మూకుమ్మడిగా ‘మాటే’శారు!

అవినీతిలో దేశానికే ఆదర్శప్రాయుడని ‘తెహల్కా’ పత్రిక వేనోళ్ల తెగడినా.. దేశంలో అసలైన ‘నల్ల’దొంగ.. అలీబాబా.. చంద్రబాబే అని హసన్ అలీ స్వయంగా చెప్పినా.. నవ్విపోదురుగాక నాకేమి సిగ్గన్న రీతిలో చంద్రబాబు మహానేత వైఎస్‌పై అక్కసు వెళ్లగక్కడం ద్వారా మరోసారి ఆకాశంపై ఉమ్మేయడానికి ప్రయత్నించారు. తాను గతంలో బీజేపీని భుజాన వేసుకున్న విషయాన్ని మరిచి.. జగన్‌కు బీజేపీతో లేని బంధాన్ని ముడేయడానికి శతథా యత్నించారు. బాబుగారొస్తే.. ఉచిత కరెంటు 9 గంటలిచ్చేస్తారట..! నారావారి నీరో పాలనలో విద్యుత్ చార్జీలు తగ్గించమన్నందుకే తూటాలతో అమాయకుల గుండెలు చీల్చిన దారుణాన్ని.. ఉచిత కరెంటు ఇస్తే.. తీగలపై బట్టలారేసుకోవాల్సిందే అంటూ ఎకసెక్కాలు ఆడిన గతాన్ని మరిచిపోయారీ గజినీ సారు!

చిరంజీవికి గత ఎన్నికల్లో రాష్ట్ర ప్రజలంతా కలిసి చాచి పెట్టి కొట్టిన చెంప దెబ్బ గుర్తొచ్చిందో ఏమో.. కడప ప్రజలు జగన్‌కు చెంపదెబ్బ కొట్టబోతున్నారంటూ డైలాగులు కొట్టారు. రాజకీయాల్లో జీరోనని సొంతపార్టీ వాళ్లతో కూడా అనిపించేసుకున్నాక.. అమ్ముకోడానికి ఇంకేమీ లేక.. అధికారం కోసం ఆత్మగౌరవాన్ని మేడం పాదాల వద్ద తాకట్టు పెట్టిన చిరుకు.. జగన్ నినదిస్తున్న ఆత్మగౌరవం విలువ ఏమిటో తెలియకపోవడం పెద్ద వింతేమీ కాదు. అందుకే తనకు మాత్రమే సొంతమైన అహంకారాన్ని యువనేతకు అంటగట్టే ప్రయత్నం చేశారు. ఏ నోటితో కాంగ్రెస్ తిట్టారో.. అదే నోటితో తెగ పొగిడేశారు. ఉండవల్లి హిందుస్థాన్ టైమ్స్‌లో రిపోర్టర్ సొంత వ్యాఖ్యానాన్నే ప్రధానంగా తీసుకుని.. జగన్ కాంగ్రెస్‌ను ఎందుకు వీడారంటూ ప్రశ్నలు గుప్పించేశారు. ఈ ఇంటర్వ్యూలో జాతీయ రాజకీయాల గురించి జగన్ మాట్లాడుతూ.. కాంగ్రెస్, బీజేపీకి ప్రత్యామ్నాయ వేదికను ఏర్పాటు చేయడానికి తాను కృషి చేస్తానని చెప్పిన మాటలను ఉద్దేశపూర్వకంగానే విస్మరించారు. ఇంటర్వ్యూలో భాగంగా విలేకరి అడిగిన మరో ప్రశ్నకు జవాబుగా.. బీజేపీని అధికారానికి దూరంగా ఉంచేందుకు ఏ పార్టీకైనా మద్దతు ఇస్తామని జగన్ చెప్పారు. తనకు ఎంపీల బలముండి.. ఒకవేళ ఎవరికైనా మద్దతివ్వాల్సిన పక్షంలో ముఖ్యమైన శాఖలు తమిళనాడు, బెంగాల్ లాంటి రాష్ట్రాలు తన్నుకుపోకుండా.. రాష్ట్రానికి ప్రయోజనం చేకూరేలా కీలక శాఖలను అడిగి తీసుకుంటానని చెప్పారు. దీనికి సదరు రిపోర్టర్ జగన్ సోనియాకు మద్దతివ్వడానికి సిద్ధమేనంటూ సొంత కామెంట్రీ జోడించగా.. దీన్ని పట్టుకుని ఉండవల్లి యువనేతపై విరుచుకుపడటం గమనార్హం. ఇక ఏ రోజున ఏ పార్టీలో ఉంటారో తెలియని జీవిత, రాజశేఖర్ గురించి మాట్లాడుకోవడమే దండగ. విజయవాడ దీక్షలో రాజశేఖర్ ప్రజాదరణ చూసి జగన్ ఓర్వలేకపోయారట!! ఆ మాట అన్నప్పుడు అక్కడే ఉన్న విలేకరులు సైతం నవ్వుతారేమో అన్న ఆలోచనే లేకుండా ఏదేదో అనేశారు. వీహెచ్ స్థాయి గల్లీకి ఎక్కువ.. ఢిల్లీకి తక్కువ. ఆయన దయాదాక్షిణ్యాల వల్లే వైఎస్ పీసీసీ అధ్యక్షుడయ్యారట..! మైనార్టీలకు మంచి చేసిన మహానేతను తిడుతూ.. ముస్లింలకు రిజర్వేషన్లు అసాధ్యమని తేల్చేయడం ద్వారా మైనార్టీలపై కాంగ్రెస్‌కున్న ప్రేమను మహదర్జాగా చాటారు.