202008forulegea,

20/2008 FORU LEGEA, azaroaren 20koa, Farmazia Laguntzari buruzko azaroaren 16ko 12/2000 Foru Legea aldatzen duena.

NAO: 146. ALDIZKARIA - 2008ko abenduaren 1a

NAFARROAKO GOBERNUKO LEHENDAKARIA NAIZEN HONEK

Aditzera ematen dut Nafarroako Parlamentuak onetsi duela honako

FORU LEGEA, FARMAZIA LAGUNTZARI BURUZKO AZAROAREN 16KO 12/2000 FORU LEGEA ALDATZEN DUENA

ZIOEN AZALPENA

Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoko 53.1 artikuluak ezartzen du Nafarroari, barne osasun eta higiene alorretan, gaur egun dituen ahalmenak eta eskumenak dagozkiola eta, gainera, Estatuko oinarrizko legeria lege bidez garatzea eta betearaztea. Era berean, 58.1.g) artikuluak ezartzen du Nafarroako Foru Komunitateari dagokiola Estatuko legeria betearaztea farmazia establezimenduen eta produktuen arloan.

Farmazia laguntzari dagokionez, uztailaren 26ko 29/2006 Legeak, hau da, Medikamentuen eta Osasun Produktuen Bermeei eta Erabilera Arrazoizkoari buruzko Legeak, zeina Konstituzioaren 149.1.16) artikuluaren babesean eman baitzen, xedatzen du, 84. artikuluan hain zuzen, osasun arloko administrazioek antolatuko dituztela farmaziak, betiere planifikazio orokorraren irizpidea kontuan hartuta, farmazia zerbitzua egokia izan dadin. Halaber, farmazien antolaketari begira, aintzat hartu beharko dira osasun zerbitzu egokia bermatzeko ezartzen diren gutxieneko eskakizunak, eskakizun materialak, teknikoak nahiz baliabideen arlokoak.

Farmazia Laguntzari buruzko azaroaren 16ko 12/2000 Foru Legeak ezartzen du zenbat farmazia behar diren gutxienez oinarrizko osasun eskualde bakoitzean eta herri bakoitzean, Foru Komunitateko populazio osoak farmazia laguntza berdintasunez eskuratzea lortu ahal izateko; ezartzen diren gutxienekoak bete gabe ezin izanen da farmazia berririk ireki Nafarroako Foru Komunitateko lurraldean.

Farmazia Laguntzari buruzko azaroaren 16ko 12/2000 Foru Legearen ondorioz, Foru Komunitateak alde batera utzi zuen ordura arteko erregulazio sistema, eta malgutasun planifikatuan oinarritutako ereduaren alde egin zuen. Oraingo sistemak farmazia berriak irekitzeko bide eman du, farmazialarien borondatearen eta interesaren arabera, farmazia berria irekitzeko bi baldintza baizik ez dagoelako: haien arteko distantzia, 150 metrokoa gutxienez, eta Nafarroa osoan ezarritako farmazien kopurua, osotara, 700 biztanleko bat izan beharko baita, gehienez ere.

Farmazia zerbitzua kalitatezkoa izan dadin, beharrezkoa da oreka lortzea zerbitzuaz baliatzeko aukera berdintasunaren - beraz, farmazien kopuru egokia izatea- eta haien errentagarritasun ekonomikoaren artean, medikamentuen hornidura behar adinakoa dela ziurtatzeko, aurrebaldintza hori, besteak beste, betetzen dela bermatu behar baita farmaziaren arloko planifikazioan.

Egun, zenbait herritan, irekitako farmazia bakoitzeko biztanle ratioa 700dik beherakoa da. Kasu horietan, arazoak egon daitezke populazioak medikamentuak eta osasun produktuak modu egokian eskura izateko.

Horrenbestez, komenigarria dirudi, farmazia laguntzaren kalitatea ziurtatze aldera, herri bakoitzeko farmazia kopurua mugatzea, farmazia bakoitzaren balizko bezeroen gutxieneko proportzioa 700 biztanlekoa izan dadin eta, halatan, medikamentu, osasun produktu eta farmaziako bestelako produktuen hornidura behar bestekoa eduki dezan. Hori guztia dela eta, foru lege honek azaroaren 16ko 12/2000 Foru Legearen 27.2 artikulua aldatzen du. Horrela, Nafarroako farmazien gehieneko kopuruaren muga, arestian aipatutako 27.2 artikuluan aurreikusitakoa, desagertu, eta herri bakoitzeko farmazia kopuruaren muga ezartzen da.

Horrez gain, foru lege honek 35.2 artikulua aldatzen du, laguntza behar dutenentzako ehun plaza edo gehiagoko osasun eta gizarte zentroetan eman beharreko farmazia zerbitzuaren antolaketari dagokionez, foru lege horren beraren 5.2 artikuluan araututakoarekin bat etor dadin, agindu horrek debekatzen baitu hirugarrenek, entitateek edo enpresek irabazteko asmoarekin esku hartzea baimendutako establezimenduek herritarrei medikamentuak ematean.

Era berean, zehapen araubideari dagokionez, foru lege honek hiru aldaketa egin ditu. Arau-hauste larriak jasotzen dituen 47.4 artikuluan beste arau-hauste bat gehitu da, farmazia laguntza jarraituarekin lotutako betebeharrak ez betetzea alegia.

48.1 artikulua ere aldatu da, Estatuko legera egiten zen igorpena kendu eta arau-hauste arin, larri eta oso larrietarako aurreikusitako gradu bakoitzeko -txikiena, ertaina, altuena- zenbateko berriak ezartzeko.

Azkenik, eta zehapen prozedurari dagokionez, 49. artikulua aldatu da, berariazko prozedurarik ezean aplikatu beharrezko ordezko prozedura Nafarroako Foru Komunitateko Administrazioari buruzko abenduaren 3ko 15/2004 Foru Legearen V. tituluan aurreikusitakoa izan dadin ezartzeko.

Artikulu bakarra.-Farmazia Laguntzari buruzko azaroaren 16ko 12/2000 Foru Legea aldatzea.

Farmazia Laguntzari buruzko azaroaren 16ko 12/2000 Foru Legearen 27.2, 35.2, 47.4, 48.1 eta 49. artikuluak aldatu dira.

Bat. Hauxe izanen da 27.2. artikuluaren testua:

"27.2 artikulua. Nafarroako herri bakoitzean, gehienez ere, farmazia bat egonen da irekita 700 biztanleko. Behin kopuru horretara iritsita, bigarren farmazia irekitzeko baimena eman ahal izanen da populazioa 1.400 biztanlekoa edo gehiagokoa denean, eta, hortik aurrera, 700 biztanleko tarte bakoitzeko. Nolanahi ere, farmazia bat irekitzeko baimena herri guztietan eman ahal izanen da, 700 biztanle baino gutxiago izanik ere.

Herri bakoitzeko biztanle kopurua zehazteko, farmazia irekitzeko eskaera egiten den egunean indarrean den udal erroldak adierazten duena hartuko da".

Bi. 35.2 artikuluaren testua hauxe izanen da aurrerantzean:

"35.2 artikulua. Aurreko idatz-zatian finkatu den eginbeharra gorabehera, b) letrari dagokionez, gizarte eta osasun zentroek zilegi izanen dute farmazia zerbitzua nola eman finkatzea zentroaren ezaugarrientzat egokiena den moduan, dela zentro bakoitzerako farmazia zerbitzu berezien bidez dela modu bateratuan zenbait zentrotarako".

Hiru. Beste arau-hauste bat gehituko da 47. artikuluko 4. idatz-zatian, z) letrarekin. Hauxe da testua:

"z) Farmazia laguntza jarraituarekin lotutako betebeharrak ez betetzea".

Lau. 48.1 artikuluaren testua hauxe izanen da aurrerantzean:

"48.1 artikulua. Foru lege honen 47. artikuluan aurreikusten diren arau-hausteen kasuan, bertan araututako establezimenduei badagozkie, zehapenak artikulu honetan xedatutakoari jarraikiz ezarriko dira, kasuan kasuko graduak -txikiena, ertaina, altuena- aplikatuz arau-hauste maila bakoitzari, honako hauek kontuan harturik: zabarkeria, intentzionalitatea, norainokoa izan den ados jartzea, iruzurra, aurretiko ohartarazpenak bete ez izana, entitatearen negozioen zenbatekoa, eragindako kaltea, zenbat pertsonarengan duen eragina, arau-hausteak egileari ekarritako onura eta sortutako arriskuen izaera, iraunkorra edo aldi baterakoa:

a) Arau-hauste arinak:

Gradu txikiena: 600 euro arte.

Gradu ertaina: 601 eurotik 1.200 bitarte.

Gradu altuena: 1.201 eurotik 3.000 bitarte.

b) Arau-hauste larriak:

Gradu txikiena: 3.001 eurotik 7.000 bitarte.

Gradu ertaina: 7.001 eurotik 11.000 bitarte.

Gradu altuena: 11.001 eurotik 15.000 bitarte, eta zilegi izanen da kopuru hori gainditzea arau-haustean izan diren produktu edo zerbitzuek balio dutenaren halako bosteraino.

c) Arau-hauste oso larriak:

Gradu txikiena: 15.001 eurotik 210.000 bitarte.

Gradu ertaina: 210.001 eurotik 405.000 bitarte.

Gradu altuena: 405.001 eurotik 600.000 bitarte, eta zilegi izanen da kopuru hori gainditzea arau-haustean izan diren produktu edo zerbitzuek balio dutenaren halako bosteraino".

Bost. Hauxe izanen da 49. artikuluaren testua:

"Osasun Departamentuko organo eskudunak hasiko du zehatzeko espedientea, eta urtarrilaren 22ko 48/1996 Foru Dekretuan araututakoari jarraikiz tramitatuko da, horren bidez onetsi baitzen osasun arloko arau-hausteak zehatzeko prozedura. Prozedura horren instrukzioa egin ondoren zehatuko dira administrazio arau-hausteak. Prozedurari buruzko berariazko araudirik egon ezean, espediente hauei Nafarroako Foru Komunitateko Administrazioari buruzko abenduaren 3ko 15/2004 Foru Legearen V. tituluan jasotako arauak aplikatuko zaizkie."

Xedapen gehigarri bakarra.-Beste arau batzuetara eginiko igorpenak.

Azaroaren 16ko 12/2000 Foru Legeak Medikamentuari buruzko abenduaren 20ko 25/1990 Legearen arauetara igortzen duen aldiro, ulertu behar da Medikamentuen eta Osasun Produktuen Bermeei eta Erabilera Arrazoizkoari buruzko uztailaren 26ko 29/2006 Legearen kasuan kasuko artikuluetara igortzen duela.

Xedapen indargabetzaile bakarra.-Indargabetzen diren xedapenak.

Foru lege honetan xedatutakoari aurka egiten dioten maila bereko edo txikiagoko xedapen guztiak indarrik gabe geratu dira.

Azken xedapen bakarra.-Indarra hartzea.

Foru lege honek Nafarroako ALDIZKARI OFIZIALean argitaratu eta biharamunean hartuko du indarra.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako ALDIZKARI OFIZIALean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2008ko azaroaren 20an.-Nafarroako Gobernuko lehendakaria, Miguel Sanz Sesma.