Byy Hni-aw ee Hongid

Lu Juxbingg huanik

Cid-vah gua nii ee qowsu. Dirr Erquanx Haixqiab ee Dannoura, Vingqax qapp Guansir nng jok quxnii vniar tenha ee juewau dua quatjenr, dirr jiax laii siusog. Dannoura sianghongx quatjenr ee qetqyw, Vingqax jit jok qunsu cam' hurzinlangg qapp ginxaw, sewhanr hongder, lanw dnaxx cxingx ix jyr Andig Tenhongg, juanvo laii hro duiwhongx bedbongg .kir. Si jit dnxua jin’ vicamw ee ligsuw.

Dyrr anxnex, dirr Erquanx ee haiw diong’ngx qapp hnua-vnix, longxx itdit u uanhunn dniardnia decc jywquair. Guaw dirr vadd pnix bunjniux marr u qongw kiw, jiax qycc laii qongw .jit .xe.

U hitt kuanw quair hxingg ee mohe hy jyr Vingqax Mohe, ix ee kag dingxquann ziauhunn ee snuawdiauu, knuar .kiw .laii cincniu langg ee binrhingg, u langg qongw hex si Vingqax buxsu ee hunpig hu dirr mohe sinkux dingw laii jyrsingg :ee. Iauxx qycc u dirr hitt xee haixhnua siwkouii-aw, jiokk je qiquair qapp kiongxvor ee dairjir decc liutuann. Qongw jit~nng hxang hro juqunx jaix.

Dirr amr binbongx ee iarmii, qui’ cingx diamw kinx bangxbangw kongxvehsig ee qngdiamw, naxx huexqimqox diamr dirr juixbin, qig qui’ cog suaw laii suaw kir, u sii qycc dirr haixingw quandingw ngiarngia vuex, u sii vuex quann, u sii qe. Jex dyrr si liac hii .ee soxx qongw ee quixhuew iacc si xmoo-huew.

Qenwnarr kiw hongx ee sijun, huwhur hauw ee sniaimx dyrr naxx cincniu siy' jenr sii dua sniax decc huachiux hitt hxingg, longxx e duiww haiw hitt vingg tuann .quer .laii.

Vingqax jiongww bongjiaw qoxjaw qunxqaw jokquair viw jinw qycc kacc lirhai. Inx e dirr amr sii hiongg hiongg dirr qniasaiw ee junjiah vnix:a cuthen, qra junn congr hro dimm .lyc .kir. Hyw tnix siyzuac ee sii, inx cangr dirr juiw-drew, diam diam aw danw, tingwhau siujuiw ee langg laii, tangx qra ix tuax zip kir juiw-drew rimx .siw.

Uirdiyhh beh andah Vingqax ee bongjiaw, dongde jingww langg dirr Ciacqanquanx kixjy jit qxingx Vudqaur sirngi, hy jyr Amiwdyy Sxi, qycc dirr li sirngi byy zuarr hng ee haixhnua vnix jyr jit xee bong-aw, lairdew cai jit der jiyhvix, dingxquann kig diyc lyc juiw siw ee siyw hongder cam' jiongww dairsinn ee miazi. Uirdiyhh beh ciaudo je je jenr siw ee buxsu, marr longxx dingrqii jyr Vudqaur ee huathue qongdig. Jurr hitt qxingx sirngi qapp bong-aw jyr hyw liauxau, Vingqax ee quixhunn dyrr kacc jiyw cud laii jyr quair, mrqycc iauxx si vutquanw sii u jit quaw qiquair ee dairjir laii huatsingx, erdangr knuar cud, hiaxee quixhunn iauxx be did diyc uanjuann ee qaixtuad.

Qowsu laii qaur Vingg-Guann Dairjenr suah, qycc quer jit~nng-vah nii au. Ciacqanquanx u druar jit xee miaa qiyr Hongid ee cnemee lamjuw. Jitt xee javolangg jiokk gauu liam quax qapp dnuaa givee, dirr inx hniuliw si tong' langg jaix.

Hongid jurr ginxaw sii dyrr jiapsiu jin’ giamqeh ee hunwlen. Qaur qaxx cingcunx siauwlen sii, ix dnuacniur ee qikiauw dyrr ixqingx tiauquer jin’ je laursu.

Jitt xee iong dnuacniur jyr jitgiap ee givee sensnix, siongrr juanquanr :ee si Vingqax qapp Guansir vniar tenha ee qowsu, digvet si lairdew hitt dnxua Dannoura dua quatjenr ee quewtingg, lenrr quixsinn tniax diyc dy’ zimw be diauu hauw cud sniax lrauu bagsaiw.

Hongid co’ cud dongrmngg sii si jiokk sanwciah .ee, snax dxngr byy jit dxngr vaw, mrqycc, iauxx si u zedsimx ee vingiuw beh qra vangjo, Amiwdyy Sxi ee jurcii huesniu dyrr si qidiongx jit xee.

Jurcii huesniu vunxsinx jiokk hingr siquax qapp imgak. Samvutgorsii dyrr jiyx Hongid laii sxi nirr dnuaa givee, cniur liamriauu hro ix tniax. Siauwlenn Hongid ee dnuacniur qanghux hro jurcii jiokk qamxdong qapp ylyw, dyrr tegi Hongid qra sirngi dongwjyr qaqi ee cur, vnuax laii sxi nirr druar. Hongid jiokk qamxsia jurcii ee hyxir, dyrr jiapsiu jitt xee tegi. Jurr anxnex, sirngi vuah jit qingx vangqingx hro siauwlenn :ee druar, snax dxngr marr cam' jiongww suhu jywhuew jiac. Amr sii narr byy qitnax dairjir, ix dyrr dnuacniur jit dnxua qowsu hro jurcii himsiongw kuaiwlok, dongwjyr huevyr.

Hex si mow jit xee zuac .langg amr mii huatsingx ee dairjir. Jurcii huesniu inui jit xee sijuw cur nirr u langg quewongw, ho'ngg cniaw kir jyr huathue. Ix qra jyr jabbu ee siyw samix marr jywhuew cua .kir, dogdok lauu Hongid jit langg diamr sxi lai.

Jiokk zuac ee amr mii, bongzinn Hongid sniu beh cuex jit xe liangg, dyrr qniaa cud laii vangqingx guarkauw ee gimjnii kax, ui’ jitt xee gimjnii kax knuar e diyc Amiwdyy Sxi ee auviah kangx dniaa.

Hongid qra givee tec .cud .laii, jre dirr gimjnii kax, naxx hiangxsiu an' auviah dniaa cuex .laii ee liangg hongx, naxx dnuaa givee cniur kxig. Jit bin danxtai jurcii dngw .laii, jit bin anui qaqi hibii ee simjingg.

Siqanx dyrr quer qaxx vnuar xia, ix dnaxx givee byy dnuaa, kxig marr byy cniur, jurcii suhu iuguann iaxx bue dngw .laii, mrqycc kongkir iauxx jiokk auwhib, vangqingx lai marr iauxx jiokk siyzuac, ix dyrr anxnex itdit dirr guarkauw jre, diam diam aw danw.

Quer jit dah .quw .aw, ix tniax diyc aurviah mngg hiax u kavo-sniax, m jaix si’angg didjiab jnaw quer auviah dua dniaa, ngr gimjnii kax qniaa uaw .laii, itdit qaur qaxx beh vrong diyc Hongid ee pni-aw jiacc tingg .lyc .laii. Ix m si jurcii huesniu. Hionghiongg ix iong jiokk byy lew, naxx cincniu dua qnruax vnix:a ee sirue decc huah erkaciuxlangg ee dua sniasaur qiyr jitt xee cnemee langg,

“Hongid”,

Hongid kir hro jitt xee langg ee sniaimx heh qaxx qniax quewtauu .kir, u .jit .dah .quw be qir did rinr sniax, suar .lyc, hitt xee langg qaiw iong qycc kacc giamle naxx cniu decc ha bingrling ee sniasaur huah,

“Hongid”,

“Si”, jitt xee bongganxjiaw qniax jit xe sintew hiamw qiux .kir, qnuaxqinw rinr sniax qongxx,

“Guaw si bongganw ee langg, m jaix beh anxjnuaw cinghox .liw?”

Jitt xee snehunrlangg qra sniasaur vangr kacc unsunn .jit .xe, qongw,

“Byy sniaxmic tangx hyw qniax. Guanw diamr lanw jiax sirngi hurqin kiarkiw, juxlangg huanhur guaw laii jiax vran jit quaw dairjir. Qongw kiw guanw juxlangg dairzinn, ix si jit xee qyquir sinhun ee langg, bagjingg cua jin’ je suijiongg dirr jiax Ciaqanquanx tingg kax. Ix u qongw beh kir camquanx Dannoura Qxow Jenwdniuu, soxiw guanw qinaxzit dyrr kir knuar jit quaw sancuanx qapp jenwdniuu qoxjig.”

“Iaxx qycc u, juxlangg tniax qongxx, liw duiww hitt dnxua jenwjingx ee qowsu suatcniur liauw jiokk hyw, hibang liw erdangr dirr ix binrjingg enxcniur hro jingww quiwvinx tniax. Soxiw cniaw liw qnuaxqinw, givee jah lehh, duer guaw laii kir guanw juxlangg cam’ junquir ee langkeh jinw tingg kax ee soxjai.”

Sudongsii, buxsu ee bingrling dyrr sngr jin’ poxtongx, itvnuax langg marr bersaiw uivue. Soxiw, Hongid qnuaxqinw cauxee cing lehh, givee jah lehh, duer jitt xee snehun langg dangjee kixqniaa.

Suibongxx jitt xee langg jin’ gauu cua lo, Hongid marr si rair qniaa vutjiw aw qinw, iacc byy dyrr duer be diyc. Iauxx qycc u, kanx Hongid ciuw ee hitt qix ciuw, dyrr naxx cniu tih lehh, ding qycc lingw. Acc “kadah kadah” ee vorhuac-sniax, viauxsi cua lo ee buxsu juann srinx longxx cing diyc ticqacsnax.

Hongid sniu qongxx, ix itding si dycc jit xee onghuw didvanx ee uervingx, siongrr kixtauu ee qniahniaa longxx byy .kir, dendyww sniu qongxx qaqi si zuacnirr hyw un, anxjnuaw qongw?

Anww laii jiarr soxx qongw, “Sinhun qyquir ee langg” laii qra sniu, beh tniax guaw suatcniur ee lauriaa dairzinn ingwqaix si qnuaqaix siongrr quann ee Dairbingg, cunx :ee dyrr byy vadd langg :ar.

Byy zuarr quw, buxsu kavo dongwdiam, kia lehh. Hongid sniu qongxx itding si qaur qaxx jit xee jiokk dua ee mngkauw. Mrqycc qaqi druar ee jitt xee soxjai, diliauw Amiwdyy Sxi ee gua mngg, dyrr byy dyc'ui u jiacc dua ee mngg lor.

“Kuix mngg!” Cua lo buxsu dua sniax huah.

Sui' dyrr tniax diyc mngcnuar vuec .kiw .laii ee sniax, nng langg qniaa .zip .kir, qingquer jit xee jin’ kongwkuah ee dua dniaa, iurqycc dirr jit xee mngkauw tingg .lyc .laii, cua lo buxsu dua sniax huah,

“Lairdew u si'angg lehh? Hongid ixqingx cua qaur xui ar.”

Suar .lyc, dyrr tniax diyc qniaa jiokk qinw ee kavo-snaix, juaxmngg giuw kuix ee sniax, jahhorvangx kuix .kuix ee sniax, cam’ je je jaboxlangg qongw ue ee sniax. Jiauww jiaxee jaboxlangg qongw ue ee uersuu tniax .kiw .laii, ingwqaix si dirr jit qingx qyquir zinqex ee tehngi, mrqycc kaksit si dirr dyhh, Hongid marr sax byy jangw.

Jongw .si, lenrr sniu kacc jimjiog ee siqanx dyrr byy, Hongid ee ciuw sui’ dyrr ho’ngg kanx lehh, vreh jnriu quixlyhh gximm ee jiyhked-aw. Qaur qaxx siongrr buew jit gamw ee sii, cua lo buxsu dyrr qiyr ix qra cauxee trngr driau.

Qycc laii ngua jit xee jaboxlangg laii kanx ix ee ciuw, qra ix cua lo. Dairsingx qniaa quer jit xee tokax dervanw crid qaxx qngx sih sih, sen’ qniaa dy’ be qaur jinrvong hiacc kuah ee dniakux. Qycc jriab .lyc .laii, sec quer jiokk je dngxuanx uatqag, tiau-aw u quiw xee, je qaxx longxx qir be cingcyw. Iurqycc tongquer jit xee kuah qaxx qniax .langg ee tatamih pox :ee kongwcngg. Jiacc laii qaur jit qingx jiokk dua qingx ee vangqingx jniawdiongngx.

Hongid taukag lai decc sniu, u jiokk je langg jurjip jywhuew. Ix tniax diyc diuduan siy’ elur ee sniax, naxx cniu hongx cuex quer ciurhiyc-aw hitt kuanw ee sniax. Qycc tniax diyc jin’ je langg ee qongw ue sniax, cibux-circu vangr qaxx jiokk qe, uersuu longxx si hongqiongx lai decc iong ee.

Jitt sii u langg qiyr ix simjingg vangr hro kinsangx, potuann ter ix cuann hyxser. Hongid dyrr dirr potuann jre hyw, qra givee ee henn-aw driauu hro junw.

Vnix:a u jabow-sniax duiww ix qongw,

“Jitt jun, cniaw liw hryy diyc henn-aw, kaisiw cniur Vingqax ee qowsu.”

Jitt xee jaboxlangg si jit xee lau hurzinlangg, Hongid sniu, ix itding si hongqiongx lai pacpair kangkuer ee luxdiongx tauu.

Vingqax qowsu jin’ dngg, juanvo cniur uann rair iong quixlyhh amr ee siqanx, soxiw Hongid dyrr laii mng kiw,

“Juanvo qowsu jit sii byy huatdo cniur uann, lauriaa dairzinn beh tniax dycc jit dnxua?”

Qangrkuanw si jabow sniax rinr qongxx,

“Dyrr suanw Dannoura Dairjenr hitt dnxua, hex si siongrr vicamw, siongrr tniawsimx ee jit dnxua.”

Hongid dyrr cringx sun naauu, qra qikqax ee Vingg-Guann nng qunx haixjenr qua’iauu cniur .lyc .kir.

Ix iong givee griw cud jiongw jiongw ee sniaimx. U junvuex qyr junn ee sniax, jnxir hiiux decc vuex ee sniax, jingww langg huachiux ee sniax, kax jamr tokax ee sniax, dyqiamr taii diyc ticqah ee sniax, langg ho’ngg pah lyc haiw drew ee sniax, jit jun jriab jit jun longxx byy tingkunr.

Viauxenw qaur jidvnuar ee sii, Hongid tniax diyc sinkux vnix qra ix ylyw cicix-curcu ee qongw ue sniax,

“Givee sensnix u qraur gauu dnuaa qapp cniur a.”

“Dirr guanw hniuliw byy kylingg tniax diyc jitt kuanw ee suatcniur.”

“Cniu Hongid jiacc gauu cniur .ee dairkair si byy derr zi xee lar.”

Tniax diyc jiaxee vysyx ee ue, Hongid ee simjingg qapp iongxkir qui’ xee longxx mew .kiw .laii, qanghux jin denw, vniawser dnuaa, vniawser cniur.

Inui sniu’ quer jingcaiw, siwkouii aw suacc venr qaxx diam jicjih. Mrqycc suar .lyc cniur qaur bixzinn ziogjiaw ee unrmia---hurzinn qapp ginxaw-----, Ziruirnii ciuw py sewhanr hongder tiaur lyc haiw drew hitt dnxua siongrr vicamw ee qowsu, tniajiongr muixx jit xee longxx huad cud jiokk quw jiokk quw qangkuanw tongwkow kukur junx ee sniaimx, liauxau juanvo ee langg longxx dua sniax hauw .cud .laii, qui’ din langg visiongx qaxx luan caucaux, cngwcngr qiyr ee sniax ensiok u .jit .dah .quw .aw.

Hongid marr jiokk diyc qniax, qaqi ee givee dnuacniur e inxkiw jiacc qiongg ee visiongx jingsu, ix marr sniu be qaur. Tikaur ee sniax ban ban aw laii byy .kir liauxau, u jiokk quw jiokk quw ee diamrjing qongqingw. Jitt sii u jit xee lau jabow sniax, Hongid sniu ix si hitt xee luxdiongx tauu, qongw, “Guanw longxx tniax qongxx liw si jit xee jiokk gauu dnuaa givee ee sensnix, byy langg qapp liw e viw .did, narr m si ing’amr bin duir bin tniax diyc liw ee dnuacniur, iaxx m jaix liw si jit xee jiacc nirr u jaijingg ee langg.”

“Dairzinn si jiokk qra liw ylyw himsiongw, marr beh dua dua qamxsia qapp sniuxsur .liw. Cuxau lak qangx, liw muixx amr laii jiax enxcniur hro dairzinn tniax. Qycc quer, guanw dairzinn dyrr beh huee dxiauu. Minaxjair qang jitt xee siqanx, jitt xee soxjai, guanw qasinn e qycc kir qra liw cua .laii. “

“Qycc u jit hxang beh qra liw huanhur, dyrr si guanw dairzinn laii jiax Ciacqanquanx qniadac cam’ dirr jitt qingx dua tehngi tingg kax ee dairjir, hibang liw duiww si’angg dy’ m tangx qongw kiw. Dairzinn si diam diam aw cud .laii, cutzip ee dairjir itkair vyxbit, dnaxx liw erdangr dngw .kir .ar.”

Hongid hiongr duiwhongx viauxsi qamxsia, dyrr ho’ngg cua qaur mngkauw, qycc hro guanvunw dyrr dirr hiax danw ee hitt ee buxsu cua lo, buxsu qra Hongid cua qaur sirngi au ee gimjnii kax jiurqin, dyrr qywsii lirkuix.

Hongid dngw qaur sxi lai byy zuarr quw, tnix dyrr qngx :ar. Ix qui’ amr byy dirr sxi lai ee dairjir si’angg dy’ byy kir diwqag .diyc. Jurcii suhu vutjiw aw nguar jiacc dngw .laii. Ix sniu qongxx Hongid ingwqaix si decc kunr jiacc driyc. Hongid liriong zit .sii langr pang siyw hiyckunr .jit .xe.

Ix qongw ue jin’ siyxsimx, narr cam’ hitt qnia qiquair dairjir siyxkuaw u kanlenn ee uergiw ix jit qxur dy’ byy tee kiw.

Qeh dngw qangx ee iarvnuar, qang hitt xee qasinn buxsu qycc laii cua Hongid kir hitt qingx quiwvinx jurjip ee dua tehngi. Hongid ee dnuacniur did diyc qapp dingw vaiw qang kuanw ee singqongx. Mrqycc ix jitt vaiw cutgua byy dirr sxi lai ee dairjir byiwdiongx kir ho’ngg knuar .diyc.

Danw ix taur jaw dngw .laii ee sii, dyrr ho’ngg qiyr kir jurcii suhu ee binrjingg. Jurcii suhu iong diyc unsunn mrqycc liyc aw jikjue ee kuiwkauw mng kiw,

“Guanw longxx jiokk quawdiaur :liw, liw bagjiux byy knuar lehh, qycc jit langg hiacc nguar cud . kir, si jiokk huihiamw .ee. Liw narr dairsingx u qongw, guaw marr erdangr qiyr sxi lai qadingx suxiongrzinn qapp liw kir. Liw dauwdew si kir dyc'ui lehh?” Hongid uergiw bih bih cih cih huedab qongxx,

“Suhu, cniaw liw guanliong, guaw inui u jit quaw qywzinn ee susu, byy dirr hitt xee siqanx cud .kir bersaiw.”

Jurcii knuar diyc Hongid dunwdnex m qongw, dyrr byy qycc mng .lyc .kir. Ix huanlyw kacc sux diyc qniax. Surjingg jin’ ho’ngg giaugii, jitt xee bongganw ginxaw si m si duw diyc siaxmic pnaixkangx :ee? Narr m si kir hro imhunn dnii .diyc, dyrr si kir ho’ngg penr .kir.

Suibongxx ix byy qycc mng, ix iaxx si amr amr aw qaudair sxi lai qadingx, juwir Hongid ee hingvangr, amr sii narr qycc jauw cud kir sxi gua, dyrr duer dirr ix aurviah, knuar ix si jauw kir dyhh.

Derr zi qangx amr, Hongid qycc hro langg cua cud sxi-gua, jiongww qadingx qnuaxqinw dinglangw tec lehh, duer dirr ix aurviah. Hitt mee ho jiokk dua, guarkauw si jiokk amr .ee, jiongww qadingx dy’ iaxx bue qniaa qaur dua lo, Hongid ee langngiaw dyrr ixqingx siausid .kir .ar.

Nacc e qniaa jiacc qinw? Jex dyrr quaiwqii lor. Jit xee bongganxjiaw dirr lyc ho ee amr mii qniaa lo viw bak qngx ee langg kacc qinw, qinw qaxx naxx vuex lehh?

Jiongww qadingx dyrr qinw laii qaur cirkux, hiongr Hongid suwsiongg kir ee zinqecur tamwmng. Qetqyw longxx byy langg jaix. Hongid si kir dyhh lehh?

Qaur lorbuew, jingww langg byy huatdo, dyrr sun diyc haiw vnix ee lo qniaa, tangx hyw kacc qinw dngw laii sxi nirr.

Dyrr dirr jitt sii, tniax diyc ser sniax mrqycc cingcyw, dirr Amiwdyy Sxi ee bongrde hiax, u langg decc dnuaa givee. Jiongww qadingx qniax jit diyy, hitt dah diliauw u sii e knuar diyc nng~snax pax quixhuew decc sih .jit .xe sih .jit .xe ixgua, vingsor sii qaur xia .laii si amwbinbongx, m vad u langg qniaa kax qaur. Jongw .si, dag'ee iaxx si qinw hiongr bongrde hiax qniaa .kir, dyrr dirr dinglangw ee qngsnuar ciyrsia diongx, knuar diyc Hongid dogdok jit langg jre dirr Andig Tenhongg ee bong taujingg, qui’ sinkux ag qaxx damm qoo qoo, dng' decc dua sniax cniur diyc Dannoura liongw qunx dairjenr ee kikdiau.

Ix aurviah cam’ siwkouii aw, quixhuew jit pax jit pax, naxx cniu lahjig decc dyc, je qaxx liw snex bagjiux dy’ m vad knuar quer hiacc je.

“Hongid Senx! Hongid Senx!” jiongww qadingx dua sniax qra huah, “Liw si kir hro dycc jit xee quixhunn bee .kir? Hongid Senx.”

Mrqycc Hongid naxx cniu byy tniax diyc ee kuanw, ix dng' decc vniar diyc juann sinkux ee kuiwlat, qra givee dnuaa qaxx dindinx-dongdongx, juanquanr decc cniur ix ee kikdiau.

Jiongww qadingx cic uaw kir, qra Hongid liac lehh, dirr ix ee hnirkangx vnix qongw,

“Hongid Senx, qinw duer guanw dngw laii kir cur, ho jin’ dua.”

Nacc jaix jitt xee bongganxjiaw suacc iong jikvi ee uergiw qra jingww langg qongw,

“Dirr jiaxee qyquir ee vinkeh taujingg, anxnex qra langg qiauxziauw si berdangr iongunw .ee!”

Jingqingw suibongxx si jiokk kiongxvor, jingww langg iaxx si zimw be diauu ciyr .cud .laii, Hongid jniasit si kir hro quixhunn bee .kir, jiongww qadingx dyrr qycjaiww cic uaw .kir, qra Hongid ee sinkux liac lehh, cud lat, qra ix qrngx quann .kiw .laii, snax vo jyr nng vo, vniar dngw laii sxi nirr.

Jurcii suhu qnuaxqinw qiyr dag'ee qra Hongid ee damm snxax trngr driau, sinx snxax cing lehh, qycc tec hro ix jiac siyx :ee, limx siyx :ee, liauxau suhu dyrr qiyr Hongid qra dairjir ee taubuew id-gnow-id-jap s.-siongser-s. qongw hro cingcyw. Hongid diwqag diyc dairjir ee giamdiong, qycc knuar diyc suhu duiww qaqi ee quansimx, m qnaw qycc dunwdnex, dyrr ui’ Vingqax buxsu laii cue :ix kaisiw, jiongw jiongw surhang qapp quewtingg longxx byy lauwqaux, qongw qaxx jiokk cingcyw.

Jurcii suhu tniax uann jiacc ban ban aw qongw,

“Kyxlenn ee ginxaw, liw dnaxx srinx ham dirr jiokk huihiamw ee qingxqair diongx, liw byy jurr kaisiw dyrr qra dairjir qongw hro guaw jaix si m driyc :ee, sniu be qaur liw ee imgak jaijingg suacc qra liw duar laii jiacc dua ee jailan. Liw juadduir m si kir langg ee dua tehngi viauxenw, liw si kir Vingqax ee bong-aw quer qui’ mee.”

“Dui' jitt jun kiw, narr byy kacc jimjiog .jit .xe, si be ing .did. Ing’amr jiongww qadingx dyrr si knuar liw dirr lyc ho tnix jre diamr Andig Tenhongg ee bong taujingg. Liw taukag lai soxx sniu :ee , diliauw buxsu quixhunn cue :liw si jinx :ee, cunx :ee jiongw jiongw longxx si huanwngiaw.

Qycc laii, liw itdanr tniax quixhunn cekenw jit vaiw, ixau dyrr qiwjai ix caulang. Liw dnaxx qycc qra dairjir qongw puar, inx juadduir be vangr liw qanhiux, liw narr qycc hro inx cua .kir, huanrser inx dyrr qra liw ced jyr veh quec. Hnuaidit qongw, liw jaxban itding e hro inx hai .siw.”

Suhu qongw qaur jiax, siyw hiyckunr .jit .xe, jiacc qycc qongw,

“Vunxdew guaw ing’amr ingwqaix qapp liw jywhuew, diamr liw sinkux vnix, tangx hyw vyxho :liw, mrqycc guaw iauxx u jit xee huathue rair jyr, jex dairsingx, guaw beh dirr liw ee sinkux dingw siaw qingbunn .

Jurcii suhu qapp jabbu siyw samix dyrr giaa vid dirr Hongid ee hingkamw, kajiacpniax, taukag, bin, amrqunw, ciuw, kax, lenrr kax drew marr byy lauwsid .kir, longxx siaw bat puatjew simqingx ee bunqur, nng langg byy ingg qaur zit tauu lyc snuax jiacc siaw hyw. Suar .lyc, suhu qra Hongid qongw,

“Ing’amr guaw jit cud mngg, liw dyrr dirr gimjnii kax jre lecc tingwhau, danw hitt xee quixhunn laii jriab :liw. Mrqycc vutquanw u siaxmih dairjir, liw cenban m tangx rinr sniax, m tangx dinxdang, longxx mair kuix cuir qongw ue. Diam diam aw jre dirr hiax, cniu siamding hitt kuanw.”

“Narr dinxdang .jit .xe, iacc si cud sniax .jit .xe, liw dyrr e ho’ngg hai .siw. Mrbenw qniax, marr m tangx beh huacqiur, huacqiur marr byy langg laii qra liw qiur. Guaw qongw jiaxee ue, liw narr longxx jiauww jyr, byy uivue, dyrr e piah quer huihiamw, iaxx kiongxvor ee dairjir marr be qycc laii huatsingx.”

Zit tauu jit lyc snuax, jurcii cam’ siyw samix dyrr cud mngg .kir. Hongid jiauww suhu qongw :ee, langg laii qaur gimjnii kax, dairsingx qra givee kngr dirr sinkux vnix ee tokax dingw, qycc laii, ix iong siamding ee juser jre hyw, juwir mair kamsaur, cuanw kuir jinrliong vangr hro ban, snaix vangr hro qe, qe qaxx ho’ngg tniax byy. Dyrr anxnex diam diam danw. Quixlyhh diamxjingx daim diam aw quer .kir.

Jitt sii guarkauw dua lo u kavo qniaa uaw .laii, kavo-sniax tongquer au mngg, jnaw quer dua dniaa, itdit qniaa uaw gimjnii kax jiacc dongwdiam, li Hongid iaxx u quixlyhh vo hng.

“Hongid” laizinn iong jiokk u lat ee sniax qiyr, jitt xee bongganxjiaw byy rinr sniax, lenrr cuanw kuir dy’ jiamrsii qimr .kiw .laii, langg byy-din.-byy-dang jre jai jai.

“Hongid”, laizinn iong beh qra langg hecqniax ee sniaimx qycc qiyr jit vxenr, qang kuanw byy tniax diyc inwsniax.

“Hongid”, derr snax vxenr quikir iong jiokk pnaiw ee sniax huah, e ho'ngg qniax puar dnaw. Hongid qang kuanw naxx jiyhtauu cai dirr hiax.

Sui’ qycc tniax diyc laii jiarr iong dauhiamm ee sniax gniau gniau liam qongxx,

“Byy langg rinr sniax, anxnex bersaiw, siyw qniaw, byy knuar hex langg, daudew si jauw kir dyhh cangr?”

Dyrr anxnex qaqi qongw, qaqi tniax, gniau gniau liam be suah, kavo-sniax zuxx dimdang qniaa uaw laii kia dirr Hongid ee binrtaujingg, Hongid si qui’ sinkux kurku junx, simjong pigpok cnaiw, siwkouii aw si diam jiucjiuh. Qycc quer jit dah .quw .aw, qycc tniax diyc colow sniaimx sisix-sudsut qongw,

“Givee dyrr dirr jiax, acc givee senx lehh? Qandna' cunx nng pnir hni-aw, bogquair ix longxx byy huedab rinr sniax, huedab rair iong ee cuir dy’ byy :ar, beh anxjnuaw huedab? Si qongxx, sinkux cunx ee vorhun nacc e longxx byy knuar .diyc? Jin’ si quair su! Qniax qongxx langg m sinr, guaw dyrr qra jitt nng pnir hni-aw tec .dngw .kir, hro guanw dairzinn knuar, dongwjyr jingwqir, siongrr jiyw marr erdangr jingwbingg qongxx guaw byy ovec qongw.”

Jit bak nih ee siqanx, Hongid ee hni-aw dyrr hro nng qix naxx tih ee jingxtauu aw giuw ann, diah .lyc .laii, tniar si tniar ui’ simqnuangiw-aw .kir, mrqycc Hongid iaxx si byy cud sniax.

Suar .lyc, laii jiarr dyrr dac diyc dang dang byy hnuahiw ee kavo, anww gimjnii vnix trer .kir, lirkuix dua dniaa, hiongr dua lo qniaa .cud .kir, siauid .kir.

Hongid qamxqag diyc taukag nng vingg vnix :a u qyx qyx siyx siyx ee mihqnia dih .lyc .laii, mrqycc ix iauxx si m qnaw qra siangx ciuw giaa .kiw .laii.

Zidtauu cud .laii jinwjingg, jurcii suhu dngw laii sxi nirr, ix quanxqinw jauw uiww lairdew cur ee gimjnii kax .kir, qnuaw jit xe hiongg, dac diyc m jaix siaxmic liamm liamm qoo qoo ee mihqnia, cux jit dyw, qiyr jit sniax, dirr dinglangw ee qngsnuar ciyrsia xe, knuar cingcyw hex liamm liamm qoo qoo ee mihqnia si jit cog angg pacpah ee hueh. Qycc knuar diyc Hongid iuguann iong siamding ee juser jre dirr hiax, huecjuiw itdit ui’ hni-aw ee siongkauw cobcop dinx .lyc .laii.

“Si anxjnuaw hioh? Liw kir siongx .diyc ar?”, diyc qniax ee jurcii dua huah cud sniax.

Tniax diyc suhu ee sniaimx, bongzinn Hongid simtauu anx :ar, hiongg hiongg dua sniax hauw .cud .laii, naxx hauw naxx qra jaramr ee dairjir qongw .cud .laii.

“Kyxlenn ee ginxaw! Kyxlenn ee Hongid!”, suhu jriab lecc qongw,

“Longxx si guaw ee sosid! Giamdiong ee sosid! Guaw dirr liw ee sinkux dingw muixx jitt xee soxjai longxx siaw bat qingbunn, dandanx hni-aw lauwqaux .kir.”

“Hitt dah guaw qiyr siyw samix siaw, liauxau guaw qycc srunn byy jiauu diyc, longxx si guaw m hyw. Zuxx qongw si zuxx huann, marr byy vangjo. Jit jun, qinw laii qra liw ee siongkauw dri hro hyw kacc iauxqinw.”

Qingquer isingx cinced dingxjinx ee dirliauu, Hongid ee siongkauw byy zuarr quw dyrr juann hyw :ar.

Jitt qnia henqii qniahiamw ee dairjir dyrr jurr Amiwdyy Sxi liutuann qaur siwqer .kir, Hongid marr venr jyr jit xee jiokk u miaa ee langg.

Qui’ dua din langg laii Ciacqanquanx, beh tniax Hongid ee suatcniur, lairdew huwquir zinqex sniuxsur hro ix jiokk je qimjnii qapp lexmic. Hongid marr venr jyr jit xee hyxgiac langg, mrqycc ix ee vunw miaa suacc byy langg jaix, qandna' qiyr ix givee senx ee byy hni Hongid.

guanjokjiaw: Yakumo Koizumi 小泉八雲