152008forulegea,nafarroakounibertsitatep

15/2008 FORU LEGEA, uztailaren 2koa, Nafarroako Unibertsitate Publikoko Gizarte Kontseiluari buruzkoa.

NAFARROAKO GOBERNUKO LEHENDAKARIA NAIZEN HONEK

Aditzera ematen dut Nafarroako Parlamentuak onetsi duela honako

FORU LEGEA, NAFARROAKO UNIBERTSITATE PUBLIKOKO GIZARTE KONTSEILUARI BURUZKOA.

ZIOEN AZALPENA

Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 47. artikuluan ezartzen denez, Nafarroaren eskumena da irakaskuntza arautzea eta administratzea maila, gradu, modalitate eta espezialitate guztietan, ezertan ukatu gabe Konstituzioan arlo honi buruzko aginduetan ezarritakoa, horiek garatzen dituzten lege organikoak eta Estatuak dituen eskumenak, ikasketa eta lanbide tituluak eskuratu, eman eta homologatzeko baldintzak arautzeari eta horiek bete eta bermatzeko goi mailako ikuskapena egiteari dagokienez.

Beste alde batetik, Unibertsitateei buruzko abenduaren 21eko 6/2001 Lege Organikoaren 14. artikuluak xedatzen du autonomia erkidegoko legeak arautuko dituela Gizarte Kontseiluaren osaera eta eginkizunak, bai eta kideak izendatuko ere, berak ezarritako parametroen barruan.

Nafarroako Parlamentuak Nafarroako Unibertsitate Publikoko Gizarte Kontseiluari buruzko azaroaren 9ko 20/1994 Foru Legea onetsi zuen, baina Unibertsitateei buruzko 2001eko Lege Organiko berria eta 2007an horrek izandako aldaketa direla-eta nahitaezkoa da legeria Gizarte Kontseiluaren kontzepzio berrira egokitzea.

Gizarte Kontseilua gizarteak unibertsitatean parte hartzeko organoa da, eta gizartearen eta unibertsitatearen arteko harremanetarako elementua izan behar du.

Gizarte Kontseiluari dagokio Nafarroako Unibertsitate Publikoko jarduera ekonomikoak eta zerbitzuen errendimendua eta kalitatea gainbegiratzea, bai eta Nafarroako gizarteak unibertsitatea finantzatzeko laguntza eman dezan sustatzea ere.

Horrez gain, Gizarte Kontseiluak lagundu behar dio Nafarroako Unibertsitate Publikoari Europako goi mailako Hezkuntzaren Esparru berria eraikitzen, eta, halaber, unibertsitatearen eta haren ingurune kultural, profesional, ekonomiko eta sozialaren arteko harremanak bultzatu behar ditu, unibertsitatearen kalitatea hobetze aldera.

Foru lege honen xedea Nafarroako Unibertsitate Publikoko Gizarte Kontseiluaren izaera, helburuak, eskumenak, antolaketa, funtzionamendua eta osaera arautzea da.

I. KAPITULUA

Xedea eta aplikazio eremua

1. artikulua. Xedea.

Foru lege honen xedea Nafarroako Unibertsitate Publikoko Gizarte Kontseiluaren izaera, helburuak, eskumenak, antolaketa, funtzionamendua eta osaera arautzea da.

II. KAPITULUA

Izaera, helburuak eta eskumenak

2. artikulua. Izaera.

Gizarte Kontseilua gizarteak unibertsitatean parte hartzeko kide anitzeko organoa da, eta Nafarroako erakundeen, gizartearen eta Unibertsitate Publikoaren arteko harremanetarako elementua izan behar du.

3. artikulua. Helburuak.

Gizarte Kontseiluari dagokio Nafarroako Unibertsitate Publikoko jarduera ekonomikoak eta zerbitzuen errendimendua eta kalitatea gainbegiratzea, bai eta Nafarroako gizarteak Nafarroako Unibertsitate Publikoa finantzatzeko laguntza eman dezan sustatzea ere.

4. artikulua. Eskumenak.

Unibertsitateei buruzko abenduaren 21eko 6/2001 Lege Organikoan ezarritakoaren esparruan, eta Unibertsitatearen estatutuetan eta foru lege honetan ezarritakoaz baliatuz, Nafarroako Unibertsitate Publikoko Gizarte Kontseiluaren eskumenekoak dira jarduera ekonomikoak eta zerbitzuen errendimendua eta kalitatea gainbegiratzea, plangintza eta garapen instituzionala, eta gizartearekiko harremanak sustatzea.

5. artikulua. Jarduera ekonomikoak gainbegiratzeko eskumenak.

Hauek dira jarduera ekonomikoak gainbegiratzeko eskumenak:

a) Nafarroako Unibertsitate Publikoaren jarduera ekonomikoak gainbegiratzea eta hobetzeko proposamenak egitea. Horretarako, Gizarte Kontseiluak Unibertsitateko Barne Auditoria eta Kontroleko Unitateak legezkotasun kontrolari eta efikazia eta eraginkortasun ekonomikoei buruz egindako txostenak jasoko ditu.

Gizarte Kontseiluak eskumen hori betetzeko beharrezkotzat jotzen dituen txosten guztiak eskatu ahal izanen dizkio Nafarroako Unibertsitate Publikoari.

b) Gobernu Kontseiluak proposaturik, Nafarroako Unibertsitate Publikoaren urte anitzeko programazioa onestea.

c) Urte anitzeko programazio hori garatzeko Nafarroako Unibertsitate Publikoak eta Nafarroako Gobernuak izenpetzen dituzten finantzaketa hitzarmenak edo programa-kontratuak hobetzeko proposamenak egitea eta egindako negoziazioen berri izatea aldioro. Hitzarmen edo programa-kontratu horietan adierazita egonen dira, gutxienez, helburuak, finantzabideak, ebaluazio sistema eta helburuen betetze-maila.

d) Gobernu Kontseiluak proposaturik, Nafarroako Unibertsitate Publikoaren urteko aurrekontua eta haren aldaketak onestea. Aurrekontuari eta hura betetzeko arauei erantsiko zaie Nafarroako Gobernuan unibertsitatearen arloko eskumena duen departamentuak eginiko aldeko txostena, aurrekontuko langileriaren kostuari buruzkoa, eta lortu nahi diren helburuak eta haien kostua biltzen dituen memoria bat.

e) Gobernu Kontseiluak proposaturik, Nafarroako Unibertsitate Publikoaren Plan Estrategikoaren finantzabidea onestea.

f) Nafarroako Unibertsitate Publikoaren urteko kontuak onestea, bai eta urteko memoria ekonomikoa, programatutako helburuen betetze-maila eta aurrekontuko kostuak izandako desbideratzeak azalduta.

g) Kasuan kasuko organoak onetsi aurretik, Nafarroako Unibertsitate Publikoaren menpeko entitateen urteko aurrekontua baimentzea, bai eta haien kapitalean nahiz ondare-funts baliokidean partaidetza handiena Nafarroako Unibertsitate Publikoarena den entitateena ere, merkataritzako legeria edo, haien araubide juridikoa dela-eta, entitate horiek men egin behar dioten beste bat deusetan ukatu gabe.

h) Artikulu honen aurreko letran aipatutako entitateen urteko kontuak onestea.

i) Gobernu Kontseiluak proposaturik, Unibertsitateko irakasle eta ikertzaileentzat oro har ezarritakoen gehigarri diren lansari kontzeptuen banakako atxikipena erabakitzea, aplikatzekoak diren arauen eta xede horrekin Nafarroako Gobernuak onetsiko dituen mugen barruan, eta Nafarroako Foru Komunitateko legeak ezartzen duen kanpoko ebaluazio organoak merezimenduak baloratu ondoan.

j) Irakaskuntza berekien eta titulu ofizialak lortzeko bideratuak ez diren ikasketen prezioak eta salbuespenak finkatzea, bai eta Unibertsitateak ematen dituen irakaskuntzaz kanpoko zerbitzuenak eta Unibertsitateko instalazioak erabili edo lagatzekoak ere.

k) Nafarroako Unibertsitate Publikoak bere baliabide arrunten kontura ikasketetarako ematen dituen beka, laguntza, salbuespen eta ikasketetarako kredituen politikaren jarraibideak ezartzea, publizitate, merezimendu eta gaitasunaren printzipioei jarraikiz.

l) Nafarroako Gobernuko organo eskudunei proposatzea, onets ditzan, Nafarroako Unibertsitate Publikoaren, haren menpeko entitateen zein haien kapitalean nahiz ondare-funts baliokidean partaidetza handiena Nafarroako Unibertsitate Publikoarena den entitateen zorpetze jarduketa guztiak.

m) Gobernu Kontseiluak proposaturik, kreditu berezia edo kreditu gehikuntzak ematea onestea, baldin eta hurrengo ekitaldira geroratu ezin den gastu bat egin beharra badago eta horretarako krediturik ez badago aurrekontuetan, eta dagoen kreditua nahikoa ez bada.

n) Kapitaleko gastuak Nafarroako Unibertsitate Publikoaren gastuen aurrekontuko beste kapitulu batera transferitzeko baimena ematea.

ñ) Unibertsitateko organo eskudunak proposaturik, baimena ematea Nafarroako Unibertsitate Publikoari ondoko hauetarako: ondasun higiezinak erosteko, erakundearen ondare-ondasun higiezinak eta aparteko balioa duten ondasun higigarriak eta bere helburuak lortzeari lotzen zaizkion gainerakoak besterendu edo erabiltzeko eta Nafarroako Unibertsitate Publikoaren jabari publikoko ondasunak desafektatzeko, baldin eta haien balioa Gizarte Kontseiluak ezartzen dituen mugetatik gorakoa bada. Horretarako, Gizarte Kontseiluak, urte natural bakoitzeko lehenbiziko hiruhilekoan, entitatearen ondarea osatzen duten ondasunen inbentarioa jasoko du, aurreko ekitaldiko abenduaren 31n eguneratua

o) Estatuko edo Foru Komunitateko legeria indardunak bere esku utzitako beste edozein.

6. artikulua. Zerbitzuen errendimendua eta kalitatea gainbegiratzeko eskumenak.

Hauek dira zerbitzuen errendimendua eta kalitatea gainbegiratzeko eskumenak:

a) Nafarroako Unibertsitate Publikoaren errendimendua eta kalitatea gainbegiratzea, bere esparru guztietan, eta hobekuntza lerroak proposatzea.

b) Nafarroako Unibertsitate Publikoaren kalitate plana prestatzeko lanetan parte hartzea eta proposamenak egitea zerbitzuen kalitatea eta eraginkortasuna hobetzeko.

c) Nafarroako Unibertsitate Publikoko irakasleen eta ikertzaileen lanaren barne nahiz kanpoko ebaluazioen emaitzak ezagutzea eta hobetzeko neurriak proposatzea.

d) Estatuko edo Foru Komunitateko legeria indardunak bere esku utzitako beste edozein.

e) Nafarroako Unibertsitate Publikoaren kontuak Nafarroako Comptos Ganberak auditatzen ez dituen urteetan, Gizarte Kontseiluak kanpoko finantza auditoria bat eskatu ahal izanen du.

7. artikulua. Plangintza eta garapen instituzionalaren eskumenak.

Hauek dira plangintza eta garapen instituzionalaren arloko eskumenak:

a) Nafarroako Unibertsitate Publikoaren Plan Estrategikoaren proiektuaren prestaketa lanetan parte hartzea eta Gobernu Kontseiluarekin adostea.

b) Nafarroako Unibertsitate Publikoko errektorearekin gerentearen izendapena adostea.

c) Ingurune sozialaren behar akademikoei erantzuten dieten titulu ofizialak lortzera bideratutako irakaskuntza berriak ezartzeari buruzko txostena egitea.

d) Unibertsitateen Kontseiluak aurretik txostena emanik, Nafarroako Unibertsitate Publikoko ikasleak mailaz igo eta bertan irauteko arauak onestea, ikasketa mota bakoitzaren ezaugarriak kontuan hartuz betiere.

e) Txostenak egitea eskolak eta fakultateak sortu, aldatu eta kentzeko proposamenei eta unibertsitateko titulu ofizialak, Espainia osoan balio dutenak, lortzera bideratutako ikasketak ezarri eta kentzeko proposamenei buruz, Unibertsitateei buruzko abenduaren 21eko 6/2001 Lege Organikoaren 8. artikuluarekin bat.

f) Txostenak egitea unibertsitateko ikerketa-institutuak, ikerketa erakundeak edo zentroak, publikoak nahiz pribatuak, Nafarroako Unibertsitate Publikoari atxikitzeko edo atxikipena kentzeko proposamenei buruz, Unibertsitateei buruzko abenduaren 21eko 6/2001 Lege Organikoaren 10. artikuluarekin bat.

g) Txostenak egitea ikastetxe publikoak edo pribatuak Nafarroako Unibertsitate Publikoari atxikitzeko proposamenei buruz, titulu ofizialak, Espainia osoan balio dutenak, lortzera bideratutako ikasketak ezartzeko, Unibertsitateei buruzko abenduaren 21eko 6/2001 Lege Organikoaren 11. artikuluarekin bat.

h) Nafarroako Unibertsitate Publikoak, bakarrik edo beste entitate batzuekin batera, edozein motatako pertsona juridikoak sortu, aldatu edo desagertzea onestea, eta beste entitate batzuetan parte hartzea ere onestea.

i) Estatuko edo Foru Komunitateko legeria indardunak bere esku utzitako beste edozein.

8. artikulua. Unibertsitatearen eta gizartearen arteko harremanak sustatzeko eskumenak.

Hauek dira gizartearekiko harremanak sustatzeko eskumenak:

a) Urteko jarduketa plan bat onestea, Unibertsitatearen eta bere ingurune kultural, profesional, ekonomiko eta sozialaren arteko harremanak sustatzeko xedearekin, eta gizarteari ezagutaraztea Nafarroako Parlamentuaren bitartez.

b) Eragile ekonomiko eta sozialen partaidetza sustatzea Nafarroako Unibertsitate Publikoaren irakaskuntzen eta ikerketaren finantzaketan.

c) Unibertsitateko tituludunen lan egoerari eta irakaskuntza berrien eskaera sozialari buruzko azterlanak sustatzea.

d) Nafarroako Unibertsitate Publikoak hitzarmenak egin ditzan sustatzea, xedea ikasleen prestakuntza osatu eta, enpresetan edo bestelako entitate sozialetan lanbide praktikak eginez, unibertsitateko tituludunei laneratzen laguntzea helburu duten entitate publiko eta pribatuekin.

e) Nafarroako Unibertsitate Publikoko irakaskuntza, ikerketa eta hedapen lana bultzatzea, bereziki produkzioaren sektoreekiko loturari dagokionez, Nafarroako Unibertsitate Publikoaren, enpresen eta ehun sozialaren arteko ikerketa eta garapen proiektu bateratuen alde eginez, eta unibertsitateko ikerketetan lortutako emaitzen transferentzia eta hedapen politikak ere lagunduz, gizartearen behar eta eskaerei erantzuteko.

f) Sektore profesionalen, sozialen eta ekonomikoen partaidetza sustatzea, titulu ofizialak eskuratzera bideratutako irakaskuntzak gizartearen behar eta eskaeretara egokitze aldera.

g) Nafarroako Unibertsitate Publikoaren ikasketa arduradunekin batera, etengabeko prestakuntzako eskaintza bat sustatzea, jardunean ari diren profesionalei zuzendua eta haien premietara egokitua.

h) Unibertsitateen arloko politikaren garrantzizko alderdiei buruzko hausnarketa eta debatea sustatzea, unibertsitateko komunitateak eta ingurune sozialak horietan parte har dezaten lortzeko.

i) Nafarroako Unibertsitate Publikoaren eta haren ikasle ohien artean harremanak ezar daitezela sustatzea, loturei eusteko eta unibertsitateko erakundearen aldeko mezenasgo ekintzak bultzatzeko.

j) Gizarte Kontseiluko buruak proposaturik, unibertsitateetako gizarte kontseiluen elkarteetan parte-hartzea onestea.

k) Pertsona nahiz erakundeendako laguntzak, sariak, goresmen edo aintzatespenak proposatzea.

l) Nafarroako kultur eta gizarte aurrerapena bultzatzeko lankidetzan aritzea.

m) Estatuko edo Foru Komunitateko legeria indardunak bere esku utzitako beste edozein.

III. KAPITULUA

Antolaketa

9. artikulua. Osaera.

1. Nafarroako Unibertsitate Publikoko Gizarte Kontseiluak hemeretzi kide izanen ditu.

2. Sei kidek unibertsitateko komunitatea ordezkatuko dute, honela banatuak:

a) Berezko hiru kontseilukide: errektorea, idazkari nagusia eta gerentea.

b) Gobernu Kontseiluak bere kideen artean hautatutako hiru kide, unibertsitateko komunitatea ordezkatuz: irakasle bat, ikasle bat eta administrazioko eta zerbitzuetako langileen ordezkari bat.

3. Hamahiru kidek Nafarroako interes sozialak ordezkatuko dituzte, honela banatuak:

a) Bost kide Nafarroako Parlamentuak gehiengo osoz hautatuak.

b) Bi kide, izendapenaren aurretik Nafarroako Foru Komunitatean egindako azken hauteskunde sindikalen emaitza ofizialen arabera ordezkari gehien lortu dituzten bi sindikatuek bana proposaturik.

c) Bi kide, araudi indardunaren arabera, Nafarroako Foru Komunitatean enpresaburuen elkarte garrantzitsuenek proposaturik.

d) Lau kide, Hezkuntza Departamentuko titularrak proposaturik.

10. artikulua. Izendapena.

Nafarroako Unibertsitate Publikoko Gizarte Kontseiluko kideen izendapenak eta kargu-uzteak Nafarroako Gobernuaren foru dekretu baten bidez eginen dira, unibertsitateen eskumena duen kontseilariak proposaturik eta foru lege honen 9. artikuluan aipatutako entitate edo erakundeek aukeratu ondoren.

11. artikulua. Eginkizunak.

1. Gizarte Kontseiluko kideek, beren eginkizunak betetzeko, Nafarroako Unibertsitate Publikoaren interes orokorrak hartuko dituzte kontuan, eta foru lege honetako 3. artikuluan aipatzen diren helburuak bete daitezen begiratuko dute.

2. Kontseiluko kideak ez dira aginduz lotuta egonen, eta karguak pertsonalki beteko dituzte. Halere, kargua eskuordetu ahalko diote, idatziz eta bilera jakin baterako, Gizarte Kontseiluko beste kide bati; eskuordetzea orokorra izan daiteke edo eguneko gai zerrendako puntu bakoitzeko botoa adierazita. Antolaketaren eta Funtzionamenduaren Erregelamenduak ezarriko ditu eskuordetzerako baldintzak eta gehieneko kopurua.

3. Gizarte Kontseiluko kideek, Kontseiluko buruaren bitartez, bere eginkizunak betetzeko beharrezkotzat jotzen duten informazioa eta laguntza eskatu ahal dizkiete Nafarroako Unibertsitate Publikoko organoei.

12. artikulua. Agintaldia.

1. Gizarte Kontseiluko kideak lau urterako izendatu ahal izanen dira, eta jarraian beste behin baizik ez dira hautatu ahal. Arau horretatik kanpo daude berezko kideak.

2. Gizarte Kontseiluko kideek egoera hauetan utziko dute kargua:

a) Agintaldia amaitzean.

b) Ukoagatik edo heriotzagatik.

c) Karguari dagozkion eginbeharrak ez betetzeagatik, artikulu honen zazpigarren idatz-zatian aurreikusitakoaren arabera.

d) Bateraezintasunagatik, foru lege honen 14. artikuluan aurreikusitakoaren arabera.

e) Ordezkaritza bertan behera uzteagatik.

f) Nafarroako Unibertsitate Publikoko Gizarte Kontseiluko kidea izateko behar den izaera edo kargua galtzeagatik.

3. Agintaldia amaituta, Gizarte Kontseiluan interes sozialak ordezkatzeko aukeratutako kideek jardunean jarraituko dute kide berriek jabetza hartu arte.

4. Nafarroako Unibertsitate Publikoko Estatutuek arautuko dute Nafarroako Unibertsitate Publikoko Gobernu Kontseiluak Gizarte Kon- tseilurako izendatutako kideak hautatu eta ordezkatzeko prozedura.

5. Gizarte Kontseiluko berezko kideek kide izatea eragiten duen izaera galtzen dutenean utziko dute kargua.

6. Agintaldia bukatu baino lehen Gizarte Kontseiluko kideren baten tokia hutsik geldituz gero, foru lege honen 9. artikuluan ezarritako prozeduraren bidez beteko da, hiru hilabeteko epean gehienez, eta foru lege honen 9. eta 10. artikuluekin bat. Kide berria aurreko titularrak bete gabe daukan agintaldirako izendatuko da.

7. Gizarte Kontseiluak prozedura bat ezarriko du bere Antolaketaren eta Funtzionamenduaren Erregelamenduan, kideren batek bere eginbeharrak betetzen ez dituenean izendatu zuen organoari hura ordezteko proposamen arrazoitua egiteko.

13. artikulua. Eginbeharrak.

Gizarte Kontseiluko kideek eginbehar hauek dituzte:

a) Osoko Bilkuretara eta, zer batzordetako kide diren, horien bilkuretara ere joatea.

b) Karguak direla-eta beren esku utzitako zeregin guztiak betetzea.

c) Barneko eztabaiden gaineko isilpekotasuna eta konfidentzialtasuna gordetzea, bai eta espresuki isilpekotzat jotzen diren gai eta jarduketenak ere.

d) Bateraezintasunari buruzko arauak betetzea, foru lege honekin bat haiengan eragina izan dezaketenak, eta Gizarte Kontseiluko buruari jakinaraztea bateraezintasuna ekar dezakeen inguruabar oro, bai hasieratik izandakoak bai ondoren gertatutakoak.

e) Antolaketaren eta Funtzionamenduaren Erregelamenduan ezartzen diren beste guztiak.

14. artikulua. Bateraezintasunak.

1. Nafarroako Unibertsitate Publikoko Gizarte Kontseiluko kideek ezin dute Unibertsitatearekin lanak, zerbitzuak edo hornidurak kontratatzen dituzten enpresa edo sozietateetako zuzendaritza kargurik bete, ez berez ez tarteko pertsona baten bidez. Bestalde, ezin dute enpresa edo sozietate horien kapitalean 100eko 10 baino gehiagoko partaidetzarik izan. Bateraezintasun horrek ez die eragiten Unibertsitateei buruzko abenduaren 21eko 6/2001 Lege Organikoaren 83. artikuluko 1. eta 2. idatz-zatiekin bat izenpetutako kontratuei.

2. Gizarte Kontseiluan interes sozialak ordezkatzen dituzten kideak ezin dira unibertsitateko komunitateko kideak izan.

IV. KAPITULUA

Funtzionamendua

15. artikulua. Egitura organikoa.

Hau da Gizarte Kontseiluaren egitura:

a) Osoko Bilkura, Batzorde Iraunkorra, eta Antolaketaren eta Funtzionamenduaren Erregelamenduak ezartzen dituen batzordeak edo Osoko Bilkuraren erabakiz eratutakoak.

b) Kontseiluko burua, idazkaria eta buruordeak, Gizarte Kontseiluko Antolaketaren eta Funtzionamenduaren Erregelamenduak xedatzen duenarekin bat.

16. artikulua. Osoko Bilkura.

Nafarroako Unibertsitate Publikoko Gizarte Kontseiluaren Osoko Bilkura kontseiluko buruak eta kideek osatzen dute, eta haren eginkizuna da foru lege honen 4. artikuluan aipatutako eskumenei buruzko erabakiak hartzea, deusetan ukatu gabe Gizarte Kontseiluaren gainerako organoei erregelamendu bidez esleitzen zaizkien eginkizunak.

17. artikulua. Batzorde Iraunkorra.

1. Nafarroako Unibertsitate Publikoko Gizarte Kontseiluak batzorde iraunkor bat izanen du, Antolaketaren eta Funtzionamenduaren Erregelamenduan ezarritakoari jarraikiz izendatua.

2. Nafarroako Unibertsitate Publikoko Gizarte Kontseiluaren Batzorde Iraunkorraren zeregina da Osoko Bilkuraren eginkizunak bere gain hartzea osoko bilkuren arteko aldian, Antolaketaren eta Funtzionamenduaren Erregelamenduan ezartzen diren arauekin bat.

18. artikulua. Batzordeak.

1. Nafarroako Unibertsitate Publikoko Gizarte Kontseiluak Osoko Bilkuraren eta batzordeen bidez beteko ditu bere eginkizunak. Batzordeen eginkizunak izanen dira beren gain utzitako gaiei buruzko erabakiak aztertu, eztabaidatu eta Osoko Bilkurari proposatzea eta, hala behar denean, erabakiak hartzea Osoko Bilkurak eskuordetuta.

2. Nafarroako Unibertsitate Publikoko Gizarte Kontseiluak ikasketa batzorde bat, ekonomia eta finantza batzorde bat eta gizartearekiko harremanetarako batzorde bat izanen ditu, gutxienez.

a) Ikasketa Batzordeak Nafarroako Unibertsitate Publikoaren jarduera zientifiko eta akademikoaren inguruko gaiei buruzko erabakiak aztertu, eztabaidatu eta proposatuko dizkio Osoko Bilkurari.

b) Ekonomia eta Finantza Batzordeak Unibertsitatearen afera ekonomikoen eta finantzabideen arloko gaiei buruzko erabakiak aztertu, eztabaidatu eta proposatuko dizkio Osoko Bilkurari.

c) Gizartearekiko Harremanetarako Batzordeak ingurune sozialarekiko harremanei dagozkien gaiei buruzko erabakiak aztertu, eztabaidatu eta proposatuko dizkio Osoko Bilkurari.

19. artikulua. Kontseiluko burua.

1. Nafarroako Unibertsitate Publikoaren Gizarte Kontseiluko burua Nafarroako Gobernuak izendatuko du interes sozialak ordezkatzen dituzten kideen artean, Nafarroako Unibertsitate Publikoaren Gizarte Kontseiluko kideen gehiengoak proposaturik.

2. Kontseiluko buruaren agintaldia lau urtekoa izanen da, eta beste agintaldi bakar baterako aukeratu ahal izanen da.

3. Kontseiluko burua Nafarroako Unibertsitate Publikoaren Gizarte Kontseiluaren ordezkari gorena izanen da.

4. Kontseiluko buruaren eskumena da Nafarroako Unibertsitate Publikoaren Gizarte Kontseiluaren bilkuretarako dei egin eta bertan buru gisa aritzea, erabakiak eta legeria indarduna betetzen direla begiratzea, eta Antolaketaren eta Funtzionamendu Erregelamenduak ematen dizkion gainerako eginkizun guztiak.

20. artikulua. Kontseiluko buruordea.

Gizarte Kontseiluko buruak buruorde bat edo bi izendatu ahalko ditu, lehentasunezko ordenan, Gizarte Kontseiluan interes sozialak ordezkatzen dituzten kideen artean. Kontseiluko buruordea buruaren ordez arituko da, kargua hutsik dagoenean, betetzen duena hiltzen bada, bertan ez badago edo uko egiten badio karguari.

21. artikulua. Idazkaria.

1. Nafarroako Unibertsitate Publikoko Gizarte Kontseiluko lehendakariak izendatuko du idazkari bat. Izendatua Nafarroako Unibertsitate Publikoko Gizarte Kontseiluko kidea ez den bat izan ahalko da, eta kasu horretan hizpidearekin bai baina botorik gabe ariko da bilkuretan. Idazkariak ez du ikasketa nahiz ikerketa arloko eginkizunik izanen Unibertsitatean.

2. Idazkariak ondoko eginkizun hauek izanen ditu: kontseiluko buruari laguntza ematea Nafarroako Unibertsitate Publikoko Gizarte Kontseiluaren aferetan, kide anitzeko organoen idazkaritzako eginkizunak betetzea, eta Antolaketaren eta Funtzionamenduaren Erregelamenduak esleitzen dizkion gainerakoak.

22. artikulua. Lansariak eta kalte-ordainak.

1. Nafarroako Unibertsitate Publikoko Gizarte Kontseiluko buruak eta idazkariak Nafarroako Unibertsitate Publikoko Gizarte Kontseiluak finkatzen dituen ordainsariak jasoko dituzte, kargu horietarako ezarritako dedikazio mailaren arabera.

2. Nafarroako Unibertsitate Publikoko Gizarte Kontseiluko gainerako kideek, beren eginkizunetan aritzeagatik, Nafarroako Unibertsitate Publikoko Gizarte Kontseiluak dieta eta joan-etorrietarako ezartzen dituen ordainak kobratuko dituzte.

23. artikulua. Antolaketaren eta Funtzionamenduaren Erregelamendua.

1. Nafarroako Unibertsitate Publikoko Gizarte Kontseiluak bere Antolaketaren eta Funtzionamenduaren Erregelamendua egin eta Nafarroako Gobernuari igorriko dio, onets dezan.

2. Erregelamendu horretan Osoko Bilkuraren bilera ohikoak egiteko maiztasuna finkatuko da, bai eta deialdiak egin, bilerak eratu eta erabakiak hartzeko baldintzak ere.

3. Foru lege honen 5., 6., 7. eta 8. artikuluetan ezartzen diren onespenak egiteko erabakiak hartzeko erabateko gehiengoa beharko da, ezertan ukatu gabe Antolaketaren eta Funtzionamenduaren Erregelamenduan horri buruz aurreikusten dena.

24. artikulua. Erabakiak betearazi eta argitaratzea.

1. Unibertsitateko errektoreari dagokio Gizarte Kontseiluak hartutako erabakiak betearaztea. Horretarako, hartutako erabakien egiaztagiria igorriko du idazkariak Errektoregora.

2. Errektoreak aginduko du Nafarroako ALDIZKARI OFIZIALean argitara eman daitezen araudi indardunaren arabera publizitatea behar duten erabakiak, bai eta beste batzuk ere, Gizarte Kontseiluaren beraren iritziz argitaratzea komeni denean.

25. artikulua. Araubide juridiko-administratiboa.

Nafarroako Unibertsitate Publikoko Gizarte Kontseiluaren Osoko Bilkuraren erabakiek eta, Osoko Bilkurak eskuordeturik, batzordeek hartutakoek amaiera ematen diote bide administratiboari, eta zuzenean administrazioarekiko auzien jurisdikzioan aurkatu behar dira, ezertan ukatu gabe aurretiko administrazio errekurtsoak, Herri administrazioen araubide juridikoari eta administrazio prozedura erkideari buruzko azaroaren 26ko 30/1992 Legeak ezarri bezala.

26. artikulua. Aurrekontua eta langileak.

1. Nafarroako Unibertsitate Publikoko Gizarte Kontseiluak bere aurrekontuaren proiektua eginen du; gero, Unibertsitatearen aurrekontuan sartuko da, Nafarroako Gobernuaren eta Unibertsitatearen arteko finantzaketa hitzarmenean ezarritakoaren barruan.

2. Nafarroako Unibertsitate Publikoko Gizarte Kontseiluak foru lege honek esleitzen dizkion eginkizunak betetzeko behar diren langileak izanen ditu; horretarako, antolaketa autonomoa izanen du eta beharko duen langile kopurua proposatuko du. Halere, Gizarte Kontseilua ahaleginduko da Nafarroako Unibertsitate Publikoak dituen langileez baliatzen.

Xedapen iragankor bakarra.-Behin-behineko araubidea.

1. Nafarroako Unibertsitate Publikoko Gizarte Kontseilua foru lege honek indarra hartu eta hiru hilabeteko epean, gehienez, eratuko da.

2. Foru lege honek indarra hartu baino lehen eratutako Nafarroako Unibertsitate Publikoko Gizarte Kontseiluak jardunean jarraituko du eta arau honek ematen dizkion eskumenak beteko ditu, kontseilu berria eratu arte.

Xedapen indargabetzaile bakarra.-Arauak indargabetzea.

Indarrik gabe geldituko da Nafarroako Unibertsitate Publikoko Gizarte Kontseiluari buruzko abenduaren 9ko 20/1994 Foru Legea, bai eta foru lege honetan xedatutakoaren kontrakoak diren maila bereko edo apalagoko xedapen guztiak.

Azken xedapenetan lehenbizikoa.-Antolaketaren eta Funtzionamenduaren Erregelamendua.

Nafarroako Unibertsitate Publikoko Gizarte Kontseiluak bere Antolaketaren eta Funtzionamenduaren Erregelamendua eginen du eratu eta hiru hilabetera, gehienez ere. Erregelamenduak Nafarroako Gobernuaren onespena beharko du eta indarra hartuko du Nafarroako ALDIZKARI OFIZIALean argitaratu ondoren.

Azken xedapenetan bigarrena.-Arau garapena.

Nafarroako Gobernuari baimena ematen zaio foru lege hau betearazi eta aplikatzeko behar diren xedapen guztiak eman ditzan.

Azken xedapenetan hirugarrena.-Indarra hartzea.

Foru lege honek Nafarroako ALDIZKARI OFIZIALean argitaratu eta biharamunean hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako ALDIZKARI OFIZIALean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2008ko uztailaren 2an.-Nafarroako Gobernuko lehendakaria, Miguel Sanz Sesma.