Jóhann Andrésson

Dagblaðið Vísir - DV - 11. apríl 1992

Jóhann Hjalti Andrésson vélsmiður, Vetrarbraut 19, Siglufirði, verður sjötugur á morgun, 12. apríl 1992. 

Starfsferill:
Jóhann Andrésson fæddist að Hjaltastöðum í Blönduhlíð í Skagafirði þann 12 apríl 1922 en ólst upp á Siglufirði. 

Á æskuárunum frá átta ára til fjórtán ára aldurs var hann ýmist vikadrengur á sumrin í Skagafirðinum eða hann gekk að síldarsöltun með móður sinni. 

Á unglingsárunum vann Jóhann ýmis störf sem til féllu á Siglufirði, vann á síldarsöltunarstöðvum, við síldarlosun, vann í mjölskemmum Síldarverksmiðju ríkisins og einnig talsvert á vegum Eimskips og Ríkisskipa. 

Hann lauk unglingaprófi frá Barnaskóla Siglufjarðar 1936, gagnfræðaprófi 1939, prófi frá Iðnskóla Siglufjarðar 1960 og prófi í vélvirkjun sama ár. 

Jóhann hóf störf með iðnnámi 1941 á verkstæði föður síns sem rak vélsmiðju á Siglufirði.

Hann tók síðan við rekstri verkstæðisins við lát fóður síns 1959 og starfrækti verkstæðið til 1977 þar sem hann stundaði einkum rennismíði. Jóhann annaðist síðan gæslustörf í skipum Þormóðs ramma hf. á Siglufirði þegar skipin lágu í höfn og vann jöfnum höndum á hafnarvog Siglufjarðar í ígripum. Hann starfaði síðan áfram við hafnarvogina þar til hann lét af störfum á síðasta ári.