22009forulegea,

2/2009 FORU LEGEA, martxoaren 20koa, Sesmako Udalaren herrilurreko 135.738,22 metro koadroren onura publikoa deklaratu eta haien desafektazioa onesten duena.

NAFARROAKO GOBERNUKO LEHENDAKARIA NAIZEN HONEK

Aditzera ematen dut Nafarroako Parlamentuak onetsi duela honako

FORU LEGEA, SESMAKO UDALAREN HERRILURREKO 135.738,22 METRO KOADROREN ONURA PUBLIKOA DEKLARATU ETA HAIEN DESAFEKTAZIOA ONESTEN DUENA.

ZIOEN AZALPENA

Sesmako Udalak herrilurreko 135.738,22 metro koadroren onura publikoa deklaratu eta desafektatzea eskatu du, ondoren 43.274,82 metro koadrorekin trukatzeko, Sesmako industrialdea handitu ahal izateko, "El Juncalillo" izeneko alderdian.

Sesman industria lurzorurako dagoen eskaerari erantzutea da xedea. Herriko egungo industrialdean erabilgarri dagoen lurzorua ez da aski zenbait enpresak eskatu dutenari erantzuteko.

Sesmako egungo industrialdea handitzeak berarekin ekarriko du gutxienez 84 lanpostu berri sortzea eta lehendik dauden beste 440 lanpostutik gora sendotzea.

Nafarroako Toki Administrazioari buruzko uztailaren 2ko 6/1990 Foru Legearen 140. artikuluko 5. idatz-zatian xedaturikoaren arabera, Sesmako Udalak desafektatzeko asmoa duen eremuak lurzati txikiaren mugak gainditzen dituenez, foru lege bidez onetsi behar da.

1. artikulua. Onura publikoaren deklarazioa.

Sesmako Udalaren herrilurreko 135.738,22 metro koadroren onura publikoa deklaratu eta haien desafektazioa onesten da. Eremu hori Sesmako katastroko lurzati hauei dagokie: 72.000 metro koadro 5. poligonoko 130. lurzatikoak dira; 36.509 metro koadro 6. poligonoko 84. lurzatikoak; 27.229,22 metro koadro 5. poligonoko 108. lurzatikoak.

Lur horiek foru lege honen 2. artikuluko baldintzetan trukatu arte herri ondasuntzat joko dira.

2. artikulua. Zuzenean trukatzeko baimena.

Sesmako Udalari baimena ematen zaio aurreko artikuluan aipatutako lurrak ondoko lur hauekin trukatzeko: 24.000 metro koadro, 4. poligonoko 625. lurzatiaren zati batekoak; 12.169,82 metro koadro 4. poligonoko 163. lurzatikoak, eta 7.105 metro koadro, 4. poligonoko 161. lurzatiaren zati batekoak. Trukearen helburua da El Juncalilloko industrialdea handitzea, dauden enpresak zabaltzeko eta berriak ezartzeko industria lurzoruaren eskaerari erantzuteko. Baimena ondoko baldintza hauen menpean egonen da:

a) Trukea egiteko itunaren klausula batek xedatu dezala lurrak herri ondarera itzuliko direla baldin eta desafektatzera bultzatu zuten xedeak edo desafektazioaren baldintzak, udalak onetsitako baldintza-agirian jasotakoak, desagertu edo bete gabe uzten badira.

b) Itzulketa klausula hori jaso dadila kontratuak formalizatzeko Jabetza Erregistroan inskribatzen diren agiri publikoetan, Sesmako Udalak 2008ko martxoaren 31n onetsitako baldintza-agirian agertzen den bezala.

c) Sesmako Udalak herrilurreko 135.738,22 metro koadro desafektatzeko 2008ko martxoaren 31n onetsi zuen baldintza-agirian adierazitako baldintzak bete daitezela. Eremu hori Sesmako katastroko lurzati hauei dagokie: 72.000 metro koadro 5. poligonoko 130. lurzatikoak dira; 36.509 metro koadro 6. poligonoko 84. lurzatikoak; 27.229,22 metro koadro 5. poligonoko 108. lurzatikoak.

d) Toki entitatearen herri ondarea poliki-poliki murriztu ez dadin, Sesmako Udalak lurrak eros ditzala, 51.000 metro koadro hain zuzen, eta herri ondasunen kalifikazio juridikoa eman diezaiela.

e) Erosi beharreko herrilur berri horiek hautatu aurretik, Landa Garapeneko eta Ingurumeneko Departamentuko Herrilurren Atalaren onespena beharko da.

Azken xedapenetako lehena.-Aplikazio eta garapenerako xedapenak

Nafarroako Gobernuari ahalmena ematen zaio foru lege hau aplikatu eta garatzeko behar diren xedapen guztiak eman ditzan.

Azken xedapenetako bigarrena.-Indarra hartzea.

Foru lege honek Nafarroako Aldizkari Ofizialean argitaratu eta biharamunean hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari ofizialean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2009ko martxoaren 20an.-Nafarroako Gobernuko lehendakaria, Miguel Sanz Sesma.