Mjölnir, 5. september 1939
Þormóður Eyjólfsson hefur stefnt ábyrgðarmanni Mjölnis og krafist, að blaðið taki aftur þau ummæli sín, um að Þormóður væri landráðamaður við Siglufjarðarkaupstað og að hann væri smánarblettur á bænum.
Þessu var auðvitað neitað, því öll framkoma Þormóðs undanfarið i garð Siglufjarðar hefir verið svo fjandsamleg, sem mest má vera og fullkomin landráð við bæjarfélagið.
Þormóður þorir ekki að verja sig fyrir dómi almennings og óskar heldur að fá dóm Guðmundar bæjarfógeta um málið og er þá eins og málefni standa til.
Á sáttanefndarfundi lýsti Þormóður því yfir, að völdin skyldu verða tekin af núverandi bæjarstjórnarmeirihluta án kosninga. Það væri þegar ákveðið.
Ennfremur sagði Þormóður, að það væri ákveðið að senda fjölmenna ríkislögreglu til Siglufjarðar.
Ekki er vitað hvort Þormóður lýgur þessu upp eða að þjóðstjórnar-meirihlutinn hefir lofað honum að beita Siglfirðinga ofbeldisráðstöfunum.
-----------------------------------------------------------------
Mjölnir, 5. September
Molar
Mjölnir skýrði frá því fyrir skömmu, að ríkisverksmiðjurnar hefðu tekið sig til og farið að gína yfir vinnslu þeirri á hausum og síldarúrgangi, sem Grána hefir haft undanfarið.
En ekki virðist græðgin hafa gefið hér þann ágóða, er til var ætlast, því að ríkisverksmiðjurnar kunnu, þegar til átti að taka, ekki með þessa vinnslu að fara og ganga sögur um, að þær hafi þegar eyðilagt mjöl fyrir 20-30 þúsund krónur.
=======================
Það þykir nú auðsætt, að ríkisstjórnin hafi með framkomu sinni girt fyrir það, að nokkur aukning verði á síldarverksmiðjum fyrir næsta ár og er þá tilgangi hennar að sjálfsögðu náð.
Hafa Síldarverksmiðjur ríkisins varið tugum þúsunda króna til mannasendinga til að eyðileggja endurbyggingu Rauðku með þessum árangri, að engin aukning verður framkvæmd á síldarverksmiðjum fyrir næstu vertíð og ef til vill ekki um ófyrirsjáanlegan tíma.
Hversu óverjandi þessi framkoma er, má m. a. draga af því, að í smá veiðihrotu nú alveg nýlega, varð svo fullt á Raufarhöfn, að hlaða varð upp með þrónni og rann lýsið í stríðum straumum í sjóinn.
Hér í SR á Siglufirði hafðist ekki við að taka á móti og biðu 20-30 skip eftir afgreiðslu.
Ríkisstjórnin sér ekki fært að veita Rauðku leyfið, en hún hefir efni á að kasta verðmætum þannig í sjóinn.
=======================
Þegar Jón Gunnarsson lét í haf til að komast yfir lánstilboð Rauðku þar ytra, gerðist Sveinn Ben. ærið umsvifamikill i stjórn ríkisverksmiðjanna.
Ráðskaði hann nú í öllu einn og hugsaði sér að vera framkvæmdarstjóri í fjarvistum Jóns.
En ekki reyndist hin nýja vinátta Þormóðs með öllu græskulaus. Kallaði hann saman stjórnarfund og lét Þorstein M. bera fram tillögu um, að Magnús Blöndal skyldi vera framkvæmdarstjóri, meðan Jón væri í burtu.Var tillaga þessi samþykkt gegn atkvæði Sveins.
Er sagt, að Sveini hafi orðið svo mikið um, að hann hafi misst matarlystina þann daginn.
========================
Mjölnir, 5. september 1939
Leiðrétting.
Út af ummælum Þorsteins M. Jónssonar í síðasta tölublaði Einherja sendi ég yður hér með staðfestan útdrátt úr reikningum Síldarverksmiðju Siglufjarðarkaupstaðar Rauðku, og bið yður að birta i næsta blaði yðar.
Virðingarfyllst.
Siglufirði, 5. september 1939
Snorri Stefánsson verksmiðjustjóri.(sign)
ÚTDRÁTTUR úr reikningum Síldarverksmiðju Siglufjarðarkaupstaðar »Rauðku» fyrir árið 1938 dags. 20. jan.1939.
I. Nettóhagnaður kr. 11.476.51
II. Gjöld:
1. Greitt fyrir hráefni kr. 45.111.11
2. Greitt fyrir viðhald kr. 14.621.51
17. Vörugjald af útfluttum vörum, til hafnarsjóðs kr. 2.628.75
18. Vatnsskattur til bæjarsjóðs kr. 1.177.60
19. Greidd leiga til Siglufjarðarkaupstaðar kr. 25.032.77
20. Útsvar til bæjarsjóðs kr. 1.957.25
Hjörleifur Magnússon (sign) settur.
Réttan tölulegan útdrátt úr reikningum Síldarverksmiðju Siglufjarðar-kaupstaðar RAUÐKA fyrir árið 1938, dags. Siglufirði 20. jan. 1939, með endurskoðunaráritun Ó.G.Baldvinsson og K.Dúason, mér sýndum í dag staðfestist hér með.Skrifstofu Siglufjarðarkaupstaðar 5/9 1939
(Stimpill)
Gjald:Staðfesting kr. 1.40
Stimpilgjald kr. 0.65
Samtals kr.2.05
Tvær krónur 5/100
Þessi yfirlýsing var einnig birt í Einherja 1. september 1939 + umfjöllun Einherja