62007forulegea,

6/2007 FORU LEGEA, martxoaren 23koa, Hezkuntzari buruzko maiatzaren 3ko 2/2006 Lege Organikoaren babesean aldez aurreko erretiroa eskatzen duten Unibertsitatetik kanpoko langile irakasleek borondatezko erretiroaren sari osagarria jasotzeko baldintzak ezarri eta borondatezko erretiroaren sari osagarri horren zenbatekoa finkatzen dituena.

NAFARROAKO GOBERNUKO LEHENDAKARIA NAIZEN HONEK,

Aditzera ematen dut Nafarroako Parlamentuak honako hau onetsi duela,

FORU LEGEA, HEZKUNTZARI BURUZKO MAIATZAREN 3KO 2/2006 LEGE ORGANIKOAREN BABESEAN ALDEZ AURREKO ERRETIROA ESKATZEN DUTEN UNIBERTSITATETIK KANPOKO LANGILE IRAKASLEEK BORONDATEZKO ERRETIROAREN SARI OSAGARRIA JASOTZEKO BALDINTZAK EZARRI ETA BORONDATEZKO ERRETIROAREN SARI OSAGARRI HORREN ZENBATEKOA FINKATZEN DITUENA.

ZIOEN AZALPENA

Hezkuntza sistemaren antolamenduari buruzko urriaren 3ko 1/1990 Lege Organikoaren bederatzigarren xedapen iragankorrak aldez aurretik borondatezko erretiroa hartzeko araubide bat ezarri zuen Estatuko klase pasiboen araubidearen eraginpean dauden Unibertsitatetik kanpoko langile irakasleentzat, betiere adinari eta lan urteei buruzko baldintza batzuk betez gero.

Arau horretan, gainera, borondatezko erretiroa hartzean hogeita zortzi urteko zerbitzualdia frogaturik duten funtzionario irakasleei ohiz kanpoko eskersari bat ematea aurreikusi zen.

Garai bateko Hezkuntza eta Kultura Departamentuko eta sindikatuetako ordezkariek Nafarroako Foru Komunitateko hezkuntza zerbitzuaren kalitatea hobetzeko 2001eko maiatzaren 31n sinatutako ituna betearazteko neurrien artean, Unibertsitateaz kanpoko irakaskuntzak hobetzeko neurriei buruzko uztailaren 2ko 26/2002 Foru Legea dago. Foru lege horren 2. artikuluan, aldez aurreko borondatezko erretiroaren ohiz kanpoko eskersari osagarri bat jasotzeko eskubidea onartzen zaie lanpostua uzten duten Nafarroako Foru Komunitateko funtzionario irakasleei, administrazio horren aurrekontuen kargura; izan ere, halaxe ezarrita zegoen Hezkuntza sistemaren antolamendu orokorrari buruzko urriaren 3ko 1/1990 Lege Organikoaren bederatzigarren xedapen iragankorrean.

Borondatezko erretiroaren saria jaso ahal izateko, Nafarroako Foru Komunitateko funtzionario irakasleek, Hezkuntza sistemaren antolamendu orokorrari buruzko urriaren 3ko 1/1990 Lege Organikoaren bederatzigarren xedapen iragankorrean ezarritako baldintzak eta betekizunak betetzeaz gainera, honako hau bete behar zuten: 1996ko irailaren 1ean jardunean egotea eta, geroztik, Nafarroako Foru Komunitateko ikastetxeetako plantilletako irakasle lanpostuetan edo Nafarroako Gobernuko Hezkuntza Departamentuko hezkuntza ikuskatzaileen plantillako lanpostuetan lanean egotea etenik gabe. Unibertsitateaz kanpoko irakaskuntzak hobetzeko neurriei buruzko uztailaren 2ko 26/2002 Foru Legearen 2. artikuluan aurreikusitakoari jarraikiz, erreferentziazko data hori, hots, 1996ko irailaren 1ekoa, urtero eguneratzen da, eta Nafarroako Gobernuak 2006ko ekainaren 5eko Erabakiaren bidez, 2000ko irailaren 1era eraman da.

Hezkuntzari buruzko maiatzaren 3ko 2/2006 Lege Organikoak erretiroa aldez aurretik hartzeko araubide berria ezarri zuen Estatuko klase pasiboen araubidearen eraginpean zeuden Unibertsitatez kanpoko irakasleentzat. Araubide berria Hezkuntza sistemaren antolamendu orokorrari buruzko urriaren 3ko 1/1990 Lege Organikoaren bederatzigarren xedapen iragankorraren bidez ezarritakoa bezalatsukoa bada ere, berrikuntza nabarmenak dakartza, eskatzen diren betebehar orokorrak aldatu baitira eta erretiroa hartzeko bide hau beste araubide batean sarturik dauden funtzionario irakasleek ere hartzeko aukera ematen baitu.

Gauzak horrela, erretiroa hartzeko bide hau aukeratu nahi dutenek, eskaera egiten duten egunean, hamabost urteko zerbitzualdi jarraitua frogatu beharko dute irakasle gisa. Hortaz, ez zaie eskatuko 1990eko urtarrilaren 1etik jardunean egotea, Hezkuntza sistemaren antolamendu orokorrari buruzko Lege Organikoaren bederatzigarren xedapen iragankorrean ezartzen zen bezala.

Gainera, irakasle lanetan hamabost urteko zerbitzualdi jarraitua frogatzeari begira, zerbitzu berezietan emandako denbora ere kontatuko da, organikoki edo eginkizunei dagokienez hezkuntza administrazio baten menpe dagoen lanpostu batean aritzeko izan bada, eta baita seme-alabaren bat edo beste ahaideren bat zaintzeko eszedentzia berezian emandako denbora ere.

Azkenik, Hezkuntzari buruzko maiatzaren 3ko 2/2006 Lege Organikoak bide ematen die Gizarte Segurantzako Araubide Orokorrean edo aurreikuspen sozialeko beste araubide batzuetan sartuta dauden langile irakasleei Estatuko klase pasiboen araubidean jasota dagoen aldez aurreko borondatezko erretiroa hartzeko, arau horretan adinari eta zerbitzualdiari dagokienez ezarritako baldintzak betez gero eta erretiroa hartzeko eskaera egiten dutenean araubide horretan sartzea aukeratuz gero.

Horiek horrela, aldez aurreko erretiroa hartu nahi duten irakasleek ohiz kanpoko ordainsaria jasotzeko lehen aipatutako Lege Organikoak ezarritako baldintzak Nafarroako Foru Komunitateko hezkuntza administrazioaren zerbitzuko irakasleei erretiro-sari osagarria jasotzeko eskatzen zaizkienekin harmonizatu nahian, beharrezkoa da foru lege hau onestea.

Aurreko guztia kontuan harturik, Nafarroako foru eraentza berrezarri eta hobetzeari buruzko abuztuaren 10eko 13/1982 Lege Organikoaren 49.1 b) artikuluan xedatutakoaren arabera, Nafarroako Foru Komunitateko funtzionarioen estatutu-araubidearen arloan Nafarroako Foru Komunitateak dituen eskumenak erabiliz, Nafarroako Parlamentuak foru lege hau onetsi du.

Artikulu bakarra._Borondatezko erretiro-saria, Hezkuntzari buruzko maiatzaren 3ko 2/2006 Lege Organikoaren bigarren xedapen iragankorrean ezarritako ohiz kanpoko eskersariaren osagarria dena.

1. Funtzionarioek beren funtzionario izaerari uko egiten badiote edo erretiroa borondatez hartzen badute 60 urtetik gora dutela eta zerbitzuan 28 urte eginda, Hezkuntzari buruzko maiatzaren 3ko 2/2006 Lege Organikoaren bigarren xedapen iragankorraren babesean eta bertan adierazten diren baldintzak betez, Foru Komunitateko administrazioak borondatezko erretiro-sari bat emanen die; sari hori xedapen iragankor hartan ezarritako ohiz kanpoko eskersariaren osagarri izanen da.

2. Erretiro-saria hartu ahal izateko, funtzionarioari eskatuko zaio aldez aurretiko erretiroa eskatzen duen urteko abuztuaren 31ren aurreko sei urteetan Nafarroako Foru Komunitatean kokaturiko ikastetxeetako plantilletako lanpostuetan jardunean egon izana jarraian, edota, eskatutako zerbitzualdi horren barrenean, zerbitzu berezietan egon izana, organikoki edo eginkizunei dagokienez, Nafarroako Foru Komunitateko hezkuntza administrazioaren menpe dagoen lanpostu batean, are eszedentzia berezian ere, abuztuaren 30eko 251/1993 Legegintzako Foru Dekretuaren bidez onetsitako Nafarroako administrazio publikoen zerbitzuko langileen Estatutuaren Testu Bateginaren 27. artikuluko 1. idatz-zatian adierazitako egoeraren bat dela kausa.

3. Aurreko idatz-zatietan ohiz kanpoko eskersariari buruz eta erretiro-sariari buruz xedatutakoa aplikatuko zaie funtzionario izaera ekainaren 27ko 5/1990 Foru Legearen lehenengo xedapen gehigarriaren babesean edo geroagoko arau baten babesean eskuratu zuten langileei, baita lan itunpeko irakasle finkoei ere.

4. Borondatezko erretiroaren sariak foru lege honetako I. eranskinak agintzen duen zenbatekoa izanen du, kontuan harturik funtzionarioaren adina, zerbitzu urteak eta kidegoa.

5. Nafarroako Gobernuak borondatezko erretiro-sariaren zenbatekoa urtero igoko du Nafarroako administrazio publikoen zerbitzuko funtzionarioen eta estatutupeko langileen lansariak igotzen diren neurri berean.

Xedapen iragankor bakarra._Nola aplikatu foru lege hau 2006. urtean aldez aurreko borondatezko erretiroa Hezkuntzari buruzko maiatzaren 3ko 2/2006 Lege Organikoa aplikatuz hartu zuten Nafarroako Foru Komunitateko administrazioaren zerbitzuko langile irakasleei.

Aldez aurreko borondatezko erretiroa 2006ko ekainaren 30a baino lehen, hots, ezarri zen ohiz kanpoko epearen barrenean, eskatu zuten Nafarroako Foru Komunitateko administrazioaren zerbitzuko langile irakasleek borondatezko erretiroaren sari berezia jasotzeko eskubidea izanen dute, foru lege honetan ezarri diren baldintzak betetzen badituzte.

Xedapen indargabetzaile bakarra._Arauak indargabetzea.

Indarrik gabe utzi dira Unibertsitateaz kanpoko irakaskuntzak hobetzeko neurriei buruzko uztailaren 2ko 26/2002 Foru Legearen 2. artikulua eta foru lege honetan xedatutakoari aurka egiten dioten maila bereko edo baxuagoko xedapen guztiak.

Azken xedapen bakarra._Indarra hartzea.

Foru lege honek Nafarroako ALDIZKARI OFIZIALean argitaratu eta biharamunean hartuko du indarra.

Nik Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako ALDIZKARI OFIZIALean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezaten manatzen diet.

Iruñean, 2007ko martxoaren 23an._Nafarroako Gobernuko lehendakaria, Miguel Sanz Sesma.

I. ERANSKINA

2006._Ondoko kidegoetako funtzionarioak: Bigarren Hezkuntzako irakasleen kidegokoak, Bigarren Hezkuntzako katedradun direnak; Musikako eta Arte Eszenikoetako katedradunen kidegokoak; Arte Plastikoetako eta Diseinuko irakasleen kidegokoak, Arte Plastikoetako eta Diseinuko katedradun direnak; Hizkuntza Eskola Ofizialetako irakasleen kidegokoak, Hizkuntza Eskola Ofizialetako katedradun direnak; eta Hezkuntza ikuskatzaileen kidegokoak.

Zerbitzu urteak 28 29 30 31 32 33 34 35 edo gehiago

Adina. 64 urte 8.696,38 8.792,47 8.792,47 8.792,47 8.864,55 8.864,55 8.864,55 8.948,62

Adina. 63 urte 8.960,64 8.960,64 8.960,64 9.044,70 9.044,70 9.044,70 9.128,78 9.440,54

Adina. 62 urte 9.128,78 9.128,78 9.224,89 9.224,89 9.561,21 10.197,83 10.954,55 11.843,40

Adina. 61 urte 9.308,97 9.381,04 9.801,43 10.486,09 11.290,87 12.239,80 13.332,83 14.533,99

Adina. 60 urte 9.765,41 10.450,06 11.242,83 12.179,72 13.272,79 14.558,02 15.987,39 15.987,39

2006._Ondoko kidegoetako funtzionarioak: Bigarren Hezkuntzako irakasleen kidegokoak, Musikako eta Arte Eszenikoetako irakasleen kidegokoak, Arte Plastikoetako eta Diseinuko Irakasleen kidegokoak eta Hizkuntza Eskola Ofizialetako irakasleen kidegokoak.

Zerbitzu urteak 28 29 30 31 32 33 34 35 edo gehiago

Adina. 64 urte 8.767,07 8.863,95 8.863,95 8.863,95 8.936,61 8.936,61 8.936,61 9.021,38

Adina. 63 urte 9.033,49 9.033,49 9.033,49 9.118,25 9.118,25 9.118,25 9.203,02 9.203,02

Adina. 62 urte 9.203,02 9.203,02 9.299,89 9.299,89 9.299,89 9.396,75 9.747,92 10.426,05

Adina. 61 urte 9.384,65 9.481,52 9.481,52 9.481,52 10.014,32 10.728,77 11.564,31 12.545,16

Adina. 60 urte 9.481,52 9.481,52 9.978,01 10.680,34 11.515,87 12.484,61 13.622,88 14.967,01

2006._Lanbide Heziketako irakasle teknikoen kidegoko edo Arte plastikoetako eta Diseinuko Tailerreko maisu-maistren kidegoko funtzionarioak.

Zerbitzu urteak 28 29 30 31 32 33 34 35 edo gehiago

Adina. 64 urte 7.291,41 7.355,26 7.355,26 7.355,26 7.408,49 7.408,49 7.408,49 7.472,35

Adina. 63 urte 7.483,02 7.483,02 7.483,02 7.536,24 7.536,24 7.536,24 7.610,74 7.610,74

Adina. 62 urte 7.610,74 7.610,74 7.674,61 7.674,61 7.674,61 8.079,10 8.568,74 9.164,81

Adina. 61 urte 7.738,48 7.802,34 7.802,34 8.260,04 8.802,92 9.430,94 10.165,40 11.027,60

Adina. 60 urte 7.802,34 8.238,76 8.770,99 9.388,36 10.122,81 10.974,36 11.974,96 13.156,47

2006._Maisu-Maistren kidegoko funtzionarioak.

Zerbitzu urteak 28 29 30 31 32 33 34 35 edo gehiago

Adina. 64 urte 7.266,02 7.322,16 7.322,16 7.322,16 7.389,56 7.389,56 7.389,56 7.456,93

Adina. 63 urte 7.894,92 7.894,92 7.894,92 7.951,06 7.951,06 7.951,06 8.029,67 8.029,67

Adina. 62 urte 8.029,67 8.029,67 8.097,07 8.097,07 8.097,07 8.175,68 8.478,89 8.995,49

Adina. 61 urte 8.164,44 8.231,82 8.231,82 8.231,82 8.669,81 9.231,33 9.882,68 10.657,57

Adina. 60 urte 8.231,82 8.231,82 8.647,35 9.208,86 9.848,99 10.612,66 11.499,85 12.544,28

Foru lege honetako artikulu bakarreko 3. idatz-zatian xedatutakoaren arabera, ohiz kanpoko ordainsaria eta erretiro saria emanen zaie bai funtzionario izaera ekainaren 27ko 5/1990 Foru Legearen lehenengo xedapen gehigarriaren babesean edo geroagoko arau baten babesean eskuratu zuten langileei, baita lan-kontratuko irakasle finkoei ere.