Hulda Sigurðardóttir

MORGUNBLAÐIÐ ÞRIÐJUDAGUR 24. APRIL 1990

Minning: Hulda Sigurðardóttir
Fædd 19. nóvember 1934 Dáin 8. apríl 1990

Andlát góðvinar kemur alltaf á óvart, jafnvel þótt þeir hafi átt við vanheilsu að stríða um langa hríð og sjúkdómurinn banvænn. Við stöndum hljóð andspænis því óumbreytanlega sem ekkert fær hnikað, og söknum þess sem áður var. 

Hún Hulda vinkona mín var fædd á Ólafsfirði en flutti með foreldrum sínum Þórönnu Guðmundsdóttur og Sigurði Sigurpálssyni til Siglufjarðar ung að árum. 

Við Hulda vorum systkinadætur, en leiðir okkar lágu fyrst saman í Keflavík, en þangað fórum við í atvinnuleit á yngri árum. Með okkur tókst góð vinátta sem ekki hefur rofnað í öll þessi ár. í Keflavík kynntist hún eftirlifandi eiginmanni sínum Guðbrandi Sörenssyni og eignaðist með honum þrjú börn, en þau eru:

 Sigurður Guðbrandsson, 

Jón Guðbrandsson og 

Vigdís Guðbrandsson. 

Við stofnuðum heimili á svipuðum tíma, og deildum með okkur íbúð um nokkurt skeið, þá var oft glatt á hjalla og aldrei bar nokkurn skugga þar á, og margar ánægjustundir áttum við með þeim hjónum í gegn um árin. En leiðir skildu er ég flutti í annað byggðarlag og samfundir urðu færri, en eitt var þó ákveðið og það var að halda hvor annarri veislu einu sinni á ári, hvað sem á gengi og við það var staðið allt fram til hins síðasta. Hulda var einstaklega myndarleg húsmóðir og höfðingi heim að sækja, hún bjó sér og sínum fallegt heimili enda var oft gestkvæmt á heimili þeirra hjóna.