3/2010 FORU LEGEA, otsailaren 23koa, abuztuaren 30eko 251/1993 Legegintzako Foru Dekretuaren bidez onetsiriko Nafarroako Administrazio Publikoen Zerbitzuko Langileen Estatutuaren Testu Bategina aldatzen duena, bizitzeko beharkizuna dagokionean

NAO 30.- 2010ko martxoaren 8a

NAFARROAKO GOBERNUKO LEHENDAKARIA NAIZEN HONEK

Aditzera ematen dut Nafarroako Parlamentuak onetsi duela honako

3/2010 FORU LEGEA, OTSAILAREN 23KOA, ABUZTUAREN 30EKO 251/1993 LEGEGINTZAKO FORU DEKRETUAREN BIDEZ ONETSIRIKO NAFARROAKO ADMINISTRAZIO PUBLIKOEN ZERBITZUKO LANGILEEN ESTATUTUAREN TESTU BATEGINA ALDATZEN DUENA, BIZITZEKO BEHARKIZUNA DAGOKIONEAN.

ZIOEN AZALPENA

Abuztuaren 30eko 251/1993 Foru Dekretuaren bidez onetsitako Nafarroako Administrazio Publikoen Zerbitzuko Langileen Estatutuaren 56. artikuluak ezartzen duenez, zerbitzu aktiboan dauden funtzionarioen betebeharra da, besteak beste, "destinoko herrian bizitzea, bestelako baimenik ematen ez bada".

Garai batean, betebehar hori exijitzeak zentzua bazuen ere, gaur egun ez du zentzurik; izan ere, aldaketak izan dira populazioaren lurralde-banaketan, hiriguneen konfigurazioan eta lan egiten duen populazioaren garraio sistemetan eta ohituretan. Halere, baliteke zenbait lanpostu betetzeko, eginkizunak zein diren eta eska daitekeen prestasuna zein den, beharrezkoa izatea lanpostuen titularrak egiaz bizitzea destinoko herrian. Hortaz, bidezkoa da kasuan kasuko administrazio publikoari esku ematea, destinoko herrian bizitzeko betebeharra exijitzeko, baldin eta beharrezkoa bada. Helburu horrekin ekin zaio Nafarroako Administrazio Publikoen zerbitzuko Langileen Estatutuko kasuko manuak aldatzeari.

Horrenbestez, bidezkoa da arau hori kentzea.

Artikulu bakarra.-Abuztuaren 30eko 251/1993 Legegintzako Foru Dekretuaren bidez onetsiriko Nafarroako administrazio publikoen zerbitzuko langileen Estatutuaren testu bategina aldatzea.

Abuztuaren 30eko 251/1993 Legegintzako Foru Dekretuaren bidez onetsiriko Nafarroako administrazio publikoen zerbitzuko langileen Estatutuaren testu bategina aldatzen da. Hona testu berria:

Bat.-56. artikuluko h) letra kentzea.

Bi.-58. artikuluak idazketa hau izanen du:

1. Destinoko herria ez den beste batean bizitzeak ez du funtzionarioa salbuesten lan lekura garaiz iristeaz eta lanaldia nahiz karguaren berezko funtzioak zorrotz betetzeaz, eta ez du ekarriko ordainik ematea lan lekurako joan-etorriengatik.

2. Behar bezala justifikaturiko kasu batzuetan administrazio publikoek zilegi izanen dute funtzionarioei eskatzea destinoko herrian bizitzea, hala behar izanez gero lanpostuaren funtzioengatik edo lanposturako eskaturiko dedikazioarengatik.

Hiru.-63. artikuluko g) letra aldatu da, eta idazketa hau izanen du:

"g) Estatutu honen 58.2 artikuluan xedatutakoari jarraituta ezarrita dauden kasuetan bizitzeko beharkizuna ez betetzea".

Azken xedapena.-Foru lege honek Nafarroako Aldizkari Ofizialean argitara eman eta biharamunean hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2010eko otsailaren 23an.-Nafarroako Gobernuko Lehendakaria, Miguel Sanz Sesma.