Валейка Вінцэнт

Вінцэнт Валейка (1883-1940)

Беларускі грамадска-палітычны дзеяч, педагог.

Нарадзіўся 23.01.1883 у вёсцы Галавічполе (зараз – Шчучынскі раён).

У 1903 годзе скончыў Трэцюю рэальную гімназію ў Пецярбургу, а потым стаў студэнтам сталічнага Горнага інстытута.

Разам з Вацлавам Іваноўскім падрыхтаваў да друку першы нумар газеты «Свабода». Быў адным з сямёх сяброў-заснавальнікаў беларускай выдавецкай суполкі «Загляне сонца і ў наша аконца».

Пасля заканчэння інстытута выехаў з Пецярбургу і з 15.11.1910 пачаў працаваць горным інжынерам Шчарбінаўскай шахты на Данбасе.

З 1921 года жыў у Дамброве Гурнэй у Польшчы, спачатку працаваў інжынерам у шахтах, а потым дырэктарам Дзяржаўнай горна-металургічнай школы імя Станіслава Сташыца.

У маі 1940 года быў арыштаваны гестапа і скіраваны ў канцлагер.

Загінуў 18.10.1940 у канцлагеры Заксенхаўзен (па іншых сведчаннях – у лагеры Дахау).