Nostalgía

Hér áður fyrr var mikið um jólaföndur í skólastarfinu og við börnin á Sigló vorum með stórar handavinnusýningar vetur og vor. Útsaumaðir jóladúkar, og klukkustrengir voru vinsælir.
Við drengirnir vorum mest í trévinnu, pússuðum fiska og hvali í ýmsum stærðum og gerðum.

Í dag eru börn og unglingar mest í því að stara ofan í snjallsímann sinn og mega ekki vera að því að föndra.

Man nú samt eftir að að við strákarnir vorum líka í saumavinnu og að mér fannst reyndar gaman af krosssaumsmyndum en það mátti maður ekki segja upphátt sem verðandi ungur karlmaður. Minnist einnig föndurs þar sem við skárum út myndir í kartöflur og stimpluðum síðan á dúka. Mjög skemmtilegt.

Metnaðarfullar húsmæður bæjarins skiptu um innréttingar á heimilum sínum yfir jólin, mjög svo litríkt jóladót birtist í tonnatali. Jólagardínur, útsaumaðir og handmálaðir jóladúkar og klukkustrengir með jólaþema upp um alla veggi og vandaðir stórir dúkar undir jólatréð.

Jólatíska norðurlandanna virðist vera svipuð á þessum árum, mynstur og annað breytist kannski svolítið á milli ára eins og t.d. þá voru jólin 1970…. og eitthvað….. appelsínugul og brún.

Hræðilega ljótt fannst mér þá og þykir ennþá.

En nú skulum við kíkja á nokkrar myndir frá Ljósmyndasafni Siglufjarðar.

Þetta er líklega mynd af handavinnu sem gerð var í gamla Æskó við Vetrarbraut
Ljósmynd: Steingrímur Kristinsson

Greinarhöfundur skrapp í heimsókn á Bohuslän museum nýlega og þá var verið að setja upp sýningu um jólamunstur á textíl frá um 1950 – 1970. Kynnt er munstur og myndir eftir marga fræga hönnuði og hér neðar getið þið séð nokkrar myndir með allskyns munstri sem þið kannist örugglega við frá liðnum jólum. Sýningin heitir:  „Tryckt till jul“ og verður opnuð formlega fyrsta desember.

Með mér var vinkona mín Sigurbjörg Óskarsdóttir sem er fædd og uppalin í síldarfirðinum Seyðisfirði en hún er mikil hannyrða listakona og heima í Lysekil átti hún fjöldann allan af gömlum „mynstur“ bókum.