Vegurinn til Fljóta

Vegurinn til Fljóta.

Einherji fimmtudaginn 5. október 1933

Þeir Árni Pálsson verkfræðingur og Lúðvík Kemp vegagerðarstjóri Ríkissjóðs  hafa síðastliðna viku verið að mæla og athuga vegarstæðið yfir Siglufjarðarskarð  til Hrauna.

Áður hafa, eins og kunnugt er, ýmsar leiðir verið athugaðar og mældar yfir  fjallgarðinn milli Siglujarðar og Fljóta svo sem Botnaleið þar sem vegurinn lægi  kringum Nautadal niður Skyrfingshóla yfir Brúnastaðaá ofan við Brúnastaðatún  og niður þaðan sem leið liggur til Fljótabrúar.

Reyndist sú vegalengd rúmir 15  km. og halli vegarins víðast hvar 1 móti 9. Þá hefir og verið mæld leiðin yfir  Skjöld sem er 490 m. yfir sjó. Reyndist sú leið vera 29 km. að Fljótabrú. Nú  síðastliðið ár hafa hugir flestra er vit hafa á hneigst frá þessum leiðum en að  hinni fornu alfaraleið yfir Siglufjarðarskarð. Nú í ár hefir leiðin yfir  Siglufjarðarskarð verið athuguð vandlega og er athugun þeirra Árna og Lúðvíks  að þessu sinni úrslitarannsókn á þessari leið.

Einherji hefir haft tal af þeim félögum og hafa þeir látið blaðinu í té eftirfarandi  upplýsingar um vegarstæðið.

Vegalengdin frá Siglufjarðareyri til Hrauna reynist að vera 13 km. eða um 19  km. að Fljótabrú. Þar af eru þegar fullir 2 km. bílfærir eða vegurinn frá Eyrinni til  Skarðdals. Eftir mælingu þeirra og nákvæmri athugun með tveim hæða  barómetrum, er Siglujarðarskarð 585 metra hátt yfir sjó. Er það um 12 metrum  lægra en sýnt er á korti herforingjaráðsins.

Hvað legu vegarins viðvíkur, ætlast þeir til að vegurinn sé lagður upp  Skarðdalshryggina, að minnsta kosti í bráðina. En ákjósanlegast væri að hann  lægi með jöfnum halla suður hlíðina ofanvið Steinaflatir. Verður það sennilega  framtíðarleiðin. Er vegurinn hefir verið lagður fullan km. upp Skarðsdalshryggina  liggur hann í tveim beygjum með hall 1 móti 10 og yfir þvergilið við efsta fossinn. 

þaðan í beinni línu með sama halla suður og uppí Skarðsdalsbotn beygist þar  norður á við með sama halla eftir hlíðinni ofan við Skíðakofann beint í  Siglufjarðarskarð. Sjálft Skarðið verður lækkað talsvert. Vestan Skarðsins liggi vegurinn suðvestur hlíðina aftan  við botn Göngudalsins og utan um fellið sunnan við hann beygist þá suður í  hlíðina norðan í Breiðfjalli um svokallað Gönguskarð, þar sem gamli vegurinn  liggur uppá nyrðri Eggjabrekkur úr Hraunadalnum og þaðan suður hlíðina yfir  Sauðdalinn ofan við gamla veginn uns hann mætir Hraunabraut ca 500 metrum  sunnan við Hraunabæinn. Alltaf er haldið sama halla 1 móti 10. Það mun vera  almenn ósk báðum megin Skarðsins að byrjað verði á veginum í vor, svo bílfært  verði um Skarðið síðari hluta næsta sumars.