Embedded Files
10/2009 Foru Legea, Museoei eta Nafarroako Bilduma Museografiko Iraunkorrei buruzkoa
Nafarroako Parlamentua
10/2009 FORU LEGEA, Museoei eta Nafarroako Bilduma Museografiko Iraunkorrei buruzkoa.
10/2009 FORU LEGEA, Museoei eta Nafarroako Bilduma Museografiko Iraunkorrei buruzkoa.
NAFARROAKO GOBERNUKO LEHENDAKARIA NAIZEN HONEK.
Aditzera ematen dut Nafarroako Parlamentuak onetsi duela honako
MUSEOEI ETA NAFARROAKO BILDUMA MUSEOGRAFIKO IRAUNKORREI BURUZKO FORU LEGEA.
ZIOEN AZALPENA
1
Nafarroako Parlamentuak, Nafarroako Foru Komunitateak arlo honetan duen eskumen esklusiboa erabiliz, Nafarroako Kultur Ondareari buruzko 14/2005 Foru Legea onetsi zuen 2005eko azaroaren 22an.
Foru lege horren V. tituluko V. kapituluan finkatzen da museoak eta bilduma museografiko iraunkorrak zer diren eta, orobat, xedatzen da Nafarroako Foru Komunitateko Administrazioak bermatuko duela herritar guztiek sarbidea izatea titulartasun publikoa duten gisa horretako erakundeetara, deusetan galarazi gabe, bertan zaintzen diren ondasunen kontserbazioari begira, zenbait muga ezartzea.
Foru lege horretan ezartzen da, erakunde horiek babesteko, Nafarroako Kultur Ondarearen sailkapenaren atalen batean sartuko direla eta horrelako erakundeak arautzeko foru legearen berariazko arauak aplikatuko zaizkiela. Aurreikusita ez dagoen guztian, Nafarroako Kultur Ondareari buruzko Foru Legean modu orokorrean xedatzen dena aplikatuko zaie.
Lege testu horren bigarren xedapen gehigarriak interes kulturaleko ondasun deklaratzen ditu Nafarroako Foru Komunitateko Administrazioaren titulartasunekoak diren museoetako bildumetako ondasun higigarriak eta haiek instalatzeko erabiltzen diren ondasun higiezinak.
2
Museoek eta bilduma museografiko iraunkorrek, etengabe aurrera egiten eta eraldatzen ari diren kultur erakundeak izanik, maila goreneko araudi bat behar dute, Nafarroako Foru Komunitateko museoen gaur eguneko egoeratik abiatuta, bikaintasunera iristeko aukera izan dezaten.
Gizarte eta kultur errealitate berria ikusirik, beharrezkoa da legedia eguneratzea, museoen eta bilduma museografiko iraunkorren kontzeptuak Museoen Nazioarteko Kontseiluak emandako jarraibideen arabera jasotzeko eta, bestetik, plangintza eta kontrolerako baliabideak ezartzeko, horrela erakunde horiek gizartearen eskakizunekin eta gure kultur ondarea osatzen duten ondasunen babesarekin bat datozela bermatuko baita.
Azkeneko urteotan kultur ondarearen aldeko sentsibilizazioa garatu da herritarrengan, eta horrek ekarri du erakusketa publikorako zentroak ugaltzea. Zentro horien titulartasuna eta kudeaketa modua ezberdina da batetik bestera. Turismoa garatzeko politikek, batez ere landa eremuetan, eta gaur eguneko arte adierazpenei tokia eman beharrak ere lagundu dute horrelakoak ugal daitezen.
Joera sozio-ekonomiko eta kultural horiek dakartzaten proposamenen aniztasuna ikusirik, beharrezkoa da administrazio eskudunak zentro horien izaera tipifikatzea eta museo erakunde horiek kalitatezko kultur zerbitzuak ematen dituztela bermatzea, eta horrekin batera, jadanik dauden museo erakundeen eguneratzea sustatzea, teknologia berriekin bat datozen baliabideak garatuz kudeaketa eta erabilgarritasuna hobetzeko.
Museo edo bilduma museografiko iraunkor baten titularrak diren erakunde publikoek edo pertsona fisiko edo juridikoek bermatu beharko dute hango funtsak osatzen dituzten kultur ondasunen mantentze-lanak, zainketa eta erakusketa foru lege honetan, berau garatzeko xedapenetan, Nafarroako Kultur Ondareari buruzko Foru Legean eta aplikatzekoak diren ordezko legeetan ezarrita dagoen bezala eginen dutela.
3
I. tituluan, xedapen orokorrei buruzkoan, museoak eta bilduma museografiko iraunkorrak zer diren zehazten da, Kultur Ondareari buruzko azaroaren 22ko 14/2005 Foru Legeak 84. artikuluan aurreratu zuen ildotik, eta zentro horien eginkizun berariazkoak eta Nafarroako Foru Komunitateak arlo horretan dituen eskumenak finkatzen dira. Eskumen horien artean Nafarroako Foru Komunitateak museoen arloan jorratuko duen politikaren diagnostikoa eta plangintza egiteko tresnak prestatu eta eguneratzea dago. Azkenik, Nafarroako Kulturaren Kontseiluak museoen arloan dituen ahalmenak arautzen dira eta Administrazioaren eta museoen titularren arteko lankidetza finkatzen da arlo honetako funtsezko printzipio gisa, museoak sustatu eta hobetuko badira.
4
II. tituluan Nafarroako museoen eta bilduma museografikoen sistemaren izaera ezartzen da, hura osatzen duten erakundeen koordinazioa, lankidetza, oreka eta hobekuntza lortzeko egitura alegia. Erakunde batzuek foru lege honen indarrez parte hartzen badute ere sistema horretan, beste askok, horien artean toki entitateek, borondatez parte hartzen ahalko dute. Sistemaren osaera, helburuak eta parte-hartzearen ondorioak finkatzen dira. Sisteman parte hartzearen ondorioz, erakundeek abantaila batzuk izanen dituzte, konparazio batera, lehentasuna izanen dute Administrazioak museoen jarduera sustatzeko ematen dituen diru-laguntzak jasotzeko, prestakuntza jardueretan parte hartzeko eta laguntza teknikoa jasotzeko, besteak beste. Halaber, 18. artikuluan museoak eta bilduma museografikoak desegitea arautzen da.
5
III. tituluaren I. kapituluan zehazten dira museoak eta bilduma museografiko iraunkorrak aitortzeko ezinbesteko baldintzak eta prozedura horren ildo nagusiak, haien titulartasuna edozein delarik ere. Tramitazioa ahalik eta gehien errazten da eta ezinbestekoak diren agiriak besterik ez direla eskatuko finkatzen da, barne-merkatuko zerbitzuei buruz Europako Parlamentuak eta Kontseiluak 2006ko abenduaren 12an hartutako 2006/123/EE zuzentarauarekin bat. 16. artikuluak ezartzen du, "Nafarroako Museoa" edo "Nafarroako Bilduma" izendapenak erabiltzeko, bakarrik edo beste hitz batzuekin konbinatuak, beharrezkoa dela museoen arloan eskumena duen departamentuaren baimena izatea eta toki entitateen izenak ere babesten ditu.
II. kapituluan Nafarroako museo eta bilduma museografiko iraunkor aitortuen Erregistroa arautzen da, non inskribatuko diren, ofizioz, aitortzen diren museo eta bilduma museografiko iraunkor guztiak, izan ere, aitortua izatea ezinbesteko baldintza da Nafarroako Foru Komunitateko aurrekontuen kargura diru-laguntzak lortzeko.
III. kapituluaren xedea da museo eta bilduma museografiko iraunkorren kudeaketa arautzea. Kapitulu honetan funts museografikoen izaerari eta babesari buruzko alderdi guztiak azaldu eta erakunde horien titularren eginbeharrak adierazten dira. Eginbehar garrantzitsuenak erregistro liburuak eduki eta eguneratzea eta funtsen inbentarioa egitea dira, eta horregatik, arlo horiek artikulu bereizietan garatu dira.
Nafarroako museoetako eta bilduma museografiko iraunkorretako funtsen Inbentario Orokorra sortzen da eta Administrazioak hura kontrolatzeko funtsezko alderdiak arautzen dira, besteak beste, zentro horien titularrek behar den informazioa eskatzen den euskarrian eman beharra. Horrez gainera, beste alderdi batzuk ere arautzen dira, hala nola, ezinbesteko gordailuak egin beharra eta museo eta bilduma museografiko iraunkorretako funtsen kopiak, erreprodukzioak eta digitalizazioa nola egin behar diren.
Sartzeko araubidea eta bisita publikoarengatiko eskubide ekonomikoak ere arautzen dira.
Azkenik, IV. kapitulua plangintzari buruzkoa da.
6
IV. tituluan museoen arloko eskumena duen departamentuak, foru lege honetako aginduak zuzen aplikatzen direla begiratzeko, erakunde horiei eginen dizkien ikuskapenen eta zehapenen araubidea jasotzen da. Arau-hausteak arinak, larriak eta oso larriak izan daitezke. Oso larriak izanen dira Nafarroako Kultur Ondareari konpondu ezinezko galera edo kaltea eragiten diotenak, eta orobat, museoen eta bildumen bisitarien segurtasuna arrisku larrian jartzen dutenak.
7
Lehenengo xedapen gehigarriak ondasun inbentariatu deklaratzen ditu foru lege honen indarrez, Nafarroako Foru Komunitatearen edo Estatuaren titulartasunekoak izan gabe, aitortuak izan diren museo eta bilduma museografiko iraunkorretako ondasun higigarriak, horietako batzuk interes kulturaleko ondasun deklara daitezkeela galarazi gabe. Neurri horrek berarekin dakar erakunde horretako funtsei Kultur Ondareari buruzko Foru Legean kategoria horretarako ezarritako babes neurri berariazkoak aplikatzea.
Bigarren xedapen gehigarriak museoaren aitorpena ematen die foru lege honen indarrez Nafarroako Museoari, Jorge Oteiza Fundazio Museoari, Gustavo de Maeztu Museoari eta Arte Garaikideko Muñoz Sola Museoari, foru lege honetan ezarritako prozedura segitu behar izan gabe.
Hirugarren xedapen gehigarriak foru lege honen ebaluazio prozedura ezartzen du.
8
Bi xedapen iragankorren helburua da erraztasunak ematea, zentzuzko epe batean, ahalik eta museo erakunde gehien egokitu daitezen foru lege honetan bildutako eskakizun berrietara. Horretarako, lehen xedapen iragankorrean aitorpen iragankorra eskatzeko aukera ematen da, foru lege honen indarraldiko lehenengo bost urteotan.
Bigarren xedapen iragankorrean bost urteko epea finkatzen da, orobat, Nafarroako Foru Komunitateko Administrazioak aitorpen iragankor hori jasotzen duten erakundeei diru-laguntzak emateko, behin betiko aitorpena lortzeko behar diren baldintzak betetzeko inbertsioak egin ditzaten.
9
Azkenik, foru legeak xedapen indargabetzaile bakarra du, orokorra, eta bi azken xedapen. Lehenak erregelamenduzko garapena egiteko eskumena Nafarroako Gobernuari eta museoen arloko eskumena duen departamentuko kontseilari titularrari ematen die, eta bigarrenak ezartzen du foru lege honek Nafarroako Aldizkari Ofizialean argitaratu eta biharamunean hartuko duela indarra.
I. TITULUA
Xedapen orokorrak
1. artikulua. Foru legearen xedea eta esparrua.
1. Foru lege honen xedea da Nafarroako Foru Komunitateko eskumenekoak diren museoen eta bilduma museografiko iraunkorren sorrera, antolamendua eta kudeaketa arautzea eta, horrez gainera, Nafarroako Museoen Sistema bat ezarri eta arautzea gizarteari ematen dizkioten zerbitzuak antolatzeko, koordinatzeko eta eragingarriak izateko eta haien funtsak eta horretara bideratzen diren baliabide publikoak babestu eta egoki kudeatzeko.
2. Foru lege honen arabera, Nafarroako Foru Komunitateak eskumena du museo edo bilduma museografiko iraunkor gisa aritzeko aitorpena duten kultur zentroen gainean, bere lurraldean kokaturik badaude eta Estatuaren titulartasunekoak ez badira, Nafarroako Foru Eraentza Berrezarri eta Hobetzeari buruzko abuztuaren 10eko 13/1983 Lege Organikoaren 44.10 artikuluan ezarrita dagoen bezala.
2. artikulua. Museoa zer den.
Museoak jendearentzat zabalik dauden erakunde iraunkorrak dira, irabazi-asmorik gabe eta gizartearen zerbitzuan eta haren garapenerako, arkeologia, historia, arte, etnologia, zientzia eta teknika edo kultur arloko balioa duten ondasunak eta bildumak eskuratu, kontserbatu, ikertu, zabaldu eta erakusten dituztenak, ikerketa, intepretazio, hezkuntza eta gozamenerako.
3. artikulua. Museoen eginkizunak.
1. Son funciones de los museos:Hona hemen museoen eginkizunak:
a) La protección y conservación de los bienes culturales que se encuentren bajo su custodia, mediante la adopción de medidas preventivas y de restauración.a) Gordetzen dituen kultur ondasunen babesa eta kontserbazioa, prebentzio eta zaharberritzeko neurriak hartuz.
b) Kultur ondasunak eskuratzea, bere plan museologikoan ezarritakoaren arabera, bere bildumak egin, osatu edo handitzeko.
c) Ondasun horiek irizpide zientifikoen arabera katalogatu eta dokumentatzea.
d) Ikerketak egitea dagokion esparru tematiko eta geografikoari buruz eta erakundearen gainerako eginkizunekin zerikusia duten alderdi museologikoei nahiz museografikoei buruz.
e) Dagozkion eginkizunak betetzetik sortzen den jakintza gizarteari jakinaraztea eta bere bildumen zabalkundea egitea.
f) Erabiltzaileen eskaerei kasu egitea, museoaren funtzionamendu arauei jarraikiz.
g) Katalogoak, monografiak, aldizkako serieak eta bere helburuak betetzeko behar den beste edozein hedabide prestatu eta argitaratzea.
h) Haren edukiei buruzko jarduera didaktikoak eta prestakuntzakoak antolatzea.
i) Gizartearen eta haren kultur ondarearen arteko bitartekaritza interpretatiboa egitea.
j) Bere bildumen erakusketa iraunkor, antolatu eta esanguratsua egitea.
k) Noizean behin erakusketa zientifikoak eta jendarterako erakusketak antolatzea, bakoitzaren plan museologikoan ezarritako jarraibideen arabera.
l) Publikoari museoetara sartzea eta museoen kultur zerbitzuak baliatzea sustatzea eta bultzatzea, haietara bertaratuta nahiz informazioaren eta komunikazioaren teknologia berrien bidez, arreta berezia jarrita irisgarritasun-zailtasunak dituzten taldeei.
m) Lege nahiz erregelamendu bidez haien gain utzitako beste eginkizun oro.
2. Museoek bestelako kultur edo gizarte jarduera osagarriak egin ditzakete, horretarako instalazio egokiak badituzte eta lege honen arabera dagozkion eginkizunak betetzeko ohiko lanari kalterik eragiten ez badiote.
4. artikulua. Bilduma museografiko iraunkorra zer den.
Bilduma museografiko iraunkorrak dira pertsona fisiko edo juridiko batek irabazi asmorik gabe kontserbatzen dituen kultur ondasunen multzo egonkorrak, zeinetan ezin diren bete, funtsen kopuru txikia, baliabide eskasia edo teknikaririk eza dela-eta, museoei esleitutako eginkizun guztiak, betiere haien titularrek bermatzen badituzte, gutxienez, jendearen bisitak ordutegi egoki eta finkoan, funtsak kontserbatu, zaindu eta erakusteko oinarrizko baldintzak eta ikertzaileentzako erabilera.
5. artikulua. Nafarroako Foru Komunitateko Administrazioaren eskumenak.
1. Nafarroako Foru Komunitateko Administrazioak, museoen arloko eskumena duen departamentuaren bitartez, Nafarroari arlo honetan dagozkion eskumenak erabiliko ditu.
Halaber, museoek eta bilduma museografiko iraunkorrek bere eginkizunak baliatzean eta bere betebeharrak betetzean gizonen eta emakumeen arteko berdintasunari buruzko araudia betetzen dutela zainduko du.
2. Zehazki, museoen arloko eskumena duen departamentuari eskumen hauek dagozkio:
a) Museoen gaineko politika eta horren lehentasunak diseinatu eta planifikatzea, museoen ondarea kontserbatu, babestu eta kudeatzeari begira.
b) Museoei eta bilduma museografiko iraunkorrei aitorpena ematea, foru lege honetan xedatutakoaren arabera.
c) Nafarroako Museoen eta Bilduma Museografiko Iraunkorren Erregistroa prestatzea eta etengabe eguneratzea.
d) Museoetako ondarea erregistratu, dokumentatu, kontserbatu, erakutsi eta jendarteratzeko arau teknikoak prestatzeko jarraibideak sortzea.
e) Nafarroako museoetako eta bilduma museografiko iraunkorretako funtsen Inbentario Orokorra prestatu eta eguneratzea.
f) Nafarroako Museoen eta bilduma museografiko iraunkorren Sistema kudeatu eta koordinatzea.
g) Museoen eta bilduma museografiko iraunkorren antolamendua eta funtzionamendua ikuskatzeko lanak, indarreko legedia betetzen dela egiaztatzeko eta, beharrezkoa bada, hori betetzeko behar diren neurriak hartzeko.
h) Museoen arloan lanean ari diren profesionalen etengabeko prestakuntza eta espezializazioa sustatzea eta eginkizun horretan laguntzea.
i) Museoei eta bilduma museografiko iraunkorrei aholkua eta laguntza teknikoa ematea, beren helburuak hobeki bete ditzaten.
j) Museoentzako eta bilduma museografiko iraunkorrentzako laguntza eta diru-laguntzak kudeatzea.
k) Ondarea hedatzeko, ikertzeko eta dokumentatzeko lana sustatzea.
l) Nafarroako museoen eta bilduma museografiko iraunkorren sistemari atxikitako museoak sustatzea.
m) I+G+Bko politikak sustatzea, bai eta atxikitako museoen arteko arlo horretako lankidetza ere.
n) Foru lege honek eta antolamendu juridikoak esleitzen dizkion gainerako eskumenak eta, orobat, Nafarroako Foru Komunitateari museoen arloan dagozkion eskumenak izanik, beste administrazio organo edo erakunde bati berariaz esleituak ez daudenak.
ñ) Nafarroako museoen eta bilduma museografiko iraunkorren erregistroa prestatu, argitaratu eta gaurkotzea.
o) Nafarroako museoen eta bilduma museografiko iraunkorren aitorpena berritzea.
p) Nafarroako museoen eta bilduma museografiko iraunkorren aitorpena ezeztatzea.
q) Funtsen aldi baterako irteerak eta erreprodukzioak baimentzea.
r) Zehapenak ezartzeko ahalmena erabiltzea foru lege honetan ezarritako eran.
s) Aurrekontu-funtsak edukitzea, kultur ondasunak erosteko, babesteko eta kontserbatzeko.
6. artikulua. Nafarroako toki entitateen eskumenak.
Nafarroako Toki Administrazioak ondoko eskumenak baliatuko ditu museoen eta bilduma museografiko iraunkorren arloan:
a) Udalen titulartasuneko museoak antolatzea eta kudeatzea.
b) Museo horien funtsen inbentarioa egitea eta funtsak kudeatzea eta gaurkotuta mantentzea.
c) Titularrak ez diren udal esparruko museoekin lankidetzan aritzea.
d) Museoen berariazko jarduerak sustatu eta laguntza ematea.
e) Haien udalerrian sortu eta/edo baimentzen diren museoen edo bilduma muesografikoen berri ematea.
f) Museoei eta bilduma muesografiko iraunkorrei baimena emateko eta horiek Nafarroako museoen eta bilduma museografiko iraunkorren sisteman sartzeko prozeduretan parte hartzea, baldin eta udalaren barrutia ukitzen badute edo harekin lotura badute.
7. artikulua. Diagnostikoa eta plangintza.
Museoen arloan eskumena duen departamentuak Nafarroako Foru Komunitateak museoen arloan jorratuko duen politikaren diagnostikoa eta plangintza egiteko tresnak prestatu eta eguneratuko ditu.
8. artikulua. Nafarroako Kulturaren Kontseilua.
Nafarroako Kulturaren Kontseiluak, Nafarroako Kultur Ondareari buruzko azaroaren 22ko 14/2005 Foru Legearen 10. artikuluan esleitutako ahalmenez gainera, eginkizun hauek izanen ditu:
a) Museoen arloko xedapen orokorren proiektuei buruzko txostenak egitea.
b) Museoen eta bilduma museografiko iraunkorren aitorpenei buruzko txostenak egitea.
c) Nafarroako Museoen Sistemaren antolamendua, funtzionamendua eta koordinazioa hobetzeko ekimenak, jarduketak eta planak proposatzea.
9. artikulua. Sustapen eta lankidetza printzipioak.
1. Nafarroako Foru Komunitateko Administrazioak arreta berezia emanen die ondokoei:
a) Nafarroako herriaren historiaren, kulturaren eta bizimoduaren erakusgarri diren museoak eta bilduma museografiko iraunkorrak sustatzea.
b) Zientziaren, naturaren, teknikaren eta teknologiaren museoak eta bilduma museografiko iraunkorrak sortzea, horiekin lotura duten erakunde publiko edo pribatuekin lankidetzan.
c) Arte garaikidearen agerpen anitzekin lotutako ikerkuntza, kontserbazio, hedapen eta sustapen jardueren garpenari lotutako museo-erakundeak ezartzea.
2. Museo eta bilduma museografiko iraunkor berriei buruzko politikan kontuan hartu beharko dira, kultur-termino zorrotzez gain, turismoari eta lurraldearen garapen jasangarriari lotutakoak ere, txertatuta dauden lurraldearen eta, oro har, erkidegoaren, gizarte-, ekonomia- nahiz kultura-garapenaren palanka eraginkor izan daitezen".
3. Nafarroako Foru Komunitateko Administrazioa tokiko, herrialdeko, Espainiako nahiz atzerriko museoen eta bilduma museografiko iraunkorren titularrekin eta kultur eta hezkuntza arloko beste edozein erakunderekin lankidetzan arituko da Nafarroako museoen azpiegiturak, funtsak eta zabalkundea hobetu eta sustatzeko.
4. Nafarroako Foru Komunitateko Administrazioak orobat sustatuko du herritarrek museo-erakundeen arloan parte har dezaten, bereziki museoen sustapena edo museoetan boluntario-lanak egitea helburu duten irabazi asmorik gabeko elkarteen edo entitateen bidez.
II. TITULUA
Nafarroako museoen eta bilduma museografiko iraunkorren sistema
10. artikulua. Definizioa.
Nafarroako Museoen Sistema Nafarroako Foru Komunitateko museoak eta bilduma museografiko iraunkorrak biltzeko egitura gisa sortzen da, kudeaketa eta zerbitzuak hobetu eta baliabide publikoak eta pribatuak hobeki aprobetxatzeko asmoz lagundu nahi duten guztiek osatua.
11. artikulua. Osaera.
Hauek dira Nafarroako Museoen Sisteman parte hartuko dutenak:
a) Museoen arloko eskumena duen departamentukoak edo hari atxikita izanik, museoen kudeaketarekin zerikusia duten administrazio unitate eta organoak. Departamentuaren ardura izanen da sistemaren zuzendaritza eta koordinazioa.
b) Nafarroako Foru Komunitateko Administrazioaren titulartasuneko museo eta bilduma museografiko iraunkorrak.
c) Halako museo eta bilduma museografiko iraunkorrak, non haien administrazio, zuzendaritza edo zaintza organoetako kideen erdiak edo gehiago Nafarroako Foru Komunitateko Administrazioak izendatu dituen.
d) Nafarroako Foru Komunitatearentzat interesgarriak izanik, Nafarroako Museoen Sisteman borondatez sartzen diren gainerako museo eta bilduma museografiko iraunkorrak. Atxikipena erakunde horietako titularraren eta museoen arloko eskumena duen departamentuaren arteko hitzarmenaren bidez eginen da, bost urterako gutxienez.
12. artikulua. Helburuak.
Nafarroako Museoen Sistemak helburu hauek betetze aldera lan eginen du:
1. Hezkuntza proiektuen, erakusketen eta gainerako jardueren programa bat garatzea.
2. Sisteman dauden zentroetako profesionalen lankidetza eta etengabeko prestakuntza erraztea.
3. Bildumen tratamendu teknikoa homologatu eta normalizatzeko tresnak garatzea, behar bezala dokumentatu, kontserbatu, zaharberritu eta zabalkundea egiteko.
4. Beste erakunde publiko edo pribatu batzuen babesa bilatzea sistemako kideen proiektuetarako, bai jardueretarako, bai ekipamendu edo azpiegituretarako, baita bestelako beharretarako ere.
5. Erregelamendu bidez ezartzen den beste edozein.
13. artikulua. Nafarroako Museoen Sisteman sartzearen ondorioak.
1. Nafarroako Museoen Sisteman sartzen diren museo eta bilduma museografiko iraunkorrek ondokoetarako lehentasuna izanen dute:
a) Nafarroako Foru Komunitateko Administrazioak museoen jarduera sustatzeko eta horrelako zentroen inbertsioetarako ematen dituen diru-laguntzak jasotzeko, aurrekontuan dagoen diruaren arabera.
b) Nafarroako Foru Komunitateko Administrazioak planifikatu eta antolatzen dituen eraskusketen zirkuituetan eta beste kultur jarduera batzuetan sartzeko.
c) Nafarroako Foru Komunitateko Administrazioak sustatzen dituen kultur, hezkuntza eta turismo ibilbideetan sartzeko eta horien bidez ezagutarazia izateko.
d) Zentroko langileek Nafarroako Foru Komunitateko Administrazioak antolatzen dituen prestakuntza eta espezializazio jardueretan parte hartzeko.
e) Museoen arloko eskumena duen departamentuak funtsak zaindu eta zaharberritzeko ematen edo antolatzen duen laguntza teknikoaz baliatzeko.
2. Foru lege honetan ezarritakoez gain, sisteman sartutako museoek eta bilduma museografiko iraunkorrek ondoko betebeharrak dituzte:
a) Sistemako museoen eta bilduma museografiko iraunkorren arteko informazio-trukean laguntzea.
b) Erregelamendu bidez ezartzen diren egunetan eta orduetan irekitzea jendearentzat. Ordutegi hori ez da inolaz ere izanen asteko 20 ordutik beheitikoa museoen kasuan eta 10 ordutik beheitikoa bilduma museografiko iraunkorrenean.
c) Jasota uztea toki ikusgai eta jendaurreko batean Nafarroako museoen eta bilduma museografiko iraunkorren sisteman sartuta dagoela, eskumena duen departamentuak ezarritako identitate grafikoko ereduaren arabera.
d) Eskumena duen departamentuaren baimenari lotuta ez dauden eskubide ekonomikoak jaso izanaren berri ematea kasuko departamentu horri.
III. TITULUA
Museoen eta bilduma museografiko iraunkorren araubide orokorra
I. KAPITULUA
Museoen eta bilduma museografiko iraunkorren aitorpena
14. artikulua. Museo gisa aitortua izateko betebeharrak.
Museoek, aitorpena jasotzeko, betebehar hauek bete beharko dituzte:
a) Balio arkeologikoa, historikoa, artistikoa, etnologikoa, zientifikoa, teknikoa edo kulturala duten ondasunen bilduma egonkor bat izatea, horiek ukigarriak zein ukiezinak izan, museoaren eragin esparruarentzat eta helburuentzat nahikoa eta egokia dena.
b) Museoaren eginkizunetarako egokia den higiezin bat izatea, museoaren egoitza iraunkorra izanen dena.
c) Museologian eta kasuan kasuko museoaren edukiari eta eginkizunei loturiko zientzia arloetan prestakuntza duten langile teknikoak izatea.
d) Urteko aurrekontu-zuzkidura egonkorra izatea, bere eginkizunak eta helburuak betetzeko modukoa.
e) Bere plan museologikoaren arabera jardutea.
f) Funtsen inbentarioa eta erregistro liburuak izatea.
g) Bildumaren erakusketa iraunkor, antolatu eta esanguratsua egitea, azalpenak eta guzti.
h) Ingurumenaren eta segurtasunaren aldetik, bildumaren kontserbazioa eta zaintza bermatzeko moduko ezaugarriak izatea.
i) Funtsak ikusteko moduan izatea, ikerketarako, kontsultarako, irakaskuntzarako eta jendeak ezagutu eta gozatzeko.
j) Erakusketa jendearentzako zabalik izatea, modu iraunkorrean eta bisitatzeko ordutegi finko batekin.
15. artikulua. Bilduma museografiko iraunkor gisa aitortua izateko betebeharrak.
Bilduma museografiko iraunkorrek, aitorpena jasotzeko, betebehar hauek bete beharko dituzte:
a) Balio arkeologikoa, historikoa, artistikoa, etnologikoa, zientifikoa, teknikoa edo kulturala duten ondasunen bilduma egonkor bat edukitzea, horiek ukigarriak nahiz ukiezinak izan.
b) Bere eginkizunetarako egokia den higiezin bat edukitzea, bildumaren egoitza iraunkorra izanen dena.
c) Bere bildumaren erakusketa iraunkorra, antolatua eta esanguratsua egitea.
d) Funtsen inbentarioa eta erregistro liburuak izatea.
e) Ingurumenaren eta segurtasunaren aldetik, bildumaren kontserbazioa eta zaintza bermatzeko moduko ezaugarriak izatea.
f) Erakusketa jendearentzako zabalik izatea, modu iraunkorrean eta bisitatzeko ordutegi finko batekin.
16. artikulua. Museoen eta bilduma museografiko iraunkorren aitorpena.
1. Museoen eta bilduma museografiko iraunkorren aitorpena titularrak berak eskatu beharko du eta erabakia hartzea museoen arloko eskumena duen departamentuak hartuko du.
2. Titularrak ondoko dokumentazio hau bidali beharko dio museoen arloko eskumena duen departamentuari:
a) Museoa edo bilduma museografiko iraunkorra sortu izanaren egiaztagiria.
b) Foru lege honetan ezarritako betebehar guztiak betetzen dituela egiaztatzen duen agiria.
c) Bildumaren inbentarioa, zehaztuko den euskarrian.
d) Plantilla.
e) Jendearentzako zabalik egoteko orduak.
3. Aitorpena sei hilabeteko epean eman edo ukatuko da, foru lege honetan ezarritako betebehar guztiak betetzen ote diren egiaztatu eta Nafarroako Kulturaren Kontseiluaren txostena ikusi ondoren. Epe horretan berariazko ebazpenik jakinarazten ez bada, aitorpena onartu dela ulertuko da.
4. Museo edo bilduma museografiko iraunkor bakoitza aitortzeko administrazio egintzan honako hauek adieraziko dira:
a) Izena.
b) Egoitza.
c) Helburuak eta irizpide zientifikoak.
d) Titularra eta kudeaketa organoa.
e) Oinarrizko antolamendua eta dituen zerbitzuak.
5. Aitorpena emateko administrazio egintza Nafarroako Museoen eta Bilduma Museografiko Iraunkorren Erregistroan inskribatuko da.
6. Museoa edo bilduma museografiko iraunkorra Nafarroako Foru Komunitatearen titulartasunekoa ez bada, ez da zilegi izanen aitorpena ematea baldin eta haren funtsen artean Nafarroako Foru Komunitateko Administrazioaren jabetzakoa den material arkeologikoa edo nolanahiko kultur ondasunen bat baldin badago eta, aurretik, ondasun horien gordailua egiteko arauak finkatzeko hitzarmena sinatu ez bada.
7. Aitorpena eman ondoren, eta deusetan galarazi gabe Nafarroako Foru Komunitateko Administrazioari ikuskapenak egiteko dagokion eskumena, museo eta bilduma museografiko iraunkor guztiak beharturik daude museoen gaineko eskumena duen departamentuari idatziz jakinaraztera foru lege honetan ezarritako betebeharren gainean edo haien kudeaketa organoetan gertatzen diren aldaketa guztiak. Jakinarazpen hori ezer aldatu aurretik egin beharko da, gertaeren nolakotasuna dela-eta ezinezkoa den kasuetan izan ezik.
8. Gerora sortutako arrazoiengatik museoaren edo bilduma museografiko iraunkorraren aitorpena emateko aintzat hartutako betebeharren bat betetzetik gelditzen bada, aitorpena eten edo bertan behera uzten ahalko da. Halakoetan, behar den prozedura instruituko da aurretik eta titularrari entzunaldia emanen zaio.
17. artikulua. Izena.
1. "Nafarroako Museoa" edo "Nafarroako Bilduma" izendapenak, bakarrik edo beste hitz batzuekin konbinatuta, edozein helburutarako erabili nahi izanez gero, museoen arloko eskumena duen departamentuaren baimena beharko da. Haren baimena beharko da, halaber, museoen eta bilduma museografiko iraunkorren izenetan Nafarroako Foru Komunitatearen osotasunaren aipamena egiten duten adjektiboak erabiltzeko.
2. Toki entitateen izena, bakar-bakarrik edo beste hitz batzuekin konbinatuta, erabiliz gero, kasuan kasuko toki entitatearen berariazko baimena beharko da.
18. artikulua. Museoak eta bilduma museografiko iraunkorrak desegitea.
Museoak eta bilduma museografiko iraunkorrak sortzeko baimena eman behar duen organoak erabakiko du museoak eta bilduma museografiko iraunkorrak desegitea, eta museoen eta bilduma museografiko iraunkorren Nafarroako erregistroko inskripzioa ezerezteko agindua emanen du.
II. KAPITULUA
Museoen eta bilduma museografiko iraunkorren erregistroa
19. artikulua. Nafarroako Museoen eta Bilduma Museografiko Iraunkorren Erregistroa.
1. Museoen arloko eskumena duen departamentuan Nafarroako Museoen eta Bilduma Museografiko Iraunkorren Erregistro bat izanen da, erregistro publiko gisa eta izaera administratiboarekin, non foru lege honetan xedatutakoaren arabera aitorpena jasotzen duten museo eta bilduma museografiko iraunkor guztiak inskribatuko diren.
2. Museo edo bilduma museografiko iraunkor bat Erregistroan inskribatzea ofizioz eginen du museoen arloko eskumena duen departamentuak, foru lege honen araberako aitorpena jaso ondoren.
3. Erregistroan, gutxienez, honako datu hauek agertu beharko dira: aitorpena emateko administrazio egintzan jaso ziren datuak, inskripzioaren eguna eta, hala bada, baja emateko eguna.
4. Museo edo bilduma museografiko iraunkor gisa jarduteko aitorpena eten edo bertan behera utziz gero, hori ere inskribatu beharko da, hori deklaratzen duen administrazio egintza irmo bilakatzen denean.
5. Nafarroako Foru Komunitateko aurrekontuen kargura diru-laguntzak jasotzeko edo museo edo bilduma museografiko iraunkorrentzako beste edozein onuraz baliatzeko, ezinbestekoa izanen da Nafarroako Museoen eta Bilduma Museografiko Iraunkorren Erregistroan inskribaturik izatea.
III. KAPITULUA
Museoen eta bilduma museografiko iraunkorren kudeaketa
20. artikulua. Museoen eta bilduma museografiko iraunkorren titularren eginbehar orokorrak.
Museoen eta bilduma museografiko iraunkorren titularrek eginbehar hauek izanen dituzte:
a) Aitorpena emateko aintzat hartutako betebeharrak betetzen segitzea.
b) Erregistro liburuak eta funtsen inbentarioa eguneraturik izatea.
c) Zentroa irekitzeko orduak, eta ordutegian egiten diren aldaketak, jendeari eta museoen arloko eskumena duen departamentuari jakinaraztea. Ordutegia zentroko sarreran jarriko da, ongi ikusteko moduko toki batean.
d) Zentroan sartzeko tarifen berri ematea jendeari eta museoen arloko eskumena duen departamentuari.
e) Besterentzeak, gordailuak, eskurapen berriak, aldi baterako irteerak edo beste edozein arrazoi dela-eta, bere funtsetan gertatzen diren aldaketa guztien berri ematea museoen arloko eskumena duen departamentuari.
f) Zentroaren jarduerari, bisitariei eta emandako zerbitzuei buruzko informazio eta estatistika datuak jaso eta museoen arloko eskumena duen departamentuari bidaltzea.
g) Ikuskapenak egiteko eskumena esleiturik duten organoei zentroaren funtzionamendua, instalazioak eta bulegoak eta, orobat, dokumentazioa, erregistro liburuak eta funtsen inbentarioa ikuskatzen uztea eta, haiek eskatuz gero, behar duten informazioa lortzeko erraztasunak ematea.
h) Erraztasunak ematea funtsak ikertzeko interesa duten pertsonei.
i) Instalazioak ezgaitasunen bat duten pertsonentzako egokitzea, arkitektura-oztopoak kenduz eta edukiak zentzumenetan zailtasunak dituzten pertsonentzat egokituz (zeinuen hizkuntza, braille, azpi-tituluak eta abar).
21. artikulua. Erregistro liburuak.
1. Museoek eta bilduma museografiko iraunkorrek ondoko erregistro liburu hauek eduki beharko dituzte, funtsen sarrera eta irteera guztien idazpena egiteko ordena kronologikoaren arabera:
a) Zentroko bilduma egonkorraren erregistro liburua, zentroa osatzen duten funts guztiak inskribatzeko.
b) Gordailuen erregistro liburua, kontzeptu hori dela kausa sartzen diren funtsak inskribatzeko, titularra edozein delarik ere.
2. Prospekzio edo indusketa baimenduetatik datozen material arkeologikoen sarrerak gordailuen liburuan erregistratu beharko dira beti.
22. artikulua. Funtsen inbentarioa.
1. Museo eta bilduma museografiko iraunkorrek beren funtsen inbentarioa egin eta eguneratuta eduki beharko dute.
2. Museoen arloko eskumena duen departamentuak noiznahi egiazta dezake erregistro liburuak eta inbentarioa bat datozela bildumak eta gordailua osatzen dituzten funtsekin.
23. artikulua. Funtsen Inbentario Orokorra.
1. Museoen arloko eskumena duen departamentuak Nafarroako museoetako eta bilduma museografiko iraunkorretako funtsen Inbentario Orokorra prestatu eta etengabe eguneratuko du.
2. Hori helburu, museo eta bilduma museografiko iraunkor guztiek behar den informazioa eman beharko dute.
3. Inbentario orokor horretan jasotzen den informazioa museoen arloko eskumena duen departamentuak zabalkunderako erabil dezake.
24. artikulua. Nafarroako Foru Komunitateko Administrazioaren titulartasunekoak diren Nafarroako Kultur Ondareko ondasunen gordailuak.
1. Nafarroako Kultur Ondareko, jabari publikoko edo Nafarroako Foru Komunitateko Administrazioaren edo haren erakunde autonomoen titulartasunekoak diren ondasunak gordailuan hartzen ahal dituzten erakunde bakarrak Nafarroako Museoen Sisteman sarturik dauden museoak eta bilduma museografiko iraunkorrak dira, horrelakoak gordetzeko bakoitzak duen gaitasunaren arabera, museoen arloko eskumena duen departamentuak hala erabakiz gero.
2. Nafarroako Foru Komunitateko Administrazioaren ondasunak gordailuan hartuko dituzten zentroak museoen arloko eskumena duen departamentuak aukeratuko ditu, hurbiltasun geografikoaren edo gaiaren espezializazioaren gaineko irizpideen arabera, materialen kontserbazioari eta segurtasunari begira zer den onena eta zentro bakoitzak zientziaren eta kulturaren ikuspegitik betetzen dituen eginkizunak kontuan harturik.
25. artikulua. Beste batzuen titulartasunekoak diren Nafarroako Kultur Ondareko ondasunen gordailuak.
1. Instalazioaren gabeziengatik, titularrak indarreko araudia ez betetzeagatik edo salbuespeneko presako arrazoiengatik, museo edo bilduma museografiko iraunkor bateko funtsen kontserbazioa, segurtasuna edo erabilgarritasuna arriskuan baldin badago, museoen arloko eskumena duen departamentuak, museoaren edo bildumaren titularrari entzunaldia eman ondoren, funts horiek beste museo batean edo batzuetan gordailuan izatea eskaintzen ahalko du, erabaki hori hartzea dakarten arrazoiak desagertu arte.
2. Museo edo bilduma museografiko iraunkor bat itxi, desegin edo itxiarazten bada, museoen arloko eskumena duen departamentuak, titularrari eta balizko beste interesdun batzuei entzunaldia eman ondoren, eskaintzen ahalko du hango funtsak beste museo batean edo batzuetan gordetzea, ondasunen izaerarekin bat datozenetan hain zuzen, eta hurbiltasun geografikoa ere kontuan harturik. Erabaki hori hartzea dakarten arrazoiak desagertuz gero, gordailuan utzitako funtsak jatorrizko museora edo bilduma museografiko iraunkorrera itzuliko dira.
26. artikulua. Kopiak, erreprodukzioak eta digitalizazioa.
1. Edonolako prozeduraren bidez museo edo bilduma museografiko iraunkor batean egiten diren kopiak eta erreprodukzioak eta funtsen digitalizazioa ikerketa eta kultur zabalkundea errazteko asmoz eginen dira, egileen jabetza intelektualaren eskubideak errespetatuz, obra behar bezala zainduz eta zentroaren ohiko jarduna oztopatu gabe.
2. Kopia edo erreprodukzioak egiteko baimena ematea ondasunaren titularrari edo, hala bada, ustiatzeko eskubideen titularrari dagokio, Jabetza Intelektualari buruzko Legearekin bat. Museo edo bilduma museografiko iraunkor bat titularrak ez beste batek kudeatzeko hitzarmena sinatuz gero, bertan arautuko da museoko edo bilduma museografiko iraunkorreko ondasunen kopiak eta erreprodukzioak egiteko baimenak emateko sistema.
3. Egiten diren kopia eta erreprodukzioetan halakoak direla agerrarazi beharko da modu ikusgarri batean, baita jatorria ere.
4. Nafarroako Gobernuak museoetako edukiak digitalizatzeko plan bat sustatuko du. Plana Nafarroako Museoen Sistemari atxiki eta hurrengo hiru urteetan garatuko da.
27. artikulua. Sartzeko araubidea eta bisita publikoarengatiko eskubide ekonomikoak.
1. Museoak eta bilduma museografiko iraunkorrak ordutegi finko batean egonen dira jendearentzat zabalik. Ordutegia eta sartzeko baldintzak museoaren edo bilduma museografikoaren sarreran egonen dira, ikusteko moduan eta eraikinaren ondare-balioaren arabera egokia den moduan.
Nafarroako Gobernuak kudeatzen dituen museoak astean behin itxiko dira, arauz ezarritako moduan.
Bisiten ordutegiari eta baldintzei buruzko edozein aldaketa aurretiaz jakinarazi beharko zaio departamentu eskudunari, arauz ezarritako moduan.
2. Nafarroako Sisteman sarturiko museoek eta bilduma museografiko iraunkorrek ezgaituentzako irisgarritasunari eta oztopoak kentzeari buruzko legeak bete beharko dituzte, eta sustatu eginen dute irisgarritasuneko berariazko programak ezartzea eta ezgaituek kultur zerbitzuez gozatu ahal izatea.
3. Museoek eta bilduma museografikoek eskubide ekonomikoak jaso ahalko dituzte bisita publikoengatik, aplikatuz, betiere, Europar Batasuneko kideak diren estatuetako nazionalitatea duten pertsonen arteko berdintasunaren printzipioa, lehenbizi nazionalitatea egiaztatuta.
4. Europar Batasuneko estaturen bateko pertsonek, behin nazionalitatea egiaztatu ondoren, eskubidea izanen dute doan sartzeko museo eta bilduma museografikoetan, erregelamenduz ezartzen diren egunetan.
Halaber, doakoa izanen da museo eta bilduma museografikoetan sartzea edozein nazionalitatetako pertsonentzat, Espainiako Egun Nazionalean, Konstituzioaren Egunean, Nafarroako Egunean, Museoen Nazioarteko Egunean eta Turismoaren Nazioarteko Egunean.
5. Nafarroako museoen eta bilduma museografiko iraunkorren sisteman dauden museo eta bilduma museografikoen kasuan, bisita publikoengatik eskubide ekonomikoak jasotzeko museoen arloko eskumena duen departamentuaren berariazko baimena beharko da; izan ere, hari egokituko zaio, halaber, pertsona, kolektibo profesional edo hezkuntza nahiz kultura arloko erakundeekin loturiko taldeen doako sarbiderako edo sarbide merkeagorako araubide bereziak zehaztea.
Nolanahi ere, Europar Batasuneko 18 urtez beherakoek, 65 urtez gorakoek, jubilatuek eta % 33koa baino minusbaliotasun gradu handiagoa dutenek ez dute bisita ordaindu beharko, behar den egiaztagiria aurkeztuta".
28. artikulua. Kontserbatze prebentiboaren printzipioa.
Kontserbazioaren arloan, museoek eta bilduma museogafikoek beren jarduera orientatu beharko dute prebentzioko estrategiak eta esku-hartzeak planifikatu, ikertu eta aplikatzera, zertarako-eta egoera egokiak sortzeko edo mantentzeko museoetako funtsak haiek honda ditzaketen era guztietako faktoreetatik babeste aldera.
29. artikulua. Dokumentuak kudeatzeko sistema.
1. Museoek eta bilduma museografiko iraunkorrek dokumentuak kudeatzeko sistema bat eduki beharko dute. Sistema horretan, tresna deskriptiboen eta kontrol tekniko eta administratiboko tresnen multzoa jasoko da, hiru funts motei zuzenduak:
a) Museografikoak.
b) Dokumentalak.
c) Bibliografikoak.
2. Museoen arloko eskumena duen kontseilaritzak aktiboki lagunduko du Museoen eta Bilduma Museografikoen Sistemako museoei eta bilduma museografikoei buruzko informaziorako, dokumentaziorako eta kudeaketarako sistema integratuak pixkanaka ezartzeko, komunikazioaren eta informazioaren teknologia berriak erabiliz.
IV. KAPITULUA
Museoei buruzko plangintza
30. artikulua. Plan museologikoa.
1. Plan museologikooak izaera integratzailea eta orokorra izanen du, eta erakundearen ildo programatikoak eta edukien proposamena jaso beharko ditu.
2. Plan museologikoen erredakzioak museoen arloko eskumena duen departamentuak ematen dituen arauak bete beharko ditu. Plan Museologikoak Segurtasun Plana ere jasoko du, hain zuzen ere hurrengo artikuluan aipatzen dena.
3. Departamentu eskudunak sustatuko du plan museologikoak eta erakusketa iraunkorretako eta aldi baterako erakusketetako aurkezpenak ikerketa zientifiko eta museologikoen eta berrikuntza museografikoen araberakoak direla.
4. Nafarroako Foru Komunitateko Administrazioaren titulartasunekoak diren museo edo bilduma museografikoen plan museologikoak departamentu eskudunak onetsi beharko ditu.
Nafarroako Museoen eta Bilduma Museografikoen Sistema osatzen duten gainerako museoetako plan museologikoek departamentu eskudunaren aldeko txostena eskatuko dute. Aldekotzat izan dela ulertuko da baldin eta bi hilabete iragaten badira hura jaso gabe.
31. artikulua. Segurtasun plana.
Museoek segurtasun plan bat eduki behar dute. Plan horretan, kontuan hartu beharko dira haren ezaugarriak, bai eta gisa horretako erakunde batek dauzkan arriskuei aurre egiteko behar diren giza baliabideak, baliabide teknikoak eta antolamendu-neurriak ere.
32. artikulua. Jardueren urteko plana eta kudeaketari buruzko txostena.
1. Nafarroako Museoen eta Bilduma Museografiko Iraunkorren Sistemari atxikitako zentroek jardueren urteko plan bat eduki beharko dute. Planak kasuko zentroak garatu nahi dituen aurreikuspenak jasoko ditu, hain zuzen ere ondoko arloetan: ikerketa, kontserbazioa, zaharberritzea, mantentzea, zabalkundea eta administrazioa.
2. Departamentu eskudunak, behar den erregelamenduzko garapenaren bitartez, behar diren gomendio teknikoak emanen ditu jardueren urteko plana eta kudeaketari buruzko txostena egiteko".
IV. TITULUA
Ikuskapenen eta zehapenen araubidea
33. artikulua. Ikuskapena.
Museoen arloko eskumena duen departamentuak, horretarako baimena duten funtzionarioen bidez, behar diren ikuskapenak eginen ditu foru lege hau betetzen dela begiratzeko. Funtzionario horiek, ondorio horietarako, agintaritzako agentetzat hartuko dira.
34. artikulua. Administrazio arau-hausteak.
1. Museoen arloko administrazio arau-hauste berariazkoak dira foru lege honetan ezarritako betebehar eta eginbeharrak urratzen dituzten egintzak edo ez-egiteak.
2. Foru lege honetan ezarritako beste betebehar batzuk ez betetzea arau-hauste arintzat hartuko da.
3. Hauek dira arau-hauste larriak:
a) Nafarroako Foru Komunitateko Administrazioaren izenean dauden museoetako eta bilduma museografiko iraunkorretako funtsen erreprodukzioak baimenik gabe egitea.
b) Funtsen segurtasuna eta kontserbazioa bermatu beharra ez betetzea.
c) Administrazioak ikuskapenak egiteko duen ahalmena oztopatzea.
d) Arau-hauste arinak behin eta berriz egitea.
4. Hauek dira arau-hauste oso larriak:
a) Pertsonen segurtasuna arriskutan jartzen dutenak.
b) Nafarroako Foru Komunitateko Kultur Ondareari oso kalte handia edo konpondu ezinezko galera eragiten diotenak.
c) Arau-hauste larriak behin eta berriz egitea.
d) Arau-hauste oso larritzat joko dira bisita publikoaren betebeharra justifikatu gabe ez betetzea, berdintasunaren printzipioa urratuta, jaioterri, arraza, sexu, erlijio, iritzi edo bestelako edozein baldintza edo egoera pertsonal edo sozialak direla eta.
5. Artikulu honen ondorioetarako, arauak behin eta berriz urratzea da urtebeteko epean izaera bereko bi arau-hauste baino gehiago egina izatea, administrazio bidean irmo bilakatu den ebazpen baten bidez hala dela deklaratu denean.
35. artikulua. Zehapenak eta zehapen prozedura.
Foru lege honetan ezarritako arau-hausteei aplikatu beharreko zehapenei dagokienez, eta orobat, erantzukizunen araubideari, eskumenari, zehapena ezartzeko prozedurari eta ondorioei eta arau-hausteen eta zehapenen preskripzioari dagokienez, Nafarroako Kultur Ondareari buruzko azaroaren 22ko 14/2005 Foru Legean xedatutakoari jarraikiz jokatuko da.
Lehen xedapen gehigarria. Museoak eta bilduma museografiko iraunkorrak babesteko araubidea.
Lege honen indarrez, Nafarroako Foru Komunitatearen titulartasunekoak ez diren eta aitorpena jasotzen duten museoetako eta bilduma museografiko iraunkorretako bilduma osatzen duten ondasun higigarriak ondasun inbentariatu deklaratzen dira, interes kulturaleko ondasun deklaratzeko aukera galarazi gabe, Kultur Ondareari buruzko azaroaren 22ko 14/2005 Foru Legearen 14.2 artikuluan adierazitako salbuespenak salbuespen.
Bigarren xedapen gehigarria.-Museoen aitorpena.
Foru lege honen indarrez, museoaren aitorpena jaso dute Nafarroako Museoak, Jorge Oteiza Fundazioaren Museoak, Gustavo de Maeztu Museoak eta Arte Garaikideko Muñoz Sola Museoak.
Hirugarren xedapen gehigarria.-Foru lege honen ebaluazioa.
Foru legeak indarra hartzen duenetik departamentu eskudunak haren betetzearen emaitzak ebaluatuko ditu, lau urtez behin, betetzen ari ote den zehazteko eta egokitzat jotzen diren lege eta erregelamendu mailako aldaketak proposatzeko. Nafarroako Gobernuak Nafarroako Parlamentuari igorri beharko dizkio ebaluazioaren emaitzak, horri buruzko saio monografiko bat egin dezan.
Lehen xedapen iragankorra.-Egun dauden museoen eta bilduma museografiko iraunkorren aitorpen iragankorra.
Foru lege honek indarra hartzean, Nafarroako Foru Komunitateko Administrazioaren titulartasunekoak ez diren museo eta bilduma museografiko iraunkorren titularrek aitorpen iragankorra eskatzen ahalko dute, foru lege honen 14. eta 15. artikuluetan ezarritako betebeharren bat betetzen ez badute. Foru lege honek indarra hartu eta bost urteko epean behin betiko aitorpena lortzen ez badute, aitorpen iragankorra baliorik gabe geldituko da.
Bigarren xedapen iragankorra.-Museoentzako eta bilduma museografiko iraunkorrentzako diru-laguntzen araubide iragankorra.
Foru lege honek indarra hartu eta bost urteko epean, lehenengo xedapen iragankorrean aipatzen den aitorpen iragankorra jasotzen duten museoei eta bilduma museografiko iraunkorrei diru-laguntzak ematen ahalko zaizkie instalazioak edo ekipamenduak hobetu edo beste edozein inbertsio egiteko, haien helburua museoen edo bilduma museografiko iraunkorren behin betiko aitorpena lortzeko beharrezkoak diren baldintzak betetzea bada.
Xedapen indargabetzaile bakarra.-Indargabetzea.
Indarrik gabe uzten dira foru lege honetan ezarritakoari aurka egiten dioten maila bereko edo baxuagoko xedapen guztiak.
Azken xedapenetan lehena.-Erregelamenduak emateko ahalmena.
Nafarroako Gobernuari eta museoen arloan eskumena duen departamentuko kontseilari titularrari ahalmena ematen zaie foru lege hau aplikatu eta garatzeko behar diren xedapenak eman ditzaten indarra hartu eta hurrengo hogeita lau hilabeteko epean.
Azken xedapenetan bigarrena.-Indarra hartzea.
Foru lege honek Nafarroako Aldizkari Ofizialean argitaratu eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.
Iruñean, 2009ko uztailaren 2an.-Nafarroako Gobernuko lehendakaria, Miguel Sanz Sesma.
euskal legezalea
Page updated
Google Sites
Report abuse