192008forulegea,

19/2008 FORU LEGEA, azaroaren 20koa, toki ogasunek Nafarroako tributuetan parte hartzeko funtsaren zenbatekoa eta banatzeko formula ezartzen dituena 2009tik 2012ra bitarteko aurrekontu-ekitaldietarako.

NAO, 146. ALDIZKARIA - 2008ko abenduaren 1a

NAFARROAKO GOBERNUKO LEHENDAKARIA NAIZEN HONEK

Aditzera ematen dut Nafarroako Parlamentuak onetsi duela honako

FORU LEGEA, TOKI OGASUNEK NAFARROAKO TRIBUTUETAN PARTE HARTZEKO FUNTSAREN ZENBATEKOA ETA BANATZEKO FORMULA EZARTZEN DITUENA 2009TIK 2012RA BITARTEKO AURREKONTU-EKITALDIETARAKO

ZIOEN AZALPENA

Nafarroako Foru Komunitateak eskumena du toki ogasunen arloan, Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 46. artikuluaren arabera.

Nafarroako Toki Administrazioari buruzko uztailaren 2ko 6/1990 Foru Legeak 259. artikuluan xedatzen duenez, toki entitateei behar adina baliabide emanen zaizkie dituzten eskumenak erabili eta helburuak bete ditzaten; baliabide horiek toki ogasunei buruzko foru lege batean arautuko dira, gai horrek Nafarroaren toki araubide berekia osatzen baitu -Nafarroako Foru Eraentza Berrezarri eta Hobetzeari buruzko Lege Organikoko 18.2 artikulua-. Horren bidez zehaztu besterik ez da egiten askitasun finantzarioaren printzipioa, Konstituzioaren 142. artikuluan biltzen dena, bertan jartzen baitu udalek behar adina baliabide izan beharko dutela legeak beren gain uzten dituen eginkizunak betetzeko, eta horretarako beren tributuez eta Estatukoetan nahiz autonomia erkidegoetakoetan duten partaidetzaz hornituko direla.

Aurreko hori betetzeko xedez, Nafarroako toki administrazioari buruzko foru lege bereko 260. eta 261. artikuluetan ezartzen da ezen toki ogasunen baliabide-iturriak izanen direla, besteak beste, beren tributuak, Foru Komunitatekoak eta Estatukoak.

Nafarroako Toki Ogasunei buruzko martxoaren 10eko 2/1995 Foru Legeak, toki ogasunen baliabideei buruzko I. tituluko 123. artikuluan, zehazkiago arautzen du zenbatekoa den Nafarroako Ogasun Publikoaren tributuetako partaidetza, eta ezartzen du ezen udal agintaldi bakoitzaren bigarren urteko lehenbiziko seihilekoan Nafarroako Gobernuak Nafarroako Parlamentuari arau-proiektu bat igorriko diola, Toki Araubideko Foru Batzordeak txostena egin ondoren. Arau-proiektu horretan zehaztuko da zenbatekoa izanen den toki ogasunek Nafarroako zergetan parte hartzeko funtsa hurrengo lau aurrekontu-ekitaldietarako, eta finkatuko da funts hori banatzeko formula, justizia eta proportzionaltasun irizpideetan oinarriturik.

Foru lege honen bidez betetzen da legez ezarritakoa, esandako epean, eta eragina izanen du 2009, 2010, 2011 eta 2012ko aurrekontu-ekitaldietan, hau da, udal agintaldiaren bigarren urtearen ondoko lau ekitaldietan.

Foru lege honek ezartzen du, lehenengo eta behin, toki entitateek Nafarroako Ogasun Publikoaren tributuetan parte hartzeko duten funtsaren zenbateko orokorra, eta, ondoren, zenbateko hori handitzeko sistema, transferentzia arruntak eta bestelako laguntzak deritzen kontzeptuetan; gehikuntza hori honakoa izanen da: kontsumorako prezioen indizea Nafarroako Foru Komunitatean igo den ehunekoaren parekoa, ekainetik ekainera neurtua, gehi ehuneko bi.

Ekitaldi bakoitzari esleitutako partaidetzaren zenbatekoa hirutan banatzen da, Nafarroako Toki Ogasunei buruzko martxoaren 10eko 2/1995 Foru Legeko 123. artikuluko 2. idatz-zatian xedatutakoaren arabera: batetik, transferentzia arruntak; bestetik, kapital transferentziak; eta, azkenik, bestelako laguntzak.

Transferentzia arruntak, Nafarroako toki ogasunei buruzko martxoaren 10eko 2/1995 Foru Legearen 123.3. artikuluan xedatutakoaren arabera, formula jakin baten bidez banatuko zaizkie udal eta kontzejuei. Banatzeko formulak zuzentasun eta proportzionaltasun irizpideak kontuan hartu beharko ditu, aipatu printzipio nagusiak zehazten dituzten parametroetan oinarriturik.

Ildo horretan, foru lege honek proposatzen du transferentzia arrunten funtsaren banaketa bat, zeinak, ekitate horizontalaren printzipioa aplikatuz, funts hori partitzen baitu zuzenean toki entitate bakoitzaren gastu beharren arabera eta alderantzizko proportzioan haren ahalmen fiskalarekin, eta horrela bermatzen du gehiago jasoko duela gastu behar handiagoa eta/edo bere baliabideak eskuratzeko ahalmen txikiagoa duenak.

Banaketa-sistema hiru mailatan egituratzen da. Lehenik, Iruñeko Udalari esleitzen zaio kopuru bat. Bigarrenik, funtsaren gainerakoa beste udalerrien artean banatzen da; eta azkenik, kontzejuen partaidetza finkatzen da, bakoitzari dagokion udalerriari esleitutako kopuruaren gainean, kontzejuak dituen biztanleen kopuruaren arabera.

Iruñeko hiriak duen berezitasuna biztanleen kopuruak ematen dio; izan ere, kopuru horrek eragiten du trataera berezia, finantzaketari dagokionez, beste toki entitateen aldean.

Bigarren mailako banaketa sistemarako, udalerri bakoitzarentzat bi indize lortu behar dira, bata, gastu beharrena, eta bestea, ahalmen fiskalarena, eta horiek zehazteko bideak taxutu dira estatistikako prozeduretan oinarritu eta Nafarroako toki entitateen sektoreko kontabilitateari buruz dagoen informazioari aplikatuta.

Sei aldagai linealki konbinatuz lortzen da gastu beharren indizea, estatistikoki frogatu baita horiek direla eraginik handiena dutenak tokiko gastu arruntean, haietako bakoitzaren gastua esplikatzeko ahalmenaren bidez ponderaturik. Honakoak dira aldagai horiek: hiri lurzoru garbiaren azalera, 65 urte edo gehiagoko biztanleen kopurua, etorkinak, azalera guztira eta barreatze-indizea (kontzentrazio indizearen alderantzizkoa).

Ahalmen fiskalaren ponderazioa 0,3491 da, hori baita, finantzatu beharreko gastu arrunten guztirakoaren gainean, indize horretan ordezkatzen diren toki baliabide ekonomikoen baturaren portzentajea. Baliabide horiek honakoak dira: hirilurraren eta landalurraren gaineko kontribuzioak, jarduera ekonomikoen gaineko zerga, trakzio mekanikoko ibilgailuen gaineko zerga eta herrilurraren aprobetxamenduagatiko diru-sarrerak.

Kontzejuen partaidetza, berriz, banaketako hirugarren mailak ezartzen du, udalerriari esleitutako zuzkiduran oinarrituta. Partaidetza hori kalkulatzeko, udalerriari esleitutakoa 100eko 30ez eta kontzejuak udalerriko biztanleriaren guztirakoarekin alderaturik duen biztanleen proportzioaz biderkatzen da. Parametro hori da kontzejuei dagokien gastuaren batez bestekoa, gaur egungo eskumenen banaketa kontuan izanik.

Banaketa formula berri honek ez du erabateko hausturarik eragin nahi egun arte indarra zuen sistemarekin, eta horregatik berme sistema bat ezarri da.

Kapital transferentziei dagokienez, haien banaketa inbertsioen plana arautzen duen foru lege baten arabera eginen da.

Funtsaren banaketaren azken kapitulua "Beste laguntza batzuk" izenekoa da, honako kontzeptu hauek biltzen dituena: abenduaren 2ko 16/1997 Foru Legearen arabera, "Iruñearen Hiriburutza Agiria" kontzeptuagatik Iruñeko Udalari dagokion zuzkidura; gainerako toki entitateentzako zuzkidura bat, haien guztien artean banatzen dena formula orokorraren bidez, bai eta Nafarroako Toki Administrazioari buruzko uztailaren 2ko 6/1990 Foru Legeko 72.2 artikuluan, interes komunak babestu eta sustatzeko osaturiko toki entitateen federazio edo elkarteentzako laguntza ekonomikoei buruz, ezarritakoa betetzeko zuzkidura ere. Eta, azkenik, beren eginkizun instituzionaletan aritzeagatik euren korporaziokideei ordainsariak, bilkura-sariak edo egindako gastuen ondoriozko bestelako gastuak ordaintzen dizkieten Nafarroako udalentzako konpentsazioa" izeneko atalari dagokiona banatuko da foru lege honetan zehazten den bezala.

I. KAPITULUA

Zuzkidura orokorra eta eguneratzea

1. artikulua. Funtsaren zuzkidura.

2009ko ekitaldi ekonomikorako Nafarroako Ogasun Publikoaren tributuetan toki entitateek duten partaidetza funtsaren zuzkidura 244.800.127 eurokoa izanen da, eta kopuru hori Nafarroako Aurrekontu Orokorretan agertuko da.

2. artikulua. Funtsaren banaketa.

Toki ogasunen Nafarroako tributuetako partaidetzen funtsa, 2009ko ekitaldirako, honela banatuko da hasiera batean:

1. Transferentzia arruntak: 161.045.317 euro.

2. Kapital transferentziak: 56.197.537 euro.

3. Bestelako laguntzak:

A) Iruñeko Udalari "Hiriburutza Agiria" delakoagatik: 22.021.024 euro.

B) Nafarroako udalei, korporaziokideei ordainketak egiteko: 5.168.577 euro.

C) Nafarroako Udal eta Kontzejuen Federazioari: 367.673 euro.

3. artikulua. Aurrekontuan esleitutako diru kopurua.

1. Nafarroako 2009, 2010, 2011 eta 2012ko ekitaldiei dagozkien aurrekontu orokorretako bakoitzean, agertuko da zenbatekoa den toki entitateen Nafarroako Ogasun Publikoko tributuetako partaidetzen funtsa, zeina banatuko baita aurreko artikuluan aipatzen diren epigrafeetan.

2. Transferentzia arruntak eta bestelako laguntzak xede izanik, funtsak 2010, 2011 eta 2012rako esleitutako diru kopurua zehazteko, aurreko artikuluan 2012. urterako kontzeptu horiengatik ezarritakoa hartuko da oinarritzat, eta gehituko zaio, urte horietako bakoitzerako, kontsumorako prezioen indizea Nafarroako Foru Komunitatean igotzen dena, ekainetik ekainera neurtua, gehi ehuneko bi.

3. Funtsean kapital transferentzietarako bereizitako diru kopurua 57.602.474 euro izanen da 2010. urtean, 59.042.536 euro 2011. urtean eta 60.518.599 euro 2012. urtean, eta diru hori 13. artikuluan xedatutakoaren arabera banatuko da.

II. KAPITULUA

Transferentzia arrunten esleipena

4. artikulua. Iruñeko udalerriarentzako esleipena.

Iruñeko Udalari 2009rako aurreko urtean jaso zuen zenbatekoa esleituko zaio, betiere 2008. urtearen aldean 2009rako gehitutako portzentajea gehituta, eta hurrengo ekitaldietan, 2010, 2011 eta 2012koetan alegia, aurreko urtean jasotako zenbatekoa esleituko zaio, gehi 3. artikuluko 2. idatz-zatian ezarritako irizpidearen arabera legokiokeena.

5. artikulua. Gainerako udalerrien artean banatu beharreko zenbatekoa.

Gainerako udalerriek 2009, 2010, 2011 eta 2012. urteetako ekitaldietan banatuko duten kopurua 2. artikuluko 1. idatz-zatian aurreikusitako kopurua izanen da, Iruñeko Udalari dagokion esleipena kendu eta gero.

6. artikulua. Gainerako udalerrientzako banaketarako formula.

Gainerako udalerrientzako banaketarako formula prozedura honi jarraikiz lortuko da:

a) Lehen fase batean, gastu premien indizea lortuko da gastu premiaren sei aldagai adierazleen konbinazio linealaren bidez, haietako bakoitzak gastu horren azalpenak emateko duen ahalmenaren arabera ponderaturik. Honakoak dira aldagai horiek: hiri lurzoru garbiaren azalera, 65 urte edo gehiagoko biztanleen kopurua, etorkinak, azalera guztira eta barreatze-indizea (kontzentrazio indizearen alderantzizkoa).

b) Bigarren fase batean, Udalen ahalmen fiskal eta ondarekoaren aldagai adierazleen konbinazio linealaren bidez lortuko da ahalmen fiskalaren indizea, bost sarrera moten arabera likidatutako eskubideen guztizkoan haietako bakoitzak duen pisuaren arabera ponderaturik. Honako aldagai hauek erabiliko dira: hirilurraren eta landalurraren gaineko oinarri fiskalak, jarduera ekonomikoen gaineko zergarena, trakzio mekanikoko ibilgailuen gaineko zergarena eta herrilurraren katastro-balioa.

c) Azkenik, gastu beharren indizeari kenduta 0,3491 faktoreak ponderatutako ahalmen fiskala, formula hau aterako da:

FTC = 0,9231 x PPOB + 0,1278 x PMA65 + 0,3355 x PURB + 0,1341 x PPINM + 0,0083 PINVDISP + 0,0074 PSUP - 0,2490 x PCTU - 0,0222 x PCTR - 0,0760 x PIAE - 0,0995 x PIVTM - 0,0895 x PVCC.

Azalpena:

FTC da udalerri bakoitzaren banaketa indizea.

PPOB da udalerri bakoitzaren biztanleria adierazten duen portzentajea, Nafarroa osoaren biztanleriarekin alderaturik, Iruña kenduta.

PURB da udalerri bakoitzaren hiri azalera garbia adierazten duen portzentajea, Nafarroa osoaren hiri azalera osoarekin alderaturik, Iruña kenduta. Hiri azalera garbia da planoaren araberako azaleraren (azalera grafikoa) eta lurzati batuketaren modura hartutako azaleraren (azalera alfanumerikoa) arteko aldea.

PMA65 da udalerri bakoitzean 65 urte edo gehiago dituzten biztanleen portzentajea, Nafarroa osoan 65 urte edo gehiago dituzten biztanle guztien baturarekin alderaturik, Iruña kenduta.

PPOB da udalerri bakoitzaren biztanleria adierazten duen portzentajea, Nafarroa osoaren biztanleriarekin alderaturik, Iruña kenduta.

PINVDISP da populazioaren kontzentrazio indizearen alderantzizkoa adierazten duen portzentajea, honela kalkulatua: udalerri bateko bizigune bakoitzeko populazioak populazio osoarekin alderaturik osatzen duen portzentajeen koadratuen batura, Nafarroa (Iruña kenduta) osoko populazioaren kontzentrazioaren indizeen alderantzizkoen baturarekin alderaturik.

PSUP da udalerri bakoitzaren azalera osoak adierazten duen portzentajea, Nafarroa osoaren azalerarekin alderaturik, Iruña kenduta.

PCTU da udalerri bakoitzaren lurralde kontribuzioaren likidazio-oinarri doitua adierazten duen portzentajea, Nafarroa osoari dagozkion tributu horren likidazio-oinarri doituen baturarekin alderaturik, Iruña kenduta. Oinarriak merkatu balioen arabera doitzen dira, koefiziente zuzentzaile baten bitartez, zeinak merkatu balioekin alderaturik agertzen duten urruntasunaren arabera handitzen baititu balioak. Ekonomia eta Ogasun Departamentuko Lurralde Aberastasunaren Zerbitzuak finkatuko du koefiziente zuzentzaile hori etxebizitzentzat.

PCTR da udalerri bakoitzaren lurralde kontribuzioaren landalurrarentzako likidazio-oinarria adierazten duen portzentajea, Nafarroa osoari dagozkion landalurrarentzako likidazio-oinarri guztien baturarekin alderaturik, Iruña kenduta.

PIAE da udalerri bakoitzaren jarduera ekonomikoen gaineko zergaren oinarri-kuota adierazten duen portzentajea, Nafarroa osoari dagokion jarduera ekonomikoen gaineko zergaren baturarekin alderaturik, Iruña kenduta; betiere, oinarri-kuotatzat hartzen da nazio, lurralde nahiz udal esparruko kuoten batura, udal errekargua kenduta.

PIVTM da udalerri bakoitzean trakzio mekanikoko ibilgailuen gaineko zergaren eskubide likidatuak adierazten dituen portzentajea, Nafarroa osoari dagokion zerga honen eskubide likidatuen guztirakoarekin alderaturik, Iruña kenduta.

PVCC da udal bakoitzean herrilurraren katastroko balioa adierazten duen portzentajea, Nafarroa osoko udalerrietako balioen guztirakoarekin alderaturik, Iruña kenduta. Beren mugapean kontzejuak dituzten udalen kasuan, kontzejuetan kokaturik ez dagoen herrilurraren balioa baizik ez da hartzen da kontuan.

7. artikulua. Gainerako udalerrientzako hasierako esleipena.

1. Aurreko artikuluan aipatzen den formula udalerri bakoitzeko aldagaien balioei aplikatuz aterako da udal mailako banaketa indizea.

2. Udalerriren batentzat ateratzen den banaketa-indizea negatiboa baldin bada, zero balioa emanen zaio, eta berriz kalkulatuko dira gainerako udalerrientzako banaketa-indizeak, haien guztien batuketaren emaitza 1 izan dadin.

3. Banaketa-indize banatu beharreko kopuruaren gainean hau aplikatuko da, hori 5. artikuluaren arabera kalkulatzen baita, udalerri bakoitzari hasieran dagokion esleipena lortzeko.

8. artikulua. Berme klausularen aplikazioa eta behin betiko esleipenaren kalkulua udal mailan.

1. Aurreko artikuluan ezarritakoa aplikatzeari dagokionez, Nafarroako Ogasun Publikoaren tributuetan parte hartzeko funtsetik udal batek transferentzia arruntetan jaso beharreko zenbatekoa, 2009ko ekitaldian, ez da izango, inola ere, 2008ko ekitaldian funtsa banatzean transferentzia arruntetan jasotakoa baino gutxiago, gehiturik, betiere, Nafarroako Foru Komunitatean kontsumorako prezioen indizea -ekainetik ekainera neurturik- igo den ehunekoa. 2010, 2011 eta 2012ko ekitaldietarako bermea aurreko ekitaldikoa izanen da, irizpide bera aplikatuz eguneratua.

2. Baldin eta funtseko partaidetzatik, transferentzia arruntak kontzeptuagatik, udalerri bati hasieran esleitutako kopurua iristen ez bada aurreko idatz-zatietan ezarritako bermera, behar diren kopuruak kenduko zaizkie, hasieran esleituak zituztenetatik, bermatutakotik goitiko kopuruak lortzen dituzten udalerriei, bakoitzari dagokion bermearekin alderaturik lortutako igoeraren araberako proportzioan.

9. artikulua. Kontzejuentzako hasierako esleipena.

Kontzejuak dituzten udalerrietan, udalerri horiei esleitutako partaidetzatik parte bat kenduko zaie, aurreko artikuluan xedatutakoaren arabera, kontzejuen artean banatzeko. Entitate horien hasierako partaidetza kalkulatzeko, kasuan kasuko udalerriaren partaidetza bider % 30 eginen da, eta hori berriz ere bider kontzejuko biztanleen proportzioa, udalerriaren biztanleria osoarekin alderaturik ateratakoa. Udalerriaren hasierako esleipena gelditzen den kopurua izanen da.

10. artikulua. Bermearen aplikazioa eta behin betiko esleipenaren kalkulua beren mugapean kontzejuak dituzten udalerrietan.

1. Aurreko artikuluan ezarritakoa aplikatzeari dagokionez, Nafarroako Ogasun Publikoaren tributuetan parte hartzeko funtsetik kontzejuek eta beren udalek transferentzia arruntetan jaso beharreko zenbatekoa, 2009ko ekitaldian, ez da izango, inola ere, 2008ko ekitaldian funtsa banatzean transferentzia arruntetan jasotakoa baino gutxiago, gehiturik, betiere, Nafarroako Foru Komunitatean kontsumorako prezioen indizea -ekainetik ekainera neurturik- igo den ehunekoa. 2010, 2011 eta 2012ko ekitaldietarako bermea aurreko ekitaldikoa izanen da, irizpide bera aplikatuz eguneratua.

2. Berme hori kontzejuentzat eta dauden udalerriarentzat gauzatzeko, baldin eta banaketa formularen aplikazioarekin hartara iristen ez badira, behar diren kopuruak kenduko zaizkie udalerri berekoak izanik bermetik goitiko kopuruak lortzen dituzten entitateei, 8. artikuluaren arabera haiei esleitutako kopuruetatik, bakoitzak dagokion bermetik izandako igoeraren proportzioan.

11. artikulua. Erabilitako aldagaiak.

1. Nafarroako udalerrien arteko banaketa kalkulatzeko behar diren aldagaien balioak foru lege honen eranskinean aipatzen diren iturrietatik lortuko dira. Aldagaien erreferentzia-urtea, banaketa egiten den urteko maiatzaren 1ean eskura dauden Estatistikako Institutu Nazionalaren udalerrietako biztanleriaren inguruko azkeneko datu estatistiko ofizialena izanen da. erreferentzia-urte horretako daturik ez bada, hurbileneko urtekoak hartuko dira.

2. Aurreko idatz-zati horretan xedatutakoa ukatu gabe, Trakzio mekanikoko ibilgailuen zergako datuak azken ekitaldiko kontuen espedientetik aterako dira, zeina Toki Ogasunei buruzko Foru Legearen arabera aurkeztua beharko baitu Toki Administrazioko Departamentuan, edo, bestela, ekitaldi horretako bereko aurrekontuaren likidazio espedientetik, Toki Ogasunei buruzko martxoaren 10eko 2/1995 Foru Legeko 227.2 artikuluan eta hura garatzeko xedapenetan xedatutakoaren arabera. Aurreko hori hala ez bada, eskura dagoen azkeneko daturik berriena eguneratuko da, urteko % 10eko igoera aplikatuz. Aurreko hiru ekitaldietako daturik ez bada, Nafarroako per capita daturik handienaren arabera kalkulatuko da, biztanleria aldagaia oinarritzat hartuz.

3. Kontzejuentzako banaketa kalkulatzeko, erreferentzia-urtetzat hartuko da, banaketa zein urtetan egiten den, urte horretako maiatzaren 1ean datu ofizialak eskura dauden urtea; datuak, betiere, hala Estatistikako Institutu Nazionalaren udalerrien biztanleria-estatistikakoak nola Nafarroako Estatistika Erakundearen kontzejuen biztanleria-estatistikakoak, bietan urte berari buruzkoak izanen dira.

4. Aurreko idatz-zatietan xedatutakoa ukatu gabe, kontzejuen edo udalen mugapeetan aldaketak gertatzen badira eta, aldagaien balioek haien eragina jasaten dutelako, banaketan kontuan hartu behar badira, aldagaien zenbatekoa berriro kalkulatuko da, banaketa gertatzen den uneko egoera administratiboari egokitzeko, betiere egoera administratibo horri buruzko datu ofizialik ez badago.

12. artikulua. Ordainketa.

1. Toki entitateen Nafarroako Ogasun Publikoaren tributuetako partaidetza funtseko diru kopuruen ordainketa, transferentzia arruntak kontzeptuagatik esleitutakoari dagokiona, lau alditan eginen da ekitaldi bakoitzean, eta hiruhileko natural bakoitzaren lehen hamabostaldian ordainduko dira.

2. Lehenbiziko bi aldietako bakoitzean ordainduko da aurreko ekitaldian behin betikoz jasotako kopuruaren ehuneko hogeita bost.

3. Hirugarren ordainketa egin aurretik, toki entitate bakoitzarentzako urteko behin betiko esleipena kalkulatuko da, eta une horretan aurreko biak osatuko dituen kopuru bat ordainduko da, esleipenaren ehuneko 75era iritsi bitarte, eta laugarren hiruhilekorako utziko da falta den zatiaren ordainketa.

4. Udalerrien eta haien mugapeko kontzejuen artean sinatutako hitzarmenik badago, eta hartan hori aipatzen bada, hitzarmenean ezarritako moduan ordainduko zaie entitate horiei, deusetan ukatu gabe hasiera batean entitate bakoitzari dagokion ekarpenaren zenbatekoa banaketa formula aplikatuz kalkulatzea.

III. KAPITULUA

Kapital-transferentzien esleipena

13. artikulua. Kapital transferentzien bidezko partaidetzaren banaketa

Funtsetik Toki Azpiegituren Planerako izendatutako diru kopuruen banaketa Toki Azpiegituren 2009-2012 Plana arautzen duen Foru Legean xedatzen denaren arabera eginen da.

IV. KAPITULUA

Bestelako laguntzen esleipena

14. artikulua. Bestelako laguntzen banaketa

Funtseko diru kopuruetan, "Bestelako laguntzak" sailaren barrenean daudenetatik "Hiriburutza Agiria" delakoagatik Iruñeko Udalari dagozkionak, araubide berezi hori ematen duen abenduaren 2ko 16/1997 Foru Legean xedatutakoaren arabera banatuko dira.

15. artikulua. Nafarroako udalentzako konpentsazioa, hautetsiei beren karguan aritzeagatik ordaindutakoaren aldera.

Kargu publiko hautatuan aritzeagatik beren korporaziokideei ordainsariak, bilkura-sariak, kalteordainak edo eginkizun publikoetan parte hartzeko eskubide konstituzionalean aritzearen ondorioz sortutako gastuengatik heldu diren bestelako paguak ordaintzen dizkieten Nafarroako udalentzako konpentsazioa, honela eginen da:

a) Baldin eta udalek alkate eta zinegotziei ordaintzen badiete, legeria orokorrari jarraikiz, beren karguan denbora osoan edo partzialean aritzeagatik, edo ematen badizkiete bilkura-sariak, kalteordainak edo bestelako pagamenduak, kargu publikoan aritzearen ondorio zuzenak direnak, toki ogasunen Nafarroako zergetako partaidetza funtsetik ekarpen bat jasoko dute, ordain horien kostua kitatzeko.

b) Kontzeptu horregatik, udalek urtean jasotzen ahal duten gehienezko ekarpena, 2009. urterako, udala osatzen duten hautetsien kopuruaren arabera, hauteskundeetako legeria orokorrari jarraikiz, honako hau izanen da:

-Kontzeju irekiko araubideko udalak: 4.080

-5 zinegotzi hautetsi dituzten udalerriak: 10.508

-7 zinegotzi hautetsi dituzten udalerriak: 15.453

-9 zinegotzi hautetsi dituzten udalerriak: 18.544

-11 zinegotzi hautetsi dituzten udalerriak: 29.670

-13 zinegotzi hautetsi dituzten udalerriak: 51.304

-17 zinegotzi hautetsi dituzten udalerriak: 78.502

-21 zinegotzi hautetsi dituzten udalerriak: 112.499

-27 zinegotzi hautetsi dituzten udalerriak: 188.528.

c) Ekarpen horiek beren xedeari lotuak egonen dira, bakar-bakarrik erabiliko baitira alkate nahiz zinegotziei aipatu diren kontzeptuengatik ordaintzeko, eta urtero eguneratuko dira, 3. artikuluko 2. idatz-zatian ezartzen den moduan.

d) Ordainketa behin eginen da transferentzia arrunten funts orokorraren bigarren soluzioarekin, urte bakoitzaren urtarrilean, jaso nahi duten udalek aldez aurretik eskatuta, eta eskabideari ekarpen honek aurreko ekitaldian izan zuen zenbatekoa eta xedea gehitu beharko dizkiote, halakorik egin bazuten. Baldin eta hautetsiei ekitaldian ordaindutako kopuruak guztira iristen ez badira artikulu honetan udal bakoitzarentzat ezarritako gehienezko kopurura, kontzeptu honengatik egiten den hurrengo ordainketan kenduko da kopuruen arteko alde hori.

Udal hauteskundeak gertatzen diren ekitaldietan, eta horien ondorioz hautetsien kopuruan aldaketarik izan bada, ekitaldi horretan jasotako zenbatekoen erregularizazioa, eratze dataren artean eta urtearen azken egunaren artean dagoen eperako, udal bakoitzeko hautetsien kopuruaren arabera kalkulatuko da.

e) Baldin eta soberakinik gertatzen bada xede hauetarako kontsignazioan, guztira likidatutako kopuruari dagokionez, soberakinak transferentzia arrunten funts orokorrari gehituko zaizkio, zeinari erantsiko baitzaizkio foru lege honetako 12. artikuluan aipatzen den urteko behin betiko esleipena kalkulatu aurretik.

f) Baldin eta defizita gertatzen bada korporaziokideen gastua konpentsatzeko esleipenean likidazioa egiteko behar den diru kopuruari dagokionez, transferentzia arrunten funts orokorretik hartuko da, foru lege honen 12. artikuluan aurreikusitako urteko esleipen behin betikoa aldez aurretik kalkulaturik, edo bestela Toki Administrazioko Departamentuaren Aurrekontuko 4. kapituluko beste edozein kontusailetik.

16. artikulua. Nafarroako Udal eta Kontzejuen Federazioarentzako laguntza.

Nafarroako Udal eta Kontzejuen Federazioarentzat funtsaren barrenean esleituriko kopurua ordainduko da transferentzia arruntentzat foru lege honetako 12. artikuluan aipatzen den modu berean.

Lehen xedapen gehigarria.-2010 eta 2011 urteetarako transferentzia arruntei dagokien zenbatekoaren ohiz kanpoko gehikuntza.

2010 eta 2011 urteetarako salbuespen gisa, transferentzia arruntei dagokien zenbatekoa 3. artikuluko 2. idatz-zatian ezarritakoarekiko handituko da: aurreko ekitaldiarekiko ehuneko bat gehituko da 2010erako, eta aurreko ekitaldiarekiko ehuneko bi, 2011rako.

Transferentzia arrunten zenbatekoaren igoera gehigarri eta ohiz kanpokoaren aurreikuspena, 2010 eta 2011 urteetarako arestiko lerrokadan ezarria eta, baliagarria izan dadin, Nafarroako urte horietarako aurrekontu orokorretan jaso beharko dena, aplikatu gabe gelditu ahal izanen da, baldin eta Nafarroako Foru Komunitateko ekonomiaren nahiz ekitaldi horietako tributu bidezko dirusarreren bilakaera txarra bada.

Bigarren xedapen gehigarria.-"Iruñearen Hiriburutza Agiria" ezartzen duen abenduaren 2ko 16/1997 Foru Legearen aldaketa.

"Iruñearen Hiriburutza Agiria" ezartzen duen abenduaren 2ko 16/1997 Foru Legearen 6. artikulua indargabetu da.

"Iruñearen Hiriburutza Agiria" ezartzen duen abenduaren 2ko 16/1997 Foru Legearen 7. artikulua honela geratzen da idatzirik:

"Iruñearen Hiriburutza Agiria" kontzeptuagatik Iruñeko Udalari dagozkion zenbatekoen ordainketa lau soluziotan eginen da ekitaldi bakoitzean, eta urteko hiruhileko bakoitzaren lehen hamabostaldian gauzatuko."

Azken xedapen bakarra.-Indarra hartzea.

Foru lege honek 2009ko urtarrilaren 1ean hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako ALDIZKARI OFIZIALean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2008ko azaroaren 20an.-Nafarroako Gobernuko lehendakaria, Miguel Sanz Sesma.

ERANSKINA

Banaketa formulako aldagaiak eta aplikazio iturriak

1. Udalerri bakoitzaren biztanleria. Estatistikako Institutu Nazionalak argitaratzen duen datu ofiziala, urte bakoitzeko urtarrilaren 1ekoa.

2. Kontzeju bakoitzaren biztanleria. Nafarroako Estatistika Erakundeak argitaratzen duen datu ofiziala, urte bakoitzeko urtarrilaren 1ekoa.

3. Udalerri bakoitzean 65 urte edo gehiago dituzten biztanleak. Estatistikako Institutu Nazionalak ematen duen datua, urte bakoitzeko urtarrilaren 1ekoa.

4. Hiri azalera garbia. Planoan ageri den azalera (azalera grafikoa) ken lurzatiek batuta duten azalera (azalera alfazenbakizkoa). Nafarroako Gobernuko Lurralde Aberastasunaren Zerbitzuak ematen du datu hori, eta erreferentzia-urtea udalerrietako populazioari buruzko datuaren berbera izaten da.

5. Etorkinak. Nafarroako Estatistika Erakundeak argitaratzen duen datu ofiziala, urte bakoitzeko urtarrilaren 1ekoa.

6. Ekonomia eta Ogasun Departamentuak emandako azalera osoa

7. Populazioaren kontzentrazio indizearen alderantzizkoa, Nafarroako Estatistika Institutuak emandako datuekin urte bakoitzerako kalkulatua.

8. Lurralde kontribuzio doituaren hirilurraren likidazio-oinarria. Hori da udalerri bakoitzeko lurraren gaineko kontribuzioko hirilurraren likidazio oinarria biderkatua merkatuko balioei doitzeko koefizientearekin. Bi horiek Nafarroako Gobernuko Lurralde Aberastasunaren Zerbitzuak ematen ditu, Nafarroako Lurralde Aberastasunaren Erregistro Fiskaletik datuak harturik, udalerrien biztanleriari dagokion erreferentzia-urte bererako.

9. Udalerri bakoitzeko Lurralde kontribuzioaren landalurraren likidazio-oinarria. Nafarroako Gobernuko Lurralde Aberastasunaren Zerbitzuak ematen du, Nafarroako Lurralde Aberastasunaren Erregistro Fiskaletik datuak harturik, udalerrien biztanleriari dagokion erreferentzia-urte bererako.

10. Jarduera ekonomikoen gaineko zergaren oinarri kuota. Nazio kuoten, lurralde kuoten, lokal finkorik gabekoen udal kuoten eta lokal finkoa dutenen udal kuoten batura da, azken horretan udal errekargua kenduta. Datu hauek Ekonomia eta Ogasun Departamentuko Jarduera Ekonomikoen Erregistroak emandakoak izanen dira.

11. Trakzio mekanikoko ibilgailuen gaineko zergaren eskubide likidatuak. Udalek Toki Administrazioko Departamentuari igorritako kontuen likidazioetatik aterea. Igortzen ez baditu, aplikatuko da zenbatespen bat, kalkulatuko dena foru lege honetako 11. artikuluko 2. puntuan ezarritako irizpidearekin.

12. Herrilurren katastroko balioa. Hori da, Nafarroako udalerri bakoitzarentzat, herri-ondasunen eta haietatik datozenen katastro-balioa, udalerrien biztanleriari dagokion erreferentzia-urte bererako. Beren baitan kontzejuak dituzten udalerrien kasuan, ez da sartzen kontzejuen titulartasunarekin dauden herri-ondasunak. Balio hori Nafarroako Gobernuko Lurralde Aberastasunaren Zerbitzuak ematen du, eta horretarako datuak hartzen ditu Nafarroako Lurralde Aberastasunaren Erregistro Fiskaletik.