Скорб Ян

Ян Скорб (1910-1988)

Адзін з камандзіраў Арміі Краёвай на Шчучыншчыне.

Нарадзіўся 06.12.1910 у Рынкаўцах (зараз – Шчучынскі раён).

Пасля заканчэння школы ў Новым Двары працягваў навучанне ў Шчучынскай настаўніцкай семінарыі.

У 1934 годзе скончыў школу падхарунжых рэзерву ў Грудзёндзу. Служыў у 23-ім палку Гродзенскіх уланаў у Паставах.

У 1935-1939 гадах працаваў школьным настаўнікам у Новым Двары і Дудках.

Актыўны ўдзельнік вераснёвай кампаніі 1939 года. Трапіў у савецкі палон, але здолеў збегчы. Вярнуўся ў родныя мясціны. Камандаваў 30-асабовым партызанскім атрадам, які да лета 1940 года дзейнічаў у Гродзенскай пушчы і лясах Шчучыншчыны.

З прыходам гітлераўцаў уладкаваўся на працу сакратаром нямецкай жандармерыі ў Васілішках, дзе вёў падпольную дзейнасць. Пад пагрозай выкрыцця быў вымушаны сыйсці ў лес. У 1942 годзе арганізаваў першы на Шчучыншчыне польскі партызанскі атрад.

У 1943 годзе стаў ад’ютантам каменданта Навагрудскій акругі Арміі Краёвай. З восені 1944 па красавік 1945 года быў выконваючым абавязкі каменданта акругі. Вясной 1945 года па фальшывых дакументах выехаў у Польшчу. Пасяліўся на Памор’і ў горадзе Лемборку.

Узнагароджаны ордэнам Virtuti Militari 5 ступені, Крыжам Валечных, Срэбным Крыжам Заслугі, Крыжам Арміі Краёвай, Крыжам Партызанскім.

Памёр 02.12.1988. 

Артыкул у Вікіпедыі