, qaux hro Augustan Ngiaa ee vexjongw, miaa Julius.

2 U Adlamyttium ee junn beh qniaa qaur Asia haiw-qnii quixnarr soxjai, guanw dyrr dah hitt jiah junn kixsinx; u Macedonia ee Tessalonikalangg, Alistarqus, qapp guanw kir.

3 Qeh zit qaur Sidon. Julius hyw kuanxtai Paul, jrunw ix jiurqin jiaxee ving'iuw, siurr inx ee jiauwingr.

4 Dui' hiax kuix junn; in'ui duiwtauhongx ee enqor, dyrr dui' Cyplus ersir qingquer.

5 Ixqing’ quer Cilicia qapp Pamfylia ee haiw, qaur Lycia ee Myla.

6 Dirr hiax, vexjongw duw diyc Alesandla ee junn, beh kir Itali :ee, dyrr qiyr guanw dah hitt jiah junn.

7 Qniaa jin' ban, jerje zit jiacc qaur Cnidus duiwbin. In'ui hongx joxdongr, dyrr siamw duiww Klete vuerhongxx hitt vingg, dui' Salmone quer;

8 Limw limw aw e tangx en' hnua qniaa qaur jit soxjai, miaa Hyw Qangw; qin jiax, u Lasea ee sniaa.

9 Ligquer jerje zit, qimwjiac ee qrii ixqing’ quer, qniaa junn guihiamw, Paul krngr inx qongxx,

10 "Dairqex ar, guaw knuar jitt vaiw qniaa junn, m na huewmic qapp junn, lenrr lanw ee sniwmia iarr beh siurr hai qapp dua sunxsid."

11 Danrsi vexjongw sinr dairqongx qapp junjuw kacc quewtauu dirr Paul soxx qongw :ee.

12 Qycc dirr jitt xee ngua'ur quer dangtnix byy lirven, duarvnuar ee langg sniu rair kuix junn lirkuix jiax, knuar e tangx qaur Foenix quer dangtnix. Hitt xui dyrr si Klete ee jit xee ngua'ur, jit bin ngr danglamm, jit bin ngr dangvag.

13 Jitt sii lamhongx bibii aw laii, jiongww langg jin' dik'ir, dyrr kiw dniar, uaw Klete ee hnua laii qniaa.

14 Byy zuarr quw, qongg hongx dui' haixsu dingw pah .lyc .laii; hitt xee hongx miaa Euloklydon.

15 Junn hro hongx saur, jicjair be diauu, dyrr cutjai ix piauliuu.

16 Sraiw qaur siyw haixsu, miaa qiyr Klauda, vuerhongx hitt vingg, limw limw e siux samvanw kiw .laii.

17 Samvanw ixqing’ siux .kiw .laii, dyrr ing honghuad kunxvak junn-drew, qycc qniax knuar diyc Syrtis ee suasnuar, dyrr lyc pxangg, hro hongx rah .kir.

18 Guanw hro hong'ingw dua iyvuar, qeh zit inx dyrr qra huewmic hed lyc haiw;

19 Derr snax zit qycc cinciuw hetqag junn nirr ee kiwqu.

20 Zit qapp cnxix jerje zit byy cuthen, qycc hro hong'ingw pah vutjiw tiamw, guanw did qiur ee ngwbang dyrr longxx byy lar.

21 Jiongww langg quw quw byy jiac, Paul kia dirr inx diongqanx, qongw, "Dairqex ar, linw vunw ingqaix tniax guaw ee ue, byc did kuix junn lirkuix Klete, laii duw diyc jitt hy sionghai qapp sunxsid.

22 Dnaxx guaw krngr linw ansimx; in'ui linw diongqanx byy jit langg e sitlyc sniwmia, dogdok sitlyc junn nardnia.

23 In'ui guaw soxx sriok, soxx hogsai ee Siongrder, Ix ee tnisair jamii kia dirr guaw sinvnix, qongw,

24 'Paul, mrbenw qniax; liw dikkag diyhh kia dirr Kaesar ee binrjingg; knuar ar, Siongrder ing junn-lai ee langg longxjongw sniuxsur liw.'

25 Soxiw dairqex ar, linw diyhh ansimx; in'ui guaw sinr Siongrder, dairjir decbeh jiauww Ix soxx qra guaw qongw :ee.

26 Danrsi lanw dikkag e kuar dirr jit xee haixsu."

27 Qaur derr jap-sir mii, guanw piauliuu dirr Adliatic Haiw, iokliok vnuawmii, juixciuw liac juer qin snuax;

28 Dyrr pah juixdyy, did diyc zi-jap siamm; liyc liyc aw jinwjingg, qycc pah juixdyy, did diyc jap-go siamm.

29 Inx qniax lee diyh jiyc, dyrr dirr junn-buew prax sir qringx dniar, cetced ngwbang tnixqngx.

30 Juixciuw rair beh lirkuix junn dyjauw; vangr samvanw lyc haiw, qew juer beh dui' junn-tauu prax dniar.

31 Paul duiww vexjongw qapp vingdingx qongw, "Jiaxee langg byy diamr dirr junn nirr, linw be e did qiur."

32 Vingdingx dyrr jam dng samvanw ee syh, cutjai ix qaqi dui .lyc.

33 Qaur tnix beh qngx, Paul krngr jiongww langg diyhh jiac, qongw, "Linw dairqex decc liaubang, lunw iaux m jniaa jiac, qinaxzit si derr jap-sir zit lar.

34 Soxiw guaw krngr linw diyhh jiac, jex si quanhe linw ee did qiur; in'ui linw byy jit langg e sitlyc jit qix taumngg."

35 Qongw suah, tec vniaw, dng' jiongww langg ee binrjingg qamxsia Siongrder; vreh puar laii jiac.

36 Dui' anxnix jiongww langg longxx ansimx, dag'ee jiac.

37 Guanw dirr junn nirr :ee qewqiong nng-vah cid-jap-lak langg.

38 Ixqing’ jiac vaw, hed bec lyc haiw, hro junn kacc kinx.

39 Qaur tnixqngx, m bad hitt xee soxjai, dogdok knuar qnir jit xee haixuanx u suapyx, dyrr snaqab qewboo knuar e hro junn lee jnriu dingxbin iacc be.

40 Dyrr kiwsag jiaxee dniar, vangr dirr haiw nirr, iarr tauw kuix diaur jundua ee syh; kir tauw pxangg, hro ix jiac hongx, ngr suapyx jinwjingg.

41 Duw diyc sianggiaplauu ee xui, junn dyrr kuawcenw; junn-tauu qa diauu be dinxdang, junn-buew hro dua ingw siag puar.

42 Vingdingx ee iwsur beh taii jiaxee huanrlangg, qniax uree siuu jauw.

43 Dogdok vexjongw rair qiur Paul, dyrr joxdongr inx ee qewboo, bingrling e siuu ee langg dairsingx lyc juiw jnriu snuax;

44 Qi'uu ee langg uree ing vangx, uree ing junn-lai ee mic. Dui' anxnix jiongww langg did qiur jnriu snuax.

28 Guanw ixqing’ did diyc qiur, jiacc jaix hitt xee haixsu miaa qiyr Malta.

2 Huanlangg ing hranw did u ee zin'air kuanxtai guanw. In'ui lyc ho qycc qnuaa, inx dyrr kiw huew, jiaplap guanw jiongww langg.

3 Paul kiyh caa jit vew, he dirr huew nirr. U dogjuaa, in'ui huew zet, dyrr jongg .cud .laii, qra ix ee ciuw qa diauu lehh.

4 Huanlangg knuar qnir dogjuaa diauu dirr ix ee ciuw, dyrr snaqab qongw, "Jitt xee langg dikkag si hiongsiuw, suibongw haiw nirr did diyc qiur, tenliw be iong'unw ix uac."

5 Paul qra dogjuaa vnua dirr huew nirr, longxx byy siursiongx.

6 Huanlangg tingwhau ix e jingw, iacc si hutzenn siw, vuac dyw; tingwhau quw quw, knuar qnir ix byy dairjir, dyrr huanxdngw pacsngr qongxx ix si sinbingg.

7 Haixsu ee taulangg, miaa Publius, u canhngg uaw dirr hiax; ix jiaplap guanw, snax zit quw hyxlew sna' kuanxtai.

8 Publius ee laurve u zedvni qapp juewli, dyw lehh. Paul zip kir jiurqin ix, qidyw, qra ix hnua ciuw, rix hyw ix.

9 Dui' anxnix haixsu diongx qi'uu ee pnuawvnirlangg iarr laii did diyc rix hyw.

10 Inx iarr ing jerje lexsor junqingr guanw, kuix junn ee sii, jiong' guanw soxx kiamwing :ee sangr qaur junn nirr.

11 Quer snax guehzit, guanw dah Alesandla ee junn kixsinx. Hitt jiah junn hy juer Siangsniqniaw, si dirr jit xee haixsu quer dangtnix :ee.

12 Qaur Sylakuse prax lehh, guanw diamr hiax snax zit.

13 Dui' hiax sec qaur Rhegium. Quer jit zit lamhongx kiw, derr zi zit qaur Puteoli,

14 Dirr hiax duw diyc hniadi, cniaw guanw snaqab diamr cid zit; dyrr qaur Rloma.

15 Rloma ee hniadi tniax qnir guanw ee siausid, dyrr dui' hiax laii qaur Appii Forum Ci, qapp Samquanw ee soxjai, jicjiab guanw. Paul knuar qnir inx, qamxsia Siongrder, dyrr jongwdnaw.

16 Ixqing’ zip Rloma, jrunw Paul qapp jit xee kanwsiuw ix ee vxingx lingrgua druar.

17 Quer snax zit, Paul cniaw Judealangg ee sirdua laii sionghue. Ixqing’ jurjip, dyrr duiww inx qongw, "Hniadi ar, guaw suizenn m bad huan diyc lanw ee vecsnir, iacc si ledjow ee quile, danrsi dui' Jelusalem siurr vak, sangr qaux Rlomalangg ee ciuw.

18 Inx ixqing’ simxpnuar guaw, knuar guaw byy sixjue, dyrr rair vangr guaw.

19 Dogdok Judealangg huanxduir, guaw vutdik'iw duiww Kaesar qryr gurjng, m si u indnuax beh qryr guaw ee vecsnir.

20 In'ui anxnix jiacc cniaw linw laii sna' qnir, snaqab girlun. Guaw uirdiyhh Islael soxx ngwbang :ee, jiacc siurr jitt xee syxlen kunxvak."

21 Inx duiww ix qongw, "Guanw m bad dui' Judea jrih diyc puex qongw qaur liw ee su, iarr byy simxmih hniadi qaur jiax tongvyr, iacc si qongw liw u simxmih pnaiw.

22 Dogdok guanw rair tniax liw ee iwqenr jnaixngiu; in'ui jitt xee dongw, guanw jaix dagg soxjai hro langg hiamm."

23 Inx ixqing’ qapp ix dniardiyc zidqii, jerje langg jiurqin ix dirr ix hiyh ee cur; Paul dui' jaxkiw qaur ehngx vailet laii jingwbingg Siongrder ee qog, inw Moses ee ludhuad, qapp jiaxee sendix, ing Jesus ee su, koxkngr inx.

24 Ix soxx qongw :ee, uree sinr, uree m sinr.

25 Nng vingg be sna' hap, dyrr siwsnuar. Paul dairsingx qongw jit qxur ue, qongw, "Singwsinn ing sendix Isaiah ee cuir, qra linw ee ledjow soxx qongw ee ue si jin' driyc,

26 Ix qongw, 'Kir qra jitt xee vecsnir qongw: Linw tniax si beh tniax, iarr longxx be hiauxgno; linw knuar si beh knuar, iarr knuar longxx be qnir;

27 In'ui jitt xee vecsnir simx dun, hnirkangx dang, bagjiux vangr kreh; qniax inx ing bagjiux knuar .qnir, ing hnirkangx tniax .qnir, ing simx hiauxgno, laii uat linr dngw, guaw dyrr rix hyw inx.'

28 Soxiw linw diyhh jaix, Siongrder jitt xee jinxqiur ixqing’ sihingg guarvangx, inx iarr beh tniasiu."

29 Paul qongw suah, Judealangg dyr .kir, jerje u decc venrlun.

30 Paul kia qaqi suer ee cur nng nii quw; huanrnarr zip laii qnir ix :ee, ix longxx jiaplap inx,

31 Tuann Siongrder ee qog, jiong' Jruw Jesus Krist ee dairjir jin' hyxdnaw qawsi langg, byy langg qimr ix.

huedngw tauu iac