1/2010 FORU LEGEA, otsailaren 23koa, Azkoiengo Udalerriko 155 hektarea herrilur onura publikoko deklaratu eta haien desafektazioa onesten duena.

NAO 30.- 2010ko martxoaren 8a

NAFARROAKO GOBERNUKO LEHENDAKARIA NAIZEN HONEK

Aditzera ematen dut Nafarroako Parlamentuak onetsi duela honako

FORU LEGEA, AZKOIENGO UDALERRIKO 155 HEKTAREA HERRILUR ONURA PUBLIKOKO DEKLARATU ETA HAIEN DESAFEKTAZIOA ONESTEN DUENA.

ZIOEN AZALPENA

Azkoiengo Udalak eskatu du udalerriko herrilurretako 155 hektarea onura publikoko deklaratu eta haien desafektazioa egitea, gero saltzeko, lurzati berrantolamenduko prozesu bati bide emateko. Berrantolamenduak 1.398 hektareako azalera ukitzen du eta horietatik 937 ureztalur bihurtzea dakar berekin, eta baita XIX. mendetik datorren liskar bat, horietako 400 hektareari buruzkoa, konpontzea.

Lehenago, Nafarroako Gobernuak 2008ko ekainaren 17ko Erabakiaren bitartez "Azkoiengo Cascajo alderdiko herrilurretako ondasunak berreskuratzeko oinarri orokorrak" onetsi zituen, zeuden arazoak konpondu eta auzitara inork jo ez zezan. Ukitu gehienak oinarri horietara bildu dira, Azkoiengo Udalak herrilur horien gainean eperik gabeko eskubideak dituztenekin egindako hitzarmen pribatuen bidez.

Nafarroako Toki Administrazioari buruzko uztailaren 2ko 6/1990 Foru Legearen 140. artikuluko 5. idatz-zatian xedaturikoaren arabera, Azkoiengo Udalak desafektatzeko asmoa duen eremuak lurzati txikiaren mugak gainditzen dituenez, foru lege bidez onetsi behar da.

1. artikulua. Herrilurraren onura publikoa deklaratzea eta desafektatzea.

1. Onura publikoko deklaratzen dira Azkoiengo Udalaren herrilurretako 155 hektarea eta desafektatu egiten dira. Lur horiek foru lege honen eranskinean deskribatzen diren lurzatiak dira.

2. Lur horiek herrilurtzat joko dira foru lege honetako 2. artikuluko baldintzetan saldu arte.

2. artikulua. Zuzenean saltzeko baimena.

Azkoiengo Udalari baimena ematen zaio 155 hektarea saltzeko. Hektarea horiek bat datoz partikularrak, bere hitzarmen pribatuan, Udalari herrilur gisa 100eko 40an egokitu zaiona erostea erabaki duenekin. Betiere, baldintza hauek bete beharko dira:

a) Salmenta-hitzarmenetan, herrilurra izanik, sartua baldin bada finka osoaren eroslehentasun eta atzera eskuratzeko eskubidea Azkoiengo Udalaren aldekoa dela dioen klausula bat, ondoren eskualdaketarik egiten bada.

b) Lurzati osoak salmenta-prezio mugatua izatea lehenbiziko eta hurrengo eskualdaketetan, eta edozein gainprezio, sari edo diru-kopuru eskuratzea debekatua izatea, Udalak eta partikularretako bakoitzak sinatutako hitzarmenean zehazten diren kopuruen ordez.

c) Eroslehentasunerako eta atzera eragiteko eskubidearen klausula jasotzea bai lurzati berrantolamenduaren ondorioz notario aurrean sinatutako dokumentuetan, bai Jabetza Erregistroan.

Azken xedapenetan lehena.-Aplikazioa eta garapena.

Nafarroako Gobernuari ahalmena ematen zaio foru lege hau garatu eta gauzatzeko behar diren xedapen guztiak eman ditzan.

Azken xedapenetan bigarrena.-Indarra hartzea.

Foru lege honek Nafarroako Aldizkari Ofizialean argitaratu eta biharamunean hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2010eko otsailaren 23an.-Nafarroako Gobernuko Lehendakaria, Miguel Sanz Sesma.

ERANSKINA