Bang Jap Xia

(夢十夜)

derr qauw xia

( 第九夜)

Lu Juxbingg huan'ik

Jex sewqair nacc e byy-hongx-byb-iyy venr qaxx qunxqaw caw .kiw .laii? Siser knuar lyc qaxnaxx beh kiw jenwjingx ee kuanw.

Hiac’ee byy-nguax-bew inui muixx jit dah longxx decc dyc huew, byy hunx zit-mee, dirr zinqecur siwkouii-aw kogkok jongg, naxx cincniu hex jenwdniuu ee vorvingx decc duiqnuaw senrliongg vecsner qangrkuanw, jit puex qycc jit puex.

Mrqycc dirr jitt dah, cur-lai suacc diamrjing qaxx byy jit diamw aw sniasueh. Cur-lai dyrr qandna’ siauwlenn laurbuw qapp jit xee beh snax huer ee ginxaw. Ginxaw ee laurve m jaix dyc’ui kir. Laurve li cur sii, si jit xee byy cud guehniuu ee amwmii. Ix langg jre dirr tokax, cauxee cing lehh, ox tauqinx vak lehh, an’ aurbuew mngg qniaa .cud .kir.

Hitt sii, jyr niuqniaw :ee ciuw tec langdingx, lahjikhuew jiokk ser pax, qngsnuar si iur iur ser ser diauu ciy .cud .laii, qra livax jingg hitt jangg lau hinoki ee sinngiaw giuw qaxx jiokk dngg.

Javolangg dyrr anxnex m bad qycc dngw .laii. Jaboxlangg dagg qangx dy’ mng ginxaw, “Linw vavax lehh?” Ginxaw sniaw longxx byy qongw, quer u .jit .dah .quw .a, rinr qongxx, “Hiax,” qycc ciyr ciyr. Jaboxlangg qycc mngg, “Dirsii dngw .laii?” Ginxaw qangrkuanw qongw, “Hiax,” qycc ciyr ciyr.

Hitt sii, jaboxlangg marr duer ginxaw ciyr. Suar .lyc, ix dyrr qra ginxaw qar qongxx, “Jitt jun dyrr beh dngw .laii.” Mrqycc ginxaw qandna’ erhiauw qongw “Jitt jun.” Vutquanxsii laurbuw mng, “Vavax lehh?” Ginxaw dyrr rinr “Jitt jun.”

xxxxx

Qaur qaxx amwsii, siwvingg vnix:a diam jiucjiuh, siaulenn jaboxlangg dyrr qra iyduar qad ann, suahii-puee dysiur haa hyw, dew dyx cah .zip .kir, ginxaw iong ser diauu ngairqinx ngai dirr kajiacpniax, liamx kax liamx ciuw kinx kinx aw qniaa .cud .kir.

Jaboxlangg jongw si cauxeee cing diauu diauu, ginxaw narr tniax diyc cauxee qniaa lo ee sniax dyrr dirr laurbuw kajiacpniax dingw kunr .kir.

Jitt diauu lo ee vnix:a si qui’ vaii cur qapsiylenn, toqad cniuuii-aw u quiw por lo dngg, lo suibongxx si lyhqia, mrqycc vutjiw aw vneunn, jaboxlangg en’ lo hiongr saix itdit qniaa. Lo ee jinrvong u jit jangg quann quann ee ginhing-ciu, qaur jiax rair uad jniar ciuw vingg, qycc qniaa beh jnia’ vah biw, dyrr erdangr knuar diyc jit xee jin’ quann ee niauxqix vaihongx. Vaihongx siangx vingg, jit vingg si kuah bongxbongw ee canhngg, jit vingg si jiokk om ee snuavehdig, en’ lo qycc qniaa .jit .dah .quw .a, dyrr venr jyr samx-aw ciurnaa, qycc laii dyrr si vnee tnaxtnaw ee jiyhvanxlo. Jiyhvanxlo u snax jap gua biw, qniaa uann jitt snax-jap biw, dyrr laii qaur qxow sinbiy ee ked-aw-kax. Biy taujingg u jit kax quanhenwsniux, nii quw guec cimx, sniux-aw guarkag henr cud pacpuw vec. Sniux-aw vnix:a, jit diauu iyy lingdongx ee syh-aw an’ taubuexdingw dinx .lyc .laii. Syh-aw vutjiw aw cox. Narr si zit sii, dnax tauu dyrr erdangr knuar diyc lingdongx vnix:a qruar diyc jit der vaivenw, vaivenw dingxquann kig “Vad Huanx Qiongx” snax zri. Hex Vad .zri nng diamw, naxx cincniu jit duir siyduir vuex ee hunxjiauw, knuar .kiw .laii qycc jin’ simsig.

Qitax vaivenw marr be jiyw, dua vorhun si huanhuw ee buxsu dirr siarjnir vixsair diongx ngiaa diyc taujingg miaa :ee. Hitt sii jniwvew diongsimx longxx kong qimx, sria diyc diongsimx ee suanxciuw, e qra kong qimx ee jniwvew vrag .kiw .laii, cam’ ix henr hro sinden ee vaivenw liamm jywhuew, vaivenw dingw dongzenn u hex buxsu ee miaa. Iarr u sinwdoo e hongrhenr dngg dyx, marr si jin’ dadjnii:ee.

Niauxqix guarui samx-aw ciu dingxquann ee amwqongjiauw, vutquanxsii dy’ decc hiuqiyr. Jaboxlangg soxx cing cojyr ciuxqangx ee cauxee, dac diyc tokax huad cud “cuua cuua” ee snia’imx. Jiauw-aw-snaix, cauxee-snaix, snaqap hoingr jit laii jit kir longxx byy tingg. Itdit danw jaboxlangg qniaa laii qaur vaiwden taujingg jiacc diam .kir.

Jaboxlangg dairsingx giuw syh-aw hro lingdongx dann, suar .lyc pacjiongw, qui .lyc. Poxtongsii amwqongjiauw dirr jitt jun longxx e qiyr qaxx jin’ hiongg qycc mew. Jaboxlangg byy quanw jex, simqnuax vangr hro cringx, juansimx itir qiqiuu sinbingg vyxvir angsair ving’anx byy dairjir. Ix sniu qongxx, huqunx si jit xee buxsu, guaw laii jiax hogsai “Qiongjnir ji’ Sinn” ee “Vad Huanx Qiongx” singsimx camvair, sinbingg nacc e byy vyxvir ee dyrliw lehh?

Ginxaw hro lingdongx ee sniax caw cnew .kiw .laii, jit knuar, siwqer amwbinbongx, suacc dua sniax hauw .cud .laii. Jitt sii jyr laurbuw:ee jit vingg cuir-lai naxx liam qriuu sinn ee uergiw, jit vingg naxx qra kajiacpniax iyy lehh iyy lehh, andah ginxaw. Ginxaw hauxsniax u sii tingg .lyc .laii, u sii suacc zuxx dua sniax. Bylun anwjnuaw, siauwlenn laurbuw byy beh cinwcaiw kia .kiw .laii, itdit qaur qaxx ix qiqiuu sinbingg vyxvir angsair ving’anx ee gensuu liam hyw, ix jiacc an’ qui lehh ee juser kia .kiw .laii, dairsingx qra ngairqinx vangr hro ling. Ginxaw kngr .lyc, ngua iong siangx ciuw qra ginxaw py dirr hingkamw jingg, langg vreh jnriu sinden ee ked-aw. Ix iong qaqi ee bin kinx kinw aw ur ginxaw ee bin qongw, “quaix hnoh, dirr jiax siyw danw .jit .xe.” Suar .lyc dyrr iong ngairqinx jit tauu qra ginxaw vak lehh, iaxx lingrgua hitt tauu dyrr qad dirr sinden ee lanqanx. Liauxau qniaa lyc lautuiked-aw, dirr sir-jap biw dngg ee jiyhvanxlo-dingw, ix beh laii aii kir kir qniaa jit-vah jua.

Ginxaw dirr amwbinbongx ee hangrlo vee laii vee kir, ngairqinx zuarr dngg dyrr vee zuarr hng. Jitt jun duiww diyc siauwlenn laurbuw si simqnuatauu siongrr cingsun ee sii. Sinbingg narr knuar diyc ix ee singsimx, marr e qra vyxvir. Mrqycc narr si hro ngairqinx vak lehh ee ginxaw kaisiw decc hauw, jyr laurbuw :ee marr e vut’anx. Dirr jiyhvanxlo qniaa ee kavo dyrr venr qaxx cneqongg .kiw .laii, pnirkangx cuanxkuir marr venr qaxx cuanw be sun. Ginxaw narr qycc kacc dua sniax hauw, ix dyrr qovutjiongx suaw kax lirkuix jiyhvanxlo, dngw laii sinden andah ginxaw. Andah hyxser, jiacc qycc qniaa laii jihvanxlo, ui’ tauu kaisiw jit-vah jua ee unn lo.

Iauxx mrqycc, hro siauwlenn jaboxlangg dagg amr be ansimx, xia xia causimx vecvag ee buxsu laurve, jin’ jaw dyrr siw dirr vad xee buxsu longrzinn ee dyx-ha.

Jitt xee visiongx ee qowsu si a’buw dirr bang-diongx qra guaw qongw :ee.

guanjokjiaw: Natsume Soseki 夏目漱石