20/2011 Errege Lege Dekretua, defizit publikoa zuzentzeko aurrekontu, zerga eta finantza arloko premiazko neurriei buruzkoa

Itzultzaile Zerbitzu Ofiziala

EAO: 20/2011Errege Lege Dekretua, abenduaren 30ekoa, defizit publikoa zuzentzekoaurrekontu, zerga eta finantza arloko premiazko neurriei buruzkoa

EAO: Hutsen zuzenketa

BOE: Real Decreto-ley 20/2011, de 30 de diciembre, de medidas urgentes en materia presupuestaria, tributaria y financiera para la corrección del déficit público (ES)

atzera

hasierako orrira

20/2011 Errege Lege Dekretua, abenduaren 30ekoa, defizit publikoa zuzentzeko aurrekontu, zerga eta finantza arloko premiazko neurriei buruzkoa.

HITZAURREA

Aurreikuspenen arabera, herri‑administrazio guztietan aldaketa handiak izango dituenez 2011ko ekitaldiko aurrekontu‑saldoak, premiazko neurriak hartu beharrean da Gobernua, agindutako egonkortasun‑helburua betetzeko.

Lehen neurri hauek sarrera publikoei zein gastuei eragingo diete, eta barne‑produktu gordinaren ehuneko puntu batean baino gehiagoan murriztuko du, berehalakoan gainera, aurrekontuko desoreka. Ekintza hauen bidez, Espainiako sektore publikoak oreka berreskuratzeko bideari ekingo diola bermatu nahi da, zor eta defizit publikoen etorkizuneko bilakaerari sinesgarritasuna emateko.

Zuzenketa hori egin ezean, ezinezkoa izango litzateke jarduera ekonomikoari egoki garatzea oztopatzen dion egungo likidezia‑urritasuna gainditzea. Zuzenketaren bidez abiaraziko den finkapen fiskala Estatuko 2012ko Aurrekontu Orokorren lege‑proiektuan zehaztuko da behin betiko.

Halaber, Diputatuen Kongresua eta Senatua desegiteko eta hauteskundeak deitzeko irailaren 26ko 1329/2011 Errege Dekretuak, irailaren 27ko Estatuko Aldizkari Ofizialean argitaratutakoak, bi ganberak desegitea agintzen zuen, eta hauteskunde orokorrak 2011ko azaroaren 20rako deitzea. Hori dela‑eta, oraingoz ez da onartu Estatuko 2012ko Aurrekontu Orokorren Legea.

Konstituzioaren 134.4 artikuluak dioenez, «Aurrekontuen Legea kasuan kasuko ekitaldi ekonomikoaren lehen egunerako onesten ez bada, ulertuko da aurreko ekitaldiko aurrekontuak zuzenean luzatu direla, berriak onetsi arte». Manu hori aurrekontuei buruzko azaroaren 26ko 47/2003 Legearen 38. artikuluak garatu du; bertan xedatutakoaren arabera, aurrekontu berriak onetsi arte, luzatu egingo dira aurrekoak, eta «luzapenak ez du eraginik izango luzatutako aurrekontuen ekitaldian bukatzen diren programa edo jardueren gastuetarako edo bertan bukatzen diren obligazioetarako kredituetan».

Hori aintzat hartuta, 2012ko urtarrilaren 1etik aurrera luzatuko da Estatuko 2011ko Aurrekontu Orokorren abenduaren 22ko 39/2010 Legea, 2011n bukatzen diren jardueretarako edo urte horretan bertan bukatutako obligazioetarako kredituak izan ezik.

Era berean, Estatuko Aurrekontu Orokorren Legeak urtebeteko indarraldia duen arren, luzapenak ez du eraginik izango bertan egon litezkeen indarraldi mugagabeko arauetan; arau horiek, beraz, indarrean jarraituko dute.

Bestalde, 2011ko ekitaldian emandako aurrekontu‑baimenek ez dute luzatutako kredituen edukian eragingo; izan ere, luzapenaren xedea ez da aurrekontua gauzatzea, ekitaldiko gasturako hasierako baimenak baizik, abenduaren 22ko 39/2010 Legean jasotakoak. Gauza bera esan liteke zorpetzeko baimenei dagokienez; hortaz, aipatutako legean ezarritako hasierakoak luzatu egin direla ulertu behar da.

Azkenik, Aurrekontuen Lege Orokorraren 38.3 artikuluak zehazten du luzatutako aurrekontuaren egitura organikoa egokitu egingo dela, zenbateko osoa aldatu gabe, aurrekontua gauzatu beharreko ekitaldian indarrean dagoen administrazio‑antolaketara.

Esparru juridiko horren barruan, Estatuko 2011ko Aurrekontu Orokorren Legea besterik gabe luzatzeak hainbat disfuntzio eragingo lituzke, zuzendu beharrekoak. Lehenik eta behin, Estatuko 2011ko Aurrekontu Orokorren Legeak defizit publikoa murrizteko aparteko neurriak hartzeari buruzko maiatzaren 20ko 8/2010 Errege Lege Dekretuak agindutako izozketara igortzen duelako hainbat arlotan (pentsio publikoak, adibidez); bada, Gobernu berriak espresuki arautu nahi du arlo hori, izoztea bertan behera uzteko.

Bigarrenik, segurtasun juridikoaren izenean, manu batzuk luzatzerik ez dagoelako; esate baterako, izaera materialeko lege batek urteko Estatuko Aurrekontu Orokorren Legera igortzen duenean. Manu horiek garrantzi berezia dutenez zerga‑arloan, espresuki arautu behar da gai hori, tazituki luzatu beharrean.

Azkenik, egoera ekonomikoa eta finantzarioa aintzat hartuta, defizit publikoan eta aurrekontu‑egonkortasunean eragina izan lezaketen gai batzuk ez liratekeelako luzatu behar; horrek, berebat, ondorioak izan bailitzake Espainiak defizit publikoa murrizteko Europar Batasunaren aurrean hartutako konpromisoetan.

Diputatuen Kongresua eta Senatua iazko abenduaren 13an eratu zirenez, ezinezkoa da Estatuko Aurrekontu Orokorren Legea aurtengo abenduaren 31 baino lehen onestea, urgentziazko prozeduraren bidez lege arrunta onartuta ere.

Konstituzioaren 86. artikuluak baimena ematen dio Gobernuari, aparteko kasuetan eta premiazko beharra dagoenean, dekretu‑lege formako behin‑behineko lege‑xedapenak emateko. Bada, arestian adierazitako argudioetan, aski justifikatuta gelditu da xedapen horien beharra.

Errege lege‑dekretu honen egiturak Estatuko aurrekontu orokorren legeek izan ohi dutenari jarraitu nahi dio; halere, bolumenari dagokionez aldea dagoenez, tituluen ordez kapituluak ditu, eta ohiko titulu guztiek ez dute dagokien kapitulua, honako hauek baino ez baitaude: «Luzatutako aurrekontu‑kredituak», «Langile‑gastuak», «Pentsioak eta laguntza publikoak», «Zerga‑arauak»; «Lurralde‑erakundeak», eta azkenik, «Kotizazio sozialak». Baditu xedapen gehigarriak, indargabetzaileak eta azken xedapenak ere.

«Luzatutako aurrekontu‑kredituak» izeneko I. kapituluak xedatzen du kredituen sailkapen organikoa egun horretan indarrean dagoen administrazioko egiturara egokitzeko beharrezko diren aurrekontu‑ eta egitura‑aldaketak luzatutako kredituetan erantsita geldituko direla, 2012ko urtarrilaren 1etik aurrera.

«Langile‑gastuak» izeneko II. kapituluari dagokionez, sektore publikoko langileen eta goi‑kargudunen lansariak bere horretan utzi ditu. Era berean, lan‑eskaintza publikoa izoztea erabaki du, artikuluan bertan jasotako salbuespenak salbuespen. Azkenik, 2012ko urtarrilaren 1etik aurrera, Estatuko sektore publiko osoan, ohiko lanaldia ez da, batez beste, astean 37 ordu eta 30 minutu baino gutxiagokoa izango.

«Pentsioak eta laguntza publikoak» izeneko III. kapituluari dagokionez, Estatuko 2011ko Aurrekontu Orokorren Legeak maiatzaren 20ko 8/2010 errege lege dekretuan xedatutako izozketara igortzen du, lehen esan bezala –azken arau horrek defizit publikoa murrizteko aparteko neurriak biltzen ditu–. Aipatutako Lege Dekretuko 4. artikuluak bertan behera uzten du, 2011ko ekitaldirako, Gizarte Segurantzako Lege Orokorraren 48. artikuluko 1.1 eta 1.2 paragrafoetan aurreikusitakoa aplikatzea, salbu eta Gizarte Segurantzako Sistemaren gutxieneko pentsioak, SOVI iraungiaren pentsioak –aldi berekoak ez badira– eta kotizazio gabeko pentsioak. Izozte horrek eragina du klase pasiboen pentsioetan ere, 4. artikuluaren bigarren paragrafoan xedatutakoaren arabera.

Gobernu berriak ehuneko bat eguneratu nahi ditu pentsioak; hortaz, espresuki jaso behar da erregulazio hori, eta ez Estatuko 2011ko Aurrekontu Orokorren Legearen luzapen hutsera joz.

«Zerga‑arauak» erregulatzen dituen IV. kapituluak hiru manu jasotzen ditu: bat, sozietateen gaineko zergaren ordainketa zatikatuari buruzkoa; beste bat, ondasun higiezinen gaineko zergari buruzkoa; eta, hirugarrena, jabari publiko irrati‑elektrikoaren tasari buruzkoa. Sozietateen gaineko Zergaren Legearen testu bateginaren 45.4 artikuluak adierazten duenaren arabera –martxoaren 5eko 4/2004 Legegintzako Errege Dekretuak onartu zuen testu bategina–, ordainketa zatikatuaren zenbatekoa aurreko bi paragrafoetan aurreikusitako oinarriei Estatuko Aurrekontu Orokorren Legean finkatutako ehunekoa aplikatzetik aterako da. Kontuan hartu behar dira, bestalde, abuztuaren 19ko 9/2011 Errege Lege Dekretuak ordainketa zatikatuen arloan egindako aldaketak. Arau hori osasun‑sistema nazionalaren kalitatea eta kohesioa hobetzeko, zerga‑finkapena laguntzeko eta 2011rako Estatuko abalen gehieneko zenbatekoa handitzeko neurriei buruzkoa da.

Halaber, tokiko ogasunei dagokienez, bermatu behar da tokiko korporazioen finantza‑egoera ez dela eragozpen izango aurrekontu‑arloko helburu nagusia lortzeko; hots, 2011‑2014rako Egonkortasun Programan aurreikusitakoari jarraiki, Espainiako Erresumako defizit publikoa murriztea.

Helburu horrekin, hain zuzen, 8. artikuluak, aldi baterako eta salbuespen gisa, 2012ko eta 2013ko ekitaldietan hiriko higiezinetan ondasun higiezinen gaineko zergaren zerga‑tasa handitzea aurreikusten du; tasa horrek udalerriko guztizko balioen txostena indarrean sartu den urtea hartzen du kontuan.

Era horretan, 2002a baino lehenagoko txostenetarako, gehikuntza 100eko 10ekoa izango da (100eko 0,5eko gutxieneko tasa 2012an, eta 100eko 0,6koa 2013an); izan ere, kasu horietan ez da oinarri likidagarria handitu, hamar ekitaldi baino gehiago igaro direlako aipatutako txostena indarrean sartu zenetik. 2002 eta 2004 bitartean onartutako txostenak dituzten udalerrietan, berriz, gehikuntza 100eko 6koa izango da (eta 100eko 0,5ekoa gutxieneko tasa), eta 2008 eta 2011 bitartean onartutakoetan, azkenik, 100eko 4ko gehikuntza egongo da.

Hala ere, zerga‑tasaren gehikuntza iragankor hori ez da aplikatuko bizitegiko higiezinetan, baldin eta 2002an edo ondorengo urte batean onartutako guztizko balioen txostena aplikagarri bazaie, eta udalerrian ezaugarri horiek dituzten higiezinetatik katastro‑balio txikiena dutenen artean badaude; halaber, ez zaie aplikatuko 2005 eta 2007 bitartean onartutako txostenak dituzten udalerriei, merkatu‑balioak oso handiak zirenean egin zituztelako.

Azkenik, telekomunikazioei buruzko azaroaren 3ko 32/2003 Lege Orokorraren I. eranskinaren 3. paragrafoak xedatzen du tasaren zenbatekoa kalkulatzeko beharrezko parametroen zenbatekoa Estatuko Aurrekontu Orokorren Legearen bidez erabakiko dela.

V. kapituluak lurralde‑erakundeak arautzen ditu, eta bereizi egiten ditu toki‑erakundeak eta autonomia‑erkidegoak. Defizit publikoa murrizteko aparteko neurriak hartzeko maiatzaren 20ko 8/2010 Errege Lege Dekretuaren 14. artikuluaren bigarren paragrafoaren bidez, toki‑erakundeen zorpetze‑eragiketetan 2011ko ekitaldian aplikatu beharreko murrizketak ezarri ziren. Muga horiek birdefinitu egin zituen Estatuko 2011ko Aurrekontu Orokorren abenduaren 22ko 39/2010 Legearen azken xedapenetariko hamabosgarrenak. Zuhurtziaz, gomendagarria da neurri hori 2012an ere ezartzea; halere, eguneratu egin behar dira xedapen horretan aipatutako aurrekontuko likidazioen eta magnitudeen denborazko erreferentziak. Aipatutako erreferentziak, izan ere, Toki‑ogasunak arautzen dituen Legearen testu bateginean sortu ziren –martxoaren 5eko 2/2004 Legegintzako Errege Dekretuak onartua–. Era berean, Toki‑ogasunak arautzen dituen Legearen testu bateginaren 114. artikuluak aipatutako lau urtean behingo berrikuspenari dagokionez –martxoaren 5eko 2/2004 Legegintzako Errege Dekretuak onartu zuen lege hori–, komenigarria da Estatuko 2012ko Aurrekontu Orokorren Legeak xedatu bezala egitea.

Autonomia‑erkidegoei dagokienez, Nahikotasun Globalaren Funtsa aipatzen da. Asmoa da ezen, kredituak kontura egindako entregak ordaintzeko aski ez badira, Errege Lege Dekretuak berak baimena ematea beharrezko kreditu‑transferentziak egin ahal izateko. Era berean, zuzendu egin behar dira 33. atalaren eranskinak aipatzen dituen proiektuak; horietako asko eginda daudenez dagoeneko, Inbertsio Publikoen Batzordean erabakitako inbertsio‑proiektuetara igorri behar dira.

Azkenik, VI. kapituluan, Gizarte Segurantzari, langabeziari, jarduera uzteagatiko babesari, Soldatak Bermatzeko Funtsari eta Lanbide Heziketari egindako kotizazio‑oinarriak eta ‑tasak daude, bai eta 2012ko funtzionarioen eskubide pasiboetarako eta mutualitate orokorretarako kotizazioa ere.

Errege lege‑dekretu honek hainbat xedapen gehigarri, indargabetzaile eta azken xedapen ditu.

Lehenengoei dagokienez, eta garrantzitsuenak bakarrik aipatzearren, hemezortzi urtera arte luzatu da osasun‑erakundeek Gizarte Segurantzarekiko dituzten zorrak ordaintzeko epea, betiere beren titulartasuna herri‑administrazioen edo irabazi‑asmorik gabeko erakundeen esku badago. Espainiako Ondare Historikoari buruzko ekainaren 25eko 16/1985 Legearen bederatzigarren xedapen gehigarriaren 3. paragrafoak Estatuko Aurrekontu Orokorren Legera igortzen duenez, interes kulturaleko obretarako ere jasota daude Estatuaren garantiak. Beharrezkoa da, halaber, mezenasgoko lehentasunezko jarduerak aitortzeko manu bat eranstea, ez baita aski 39/2010 Legean jasotako xedapena luzatzea, zerrenda horri Lorcako Ondare Kulturala Leheneratzeko Plan Zuzentzailean jasotako proiektuekin lotutako emaitzak eta ekarpenak gaineratzen baitzaizkio; hala, Lorcan 2011ko maiatzaren 11n izandako mugimendu sismikoek eragindako kalteak arintzeko neurri osagarriak ezartzen dituen urriaren 31ko 17/2011 Errege Lege Dekretuaren 6. artikuluan jasotako aginduari aurrea hartuz, aldatu egin da maiatzaren 13ko 6/2011 Errege Lege Dekretua, eta Hierro uhartearen gaineko zerga-eta lan-arloko neurriak hartu dira. Horrela, bada, Estatuko 2012ko Aurrekontu Orokorren Legeak mezenasgoko lehentasunezko jardueratzat hartuko ditu aipatutako emaitzak eta ekarpenak 2011. eta 2012. urteetan.

Xede sozialetarako ekarpenak eta Eliza Katolikoaren finantzaketa arautzen dituzten xedapen gehigarriei segurtasun juridiko handiagoa emateko, bai eta horietan jasotako denborazko erreferentziak egokitzeko ere, idazketa berria eman zaie bi xedapenei.

Kendu egin da kopia pribatuagatiko ekitatezko konpentsazioa; horren ordez, Estatuko Aurrekontu Orokorren kontura egingo da ordainketa. Erregelamendu bidez zehaztuko da prozedura.

Oraindik ere iraun egiten dutenez langabeziagatiko babesa agortzen duten pertsonen gaikuntza profesionalerako programa –enpleguko politika aktiboen ekintzak eta laguntza ekonomikoa, alegia– abuztuaren 26ko 10/2011 Errege Lege Dekretuaren bidez luzatzea eragin zuten egoera ekonomiko eta sozialek, berriro ere luzatu egin behar da programa.

Xedapen indargabetzaileei dagokienez, horietako lehenak indargabetu egiten du azaroaren 2ko 1472/2007 Errege Dekretua, gazteek burujabetza lortzeko oinarrizko errenta arautzen duena, lehenengo xedapen gehigarrian adierazitakoari jarraiki; izan ere, egungo austeritate‑egoera eta gastu publikoa eusteko joera aintzat hartuta, beharrezkoa da arauak xedatzen zuen neurri ekonomikoa bertan behera uztea. Hala ere, emantzipazioko oinarrizko errentaren onuradunek, eskubidea aitortuta zeukatenek, berau jasotzen jarraituko dute, indargabeturiko arauan ezarritako baldintzetan eta eskubidea aitortu zien administrazio‑ebazpenean xedatutako moduan. Bigarren xedapen indargabetzailea indargabetze‑arau orokorra da.

Azken xedapenei dagokienez, lehenak Kontseiluaren 2010eko martxoaren 16ko 2010/24/EB Zuzentaraua aipatzen du –zerga, eskubide jakin batzuei eta bestelako neurriei dagozkien kredituak kobratzeko orduan elkarri laguntzeari buruzkoa–, eta hainbat aldaketa garrantzitsu egin ditu elkarlaguntzaren arloan.

Aldaketa horien garrantzia dela‑eta, justifikatuta dago aipatutako zuzentarauaren transposizioa Zergei buruzko abenduaren 17ko 58/2003 Lege Orokorraren bidez egitea; hala, izaera kodetzailea duenez gero, elkarri laguntzeko modua arautzeko beharrezko diren arau guztiak erantsiko zaizkio.

Defizit publikoa murrizteko helburuz, estatuko kuota osoaren karga osagarria ezarri da pertsona fisikoen errentaren gaineko zergan, 2012ko eta 2013ko zerga‑aldietan aplikatu beharrekoa. Horren harira, konturako ordainketetan ere aldaketak egingo dira, eta aldaketok sozietateen gaineko zergara eta ez‑egoiliarren errentaren gaineko zergara ere zabalduko dira, aipatutako zergetan horiei buruz ezarritako tratuari eustearren.

Aldaketa bat egingo zaio, era berean, Sozietateen gaineko Zergaren Legearen testu bateginari, martxoaren 5eko 4/2004 Legegintzako Errege Dekretuak onartutakoari. Aldaketa horren eraginez, 2012ko urtarrilaren 1etik 2013ko abenduaren 31ra, atxikipen‑ehunekoa 100eko 19tik 100eko 21era handitu da.

Berez 2011ko abenduaren 31n bukatu beharreko beste neurri batzuk ere luzatuko dira 2012ko ekitaldira, urtebete gehiagoz luzatzea egokia delakoan; besteak beste, mikroenpresei enplegua mantendu edo sortzeagatik sozietatearen gaineko zergan aplikatu beharreko karga‑tasa murriztua, pertsona fisikoen errentaren gaineko zergan ere dagokion murrizketa eginda –jarduera ekonomikoen errendimendu garbia murriztuz–, aipatutako zergetan langileak komunikazio eta informazioaren teknologia berriak erabiltzen ohitzeko egindako gastu eta inbertsioei emandako zerga‑tratamendua, eta, balio erantsiaren gaineko zergaren arloan, etxebizitzen entrega jakin batzuetan 100eko 4ko tasa murriztua aplikatzea, jarduera ekonomikoaren gainean ondorio onuragarriak izan ditzaketelako.

Produktu energetikoen eta elektrizitatearen zergei buruzko Erkidegoko araubidea berregituratzen duen Kontseiluaren urriaren 27ko 2003/96/EE Zuzentarauaren 18.3 artikuluaren ondorioz, halaber, aldatu egin da zerga bereziei buruzko abenduaren 28ko 38/1992 Legearen 52 bis artikuluaren 6. paragrafoaren a) hizkia. Aipatutako aldaketa 2012ko urtarrilaren 1ean indarrean egon behar denez, errege lege‑dekretu hau tresna egokia da aldaketa egiteko.

Aldatu egin da, halaber, Lurzoruari buruzko Legearen testu bateginaren hirugarren xedapen iragankorraren 2. paragrafoa –ekainaren 20ko 2/2008 Legegintzako Errege Dekretuaren bidez onartu zen testu bategina–, epe iragankorra bost urtera arte luzatzearren, Lurzoruari buruzko maiatzaren 28ko 8/2007 Legean indarrean sartu zenetik; hots, plangintzak garatzeko baldintzak ezarri dituen eremu mugatuetan jasotako lurzoru urbanizagarriko lurren balorazioak Lurzoruaren Araubideari eta Balorazioei buruzko apirilaren 13ko 6/1998 Legean ezarritako arauen arabera egiteko epe iragankorra –maiatzaren 20ko 10/2003 Legean idatzita bezala–. Susperraldi ekonomikoa eta enplegua bultzatzeko neurriei buruzko apirilaren 9ko 6/2010 Errege Lege Dekretuak 2011ko abenduaren 31ra arte luzatu zuen hasierako epea; epe hori agortzear dago, beraz.

Luzatu egin da, baita ere, Estatuko Loteriak eta Apustuak Estatuko Sozietateak, Jokoa arautzeko maiatzaren 27ko 13/2011 Legeak ezarritako betebeharrak bere gain hartuko dituen aldia (2012. urtean, eta Estatuko Aurrekontu Orokorren Legea onartu arte), Estatuko Kirol Apustuen diru‑bilketa eta sariak banatzea arautzen dituen martxoaren 27ko 419/1991 Errege Dekretuarekin lotuta. Horretaz gain, jokoa arautzen duen maiatzaren 27ko 13/2011 Legea ere aldatu egin da. Aldaketa horren bidez, atzeratu egin da Legearen araubide zigortzailea indarrean sartzeko unea, Jokoa Arautzeko Zuzendaritza Nagusiak lizentzia‑eskaerak ebatz ditzan; izan ere, horrela egin ezean, araubidea eskaerak izapidetzen ari direla sartzen bada indarrean, erakunde batzuk kaltetuta gerta litezke.

Gastu erreserbatuetarako kredituen gaineko erabilera eta kontrola arautzen dituen maiatzaren 11ko 11/1995 Legea aldatu egin beharko da, Espainiako Inteligentzia Zentroa Lehendakaritza Ministeriora atxikitzen denean.

Aldatu egin da Estatuko 2011ko Aurrekontu Orokorren abenduaren 22ko 39/2010 Legearen 49. artikulua, Estatuaren abalen zenbatekoei buruzkoa; aldaketaren ondorioz, 196.043.560 mila euroko gehieneko zenbatekoa ezarri da.

Denbora igaro denez abenduaren 22ko 39/1970 Legea egin zenetik, indarreko titulazioei dagokienez, espetxe‑erakundeetako gaur egungo errealitatera egokitu behar dira Espetxe Erakundeetako Teknikarien Goi Mailako Kidegoko langileen ezaugarriak, eginkizunak, sartzeko bideak eta baldintzak.

Azkenik, zerga‑gaien eskumen‑tituluari buruzko eta klase pasiboen arloko aurrekontu‑kredituen kudeaketari buruzko azken xedapenak ere baditu arauak.

Hori betez, Espainiako Konstituzioaren 86. artikuluan aurreikusitako baimenaz baliatuz, Defentsako, Ogasun eta Herri Administrazioko, Barneko, Sustapeneko, Hezkuntza, Kultura eta Kiroleko, Enplegu eta Gizarte Segurantzako, Ekonomia eta Lehiakortasuneko eta Osasun, Gizarte Zerbitzu eta Berdintasuneko ministroek proposatuta, eta 2011ko abenduaren 30eko Ministroen Kontseiluak eztabaidatu ostean,

HAUXE XEDATU DUT:

I. KAPITULUA

Luzatutako aurrekontu‑kredituak

1. artikulua. Administrazio‑egitura berriaren ondoriozko aldaketak.

2012ko urtarrilaren 1etik aurrera, luzatutako kredituetan erantsita geldituko dira kredituen sailkapen organikoa egun horretan indarrean dagoen administrazio‑egiturara egokitzeko beharrezko diren aurrekontu‑ eta egitura‑aldaketak.

II. KAPITULUA

Langile‑gastuak

2. artikulua. Sektore publikoko langileen eta goi‑kargudunen lansariak.

Bat. Artikulu honetan adierazitako xedeetarako, hauek osatzen dute sektore publikoa:

Estatuko Administrazio Orokorrak, bere erakunde autonomoek eta Estatuko agentziek, eta bere eskumeneko unibertsitateek.

Autonomia‑erkidegoetako Administrazioek, horien mendeko organismoek, eta beren eskumeneko unibertsitateek.

Tokiko korporazioek eta horien mendeko erakundeek.

Gizarte Segurantzako erakunde kudeatzaileek eta zerbitzu erkideek.

Estatuko konstituzio‑organoek, Konstituzioaren 72.1 artikuluan xedatutakoari kalte egin gabe.

Merkataritza‑sozietate publikoek.

Enpresa‑erakunde publikoek eta Estatuko, autonomia‑erkidegoetako eta tokiko sektore publikoko gainerako organismo publikoek eta erakundeek.

Bi. 2012an, sektore publikoaren zerbitzupeko langileen lansariek ezin izango dute igoerarik izan 2011ko abenduaren 31n indarrean zeudenen aldean –bi aldi horietarako irizpide berberak hartuta betiere–, hala langile‑kopuruari nola horien antzinatasunari dagokienez.

Ondorioz, 2012ko urtarrilaren 1etik aurrera, ez dute igoerarik izango Estatuko 2011ko Aurrekontu Orokorren abenduaren 22ko 39/2010 Legean ezarritako lansariek eta soldata‑masak.

Hiru. 2012ko ekitaldian, artikulu honen Bat paragrafoan aipatutako administrazioek, erakundeek eta sozietateek ezin izango dute enpleguko pentsio‑planetarako edo aseguru kolektiboen kontratuetarako ekarpenik egin, baldin eta horietan erretiro‑gertakariaren estaldura jasota badago.

Lau. Artikulu honen Bi paragrafoan xedatutakotik kanpo gelditzen dira, hala ere, lanpostuen edukiagatik, programa bakoitzera zuzendutako langile‑kopurua aldatzeagatik edo bertan finkatutako helburuen lortze‑mailagatik ezinbesteko diren salbuespenezko lansari‑egokitzapenak.

Bost. Aurreko paragrafoan aipatutako lansari‑egokitzapenak egiteko, dena den, Ogasun eta Herri Administrazio Ministerioak aldeko txostena egin beharko du Estatuko Administrazio Orokorraren, bere erakunde autonomoen, Estatuko agentzien, beren eskumeneko unibertsitateen eta Estatuko gainerako sektore publikoaren esparruan.

Sei. Nazioko Gobernuaren, bere aholkularitza‑organoen, Estatuko Administrazio Orokorraren goi‑kargudunen eta Estatuko 2011ko Aurrekontu Orokorren abenduaren 22ko 339/2010 Legearen 24. artikuluan araututako gainerako zuzendarien lansariek ezin izango dute igoerarik izan 2011ko abenduaren 31n indarrean zeudenen aldean. 2012ko ekitaldian langile hauentzako produktibitate‑osagarrira zuzendutako kreditu globalak 100eko 10 murriztuko dira, 2011ko ekitaldian xede horretara zuzendutakoen aldean.

Zazpi. Artikulu honetako Bat, Bi, Hiru eta Lau paragrafoek oinarrizko izaera dute, eta Konstituzioaren 149.1.13 eta 156.1 artikuluen babesean eman dira.

3. artikulua. Lan‑eskaintza publikoa edo langile‑beharrak hornitzeko beste kudeaketa‑tresnen bat.

Bat. 2012ko ekitaldian ez da langile berririk sartuko, honako hauek izan ezik: aurreko ekitaldietako lan‑eskaintza publikoen hautaketa‑prozesuetatik edo Estatuko 2011ko Aurrekontu Orokorren abenduaren 22ko 39/2010 Legearen hamargarren xedapen gehigarrian finkatutako kopuruetara iristeko beharrezko soldadutzako eta marineltzako militarren plazetatik datozenak.

Muga horrek badu eraginik Langile Publikoaren Oinarrizko Estatutuaren laugarren xedapen iragankorrean aurreikusitako enplegua finkatzeko prozesuetako plazetan.

Bi. 2012an ez da aldi baterako langilerik kontratutako, ezta aldi baterako estatutupeko langilerik edo bitarteko funtzionariorik izendatuko ere, salbuespenezko kasuetan eta premiazko behar atzeraezinak estaltzeko izan ezik; azken hauek, gainera, lehentasunezko edo funtsezko zerbitzu publikoen funtzionamenduan eragiten duten sektore, eginkizun eta kategorietara mugatuko dira.

Hiru. 2012an ez da baimenduko plaza berri hutsen deialdirik arlo hauetako langileei dagokienez: Estatuko Administrazio Zibila, bere erakunde autonomoak eta Estatuko agentziak, Administrazio Militarra, bere erakunde autonomoak eta Estatuko agentzietako langile zibilak, 55/2003 Legeak onartutako Esparru Estatutua aplikatu beharreko arloko estatutupeko langileak, Justizia Administrazioko eta Estatuko Segurtasun Indar eta Kidegoetako langileak eta Zerga Administrazioko Estatuko Agentzia, Portu eta Portuetako Agintaritzak, Segurtasun Nuklearreko Batzordea, Datuak Babesteko Agentzia, Lehiaren Batzorde Nazionala erakunde publikoetako langileak eta Estatuko Loteriak eta Apustuak enpresa‑erakunde publikokoak.

Salbuespenezko kasuetan eta premiazko behar atzeraezinak daudenean bakarrik kontratatuko dira aldi baterako lan‑kontratudun langileak, eta izendatuko aldi baterako estatutupeko langileak eta bitarteko funtzionarioak; lehentasunezko edo funtsezko zerbitzu publikoen funtzionamenduan eragiten duten sektore, eginkizun eta kategoria profesionaletara mugatuko dira; halaber, Ogasun eta Herri Administrazio Ministerioaren aurretiazko baimen espresua beharrezkoa izango da.

2012an ez da baimenduko enpresa‑erakunde publikoetako eta aurrez aipatu gabeko Estatuko sektore publikoko gainerako organismo publiko eta erakundeetako postu edo plaza hutsen deialdirik, salbuespenezko kasuetan eta premiazko behar atzeraezinak estaltzeko izan ezik; dena den, horretarako, Ogasun eta Herri Administrazio Ministerioaren baimen espresua jaso beharko da aurretiaz.

Lau. 2012an, Estatuko sektore publikoko sailetan, erakunde autonomoetan, estatu‑agentzietan, enpresa‑erakunde publikoetan eta gainerako organismo publiko nahiz erakundeetan gertatzen diren erretiroak adina plaza amortizatuko dira, Ogasun eta Herri Administrazio Ministerioak erabakitako baldintzetan, salbu eta lehentasunezkoak diren edo funtsezko zerbitzu publikoen funtzionamenduan eragiten duten sektore, eginkizun eta kategoria profesionaletan.

Bost. Betiere dagokien gastu‑aurrekontuen I. kapituluaren aurrekontu‑baliabideak aintzat hartuta, aurreko paragrafoetan adierazitako muga ez zaie ondoko sektore eta administrazio hauei aplikatuko, eta 100eko 10eko berritze‑tasa izango dute:

A. Hezkuntzari buruzko maiatzaren 3ko 2/2006 Lege Organikoa garatzeko hezkuntza‑eskumenak dituzten Administrazio publikoei, hezkuntzako funtzionarioen kidegoetan sartzeko plaza‑kopurua ezartzeari dagokionez.

B. Osasun‑eskumenak dauzkaten Administrazio publikoei, Osasun Sistema Nazionaleko ospitaleetako eta osasun‑zentroetako plazei dagokienez. C. Estatuko Segurtasun Indar eta Kidegoei eta beren lurraldean polizia autonomoaren kidegoak dituzten autonomia‑erkidegoei, plaza horiek estaltzeari dagokionez.

D. Indar Armatuei, karrerako militarren eta osagarriko militarren plazei dagokienez, Karrera Militarrari buruzko azaroaren 19ko 39/2007 Legean aurreikusitakoarekin bat etorriz.

E. Administrazio Publikoei, iruzur fiskal eta laboralaren aurka borrokatzeaz eta hori kontrolatzeaz arduratzen diren kidegoei dagokienez.

Sei. Artikulu honetako Bat, Bi eta Bost paragrafoek oinarrizko izaera dute, eta Konstituzioaren 149.1.13 eta 156.1 artikuluen babesean eman dira.

4. artikulua. Langile publikoen lanaldiaren berrantolaketa.

2012ko urtarrilaren 1etik aurrera, Estatuko sektore publiko osoan, ohiko lanaldia ez da, batez beste, astean 37 ordu eta 30 minutu baino gutxiagokoa izango.

Asteko batez besteko horrek ez die kalterik egingo ezarrita dauden edo, hala badagokio, ezarriko diren lanaldi bereziei; azken horietan beharrezko egokitzapenak egingo dira, ohiko lanaldiaren aldaketa orokorrera egokitzeko.

Neurri hori Estatuko Administrazio Orokorraren esparruan eraginkortasunez eta era homogeneoan aplikatzeko, Ogasun eta Herri Administrazio Ministerioak baimena du indarrean dauden lan‑egutegiak egokitzearren beharrezko diren jarraibideak emateko –ordutegia betetzen den jarraitzeko sistemak barne–, betiere, Negoziazio Mahai Nagusiaren barruan negoziatu ondoren.

III. KAPITULUA

Pentsioak eta laguntza publikoak

5. artikulua. Pentsioak eta bestelako prestazio publikoak zehaztu eta igotzeari buruzko arauak.

Estatuko 2012ko Aurrekontu Orokorren Legea onartu artean, 2012an ere indarrean egongo dira IV. tituluaren edukia eta Estatuko 2011ko Aurrekontu Orokorren abenduaren 22ko 39/2010 Legearen baterako xedapen gehigarrien edukia, bai eta garatzeko xedapenena ere; betiere, ondorengo aldaketa eta salbuespen hauek eginda:

1. Gizarte Segurantzako sistemak ordaintzen dituen kontribuziopeko pentsioek, bai eta Estatuko Klase Pasiboenek ere, 100eko 1eko igoera izango dute 2012an, Gizarte Segurantzaren eta Estatuko Klase Pasiboen Lege Orokorren testu bateginen 48. eta 27. artikuluetan, hurrenez hurren, aurreikusitakoarekin bat etorriz; betiere, artikulu honen hurrengo paragrafoetan jasotako salbuespenei eta berezitasunei kalterik egin gabe, eta 3. paragrafoan ageri diren gerrako legeria bereziaren babesean aitortutako pentsioak bermatzeko zenbatekoak errespetatuz.

Ehuneko horretan bertan handituko dira pentsio publikoak, minimoetarako osagarri ekonomikoak aitortzeko sarrerak, eta ardurapeko seme‑alaba bakoitzeko Gizarte Segurantzaren prestazio familiarrak jasotzeko mugen zenbatekoak, baita Estatuko Klase Pasiboen Araubidearen pentsioak eta gerrako pentsio bereziak hasieran zehazteko aplikatu beharreko hartzeko arautzaileen zenbatekoak ere.

Indar Armatuen Gizarte Segurantzako Araubide Bereziaren baliaezintasun handiko prestazio ekonomikoek 100eko 1eko igoera izango dute. Igoera bera izango dute martxoaren 18ko 3/2005 Legearen babesean Gerra Zibilaren ondorioz adingabeak zirenean atzerrira joandako espainiarrei aitortutakoek, bai eta giza immunoeskasiaren birusak (GIB) kutsatutako pertsonen alde aitortutako laguntza sozialen hileko zenbatekoek ere –maiatzaren 28ko 9/1993 Errege Lege Dekretuaren 2.1 artikuluaren b), c) eta d) lerrokadetan ezarrita–.

2. 100eko 1eko igoera ere izango dute, halaber, Gizarte Segurantzako sistemaren eta Klase Pasiboen gutxieneko pentsioek, kontributiboak ez diren pentsioek eta Zahartzaroko eta Elbarritasuneko Derrigorrezko Aseguru iraungiaren pentsioek –aldi berekoak ez badira–, baita hemezortzi urteko edo gehiagoko eta 100eko 65 edo gehiagoko minusbaliotasun‑maila duen seme‑alabagatiko Gizarte Segurantzako prestazioek eta garraio‑gastuetarako mugikortasun‑ eta konpentsazio‑subsidioek ere. Horrela kalkulatuko da pentsio eta prestazio horien zenbatekoa –hain zuzen ere, zenbateko horiei aplikatu behar zaie aipatutako igoera–: 2010eko abenduaren 31n indarrean zegoenari, 2010eko azarotik 2011ko azarora arteko aldiaren kontsumoko prezioen indize (KPI) errealari dagokion 100eko 2,9 gehituta.

3. Ondoko hauek ere, ordaintzen hasteko eguna edozein dela ere, ez dira izango Gizarte Segurantzako sistemaren 65 urtetik gorakoen alarguntasun‑pentsioen gutxieneko zenbatekoa baino txikiagoak: Gerra Zibilaren ondorioz hildakoen senideen aldeko irailaren 18ko 5/1979 Legearen babesean emandako pentsioak, eremu errepublikanoko gudari ohi izandako gerrako elbarriei buruzko ekainaren 26ko 35/1980 Legearen babesean emandako pentsioak –ezinduak ez diren umezurtzen aldeko pentsioak izan ezik–, gerrako elbarri zibilentzako oinarrizko sariari buruzko martxoaren 29ko 6/1982 Legearen barruan emandakoak, eta Gerra Zibilean Errepublikako Indar Armatu eta Ordena Publikokoak eta Karabineroen Kidegokoak izan zirenei eskubideak eta zerbitzuak aitortzeko urriaren 22ko 37/1984 Legearen II. tituluko alarguntasun‑pentsioak.

Halaber, urriaren 22ko 37/1984 Legearen II. tituluaren babesean aitortutako kausatzaileen aldeko pentsioak ere ez dira izango Gizarte Segurantzako sistemako 65 urtetik gorakoen –ardurapeko ezkontidearekin– erretiro‑pentsioen gutxieneko zenbatekoa baino txikiagoak, ordaintzen hasteko eguna edozein dela ere.

4. Ondoko pentsio publiko hauek artikulu honen 1. paragrafoan ezarritako igoeratik kanpo egongo dira:

a) Estatuko 1989ko Aurrekontu Orokorren abenduaren 28ko 37/1988 Legearen 42. artikuluan zerrendatutako edozein araubide edo aurreikuspen‑sistemaren kontura ordaindutako pentsioak, baldin eta horien hileko zenbateko osoa, titularrak jasotako gainerako pentsio publikoen hileko zenbateko osoa batuta, hala badagokio, handiagoa bada errege lege‑dekretu honen I. eranskinean ezarritako pentsio publikoetan gehienez jaso daitekeen hileko zenbatekoa baino.

Aurreko paragrafoan xedatutakoa ez da aplikatuko ekintza terroristek eragindako Estatuko Klase Pasiboen Araubideko eta Gizarte Segurantzako aparteko pentsioetan, ez ekainaren 23ko 6/2006 Errege Lege Dekretuaren babesean aitortutako salbuespenezko pentsioetan, ezta Zerga, Administrazio eta Lan Arloko Neurriei buruzko abenduaren 30eko 62/2003 Legearen berrogeita hirugarren xedapen gehigarriaren bidez aitortutako pentsioetan ere.

b) 1985eko urtarrilaren 1a baino lehen, Estatuko Bidezainen alde aitortutako Klase Pasiboen pentsioak, salbu eta titularrak bidezain gisako pentsio hau bakarrik jasotzen badu.

c) Zahartzaroko eta Elbarritasuneko Derrigorrezko Aseguru iraungiaren pentsioak, beste pentsio publiko batzuekin batera ematen direnean, salbu eta Gizarte Segurantzako sistemaren araubideetakoren baten alarguntasun‑pentsioekin batera ematen badira, edo pentsio hauetako batekin eta, gainera, alarguntzako beste edozein pentsio publikorekin ematen direnean. Xede hauetarako, ez dira aldi bereko pentsiotzat hartuko martxoaren 18ko 3/2005 Legearen babesean aitortutako prestazio ekonomikoa, Espainiako Gerra Zibilaren ondoriozko elbarri baliagarriek edo ezinduek jasotako pentsioa –araudi arautzailea edozein dela ere–, Elbarriak Gizarteratzeko apirilaren 7ko 13/1982 Legean aurreikusitako hirugarren pertsonaren laguntzagatiko subsidioak, eta terrorismo‑ekintzen ondoriozko aparteko pentsioak.

Hala eta guztiz ere, aldi bereko pentsio guztiak eta Zahartzaroko eta Elbarritasuneko Derrigorrezko Aseguruarenak –horien balioa handituta– batu ondoren, aldi bereko aseguru horren pentsioaren zenbatekoa txikiagoa denean 2012an finkatutako zenbatekoa baino, guztietan urteko zenbatekoa kalkulatuta, Zahartzaroko eta Elbarritasuneko Derrigorrezko Aseguruaren pentsioaren balioa aipatutako aldea adina handituko da. Alde hori, dena den, ez da iraunkorra; hortaz, interesdunaren hartzekoetan (dela balio‑handitzeengatik, dela aldizkako prestazio berriak aitortzeagatik) izan litekeen edozein igoerarekin batera desagertuko da.

d) Estatuko Funtzionario Zibilen Mutualitate Orokorraren Funts Berezian sartutako Mutualitateen pentsioak, baldin eta, 2011ko abenduaren 31n, 1973ko abenduaren 31ko zenbatekoetara iritsi badira.

e) Estatuko 2010eko Aurrekontu Orokorren abenduaren 23ko 26/2009 Legearen 45.Hiru artikuluan aipatutako mutualitateen, Montepioen edo gizarte‑aurreikuspeneko erakundeen pentsioak.

5. Estatuko Funtzionario Zibilen Gizarte Segurantzari buruzko Legearen testu bateginaren –ekainaren 23ko 4/2000 Legegintzako Errege Dekretuak onartua– seigarren xedapen gehigarriaren Bat puntuan xedatutakoarekin bat etorriz, Estatuko Funtzionario Zibilen Mutualitate Orokorraren Funts Berezian jasotako pentsioek, baldin eta 2006ko abenduaren 31ren ostean eragin badira, 2012ko urtarrilaren 1ean murrizketa izango dute 2011ko abenduaren 31n jasotako zenbatekoekiko; aipatutako jaitsiera 1978ko abenduaren 31ko zenbatekoaren –edo Erakunde Sindikaleko Funtzionarioen Montepioaren kasuan, 1977ko abenduaren 31koaren– eta 1973ko abenduaren 31koaren arteko aldearen 100eko 20koa izango da.

6. Artikulu honetan xedatutakoa betetzeko orduan, 2012an aplikatu beharreko pentsio eta prestazio publikoen zenbatekoak errege lege‑dekretu honen I. eranskinean jasotakoak izango dira.

6. artikulua. Pentsioen erosahalmena mantentzea.

Bat. Gizarte Segurantzako eta Klase Pasiboetako sistemaren pentsioen minimoen osagarriak jasotzen dituztenek zenbateko hauxe jasoko dute 2012ko apirilaren 1a baino lehen, ordainketa bakarrean: 2011n jasotako pentsioaren eta aipatutako pentsioen gutxieneko zenbatekoei 100eko 2,9 aplikatuz gero –2010eko azarotik 2011ko azarora arteko aldiko KPI errealari dagokiona– jaso beharrekoaren arteko aldeari dagokion zenbatekoa.

Aurreko paragrafoan aurreikusitakoa aplikagarri izango zaie, halaber, ekitaldi horretan Gizarte Segurantzako kotizaziorik gabeko pentsioen hartzaileei, Zahartzaroko eta Elbarritasuneko Derrigorrezko Aseguruko (SOVI) pentsioen hartzaileei –aldi berekoak ez badira–, eta hemezortzi urte edo gehiago eta 100eko 65 desgaitasun‑maila edo handiagoa dituen seme‑alabagatiko Gizarte Segurantzako prestazioak eta garraio‑gastuetarako mugikortasun‑ eta konpentsazio‑subsidioak jasotzen dituztenei.

Bi. Ordainketa egokiak zehazteko, aurreko paragrafoak aipatutako pentsioen eta bestelako prestazio sozial publikoen 2011ko zenbatekoak errege lege‑dekretu honen I. eranskinean finkatutakoak izango dira.

IV. KAPITULUA

Zerga‑arauak

1. atala. Zuzeneko zergak

7. artikulua. Sozietateen gaineko zergaren ordainketa zatikatua.

2012an hasten diren zerga‑aldiei dagokienez, Sozietateen gaineko Zergaren Legearen testu bateginaren –martxoaren 5eko 4/2004 Legegintzako Errege Dekretuak onartua– 45. artikuluaren 4. paragrafoak aipatutako portzentajea 100eko 18 izango da, bere 2. paragrafoan aurreikusitako ordainketa zatikatuaren modalitatean. Paragrafo horretan aipatutako kenkari eta hobarien barruan, subjektu pasiboari aplikatu beharreko guztiak sartuko dira. Sozietateen gaineko Zergaren Legearen testu bateginaren 45. artikuluaren 3. paragrafoan aurreikusitako modalitatean, berriz, gutxiagoz biribildutako karga‑tasa bost zazpirenaz biderkatzean aterako da ehunekoa.

Subjektu pasiboek aurreko paragrafoak aipatutako modalitatea aplikatu beharko dute, baldin eta beren eragiketa‑bolumena, Balio Erantsiaren gaineko Zergaren abenduaren 28ko 37/1992 Legearen 121. artikuluan xedatutakoaren arabera kalkulaturik, 6.010.121,04 euro baino handiagoa izan bada zerga‑aldiak 2012an hasi aurreko hamabi hilabeteetan.

Sozietateen gaineko Zergaren Legearen testu bateginaren 45. artikuluaren 3. paragrafoan aurreikusitako ordainketa zatikatuaren modalitatea aplikatzeko orduan, kontuan hartu beharko da abuztuaren 19ko 9/2011 Errege Lege Dekretuaren 9.Lehena.Bat artikuluan xedatutakoa –aipatutako legea osasun‑sistema nazionalaren kalitatea eta kohesioa hobetzeko, zerga‑finkapena laguntzeko eta 2011rako Estatuko abalen gehieneko zenbatekoa handitzeko neurriei buruzkoa da–.

8. artikulua. Ondasun higiezinen gaineko zergaren karga‑tasak.

1. 2012an eta 2013an hasitako zerga‑aldietan eragina izanik, Tokiko Ogasunak Arautzen dituen Legearen testu bateginaren 72. artikuluan xedatutakoarekin bat etorriz –martxoaren 5eko 2/2004 Legegintzako Errege Dekretuak onartua–, hiriko ondasun higiezinetarako onartutako ondasun higiezinen gaineko zergaren karga‑tasak ehuneko hauetan handituko dira:

a) 100eko 10, 2002. urtea baino lehenago onartutako guztizko balioen txosten baten ondorioz hiriko ondasun higiezinetarako izaera orokorreko balorazio kolektiboa egin duten udalerrietan; horietan, gutxieneko eta ordezko karga‑tasa ez da izango 100eko 0,5 baino txikiagoa 2012an edo 100eko 0,6 baino txikiagoa 2013an.

b) 100eko 6, 2002 eta 2004 bitartean onartutako guztizko balioen txosten baten ondorioz hiriko ondasun higiezinetarako izaera orokorreko balorazio kolektiboa egin duten udalerrietan; horietan, gutxieneko eta ordezko karga‑tasa ez da izango 100eko 0,5 baino txikiagoa.

c) 100eko 4, 2008 eta 2011 bitartean onartutako guztizko balioen txosten baten ondorioz hiriko ondasun higiezinetarako izaera orokorreko balorazio kolektiboa egin duten udalerrietan.

Paragrafo honetan xedatutakoa kasu hauei baino ez da aplikatuko:

–Bizitegi‑erabilerarik ez duten higiezinei, edozer kasutan ere, Tokiko Ogasunak Arautzen dituen Legearen testu bateginaren 72.4 artikuluak aipatutako tasa berezituez kargatutako higiezinak barne.

–2002a baino lehenago onartutako guztizko balioen txostena aplikagarri zaien bizitegi‑erabilerako higiezin guztiei.

–2002an edo geroagoko urte batean onartutako guztizko balioen txostena aplikagarri zaien bizitegi‑erabilerako higiezinei, baldin eta erabilera hori dutenetan katastroko balio handiena dutenen erdian sartzen badira.

Artikulu honetan xedatutakoa ez da aplikatuko 2005 eta 2007 artean onartutako balioen txostenak dituzten udalerrietan; 2013an hasitako zerga‑aldirako ere ez du ondoriorik izango, 2012. urtean guztizko balioen txostena onartzen duten udalerrietan.

2. Udalerri batek 2012 edo 2013rako onartutako tasa txikiagoa bada 2011n indarrean zegoena baino, hori gertatzen den urtean artikulu honetan xedatutakoa aplikatuko da, oinarritzat 2011n indarrean zegoen tasa hartuta.

3. Aplikatu beharreko gehieneko tasa ez da inoiz Tokiko Ogasunak Arautzen dituen Legearen testu bateginaren 72. artikuluan ezarritakoa baino handiagoa izango.

2.atala. Beste zerga batzuk

9. artikulua. Telekomunikazioen arloko tasak.

Bat. Telekomunikazioei buruzko azaroaren 3ko 32/2003 Lege Orokorraren (hemendik aurrera, Telekomunikazioen Lege Orokorra) I. eranskinaren 3. paragrafoan jabari publiko irrati‑elektrikoa erreserbatzeagatik ezarritako tasa, honen arabera kalkulatu behar da:

T = [N x V] / 166,386= [S (km2) x B (kHz) x F (C1, C2, C3,C4, C5)] / 166,386

Non:

T = urteko tasaren zenbatekoa, eurotan.

N = erreserba irrati‑elektrikoko unitate‑kopurua (URR) S x B‑ren emaitza gisa kalkulaturik; hau da, zerbitzu‑eremuaren kilometro koadroko azalera bider kHz‑tan adierazitako banda‑zabalera erreserbatuaz.

V = URR‑ren balioa, C bost koefizienteen arabera zehaztuta; koefiziente horiek Telekomunikazioei buruzko Lege Orokorrean ezarrita daude, eta kuantifikazioa, aipatutako lege horren arabera, Estatuko Aurrekontu Orokorren Legean zehaztuko da.

F (C1, C2, C3, C4, C5) = funtzio hau aurretik adierazitako bost koefizienteen emaitza da.

Estatuko lurralde osoan eragiten duten jabari publiko irrati‑elektrikoaren erreserbetan, tasa kalkulatzeko, kontuan hartu beharreko azaleraren (S) balioa 505.990 kilometro koadrokoa izango da.

Irrati‑komunikazioetako zerbitzuetan, hala badagokio, kontuan hartu beharreko azaleraren barruan (S) Espainiako jurisdikziopeko urak edo Espainiako jurisdikziopeko aire‑esparrua ere jaso ahal izango dira.

Irrati‑komunikazioetako zerbitzu bakoitzean C1 eta C5 bitarteko koefizienteen balioa finkatzeko orduan, kontuan hartu da Telekomunikazioen Lege Orokorrak eta berau garatzen duten erregelamenduek emandako esanahia; hau da:

1. C1 koefizientea: Banda eta eremu geografiko guztien erabilera‑ eta pilaketa‑maila. Kontzeptu hauek baloratzen dira:

Emakida edo baimen bakoitzeko maiztasun‑kopurua.

Hiriko edo landako gunea.

Zerbitzu‑eremua.

2. C2 koefizientea: Zer zerbitzu motarako erabili nahi den eta, zehazki, zerbitzua eskaintzen duenarentzat Telekomunikazioen Lege Orokorraren III. tituluan jasotako zerbitzu publikoko betebeharrak lotuta dituen. Kontzeptu hauek baloratzen dira:

Beste sare batzuetarako euskarria (azpiegitura).

Hirugarrenentzako prestazioa.

Autoprestazioa.

Eskubide esklusiboak dituzten telefonia‑zerbitzuak.

Irrati‑difusioko zerbitzuak.

3. C3 koefizientea: Espektroaren banda edo azpibanda. Kontzeptu hauek baloratzen dira:

Bandaren ezaugarri irrati‑elektrikoak (eskatutako zerbitzurako banda egokia den).

Banda‑erabileraren aurreikuspenak.

Azpibandaren erabilera esklusibo edo partekatua.

4. C4 koefizientea: Erabilitako ekipoak eta teknologia. Kontzeptu hauek baloratzen dira:

Sare konbentzionalak.

Ausaz esleitutako sareak.

Irrati‑loturako modulazioa.

Erradiazio‑diagrama.

5. C5 koefizientea: Erreserbatutako jabari publikoa erabili edo aprobetxatzeak ekarritako balio ekonomikoa. Kontzeptu hauek baloratzen dira:

Esperientzia ez‑komertzialak.

Zerbitzuaren errentagarritasun ekonomikoa.

Bandaren interes soziala.

Merkatuko eskariaren ondoriozko erabilerak.

Biztanleriaren dentsitatea.

Tasa zehazteko orduan eragina duten faktore guztiak kontuan harturik, zerbitzu bakoitzean hainbat modalitate ezarri dira, eta horietako bakoitzari identifikazio‑kode bat eman zaio.

Ondoren, koefizienteak haztatzeko faktoreak datoz adierazita, bai eta erreferentzia‑balioarekiko izan dezaketen balorazio‑marjina ere. Erreferentzia‑balioa lehenetsita hartzen da, eta, zerbitzuaren edo egindako erreserbaren izaeragatik, dagokion koefizientea aplikatzerik ez dagoen kasuetan ezartzen da.

C1 koefizientea: Koefiziente honen bidez, zerbitzu jakin baterako maiztasun‑banden gainean dagoen okupazio‑maila hartzen da kontuan. Horretarako, maiztasun‑marjinetako tabulazioa egin da; beheko eta goiko muturretan, zerbitzuetan erabili ohi diren bandak daude jasota. Koefiziente horrek erabili beharreko eremu geografikoa ere jasotzen du; oro har, interes eta erabilera handiko eremuak (hirigune handiak) eta interes nahiz erabilera txikiko eremuak (landaguneak, adibidez) bereizten ditu. Hasteko, pilaketa txikieneko eta erabilera eskaseko eremu geografikoetarako erreferentzia‑ edo unitate‑balio bat finkatzen da, eta kontzeptu hauengatik kostu erlatiboa gehienez bira igotzen da, gehien eskatutako maiztasun‑bandetan eta interes edo erabilera handiko eremuetan.

Jabari publiko irrati‑elektrikoa erreserbatzeagatiko tasaren kalkulua.

Zerbitzu irrati‑elektrikoak eta kontuan hartutako modalitateak.

Ondoko talde edo sailkapen hauek jaso dira:

1. Zerbitzu mugikorrak.

1.1 Lurreko zerbitzu mugikorra eta lotutako zerbitzuak.

1.2 Hedapen nazionaleko lurreko zerbitzu mugikorra.

1.3 Komunikazio elektronikoen zerbitzuak (hirugarrenentzako prestazioa).

1.4 Itsasoko zerbitzu mugikorra.

1.5 Zerbitzu mugikor aeronautikoa.

1.6 Satelite bidezko zerbitzu mugikorra.

1.7 Banda zabaleko lurreko komunikazio mugikorren sistemak.

1.8 Trenbide bidezko komunikazioen Europako sistema (GSM‑R).

2. Zerbitzu finkoa.

2.1 Puntutik punturako zerbitzu finkoa.

2.2 Puntutik puntu anitzerako zerbitzu finkoa.

2.3 Satelite bidezko zerbitzu finkoa.

3. Irrati‑difusioko zerbitzua.

3.1 Soinudun irrati‑difusioa.

3.2 Telebista.

3.3 Irrati‑difusioaren zerbitzu osagarriak.

4. Bestelako zerbitzuak.

4.1 Irrati‑nabigazioa.

4.2 Irrati‑determinazioa.

4.3 Irrati‑lokalizazioa.

4.4 Satelite bidezko zerbitzuak: ikerketa espaziala, eragiketa espazialak, eta abar.

4.5 Aurreko paragrafoetan jaso gabeko zerbitzuak.

Kontuan hartuz gero zerbitzu irrati‑elektrikoen talde hauek, zerbitzua eskaintzeko maiztasun‑bandak eta bost koefizienteak –zerbitzu jakin bateko jabari publiko irrati‑elektrikoaren erreserben tasa kalkulatzeko aintzat hartu beharreko kontzeptuak edo faktoreak barne–, jarraian adierazitako modalitateak lortuko lirateke.

1. Zerbitzu mugikorrak.

1.1 Lurreko zerbitzu mugikorra eta lotutako zerbitzuak.

Sailkapen honen barruan, lurreko zerbitzu mugikorraren sareetarako jabari publiko irrati‑elektrikoaren erreserbak eta bestelako modalitate batzuk daude jasota; hala nola portuetako eta itsasontziak mugitzeko eragiketak, eta kanal bakarreko banda estuko loturak.

Telekomunikazioetako Lege Orokorraren I. eranskinaren 3.1 paragrafoan ezarritako bost koefizienteetan oinarrituta, hainbat modalitate bereizi behar dira lurreko zerbitzu mugikorraren sarean, eta bereiz ebaluatu behar dira erreserba jakin baten tasa finkatzeko irizpideak.

Modalitate bakoitzean, tasa kalkulatzeko bereizi beharreko maiztasun‑marjinak tabulatu dira, maiztasun‑banda guztien okupazioa eta Telekomunikazioen Lege Orokorrean jasotako beste alderdi batzuk kontuan hartzeko (zerbitzu horretarako maiztasun‑banda jakin bat egokia den, adibidez).

Maiztasun‑marjina horien barruan, Frekuentziak Esleitzeko Koadro Nazionalak (CNAF) aztertutako zerbitzuari erreserbatutako maiztasun‑bandetan baino ez da gertatuko jabari publiko irrati‑elektrikoaren erreserba.

Tasa kalkulatzeko orduan, zerbitzu mugikorraren sareei dagokienez, erabilera handiko eremu geografikoaren modalitatea erabiltzen da oro har, betiere sare‑estaldurak 50.000 biztanle baino gehiagoko udalerriak –osotasunean edo partzialki– barne hartzen baditu. Hainbat bandetako maiztasunak dituzten sareetan, bestalde, bakoitzari modu independentean aplikatuko zaio eremu geografikoaren kontzeptua.

1.1.9 paragrafoan ezarritakoari kalterik egin gabe, epigrafe honen barruan jasotako modalitateetarako, kontuan hartu beharreko B banda‑zabalera kanalizazioaren balioa (12,5 kHz edo 25 kHz) erabilitako maiztasun‑kopuruaz biderkatzean lortzen da.

1.1.1 Zerbitzu mugikorra, esleipen finkoa/maiztasun partekatua/erabilera txikiko eremua/autoprestazioa.