Frá Álandseyjum

Hópur siglfirskra síldarstúlkna og stráka sýnir þessa dagana síldarsöltun og heldur uppi fjöri í Maríuhöfn á Álandseyjum þar sem fram fer samnorræn strandmenningarhàtìð ásamt árlegum Ålands Sjödagar. 

Söltun þeirra, tónlist og dans er framlag Íslands til hátíðarinnar og er í boði Íslenska vita- og strandmenningarfélagsins.

Fimm sýningar eru settar upp á þremur dögum og hafa þær vakið mikla hrifningu áhorfanda sem klappa vel og mikið fyrir - en illa gengur að fá Skandinavíubùa til þess að dansa við slorugar sìldarstùlkurnar!

Í morgun prýddu myndir af hópnum heilsíðu í dagblaði staðarins - svo það fer ekki á milli mála að siglfirski hópurinn vekur athygli heimamanna sem og annarra hátíðargesta í Maríuhöfn.

Nokkuð þurfti fyrir því að hafa að undirbúa síldarsöltun á þessum miklu síldarslóðum Eystrasalts en iðnnemar à staðnum smíðuðu það sem til þurfti; sìldarkassa, bjóð og saltkassa. Tunnurnar komu frá Íslandi og hálft tonn af síld kom siglandi 1300 mílna leið með 120 ára gamalli færeyskri skùtu; Jòhönnu frà Vågi.

Í síldarhópnum sem gerir nú garðinn frægan á siglingahátíðinni eru: Birna Björnsdóttir, Svanhildur Björnsdóttir, Sandra Finnsdóttir, Sturlaugur Kristjánsson, Björn Sveinsson, Haukur Kristjánsson og Anita Elefsen leiðangursstjóri.

Skemmst er þess að minnast að flestir úr þessu vaska liði tóku þátt í sömu árlegu siglingahátíð í Karlskrona í Svíþjóð fyrir tveimur árum.

Frétt af vef Síldarminjasafnsins  Tengdar fréttir  STÆRSTA SÍLD VERALDAR ?