Урбановіч Міхаіл

Міхаіл Язэпавіч Урбановіч (1890-1973)

Каталіцкі святар заходняга абраду, магістар тэалогіі, манах-марыянін, місіянер, удзельнік беларускага хрысціянскага руху ХХ ст., душпастыр, педагог

Нарадзіўся 30.10.1890 у Астрыне (паводле іншых крыніц – у мясцовасці Масеўня) Гродзенскай губерні. 

Пачатковую адукацыю атрымаў дома. З 1897 года жыў у Варшаве, дзе вучыўся ў школе. Прадоўжыў вучобу ў гімназіі. Пасля яе заканчэння вырашыў прысвяціць сваё жыццё святарскай дзейнасці. 

З восені 1910 года – клерык Варшаўскай духоўнай каталіцкай семінарыі. Пасвячоны ў святары 24.01.1915. Душпастырскую дзейнасць распачаў на пасадзе вікарыя. На пачатку 20-х гадоў служыў у Віленскай дыяцэзіі. З 1922 года – у ордэне айцоў марыянаў. Пасля навіцыята прыняў манаства. 

У 1924 годзе выехаў ў ЗША. Працаваў на пасадзе прафесара ў духоўнай семінарыі каля Чыкага, вучыўся ва ўніверсітэце Лаёлы. 

У 2-й палове 1920-х гадоў пазнаёміўся з беларускім святаром Янкам Тарасевічам. Служыў вікарыем у касцёле Маці Божай Вострабрамскай у Чыкага. У 1935-1940 гадах працаваў таксама на пасадзе пробашча. Ведаючы літоўскую мову, выконваў святарскія абавязкі ў каталіцкіх парафіях і асяродках літоўскіх эмігрантаў у ЗША. У 1944-1950 гадах зноў вучыўся ва ўніверсітэце Лаёлы, дзе атрымаў ступень магістра псіхалогіі. Супрацоўнічаў з беларускімі рэлігійнымі выданнямі («Божым шляхам», Лондан; «Znic», Рым і інш.). 

Апошнія гады жыцця правёў у доме-прытулку у Чыкага. 

Памёр 4 жніўня 1973 года. Пахаваны на могілках св.Казіміра ў Чыкага.